(1)

Le Rialachán (AE) 2018/858 ó Pharlaimint na hEorpa agus ón gComhairle (3) leagtar síos forálacha riaracháin agus ceanglais theicniúla maidir le cineálcheadú na bhfeithiclí, na gcóras, na gcomhpháirteanna agus na n-aonad teicniúil ar leithligh nua uile d’fhonn dea-fheidhmiú an mhargaidh inmheánaigh a áirithiú agus chun ardleibhéal feidhmíochta sábháilteachta agus comhshaoil a chur ar fáil.

(2)

Is gníomh rialála é an Rialachán seo chun críocha nós imeachta cineálcheadaithe AE a leagtar síos le Rialachán (AE) 2018/858. Dá bhrí sin, ba cheart Iarscríbhinn II a ghabhann le Rialachán (AE) 2018/858 a leasú dá réir. Tá forálacha riaracháin Rialachán (AE) 2018/858, lena n-áirítear na forálacha maidir le bearta ceartaitheacha agus pionóis, infheidhme go hiomlán maidir leis an Rialachán seo.

(3)

Leis na deichbhlianta anuas, chuir forbairtí i sábháilteacht feithicle go mór le laghdú foriomlán i líon na mbásanna ar na bóithre agus líon na ngortuithe tromchúiseacha. Fuair 25 300 duine bás ar bhóithre an Aontais in 2017, áfach, ar figiúr é sin atá mórán gan athrú le 4 bliana anuas. Thairis sin, gortaítear 135 000 duine go dona gach bliain in imbhuailtí ar bhóithre AE (4). Ba cheart don Aontas gach is féidir leis a dhéanamh chun timpistí agus gortuithe in iompar de bhóthar a laghdú nó a dhíothú. Sa bhreis ar bhearta sábháilteachta chun daoine i bhfeithiclí a chosaint, tá gá le bearta sonrach a chur chun feidhme ar mhaithe le básanna agus gortuithe a bhaineann d’úsáideoirí soghonta bóthair, amhail rothaithe agus coisithe, chun úsáideoirí bóthair lasmuigh den fheithicil a chosaint. Gan tionscnaimh nua maidir le sábháilteacht ar bhóithre i gcoitinne, ní bheidh na tionchair atá ag an gcur chuige atá ann faoi láthair ó thaobh sábháilteachta de in ann ag an méadú atá ag teacht ar an trácht. Dá bhrí sin, ní mór feidhmíocht sábháilteachta feithiclí a fheabhsú tuilleadh mar chuid de chur chuige comhtháite maidir le sábháilteacht ar bhóithre agus chun úsáideoirí soghonta bóthair a chosaint ar bhealach níos fearr.

(4)

Leis na forálacha cineálcheadaithe, ba cheart a áirithiú go ndéantar leibhéal feidhmíochta mótarfheithicle a mheasúnú ar shlí a fhágann gur féidir na measúnuithe a athdhéanamh agus gur féidir iad a atáirgeadh. Dá bhrí sin, is do choisithe agus rothaithe amháin a thagraíonn na ceanglais theicniúla sa Rialachán seo mar gurb iadsan amháin, i láthair na huaire, atá ann mar spriocábhair do thástáil atá comhchuibhithe go foirmiúil. Taobh amuigh de choisithe agus rothaithe, ba cheart a áireamh ar úsáideoirí soghonta bóthair, go ginearálta, úsáideoirí bóthair eile gan inneall nó le hinneall a d’fhéadfadh a bheith ag úsáid réitigh soghluaisteachta pearsanta nach bhfuil aon chabhalra cosanta orthu. Thairis sin, cruthaíonn an teicneolaíocht reatha ionchas réasúnach go mbeidh córais ardfhorbartha in ann oibriú i bhfreagairt d’úsáideoirí soghonta bóthair eile faoi ghnáthdhálaí tiomána, cé nach bhfuil tástáil shainiúil déanta ar an teicneolaíocht sin. Ba cheart na ceanglais theicniúla sa Rialachán seo a oiriúnú tuilleadh don dul chun cinn teicniúil i ndiaidh próiseas measúnaithe agus athbhreithnithe chun gach úsáideoir bóthair a úsáideann réitigh soghluaisteachta pearsanta nach bhfuil aon chabhalra cosanta orthu a chlúdach, amhail scútair, feithiclí féinchothromaithe agus cathaoireacha rothaí.

