Penali kriminali għall-falsifikazzjoni tal-flus

PUNTI EWLENIN

Id-direttiva tapplika għall-protezzjoni tal-munita kollha awtorizzati legalment, inklużi l-karti tal-flus u l-muniti tal-euro, u tissostitwixxi d-Deċiżjoni Qafas tal-Kunsill 2000/383/ĠAI għall-Istati Membri tal-Unjoni Ewropea (UE) marbuta biha.

Reati

L-Istati Membri jridu jiżguraw li l-aġir li ġej ikun punibbli bħala reat kriminali meta jitwettaq intenzjonalment:

• kwalunkwe manifattura jew modifka frawdolenti tal-munita, bi kwalunkwe mezz;
• iċ-ċirkolazzjoni frawdolenti ta’ munita ffalsifikata;
• l-importazzjoni, l-esportazzjoni, it-trasport, ir-riċeviment jew l-akkwist ta’ munita ffalsifikata bil-ħsieb li titqiegħed fiċ-ċirkolazzjoni u bl-għarfien li hija ffalsifikata;
• il-manifattura, ir-riċeviment, il-kisba jew il-pussess frawdolenti ta’ strumenti u komponenti ta’ falsifikazzjoni, inklużi iżda mhux limitati għal:
  • strumenti, oġġetti, programmi tal-kompjuter u data adattati għall-falsifikazzjoni jew għall-modifika tal-munita,
  • karatteristiċi ta’ sigurtà, bħal ologrammi, marki tal-ilma jew komponenti oħra tal-munita li jservu ta’ protezzjoni mill-falsifikazzjoni.

Dawn ir-reati japplikaw ukoll għal karti tal-flus jew muniti manifatturati permezz tal-użu ta’ faċilitajiet legali jew materjali, bi ksur tad-drittijiet jew tal-kundizzjonijiet li skonthom l-awtoritajiet kompetenti jistgħu joħorġu tali karti tal-flus jew muniti. Dawn japplikaw ukoll għal karti tal-flus u muniti li għadhom ma nħarġux s’issa iżda li huma magħżula għaċ-ċirkolazzjoni bħala valuta legali.

L-inċitament, l-għoti ta’ għajnuna u l-kompliċità, u t-tentattiv

L-Istati Membri jridu jiżguraw ukoll li l-imġiba li ġejja tkun punibbli bħala reat kriminali:

• l-inċitament għal kwalunkwe wieħed mir-reati elenkati hawn fuq, jew l-għoti ta’ għajnuna jew kompliċità fit-twettiq tagħhom;
• it-tentattiv li jitwettqu r-reati ta’ manifattura jew alterazzjoni frawdolenti tal-munita, flimkien maċ-ċirkolazzjoni, l-importazzjoni, l-esportazzjoni, it-trasport, ir-riċeviment jew il-kisba ta’ munita ffalsifikata.

Sanzjonijiet għall-persuni fiżiċi

Ir-reati kollha ta’ falsifikazzjoni jridu jkunu punibbli b’sanzjonijiet kriminali effettivi, proporzjonati u dissważivi. Id-direttiva tistabbilixxi l-livelli minimi ta’ sanzjonijiet li ġejjin:

• ir-reati relatati ma’ strumenti ta’ falsifikazzjoni huma punibbli b’sanzjoni massima li tipprevedi priġunerija;
• il-manifattura jew il-modifika frawdolenti tal-munita hija punibbli b’terminu massimu ta’ priġunerija ta’ mill-inqas 8 snin;
• iċ-ċirkolazzjoni, il-kisba u t-traffikar ta’ munita ffalsifikata huma punibbli b’terminu massimu ta’ priġunerija ta’ mill-inqas 5 snin;
• meta xi ħadd jgħaddi b’mod konxju munita ffalsifikata riċevuta bona fide, l-Istati Membri jistgħu jipprevedu sanzjonijiet effettivi, inklużi multi u priġunerija.

