Vjeġġi ta’ skart

PUNTI EWLENIN

Kamp ta’ applikazzjoni

Dan ir-regolament japplika għal:

• vjeġġi bejn l-Istati Membri tal-UE;
• esportazzjonijiet u importazzjonijiet għal u minn pajjiżi mhux tal-UE;
• tranżizzjoni ta’ skart fl-UE kollha.

Ir-regolament ma japplikax għal vjeġġi ta’ kategoriji varji ta’ skart, bħal prodotti sekondarji mill-annimali jew skart radjuattiv, li huma koperti minn leġiżlazzjoni separata tal-UE.

Vjeġġi intra-UE

Vjeġġi għar-rimi ta’ skart fl-UE;

• huma pprojbiti bħala regola ġenerali;
• huma permessi jekk il-vjeġġ ikun:
  • iddikjarat elettronikament minn qabel taħt il-proċedura ta' notifika u approvazzjoni (PIC), li għandha kundizzjonijiet, kronoloġiji u skadenzi speċifiċi — l-Anness I jipprovdi formola standard,
  • akkumpanjat mid-dokumentazzjoni neċessarja b’konferma bil-miktub mill-pajjiżi ta’ spedizzjoni, destinazzjoni u tranżitu qabel l-esportazzjoni,
  • approvat, bi jew mingħajr kundizzjonijiet, mill-awtoritajiet kompetenti.

Vjeġġi għall-irkupru ta’ skart fl-UE:

• elenkati f’Anness IV, meqjusa perikolużi jew li ma jistgħux ikunu rkuprati b’manjera li tiffavorixxi l-ambjent, jridu jużaw l-istess PIC bħall-vjeġġi ta’ rimi tal-iskart t’hawn fuq;
• jikkonformaw mar-rekwiżiti inqas strinġenti tal-informazzjoni ġenerali jekk ikunu identifikati bħala skart elenkat “ekoloġiku” f’Annessi III, IIIA u IIIB jew taħt 250kg u destinati għal analiżi tal-laboratorju.

Rekwiżiti dwar informazzjoni ġenerali jistipulaw:

• li skart tal-irkupru jista’ jmur biss ġo faċilità legalment awtorizzata;
• li l-partijiet kollha involuti fit-trasportazzjoni jridu jimlew il-formola tal-informazzjoni f’Anness VII;
• il-faċilità tal-irkupru trid tipprovdi ċertifikat ladarba ix-xogħol ikun terminat.

Regoli addizzjonali jiddikjaraw:

• skart notifikat fi vjeġġ ta’ irkupru jew rimi ma jistax ikun imħallat ma’ skart jew sustanzi oħra;
• id-dokumenti kollha jrid jinżammu tal-inqas ħames snin;
• il-Kummissjoni Ewropea tippubblika informazzjoni dwar vjeġġi suġġett għall-notifika u rekwiżiti dwar informazzjoni ġenerali fuq is-sit tal-internet tagħha, b’aġġornamenti ta’ kull xahar;
• hemm proċeduri addizzjonali jekk vjeġġ ma jkunx jista’ jkun komplut kif intenzjonat jew ikun illeġali;
• l-Istati Membri jistabbilixxu u japplikaw il-miżuri tas-superviżjoni u tal-kontroll tagħhom konformi mar-regolament, għal skart trasportat esklużivament fi ħdan il-konfini tagħhom stess.

Esportazzjonijiet mill-UE għal pajjiżi mhux tal-UE

Esportazzjonijiet ta’ skart mhux riutilizzabbli mill-UE huma:

• ipprojbiti bħala regola ġenerali;
• permessi għal pajjiżi tal-Assoċjazzjoni Ewropea tal-Kummerċ Ħieles jekk dawn:
  • huma parti għall-Konvenzjoni ta’ Basel;
  • ma jipprojbixxux tali importazzjonijiet;
  • jikkonformaw mar-regoli interni dwar vjeġġi fl-UE, b’xi modifiki.

