(1)

F’konformità mal-Artikolu 168(1) tat-Trattat dwar il-Funzjonament tal-Unjoni Ewropea, l-azzjoni tal-Unjoni, li għandha tikkomplementa l-politiki nazzjonali, jenħtieġ li tindirizza t-titjib tas-saħħa pubblika, il-prevenzjoni tal-mard fiżiku u mentali, u l-evitar tas-sorsi ta’ periklu għas-saħħa fiżika u mentali. Skont l-Artikolu 168(2) tat-Trattat, l-Istati Membri, flimkien mal-Kummissjoni, huma meħtieġa jikkoordinaw bejniethom il-politiki u l-programmi tagħhom fl-oqsma msemmija fil-paragrafu 1 ta’ dak l-artikolu. Il-Kummissjoni tista’, f’kuntatt mill-qrib mal-Istati Membri, tieħu kwalunkwe inizjattiva utli biex tippromwovi din il-koordinazzjoni, b’mod partikolari inizjattivi li jimmiraw l-istabbiliment ta’ linji gwida u indikaturi u l-organizzazzjoni ta’ skambju tal-aħjar prattika.

(2)

L-esperjenza u r-riżultati miksuba permezz tal-grupp ta’ esperti tal-Kummissjoni “Grupp ta’ Tmexxija dwar il-Promozzjoni tas-Saħħa, il-Prevenzjoni tal-Mard u l-Ġestjoni tal-Mard Mhux Komunikabbli” wrew li l-koordinazzjoni fost l-Istati Membri tista’ tikkontribwixxi għat-tnaqqis tal-piż tal-mard mhux komunikabbli fl-Unjoni billi tikkondividi u timplimenta l-aħjar prattiki u ttejjeb il-koordinazzjoni tal-azzjoni.

(3)

F’dak il-grupp ta’ esperti, il-Kummissjoni ħadmet mill-qrib mal-Istati Membri biex tiżviluppa azzjonijiet u politiki li jistgħu jappoġġawhom fil-kisba tal-għanijiet ta’ żvilupp sostenibbli, u b’mod partikolari l-għan ta’ żvilupp sostenibbli 3 “Jiġu żgurati ħajjiet f’saħħithom u jiġi promoss il-benesseri għal kulħadd f’kull età”. Din il-ħidma hija f’konformità mal-Komunikazzjoni tal-Kummissjoni dwar il-passi li jmiss għal ġejjieni Ewropew sostenibbli – Azzjoni Ewropea għas-sostenibbiltà (1). L-Għanijiet ta’ Żvilupp Sostenibbli se jkomplu jipprovdu d-direzzjoni għal azzjonijiet dwar is-saħħa pubblika.

(4)

Sa mit-twaqqif ta’ dak il-grupp ta’ esperti, l-Unjoni ilha tiffaċċja sfidi oħra importanti għas-saħħa pubblika, bħal dawk relatati ma’ mard komunikabbli inkluż l-HIV/AIDS, it-tuberkulożi u l-epatite kif ukoll sfidi relatati li jikkonċernaw it-tilqim u r-reżistenza għall-antimikrobiċi. Għalhekk, hemm bżonn li l-koordinazzjoni ma tibqax limitata għall-promozzjoni tas-saħħa, il-prevenzjoni tal-mard u l-ġestjoni tal-mard li mhux komunikabbli, iżda jenħtieġ li tiġi estiża wkoll għal dawn l-isfidi ġodda importanti għas-saħħa pubblika.

(5)

Jenħtieġ li l-missjoni ta’ grupp ta’ esperti ġdid tikkomplementa l-ħidma tal-Kumitat għas-Sigurtà tas-Saħħa, stabbilit bid-Deċiżjoni 1082/2013/UE tal-Parlament Ewropew u tal-Kunsill (2), billi tappoġġa aktar l-iskambju u l-implimentazzjoni tal-aħjar prattiki.

