Access to European Union law
<a href="https://eur-lex.europa.eu/content/help/eurlex-content/experimental-features.html" target="_blank">More about the experimental features corner</a>
Choose the experimental features you want to try
EUR-Lex
Access to European Union law

This document is an excerpt from the EUR-Lex website

You are here
Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search

Document 32012R0711

    Regolament ta’ Implimentazzjoni tal-Kummissjoni (UE) Nru 711/2012 tat- 3 ta’ Awwissu 2012 li jemenda r-Regolament (UE) Nru 185/2010 li jistipula miżuri dettaljati għall-implimentazzjoni tal-istandards bażiċi komuni dwar is-sigurtà tal-avjazzjoni fir-rigward tal-metodi użati għall-iskrinjar tal-persuni għajr il-passiġġieri u l-oġġetti li jġorru magħhom Test b’relevanza għaż-ŻEE

    ĠU L 209, 4.8.2012, p. 1–3 (BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV)

    ⏵Dan id-dokument ġie ppubblikat f’edizzjoni(jiet) speċjali (HR)

    Legal status of the document No longer in force, Date of end of validity: 14/11/2015; Impliċitament imħassar minn 32015R1998

    ELI: http://data.europa.eu/eli/reg_impl/2012/711/oj

    4.8.2012   

    MT

    Il-Ġurnal Uffiċjali tal-Unjoni Ewropea

    L 209/1

    REGOLAMENT TA’ IMPLIMENTAZZJONI TAL-KUMMISSJONI (UE) Nru 711/2012

    tat-3 ta’ Awwissu 2012

    li jemenda r-Regolament (UE) Nru 185/2010 li jistipula miżuri dettaljati għall-implimentazzjoni tal-istandards bażiċi komuni dwar is-sigurtà tal-avjazzjoni fir-rigward tal-metodi użati għall-iskrinjar tal-persuni għajr il-passiġġieri u l-oġġetti li jġorru magħhom

    (Test b’relevanza għaż-ŻEE)

    IL-KUMMISSJONI EWROPEA,

    Wara li kkunsidrat it-Trattat dwar il-Funzjonament tal-Unjoni Ewropea,

    Wara li kkunsidrat ir-Regolament (KE) Nru 300/2008 tal-Parlament Ewropew u tal-Kunsill tal-11 ta’ Marzu 2008 dwar regoli komuni fil-qasam tas-sigurtà tal-avjazzjoni ċivili u li jħassar ir-Regolament (KE) Nru 2320/2002 (1), u b’mod partikolari l-Artikolu 4(3) tiegħu,

    Billi:

    (1)

    Ir-Regolament tal-Kummissjoni (KE) Nru 272/2009 tat-2 ta’ April 2009 li jissupplimenta l-istandards bażiċi komuni dwar is-sigurtà tal-avjazzjoni ċivili stabbiliti fl-Anness tar-Regolament (KE) Nru 300/2008 tal-Parlament Ewropew u tal-Kunsill (2) jipprovdi li r-regoli ta’ implimentazzjoni għandhom jiġu adottati skont l-Artikolu 4(3) tar-Regolament (KE) Nru 300/2008 li jista’ jippermetti l-użu ta’ tagħmir għall-individwazzjoni ta’ traċċi ta’ splussivi (ETD) u ta’ klieb li jindividwaw l-isplussivi għall-iskrinjar tal-persuni għajr il-passiġġieri u l-oġġetti li jġorru magħhom.

    (2)

    Jeħtieġ li jiġu adottati dispożizzjonijiet dettaljati dwar l-iskjerament ta’ tagħmir għall-individwazzjoni ta’ traċċi tal-isplussivi (ETD) u tal-klieb li jindividwaw l-isplussivi għall-iskrinjar tal-persuni għajr il-passiġġieri u l-oġġetti li jġorru magħhom.

    (3)

    L-użu ta’ tagħmir għall-individwazzjoni ta’ traċċi tal-isplussivi (ETD) u tal-klieb li jindividwaw l-isplussivi għall-iskrinjar tal-persuni għajr il-passiġġieri u l-oġġetti li jġorru magħhom, għandu jikkunsidra l-kuntest speċifiku għall-iskrinjar tal-persunal u jista’ jħaffef u jtejjeb l-effettività tal-proċess tal-iskrinjar.

    (4)

    Id-dispożizzjonijiet rigward l-individwaturi tal-metall li tgħaddi minnhom (WTMD) huma stabbiliti fir-Regolament tal-Kummissjoni (UE) Nru 185/2010 tal-4 ta’ Marzu 2010 li jistipula miżuri għall-implimentazzjoni tal-istandards bażiċi komuni dwar is-sigurtà tal-avjazzjoni (3), għandhom jiġu riveduti f’konformità mal-evoluzzjoni tat-theddida għall-avjazzjoni ċivili u r-riskju li ġej mill-kategoriji differenti ta’ persuni.

    (5)

    Għaldaqstant, ir-Regolament (UE) Nru 185/2010 għandu jiġi emendat skont dan.

    (6)

    Il-miżuri previsti f’dan ir-Regolament huma skont l-opinjoni tal-Kumitat dwar is-Sigurtà tal-Avjazzjoni Ċivili,

    ADOTTAT DAN IR-REGOLAMENT:

    Artikolu 1

    L-Anness tar-Regolament (UE) Nru 185/2010 huwa emendat skont l-Anness ta’ dan ir-Regolament.

