Ċibersigurtà

Iċ-ċibersigurtà, magħrufa wkoll bħala teknoloġija tal-informazzjoni jew sigurtà tal-kompjuter, tinvolvi l-istabbiliment ta’ miżuri li jipproteġu s-sistemi u n-networks mid-divulgazzjoni tal-informazzjoni, is-serq jew il-ħsara lill-ħardwer, is-softwer jew id-data elettronika tagħhom, u mit-tfixkil jew id-direzzjoni ħażina tas-servizzi li jipprovdu.

Iċ-ċibersigurtà ilha prijorità tal-Unjoni Ewropea (UE). Dan ġie rifless reċentement fil-baġit fit-tul tagħha (qafas finanzjarju pluriennali) għall-perjodu 2021–2027, fejn finanzjament sinifikanti ġie allokat biex jappoġġja r-riċerka, l-innovazzjoni u l-infrastruttura taċ-ċibersigurtà, iċ-ċiberdifiża u l-industrija taċ-ċibersigurtà.

Mill-2004, u msaħħa bl-Att dwar iċ-Ċibersigurtà tal-UE tal-2019, l-Aġenzija tal-Unjoni Ewropea għaċ-Ċibersigurtà (ENISA) ilha taħdem mal-Istati Membri tal-UE u partijiet rilevanti oħra, tagħti pariri u soluzzjonijiet u tibni l-kapaċitajiet taċ-ċibersigurtà tagħhom biex tirrispondi b’mod konġunt għal inċidenti transkonfinali taċ-ċibersigurtà fuq skala kbira.

Is-strateġija taċ-ċibersigurtà l-iktar riċenti tal-UE, ippreżentata fl-2020, tfittex li ssaħħaħ ir-reżiljenza kollettiva tagħha kontra t-theddid ċibernetiku u tgħin biex tiżgura li ċ-ċittadini u n-negozji jkunu jistgħu jibbenefikaw bis-sħiħ minn servizzi u għodod diġitali affidabbli u ta’ min joqgħod fuqhom. Din fiha proposti għal inizjattivi regolatorji, ta’ investiment u ta’ politika li għandhom jittieħdu fi tliet oqsma.

• It-titjib tar-reżiljenza, is-sovranità teknoloġika u t-tmexxija. Dan se jinkiseb billi jiġu riformati r-regoli dwar is-sigurtà tan-networks u s-sistemi tal-informazzjoni. Dan jinkludi l-adozzjoni ta’ leġiżlazzjoni riveduta (direttiva ġdida, proposta fl-2020) dwar miżuri għal livell komuni għoli ta’ ċibersigurtà madwar l-UE biex tiżdied ir-reżiljenza ċibernetika ta’ infrastrutturi kritiċi tas-settur pubbliku u privat.
• Il-bini ta’ kapaċità operattiva għall-prevenzjoni, l-iskoraġġiment u r-rispons. Għandha tinħoloq Unità Ċibernetika Konġunta ġdida biex tingħata spinta lill-kooperazzjoni bejn il-korpi tal-UE u l-awtoritajiet tal-Istati Membri responsabbli għall-prevenzjoni, l-iskoraġġiment u r-rispons għaċ-ċiberattakki. Is-sett ta’ għodod taċ-ċiberdiplomazija tal-UE se jiġi aġġornat biex jipprevjeni, jiskoraġġixxi, iwaqqaf u jirrispondi b’mod effettiv għal attivitajiet ċibernetiċi malizzjużi, speċjalment dawk li jaffettwaw l-infrastruttura kritika, il-ktajjen tal-provvista, l-istituzzjonijiet demokaratiċi u l-proċessi tiegħu.
• L-avvanz ta’ ċiberspazju globali u miftuħ permezz ta’ kooperazzjoni ikbar. Dan se jinkiseb permezz tal-ħidma ma’ msieħba u organizzazzjonijiet internazzjonali biex tissaħħaħ l-ordni globali bbażata fuq ir-regoli, il-promozzjoni tas-sigurtà u l-istabbiltà internazzjonali fiċ-ċiberspazju u l-protezzjoni tad-drittijiet tal-bniedem u l-libertajiet fundamentali online. L-UE se żżid l-isforzi tal-bini tal-kapaċità ċibernetika f’pajjiżi mhux tal-UE, flimkien ma’ djalogi ċibernetiċi ma’ pajjiżi mhux tal-UE, organizzazzjonijiet reġjonali u internazzjonali u l-komunità b’diversi partijiet interessati.