This document is an excerpt from the EUR-Lex website
Document 52024PC0543
Proposal for a COUNCIL IMPLEMENTING DECISION amending Implementing Decision (EU) 2018/789 authorising Hungary to introduce a special measure derogating from Article 193 of Directive 2006/112/EC on the common system of value added tax
Proposta għal DEĊIŻJONI TA’ IMPLIMENTAZZJONI TAL-KUNSILL li temenda d-Deċiżjoni ta’ Implimentazzjoni (UE) 2018/789 li tawtorizza lill-Ungerija tintroduċi miżura speċjali li tidderoga mill-Artikolu 193 tad-Direttiva 2006/112/KE dwar is-sistema komuni ta’ taxxa fuq il-valur miżjud
Proposta għal DEĊIŻJONI TA’ IMPLIMENTAZZJONI TAL-KUNSILL li temenda d-Deċiżjoni ta’ Implimentazzjoni (UE) 2018/789 li tawtorizza lill-Ungerija tintroduċi miżura speċjali li tidderoga mill-Artikolu 193 tad-Direttiva 2006/112/KE dwar is-sistema komuni ta’ taxxa fuq il-valur miżjud
COM/2024/543 final
IL-KUMMISSJONI EWROPEA
Brussell, 21.11.2024
COM(2024) 543 final
2024/0302(NLE)
Proposta għal
DEĊIŻJONI TA’ IMPLIMENTAZZJONI TAL-KUNSILL
li temenda d-Deċiżjoni ta’ Implimentazzjoni (UE) 2018/789 li tawtorizza lill-Ungerija tintroduċi miżura speċjali li tidderoga mill-Artikolu 193 tad-Direttiva 2006/112/KE dwar is-sistema komuni ta’ taxxa fuq il-valur miżjud
MEMORANDUM TA’ SPJEGAZZJONI
Skont l-Artikolu 395(1) tad-Direttiva 2006/112/KE tat-28 ta’ Novembru 2006 dwar is-sistema komuni ta’ taxxa fuq il-valur miżjud 1 (“id-Direttiva tal-VAT”), il-Kunsill, filwaqt li jaġixxi unanimament fuq proposta tal-Kummissjoni, jista’ jawtorizza lil kwalunkwe Stat Membru biex japplika miżuri speċjali għal deroga mid-dispożizzjonijiet ta’ dik id-Direttiva, sabiex jissimplifika l-proċedura tal-ġbir tal-VAT jew sabiex jipprevjeni ċerti forom ta’ evażjoni jew ta’ evitar tat-taxxa.
Permezz ta’ ittra reġistrata mal-Kummissjoni fl-10 ta’ Ġunju 2024, l-Ungerija talbet awtorizzazzjoni biex tissokta d-deroga mill-Artikolu 193 tad-Direttiva tal-VAT fir-rigward tal-persuna responsabbli għall-ħlas tal-VAT fil-każ ta’ ċerti provvisti mwettqa minn persuni taxxabbli soġġetti għal likwidazzjoni jew għal kwalunkwe proċediment ieħor li jistabbilixxi legalment l-insolvenza tagħha. F’konformità mal-Artikolu 395(2) tad-Direttiva tal-VAT, il-Kummissjoni infurmat lill-Istati Membri l-oħra bit-talba tal-Ungerija permezz ta’ ittra tas-7 ta’ Awwissu 2024. Permezz ta’ ittra tad-9 ta’ Awwissu 2024, il-Kummissjoni nnotifikat lill-Ungerija li kellha l-informazzjoni kollha li qieset li kellha bżonn għall-valutazzjoni tat-talba.
1.KUNTEST TAL-PROPOSTA
•Raġunijiet u objettivi tal-proposta
Abbażi tal-Artikolu 199(1)(g) tad-Direttiva tal-VAT, l-Istati Membri jistgħu jistipulaw li l-persuna responsabbli għall-ħlas tal-VAT tkun il-persuna taxxabbli li lilha jsirilha l-forniment ta’ proprjetà immobbli mibjugħa mid-debitur tas-sentenza fi proċedura ta’ bejgħ obbligatorju (il-mekkaniżmu tar-reverse charge). Fl-2017, l-Ungerija talbet biex testendi l-applikazzjoni tal-mekkaniżmu tar-reverse charge għall-provvisti ta’ oġġetti kapitali u għall-provvisti ta’ oġġetti u servizzi oħra b’valur tas-suq miftuħ li jaqbżu l-HUF 100 000 (madwar EUR 250) meta ssir il-konsenja, meta l-persuna taxxabbli li tipprovdi l-oġġetti jew is-servizzi tkun soġġetta għal likwidazzjoni jew għal kwalunkwe proċediment ieħor li jistabbilixxi legalment l-insolvenza tagħha. Id-Deċiżjoni ta’ Implimentazzjoni tal-Kunsill (UE) 2018/789 2 awtorizzat din id-deroga sal-31 ta’ Diċembru 2021.
