IL-KUMMISSJONI EWROPEA

Brussell, 14.2.2024

COM(2024) 64 final

RAPPORT TAL-KUMMISSJONI LILL-PARLAMENT EWROPEW U LILL-KUNSILL

dwar l-implementazzjoni tar-Regolament (UE) 2021/784 dwar l-indirizzar tad-disseminazzjoni ta’ kontenut terroristiku online

{SWD(2024) 36 final}

1.SOMMARJU EŻEKUTTIV

Ir-Regolament (UE) 2021/784 dwar l-indirizzar tad-disseminazzjoni ta’ kontenut terroristiku online jipprovdi l-qafas legali fil-livell Ewropew għall-Istati Membri biex jipproteġu liċ-ċittadini milli jkunu esposti għal kontenut terroristiku online. Ir-Regolament ifittex li jiżgura l-funzjonament bla xkiel tas-suq uniku diġitali billi jindirizza l-użu ħażin tas-servizzi ta’ hosting għad-disseminazzjoni lill-pubbliku ta’ kontenut terroristiku online. Dan għandu l-għan li jipprevjeni li t-terroristi milli jagħmlu użu mill-internet biex ixerrdu l-messaġġi tagħhom biex jintimidaw, jirradikalizzaw, jirreklutaw u jiffaċilitaw l-attakki terroristiċi. Dan huwa partikolarment rilevanti fil-kuntest attwali ta’ kunflitt u instabbiltà, li għandu impatt fuq is-sigurtà tal-Ewropa. Il-gwerra ta’ aggressjoni tar-Russja kontra l-Ukrajna u l-attakk terroristiku mwettaq mill-Ħamas kontra Iżrael fis-7 ta’ Ottubru 2023 kellhom bħala konsegwenza żieda fil-kontenut terroristiku li qed jinxtered online.

Il-qafas regolatorju biex jiġi indirizzat il-kontenut illegali online kompla jissaħħaħ bid-dħul fis-seħħ tal-Att dwar is-Servizzi Diġitali fis-16 ta’ Novembru 2022. L-Att dwar is-Servizzi Diġitali jirregola l-obbligi tas-servizzi diġitali li jaġixxu bħala intermedjarji fir-rwol tagħhom li jgħaqqdu lill-konsumaturi mal-kontenut, is-servizzi u l-oġġetti, u b’hekk jipproteġu aħjar lill-utenti online u jikkontribwixxu għal ambjent online aktar sikur.

Ir-Regolament dwar l-indirizzar tad-disseminazzjoni ta’ kontenut terroristiku online daħal fis-seħħ fis-7 ta’ Ġunju 2022. Skont l-Artikolu 22 tar-Regolament, il-Kummissjoni għandha tippreżenta rapport dwar l-applikazzjoni tar-Regolament (“rapport ta’ implimentazzjoni”) lill-Parlament Ewropew u lill-Kunsill.

Dan ir-rapport ta’ implimentazzjoni huwa bbażat fuq il-valutazzjoni tal-informazzjoni pprovduta mill-Istati Membri, l-Europol u l-fornituri ta’ servizzi ta’ hosting f’konformità mal-obbligi stabbiliti fir-Regolament. Abbażi ta’ valutazzjoni bħal din, is-sejbiet ewlenin rigward l-implimentazzjoni tar-Regolament jistgħu jinġabru fil-qosor kif ġej:

·Mill-31 ta’ Diċembru 2023, tlieta u għoxrin Stat Membru nnominaw awtorità / awtoritajiet bis-setgħa li toħroġ / joħorġu ordnijiet ta’ tneħħija kif stabbilit fir-Regolament 1 . Il-lista tal-awtoritajiet tal-Istati Membri hija disponibbli fuq is-sit web tal-Kummissjoni u tiġi aġġornata regolarment. 2

·Mill-31 ta’ Diċembru 2023, il-Kummissjoni rċeviet informazzjoni dwar mill-inqas 349 ordni ta’ tneħħija ta’ kontenut terroristiku maħruġa mill-awtoritajiet kompetenti ta’ sitt Stati Membri (Spanja, ir-Rumanija, Franza, il-Ġermanja, iċ-Ċekja u l-Awstrija), li fil-biċċa l-kbira tal-każijiet wasslu għal azzjonijiet ta’ segwitu rapidi mill-fornituri ta’ servizzi ta’ hosting biex jitneħħa jew jiġi mblukkat l-aċċess għal kontenut terroristiku. Dan juri li l-għodod ipprovduti mir-Regolament qed jibdew jintużaw u huma ta’ suċċess fl-iżgurar tat-tneħħija rapida ta’ kontenut terroristiku mill-fornituri ta’ servizzi ta’ hosting skont l-Artikolu 3(3). Skont l-informazzjoni li waslet għand il-Kummissjoni, dawn l-ordnijiet ta’ tneħħija ma ġewx ikkontestati.

·Il-koordinazzjoni taħdem tajjeb bejn l-awtoritajiet kompetenti tal-Istati Membri u l-Europol, u b’mod partikolari l-Unità ta’ Indikazzjoni ta’ Kontenut fuq l-Internet (EU IRU), fl-applikazzjoni tar-Regolament, speċjalment fl-ipproċessar ta’ ordnijiet ta’ tneħħija.

·L-għodda tal-Europol “PERCI” 3 bdiet titħaddem fit-3 ta’ Lulju 2023. Din l-għodda ntużat b’suċċess minn xi Stati Membri biex jittrażmettu kemm ordnijiet ta’ tneħħija kif ukoll riferimenti 4 . L-awtoritajiet kompetenti Spanjoli, Ġermaniżi, Awstrijaki, Franċiżi u Ċeki użaw ukoll l-għodda biex jittrażmettu ordnijiet ta’ tneħħija. B’mod ġenerali, ġew ipproċessati mill-inqas 14 615 riferiment fil-PERCI bejn it-tnedija tal-PERCI fit-3 ta’ Lulju u l-31 ta’ Diċembru 2023.

·Għalkemm ir-Regolament ma fih l-ebda miżura partikolari dwar ir-riferimenti, skont l-informazzjoni li waslet għand il-Kummissjoni, kien hemm ukoll żieda fir-rispons għar-riferimenti mill-fornituri ta’ servizzi ta’ hosting mid-dħul fis-seħħ tar-Regolament.

·Abbażi tal-għarfien tal-Kummissjoni, mill-31 ta’ Diċembru 2023, l-ebda fornitur ta’ servizzi ta’ hosting ma ġie identifikat bħala li ġie espost għal kontenut terroristiku, kif definit fl-Artikolu 5(4) tar-Regolament. Din l-identifikazzjoni hija prerekwiżit għall-applikazzjoni tal-miżuri speċifiċi deskritti f’dak l-artikolu. Madankollu, skont ir-rapporti ta’ trasparenza pprovduti mill-fornituri ta’ servizzi ta’ hosting, il-fornituri ta’ servizzi ta’ hosting ħadu miżuri biex jindirizzaw l-użu ħażin tas-servizzi tagħhom għad-disseminazzjoni ta’ kontenut terroristiku, b’mod partikolari permezz tal-adozzjoni ta’ termini u kundizzjonijiet speċifiċi u l-applikazzjoni ta’ dispożizzjonijiet u miżuri oħra biex jiġi limitat it-tixrid ta’ kontenut terroristiku.

·Il-fornituri ta’ servizzi ta’ hosting adottaw ukoll miżuri għan-notifika ta’ theddida imminenti għall-ħajja skont l-Artikolu 14(5) tar-Regolament.

Fir-rigward ta’ fornituri iżgħar ta’ servizzi ta’ hosting, fl-2021 il-Kummissjoni nediet sejħa għal proposti biex tappoġġahom fl-implimentazzjoni tar-Regolament. Fl-2022, il-Kummissjoni ħabbret tliet proġetti (ara taħt it-taqsima 4.8.) li bdew il-ħidma tagħhom fl-2023 u diġà taw xi riżultati fl-għoti ta’ appoġġ lil kumpaniji żgħar biex jikkonformaw mar-Regolament.

