IL-KUMMISSJONI EWROPEA

Brussell, 8.10.2018

COM(2018) 677 final

2018/0348(NLE)

Proposta għal

DEĊIŻJONI TAL-KUNSILL

dwar l-iffirmar, f’isem l-Unjoni, tal-Ftehim ta’ Sħubija dwar is-Sajd Sostenibbli bejn l-Unjoni Ewropea u r-Renju tal-Marokk, tal-Protokoll ta’ implimentazzjoni tiegħu, kif ukoll tal-iskambju ta’ ittri li jakkumpanja dan il-Ftehim

{SWD(2018) 433 final}

MEMORANDUM TA’ SPJEGAZZJONI

1.KUNTEST TAL-PROPOSTA

Raġunijiet u għanijiet tal-proposta

Fit-28 ta’ Frar 2007, daħal fis-seħħ Ftehim ta’ sħubija fis-settur tas-sajd bejn il-Komunità Ewropea u r-Renju tal-Marokk 1 . L-aħħar Protokoll ta’ implimentazzjoni ta’ dan il-Ftehim 2 li daħal fis-seħħ fil-15 ta’ Lulju 2014, skada fl-14 ta’ Lulju 2018. B’mod aktar ġenerali, dan il-Ftehim ta’ Sħubija huwa parti mir-relazzjonijiet bejn l-Unjoni u l-Marokk, kif jidher fil-Ftehim Ewro-Mediterranju li jistabbilixxi assoċjazzjoni bejn il-Komunitajiet Ewropej u l-Istati Membri tagħhom minn naħa, u r-Renju tal-Marokk min-naħa l-oħra 3 , li daħal fis-seħħ fl-2000. Il-Ftehim ifittex li jiżgura l-ġestjoni tajba u s-sostenibbiltà tar-riżorsi tas-sajd mil-lat ekoloġiku, ekonomiku u soċjali.

Abbażi tad-direttivi ta’ negozjati adottati mill-Kunsill 4 , il-Kummissjoni wettqet negozjati mal-gvern tal-Marokk bil-ħsieb li jiġi emendat il-Ftehim ta’ Sħubija dwar is-Sajd bejn il-Komunità Ewropea u r-Renju tal-Marokk, u li jkun hemm qbil dwar Protokoll ta’ implimentazzjoni ġdid tiegħu.

Dawn in-negozjati u t-testi li jirriżultaw minnhom iqisu bi sħiħ is-sentenza tal-Qorti tal-Ġustizzja tal-Unjoni Ewropea tas-27 ta’ Frar 2018 dwar il-kawża C-266/16 5 li ddeċidiet li l-Ftehim dwar is-Sajd u l-Protokoll tiegħu ma kinux japplikaw għall-ilmijiet tal-madwar tat-territorju tas-Saħara tal-Punent. Fid-dawl tal-kunsiderazzjonijiet stabbiliti fis-sentenza tal-Qorti tal-Ġustizzja, u f’konformità max-xewqa taż-żewġ Partijiet, in-negozjati setgħu għaldaqstant jinkludu dan it-territorju u l-ilmijiet tal-madwar fil-Ftehim ta’ Sħubija dwar is-Sajd, għal diversi raġunijiet. L-ewwel nett, minn perspettiva ekonomika huwa importanti li l-flotta tal-Unjoni twettaq l-attivitajiet tas-sajd tagħha, inkluż f’dawn l-ilmijiet, f’qafas ġuridiku sikur fejn l-ambitu ġeografiku jkun definit b’mod ċar. Huwa previst ukoll li dan it-territorju u l-popolazzjoni tiegħu jibbenefikaw mill-impatti soċjoekonomiċi tal-Ftehim b’mod proporzjonali għall-attivitajiet tas-sajd, partikolarment fir-rigward tal-iżbark tal-qabdiet mill-flotta tal-UE, l-impjieg tal-baħħara, l-investimenti u azzjonijiet oħra ta’ appoġġ fis-settur, li huma possibbli bis-saħħa tal-kontribuzzjoni finanzjarja prevista mill-Protokoll tal-Ftehim dwar is-Sajd. Barra minn hekk, ta’ min jinnota li l-Ftehim seta’ jiġi konkluż biss mar-Renju tal-Marokk li jamministra dan it-territorju (almenu l-iktar parti importanti), peress li l-ebda entità oħra ma setgħet tiżgura l-użu sostenibbli ta’ dawn ir-riżorsi, kif ukoll il-ġestjoni u l-monitoraġġ tal-fondi ta’ appoġġ settorjali għall-benefiċċju tat-territorju tas-Saħara tal-Punent u tal-popolazzjoni tiegħu.

Barra minn hekk, il-proposta rigward Ftehim ġdid u Protokoll ġdid tirrispetta bis-sħiħ id-dritt internazzjonali u d-dritt tal-Unjoni. L-Unjoni tenniet b’mod konsistenti l-impenn tagħha tas-soluzzjoni għat-tilwim dwar is-Saħara tal-Punent u tappoġġa l-isforzi tas-Segretarju Ġenerali tan-Nazzjonijiet Uniti u tal-persunal tiegħu mibgħut biex jgħin lill-Partijiet jaslu għal soluzzjoni politika ġusta, sostenibbli u aċċettabbli b’mod reċiproku. B’rabta ma’ dan, l-iskambju ta’ ittri dwar din il-proposta jfakkar il-pożizzjoni tal-Unjoni fir-rigward tas-Saħara tal-Punent.

Wara diversi sessjonijiet tan-negozjati, it-testi li kienu s-suġġett ta’ Ftehim bejn in-negozjaturi, jinkludu l-Ftehim innifsu li jistabbilixxi Sħubija dwar is-Sajd Sostenibbli bejn l-Unjoni Ewropea u r-Renju tal-Marokk (“il-Ftehim dwar is-Sajd”) u li jissostitwixxi l-Ftehim tal-2007, Protokoll ta’ implimentazzjoni ġdid, Anness u Appendiċijiet, kif ukoll skambju ta’ ittri. Dawn it-testi ġew inizjalati fl-24 ta’ Lulju 2018.

Il-Protokoll ikopri perjodu ta’ erba’ snin mid-data ta’ applikazzjoni tiegħu li hija stabbilita bl-Artikolu 16 tiegħu. Il-Ftehim il-ġdid dwar is-sajd iħassar il-Ftehim ta’ sħubija dwar is-sajd bejn il-Komunità Ewropea u r-Renju tal-Marokk li daħal fis-seħħ fit-28 ta’ Frar 2007. Jipprevedi l-possibbiltà ta’ applikazzjoni proviżorja qabel il-konklużjoni tiegħu; madankollu, ma jitqiesx neċessarju li tiġi proposta applikazzjoni proviżorja. L-għan tal-Ftehim il-ġdid hu li jiġu riflessi l-prinċipji tar-riforma tal-2009: governanza tajba fir-rigward tas-sajd u sostenibbiltà, rispett għad-drittijiet tal-bniedem, trasparenza u nondiskriminazzjoni. L-emenda tal-Ftehim hija meħtieġa wkoll biex tikkonforma mas-Sentenza tal-Qorti tas-27 ta’ Frar 2018 u biex tipprovdi l-bażi ġuridika għall-applikazzjoni tal-Ftehim għall-ilmijiet tal-madwar tat-territorju tas-Saħara tal-Punent.

