KOMUNIKAZZJONI TAL-KUMMISSJONI

Linji gwida dwar ir-rappurtar mhux finanzjarju: Suppliment dwar ir-rappurtar ta' informazzjoni relatata mal-klima

(2019/C 209/01)

Avviż importanti Din il-komunikazzjoni ġiet imħejjija skont l-Artikolu 2 tad-Direttiva 2014/95/UE tal-Parlament Ewropew u tal-Kunsill (1) sabiex tassisti lill-kumpaniji kkonċernati biex jiddivulgaw informazzjoni mhux finanzjarja b’mod rilevanti, utli, konsistenti u aktar komparabbli. Hija suppliment għal-Linji Gwida dwar ir-Rappurtar Mhux Finanzjarju adottati mill-Kummissjoni fl-2017 (C(2017)4234 final). Din il-Komunikazzjoni tipprovdi linji gwida mhux vinkolanti u ma toħloqx obbligi legali ġodda. Sa fejn din il-Komunikazzjoni tista’ tinterpreta d-Direttiva 2014/95/UE, il-pożizzjoni tal-Kummissjoni hi mingħajr preġudizzju għal kwalunkwe interpretazzjoni ta’ din id-Direttiva li tista’ tinħareġ mill-Qorti tal-Ġustizzja tal-Unjoni Ewropea. Il-kumpaniji li jużaw dawn il-linji gwida jistgħu jiddependu wkoll fuq oqfsa internazzjonali, ibbażati fl-UE jew dawk nazzjonali. Din il-komunikazzjoni ma tikkostitwixxix standard tekniku, u la min jipprepara r-rapporti mhux finanzjarji u lanqas xi parti oħra, kemm jekk tkun qed taġixxi għan-nom ta’ xi ħadd li jipprepara r-rapporti jew ukoll ta’ xi ħadd ieħor, ma għandha tiddikjara li r-rapporti mhux finanzjarji huma f’konformità ma’ dan id-dokument.

Kontenut

1

Introduzzjoni

2

1.1

Għaliex għandhom jiġu pprovduti linji gwida ġodda dwar divulgazzjonijiet relatati mal-klima?

2

1.2

Benefiċċji għall-kumpaniji ta’ rappurtar

3

2

Kif għandhom jintużaw dawn il-linji gwida

3

2.1

Konsiderazzjonijiet ġenerali

3

2.2

Materjalità

4

2.3

Riskji, dipendenzi u opportunitajiet relatati mal-klima

5

2.4

L-istruttura tad-divulgazzjonijiet proposti

8

2.5

Konsistenza mal-oqfsa u l-istandards ta’ rappurtar rikonoxxuti

8

3

Divulgazzjonijiet irrakkomandati u gwida ulterjuri

8

3.1

Mudell tan-Negozju

8

3.2

Politiki u Proċessi ta’ Diliġenza Dovuta

9

3.3

Eżiti

10

3.4

Riskji Prinċipali u l-Immaniġġjar tagħhom

11

3.5

Indikaturi Ewlenin tal-Prestazzjoni

12

Anness I:

Gwida ulterjuri għall-banek u għall-kumpaniji tal-assigurazzjoni

21

Anness II:

L-immappjar tar-Rekwiżiti tad-Direttiva ta’ Rappurtar Mhux Finanzjarju u d-Divulgazzjonijiet Rakkomandati tat-TCFD

29

1.   INTRODUZZJONI

1.1.   Għaliex għandhom jiġu pprovduti linji gwida ġodda dwar divulgazzjonijiet relatati mal-klima?

Il-Ftehim ta’ Pariġi dwar il-Klima tal-2015, l-Għanijiet ta' Żvilupp Sostenibbli tan-Nazzjonijiet Uniti u r-Rapport Speċjali tal-Grupp Intergovernattiv ta’ Esperti dwar it-Tibdil fil-Klima (Ottubru 2018) kollha talbu għal azzjoni aċċellerata u deċiżiva sabiex jitnaqqsu l-emissjonijiet tal-gassijiet serra (greenhouse gas, GHG) u tinħoloq ekonomija b’livell baxx ta’ emissjonijiet tal-karbonju u reżiljenti għat-tibdil fil-klima. L-UE qablet dwar miri ambizzjużi għall-2030 rigward it-tnaqqis tal-emissjonijiet tal-gassijiet serra, l-enerġija rinnovabbli u l-effiċjenza enerġetika (2), u approvat regoli dwar l-emissjonijiet tal-gassijiet serra mill-użu tal-art kif ukoll miri ta’ emissjonijiet għall-karozzi u għall-vannijiet. Fl-2018, il-Kummissjoni ppubblikat il-viżjoni strateġika fit-tul tagħha għal ekonomija prosperuża, moderna, kompetittiva u newtrali għall-klima sal-2050. (3)

Il-kumpaniji u l-istituzzjonijiet finanzjarji għandhom rwol kritiku fit-tranżizzjoni għal ekonomija b’livell baxx ta’ emissjonijiet tal-karbonju u reżiljenti għat-tibdil fil-klima. L-ewwel nett, diġà hemm bżonn ta’ investiment annwali addizzjonali ta’ EUR 180 biljun sabiex jintlaħqu l-miri tal-enerġija u l-klima tal-UE għall-2030, u se jkunu meħtieġa fondi ulterjuri sabiex sal-2050 tinkiseb in-newtralità klimatika. Ħafna minn dawn l-investimenti jirrappreżentaw opportunitajiet ta’ negozju sinifikanti, u l-biċċa l-kbira tal-finanzjament se jkollu jiġi minn kapital privat. It-tieni nett, il-kumpaniji u l-istituzzjonijiet finanzjarji se jkollhom jifhmu aħjar u jindirizzaw ir-riskji ta’ impatt negattiv fuq il-klima li jirriżultaw mill-attivitajiet ta’ negozju tagħhom, kif ukoll ir-riskji li t-tibdil fil-klima joħloq għan-negozju tagħhom. Id-diżastri relatati mat-temp ikkawżaw rekord ta’ EUR 283 biljun fi ħsarat ekonomiċi fl-2017 u sal-2100 jistgħu jaffettwaw sa żewġ terzi tal-popolazzjoni Ewropea meta mqabbla mal-5 % tal-lum. Id-divulgazzjoni aħjar ta’ informazzjoni relatata mal-klima mill-kumpaniji tista’ tikkontribwixxi għall-implimentazzjoni tal-Qafas ta’ Sendai għat-Tnaqqis tar-Riskju ta’ Diżastri 2015-2030, li jitlob lill-gvernijiet biex jevalwaw, jirrekordjaw, jaqsmu u jispjegaw pubblikament it-telf mid-diżastri.

F’Marzu 2018, il-Kummissjoni ppubblikat il-Pjan ta’ Azzjoni dwar il-Finanzjament ta' Tkabbir Sostenibbli, bil-għan li torjenta mill-ġdid il-kapital lejn l-investiment sostenibbli, timmaniġġja r-riskji finanzjarji li jirriżultaw mit-tibdil fil-klima u problemi ambjentali u soċjali oħra, u trawwem it-trasparenza u l-perspettiva fit-tul fl-attività finanzjarja u ekonomika. (4) Il-pubblikazzjoni ta’ linji gwida ġodda dwar id-divulgazzjoni ta’ informazzjoni relatata mal-klima mill-kumpanji hija parti mill-Pjan ta’ Azzjoni.

Għadd ta’ azzjonijiet oħra fil-Pjan ta’ Azzjoni sa ċertu punt jiddependu mid-divulgazzjoni ta’ informazzjoni adegwata relatata mas-sostenibbiltà mill-kumpaniji. Dan pereżempju jinkludi, ir-regolamenti proposti dwar l-istabbiliment ta’ qafas (tassonomija) sabiex jiġi ffaċilitat l-investiment sostenibbli (5), dwar id-divulgazzjonijiet ta’ sostenibbiltà mill-investituri istituzzjonali u l-maniġers tal-assi (6), u dwar parametri referenzjarji relatati mal-karbonju. (7)

Mingħajr informazzjoni suffiċjenti, affidabbli u komparabbli relatata mas-sostenibbiltà minn destinatarji ta’ investiment, is-settur finanzjarju ma jistax jidderieġi b'mod effiċjenti l-kapital lejn investimenti li jixprunaw soluzzjonijiet għall-kriżijiet ta’ sostenibbiltà li niffaċċjaw, u ma jistax jidentifika u jimmaniġġja b’mod effettiv ir-riskji għall-investimenti li jirriżultaw minn dawn il-kriżijiet.

Id-divulgazzjoni korporattiva ta’ informazzjoni relatata mal-klima tjiebet f’dawn l-aħħar snin. Madanakollu, xorta għad hemm lakuni sinifikanti, u hemm bżonn ta’ titjib ulterjuri malajr fil-kwantità, fil-kwalità u fil-komparabbiltà tad-divulgazzjonijiet sabiex jiġu ssodisfati l-ħtiġijiet tal-investituri u ta’ partijiet ikkonċernati oħra.

F’Ġunju 2017, it-Task Force dwar Divulgazzjonijiet Finanzjarji relatati mal-Klima (TCFD), stabbilita mill-Bord għall-Istabbiltà Finanzjarja tal-G20, ippubblikat rakkomandazzjonijiet biex tħeġġeġ lill-istituzzjonijiet finanzjarji u lill-kumpaniji mhux finanzjarji biex jiddivulgaw informazzjoni dwar riskji u opportunitajiet relatati mal-klima. (8) Ir-rakkomandazzjonijiet tat-TCFD huma rikonoxxuti b’mod wiesa’ bħala gwida awtoritattiva dwar ir-rappurtar ta’ informazzjoni finanzjarjament materjali relatata mal-klima, u l-Kummissjoni tħeġġeġ lill-kumpaniji jimplimentawhom. Għadd ta’ gvernijiet u regolaturi finanzjarji madwar id-dinja esprimew l-appoġġ tagħhom għar-rakkomandazzjonijiet u qed jintegrawhom fil-gwida u l-oqfsa ta’ politika tagħhom. Xi eżempji jinkludu l-Awstralja, il-Kanada, Hong Kong, il-Ġappun, Singapore u l-Afrika t’Isfel, kif ukoll xi Stati Membri oħra tal-UE.

Dan is-suppliment jintegra r-rakkomandazzjonijiet tat-TCFD, u jipprovdi gwida għall-kumpaniji li hija konsistenti mad-Direttiva dwar ir-Rappurtar Mhux Finanzjarju u mar-rakkomandazzjonijiet tat-TCFD.

Il-Grupp ta’ Esperti Tekniċi dwar il-Finanzjament Sostenibbli, maħtur mill-Kummissjoni f’Ġunju 2018, ipprovda rakkomandazzjonijiet dwar divulgazzjonijiet relatati mal-klima u dawn il-linji gwida huma mibnija fuq dawn ir-rakkomandazzjonijiet. Dawn il-linji gwida jqisu l-feedback tal-partijiet ikkonċernati dwar ir-rakkomandazzjonijiet tal-Grupp ta’ Esperti Tekniċi dwar il-Finanzjament Sostenibbli, u r-riżultati ta’ konsultazzjoni online fil-mira mwettqa mis-servizzi tal-Kummissjoni Ewropea fi Frar/Marzu 2019 (9).

