Sejħa għal Proposti EACEA/38/2019

taħt il-Programm Erasmus+

Azzjoni Ewlenija 3: Appoġġ għar-riforma politika

Esperimentazzjonijiet tal-Politika Ewropea fl-oqsma tal-Edukazzjoni u tat-Taħriġ taħt it-tmexxija ta’ awtoritajiet pubbliċi ta’ livell għoli

(2019/C 410/06)

1.   Id-deskrizzjoni, l-għanijiet u t-temi prijoritarji

L-esperimentazzjonijiet tal-politika Ewropea huma proġetti ta’ kooperazzjoni transnazzjonali mmexxija minn awtoritajiet pubbliċi ta’ livell għoli mill-Pajjiżi tal-Programm. Dawn jinvolvu l-ittestjar tar-rilevanza, l-effettività, l-impatt potenzjali u l-iskalabbiltà tal-miżuri ta’ politika permezz ta’ provi fuq il-post paralelli f’pajjiżi differenti, ibbażati fuq approċċi (semi)esperimentali u protokolli komuni ta’ evalwazzjoni. Billi jgħaqqdu t-tmexxija strateġika, is-solidità metodoloġika u dimensjoni Ewropea b’saħħitha, jippermettu t-tagħlim reċiproku u jappoġġjaw politika bbażata fuq l-evidenza fil-livell Ewropew.

L-għanjiet speċifiċi ta’ din is-sejħa huma:

—	Il-promozzjoni tal-kooperazzjoni transnazzjonali u tat-tagħlim reċiproku bejn l-awtoritajiet pubbliċi fl-ogħla livell istituzzjonali tal-pajjiżi eliġibbli sabiex irawmu titjib sistemiku u innovazzjoni fl-oqsma tal-edukazzjoni u tat-taħriġ,

—	It-titjib tal-ġbir u l-analiżi ta’ evidenza sostantiva li tippermetti l-implimentazzjoni b’suċċess ta’ miżuri innovattivi,

—	Il-faċilitazzjoni tat-trasferibbiltà u l-iskalabilità ta’ miżuri innovattivi.

It-temi prijoritarji għal din is-sejħa huma:

LOTT 1 — Edukazzjoni u kompetenzi diġitali — Tagħlim u għalliema

LOTT 2 — Mekkaniżmi ta’ finanzjament għat-titjib tal-ħiliet u għat-taħriġ mill-ġdid, inklużi skemi simili għal Kontijiet tat-Tagħlim Individwali — Politika u proċessi għall-appoġġ tal-validazzjoni tat-tagħlim mhux formali u informali, inkluż permezz ta’ gwida effettiva

2.   Eliġibbiltà

2.1.   L-applikanti eliġibbli

L-applikanti meqjusin eliġibbli biex iwieġbu għal din is-sejħa huma:

(a)

L-awtoritajiet pubbliċi (Ministeru jew ekwivalenti) responsabbli għall-edukazzjoni u t-taħriġ fl-ogħla livell fil-kuntest rilevanti (nazzjonali jew deċentralizzat). L-awtoritajiet pubbliċi responsabbli għas-setturi li mhumiex tal-edukazzjoni u tat-taħriġ (eż. l-impjiegi, iż-żgħażagħ, il-finanzi, l-affarijiet soċjali, l-affarijiet interni, il-ġustizzja, is-saħħa, eċċ.) jitqiesu eliġibbli sakemm juru li għandhom kompetenza speċifika fil-qasam li fih se jitwettaq il-proċess ta’ esperimenti.

(b)	Organizzazzjonijiet pubbliċi jew privati attivi fl-oqsma tal-edukazzjoni jew tat-taħriġ jew oqsma rilevanti oħra.

(c)

Organizzazzjonijiet jew istituzzjonijiet pubbliċi jew privati li jwettqu attivitajiet transettorjali marbuta mal-edukazzjoni u t-taħriġ f’setturi soċjoekonomiċi oħrajn (eż. NGOs, servizzi ta’ informazzjoni jew gwida, awtoritajiet pubbliċi, aġenziji jew servizzi responsabbli għal: l-edukazzjoni, it-taħriġ, iż-żgħażagħ, l-impjiegi, l-affarijiet soċjali, l-affarijiet interni, il-ġustizzja, l-assigurazzjoni tal-kwalità, ir-rikonoxximent u/jew il-validazzjoni; il-gwida għall-karriera, kmamar tal-kummerċ, sħab tan-negozju jew soċjali, organizzazzjonijiet tal-kummerċ, is-soċjetà ċivili, organizzazzjonijiet kulturali jew tal-isport, entitajiet tal-evalwazzjoni jew tar-riċerka, midja eċċ.)

