A.

billi l-kunċett ta’ midja ħielsa u indipendenti huwa komponent prinċipali tad-dritt fundamentali għal-libertà tal-espressjoni, kif stipulat fid-Dikjarazzjoni Universali tad-Drittijiet tal-Bniedem u sussegwentement approvat kemm mill-Karta tad-Drittijiet Fundamentali tal-Unjoni Ewropea kif ukoll mill-Ftehima ta’ Sħubija ta’ Cotonou,

B.

billi hemm rikonoxximent ġenerali fil-fora globali, bħal pereżempju l-Federazzjoni Internazzjonali tal-Ġurnalisti, l-Assoċjazzjoni Dinjija tal-Gazzetti, il-Kumitat għall-Protezzjoni tal-Ġurnalisti, il-Ġurnalisti Mingħajr Fruntieri u l-Freedom House, li l-libertà u l-indipendenza fil-midja huma kruċjali għall-funzjonament xieraq ta’ demokrazija fejn il-libertajiet bażiċi huma rrispettati u ta’ soċjetà fejn id-drittijiet tal-individwu jingħataw il-valur reali tagħhom,

C.

billi żviluppi reċenti wrew li kien hemm rigress b’mod ġenerali f’termini ta’ libertà tal-espressjoni fil-midja, kif ħareġ mir-rapporti ta’ entitajiet indipendenti, kemm f’pajjiżi żviluppati kif ukoll f’pajjiżi li qed jiżviluppaw,

D.

billi r-reġimi awtoritarji mhux biss qed jillimitaw il-libertà tal-midja biex joħonqu l-oppożizzjoni, u b’hekk ifixklu l-funzjonament xieraq tad-demokrazija, iżda qed jipperikolaw ukoll il-proċessi elettorali u l-operat normali tas-soċjetà billi jieħdu miżuri li jillimitaw id-dritt tal-oppożizzjoni u tal-minoritajiet li jippromwovu l-messaġġ tagħhom b’mod ħieles u trasparenti,

E.

billi hemm ukoll rikorrenza mifruxa ta’ attivitajiet imwettqa minn kriminali fis-soċjetà, anki f’żoni iktar prosperi tad-dinja, li joħonqu kwalunkwe tip ta’ ġurnaliżmu investigattiv, u saħansitra jaslu biex joqtlu individwi li jkunu jaħdmu fil-midja u li jippruvaw jikxfu l-attivitajiet tagħhom,

F.

billi entitajiet indipendenti identifikaw rigress tas-sitwazzjoni fir-rigward tal-libertà u l-indipendenza tal-midja kemm f’pajjiżi tal-UE kif ukoll f’dawk tal-AKP,

G.

billi ċerti pajjiżi tal-UE niżlu ’l isfel fil-klassifiki ġenerali fil-qasam tal-libertà u l-indipendenza tal-midja, f’xi każijiet b’mod konsiderevoli,

H.

billi hemm ċerti pajjiżi tal-AKP fejn il-libertà u l-indipendenza tal-midja huma estremament ristretti jew saħansitra ma jeżistux; billi ċerti pajjiżi tal-AKP bħal pereżempju l-Ħaiti, il-Gujana u l-Papwa Ginea Ġdida ġew imfaħħra għall-progress miksub fir-rigward tat-titjib tal-libertà tal-midja,

I.

billi l-ġurnalisti għandhom ir-responsabilità, li hija proporzjonali għall-influwenza tagħhom, li ma jinċitawx il-mibegħda, b’mod partikolari l-mibegħda razzjali,

J.

billi l-iżvilupp ta’ teknoloġija ġdida relatata mal-internet u t-telefonija mobbli qed jipprovdi lin-nies opportunitajiet dejjem aqwa biex jesprimu lilhom infushom,

1.

Tikkundanna r-rigress tas-sitwazzjoni fir-rigward tal-libertà u l-indipendenza tal-midja fid-dinja, fejn ir-reġimi awtoritarji joħonqu lill-oppożizzjoni billi jikkommettu ksur serju tad-drittijiet tal-bniedem fil-konfront ta’ ġurnalisti, impjegati fil-midja u utenti tal-internet, li jista’ saħansitra jikkonsisti fi qtil jew priġunerija illegali, u b’hekk ikunu qed jiksru l-Artikoli 19 u 20 tal-Patt Internazzjonali dwar id-Drittijiet Ċivili u Politiċi;

2.

Tiddenunzja l-konsegwenzi negattivi li jirriżultaw minn sjieda kkonċentrata ta’ midja minn impriżi kummerċjali kbar, partikolarment f’termini ta’ tnaqqis ta’ pluraliżmu, kundizzjonar tal-libertà li wieħed jinforma u li jiġi infurmat, restrizzjonijiet imposti fuq l-attività tal-ġurnalisti u emerġenza ta’ forom ġodda, espliċiti u impliċiti, ta’ ċensura;

3.

Tistieden lill-gvernijiet li arrestaw ġurnalisti li kienu qed iwettqu l-funzjonijiet leġittimi tagħhom, biex jirrilaxxawhom immedjatament;

4.

Tistieden lill-Kummissjoni Ewropea, lill-Grupp AKP u lill-Istati Membri tal-UE biex jikkundannaw bis-saħħa l-forom kollha ta’ ksur tal-libertà tal-kelma u tal-istampa fil-pajjiżi membri u msieħba tagħhom;

5.

Tikkundanna l-atti mwettqa minn suġġetti kriminali li ta’ spiss ma jiġux ikkastigati, liema suġġetti ħafna drabi jkunu jaħdmu fi gruppi ta’ kriminalità organizzata jew fuq ordnijiet tal-awtoritajiet politiċi, u li jikkawżaw fastidju, iweġġgħu u xi drabi joqtlu lill-ġurnalisti talli jkunu qed jinvestigaw l-attivitajiet tagħhom;

6.

Tikkunsidra li huwa inaċċettabbli li l-ġurnalisti jkollhom jillimitaw, jaġġustaw jew iwaqqfu l-attivitajiet tagħhom jew li jkollhom jgħixu f’sitwazzjoni ta’ priġunerija, minħabba li jkunu indirizzaw kwistjonijiet reliġjużi;

7.

Tikkunsidra li huwa inaċċettabbli li figuri reliġjużi jaqtgħu sentenzi fir-rigward tal-ġurnalisti, biex b’hekk jillimitaw l-attivitajiet tagħhom, jirrestrinġu l-libertà tal-espressjoni tagħhom u jpoġġu ħajjithom fil-periklu;

8.

Jiddispjaċiha li m’hemm ebda strument effettiv għall-infurzar tar-rispett tad-drittijiet fundamentali meta jiġu applikati l-ftehimiet dwar il-kummerċ u l-koperazzjoni internazzjonali;

9.

Tenfasizza li l-libertà u l-indipendenza tal-midja huma elementi essenzjali għall-funzjonament xieraq ta’ soċjetà demokratika, li jvarjaw mill-organizzazzjoni ta’ elezzjonijiet liberi u ġusti sal-libertà tal-espressjoni pluralistika għal kulħadd;

10.

Tirrikonoxxi li l-membri tal-midja għandhom responsabilità morali u legali biex jagħtu lill-pubbliku informazzjoni ta’ kwalità tajba u għandhom joffru l-aħjar servizz lill-pubbliku; madankollu tikkonsidra li l-gvernijiet, il-kumpaniji u l-entitajiet kriminali m’għandhomx jippruvaw jiċċensuraw il-midja;

11.

Tirrikonoxxi li forom ġodda ta’ midja bbażata fuq l-Internet għandhom jiġu protetti bħala parti mill-midja ħielsa u indipendenti, minbarra l-midja tradizzjonali tar-radju, it-televixin u l-gazzetti;

12.

Titlob referenza iktar espliċita għal-libertà u l-indipendenza tal-midja fi ftehimiet internazzjonali biex tiġi żgurata l-applikazzjoni ta’ kondizzjonalità xierqa meta tali libertà tiġi limitata;

13.

Tesprimi tħassib dwar ir-rigress fil-klassifiki tal-libertà tal-istampa f’ċerti pajjiżi tal-AKP, iżda tfaħħar lill-Papwa Ginea Ġdida, lill-Gujana, lill-Gana, lit-Tanzanija, lil Ġibuti u lil-Lesoto talli pprovdew eżempju tajjeb ta’ x’jista’ jinkiseb f’pajjiżi tal-AKP minkejja l-kundizzjonijiet diffiċli; tiddikjara li għaxra mill-pajjiżi tal-AKP jinsabu fost l-ewwel 50 pożizzjoni fil-klassifiki tal-2009, iżda li Stat Membru wieħed tal-UE ma kklassifikax mal-ewwel 50;

14.

Tesprimi tħassib dwar restrizzjonijiet fil-libertà tal-midja f’pajjiżi li japplikaw għall-adeżjoni kemm mal-UE kif ukoll mal-Ftehima ta’ Cotonou, u titlob li l-adeżjoni tkun waħda kkundizzjonata mir-rispett tad-drittijiet tal-bniedem u, b’mod espliċitu, ir-rispett tal-libertà tal-espressjoni fil-gazzetti u f’midja oħra;

15.

Jiddispjaċiha li, ta’ spiss wisq, il-midja jkollha twieġeb iżżejjed għall-interessi ekonomiċi jew politiċi jew għall-Istat, fatt li jillimita l-pluraliżmu tal-opinjoni;

16.

Titlob il-promozzjoni ta’ kodiċi etiċi u statuti li jipproteġu l-indipendenza editorjali tal-ġurnalisti, jippromwovu standards professjonali u jobbligawhom jeżerċitaw l-indipendenza tagħhom b’mod responsabbli fil-limiti tal-Artikolu 20 tad-Dikjarazzjoni Universali tad-Drittijiet tal-Bniedem u fl-organizzazzjonijiet rappreżentattivi tal-ġurnalisti;

17.

Titlob li tiġi stabbilita linja baġitarja separata fi ħdan il-baġit għall-għajnuna għall-iżvilupp tal-Kummissjoni Ewropea, bl-għan li jiżdiedu l-bini tal-kapaċità u t-taħriġ tal-ġurnalisti, b’mod partikolari fil-pajjiżi tal-AKP;

18.

Tfaħħar lill-Kummissjoni Ewropea għall-inizjattivi tagħha fil-qasam tal-libertà u l-indipendenza tal-midja, u tistedinha tkompli tippromwovi l-libertà tal-espressjoni ġurnalistika permezz tal-programmi tagħha, pereżempju l-Premju Lorenzo Natali u l-Istrument Ewropew għad-Demokrazija u d-Drittijiet tal-Bniedem;

19.

Tagħti istruzzjonijiet lill-ko-Presidenti tagħha biex isibu mezzi ta’ kif hija tista’ tappoġġa l-azzjoni favur il-libertà tal-istampa fil-pajjiżi tal-AKP u tal-UE permezz ta’ premju annwali mogħti mill-Assemblea Parlamentari Konġunta (APK) AKP-UE, u biex jirrapportaw dwar dan fis-sessjoni li jmiss tal-APK;

20.

Tfaħħar ix-xogħol ta’ organizzazzjonijiet professjonali bħal pereżempju l-IFJ, l-EFJ, l-FAJ, l-IPI u l-WAN, l-NGOs bħal pereżempju l-RWB, il-Freedom House, il-Kumitat għall-Protezzjoni tal-Ġurnalisti u l-Programm Internazzjonali tal-UNESCO għall-Iżvilupp tal-Komunikazzjoni, fir-rigward tal-promozzjoni tal-għarfien dwar il-ksur tal-libertà tal-midja madwar id-dinja, u tappella li xogħolhom jiġi appoġġjat u ċċirkolat kemm jista’ jkun;

21.

Tilqa’ l-inizjattiva tal-UE u tal-UA li jappoġġjaw in-Netwerk u l-Portal tal-Midja pan-Afrikana;

22.

Timpenja ruħha li tkompli tissorvelja l-libertà u l-indipendenza tal-midja fl-Istati tal-AKP u tal-UE, kif ukoll fir-relazzjonijiet istituzzjonali tagħha fil-livell reġjonali u internazzjonali;

23.

Tagħti istruzzjonijiet lill-ko-Presidenti tagħha biex jgħaddu din ir-riżoluzzjoni lill-istituzzjonijiet tal-AKP u tal-UE.

A.

billi huwa essenzjali li jiġu aċċelerati r-riċerka, l-iżvilupp u t-trasferiment ta’ teknoloġiji b'livell baxx ta’ karbonju (LCTs – Low Carbon Technologies) f'pajjiżi tal-AKP u tal-UE biex jitwaqqaf it-tisħin globali (wara li inizjalment kien ġie limitat għal mhux iktar minn 1,5 °C ogħla mil-livelli preindustrijali), jinħolqu ekonomiji b'livell baxx ta’ karbonju bbażati inter alia fuq il-produzzjoni ta’ enerġija nadifa u li kulħadd jingħata l-opportunità li jadatta għall-impatt negattiv tat-tibdil fil-klima u li jiġu miġġielda b'mod effettiv it-tibdil fil-klima, it-telf tal-bijodiversità u t-tniġġis mifrux mad-dinja kollha,

B.

billi l-prinċipju ta’ “responsabilità komuni iżda differenzjata” għat-tisħin globali għandu jiġi kkunsidrat fil-qasam tat-trasferiment tal-LCTs lejn il-pajjiżi tal-AKP,

C.

billi t-trasferiment tat-teknoloġija għandu jservi biex jikkumplementa u jtejjeb l-isforzi kollha, inklużi l-mitigazzjoni, il-bini tal-kapaċità u l-adattament, li qed isiru fil-livell globali fil-ġlieda kontra t-tibdil fil-klima,

D.

billi l-pajjiżi tal-AKP huma fost dawk il-pajjiżi li kkontribwixxew l-inqas għall-effetti negattivi tat-tibdil fil-klima, iżda li l-aktar jinsabu f'riskju kawża tiegħu; billi l-limitazzjoni tal-konsum tal-enerġija fil-pajjiżi industrijalizzati u emerġenti, flimkien mal-iżvilupp rapidu u t-trasferiment ta’ LCTs lejn l-Istati tal-AKP jistgħu jkunu ta’ għajnuna biex jiġu evitati l-konsegwenzi tat-tisħin globali f'dawn il-pajjiżi;

E.

billi l-maġġoranza tal-koperazzjoni teknoloġika għadha sseħħ primarjament fil-livell nazzjonali iktar milli f'dak internazzjonali u 2 % biss tal-privattivi konġunti huma kondiviżi bejn kumpaniji u istituzzjonijiet minn pajjiżi żviluppati u pajjiżi li qegħdin jiżviluppaw,

F.