Skont id-direttivi ta’ negozjati, il-Ftehim dwar is-Sajd jipprovdi garanziji marbuta ma’ allokazzjoni ġeografika ġusta tal-benefiċċji soċjoekonomiċi, b’mod proporzjonali għall-attivitajiet tas-sajd, li jirriżultaw mill-użu tal-kontribuzzjoni finanzjarja totali tal-Ftehim (jiġifieri kemm il-kumpens finanzjarju għall-aċċess, għall-appoġġ settorjali u l-imposti mħallsa mis-sidien tal-bastimenti). Dawn il-garanziji jinkludu, b’mod speċjali, il-monitoraġġ tal-allokazzjoni ta’ dawn il-fondi u l-użu tagħhom, li l-Kumitat Konġunt stabbilit mill-Ftehim huwa prinċipalment responsabbli minnhom, u li fi ħdanu jkunu rrappreżentati ż-żewġ Partijiet. Barra minn hekk, hemm dispożizzjonijiet li jipprevedu li l-Marokk jipprovdi rapporti regolari dwar l-attivitajiet imwettqa skont dan il-Ftehim.

Fl-aħħar nett, din il-proposta hija akkumpanjata minn Dokument ta’ Ħidma tal-Persunal tal-Kummissjoni intitolat “Rapport dwar l-evalwazzjoni tal-benefiċċji għall-popolazzjoni tas-Saħara tal-Punent tal-Ftehim ta’ Sħubija dwar is-Sajd Sostenibbli bejn l-Unjoni Ewropea u r-Renju tal-Marokk u l-Protokoll ta’ Implimentazzjoni tiegħu, u dwar il-konsultazzjoni ma’ dik il-popolazzjoni”. Dan ir-rapport għandu jinkludi evalwazzjoni tal-implikazzjonijiet potenzjali tal-Fehim dwar is-Sajd u l-Protokoll tiegħu dwar l-iżvilupp sostenibbli, b’mod partikolari fir-rigward tal-impatt fuq il-popolazzjoni kkonċernata u l-użu tar-riżorsi naturali tat-territorji kkonċernati, kif ukoll sommarju tal-proċess ta’ konsultazzjoni ma’ dawn il-popolazzjonijiet, skont id-direttivi ta’ negozjati li għamlu l-assoċjazzjoni ta’ dawn il-popolazzjonijiet fattur deċiżiv fil-proċess tat-tiġdid tal-Ftehim dwar is-Sajd.

•Konsistenza mad-dispożizzjonijiet eżistenti fil-qasam ta’ politika

L-għan prinċipali tal-Ftehim dwar is-Sajd u l-Protokoll il-ġdid tiegħu hu li permezz ta’ sħubija, jiġi stabbilit sajd sostenibbli u li jingħataw opportunitajiet ta’ sajd għall-bastimenti tal-Unjoni fiż-żona tas-sajd definita fil-Ftehim dwar is-Sajd. L-opportunitajiet offruti huma bbażati fuq l-aħjar parir xjentifiku disponibbli u, għas-sajd ta’ speċijiet migratorji ħafna, jissodisfaw ir-rakkomandazzjonijiet tal-Kummissjoni Internazzjonali għall-Konservazzjoni tat-Tonn tal-Atlantiku (ICCAT). Il-Protokoll il-ġdid iqis ir-riżultati ta’ evalwazzjoni tal-Protokoll preċedenti (2014-2018) u ta’ evalwazzjoni li tħares lejn il-ġejjieni dwar jekk għandux jiġi konkluż Protokoll ġdid. Dawn iż-żewġ evalwazzjonijiet twettqu minn esperti esterni. Il-Protokoll se jippermetti wkoll lill-Unjoni Ewropea u lir-Renju tal-Marokk isaħħu s-sħubija tagħhom sabiex jippromwovu l-użu responsabbli tar-riżorsi tas-sajd fiż-żona tas-sajd u biex jappoġġaw l-isforzi tar-Renju tal-Marokk li jiżviluppa l-ekonomija blu tiegħu. Dawn l-elementi huma koerenti mal-għanijiet u l-obbligi tal-politika komuni tas-sajd 6 .

Il-Protokoll jipprevedi opportunitajiet tas-sajd għal 128 bastiment fis-sitt kategoriji:

–    żewġ kategoriji ta’ sajd fuq skala żgħira fit-Tramuntana: sajd pelaġiku bit-tartarun u bil-konz tal-qiegħ;

–    sajd fuq skala żgħira fin-Nofsinhar bil-qasba u x-xlief;

–    sajd demersali fin-Nofsinhar bix-xbieki tat-tkarkir tal-qiegħ u bil-konz tal-qiegħ;

–    sajd fuq skala żgħira għat-tonn bil-qasba;

–    sajd pelaġiku industrijali bix-xbieki tat-tkarkir pelaġiku jew semipelaġiku u bit-tartarun tal-borża.

•Konsistenza ma’ politiki oħra tal-Unjoni

In-negozjar ta’ Ftehim ta’ sħubija fis-settur tas-sajd sostenibbli mar-Renju tal-Marokk jaqa’ fil-qasam tal-azzjoni esterna tal-Unjoni, u b’mod partikolari jqis l-għanijiet tal-Unjoni dwar ir-rispett tal-prinċipji demokratiċi u d-drittijiet tal-bniedem. Hija koerenti mal-pożizzjoni tal-Unjoni li tappoġġa bis-sħiħ l-isforzi tas-Segretarju Ġenerali tan-Nazzjonijiet Uniti u tal-persunal tiegħu mibgħut biex jgħin lill-Partijiet jaslu għal soluzzjoni politika ġusta, sostenibbli u aċċettabbli b’mod reċiproku, li tkun tipprevedi l-awtodeterminazzjoni tal-poplu tas-Saħara tal-Punent fil-kuntest ta’ arranġamenti konformi mal-għanijiet u l-prinċipji tal-Karta tan-Nazzjonijiet Uniti kif stabbiliti fir-Riżoluzzjonijiet tal-Kunsill tas-Sigurtà tan-Nazzjonijiet Uniti, b’mod partikolari r-Riżoluzzjonijiet 2152 (2014), 2218 (2015), 2385 (2016), 2351 (2017) u 2414 (2018). Il-konklużjoni tal-Ftehim dwar is-Sajd hija mingħajr preġudizzju għall-eżitu tal-proċess politiku dwar l-istatus finali tas-Saħara tal-Punent.

2.BAŻI ĠURIDIKA, SUSSIDJARJETÀ U PROPORZJONALITÀ

•Bażi ġuridika

Il-bażi ġuridika magħżula hija t-Trattat dwar il-Funzjonament tal-Unjoni Ewropea, li l-Artikolu 43(2) tiegħu jistabbilixxi l-politika komuni tas-sajd, filwaqt li l-Artikolu 218(5) tiegħu jistabbilixxi l-istadju kkonċernat tal-proċedura ta’ negozjar u l-konklużjoni tal-ftehimiet bejn l-Unjoni u l-pajjiżi terzi.

•Sussidjarjetà (għall-kompetenza mhux esklużiva)

Il-proposta taqa’ taħt il-komptenza eklużiva.

•Proporzjonalità

Il-proposta hija proporzjonata mal-għan li jiġi stabbilit qafas ta’ governanza ġuridika, ambjentali, ekonomika u soċjali għall-attivitajiet tas-sajd imwettqa mill-bastimenti tal-Unjoni fl-ilmijiet ta’ pajjiżi terzi, kif stipulat fl-Artikolu 31 tar-Regolament dwar il-politika komuni tas-sajd. Tikkonforma mad-dispożizzjonijiet tiegħu, kif ukoll ma’ dawk dwar l-assistenza finanzjarja lil pajjiżi terzi stipulati fl-Artikolu 32 ta’ dak ir-Regolament.

