Notifika ta’ Bidu ta’ investigazzjoni ta’ salvagwardja rigward importazzjonijiet ta’ prodotti tal-azzar

(2018/C 111/10)

L-informazzjoni li għandha disponibbli l-Kummissjoni Ewropea (il-Kummissjoni Ewropea), inklużi l-miżuri ta’ sorveljanza fis-seħħ (1), uriet li l-importazzjonijiet ta’ ċerti prodotti tal-azzar żdiedu f’daqqa dan l-aħħar, li juri li hemm biżżejjed evidenza li dawn ix-xejriet fl-importazzjonijiet jidher li qed jirrikjedu miżuri ta’ salvagwardja. Għaldaqstant, il-Kummissjoni ddeċidiet ex officio li tibda investigazzjoni ta’ salvagwardja bis-saħħa tal-Artikolu 5 tar-Regolament (UE) 2015/478 tal-Parlament Ewropew u tal-Kunsill (2) u l-Artikolu 3 tar-Regolament (UE) 2015/755 tal-Parlament Ewropew u tal-Kunsill (3).

1.   PRODOTTI INVESTIGATI

Il-prodotti soġġetti għal din l-investigazzjoni huma ċerti prodotti tal-azzar (“il-prodotti kkonċernati”). Il-prodotti kkonċernati, flimkien mal-kodiċijiet NM li bħalissa jaqgħu taħthom huma mniżżlin fl-Anness I ta’ din in-Notifika. Dawn il-kodiċijiet NM qed jingħataw biss għall-informazzjoni.

2.   ŻIEDA FL-IMPORTAZZJONIJIET U D-DANNU

L-informazzjoni li bħalissa hija disponibbli għall-Kummissjoni tindika li l-importazzjonijiet totali tal-prodotti kkonċernati żdiedu minn 17,8 miljun tunnellata għal 29,3 miljun tunnellata fil-perjodu bejn l-2013 u l-2017. L-importazzjonijiet totali tal-prodotti kkonċernati żdiedu b’madwar 65 % bejn l-2013 u l-2016. Iż-żidiet ewlenin seħħew fl-2015 u partikolarment fl-2016, meta dawn laħqu 28,6 miljun tunnellata. L-importazzjonijiet tal-prodotti kkonċernati baqgħu f’livell sinifikanti wara dan. Barra minn hekk, kien hemm żidiet f’daqqa, riċenti, sinifikanti u kbar fl-importazzjonijiet ta’ kull wieħed mill-prodotti kkonċernati f’termini assoluti. Barra minn hekk, il-Kummissjoni tinnota wkoll li l-importazzjonijiet totali tal-prodotti kkonċernati żdiedu f’termini relattivi wkoll, jiġifieri minn 7,3 % għal 11,6 % f’termini ta’ produzzjoni u minn 12,2 % sa 17,6 % f’termini ta’ konsum. Fiż-żewġ każijiet, iż-żidiet urew irwieħhom tul il-perjodu bejn l-2014 u l-2016, wara liema żmien l-importazzjonijiet baqgħu f’livell relattivament għoli. Iż-żieda fl-importazzjonijiet jidher li hija riżultat ta’ żviluppi li ma kinux mistennija, bħall-kapaċità żejda globali tal-manifattura tal-azzar, u miżuri kummerċjali adottati minn sensiela ta’ pajjiżi terzi tul l-aħħar snin fil-kuntest ta’ dik il-kapaċità żejda globali.

