L-Awtorità għall-Ġlieda kontra l-Ħasil tal-Flus u l-Ġlieda kontra l-Finanzjament tat-Terroriżmu

PUNTI EWLENIN

L-AMLA, li hija responsabbli lejn il-Parlament Ewropew u l-Kunsill tal-Unjoni Ewropea, għandha l-kompiti ġenerali li ġejjin:

• il-monitoraġġ u l-valutazzjoni tat-theddidiet tal-ħasil tal-flus u t-terroriżmu u r-riskji fl-UE u fid-dinja;
• il-ġbir, l-analiżi u l-kondiviżjoni ta’ informazzjoni minn network ta’ superviżuri nazzjonali u Ewropej;
• il-faċilitar u t-titjib tal-kooperazzjoni u l-iskambju ta’ informazzjoni fost l-Unitajiet tal-Intelligence Finanzjarja (UIF) tal-UE;
• l-organizzazzjoni, il-bidu u l-appoġġ ta’ analiżi konġunta mill-FIUs ta’ tranżazzjonijiet jew attività transkonfinali suspettuż;
• il-kooperazzjoni ma’ istituzzjonijiet, korpi, uffiċċji u aġenziji oħra tal-UE ma’ kompetenzi fil-qasam tal-ġlieda kontra reati kriminali serji, pereżempju l-Uffiċċju tal-Prosekutur Pubbliku Ewropew (UPPE), l-Aġenzija tal-Unjoni Ewropea għall-Kooperazzjoni fil-Ġustizzja Kriminali (Eurojust), l-Aġenzija tal-Unjoni Ewropea għall-Kooperazzjoni fl-Infurzar tal-Liġi (Europol) u l-Uffiċċju Ewropew Kontra l-Frodi (OLAF);
• l-istabbiliment u ż-żamma aġġornata ta’ bażi tad-data ta’ informazzjoni ċentrali li l-kontenut tagħha huwa disponibbli għas-superviżuri nazzjonali u Ewropej;
• il-ħruġ ta’ pubblikazzjonijiet u l-forniment ta’ taħriġ fil-qasam tal-ġlieda kontra l-ħasil tal-flus u l-ġlieda kontra l-finanzjament tat-terroriżmu (AML/CFT);
• tagħrif lill-Kummissjoni Ewropea jekk Stat Membru tal-UE jonqos milli japplika b’mod korrett ir-regoli tal-UE li jindirizzaw il-ħasil tal-flus u il-finanzjament tat-terroriżmu fid-Direttiva (UE) 2024/1640 (ara s-sommarju);
• l-iżgurar li s-sistema superviżorja tal-AML/CFT topera b’mod effettiv u konsistenti billi:
  • tiżviluppa metodoloġija superviżorja armonizzata,
  • tirrikjedi li l-awtoritajiet superviżorji jwettqu reviżjonijiet annwali b’tema speċifika,
  • tippromwovi approċċi superviżorji komuni u l-aħjar prattiki.

Hija għandha wkoll kompiti superviżorji u ta’ sorveljanza speċifiċi fuq:

• l-individwu u l-gruppi ta’ istituzzjonijiet ta’ kreditu u ta’ istituzzjonijiet finanzjarji bi profil ta’ riskju għoli magħżul għal superviżjoni diretta (“entitajiet obbligati magħżula”);
• is-superviżuri finanzjarji u mhux finanzjarji tal-entitajiet l-oħra kollha fl-UE;
• l-FIUs nazzjonali; u
• is-setgħa li, fost affarijiet oħra:
  • toħroġ deċiżjonijiet vinkolanti lill-istituzzjonijiet individwali b’riskju għoli,
  • titlob lis-superviżuri jipprovdulha l-informazzjoni kollha meħtieġa,
  • titlob data, analiżi u statistika mhux operazzjonali mill-FIUs,
  • tabbozza standards tekniċi regolatorji, linji gwida u rakkomandazzjonijiet.

Superviżjoni diretta ta’ entitajiet obbligati magħżula

AMLA:

• tagħżel, kull tliet snin, entitajiet obbligati, li huma istituzzjonijiet ta’ kreditu u istituzzjonijiet finanzjarji bi profili ta’ riskju għoli u operazzjonijiet f’mill-inqas sitt Stati Membri, għal superviżjoni diretta;
• taħtar tim superviżorju konġunt għal kull entità obbligata magħżula;
• twettaq superviżjoni diretta, flimkien ma’ persunal minn superviżuri nazzjonali rilevanti, permezz ta’ investigazzjonijiet ġenerali, spezzjonijiet fuq il-post, eċċ.;
• tista’ tapplika sanzjonijiet monetarji amministrattivi u ħlasijiet perjodiċi ta’ penali, li l-Qorti tal-Ġustizzja tal-Unjoni Ewropea għandha s-setgħa li tirrevedi, tannulla, tnaqqas jew iżżid.

Superviżjoni indiretta

AMLA:

• tevalwa s-superviżuri finanzjarji perjodikament biex jiġu żgurati standards u prattiki ta’ livell għoli b’mod konsistenti;
• twettaq reviżjonijiet bejn il-pari ta’ sorveljaturi mhux finanzjarji u korpi pubbliċi;
• tiżgura li jeżistu kollegi superviżorji tal-AML/CFT fis-setturi finanzjarji u mhux finanzjarji għall-istituzzjonijiet ikkonċernati;
• issolvi kwalunkwe problema transkonfinali bejn is-superviżuri finanzjarji;
• taġixxi kontra s-superviżuri li qed ifallu fid-dmirijiet tagħhom.

Il-Kummissjoni:

• tista’ tuża atti delegati għal erba’ snin, mis-26 ta’ Ġunju 2024, biex tadotta rtandards tekniċi regolatorji, li ma jistgħux jinkludu deċiżjonijiet strateġiċi jew għażliet ta’ politika u li l-Parlament jew il-Kunsill jista’ jisfida;
• tippreżenta rapport dwar il-prestazzjoni tal-AMLA sal-31 ta’ Diċembru 2030, u kull ħames snin wara dan.

Ir-regolament jemenda:

• Ir-Regolament (UE) Nru 1093/2010 dwar l-Awtorità Bankarja Ewropea;
• Ir-Regolament (UE) Nru 1094/2010 dwar l-Awtorità Ewropea tal-Assigurazzjoni u tal-Pensjonijiet tax-Xogħol;
• Ir-Regolament (UE) Nru 1095/2010 dwar l-Awtorità Ewropea tat-Titoli u s-Swieq).