1.2.   Benefiċċji għall-kumpaniji ta’ rappurtar

Divulgazzjoni aħjar ta’ informazzjoni relatata mal-klima jista’ jkollha benefiċċji għall-kumpanija ta’ rappurtar innifisha, bħal:

—	għarfien u fehim akbar ta' riskji u opportunitajiet relatati mal-klima fi ħdan il-kumpanija, immaniġġjar aħjar tar-riskji, u teħid ta’ deċiżjonijiet u ppjanar strateġiku aktar informat;

—

bażi tal-investituri aktar diversa u kost tal-kapital potenzjalment aktar baxx, li jirriżultaw pereżempju mill-inklużjoni f’portafolli tal-investiment ġestiti b’mod attiv u f’indiċi ffukati fuq is-sostenibbiltà, u minn klassifikazzjonijiet tal-kreditu mtejba għall-ħruġ ta’ bonds u valutazzjonijiet tal-affidabbiltà tal-kreditu għall-krediti bankarji;

—	djalogu aktar kostruttiv mal-partijiet ikkonċernati, b’mod partikolari l-investituri u l-partijiet ikkonċernati;

—	reputazzjoni korporattiva aħjar u ż-żamma ta’ liċenzja soċjali biex topera.

2.   KIF GĦANDHOM JINTUŻAW DAWN IL-LINJI GWIDA

2.1.   Konsiderazzjonijiet ġenerali

Il-kumpaniji għandhom jaqraw dan is-suppliment flimkien mal-leġiżlazzjoni nazzjonali rilevanti li tittrasponi d-Direttiva dwar ir-Rappurtar Mhux Finanzjarju (2014/95/UE) u jekk ikun meħtieġ it-test tad-Direttiva nnifisha.

Huma għandhom iqisu wkoll il-Linji Gwida Mhux Vinkolanti dwar ir-Rappurtar Mhux Finanzjarju ppubblikati mill-Kummissjoni f’Ġunju 2017 (10), li fihom 6 prinċipji ewlenin ta’ rappurtar mhux finanzjarju tajjeb, jiġifieri li l-informazzjoni divulgata għandha tkun: (1) materjali; (2) ġusta, ibbilanċjata u komprensibbli; (3) komprensiva iżda konċiża; (4) strateġika u tħares ’il quddiem (11); (5) orjentata lejn il-partijiet ikkonċernati; u (6) konsistenti u koerenti. Dawn il-prinċipji u t-taqsimiet l-oħra tal-Linji Gwida Mhux Vinkolanti kollha japplikaw kif xieraq għal dan is-suppliment.

Il-kumpaniji huma wkoll imħeġġa jaqraw ir-rakkomandazzjonijiet tat-Task Force dwar Divulgazzjonijiet Finanzjarji relatati mal-Klima, u jekk rilevanti l-gwida supplimentari għas-settur finanzjarju u għall-kumpaniji li joperaw fis-setturi tal-enerġija, it-trasport, il-materjali u l-bini u l-prodotti tal-agrikoltura, tal-ikel u tal-foresti (12).

Bħal-linji gwida ġenerali ppubblikati fl-2017, dan is-suppliment dwar rappurtar relatat mal-klima mhuwiex vinkolanti. Il-kumpaniji jistgħu jagħżlu approċċi alternattivi għar-rappurtar dwar informazzjoni relatata mal-klima, dejjem jekk dawn jissodisfaw ir-rekwiżiti legali.

Dawn il-linji gwida jirrikonoxxu li l-kontenut ta’ divulgazzjonijiet relatati mal-klima jista’ jvarja bejn il-kumpaniji skont numru ta’ fatturi, inkluż is-settur tal-attività, il-post ġeografiku u n-natura u d-daqs tar-riskji u l-opportunitajiet relatati mal-klima.

Il-metodoloġiji u l-aħjar prattiki fil-qasam tar-rappurtar relatat mal-klima qed jevolvu b’rata mgħaġġla. Għalhekk, dawn il-linji gwida jirrikonoxxu li huwa meħtieġ approċċ flessibbli. Il-kumpaniji u organizzazzjonijiet oħra huma mħeġġa ħafna jkomplu jwettqu innovazzjoni u jtejbu aktar ir-rappurtar relatat mal-klima lil hinn mill-kontenut ta’ dawn il-linji gwida. Il-kumpaniji għandhom jiżguraw ukoll li l-approċċ tagħhom għal rappurtar relatat mal-klima jiġi aġġornat b’mod regolari f’konformità mal-aktar evidenza xjentifika riċenti.

Mhix l-intenzjoni ta’ dawn il-linji gwida li jħeġġu rappurtar awtonomu dwar il-klima. Il-kumpaniji huma mħeġġa jintegraw informazzjoni relatata mal-klima ma’ informazzjoni finanzjarja u mhux finanzjarja oħra kif xieraq fir-rapporti tagħhom.

Il-post prestabbilit għar-rapport mhux finanzjarju skont id-Direttiva dwar ir-Rappurtar Mhux Finanzjarju huwa r-rapport tal-ġestjoni tal-kumpanija, għalkemm ħafna Stati Membri għażlu l-alternattiva li jħallu lill-kumpaniji jippubblikaw ir-rapport mhux finanzjarju tagħhom f’rapport separat. It-TCFD tipproponi li d-divulgazzjonijiet rakkomandati tagħha għandhom jiġu inklużi fil-"filings finanzjarji annwali" formali tal-kumpanija (13).

Fi kwalunkwe każ, il-kumpaniji għandhom ifittxu li jiżguraw li l-informazzjoni relatata mal-klima tkun aċċessibbli faċilment għall-utenti intiżi. Jekk il-kumpaniji jagħmlu referenzi inkroċjati għal rapporti jew dokumenti oħra, dan għandu jsir b’mod sempliċi u faċli għall-utent, pereżempju, bl-applikazzjoni ta’ regola prattika ta’ “massimu ta’ “klikk” waħda mir-rapport”.

Dawn il-linji gwida huma intiżi għall-użu minn kumpaniji li jaqgħu fil-kamp ta’ applikazzjoni tad-Direttiva dwar ir-Rappurtar Mhux Finanzjarju (14). Madanakollu, dawn jistgħu jkunu utli wkoll għal kumpaniji oħra li jixtiequ jiddivulgaw informazzjoni relatata mal-klima.

2.2.   Materjalità

Skont id-Direttiva dwar ir-Rappurtar Mhux Finanzjarju, kumpanija hija meħtieġa tiddivulga informazzjoni dwar materji ambjentali, soċjali u tal-impjegati, ir-rispett għad-drittijiet tal-bniedem, u t-tixħim u l-korruzzjoni, sa fejn tali informazzjoni tkun neċessarja għall-fehim tal-iżvilupp, tal-prestazzjoni, tal-pożizzjoni u tal-impatt tal-kumpanija u tal-impatt tal-attivitajiet tagħha (15). L-informazzjoni relatata mal-klima tista’ titqies bħala li taqa’ fil-kategorija tal-materji ambjentali.

Kif indikat fil-Linji Gwida Mhux Vinkolanti dwar ir-Rappurtar Mhux Finanzjarju tal-Kummissjoni tal-2017, ir-referenza għall-“impatt tal-attivitajiet [tal-kumpanija]” introduċiet element ġdid li għandu jitqies meta tiġi vvalutata l-materjalità tal-informazzjoni mhux finanzjarja. Fil-verità, id-Direttiva dwar ir-Rappurtar Mhux Finanzjarju għandha perspettiva ta’ materjalità doppja:

—

Ir-referenza għall-“iżvilupp, il-prestazzjoni [u] l-pożizzjoni” tal-kumpanija tindika materjalità finanzjarja, fis-sens usa’ li jiġi affettwat il-valur tal-kumpanija. L-informazzjoni relatata mal-klima għandha tiġi rrappurtata jekk tkun meħtieġa għall-fehim tal-iżvilupp, tal-prestazzjoni u tal-pożizzjoni tal-kumpanija. Din il-perspettiva hija normalment ta’ interess kbir għall-investituri.

—

Ir-referenza għall-“impatt tal-attivitajiet tal-[kumpanija]” tindika l-materjalità ambjentali u soċjali. L-informazzjoni relatata mal-klima għandha tiġi rrappurtata jekk tkun meħtieġa għal fehim tal-impatti esterni tal-kumpanija. Din il-perspettiva normalment hija ta’ interess kbir għaċ-ċittadini, għall-konsumaturi, għall-impjegati, għas-sħab fin-negozju, għall-komunitajiet u għall-organizzazzjonijiet tas-soċjetà ċivili. Madanakollu, numru dejjem jiżdied ta’ investituri jeħtieġ li jkunu jafu wkoll dwar l-impatti tal-klima tad-destinatarji ta’ investiment sabiex jifhmu aħjar u jkejlu l-impatti tal-klima tal-portafolli tal-investiment tagħhom.

Il-kumpaniji għandhom iqisu l-użu tad-divulgazzjonijiet proposti f’dawn il-linji gwida jekk jiddeċiedu li l-klima hija kwistjoni materjali minn waħda minn dawn iż-żewġ perspettivi.

Dawn iż-żewġ perspettivi ta’ riskju diġà jikkoinċidu f’xi każijiet u hemm aktar ċans li jagħmlu hekk fil-futur. Hekk kif il-politiki tas-swieq u dawk pubbliċi jevolvu b’rispons għat-tibdil fil-klima, l-impatti pożittivi u/jew negattivi ta’ kumpanija dwar il-klima se jittrasformaw dejjem aktar f’opportunitajiet ta' negozju u/jew riskji li huma finanzjarjament materjali.

Il-perspettiva tal-materjalità tad-Direttiva dwar ir-Rappurtar Mhux Finanzjarju tkopri kemm il-materjalità finanzjarja kif ukoll il-materjalità ambjentali u soċjali, filwaqt li t-TCFD għandha perspettiva tal-materjalità finanzjarja biss.

Figura 1

Il-perspettiva tal-materjalità doppja tad-Direttiva dwar ir-Rappurtar Mhux Finanzjarju fil-kuntest tar-rappurtar tal-informazzjoni relatata mal-klima

Meta jivvalutaw il-materjalità ta’ informazzjoni relatata mal-klima, il-kumpaniji għandhom iqisu perjodu ta’ żmien itwal minn dak li normalment ikun il-każ għall-informazzjoni finanzjarja. Huwa rrakkomandat li l-kumpaniji ma jikkonkludux kmieni wisq li l-klima mhix kwistjoni materjali sempliċiment minħabba li jitqies li xi riskji relatati mal-klima fin-natura tagħhom huma għal żmien twil.

Meta jivvalutaw il-materjalità ta’ informazzjoni relatata mal-klima, il-kumpaniji għandhom iqisu l-katina ta’ valur kollha tagħhom, kemm upstream fil-katina ta’ provvista kif ukoll downstream.

Minħabba l-impatti sistemiċi u pervażivi tat-tibdil fil-klima, il-biċċa l-kbira tal-kumpaniji fil-kamp ta’ applikazzjoni tad-Direttiva aktarx jikkonkludu li l-klima hija kwistjoni materjali. Il-kumpaniji li jikkonkludu li l-klima mhix kwistjoni materjali huwa rrakkomandat li jikkunsidraw jagħmlu dikjarazzjoni għal dan il-għan, li tispjega kif ikunu waslu għal dik il-konklużjoni.

2.3.   Riskji, dipendenzi u opportunitajiet relatati mal-klima

Riskji relatati mal-klima

Skont id-Direttiva dwar ir-Rappurtar Mhux Finanzjarju, sa fejn hu meħtieġ, l-informazzjoni relatata mal-klima għandha tinkludi kemm ir-riskji prinċipali għall-iżvilupp, għall-prestazzjoni u għall-pożizzjoni tal-kumpanija li jirriżultaw mit-tibdil fil-klima, u wkoll ir-riskji prinċipali ta’ impatt negattiv fuq il-klima li jirriżultaw mill-attivitajiet tal-kumpanija. Id-divulgazzjonijiet proposti f’dawn il-linji gwida jirriflettu dawn iż-żewġ perspettivi ta’ riskju.