Hemm ukoll biżżejjed evidenza prima facie li turi li l-volum u l-prezzijiet ta’ dawn l-importazzjonijiet ikkawżaw jew qed jheddu li jikkawżaw indeboliment ġenerali sinfikanti tal-pożizzjoni tal-industrija tal-Unjoni, abbażi tal-indikaturi ekonomiċi speċifikati fl-Artikolu 9 tar-Regolament (UE) 2015/478 u l-Artikolu 6 tar-Regolament (UE) 2015/755. B’mod partikolari, din l-evidenza turi li l-importazzjonijiet tal-prodotti kkonċernati kellhom, fost konsegwenzi oħrajn, impatt negattiv fuq is-sehem mis-suq tal-produtturi tal-Unjoni. Barra minn hekk, il-prezzijiet tal-importazzjoni tul dan il-perjodu kienu iktar baxxi mill-prezzijiet tal-bejgħ tal-industrija tal-Unjoni. Dan tefa’ pressjoni sinifikanti fuq il-prezzijiet tal-bejgħ tal-industrija tal-Unjoni, li rriżultat f’livell negattiv jew baxx ta’ profitt. Xi prodotti kkonċernati, minkejja li jidher li s-sitwazzjoni finanzjarja tjiebet fl-2017, għadhom f’qagħda fraġli u vulnerabbli għal żieda ulterjuri fl-importazzjonijiet, li aktarx se tkun imminenti minħabba l-kuntest ta’ kapaċità żejda ġenerali tal-azzar, l-għadd jikber ta’ miżuri ta’ difiża tal-kummerċ meħudin minn pajjiżi terzi fuq prodotti tal-azzar u l-miżuri “Section 232” tal-Istati Uniti tal-Amerka. L-investigazzjoni ser teżamina s-sitwazzjoni tal-prodotti kkonċernati, inkluż is-sitwazzjoni ta’ kull kategorija ta’ prodotti individwali, ibbażat ukoll fuq l-aktar żviluppi riċenti, bħal kwalunkwe devjazzjoni tal-kummerċ li tirriżulta mill-miżuri tal-Istati Uniti.

3.   PROĊEDURA

Ladarba ddeterminat, wara li infurmat lill-Istati Membri, li hemm biżżejjed evidenza biex jiġi ġġustifikat il-bidu ta’ investigazzjoni, il-Kummissjoni qiegħda b’dan tibda investigazzjoni bis-saħħa tal-Artikolu 5 tar-Regolament (UE) 2015/478 u l-Artikolu 3 tar-Regolament (UE) 2015/755.

L-investigazzjoni se tiddetermina jekk bħala riżultat ta’ żviluppi mhux previsti, il-prodotti qegħdinx jiġu impurtati fl-Unjoni fi kwantitajiet tant ikbar u/jew fuq tali termini jew kundizzjonijiet li jikkawżaw, jew jheddu li jikkawżaw, dannu serju għall-produtturi tal-Unjoni tal-prodotti simili jew direttament kompetituri.

3.1.   Is-sottomissjonijiet bil-miktub, it-tweġibiet tal-kwestjonarju u l-korrispondenza

Sabiex tikseb it-tagħrif li tqis li hu meħtieġ fl-investigazzjoni tagħha, il-Kummissjoni se tibgħat kwestjonarji lill-produtturi magħrufa tal-prodotti simili jew direttament kompetituri u lil kull assoċjazzjoni magħrufa ta’ produtturi fl-Unjoni. Il-kwestjonarji mimlija jridu jaslu għand il-Kummissjoni fi żmien 21 jum mid-data li fiha jkunu ntbagħtu.

Il-partijiet interessati kollha, inklużi l-produtturi esportaturi, l-importaturi u l-utenti tal-prodotti kkonċernati u l-assoċjazzjonijiet tagħhom huma mistiedna li jesprimu l-fehmiet tagħhom bil-miktub, jippreżentaw l-informazzjoni u li jipprovdu evidenza ta’ sostenn. Ir-rappreżentazzjonijiet f’format liberu għandhom jiġu sottomessi fi żmien 21 jum mid-data tal-pubblikazzjoni ta’ din in-Notifika f’Il-Ġurnal Uffiċjali tal-Unjoni Ewropea. Il-partijiet interessati jistgħu jippreżentaw lilhom infushom billi jikkuntattjaw lill-Kummissjoni, preferibbilment permezz tal-posta elettronika, sa mhux iktar tard minn 15-il jum wara l-pubblikazzjoni ta’ din in-notifika f’Il-Ġurnal Uffiċjali tal-Unjoni Ewropea, u jitolbu kwestjonarju. Il-kwestjonarju mimli jrid jiġi sottomess fi żmien 21 jum mid-data li fih ikun intbagħat.

Kull preżentazzjoni ta’ fehmiet jew informazzjoni wara dawn l-iskadenza jistgħu jiġu injorati.