L-Aġenziji Nazzjonali jew strutturi u netwerks oħra tal-Programm Erasmus+, li jirċievu għotja diretta mill-Kummissjoni skont il-bażi ġuridika tal-Programm Erasmus+ mhumiex eliġibbli biex jipparteċipaw. Madankollu, l-entitajiet ġuridiċi li jospitaw l-Aġenziji Nazzjonali tal-Erasmus+ jew l-istrutturi u n-netwerks imsemmija hawn fuq jitqiesu bħala applikanti eliġibbli.

L-applikazzjonijiet mill-entitajiet ġuridiċi stabbiliti fil-pajjiżi tal-programm li ġejjin biss huma eliġibbli:

—	l-Istati Membri tal-Unjoni Ewropea;

—	il-pajjiżi tal-EFTA/ŻEE: l-Iżlanda, il-Liechtenstein, in-Norveġja;

—	il-pajjiżi kandidati tal-UE: Il-Maċedonja ta’ Fuq, it-Turkija u s-Serbja.

Għal applikanti Brittaniċi: Jekk jogħġbok innota li għandu jkun hemm konformità mal-kriterji ta’ eliġibbiltà għat-tul kollu tal-għotja. Jekk ir-Renju Unit joħroġ mill-UE matul il-perjodu tal-għotja mingħajr ma jikkonkludi ftehim mal-UE li jiżgura b’mod partikolari li l-applikanti Brittaniċi jibqgħu eliġibbli, inti se tieqaf tirċievi finanzjament mill-UE (filwaqt li tkompli, sa fejn ikun possibbli, tipparteċipa) jew tintalab tħalli l-proġett fuq il-bażi tal-Artikolu II.17 tal-ftehim ta’ għotja.

Jistgħu jintgħażlu proposti mill-applikanti fil-pajjiżi kandidati, jekk fid-data tal-għoti, ikunu daħlu fis-seħħ ftehimiet li jistabbilixxu l-arranġamenti għall-parteċipazzjoni ta’ dawk il-pajjiżi fil-programm.

Rekwiżit tal-kompożizzjoni tas-sħubija

Ir-rekwiżit minimu tal-kompożizzjoni tas-sħubija għal din is-sejħa huwa ta’ 4 entitajiet li jirrappreżentaw 3 pajjiżi tal-programm differenti. B’mod speċifiku:

—	Tal-anqas tliet awtoritajiet pubbliċi (Ministeri jew ekwivalenti) kull wieħed minn pajjiż tal-Programm differenti, filwaqt li mill-anqas wieħed mit-tliet awtoritajiet pubbliċi għandu jkun minn Stat Membru tal-Unjoni Ewropea u

—

Tal-inqas entità pubblika jew privata waħda b’għarfien espert fl-analiżi u l-evalwazzjoni tal-impatt tal-politika (“ir-riċerkatur”). Tali entità għandha tkun responsabbli għall-aspetti metodoloġiċi u l-protokolli tal-provi fuq il-post. Il-proposta tista’ tinvolvi aktar minn entità bħal din waħda, sakemm ix-xogħol ikun ikkoordinat u konsistenti.

Rekwiżit ta’ koordinazzjoni

Proposta ta’ proġett tista’ tiġi kkoordinata u ppreżentata biss, f’isem l-applikanti kollha, minn waħda minn dawn li ġejjin:

—	Awtorità pubblika (Ministeru jew ekwivalenti) kif deskritta fit-taqsima 2.1.a);

—

Entità pubblika jew privata ddelegata minn awtorità pubblika. L-entitajiet iddelegati għandu jkollhom approvazzjoni espliċita bil-miktub (ittra ta’ delega) minn awtorità pubblika biex iressqu u jikkordinaw il-proposta ta’ proġett f’isimhom. Huma biss l-entitajiet delegati li huma f’pożizzjoni li juru l-eżistenza tagħhom bħala persuna ġuridika għal tal-inqas 3 snin fid-data tal-iskadenza għall-preżentazzjoni tal-informazzjoni ta’ qabel il-proposti li ssir referenza għalihom fit-taqsima 6 li jitqiesu eliġibbli bħala “koordinatur” għall-iskop ta’ din is-sejħa.

2.2.   Attivitajiet eliġibbli u t-tul tal-proġett

L-attivitajiet eliġibbli għandhom ikunu konformi mal-Anness tal-linji gwida għall-applikanti. Il-provi fuq il-post għandhom iseħħu tal-inqas fi tliet pajjiżi li l-awtoritajiet pubbliċi/Ministeri tagħhom huma involuti fil-proġett.

L-attivitajiet għandhom jibdew bejn l-1 ta’ Jannar 2021 u t-28 ta’ Frar 2021.

It-tul tal-proġett għandu jkun ta’ bejn 24 u 36 xahar.

3.   Ir-riżultati mistennija

Il-proġetti proposti għandhom iwasslu għal riżultati sinifikanti fl-oqsma li ġejjin:

—	Appoġġ għall-prijoritajiet għal kooperazzjoni politika fil-livell tal-UE stabbiliti fil-Qafas tal-ET 2020, kif adatt.