(5)

Mar gheall ar dhul chun cinn teicniúil i réimse na n-ardchóras sábháilteachta feithicle cuirtear féidearthachtaí nua ar fáil chun líon na dtaismeach a laghdú. Chun líon ngortuithe tromchúiseacha agus na mbásanna a íoslaghdú, ní mór tacar teicneolaíochtaí nua a thabhairt isteach.

(6)

I gcomhthéacs Rialachán (CE) Uimh. 661/2009 ó Pharlaimint na hEorpa agus ón gComhairle (5), rinne an Coimisiún measúnú an féidir an ceanglas atá sa Rialachán sin faoi láthair go ndéanfaí córais áirithe (mar shampla ardchórais coscánaithe éigeandála agus córais faireacháin bhrú na mbonn) a fheistiú i gcatagóirí éagsúla feithicle a leathadh amach ionas go mbeidh feidhm aige maidir le gach catagóir feithicle. Rinne an Coimisiún measúnú freisin ar an indéantacht theicniúil agus eacnamaíoch i dtaobh ceanglas nua a fhorchur chun ardghnéithe sábháilteachta eile a fheistiú, agus ar aibíocht an mhargaidh ina leith sin. Bunaithe ar na measúnuithe sin, d’fhoilsigh an Coimisiún tuarascáil do Pharlaimint na hEorpa agus don Chomhairle i an 12 Nollaig 2016 dar teideal “Saving Lives: Boosting Car Safety in the EU” (Beatha a shábháil: Sábháilteacht i gcarranna a chur chun cinn san Aontas Eorpach). Sa Doiciméad Inmheánach Oibre de chuid an Choimisiúin a ghabhann leis an tuarascáil sin sainmhíníodh agus cuireadh ar aghaidh 19 mbeart rialála féideartha a bheadh éifeachtach chun líon na dtionóiscí bóthair agus líon na mbásanna agus na ngortuithe a laghdú a thuilleadh.

(7)

Chun neodracht theicniúil a áirithiú, ba cheart a cheadú, leis na ceanglais feidhmíochta, córais faireacháin dhíreacha agus indíreacha bhrú na mbonn a bheith ann.

(8)

Is féidir leis na hardchórais feithicle a bheith níos éifeachtaí ó thaobh básanna a laghdú, an líon timpistí bóthair a laghdú agus ó thaobh gortuithe agus damáiste a mhaolú má bhíonn siad deartha sa chaoi go mbeidh siad áisiúil do na húsáideoirí. Dá bhrí sin, ba cheart do mhonaróirí feithiclí a lándícheall a dhéanamh chun a áirithiú go ndéantar na córais agus gnéithe dá bhforáiltear sa Rialachán seo a fhorbairt ar shlí a thacóidh leis an tiománaí. Ba cheart feidhmiú na gcóras agus na ngnéithe sin mar aon leis na teorannuithe a ghabhann leo, a mhíniú i dtreoracha úsáideora na mótarfheithicle ar shlí atá soiléir agus sothuigthe don thomhaltóir.

(9)

Ba cheart go mbeadh gnéithe sábháilteachta agus foláirimh a úsáidtear chun cabhrú leis an tiomáint le feiceáil go héasca ag gach tiománaí, lena n-áirítear daoine scothaosta agus daoine faoi mhíchumas.

(10)

Ardchórais coscánaithe éigeandála, cúnamh cliste luais, córais éigeandála le fanacht i lána, rabhadh codlatachta agus aire tiománaí, ardchóras rabhaidh do sheachmall tiománaí agus brath cúlaithe, is córais sábháilteachta iad a d’fhéafadh líon na dtaismeach a laghdú go mór. Sa bhreis air sin, tá cuid de na córais sábháilteachta sin ina mbunús do theicneolaíochtaí a úsáidfear chun feithiclí uathoibrithe a imscaradh freisin. Aon chóras sábháilteachta den sórt sin, ba cheart dó feidhmiú gan úsáid a bhaint as aon chineál faisnéise bithmhéadraí faoi na tiománaithe nó na paisinéirí, lena n-áirítear aitheantas aghaidhe. Dá bhrí sin, ní mór rialacha agus nósanna imeachta tástála comhchuibhithe i ndáil le cineálcheadú feithiclí maidir leis na córais sin agus i ndáil le cineálcheadú na gcóras sin mar aonaid theicniúla ar leithligh a bhunú ar leibhéal an Aontais. Ba cheart dul chun cinn theicniúil na gcóras sin a chur san áireamh i ngach meastóireacht a dhéantar ar an reachtaíocht atá cheana ann, chun go mbeidh sé in ann a bheith stóinseach don todhchaí, agus prionsabail na príobháideachta agus na cosanta sonraí á gcomhlíonadh go docht, agus chun timpistí agus gortuithe in iompar de bhóthar a laghdú nó a dhíothú. Is gá a áirithiú freisin gur féidir na córais sin a úsáid go sábháilte i rith shaolré na feithicle.