3.2.   Struzzjonijiet għas-sottomissjonijiet bil-miktub u biex jintbagħtu l-kwestjonarji mimlija u l-korrispondenza

L-informazzjoni li tingħata lill-Kummissjoni għandha tkun ħielsa mid-drittijiet tal-awtur. Il-partijiet interessati, qabel ma jippreżentaw lill-Kummissjoni informazzjoni u/jew data soġġetta għad-drittijiet tal-awtur ta’ terzi persuni, iridu jitolbu permess speċifiku lid-detentur tad-drittijiet li jippermetti b’mod espliċitu a) li l-Kummissjoni tuża l-informazzjoni u d-data għall-iskop ta’ dan il-proċediment tad-difiża tal-kummerċ u b) li tipprovdi l-informazzjoni u/jew id-data lill-partijiet interessati f’din l-investigazzjoni f’għamla li tippermettilhom li jeżerċitaw id-drittijiet tad-difiża tagħhom.

Is-sottomissjonijiet kollha bil-miktub, inkluża l-informazzjoni mitluba f’din in-Notifika, il-kwestjonarji mimlija u l-korrispondenza pprovduta mill-partijiet interessati li għaliha jintalab trattament kunfidenzjali jkunu mmarkati bħala “Ristrett” (Limited) (1). Il-partijiet li jippreżentaw informazzjoni matul din l-investigazzjoni huma mistiedna jagħtu raġuni għat-talba tagħhom għal trattament kunfidenzjali.

Sabiex jiġu żgurati d-drittijiet tad-difiża adegwati għall-partijiet interessati kollha tul l-investigazzjoni, il-partijiet li jipprovdu informazzjoni “Ristretta” (Limited) huma rikjesti li jipprovdu sommarji mhux kunfidenzjali tagħha, li se jiġu mmarkati “Għall-ispezzjoni minn partijiet interessati” (For inspection by interested parties). Jenħtieġ li dawn is-sommarji jkunu ddettaljati tant li jippermettu li l-qofol tat-tagħrif imressaq b’mod kunfidenzjali jinftiehem raġonevolment. Jekk parti li tipprovdi informazzjoni kunfidenzjali tonqos milli tagħti raġuni ġusta għat-talba għal trattament kunfidenzjali jew ma tipprovdix sommarju mhux kunfidenzjali tagħha fil-format u l-kwalità mitlubin, tali informazzjoni tista’ tiġi injorata.

Il-partijiet interessati huma mistiedna jressqu s-sottomissjonijiet u t-talbiet kollha permezz tal-posta elettronika inklużi dokumenti skenjati ta’ prokuri u ta’ ċertifikazzjoni, bl-eċċezzjoni ta’ tweġibiet voluminużi li jiġu mressqa fuq CD-ROM jew DVD bl-idejn jew permezz ta’ ittra reġistrata.

Meta jużaw il-posta elettronika, il-partijiet interessati jesprimu l-qbil tagħhom mar-regoli applikabbli għas-sottomissjonijiet elettroniċi li jinsabu fid-dokument “KORRISPONDENZA MAL-KUMMISSJONI EWROPEA F’KAŻIJIET TA’ DIFIŻA TAL-KUMMERĊ” ippubblikat fuq is-sit web tad-Direttorat Ġenerali għall-Kummerċ:

http://trade.ec.europa.eu/doclib/docs/2011/june/tradoc_148003.pdf

Il-partijiet interessati jridu jindikaw l-isem, l-indirizz, in-numru tat-telefown u indirizz tal-posta elettronika validu tagħhom u jridu jiżguraw li l-indirizz tal-posta elettronika pprovdut ikun indirizz elettroniku tax-xogħol uffiċjali operattiv u ċċekkjat kuljum. Ladarba jingħataw id-dettalji ta’ kuntatt, il-Kummissjoni se tikkomunika mal-partijiet interessati permezz tal-posta elettronika biss, dment li ma jitolbux li jirċievu d-dokumenti kollha mingħand il-Kummissjoni permezz ta’ mezz ieħor ta’ komunikazzjoni jew sakemm in-natura tad-dokument li għandu jintbagħat ma tkunx teħtieġ l-użu tal-posta reġistrata. Għal iktar regoli u informazzjoni dwar il-korrispondenza mal-Kummissjoni inklużi l-prinċipji li japplikaw għas-sottomissjonijiet bil-posta elettronika, jenħtieġ li l-partijiet interessati jikkonsultaw l-istruzzjonijiet ta’ komunikazzjoni mal-partijiet interessati msemmija hawn fuq.