billi l-pajjiżi żviluppati taw kelmithom f'Kopenħagen f'Diċembru 2009 li jipprovdu “finanzjament ogħla, ġdid u addizzjonali, prevedibbli u adegwat” li inizjalment jammonta għal 30 biljun dollaru Amerikan għall-perjodu 2010-2012 u għal 100 biljun dollaru Amerikan sal-2020 (7) biex jappoġġjaw l-azzjoni meħuda fir-rigward il-mitigazzjoni, l-adattament, l-iżvilupp teknoloġiku u t-trasferiment u l-bini ta’ kapaċità; billi l-UE impenjat ruħha li tipprovdi 7,2 biljun ewro mit-30 biljun dollaru Amerikan għall-2010-2012,

G.

billi l-bijomassa hija s-sors prinċipali tal-enerġija rinnovabbli fil-pajjiżi l-inqas żviluppati, iżda l-użu estensiv u mhux regolat tagħha mhuwiex sostenibbli u għandha firxa wiesgħa ta’ effetti negattivi fuq l-ambjent u s-saħħa tal-bniedem,

H.

billi, fl-istess ħin, qiegħda tintuża frazzjoni żgħira biss mill-potenzjal vast tal-enerġija rinnovabbli sostenibbli tal-Afrika (8),

I.

billi ħafna mill-pestiċidi mibjugħin mill-kumpaniji tal-iktar pajjiżi sinjuri lill-pajjiżi tal-AKP, u l-użu intensiv u mhux regolat tagħhom, għandhom diversi effetti negattivi fuq l-ambjent u s-saħħa tal-bniedem; billi l-iskambju ta’ teknoloġija kimika għandha tippermetti li l-produtturi agrikoli f'pajjiżi tal-AKP jixtru prodotti li ma jkunux jiswew ħafna flus u li kemm jista' jkun ma jagħmlux ħsara lill-ambjent,

J.

billi l-esportazzjoni massiva ta’ skart ta’ kull tip mill-pajjiżi żviluppati u dawk l-iktar sinjuri lejn il-pajjiżi tal-AKP tikkawża theddida serja għall-bilanċ ekoloġiku tal-pajjiżi tal-AKP, li, barra minn hekk, m'għandhomx it-teknoloġija adegwata u effiċjenti biex jittrattaw il-proċessar mill-ġdid, ir-rikondizzjonament u r-riċiklaġġ ta’ tali skart, li jvarja minn materjali li ma jagħmlux ħsara għal materjali estremament tossiċi,

K.

billi l-estensjoni ta’ enerġiji rinnovabbli deċentralizzati fil-pajjiżi tal-AKP tista' tnaqqas il-faqar billi żżid l-aċċess għall-provvista tal-enerġija, u b'hekk tippreżenta opportunitajiet aħjar għall-iżvilupp rurali u l-konservazzjoni forestali u twassal għal benefiċċji diretti għas-saħħa tal-bniedem u għall-opportunitajiet ta’ impjiegi; billi bħalissa 0,2 % biss tal-Assistenza ta’ Żvilupp Uffiċjali (ODA - Official Development Assistance) tal-UE huwa mmirat lejn investimenti fi provvista deċentralizzata ta’ enerġija rinnovabbli,

L.

billi l-ostakoli kollha ta’ natura politika, istituzzjonali, finanzjarja, kummerċjali, kif ukoll dawk relatati mal-informazzjoni u l-kapaċità umana biex l-LCTs jiġu trasferiti lejn il-pajjiżi tal-AKP għandhom jiġu eliminati,

M.

billi n-nuqqasijiet teknoloġiċi u ta’ innovazzjoni fil-pajjiżi tal-AKP ta’ spiss jiġu indirizzati bħala sintomi ta’ nuqqasijiet min-naħa tas-suq minflok indikaturi tal-ħtieġa li titjieb il-koperazzjoni internazzjonali għall-iżvilupp teknoloġiku,

N.

billi r-rwol importanti tat-teknoloġiji tal-informazzjoni u l-komunikazzjoni fil-proċess tat-tixrid teknoloġiku għandu jiġu rikonoxxut ukoll,

1.

Tenfasizza li ż-żieda tar-riċerka u l-innovazzjoni fil-pajjiżi tal-AKP u tal-UE u t-tixrid, u t-trasferiment tat-teknoloġiji u tal-għarfien tekniku rilevanti lejn pajjiżi tal-AKP huma elementi ewlenin ta’ kwalunkwe rispons internazzjonali effettiv għall-isfida globali tat-tibdil fil-klima;

2.

Jiddispjaċiha li, minkejja l-fatt li l-iżvilupp u t-trasferiment tat-teknoloġija għall-mitigazzjoni u l-adattament għat-tibdil tal-klima kienu jikkostitwixxu wieħed mill-komponenti tal-Pjan ta’ Azzjoni ta’ Bali u punt ewlieni fin-negozjati tan-NU dwar it-tibdil fil-klima f'Kopenħagen 2009, il-COP 15 naqset milli tipproponi mekkaniżmu għall-iżvilupp, it-trasferiment u l-koperazzjoni fir-rigward tat-teknoloġiji l-ħodor;

3.

Tikkunsidra li ftehim internazzjonali ta’ suċċess dwar il-protezzjoni tal-klima għandu jinkludi regoli u regolamenti istituzzjonali robusti għall-iżvilupp teknoloġiku u trasferiment mhux projbittiv biex jiġu ffaċilitati investimenti pubbliċi u privati f'dan il-qasam; għaldaqshekk, tistieden lis-COP 16 biex minnufih tieħu deċiżjonijiet speċifiċi dwar il-bini tal-kapaċità teknika u l-iżvilupp u t-trasferiment teknoloġiċi, billi tibbaża ruħha fuq id-dispożizzjonijiet f'dan il-qasam mill-proċess tal-UNFCCC;

4.

Tindika li l-Mekkaniżmu tat-Teknoloġija, propost fis-COP 15 f'Kopenħagen, għandu jkompli jiġi żviluppat fi kwalunkwe qafas internazzjonali futur dwar il-protezzjoni tal-klima; tistieden ukoll lin-negozjaturi biex jiżguraw li jiġu allokati fondi adegwati mill-Fond Aħdar ta’ Kopenħagen għall-Klima speċifikament għall-iżvilupp u t-trasferiment teknoloġiku biex tiġi żgurata implimentazzjoni effettiva tal-Mekkaniżmu tat-Teknoloġija;

5.

Tinnota li, għas-suċċess tal-iżvilupp u t-trasferiment tat-teknoloġija, kif ukoll tal-proġetti tal-bini tal-kapaċitajiet fil-pajjiżi tal-AKP, għandhom jiġu identifikati l-ewwel nett il-bżonnijiet nazzjonali tar-riċerka u l-iżvilupp, l-esperjenzi, l-ostakoli u l-opportunitajiet endoġeniċi; tenfasizza li l-approċċi għandhom jittieħdu skont il-kundizzjonijiet speċifiċi tal-pajjiż u għandhom iżidu l-kontroll ta’ dawk l-attivitajiet min-naħa tal-pajjiżi;

6.

Tindika l-ħtieġa li jiġu kkunsidrati l-kundizzjonijiet speċjali tal-ekonomija fraġli tal-Pajjiżi l-Inqas Żviluppati u tal-pajjiżi bi dħul medju iżda b'ħafna dejn, u l-vulnerabilità, id-distanza u n-nuqqas ta’ opportunità li jinħolqu ekonomiji ta’ daqs tal-Istati tal-AKP li huma Gżejjer Żgħar li Qegħdin Jiżviluppaw;

7.

Tappella lill-pajjiżi żviluppati biex jappoġġjaw l-iżvilupp u t-tisħiħ ulterjuri tal-kapaċità u l-għarfien istituzzjonali, xjentifiċi, teknoloġiċi u umani fil-pajjiżi tal-AKP, billi jimxu fuq l-eżempju tal-Programm tal-AKP dwar ix-Xjenza u t-Teknoloġija, biex ikunu jistgħu jassorbu, jadottaw u jiżviluppaw LCTs adegwati;

8.

Tinnota li l-appoġġ għall-kapaċità għadu frammentat u huwa dipendenti fuq karatteristiċi nazzjonali bħal pereżempju l-intensità ta’ ħaddiema u d-deċentralizzazzjoni tas-servizzi; tenfasizza li l-bini tal-kapaċità għall-iżvilupp u t-trasferiment teknoloġiċi fil-pajjiżi tal-AKP għandu jiġu kkunsidrat bħala mira prijoritarja, iktar milli sempliċi miżura li tavvanza eżiti ta’ proġetti fil-futur qarib; tenfasizza li dan huwa proċess fit-tul, li jirrikjedi approċċ sistematiku, li jikkunsidra ċ-ċirkostanzi speċifiċi tal-pajjiż u tas-settur u li jgħaqqad flimkien l-iżviluppi istituzzjonali, organizzazzjonali u dawk tal-kapaċità umana; tenfasizza wkoll li l-bini tal-kapaċitajiet għandu jrawwem id-domanda għall-iżvilupp u/jew it-trasferiment ta’ teknoloġiji fost il-pajjiżi tal-AKP;

9.

Tiġbed l-attenzjoni għall-ħtieġa li jiġu pprovduti programmi ta’ taħriġ biex titjieb il-kapaċità endoġena fi proġetti għall-iżvilupp, l-immaniġġjar, il-funzjonament u l-manutenzjoni ta’ teknoloġiji; tinnota, madankollu, li hemm ħtieġa urġenti li jiġu ttrattati r-raġunijiet li jwasslu biex il-persunal imħarreġ f'xi pajjiżi tal-AKP jitlaq mill-pajjiż, bażikament, salarji baxxi u kundizzjonijiet tax-xogħol ħżiena;

10.

Tikkunsidra li approċċ ċar u ferm iktar ambizzjuż lejn l-iżvilupp tal-LCTs għandu jiġi adottat biex jiffaċilita u jħaffef id-diffużjoni tagħhom u t-tmiem tad-dipendenza fuq l-enerġija fossili; tinnota l-ħtieġa li jissaħħu l-kapaċitajiet tal-istituzzjonijiet pubbliċi nazzjonali u reġjonali eżistenti bħala appoġġ għal dan l-approċċ;

11.

Tappella lill-pajjiżi żviluppati biex jappoġġjaw b'mod attiv ir-riċerka u l-iżvilupp fil-pajjiżi tal-AKP, biex b'hekk jippermettu lill-atturi pubbliċi u privati mill-pajjiżi li qegħdin jiżviluppaw jipparteċipaw bħala sidien fis-suq globali li qed jikber tat-teknoloġija b'livell baxx ta’ karbonju; tħeġġeġ l-istabbiliment ta’ istituzzjonijiet nazzjonali li jaħdmu fuq sistemi innovattivi li jistgħu jwasslu għall-iżvilupp endoġenu ta’ teknoloġiji; tindika li l-inizjattivi għandhom jgħaqqdu flimkien żoni tekniċi u soċjali, billi jiżguraw li jkun hemm sidien lokali tal-proġetti u billi jwieġbu għall-ħtiġijiet lokali; tenfasizza li l-kwistjonijiet dwar id-drittijiet ta’ proprjetà għandhom jiġu kkunsidrati wkoll;

12.

Tenfasizza l-ħtieġa li wieħed jikkapitalizza l-potenzjal innovattiv tan-negozji tal-UE u tas-servizzi pubbliċi tal-UE fl-enerġiji rinnovabbli u t-teknoloġiji, inklużi teknoloġiji li jiffrankaw l-enerġija u ICT avvanzata, biex permezz ta’ ftehimiet kummerċjali tiġi promossa bidla gradwali lejn ekonomija b'livell baxx ta’ karbonju madwar id-dinja kollha, biex b'hekk jiġu żgurati opportunitajiet ġodda għall-bejgħ ta’ prodotti u għall-għarfien tekniku tal-UE f'din iż-żona lill-pajjiżi li qegħdin jiżviluppaw, jew biex dan l-għarfien jiġi trasferit lilhom fejn ikun applikabbli;

13.

Tikkunsidra li d-diversifikazzjoni tas-sorsi tal-enerġija, tar-rotot ta’ provvista u tal-infrastruttura, u l-interkonnessjoni tan-netwerks taż-żejt, tal-gass u s-sistemi ta’ distribuzzjoni intelliġenti huma kruċjali għas-sigurtà u s-sostenibilità fit-tul tal-provvisti tal-enerġija kemm għall-pajjiżi tal-UE kif ukoll għal dawk tal-AKP; tfakkar li dawn it-tendenzi ta’ politika huma wkoll strumentali biex jippromwovu żviluppi ġodda fit-teknoloġija tal-enerġija u l-ħolqien ta’ impjiegi fil-pajjiżi tal-UE u f'dawk tal-AKP;

14.

Tafferma mill-ġdid l-importanza li jiżdiedu r-riċerka u l-finanzjament konġunti tal-UE-AKP fil-bini u l-immodernizzar tal-infrastruttura tal-enerġija kemm fil-pajjiżi tal-UE kif ukoll f'dawk tal-AKP, b'mod partikolari permezz ta’ sħubijiet u impriżi bi sħab, pubbliċi-privati jew sħubijiet pubbliċi-pubbliċi fejn ikun il-każ, biex b'hekk jiġi mħeġġeġ il-kummerċ tat-trasferiment tal-enerġija jew tat-teknoloġija li huma ta’ benefiċċju reċiproku, u tiġi promossa d-diversifikazzjoni tat-taħlita tal-enerġija fil-pajjiżi tal-AKP;

15.

Tappella lill-pajjiżi tal-AKP biex jaġġustaw skont il-bżonn u jimplimentaw strateġiji ta’ innovazzjoni nazzjonali dwar it-tibdil fil-klima skont il-ħtiġijiet u l-politiki tagħhom, filwaqt li jikkunsidraw ukoll l-effetti pożittivi indiretti tagħhom fuq is-saħħa, l-edukazzjoni u l-impjiegi;

16.

Tappella lill-UE biex tappoġġja s-soluzzjonijiet u l-proġetti innovattivi attwali fil-pajjiżi tal-AKP;

17.

Tappella lill-UE u lill-Istati Membri tagħha biex jagħmlu pressjoni fuq il-kumpaniji Ewropej li hemm fil-pajjiżi tal-AKP u biex jimponu leġiżlazzjoni vinkolanti fuqhom bl-għan li jiġi żgurat li dawn ikunu ta’ eżempju fir-rigward tal-iżvilupp sostenibbli, l-emissjonijiet baxxi ta’ CO2, ir-rispett tal-ambjent u l-prevenzjoni tat-tniġġis tal-ħamrija u l-ilma; tikkunsidra li dan jista' pereżempju jkun jikkonsisti f'forma ta’ skambju ta’ teknoloġija u għarfien espert;

18.

Tappella lill-pajjiżi tal-AKP biex jimponu sanzjonijiet fuq il-kumpaniji tal-UE preżenti fit-territorju tagħhom li ma jaġixxux skont il-prinċipji msemmija hawn fuq, u li għaldaqstant mhumiex pereżempju involuti f'tali skambji;

19.

