16.12.2009

MT

Il-Ġurnal Uffiċjali tal-Unjoni Ewropea

C 305/27

---

Pubblikazzjoni ta’ applikazzjoni għal reġistrazzjoni skont l-Artikolu 8(2) tar-Regolament tal-Kunsill (KE) Nru 509/2006 dwar prodotti agrikoli u oġġetti tal-ikel bħala speċjalitajiet tradizzjonali ggarantiti

2009/C 305/10

Din il-pubblikazzjoni tagħti d-dritt li wieħed joġġezzjona għall-applikazzjoni skont l-Artikolu 9 tar-Regolament tal-Kunsill (KE) Nru 509/2006. Id-dikjarazzjonijiet ta’ oġġezzjoni għandhom jaslu għand il-Kummissjoni fi żmien sitt xhur mid-data ta’ din il-pubblikazzjoni.

APPLIKAZZJONI GĦAL REĠISTRAZZJONI TA’ SPEĊJALITÀ TRADIZZJONALI GGARANTITA (STG)

IR-REGOLAMENT TAL-KUNSILL (KE) Nru 509/2006

“OVČÍ SALAŠNÍCKY ÚDENÝ SYR”

Nru tal-KE: SK-TSG-0007-0045-20.10.2006

1.   Isem u indirizz tal-grupp applikant:

Isem:	Družstvo – „Cech výrobcov ovčieho syra v Turci“
Indirizz:	Poľnohospodárske družstvo Turčianske Kľačany 271 038 61 Vrútky SLOVENSKO/SLOVAKIA
Nru tat-telefown	+421 4343085213
Nru tal-feks	+421 434308523
Indirizz tal-posta elettronika:	tas_sro@stonline.sk

2.   Stat Membru jew pajjiż terz:

Ir-Repubblika Slovakka

3.   Speċifikazzjoni tal-prodott:

3.1.   L-isem jew l-ismijiet li għandhom jiġu rreġistrati:

“Ovčí salašnícky údený syr”

3.2.   Indika jekk l-isem:

	hux speċifiku fih innifsu
	jesprimix in-natura speċifika tal-prodott agrikolu jew tal-oġġett tal-ikel

In-natura speċifika tal-prodott ġejja min-natura tal-materja prima użata, jiġifieri mill-ħalib tan-nagħaġ mhux ipproċessat li jintuża, mill-metodu tradizzjonali tal-ipproċessar fl-għarajjex tar-rgħajja, u mill-affumikar. Il-kelma “salašnícky”, użata f’isem il-ġobon, tesprimi n-natura speċifika tal-prodott u ġejja mill-kelma “salaš”, li tirreferi għall-għarix tar-ragħaj fejn isir il-ġobon, u b’hekk hija marbuta wkoll mal-post tal-produzzjoni.

3.3.   Indika jekk l-isem hux qed jiġi rriżervat skont l-Artikolu 13(2) tar-Regolament (KE) Nru 509/2006:

	Reġistrazzjoni flimkien mar-riżerva tal-isem
	Reġistrazzjoni mingħajr ir-riżerva tal-isem

3.4.   Tip ta’ prodott:

1.3

Ġobon

3.5.   Deskrizzjoni tal-prodott agrikolu jew tal-oġġett tal-ikel li għalih japplika l-isem mogħti fil-punt 3.1:

Il-ġobon “Ovčí salašnícky údený syr” isir mill-ħalib frisk tan-nagħaġ, li jiġi pproċessat fl-għarajjex tar-rgħajja, jiġi affumikat u ħafna drabi jingħata sura speċifika (per eż. sura ta’ qalb, ta’ srejdek jew ta’ annimal ieħor, jew ta’ nofs globu).

Il-karatteristiċi fiżiċi: — issibu f’diversi suriet, ħafna drabi jkun qisu boċċa, jew jekk tkun intużat forma huwa u jkun qed jiġi prodott, jieħu s-sura tal-forma: sura ta’ nofs globu, ta’ annimali differenti jew inkella ta’ qalb, — il-piż tiegħu jvarja minn 0.1 kg għal kilogramm.

