Back to EUR-Lex homepage

EUR-Lex Access to European Union law

Back to EUR-Lex homepage

This document is an excerpt from the EUR-Lex website

Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search
You are here

Document 52014XX0711(01)

Sommarju Eżekuttiv tal-Opinjoni tal-Kontrollur Ewropew għall-Protezzjoni tad-Data dwar il-Proposta għal Regolament tal-Parlament Ewropew u tal-Kunsill li jemenda r-Regolament (KE) Nru 515/97 dwar għajnuna reċiproka bejn l-awtoritajiet amministrattivi tal-Istati Membri u koperazzjoni bejn dawn tal-aħħar u l-Kummissjoni biex ikun assigurat l-applikar korrett tal-liġi dwar materji doganali u agrikoli (It-test sħiħ ta’ din l-Opinjoni jista’ jinstab bl-EN, FR & DE fuq is-sit elettroniku tal-KEPD www.edps.europa.eu)

ĠU C 219, 11.7.2014, p. 8–9 (BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)

11.7.2014   

MT

Il-Ġurnal Uffiċjali tal-Unjoni Ewropea

C 219/8

Sommarju Eżekuttiv tal-Opinjoni tal-Kontrollur Ewropew għall-Protezzjoni tad-Data dwar il-Proposta għal Regolament tal-Parlament Ewropew u tal-Kunsill li jemenda r-Regolament (KE) Nru 515/97 dwar għajnuna reċiproka bejn l-awtoritajiet amministrattivi tal-Istati Membri u koperazzjoni bejn dawn tal-aħħar u l-Kummissjoni biex ikun assigurat l-applikar korrett tal-liġi dwar materji doganali u agrikoli

(It-test sħiħ ta’ din l-Opinjoni jista’ jinstab bl-EN, FR & DE fuq is-sit elettroniku tal-KEPD www.edps.europa.eu)

2014/C 219/11

1.   INTRODUZZJONI

1.1.   Konsultazzjoni tal-KEPD

1.

Fil-25 ta’ Novembru 2013, il-Kummissjoni adottat proposta għal Regolament tal-Parlament Ewropew u tal-Kunsill (1) li jemenda r-Regolament (KE) Nru 515/97 tat-13 ta’ Marzu 1997 dwar għajnuna reċiproka bejn l-awtoritajiet amministrattivi tal-Istati Membri u l-koperazzjoni bejn dawn tal-aħħar u l-Kummissjoni biex ikun assigurat l-applikar korrett tal-liġi dwar materji doganali u agrikoli, kif emendat mir-Regolament 766/2008 fid-9 ta’ Lulju 2008 (2). Il-Proposta ntbagħtet lill-KEPD għall-konsultazzjoni fid-29 ta’ Novembru 2013.

2.

Qabel l-adozzjoni tal-Proposta, il-KEPD ingħata l-possibilità li jipprovdi kummenti informali lill-Kummissjoni. Uħud minn dawn il-kummenti ġew ikkunsidrati. Bħala riżultat, is-salvagwardji għall-protezzjoni tad-dejta fil-Proposta ssaħħu.

1.2.   Sfond u objettivi tal-Proposta

3.

Il-Proposta temenda wieħed mill-istrumenti legali l-aktar importanti għall-azzjoni kontra l-ksur tal-leġiżlazzjoni doganali. Il-ġlieda kontra l-ksur tal-leġiżlazzjoni doganali tal-Unjoni tinvolvi skambju estensiv ta’ informazzjoni - inkluż dejta personali - fil-kuntest ta’ koperazzjoni bejn awtoritajiet kompetenti fl-Istati Membri u bejn dawn tal-aħħar u l-Kummissjoni.

4.