Sakemm ma jiġix iddikjarat mod ieħor fit-test, għandu jiġi mifhum li r-referenzi għar-riskji jirreferu kemm għar-riskji ta’ impatti negattivi fuq il-kumpanija (riskji ta’ tranżizzjoni u riskji fiżiċi – ara hawn taħt) kif ukoll għar-riskji ta’ impatti negattivi fuq il-klima.

Dawn iż-żewġ tipi ta’ riskju – riskji ta’ impatti negattivi fuq il-kumpanija u riskji ta’ impatti negattivi fuq il-klima – jistgħu jirriżultaw mill-operazzjonijiet tal-kumpaniji stess u jistgħu jseħħu tul il-katina ta’ valur kollha, kemm upstream fil-katina ta’ provvista kif ukoll downstream.

1)   Ir-riskji ta’ impatti negattivi fuq il-klima

Xi eżempji ta’ riskji ta’ impatti negattivi fuq il-klima huma:

—	Il-faċilità tal-produzzjoni industrijali ta’ kumpanija tista’ tarmi gassijiet serra (GHG) direttament fl-atmosfera.

—	L-enerġija li kumpanija tixtri biex twettaq l-operazzjonijiet tagħha jista’ jkun li tkun ġiet prodotta mill-fjuwils fossili.

—	Il-prodott li kumpanija tagħmel jista’ jkun li jkun jirrikjedi l-konsum tal-fjuwils fossili, pereżempju fil-każ ta’ karozzi li jaħdmu bil-petrol jew bid-diżil.

—

Il-produzzjoni ta’ materjali użati mill-kumpanija tista’ twassal għal emissjonijiet ta’ gassijiet serra upstream fil-katina ta’ valur tagħhom. Dan jista’ jkun il-każ għall-kumpaniji li jużaw materjali bħas-siment jew l-aluminju fil-proċessi ta’ produzzjoni tagħhom. Bl-istess mod, kumpanija li tipproduċi jew tipproċessa komoditajiet forestali jew agrikoli, inkluż fis-setturi bħall-industriji tal-ikel, tal-ħwejjeġ jew tal-ipproċessar tal-injam, potenzjalment tista’ tkun qed tikkawża, direttament jew indirettament, bidla fl-użu tal-art inkluża deforestazzjoni u degradazzjoni tal-foresti u emissjonijiet ta’ gassijiet serra relatati.

2)   Ir-riskju ta’ impatt negattiv fuq il-kumpanija

Ir-riskji tat-tibdil fil-klima għall-prestazzjoni finanzjarja tal-kumpanija jistgħu jiġu kklassifikati bħala riskji fiżiċi jew riskji ta’ tranżizzjoni. (16)

Riskji ta’ tranżizzjoni huma riskji għall-kumpanija li jirriżultaw mit-tranżizzjoni għal ekonomija b’livell baxx ta’ emissjonijiet tal-karbonju u reżiljenti għat-tibdil fil-klima. Dawn jinkludu:

—	Riskji ta’ politika, pereżempju b’riżultat tar-rekwiżiti tal-effiċjenza enerġetika, mekkaniżmi tal-ipprezzar tal-karbonju li jżidu l-prezz tal-fjuwils fossili, jew politiki li jħeġġu l-użu sostenibbli tal-art.

—	Riskji legali, pereżempju r-riskju ta’ litigazzjoni talli tonqos li tevita jew timminimizza l-impatti avversi fuq il-klima, jew tonqos milli tadatta għat-tibdil fil-klima.

—	Riskji teknoloġiċi, pereżempju jekk teknoloġija b’impatt anqas dannuż fuq il-klima tissostitwixxi teknoloġija li hija aktar dannuża għall-klima.

—	Riskji tas-suq, pereżempju jekk l-għażliet tal-konsumaturi u l-konsumaturi tan-negozju jaqilbu lejn prodotti u servizzi li huma anqas dannużi għall-klima.

—	Riskji reputazzjonali, pereżempju d-diffikultà li tattira u żżomm il-konsumaturi, l-impjegati, is-sħab fin-negozju u l-investituri jekk kumpanija jkollha reputazzjoni li tagħmel ħsara lill-klima.

B’mod ġenerali, kumpanija b’impatt negattiv ogħla fuq il-klima se tkun aktar esposta għar-riskji ta’ tranżizzjoni.

Riskji fiżiċi huma riskji għall-kumpanija li jirriżultaw mill-effetti fiżiċi tat-tibdil fil-klima. (17) Dawn jinkludu:

—	Riskji fiżiċi akuti, li jirriżultaw minn avvenimenti partikolari, speċjalment avvenimenti relatati mat-temp bħal maltempati, għargħar, nirien jew mewġiet ta' sħana, li jistgħu jagħmlu ħsara lill-faċilitajiet tal-produzzjoni u jfixklu lill-katini ta’ valur.

—	Riskji fiżiċi kroniċi, li jirriżultaw minn bidliet fil-klima aktar fit-tul, bħal bidliet fit-temperatura, żieda fil-livelli tal-baħar, tnaqqis fid-disponibbiltà tal-ilma, it-telf ta’ bijodiversità u bidliet fil-produttività tal-art u tal-ħamrija.

L-esponiment ta’ kumpanija għal riskji fiżiċi ma jiddependix direttament fuq jekk dik il-kumpanija għandhiex impatt negattiv fuq il-klima jew le.

Id-dipendenzi fuq il-kapitali naturali, umani u soċjali

Ħafna kumpaniji huma dipendenti fuq il-kapital naturali. (18) Jekk il-kapital naturali nnifsu huwa mhedded mit-tibdil fil-klima, f'dak il-każ il-kumpanija se tiġi esposta għal riskji relatati mal-klima, speċjalment riskji fiżiċi. Għalhekk, il-kumpaniji għandhom iqisu bir-reqqa d-dipendenzi tagħhom fuq il-kapital naturali meta jidentifikaw u jirrappurtaw dwar ir-riskji relatati mal-klima tagħhom. Pereżempju, kumpanija tal-produzzjoni agrikola tista’ tkun dipendenti fuq diversi kapitali naturali bħall-ilma, il-bijodiversità u l-produttività tal-art u tal-ħamrija, li kollha kemm huma huma vulnerabbli għat-tibdil fil-klima. Tali kumpanija tkun mistennija li tispjega dawn id-dipendenzi meta tirrapporta dwar ir-riskji relatati mal-klima tagħha.

Ħafna kumpaniji huma wkoll dipendenti fuq il-kapital uman u soċjali, bħall-ħiliet u l-motivazzjoni tal-impjegati, u l-livell ta’ fiduċja li l-kumpanija tgawdi fost il-partijiet ikkonċernati esterni. Il-kumpaniji għandhom jintegraw l-informazzjoni dwar il-kapital uman u soċjali kif xieraq fir-rappurtar tagħhom dwar kwistjonijiet relatati mal-klima. Pereżempju, l-impjegati jistgħu jkunu kritiċi rigward l-iżvilupp ta’ prodotti u servizzi innovattivi b’livell baxx ta’ emissjonijiet tal-karbonju.

Opportunitajiet relatati mal-klima

Ir-riskji relatati mal-klima spiss jistgħu jinbidlu f’opportunitajiet mill-kumpaniji li joffru prodotti u servizzi li jikkontribwixxu għall-mitigazzjoni jew għall-adattament għat-tibdil fil-klima.

L-adattament għat-tibdil fil-klima jfisser l-antiċipazzjoni tal-effetti avversi tat-tibdil fil-klima u t-teħid ta’ azzjoni xierqa sabiex il-ħsara li jistgħu jikkawżaw tiġi impedita jew minimizzata. Dan jinkludi opportunitajiet tan-negozju bħal teknoloġiji ġodda li jużaw riżorsi tal-ilma skarsi b’mod aktar effiċjenti, jew il-bini ta’ difiżi kontra l-għargħar ġodda.

Il-mitigazzjoni tat-tibdil fil-klima tirreferi għall-isforzi biex jitnaqqsu jew jiġu impediti l-emissjonijiet ta’ gassijiet serra. Eżempji ta’ opportunitajiet tan-negozju assoċċjati mal-mitigazzjoni jinkludu l-enerġija rinnovabbli jew l-iżvilupp ta’ aktar bini u sistemi tat-trasport effiċjenti fl-enerġija.

It-tassonomija ta’ attivitajiet ekonomiċi sostenibbli, proposta mill-Kummissjoni bħala parti mill-Pjan ta’ Azzjoni dwar il-Finanzjament ta' Tkabbir Sostenibbli, timmira li tidentifika u tikklassifika opportunitajiet relatati mal-klima.

Il-Figura 2 turi r-relazzjoni bejn ir-riskji u l-opportunitajiet relatati mal-klima.

Figura 2

Riskji u opportunitajiet relatati mal-klima

Ir-riskji u l-opportunitajiet relatati mal-klima tul il-katina ta’ valur

Meta jirrappurtaw dwar ir-riskji, id-dipendenzi u l-opportunitajiet relatati mal-klima tagħhom, il-kumpaniji għandhom, fejn rilevanti u proporzjonat, iqisu l-katina ta’ valur kollha tagħhom, kemm upstream kif ukoll downstream. Għall-kumpaniji involuti fl-attivitajiet ta’ manifattura dan ifisser li jiġi segwit approċċ taċ-ċiklu tal-ħajja tal-prodott li jqis il-kwistjonijiet tal-klima fil-katina ta’ provvista u l-provvista ta’ materja prima, kif ukoll matul l-użu tal-prodott u meta l-prodott jasal fit-tmiem tal-ħajja tiegħu. Il-kumpaniji li jipprovdu s-servizzi, inklużi servizzi finanzjarji, ukoll se jkollhom iqisu l-impatti klimatiċi tal-attivitajiet li huma jappoġġjaw jew jiffaċilitaw.

Meta l-SMEs ikunu parti mill-katina ta’ valur, il-kumpaniji jiġu mħeġġa jappoġġjawhom billi jipprovdu l-informazzjoni meħtieġa.

2.4.   L-istruttura tad-divulgazzjonijiet proposti

Dawn il-linji gwida jipproponu divulgazzjonijiet relatati mal-klima għal kull wieħed mill-ħames oqsma ta’ rappurtar elenkati fid-Direttiva dwar ir-Rappurtar Mhux Finanzjarju: (a) mudell tan-negozju (b) politiki u diliġenza dovuta (c) eżitu tal-politiki (d) riskji prinċipali u mmaniġġjar tar-riskji u (e) indikaturi ewlenin tal-prestazzjoni.

Għal kull qasam ta’ rappurtar, il-linji gwida jidentifikaw għadd limitat ta’ divulgazzjonijiet rakkomandati. Kumpanija għandha tqis l-użu ta’ divulgazzjonijiet rakkomandati sa fejn dawn ikunu meħtieġa għal fehim tal-iżvilupp, il-prestazzjoni, il-pożizzjoni u l-impatt tal-attivitajiet tagħha.