    Artikolu 2

    Dan ir-Regolament għandu jidħol fis-seħħ fl-għoxrin jum wara l-pubblikazzjoni tiegħu f’Il-Ġurnal Uffiċjali tal-Unjoni Ewropea.

    Dan ir-Regolament għandu jorbot fl-intier tiegħu u japplika direttament fl-Istati Membri kollha.

    Magħmul fi Brussell, it-3 ta’ Awwissu 2012.

    Għall-Kummissjoni

    Il-President

    José Manuel BARROSO

    (1)  ĠU L 97, 9.4.2008, p. 72.

    (2)  ĠU L 91, 3.4.2009, p. 7

    (3)  ĠU L 55, 5.3.2010, p. 1.

    ANNESS

    L-Anness għar-Regolament (UE) Nru 185/2010 huwa emendat kif ġej:

    1.

    Il-punt 1.3.1. huwa sostitwit b’dan li ġej:

    “1.3.1   Skrinjar ta’ persuni għajr il-passiġġieri u l-oġġetti li jġorru magħhom

    1.3.1.1

    Persuni għajr il-passiġġieri għandhom ikunu skrinjati permezz ta’ wieħed mill-mezzi li ġejjin:

    (a)

    tfittxija bl-idejn;

    (b)

    individwaturi tal-metall li tgħaddi minnhom (WTMD);

    (c)

    klieb li jindividwaw l-isplussivi;

    (d)

    tagħmir għall-individwazzjoni ta’ traċċi tal-isplussivi (ETD);

    (e)

    skaners tas-sigurtà li ma jużawx radjazzjoni jonizzanti.

    1.3.1.2

    Il-punti 4.1.1.3 – 4.1.1.6 u 4.1.1.10 għandhom japplikaw fir-rigward tal-iskrinjar ta’ persuni għajr il-passiġġieri.

    1.3.1.3

    Il-klieb li jindividwaw l-isplussivi u t-tagħmir ETD jistgħu jintużaw biss bħala mezz supplimentari ta’ skrinjar jew f’alternazzjoni mhux prevista tat-tfittxija bl-idejn, tal-WTMD jew tal-iskaners tas-sigurtà.

    1.3.1.4

    L-oġġetti li jġorru magħhom il-persuni għajr il-passiġġieri għandhom ikunu skrinjati permezz ta’ wieħed mill-mezzi li ġejjin:

    (a)

    tfittxija bl-idejn;

    (b)

    tagħmir bir-raġġi X;

    (c)

    tagħmir b’sistemi għall-individwazzjoni tal-isplussivi (EDS);

    (d)

    klieb li jindividwaw l-isplussivi;

    (e)

    tagħmir għall-individwazzjoni ta’ traċċi tal-isplussivi (ETD).

    1.3.1.5

    Il-punti 4.1.2.4 – 4.1.2.7 għandhom japplikaw fir-rigward tal-iskrinjar tal-oġġetti li persuni għajr il-passiġġieri jġorru magħhom.

    1.3.1.6

    Il-klieb li jindividwaw l-isplussivi u t-tagħmir ETD jistgħu jitużaw biss bħala mezz supplimentari ta’ skrinjar jew f’alternazzjoni mhux prevista tat-tfittxija bl-idejn, tat-tagħmir bir-raġġi X jew tat-tagħmir b’sistemi għall-individwazzjoni tal-isplussivi (EDS).

    1.3.1.7

    L-oġġetti elenkati fid-Dokument Mehmuż 4-C jistgħu jinġarru biss jekk il-persuna tkun awtorizzata ġġorrhom sabiex twettaq il-ħidmiet li huma essenzjali għat-tħaddim tal-faċilitajiet tal-ajruport jew tal-inġenji tal-ajru, jew sabiex twettaq il-ħidmiet ta’ waqt it-titjira.

    1.3.1.8

    Fejn persuni għajr il-passiġġieri u l-oġġetti li jġorru magħhom jeħtieġu li jiġu skrinjati fuq bażi aleatorja, il-frekwenza għandha tiġi stabbilita mill-awtorità xierqa abbażi ta’ valutazzjoni tar-riskji.

    1.3.1.9

    L-iskrinjar ta’ persuni għajr il-passiġġieri u l-oġġetti li jġorru magħhom għandhom ikunu wkoll soġġetti għad-dispożizzjonijiet addizzjonali stabbiliti f’Deċiżjoni separata li ħadet il-Kummissjoni.”

    2.

    Il-punt 12.1.2. huwa sostitwit b’dan li ġej:

    “12.1.2   Standards għall-WTMD

    12.1.2.1

    Għandu jkun hemm żewġ standards għall-WTMD. Ir-rekwiżiti dettaljati dwar dawn l-istandards huma stabbiliti f’Deċiżjoni separata li ħadet il-Kummissjoni.

    12.1.2.2

    Il-WTMD kollha użati esklussivament għall-iskrinjar tal-persuni għajr il-passiġġieri għandhom jissodisfaw l-istandard 1.

    12.1.2.3

    Il-WTMD użati għall-iskrinjar tal-passieġġieri għandhom jissodisfaw l-istandard 2.”
    Top