EUR-Lex Access to European Union law
This document is an excerpt from the EUR-Lex website
Document 62011TN0090
Case T-90/11: Action brought on 18 February 2011 — ONP and Others v Commission
Kawża T-90/11: Rikors ippreżentat fit- 18 ta' Frar 2011 — ONP et vs Il-Kummissjoni
Kawża T-90/11: Rikors ippreżentat fit- 18 ta' Frar 2011 — ONP et vs Il-Kummissjoni
ĠU C 173, 11.6.2011, p. 13–14
(BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV)
11.6.2011 |
MT |
Il-Ġurnal Uffiċjali tal-Unjoni Ewropea |
C 173/13 |
Rikors ippreżentat fit-18 ta' Frar 2011 — ONP et vs Il-Kummissjoni
(Kawża T-90/11)
2011/C 173/29
Lingwa tal-kawża: il-Franċiż
Partijiet
Rikorrenti: Ordre national des pharmaciens (ONP) (Pariġi, Franza), Conseil national de l’Ordre des pharmaciens (CNOP) (Pariġi), Conseil central de la section G de l’Ordre national des pharmaciens (CCG) (Pariġi) (rappreżentanti: O. Saumon, L. Defalque u T. Bontinck, avukati)
Konvenuta: Il-Kummissjoni Ewropea
Talbiet
Ir-rikorrenti jitlobu li l-Qorti Ġenerali jogħġobha:
— |
tannulla d-Deċiżjoni tal-Kummissjoni Ewropea C(2010) 8952 finali, tat-8 ta’ Diċembru 2010, notifikata fl-10 ta’ Diċembru 2010 lir-rikorrenti, dwar proċedura skont l-Artikolu 101 tat-Trattat dwar il-Funzjonament tal-Unjoni Ewropea (Każ 39510 — LABCO/ONP); |
— |
sussidjarjament, fil-każ li jiġu stabbiliti ċerti lmenti, tnaqqas il-multa ta’ EUR 5 000 000 imposta fuq ir-rikorrenti mill-Kummissjoni Ewropea għal ksur tal-Artikolu 101 tat-TFUE b’kunsiderazzjoni taċ-ċirkustanzi attenwanti eżistenti u tal-karatteristiċi tal-assoċjazzjoni ta’ impriżi inkwistjoni; |
— |
fi kwalunkwe każ, tikkundanna lill-Kummissjoni Ewropea għall-ispejjeż kollha b’mod konformi mal-Artikolu 87(2) tar-Regoli tal-Proċedura tal-Qorti Ġenerali tal-Unjoni Ewropea. |
Motivi u argumenti prinċipali
Insostenn tar-rikors, ir-rikorrenti jinvokaw disa’ motivi.
(1) |
L-ewwel motiv ibbażat fuq żball ta’ interpretazzjoni u ta’ applikazzjoni tal-Artikolu 101 TFUE peress li l-Kummissjoni kkunsidrat li l-eċċezzjoni stabbilita mis-sentenza Wouters (1) ma tapplikax għall-kawża preżenti. |
Għal dak li jirrigwarda r-restrizzjonijiet għall-iżvilupp ta’ gruppi ta’ laboratorji fis-suq Franċiż tal-analiżi ta’ bijoloġija medika:
(2) |
It-tieni motiv ibbażat fuq żball ta’ liġi minħabba żball fl-evalwazzjoni tal-portata tal-leġiżlazzjoni Franċiża fir-rigward tar-rwoli rispettivi tal-prefett u tal-Conseil central de la section G de l’Ordre des pharmaciens fit-tibdiliet li seħħew matul il-ħajja soċjali ta’ kumpannija b’responsabbiltà limitata li teżerċita professjoni libera. |
(3) |
It-tielet motiv ibbażat fuq ksur tal-kamp ta’ applikazzjoni tal-obbligu ta’ komunikazzjoni, hekk kif jirriżulta mill-Artikoli L 4221-19, L 6221-4 u L 6221-5 tal-kodiċi tas-saħħa pubblika kif ukoll ta’ ċirkulari tat-22 ta’ Settembru 1998, peress li l-Kummissjoni ma osservatx ir-rwol tal-Conseil central de la section G de l’Ordre des pharmaciens fil-kuntest tal-verifika tagħha a posteriori tad-dokumenti soċjali li jirrigwardaw il-kumpanniji b’responsabbiltà limitata li jeżerċitaw professjoni libera ta’ laboratorji ta’ analiżi ta’ bijoloġija medika u tal-obbligu tagħha ta’ komunikazzjoni ta’ osservazzjonijiet lill-prefett. |