Gwida ulterjuri hija pprovduta wara d-divulgazzjonijiet rakkomandati għal kull qasam ta’ rappurtar. Il-gwida ulterjuri tikkonsisti minn suġġerimenti għal informazzjoni aktar dettaljata li l-kumpaniji jistgħu jqisu inkluż bħala parti mid-divulgazzjonijiet rakkomandati. Barra minn hekk, gwida ulterjuri hija pprovduta għall-banek u għall-kumpaniji tal-assigurazzjoni fl-Anness I.

Meta jiddeċiedu jekk jużawx u sa fejn jużaw id-divulgazzjonijiet rakkomandati u s-suġġerimenti aktar dettaljati inklużi fil-gwida ulterjuri, inkluża l-gwida ulterjuri għall-banek u għall-kumpaniji tal-assigurazzjoni fl-Anness I, il-kumpaniji għandhom iqisu l-prinċipji ta’ rappurtar mhux finanzjarju tajjeb inkluż fil-Linji Gwida Mhux Vinkolanti tal-2017 tal-Kummissjoni dwar ir-Rappurtar Mhux Finanzjarju, inklużi l-prinċipji dwar l-informazzjoni divulgata jiġifieri: materjali; ġusta, ibbilanċjata u komprensibbli; u komprensiva iżda konċiża.

Id-daqs tar-riskji u l-opportunitajiet relatati mal-klima li tidentifika l-kumpanija se jkunu fattur importanti biex jiġi deċiż jekk jużawx u sa fejn jużaw id-divulgazzjonijiet rakkomandati u l-gwida ulterjuri.

2.5.   Konsistenza mal-oqfsa u l-istandards ta’ rappurtar rikonoxxuti

Il-kumpaniji huma mħeġġa jiddivulgaw l-informazzjoni skont l-istandards u l-oqfsa ta’ rappurtar aċċettati b’mod wiesa’ sabiex jimmassimizzaw il-komparabbiltà għall-partijiet ikkonċernati tagħhom. Bħala kontribut għall-konverġenza fil-livell globali u fil-livell tal-UE, dawn il-linji gwida jirreferu għal għadd ta’ oqfsa u standards ta’ rappurtar rikonoxxuti.

Huma jinkorporaw, b’mod partikolari, id-divulgazzjonijiet rakkomandati tat-Task-Force dwar id-Divulgazzjonijiet Finanzjarji relatati mal-Klima (TCFD), li huma allinjati ma’ oqfsa prinċipali oħra. Id-divulgazzjonijiet irrakkomandati mit-TCFD huma identifikati b’mod separat f’dawn il-linji gwida. L-Anness II juri r-rekwiżiti ta’ divulgazzjoni tad-Direttiva dwar ir-Rappurtar Mhux Finanzjarju mmappjati mad-divulgazzjonijiet irrakkomandati tat-TCFD.

Minbarra t-TCFD, dawn il-linji gwida jqisu wkoll b’mod partikolari l-istandards u l-oqfsa żviluppati mill-Inizjattiva għar-Rappurtar Globali (Global Reporting Initiative, GRI), mis-CDP, mill-Bord tal-Istandards ta’ Divulgazzjoni dwar il-Klima (Climate Disclosure Standards Board,CDSB), mill-Bord tal-Istandards ta’ Kontabbiltà tas-Sostenibbiltà (SASB) u mill-Kunsill Internazzjonali għar-Rappurtar Integrat (IIRC) u mill-Iskema ta’ ġestjoni u verifika ambjentali (EMAS). (19)

3.   DIVULGAZZJONIJIET IRRAKKOMANDATI U GWIDA ULTERJURI

3.1.   Mudell tan-Negozju

Huwa importanti ħafna li l-partijiet ikkonċernati jifhmu l-opinjoni tal-kumpanija dwar kif it-tibdil fil-klima jaffettwa l-mudell u l-istrateġija tan-negozju tagħha, u kif l-attivitajiet tagħha jistgħu jaffettwaw il-klima, fuq perjodu qasir, medju u twil. Sabiex jirrappurtaw b’mod adegwat dwar materji relatati mal-klima, il-kumpaniji se jkollhom bżonn jadottaw perspettiva aktar fit-tul milli normalment jadottaw għar-rappurtar finanzjarju.

Ir-riskji u l-opportunitajiet relatati mal-klima ta’ kumpanija jiddependu fuq it-tip ta’ attività tagħha, il-postijiet ġeografiċi tagħha u l-ippożizzjonar tagħha fit-tranżizzjoni għal ekonomija b’livell baxx ta’ emissjonijiet tal-karbonju u reżiljenti għat-tibdil fil-klima.

Sabiex jinkorporaw b’mod xieraq l-effetti potenzjali tat-tibdil fil-klima fil-proċessi tal-ippjanar tagħhom, il-kumpaniji għandhom iqisu kif ir-riskji u l-opportunitajiet relatati mal-klima jistgħu jevolvu u l-implikazzjonijiet potenzjali tan-negozju tagħhom f’kundizzjonijiet differenti. Mod wieħed kif tali implikazzjonijiet jiġu vvalutati huwa permezz tal-użu ta’ analiżi tax-xenarju.

Kumpaniji li ma jqisux b’mod xieraq il-mudell u l-istrateġija tan-negozju tagħhom fid-dawl tat-tibdil fil-klima jistgħu jikkawżaw effetti negattivi fuq il-klima u jesperjenzaw impatti negattivi fuq in-negozju tagħhom bħal fuq ir-rapport tal-introjtu, il-finanzjament, il-piż regolatorju futur u l-“liċenzja biex topera”. Min-naħa l-oħra, l-identifikazzjoni ta’ opportunitajiet ġodda relatati mal-klima tista’ ssaħħaħ il-mudell tan-negozju u l-prospettiva tal-qligħ ta’ kumpanija.

Tabella 1

Divulgazzjoni dwar Mudell tan-Negozju

Iddeskrivi l-impatt tar-riskji u l-opportunitajiet relatati mal-klima fuq il-mudell, l-istrateġija u l-ippjanar finanzjarju tan-negozju tal-kumpanija. [Tkopri r-rakkomandazzjoni tat-TCFD dwar l-Istrateġija b)]

Iddeskrivi l-modi li bihom il-mudell tan-negozju tal-kumpanija jista’ jaffettwa l-klima b’mod pożittiv u negattiv.

Iddeskrivi r-reżiljenza tal-mudell u l-istrateġija tan-negozju tal-kumpanija, filwaqt li tqis xenarji differenti relatati mal-klima f’perjodi ta’ żmien differenti, inkluż mill-anqas xenarju ta’ 2 °C jew anqas u xenarju ta’ aktar minn 2 °C. (20) [Tkopri r-rakkomandazzjoni tat-TCFD dwar l-Istrateġija c)]

Gwida ulterjuri:

—	Iddeskrivi kwalunkwe bidla fil-mudell u fl-istrateġija tan-negozju tal-kumpanija sabiex jiġu indirizzati r-riskji ta’ tranżizzjoni u fiżiċi u sabiex jiġu sfruttati opportunitajiet tan-negozju relatati mal-klima.

—	Iddeskrivi d-dipendenzi tal-kumpanija fuq il-kapitali naturali, bħall-ilma, l-art, l-ekosistemi jew il-bijodiversità li jinsabu f’riskju minħabba t-tibdil fil-klima.

—	Iddeskrivi kif kwalunkwe bidla fil-mudell u fl-istrateġija tan-negozju tal-kumpanija sabiex tiġi indirizzata l-mitigazzjoni u/jew l-adattament għat-tibdil fil-klima se tibdel il-ħtiġijiet tal-kapital uman tal-kumpanija.

—	Iddeskrivi l-opportunitajiet relatati mal-effiċjenza fir-riżorsi u l-iffrankar tal-kostijiet, l-adozzjoni ta’ sorsi tal-enerġija b’livell baxx ta’ emissjonijiet, l-iżvilupp ta’ prodotti u servizzi ġodda, l-aċċess għal swieq ġodda, u l-bini ta’ reżiljenza tul il-katina ta’ valur.

—	Iddivulga kif il-kumpanija għażlet ix-xenarji.

—	Iddeskrivi kif l-attivitajiet tal-kumpanija jikkontribwixxu għat-tibdil fil-klima permezz tal-emissjonijiet ta’ gassijiet serra, inkluż mid-deforestazzjoni, mid-degradazzjoni tal-foresti jew mill-bidla fl-użu tal-art.

3.2.   Politiki u Proċessi ta’ Diliġenza Dovuta

Is-sistemi ta’ governanza u kontroll huma fundamentali għall-fehim tal-partijiet ikkonċernati dwar ir-robustezza tal-approċċ ta’ kumpanija dwar kwistjonijiet relatati mal-klima. L-informazzjoni dwar l-involviment tal-bord u l-maniġment, b’mod partikolari r-responsabbiltajiet rispettivi tagħhom fir-rigward tat-tibdil fil-klima, tinforma lill-partijiet ikkonċernati dwar il-livell ta' għarfien tal-kumpanija dwar kwistjonijiet relatati mal-klima. Meta tiddeskrivi r-rwol tal-bord, il-kumpanija jista’ jkun li tkun tixtieq tagħmel referenza għal kwalunkwe dikjarazzjoni dwar it-tmexxija korporattiva li jkun meħtieġ li tippubblika.

Il-partijiet ikkonċernati jistgħu jkunu interessati wkoll fil-politiki tal-kumpanija u kwalunkwe miri assoċjati li juru l-impenn tagħha lejn il-mitigazzjoni u l-adattament għat-tibdil fil-klima, u fil-proċessi ta’ diliġenza dovuta tagħha. Dan se jgħin lill-partijiet ikkonċernati jifhmu l-kapaċità tal-kumpanija li timmaniġġja n-negozju tagħha biex timminimizza r-riskju relatat mal-klima, tillimita l-impatti negattivi fuq il-klima u timmassimizza l-impatti pożittivi tul il-katina ta’ valur.

Il-politiki u l-proċessi li jindirizzaw suġġetti relatati mal-klima jistgħu jkunu separati minn politiki u proċessi operazzjonali oħra jew integrati fihom. Il-proċessi ta’ diliġenza dovuta li jqisu l-klima, pereżempju, jistgħu jiġu integrati fil-qafas tal-immaniġġjar tar-riskji tal-kumpanija. Il-kumpanija jista’ jkun li tkun tixtieq tispjega l-approċċ tagħha dwar l-immaniġġjar ta’ kwistjonijiet relatati mal-klima u r-raġunament għall-għażla ta’ dan l-approċċ.

Tabella 2

Divulgazzjoni dwar il-Politiki u l-Proċessi ta’ Diliġenza Dovuta

Iddeskrivi kwalunkwe politika tal-kumpanija relatata mal-klima, inkluż kwalunkwe politika dwar il-mitigazzjoni jew l-adattament għat-tibdil fil-klima.

Iddeskrivi kwalunkwe mira relatata mal-klima li l-kumpanija stabbiliet bħala parti mill-politiki tagħha, speċjalment kwalunkwe mira dwar l-emissjonijiet ta’ gassijiet serra, u kif il-miri tal-kumpanija huma relatati mal-miri nazzjonali u internazzjonali u b’mod partikolari mal-Ftehim ta’ Pariġi.