Il-karatteristiċi kimiċi: — Il-materja niexfa: mill-inqas 40 % skont il-piż, — Il-kontenut tax-xaħam fil-materja niexfa skont il-piż: mill-inqas 50 %, — Il-klorur tas-sodju (NaCl): massimu ta’ 25 000 mg għal kull kilogramm.

Il-kriterji mikrobijoloġiċi: Il-ġobon fih għadd ta’ mikro-organiżmi, fosthom b’mod partikulari: Mikro-organiżmi aċidoġeniċi – il-batterji Streptococcus lactis, Leuconostoc mesenteroides, Lactobacillus casei, u Lactobacillus plantarum, ħmejjer u moffa – Torulopsis candida, Geotrichum candidum, Geotrichum casei.

Il-karatteristiċi organolettiċi: — kif jidher minn barra: wiċċ sħiħ, sod u niexef, bil-qoxra, u jista’ jkollu wkoll xi tbajja’ żgħar tad-duħħan, u ma jkollux fdalijiet tal-qatran, — il-kulur: meta taqsmu, lewn il-ġobon huwa wieħed li jagħti minn lewn safrani għal isfar; fil-wiċċ, jagħti minn lewn kannelli għal wieħed li jixbah lill-qastan, — ir-riħa u t-togħma: riħa ta’ duħħan, b’togħma li mhix qawwija żżejjed u li hi kważi tikka qarsa, — il-konsistenza: sod u iebes meta jinqata’, b’xi toqob u xi qasmiet żgħar ’l hemm u ’l hawn.

3.6.   Deskrizzjoni tal-metodu ta’ produzzjoni tal-prodott agrikolu jew tal-oġġett tal-ikel li għalih japplika l-isem mogħti fil-punt 3.1:

Il-ġbir tal-ħalib tan-nagħaġ: — Il-ħalib li jkun se jintuża biex minnu jsir il-ġobon jinħaleb bl-idejn minn nagħaġ li jkunu b’saħħithom (nagħaġ li jkunu fil-mergħat u li jkunu ta’ tipi mkabbrin fil-muntanji u fiż-żoni ta’ madwar il-muntanji) f’maqjel għall-ħlib (imsejjaħ “strunga”) li jkun f’postijiet naturali. Il-ħalib jinġabar f’barmil għall-ħalib li ma jissaddadx u li jkollu tagħmir għall-iffiltrar (id-drawwa kienet li l-ħalib jinġabar f’barmil tal-injam). Meta l-barmil (imsejjaħ “geleta”) jimtela, il-kontenut tiegħu jitferra’ minn ġo passatur li jkun fih filtru tat-tajjar għal ġo landa tal-ħalib (il-ħalib jista’ jinġabar ukoll b’mod mekkaniku fil-maħleb li jkun jista’ jiċċaqlaq minn post għal ieħor jew li jkun f’post wieħed); — il-ħalib miġbur jittieħed ġol-laned tal-ħalib għaż-żona tal-produzzjoni – li tkun għarix ta’ ragħaj (imsejjaħ “salaš”).