(11)

Ba cheart é a bheith indéanta an cúnamh cliste luais a chasadh as, mar shampla, nuair a bhíonn rabhaidh bhréige nó aiseolas míchuí á bhfáil ag an tiománaí mar thoradh ar dhroch-aimsir, marcálacha bóthair sealadacha i limistéir oibreacha bóthair a thugann atá ina gcúis le foláirimh chontrártha, nó comharthaí bóthair a bheith míthreorach, fabhtach nó in easnamh. Ba cheart an ghné sin inar féidir casadh as a bheith faoi smacht an tiománaí. Ba cheart di ligean don chúnamh cliste luais a bheith casta as chomh fada agus is gá agus an tiománaí a bheith in ann í a chasadh air arís go héasca. Nuair a bhíonn an córas casta as, d’fhéadfadh sé go dtabharfaí faisnéis fós faoin teorainn luais. Ba cheart go mbeadh an córas gníomhach i gcónaí nuair a dhúisítear an t‐ineall agus ba cheart go mbeadh an tiománaí ar an eolas i gcónaí faoin gcóras a bheith casta air nó as.

(12)

Aithnítear go forleathan go bhfuil criosanna sábhála ar cheann de na gnéithe sábháilteachta is tábhachtaí agus is éifeachtaí san fheithicil. Dá bhrí sin, is féidir le córais mheabhrúcháin criosa sábhála básanna a chosc nó gortuithe a mhaolú trí na rátaí do chaitheamh criosa sábhála ar fud an Aontais a mhéadú. Ar an gcúis sin, foráladh faoi Rialachán (CE) Uimh. 661/2009 go bhfuil córas meabhrúcháin criosa sábhála éigeantach do shuíochán an tiománaí i ngach carr paisinéirí nua ó 2014 trí Rialachán Uimh. 16 de chuid na Náisiún Aontaithe (NA) a chur chun feidhme, arbh é an rialachán é lenar bunaíodh na forálacha teicniúla ábhartha. Mar thoradh ar leasú an Rialachán sin de chuid NA a leasú chun dul chun cinn teicniúil a chur san áireamh, tá sé éigeantach córais mheabhrúcháin criosa sábhála a fheistiú ar gach suíochán tosaigh agus deiridh d’fheithiclí M1 agus N1, chomh maith leis na suíocháin tosaigh go léir i bhfeithiclí N2, N3, M2 agus M3, amhail ón 1 Meán Fómhair 2019 do chineálacha mótarfheithiclí nua agus amhail ón 1 Meán Fómhair 2021 do gach mótarfheithicil nua.

(13)

Is céim thábhachtach é tabhairt isteach taifeadáin sonraí teagmhais lena stórálfar sraith sonraí feithicle ríthábhachtacha atá i ndíth ainm, in éineacht le ceanglais le haghaidh raon, cruinneas agus taifeach sonraí agus le haghaidh a mbailithe, a stórála agus a n‐aisghabháltachta thar thréimhse ghearr ama roimh, le linn agus díreach i ndiaidh imbhualadh (mar shampla, trí ghníomhú mála aeir a mhúscailt) chun mionsonraí tionóiscí níos cruinne a fháil. Ní mór ceangal a bheith ar gach mótarfheithicil a bheith feistithe le taifeadáin den sórt sin, mar sin. Ba cheart go mbeadh taifeadáin den sórt sin in ann sonraí a thaifeadadh agus a stóráil ar bhealach nach bhféadfar iad a úsáid ach amháin chun go ndéanfadh na Ballstáit iad a úsáid chun anailís a dhéanamh ar shábháilteacht bóithre agus chun measúnú a dhéanamh ar éifeachtúlacht bearta sonracha a glacadh gan aon fhéidearthacht ann úinéir nó sealbhóir feithicle ar leith a shainaithint ar bhonn na sonraí atá stóráilte.