Il-Kummissjoni nediet proċedimenti ta’ ksur kontra 22-il Stat Membru talli ma nnominawx awtoritajiet kompetenti skont l-Artikolu 12(1) tar-Regolament u talli naqsu milli jikkonformaw mal-obbligi tagħhom skont l-Artikoli 12(2), 12(3) u 18(1) billi bagħtet ittri ta’ intimazzjoni fis-26 ta’ Jannar 2023 5 . Wara t-tnedija ta’ dawn il-proċedimenti ta’ ksur, żdied l-għadd ta’ Stati Membri li jinnotifikaw lill-awtoritajiet kompetenti responsabbli għat-trattament tal-ordnijiet ta’ tneħħija, kif rifless fl-informazzjoni ppubblikata fir-reġistru online 6 . Barra minn hekk, 11 mill-każijiet ta’ ksur miftuħa f’Jannar 2023 ingħalqu sal-21 ta’ Diċembru 2023 7 .

Abbażi tal-informazzjoni li waslet mingħand l-Istati Membri u l-Europol u li saret disponibbli mill-fornituri ta’ servizzi ta’ hosting, il-Kummissjoni vvalutat li l-applikazzjoni tar-Regolament kellha impatt pożittiv fuq il-limitazzjoni tat-tixrid ta’ kontenut terroristiku online.

2.KUNTEST

Ir-Regolament daħal fis-seħħ fis-7 ta’ Ġunju 2022. Dan ifittex li jiżgura l-funzjonament bla xkiel tas-suq uniku diġitali billi jindirizza l-użu ħażin tas-servizzi ta’ hosting għad-disseminazzjoni lill-pubbliku ta’ kontenut terroristiku online. Dan jipprovdi lill-Istati Membri b’għodod immirati, fil-forma ta’ ordnijiet ta’ tneħħija, biex jindirizzaw id-disseminazzjoni ta’ kontenut terroristiku online u jippermetti lill-Istati Membri jitolbu lill-fornituri ta’ servizzi ta’ hosting ta’ kull daqs jieħdu miżuri speċifiċi biex jipproteġu s-servizzi tagħhom mill-isfruttament minn atturi terroristiċi meta jkunu esposti għal kontenut terroristiku.

Barra minn hekk, bid-dħul fis-seħħ tal-Att dwar is-Servizzi Diġitali fis-16 ta’ Novembru 2022, ix-xenarju regolatorju huwa estiż b’leġiżlazzjoni orizzontali b’ambitu wiesa’ bl-għan li jiġi żgurat spazju diġitali aktar sikur għall-konsumaturi, miżuri effettivi biex jiġi miġġieled il-kontenut illegali u kundizzjonijiet ta’ servizz aktar trasparenti. L-Att dwar is-Servizzi Diġitali jgħammar lill-Kummissjoni b’biżżejjed setgħat ta’ superviżjoni, investigazzjoni u infurzar biex tieħu azzjonijiet indirizzati lejn pjattaformi online u magni tat-tiftix kbar ħafna. Dawn l-azzjonijiet jinkludu talbiet għal informazzjoni u investigazzjonijiet dwar azzjonijiet ta’ moderazzjoni tal-kontenut tal-kumpaniji bil-possibbiltà li jiġu imposti multi.

L-Att dwar is-Servizzi Diġitali jippermetti li jiġu indirizzati l-forom kollha ta’ kontenut illegali, u jippermetti lill-Kummissjoni tisfida lill-pjattaformi biex jipprovdu data biex juru li qed jonoraw l-impenji tagħhom stess dwar it-tneħħija tal-kontenut. Filwaqt li r-Regolament dwar il-Kontenut Terroristiku Online jipprovdi għodda saħansitra aktar b’saħħitha għal din il-forma speċifika ta’ kontenut illegali b’obbligu legali li l-kontenut jitneħħa fi żmien siegħa minn meta tasal ordni ta’ tneħħija u mekkaniżmi effettivi ta’ sanzjoni.

Kif enfasizzat mill-Europol fir-Rapport tas-Sitwazzjoni u t-Tendenzi tat-Terroriżmu (Terrorism Situation and Trend Reports, TE-SAT) 8 ippubblikati f’dawn l-aħħar snin, it-terroristi jagħmlu użu estensiv mill-internet biex ixerrdu l-messaġġi tagħhom biex jintimidaw, jirradikalizzaw, jirreklutaw u jiffaċilitaw attakki terroristiċi. Filwaqt li l-miżuri volontarji u r-rakkomandazzjonijiet mhux vinkolanti taw il-frott biex titnaqqas id-disponibbiltà ta’ kontenut terroristiku online, il-limitazzjonijiet inkluż l-għadd żgħir ta’ fornituri ta’ servizzi ta’ hosting li jadottaw mekkaniżmi volontarji 9 kif ukoll il-frammentazzjoni tar-regoli proċedurali fl-Istati Membri kollha llimitaw l-effettività u l-effiċjenza tal-kooperazzjoni fost l-Istati Membri u l-fornituri ta’ servizzi ta’ hosting u għamluha neċessarja li jiġu stabbiliti miżuri regolatorji. 10 Għalhekk, l-applikazzjoni effettiva tar-Regolament hija kruċjali biex tiġi indirizzata d-disseminazzjoni ta’ kontenut terroristiku online. Il-Kummissjoni appoġġat b’mod proattiv lill-awtoritajiet nazzjonali kompetenti f’dan il-proċess.

Skont l-Artikolu 22 tar-Regolament, il-Kummissjoni kellha l-obbligu li tippreżenta rapport dwar l-applikazzjoni tar-Regolament (“rapport ta’ implimentazzjoni”) lill-Parlament Ewropew u lill-Kunsill sas-7 ta’ Ġunju 2023, li jibni fuq l-informazzjoni pprovduta mill-Istati Membri, li min-naħa tagħha kienet tiddependi parzjalment fuq l-informazzjoni pprovduta mill-fornituri ta’ servizzi ta’ hosting (l-Artikolu 21). Id-dewmien fil-preżentazzjoni tar-rapport ta’ implimentazzjoni huwa dovut minn naħa għat-trażmissjoni tardiva lill-Kummissjoni ta’ informazzjoni ewlenija mill-Istati Membri u mill-fornituri ta’ servizzi ta’ hosting. Min-naħa l-oħra, tqies importanti li fir-rapport ta’ implimentazzjoni jiġi rifless l-użu tal-PERCI, li sar operattiv fit-3 ta’ Lulju 2023 u minn dak iż-żmien intuża għall-ipproċessar tal-ordnijiet ta’ tneħħija skont ir-Regolament.

Dan ir-rapport ta’ implimentazzjoni għandu biss l-għan li jagħti ħarsa ġenerali fattwali lejn il-kwistjonijiet rilevanti relatati mal-applikazzjoni tar-Regolament. Ma fih l-ebda interpretazzjoni tar-Regolament u ma jesprimi l-ebda opinjoni dwar l-interpretazzjonijiet jew miżuri oħra meħuda fl-applikazzjoni tar-Regolament.

F’konformità mal-Artikolu 21(2) tar-Regolament, il-Kummissjoni kellha tistabbilixxi sal-istess data (is-7 ta’ Ġunju 2023) programm dettaljat għall-monitoraġġ tal-outputs, tar-riżultati u tal-impatti tar-Regolament. B’mod aktar speċifiku, jenħtieġ li l-programm ta’ monitoraġġ jistabbilixxi l-indikaturi, il-mezzi u l-intervalli li fihom għandhom jinġabru d-data u evidenza oħra meħtieġa. Dan il-programm huwa stabbilit fid-Dokument ta’ Ħidma tal-Persunal li jakkumpanjah. Dan jispeċifika l-azzjonijiet li għandhom jittieħdu mill-Kummissjoni u mill-Istati Membri fil-ġbir u fl-analiżi tad-data u ta’ evidenza oħra biex jimmonitorjaw il-progress u l-impatti tar-Regolament u biex iwettqu evalwazzjoni tar-Regolament skont l-Artikolu 23 tiegħu.