L-għan iddikjarat tal-Proposta huwa li tagħmel l-infurzar u l-koperazzjoni f’dan il-qasam tal-liġi tal-UE iktar effettivi. B’rabta mar-rintraċċar tal-oġġetti, hija tintroduċi obbligi ġodda għall-ġarriera tal-informazzjoni biex jissupplixxu lill-Kummissjoni b’informazzjoni fuq movimenti ta’ kontejners (l-hekk imsejħa Container Status Messages - “CSM” – Messaġġi dwar l-Istatus tal-Kontejners); hija timmira wkoll li tissimplifika r-regoli li jorganizzaw d-database ċentrali għal dejta importata, esportata u ta’ tranżitu biex tittejjeb l-analiżi tal-flussi tal-oġġetti.

5.

Il-Proposta tintroduċi wkoll il-possibilità lill-Kummissjoni li tikseb direttament mingħand operaturi mis-settur privat, dokumenti li jappoġġaw dikjarazzjonijiet ta’ importazzjoni u esportazzjoni, bil-għan espliċitu li tħaffef l-investigazzjonijiet tal-OLAF.

6.

Il-Proposta għandha wkoll l-għan iddikjarat li tissimplifika u tarmonizza r-regoli ta’ superviżjoni ta’ protezzjoni tad-dejta applikabbli għad-databases differenti stabbiliti fuq il-bażi tar-Regolament. Hija tintroduċi perjodu ta’ żamma massima għal dejta maħżuna fis-Sistema ta’ Informazzjoni Doganali (“SID”) (3) u f’databases oħrajn.

7.

Għall-għanijiet ta’ ċarezza, id-databases u d-direttorji koperti mir-Regolament huma dawn li ġejjin:

—

Id-“direttorju tad-Dejta Ewropea” – Artikolu 18(a);

—

Id-“direttorju CSM” - Artikoli 18(c), 18(d) u 18(e);

—

Id-“direttorju tal-importazzjoni, esportazzjoni u tranżitu ” - Artikolu 18(g);

—

Id-database SID - Artikoli 23 sa 41;

—

Id-database FIDE - Artikoli 41(a) sa 41(d).

3.   KONKLUŻJONIJIET

66.

Il-KEPD jilqa’ l-modifiki li l-Kummissjoni għamlet fil-Proposta biex ittejjeb il-konformità tagħha mal-leġiżlazzjoni rilevanti għall-protezzjoni tad-dejta. Madankollu, għandu jiġi innutat li l-Proposta tinkludi wkoll xi dgħjufijiet pjuttost serji li jeħtieġ li jiġu eleminati qabel l-adozzjoni finali tagħha.

67.

Il-KEPD jixtieq jenfasizza li l-Kummissjoni għandha tieħu approċċ iktar komprensiv għal leġiżlazzjoni dwar l-assistenza reċiproka fil-qasam doganali biex iġġibha konformi mal-bidliet li seħħew permezz tat-Trattat ta’ Lisbona, jiġifieri billi tiddeċiedi li telimina l-bażi doppja Regolament/Deċiżjoni u tissostittwixxiha bi strument wieħed ibbażat esklussivament fuq it-TFUE, biex tiggarantixxi ċertezza legali u reġim mingħajr skossi għall-protezzjoni tad-dejta.

68.

Għar-raġunijiet imressqa hawn fuq, il-KEPD fi kwalunkwe każ jirrakkomanda:

—

l-introduzzjoni ta’ mudell ġdid għas-superviżjoni tad-databases kollha li jinvolvu l-ipproċessar ta’ dejta personali stabbiliti fuq il-bażi tar-Regolament u l-Proposta (jiġifieri, SID - inkluż FIDE -, id-direttorju tad-Dejta Ewropea, u d-direttorju dwar l-importazzjoni, l-esportazzjoni u t-tranżitu). Dan il-mudell ikun ibbażat fuq superviżjoni kkordinata li għandha struttura bi tliet saffi: Awtoritajiet għall-Protezzjoni tad-Dejta fuq livell nazzjonali, il-KEPD fuq livell ċentrali u kordinazzjoni bejn it-tnejn;

—

il-ħatra tal-KEPD bħala s-segretarjat tal-kordinazzjoni tas-superviżjoni kemm skont id-Deċiżjoni kif ukoll ir-Regolament;