(14)

Aon phróiseáil a dhéantar ar shonraí pearsanta, amhail faisnéis faoin tiománaí arna próiseáil i dtaifeadáin sonraí teagmhais nó faisnéis faoi leibhéal codlatachta agus aird an tiománaí nó faoi seachmaill an tiománaí, ba cheart í a dhéanamh i gcomhréir le dlí an Aontais maidir le cosaint sonraí, go háirithe Rialachán (AE) 2016/679 ó Pharlaimint na hEorpa agus ón gComhairle (6). Maidir le taifeadáin sonraí teagmhais, ba cheart dóibh oibriú ar chóras lúbiata ina dtaifeadtar arís anuas ar na sonraí atá stóráilte, agus nach bhfágann gur féidir an fheithicil nó an sealbhóir a shainaithint. Sa bhreis air sin, níor cheart go mbeadh rabhadh codlatachta agus aird an tiománaí nó ardchóras rabhaidh do sheachmall an tiománaí ag taifeadadh go leanúnach ná go gcoinneofaí ann aon sonraí seachas na sonraí sin atá riachtanach i ndáil leis na cuspóirí chuig ar bailíodh iad nó go mbeadh na sonraí sin á bpróiseáil ar shlí eile laistigh den chóras lúbiata. Thairis sin, tá próiseáil sonraí pearsanta arna mbailiú tríd an gcóras eCall infheithicle atá bunaithe ar an tseirbhís 112 faoi réir coimircí sonracha a leagtar amach i Rialachán (AE) 2015/758 ó Pharlaimint na hEorpa agus ón gComhairle (7).

(15)

D’fhéadfadh sé nach mbeadh ardchórais coscánaithe éigeandála nó córais éigeandála le fanacht i lána ag feidhmiú go hiomlán i roinnt cásanna, go háirithe mar gheall ar easnaimh sa bhonneagar bóithre. Sna cásanna sin, ba cheart do na córais iad féin a dhíghníomhachtú agus faisnéis faoin díghníomhachtú sin a thabhairt don tiománaí. Mura ndíghníomhaíonn siad go huathoibríoch, ba cheart go mbeadh sé indéanta iad a chasadh as de lámh. Ba cheart an díghníomhachtú sin a bheith sealadach agus go mairfeadh sé don tréimhse ar lena linn nach bhfuil an córas ag feidhmiú go hiomlán agus don tréimhse sin amháin. D’fhéadfadh sé go mbeadh ar thiománaithe freisin ardchórais coscánaithe éigeandála nó córais éigeandála le fanacht i lána a fhorstiúradh i gcás ina bhféadfadh riosca níos mó nó díobháil leanúint as feidhmiú an chórais. D’áiritheodh sé seo go mbeadh na feithiclí faoi smacht an tiománaí i gcónaí. Mar sin féin, leis na córais sin, d’fhéadfaí cásanna a aithint ina bhfuil an tiománaí éagumasaithe agus, dá bhrí sin, ina bhfuil gá le hidirghabháil ón gcóras chun timpiste níos measa ná mar a bheadh sé murach sin a chosc.

(16)

Le Rialachán (CE) Uimh. 661/2009, bhí díolúine ag veaineanna, feithiclí spórt-áirgiúlachta (SUVanna) agus feithiclí ilfheidhmeacha (MPVanna) ó cheanglais sábháilteachta mar gheall ar shaintréithe a bhaineann le hairde suíocháin agus mais feithiclí. I bhfianaise an ráta méadaithe lena bhfuil feithiclí den sórt sin ag dul i bhfód ar an margadh (suas ó 3 % i 1996 go 14 % in 2016) agus na forbairtí teicneolaíocha i seiceálacha ar shábháilteacht leictreach i ndiaidh tuairteanna, tá na díolúintí sin as dáta agus gan údar. Ba cheart, dá bhrí sin, na díolúintí a bhaint agus an tsraith iomlán de cheanglais i ndáil le hardchórais feithicle a chur i bhfeidhm maidir leis na feithiclí sin.