Tenfasizza l-importanza ta’ koperazzjoni reċiprokament benefika bejn l-kumpaniji, l-entitajiet tas-settur pubbliku u l-istituzzjonijiet tar-riċerka fil-pajjiżi żviluppati u l-ekwivalenti tagħhom fl-Istati tal-AKP, u tħeġġeġ il-ħolqien ta’ sħubijiet teknoloġiċi bejniethom; titlob li jitjieb l-għarfien dwar l-arranġamenti ta’ koperazzjoni li jeżistu diġà fil-qasam tat-trasferiment tat-teknoloġija, kif ukoll li jiġi stabbilit reġistru għal tali azzjonijiet u bażi ta’ dejta globali fir-rigward ta’ dejta dwar il-liċenzjar u l-aħjar prattiki;

20.

Titlob għat-titjib tas-sħubijiet ma’ istituzzjonijiet intergovernattivi u internazzjonali; tenfasizza li l-koperazzjoni f'livell lokali iktar baxx, li jinkludi l-organizzazzjonijiet mhux governattivi u bbażati fil-komunità, għandha tiġi promossa wkoll;

21.

Tenfasizza l-ħtieġa li jiġu stabbiliti Ċentru Teknoloġiku għall-Klima u netwerk li jagħtu spinta lill-koperazzjoni internazzjonali dwar teknoloġiji ewlenin u li jipprovdu assistenza teknika, taħriġ u bini tal-kapaċità konġunt; tenfasizza li l-istrutturi globali l-ġodda għat-trasferiment teknoloġiku b'rabta mat-tibdil fil-klima għandhom ikunu inqas ta’ piż u inqas burokratiċi;

22.

Tinnota l-importanza tal-koperazzjoni Nofsinhar-Nofsinhar, li tista' twassal għal awtodipendenza teknoloġika u b'hekk tevita kunflitt possibbli li jirriżulta mid-Drittijiet dwar il-Proprjetà Intellettwali (IPRs); tħeġġeġ lill-pajjiżi tal-AKP biex jistabbilixxu pjattaformi/netwerks reġjonali ta’ koperazzjoni fl-R&D ta’ istituzzjonijiet ta’ riċerka domestiċi eżistenti għall-iżvilupp tat-teknoloġija dwar it-tibdil fil-klima, li jippermettu l-kondiviżjoni tar-riżorsi u tal-ispejjeż tal-R&D;

23.

Tħeġġeġ lill-gvernijiet tal-UE u tal-AKP biex jiżviluppaw iktar u jżidu l-finanzjament għar-riċerka dwar it-tibdil fil-klima fl-universitajiet u l-istituzzjonijiet ta’ riċerka tagħhom u biex itejbu r-rabtiet bejniethom biex isibu soluzzjonijiet konġunti għal problemi komuni (pereżempju billi jiġu żviluppati teknoloġiji li bihom ikun jista' jiġi ffrankat l-ilma jew jintuża mill-ġdid);

24.

Tappella għall-promozzjoni tas-sħubijiet pubbliċi-privati fil-qasam tar-riċerka, l-iżvilupp u l-użu tat-teknoloġija kif ukoll għall-ħolqien ta’ impriżi bi sħab bejn kumpaniji tal-UE u tal-AKP; tappella wkoll lill-UE u lill-Istati Membri tagħha biex jipprovdu appoġġ finanzjarju u tekniku għall-investimenti fil-pajjiżi tal-AKP fir-rigward tal-iżvilupp u t-trasferiment tat-teknoloġija, biex b'hekk jiġu offerti inċentivi għal koperazzjoni kummerċjali;

25.

Titlob involviment serju min-naħa tal-NGOs lokali fil-proċessi tad-diffużjoni teknoloġika u tal-bini tal-kapaċità; tenfasizza l-importanza li l-NGOs jkollhom għarfien dwar l-ambjenti lokali biex jiġu introdotti b'suċċess teknoloġiji ġodda;

26.

Tindika li l-pajjiżi tal-AKP jinkludu numru kbir ta’ komunitajiet iżolati u gżejjer u għalhekk tappella biex il-promozzjoni tal-enerġija prodotta lokalment issir prijorità;

27.

Tindika li għandha tingħata attenzjoni partikolari għall-iżvilupp u t-trasferiment tat-teknoloġiji relatati mal-enerġija u li ma jagħmlux ħsara lill-ambjent; tikkunsidra li l-Għajnuna Uffiċjali għall-Iżvilupp (ODA - Official Development Assistance) għandha tiffoka iktar fuq l-iżvilupp ta’ teknoloġiji li jiffrankaw l-enerġija u enerġiji rinnovabbli deċentralizzati fil-pajjiżi tal-AKP, u li dan għandu jnaqqas il-faqar u jżid l-opportunitajiet tal-impjiegi; tfakkar li l-enerġija nukleari mhix soluzzjoni biex tiżgura żvilupp b'livell baxx ta’ karbonju; tenfasizza li għandu jiġi ppruvat li t-teknoloġiji jkunu effiċjenti u ekonomikament vijabbli u li l-adozzjoni tagħhom għandha tirrikjedi approċċ olistiku b'dimensjonijiet varji ta’ sostenibilità, inklużi l-aspetti sanitarji, ambjentali, teknoloġiċi, ekonomiċi, soċjokulturali u istituzzjonali;

28.

Tenfasizza li l-Ftehimiet ta’ Sħubija Ekonimika (EPAs) għandhom iħallu impatt pożittiv fuq id-diffużjoni teknoloġika u t-titjib tal-kapaċità tal-innovazzjoni fir-reġjuni tal-AKP, hekk kif inhu stabbilit fl-abbozz dwar azzjoni mtejba fir-rigward tal-iżvilupp u t-trasferiment tat-teknoloġija;

29.

Tenfasizza li l-pajjiżi tal-AKP għandhom jibbenefikaw ħafna iktar mill-potenzjal tal-Mekkaniżmu għall-Iżvilupp Nadif, li għandu jiġi mfassal mill-ġdid fix-xenarju post-Kopenħagen;

30.

Tenfasizza l-ħtieġa li wieħed jiffoka b'mod speċifiku fuq il-potenzjal tat-teknoloġija li tindirizza l-mitigazzjoni u l-adattament għat-tibdil fil-klima fil-pajjiżi tal-AKP;

31.

Tenfasizza l-ħtieġa li jiġi żgurat li l-iżvilupp u t-trasferiment tat-teknoloġija, kif ukoll l-attivitajiet ta’ proġetti għall-bini ta’ kapaċità, jiġu segwiti, immoniterjati u evalwati regolarment; titlob li jitħejjew rapporti perjodiċi dwar il-qagħda attwali, l-opportunitajiet u kull ħtieġa għal iktar titjib, biex b'hekk jiġu fformulati rakkomandazzjonijiet abbażi tas-sejbiet li joħorġu mill-evalwazzjonijiet; tenfasizza l-importanza li jiġi kondiviż it-tagħlim akwiżit;

32.

Tagħti istruzzjonijiet lill-ko-Presidenti tagħha biex jgħaddu din ir-riżoluzzjoni lill-Kunsill tal-Ministri AKP-UE, lill-Parlament Ewropew, lill-Kummissjoni Ewropea, lill-Unjoni Afrikana u lis-segretarjat tal-UNFCCC.

A.

billi skont l-estimi tal-Organizzazzjoni tal-Ikel u l-Agrikoltura (FAO) (11), in-numru ta’ persuni fid-dinja li m'għandhomx biżżejjed x'jieklu naqas globalment għal 925 miljun persuna fl-2010, meta mqabbel ma’ biljun fl-2009,

B.

billi l-impatt tal-kriżijiet varji (tal-enerġija, tal-ikel, tal-finanzi u tal-ekonomija) fuq il-pajjiżi tal-AKP qed jipprovdi sfida addizzjonali għall-ġlieda kontra l-faqar u jista' jkun ta’ theddida għall-ilħuq tal-MDGs,

C.

billi jinħtieġu inċentivi biex jiġi żgurat li l-investituri jtejbu l-involviment tagħhom fi proġetti li għandhom impatt lokali pożittiv f'termini ekonomiċi, soċjali u ambjentali,

D.

billi għandhom jiġu introdotti miżuri li jappoġġjaw ir-riformi fiskali fil-kuntest tal-Ftehimiet ta’ Sħubija Ekonomika (EPAs) biex jikkumpensaw għat-telf tad-dħul mid-dwana kawża tat-tneħħija tad-dazji doganali bħala parti mill-proċess tal-liberalizzazzjoni tal-kummerċ,

E.

billi matul dawn l-aħħar snin il-faqar estrem esperjenza tnaqqis marġinali u, minħabba t-tkabbir tal-popolazzjoni, fil-fatt kien hemm żieda ta’ 27 miljun persuna li jgħixu f'faqar estrem fl-Afrika Sub-Saħarjana (12),

F.

billi hawn wisq tfal, speċjalment dawk li huma l-ifqar u l-iktar marġinalizzati, li għadhom qed jiġu mċaħħda mid-dritt għall-edukazzjoni (iktar minn 100 miljun ma kinux imorru skola fl-2008, 52 % minnhom bniet) u t-tfal li attwalment ma jmorrux skola, b'mod partikolari fl-Afrika, qatt ma kellhom kuntatt ma’ edukazzjoni formali (13), u billi 80 % tal-persuni fid-dinja li għandhom diżabilità jgħixu f'pajjiżi li qegħdin jiżviluppaw u iktar minn 98 % tat-tfal b'diżabilità f'dawn il-pajjiżi ma jmorrux l-iskola fuq bażi full-time,

G.

billi d-diżugwaljanza fl-opportunitajiet ibbażata fuq is-sess, l-etniċità, id-dħul finanzjarju, il-lingwa jew id-diżabilitajiet tirrappreżenta ostakolu kbir ħafna għall-edukazzjoni universali, u jekk ma tiġix irrekordjata l-informazzjoni dwar l-inklużjoni ta’ dawn il-gruppi jkun diffiċli li jitkejjel il-progress li jkun sar; u billi l-mira li jiġu eliminati l-inugwaljanzi bbażati fuq is-sess ma ntlaħqitx,

H.

billi l-eradikazzjoni tal-faqar titlob ukoll parteċipazzjoni demokratika u għandha tinvolvi bidla fl-istrutturi ekonomiċi biex jiġu garantiti opportunitajiet indaqs u aċċess għar-riżorsi u s-servizzi pubbliċi għan-nisa kollha,

I.

billi, għalkemm sar progress kbir fir-rigward tal-ilħuq ta’ wħud mill-MDGs, it-tliet MDGs li jirrigwardaw is-saħħa – u b'mod partikolari l-mortalità fost l-ommijiet – huma dawk li l-aktar għadhom lura milli jintlaħqu,

J.

billi r-rata ta’ mortalità globali ta’ tfal taħt il-ħames snin naqset minn 90 mewta għal kull 1 000 tarbija mwielda fl-1990 għal 65 fl-2008, minħabba titjib fis-sistema tat-tilqim u l-possibilità tat-tieni opportunità għat-tilqim, iżda r-rata ta’ tnaqqis fil-mortalità ta’ tfal taħt il-ħames snin għadha mhix biżżejjed biex jintlaħaq l-objettiv tal-MDG sal-2015, b'mod partikolari fl-Afrika Sub-Saħarjana (14), u r-rata ta’ mortalità ta’ tfal taħt il-ħames snin minn fost it-tfal b'diżabilità hija ta’ 80 % anki f'pajjiżi fejn il-mortalità ta’ tfal taħt il-ħames snin niżlet taħt l-20 % (15),

K.

billi globalment il-prevalenza ta’ tfal taħt il-5 snin li huma taħt il-piż naqset minn 31 % għal 26 % bejn l-1990 u l-2008, u billi l-maġġoranza tal-pajjiżi li qed jagħmlu ftit jew ebda progress biex jilħqu l-MDG 1 jinsabu fl-Afrika Sub-Saħarjana u fin-Nofsinhar tal-Asja (16),

L.

billi l-mira li titjieb is-saħħa materna għadha ma ntlaħqitx, billi attwalment hemm tnaqqis ta’ 1 % fis-sena fil-proporzjon globali tal-mortalità fost l-ommijiet (MMR - Maternal Mortality Ratio) meta mqabbel mal-perċentwal annwali ta’ 5,5 % meħtieġ biex l-MMR jilħaq it-tnaqqis stabbilit mill-MDG fir-rigward tal-mortalità tal-ommijiet sal-2015 (17); billi numru kbir ta’ nisa jsofru minn feriti, infezzjonijiet jew mard, jew jiżviluppaw diżabilità kawża tal-komplikazzjonijiet li jirriżultaw mit-tqala jew mill-ħlas,

M.

billi l-maġġoranza ta’ persuni affettwati mill-vajrus tal-HIV jgħixu fl-Afrika Sub-Saħarjana, u ħafna minnhom huma nisa, u billi nofs in-nisa tqal fid-dinja li rriżultaw pożittivi għall-vajrus tal-HIV issa qed jiġu protetti mir-riskju li l-vajrus jgħaddi mingħand l-omm għal għand it-tarbija permezz ta’ sistemi antiretrovirali (ARV),

N.

billi s-settur tal-edukazzjoni, permezz ta’ programmi ta’ tagħlim matul il-ħajja skolastika ta’ persuna huwa mezz kruċjali għall-prevenzjoni tal-HIV, tal-malarja, tat-tuberkulożi u tal-Mard Tropikali Traskurat, u għat-tnaqqis tal-istigma assoċjata ma’ dan il-mard,

O.

billi skont l-estimi tan-NU, hemm bżonn jiġu impjegati aktar minn 10 miljun għalliem madwar id-dinja biex tintlaħaq il-mira miftiehma internazzjonalment li tinkiseb edukazzjoni primarja universali sal-2015 (18),

P.

billi l-malarja għadha theddida sinifikanti għal kważi nofs il-popolazzjoni tad-dinja u 90 % tal-imwiet kollha kkawżati mill-malarja jseħħu fl-Afrika Sub-Saħarjana, u tolqot l-iżjed lit-tfal taħt il-ħames snin, u billi l-malarja jista' jkollha wkoll implikazzjonijiet sanitarji perikolużi oħra bħal pereżempju l-anemija, piż baxx fit-twelid, twelid prematur, mortalità tat-trabi u mwiet tal-ommijiet, u billi ġie ppruvat li n-nets trattati bl-insettiċidi (ITNs - Insecticide-Treated Nets) naqqsu l-imwiet fost it-tfal b'madwar 20 fil-mija (19),

Q.

billi l-prevalenza tat-tuberkulożi, jiġifieri n-numru ta’ każijiet għal kull 100 000, ukoll waqgħet globalment, u ma tantx jidher li hemm possibilità li l-miri biex din il-prevalenza u r-rati tal-imwiet jitnaqqsu bin-nofs sal-2015 jintlaħqu,

R.

