Back to EUR-Lex homepage

EUR-Lex Access to European Union law

Back to EUR-Lex homepage

This document is an excerpt from the EUR-Lex website

Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search
You are here

Document 52020XC0327(03)

Komunikazzjoni tal-Kummissjoni Linji Gwida tal-Kummissjoni Ewropea: L-iffaċilitar tal-Operazzjonijiet tal-Merkanzija bl-Ajru waqt it-tifqigħa tal-COVID-19 2020/C 100 I/01

C/2020/2010

ĠU C 100I, 27.3.2020, p. 1–4 (BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)

27.3.2020   

MT

Il-Ġurnal Uffiċjali tal-Unjoni Ewropea

CI 100/1

KOMUNIKAZZJONI TAL-KUMMISSJONI

Linji Gwida tal-Kummissjoni Ewropea: L-iffaċilitar tal-Operazzjonijiet tal-Merkanzija bl-Ajru waqt it-tifqigħa tal-COVID-19

(2020/C 100 I/01)

Sommarju

—

Il-merkanzija bl-ajru tammonta għal madwar 35 % tal-kummerċ dinji skont il-valur. Tifforma parti ewlenija mit-trasport tal-merkanzija, billi tikkomplementa kemm it-trasport fuq l-art kif ukoll dak bil-baħar, b’mod partikolari fir-rigward tal-merkanzija li jkun importanti li tasal fil-ħin. Wara t-tifqigħa tal-COVID-19, ġew imposti restrizzjonijiet fuq it-titjiriet u/jew fuq il-moviment tal-passiġġieri u tal-persunal tat-trasport, bil-għan li titrażżan il-pandemija. Għaldaqstant, il-ktajjen tal-provvista Ewropej u globali sfaw imfixkla serjament.

—

Is-servizzi tal-merkanzija bl-ajru kontinwi u mingħajr interruzzjoni huma vitali għall-ekonomija u għall-ġlieda kontra l-COVID-19, u l-ktajjen tal-provvista Ewropej u globali jiddependu fuq it-tħaddim tagħhom mingħajr xkiel. Għalhekk it-trasport tal-merkanzija bl-ajru għandu jkun kapaċi jwassal kontinwament prodotti kritiċi bħall-ikel, il-provvisti mediċi u t-tagħmir ta’ protezzjoni personali (PPE), kif ukoll prodotti oħra li huma vitali għall-funzjonament tal-ktajjen tal-provvista sensittivi.

—

Is-sitwazzjoni straordinarja kkawżata mit-tifqigħa tal-COVID-19 tista’ twassal għall-ħtieġa ta’ kooperazzjoni bejn il-komunità tal-avjazzjoni Ewropea u dik internazzjonali, inkluż il-fornituri tas-servizzi tal-merkanzija bl-ajru u dawk express sabiex ikunu żgurati l-provvista u d-distribuzzjoni ġusta ta’ prodotti skarsi.

—

Bħala parti mill-isforzi ġenerali tal-UE biex iżżomm il-flussi tat-trasport essenzjali għaddejjin, inkluż b’mod partikolari dawk l-aktar sensittivi, l-Istati Membri mitluba jiffaċilitaw l-operazzjonijiet tal-merkanzija bl-ajru waqt it-tifqigħa tal-COVID-19. Għaldaqstant, il-Kummissjoni Ewropea qed tistieden lill-Istati Membri jimplimentaw il-miżuri operazzjonali stabbiliti f’dawn il-Linji Gwida bil-fehim li dawn il-miżuri eċċezzjonali se jkunu temporanji għat-tul ta’ żmien tal-kriżi tal-COVID-19.