3.L-OBJETTIV U L-METODOLOĠIJA TAR-RAPPORT

L-objettiv ta’ dan ir-rapport huwa li jivvaluta l-applikazzjoni tar-Regolament u x’kien l-impatt tiegħu s’issa fil-limitazzjoni tad-disseminazzjoni ta’ kontenut terroristiku online. Dan jinkludi azzjonijiet meħuda mill-Istati Membri u l-fornituri ta’ servizzi ta’ hosting, bħal emendi fit-termini ta’ servizz u l-linji gwida tagħhom tal-komunità u l-konformità u r-rispons tagħhom għall-ordnijiet ta’ tneħħija.

Għal dan l-għan, il-Kummissjoni ġabret informazzjoni mill-Istati Membri, mill-Unità ta’ Indikazzjoni ta’ Kontenut fuq l-Internet (EU IRU) u mill-fornituri ta’ servizzi ta’ hosting tal-Europol, inkluża informazzjoni li tinsab fir-rapporti ta’ trasparenza u monitoraġġ skont l-Artikoli 7, 8 u 21 tar-Regolament. L-informazzjoni skont l-Artikoli 8 u 21 waslet minn 18-il Stat Membru. L-informazzjoni dwar l-azzjonijiet meħuda mill-fornituri ta’ servizzi ta’ hosting inġabret permezz tar-rapporti annwali tagħhom dwar it-trasparenza, l-Europol, u permezz ta’ komunikazzjoni volontarja diretta mas-servizzi tal-Kummissjoni. Dan ir-rapport ta’ implimentazzjoni jinkludi informazzjoni li waslet għand il-Kummissjoni sal-31 ta’ Diċembru 2023.

Obbligi ta’ monitoraġġ u trasparenza (l-Artikoli 21, 7 u 8)

Għall-istabbiliment tar-rapport ta’ implimentazzjoni, skont l-Artikolu 21(1) tar-Regolament, l-Istati Membri huma obbligati jiġbru informazzjoni mill-awtoritajiet kompetenti tagħhom u mill-fornituri ta’ servizzi ta’ hosting taħt il-ġuriżdizzjoni tagħhom u jibagħtu lill-Kummissjoni sal-31 ta’ Marzu ta’ kull sena. Dan jinkludi informazzjoni dwar l-azzjonijiet li jkunu ħadu f’konformità mar-Regolament fis-sena kalendarja preċedenti. L-Artikolu 21(1) jirreferi għat-tip ta’ informazzjoni li l-Istati Membri jenħtieġ li jiġbru dwar il-miżuri meħuda biex jikkonformaw mar-Regolament, bħad-dettalji dwar l-ordnijiet ta’ tneħħija, l-għadd ta’ talbiet għall-aċċess għall-kontenut ippreservati biex ikunu jistgħu jsiru investigazzjonijiet, proċeduri ta’ lment, stħarriġ amministrattiv u ġudizzjarju.

Skont l-Artikolu 7(1) tar-Regolament, il-fornituri ta’ servizzi ta’ hosting għandhom jistabbilixxu b’mod ċar, fit-termini u l-kundizzjonijiet tagħhom, il-politika tagħhom għall-indirizzar tad-disseminazzjoni ta’ kontenut terroristiku, inkluż, fejn xieraq, spjegazzjoni sinifikanti tal-funzjonament ta’ miżuri speċifiċi.

Barra minn hekk, skont l-Artikolu 7(2) tar-Regolament, fornitur ta’ servizzi ta’ hosting li jkun ħa azzjoni biex jindirizza d-disseminazzjoni ta’ kontenut terroristiku jew li jkun intalab jieħu azzjoni skont ir-Regolament f’sena kalendarja partikolari, għandu jirrendi disponibbli għall-pubbliku rapport ta’ trasparenza dwar dawk l-azzjonijiet għal dik is-sena. Jenħtieġ li dan ir-rapport jiġi ppubblikat qabel l-1 ta’ Marzu tas-sena ta’ wara.

L-Artikolu 7(3) tar-Regolament jistabbilixxi l-informazzjoni minima li dawn ir-rapporti ta’ trasparenza jenħtieġ li jinkludu, bħal miżuri meħuda biex jiġi identifikat u diżattivat l-aċċess għal kontenut terroristiku, l-għadd ta’ oġġetti mneħħija u / jew imdaħħla mill-ġdid u l-eżitu tal-ilmenti.

Skont l-Artikolu 8 tar-Regolament, l-awtoritajiet kompetenti maħtura tal-Istati Membri għandhom jippubblikaw rapporti annwali ta’ trasparenza dwar l-attivitajiet tagħhom skont ir-Regolament. L-Artikolu 8(1) jirreferi għall-informazzjoni minima li dawn ir-rapporti jeħtieġ li jinkludu. 11

Mill-31 ta’ Diċembru 2023, tmintax-il Stat Membru bagħtu informazzjoni lill-Kummissjoni dwar l-azzjonijiet tagħhom meħuda f’konformità mar-Regolament, filwaqt li tlieta u għoxrin Stat Membru ħatru awtorità / awtoritajiet bis-setgħa li joħorġu ordnijiet ta’ tneħħija kif stabbilit fir-Regolament.

4.PUNTI SPEĊIFIĊI TA’ VALUTAZZJONI

4.1.    ORDNIJIET TA’ TNEĦĦIJA (l-Artikolu 3)

B’kollox, mill-31 ta’ Diċembru 2023, il-Kummissjoni ġiet infurmata dwar mill-inqas 349 ordni ta’ tneħħija mibgħuta lil Telegram, Meta, Justpaste.it, TikTok, DATA ROOM S.R.L., FLOKINET S.R.L., Archive.org, Soundcloud, X, Jumpshare.com, Krakenfiles.com, Top4Top.net u Catbox mill-awtoritajiet kompetenti ta’ Spanja, tar-Rumanija, ta’ Franza, tal-Ġermanja, tal-Awstrija u taċ-Ċekja.

Intbagħtu tnejn u sittin ordni ta’ tneħħija mill-awtorità kompetenti Spanjola - CITCO (Centro de Inteligencia contra el Terrorismo y el Crimen Organizado), filwaqt li l-awtorità kompetenti Rumena (ANCOM — (ANCOM – Autoritatea Națională pentru Administrare și Reglementare în Comunicații) bagħtet żewġ ordnijiet ta’ tneħħija u l-awtorità kompetenti Franċiża (OCLCTIC – L’Office central de lutte contre la criminalité liée aux technologies de l'information et de la communication) bagħtet sitta u għoxrin ordni ta’ tneħħija. Mill-attakk terroristiku mwettaq mill-Ħamas kontra l-Iżrael, l-awtorità kompetenti Ġermaniża (BKA – Bundeskriminalamt) bagħtet 249 ordni ta’ tneħħija.

L-awtorità kompetenti Spanjola bagħtet tnejn u sittin ordni ta’ tneħħija: tmintax qabel it-tnedija tal-PERCI u erbgħa u erbgħin permezz tal-PERCI. Hija pprovdiet deskrizzjoni dettaljata tat-trażmissjoni tal-ewwel ordnijiet ta’ tneħħija maħruġa u s-segwitu tagħhom, li hija rilevanti ħafna biex jinftiehmu aħjar l-implikazzjonijiet u l-effetti tar-Regolament.