L-indirizz tal-Kummissjoni għall-korrispondenza:

3.3.   Seduti ta’ smigħ

Bis-saħħa tal-Artikolu 5 tar-Regolament (UE) 2015/478 u l-Artikolu 3 tar-Regolament (UE) 2015/755, il-partijiet interessati kollha jistgħu japplikaw biex jinstemgħu mill-Kummissjoni fi żmien 21 jum mid-data ta’ pubblikazzjoni ta’ din in-Notifika f’Il-Ġurnal Uffiċjali tal-Unjoni Ewropea.

4.   SPEZZJONI TAL-INFORMAZZJONI

Il-partijiet interssati li jkunu esprimew il-fehmiet tagħhom jew ippreżentaw informazzjoni jew talbu li jinstemgħu f’konformità mal-Artikolu 5 tar-Regolament (UE) 2015/478 u l-Artikolu 3 tar-Regolament (UE) 2015/755, u rappreżentanti tal-pajjiżi esportaturi jistgħu, fuq talba bil-miktub, jispezzjonaw kull informazzjoni disponibbli għall-Kummissjoni b’rabta mal-investigazzjoni għajr dokumenti interni mħejjija mill-awtoritajiet tal-Unjoni jew tal-Istati Membri tagħha, dment li dik l-informazzjoni tkun rilevanti għall-preżentazzjoni tal-każ tagħhom u ma tkunx kunfidenzjali skont it-tifsira tal-Artikolu 8 tar-Regolament (UE) 2015/478 jew l-Artikolu 5 tar-Regolament (UE) 2015/755, u li qed tintuża mill-Kummissjoni fl-investigazzjoni. Il-partijiet interessati li ppreżentaw irwieħhom jistgħu jikkomunikaw fehmiethom dwar l-informazzjoni inkwistjoni lill-Kummissjoni u dawk il-fehmiet jistgħu jiġu meqjusa meta jkunu sostnuti b’biżżejjed evidenza.

5.   NUQQAS TA’ KOOPERAZZJONI

F’każijiet fejn xi parti interessata tirrifjuta l-aċċess għall-informazzjoni meħtieġa jew ma tipprovdihiex fit-termini preskritti stipulati, jew tfixkel b’mod sinifikanti l-investigazzjoni, jistgħu jiġu stabbiliti konklużjonijiet abbażi tal-fatti disponibbli, skont l-Artikolu 5 tar-Regolament (UE) 2015/478 u l-Artikolu 3 tar-Regolament (UE) 2015/755. Meta jinstab li xi parti interessata tkun tat informazzjoni falza jew qarrieqa, l-informazzjoni tista’ tiġi injorata u jistgħu jintużaw il-fatti disponibbli.

6.   UFFIĊJAL TAS-SEDUTA

Il-partijiet interessati jistgħu jitolbu l-intervent tal-Uffiċjal tas-Seduta fi proċedimenti kummerċjali. L-Uffiċjal tas-Seduta jagħmilha ta’ medjatur bejn il-partijiet interessati u s-servizzi ta’ investigazzjoni tal-Kummissjoni. L-Uffiċjal tas-Seduta jeżamina t-talbiet għall-aċċess tal-fajl, it-tilwim dwar il-kunfidenzjalità tad-dokumenti, it-talbiet għall-estensjoni tal-limiti taż-żmien u t-talbiet minn terzi persuni għal smigħ. L-Uffiċjal tas-Seduta jista’ jorganizza seduta ta’ smigħ ma’ parti interessata individwali u jagħmilha ta’ medjatur biex jiżgura li d-drittijiet tad-difiża tal-partijiet interessati jkunu qed jitħaddmu b’mod sħiħ.