Il-Linji Gwida għal miżuri tal-ġestjoni tal-fruntieri li jipproteġu s-saħħa u li jiżguraw id-disponibbiltà ta’ oġġetti u servizzi essenzjali adottati mill-Kummissjoni Ewropea fis-16 ta’ Marzu 2020 (1) , jenfasizzaw il-prinċipju li l-fruntieri interni kollha tal-UE għandhom jibqgħu miftuħa għall-merkanzija u li l-ktajjen tal-provvista għal oġġetti essenzjali bħall-provvisti tal-ikel, inkluż il-bhejjem, it-tagħmir mediku, il-PPE u s-sustanzi ta’ oriġini umana jridu jiġu ggarantiti. Huwa fl-interess ta’ kulħadd, f’dawn iż-żminijiet ta’ emerġenza li l-oġġetti jkomplu jiċċirkolaw liberament. Dan jirrikjedi li l-Istati Membri jirrispettaw u jimplimentaw bis-sħiħ dawk il-Linji Gwida fil-qsim tal-fruntieri interni kollha. Barra minn hekk, il-Komunikazzjoni dwar l-implimentazzjoni tal-Korsiji Ħodor adottata mill-Kummissjoni Ewropea fit-23 ta’ Marzu 2020 (2) , għandha l-għan li toħloq proċess kooperattiv madwar l-UE biex ikun żgurat li l-merkanzija kollha, inkluż iżda mhux limitata għal oġġetti essenzjali bħall-ikel u l-provvisti mediċi, tasal malajr għad-destinazzjoni tagħha mingħajr dewmien. Fl-aħħar nett, fid-dikjarazzjoni konġunta tan-Netwerk Ewropew għall-Kompetizzjoni dwar l-applikazzjoni tal-liġi tal-kompetizzjoni waqt il-kriżi tal-Corona (3) , in-Netwerk Ewropew għall-Kompetizzjoni nnota li s-sitwazzjoni straordinarja kkawżata mill-COVID-19 tista’ tagħti lok għall-ħtieġa ta’ kooperazzjoni bejn il-kumpaniji sabiex ikunu żgurati l-provvista u d-distribuzzjoni ġusta lill-konsumaturi kollha ta’ prodotti skarsi. Fiċ-ċirkostanzi attwali, in-netwerk mhux se jintervjeni b’mod attiv kontra miżuri neċessarji u temporanji stabbiliti sabiex jiġi evitat nuqqas ta’ provvista. Madankollu, id-dikjarazzjoni konġunta tiegħu tagħmilha ċara wkoll li n-Netwerk Ewropew għall-Kompetizzjoni mhux se joqgħod lura milli jieħu azzjoni kontra l-operaturi tal-merkanzija bl-ajru li jieħdu vantaġġ mis-sitwazzjoni attwali permezz ta’ kartelli jew billi jabbużaw mill-pożizzjoni dominanti tagħhom, inkluż fir-rigward tal-ipprezzar.

Din il-Komunikazzjoni tibni fuq id-dokumenti msemmija hawn fuq u l-Istati Membri mistiedna jimplimentawhom bis-sħiħ. Il-Linji Gwida attwali huma maħsuba biex jgħinu lill-Istati Membri biex iżommu u jiffaċilitaw l-operazzjonijiet tal-merkanzija bl-ajru, inkluż it-trasport bl-ajru ta’ oġġetti essenzjali bħall-ikel u l-provvisti mediċi, b’mod partikolari dawk li importanti li jaslu fil-ħin. Il-Linji Gwida jistiednu lill-Istati Membri jdaħħlu fis-seħħ il-miżuri operazzjonali u organizzazzjonali meħtieġa, bil-fehim li dawn il-miżuri eċċezzjonali se jkunu temporanji għat-tul ta’ żmien tal-kriżi tal-COVID-19, sakemm jitneħħew ir-restrizzjonijiet fuq it-traffiku tal-ajru u fuq l-ivvjaġġar.

1.   Introduzzjoni

1.1   L-impatt tal-COVID-19

1.