L-ipproċessar tal-ħalib biex isir ġobon – il-produzzjoni tal-ġobon “ovčí salašnícky údený syr”: — Il-ħalib li jkun għadu kemm inġabar jiġi pproċessat mill-ewwel hekk kif jinħaleb, wara li jinġarr lejn iż-żona tal-produzzjoni fl-għarix tar-ragħaj, fejn jitferra’ minn ġol-landa għal ġo reċipjent imsejjaħ “putera”, li huwa reċipjent użat għall-produzzjoni tal-ġobon. Matul dan il-proċess, il-ħalib jerġa’ jingħadda minn filtru tat-tajjar. Sabiex isir il-ġobon, jintuża reċipjent tal-injam (imsejjaħ “putera”) jew reċipjent tal-azzar li ma jissaddadx li jkollu qiegħ doppju; — It-temperatura tal-ħalib tiżdied għal bejn 30 u 32 °Ċ billi miegħu jew jiżdiedu, b’mod dirett, bejn żewġ litri u tlieta ta’ ilma tajjeb għax-xorb sħun (li jkollu temperatura ta’ 50 °Ċ) għal kull 50 litru ta’ ħalib, jewinkella billi l-ħalib jissaħħan permezz tal-ilma tajjeb għax-xorb sħun f’reċipjent li jkun mgħotti b’materjal iżolanti (imsejjaħ “putera”) jew permezz tax-xorrox mgħolli tal-ħalib tan-nagħaġ qares; — Wara li t-temperatura tkun żdiedet għal bejn 30 u 32 °Ċ, mal-ħalib jiżdied it-tames mikrobiku f’forma likwida (imsejjes fuq il-fungu stabbilizzat permezz tal-melħ imsejjaħ “Rhizomucor miehei”), filwaqt li jitħawwad il-ħin kollu. Għal kull 100 litru ta’ ħalib jiżdied 40 ml ta’ tames. L-ammont ta’ tames li jintuża jiddependi wkoll fuq il-perjodu tal-ħlib (il-kwalità tal-ħalib, li tinbidel matul il-perjodu tal-ħlib). Il-ħalib jieħu madwar 30 sa 45 minuta sakemm jitbaqqat wara li miegħu jkun żdied it-tames (il-produttur jiddeċiedi dwar l-ammont ta’ tames li jintuża); — Il-baqta li tkun saret b’dan il-mod titħawwad u tinqata’ b’tagħmir b’fili tal-metall biex tinqata’ l-baqta sakemm jinkiseb daqs ta’ qamħa ta’ bejn 0.5 ċm u ċentimetru; — L-ilma tajjeb għax-xorb mgħolli, imberred għal temperatura ta’ 65 °Ċ, jiżdied mal-baqta maqtugħa f’biċċiet sabiex din tissaħħan għal temperatura ta’ bejn 32 u 35 °Ċ, ħaġa li ttejjeb ir-rilaxx tax-xorrox mill-qmuħ. Il-baqta titħawwad sew u titħalla toqgħod. Matul il-produzzjoni tal-ġobon f’forma ta’ boċċa magħmul mill-ħalib tan-nagħaġ, it-temperatura tal-ħalib u tax-xorrox ma tistax tkun ta’ inqas minn 29 °Ċ; — Il-metodu tradizzjonali ta’ kif wieħed jagħti sura lill-ġobon huwa billi wieħed jagħfas b’idejh il-baqta li tkun qagħdet għal madwar għaxar minuti u jġibha qisha ballun, li mbagħad jitneħħa, permezz ta’ biċċa tal-ġobon, u jiddendel ma’ grampun u jingħata s-sura ta’ boċċa, jew inkella billi l-baqta ppressata titqiegħed bl-idejn fil-forom li jagħtuha s-sura tagħhom. L-ipproċessar bl-idejn jagħti ’l dan il-ġobon f’forma ta’ boċċa l-elastiċità tipika tiegħu; — L-għoti ta’ sura lill-ġobon fil-forom: mill-ġobon f’forma ta’ boċċa li jkun tħejja jinqatgħu biċċiet żgħar (skont id-daqs tal-forma). Dawn il-biċċiet jingħafsu bl-idejn u jitpoġġew fil-forom (ta’ qalb, ta’ srejdek jew ta’ annimal ieħor, jew ta’ nofs globu) u jingħafsu kemm kemm sabiex tinkiseb is-sura partikulari. Jekk jintużaw forom magħmulin minn żewġ biċċiet, il-proċedura tkun l-istess, u l-ġobon jingħafas bl-idejn u jitpoġġa fil-forma b’mod li jimla ż-żewġ biċċiet tagħha. Il-forma mbagħad tingħalaq; — Il-ġobon f’forma ta’ boċċa jew ta’ sura partikulari jitħalla joqtor għal xi sagħtejn. Il-ġobon f’forma ta’ boċċa jiddendel mal-grampuni u dak li jkun fil-forom jitqiegħed fuq l-ixkafef sabiex joqtor; — Wara li joqtor, il-ġobon jiġi ttrasferit f’żona tal-ħżin sħuna, il-kamra tal-maturazzjoni, fejn iseħħ il-proċess tal-fermentazzjoni. Il-ġobon, imgeżwer b’surtu f’biċċa tal-ġobon, jiddendel mal-grampun, u l-ġobnijiet iż-żgħar b’sura partikulari jitneħħew mill-forom tagħhom u jitħallew jimmaturaw fuq xkafef tal-injam magħmulin b’tali mod li jħallu x-xorrox joqtor mill-ġobon; — Matul il-proċess tal-fermentazzjoni, il-kamra jrid ikollha temperatura ta’ bejn it-18 u t-22 °Ċ. Il-ġobon għandu jitħalla jiffermenta f’dawn il-kundizzjonijiet għal jumejn jew tlieta. Matul il-proċess tal-fermentazzjoni, għandha tiġi mmonitorjata t-temperatura; — Il-ġobon f’forma ta’ boċoċ imbagħad jinqata’ f’biċċiet u jitqiegħed f’taħlita kiesħa tas-salmura għal perjodu li jvarja minn siegħa sa għaxar sigħat (skont il-piż tal-biċċiet). Wara li jitmellaħ, il-konsistenza tal-ġobon issir iebsa u soda. It-taħlita tas-salmura (li 10 sa 15 % minnha tkun melħ) titħejja billi l-melħ jitgħalla mal-ilma li jkun tajjeb għax-xorb. Il-ġobon li jkun ingħata sura fil-forom jitmellaħ bl-istess mod; — Wara li jitmellaħ, il-ġobon jitneħħa mit-taħlita u jitqiegħed fuq l-ixkafef tal-injam sabiex jinxef u sabiex joqtor sew mit-taħlita tas-salmura; — Wara dan isir il-proċess tal-affumikar, li fih il-ġobon jitqiegħed fuq gradilji tal-injam u tal-azzar li ma jissaddadx (jew inkella jiddendel ma’ grampuni li jżommuh, magħmulin mit-tilju) u jiġi affumikat bil-kesħa b’duħħan tal-injam iebes tas-siġar li fix-xitwa jwaqqgħu l-weraq u li m’għandux ikun fih irmied jew trab. Il-ġobon jibqa’ għaddej mill-proċess tal-affumikar sakemm jieħu lewn kannella ċar li jagħti kemm kemm f’lewn il-qastan – proċess li jieħu 12, 16 jew saħansitra 24 siegħa; — Wara li jkun ġie affumikat, il-ġobon jitqiegħed fuq xkafef tal-injam f’kamra tal-ħżin kiesħa, li jkollha temperatura ta’ bejn 13 u 15-il °Ċ; — Wara li jiġi ppakkjat, il-ġobon jitlesta biex jitqassam u jinbiegħ.