It-talba għal seduta ta’ smigħ mal-Uffiċjal tas-Seduta jenħtieġ li ssir bil-miktub u jenħtieġ li jiġu speċifikati r-raġunijiet għat-talba. Għal seduti ta’ smigħ dwar kwistjonijiet li jkollhom x’jaqsmu mal-fażi inizjali tal-investigazzjoni, it-talba trid tiġi ppreżentata fi żmien 15-il jum mid-data tal-pubblikazzjoni ta’ din in-Notifika f’Il-Ġurnal Uffiċjali tal-Unjoni Ewropea.

L-Uffiċjal tas-Seduta se jipprovdi wkoll opportunitajiet biex isir smigħ li jinvolvi lill-partijiet u li jippermetti li jiġu ppreżentati fehmiet differenti u li jitressqu argumenti kuntrarji dwar kwistjonijiet li jirrigwardaw, fost affarijiet oħra, iż-żieda fl-importazzjonijiet, id-dannu, ir-rabta ta’ kawżalità, u l-interess tal-Unjoni.

Għal aktar informazzjoni u għad-dettalji ta’ kuntatt, il-partijiet interessati jistgħu jikkonsultaw il-paġni web tal-Uffiċjal tas-Seduta fuq is-sit web tad-DĠ Kummerċ: http://ec.europa.eu/trade/trade-policy-and-you/contacts/hearing-officer/

7.   SKEDA TAL-INVESTIGAZZJONI

Jekk il-Kummissjoni tiddetermina li l-miżuri huma meħtieġa, il-Kummissjoni għandha tieħu d-deċiżjonijiet meħtieġa f’konformità mal-Kapitolu V tar-Regolamenti (UE) 2015/478 u (UE) 2015/755 rispettivament, mhux aktar tard minn disa’ xhur mid-data tal-bidu, sakemm ma jkunux jeżistu ċirkostanzi ta’ eċċezzjoni, f’liema każ dak il-limitu ta’ żmien jista’ jiġi mtawwal b’perjodu massimu ta’ xahrejn. Jekk il-limitu ta’ żmien jittawwal, il-Kummissjoni se tippubblika Avviż f’Il-Ġurnal Uffiċjali tal-Unjoni Ewropea li fih tistipula kemm se ddum l-estensjoni u sommarju tar-raġunijiet.

8.   PROĊESSAR TA’ DATA PERSONALI

Id-data personali kollha miġbura f’din l-investigazzjoni tiġi trattata skont ir-Regolament (KE) Nru 45/2001 tal-Parlament Ewropew u tal-Kunsill tat-18 ta’ Diċembru 2000 dwar il-protezzjoni ta’ individwu fir-rigward tal-ipproċessar ta’ data personali mill-istituzzjonijiet u l-korpi tal-Komunità u dwar il-moviment liberu ta’ dak id-data  (4).

(1)  Ir-Regolament ta’ Implimentazzjoni tal-Kummissjoni (UE) 2016/670 tat-28 ta’ April 2016 li tintroduċi s-sorveljanza minn qabel tal-Unjonigħall-importazzjonijiet ta’ ċerti prodotti tal-ħadid u tal-azzar li joriġinaw minn ċerti pajjiżi terzi (ĠU L 115, 29.4.2016, p. 37).

(2)  Ir-Regolament (UE) 2015/478 tal-Parlament Ewropew u tal-Kunsill tal-11 ta’ Marzu 2015 dwar ir-regoli komuni għall-importazzjonijiet (ĠU L 83, 27.3.2015, p. 16).

(3)  Ir-Regolament (UE) 2015/755 tal-Parlament Ewropew u tal-Kunsill tad-29 ta’ April 2015 dwar regoli komuni għall-importazzjonijiet minn ċerti pajjiżi terzi (ĠU L 123, 19.5.2015, p. 33).

(1)  Dokument “Ristrett” (Limited) huwa dokument li jitqies kunfidenzjali skont l-Artikolu 8 tar-Regolament (UE) 2015/478, l-Artikolu 5 tar-Regolament (UE) 2015/755 u l-Artikolu 3.2 tal-Ftehim tad-WTO dwar is-Salvagwardji. Huwa wkoll dokument protett skont l-Artikolu 4 tar-Regolament (KE) Nru 1049/2001 tal-Parlament Ewropew u tal-Kunsill (ĠU L 145, 31.5.2001, p. 43).

(4)  ĠU L 8, 12.1.2001, p. 1.