3.RIŻULTATI TAL-EVALWAZZJONIJIET EX POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT

•Evalwazzjonijiet ex post/kontrolli tal-idoneità tal-leġiżlazzjoni eżistenti

Fl-2017, il-Kummissjoni wettqet evalwazzjoni ex post tal-Protokoll 2014-2018 tal-Ftehim ta’ sħubija fis-settur tas-sajd bejn l-Unjoni Ewropea u r-Renju tal-Marokk, kif ukoll evalwazzjoni ex ante tat-tiġdid potenzjali tal-Protokoll. Il-konklużjonijiet tal-evalwazzjoni huma ppreżentati f’dokument ta’ ħidma separat 7 .

L-evalwazzjoni kkonkludiet li s-settur tas-sajd tal-Unjoni għandu interess qawwi fil-possibbiltà li jeżerċita l-attività tiegħu fiż-żona tas-sajd tal-Protokoll, u li t-tiġdid tal-Protokoll se jgħin biex jissaħħu l-kapaċitajiet tal-monitoraġġ, tal-kontroll u tas-sorveljanza, u se jikkontribwixxi għat-titjib fil-governanza tas-sajd fir-reġjun.

•Konsultazzjoni mal-partijiet ikkonċernati

L-Istati Membri, ir-rappreżentanti tas-settur, l-organizzazzjonijiet internazzjonali tas-soċjetà ċivili, kif ukoll l-amministrazzjoni tas-sajd u r-rappreżentanti tas-soċjetà ċivili tar-Renju tal-Marokk ġew ikkonsultati bħala parti mill-evalwazzjoni. Saru wkoll konsultazzjonijiet fil-qafas tal-Kunsill Konsultattiv għall-Flotta ta’ Distanzi Twal, kif ukoll konsultazzjonijiet mal-popolazzjonijiet ikkonċernati fis-Saħara tal-Punent mill-Kummissjoni u s-Servizz Ewropew għall-Azzjoni Esterna (SEAE), biex jiġi żgurat li dawn ikunu jistgħu jesprimu ruħhom dwar l-estensjoni tas-sħubija għall-ilmijiet tal-madwar tas-Saħara tal-Punent u li jibbenefikaw mill-impatti soċjoekonomiċi tal-Ftehim dwar is-Sajd b’mod proporzjonali għall-attivitajiet tas-sajd. Rapport tal-evalwazzjoni dwar il-benefiċċji għal dawn il-popolazzjonijiet u l-konsultazzjonijiet imwettqa huwa mehmuż ma’ din il-proposta bħala dokument ta’ ħidma tal-persunal tal-Kummissjoni. Ir-rapport jikkonkludi li l-impatti soċjoekonomiċi tal-Ftehim dwar is-Sajd għandhom ikunu ta’ benefiċċju kbir għall-popolazzjonijiet ikkonċernati u li l-impatt tiegħu fuq l-iżvilupp sostenibbli tar-riżorsi naturali se jkun wieħed pożittiv. Bl-istess mod, il-partijiet soċjoekonomiċi u politiċi li ħadu sehem fil-konsultazzjonijiet kienu bla dubju favur il-konklużjoni tal-Ftehim dwar is-Sajd, anke jekk il-Front Polisario, kif ukoll partijiet oħra, irrifjutaw li jieħdu sehem fil-proċess ta’ konsultazzjoni minħabba raġunijiet ta’ prinċipju. Għalhekk, jista’ jiġi konkluż li l-Kummissjoni, flimkien mas-SEAE, ħadet il-miżuri raġonevoli u possibbli kollha fil-kuntest attwali sabiex il-popolazzjonijiet kkonċernati jkunu involuti kif xieraq.

•Ġbir u użu tal-għarfien espert

Il-Kummissjoni użat konsulent indipendenti għall-evalwazzjonijiet ex post u ex ante, f’konformità mad-dispożizzjonijiet tal-Artikolu 31(10) tar-Regolament li jistabbilixxi l-politika komuni tas-sajd.

4.IMPLIKAZZJONI BAĠITARJA

Il-kontribuzzjoni finanzjarja annwali tammonta għal EUR 37 000 000, li tiżdied kull sena biex fl-aħħar sena tilħaq EUR 42 400 000 abbażi ta’:

a) kumpens finanzjarju għall-aċċess tal-bastimenti tal-Unjoni ta’ EUR 19 100 000 għall-ewwel sena tal-applikazzjoni tal-Protokoll, li żdied għal EUR 20 000 000 fit-tieni sena, u għal EUR 21 900 000 għat-tielet u r-raba’ sena;

b) appoġġ għall-iżvilupp tal-politika settorjali tas-sajd tar-Renju tal-Marokk ta’ EUR 17 900 000 għall-ewwel sena tal-applikazzjoni tal-Protokoll, li żdied għal EUR 18 800 000 fit-tieni sena, u għal EUR 20 500 000 għat-tielet u r-raba’ sena; Dan l-appoġġ huwa konformi mal-għanijiet tal-politika nazzjonali fir-rigward tal-ġestjoni sostenibbli tar-riżorsi tas-sajd kontinentali u marittimi tar-Renju tal-Marokk.

5.ELEMENTI OĦRA

•Pjanijiet ta’ implimentazzjoni u arranġamenti dwar il-monitoraġġ, l-evalwazzjoni u r-rappurtar

L-arranġamenti ta’ monitoraġġ huma previsti fil-Protokoll inkluż fil-Ftehim ta’ sħubija ġdid.

2018/0348 (NLE)

Proposta għal

DEĊIŻJONI TAL-KUNSILL

dwar l-iffirmar, f’isem l-Unjoni, tal-Ftehim ta’ Sħubija dwar is-Sajd Sostenibbli bejn l-Unjoni Ewropea u r-Renju tal-Marokk, tal-Protokoll ta’ implimentazzjoni tiegħu, kif ukoll tal-iskambju ta’ ittri li jakkumpanja dan il-Ftehim

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 43(2) tiegħu, flimkien mal-Artikolu 218(5) tiegħu,

Wara li kkunsidra l-proposta mill-Kummissjoni Ewropea,

Billi:

(1)Fit-22 ta’ Mejju 2006, il-Kunsill adotta r-Regolament tal-Kunsill (KE) Nru 764/2006 dwar il-konklużjoni ta’ Ftehim ta’ Assoċjazzjoni fis-settur tas-sajd bejn il-Komunità Ewropea u r-Renju tal-Marokk, li ġġedded b’mod taċitu,

(2)L-aħħar Protokoll li jimplimenta dan il-Ftehim u li jistabbilixxi l-opportunitajiet tas-sajd u l-kontribuzzjoni finanzjarja previsti f’dan il-Ftehim, skada fl-14 ta’ Lulju 2018,

(3)Fis-Sentenza tagħha dwar il-Kawża C-266/16 8 , bħala tweġiba għal domanda preliminari dwar il-validità u l-interpretazzjoni tal-Ftehim ta’ Sħubija dwar is-Sajd bejn il-Komunità Ewropea u r-Renju tal-Marokk, u l-Protokoll ta’ implimentazzjoni tiegħu, il-Qorti ddeċidiet li la l-Ftehim u lanqas il-Protokoll tiegħu ma japplikaw għall-ilmijiet tal-madwar tas-Saħara tal-Punent,