(6)

Il-grupp ta’ esperti l-ġdid dwar is-saħħa pubblika se jaħdem fuq oqsma li ma jikkoinċidux mal-ħidma tal-Kumitat għas-Sigurtà tas-Saħħa, stabbilit bid-Deċiżjoni Nru 1082/2013/UE. Il-Kumitat għas-Sigurtà tas-Saħħa jaġixxi fuq it-tħejjija u r-rispons għall-kriżijiet filwaqt li l-grupp ta’ esperti l-ġdid dwar is-saħħa pubblika se jagħti pariri lill-Kummissjoni dwar l-iżvilupp tal-politika u t-trasferiment tal-aħjar prattiki relatati mal-isfidi ewlenin tas-saħħa pubblika, inkluż il-mard li mhux komunikabbli kif ukoll il-mard komunikabbli bħall-HIV/AIDS, it-tuberkulożi u l-epatite, it-tilqim u r-reżistenza għall-antimikrobiċi, sabiex tiġi promossa l-koordinazzjoni bejn l-Istati Membri.

(7)

Minħabba l-ambitu usa’ tal-attivitajiet li jmur lil hinn mill-grupp ta’ esperti attwali, li jiffoka biss fuq il-mard mhux komunikabbli, huwa meħtieġ li jitwaqqaf grupp ta’ esperti ġdid fil-qasam tas-saħħa pubblika u li jiġu definiti l-kompiti u l-istruttura tiegħu, f’konformità mad-Deċiżjoni tal-Kummissjoni C(2016) 3301 dwar l-istabbiliment ta’ regoli orizzontali dwar il-ħolqien u l-funzjoni tal-gruppi ta’ esperti tal-Kummissjoni. Jenħtieġ li l-ambitu ta’ dan il-grupp ta’ esperti jiġi estiż għal dawn l-isfidi tas-saħħa pubblika u mhux limitat għall-mard mhux komunikabbli biss.

(8)

Jenħtieġ li l-grupp ikun magħmul mill-awtoritajiet tal-Istati Membri.

(9)

Jenħtieġ li jiġu stabbiliti regoli dwar id-divulgazzjoni ta’ informazzjoni minn membri tal-grupp.

(10)

Jenħtieġ li d-data personali tiġi pproċessata f’konformità mar-Regolament (UE) 2016/679 tal-Parlament Ewropew u tal-Kunsill (3) (ir-Regolament Ġenerali dwar il-Protezzjoni tad-Data), li japplika għall-Istati Membri.

(11)

Jenħtieġ li d-Deċiżjoni tal-Kummissjoni li tistabbilixxi l-Grupp ta’ Tmexxija dwar il-Promozzjoni tas-Saħħa, il-Prevenzjoni tal-Mard u l-Ġestjoni tal-Mard Mhux Komunikabbli (4) titħassar u li dan il-grupp jiġi sostitwit mill-grupp il-ġdid stabbilit f’din id-deċiżjoni attwali, sabiex jiġu żviluppati azzjonijiet u inizjattivi, tiġi promossa l-koordinazzjoni bejn l-Istati Membri, jiġu indirizzati l-isfidi ewlenin tas-saħħa pubblika fl-Unjoni, bħal dawk relatati mal-mard komunikabbli inkluż l-HIV/AIDS, it-tuberkulożi u l-epatite kif ukoll l-isfidi relatati inkluż it-tilqim u r-reżistenza għall-antimikrobiċi u ma tkunx limitata għall-mard mhux komunikabbli biss.

(12)

Jixraq li jiġi ffissat perjodu għall-applikazzjoni ta’ din id-Deċiżjoni, li jenħtieġ li jkun ta’ 5 snin. Jenħtieġ li l-Kummissjoni tikkunsidra fi żmien debitu l-ħtieġa għal estensjoni tal-perjodu ta’ applikazzjoni, wara evalwazzjoni tal-funzjonijiet u r-riżultati tal-Grupp ta’ esperti dwar is-saħħa pubblika.