Fond għas-Sigurtà Interna (2021–2027)

PUNTI EWLENIN

Il-Fond għas-Sigurtà Interna (FSI) 2021–2027 hu wieħed minn bosta fondi stabbiliti mill-UE fiż-żona ta’ libertà, ġustizzja u sigurtà. Fondi oħra jinkludu:

• il-Fond għall-Ażil, Migrazzjoni u Integrazzjoni (ara sommarju) stabbilit mir-Regolament (UE)2021/1147;
• l-istrument għall-Appoġġ Finanzjarju għall-Ġestjoni tal-Fruntieri u l-Politika dwar il-Viżi (ara sommarju), stabbilit mir-Regolament (UE) 2021/1148 bħala parti mill-Fond għall-Ġestjoni integrata tal-Fruntieri.

L-FSI hu regolat mir-Regolament tad-Dispożizzjonijiet Komuni (Regolament (UE) 2021/1060 — ara sommarju)

Għanijiet

L-FSI għandu tliet għanijiet speċifiċi:

• li jtejjeb u jiffaċilita l-iskambju ta’ informazzjoni bejn u fi ħdan l-awtoritajiet kompetenti u l-korpi, l-organi u l-agenziji rilevanti tal-UE u, fejn rilevanti, ma’ pajjiżi mhux tal-UE u organizzazzjoni internazzjonali;
• li jtejjeb u jintensifika l-kooperazzjoni transfruntiera, inklużi operazzjonijiet konġunti bejn awtoritajiet kompetenti b’rabta mat-terroriżmu u l-kriminalità serja u organizzata b’dimensjoni transfruntiera; u
• li jappoġġa t-tisħiħ tal-kapaċitajiet tal-Istati Membri tal-UE fir-rigward tal-prevenzjoni u l-ġlieda kontra l-kriminalità, it-terroriżmu u r-radikalizzazzjoni kif ukoll il-ġestjoni ta’ inċidenti, riskji u kriżijiet relatati mas-sigurtà.

Il-baġit u l-allokazzjoni tal-fondi

• L-FSI għandu baġit ta’ €1.931 biljun għall-perjodu mill-1 ta’ Jannar 2021 sal-31 ta’ Diċembru 2027, it-tul tal-qafas finanzjarju pluriennali. Din is-somma hi allokata kif ġej:
  • €1.352 biljun għal programmi tal-Istati Membri;
  • €579 miljun għall- “faċilità tematika” — biex jintużaw għal azzjonijiet speċifiċi, azzjonijiet ta’ ġestjoni diretta fil-livell tal-UE u assistenza ta’ emerġenza.
• Stat Membru jrid jissottometti talbiet għal ħlas li jkopru tal-inqas 10 % tal-allokazzjoni tal-programm inizjali tiegħu biex ikun eliġibbli għal allokazzjoni addizzjonali taħt il-programm tiegħu fir-rieżami ta’ nofs it-terminu fl-2024.
• Stati Membri jridu jallokaw tal-inqas 10 % tar-riżorsi tal-programm tagħhom għall-għanijiet speċifiċi relatati mal-iskambju ta’ informazzjoni u kooperazzjoni transfruntiera.

Azzjonijiet

L-FSI ikopri firxa wiesgħa ta’ azzjonijiet, inklużi:

• it-twaqqif, l-addattament u ż-żamma tas-sistemi ICT u t-taħriġ u ttestjar assoċjat kif ukoll it-titjib tal-interoperabbilità u l-kwalità tad-data;
• il-monitoraġġ tal-implimentazzjoni tad-dritt tal-Unjoni u l-għanijiet ta’ politika fl-Istati Membri fil-qasam tas-sigurtà tas-sistemi tal-informazzjoni;
• l-implimentazzjoni tal-operazzjonijiet jew l-iffaċilitar tal-implimentazzjoni taċ-ċiklu ta’ politika tal-UE— Pjattaforma Multidixxiplinarja Ewropea Kontra Theddid Kriminali (Empact);
• l-edukazzjoni u t-taħriġ tal-awtoritajiet rilevanti tal-infurzar tal-liġi u ġudizzjariji u aġenziji amminstrattivi.

Azzjonijiet limitati għaż-żamma tal-ordni pubblika fuq il-livell nazzjonali u azzjonijiet għal skopijiet militari jew ta’ difiża mhumiex eliġibbli.

Xiri ta’ tagħmir u sostenn operazzjonali

Ir-regolament jistabbilixxi ċerti limiti rigward l-użu tal-allokazzjoni tal-Istati Membri:

• sa 35 % jistgħu jintużaw għax-xiri ta’ tagħmir jew mezzi tat-trasport jew biex jiffinanzjaw il-kostruzzjoni ta’ faċilitajiet li għandhom x’jaqsmu mas-sigurtà;
• sa 20 % jistgħu jintużaw biex jappoġġjaw awtoritajiet pubbliċi li jwettqu kompiti u servizzi biex jipprovdu servizz pubbliku lil UE.