Esportazzjonijiet mill-UE għal pajjiżi mhux tal-OECD ta’:

• skart perikoluż u ċerti tipi oħra ta’ skart (elenkat f’Anness V) inkluż il-plastiks, għal irkupru huma pprojbiti ħlief f’ċirkostanzi eċċezzjonali;
• skart mhux perikoluż hu pprojbit ħlief:
  • għal skart tal-metall u minerali tal-metall li hu suġġett għar-rekwiżiti dwar informazzjoni ġenerali jew proċeduri PIC,
  • fejn pajjiż jista’ juri li l-iskart ser ikun immaniġġjat b’mod li jiffavorixxi l-ambjent, u jitlob inklużjoni fuq il-lista ta’ destinazzjonijiet approvati, il-Kummissjoni ser tadotta sal-21 ta’ Novembru 2026 u taġġorna regolarment.

Rekwiżiti oħra jiddikjaraw:

• il-Kummissjoni timmonitorja l-esportazzjonijiet ta’ skart tal-UE, b’mod partikolari ta’ plastiks, għal pajjiżi tal-OECD minħabba l-impatt ambjentali u fuq is-saħħa u biex tassikura li ma jkunux trasportati lejn destinazzjonijiet terzi.;
• l-esportaturi jridu juru li l-iskart ser ikun immaniġġjat b’mod li jiffavorixxi l-ambjent;
• esportazzjonijiet ta’ skart lill-Antarctica u lil pajjiżi u territorji barranin huma pprojbiti.

Importazzjonijiet ġol-UE minn pajjiżi mhux tal-UE

Ir-regolament:

• jipprojbixxi importazzjonijiet ta’ skart għar-rimi jew irkupru ħlief minn:
  • partijiet għall-Konvenzjoni ta’ Basel;
  • pajjiżi oħra li magħhom l-UE jew l-Istati Membri kkonkludew arranġamenti bilaterali jew multilaterali;
  • oqsma oħra matul sitwazzjonijiet eċċezzjonali, bħal kriżi, operazzjonijiet taż-żamma tal-paċi jew gwerra;
• jirrekjedi li l-awtoritajiet kompetenti fl-UE jassikuraw li l-iskart impurtat ma jipperikolax is-saħħa umana u li hu ġestjonat b’mod li jiffavorixxi l-ambjent.

Ġestjoni u infurzar li jiffavorixxu l-ambjent

Ir-regolament jitlob:

• li produtturi tal-iskart, notifikaturi, spedituri u oħrajn involuti fl-irkupru jew rimi tal-iskart ma jipperikolawx is-saħħa umana u japplikaw prattiċi tajba ambjentali matul il-proċess intier.
• L-Istati Membri jridu:
  • jisspezzjonaw postijiet, kumpaniji, sensara, negozjanti, vjeġġi u materjal ittrattat,
  • joħolqu u japplikaw pjanijiet nazzjonali għal spezzjonijiet,
  • jimponu penalitajiet xierqa għal ksur tar-regolament,
  • jassikuraw koordinazzjoni bejn l-aġenziji tal-infurzar tagħhom stess,
  • jikkooperaw ma’ partijiet oħra għall-Konvenzjoni ta’ Basel;
• joħolqu grupp ta’ infurzar tat-trasportazzjoni tal-iskart biex jappoġġja kooperazzjoni bejn l-Istati Membri biex jipprevenu u jiskopru vjeġġi illeġali;
• il-Kummissjoni:
  • trid tappoġġja u tikkumplimenta attivitajiet nazzjonali tal-infurzar,
  • tvara l-ispezzjoni tagħha stess jekk tissuspetta li vjeġġ hu illeġali,
  • tissottometti rapport ta’ rieżami lill-Parlament Ewropew u lill-Kunsill tal-Unjoni Ewropea sal-31 ta’ Diċembru 2035

Il-Kummissjoni tista’ wkoll tintervista persuni fiżiċi jew ġiuridiċi għal informazzjoni, u tista’ tadotta atti delegati biex temenda l-annessi tar-regolament.