(1)

Maidir leis an gcalaois chánach i réimse na cánach breisluacha (CBL), is rud é sin as a n-eascraíonn caillteanais bhuiséadacha shuntasacha agus ag a mbíonn tionchar ar oibriú an mhargaidh inmheánaigh.

(2)

Le Treoir 2006/112/CE ón gComhairle (3), déantar foráil ionas gur féidir leis na Ballstáit, ar bhonn roghnach, an sásra aistrithe táillí (RCM) a úsáid le haghaidh CBL a íoc ar sholáthairtí earraí agus seirbhísí réamhshainithe atá soghabhálach don chalaois, go háirithe calaois laistigh den Chomhphobal arna déanamh ag trádálaí atá ar iarraidh. Forálítear do bheart speisialta an tSásra Frithghnímh Mhear (SFM) leis an Treoir sin chomh maith, lena sholáthraítear do na Ballstáit, faoi choinníollacha dochta áirithe, nós imeachta níos tapa lenar féidir RCM a thabhairt isteach, as a dtagann freagairt níos fearr agus níos éifeachtaí ar chalaois thobann ollmhór. Rachaidh tréimhse chur chun feidhme an dá shásra in éag an 30 Meitheamh 2022.

(3)

Ghlac an Coimisiún dhá thogra reachtacha chun an córas cinntitheach CBL a thabhairt isteach, agus é d’aidhm acu freagairt chuimsitheach a thabhairt ar chalaois laistigh den Chomhphobal arna déanamh ag trádálaí atá ar iarraidh. Na tograí sin, tograí a bhí beartaithe ar dtús teacht i bhfeidhm an 1 Iúil 2022, tá siad fós á gcaibidil ag an gComhairle agus is féidir a thuar nach nglacfar iad roimh an dáta sin, agus nach dtiocfaidh siad i bhfeidhm an dáta sin.

(4)

Ina thuarascáil an 8 Márta 2018, ar éifeachtaí Airteagal 199a agus Airteagal 199b de Threoir 2006/112/CE maidir leis an gcalaois a chomhrac, léiríonn an Coimisiún gur mheas na Ballstáit agus na páirtithe leasmhara i gcoitinne go raibh RCM ina uirlis shealadach éifeachtach chun calaois CBL a chomhrac. Thairis sin, mheas na Ballstáit go raibh SFM ina uirlis úsáideach agus ina bheart réamhchúraim úsáideach in aghaidh cásanna eisceachtúla chalaois CBL. Ó shin i leith, níor athraíodh na coinníollacha dlíthiúla ná na praiticiúlachtaí maidir le cur i bhfeidhm RCM i gcóras CBL an Aontais. Ina theannta sin, níor leasaíodh go suntasach Treoir 2006/112/CE chun dul i ngleic ar bhealach níos struchtúrtha le saincheist na calaoise laistigh den Chomhphobal arna déanamh ag trádálaí atá ar iarraidh. Tá sé réasúnach, dá bhrí sin, glacadh leis go bhfuil na torthaí agus na breithnithe atá sa tuarascáil sin fós bailí den chuid is mó.

(5)

Is cosúil, dá bhrí sin, go raibh RCM agus SFM úsáideach mar bhearta sealadacha agus spriocdhírithe. Dá n-imeoidís in éag, d’fhágfaí na Ballstáit gan uirlisí éifeachtúla chun an chalaois a chomhrac. Ba cheart, dá bhrí sin, síneadh a chur le tréimshe feidhme RCM agus SFM ar feadh tréimhse theoranta ama eile chun gur féidir an chaibidlíocht a dhéanamh sa Chomhairle maidir leis an gcóras cinntitheach CBL, agus chun gur féidir leanúint, idir an dá linn, d’fhorbairt na n-uirlisí chun an chalaois a chomhrac agus de nuachóiriú rialacha tuairiscithe atá le glacadh.

(6)

Ós rud é nach féidir leis na Ballstáit cuspóir na Treorach seo, eadhon uirlisí chun an chalaois a chomhrac a chaomhnú, a ghnóthú go leordhóthanach, agus gur fearr is féidir é a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta a leagtar amach in Airteagal 5 den Chonradh ar an Aontas Eorpach. I gcomhréir le prionsabal na comhréireachta a leagtar amach san Airteagal sin, ní théann an Treoir seo thar a bhfuil riachtanach chun an cuspóir sin a bhaint amach.

(7)

Ba cheart Treoir 2006/112/CE a leasú dá réir,