Iddeskrivi s-sorveljanza tal-bord ta’ riskji u opportunitajiet relatati mal-klima. [Tkopri r-rakkomandazzjoni tat-TCFD dwar il-Governanza a)]

Iddeskrivi l-irwol tal-maniġment fil-valutazzjoni u fl-immaniġġjar ta’ riskji u opportunitajiet relatati mal-klima u spjega r-raġunament għall-approċċ. [Tkopri r-rakkomandazzjoni tat-TCFD dwar il-Governanza b)]

Gwida ulterjuri:

—	Iddeskrivi l-ingaġġ tal-kumpanija mal-katina ta’ valur tagħha dwar kwistjonijiet relatati mal-klima; waqt li tispjega kif din tinvolvi ruħha ma’ sħab upstream u downstream biex tippromwovi l-mitigazzjoni u/jew l-adattament għat-tibdil fil-klima.

—	Spjega kif kwistjonijiet relatati mal-klima jiġu integrati fil-proċessi tat-teħid ta’ deċiżjonijiet operazzjonali tal-kumpanija.

—	Iddeskrivi kwalunkwe ingaġġ tal-politika pubblika dwar kwistjonijiet relatati mal-klima li twettaq il-kumpanija, inkluż is-sħubija ta’ kwalunkwe organizzazzjoni jew grupp ta’ interess rilevanti.

—	Iddeskrivi jekk, kif u kemm (b’mod partikolari l-bord u l-maniġment) il-kumpanija għandha aċċess għall-għarfien espert dwar kwistjonijiet relatati mal-klima, mill-kapaċità interna tagħha stess u/jew minn sorsi esterni.

—

Iddeskrivi kwalunkwe politika tal-impjegati li hija relatata mal-klima, pereżempju investimenti f’ħiliet meħtieġa għat-tranżizzjoni għal teknoloġiji b’livell baxx ta’ emissjonijiet tal-karbonju, jew miżuri biex jiġi żgurat li l-impjegati jistgħu jwettqu l-kompiti tagħhom b’mod sigur fi klima li qed tinbidel.

—	Iddeskrivi jekk u kif il-politika ta’ remunerazzjoni tal-kumpanija tqis il-prestazzjoni relatata mal-klima, inkluż il-prestazzjoni skont il-miri stabbiliti.

—	Iddivulga kwalunkwe mira relatata mal-enerġija li l-kumpanija stabbiliet bħala parti mill-politiki tagħha (ara t-Taqsima 3.5).

—	Spjega r-raġunament wara l-għażla ta’ kwalunkwe mira relatata mal-klima użata mill-kumpanija.

—	Fil-każ ta’ kumpaniji tas-settur tal-art, iddeskrivi kwlaunkwe mira relatata ma’ “bjar” tal-gassijiet serra (assorbiment tal-emissjonijiet ta' gassijiet serra).

3.3.   Eżiti

Id-divulgazzjoni ta’ eżiti ta’ politika relatati mal-klima tgħin lill-partijiet ikkonċernati jimmonitorjaw u jivvalutaw l-iżvilupp, il-pożizzjoni, il-prestazzjoni u l-impatt ta’ kumpanija bħala riżultat tal-politiki tagħha. Billi tivvaluta l-prestazzjoni tagħha permezz tal-istabbiliment tal-miri u r-rappurtar dwar il-miri, il-kumpanija turi l-konsistenza tal-istrateġija, l-azzjonijiet u d-deċiżjonijiet tagħha relatati mat-tibdil fil-klima.

Aspetti kwantitattivi, bħal indikaturi li jappoġġjaw l-analiżijiet, huma koperti fit-Taqsima 3.5 Indikaturi Ewlenin tal-Prestazzjoni ta’ dawn il-linji gwida.

Tabella 3

Divulgazzjoni dwar l-Eżiti

Iddeskrivi l-eżiti tal-politika tal-kumpanija dwar it-tibdil fil-klima, inkluż il-prestazzjoni tal-kumpanija mal-indikaturi użati u l-miri stabbiliti biex jiġu mmaniġġjati r-riskji u l-opportunitajiet relatati mal-klima. [Tkopri l-Metriċi u l-miri c) tat-TCFD].

Iddeskrivi l-iżvilupp tal-emissjonijiet tal-gassijiet serra mal-miri stabbiliti u r-riskji relatati maż-żmien. [Tkopri l-Metriċi u l-miri b) tat-TCFD].

Gwida ulterjuri:

—	Iddeskrivi kif il-prestazzjoni tal-kumpanija rigward il-klima tinfluwenza l-prestazzjoni finanzjarja tagħha, fejn possibbli b’referenza għall-KPI finanzjarji.

3.4.   Riskji Prinċipali u l-Immaniġġjar tagħhom

Huwa importanti ħafna għall-investituri u għall-partijiet interessati tagħhom li jkunu jafu kif il-kumpanija tidentifika riskji relatati mal-klima, ir-riskji prinċipali li identifikat, u kif timmaniġġja dawk ir-riskji.

Id-divulgazzjonijiet dwar ir-riskji għandhom jinkludu riskji tal-kumpanija li għandhom impatt negattiv fuq il-klima u riskji tat-tibdil fil-klima li għandhom impatt negattiv fuq il-kumpanija (riskji ta’ tranżizzjoni u fiżiċi), u jekk u kif dawn it-tnejn huma marbutin. Huwa rrakkomandat li l-kumpaniji jqisu d-definizzjonijiet tar-riskji mogħtija fit-Taqsima 2.3 meta jiddeċiedu liema informazzjoni se jiddivulgaw rigward ir-riskji.

Meta jiddivulgaw informazzjoni dwar riskji relatati mal-klima, il-kumpaniji għandhom iqisu perjodi ta’ żmien itwal milli normalment jużaw għar-riskji finanzjarji.

Il-lakuni fid-data u fil-metodoloġiji f’xi każijiet jistgħu jagħmluha diffiċli li tiġi ppreżentata informazzjoni kwantitattiva dwar riskji relatati mal-klima, speċjalment fir-rigward ta’ perjodi ta’ żmien itwal. F’tali każijiet, il-kumpaniji huma mħeġġa jippreżentaw informazzjoni kwalitattiva sakemm dawn il-kwistjonijiet dwar id-data u metodoloġiċi jiġu indirizzati b’mod adegwat.

Tabella 4

Id-Divulgazzjoni dwar ir-Riskji Prinċipali u l-Immaniġġjar Tagħhom

Iddeskrivi l-proċessi tal-kumpanija għall-identifikazzjoni u l-valutazzjoni ta’ riskji relatati mal-klima fuq perjodu qasir, medju u twil u ddivulga kif il-kumpanija tiddefinixxi perjodu qasir, medju u twil. (21) [Tkopri r-rakkomandazzjoni tat-TCFD dwar l-Immaniġġjar tar-riskji a)]

Iddeskrivi r-riskji prinċipali relatati mal-klima li l-kumpanija identifikat fuq perjodu qasir, medju u twil tul il-katina ta’ valur, u kwalunkwe preżunzjoni li tkun saret waqt l-identifikazzjoni ta’ dawn ir-riskji. [Tkopri r-rakkomandazzjoni tat-TCFD dwar l-Istrateġija a)]. Din id-deskrizzjoni għandha tinkludi r-riskji prinċipali li jirriżultaw minn kwalunkwe dipendenza fuq il-kapitali naturali mhedda mit-tibdil fil-klima, bħall-ilma, l-art, l-ekosistemi jew il-bijodiversità.

Iddeskrivi l-proċessi għall-immaniġġjar tar-riskji relatati mal-klima (jekk applikabbli kif jieħdu d-deċiżjonijiet biex jimmitigaw, jittrasferixxu, jaċċettaw, jew jikkontrollaw dawn ir-riskji), u kif il-kumpanija qed timmaniġġja r-riskji partikolari relatati mal-klima li identifikat. [Tkopri r-rakkomandazzjoni tat-TCFD dwar l-Immaniġġjar tar-riskju b)]

Iddeskrivi kif il-proċessi għall-identifikazzjoni, il-valutazzjoni, u l-immaniġġjar tar-riskji relatati mal-klima huma integrati fl-immaniġġjar tar-riskji globali tal-kumpanija. [Tkopri r-rakkomandazzjoni tat-TCFD dwar l-Immaniġġjar tar-Riskju c)]. Aspett importanti ta’ din id-deskrizzjoni huwa kif il-kumpanija tiddetermina s-sinifikat relattiv tar-riskji relatati mal-klima fir-rigward ta’ riskji oħra.

Gwida ulterjuri:

—	Iddeskrivi kwlaunkwe miżuri ta’ adattament dwar il-klima li ħadet il-kumpanija bħala parti mill-proċess ta’ mmaniġġjar tar-riskju.

—	Agħti deskrizzjoni dettaljata tar-riskji prinċipali relatati mal-klima skont l-attività kummerċjali.

—	Agħti deskrizzjoni dettaljata tar-riskji prinċipali relatati mal-klima skont il-post ġeografiku.

—	Identifka l-postijiet li huma kritiċi għall-katini ta’ valur, inklużi operazzjonijiet, fornituri u swieq.

—	Iddeskrivi kif il-kumpanija tistabbilixxi u tapplika l-limiti għar-riskji relatati mal-klima, inklużi kwalunkwe passi li jittieħdu biex kwistjonijiet jittellgħu għall-attenzjoni tal-maniġment.

—	Iddeskrivi l-proċessi għall-prijoritizzazzjoni ta’ riskji relatati mal-klima, inklużi kwalunkwe livell limitu applikat u indika liema riskji tul il-katina ta’ valur jitqiesu bħala l-aktar sinifikanti.

—	Ikkategorizza r-riskji prinċipali tat-tibdil fil-klima dwar il-prestazzjoni finanzjarja tal-kumpanija skont jekk humiex riskji ta’ tranżizzjoni (riskji ta’ politika, legali, teknoloġiċi, tas-suq u reputazzjonali) jew riskji fiżiċi (riskji akuti u kroniċi).

—	Iddivulga kwalunke mmappjar tar-riskji li jinkludi kwistjonijiet relatati mal-klima.

—	Ipprovdi definizzjonijiet għat-terminoloġija tar-riskji użata jew referenzi għal oqfsa tal-klassifikazzjoni tar-riskju eżistenti użati.

—	Iddeskrivi l-frekwenza ta’ reviżjonijiet u analiżijiet fir-rigward tal-identifikazzjoni u l-valutazzjoni tar-riskji.

—	Iddeskrivi r-rabtiet bejn ir-riskji prinċipali relatati mal-klima u l-KPI finanzjarji.

—	Iddivulga kif ix-xenarji u/jew l-ipprezzar intern tal-karbonju jintużaw għal azzjonijiet ta’ mmaniġġjar tar-riskji bħall-mitigazzjoni, it-trasferiment jew l-adattament.

—	Iddivulga l-impatti finanzjarji ta’ avvenimenti tat-temp estremi, inklużi indikaturi possibbli dwar jiem ta’ interruzzjonijiet fin-negozju u kostijiet assoċjati, kostijiet ta’ tiswijiet, indeboliment ta’ assi fissi, tfixkil fil-katina ta’ valur u dħul mitluf.

—	Iddeskrivi kif il-prestazzjoni tal-kumpanija tiġi affettwata mill-varjabbiltà tat-temp, b’mod partikolari għal kumpaniji sensittivi għall-varjabbiltà fit-temperatura u l-preċipitazzjoni.