(4) |
Ir-raba’ motiv ibbażat fuq nuqqas ta’ osservanza tar-rwol tal-Conseil central de la section G de l’Ordre des pharmaciens bħala garanti tal-indipendenza professjonali tas-soċju li jipparteċipa, sa fejn il-Kummissjoni kienet sostniet il-partiċipazzjoni minima tas-soċju li jipparteċipa fil-kapital tal-kumpanniji b’responsabbiltà limitata li jeżerċitaw professjoni libera li twassal għat-telf tal-indipendenza ekonomika u ta’ governanza tiegħu. |
(5) |
Il-ħames motiv ibbażat fuq żball ta’ evalwazzjoni tal-intenzjoni tal-leġiżlatur fir-rigward tad-diviżjoni tal-ishma iktar minn limitu ta’ 25 % u tal-ksur tal-kuntest ġuridiku applikabbli għad-diviżjoni tal-ishma ta’ kumpanniji b’responsabbiltà limitata li jeżerċitaw professjoni libera. |
(6) |
Is-sitt motiv ibbażat fuq żball ta’ interpretazzjoni u ta’ applikazzjoni tal-Artikolu 101 TFUE billi ħadet inkunsiderazzjoni, fid-deċiżjoni kkontestata, is-sanzjonijiet dixxiplinari deċiżi peress li huma jirrinforzaw l-effetti potenzjali jew reali tad-deċiżjonijiet inkriminati. |
Għal dak li jirrigwarda l-impożizzjoni tal-prezzijiet minimi fis-suq Franċiż tal-analiżi ta’ bijoloġija medika:
(7) |
Is-seba’ motiv ibbażat fuq il-fatt li l-Kummissjoni kienet qabżet il-limiti tad-deċiżjoni ta’ spezzjoni (2) billi ġabret dokumenti li jirrigwardaw il-“prezz”, li jkollu bħala konsegwenza li l-provi miġbura fuq din il-bażi jkunu nġabru illegalment u, konsegwentement, l-ilment dwar il-prezzijiet minimi għandu jiġi kkunsidrat bħala mhux stabbilit. |
Jekk, quod non, il-provi li jirrigwardaw il-prezzijiet minimi setgħu validament jiġu miġbura mill-Kummissjoni fl-ispezzjoni tagħha:
(8) |
It-tmien motiv ibbażat fuq żball ta’ evalwazzjoni tal-portata tal-Artikolu L 6211-6 antik tal-Kodiċi tas-Saħħa Pubblika u tal-volontà tal-leġiżlatur fir-rigward tad-definizzjoni u tal-prassi tar-rifużjonijiet. |
(9) |
Id-disa’ motiv ibbażat fuq żball ta’ evalwazzjoni tal-fatti li wassal għal żball ta’ liġi, il-Kummissjoni kkunsidrat, minn naħa, li l-aġir tal-ONP dwar ir-rifużjonijiet ma jaqax fil-kamp tal-missjonijiet legali tagħha iżda jirrefletti l-għanijiet antikompetittivi tagħha u, min-naħa l-oħra, li l-ONP kienet sistematikament, bil-għan li tipproteġi l-interessi tal-laboratorji żgħar, ipprovat timponi prezz minimu fis-suq tas-servizzi ta’ analiżi ta’ bijoloġija medika. |
(1) Sentenza tal-Qorti tal-Ġustizzja tad-19 ta’ Frar 2002, Wouters et, C-309/99, Ġabra p. I-1577.
(2) Deċiżjoni ta’ Spezzjoni tal-Kummissjoni C(2008) 6494, tad-29 ta’ Ottubru 2008, li tordna lir-rikorrenti li jissuġġettaw ruħhom għal spezzjoni skont l-Artikolu 20(4) tar-Regolament tal-Kunsill (KE) Nru 1/2003, tas-16 Diċembru 2002, fuq l-implimentazzjoni tar-regoli tal-kompetizzjoni mniżżlin fl-Artikoli 101 TFUE u 102 TFUE, hija s-suġġett tar-rikors T-23/09, CNOP u CCG vs Il-Kummissjoni (ĠU 2009, C 55 p. 49).