billi hemm iktar minn 650 miljun persuna b'diżabilità fil-livell globali, li 80 % minnhom jgħixu f'pajjiżi li qegħdin jiżviluppaw, u li ħafna minnhom huma qiegħda u jaqgħu taħt il-livell stabbilit tal-faqar,

S.

billi l-Istati tal-AKP għadhom jiffaċċjaw ħafna sfidi ambjentali marbuta mat-tniġġis, mat-tibdil fil-klima u d-deforestazzjoni, li jistgħu jinfluwenzaw il-provvista tal-prodotti agrikoli lokali b'mod negattiv,

T.

billi d-dinja qiegħda fit-triq it-tajba biex twassal ilma tajjeb għax-xorb minn sorsi mtejba, u 207 miljun Afrikan addizzjonali llum il-ġurnata qed jużaw sorsi siguri ta’ ilma tajjeb għax-xorb, iżda l-kopertura mtejba tal-ilma tajjeb għax-xorb fl-Afrika Sub-Saħarjana għadha iktar baxxa milli f'reġjuni oħra u l-progress fil-kopertura tas-sanitizzazzjoni kien minimu f'xi pajjiżi, peress li madwar 95 % tal-ifqar nies f'dawk il-pajjiżi jaqdu l-bżonnijiet naturali tagħhom fil-beraħ (20),

U.

billi l-Afrika Sub-Saħarjana għad għandha l-ogħla prevalenza ta’ kwartieri tal-foqra, għalkemm, globalment, il-popolazzjoni f'dawn il-kwartieri naqset,

V.

billi, globalment, 215-il miljun tifel u tifla huma obbligati jaħdmu, u 115-il miljun huma vittmi ta’ dak li l-ILO tiddefinixxi bħala l-agħar forom ta’ xogħol (21),

W.

billi, skont l-UNICEF, it-terminu “tħaddim tat-tfal” ifisser kull forma ta’ xogħol imwettaq minn tfal taħt it-18-il sena, liema xogħol ikun perikoluż jew jinterferixxi fl-edukazzjoni tat-tfal jew ikun ta’ periklu għas-saħħa tat-tfal jew għall-iżvilupp fiżiku, mentali, spiritwali, morali jew soċjali tagħhom,

X.

billi minkejja li sar iktar progress fl-ilħuq tat-tmien MDGs, is-sħubija globali għall-iżvilupp batiet minn tfixkil sinifikanti, li jitfa' lura l-ilħuq b'suċċess tal-MDGs,

Y.

billi l-MDGs mhumiex se jintlaħqu jekk mhumiex se jkunu marbuta ma’ sens ta’ responsabilità, governanza tajba, demokrazija, sigurtà, żvilupp, drittijiet tal-bniedem u ugwaljanza bejn is-sessi,

Z.

billi, jekk il-mira tal-ODA ta’ 0.7 % tintlaħaq mid-donaturi kollha sal-2015, jiġu ġġenerati iktar minn 300 biljun dollaru Amerikan fis-sena għall-iżvilupp,

AA.

billi nuqqas ta’ paċi u sigurtà, demokrazija u stabilità politika ta’ spiss ma jippermettix li pajjiżi foqra jilħqu l-potenzjal ta’ żvilupp kollu tagħhom,

AB.

billi s-sjieda tal-art toħloq inċentivi għall-individwi, il-familji u l-komunitajiet biex jieħdu f'idejhom l-iżvilupp tagħhom stess u jiżguraw is-sigurtà tal-ikel fil-livell lokali,

1.

Tfakkar li l-impenji internazzjonali li ttieħdu fir-rigward tal-MDGs jeħtieġu li l-pajjiżi industrijalizzati jikkontribwixxu 0,7 % tal-PGD tagħhom fl-Għajnuna Uffiċjali għall-Iżvilupp (ODA) sal-2015; tfakkar li attwalment l-UE hija minn taħt b'madwar 20 biljun ewro fir-rigward tal-impenji ta’ nfiq tagħha għall-MDGs;

2.

Tilqa' bi pjaċir l-eżiti tas-Samit tan-NU fi New York bħala sinjal ċar li l-pajjiżi kollha jridu jżommu l-impenn tagħhom li jintlaħqu l-miri sal-2015, anki fl-ambjent internazzjonali diffiċli attwali;

3.

Tfakkar li nkiseb ħafna progress fir-rigward tal-ilħuq tal-MDGs; għalhekk, min-naħa l-waħda, titlob biex ir-riżultati pożittivi jiġu ppubblikati b'mod regolari u, min-naħa l-oħra, biex il-pajjiżi tal-UE u tal-AKP jippubblikaw skedi multiannwali biex jintlaħqu l-MDGs fil-ħames snin li ġejjin;

4.

Tistieden lid-donaturi internazzjonali biex jipprovdu fondi sinifikanti addizzjonali, trasparenti, li jistgħu jiġu kkwantifikati u li jkunu orjentati b'tali mod li jinkisbu riżultati, biex jgħinu lill-pajjiżi l-fqar jiġġieldu l-faqar, jilħqu l-MDGs u jiġġieldu l-effetti tat-tibdil fil-klima u l-kriżi ekonomika;

5.

Tistieden lill-pajjiżi tal-AKP biex iżidu u jimmobilitaw ir-riżorsi domestiċi tagħhom b'mod adegwat biex jilħqu aħjar l-MDGs;

6.

Tenfasizza l-ħtieġa li jiġu introdotti sorsi alternattivi u innovattivi ta’ finanzjament għall-iżvilupp biex ikunu jistgħu jiġu ssodisfati l-impenji tal-MDGs;

7.

Tistieden lill-pajjiżi tal-UE u tal-AKP biex jissuġġerixxu li n-NU jistabbilixxu kumitat intergovernattiv dwar kwistjonijiet li jirrigwardaw it-taxxa internazzjonali;

8.

Tistieden lill-G20 biex irażżan il-kenn fiskali, filwaqt li jiddistingwi il-ġuriżdizzjonijiet ta’ koperazzjoni b'livelli fiskali baxxi u l-evażjoni tat-taxxa, u biex jippromwovi trasparenza ikbar u sistemi ta’ rappurtar f'kull pajjiż biex jippermetti li l-pajjiżi li qegħdin jiżviluppaw iżommu r-riżorsi proprji tagħhom għall-iżvilupp tagħhom;

9.

Tistieden lid-donaturi internazzjonali kollha biex itejbu l-koordinazzjoni tad-donaturi u t-tqassim tax-xogħol u biex jagħtu l-għajnuna kollha tagħhom, b'konsultazzjoni mal-pajjiżi msieħba;

10.

Tħeġġeġ lill-pajjiżi tal-UE u tal-AKP biex jistabbilixxu strateġiji effettivi biex jittaffa d-dejn tal-pajjiżi tal-AKP, b'mod partikolari bħala appoġġ għall-MDGs li jirrigwardaw l-edukazzjoni u s-saħħa, filwaqt li tinnota li d-dejn barrani tal-pajjiżi tat-Tielet Dinja u l-mekkaniżmi tiegħu, pereżempju s-servizzi tad-dejn, jirrappreżentaw ostaklu kbir permanenti għall-iżvilupp ta’ dawk il-pajjiżi;

11.

Tenfasizza li, sabiex jintlaħqu l-MDGs, is-servizzi pubbliċi għandhom jiġu salvagwardjati u msaħħa, bħala element indispensabbli għas-soluzzjoni tal-problemi, b'rabta partikolari mas-saħħa u l-faqar;

12.

Tistieden lill-Istati Membri tal-UE biex jieħdu azzjoni biex ir-rimessi ma jibqgħux jiswew ħafna flus;

13.

Tindika li, minkejja li l-għajnuna tista' tkun ta’ lieva għall-pajjiżi li qegħdin jiżviluppaw, mhijiex biżżejjed biex tiggarantixxi żvilupp sostenibbli u dejjiemi; għalhekk titlob formazzjoni effettiva ta’ sħubijiet bejn is-setturi pubbliċi u privati, sjieda ikbar min-naħa tal-pajjiżi li qegħdin jiżviluppaw tal-proġetti tagħhom tal-MDGs, u titlob li l-gvernijiet jistabbilixxu kundizzjonijiet li jippermettu li s-settur privat ikun innovattiv, jinvesti u joħloq l-impjiegi;

14.

Ittenni r-rwol importanti tal-kummerċ bħala mutur għat-tkabbir u l-iżvilupp, u l-kontribut tiegħu biex jintlaħqu l-Miri tal-Millennju għall-Iżvilupp; tenfasizza l-ħtieġa li jkun hemm reżistenza għat-tendenzi protezzjonisti;

15.

Tistieden lill-UE biex tieħu azzjoni konkreta kontra l-faqar billi tiżgura koerenza politika bejn il-politiki tagħha tal-kummerċ, tal-koperazzjoni għall-iżvilupp, tal-politiki agrikola komuni u tal-politika komuni tas-sajd, biex jiġu evitati impatti negattivi diretti jew indiretti fuq l-iżvilupp ekonomiku sostenibbli tal-pajjiżi tal-AKP;

16.

Temmen li l-istrateġiji għall-Iżvilupp Ekonomiku Lokali (LED – Local Economic Development) għandhom potenzjal li jittrasformaw l-iżvilupp sostenibbli nazzjonali u intrareġjonali tal-pajjiżi li qegħdin jiżviluppaw biex joħolqu swieq domestiċi u reġjonali billi jiġu kkunsidrati l-ħtiġijiet reali tal-popolazzjonijiet;

17.

Tistieden il-pajjiżi tal-UE u tal-AKP biex jiżguraw progress deċiżiv tal-objettivi tal-MDGs li għadhom l-iktar lura, fosthom l-MDG 3, 4, 5, 6 u 8;

18.

Tfakkar li miżuri tajbin ta’ governanza fiskali u antikorruzzjoni jgħinu biex jinħoloq ambjent favorevoli għall-investimenti;

19.

Tilqa' bi pjaċir l-impenn tal-MDG tal-Kummissjoni Ewropea ekwivalenti għal biljun ewro, kif espress mill-President tal-Kummissjoni Ewropea fil-Laqgħa ta’ Livell Għoli tan-NU dwar l-MDGs fi New York, biex il-pajjiżi bi prestazzjoni tajba jiġu ppremjati u biex jiġu appoġġjati dawk li huma l-iktar żvijati;

20.

Tħeġġeġ lill-pajjiżi tal-AKP biex jieħdu passi konkreti biex jinkiseb titjib fis-saħħa materna; tistieden għalhekk lill-pajjiżi li qegħdin jiżviluppaw biex jonfqu tal-inqas 15 % tal-baġits nazzjonali tagħhom fuq il-kura tas-saħħa, biex itejbu s-sistemi ta’ kura tas-saħħa tagħhom u jħaffu t-taħriġ tal-qwiebel u l-infermiera biex ikunu jistgħu jwettqu xogħol fuq il-post;

21.

Tistieden lill-pajjiżi tal-UE u tal-AKP biex jidentifikaw strateġiji effettivi ta’ protezzjoni soċjali, billi jagħtu prijorità lill-ġbir tal-iskemi tal-assigurazzjoni mir-riskji u dawk tal-prepagamenti, biex jiġi evitat li l-pazjent ikollu jħallas direttament lill-fornituri primarji tal-kura tas-saħħa, ladarba dan ta’ spiss jiskoraġġixxi lill-persuni fqar milli jużaw is-servizzi tagħhom;

22.

Tilqa' bi pjaċir l-Istrateġija Globali għas-Saħħa tan-Nisa u tat-Tfal, b'impenn ta’ iktar minn 40 biljun dollaru Amerikan fil-ħames snin li ġejjin, liema strateġija ġiet imnedija fil-laqgħa ta’ Livell Għoli tan-NU dwar l-MDGs;

23.

Tistieden lill-pajjiżi tal-UE u tal-AKP biex jippromwovu l-aċċess gratwit u inklussiv għas-saħħa, u biex jistabbilixxu, itejbu u jsaħħu l-kura tas-saħħa ta’ kwalità tajba, inklużi l-kura ta’ qabel it-twelid, l-assistenza fit-twelid minn ħaddiema mħarrġa fil-qasam tas-saħħa u l-aċċess għall-kura ostetrika f'każ ta’ emerġenza;

24.

Titlob approċċ olistiku lejn servizz tas-saħħa komprensiv, li jkopri l-aċċess għall-mediċina, is-servizzi mediċi u l-ilma nadif, is-sanitizzazzjoni u n-nutrizzjoni; tenfasizza li tali approċċ kumpless jista' jkollu impatt ikbar u iktar stimulanti fuq il-progress għall-ilħuq tal-MDGs relatati mas-saħħa;

25.

Tenfasizza li s-sistemi ta’ taħriġ tal-ħaddiema fil-qasam tas-saħħa mhumiex biżżejjed fl-Afrika, fejn żewġ terzi tal-pajjiżi għandhom biss skola waħda għat-taħriġ mediku u oħrajn m'għandhom xejn; iħeġġeġ lill-pajjiżi tal-AKP, għalhekk, biex fl-istrateġiji tagħhom jinkludu programmi speċifiċi bl-għan li jipprovdu korsijiet ta’ taħriġ għall-ħaddiema fil-qasam tas-saħħa biex b'hekk ikunu jistgħu jiġu impjegati ħaddiema kwalifikati fl-isptarijiet u fl-istrutturi tal-kura tas-saħħa;

26.

Tesprimi t-tħassib tagħha dwar il-fatt li r-reklutaġġ ta’ persunal kwalifikat fil-qasam tas-saħħa minn pajjiżi industrijalizzati jikkostitwixxi wieħed mill-fatturi li jiggravaw is-sistemi tas-saħħa fraġli fil-pajjiżi li qegħdin jiżviluppaw;

27.

Titlob li jkun hemm iktar iffukar fuq in-numru dejjem jikber ta’ mard mhux kontaġjuż, mard tropikali traskurat u mard li jirriżulta minn vjolenza, trawma u inċidenti, billi jissaħħu s-sistemi tas-saħħa fil-pajjiżi tal-AKP;

28.

Tistieden lill-pajjiżi tal-UE u tal-AKP biex ikomplu bl-isforzi tagħhom biex jiġi eliminat ir-riskju li omm tgħaddi l-vajrus tal-HIV lit-tarbija tagħha; ittenni li dan iktar jista' jsir meta jingħataw kura qabel it-twelid u kura għat-tfal u għall-ommijiet fil-komunità;

29.

Tistieden lill-UE biex ittejjeb l-aċċess tan-nies il-fqar għal mediċini li jintlaħqu mill-but ta’ kulħadd billi turi flessibilità fl-applikazzjoni tal-ftehima dwar it-TRIPS (aspetti relatati mal-kummerċ tad-drittijiet ta’ proprjetà intellettwali) fir-relazzjonijiet ta’ kummerċ tagħha ma’ pajjiżi li qegħdin jiżviluppaw;

30.