 It-tifqigħa tal-COVID-19 qed ikollha impatt devastanti fuq l-avjazzjoni internazzjonali u dik Ewropea. It-traffiku tal-ajru naqas b’aktar minn 80 %, u kważi t-titjiriet tal-passiġġieri kollha ġew ikkanċellati. Minbarra tnaqqis sinifikanti fid-domanda għall-ivvjaġġar, din is-sitwazzjoni hija wkoll parzjalment dovuta għall-miżuri ta’ konteniment, bħar-restrizzjonijiet fuq l-ivvjaġġar u l-projbizzjonijiet tat-titjir, imposti mill-Istati.

1.2   L-importanza tal-merkanzija bl-ajru

2.

 Il-ktajjen tal-provvista Ewropej qed jinżammu permezz ta’ netwerk estensiv ta’ servizzi tat-trasport tal-merkanzija li jinvolvi l-modalitajiet kollha tat-trasport. Is-servizzi tal-merkanzija bl-ajru kontinwi u mingħajr interruzzjoni huma ta’ importanza strateġika essenzjali għall-UE. Dawn għandhom rwol vitali fit-twassil rapidu ta’ prodotti essenzjali, mediċini, tagħmir u provvisti mediċi, organi jew sustanzi oħra ta’ oriġini umana. B’mod aktar ġenerali, il-ktajjen tal-provvista globali qed ikomplu jiffunzjonaw għal bosta materjali li jkun importanti li jaslu fil-ħin u li huma ta’ valur għoli bis-saħħa tat-trasport tal-merkanzija bl-ajru, li minbarra dan, jikkomplementa b’mod kritiku t-trasport tal-merkanzija bl-art u bil-baħar.

3.

 Madwar nofs il-merkanzija bl-ajru kollha tinġarr fl-istiva tal-inġenji tal-ajru tal-passiġġieri. Madankollu, fil-kuntest tat-tifqigħa tal-COVID-19, dawn l-inġenji tal-ajru kważi kollha ma għadhomx itiru. Filwaqt li t-titjiriet tal-merkanzija kollha għadhom qed jiġu operati f’livelli simili bħal dan iż-żmien sena ilu, ma jistgħux jikkumpensaw għat-telf tal-kapaċità tal-merkanzija fuq l-inġenji tal-ajru tal-passiġġieri. L-ispedituri, inkluż is-settur mediku, qed jirrappurtaw nuqqas ta’ kapaċità u żieda qawwija fir-rati tat-trasport tal-merkanzija bl-ajru.

4.

 Barra minn hekk, il-linji tal-ajru tal-merkanzija u dawk express qed jirrappurtaw diffikultajiet prattiċi biex joperaw f’ċerti ajruporti minħabba r-restrizzjonijiet mingħajr diskriminazzjoni fuq it-titjiriet jew fuq il-persunal. Dawn il-kwistjonijiet qed jheddu l-funzjonament tal-ktajjen tal-provvista kritiċi.

1.3   Ir-restrizzjonijiet fuq il-merkanzija bl-ajru

5.

 L-effettività tal-miżuri tal-konteniment tal-COVID-19 ma tiddependix fuq ir-restrizzjoni tal-moviment tal-inġenji tal-ajru iżda fuq dak tal-passiġġieri. Għalhekk, ir-restrizzjoni temporanja tal-moviment tal-vjaġġaturi minflok tat-titjiriet hija l-aħjar mod kif jiġi evitat it-tfixkil tal-merkanzija bl-ajru, inkluż it-trasport ta’ oġġetti essenzjali.

6.

 Tipi speċifiċi ta’ titjiriet, bħal titjiriet ta’ trasferiment, titjiriet li jġorru merkanzija kritika (bħal mediċini, PPE jew tagħmir tal-ittestjar), titjiriet li jġorru l-assistenza fil-qafas tal-Mekkaniżmu tal-Unjoni għall-Protezzjoni Ċivili, titjiriet tal-Istat, titjiriet għal operazzjonijiet speċjali kif imsemmi fl-Artikolu 4 tar-Regolament ta’ Implimentazzjoni tal-Kummissjoni (UE) Nru 923/2012 (bħal titjiriet mediċi), bħala regola, għandhom jitħallew joperaw f’kull ħin. Għadd sinifikanti ta’ Stati Membri ma eżentawx b’mod ċar it-titjiriet tal-merkanzija mir-restrizzjonijiet nazzjonali tagħhom fuq l-avjazzjoni.