Il-miżura ġiet estiża ulterjorment sal-31 ta’ Diċembru 2024 bid-Deċiżjoni ta’ Implimentazzjoni tal-Kunsill (UE) 2021/1775 tal-5 ta’ Ottubru 2021 3 .
Tipikament, l-oġġetti kapitali huma għodod, makkinarju u oġġetti ta’ valur għoli. Barra minn hekk, skont l-Ungerija, hemm għadd kbir ta’ tranżazzjonijiet li jaqbżu l-limitu ta’ HUF 100 000 imwettqa minn persuni taxxabbli insolventi. Il-likwidatur ta’ sikwit jonqos milli jħallas il-VAT dovuta minħabba li dak l-ammont jintuża biex jitħallsu t-talbiet preċedenti. Fl-istess ħin, ix-xerrej, li huwa persuna taxxabbli bid-dritt għal tnaqqis, jista’ xorta jnaqqas il-VAT mġarrba, u dan iħalli impatt negattiv fuq il-baġit. L-Ungerija rreġistrat ukoll każijiet ta’ frodi fejn kumpaniji f’likwidazzjoni joħorġu fatturi fittizji lil kumpaniji attivi biex jgħollu sostanzjalment fl-ammont ta’ VAT deduċibbli mingħajr il-garanzija li l-emittent tal-fattura jħallas il-VAT dovuta.
Għaldaqstant, l-Ungerija ssostni li hemm ħtieġa li jitħares id-dħul mit-taxxi u l-interessi baġitarji minħabba l-għadd ta’ persuni taxxabbli f’diffikultajiet finanzjarja li jwettqu l-provvisti msemmija hawn fuq. Skont l-Ungerija, il-mekkaniżmu tar-reverse charge huwa għodda xierqa għal dan l-għan. Il-persuna taxxabbli f’likwidazzjoni ma tkunx responsabbli li tħallas il-VAT dovuta u l-klijent ma jiġix ippenalizzat filwaqt li jiġi evitat it-telf mill-finanzi pubbliċi.
Skont l-Artikolu 199a tad-Direttiva tal-VAT, hemm il-possibbiltà, għall-Istati Membri kollha, li japplikaw il-mekkaniżmu tar-reverse charge għal tranżazzjonijiet speċifiċi suxxettibbli għal frodi. Dak l-Artikolu huwa fis-seħħ sal-31 ta’ Diċembru 2026 u l-Kummissjoni se tivvaluta jekk il-provvisti ta’ oġġetti kapitali u ta’ oġġetti u servizzi oħra, meta l-persuna taxxabbli li tipprovdi l-oġġetti jew is-servizzi tkun soġġetta għal likwidazzjoni jew għal kwalunkwe proċediment ieħor li jistabbilixxi legalment l-insolvenza tagħha, għandux jiġi inklużi wkoll fil-provvisti koperti mill-mekkaniżmu tar-reverse charge, jekk ikun hemm proposta ġdida f’dan ir-rigward.
B’hekk, għalkemm l-Ungerija talbet li l-awtorizzazzjoni tiġi estiża sal-31 ta’ Diċembru 2027, qiegħed jiġi propost li tingħata awtorizzazzjoni biex id-deroga tiġi estiża sal-31 ta’ Diċembru 2026.
Deroga li tippermetti l-użu tal-mekkaniżmu tar-reverse charge minn Stat Membru wieħed minflok miżuri ġenerali tikkostitwixxi mezz tal-aħħar istanza u t-tul ta’ żmien tagħha għandu jiġi limitat kemm jista’ jkun. Barra minn hekk, dak il-perjodu għandu jkun biżżejjed biex jiġu implimentati miżuri konvenzjonali oħra li jnaqqsu t-telf għall-finanzi pubbliċi, b’mod partikolari għal dak it-telf marbut ma’ mġiba frodulenti, biex b’hekk jiġi evitat li din il-miżura terġa’ tiġi estiża.