3.5.   Indikaturi Ewlenin tal-Prestazzjoni

Skont id-Direttiva dwar ir-Rappurtar Mhux Finanzjarju, il-kumpaniji għandhom jiddivulgaw indikaturi ewlenin tal-prestazzjoni rilevanti għan-negozji partikolari tagħhom. Huma għandhom iqisu l-użu ta’ indikaturi sabiex jappoġġjaw id-divulgazzjonijiet l-oħra tagħhom relatati mal-klima, bħal dawk relatati mal-eżiti jew ir-riskji prinċipali u l-immaniġġjar tagħhom, u biex jippermettu l-aggregazzjoni u l-komparabbiltà bejn il-kumpaniji u l-ġurisdizzjonijiet. L-indikaturi għandhom jiġu integrati ma’ divulgazzjonijiet oħra sabiex jappoġġjaw u jispjegaw in-narrattiva. Madanakollu, hija meqjusa wkoll prattika tajba li tiġi ppubblikata tabella addizzjonali li tippreżenta l-indikaturi kollha f’post wieħed.

Sabiex jintlaħqu l-aspettattivi tat-TCFD, il-kumpaniji għandhom jiddivulgaw l-indikaturi u l-miri użati mill-kumpanija biex jiġu vvalutati r-riskji u l-opportunitajiet relatati mal-klima f’konformità mal-istrateġija u mal-proċessi ta' mmaniġġjar tar-riskju tagħhom [Tkopri r-rakkomandazzjoni tat-TCFD Metriċi u miri a)].

Ir-robustezza u l-affidabbiltà tad-data huma fundamentali biex l-informazzjoni tkun tista’ tintuża fi proċessi tat-teħid ta’ deċiżjonijiet. Meta ma tkunx preżenti, il-kumpaniji għandhom jipprovdu deskrizzjoni ta’ u kwalunkwe bidla fil-metodoloġiji użati fil-kalkolu jew l-istima tal-indikaturi.

Indikaturi rrakkomandati  (22)

Skont il-valutazzjoni tal-materjalità tal-kumpanija u sabiex tiġi ffaċilitata komparabbiltà akbar tad-divulgazzjonijiet tal-informazzjoni mhux finanzjarja mill-kumpaniji, il-kumpaniji għandhom iqisu li jiddivulgaw l-indikaturi f’din it-taqsima.

L-emissjonijiet ta’ gassijiet serra

Din it-taqsima fiha erba’ indikaturi differenti dwar l-emissjonijiet tal-gassijiet serra: emissjonijiet diretti ta’ gassijiet serra; emissjonijiet indiretti ta’ gassijiet serra mill-ġenerazzjoni ta’ elettriku, fwar, sħana, jew tkessiħ miksuba u kkunsmati; l-emissjonijiet indiretti kollha l-oħra ta’ gassijiet serra li jokkorru fil-katina ta’ valur tal-kumpanija ta’ rappurtar; u l-mira ta’ emissjonijiet assoluti ta’ gassijiet serra. Il-kumpaniji li jiddeċiedu li jużaw kwalunkwe wieħed minn dawn l-indikaturi jew l-indikaturi kollha għandhom:

—

jikkalkulaw l-emissjonijiet ta’ gassijiet serra tagħhom f’konformità mal-metodoloġija tal-Protokoll tal-Gassijiet Serra jew l-istandards ISO 14064-1:2018 u, fejn xieraq, mar-Rakkomandazzjoni tal-Kummissjoni 179/2013 għall-metodi komuni dwar il-kejl tal-prestazzjoni tal-gassijiet serra skont approċċ taċ-ċiklu tal-ħajja (l-Impronta Ambjentali tal-Organizzazzjoni u l-Impronta Ambjentali tal-Prodott). Dan se jippermetti l-aggregazzjoni u l-komparabbiltà bejn il-kumpaniji u l-ġurisdizzjonijiet;

—	indika l-istatus ta’ verifika/assigurazzjoni tal-partijiet terzi li japplika għall-emissjonijiet ta’ gassijiet serra tal-Ambitu 1, l-Ambitu 2 u l-Ambitu 3 irrappurtati tagħhom.

KPI	Unità ta’ Kejl	Eżempju	Raġunament	Allinjament ma’ Oqfsa ta’ Rappurtar Oħra	Ir-Referenza għall-Politika tal-UE
L-emissjonijiet diretti ta’ gassijiet serra minn sorsi proprjetà ta’ jew ikkontrollati mill-kumpanija (l-Ambitu 1)	Tunnellati metriċi ta’ CO2e (23)	270 900 tCO2e	Dan il-KPI jiżgura li l-kumpaniji qed ikejlu l-marka tal-karbonju tagħhom minn emissjonijiet diretti b’mod preċiż.	Il-Metriċi u l-Miri tat-TCFD, il-Kwestjonarju tas-CDP dwar it-Tibdil fil-Klima, GRI 305, il-qafas CDSB, SASB, EMAS	L-Iskema tal-UE għan-negozjar ta’ emissjonijiet (ETS) Qafas ta' politika għall-klima u l-enerġija għall-2030
Gwida ulterjuri: — Il-kumpaniji għandhom jiddivulgaw 100 % mill-emissjonijiet ta’ gassijiet serra tal-Ambitu 1 tagħhom. Dan se jgħin biex titjieb il-kwalità tar-rappurtar dwar l-emissjonijiet tal-gassijiet serra ta’ kumpaniji oħra. Jekk kumpanija ma tkunx tista’ tiġbor data affidabbli għal proporzjon mill-emissjonijiet ta’ gassijiet serra tal-Ambitu 1, din għandha tieħu stima raġjonevoli għal dak il-proporzjon sabiex tasal għal ċifra għal 100 %. F’dak il-każ, il-kumpanija għandha tiddivulga wkoll (1) il-% tal-emissjonijiet li għalih tkun inġabret data affidabbli u l-% tal-emissjonijiet li jkunu ġew stmati, (2) ir-raġunijiet għaliex ma setgħetx tinġabar data affidabbli għal proporzjon tal-emissjonijiet u (3) il-metodoloġija użata biex jiġi stmat il-proporzjon ta’ emissjonijiet li għalih ma setgħetx tinġabar data affidabbli. — Fejn xieraq, il-kumpaniji għandhom iqisu d-divulgazzjoni ta’ analiżi tal-emissjonijiet ta’ gassijiet serra tal-Ambitu 1 skont il-pajjiż jew ir-reġjun (inkluża l-UE), skont l-attività tan-negozju, u skont is-sussidjarja. Eż.: L-emissjonijiet ta’ gassijiet serra tal-Ambitu 1 fil-pajjiż/reġjun X 42 260 tCO2e, fil-pajjiż/reġjun Y 54 180 tCO2e.

KPI	Unità ta’ Kejl	Eżempju	Raġunament	Allinjament ma’ Oqfsa ta’ Rappurtar Oħra	Ir-Referenza għall-Politika tal-UE
L-emissjonijiet indiretti ta’ gassijiet serra mill-ġenerazzjoni ta’ elettriku, fwar, sħana, jew tkessiħ miksuba u kkunsmati (li flimkien jissejħu “elettriku”) (l-Ambitu 2)	Tunnellati metriċi ta’ CO2e	632 400 tCO2e	Dan il-KPI jiżgura li l-kumpaniji qed ikejlu l-emissjonijiet minn elettriku, fwar, sħana u tkessiħ mixtrija jew miksuba.	Il-Metriċi u l-Miri tat-TCFD, il-Kwestjonarju tas-CDP dwar it-Tibdil fil-Klima, GRI 305, il-qafas CDSB, EMAS	Qafas ta' politika għall-klima u l-enerġija għall-2030
Gwida ulterjuri: — Jekk ikun meħtieġ, il-kumpaniji għandhom jiddikjaraw jekk hemmx xi sorsi (eż. faċilitajiet, gassijiet serra speċifiċi, attivitajiet, ġeografiji, eċċ) tal-emissjonijiet ta’ gassijiet serra tal-Ambitu 2 fil-limiti ta’ rappurtar magħżula tagħhom li għaliha l-emissjonijiet ta’ gassijiet serra ma setgħux jinġabru jew jiġu stmati, u r-raġunijiet għal dan. — Fejn xieraq, il-kumpaniji għandhom iqisu d-divulgazzjoni ta’ analiżi tal-emissjonijiet ta’ gassijiet serra tal-Ambitu 2 skont il-pajjiż jew ir-reġjun (inkluża l-UE), skont l-attività tan-negozju, u skont is-sussidjarja. Eż.: L-emissjonijiet ta’ gassijiet serra tal-Ambitu 2 fil-pajjiż/reġjun X 98 654 tCO2e, fil-pajjiż/reġjun Y tal-UE: 126 480 tCO2e.

KPI	Unità ta’ Kejl	Eżempju	Raġunament	Allinjament ma’ Oqfsa ta’ Rappurtar Oħra	Ir-Referenza għall-Politika tal-UE
L-emissjonijiet indiretti ta’ gassijiet serra kollha (mhux inklużi fl-Ambitu 2) li jokkorru fil-katina ta’ valur tal-kumpanija ta’ rappurtar, inklużi l-emissjonijiet upstream kif ukoll dawk downstream (l-Ambitu 3)	Tunnellati metriċi ta’ CO2e	4 383 000 tCO2e	Għall-biċċa l-kbira tal-kumpaniji, il-maġġoranza tal-emissjonijiet iseħħu indirettament minn attivitajiet tal-katina ta’ valur. Dan il-KPI jgħin biex titkejjel ir-reqqa tal-proċessi ta’ kontabbiltà tal-kumpaniji u biex wieħed jifhem kif il-kumpaniji qed janalizzaw il-marki tal-emissjonijiet tagħhom.	Il-Metriċi u l-Miri tat-TCFD, il-Kwestjonarju tas-CDP dwar it-Tibdil fil-Klima, GRI 305, il-qafas CDSB, EMAS	Qafas ta' politika għall-klima u l-enerġija għall-2030
Gwida ulterjuri: — L-Ambitu 3 għandu jispjega l-emissjonijiet mill-attivitajiet li jseħħu “downstream” u “upstream” mill-operazzjonijiet proprji tal-kumpanija. — Il-kumpaniji ma għandhom jeskludu l-ebda attività li tikkomprometti r-rilevanza tal-inventarju dwar l-emissjonijiet ta’ gassijiet serra tal-Ambitu 3. L-Istandard ta’ Kontabbiltà u ta’ Rappurtar tal-Katina ta’ Valur Korporattiva tal-Protokoll tal-Gassijiet Serra (l-Ambitu 3) u l-Anness H tal-ISO 14064-1:2018 jipprovdu kriterji għad-determinazzjoni tar-rilevanza. Il-kumpaniji għandhom jispjegaw kwalunkwe kategorija eskluża fid-divulgazzjoni tal-emissjonijiet ta’ gassijiet serra tal-Ambitu 3. Meta l-SMEs ikunu parti mill-katina ta’ valur, il-kumpaniji jiġu mħeġġa jappoġġjawhom billi jipprovdu l-informazzjoni meħtieġa.