(4)L-Unjoni ma tippreġudikax l-eżitu tal-proċess politiku dwar l-istatus finali tas-Saħara tal-Punent li jingħata taħt il-patroċinju tan-Nazzjonijiet Uniti, u ma waqfitx itenni l-impenn tagħha fir-rigward tas-soluzzjoni għat-tilwim dwar is-Saħara tal-Punent, elenkata bħalissa min-Nazzjonijiet Uniti fil-lista ta’ territorji mhux awtonomi, u li llum parti kbira minnha hija amministrata mir-Renju tal-Marokk. Hija tappoġġa bis-sħiħ l-isforzi tas-Segretarju Ġenerali tan-Nazzjonijiet Uniti u tal-persunal tiegħu mibgħut apposta biex jgħin lill-partijiet jaslu għal soluzzjoni politika ġusta, sostenibbli u aċċettabbli b’mod reċiproku, li tkun tipprevedi l-awtodeterminazzjoni tal-poplu tas-Saħara tal-Punent fil-kuntest ta’ arranġamenti konformi mal-għanijiet u l-prinċipji tal-Karta tan-Nazzjonijiet Uniti kif stabbiliti fir-Riżoluzzjonijiet tal-Kunsill tas-Sigurtà tan-Nazzjonijiet Uniti, b’mod partikolari r-Riżoluzzjonijiet 2152 (2014), 2218 (2015), 2385 (2016), 2351 (2017) u 2414 (2018),

(5)Huwa importanti li l-flotot tal-Unjoni jkunu jistgħu jkomplu l-attivitajiet tas-sajd tagħhom minn meta jidħol fis-seħħ il-Ftehim, u li l-kamp ta’ applikazzjoni tal-Ftehim jiġi ddefinit sabiex jinkludi l-ilmijiet tal-madwar tas-Saħara tal-Punent. It-tkomplija tas-sħubija dwar is-sajd hija essenzjali wkoll sabiex jiġi żgurat li dan it-territorju jista’ jkompli jgawdi mill-appoġġ settorjali pprovdut mill-Ftehim skont id-dritt Komunitarju u internazzjonali, u għall-benefiċċju tal-popolazzjonijiet lokali,

(6)Għal dan l-għan, fis-16 ta’ April 2018, il-Kunsill awtorizza lill-Kummissjoni biex twettaq negozjati mar-Renju tal-Marokk bil-ħsieb li jiġi emendat il-Ftehim u li jkun hemm qbil dwar Protokoll ta’ implimentazzjoni ġdid tiegħu. Wara n-negozjati, fl-24 ta’ Lulju 2018 ġie inizjalat Ftehim ġdid ta’ Sħubija dwar is-Sajd Sostenibbli bejn l-Unjoni Ewropea u r-Renju tal-Marokk (min hawn ’il quddiem imsejjaħ “il-Ftehim dwar is-Sajd”) magħmul minn Protokoll ta’ implimentazzjoni ġdid, l-Anness u l-Appendiċijiet tiegħu, kif ukoll skambju ta’ ittri li jakkumpanja dan il-Ftehim,

(7)L-għan tal-Ftehim dwar is-Sajd huwa li jippermetti lill-Unjoni Ewropea u lir-Renju tal-Marokk jaħdmu aktar mill-qrib fuq il-promozzjoni ta’ politika tas-sajd sostenibbli, l-użu responsabbli tar-riżorsi tas-sajd fiż-żona tas-sajd definita fil-Protokoll, u li jiġu appoġġati l-isforzi tar-Renju tal-Marokk biex jiżviluppa s-settur tas-sajd, kif ukoll l-ekonomija blu. F’dan ir-rigward, jikkontribwixxi biex jintlaħqu l-għanijiet tal-Unjoni skont l-Artikolu 21 tat-Trattat dwar l-Unjoni Ewropea,

(8)Il-Kummissjoni vvalutat l-impatt potenzjali tal-Ftehim dwar is-Sajd fuq l-iżvilupp sostenibbli, b’mod partikolari fir-rigward tal-benefiċċji għall-popolazzjonijiet ikkonċernati u l-użu tar-riżorsi naturali tat-territorji kkonċernati,

(9)L-evalwazzjoni kkonkludiet li l-Ftehim dwar is-Sajd għandu jkun ta’ benefiċċju kbir għall-popolazzjonijiet tas-Saħara tal-Punent, minħabba l-impatt soċjoekonomiku pożittiv għal dawn il-popolazzjonijiet, b’mod partikolari f’termini ta’ impjiegi u investiment, u l-impatt tiegħu fuq l-iżvilupp tas-settur tas-sajd u tas-settur tal-ipproċessar tal-prodotti tas-sajd,

(10)Il-Ftehim dwar is-Sajd jirrappreżenta l-aħjar garanzija għall-użu sostenibbli tar-riżorsi naturali tal-ilmijiet tal-madwar tas-Saħara tal-Punent, peress li l-attività tas-sajd hija bbażata fuq l-aħjar pariri u rakkomandazzjonijiet xjentifiċi f’dan il-qasam u fil-forma ta’ miżuri ta’ monitoraġġ u kontroll xierqa,

(11)Wara li qieset il-kunsiderazzjonijiet stipulati fis-Sentenza tal-Qorti tal-Ġustizzja, il-Kummissjoni, flimkien mas-Servizz Ewropew għall-Azzjoni Esterna, ħadet il-miżuri kollha raġonevoli u possibbli fil-kuntest attwali ħalli l-popolazzjonijiet kkonċernati jiġu involuti b’mod xieraq, sabiex jiġi żgurat li l-pożizzjoni tagħhom fir-rigward tal-Ftehim dwar is-Sajd tiġi espressa u kkunsidrata. Twettqu konsultazzjonijiet fis-Saħara tal-Punent u fil-Marokk, u l-partijiet soċjoekonomiċi u politiċi li ħadu sehem fil-konsultazzjonijiet kienu bla dubju favur il-konklużjoni tal-Ftehim dwar is-Sajd, anke jekk il-Front Polisario, kif ukoll partijiet oħra, irrifjutaw li jieħdu sehem fil-proċess ta’ konsultazzjoni minħabba raġunijiet ta’ prinċipju,

(12)Dawk li rrifjutaw li jieħdu sehem ċaħdu l-applikazzjoni tal-Ftehim u l-Protokoll tiegħu għall-ilmijiet ’il barra mis-Saħara tal-Punent, billi essenzjalment huma kkunsidraw li ftehim bħal dan jikkonferma l-pożizzjoni tal-Marokk fir-rigward tat-territorju tas-Saħara tal-Punent. Madankollu, fit-termini ta’ dak il-Ftehim, xejn ma jippermetti li jitqies li dan jirrikonoxxi s-sovranità jew id-drittijiet sovrani tal-Marokk fir-rigward tas-Saħara tal-Punent u l-ilmijiet tal-madwar. Permezz ta’ sforzi msaħħa, l-Unjoni se tkompli tappoġġa l-proċess ta’ riżoluzzjoni paċifika tat-tilwima mibdi u li qed jitkompla taħt il-patroċinju tan-Nazzjonijiet Uniti,

(13)Għaldaqstant jenħtieġ li tiġi awtorizzata l-firma tal-Ftehim dwar is-sajd, tal-Protokoll ta’ implimentazzjoni tiegħu u tal-iskambju ta’ ittri li jakkumpanjah.