—

l-introduzzjoni ta’ dispożizzjoni ġenerali fit-test tal-Proposta biex jiġi ċċarat ir-Regolament 45/2001 li japplika għall-ipproċessar tad-dejta personali mwettaq mill-istituzzjonijiet tal-Unjoni u biex liġijiet nazzjonali li jimplimentaw id-Direttiva 95/46/KE ikunu applikabbli għall-ipproċessar imwettaq mill-awtoritajiet kompetenti fl-Istati Membri varji;

—

is-sostituzzjoni ta’ dispożizzjonijiet frammentati varji b’dispożizzjonijiet uniformi li jispeċifikaw għal kull database (i) ir-rwol tal-Kummissjoni bħala kontrollur tad-dejta jew possibbilment kontrollur tad-dejta konġunt flimkien mal-awtoritajiet kompetenti nazzjonali rilevanti; (ii) jekk meħtieġ għall-għanijiet ta’ ċarezza, l-irwol superviżorju tal-KEPD fejn il-Kummissjoni hija l-kontrollur, kuntrarju għal każijiet fejn l-ipproċessar huwa taħt is-superviżjoni ta’ awtoritajiet nazzjonali għall-protezzjoni tad-dejta; (iii) il-miżuri tekniċi li għandhom jiġu adottati mill-Kummissjoni biex tiġi żgurata s-sigurtà tal-ipproċessar (possibbilment, il-miżuri speċifiċi jistgħu jiddaħħlu f’att delegat biex ikun żgurat aġġornar iktar flessibbli); u (iv) il-ħtieġa għal iċċekkjar minn qabel mill-KEPD skont l-Artikolu 27 tar-Regolament 45/2001;

—

li l-perjodi ġodda ta’ żamma li ġew introdotti jiġu kkunsidrati mill-ġdid fuq il-bażi ta’ evalwazzjoni tal-ħtieġa tat-tul għal kull każ speċifiku; barra minn hekk, id-dispożizzjonijiet dwar l-anonimizzazzjoni tad-dejta għandhom jiġu mmodifikati biex jeħtieġu t-tħassir ta’ dejta;

—

fir-rigward tad-database tas-CSM, il-Proposta għandha tindika lista eżawrenti ta’ dejta li għandha tiddaħħal. Inkella, it-test tal-Proposta għandu jipprojbixxi espliċitament li dejta personali tiddaħħal f’din id-database.

Magħmul fi Brussell, il-11 ta’ Marzu 2014.

Peter HUSTINX

Kontrollur Ewropew għall-Protezzjoni tad-Data

(1)  COM(2013)796 finali. Minn hawn 'il quddiem: “il-Proposta”.

(2)  Ir-Regolament (KE) Nru 515/97 tat-13 ta’ Marzu 1997 dwar għajnuna reċiproka bejn l-awtoritajiet amministrattivi tal-Istati Membri u l-koperazzjoni bejn dawn tal-aħħar u l-Kummissjoni biex ikun assigurat l-applikar korrett tal-liġi dwar materji doganali u agrikoli, kif emendat mir-Regolament 766/2008 fid-9 ta’ Lulju 2008 (ĠU L 82, 22.3.1997, p. 1). Minn hawn 'il quddiem: “ir- Regolament”.

(3)  L-għan tas-SID huwa li tassisti lil awtoritajiet nazzjonali kompetenti u l-Kummissjoni (“imsieħba tas-SID”) fil-prevenzjoni, l-investigazzjoni u l-prosekuzzjoni ta’ operazzjonijiet li jiksru d-dispożizzjonijiet doganali u agrikoli. Għal dan il-għan, tippermetti msieħba fis-SID li sabiex itellgħu twissijiet fis-sistema li jitolbu lil msieħba SID oħra biex jieħdu ċerti azzjonijiet, b’mod iktar speċifiku: li jaraw u jirrapportaw, sorveljanza diskreta, iċċekkjar speċifiku u analiżi operattiva. Dawn it-twissijiet jistgħu jkunu relatati għal komoditajiet, mezzi tat-trasport, negozji u persuni.

Top