Tħeġġeġ lill-gvernijiet u lill-pajjiżi donaturi li sabiex ikunu jistgħu jilħqu aħjar l-MDGs li jirrigwardaw is-saħħa, huma għandhom isaħħu s-sistemi tal-kura tas-saħħa, u b'mod speċjali l-komponenti tas-sistema tas-saħħa, inklużi l-provvista tas-servizzi, il-prodotti mediċinali, il-vaċċini u t-teknoloġiji, il-persunal tas-saħħa, il-finanzjament tas-saħħa, is-sistemi ta’ informazzjoni sanitarja, u t-tmexxija u l-governanza u għandhom jiżguraw l-aċċessibilità għal dawn is-sistemi lill-persuni b'diżabilità;

31.

Tappella lill-pajjiżi tal-UE u tal-AKP biex jinvestu fi protezzjoni soċjali sensittiva għat-tfal, li tkopri l-iskemi ta’ assigurazzjoni soċjali u tas-saħħa;

32.

Tenfasizza li l-ewwel objettiv tal-MDGs jinkludi d-dritt li wieħed igawdi standards tal-għajxien xierqa, filwaqt li tiġi rikonoxxuta l-ħtieġa li tingħata protezzjoni speċjali lill-persuni b'diżabilità;

33.

Tenfasizza l-ħtieġa li jiġu żviluppati u implimentati politiki nazzjonali adegwati għas-sopravvivenza tat-tfal, inklużi miżuri preventivi, vaċċini u trattament mediku, u nutrizzjoni, ilma tajjeb għax-xorb u sanitizzazzjoni aħjar; għalhekk titlob li jkun hemm promozzjoni ta’ kampanji integrati li jistgħu jinkludu, pereżempju, id-distribuzzjoni ta’ nets għal fuq is-sodod u kampanji ta’ vaċċinazzjoni (speċjalment kontra l-ħożba), biex titnaqqas il-mortalità fost it-tfal;

34.

Tistieden lill-pajjiżi tal-UE u tal-AKP biex jippromwovu politiki tal-edukazzjoni u biex ma jiffukawx biss fuq iċ-ċifri tal-iskrizzjonijiet iżda wkoll fuq il-kwalità tal-edukazzjoni u r-rata ta’ kompletar, billi jillimitaw ir-rati ta’ studenti li jitilqu mill-iskola kmieni, speċjalment fost il-bniet, itejbu l-kapaċità tal-iskejjel li jilqgħu l-istudenti u jtejbu t-taħriġ tal-għalliema, filwaqt li jaħdmu bis-sħiħ biex tiġi provduta edukazzjoni inklussiva għal tfal b'diżabilità, li attwalment 10 % biss minnhom għandhom aċċess għall-iskola f'pajjiżi bi dħul baxx;

35.

Tenfasizza r-rwol ċentrali li l-edukazzjoni għandu jkollha fil-politiki nazzjonali tal-pajjiżi tal-AKP billi tikkombina politiki effettivi u investimenti nazzjonali sostnuti fl-edukazzjoni; tinsisti, f'dan ir-rigward, li jittieħed approċċ olistiku fir-rigward tal-edukazzjoni, li għandu jitqies bħala sistema kumplessa li tinkludi parteċipanti, strutturi u relazzjonijiet varji u li tiffoka fuq:

36.

Tilqa' bi pjaċir l-impenji tan-NU fir-rigward tad-drittijiet tal-bniedem u tal-protezzjoni soċjali fid-Dokument ta’ Eżitu tagħhom;

37.

Tenfasizza li l-Istati Membri tal-UE u tal-AKP għandhom isaħħu l-impenji tagħhom biex itejbu l-ugwaljanza bejn is-sessi, il-ġlieda kontra l-vjolenza abbażi tas-sess u t-tisħiħ tan-nisa bħala prijoritajiet ewlenin biex jintlaħqu l-MDGs;

38.

Tfakkar li r-responsabilità reċiproka tal-pajjiżi żviluppati u li qegħdin jiżviluppaw biex jintlaħqu l-MDGs sal-2015 hija dipendenti fuq it-tisħiħ tal-oqfsa għar-responsabilità, governanza u trasparenza;

39.

Tenfasizza l-ħtieġa li x-xogħol fuq l-MDGs jitkompla permezz ta’ approċċ olistiku ladarba l-MDGs kollha huma interkonnessi u reċiprokament infurzabbli;

40.

Tinsisti li r-rispett tad-drittijiet tal-bniedem, u l-promozzjoni u l-protezzjoni tagħhom, huwa parti integrali tax-xogħol effettiv lejn l-ilħuq tal-MDGs;

41.

Titlob l-implimentazzjoni tal-“patti tal-iżvilupp” fil-livell lokali, li jinvolvu impenji pubbliċi minn awtoritajiet lokali biex jitwettqu objettivi ta’ żvilupp definiti minn komunitajiet lokali u jiġi żgurat li l-awtoritajiet lokali jinżammu responsabbli għall-mod ta’ kif il-fondi jintefqu;

42.

Tenfasizza li ħaddiema edukati u tas-sengħa huma kruċjali biex itejbu l-iżvilupp ekonomiku, il-kompetittività u t-tkabbir;

43.

Tistieden lill-pajjiżi tal-UE u tal-AKP biex jistabbilixxu programmi ta’ taħriġ legali u fiskali għall-ħaddiema tal-awtorità fiskali; tenfasizza li hemm il-ħtieġa ta’ sforz speċjali fir-rigward ta’ pajjiżi li s'issa għadhom ma jirċevux għajnuna għall-futur imbiegħed fir-rigward ta’ kwistjonijiet ta’ tassazzjoni;

44.

Tenfasizza li l-ġlieda biex jiġu eliminati l-isfruttament tat-tfal u t-tħaddim tat-tfal għandha tkun prijorità għall-pajjiżi tal-UE u tal-AKP; tistieden lill-pajjiżi tal-UE u tal-AKP, għalhekk, biex jiffukaw l-isforzi tagħhom fuq l-eliminazzjoni tat-tħaddim tat-tfal;

45.

Tistieden lill-pajjiżi tal-UE u tal-AKP biex jużaw il-fondi Ewropej bl-aktar mod effettiv, bl-għan li l-MDGs jintlaħqu permezz tal-aktar għażla għaqlija tas-setturi fokali fil-Karti ta’ Strateġija għall-Pajjiż u fil-Programmi Indikattivi Nazzjonali, kif ukoll aċċess aktar faċli għall-miżuri ta’ appoġġ tal-EPA; tistieden lill-Kummissjoni Ewropea, f'dan il-kuntest, biex tiżgura li l-proposta tagħha biex jiġu allokati biljun ewro mill-fond FEŻ tkun ta’ benefiċċju l-iktar għal dawk il-pajjiżi li huma l-aktar żvijati fil-qafas tar-reviżjoni ta’ nofs it-terminu tal-2010 tal-programmi tal-AKP; tistieden lill-UE biex tinkludi lill-persuni b'diżabilità fix-xogħol kollu ta’ koperazzjoni internazzjonali, skont l-obbligi tagħha taħt l-Artikolu 32 tal-Konvenzjoni tan-NU dwar id-Drittijiet ta’ Persuni b'Diżabilitajiet;

46.

Tistieden lill-pajjiżi tal-UE u tal-AKP biex jistabbilixxu politiki kummerċjali ġusti, retti u regolati; tenfasizza f'dan il-kuntest l-importanza tad-dimensjoni tad-drittijiet tal-bniedem fil-ftehimiet kummerċjali kollha;

47.

Tistieden lill-pajjiżi tal-UE u tal-AKP biex iżidu l-investiment fl-agrikoltura u fis-sigurtà tal-ikel b'enfasi speċjali fuq il-lat tal-provvista, għal livelli li jiggarantixxu ħelsien mill-ġuħ għal kulħadd, b'mod partikolari billi jitqiesu ħtiġijiet urġenti ta’ ikel, infrastruttura mtejba f'reġjuni rurali, agrikoltura fuq skala żgħira u programmi ta’ protezzjoni soċjali, bl-għan li tiġi żgurata s-sigurtà tal-ikel fil-futur imbiegħed;

48.

Tesprimi t-tħassib serju tagħha dwar l-akkwist attwali ta’ art agrikola (b'mod partikolari fl-Afrika) minn investituri barranin megħjuna mill-gvern, liema akkwist, jekk ma jiġix trattat kif suppost, jista' jkun ta’ theddida billi jfixkel is-sikurezza alimentari lokali u jkollu konsegwenzi serji u mifruxa sew fil-pajjiżi li qegħdin jiżviluppaw; tħeġġeġ lill-AKP, lin-NU u lill-UE biex jindirizzaw b'mod serju l-impatti negattivi tal-akkwist ta’ art agrikola;

49.

Tistieden lill-pajjiżi tal-UE u tal-AKP biex jiżguraw li r-riformi tal-PAK, il-konklużjoni tal-EPAs u r-reviżjoni ta’ nofs it-terminu tal-Fond Ewropew għall-Iżvilupp jitwettqu b'mod koerenti u koordinat;

50.

Tistieden lill-pajjiżi tal-UE u tal-AKP biex jippromwovu s-sjieda tal-art bħala mezz biex jitnaqqas il-faqar u biex tiġi żgurata s-sigurtà tal-ikel, billi jissaħħu d-drittijiet tal-proprjetà u billi jiġi ffaċilitat l-aċċess għall-kreditu tal-bdiewa, tan-negozji ż-żgħar u tal-komunitajiet lokali; tenfasizza l-importanza ta’ investimenti ġodda għat-titjib tal-kapaċitajiet ta’ bdiewa żgħar, billi jiġu introdotti teknoloġiji iktar effiċjenti għall-ġestjoni tal-ilma u billi jiġu riġenerati n-nutrijenti tal-ħamrija;

51.

Tistieden lill-pajjiżi tal-UE u tal-AKP biex jirrikonoxxu d-dritt għall-ikel;

52.

Tistieden lill-pajjiżi tal-UE u tal-AKP biex jippromwovu l-produzzjoni lokali u l-konsum lokali;

53.

Tistieden lill-pajjiżi tal-UE u tal-AKP biex iżidu l-opportunitajiet għal nies li jaħdmu għal rashom u għal negozji żgħar u, f'dan il-kuntest, biex jippromwovu u jiffaċilitaw l-aċċess għall-mikroself.

54.

Tindika li l-iżvilupp industrijali għandu potenzjal trasformattiv kbir ħafna għall-ekonomiji nazzjonali u għandu t-tendenza li jagħti aktar lok għat-tkabbir tal-produttività fil-futur imbiegħed milli għall-esportazzjonijiet agrikoli u għall-estrazzjoni tar-riżorsi naturali, li jesponu lill-ekonomiji għal xokkijiet; tistieden lill-pajjiżi tal-AKP, għalhekk, biex jindirizzaw din il-kwistjoni billi jħejju u jimplimentaw politiki relatati mal-industrijalizzazzjoni billi jiffukaw b'mod speċjali fuq l-ispeċjalizzazzjoni tal-manifattura u l-bini ta’ kapaċità kummerċjali;

55.

Tħeġġeġ lill-gvernijiet u lill-pajjiżi donaturi, sabiex itejbu l-prestazzjoni kummerċjali tal-pajjiżi tal-AKP, biex iżidu l-investimenti u jtejbu l-appoġġ għall-bini tal-kapaċità, għall-kwalità, għall-kompetittività u għall-konformità mal-istandards tal-prodotti tal-intrapriżi tal-AKP, liema standards huma rikjesti mill-importatur; tikkunsidra li dan għandu jinvolvi t-tisħiħ tal-produttività, is-servizzi għall-estensjoni teknoloġika, it-taħriġ, il-bini tal-konsorzji għall-esportazzjoni u l-iżvilupp tal-klasters;

56.

Ittenni l-importanza tal-prinċipji tal-effettività tal-għajnuna, stabbiliti fid-Dikjarazzjoni ta’ Pariġi u fl-Aġenda għall-Azzjoni ta’ Akkra;

57.

Tistieden lill-parlamenti tal-AKP biex jagħtu rendikont tal-progress fid-dimensjoni parlamentari tal-koperazzjoni internazzjonali u biex jevalwaw l-involviment parlamentari b'appoġġ għall-Miri tal-Millennju għall-Iżvilupp; tħeġġeġ lill-parlamenti kollha biex meta jkunu qed jeżaminaw l-abbozz tal-baġits u tal-liġijiet jevalwaw l-impatt tagħhom fuq l-ilħuq tal-MDGs;

58.

Tistieden lill-komunità internazzjonali biex tippromwovi u tappoġġja d-demokrazija, il-paċi, l-istat tad-dritt u l-amministrazzjoni ħielsa mill-korruzzjoni fil-pajjiżi li qegħdin jiżviluppaw;

59.

Tistieden lill-pajjiżi tal-UE u tal-AKP biex jindirizzaw l-kawżi bażiċi sottostanti ta’ inġustizzja billi jindirizzaw id-diskriminazzjoni, in-normi u l-prattiki soċjali, billi jagħtu lill-komunitajiet iktar għarfien u iktar lok għall-iżvilupp tal-kapaċità, isaħħu s-sistemi ta’ responsabilità, u billi jappoġġjaw l-organizzazzjonijiet tas-soċjetà ċivili;

60.

Tistieden lill-pajjiżi tal-UE u tal-AKP biex jagħtu attenzjoni partikolari lid-drittijiet tal-minoranza, u biex jirrispettaw id-drittijiet tal-bniedem u jippromwovu n-nondiskriminazzjoni;

61.

Tistieden lill-Istati Membri tal-UE biex ikomplu jsegwu l-pjan ta’ azzjoni fuq tnax-il punt li nħareġ mill-Kummissjoni Ewropea f'April 2010 (22) u tistieden lill-Kummissjoni Ewropea biex tipprovdi, annwalment, rapport dwar il-progress tal-UE fir-rigward tal-ilħuq tal-MDGs sal-2015;

62.

Tilqa' bi pjaċir l-impenn tan-NU biex jorganizzaw avveniment speċjali fl-2013 bħala segwitu tal-isforzi li jkunu saru għall-ilħuq tal-MDGs;

63.

Tagħti istruzzjonijiet lill-Ko-Presidenti tagħha biex jibagħtu din ir-riżoluzzjoni lill-Kunsill tal-Ministri tal-AKP-UE, lill-Parlament Ewropew, lill-Kummissjoni Ewropea, lill-Presidenza tal-Kunsill tal-UE u lill-Unjoni Afrikana.