ADOTTA DIN ID-DEĊIŻJONI:

Artikolu 1

Il-firma tal-Ftehim ta’ Sħubija dwar is-Sajd Sostenibbli bejn l-Unjoni Ewropea u r-Renju tal-Marokk (minn hawn ’il quddiem imsejjaħ “il-Ftehim dwar is-Sajd”), tal-Protokoll ta’ implimentazzjoni tiegħu, kif ukoll tal-iskambju ta’ ittri li jakkumpanja dan il-Ftehim, hija approvata f’isem l-Unjoni, soġġetta għall-konklużjoni ta’ dawk l-atti.

It-test tal-Ftehim dwar is-Sajd, tal-Protokoll ta’ implimentazzjoni tiegħu u l-iskambju ta’ ittri li jakkumpjanaw dan il-Ftehim, huwa mehmuż ma’ din id-Deċiżjoni.

Artikolu 2

Is-Segretarjat Ġenerali tal-Kunsill għandu jistabbilixxi l-istrument ta’ setgħat sħaħ li jawtorizza lill-persuni indikati min-negozjatur tal-Ftehim dwar is-Sajd biex jiffirmaw il-Ftehim, soġġett għall-konklużjoni tiegħu.

Artikolu 3

Din id-Deċiżjoni għandha tidħol fis-seħħ l-għada tal-jum tal-pubblikazzjoni tagħha f’Il-Ġurnal Uffiċjali tal-Unjoni Ewropea.

Magħmul fi Brussell,

DIKJARAZZJONI FINANZJARJA LEĠIŻLATTIVA

1.QAFAS TAL-PROPOSTA/TAL-INIZJATTIVA

1.1.Titolu tal-proposta/tal-inizjattiva

1.2.Oqsma ta’ politika kkonċernati fl-istruttura ABM/ABB

1.3.Natura tal-proposta/tal-inizjattiva

1.4.Għanijiet

1.5.Raġunijiet għall-proposta/għall-inizjattiva

1.6.Durata u impatt finanzjarju

1.7.Modi ta’ ġestjoni ppjanati

2.MIŻURI TA’ ĠESTJONI

2.1.Regoli ta’ monitoraġġ u ta’ rapportar

2.2.Sistema ta’ ġestjoni u ta’ kontroll

2.3.Miżuri għall-prevenzjoni ta’ frodi u ta’ irregolaritajiet

3.IMPATT FINANZJARJU STMAT TAL-PROPOSTA/TAL-INIZJATTIVA

3.1.Intestaturi tal-qafas finanzjarju pluriennali u l-linji baġitarji tan-nefqa affettwati

3.2.Impatt stmat fuq in-nefqa 

3.2.1.Sommarju tal-impatt stmat fuq in-nefqa

3.2.2.Impatt stmat fuq l-approprjazzjonijiet operazzjonali

3.2.3.Impatt stmat fuq l-approprjazzjonijiet ta’ natura amministrattiva

3.2.4.Kompatibbiltà mal-qafas finanzjarju pluriennali attwali

3.2.5.Kontribuzzjonijiet ta’ partijiet terzi

3.3.Impatt stmat fuq id-dħul

DIKJARAZZJONI FINANZJARJA LEĠIŻLATTIVA

1.QAFAS TAL-PROPOSTA/TAL-INIZJATTIVA

1.1.Titolu tal-proposta/tal-inizjattiva

1.2.Oqsma ta’ politika kkonċernati fl-istruttura ABM/ABB 9  

1.3.Natura tal-proposta/tal-inizjattiva

☒ Il-proposta/l-inizjattiva hija dwar azzjoni ġdida

◻ Il-proposta/l-inizjattiva hija dwar azzjoni ġdida b’segwitu għal proġett pilota/azzjoni preparatorja 10

◻ Il-proposta/l-inizjattiva hija dwar l-estensjoni ta’ azzjoni eżistenti

◻ Il-proposta/l-inizjattiva hija dwar azzjoni diretta mill-ġdid lejn azzjoni ġdida 

1.4.Għanijiet

1.4.1.L-għanijiet strateġiċi pluriennali tal-Kummissjoni fil-mira tal-proposta/tal-inizjattiva

1.4.2.Għanijiet speċifiċi u attivitajiet ABM/ABB ikkonċernati

1.4.3.Riżultati u impatt mistennija

Speċifika l-effetti li l-proposta/l-inizjattiva jenħtieġ li jkollha fuq il-benefiċjarji/il-gruppi fil-mira.

1.4.4.Indikaturi tar-riżultati u tal-impatt

Speċifika l-indikaturi għall-monitoraġġ tal-implimentazzjoni tal-proposta/tal-inizjattiva.

1.5.Raġunijiet għall-proposta/għall-inizjattiva

1.5.1.Rekwiżiti li jridu jiġu ssodisfati fuq terminu qasir jew twil

1.5.2.Valur miżjud tal-involviment tal-UE

1.5.3.Tagħlimiet meħuda minn esperjenzi simili fl-imgħoddi

1.5.4.Kompatibbiltà u sinerġija possibbli ma’ strumenti xierqa oħra

1.6.Durata u impatt finanzjarju

☒ Proposta/inizjattiva ta’ durata limitata

–☒    Proposta/inizjattiva fis-seħħ mid-data tad-dħul fis-seħħ (jew jekk applikabbli, l-applikazzjoni proviżorja) u għal erba’ snin

–☐    Impatt finanzjarju minn SSSS sa SSSS

◻ Proposta/inizjattiva ta’ durata mhux limitata

–Implimentazzjoni b’perjodu ta’ tnedija minn SSSS sa SSSS,

–segwita b’operazzjoni fuq skala sħiħa.

1.7.Modi ta’ ġestjoni ppjanati 11  

☒ Ġestjoni diretta mill-Kummissjoni

–☒ mid-dipartimenti tagħha, inkluż mill-persunal tagħha fid-delegazzjonijiet tal-Unjoni;

–◻    mill-aġenziji eżekuttivi

◻ Ġestjoni kondiviża mal-Istati Membri

◻ Ġestjoni indiretta billi jiġu fdati kompiti ta’ implimentazzjoni baġitarja:

–◻ lill-pajjiżi terzi jew lill-korpi nnominati minnhom;

–◻ lill-organizzazzjonijiet internazzjonali u lill-aġenziji tagħhom (iridu jiġu speċifikati);

–◻lill-BEI u lill-Fond Ewropew tal-Investiment;

–◻ lill-korpi msemmija fl-Artikoli 208 u 209 tar-Regolament Finanzjarju;

–◻ lill-korpi tal-liġi pubblika;

–◻ lill-korpi rregolati mil-liġi privata b’missjoni ta’ servizz pubbliku sakemm dawn jipprovdu garanziji finanzjarji adegwati;

–◻ lill-korpi rregolati mil-liġi privata ta’ Stat Membru li jkunu fdati bl-implimentazzjoni ta’ sħubija pubblika-privata u li jipprovdu garanziji finanzjarji adegwati;

–◻ lill-persuni fdati bl-implimentazzjoni ta’ azzjonijiet speċifiċi fil-PESK skont it-Titolu V tat-TUE, u identifikati fl-att bażiku rilevanti.

–Jekk jiġi indikat iżjed minn mod ta’ ġestjoni wieħed, jekk jogħġbok ipprovdi d-dettalji fit-taqsima “Kummenti”.