(17)

Le Rialachán (CE) Uimh. 661/2009 baineadh amach simpliú suntasach ar reachtaíocht an Aontais trí 38 dTreoir a bhaint agus Rialacháin choibhéiseacha de chuid NA, atá éigeantach faoi Chinneadh 97/836/CE (8), a chur ina n-ionad. Chun simpliú breise a bhaint amach, ba cheart níos mó rialacha de chuid na Náisiún Aontaithe a bhfuil feidhm acu san Aontas ar bhonn éigeantach a chur in ionad rialacha de chuid an Aontais. Ina theannta sin, ba cheart don Choimisiún an obair atá ar siúl ar leibhéal na Náisiún Aontaithe a chur chun cinn agus tacaíocht a thabhairt di, chun na ceanglais theicniúla maidir le cineálcheadú córais shábháilteachta feithicle dá bhforáiltear leis an Rialachán seo a bhunú, gan mhoill agus i gcomhréir leis na caighdeáin is airde sábháilteachta bóthair atá ann.

(18)

Ba cheart rialacháin de chuid NA, agus na leasuithe orthu, ar vótáil an tAontas ina bhfabhar nó a chuireann an tAontas i bhfeidhm, i gcomhréir le Cinneadh 97/836/CE, a ionchorprú i reachtaíocht an Aontais maidir le cineálcheadú. Dá réir sin, ba cheart an chumhacht a tharmligean chuig an gCoimisiún leasú a dhéanamh ar an liosta de na Rialacháin de chuid NA a bhfuil feidhm acu ar bhonn éigeantach chun a áirithiú go gcoimeádtar an liosta sin cothrom le dáta.

(19)

Le Rialachán (CE) Uimh. 78/2009 ó Pharlaimint na hEorpa agus ón gComhairle (9) leagtar amach ceanglais maidir le coisithe, rothaithe agus úsáideoirí soghonta bóthair eile a chosaint le tástálacha comhlíontachta agus teorainnluachanna maidir le cineálcheadú feithiclí a mhéid a bhaineann lena struchtúr tosaigh agus maidir le cineálcheadú córais cosanta tosaigh (mar shampla túsbharraí cosanta). Ó glacadh Rialachán (CE) Uimh. 78/2009, rinneadh ceanglais theicniúla agus nósanna imeachta tástála d’fheithiclí a fhorbairt tuilleadh ar leibhéal na Náisiún Aontaithe chun dul chun cinn teicniúil a chur san áireamh. Tá feidhm freisin ag Rialachán Uimh. 127 de chuid NA lena leagtar síos forálacha aonfhoirmeacha maidir le mótarfheithiclí a cheadú i ndáil le feidhmíocht shábháilteacht na gcoisithe (“Rialachán Uimh. 127 de chuid NA”) san Aontas faoi láthair maidir le mótarfheithiclí a chineálcheadú.

(20)

Tar éis Rialachán (CE) Uimh. 79/2009 ó Pharlaimint na hEorpa agus ón gComhairle (10) a ghlacadh, rinneadh tuilleadh forbartha ar leibhéal na Náisiún Aontaithe ar na ceanglais theicniúla agus na nósanna imeachta tástála maidir le feithiclí faoi thiomáint hidrigine agus córais agus comhpháirteanna hidrigine a chineálcheadú, chun an dul chun cinn teicniúil a chur san áireamh. Tá feidhm ag Rialachán Uimh. 134 de chuid NA maidir le forálacha aonfhoirmeacha a bhaineann le mótarfheithiclí agus a gcomhpháirteanna a cheadú i ndáil le feidhmíocht sábháilteachta feithiclí le hinnill hidrigine (HFCV) (11) (“Rialachán Uimh. 134 de chuid NA”) san Aontas faoi láthair maidir le córais hidrigine i mótarfheithiclí a chineálcheadú. De bhreis ar na ceanglais sin, ba cheart critéir maidir le cáilíocht na n‐ábhar agus na ngabhdán breosla a úsáidtear i gcóras feithiclí le hidrigin comhbhrúite a bhunú ar leibhéal an Aontais.