A.

billi fl-1996 l-FAO ddefinixxiet is-sigurtà tal-ikel bħala “l-aċċess għal kulħadd fi kwalunkwe ħin għal biżżejjed ikel sigur u nutrittiv għal ħajja b’saħħitha u attiva”,

B.

wara li kkunsidrat il-Green Paper tal-Kummissjoni Ewropea intitolata “Politika tal-żvilupp tal-UE għall-appoġġ ta’ tkabbir inklussiv u żvilupp sostenibbli: Żieda fl-impatt tal-politika tal-iżvilupp tal-UE”, li ġiet ippubblikata fl-10 ta’ Novembru 2010 u li l-objettivi tagħha jinkludu “kif jinkisbu riżultati dejjiema fil-qasam tal-agrikoltura u s-sigurtà tal-ikel”,

C.

billi l-agrikoltura hija s-sors ewlieni ta’ għajxien għal 80-90 % tal-popolazzjoni f’ħafna pajjiżi li qegħdin jiżviluppaw; billi żieda fid-dħul tagħhom tirrivitalizza l-ekonomiji rurali, toħloq iktar impjiegi għal nies foqra u żżid id-domanda għal prodotti u servizzi prodotti lokalment,

D.

billi n-numru ta’ nies li m’għandhomx biżżejjed ikel fid-dinja għadu iktar minn biljun fl-2010, minkejja l-isforzi globali attwali biex jitnaqqas il-ġuħ,

E.

billi fl-2008 ż-żieda fil-prezzijiet tal-ikel, l-ogħla żieda fil-prezz taż-żejt u l-kriżi finanzjarja, flimkien mat-tibdil fil-klima, kollha kellhom impatt devastanti fuq l-ekonomiji tal-pajjiżi tal-AKP, staġnati fi kriżi sistematika,

F.

billi l-ispekulazzjoni fl-akkwiżizzjonijiet ta’ ikel u art f’negozji agrikoli orjentati lejn l-esportazzjoni tista’ tikkontribwixxi għal nuqqasijiet u, għaldaqstant, għal żieda fil-prezzijiet, u ċċaħħad lil miljuni ta’ persuni minn aċċess adegwat għall-ikel,

G.

billi, minkejja l-importanza pruvata tal-agrikoltura għall-pajjiżi tal-AKP, il-programmi ta’ koperazzjoni għall-iżvilupp bejn l-UE u l-AKP ma tawx biżżejjed prijorità lis-settur agrikolu,

H.

billi prattiki agrikoli mhux sostenibbli, inklużi d-deforestazzjoni mhux kontrollata jew id-dipendenza żejda fuq il-pestiċidi, jikkontribwixxu b’mod dirett għall-iskarsezza ta’ art tajba għall-ħrit u ta’ kwalità tajba għall-produzzjoni ta’ ikel tajjeb għas-saħħa,

I.

billi l-pajjiżi tal-AKP huma dipendenti fuq l-esportazzjonijiet ta’ prodotti, liema esportazzjonijiet jikkontribwixxu għal iktar minn 50 % tad-dħul barrani tagħhom, filwaqt li xi SIDS (Stati li huma gżejjer żgħar li qegħdin jiżviluppaw) jiddependu fuq l-importazzjonijiet għal kważi 80 % tar-rekwiżiti alimentari bażiċi tagħhom peress li ma jistgħux jaspiraw għal xi livell raġonevoli ta’ awtosuffiċjenza alimentari,

J.

billi sussidji ta’ esportazzjoni għal prodotti agrikoli jistgħu jwasslu għal dumping fis-swieq tal-pajjiżi li qegħdin jiżviluppaw, b’konsegwenzi serji għall-produtturi lokali ż-żgħar,

K.

billi l-impatt tat-tibdil fil-klima, id-degradazzjoni tal-kopertura tal-pjanti u ż-żieda fil-frekwenza tad-diżastri naturali x’aktarx iżidu n-nuqqas tas-sigurtà tal-ikel b’mod sinifikanti fis-snin li ġejjin, u se jkollhom impatt drammatiku fuq il-mod ta’ kif dawk li jaħdmu fis-settur agrikolu jaqilgħu l-għajxien tagħhom,

L.

billi ħafna mill-pajjiżi Afrikani jikru art agrikola lill-investituri barranin, li, jekk ma tiġix ġestita kif xieraq, tista’ tkun ta’ theddida għas-sigurtà tal-ikel lokali u tista’ twassal għal konsegwenzi serji u mifruxin,

M.

billi l-konsegwenzi tat-tibdil fil-klima u d-deforestazzjoni li jaffettwaw lill-agrikoltura, prinċiparjament it-tnaqqis fil-prodotti tal-uċuħ tar-raba’ minħabba nuqqasijiet kontinwi ta’ ilma, nixfa, jew, b’kuntrast, għargħar u ċediment tal-art, għandhom effetti serji u negattivi fuq l-attivitajiet agrikoli fil-pajjiżi tal-UE u tal-AKP,

N.

billi ż-żieda fil-produzzjoni agrikola, prinċiparjament fis-settur tal-azjendi agrikoli familjari, tista’ ttaffi n-nuqqas ta’ sigurtà u tikkontribwixxi għat-tnaqqis fil-prezzijiet tal-ikel u għaż-żieda fid-dħul tal-produtturi,

O.

billi l-ilma tajjeb għax-xorb huwa fattur importanti għas-sigurtà tal-ikel u l-pajjiżi tal-AKP jsibu diffikultà biex ikollhom aċċess għalih,

P.

billi annimali selvaġġi, fil-forma ta’ laħam ta’ annimali selvaġġi, jipprovdu l-parti l-kbira tal-proteini fid-dieta ta’ ħafna mill-ifqar persuni fid-dinja b’mod insostenibbli, fatt li jirriżulta f’żoni selvaġġi li strutturalment jidhru intatti, iżda potenzjalment mhumiex kapaċi jsostnu l-bijodiversità tagħhom, u għalhekk huma biss soluzzjoni temporanja, fatt li joħloq iktar theddid għall-katina alimentari,

Q.

billi 70 % tal-1,3 biljun ruħ li jgħixu f’faqar estrem huma nisa, u madwar id-dinja, in-nisa huma mċaħħda mill-opportunitajiet meħtieġa biex itejbu l-kundizzjonijiet ekonomiċi u soċjali tagħhom, bħad-drittijiet għall-proprjetà jew għall-wirt, jew l-aċċess għall-edukazzjoni jew għall-impjiegi,

R.

billi t-tnaqqis fil-fluss tal-investiment dirett barrani fid-dinja li qiegħda tiżviluppa bħala riżultat tar-riċessjoni globali jfixkel direttament l-aċċess għas-self u l-garanziji ta’ kreditu, inkluż il-mikrokreditu, filwaqt li jżid mal-ostakoli eżistenti għall-akkwiżizzjoni u l-użu ta’ art tajba għall-ħrit, li hija essenzjali għall-iżvilupp tal-agrikoltura lokali u biex tiġi żgurata s-sigurtà tal-ikel fil-futur imbiegħed,

S.

billi, skont l-estimi tal-FAO, 7 miljun ħaddiem agrikolu mietu kawża tal-HIV/AIDS mill-1985 ’l hawn, u l-pandemija hija maħsuba li se taħsad il-ħajja ta’ 16-il miljun vittma oħra fl-għoxrin sena li jmiss fil-25 pajjiż Afrikan li huma affettwati l-agħar; billi l-HIV/AIDS u pandemiji oħra prinċiparjament jaffettwaw il-forza tax-xogħol produttiva,

T.

billi inkwiet politiku u nuqqas ta’ paċi u sigurtà huma ta’ theddida għall-kapaċità ta’ ħafna pajjiżi li jipprovdu l-ikel, u barra minn hekk iħallu impatt negattiv fuq il-mod ta’ kif in-nies se jaqilgħu l-għajxien tagħhom fil-futur imbiegħed,

U.

billi żieda fl-aċċess għal teknoloġiji tal-informazzjoni moderni tippromwovi l-kapaċitajiet tal-bdiewa u tiżgura li huma jkunu informati aħjar dwar il-prattiki agrikoli, il-prezzijiet u l-aċċess għal fatturi ta’ produzzjoni,

1.

Tenfasizza n-natura essenzjali tad-dritt għall-ikel, li għandu jiġi kkunsidrat bħala dritt inaljenabbli u universali; tenfasizza d-dritt ta’ kull pajjiż jew reġjun li jistabbilixxi tip ta’ agrikoltura li tissodisfa l-bżonnijiet alimentari tal-popolazzjoni tiegħu; tikkonferma mill-ġdid li l-aċċess għal ikel suffiċjenti u tajjeb għas-saħħa huwa dritt bażiku tal-bniedem u għandu jiġi garantit permezz ta’ azzjoni komuni mill-gvernijiet, entitajiet internazzjonali u organizzazzjonijiet tas-soċjetà ċivili; tenfasizza li ż-żamma jew iċ-ċaħda ta’ dan id-dritt jeħtieġ li jitqies bħala ksur ta’ dritt universali tal-bniedem;

2.

Tfakkar lill-pajjiżi tal-UE u tal-AKP li huma taw kelmithom li jnaqqsu bin-nofs il-proporzjon tal-popolazzjoni li tbati l-ġuħ sal-2015; tistieden lill-pajjiżi tal-UE u tal-AKP biex jieħdu l-miżuri adegwati fil-qafas tal-MDG biex jonoraw dan l-impenn;

3.

Tistieden lill-UE biex tagħti prijorità, b’konsultazzjoni mill-qrib mal-pajjiżi tal-AKP u fil-qafas tad-WTO, lill-kwistjoni tal-impatt tas-sussidji tal-Ewropa għall-esportazzjonijiet agrikoli tagħha fuq il-pajjiżi tal-AKP; tenfasizza l-ħtieġa li l-eżitu tar-Rawnd ta’ Doha jkun ta’ suċċess għall-iżvilupp; tenfasizza wkoll li d-dinja żviluppata għandha ssaħħaħ l-impenn tagħha biex tirriforma s-sussidji tal-biedja tagħha permezz ta’ ftehim dwar il-kummerċ dinji; tfakkar, f’dan ir-rigward, li kwalunkwe ftehim għandu jikkunsidra r-reġjuni klimatiċi u b’konsegwenza ta’ dan il-forom distinti tal-produzzjoni agrikola; tenfasizza li r-riżultati tar-Rawnd ta’ Doha għandhom jipprovdu lill-pajjiżi li qegħdin jiżviluppaw b’inċentiv biex jinvestu fil-produzzjoni agrikola u alimentari tagħhom;

4.

Tistieden lill-pajjiżi tal-AKP biex lill-azjendi agrikoli familjari jagħtuhom sehem sinifikanti mill-investimenti tas-settur bl-għan li tintlaħaq is-sigurtà tal-ikel;

5.

Tikkunsidra li huwa essenzjali li jingħata impetu ġdid lis-sħubija bejn l-AKP u l-UE billi jiġu nnegozjati ftehimiet ta’ sħubija ġusti u bilanċjati li huma mmirati lejn l-iżvilupp;

6.

Hija tal-opinjoni li, biex jiġu żgurati s-sigurtà u s-sostenibilità tal-ikel, u biex niġġieldu l-faqar, id-drittijiet ekonomiċi u soċjali kollha, inkluż id-dritt għall-ikel, għandhom jiġu kkunsidrati fir-regoli u fil-ftehimiet internazzjonali tal-kummerċ;

7.

Jiddispjaċiha li, fl-2008, ħames snin wara d-Dikjarazzjoni ta’ Maputo li stabbilixxiet objettiv ġenerali li 10 % tal-baġits nazzjonali tal-Istati Membri tal-UA jiġi allokat għall-agrikoltura, 50 % tal-pajjiżi Afrikan nefqu inqas minn 5 % tal-baġits nazzjonali tagħhom fuq l-agrikoltura;

8.

Tenfasizza li d-diskussjonijiet dwar l-implimentazzjoni tal-10 FEŻ għandhom jikkunsidraw iktar il-ħtiġijiet tal-popolazzjonijiet f’termini ta’ produzzjoni agrikola li għandha l-għan li tiżgura s-sigurtà tal-ikel tagħhom, kif ukoll it-titjib u d-diversifikazzjoni tal-produzzjoni agrikola u l-ħolqien ta’ valur miżjud, biex b’hekk tgħin lill-pajjiżi tal-AKP joħorġu mill-mudell ta’ monokulturi tal-esportazzjoni;

9.

Titlob għall-implimentazzjoni tal-10 FEŻ biex jiġi inkluż programm ta’ żvilupp speċifiku tas-sigurtà tal-ikel għal kull pajjiż tal-AKP, u biex dak il-programm jinkludi miri ċari u ambizzjużi, kif ukoll għall-applikazzjoni ta’ miżuri konkreti fi żmien stipulat preċiż, b’konsultazzjoni mal-organizzazzjonijiet tal-bdiewa u mas-soċjetà ċivili;

10.

Tistieden lill-pajjiżi tal-UE u tal-AKP biex fil-politika ta’ żvilupp tagħhom jikkunsidraw il-bżonnijiet għall-futur qarib u t-tfixkil li huma soġġetti għalih in-nisa u l-irġiel li jgħixu f’żoni rurali, biex b’mod partikolari jiġi garantit is-suċċess tal-programmi relatati mas-sigurtà tal-ikel;

11.

Tenfasizza li s-sigurtà tal-ikel għandha tiġi integrata fil-politiki tal-pajjiżi li qegħdin jiżviluppaw biex jitjiebu d-disponibilità tal-ikel, l-aċċess għall-ikel u l-konsum tal-ikel billi jiġu stabbiliti strateġiji alimentari li għandhom l-għan li jtaffu l-faqar;

12.

Tħeġġeġ lill-komunità internazzjonali biex tassisti lill-Programm Dinji tal-Ikel (WFP – World Food Programme) biex dan jiffaċċja l-isfidi l-ġodda fil-ġlieda kontra l-ġuħ kawża tal-prezzijiet tal-ikel u taż-żejt li dejjem qed jogħlew, tal-kambjamenti drastiċi fit-temp u kawża ta’ stokkijiet globali tal-ikel dejjem jonqsu;

13.

Titlob lill-Kummissjoni, lill-Istati Membri tal-UE u lill-pajjiżi tal-AKP biex jikkoperaw mill-qrib flimkien biex jieħdu azzjoni konkreta biex tinstab soluzzjoni għall-ispekulazzjoni finanzjarja taż-żrieragħ u l-ikel;

14.

Titlob għar-rikonoxximent tal-importanza tar-riċerka, tas-servizzi ta’ estensjoni agrikoli u tar-rabtiet bejn il-bdiewa biex jintlaħqu l-objettivi tas-sigurtà tal-ikel;

15.

Tindika li huwa neċessarju li jiġu introdotti metodi aħjar ta’ produzzjoni agrikola, inklużi teknoloġiji li ma jiswewx ħafna flus, li tiġi provduta riċerka fl-agrikoltura, u li jissaħħaħ il-proporzjon produttività-effiċjenza fil-pajjiżi tal-AKP biex titjieb is-sostenibilità u jittaffew l-effetti negattivi tan-nuqqas ta’ sigurtà tal-ikel;

16.

Tħeġġeġ lill-pajjiżi tal-AKP u tal-UE biex jimmoniterjaw iktar mill-qrib l-akkwisti fuq skala kbira ta’ artijiet li jistgħu jwasslu biex iż-żieda fil-prezzijiet tqaċċat ’il barra lill-bdiewa lokali u b’hekk tonqos l-abilità tagħhom li jipproduċu prodotti agrikoli lokali biex isostnu lilhom infushom u lill-popolazzjonijiet lokali;

17.