Kummenti

2.MIŻURI TA’ ĠESTJONI

2.1.Regoli ta’ monitoraġġ u ta’ rapportar

Speċifika l-frekwenza u l-kundizzjonijiet.

2.2.Sistema ta’ ġestjoni u ta’ kontroll

2.2.1.Riskji identifikati

2.2.2.Tagħrif dwar is-sistema ta’ kontroll intern li ġiet stabbilita

2.2.3.Stima tal-kostijiet u tal-benefiċċji tal-kontrolli u valutazzjoni tal-livell mistenni ta’ riskju ta’ errur

2.3.Miżuri għall-prevenzjoni ta’ frodi u ta’ irregolaritajiet

Speċifika l-miżuri ta’ prevenzjoni u ta’ protezzjoni eżistenti jew previsti.

3.IMPATT FINANZJARJU STMAT TAL-PROPOSTA/TAL-INIZJATTIVA

3.1.Intestaturi tal-qafas finanzjarju pluriennali u l-linji baġitarji tan-nefqa affettwati

·Linji baġitarji eżistenti

Skont l-ordni tal-intestaturi tal-qafas finanzjarju pluriennali u tal-linji baġitarji.

·Linji baġitarji ġodda mitluba

Skont l-ordni tal-intestaturi tal-qafas finanzjarju pluriennali u tal-linji baġitarji.

3.2.Impatt stmat fuq in-nefqa

[Jenħtieġ li din it-taqsima timtela billi tintuża l- ispreadsheet dwar id-data baġitarja ta’ natura amministrattiva (it-tieni dokument fl-Anness ta’ din id-dikjarazzjoni finanzjarja) u tittella’ fis-CISNET għal finijiet ta’ konsultazzjoni bejn is-servizzi.]

3.2.1.Sommarju tal-impatt stmat fuq in-nefqa

miljuni ta’ EUR (aġġustati ’l fuq għal tliet pożizzjonijiet deċimali)

Jekk il-proposta/l-inizjattiva taffettwa iżjed minn intestatura waħda:

miljuni ta’ EUR (aġġustati ’l fuq għal tliet pożizzjonijiet deċimali)

miljuni ta’ EUR (aġġustati ’l fuq għal tliet pożizzjonijiet deċimali)

3.2.2.Impatt stmat fuq l-approprjazzjonijiet operazzjonali

–◻    Il-proposta/l-inizjattiva ma teħtieġx l-użu ta’ approprjazzjonijiet operazzjonali

–☒    Il-proposta/l-inizjattiva teħtieġ l-użu ta’ approprjazzjonijiet operazzjonali, kif spjegat hawn taħt:

Approprjazzjonijiet ta’ impenn f’miljuni ta’ EUR (aġġustati ’l fuq għal tliet pożizzjonijiet deċimali)

3.2.3.Impatt stmat fuq l-approprjazzjonijiet ta’ natura amministrattiva

3.2.3.1.Sommarju

–☒    Il-proposta/l-inizjattiva ma teħtieġx l-użu ta’ approprjazzjonijiet ta’ natura amministrattiva

–◻    Il-proposta/l-inizjattiva teħtieġ l-użu ta’ approprjazzjonijiet ta’ natura amministrattiva, kif spjegat hawn taħt:

miljuni ta’ EUR (aġġustati ’l fuq għal tliet pożizzjonijiet deċimali)

L-approprjazzjonijiet meħtieġa għar-riżorsi umani u għal nefqa oħra ta’ natura amministrattiva se jiġu koperti mill-approprjazzjonijiet tad-DĠ li diġà jkunu assenjati għall-ġestjoni tal-azzjoni u/jew li diġà jkunu ġew riassenjati fid-DĠ, flimkien, jekk ikun meħtieġ, ma’ kwalunkwe allokazzjoni addizzjonali li tista’ tingħata lid-DĠ tal-ġestjoni skont il-proċedura annwali ta’ allokazzjoni u fid-dawl tal-limitazzjonijiet baġitarji.

3.2.3.2. Rekwiżiti stmati ta’ riżorsi umani

–☒    Il-proposta/l-inizjattiva ma teħtieġx l-użu ta’ riżorsi umani.

–◻    Il-proposta/l-inizjattiva teħtieġ l-użu ta’ riżorsi umani, kif spjegat hawn taħt:

L-istima trid tiġi espressa f’unitajiet ekwivalenti għall-full-time

XX huwa l-qasam ta’ politika jew it-titolu baġitarju kkonċernat.

Ir-riżorsi umani meħtieġa se jiġu koperti mill-persunal tad-DĠ li diġà jkun assenjat għall-ġestjoni tal-azzjoni u/jew li diġà jkun ġie riassenjat fid-DĠ, flimkien, jekk ikun meħtieġ, ma’ kwalunkwe allokazzjoni addizzjonali li tista’ tingħata lid-DĠ tal-ġestjoni skont il-proċedura annwali ta’ allokazzjoni u fid-dawl tal-limitazzjonijiet baġitarji.

Deskrizzjoni tal-kompiti li jridu jitwettqu:

3.2.4.Kompatibbiltà mal-qafas finanzjarju pluriennali attwali

–☒    Il-proposta/l-inizjattiva hija kompatibbli mal-qafas finanzjarju pluriennali attwali.

–◻    Il-proposta/l-inizjattiva se tkun tinvolvi riprogrammazzjoni tal-intestatura rilevanti fil-qafas finanzjarju pluriennali.

–◻    Il-proposta/l-inizjattiva teħtieġ l-applikazzjoni tal-istrument ta’ flessibbiltà jew ir-reviżjoni tal-qafas finanzjarju pluriennali.

3.2.5.Kontribuzzjonijiet ta’ partijiet terzi

–Il-proposta/l-inizjattiva ma tipprevedix kofinanzjament minn partijiet terzi.

–Il-proposta/l-inizjattiva tipprevedi l-kofinanzjament stmat hawn taħt:

Approprjazzjonijiet f’miljuni ta’ EUR (aġġustati ’l fuq għal tliet pożizzjonijiet deċimali)

3.3.Impatt stmat fuq id-dħul

–☒    Il-proposta/l-inizjattiva ma għandha l-ebda impatt finanzjarju fuq id-dħul.

–◻    Il-proposta/l-inizjattiva għandha l-impatt finanzjarju li ġej:

–◻    fuq ir-riżorsi proprji

–◻    fuq id-dħul mixxellanju

Miljuni ta’ EUR (aġġustati ’l fuq għal tliet pożizzjonijiet deċimali)

Għad-dħul “assenjat” mixxellanju, speċifika l-linji baġitarji tan-nefqa affettwati.

Speċifika l-metodu biex jiġi kkalkolat l-impatt fuq id-dħul.

(1)    ĠU L 141, 29.05.2006, p. 1; ĠU L 78, 17.03.2007, p. 31.

(2)    ĠU L 328, 7.12.2013, p. 2; ĠU L 228, 31.7.2014, p. 1.

(3)    ĠU L 70, 18.3.2000, p. 2.

(4)    Adottat fis-16 ta’ April 2018 waqt it-3612-il sessjoni tal-Kunsill Agrikoltura u Sajd.

(5)    Is-Sentenza tal-Qorti tal-Ġustizzja tas-27 ta’ Frar 2018, Western Sahara Campaign UK, C-266/16, EU :C :2018 :118.

(6)    ĠU L 354, 28.12.2013, p. 22.