2.BAŻI LEGALI, SUSSIDJARJETÀ U PROPORZJONALITÀ
•Bażi legali
L-Artikolu 395 tad-Direttiva tal-VAT.
•Sussidjarjetà (għall-kompetenza mhux esklużiva)
Meta titqies id-dispożizzjoni tad-Direttiva tal-VAT li fuqha hija msejsa, il-prinċipju tas-sussidjarjetà ma japplikax.
•Proporzjonalità
Id-Deċiżjoni tikkonċerna awtorizzazzjoni mogħtija lil Stat Membru fuq talba tiegħu stess u ma tikkostitwixxi l-ebda obbligu.
Minħabba l-kamp ta’ applikazzjoni limitat tad-deroga, il-miżura speċjali hija proporzjonata mal-għan li qed jiġi segwit, jiġifieri s-simplifikazzjoni tal-ġbir tat-taxxi u l-ġlieda kontra l-evażjoni u l-evitar tat-taxxa. Il-proposta ma tmurx lil hinn minn dak li huwa meħtieġ sabiex jintlaħqu dawn l-għanijiet.
•Għażla tal-istrument
L-istrument propost huwa Deċiżjoni ta’ Implimentazzjoni tal-Kunsill.
Skont l-Artikolu 395 tad-Direttiva tal-VAT, huwa possibbli li tingħata deroga mir-regoli komuni tal-VAT biss bl-awtorizzazzjoni tal-Kunsill, li jaġixxi b’mod unanimu fuq proposta tal-Kummissjoni. Deċiżjoni ta’ Implimentazzjoni tal-Kunsill hija l-aktar strument xieraq minħabba li tista’ tiġi indirizzata lil Stat Membru individwali.
3.RIŻULTATI TAL-EVALWAZZJONIJIET EX POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT
•Konsultazzjonijiet mal-partijiet ikkonċernati
Ma saret l-ebda konsultazzjoni mal-partijiet ikkonċernati. Il-proposta attwali hija bbażata fuq talba li saret mill-Ungerija u tikkonċerna biss lil dan l-Istat Membru partikolari.
•Ġbir u użu tal-għarfien espert
Ma kienx hemm bżonn ta’ għarfien espert estern.
•Valutazzjoni tal-impatt
Il-proposta għal Deċiżjoni ta’ Implimentazzjoni għandha l-għan li tissalvagwardja d-dħul mit-taxxa u l-interessi baġitarji marbutin ma’ kumpaniji f’proċedura ta’ insolvenza f’każ li jwettqu provvisti ta’ oġġetti kapitali jew provvisti ta’ oġġetti jew servizzi b’valur miżjud li jaqbeż il-HUF 100 000. Skont l-Ungerija, l-applikazzjoni tal-mekkaniżmu tar-reverse charge fuq dawn it-tipi ta’ tranżazzjonijiet issimplifikat effettivament il-ġbir tat-taxxa u ppreveniet l-evażjoni jew l-evitar tat-taxxa.
Skont iċ-ċifri tal-awtorità tat-taxxa Ungeriża għall-2021–2023, l-għadd ta’ persuni taxxabbli kkonċernati fl-2021 — wara miżuri ta’ emerġenza introdotti bħala riżultat tal-pandemija tal-COVID-19 — żdied għal 380, u naqas għal 335 fl-2022 u għal 212 fl-2023.
Il-provvisti ta’ oġġetti u servizzi rreġistrati taħt il-mekkaniżmu tar-reverse charge kienu ta’ HUF 34 biljun fl-2021 u HUF 31 biljun fl-2022. Fl-2023, iċ-ċifra żdiedet għal HUF 157 biljun, li minnhom HUF 109 biljun kienu marbuta ma’ kontribwent kbir wieħed.
Konsegwentement — jekk wieħed jassumi r-rata tat-taxxa standard — l-obbligazzjoni tat-taxxa ammontat għal HUF 8,3–9,3 biljun fl-2021 u l-2022, u laħqet ċifra eċċezzjonalment għolja ta’ HUF 42 biljun fl-2023.
