(1)

Is é Coinbhinsiún Chomhairle na hEorpa chun foréigean in aghaidh na mban agus foréigean teaghlaigh a chosc agus a chomhrac (‘an Coinbhinsiún’) an chéad ionstraim idirnáisiúnta arb é is aidhm di deireadh a chur le foréigean in aghaidh na mban, lena n-áirítear cailíní faoi bhun 18 mbliana d’aois, mar bhunchúis le neamhionannas leanúnach idir fir agus mná, trí chreat cuimsitheach de bhearta dlíthiúla agus beartais a bhunú chun foréigean in aghaidh na mban a chosc agus íospartaigh an fhoréigin sin a chosaint agus cúnamh a thabhairt dóibh. Tháinig an Coinbhinsiún i bhfeidhm an 1 Aibreán 2014. I gcomhréir le hAirteagal 75 den Choinbhinsiún, féadfaidh an tAontas a bheith ina Pháirtí sa Choinbhinsiún.

(2)

I gcomhréir le Cinntí (AE) 2017/865 (2) agus (AE) 2017/866 (3) ón gComhairle, síníodh an Coinbhinsiún an 13 Meitheamh 2017 thar ceann an Aontais maidir leis na hábhair a chumhdaítear leis an gCoinbhinsiún agus a thagann faoi inniúlacht eisiach an Aontais Eorpaigh, faoi réir a thabhairt i gcrích ar dháta níos déanaí.

(3)

Cruthaítear leis an gCoinbhinsiún creat dlíthiúil cuimsitheach ilghnéitheach chun mná a chosaint ar gach cineál foréigin. Féachann sé le foréigean in aghaidh na mban agus na gcailíní agus foréigean teaghlaigh a chosc, a ionchúiseamh agus a dhíothú. Clúdaíonn sé raon leathan beart, idir bhailiú sonraí agus múscailt feasachta agus bearta dlíthiúla maidir le cineálacha éagsúla foréigin in aghaidh na mban a choiriúlú. Áirítear ann bearta chun íospartaigh a chosaint agus seirbhísí tacaíochta a sholáthar, agus tugtar aghaidh ann ar ghné an fhoréigin inscnebhunaithe in ábhair a bhaineann le tearmann agus imirce. Bunaítear leis an gCoinbhinsiún sásra faireacháin sonrach chun a áirithiú go gcuirfidh na Páirtithe a fhorálacha chun feidhme go héifeachtach.

(4)

Rannchuideoidh tabhairt i gcrích an Choinbhinsiúin thar ceann an Aontais le comhionannais idir mná agus fir a bhaint amach i ngach réimse, ar príomhchuspóir agus luach lárnach de chuid an Aontais é atá le baint amach ina ghníomhaíochtaí uile i gcomhréir le hAirteagail 2 agus 3 den Chonradh ar an Aontas Eorpach, le hAirteagal 8 den Chonradh ar Fheidhmiú an Aontais Eorpaigh agus le hAirteagal 23 de Chairt um Chearta Bunúsacha an Aontais Eorpaigh. Ní hamháin gur cion coiriúil é an foréigean in aghaidh na mban ach is sárú é freisin ar a gcearta daonna agus is fíorchineál idirdhealaithe é, atá daingnithe i neamhionannas inscne agus a rannchuidíonn lena gcoinneáil ar bun agus lena dtreisiú. Trí ghealltanas a thabhairt maidir le cur chun feidhme an Choinbhinsiúin, deimhníonn an tAontas a rannpháirtíocht chun foréigean in aghaidh na mban a chomhrac ar a chríoch agus ar fud an domhain, agus treisíonn sé a ghníomhaíocht pholaitiúil reatha agus an creat dlíthiúil substaintiúil atá ann cheana i réimse an dlí nós imeachta choiriúil, atá ábhartha go háirithe do mhná agus do chailíní.

(5)

Cumhdaíonn an Coinbhinsiún ábhair a thagann faoi inniúlacht eisiach an Aontais agus ábhair eile a thagann faoi inniúlacht na mBallstát.