3.7.   In-natura speċifika tal-prodott agrikolu jew tal-oġġett tal-ikel:

1.	Dan il-prodott ilu jsir għal għexieren ta’ snin, u saħansitra għal sekli sħaħ, u l-ġobon kien jiġi affumikat sabiex jibqa’ tajjeb sax-xitwa, meta ma kien isir l-ebda ġobon.

2.	In-natura speċifika tal-prodott ġejja mill-kwalità tal-ħalib li jintuża, li hu prodott fiż-żoni tal-muntanji u f’dawk ta’ madwarhom (ir-rigħi tan-nagħaġ fil-mergħat li jinsabu fil-muntanji u fiż-żoni ta’ madwarhom, u l-għalf miksub mill-mergħat fiż-żoni tal-muntanji u f’dawk ta’ madwarhom).

3.	Il-prodott għandu riħa u togħma partikulari (riħa ta’ duħħan u togħma li mhix qawwija żżejjed u li hi kważi tikka qarsa).

4.	Il-prodott isir bl-idejn, bl-użu ta’ metodi tradizzjonali (l-ipproċessar tal-baqta bl-idejn).

5.	Matul il-proċess tal-produzzjoni jintużaw diversi forom (xi wħud tal-injam) sabiex il-ġobon jingħata sura partikulari (sura ta’ qalb, ta’ srejdek jew ta’ annimal ieħor, jew ta’ nofs globu). B’hekk, il-prodott aħħari jkollu sura partikulari.

6.	Il-prodott ma jsirx b’mod industrijali, iżda jsir fl-għarajjex tar-rgħajja (imsejħin “salaš”), u wieħed jista’ juża wkoll apparat, strumenti u tagħmir tal-injam (per eż. reċipjent tal-injam (imsejjaħ “putera”), “mixers” tal-injam u forom tal-injam).

7.	Il-prodott jgħaddi minn proċess t’affumikar li fih jintuża d-duħħan mill-ħruq tal-injam iebes tas-siġar li fix-xitwa jwaqqgħu l-weraq.

3.8.   In-natura tradizzjonali tal-prodott agrikolu jew tal-oġġett tal-ikel:

Il-kelma “salašnícky”, li hi parti mill-isem tal-ġobon, ġejja mill-kelma għas-sit tradizzjonali tal-produzzjoni tiegħu, li hija l-għarix tar-ragħaj (imsejjaħ “salaš”). In-natura tradizzjonali tiegħu ġejja mill-kompożizzjoni, mill-metodu tal-produzzjoni u mill-ipproċessar tradizzjonali tiegħu.

Kif qal P. Huba fil-ktieb tiegħu “Zázrivá”, it-trobbija tan-nagħaġ fuq skala żgħira fil-muntanji f’Zázrivá kienet iffukata fuq il-produzzjoni tal-ħalib tan-nagħaġ, li minn dejjem kien ikun ipproċessat f’dar ir-ragħaj (imsejħa “salaš”), li fiha l-ġobon f’forma ta’ boċċa magħmul mill-ħalib tan-nagħaġ kien jingħata bħala speċjalità lin-nies li jkunu qed iżuru lir-ragħaj (Martin: Osveta 1998).

Il-ġobon tradizzjonali tat-tip “ovčí hrudkový syr salašnícky” kien isir mill-ħalib frisk tan-nagħaġ billi jitbaqqat f’reċipjent (imsejjaħ “putera”) permezz tal-użu ta’ tames naturali (imsejjaħ “kľag”) f’temperatura medja ta’ 32 °Ċ għal bejn għaxar minuti u nofs siegħa. Il-ħalib imbaqqat l-ewwel kien jitħawwad, imbagħad jitħalla joqgħod, u fl-aħħar il-baqta kienet titpoġġa f’biċċa tal-ġobon u tingħafas sa ma tieħu s-sura ta’ boċċa kumpatta. Il-biċċa tal-ġobon mimlija baqta kienet tiddendel ma’ bitta, u titħalla hemm sabiex joqtor minnha x-xorrox.

Wara li jkun qotor, il-ġobon f’forma ta’ boċċa kien jitneħħa mill-biċċa u jitqiegħed rasu ’l isfel fuq xkaffa tal-injam (imsejħa “podišiar”), fejn kien jitħalla għal diversi jiem sabiex jinxef u jimmatura. Ladarba kien ikun immatura, il-ġobon f’forma ta’ boċċa kien jittieħed mill-għarix tar-ragħaj għal ġod-djar tan-nies li kellhom in-nagħaġ (Podolák Ján: Slovenský národopis 25, 1977).

Fis-seklu għoxrin, il-produzzjoni tal-ġobon tat-tip “ovčí hrudkový syr salašnícky” u tat-tip “ovčí salašnícky údený syr” infirxet madwar iż-żoni muntanjużi tas-Slovakkja fejn kienu jitkabbru n-nagħaġ.