(7)     https://ec.europa.eu/fisheries/sites/fisheries/files/docs/publications/evaluation-report-morocco_fr.pdf SWD(2018) 1 final : https://eur-lex.europa.eu/legal-content/FR/TXT/?qid=1535624240760&uri=CELEX:52018SC0001

(8)    Is-Sentenza tal-Qorti tal-Ġustizzja tas-27 ta’ Frar 2018, Western Sahara Campaign UK, C-266/16, EU :C :2018 :118.

(9)    ABM: Ġestjoni bbażata fuq l-Attività (Activity-Based Management) – ABB: Ibbaġitjar ibbażat fuq l-Attività (Activity-Based Budgeting).

(10)    Kif imsemmi fl-Artikolu 54(2)(a) jew (b) tar-Regolament Finanzjarju.

(11)    Id-dettalji dwar il-modi ta’ ġestjoni u r-referenzi għar-Regolament Finanzjarju jinsabu fuq is-sit BudgWeb: http://www.cc.cec/budg/man/budgmanag/budgmanag_en.html

(12)    Diff. = Approprjazzjonijiet differenzjati / Mhux diff. = Approprjazzjonijiet mhux differenzjati.

(13)    EFTA: Assoċjazzjoni Ewropea tal-Kummerċ Ħieles.

(14)    Pajjiżi kandidati u, meta jkun applikabbli, pajjiżi kandidati potenzjali mill-Balkani tal-Punent.

(15)    Is-Sena N hija s-sena li fiha tibda l-implimentazzjoni tal-proposta/tal-inizjattiva.

(16)    Assistenza teknika u/jew amministrattiva u nefqa li jappoġġaw l-implimentazzjoni ta’ programmi u/jew ta’ azzjonijiet tal-UE (li qabel kienu l-linji “BA”), riċerka indiretta u riċerka diretta.

(17)    Is-Sena N hija s-sena li fiha tibda l-implimentazzjoni tal-proposta/tal-inizjattiva.

(18)    L-outputs huma l-prodotti u s-servizzi li jridu jiġu pprovduti (pereż.: l-għadd ta’ skambji ta’ studenti ffinanzjati, l-għadd ta’ km ta’ toroq mibnija, eċċ.).

(19)    Kif deskritt fil-punt 1.4.2. “Għanijiet speċifiċi…”.

(20)    Is-Sena N hija s-sena li fiha tibda l-implimentazzjoni tal-proposta/tal-inizjattiva.

(21)    Assistenza teknika u/jew amministrattiva u nefqa li jappoġġaw l-implimentazzjoni ta’ programmi u/jew ta’ azzjonijiet tal-UE (li qabel kienu l-linji “BA”), riċerka indiretta u riċerka diretta.

(22)    AC = Aġent Kuntrattwali; AL = Persunal Lokali; END = Espert Nazzjonali Sekondat; INT = Persunal tal-aġenziji; JED= Espert Żagħżugħ fid-Delegazzjonijiet.

(23)    Sottolimitu għall-persunal estern kopert minn approprjazzjonijiet operazzjonali (li qabel kienu l-linji “BA”).

(24)    Fir-rigward tar-riżorsi proprji tradizzjonali (id-dazji doganali, l-imposti fuq iz-zokkor), l-ammonti indikati jridu jkunu ammonti netti, jiġifieri ammonti grossi wara t-tnaqqis ta’ 25 % tal-kostijiet tal-ġbir.

IL-KUMMISSJONI EWROPEA

Brussell, 8.10.2018

COM(2018) 677 final

ANNESS

tal-

Proposta għal Deċiżjoni tal-Kunsill

dwar l-iffirmar, f'isem l-Unjoni, tal-Ftehim ta' Sħubija dwar is-Sajd Sostenibbli bejn l-Unjoni Ewropea u r-Renju tal-Marokk, tal-Protokoll ta' implimentazzjoni tiegħu, kif ukoll tal-iskambju ta' ittri li jakkumpanja dan il-Ftehim

{SWD(2018) 433 final}

ANNESS

Skambju ta’ ittri bejn l-Unjoni Ewropea u r-Renju tal-Marokk li jakkumpanja l-Ftehim ta’ Sħubija dwar is-Sajd Sostenibbli bejn l-Unjoni Ewropea u r-Renju tal-Marokk

A. Ittra mill-Unjoni

Għażiż/a Sinjur/Sinjura,

Għandi l-unur nirreferi għall-Ftehim ta’ Sħubija dwar is-Sajd Sostenibbli bejn l-Unjoni Ewropea u r-Renju tal-Marokk (“il-Ftehim dwar is-Sajd”), dwar ċerti dispożizzjonijiet ta’ dan il-Ftehim.

Wara n-negozjati, l-Unjoni Ewropea u r-Renju tal-Marokk qablu li:

1.Fir-rigward tal-kwistjoni tas-Saħara tal-Punent, il-Partijiet itennu l-appoġġ tagħhom għall-proċess tan-Nazzjonijiet Uniti u l-isforzi tas-Segretarju Ġenerali biex tinkiseb soluzzjoni politika definittiva, skont il-prinċipji u l-għanijiet tal-Karta tan-Nazzjonijiet Uniti u abbażi tar-Riżoluzzjonijiet tal-Kunsill tas-Sigurtà. 

2.Il-Ftehim dwar is-Sajd huwa konkluż mingħajr preġudizzju għall-pożizzjonijiet rispettivi:

–għall-Unjoni Ewropea, fir-rigward tal-istatut tat-territorju mhux awtonomu tas-Saħara tal-Punent, fejn l-ilmijiet tal-madwar huma koperti miż-żona tas-sajd kif definita fl-Artikolu 1(h) tal-Ftehim dwar is-Sajd u d-dritt tagħha għall-awtodeterminazzjoni, kull referenza fil-Ftehim dwar is-Sajd għal-liġijiet u r-regolamenti tal-Marokk ma tippreġudikax il-pożizzjoni tagħha;

–għar-Renju tal-Marokk, ir-reġjun tas-Saħara huwa parti integrali tat-territorju nazzjonali li fuqu jeżerċita sovranità sħiħa bħal fuq il-bqija tat-territorju nazzjonali. Il-Marokk iqis li kull soluzzjoni għal din it-tilwima reġjonali jenħtieġ li tkun ibbażata fuq l-inizjattiva tiegħu ta’ awtonomija.

Napprezza jekk tikkonferma li l-Gvern tiegħek jaqbel ma’ dan ta’ hawn fuq.

Dejjem tiegħek,

B. Ittra mir-Renju tal-Marokk

Għażiż/a Sinjur/Sinjura,

Għandi l-unur ngħarrfek li rċevejt l-ittra tiegħek bid-data tal-lum u li tgħid hekk:

“Għażiż/a Sinjur/Sinjura,

Għandi l-unur nirreferi għall-Ftehim ta’ Sħubija dwar is-Sajd Sostenibbli bejn l-Unjoni Ewropea u r-Renju tal-Marokk (“il-Ftehim dwar is-Sajd”), dwar ċerti dispożizzjonijiet ta’ dak il-Ftehim.

Wara n-negozjati, l-Unjoni Ewropea u r-Renju tal-Marokk qablu li:

1.Fir-rigward tal-kwistjoni tas-Saħara tal-Punent, il-Partijiet itennu l-appoġġ tagħhom għall-proċess tan-Nazzjonijiet Uniti u l-isforzi tas-Segretarju Ġenerali biex tinkiseb soluzzjoni politika definittiva, skont il-prinċipji u l-għanijiet tal-Karta tan-Nazzjonijiet Uniti u abbażi tar-Riżoluzzjonijiet tal-Kunsill tas-Sigurtà.