Responsabbilità tal-persuni ġuridiċi u sanzjonijiet għalihom

Il-persuni ġuridiċi jistgħu jinżammu responsabbli għal reati ta’ falsifikazzjoni mwettqa għall-benefiċċju tagħhom, u jiffaċċjaw firxa ta’ sanzjonijiet kriminali jew mhux kriminali. B’mod partikolari:

• il-persuni ġuridiċi huma responsabbli meta r-reat jitwettaq minn persuna li jkollha pożizzjoni ta’ tmexxija (setgħa ta’ rappreżentanza, awtorità tat-teħid tad-deċiżjonijiet jew kontroll);
• huma wkoll responsabbli meta nuqqas ta’ superviżjoni jew kontroll minn tali persuna jkun għamel ir-reat possibbli;
• ir-responsabbiltà ta’ persuni ġuridiċi ma teskludix proċedimenti kriminali kontra l-persuni fiżiċi involuti;
• is-sanzjonijiet jinkludu multi kriminali jew mhux kriminali u jistgħu jinkludu wkoll:
  • esklużjoni mid-dritt għal benefiċċji jew għajnuna pubblika,
  • skwalifika temporanja jew permanenti minn attivitajiet kummerċjali,
  • it-tqegħid taħt superviżjoni ġudizzjarja,
  • stralċ ġudizzjarju,
  • l-għeluq temporanju jew permanenti tal-istabbilimenti użati għat-twettiq tar-reat.

Ġuriżdizzjoni

L-Istati Membri jridu jistabbilixxu ġuriżdizzjoni fir-rigward tar-reati ta’ falsifikazzjoni biex jiżguraw prosekuzzjoni effettiva. B’mod partikolari:

• kull Stat Membru jrid jistabbilixxi ġuriżdizzjoni fuq reati mwettqa fit-territorju tiegħu jew min-nazzjonali tiegħu;
• L-Istati Membri li l-munita tagħhom hija l-euro jridu jistabbilixxu wkoll ġuriżdizzjoni fuq reati relatati mal-falsifikazzjoni tal-euro mwettqa barra mit-territorju tagħhom, tal-inqas meta l-awtur tar-reat ikun fit-territorju tagħhom u ma jiġix estradit, jew meta karti tal-flus jew muniti tal-euro ffalsifikati jkunu nstabu fit-territorju tagħhom;
• għall-prosekuzzjoni ta’ reati relatati mal-produzzjoni ta’ karti tal-flus jew muniti tal-euro ffalsifikati, il-ġuriżdizzjoni mhijiex subordinata għal kriminalità doppja (jiġifieri l-kundizzjoni li l-atti jikkostitwixxu reat kriminali fil-post fejn ikunu twettqu).

Analiżi u sejbien ta’ karti tal-flus iffalsifikati

Matul il-proċedimenti kriminali, l-awtoritajiet kompetenti jridu jiżguraw li karti tal-flus u muniti tal-euro suspettati li huma foloz ikunu jistgħu jiġu eżaminati għal finijiet ta’ analiżi, identifikazzjoni u detezzjoni. Dan huwa kruċjali biex jippermetti t-traċċar ta’ networks kriminali u jiffaċilita strateġija koerenti ta’ infurzar. B’mod partikolari:

• l-eżami miċ-Ċentru Nazzjonali għall-Analiżi rilevanti u miċ-Ċentru Nazzjonali għall-Analiżi tal-Muniti rilevanti jrid ikun permess mingħajr dewmien;
• l-awtoritajiet kompetenti jridu jittrażmettu l-kampjuni meħtieġa liċ-Ċentru Nazzjonali għall-Analiżi rilevanti u liċ-Ċentru Nazzjonali għall-Analiżi tal-Muniti rilevanti mhux aktar tard minn meta tkun intlaħqet deċiżjoni finali dwar il-proċedimenti kriminali.