Tenfasizza l-importanza enormi tal-koperazzjoni bejn l-UE u l-AKP biex jitjiebu l-għarfien u l-kapaċitajiet tal-bdiewa, titlob, għalhekk, li jiġu provduti programmi ta’ taħriġ bl-għan li jiżdiedu l-kapaċitajiet tagħhom fil-metodi ta’ agrikoltura sostenibbli;

18.

Tenfasizza l-importanza li jiġu garantiti żrieragħ ta’ kwalità għall-produtturi kollha;

19.

Tistieden lill-pajjiżi tal-AKP biex juru inizjattiva permezz ta’ programmi ta’ politika agrikoli ambizzjużi, bħal pereżempju l-inizjattiva tar-ross f’Mali;

20.

Tistieden lill-pajjiżi tal-AKP biex jagħtu prijorità lis-settur tal-agrikoltura fil-pjanijiet ta’ żvilupp tagħhom u fil-Karti ta’ Strateġija Reġjonali u tal-Pajjiż, b’mod partikolari permezz ta’ investiment pubbliku mifrux fl-infrastruttura rurali,

21.

Tikkunsidra li l-koerenza politika għall-iżvilupp, b’mod partikolari bejn il-politiki dwar il-kummerċ, l-iżvilupp, l-agrikoltura u s-sajd, għandha tkun il-prinċipju ta’ gwida tal-koperazzjoni tal-UE għall-iżvilupp biex isir użu ikbar mill-Artikolu 12 tal-Ftehima ta’ Cotonou;

22.

Tenfasizza l-ħtieġa li l-pajjiżi tal-UE u tal-AKP jiddisinjaw mekkaniżmu adegwat u flessibbli adattat għal sitwazzjonijiet ta’ emerġenza partikolari li jirriżultaw minn diżastri fis-settur agrikolu;

23.

Tilqa’ bi pjaċir l-assistenza tal-Faċilità tal-Ikel stabbilita mill-UE b’baġit ta’ biljun ewro biex mill-2009 sal-2011 tipprovdi għajnuna rapida lil aktar minn 50 pajjiż ta’ prijorità madwar id-dinja li qed jiffaċċjaw żidiet fil-prezzijiet tal-ikel, bl-għan li tiżdied il-kapaċità u l-provvista tal-produzzjoni tal-ikel lokali, biex b’hekk jissaħħu l-komunitajiet agrikoli lokali;

24.

Tistieden lill-gvernijiet tal-AKP biex jiżguraw li n-nisa f’żoni rurali jingħataw drittijiet kompluti u ugwali għall-art u riżorsi oħra, inkluż id-dritt akkwistat permezz tal-wirt, u li r-riformi amministrattivi u miżuri neċessarji oħra jittieħdu biex in-nisa jingħataw l-istess aċċess mogħti lill-irġiel għall-kreditu, kapital, drittijiet tax-xogħol, dokumenti ta’ identifikazzjoni legali, teknoloġiji adegwati u aċċess għas-swieq u għall-informazzjoni;

25.

Tinnota li l-Unjoni Ewropea fit-totalità tagħha, inklużi l-Istati Membri tagħha, tibqa’ d-donatur ewlieni ta’ għajnuna għall-iżvilupp, billi tikkontribwixxi għal 56 % tat-total dinji, li ammonta għal 49 biljun ewro fl-2009, ammont li huwa kkonfermat mill-wegħdiet kollettivi tal-gvernijiet tal-UE li jilħaq iż-0,56 % u ż-0,70 % tad-Dħul Gross Nazzjonali għall-Għajnuna Uffiċjali għall-Iżvilupp sal-2010 u l-2015 rispettivament;

26.

Tistieden lill-Istati Membri tal-UE u lill-Kummissjoni Ewropea biex jissodisfaw l-impenji tagħhom, b’mod partikolari fir-rigward tal-Istati tal-AKP li huma l-inqas żviluppati u tal-Istati tal-AKP li jagħmlu profitt nett mill-importazzjoni tal-ikel, biex b’hekk dawn ikunu jistgħu jtaffu l-effetti negattivi li qed jesperjenzaw wara ż-żidiet sinifikanti fil-prezzijiet tal-ikel, li iktar ma jgħaddi żmien iktar qed jaggravaw il-problemi tagħhom tal-bilanċ tal-pagamenti;

27.

Tikkunsidra li d-dejn estern ta’ pajjiżi fqar ifixkel il-possibilitajiet tagħhom għall-iżvilupp u jnaqqas ir-reżiljenza u l-kapaċità tagħhom li jiġġieldu b’mod effettiv kontra l-faqar u l-ġuħ; għalhekk titlob lill-Kummissjoni Ewropea u lill-Istati Membri tal-UE biex ikomplu bin-negozjati biex tinkiseb il-kanċellazzjoni tad-dejn għall-Pajjiżi bi Djun Kbar, li sal-lum għadha ma ġietx solvuta;

28.

Tilqa’ b’sodisfazzjon l-impenn tal-MDG ta’ miljun ewro min-naħa tal-Kummissjoni Ewropea, kif imħabbar mill-President tal-Kummissjoni fil-Laqgħa ta’ Livell Għoli tan-Nazzjonijiet Uniti fi New York, biex jiġu ppremjati dawk il-pajjiżi li jkunu qed jagħmlu xogħol tajjeb u biex jingħata appoġġ lil dawk li jkunu l-iktar żvijati, u, filwaqt li tindirizza l-ispeċifiċitajiet u l-ħtiġijiet tal-LDCs, tal-Istati li huma gżejjer żgħar li qegħdin jiżviluppaw (SIDS) u tal-Istati tal-AKP li jagħmlu profitt nett mill-importazzjoni tal-ikel, biex jiġu stabbiliti kriterji ta’ eliġibilità objettivi u trasparenti u biex jiġi żgurat li l-aċċess għal dawn ir-riżorsi jkun ibbażat fuq id-domanda; tistieden lill-Kummissjoni Ewropea biex tikkunsidra wkoll li tuża parti mill-biljun ewro allokat skont l-impenn tal-MDG biex tillieva riżorsi addizzjonali minn entitajiet privati li jikkorrispondu għall-flus allokati għal proġetti ta’ implimentazzjoni li jżidu l-produzzjoni tal-ikel għas-swieq lokali u reġjonali kif ukoll għall-iżvilupp u l-użu tal-bijoteknoloġija biex jintlaħqu dawn l-objettivi;

29.

Tikkunsidra li l-impatt kummerċjali tal-agrofjuwils tal-ġenerazzjoni li jmiss għandu jiġi analizzat iktar fid-dettall; għalhekk, tistieden lill-Kummissjoni Ewropea biex tadotta u timplimenta kriterji ta’ sostenibilità trasparenti b’urġenza u biex tikkunsidra l-effetti detrimentali possibbli tas-sussidji għall-prodotti agrikoli tal-agrofjuwils;

30.

Tappoġġja l-istabbiliment, fi ħdan il-koperazzjoni reġjonali tal-AKP u l-UE, ta’ mekkaniżmu adegwat għall-mitigazzjoni u l-adattazzjoni tat-tibdil fil-klima għall-azjendi agrikoli familjari;

31.

Tinkoraġġixxi koordinazzjoni aħjar, b’mod partikolari fil-livell nazzjonali iżda wkoll fi ħdan il-komunità tal-iżvilupp internazzjonali, tal-isforzi li jsiru fil-kuntest tal-programmi agrikoli u s-sovrapożizzjoni ta’ programmi li jinħolqu fil-pajjiżi tal-AKP, li huma ta’ piż fuq ir-riżorsi umani u finanzjarji;

32.

Tenfasizza l-ħtieġa għal responsabilità finanzjarja, fil-livell nazzjonali u internazzjonali, tal-programmi agrikoli kollha li jirriżultaw mill-għajnuna Ewropea, biex tiġi żgurata ġestjoni xierqa tal-fondi allokati;

33.

Tħeġġeġ lill-gvernijiet tal-AKP biex jiżviluppaw ġestjoni aktar sostenibbli tal-assi ambjentali bħal pereżempju l-laħam tal-annimali selvaġġi, u titlob iktar riċerka dwar il-produzzjoni sostenibbli tal-proteini fil-pajjiżi tal-AKP, bħala mezz biex titnaqqas id-dipendenza fuq is-sorsi, li qed jonqsu b’rata mgħaġġla, tal-proteini ta’ annimali selvaġġi;

34.

Tistieden lill-pajjiżi tal-UE u tal-AKP biex jagħmlu enfasi partikolari, matul in-negozjati attwali u futuri dwar it-tibdil fil-klima, fuq il-ħtieġa li tiżdied id-disponibilità tal-inputs agrikoli bħal pereżempju l-fertilizzanti, iż-żrieragħ u għodod oħra, biex jgħinu lill-bdiewa jistimulaw il-produzzjoni filwaqt li tiġi promossa l-ġestjoni sostenibbli tar-riżorsi tal-ilma, u biex jagħmlu l-almu tagħhom biex jipprovdu l-appoġġ meħtieġ għall-prattiki agrikoli li ma jagħmlux ħsara lill-klima;

35.

Tagħti istruzzjonijiet lill-Ko-Presidenti tagħha biex jibagħtu din ir-riżoluzzjoni lill-Kunsill tal-Ministri tal-AKP-UE, lill-President tal-Kummissjoni Ewropea, lill-Parlament Ewropew, lill-parlamenti nazzjonali tal-AKP u tal-Istati Membri tal-UE, lill-Viċi President tal-Kummissjoni Ewropea/Rappreżentant Għoli tal-Unjoni għall-Affarijiet Barranin u l-Politika tas-Sigurtà, lill-President tal-Kummissjoni tal-Unjoni Afrikana, lill-Parlament Pan-Afrikan u lis-Segretarju Ġenerali tan-NU.

A.

billi kkunsidrat id-daqs tar-reġjun Saħel-Saħara u n-natura awstera tal-ambjent tiegħu,

B.

billi l-pajsaġġ tiegħu huwa kkaratterizzat minn kontorni magħmula minn muntanji u għerien li jinsabu tul il-meded vasti ta' duni, ramel u widien ġeblin (wadis),

C.

billi Mali, l-Alġerija, il-Mawritanja, in-Niġer, il-Libja u ċ-Ċad huma l-pajjiżi ewlenin li jmissu mal-istrixxa Saħel-Saħara,

D.

billi, minħabba l-medda ta' dan it-territorju li tammonta għal 4 miljun km kwadru, liema territorju m'għandux popolazzjoni densa, u t-tul tal-fruntieri tiegħu b'demarkazzjoni ambigwa, hemm il-ħtieġa ta' koordinazzjoni effettiva ta' informazzjoni u azzjoni u mezzi sofistikati ta' skoperta, protezzjoni u prevenzjoni,

E.

billi l-partijiet interessati internazzjonali, reġjonali u nazzjonali kollha għandhom jiġu mobilizzati għall-promozzjoni tal-ġlieda kontra t-terroriżmu u għat-tisħiħ tas-sigurtà fir-reġjun, permezz ukoll tad-djalogu strutturat,

F.

billi l-ark tas-Saħel huwa żona strateġika bejn l-Afrika Sub-Saħarjana u l-Ewropa u billi s-sitwazzjoni fil-medda Saħel-Saħara hija għalhekk kwistjoni ewlenija ta' sigurtà kemm għall-Afrika kif ukoll għall-Ewropa,

G.

billi t-trasformazzjoni tal-medda Saħel-Saħara f'żona li tintuża għal attivitajiet illegali u perikolużi u forom ta' traffikar hija theddida għas-sigurtà globali dinjija,

H.

wara li kkunsidrat ir-reġjuni aridi sottożviluppati u l-impatt ta' dan fuq iż-żgħażagħ, li jispiċċaw qiegħda,

I.

billi, fl-isforzi tagħhom ta' reklutaġġ, it-terroristi jisfruttaw id-defiċit tal-iżvilupp, il-kundizzjonijiet mhux siguri, il-privazzjoni soċjali u l-prospetti fjakki ta' impjieg ta' ħafna żgħażagħ fir-reġjun mingħajr prospetti, billi joffrulhom pagi illegali iżda sostanzjali,

J.

wara li kkunsidrat l-impatt, li jagħmel ħsara, tat-terroriżmu u tal-kriminalità organizzata fuq l-Istati fir-reġjun u l-popolazzjonijiet lokali rispettivi tagħhom,

K.

wara li kkunsidrat ir-riperkussjonijiet serji tan-nuqqas ta' sigurtà fuq l-ekonomija tar-reġjun, b'mod partikolari is-setturi tal-minjieri u tat-turiżmu, fuq l-iżvilupp tiegħu u fuq il-ħolqien tal-impjiegi,

L.

billi r-reġjun żviluppa f'żona ta' tranżitu u tranżazzjoni għat-traffikanti tad-drogi, il-kummerċjanti tal-armi u t-traffikanti ta' migranti illegali fl-Ewropa,

M.

wara li kkunsidrat iż-żieda fin-nuqqas ta' sigurtà f'dan ir-reġjun, ikkawżata mill-fergħa tal-Al-Qaeda f'Magreb (AQMI), bil-ħtif u t-teħid min-naħa tagħha ta' ostaġġi, li issa qegħdin jintużaw bħala pedini,

N.

wara li kkunsidrat il-vjolazzjoni tal-ispazju tal-ajru ta' numru ta' pajjiżi fil-viċin minn negozjanti ta' prodotti illeċiti, inkluża l-kokaina,

O.

wara li kkunsidrat ir-riżorsi u l-possibilitajiet kbar li t-terroristi u t-traffikanti tad-drogi għandhom fir-rigward tal-pajjiżi mhedda,

P.

billi numru ta' pajjiżi esprimew ir-rieda tagħhom li jipprovdu lill-Istati li għandhom il-fruntiera tagħhom tmiss mas-Saħara bl-għajnuna meħtieġa biex jiffaċċjaw din is-sitwazzjoni,

Q.

billi n-nuqqas ta' sigurtà qed jagħmilha diffiċli li jiġu implimentati l-proġetti tal-iżvilupp u li jitwettaq ix-xogħol umanitarju tal-NGOs,

R.

wara li kkunsidrat it-tradizzjonijiet ta' tolleranza, solidarjetà u rispett għall-persuna umana li jaderixxi magħhom l-Iżlam, hekk kif inhuma prattikati fir-reġjun,

S.

wara li kkunsidrat il-krudeltà selvaġġa tal-eżekuzzjoni ta' ċittadini innoċenti,

T.

billi l-ħtif ta' persuni għal somom ta' flus ta' spiss huwa marbut mal-kriminalità organizzata iktar milli ma' ġlidiet ideoloġiċi jew reliġjużi,

U.