L-ewwel żewġ ordnijiet ta’ tneħħija nħarġu mill-awtorità kompetenti Spanjola fl-24 ta’ April 2023. 12 Dawn kienu relatati ma’ żewġ biċċiet ta’ kontenut terroristiku, waħda dwar it-terroriżmu tal-lemin u l-oħra dwar il-ġiħadiżmu. Il-kontenut li kien soġġett għall-ewwel ordni ta’ tneħħija kien dokument PDF ippubblikat fuq kanal Telegram b’aċċess illimitat, li kien favur vjolenza terroristika u attakki terroristiċi glorifikati tal-lemin. Il-biċċa ta’ kontenut terroristiku soġġetta għat-tieni ordni ta’ tneħħija kienet vidjo li fih immaġnijiet ta’ ġiħadisti mill-hekk imsejħa organizzazzjoni terroristika f’taqbid tal-Istat Iżlamiku mtella’ fuq l-Arkivju tal-Internet. Dawn iż-żewġ biċċiet ta’ kontenut tneħħew miż-żewġ pjattaformi f’inqas minn siegħa, u b’hekk f’konformità mal-Artikolu 3(3) tar-Regolament. Fil-valutazzjoni pprovduta mill-awtoritajiet Spanjoli ġie spjegat li huma kienu għażlu ordni ta’ tneħħija aktar milli riferiment għal żewġ raġunijiet ewlenin: il-konformità mar-rekwiżiti fir-Regolament dwar l-ordnijiet ta’ tneħħija u l-urġenza. L-awtorità kompetenti Spanjola mbagħad bagħtet aktar ordnijiet ta’ tneħħija.

L-awtorità Spanjola enfasizzat l-isfidi relatati mal-użu ta’ formola web minn fornitur wieħed ta’ servizzi ta’ hosting (Meta) biex jirċievi ordnijiet ta’ tneħħija minflok ma jipprovdi punt ta’ kuntatt dirett. Din il-formola web wasslet ukoll għal problemi ta’ komunikazzjoni mal-awtorità kompetenti tal-Istat Membru fejn jinsab l-istabbiliment ewlieni tal-fornitur ta’ servizzi ta’ hosting.

L-awtorità kompetenti Franċiża ħarġet l-ewwel ordni ta’ tneħħija tagħha fit-13 ta’ Lulju 2023 lil pjattaforma ta’ kondiviżjoni (Justpaste.it), li neħħiet il-kontenut terroristiku fi żmien siegħa. Il-kontenut immirat kien propaganda mill-Al-Qaeda, b’mod aktar speċifiku mill-korp tal-media Rikan Ka Mimber tal-fergħa Indjana tagħha Al-Qaeda fis-Subkontinent Indjan (AQIS). It-tneħħija sħiħa tal-kontenut ġiet ikkonfermata fil-pjattaforma PERCI tal-Europol.

L-awtorità kompetenti Ġermaniża ħarġet sitt, sittax u ħames ordnijiet ta’ tneħħija fis-16, it-18 u l-24 ta’ Ottubru 2023 rispettivament immirati lejn propaganda mill-Ħamas u l-Ġiħad Iżlamika tal-Palestina. L-aċċess għall-kontenut ġie mblukkat fl-UE f’konformità mal-Artikolu 3(3) tar-Regolament. L-awtorità kompetenti Ġermaniża l-ewwel bagħtet riferimenti u sussegwentement ħarġet ordnijiet ta’ tneħħija peress li dawn ir-riferimenti ma ttieħdux azzjoni dwarhom. Wara l-attakk tal-Ħamas fis-7 ta’ Ottubru 2023, l-awtorità kompetenti Ġermaniża bagħtet 249 ordni ta’ tneħħija l-aktar lil Telegram. 13

L-awtorità kompetenti Ċeka u l-awtorità kompetenti Awstrijaka ħarġu żewġ u tmien ordnijiet ta’ tneħħija, lil X u lil Telegram rispettivament.

Fir-rigward tal-użu ta’ formola web biex tirċievi ordnijiet ta’ tneħħija minn fornitur wieħed ta’ servizzi ta’ hosting, l-awtoritajiet Spanjoli indikaw żewġ kwistjonijiet: (1) fil-kuntest tal-Artikolu 3(2) tar-Regolament, formola web ma tippermettix lill-awtoritajiet kompetenti tal-Istati Membri jibagħtu informazzjoni dwar il-proċeduri u l-iskadenzi applikabbli qabel ma joħorġu l-ewwel ordni ta’ tneħħija lill-fornitur ta’ servizzi ta’ hosting; (2) fil-kuntest tal-Artikolu 4(1), formola web ma tippermettix li tiġi ppreżentata kopja tal-ordni ta’ tneħħija simultanjament lill-awtorità kompetenti tal-Istat Membru fejn il-fornitur ta’ servizzi ta’ hosting ikollu l-istabbiliment ewlieni tiegħu u lir-rappreżentant legali tal-fornitur ta’ servizzi ta’ hosting.

4.2    ORDNIJIET TA’ TNEĦĦIJA TRANSFRUNTIERA (l-Artikolu 4)

Għall-ewwel żewġ ordnijiet ta’ tneħħija maħruġa f’April 2023, l-awtorità kompetenti Spanjola ma setgħetx tibgħat kopji lill-awtorità tal-Istat Membru fejn il-fornitur ta’ servizzi ta’ hosting kellu l-istabbiliment ewlieni tiegħu jew ir-rappreżentant legali tiegħu, peress li l-ebda wieħed miż-żewġ fornituri ta’ servizzi ta’ hosting ma kellu, dak iż-żmien, l-istabbiliment ewlieni tiegħu jew ħatar rappreżentant legali fl-UE. Għall-ordnijiet ta’ tneħħija sussegwenti, l-awtorità kompetenti Spanjola bagħtet kopji lill-awtorità kompetenti tal-Istat Membru fejn il-fornitur ta’ servizzi ta’ hosting kellu l-istabbiliment ewlieni tiegħu jew kien ħatar ir-rappreżentant legali tiegħu.

It-trażmissjoni ta’ ordnijiet ta’ tneħħija lil fornituri ta’ servizzi ta’ hosting ibbażati f’pajjiżi terzi li għadhom ma ssodisfawx l-obbligu tagħhom li jaħtru rappreżentanza legali fl-UE ġiet irrapportata bħala sfida mill-Istati Membri. F’dan il-kuntest, il-Kummissjoni appoġġat lill-Istati Membri biex jiżguraw li l-fornituri ta’ servizzi ta’ hosting jikkonformaw mal-obbligu tagħhom li jaħtru rappreżentant legali fl-UE u li jipprovdu punt ta’ kuntatt (l-Artikolu 15(1) tar-Regolament), bħal indirizz tal-posta elettronika, biex tiġi żgurata azzjoni immedjata. Barra minn hekk, il-Kummissjoni fakkret lill-fornituri ta’ servizzi ta’ hosting dwar l-obbligi tagħhom f’fora differenti, inkluż fil-Forum tal-UE dwar l-Internet.

Skont l-informazzjoni disponibbli għall-Kummissjoni, l-ebda awtorità kompetenti tal-Istat Membru li fih l-HSP għandu l-istabbiliment ewlieni tiegħu s’issa ma skrutinizzat ordni ta’ tneħħija skont l-Artikolu 4 tar-Regolament biex tiddetermina jekk kisritx serjament jew manifestament ir-Regolament jew id-drittijiet u l-libertajiet fundamentali peress li għadha ma tressqet l-ebda talba motivata għal skrutinju. Bħala konsegwenza, sa issa, l-ebda awtorità ma sabet li kwalunkwe ordni ta’ tneħħija kisret dan ir-Regolament jew id-drittijiet fundamentali b’dak il-mod.

S’issa l-ebda HSP ma reġa’ daħħal il-kontenut (jew l-aċċess għalih) li kien soġġett għal ordni ta’ tneħħija skont l-iskrutinju f’konformità mal-Artikolu 4 tar-Regolament, minħabba li tali skrutinju u talbiet għal riintegrazzjoni għadhom ma sarux. Għalhekk, ma hemm l-ebda informazzjoni disponibbli dwar kemm normalment jieħu żmien biex jerġa’ jiddaħħal il-kontenut jew l-aċċess għalih, jew dwar il-“miżuri meħtieġa” meħuda mill-HSPs biex jerġa’ jiddaħħal il-kontenut jew l-aċċess għall-kontenut.

