Appoġġ Finanzjarju għall-Ġestjoni tal-Fruntieri u l-Politika dwar il-Viżi

PUNTI EWLENIN

Il-BMVI għandu l-għan li:

• jiżgura l-ġestjoni integrata b’saħħitha u effettiva tal-fruntieri esterni tal-Ewropa;
• jikkontribwixxi għal livell għoli ta’ sigurtà interna;
• jissalvagwardja l-moviment liberu tan-nies fl-UE;
• jirrispetta l-liġi u l-obbligi internazzjonali tal-UE.

Żewġ għanijiet speċifiċi — Anness II jistabbilixxi l-miżuri li għandhom jintużaw — għandhom jappoġġaw:

• il-Gwardja Ewropea tal-Fruntiera u tal-Kosta (ara s-sommarju) bħala responsabilità kondiviża tal-Aġenzija Ewropea għall-Gwardja tal-Fruntiera u tal-Kosta u awtoritajiet nazzjonali biex jiffaċilitaw qsim tal-fruntieri leġittimi, jżommu u jiskopru l-immigrazzjoni illegali u reati transkonfinali u jimmaniġġjaw flussi migratorji b’mod effettiv (Anness III fih l-ambitu tal-ispejjeż li jistgħu jiġu ffinanzjati);
• il-politika komuni dwar il-viżi u approċċ armonizzat dwar il-ħruġ ta viżi għall-faċilitazzjoni ta’ vvjaġġar leġittimitu u biex tgħin tevita riskji migratorji u tas-sigurtà.

L-attivitajiet tal-BMVI:

• jiffokaw primarjament fuq oqsma bħall-infrastruttura transkonfinali, tagħmir operattiv, taħriġ, l-iskjerament ta’ uffiċjali ta’ kollegament tal-immigrzzjoni, studji pilota u skambji tal-aħjar prattika (Anness III jistabbilixxi dawn fid-dettall);
• jistgħu jiġu estiżi mill-Kummissjoni Ewropea biex tindirizza ċirkostanzi mhux mistennija jew ġodda;
• jikkomplementaw miżuri nazzjonali, reġjonali u lokali li jibbenefikaw lill-UE.

Meta jaħdmu ma’ pajjiżi mhux tal-UE, il-Kummissjoni, l-Istati Membri tal-UE u s-Servizz Ewropew għall-Azzjoni Esterna, għandhom:

• jiżguraw li l-attivitajiet huma koerenti mal-politika esterna u interna tal-UE;
• jiffukaw fuq miżuri li mhumiex orjentati lejn l-iżvilupp.

Il-baġit ta’ 7 snin jammonta għal EUR 5.241 biljun, flimkien ma’ EUR 1.141 biljun addizzjonali. Dan jintuża kif ġej:

• EUR 3.668 biljun huma allokati għal programmi nazzjonali, li minnhom EUR 200 568 000 huma allokati għal skema ta’ tranżitu speċjali għal-Litwanja;
• EUR 1.573 biljun huma allokati għal azzjonijiet speċifiċi, azzjonijiet tal-UE u assistenza ta’ emerġenza (magħrufa bħala l-“faċilità tematika”), primarjament biex tappoġġa l-politiki interni tal-UE;
• perċentwal żgħir (sa 0.52 %) huwa allokat għall-asistenza teknika, skont id-diskrezzjoni tal-Kummissjoni;
• minimu ta’ 10 % tal-programmi nazzjonali għandhom jiġu allokati għall-politika dwar il-viżi.

Anness I jistabbilixxi kif il-baġit, li jippermetti xi finanzjament minn qabel, huwa distribwit bejn programmi nazzjonali:

• kull Stat Membru jirċievi ammont fiss bażiku ta’ EUR 8 miljuni, għajr għal Ċipru, Malta u l-Greċja (EUR 28 miljun kull wieħed);
• il-bqija jinqasam bejn
  • fruntieri esterni tal-art (30 %)
  • fruntieri esterni tal-baħar (35 %)
  • ajruporti (20 %)
  • uffiċċji konsulari (15 %);
• il-kontribuzzjoni tal-UE normalment hija limitata għal 75 % tal-ispiża totali ta’ proġett. Din tista’ tiżdied sa 90 % f’ċerti każi (stabbiliti f’Anness IV), bħax-xiri ta’ tagħmir operattiv għall-Aġenzija Ewropea għall-Gwardja tal-Fruntiera u tal-Kosta, u anke sa 100 % għal xi azzjonijiet elenkati taħt l-Artikolu 12, bħall-assistenza ta’ emerġenza.

L-Istati Membri:

• jiżguraw li l-prijoritajiet tal-programmi tagħhom huma konsistenti mal-ġestjoni tal-fruntieri u l-politika dwar il-viżi, il-liġi u l-obbligi internazzjonali tal-UE;
• jikkonsulaw mal-Kummissjoni qabel jużaw il-BMVI għal proġett ma’ jew f’pajjiż mhux tal-UE;
• jistgħu jużaw sa 33 % tal-allokazzjoni tal-finanzjament tagħhom għall-awtoritajiet pubbliċi li qed iwettqu diversi kompiti u servizzi fl-interess tal-UE (appoġġ operattiv);
• jissottomettu rapporti tal-prestazzjoni annwali lill-Kummissjoni mill-15 ta’ Frar 2023 sal-15 ta’ Frar 2031.

L-entitajiet legali li ġejjin huma eliġibbli għal finanzjament tal-UE:

• dawk stabbiliti fi Stat Membru, jew f’pajjiż jew territorju barrani, jew f’pajjiż mhux tal-UE elenkat fil-programm ta’ ħidma;
• dawk maħluqa taħt il-liġi tal-UE, jew xi organizzazzjoni internazzjonali rilevanti.

Informazzjoni, komunikazzjoni u obbligi ta’ pubbliċità jeħtieġu:

• ir-riċevituri ta’ finanzjament tal-UE jirrikonoxxu l-oriġini tal-finanzjament u jiżguraw il-viżibilità tiegħu;
• il-Kummissjoni biex
  • twettaq attivitajiet ta’ informazzjoni u komunikazzjoni
  • tippubblika l-programmi ta’ ħidma tal-faċilità tematika.

Il-Kummissjoni:

• tikoopera ma’ msieħba pubbliċi u privati, inkluż is-soċjetà ċivili u organizzazzjonijiet mhux governattivi, meta tuża l-faċilità tematika biex tipprovdi finanzjament dirett permezz ta’ għotjiet jew kuntratti pubbliċi;
• tippreżenta informazzjoni lill-Parlament Ewropew u lill-Kunsill dwar indikaturi tal-prestazzjoni ewlenin dwar il-fruntieri u l-viżi (stabbiliti f’Anness V);
• twettaq valutazzjoni ta’ nofs it-terminu tar-regolament sal-31 ta’ Diċembru 2024;
• tagħmel sommarji tar-rapporti tal-prestazzjoni annwali li tirċievi mill-Istati Membri disponibbli pubblikament bil-lingwi uffiċjali kollha tal-UE.