Meta wieħed iqis, għalhekk, li ftit hemm ċans li tiġi rkuprata l-VAT minn persuni taxxabbli soġġetti għal proċeduri ta’ likwidazzjoni, l-awtorità tat-taxxa Ungeriża tistma għal madwar HUF 3,6–4 biljun (HUF 5,6 biljun fl-2023 jekk neskludu l-anomaliji, jew HUF 18-il biljun kieku ninkluduhom) l-ammont ta’ VAT li kien jintilef għall-baġit kull sena li kieku d-deroga ma nżammitx għall-proprjetà mobbli tanġibbli.
Għalhekk, il-miżura ta’ deroga għandha impatt pożittiv. Minħabba dan l-impatt limitat, l-Ungerija għandha timplimenta miżuri konvenzjonali oħra biex tnaqqas it-telf mill-baġit, li jistgħu jiksbu riżultati simili.
Minħabba l-kamp ta’ applikazzjoni żgħir tad-deroga u l-applikazzjoni limitata tagħha fiż-żmien, l-impatt, fi kwalunkwe każ, se jkun limitat.
4.IMPLIKAZZJONIJIET BAĠITARJI
Il-proposta ma hija se jkollha l-ebda implikazzjoni negattiva għall-baġit tal-UE.
5.ELEMENTI OĦRA
Il-proposta tinkludi klawżola ta’ estinzjoni stabbilita sal-31 ta’ Diċembru 2026.
2024/0302 (NLE)
Proposta għal
DEĊIŻJONI TA’ IMPLIMENTAZZJONI TAL-KUNSILL
li temenda d-Deċiżjoni ta’ Implimentazzjoni (UE) 2018/789 li tawtorizza lill-Ungerija tintroduċi miżura speċjali li tidderoga mill-Artikolu 193 tad-Direttiva 2006/112/KE dwar is-sistema komuni ta’ taxxa fuq il-valur miżjud
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea,
Wara li kkunsidra d-Direttiva tal-Kunsill 2006/112/KE tat-28 ta’ Novembru 2006 dwar is-sistema komuni ta’ taxxa fuq il-valur miżjud 4 , u b’mod partikolari l-Artikolu 395(1), l-ewwel subparagrafu, tagħha,
Wara li kkunsidra l-proposta tal-Kummissjoni Ewropea,
Billi:
(1)F’konformità mal-Artikolu 193 tad-Direttiva 2006/112/KE, kwalunkwe persuna taxxabbli li twettaq provvista taxxabbli ta’ oġġetti jew servizzi, bħala regola ġenerali, hija responsabbli mill-ħlas tat-taxxa fuq il-valur miżjud (“VAT”, value added tax) lill-awtoritajiet tat-taxxa.
(2)Permezz tad-Deċiżjoni ta’ Implimentazzjoni tal-Kunsill (UE) 2018/789 5 , l-Ungerija ġiet awtorizzata tintroduċi miżura speċjali li tidderoga mill-Artikolu 193 tad-Direttiva 2006/112/KE (“il-miżura speċjali”) fir-rigward tal-persuna responsabbli mill-ħlas tal-VAT meta ċerti provvisti jitwettqu minn persuna taxxabbli soġġetta għal likwidazzjoni jew għal kwalunkwe proċediment ieħor li jistabbilixxi legalment l-insolvenza tagħha.
(3)Id-Deċiżjoni ta’ Implimentazzjoni tal-Kunsill (UE) 2021/1775 tal-5 ta’ Ottubru 2021 6 estendiet l-awtorizzazzjoni biex tiġi applikata l-miżura speċjali sal-31 ta’ Diċembru 2024.
(4)Permezz ta’ ittra tal-10 ta’ Ġunju 2024 (“it-talba”), l-Ungerija talbet lill-Kummissjoni testendi ulterjorment l-awtorizzazzjoni biex tapplika l-miżura speċjali sal-31 ta’ Diċembru 2027. Flimkien mat-talba l-Ungerija ppreżentat rapport, inkluż rieżami tal-miżura speċjali.
(5)Skont l-Artikolu 395(2), it-tieni subparagrafu, tad-Direttiva 2006/112/KE, permezz ta’ ittri bid-data tas-7 ta’ Awwissu 2024, il-Kummissjoni bagħtet it-talba lill-Istati Membri l-oħrajn. Il-Kummissjoni nnotifikat lill-Ungerija li kellha l-informazzjoni kollha meħtieġa sabiex tikkunsidra t-talba permezz tal-ittra tad-9 ta’ Awwissu 2024.