—	Għarfien u bażi ta’ evidenza mtejba għal riformi b’impatt sistemiku potenzjalment għoli fis-setturi kkonċernati fil-pajjiżi eliġibbli.

—	Il-valur miżjud Ewropew billi flimkien jiġu identifikati l-aħjar prattika u tagħlimiet dwar “x’jaħdem” u “x’ma jaħdimx”.

—

L-iskalabbiltà u t-trasferibbiltà ta’ miżuri innovattivi. Iż-żieda mhux bilfors tfisser biss id-duplikazzjoni tal-miżuri ttestjati fuq numru akbar ta’ benefiċjarji. Pjuttost għandha tinftiehem bħala li toħloq l-aħjar kundizzjonijiet biex tagħmel il-miżuri ttestjati b’suċċess parti minn politika jew sistema.

—	Konsistenza u komplimentarjetà sodi bejn it-teorija u l-prattika; bejn il-politiki u l-programmi ta’ finanzjament tal-UE; bejn miżuri Ewropej, nazzjonali u reġjonali; bejn ir-rwoli ta’ dawk li jfasslu l-politika, tal-partijiet ikkonċernati u tar-riċerkaturi.

4.   Baġit disponibbli:

Il-baġit totali disponibbli għall-kofinanzjament tal-proġetti li jaqgħu taħt din is-sejħa huwa ta’ EUR 14 000 000, allokati kif ġej:

—	Lott 1	EUR 12 000 000
—	Lott 2	EUR 2 000 000

Il-kontribuzzjoni finanzjarja mill-UE ma tistax taqbeż 75 % tal-kostijiet totali eliġibbli tal-proġett.

L-għotja massima għal kull proġett se tkun ta’ EUR 2 000 000.

L-Aġenzija tirriżerva d-dritt li ma tqassamx il-fondi kollha disponibbli.

5.   Kriterji tal-għoti

Il-proposti se jiġu ppreżentati u evalwati f’żewġ stadji, li jinvolvu stadju ta’ qabel il-proposta u stadju ta’ proposta sħiħa.

Stadju ta’ qabel il-proposta
	Kriterji	Punti Massimi
1	Ir-rilevanza tal-proġett	20 punt
L-istadju tal-proposta sħiħa
2	Il-kwalità tat-tfassil tal-proġett u l-implimentazzjoni	30 punt
3	Il-kwalità tas-sħubija u l-arranġamenti ta’ kooperazzjoni	20 punt
4	L-impatt, it-tixrid u s-sostenibbiltà	30 punt

Huma biss l-applikanti eliġibbli li jilħqu l-livell limitu minimu ta’ 12-il punt fuq il-punteġġ għall-kriterju ta’ għoti tal-kriterju ta’ għoti Rilevanza tal-proġett fl-istadju ta’ qabel il-proposta li se jiġu mistiedna jippreżentaw proposta sħiħa u jelaboraw aktar fuq il-proposta tagħhom.

Il-kalkolu tal-punteġġ totali għall-proposta sħiħa se jinkludi l-punteġġ miksub għar-“Rilevanza tal-proġett” fl-istadju ta’ qabel il-proposta. Huma biss il-proposti sħaħ li jkunu laħqu mill-inqas il-limitu ta’ 60 punt tal-punteġġ totali (jiġifieri, il-punteġġ fuq il-kriterju tal-għoti “Rilevanza tal-proġett” ivvalutat fl-ewwel stadju flimkien mal-punteġġi fuq it-tliet kriterji tal-għoti l-oħra vvalutati fit-tieni stadju) li se jiġu kkunsidrati għall-finanzjament tal-UE. L-applikanti li jinżlu taħt dak il-limitu jiġu miċħuda.

6.   Proċedura ta’ sottomissjoni u skadenza

L-iskadenza għas-sottomissjoni hija:

—	Stadju ta’ qabel il-proposta: 21 ta’ April 2020 — 17.00 (ħin ta’ Brussell)

—	Proposti sħaħ: 24 ta’ Settembru 2020 — 17.00 (ħin ta’ Brussell)

L-applikanti huma mitlubin jaqraw sew l-informazzjoni kollha dwar is-sejħa għal proposti EACEA/38/2019 u l-proċedura ta’ sottomissjoni u li jużaw id-dokumenti obbligatorji, li jistgħu jinstabu fuq:

https://eacea.ec.europa.eu/erasmus-plus/funding_en — Referenza tas-sejħa EACEA/38/2019

L-applikazzjoni u l-annessi tagħha għandhom jiġu sottomessi online permezz ta’ formola elettronika apposta.

7.   L-informazzjoni dwar is-sejħa

L-informazzjoni kollha dwar is-Sejħa EACEA/38/2019 hija disponibbli fuq is-sit web li ġej:

https://eacea.ec.europa.eu/erasmus-plus/funding_en - Referenza tas-sejħa EACEA/38/2019

Kuntatt tal-email: EACEA-Policy-Support@ec.europa.eu