KPI	Unità ta’ Kejl	Eżempju	Raġunament	Allinjament ma’ Oqfsa ta’ Rappurtar Oħra	Ir-Referenza għall-Politika tal-UE
Il-mira tal-emissjonijiet assoluti ta’ gassijiet serra	Tunnellati metriċi ta’ CO2e miksuba jew % ta' tnaqqis, mis-sena bażi	Tnaqqis ta’ 20 % f’emissjonijiet assoluti, ekwivalenti għal tnaqqis ta’ 1 500 000 tCO2e sal-2025 mis-sena bażi 2018	L-istabbiliment ta’ miri jagħti direzzjoni u struttura lill-istrateġija ambjentali. Dan il-KPI jgħin biex wieħed jifhem l-impenji tal-kumpaniji lejn it-tnaqqis tal-emissjonijiet u jekk il-kumpanija jkollhiex objettiv li lejh qed tarmonizza u tiffoka sforzi relatati mal-emissjonijiet.	Il-Metriċi u l-Miri tat-TCFD, il-Kwestjonarju tas-CDP dwar it-Tibdil fil-Klima, GRI 103-2 u 305, il-qafas CDSB, SASB, EMAS	Qafas ta' politika għall-klima u l-enerġija għall-2030
Gwida ulterjuri: — Il-kumpaniji għandhom jiddeskrivu jekk il-mira/miri tagħhom hix relatata/humiex relatati mal-emissjonijiet ta’ gassijiet serra tal-Ambitu 1, tal-Ambitu 2 u/jew tal-Ambitu 3 tagħhom kompletament jew parzjalment. — Il-kumpaniji għandhom jiddeskrivu l-iżvilupp tal-emissjonijiet ta’ gassijiet serra mal-miri stabbiliti (ara t-Taqsima 3.3 Eżiti). — Il-kumpaniji għandhom iqisu l-istabbiliment ta’ miri għall-2025 jew għall-2030 u jirrieżaminawhom kull ħames snin. Huma jistgħu jqisu wkoll l-istabbiliment ta’ mira għall-2050 sabiex jallinjaw mal-Ftehim ta’ Pariġi. — Fejn xieraq, il-kumpaniji għandhom iqisu d-divulgazzjoni ta’ miri tal-emissjonijiet ta’ gassijiet serra skont il-pajjiż jew ir-reġjun (inkluża l-UE), skont l-attività tan-negozju, u skont is-sussidjarja. — Il-kumpaniji jistgħu jqisu d-divulgazzjoni ta’ mira ta’ intensità addizzjonali espressa f’tunnellati metriċi ta’ CO2e għal kull metriku tan-negozju jew % ta’ tnaqqis ta’ metrika tal-intensità, mis-sena bażi (eż. it-tnaqqis ta’ 8 % f’emissjonijiet relattivi, ekwivalenti għal tnaqqis ta’ 350 tCO2e kull EUR 1 miljun ta’ dħul sal-2025 mis-sena bażi 2018).

L-enerġija

KPI	Unità ta’ Kejl	Eżempju	Raġunament	Allinjament ma’ Oqfsa ta’ Rappurtar Oħra	Ir-Referenza għall-Politika tal-UE
Il-konsum u/jew il-produzzjoni totali tal-enerġija minn sorsi rinnovabbli u mhux rinnovabbli	MWh	292 221 MWh ikkonsmati minn sorsi rinnovabbli; 1 623 453 MWh ikkonsmati minn sorsi mhux rinnovabbli	Il-konsum u l-produzzjoni tal-enerġija jirrappreżenta proporzjon importanti mill-emissjonijiet ta’ gassijiet serra.	Il-Metriċi u l-Miri tat-TCFD, il-Kwestjonarju tas-CDP dwar it-Tibdil fil-Klima, GRI 302, il-qafas CDSB, SASB, EMAS	Qafas ta' politika għall-klima u l-enerġija għall-2030; Id-Direttiva dwar l-Effiċjenza fl-Enerġija
Gwida ulterjuri — Il-fjuwils ikkonsmati bħala feedstock ma jinħarqux għall-finijiet ta’ enerġija u ma għandhomx jiġu inklużi fil-kalkoli għal dan l-indikatur. — Inkludi analiżi tas-sorsi differenti tal-enerġija rinnovabbli. Is-sorsi tal-enerġija rinnovabbli huma dawk li jistgħu jiġu rikostitwiti b’mod naturali fuq perjodu ta’ żmien uman, bħar-riħ, ix-xemx, l-ilma, ġeotermika, bijomassa, eċċ. Din id-definizzjoni teskludi l-fjuwils fossili kollha (faħam, żejt, gass naturali) u l-fjuwils nukleari. L-enerġija mill-iskart ma għandhiex tiġi inkluża jekk tkun derivata mill-fjuwils fossili. (24) — Meta tiddivulga sorsi tal-enerġija mhux rinnovabbli, agħmel distinzjoni bejn sorsi b’livell baxx ta’ emissjonijiet tal-karbonju u sorsi oħra tal-enerġija mhux rinnovabbli.

KPI	Unità ta’ Kejl	Eżempju	Raġunament	Allinjament ma’ Oqfsa ta’ Rappurtar Oħra	Ir-Referenza għall-Politika tal-UE
Mira tal-effiċjenza fl-enerġija	Perċentwal	Titjib ta’ 6.5 % sal-2025 mis-sena bażi 2018 għall-prodott, l-output jew l-attività.	Dan il-KPI jgħin lill-utenti tad-data jifhmu l-ambizzjoni tal-kumpaniji li tuża l-enerġija b’mod aktar effiċjenti, li jista’ jnaqqas il-kostijiet tal-enerġija tagħhom u jbaxxi l-emissjonijiet tal-gassijiet serra. Huwa jipprovdi sfond ulterjuri dwar kif il-kumpanija timmira li tikseb il-miri ta’ tnaqqis fl-emissjonijiet tagħha.	Il-Metriċi u l-Miri tat-TCFD, il-Kwestjonarju tas-CDP dwar it-Tibdil fil-Klima, GRI 103-2 u 302, SASB, EMAS	Qafas ta' politika għall-klima u l-enerġija għall-2030; Id-Direttiva dwar l-Effiċjenza fl-Enerġija
Gwida ulterjuri — Il-kumpaniji għandhom jiddeskrivu l-progress mal-miri tal-enerġija stabbiliti (ara t-Taqsima 3.3 Eżiti).

KPI	Unità ta’ Kejl	Eżempju	Raġunament	Allinjament ma’ Oqfsa ta’ Rappurtar Oħra	Ir-Referenza għall-Politika tal-UE
Il-mira tal-konsum u /jew tal-produzzjoni tal-enerġija rinnovabbli	Żieda ta' % tal-proporzjon ta’ enerġija rinnovabbli kkunsmata/prodotta mis-sena bażi	Żieda ta’ 13 % tal-proporzjon ta’ enerġija rinnovabbli kkunsmata sal-2025 mis-sena bażi 2018	Dan il-KPI jgħin lill-utenti tad-data jifhmu l-ambizzjoni tal-kumpaniji li jipproduċu jew jikkonsmaw l-enerġija b’emissjonijiet ta’ gassijiet serra aktar baxxi.	Il-Metriċi u l-Miri tat-TCFD, il-Kwestjonarju tas-CDP dwar it-Tibdil fil-Klima, GRI 103-2 u 302, EMAS	Qafas ta' politika għall-klima u l-enerġija għall-2030; Id-Direttiva dwar l-Enerġija Rinnovabbli
Gwida ulterjuri — Il-kumpaniji għandhom jiddeskrivu l-progress mal-miri tal-enerġija stabbiliti (ara t-Taqsima 3.3 Eżiti).

Riskji fiżiċi

KPI	Unità ta’ Kejl	Eżempju	Raġunament	Allinjament ma’ Oqfsa ta’ Rappurtar Oħra	Ir-Referenza għall-Politika tal-UE
Assi impenjati f’reġjuni li aktarx se jsiru aktar esposti għal riskji tat-tibdil fil-klima fiżiċi akuti jew kroniċi	Perċentwal	15 % ta’ valur kontabilistiku ta’ assi reali skoperti	Avvenimenti ta’ temp estrem jistgħu jwasslu għal interruzzjonijiet jew limitazzjonijiet fil-kapaċità ta’ produzzjoni jew tnaqqis bikri ta’ faċilitajiet operazzjonali. Il-valur tal-assi fl-oqsma esposti għal żieda fit-temp jaffettwa l-implikazzjonijiet potenzjali għall-valwazzjoni tal-assi. Huwa importanti li dan il-KPI jiġi osservat flimkien mad-divulgazzjonijiet fir-rigward tal-istrateġiji u l-politiki ta’ adattament tal-kumpanija.	Il-Metriċi u l-Miri tat-TCFD, il-kodiċijiet 450a.1 SASB kollha fi ħdan l-industriji magħżula	L-Istrateġija ta’ Adattament tal-UE
Gwida ulterjuri: — Huwa rrakkomandat li l-kumpaniji jiddivulgaw is-sorsi jew il-metodoloġija li jkunu użaw biex jidentifikaw reġjuni aktar esposti għal riskji fiżiċi relatati mal-klima.

Prodotti u servizzi

KPI	Unità ta’ Kejl	Eżempju	Raġunament	Ir-Referenza għall-Politika tal-UE
Fatturat perċentwali fis-sena ta’ rappurtar minn prodotti jew servizzi assoċjati ma’ attivitajiet li jissodisfaw il-kriterji għall-kontribut sostanzjali għall-mitigazzjoni jew għall-adattament għat-tibdil fil-klima kif stipulat fir-Regolament dwar l-istabbiliment ta’ qafas sabiex jiġi ffaċilitat investiment sostenibbli (tassonomija tal-UE). U / jew Investiment (CapEx) u/jew nefqiet (OpEx) perċentwali fis-sena ta’ rappurtar għall-assi jew il-proċessi assoċjati mal-attivitajiet li jissodisfaw il-kriterji għall-kontribut sostanzjali għall-mitigazzjoni jew għall-adattament għat-tibdil fil-klima kif stipulat fir-Regolament dwar l-istabbiliment ta’ qafas sabiex jiġi ffaċilitat investiment sostenibbli (tassonomija tal-UE).	Perċentwal	12.5 % (dħul) minn prodotti jew servizzi assoċjati ma’ attivitajiet li jikkontribwixxu b’mod sostanzjali għall-mitigazzjoni jew għall-adattament għat-tibdil fil-klima 8 % (CapEx) fi prodotti assoċjati ma’ attivitajiet li jikkontribwixxu b’mod sostanzjali għall-mitigazzjoni jew għall-adattament għat-tibdil fil-klima	Dawn il-KPIs jipprovdu informazzjoni utli lill-investituri li huma interessati f’kumpaniji li l-prodotti u s-servizzi tagħhom jikkontribwixxu b’mod sostanzjali għall-mitigazzjoni jew għall-adattament għat-tibdil fil-klima filwaqt li ma jagħmlux ħsara sinifikanti lil xi wieħed mill-objettivi ambjentali l-oħra tal-UE.	Ir-Regolament Propost dwar l-istabbiliment ta’ qafas sabiex jiġi ffaċilitat l-investiment sostenibbli Il-pjan ta’ azzjoni tal-Kummissjoni dwar il-finanzjament ta' tkabbir sostenibbli
Gwida ulterjuri — Il-kumpaniji għandhom jirrappurtaw dwar dan l-indikatur jekk u meta r-Regolament propost dwar l-istabbiliment ta’ qafas sabiex jiġi ffaċilitat l-investiment sostenibbli (tassonomija tal-UE) jiġi approvat. Waqt li jivvalutaw jekk attività tikkontribwixxix b’mod sostanzjali għaż-żewġ objettivi ta’ mitigazzjoni jew adattament għat-tibdil fil-klima tal-UE filwaqt li ma tagħmilx ħsara sinifikanti lil xi objettiv ambjentali ieħor tal-UE, il-kumpaniji għandhom iqisu l-kriterji u l-kundizzjonijiet rilevanti kollha stipulati fir-Regolament.