7.

 Il-Kummissjoni Ewropea tqis li, b’mod ġenerali, ir-restrizzjonijiet fuq it-titjiriet fl-UE li jipprojbixxu b’mod assolut it-titjiriet tal-merkanzija bl-ajru jew li de facto jagħmlu l-operat ta’ tali titjiriet impossibbli, pereżempju minħabba restrizzjonijiet mhux ġustifikati fuq it-titjiriet tal-merkanzija bl-ajru li jagħtu servizz lill-ekwipaġġ tal-ajru, ikunu sproporzjonati. Għalhekk, tali restrizzjonijiet fuq it-titjiriet, b’mod partikolari, ma jkunux jissodisfaw il-kundizzjonijiet stabbiliti fl-Artikolu 21 tar-Regolament (UE) Nru 1008/2008 (4). Kwalunkwe restrizzjoni inkompatibbli mad-dritt tal-Unjoni trid titneħħa.

8.

 Il-pajjiżi terzi għandhom ukoll iżommu lura milli jimponu restrizzjonijiet mhux meħtieġa fuq l-operazzjonijiet tal-merkanzija bl-ajru, fl-interess komuni tal-kontinwità tal-katina tal-provvista għal oġġetti essenzjali, inkluż prodotti speċjalizzati ħafna u prodotti kritiċi bħall-provvisti mediċi. Il-Kummissjoni Ewropea tfakkar li r-restrizzjonijiet fuq l-operazzjonijiet tal-merkanzija bl-ajru imposti minn pajjiżi terzi jridu jikkonformaw mar-regoli internazzjonali rilevanti stabbiliti fi ftehimiet applikabbli. Il-Kummissjoni Ewropea, wara kwalunkwe konsultazzjoni meħtieġa, se tieħu l-passi prattiċi kollha biex tiżgura li pajjiżi terzi jikkonformaw mal-obbligi internazzjonali tagħhom, b’mod partikolari vis-à-vis it-trasportaturi tal-ajru tal-Unjoni, u biex tippromwovi l-applikazzjoni min-naħa tal-pajjiżi terzi u tal-organizzazzjonijiet internazzjonali ta’ dawn il-prinċipji.

2.   L-iżgurar tal-kontinwità tal-operazzjonijiet tal-merkanzija bl-ajru

Miżuri operazzjonali rakkomandati

9.

 Fid-dawl tal-importanza tat-trasport bl-ajru tal-merkanzija u tat-trasport bl-ajru tal-merkanzija ta’ emerġenza b’mod partikolari fil-ġlieda kontra l-COVID-19, u bħala parti mill-isforzi ġenerali tal-UE biex iżżomm il-flussi essenzjali tat-trasport għaddejjin u biex tippreserva t-tħaddim tal-ktajjen tal-provvista madwar l-UE kollha, il-Kummissjoni Ewropea tistieden lill-Istati Membri jimplimentaw serje ta’ miżuri operazzjonali biex jiffaċilitaw it-trasport tal-merkanzija bl-ajru u jgħinu biex jitnaqqsu l-ispejjeż addizzjonali, bil-fehim li dawn il-miżuri eċċezzjonali se jkunu temporanji għat-tul ta’ żmien tal-kriżi tal-COVID-19.

10.

 Miżuri bħal dawn għandhom jinkludu b’mod partikolari:

a.