(6)

Níor cheart don Aontas aontú don Choinbhinsiún ach amháin maidir leis na hábhair a thagann faoi inniúlacht eisiach an Aontais, eadhon a mhéid a d’fhéadfadh forálacha ábhartha an Choinbhinsiúin difear a dhéanamh do chomhrialacha nó a raon feidhme a athrú. Coimeádann na Ballstáit a n-inniúlacht sa mhéid nach ndéanann an Coinbhinsiún difear do chomhrialacha ná nach n-athraíonn sé a raon feidhme. Tá aontachas an Aontais leis an gCoinbhinsiún i ndáil le hábhair a thagann faoina inniúlacht eisiach gan dochar d’inniúlacht na mBallstát a mhéid a bhaineann le daingniú an Choinbhinsiúin, maidir le hábhair a thagann faoina n-inniúlachtaí náisiúnta.

(7)

Ag céim chur chun feidhme an Choinbhinsiúin, beidh an tAontas freagrach as forálacha an Choinbhinsiúin a thagann faoina inniúlacht eisiach a chur chun feidhme, ach is iad na Ballstáit a dhaingnigh an Coinbhinsiún amháin a bheidh freagrach as cur chun feidhme fhorálacha an Choinbhinsiúin a thagann faoina n-inniúlacht náisiúnta.

(8)

Tá inniúlacht eisiach ag an Aontas freisin glacadh leis na hoibleagáidí a leagtar amach sa Choinbhinsiún maidir lena institiúidí féin agus lena riarachán poiblí féin. Ba cheart don Aontas Eorpach, faoin tráth a dtiocfaidh an Coinbhinsiún i bhfeidhm ar son an Aontais, a áirithiú go gcomhlíonfaidh sé an Coinbhinsiún, lena n-áirítear madir lena institiúidí agus a riaracháin phoiblí féin.

(9)

Ní bhaineann an Cinneadh seo ach le forálacha an Choinbhinsiúin a mhéid is infheidhme iad maidir le hinstitiúidí agus riarachán poiblí an Aontais. Ní bhaineann sé le forálacha an Choinbhinsiúin maidir le comhar breithiúnach in ábhair choiriúla, le tearmann nó le non-refoulement, a dtugtar aghaidh orthu le cinneadh ar leith ón gComhairle atá le glacadh i gcomhthráth leis an gCinneadh seo.

(10)

Dréachtaíodh Cód Iompraíochta lena leagtar síos na socruithe inmheánacha maidir le feidhmiú chearta agus oibleagáidí an Aontais agus na mBallstát faoin gCoinbhinsiún (‘an Cód Iompair’) idir an Chomhairle, na Ballstáit ar páirtithe iad sa Choinbhinsiún agus an Coimisiún. Cumhdaítear leis na socruithe sin, inter alia, ról an Choimisiúin mar chomhlacht comhordaithe de réir bhrí Airteagal 10 den Choinbhinsiún maidir le hábhair a thagann faoi inniúlacht eisiach an Aontais, gan dochar d’inniúlachtaí faoi seach na mBallstát ná d’uathriail institiúidí an Aontais in ábhair a bhaineann lena n-oibríochtaí faoi seach; an tsásra faireacháin lena n-áirítear tuairisciú don Ghrúpa Saineolaithe um ghníomhaíocht in aghaidh foréigean ar mhná agus foréigean baile (GREVIO); rannpháirtíocht an Aontais i gcruinnithe na gcomhlachtaí a cruthaíodh leis an gCoinbhinsiún, go háirithe Coiste na bPáirtithe dá dtagraítear in Airteagal 67 den Choinbhinsiún; seasaimh choiteanna nó chomhordaithe de chuid an Aontais a bhunú do na cruinnithe sin; agus an dlúthchomhar ag na cruinnithe sin, go háirithe maidir leis na ceisteanna a bhaineann le labhairt agus le socruithe vótála. Dá bhrí sin, tá an Cód Iompair seo ceaptha mar uirlis inmheánach phraiticiúil chun cur ar chumas an Aontais agus a Bhallstát ionadaíocht sheachtrach atá comhleanúnach, cuimsitheach agus aontaithe a bhaint amach maidir leis an gCoinbhinsiún.

(11)

Ba cheart an Coinbhinsiún a fhormheas,