Finanzjament Ekoloġiku

KPI	Unità ta’ Kejl	Eżempju	Raġunament	Allinjament ma’ Oqfsa ta’ Rappurtar Oħra	Ir-Referenza għall-Politika tal-UE
Il-Proporzjon ta’ Bonds Ħodor relatati mal-Klima: L-ammont totali ta’ bonds ħodor pendenti (fi tmiem is-sena) diviż bl-ammont totali ta’ bonds pendenti (medja mobbli ta’ 5 snin) u / jew, Il-Proporzjon ta’ Dejn Aħdar relatat mal-Klima: L-ammont totali ta’ strumenti tad-dejn aħdar pendenti kollha (fi tmiem is-sena) diviż bl-ammont totali tad-dejn kollu pendenti (medja mobbli ta’ 5 snin).	Perċentwal	20 % tal-bonds	Dawn il-KPIs jgħinu lill-kumpaniji jikkomunikaw kif il-pjan ta’ tranżizzjoni lejn livell baxx ta’ emissjonijiet tal-karbonju huwa appoġġjat minn attivitajiet ta’ finanzjament tad-dejn u kif jinġabar kapital għal proġetti eżistenti u ġodda b’benefiċċji tal-klima.	ISO/CD 14030-1 Bonds ħodor -- Il-prestazzjoni ambjentali ta’ proġetti u assi nnominati (ABBOZZ)	Il-pjan ta’ azzjoni tal-Kummissjoni dwar il-finanzjament ta' tkabbir sostenibbli
Gwida ulterjuri: — L-ammont totali ta’ bonds ħodor jew dejn aħdar għandu jinkludi biss bonds u strumenti ta’ dejn maħruġa skont Standard ta’ Bond Aħdar potenzjali tal-UE jekk u meta tali standard jiġi approvat, jew skont kwalunkwe qafas ta’ bond aħdar rikonoxxut b’mod wiesa’, bħall-Prinċipji tal-Bonds Ħodor u l-Prinċipji tas-Self Aħdar. Il-kumpaniji għandhom jispeċifikaw il-qafas ta' bond aħdar applikat. — Għal emittenti ta’ bonds li jkunu ħarġu bonds li mhumiex strumenti elenkati (eż. bħal pjazzamenti privati), għandha tiġi divulgata l-analiżi ta’ dawk elenkati u dawk mhux elenkati. — Il-kumpaniji għandhom iqisu wkoll li jipprovdu l-miri futuri relatati ma’ dawn il-KPIs.

Barra mill-indikaturi ta’ hawn fuq, il-kumpaniji għandhom iqisu wkoll dan li ġej:

—

Indikaturi speċifiċi għas-settur rilevanti għall-industrija partikolari. Kumpaniji minn setturi li jinkludu iżda mhumiex limitati għal dawk tal-enerġija, tat-trasport, tal-materjali, tal-proprjetà immobbli, u tal-agrikoltura għandhom jirreferu għall-gwida supplimentari tat-TCFD għall-gruppi mhux finanzjarji u oqfsa ta’ rappurtar oħra relatati mal-klima sabiex tiġi żgurata l-komparabbiltà tal-KPIs irrappurtati fis-setturi u fil-kumpaniji. (25)

—

Indikaturi dwar kwistjonijiet ambjentali relatati. Il-kumpaniji li l-mudelli tan-negozju tagħhom jiddependu fuq kapitali naturali mhedda mit-tibdil fil-klima jista' jkollhom bżonn jiddivulgaw indikaturi relatati ma’ dawk il-kapitali naturali (eż. l-ilma, il-produttività tal-ħamrija jew il-bijodiversità). Il-kumpaniji b’impatti avversi fuq il-klima minħabba l-bidla fl-użu tal-art inkluż deforestazzjoni u degradazzjoni ta’ foresti għandhom iqisu li jiddivulgaw indikaturi dwar dawn il-materji. (26)

—	Indikaturi dwar kapital uman u kwistjonijiet soċjali relatati, bħat-taħriġ u r-reklutaġġ ta’ impjegati.

—

Indikaturi relatati ma’ opportunitajiet. Kumpaniji li jinvolvu ruħhom fi tranżizzjoni għal ekonomija b’livell baxx ta’ emissjonijiet tal-karbonju u reżiljenti għat-tibdil fil-klima, allinjati mal-politiki prinċipali tal-UE (27), li qed iwettqu attivitajiet ta’ mitigazzjoni/adattament għat-tibdil fil-klima li jistgħu jinbidlu f’opportunitajiet għall-kumpanija għandhom iqisu li jiddivulgaw KPIs li jirriflettu tali sforzi. Eżempji ta’ dawn jistgħu jkunu d-dħul minn prodotti b’livell baxx ta’ emissjonijiet tal-karbonju, dħul minn prodotti jew servizzi li japplikaw għall-mudell tal-ekonomija ċirkolari, u n-nefqiet fir-riċerka u l-iżvilupp fil-produzzjoni ta’ ekonomija ċirkolari.

---

(1)  ĠU L 330, 15.11.2014, p. 1.

(2)  https://ec.europa.eu/clima/policies/strategies/2030_mt

(3)  https://ec.europa.eu/clima/policies/strategies/2050_mt

(4)  https://eur-lex.europa.eu/legal-content/MT/TXT/?uri=CELEX:52018DC0097

(5)  https://eur-lex.europa.eu/legal-content/MT/TXT/?uri=CELEX%3A52018PC0353

(6)  https://eur-lex.europa.eu/legal-content/MT/TXT/?uri=CELEX%3A52018PC0354

(7)  https://eur-lex.europa.eu/legal-content/FR/TXT/?uri=CELEX%3A52018PC0355

(8)  https://www.fsb-tcfd.org/

(9)  https://ec.europa.eu/info/consultations/finance-2019-non-financial-reporting-guidelines_en

(10)  ĠU C 215, 5.7.2017, p. 1.

(11)  Dan ma jipprevjenix il-kunsiderazzjoni xierqa ta’ informazzjoni kummerċjalment sensittiva. Informazzjoni rilevanti tista’ tiġi pprovduta f’termini usa’ li xorta jwasslu informazzjoni utli lill-investituri u lil partijiet ikkonċernati oħra u tissodisfa l-objettiv tat-trasparenza kumplessiva.

(12)  https://www.fsb-tcfd.org/wp-content/uploads/2017/12/FINAL-TCFD-Annex-Amended-121517.pdf

(13)  Ara l-Anness II “L-Immappjar tar-Rekwiżiti tad-Direttiva dwar ir-Rappurtar Mhux Finanzjarju u d-Divulgazzjonijiet Rakkomandati tat-TCFD”

(14)  Entitajiet ta’ interess pubbliku kbar skont id-Direttiva 2013/34/UE b’aktar minn 500 impjegat.

(15)  L-Artikolu 19a(1) tad-Direttiva 2013/34/UE (introdott mid-Direttiva 2014/95/UE, id-Direttiva dwar ir-Rappurtar Mhux Finanzjarju).

(16)  Din id-deskrizzjoni ta’ riskji ta’ tranżizzjoni u fiżiċi hija sa ċertu punt ibbażata fuq ir-rapport tat-Task Force dwar Divulgazzjonijiet Finanzjarji relatati mal-Klima.

(17)  Gwida ulterjuri dwar ir-rappurtar ta’ riskji fiżiċi tista' tinstab f’Advancing TCFD Guidance on Physical Climate Risks and Opportunities, il-BERŻ u ċ-Ċentru Globali għall-Eċċellenza dwar l-Adattament għall-Klima

https://www.physicalclimaterisk.com/media/EBRD-GCECA_draft_final_report_full.pdf

(18)  Spjegazzjoni u gwida ulterjuri fir-rigward tal-kapital naturali hija disponibbli mill-Koalizzjoni tal-Kapital Naturali https://naturalcapitalcoalition.org/

(19)  Id-Djalogu dwar ir-Rappurtar Korporattiv qed iwettaq ħidma sabiex id-divulgazzjonijiet relatati mal-klima tal-IIRC, tas-SASB, tal-GRI, tas-CDP u tas-CDSB jiġu allinjati aħjar. Huwa rrakkomandat li l-kumpaniji jqisu din il-ħidma meta tkun lesta.

(20)  Il-kumpaniji huma mħeġġa jqisu xenarju ta’ 1,5 °C, fid-dawl tal-konklużjonijiet tar-Rapport Speċjali tal-2018 tal-IPCC. Għal aktar informazzjoni dwar kif titwettaq analiżi tax-xenarju biex tiġi vvalutata r-reżiljenza strateġika ta’ kumpanija, ara s-Suppliment Tekniku tat-TCFD “The Use of Scenario Analysis in Disclosure of Climate-related Risks and Opportunities” (L-Użu ta' Analiżi tax-Xenarju fid-Divulgazzjoni ta' Riskji u Opportunitajiet relatati mal-Klima)

https://www.fsb-tcfd.org/wp-content/uploads/2017/06/FINAL-TCFD-Technical-Supplement-062917.pdf.

(21)  Id-definizzjoni ta’ perjodu qasir, medju u twil aktarx tiddependi fuq il-mudell tan-negozju tal-kumpanija u ċ-ċiklu tal-ħajja tal-assi u tal-obbligazzjonijiet tagħha.

(22)  Sabiex tittejjeb l-użabbiltà, f’din it-taqsima hija pprovduta gwida ulterjuri rilevanti immedjatament wara kull indikatur irrakkomandat.

(23)  Ekwivalenti għad-diossidu tal-karbonju jew ekwivalenti għas-CO2 (CO2e) huwa kejl metriku użat fit-tqabbil tal-emissjonijiet minn diversi gassijiet serra abbażi tal-potenzjal tat-tisħin globali tagħhom, permezz tal-konverżjoni tal-ammonti ta’ gassijiet oħra għall-ammont ekwivalenti ta’ diossidu tal-karbonju bl-istess potenzjal ta’ tisħin globali.

(24)  Definizzjoni ta’ “enerġija rinnovabbli” mill-Gwida tar-Rappurtar dwar it-Tibdil fil-Klima tas-CDP għall-2018.

(25)  TCFD (2017): L-Implimentazzjoni tar-Rakkomandazzjonijiet tat-Task-Force dwar Divulgazzjonijiet Finanzjarji relatati mal-Klima, https://www.fsb-tcfd.org/wp-content/uploads/2017/06/FINAL-TCFD-Annex-062817.pdf. Standards u oqfsa ta’ rappurtar oħra li jipprovdu KPI speċifiċi għall-industrija dwar kwistjonijiet relatati mal-klima jinkludu l-Kwestjonarji tas-CDP dwar it-Tibdil fil-Klima, is-Sigurtà tal-Ilma u l-Foresti, il-GRI 305: Emissjonijiet 2016 u l-GRI 302: L-Istandards tal-enerġija għall-2016 jew l-istandards tal-industrija tas-SASB.

(26)  Gwida addizzjonali tista’ tinstab fis-Sett ta’ Għodod tal-Protokoll tal-Kapital Naturali https://naturalcapitalcoalition.org/protocol-toolkit/ u fir-Rakkomandazzjoni tal-Kummissjoni 179/2013 għall-metodi komuni dwar il-kejl tal-prestazzjoni tal-gassijiet serra skont approċċ taċ-ċiklu tal-ħajja (Impronta Ambjentali tal-Organizzazzjoni u Impronta Ambjentali tal-Prodott).

(27)  Bħall-Pakkett tal-Ekonomija Ċirkolari, id-Direttiva dwar l-Enerġija Rinnovabbli, id-Direttiva dwar l-Effiċjenza fl-Enerġija, l-Iskema tal-UE għan-Negozjar ta’ Emissjonijiet jew il-Pakkett dwar it-Trasport Nadif. Għal aktar dettalji, ara https://ec.europa.eu/clima/policies/strategies/2050_en.