4.3.    RIMEDJI (l-Artikolu 9)

Skont l-informazzjoni disponibbli għall-Kummissjoni, il-fornituri ta’ servizzi ta’ hosting s’issa ma kkontestawx ordnijiet jew deċiżjonijiet ta’ tneħħija skont l-Artikolu 5(4) quddiem il-qrati rilevanti. Madankollu, fornitur wieħed ta’ servizzi ta’ hosting argumenta dwar l-impossibbiltà li tiġi eżegwita ordni ta’ tneħħija.

Skont l-informazzjoni pprovduta mill-Istati Membri, 14 mill-inqas tnax-il Stat Membru għandhom “proċeduri effettivi” fis-seħħ sabiex il-fornituri ta’ servizzi ta’ hosting u l-fornituri tal-kontenut ikunu jistgħu jikkontestaw ordni ta’ tneħħija maħruġa u / jew deċiżjoni meħuda skont l-Artikolu 4(4) jew l-Artikolu 5(4), (6) jew (7) quddiem il-qrati tal-awtorità kompetenti ta’ dawk l-Istati Membri (l-Artikolu 9(1) u (2)). Fl-Istati Membri fejn dawn il-proċeduri huma fis-seħħ, tali proċeduri jirreferu l-aktar għall-kawżi. Madankollu, jekk dawn il-proċeduri humiex “effettivi” jew speċifiċi għar-Regolament ma jistax jiġi aċċertat bid-data attwali riċevuta mill-Istati Membri, minħabba l-fatt li s’issa ma kien hemm l-ebda deċiżjoni li ġiet ikkontestata.

4.4.    MIŻURI SPEĊIFIĊI U TRASPARENZA RELATATA (l-Artikoli 5 u 7)

Skont l-informazzjoni disponibbli, sal-lum, l-ebda fornitur ta’ servizzi ta’ hosting ma nstab li huwa espost għal kontenut terroristiku fl-ambitu tal-Artikolu 5(4) tar-Regolament. Għaldaqstant, ir-rekwiżit li jittieħdu l-miżuri speċifiċi stabbilit f’dak l-artikolu (għadu) ma japplika għall-ebda fornitur ta’ servizzi ta’ hosting.

Jista’ madankollu jiġi nnotat li, skont ir-rapporti ta’ trasparenza pprovduti mill-fornituri ta’ servizzi ta’ hosting, diversi fornituri ta’ servizzi ta’ hosting ħadu miżuri biex jindirizzaw l-użu ħażin tas-servizzi tagħhom għad-disseminazzjoni ta’ kontenut terroristiku, b’mod partikolari l-adozzjoni ta’ termini u kundizzjonijiet speċifiċi u l-applikazzjoni ta’ dispożizzjonijiet u miżuri oħra biex jiġi limitat it-tixrid ta’ kontenut terroristiku. Kif innotat hawn fuq, skont l-Artikolu 7, il-fornituri ta’ servizzi ta’ hosting iridu jiżguraw it-trasparenza f’dan ir-rigward mhux biss permezz ta’ rapportar ta’ trasparenza, iżda wkoll billi jinkludu informazzjoni ċara fit-termini u l-kundizzjonijiet tagħhom.

4.5.    THEDDIDA IMMINENTI GĦALL-ĦAJJA (l-Artikolu 14(5))

Skont l-Artikolu 14(5) tar-Regolament, meta l-fornituri ta’ servizzi ta’ hosting isiru konxji ta’ kontenut terroristiku li jinvolvi theddida imminenti għall-ħajja, huma għandhom jinfurmaw minnufih lill-awtoritajiet kompetenti għall-investigazzjoni u l-prosekuzzjoni ta’ reati kriminali fl-Istati Membri kkonċernati. Fejn ma jkunx possibbli li jiġu identifikati l-Istati Membri kkonċernati, il-fornitur ta’ servizzi ta’ hosting għandu jibgħat l-informazzjoni lill-Europol għal segwitu xieraq.

Sal-31 ta’ Diċembru 2023, il-Kummissjoni ġiet infurmata dwar disa’ każijiet li fihom l-Unità ta’ Indikazzjoni ta’ Kontenut fuq l-Internet tal-Europol irċeviet informazzjoni dwar kontenut terroristiku li jinvolvi theddida imminenti għall-ħajja. Peress li l-Artikolu 14(5) tar-Regolament ma jipprevedix obbligu li l-Europol tiġi infurmata fil-każijiet kollha, l-għadd ta’ notifiki jista’ jkun ogħla. L-uniku Stat Membru li pprovda informazzjoni dwar l-applikazzjoni tal-Artikolu 14(5) kien Spanja. Fit-18 ta’ April 2023, l-awtoritajiet ta’ Spanja rċevew komunikazzjoni minn Amazon dwar allegat kontenut terroristiku li jinvolvi theddida imminenti għall-ħajja fuq il-pjattaforma tal-videogaming Twitch. Il-kontenut ġie vvalutat li ma jikkorrispondix mal-kundizzjonijiet għal kontenut terroristiku li jinvolvi theddida imminenti għall-ħajja fl-ambitu tar-Regolament.

4.6.    KOOPERAZZJONI BEJN IL-FORNITURI TA’ SERVIZZI TA’ HOSTING, L-AWTORITAJIET KOMPETENTI U L-EUROPOL (L-Artikolu 14)

Kif imsemmi hawn fuq, l-Europol żviluppat pjattaforma msejħa “PERCI” biex tappoġġa l-implimentazzjoni tar-Regolament billi tiċċentralizza, tikkoordina u tiffaċilita t-trażmissjoni ta’ ordnijiet ta’ tneħħija u riferimenti mill-Istati Membri lill-fornituri ta’ servizzi ta’ hosting. Il-pjattaforma ilha operattiva mit-3 ta’ Lulju 2023. Qabel l-implimentazzjoni sħiħa tal-PERCI, l-Europol kienet stabbiliet arranġamenti ta’ kontinġenza biex tappoġġa t-trażmissjoni manwali ta’ ordnijiet ta’ tneħħija, it-tneħħija tal-konfużjoni tal-kontenut biex tiġi evitata interferenza ma’ investigazzjonijiet li għaddejjin u rispons għall-kriżijiet f’sitwazzjonijiet ta’ “theddida imminenti għall-ħajja”.

PERCI hija sistema unika li tippermetti l-kooperazzjoni fost l-awtoritajiet kompetenti, il-fornituri ta’ servizzi ta’ hosting u l-Europol, kif previst fl-Artikolu 14 tar-Regolament fir-rigward ta’ kwistjonijiet koperti mir-Regolament. B’mod aktar konkret, PERCI:

·hija soluzzjoni bbażata fuq il-cloud imfassla biex tiżgura s-sigurtà u l-protezzjoni tad-data fil-cloud;

·hija pjattaforma unika għall-komunikazzjoni u l-koordinazzjoni kollaborattivi u f’ħin reali, li tappoġġa t-tneħħija rapida ta’ kontenut terroristiku;

·tiffaċilita l-proċess ta’ skrutinju dwar l-ordnijiet ta’ tneħħija transfruntiera;

·isaħħaħ it-tneħħija tal-konfużjoni, li hija importanti biex jiġi evitat li awtorità kompetenti ta’ Stat Membru tibgħat ordni ta’ tneħħija mmirata lejn kontenut soġġett għal investigazzjoni li tkun għaddejja fi Stat Membru ieħor;

·tippermetti lill-fornituri ta’ servizzi ta’ hosting jirċievu ordnijiet ta’ tneħħija b’mod unifikat u standardizzat minn kanal wieħed.

Separatament, il-PERCI tippermetti wkoll it-trażmissjoni ta’ riferimenti.