(21)

Ar mhaithe le soiléireacht, le réasúntacht agus le simpliú, ba cheart Rialacháin (CE) Uimh. 78/2009, (CE) Uimh. 79/2009 agus (CE) Uimh. 661/2009 a aisghairm, agus ba cheart an Rialachán seo a chur ina n‐ionad.

(22)

Go stairiúil, chuir rialacha an Aontais teorainn le fad foriomlán cónaisc trucailí, as ar eascair an dearadh tipiciúil ina bhfuil cábán os cionn an innill, chun an spás lasta is mó a fháil. D’fhág suíomh ard an tiománaí, áfach, go raibh caochspota níos mó ann agus laghdú ar an infheictheacht dhíreach timpeall chábán na trucaile. Is toisc mhór é sin do thionóiscí trucaile a bhaineann le húsáideoirí soghonta bóthair. D’fhéadfaí líon na dtaismeach a laghdú go suntasach tríd an amharc díreach a fheabhsú. Ba cheart, mar sin, ceanglais a thabhairt isteach chun an t‐amharc díreach a fheabhsú ionas go gcuirfí feabhas ar an infheictheacht dhíreach ar choisithe, ar rothaithe agus ar úsáideoirí soghonta bóthair eile ó shuíochán an tiománaí trí bhíthin na caochspotaí os comhair an tiománaí ar go cliathánach ón tiománaí a laghdú a mhéid is féidir. Ba cheart na sonraíochtaí do na catagóirí éagsúla feithiclí a chur san áireamh.

(23)

Tá sé d’acmhainn ag feithiclí uathoibrithe rannchuidiú go mór le líon na mbásanna ar na bóithre a laghdú, ós rud é go bhfuil leibhéal áirithe d'earráid an duine ina chúis le níos mó ná 90 % de thimpistí bóthair. Ós rud é go mbeidh feithiclí uathoibrithe ag glacadh cúraimí an tiománaí chucu féin de réir a chéile, ba cheart rialacha agus ceanglais theicniúla chomhchuibhithe do chórais feithiclí uathoibrithe, lena n‐áirítear i ndáil le dearbhú sábháilteachta infhíoraithe don chinnteoireacht maidir le feithiclí uathoibrithe, a ghlacadh ar leibhéal an Aontais, agus fós urraim a léiriú do phrionsabal na neodrachta teicneolaíochta, agus ba cheart é sin a chur chun cinn ar an leibhéal idirnáisiúnta faoi chuimsiú Fhóram Domhanda de chuid CENAE um Rialacháin d’Fheithiclí (WP 29) a chomhchuibhiú.

(24)

Ba cheart úsáideoirí bóithre, amhail coisithe agus rothaithe mar aon le tiománaithe feithiclí neamh-uathoibrithe nach féidir leo faisnéis leictreonach feithicil le feithicil a fháil faoi iompar feithicle uathoibrithe, a choimeád ar an eolas faoin iompar sin trí mhodhanna traidisiúnta dá bhforáiltear i Rialacháin de chuid NA nó i ngníomhartha rialála eile a luaithe is féidir tar éis dóibh teacht i bhfeidhm.

(25)

Trí dhlúthghrúpáil feithiclí, tá an fhéidearthacht ann iompar atá níos sábháilte, níos glaine agus níos éifeachtaí a spreagadh amach anseo. Mar réamhaíocht don teicneolaíocht agus do na caighdeáin ábhartha i ndáil leis an dlúthghrúpáil a thabhairt isteach, beidh creat rialála le rialacha agus próisis chomhchuibhithe ag teastáil.

(26)

Mar gheall ar nascacht agus uathoibriú feithiclí tá méadú ag teacht ar an bhféidearthacht go ndéanfaí rochtain neamhúdaraithe cianda ar bhogearraí infheithicle agus go ndéanfaí modhnú aer-rochtana ar bhogearraí. Chun rioscaí den sórt sin a chur san áireamh, ba cheart Rialacháin de chuid NA agus gníomhartha rialála eile maidir leis an gcibearshlándáil a chur i bhfeidhm ar bhonn éigeantach a luaithe is féidir tar éis teacht i bhfeidhm dóibh.