F’dak li jirrigwarda t-trasport minn barra l-UE, l-għoti mingħajr dewmien tal-awtorizzazzjonijiet u tal-permessi kollha meħtieġa, inkluż id-drittijiet tat-traffiku temporanji meta dan huwa legalment possibbli, għall-operazzjonijiet addizzjonali tal-merkanzija bl-ajru, anke meta jitwettqu b’inġenji tal-ajru tal-passiġġieri;

b.

It-tneħħija temporanja, jew l-applikazzjoni flessibbli, ta’ restrizzjonijiet billejl jew ta’ restrizzjonijiet ta’ slots fl-ajruporti għall-operazzjonijiet essenzjali tal-merkanzija bl-ajru;

c.

L-iffaċilitar tal-użu tal-inġenji tal-ajru tal-passiġġieri għall-operazzjonijiet ta’ merkanzija biss, inkluż għall-ippożizzjonar mill-ġdid tal-ekwipaġġ tat-titjira tal-merkanzija bl-ajru, tal-persunal mediku u ta’ kull min ikun involut fit-trasport tal-oġġetti irrispettivament mill-modalità tat-trasport;

d.

L-iżgurar li l-ekwipaġġ tal-merkanzija bl-ajru kif ukoll il-persunal tal-immaniġġar u tal-manutenzjoni jkunu kkwalifikati bħala persunal kritiku f’każijiet ta’ għeluq jew ta’ restrizzjonijiet;

e.

L-iżgurar li, fejn ikun possibbli, tinżamm biżżejjed kapaċità tal-merkanzija meta l-ajruporti reġjonali jkunu magħluqa għal raġunijiet ekonomiċi jew meta jitqies li l-ajruporti jinżammu miftuħa għall-merkanzija bl-ajru biss, u fi kwalunkwe każ l-iżgurar li l-ajruporti miftuħa jżommu kapaċitajiet suffiċjenti tal-immaniġġar tal-merkanzija bl-ajru biex jiżguraw trattament u twassil fil-ħin;

f.

L-eżentar mir-restrizzjonijiet tal-ivvjaġġar għall-persunal tat-trasport asimtomatiku, inkluż għall-ekwipaġġ tal-ajru, involut fit-trasport ta’ oġġetti;

g.

L-eżentar mill-miżuri tal-konteniment, għall-ekwipaġġ tal-ajru asimtomatiku, għall-persunal tal-merkanzija asimtomatiku u għall-persunal tal-ajruport asimtomatiku li jaħdmu fuq ir-rampa, jekk ikun hemm fis-seħħ protokolli tas-saħħa adegwati;

h.

L-approvazzjoni ta’ eżenzjonijiet ad hoc rapidi sabiex jiġu indirizzati sitwazzjonijiet mhux previsti bħall-operazzjonijiet ta’ emerġenza għal għarrieda u mhux previsti;

i.

Il-persunal tar-rampa jitħalla jagħmel xogħlu b’mod sikur kif ukoll b’mod effiċjenti, billi l-istaff jingħata gwida dwar il-prekawzjonijiet tas-saħħa f’ambjent tal-merkanzija bl-ajru u billi jiġi appoġġat bi provvisti xierqa ta’ prodotti tal-iġene;

j.

Il-linji tal-ajru tal-merkanzija u tal-express jiġu mħeġġa biex eċċezzjonalment jirriżervaw kapaċità għall-provvista ta’ oġġetti essenzjali, b’mod partikolari provvisti mediċi u ta’ emerġenza, u biex japplikaw rati tat-trasport raġonevoli għal provvisti bħal dawn.

11.

 Il-miżuri kollha ta’ hawn fuq għandhom japplikaw kemm għaċ-ċittadini tal-UE kif ukoll għaċ-ċittadini ta’ pajjiżi terzi jekk ikunu essenzjali sabiex ikun hemm il-moviment liberu tal-merkanzija fl-UE u lejha.

12.