Il-ġobon f’forma ta’ boċċa magħmul mill-ħalib tan-nagħaġ kien wieħed mill-prodotti tal-ħalib tat-trobbija tradizzjonali tan-nagħaġ fil-Prinċipalità preċedenti tal-Wallachia, u l-produzzjoni tiegħu kienet ir-raġuni prinċipali għala kienu jitrabbew in-nagħaġ fir-reġjuni muntanjużi tas-Slovakkja. Bħala speċjalità tal-ikel, dan il-prodott kien jintuża frisk (immerraq – ħelu) jew iffermentat jew imnixxef, jew inkella ppriżervat permezz tal-proċess tal-affumikar, jiġifieri affumikat (Podolák Ján: Slovenský národopis 25, 1977).

F’artiklu msejjaħ “Z histórie Ovčieho mliekárstva na Slovensku”, il-kittieb Prokop kiteb dan li ġej: “Il-kultura tal-Prinċipalità preċedenti tal-Wallachia għadha tinżamm ħajja f’dawn ir-reġjuni permezz tas-sengħa tat-tinqix li għandhom ir-rgħajja tagħna; l-influwenzi tagħha għadna nistgħu narawhom fil-bwieqi minquxin b’mod skwiżit (imsejħa “črpáky”) li jużaw ir-rgħajja u fil-forom (ta’ qlub, papri, eċċ.) li jintużaw għall-ġobon tat-tip “oštiepok” u fi prodotti simili.” (Čítanie o správnej výžive 1970, Slovenská spoločnosť pre racionálnu výživu, Bratislava, 1969). Għall-ġobon tat-tip “ovčí salašnícky údený syr” jintużaw il-forom ta’ qalb jew ta’ papra.

Dr Ján Balko, il-kittieb tal-ktieb “Bryndziarsky priemysel na Slovensku”, li nħareġ minn Osveta fl-1968, kiteb dan li ġej: “M’hemm l-ebda provi eżatti li juru min għamel l-ewwel ġobon f’forma ta’ boċċa magħmul mill-ħalib tan-nagħaġ hawnhekk, jew li juru meta sar dan. Madanakollu, hemm biżżejjed raġunijiet biex inkunu nistgħu nassumu li dan ilu li seħħ ħafna sekli, minħabba li sal-1914, it-trobbija tan-nagħaġ għall-ħalib ma kinetx tvarja wisq mill-prattiki tal-biedja li kienu jeżistu fiż-żmien meta l-popli ċċaqalqu minn post għall-ieħor.”

F’parti mill-ktieb “Druhy najznámejších slovenských syrov” insibu dan li ġej: “L-ispeċjalitajiet tagħna tal-ġobon magħmul mill-ħalib tan-nagħaġ huma magħrufin sew hawnhekk u f’artijiet barranin, u fost dawn l-ispeċjalitajiet hemm il-ġobon tat-tip ‘ovčí salašnícky údený syr’” (1992).

L-isem u l-metodu tradizzjonali tal-produzzjoni tal-ġobon tat-tip “ovčí hrudkový syr salašnícky” u tat-tip “ovčí salašnícky údený syr” intużaw ukoll minn rgħajja mill-muniċipalità ta’ Priechod li fis-snin Sittin u Sebgħin kienu jaħdmu fl-għarajjex tar-rgħajja fir-reġjun tat-Turiec (Lamper u Ivanič, rgħajja minn Priechod).

Is-Sur Jasenský, ragħaj minn Dolné Jaseno, jgħid li l-ġobon tat-tip “Ovčí hrudkový syr – salašnícky” u tat-tip “ovčí salašnícky údený syr” ilu jsir minn żmien żemżem, imma dejjem f’ammonti żgħar biss, u jgħid li kien jintuża għall-konsum dirett fl-għarajjex tar-rgħajja u li kien, u għadu, jinbiegħ lin-nies li jżuru l-għarajjex tar-rgħajja. Jasenský igħid li dawn huma speċjalitajiet tradizzjonali li jgawduhom in-nies Slovakki li joqogħdu fir-reġjuni tal-muntanji u fiż-żoni ta’ madwarhom (Prehlásenie pána Jasenského, 1999).