(27)

Is féidir le modhnuithe bogearraí feidhmiúlachtaí feithiclí a athrú ar bhealach suntasach. Ba cheart rialacha comhchuibhithe agus ceanglais theicniúla le haghaidh modhnuithe bogearraí a bhunú atá ar aon dul leis na nósanna imeachta cineálcheadaithe. Dá bhrí sin, ba cheart Rialacháin de chuid NA nó gníomhartha rialála eile maidir le próisis uasdátaithe bogearraí a chur i bhfeidhm ar bhonn éigeantach a luaithe is féidir tar éis teacht i bhfeidhm dóibh. Níor cheart, áfach, go mbainfeadh na bearta slándála sin an bonn de na hoibleagáidí atá ar mhonaróirí feithiclí rochtain a thabhairt ar fhaisnéis chuimsitheach dhiagnóiseach agus ar shonraí infheithicle atá ábhartha chun feithicil a dheisiú agus a chothabháil.

(28)

Ba cheart don Aontas leanúint den fhorbairt ar riachtanais teicniúla a chur chun cinn maidir le torann, le friotaíocht rollach agus le feidhmiú fliuchghreama na mbonn ar leibhéal na Náisiún Aontaithe. Moltar an méid seo mar cuimsíonn Rialachán Uimh. 117 chuid NA maidir le forálacha aonfhoirmeacha a bhaineann le boinn a cheadú i dtaca le hastaíochtaí fuaime ó rolladh bonn agus/nó greamaitheacht ar dhromchlaí fliucha agus/nó friotaíocht rollach (12) (“Rialachán Uimh. 117 de chuid NA”) na forálacha mionsonraithe seo anois. Ba cheart go leanfaí, go mear agus go huaillmhianach, ar leibhéal na Náisiún Aontaithe den phróiseas chun na ceanglais i ndáil le boinn a oiriúnú, chun gach dul chun cinn teicniúil a áireamh, go háirithe chun measúnú a dhéanamh ar fheidhmiú bonn ag deireadh a saolré agus riocht chaite orthu chun an tuiscint a chur chun cinn gur cheart na ceanglais sin a bhaint amach ó thús go deireadh a saolré ionas nach mbeidh gá lena n‐athrú roimh am. Ba cheart anois Rialacháin choibhéiseacha de chuid NA a chur in ionad na gceanglas atá ann cheana i Rialachán (CE) Uimh. 661/2009 a bhaineann le feidhmiú bonn.

(29)

Chun éifeachtacht an Rialacháin seo a áirithiú, ba cheart an chumhacht chun gníomhartha a ghlacadh i gcomhréir le hAirteagal 290 den Chonradh ar Fheidhmiú an Aontais Eorpaigh (CFAE) a tharmligean chuig an gCoimisiún chun an Rialachán seo a fhorlíonadh i ndáil le ceanglais chineálcheadaithe i dtaca le hardchórais feithicle agus chun an Rialachán seo a leasú i leith Iarscríbhinn II a ghabhann leis chun an dul chun cinn sa teicneolaíocht agus forbairtí rialála a chur san áireamh. Tá sé tábhachtach, go háirithe, go rachadh an Coimisiún i mbun comhairliúcháin iomchuí le linn a chuid oibre ullmhúcháin, lena n‐áirítear ar leibhéal na saineolaithe, agus go ndéanfar na comhairliúcháin sin i gcomhréir leis na prionsabail a leagtar síos i gComhaontú Idirinstitiúideach an 13 Aibreán 2016 maidir le Reachtóireacht Níos Fearr (13). Go sonrach, chun rannpháirtíocht chomhionann in ullmhú na ngníomhartha tarmligthe a áirithiú, faigheann Parlaimint na hEorpa agus an Chomhairle na doiciméid uile ag an am céanna leis na saineolaithe sna Ballstáit, agus bíonn rochtain chórasach ag a gcuid saineolaithe ar chruinnithe ghrúpaí saineolaithe an Choimisiúin a bhíonn ag déileáil le hullmhú na ngníomhartha tarmligthe.

(30)

Chun coinníollacha aonfhoirmeacha a áirithiú maidir leis an Rialachán seo a chur chun feidhme, ba cheart cumhachtaí cur chun feidhme a thabhairt don Choimisiún. Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011 ó Pharlaimint na hEorpa agus ón gComhairle (14).