(6)L-Ungerija ssostni li l-persuni taxxabbli f’likwidazzjoni jew taħt proċedura ta’ insolvenza ta’ sikwit ma jħallsux il-VAT dovuta lill-awtoritajiet tat-taxxa. Fl-istess ħin, ix-xerrej, li huwa persuna taxxabbli bid-dritt għal tnaqqis, jista’ xorta jnaqqas il-VAT mġarrba, u dan ikollu impatt negattiv fuq il-finanzi pubbliċi. L-Ungerija irreġistrat ukoll każijiet ta’ frodi fejn il-kumpaniji f’likwidazzjoni joħorġu fatturi fittizji lil kumpaniji attivi u jnaqqsu b’mod sostanzjali t-taxxa pagabbli mingħajr il-garanzija li l-emittent tal-fatturi jħallas il-VAT dovuta.
(7)F’konformità mal-Artikolu 199(1), il-punt (g) tad-Direttiva 2006/112/KE, l-Istati Membri jistgħu jistipulaw li l-persuna responsabbli għall-ħlas tal-VAT tkun il-persuna taxxabbli li lilha jsirilha l-forniment ta’ proprjetà immobbli mibjugħa mid-debitur tas-sentenza fi proċedura ta’ bejgħ obbligatorju (“il-mekkaniżmu tar-reverse charge”). Il-miżura speċjali tippermetti lill-Ungerija testendi l-applikazzjoni tal-mekkaniżmu tar-reverse charge għal provvisti oħra minn persuni taxxabbli taħt proċedura ta’ insolvenza, jiġifieri l-provvista ta’ oġġetti kapitali u l-provvista ta’ oġġetti jew servizzi oħra b’valur tas-suq miftuħ li jaqbeż il-HUF 100 000.
(8)Abbażi tal-informazzjoni mogħtija mil-Ungerija, l-applikazzjoni tal-mekkaniżmu tar-reverse charge fuq dawk it-tipi ta’ tranżazzjonijiet issimplifikat effettivament il-ġbir tat-taxxa u ppreveniet l-evażjoni jew l-evitar tat-taxxa. L-implimentazzjoni tal-miżura llimitat it-telf għad-dħul pubbliku u ġġenerat dħul baġitarju addizzjonali.
(9)L-estensjoni mitluba għandha tkun limitata fiż-żmien biex tippermetti lill-amministrazzjoni tat-taxxa tintroduċi miżuri konvenzjonali oħra, sa ma l-miżura speċjali tiskadi, biex tindirizza l-problema rispettiva u tnaqqas it-telf għall-finanzi pubbliċi, b’mod partikolari dak marbut ma’ prattiki frodulenti, sabiex b’hekk estensjoni ulterjuri ta’ dik il-miżura ssir waħda superfluwa. Id-deroga mill-Artikolu 193 tad-Direttiva 2006/112/KE li tippermetti l-użu tal-mekkaniżmu tar-reverse charge tingħata biss f’każijiet eċċezzjonali għal oqsma frodulenti speċifiċi u għandha tintuża biss bħala mezz tal-aħħar istanza. Barra minn hekk, l-Artikolu 199a tad-Direttiva 2006/112/KE se jibqa’ fis-seħħ sal-31 ta’ Diċembru 2026. Għalhekk, l-awtorizzazzjoni biex tiġi applikata l-miżura speċjali għandha tiġi estiża biss sal-31 ta’ Diċembru 2026.
(10)Il-miżura speċjali mhi se jkollha l-ebda impatt negattiv fuq ir-riżorsi proprji tal-Unjoni li jirriżultaw mill-VAT.
(11)Għaldaqstant, id-Deċiżjoni ta’ Implimentazzjoni (UE) 2018/789 għandha tiġi emendata kif xieraq,
ADOTTA DIN ID-DEĊIŻJONI:
Artikolu 1
Fl-Artikolu 2 tad-Deċiżjoni ta’ Implimentazzjoni (UE) 2018/789, it-tieni paragrafu huwa sostitwit b’dan li ġej:
Din id-Deċiżjoni għandha tiskadi fil-31 ta’ Diċembru 2026”.
Artikolu 2
Din id-Deċiżjoni hija indirizzata lill-Ungerija.
Magħmul fi Brussell,
Għall-Kunsill
Il-President