3.9.   Ir-rekwiżiti minimi u l-proċeduri sabiex tkun ivverifikata n-natura speċifika:

Il-verifiki jsiru għall-karatteristiċi li ġejjin:

—

il-materja prima użata – ħalib frisk mhux ipproċessat maħlub minn nagħaġ li jkunu fil-mergħat u minn nagħaġ li jingħalfu b’għalf miksub mill-mergħat li jinsabu fiż-żoni tal-muntanji u f’dawk ta’ madwarhom. Il-verifiki jsiru b’mod viżwali waqt li jkunu qed jinħalbu n-nagħaġ u abbażi tar-reġistri dwar dan il-proċess;

—	il-produzzjoni fl-għarajjex tar-rgħajja u l-produzzjoni skont l-istaġun (minn April sa Settembru);

—

it-temperatura tal-ħalib qabel ma jitbaqqat matul il-proċess teknoloġiku, u l-ipproċessar tal-baqta bl-idejn. Is-sura tal-ġobon għandha tiġi vverifikata b’mod viżwali wara li tkun ġiet iffurmata l-boċċa. It-temperatura tal-kamra fiż-żona tal-ħżin għandha tkun immonitorjata matul il-proċess tal-fermentazzjoni. Il-verifiki jitwettqu abbażi tar-reġistri tat-temperatura ta’ matul il-proċess tal-fermentazzjoni;

—	l-użu tal-injam iebes tas-siġar li fix-xitwa jwaqqgħu l-weraq għall-proċess tal-affumikar (tal-fagu, tal-ballut, eċċ.). Il-verifiki jitwettqu abbażi tar-reġistri tal-proċess tal-affumikar;

—	l-elementi fiżiċi tal-prodott aħħari: is-sura u l-piż tiegħu. Il-verifiki jitwettqu b’mod viżwali u billi jintiżen il-prodott;

—	l-elementi kimiċi tal-prodott aħħari: il-kontenut tal-materja niexfa, il-kontenut tax-xaħam fil-materja niexfa u l-kontenut tal-klorur tas-sodju (NaCl). Il-valuri tagħhom għandhom jaqblu ma’ dawk mogħtija fil-punt 3.5 tal-ispeċifikazzjoni. Il-verifiki jitwettqu permezz t’analiżi fil-laboratorju;

—

il-karatteristiċi organolettiċi tal-prodott aħħari: id-dehra minn barra u meta jinqasam b’mod trasversali, lewn il-ġobon minn barra u meta jinqasam b’mod trasversali, ir-riħa u t-togħma, u l-konsistenza tiegħu. Il-karatteristiċi organolettiċi jiġu vverifikati wara li jitlesta l-proċess teknoloġiku biex isir il-ġobon. Il-verifiki jitwettqu permezz ta’ analiżi sensorja tal-prodott aħħari;

—	l-użu tal-għodod, li huwa suġġett għall-approvazzjoni tal-amministrazzjoni tal-għarix tar-ragħaj (l-apparat u t-tagħmir tal-injam).

Il-verifiki mill-awtorità jew mill-korp li jivverifika l-konformità mal-ispeċifikazzjoni tal-prodott jitwettqu darba f’sena.

3.10.   L-awtoritajiet jew l-entitajiet li jivverifikaw il-konformità mal-ispeċifikazzjoni tal-prodott:

—

3.11.   Isem u indirizz:

Isem:	Štátna veterinárna a potravinová správa SR
Indirizz:	Botanická 17 842 13 Bratislava SLOVENSKO/SLOVAKIA
Nru tat-telefown:	+421 260257427
Indirizz tal-posta elettronika:	buchlerova@svssr.sk

Awtorità pubblika  Awtorità privata

3.12.   Il-ħidmiet speċifiċi tal-awtorità jew tal-entità:

L-entità ta’ spezzjoni msemmija hawn fuq hija responsabbli għall-monitoraġġ tal-ispeċifikazzjoni kollha.

4.   Annessi:

—

---