(31)

I bhfianaise ailíniú reachtaíocht an Aontais, ina dtagraítear do nós imeachta rialála lena ngabhann grinnscrúdú, leis an gcreat dlí a tugadh isteach le CFAE agus d’fhonn reachtaíocht an Aontais a shimpliú tuilleadh sa réimse a bhaineann le sábháilteacht feithiclí, ba cheart na Rialacháin seo a leanas a aisghairm agus gníomhartha cur chun feidhme arna nglacadh faoin Rialachán seo a chur ina n‐ionad:

(32)

Toisc go bhfuil cineálcheaduithe AE arna ndeonú i gcomhréir le Rialachán (CE) Uimh. 78/2009, Rialachán (CE) Uimh. 79/2009 nó Rialachán (CE) Uimh. 661/2009, chomh maith leis na bearta cur chun feidhme a ghabhann leo, le meas mar chinn atá coibhéiseach leis na cinn arna ndeonú i gcomhréir leis an Rialachán seo, ach amháin má athraítear na ceanglais ábhartha leis an Rialachán seo nó go dtí go modhnaítear iad leis na gníomhartha tarmligthe nó leis na gníomhartha cur chun feidhme arna nglacadh de bhun an Rialacháin seo, tá gá le forálacha idirthréimhseacha chun a áirithiú nach ndéanfar ceaduithe den sórt sin a neamhbhailíochtú.

(33)

Maidir leis na dátaí chun cineálcheadú AE a dhiúltú, chun clárú feithiclí a dhiúltú, chun cur ar an margadh nó teacht i seirbhís na gcomhpháirteanna agus na n‐aonad teicniúil ar leithligh a thoirmeasc, ba cheart iad a leagan síos le haghaidh gach comhpháirt rialálaithe.

(34)

Ós rud é nach féidir leis na Ballstáit cuspóir an Rialacháin seo, eadhon dea-fheidhmiú an mhargadh inmheánaigh a áirithiú trí cheanglais theicniúla chomhchuibhithe a thabhairt isteach i dtaca le sábháilteacht agus feidhmíocht chomhshaoil mótarfheithiclí agus a leantóirí, agus na gcóras, na gcomhpháirteanna agus na n-aonad teicniúil ar leithligh le haghaidh feithiclí den sórt sin a ghnóthú go leordhóthanach agus gur fearr, dá bhrí sin, de bharr a fhairsinge agus a n-éifeachtaí, is féidir é a ghnóthú ar leibhéal an Aontais, féadfaidh an tAontas bearta a ghlacadh i gcomhréir le prionsabal na coimhdeachta a leagtar amach in Airteagal 5 den Chonradh ar an Aontas Eorpach. De réir phrionsabal na comhréireachta, a leagtar amach san Airteagal sin, ní théann an Rialachán seo thar a bhfuil riachtanach chun an cuspóir sin a bhaint amach.

(35)

Ba cheart ceanglais theicniúla agus nósanna imeachta tástála leormhaithe, chomh maith le forálacha i dtaca le nósanna imeachta aonfhoirmeacha agus sonraíochtaí teicniúla, le haghaidh cineálcheadú mótarfheithiclí agus a leantóirí, a gcóras, a gcomhpháirteanna agus a n-aonad teicniúil ar leithligh a leagan síos i ngníomhartha tarmligthe agus cur chun feidhme luath go leor roimh an dáta a thiocfaidh siad i bhfeidhm chun dóthain ama a thabhairt do mhonaróirí oiriúnú do cheanglais an Rialacháin seo agus na ngníomhartha tarmligthe agus cur chun feidhme a ghlactar dá bhun. Déantar feithiclí áirithe a tháirgeadh i méideanna beaga. Dá bhrí sin, is iomchuí i dtaca leis na ceanglais a leagtar amach sa Rialachán seo agus sna gníomhartha tarmligthe agus cur chun feidhme a ghlacfar dá bhun, go gcuirfear san áireamh iontu na feithiclí nó na haicmí feithiclí sin, i gcás ina bhfuil na ceanglais sin ar neamhréir le húsáid nó le dearadh na bhfeithiclí sin, nó i gcás ina mbeadh an t‐ualach breise a d’fhorchuirfí leis na ceanglais sin díréireach. Dá bhrí sin, ba cheart cur i bhfeidhm an Rialacháin seo a chur siar,