Bħalissa, minbarra r-rilevanza tagħha b’rabta mar-riferimenti (ara l-Premessa 40 tar-Regolament), il-PERCI tiffaċilita t-trażmissjoni ta’ ordnijiet ta’ tneħħija (l-Artikoli 3 u 4), ir-rapportar tal-Istati Membri (l-Artikolu 8) u l-koordinazzjoni, kif ukoll it-tneħħija tal-konfużjoni f’każ ta’ kunflitt ma’ investigazzjonijiet li jkunu għaddejjin dwar il-kontenut li għalih tkun maħsuba li tintbagħat ordni ta’ tneħħija (l-Artikolu 14). Bħalissa l-PERCI għaddejja minn żviluppi ulterjuri biex tappoġġa kompiti addizzjonali li jirriżultaw mir-Regolament, bħall-iskrutinju ta’ ordnijiet ta’ tneħħija transfruntiera (l-Artikolu 4) 15 .

L-Istati Membri kkonfermaw li skont l-Artikolu 14 tar-Regolament:

·l-awtoritajiet kompetenti jiskambjaw informazzjoni, jikkoordinaw u jikkooperaw ma’ awtoritajiet kompetenti oħra;

·l-awtoritajiet kompetenti jiskambjaw informazzjoni, jikkoordinaw u jikkooperaw mal-Europol;

·hemm mekkaniżmi fis-seħħ biex tissaħħaħ il-kooperazzjoni filwaqt li tiġi evitata l-interferenza ma’ investigazzjonijiet li jseħħu fi Stati Membri oħra;

·il-biċċa l-kbira tal-Istati Membri jqisu l-PERCI bħala l-għodda ppreferuta li għandha tintuża għat-trażmissjoni tal-ordnijiet ta’ tneħħija, peress li tippermetti l-koordinazzjoni tal-azzjoni permezz tat-tneħħija tal-konfużjoni.

4.7.     EFFETTI FUQ IR-RIFERIMENTI

Ir-riferimenti ta’ kontenut terroristiku huma għodda volontarja li diġà ntużat qabel l-adozzjoni tar-Regolament. Filwaqt li r-Regolament ma fih l-ebda regola partikolari dwar ir-riferimenti, f’konformità mal-Premessa 40 tiegħu, xejn fir-Regolament ma jipprekludi lill-Istati Membri u lill-Europol milli jużaw riferimenti bħala strument biex jindirizzaw kontenut terroristiku online.

Sa mit-twaqqif tagħha fl-2015, l-Unità ta’ Indikazzjoni ta’ Kontenut fuq l-Internet tal-UE fl-Europol kienet attiva fl-identifikazzjoni ta’ kontenut terroristiku online u fir-referenza tiegħu għall-fornituri ta’ servizzi ta’ hosting, kif ukoll fl-istabbiliment ta’ għodod (jiġifieri PERCI u preċedentement IRMA 16 ) biex tiġi ffaċilitata t-trażmissjoni ta’ riferimenti.

Skont l-informazzjoni pprovduta lill-Kummissjoni, l-awtoritajiet tal-Istati Membri jkomplu jużaw riferimenti ma’ ċerti fornituri ta’ servizzi ta’ hosting, filwaqt li jistgħu jikkunsidraw li joħorġu ordnijiet ta’ tneħħija lil fornituri ta’ servizzi ta’ hosting li ma jkunux qed iwieġbu għal riferimenti jew għal raġunijiet oħra bħall-urġenza li jitneħħa l-kontenut.

4.8.    APPOĠĠ LIL FORNITURI IŻGĦAR TA’ SERVIZZI TA’ HOSTING GĦALL-IMPLIMENTAZZJONI TAR-REGOLAMENT

Ir-Regolament fih diversi obbligi għall-fornituri ta’ servizzi ta’ hosting. Filwaqt li fornituri kbar ta’ servizzi ta’ hosting tipikament ikollhom il-kapaċitajiet tekniċi, il-kapaċità ta’ verifika umana u l-għarfien biex jimplimentaw ir-Regolament, dawk żgħar jista’ jkollhom riżorsi finanzjarji, tekniċi u umani u għarfien espert aktar limitati għal dak l-għan. Fl-istess ħin, fornituri iżgħar ta’ servizzi ta’ hosting qed ikunu dejjem aktar fil-mira ta’ atturi malizzjużi biex jisfruttaw is-servizzi tagħhom. Dan jista’ jiġi attribwit ukoll għal sforzi effettivi ta’ moderazzjoni tal-kontenut minn fornituri akbar ta’ servizzi ta’ hosting. Filwaqt li din ix-xejra turi s-suċċess tal-miżuri ta’ moderazzjoni tal-kontenut, hija tenfasizza wkoll il-ħtieġa li jiġu appoġġati fornituri iżgħar ta’ servizzi ta’ hosting biex iżidu l-kapaċità u l-għarfien tagħhom biex jikkonformaw mar-rekwiżiti tar-Regolament.

Biex twieġeb għal din l-isfida, il-Kummissjoni nediet sejħa għal proposti skont il-Fond għas-Sigurtà Interna biex tappoġġa fornituri iżgħar ta’ servizzi ta’ hosting fl-implimentazzjoni tar-Regolament 17 . Il-Kummissjoni għażlet tliet proġetti 18 biex tappoġġahom b’approċċ triplu. L-ewwel nett, billi tinforma u żżid is-sensibilizzazzjoni dwar ir-regoli u r-rekwiżiti tar-Regolament, it-tieni billi tiżviluppa, timplimenta u tintroduċi l-għodod u l-oqfsa meħtieġa biex jiġi indirizzat id-disseminazzjoni ta’ kontenut terroristiku online, u t-tielet billi jiġu kondiviżi l-esperjenzi u l-aħjar prattiki fl-industrija kollha.

It-tliet proġetti bdew il-ħidma tagħhom fl-2023 u diġà taw riżultati siewja. Pereżempju, fir-rapport ta’ mmappjar tiegħu, il-proġett FRISCO 19 sab li l-fornituri mikro u żgħar ta’ servizzi ta’ hosting għandhom it-tendenza li jkollhom sensibilizzazzjoni u għarfien limitati ħafna tar-Regolament u enfasizza d-diffikultajiet potenzjali li jistgħu jiffaċċjaw biex jirrispondu għal ordnijiet ta’ tneħħija fi żmien siegħa, peress li spiss ma jkollhomx servizzi 24/7. In-nuqqas ta’ riżorsi huwa sfida, kif ukoll l-istabbiliment ta’ linji ta’ komunikazzjoni mal-aġenziji tal-infurzar tal-liġi. Aktar minn nofs il-fornituri ta’ servizzi ta’ hosting mistħarrġa mill-kuntratturi ma jimmoderawx il-kontenut iġġenerat mill-utenti u ddikjaraw li qatt ma ltaqgħu ma’ kontenut terroristiku fuq il-pjattaformi tagħhom. Dawn il-fornituri ta’ servizzi ta’ hosting x’aktarx li jieħdu miżuri ad hoc jekk tali kontenut jidher fuq il-pjattaformi tagħhom.

Permezz ta’ dawn it-tliet proġetti, il-fornituri żgħar ta’ servizzi ta’ hosting qed jiġu appoġġati fl-isforzi tagħhom biex jikkonformaw mar-regoli tar-Regolament anke billi jistabbilixxu punti ta’ kuntatt u jimplimentaw mekkaniżmi għall-ilmenti tal-utenti.

Barra minn hekk, l-Artikolu 3(2) tar-Regolament - li jirrikjedi l-għoti f’waqtu ta’ informazzjoni dwar il-proċeduri u l-iskadenzi applikabbli lill-fornituri ta’ servizzi ta’ hosting li ma tkun inħarġitilhom l-ebda ordni ta’ tneħħija preċedenti - jista’ jkun ta’ rilevanza b’mod partikolari għal fornituri iżgħar ta’ servizzi ta’ hosting.