 Fir-rigward tal-miżuri ta’ emerġenza, l-Istati Membri huma mfakkra li jridu jikkonformaw mal-Artikolu 21 tar-Regolament (KE) Nru 1008/2008, inkluż fir-rigward tal-informazzjoni tal-Kummissjoni u Stati Membri oħra. Minbarra dawn l-obbligi, l-Istati Membri huma mistiedna, li jinnotifikaw minn qabel b’kull miżura koperta minn din il-Komunikazzjoni lill-Kummissjoni Ewropea u lill-Istati Membri l-oħra kollha, kif ukoll li jagħmluhom pubbliċi b’tali mod li l-partijiet ikkonċernati kollha tal-merkanzija bl-ajru jkunu infurmati minn qabel biżżejjed biex jadattaw l-operazzjonijiet tagħhom skont dan.

13.

 Id-dikjarazzjoni konġunta tan-Netwerk Ewropew għall-Kompetizzjoni tat-23 ta’ Marzu 2020 tenfasizza li l-awtoritajiet tal-kompetizzjoni tal-UE “mhux se jintervjenu b’mod attiv kontra miżuri neċessarji u temporanji stabbiliti sabiex jiġi evitat nuqqas ta’ provvista”. Id-dikjarazzjoni konġunta tagħmilha ċara wkoll li l-awtoritajiet tal-kompetizzjoni mhux se joqogħdu lura milli jieħdu azzjoni kontra l-operaturi tal-merkanzija bl-ajru li jieħdu vantaġġ mis-sitwazzjoni attwali permezz ta’ kartelli jew billi jabbużaw mill-pożizzjoni dominanti tagħhom. Jekk il-linji tat-trasport bl-ajru tal-merkanzija u tal-express iqisu li jeħtieġ li jikkooperaw sabiex jiżguraw il-provvista ta’ prodotti skarsi u jkollhom dubji dwar il-kompatibbiltà ta’ tali kooperazzjoni mal-liġi tal-kompetizzjoni tal-UE/taż-ŻEE, dawn mistiedna jfittxu gwida informali mill-Kummissjoni Ewropea, mill-Awtorità ta’ Sorveljanza tal-EFTA jew mill-awtoritajiet nazzjonali tal-kompetizzjoni kkonċernati.

3.   Konklużjoni

14.

 Il-Kummissjoni Ewropea tappella biex l-Istati Membri kollha jimplimentaw il-miżuri deskritti fil-punti 8 sa 11 b’urġenza.

15.

 F’kooperazzjoni mill-qrib mal-Istati Membri, il-Kummissjoni Ewropea se tqis il-passi prattiċi kollha biex tħeġġeġ lill-pajjiżi terzi japplikaw dawn il-prinċipji, inkluż permezz tal-involviment mal-Organizzazzjoni Internazzjonali tal-Avjazzjoni Ċivili (ICAO), mas-sħab internazzjonali tal-avjazzjoni kif ukoll mal-industrija internazzjonali tat-trasport bl-ajru.

16.

 Il-Kummissjoni Ewropea se tkompli timmonitorja s-sitwazzjoni, u se tipprovdi aktar gwida, kif ikun xieraq.

(1)  C(2020) 1753 final

(2)  C(2020) 1897 final

(3)  https://ec.europa.eu/competition/ecn/202003_joint-statement_ecn_corona-crisis.pdf

(4)  L-Artikolu 21 tar-Regolament (UE) Nru 1008/2008 jippermetti lill-Istati Membri jimponu restrizzjonijiet fuq it-titjiriet fl-UE b’ċerti kundizzjonijiet stretti. Huwa bbażat fuq valutazzjoni każ b’każ ta’ notifiki individwali mill-Istati Membri. Il-pożizzjoni espressa mill-Kummissjoni Ewropea fir-rigward tat-titjiriet tal-merkanzija bl-ajru hija mingħajr preġudizzju għall-valutazzjoni individwali skont l-Artikolu 21 tas-sett sħiħ ta’ restrizzjonijiet implimentati mill-Istati Membri.

Top