billi l-għażla militari tista' tkun effettiva biss jekk tkun sostnuta minn politika ta' żvilupp sostenibbli fir-reġjun Saħel-Saħara,

V.

billi l-istrumenti internazzjonali msemmijin hawn fuq jiffurmaw bażi għal koperazzjoni globali mtejba li hija riflessa wkoll fl-iżvilupp li jirrigwarda r-relazzjonijiet tal-Unjoni Ewropea ma' pajjiżi terzi,

W.

billi ċ-Ċentru Internazzjonali għall-Istudji dwar it-Terroriżmu ddokumenta żieda drammatika fl-attakki terroristiċi fl-Afrika ta' Fuq u fl-Afrika tal-Lvant, li żdiedu b'iktar minn 500 % mill-11 ta' Settembru 2001 (32), billi dawn l-attakki qatlu 'l fuq minn 1 500 persuna u darbu 6 000;

X.

billi r-reġjun qed jesperjenza tisħiħ allarmanti tar-rabtiet bejn it-traffikanti tad-droga fl-Amerika Latina u fi Stati fl-Afrika tal-Punent/Ċentrali, u billi din tal-aħħar issa hija rotta ta' tranżitu ewlenija għat-trasport bil-baħar tad-droga lejn l-Ewropa, li tammonta għal aktar minn 25 % tal-konsum globali ta' kokaina; tenfasizza li dawn ix-xejriet jirrikjedu impenn akbar mill-Unjoni Ewropea,

Y.

billi fis-Saħel qed jiżdiedu r-rabtiet bejn, min-naħa l-waħda, il-kartelli tad-droga tal-Amerika Latina li għandhom ħafna riżorsi u huma ferm organizzati u, min-naħa l-oħra, l-organizzazzjonijiet terroristiċi, li qed ifittxu li jinvolvu lill-popolazzjoni lokali,

Z.

billi l-Istrateġija Ewropea ta' Sigurtà tal-2003 ddikjarat li t-terroriżmu “jimponi theddida strateġika dejjem akbar għall-Ewropa kollha” u billi r-reġjun tas-Saħel-Saħara huwa wieħed mill-prijoritajiet tal-UE fil-ġlieda kontra t-terroriżmu,

AA.

billi huwa essenzjali li jiġu eliminati s-sorsi ta' finanzjament għat-traffikar illegali u għall-ħtif, u għal dan l-għan jeħtieġ li jittieħdu l-miżuri kollha possibbli biex jiġi evitat il-ħasil tal-flus,

1.

Tfakkar lill-vittmi tat-terroriżmu; tikkundanna bis-saħħa t-terroriżmu fil-forom u l-manifestazzjonijiet kollha tiegħu, u tappella għall-ħelsien inkondizzjonat tal-ostaġġi kollha;

2.

Tikkundanna bis-sħiħ is-sitwazzjoni tas-sigurtà li qed tmur għall-agħar fis-Saħel-Saħara, li swiet il-ħajja ta' bosta persuni u li qed thedded il-progress li sar f'dawn l-aħħar ftit snin biex jiġi miġġieled it-terroriżmu fir-reġjun;

3.

Tappella lin-Nazzjonijiet Uniti biex jiżviluppaw mill-aktar fis rispons aktar koordinat fis-Saħel, kif sostnut fl-Istqarrija Presidenzjali tal-Kunsill tas-Sigurtà tan-NU tal-10 ta' Lulju 2009 (S/PRST/2009/20) fir-rigward tal-ġlieda kontra l-attivitajiet kriminali u t-theddid terroristiku transkonfinali, b'mod partikolari fl-istrixxa tas-Saħel-Saħara, inkluża l-implimentazzjoni tal-Istrateġija Globali kontra t-Terroriżmu fir-reġjun;

4.

Tenfasizza l-importanza li jiġu pprovduti assistenza, appoġġ u kura psikoloġika lill-persuna li tkun sfat vittma tat-terroriżmu u lill-familja tagħha;

5.

Tappoġġja t-tisħiħ tal-koperazzjoni internazzjonali dwar il-ġlieda kontra t-terroriżmu, tilqa' b'sodisfazzjon il-koordinazzoni min-naħa ta' xi pajjiżi, tħeġġeġ lill-pajjiżi kollha fir-reġjun biex ikomplu jgħaqqdu flimkien l-isforzi tagħhom biex jiġġieldu b'mod effettiv kontra t-terroriżmu u l-kriminalità organizzata, u tittama li l-iskambji ta' informazzjoni ma jiġux imfixkla mir-rivalitajiet reġjonali;

6.

Tappella lis-Segretarju Ġenerali tan-Nazzjonijiet Uniti, lill-President tal-Kunsill tal-UE u lill-President tal-Kummissjoni tal-UA biex jiffaċilitaw samit tal-Kapijiet tal-Istat tal-Alġerija, il-Mali, in-Niġer, il-Mawritanja, il-Libja u ċ-Ċad bl-għan li tiġi stabbilita strateġija komuni għall-ġlieda kontra l-AQMI u biex jiġi żgurat kontroll konġunt fuq l-istrixxa tas-Saħel-Saħara fit-totalità tagħha;

7.

Tappella lill-Istati tar-reġjun tas-Saħel-Saħara biex jgħaqqdu flimkien ir-riżorsi tagħhom ta' komunikazzjoni u ta' intelligence biex jiġu infurmati f'ħin reali dwar il-pożizzjoni tal-gruppi Salafisti;

8.

Tappella lill-komunità internazzjonali biex tappoġġja lill-pajjiżi tar-reġjun tas-Saħel-Saħara permezz ta' kapaċitajiet effettivi ta' sorveljanza fl-ajru u fuq l-art, u għal dan l-għan, tappella biex jingħatalhom it-taħriġ militari u l-appoġġ tekniku meħtieġa biex jiġu miġġielda tali terroristi;

9.

Tħeġġeġ lill-Istati tar-reġjun tas-Saħel-Saħara biex jieħdu l-miżuri kollha meħtieġa biex jidentifikaw lil dawk il-persuni li jkunu qed jaħdmu f'kollużjoni mal-AQMI u jarrestawhom;

10.

Tenfasizza l-ħtieġa li l-komunità internazzjonali u b'mod partikolari l-Unjoni Ewropea kif ukoll il-membri tal-AKP, speċjalment il-membri tal-Komunità tal-Istati tas-Saħel-Saħara (CEN-SAD) jadottaw approċċ effiċjenti biex jiġġieldu l-vjolenza fir-reġjun tas-Saħel-Saħara;

11.

Tħeġġeġ lill-Kapijiet tal-Istat ikkonċernati biex jistabbilixxu forum indipendenti għal konsultazzjonijiet dwar il-paċi u s-sigurtà fir-reġjun u biex jagħmluh pilastru ta' stabilità u żvilupp; tirrakkomanda wkoll li jiġu identifikati b'mod ċar ir-rabtiet bejn is-sigurtà u l-iżvilupp biex tiġi massimizzata l-effiċjenza tal-programmi mwettqa;

12.

Tappella lill-awtoritajiet tal-pajjiżi ġirien biex jagħmlu kampanji ta' sensibilizzazzjoni tal-popolazzjonijiet lokali biex jinvolvuhom fil-ġestjoni tal-problema;

13.

Tappella lill-UE u lill-Istati Membri tagħha biex jimmobilitaw ir-riżorsi disponibbli kollha tagħhom biex jippromwovu s-sigurtà u l-iżvilupp fir-reġjun tas-Saħel-Saħara b'koperazzoni mal-pajjiżi tar-reġjun, in-Nazzjonijiet Uniti u msieħba internazzjonali oħra;

14.

Tappoġġja l-inizjattivi tal-ECOWAS u tas-sieħba internazzjonali tagħha għall-prevenzjoni u l-ġlieda kontra t-traffikar tad-drogi u tal-bnedmin, kif ukoll kontra l-kriminalità organizzata fir-reġjun, permezz tal-iżvilupp ta' pjan ta' azzjoni reġjonali, speċjalment permezz tal-istabbiliment tal-kariga ta' Konsulent Speċjali dwar id-drogi, it-traffikar tal-bnedmin u l-kriminalità tal-President tal-Kummissjoni tal-ECOWAS;

15.

Tenfasizza li għandhom jittieħdu miżuri effettivi biex jinqatgħu s-sorsi ta' finanzjament tat-terroristi u l-kompliċi tagħhom, u tappella lill-Istati tar-reġjun biex jadottaw il-miżuri appoġġjati mill-Uffiċċju dwar id-Drogi u l-Kriminalità tan-Nazzjonijiet Uniti (UNODC - United Nations Office on Drugs and Crime), jiġifieri riforma tas-sistemi tal-ġustizzja kriminali, liġijiet kontra l-korruzzjoni, titjib tal-monitoraġġ tal-kummerċ ta' armi żgħar u l-iffriżar tal-kontijiet bankarji ta' persuni suspettati;

16.

Tilqa' l-pressjoni internazzjonali fuq l-Istati li jipprovdu appoġġ materjali u finanzjarju lil gruppi terroristi u timpenja ruħha li tagħmel pressjoni politika biex tittratta t-tkabbir esponenzjali tal-finanzjament ta' ċerti gruppi terroristi;

17.

Tikkundanna bis-sħiħ lill-kumpaniji u lill-organizzazzjonijiet li għalkemm teknikament mhumiex qed jiksru l-liġi, huma magħrufa sew li jipprovdu appoġġ lil organizzazzjonijiet terroristiċi;

18.

Tinkoraġġixxi l-appoġġ għaċ-Ċentru Afrikan ta' Studju u ta' Riċerka dwar it-Terroriżmu (ACSRT – African Centre for the Study and Research on Terrorism), li għandu l-mandat li jiffaċilita l-implimentazzjoni tal-inizjattivi kontra t-terroriżmu tal-Unjoni Afrikana, fil-ħidma tagħha biex tiżviluppa bażi ta' dejta kunfidenzjali li tkun tinkludi l-ismijiet tat-terroristi suspettati u x-xejriet fl-attività terroristika;

19.

Tilqa' l-fatt li l-użu tal-fondi mill-“istrument għall-istabilità” tal-UE ġie estiż għar-reġjun tas-Saħel-Saħara;

20.

Tappoġġja l-bini tal-kapaċitajiet permezz ta' qafas multilaterali bħan-Nazzjonijiet Uniti;

21.

Tappella biex il-miżuri kollha meħuda biex jiġi miġġieled it-terroriżmu jkunu konformi mal-konvenzjonijiet u l-protokolli internazzjonali dwar id-drittijiet tal-bniedem;

22.

Tinsisti fuq il-ħtieġa ta' rikonċiljazzjoni tal-ġlieda kontra l-gruppi terroristiċi u l-iżvilupp tar-reġjun;

23.

Tappella lill-Unjoni Ewropea, fil-kuntest tal-Programmi Indikattivi Reġjonali (RIP) u tal-Programmi Indikattivi Nazzjonali (NIP) biex iżżid l-azzjoni tagħha ta' appoġġ tal-popolazzjonijiet tar-reġjun billi tagħti l-għajnuna tagħha biex jiġi pprovdut lilhom aċċess aħjar għall-ilma u għas-servizzi tal-edukazzjoni u s-saħħa pubbliċi, kif ukoll infrastruttura aħjar biex jinfetħu negozji u attivitajiet kummerċjali fir-reġjun;

24.

Tiġbed l-attenzjoni għall-fatt li l-attivitajiet tal-organizzazzjonijiet mhux governattivi jikkontribwixxu sostanzjalment għall-iżvilupp, id-demokrazija u d-drittijiet tal-bniedem u li jkun utli li dawn jiġu kkonsultati biex tinkiseb informazzjoni siewja dwar is-sitwazzjoni fuq il-post; tenfasizza li l-miżuri ripressivi kontra t-terroriżmu m'għandhomx jitħallew jkunu ta' ostaklu għall-isforzi ta' tali organizzazzjonijiet fl-oqsma tal-iżvilupp, id-demokrazija u d-drittijiet tal-bniedem;

25.

Tiġbed l-attenzjoni għall-fatt li s-Saħel huwa wieħed mir-reġjuni l-aktar milquta mit-tibdil fil-klima u mit-telf tal-bijodiversità li għandhom impatt kbir fuq l-agrikoltura u fuq il-ħajja tal-bdiewa u tal-persuni tal-lokal, u li dan se jżid il-faqar u l-inugwaljanzi;

26.

Tħeġġeġ lill-Kummissjoni Ewropea biex tappoġġja miżuri biex titreġġa' lura d-deżertifikazzjoni gradwali ta' dan ir-reġjun, inkluż permezz tar-riċerka u tal-għarfien lokali f'dan il-qasam;

27.

Tagħti istruzzjonijiet lill-Ko-Presidenti tagħha biex jgħaddu din ir-riżoluzzjoni lill-Kunsill tal-Ministri AKP-UE, lill-President tal-Kunsill tal-UE, lill-Viċi President tal-Kummissjoni Ewropea/ir-Rappreżentant Għoli tal-Unjoni għall-Affarijiet Barranin u l-Politika tas-Sigurtà, lis-Segretarju Ġenerali tan-Nazzjonijiet Uniti u lill-gvernijiet tal-pajjiżi tar-reġjun tas-Saħel-Saħara.

1.

Tikkundanna l-konflitti vjolenti li nqalgħu f’xi partijiet tal-pajjiż waqt l-istennija tat-tħabbir tar-riżultati provviżorji, liema konflitti wasslu għal diversi mwiet;

2.

Jiddispjaċiha li l-ostakli fl-operat tajjeb tal-Kummissjoni Elettorali Indipendenti tal-Côte d’Ivoire ma ppermettewlhiex tħabbar ir-riżultati provviżorji tat-tieni rawnd tal-elezzjoni presidenzjali sal-iskadenzi stipulati fil-kodiċi elettorali;

3.

Tħeġġeġ lill-partijiet kollha kkonċernati biex jeżerċitaw trażżin massimu wara t-tħabbir tar-riżultati finali mill-Kunsill Kostituzzjonali tal-Côte d’Ivoire u biex jużaw il-mezzi legali xierqa għal kwalunkwe ilmenti;

4.

Tfakkar lill-Kunsill Kostituzzjonali li d-deċiżjonijiet kollha għandhom jittieħdu fuq bażi oġġettiva, b’sens kbir ta’ dover u responsabilità lejn il-poplu tal-Côte d’Ivoire;

5.

Tikkundanna d-deċiżjoni tal-Kunsill Kostituzzjonali li jinvalida r-riżultati provviżorji ppubblikati mill-Kummissjoni Elettorali Indipendenti tal-Côte d’Ivoire, mingħajr ma l-ewwel segwa l-proċedura stipulata fil-kodiċi elettorali;

6.

Tirrifjuta li tirrikonoxxi r-riżultati mħabbra mill-Kunsill Kostituzzjonali, billi tqis li jmorru kontra r-rieda espressa mill-poplu Ivorjan fil-vot tiegħu.