4.9.     SALVAGWARDJI TAD-DRITTIJIET FUNDAMENTALI

Ir-Regolament jinkludi diversi salvagwardji biex jissaħħu r-responsabbiltà u t-trasparenza dwar il-miżuri meħuda biex jitneħħa l-kontenut terroristiku online. F’dan ir-rigward, qed issir referenza għal dak li ntqal hawn fuq, b’mod partikolari l-informazzjoni pprovduta dwar ir-rimedji, ir-rapportar u l-mekkaniżmu speċjali għal ordnijiet ta’ tneħħija transfruntiera.

Barra minn hekk, l-Artikolu 23 tar-Regolament jirrikjedi li l-Kummissjoni tirrapporta dwar il-funzjonament u l-effettività tal-mekkaniżmi ta’ salvagwardja, b’mod partikolari dawk previsti fl-Artikolu 4(4), l-Artikolu 6(3) u l-Artikoli 7 sa 11 fil-kuntest tal-evalwazzjoni tar-Regolament. Tali salvagwardji jikkonċernaw ilmenti, rimedji, u mekkaniżmi ta’ penali adottati u implimentati kontra r-riskju ta’ tneħħija żbaljata ta’ kontenut terroristiku online biex jiġu protetti l-fornituri tal-kontenut u l-fornituri ta’ servizzi ta’ hosting. Il-valutazzjoni tal-funzjonament u l-effettività tal-mekkaniżmi ta’ salvagwardja għalhekk se jkunu parti mill-evalwazzjoni skont l-Artikolu 23.

F’dan ir-rigward, fil-programm għall-monitoraġġ imsemmi fl-Artikolu 21(2) tar-Regolament, qed jiġi pprovdut qafas ta’ indikaturi għall-evalwazzjoni tal-effetti tar-Regolament fuq id-drittijiet fundamentali, li se jikkontribwixxi għall-evalwazzjoni tar-Regolament.

Il-programm ta’ monitoraġġ se jappoġġa l-valutazzjoni, li għandha titwettaq bħala parti mill-evalwazzjoni, tal-funzjonament u l-effettività tal-mekkaniżmi ta’ salvagwardji implimentati fil-kuntest tar-Regolament, u l-impatt tagħhom fuq id-drittijiet fundamentali. Dan il-qasam ta’ impatti jirrifletti ż-żewġ oqsma msemmija fl-Artikolu 23 tar-Regolament: (a) il-funzjonament u l-effettività tal-mekkaniżmi ta’ salvagwardja, b’mod partikolari dawk previsti fl-Artikoli 4(4), 6(3) u 7 sa 11; u (b) l-impatt tal-applikazzjoni ta’ dan ir-Regolament fuq id-drittijiet fundamentali, b’mod partikolari fuq il-libertà ta’ espressjoni u ta’ informazzjoni, ir-rispett għall-ħajja privata u l-protezzjoni tad-data personali.

4.10. AWTORITAJIET KOMPETENTI (l-Artikolu 13)

Skont l-Artikolu 13 tar-Regolament, l-Istati Membri għandhom jiżguraw li l-awtoritajiet kompetenti tagħhom ikollhom is-setgħat meħtieġa u riżorsi suffiċjenti biex jilħqu l-għanijiet u jissodisfaw l-obbligi tagħhom skont ir-Regolament. Xi Stati Membri implimentaw il-miżuri li ġejjin biex jiżguraw li l-awtoritajiet kompetenti jkollhom is-setgħat meħtieġa u r-riżorsi suffiċjenti:

·l-istabbiliment ta’ korpi / Direttorati ġodda;

·l-allokazzjoni ta’ finanzjament addizzjonali u persunal addizzjonali u

·il-ħolqien ta’ oqfsa leġiżlattivi ġodda.

5. KONKLUŻJONI

Huwa importanti ħafna li l-għodod u l-miżuri kollha fil-livell tal-UE jiġu implimentati bis-sħiħ biex jiġi indirizzat malajr il-kontenut illegali mxerred online. Dan huwa speċjalment il-każ fid-dawl tal-iskala kbira ta’ tali kontenut illegali kif rajna reċentement bid-disseminazzjoni ta’ kontenut relatat mal-attakk imwettaq mill-Ħamas kontra l-Iżrael.

Ir-Regolament jikkontribwixxi biex tiżdied is-sigurtà pubblika madwar l-Unjoni biex jiġi evitat li l-fornituri ta’ servizzi ta’ hosting li joperaw fis-suq intern jintużaw mit-terroristi biex ixerrdu l-messaġġi tagħhom biex jintimidaw, jirradikalizzaw, jirreklutaw u jiffaċilitaw attakki terroristiċi.

Wara l-ftuħ ta’ proċedimenti ta’ ksur f’Jannar 2023, inkiseb progress. Mill-31 ta’ Diċembru 2023, tlieta u għoxrin Stat Membru ħatru awtoritajiet kompetenti skont l-Artikolu 12(1) kif rifless fir-reġistru online, li rriżulta f’użu aktar sistematiku tal-miżuri u l-għodod previsti fir-Regolament. Barra minn hekk, ħdax mit-tnejn u għoxrin każ ta’ ksur miftuħa f’Jannar 2023 ingħalqu sa mill-21 ta’ Diċembru 2023. Il-Kummissjoni tħeġġeġ lill-bqija tal-Istati Membri biex jieħdu l-passi meħtieġa sabiex jaħtru l-awtoritajiet kompetenti skont l-Artikolu 12(1) u jikkonformaw mal-obbligi tagħhom skont l-Artikoli 12(2), 12(3) u 18(1).

B’mod ġenerali, l-Istati Membri rrappurtaw trażmissjoni bla xkiel tal-ordnijiet ta’ tneħħija lill-fornituri ta’ servizzi ta’ hosting bl-appoġġ tal-Europol. Abbażi tal-informazzjoni riċevuta mill-Istati Membri u l-Europol, ġew trażmessi 349 ordni ta’ tneħħija ta’ kontenut terroristiku mid-dħul fis-seħħ tar-Regolament. F’għaxar każijiet il-kontenut terroristiku ma tneħħiex / ma ġiex imblukkat minn fornitur wieħed ta’ servizzi ta’ hosting fil-perjodu massimu ta’ siegħa stabbilit mir-Regolament.

Skont l-informazzjoni li waslet mingħand l-Istati Membri u l-Europol, minkejja li r-Regolament ma fih l-ebda regola f’dan ir-rigward, kien hemm żieda fir-rispons għar-riferimenti ta’ kontenut terroristiku mid-dħul fis-seħħ tar-Regolament. Barra minn hekk, l-Europol irċeviet informazzjoni minn fornituri ta’ servizzi ta’ hosting f’disa’ każijiet dwar kontenut terroristiku li jinvolvi theddida imminenti għall-ħajja, skont l-Artikolu 14(5).

Hemm fis-seħħ kanali u proċeduri ta’ komunikazzjoni aktar effiċjenti b’mod partikolari mit-tnedija tal-pjattaforma PERCI fit-3 ta’ Lulju 2023, li wasslet għal approċċ aktar sistematiku għat-trażmissjoni ta’ ordnijiet ta’ tneħħija, filwaqt li l-PERCI qed tintuża wkoll biex tibgħat għadd kbir ta’ riferimenti. L-Istati Membri u l-Europol esprimew l-aspettattiva li l-użu tal-PERCI se jkun ta’ benefiċċju għall-użu ta’ dawn l-istrumenti biex jiġi indirizzat il-kontenut terroristiku online.

Abbażi ta’ dan, il-Kummissjoni tqis li b’mod ġenerali, ir-Regolament kellu impatt pożittiv fuq il-limitazzjoni tat-tixrid ta’ kontenut terroristiku online. Madankollu, f’għaxar każijiet minn 349, il-fornitur fil-mira ta’ servizzi ta’ hosting qabeż il-perjodu massimu ta’ siegħa stabbilit fir-Regolament biex ineħħi l-kontenut terroristiku jew jimblokka l-aċċess għalih.

Il-Kummissjoni qed tappoġġa b’mod proattiv lill-Istati Membri u lill-fornituri ta’ servizzi ta’ hosting, inkluż permezz ta’ workshops tekniċi organizzati qabel u wara d-dħul fis-seħħ tar-Regolament. L-aħħar wieħed sar fl-24 ta’ Novembru 2023. Il-Kummissjoni qed tappoġġa wkoll fornituri iżgħar ta’ servizzi ta’ hosting biex tiżgura l-applikazzjoni sħiħa u rapida tar-Regolament u tgħinhom jindirizzaw l-isfidi li ltaqgħu magħhom s’issa.

Il-Kummissjoni se tkompli timmonitorja l-implimentazzjoni u l-applikazzjoni tar-Regolament. Il-Kummissjoni se tissorvelja mill-qrib il-prestazzjoni tal-istrumenti pprovduti fir-Regolament permezz tal-programm ta’ monitoraġġ, li se jikkontribwixxi għall-evalwazzjoni tar-Regolament skont l-Artikolu 23.

(1)

 Ir-reġistru online, stabbilit mill-Kummissjoni skont l-Artikolu 12(4) tar-Regolament, jelenka l-awtoritajiet kompetenti msemmija fl-Artikolu 12(1) u l-punt ta’ kuntatt maħtur jew stabbilit skont l-Artikolu 12(2) għal kull awtorità kompetenti. Dan jiġi aġġornat regolarment man-notifiki li jaslu mingħand l-Istati Membri. Lista tal-awtorità nazzjonali kompetenti (awtoritajiet) u l-punti ta’ kuntatt (europa.eu).

(2)

  Lista tal-awtorità nazzjonali kompetenti (awtoritajiet) u l-punti ta’ kuntatt .

(3)

Il-PERCI (Plateforme Européenne de Retraits des Contenus illégaux sur Internet) hija pjattaforma għat-tneħħija ta’ kontenut illegali online żviluppata u ġestita mill-Europol. Din tappoġġa l-implimentazzjoni tar-Regolament billi tipprovdi soluzzjoni teknika għall-ipproċessar ta’ riferimenti u ordnijiet ta’ tneħħija lill-fornituri ta’ servizzi ta’ hosting fost funzjonalitajiet oħra.

(4)

Ir-riferimenti huma mekkaniżmu biex il-fornituri ta’ servizzi ta’ hosting jiġu mwissija dwar il-kunsiderazzjoni volontarja tal-fornitur dwar il-kompatibbiltà ta’ dak il-kontenut mat-termini u l-kundizzjonijiet tiegħu stess. Ir-Regolament (il-premessa 40) jiddikjara li r-riferimenti wrew li huma effettivi u jenħtieġ li jibqgħu disponibbli flimkien mal-ordnijiet ta’ tneħħija.

(5)

 Ara l-istqarrija għall-istampa: Kontenut terroristiku online (europa.eu).

(6)

  Lista tal-awtorità nazzjonali kompetenti (awtoritajiet) u l-punti ta’ kuntatt (europa.eu). Hemm informazzjoni dwar 23-il awtorità kompetenti tal-Istati Membri għall-ħruġ ta’ ordnijiet ta’ tneħħija skont l-Artikolu 12(1)(a) fir-reġistru online.

(7)

Il-Finlandja, Malta, iċ-Ċekja, id-Danimarka, ir-Rumanija, l-Iżvezja, il-Latvja, Spanja, il-Litwanja, l-Awstrija u s-Slovakkja.

(8)

It-TE-SAT 2023 tal-Europol https://www.europol.europa.eu/cms/sites/default/files/documents/Europol_TE-SAT_2023.pdf u tal-2022 https://www.europol.europa.eu/cms/sites/default/files/documents/Tesat_Report_2022_0.pdf  

(9)

 Il-Kummissjoni Ewropea, (2018) Valutazzjoni tal-Impatt li takkumpanja l-Proposta għal Regolament dwar il-prevenzjoni tad-disseminazzjoni ta’ kontenut terroristiku online, SWD(2018) 408 final, aċċessata fl-04/05/2023 fuq: https://eur-lex.europa.eu/legal-content/EN/TXT/?uri=SWD:2018:408:FIN .

(10)

 Ibidem. 

(11)

 Ara t-test tar-Regolament (UE) 2021/784, l-Artikolu 8(1)  https://eur-lex.europa.eu/legal-content/MT/TXT/HTML/?uri=CELEX:32021R0784

(12)

  Ministerio del Interior | El CITCO culmina la retirada de Internet de dos contenidos que alentaban al terrorismo

(13)

Skont l-informazzjoni disponibbli għall-Kummissjoni.

(14)

Ta’ min jinnota li l-informazzjoni pprovduta mhijiex neċessarjament kompluta. Ikunu meħtieġa aktar valutazzjonijiet biex tinkiseb ħarsa ġenerali sħiħa u kompletament aġġornata tal-mod li bih l-Istati Membri taw effett lir-rekwiżit li tiġi żgurata d-disponibbiltà ta’ proċeduri effettivi ta’ rimedju.

(15)

 F’aktar dettall: - l-Artikolu 3 u l-Artikolu 4: Trażmissjoni ta’ Ordnijiet ta’ Tneħħija; - l-Artikolu 3(6)-(8): il-feedback tal-fornituri ta’ servizzi ta’ hosting; - l-Artikolu 4(3)-(7): Mekkaniżmu ta’ skrutinju; - l-Artikolu 7: Rapportar; - l-Artikolu 14(1): it-tneħħija tal-konfużjoni, il-koordinazzjoni, l-evitar tad-duplikazzjoni; - l-Artikolu 14(3): Mezz sikur ta’ komunikazzjoni; - l-Artikolu 14(4): L-użu ta’ għodda apposta stabbilita mill-Europol; - l-Artikolu 14(5): Komunikazzjoni dwar “theddida imminenti għall-ħajja”; - Il-Premessa 40: Trażmissjoni ta’ Referimenti.

(16)

L-Europol bniet l-Applikazzjoni għall-Ġestjoni tal-Indikazzjoni ta’ Kontenut fuq l-Internet (IRMA) fl-2016 biex tappoġġa r-riferiment (mmarkar) ta’ kontenut illegali lil Fornituri ta’ Servizzi Online. Inizjalment, ingħata aċċess għall-IRMA lill-persunal tal-Europol u lill-Unitajiet speċjalizzati (IRUs) f’seba’ Stati Membri. IRMA ġiet sostitwita minn PERCI mit-3 ta’ Lulju 2023.

(17)

  https://ec.europa.eu/info/funding-tenders/opportunities/docs/2021-2027/isf/wp-call/2021-2022/call-fiche_isf-2021-ag-tco_en.pdf

(18)

(1) Qafas ibbażat fuq l-IA għall-appoġġ ta’ fornituri mikro (u żgħar) ta’ servizzi ta’ hosting dwar ir-rapport u t-tneħħija ta’ kontenut terroristiku online (ALLIES), (2) il-Ġlieda kontra l-Kontenut terroristiku Online (Fighting terrorist Content Online, Frisco) u (3) it-Teknoloġija Kontra t-Terroriżmu Ewropa (Technology Against Terrorism Europe, TATE). link għal aktar informazzjoni: Finanzjament u offerti (europa.eu).

(19)

 Imwettaq fuq perjodu ta’ sitt xhur li jintemm f’Mejju 2023. Ir-rapport huwa bbażat fuq il-feedback ta’ 48 fornitur Ewropew ta’ servizzi ta’ hosting, 33 tweġiba permezz tal-istħarriġ online tagħna u 15 permezz ta’ intervisti. FRISCO, D2.1: Rapport ta’ mmappjar dwar il-ħtiġijiet u l-ostakli għall-konformità Fehim tal-ħtiġijiet u s-sensibilizzazzjoni tal-fornituri żgħar u mikro ta’ servizzi ta’ hosting fir-rigward tal-implimentazzjoni tar-rekwiżiti tar-Regolament TCO, disponibbli fuq Riżultati | Frisco (friscoproject.eu) .