2.Il-Ftehim dwar is-Sajd huwa konkluż mingħajr preġudizzju għall-pożizzjonijiet rispettivi:

–għall-Unjoni Ewropea, fir-rigward tal-istatut tat-territorju mhux awtonomu tas-Saħara tal-Punent, fejn l-ilmijiet tal-madwar huma koperti miż-żona tas-sajd kif definita fl-Artikolu 1(h) tal-Ftehim dwar is-Sajd u d-dritt tagħha għall-awtodeterminazzjoni, kull referenza fil-Ftehim dwar is-Sajd għal-liġijiet u r-regolamenti tal-Marokk ma tippreġudikax il-pożizzjoni tagħha;

–għar-Renju tal-Marokk, ir-reġjun tas-Saħara huwa parti integrali tat-territorju nazzjonali li fuqu jeżerċita sovranità sħiħa bħal fuq il-bqija tat-territorju nazzjonali. Il-Marokk iqis li kull soluzzjoni għal din it-tilwima reġjonali jenħtieġ li tkun ibbażata fuq l-inizjattiva tiegħu ta’ awtonomija.

Napprezza jekk tikkonferma li l-Gvern tiegħek jaqbel ma’ dan ta’ hawn fuq.

Dejjem tiegħek, ”

Nista’ nikkonferma li l-Gvern tiegħi jaqbel mal-kontenut ta’ din l-ittra.

Dejjem tiegħek,

FTEHIM TA’ SĦUBIJA

dwar is-Sajd Sostenibbli bejn l-Unjoni Ewropea u r-Renju tal-Marokk

L-UNJONI EWROPEA, minn hawn ’il quddiem imsejħa “l-Unjoni”, u

IR-RENJU TAL-MAROKK, minn hawn ’il quddiem imsejjaħ “il-Marokk”,

Flimkien imsejħin “il-Partijiet”,

FILWAQT LI JQISU r-relazzjoni ta’ ħidma mill-qrib bejn l-Unjoni u l-Marokk, b’mod partikolari fil-kuntest tal-Ftehim Ewro-Mediterranju li jistabbilixxi assoċjazzjoni bejn l-Unjoni u l-Istati Membri tagħha minn naħa waħda, u r-Renju tal-Marokk min-naħa l-oħra, u x-xewqa komuni tagħhom li jsaħħu din ir-relazzjoni;

IMPENJATI li jikkonformaw b’mod strett mal-liġi internazzjonali u mad-drittijiet fundamentali tal-bniedem filwaqt li jiżguraw il-benefiċċji reċiproċi tal-Partijiet ikkonċernati;

FILWAQT LI JQISU li dan il-Ftehim jagħmel parti mis-sħubija ġenerali tagħhom li tkopri l-kwistjonijiet ekonomiċi, politiċi u ta’ sigurtà u l-ġlieda kontra l-migrazzjoni irregolari, inkluż il-kawżi ewlenin tagħha;

FID-DAWL tad-dispożizzjonijiet tal-Konvenzjoni tan-Nazzjonijiet Uniti dwar id-Dritt tal-Baħar (UNCLOS);

KONXJI mill-importanza tal-prinċipji stabbiliti mill-Kodiċi ta’ Kondotta għal Sajd Responsabbli adottat waqt il-Konferenza tal-Organizzazzjoni tal-Ikel u l-Agrikoltura tan-Nazzjonijiet Uniti (FAO) fl-1995;

DETERMINATI li japplikaw id-deċiżjonijiet u r-rakkomandazzjonijiet adottati mill-organizzazzjonijiet reġjonali għall-ġestjoni tas-sajd rilevanti li l-Partijiet huma membri tagħhom;

JIXTIEQU, għal dawn il-finijiet, li jitqiesu l-pariri xjentifiċi disponibbli u l-pjanijiet ta’ ġestjoni rilevanti adottati mill-organizzazzjonijiet reġjonali għall-ġestjoni tas-sajd rilevanti, biex tiġi żgurata s-sostenibbiltà ambjentali tal-attivitajiet tas-sajd u biex tiġi promossa l-governanza tal-oċeani fuq livell internazzjonali;

DEĊIŻI, għal dawn il-finijiet, li jistabbilixxu djalogu, b’mod partikolari fir-rigward tal-governanza tas-sajd, il-ġlieda kontra s-sajd illegali, mhux irrappurtat u mhux irregolat u l-kontroll, il-monitoraġġ u s-sorveljanza tal-attivitajiet tas-sajd;

JIXTIEQU li l-aċċess għaż-żona tas-sajd ikun ibbażat fuq l-attività tal-flotta tas-sajd tal-Unjoni u li din tikseb sehem xieraq tar-riżorsi żejda tas-sajd, filwaqt li titqies l-ispeċifiċità ta’ kull Ftehim u li tibbenefika mill-istess kundizzjonijiet tekniċi tas-sajd applikati għall-flotot kollha;

KONVINTI li s-sħubija trid tkun ibbażata fuq inizjattivi u miżuri li, sew jekk jittieħdu b’mod konġunt u sew jekk b’mod individwali mill-Partijiet, ikunu kumplementari, konformi mal-politika u jiżguraw sinerġija tal-isforzi;

DEĊIŻI, għal dawn il-finijiet, li jikkontribwixxu, fil-qafas tal-politika settorjali tas-sajd tal-Marokk, inkluż fiż-żona tas-sajd koperta b’dan il-Ftehim, biex jippromwovu l-iżvilupp ta’ sħubija b’mod partikolari bil-ħsieb li jiġu identifikati l-mezzi l-aktar xierqa biex jiżguraw l-implimentazzjoni effettiva ta’ din il-politika u biex l-operaturi ekonomiċi u s-soċjetà ċivili jiġu involuti fil-proċess;

JIXTIEQU li jistabbilixxu t-termini u l-kundizzjonijiet tal-aċċess għaż-żona tas-sajd għall-bastimenti tal-Unjoni u, f’dan ir-rigward, li jiġi żgurat li l-attivitajiet tas-sajd ikunu mmirati esklussivament għar-riżorsi disponibbli, filwaqt li titqies il-kapaċità tas-sajd tal-flotot li joperaw fiż-żona u fl-istess ħin tingħata attenzjoni partikolari għan-natura transżonali u migratorja ħafna ta’ ċerti speċijiet;

DEĊIŻI li jsegwu kooperazzjoni ekonomika u soċjali aktar mill-qrib bil-għan li tistabbilixxi u ssaħħaħ is-sajd sostenibbli u ttejjeb il-governanza tal-oċeani, inkluż bit-trawwim ta’ investimenti li jinvolvu intrapriżi tal-Partijiet, f’konformità mal-għanijiet ta’ żvilupp tal-pajjiż;

FTIEHMU DWAR DAN LI ĠEJ:

DISPOŻIZZJONIJIET ĠENERALI

Artikolu 1

Definizzjonijiet

Għall-finijiet ta’ dan il-Ftehim għandhom japplikaw id-definizzjonijiet li ġejjin:

(a)“Awtoritajiet tar-Renju tal-Marokk” tfisser il-Ministeru għall-Agrikoltura, is-Sajd Marittimu, l-Iżvilupp Rurali u tal-Ilma u l-Foresti — id-Dipartiment tas-Sajd Marittimu;

(b)“Awtoritajiet tal-Unjoni” tfisser il-Kummissjoni Ewropea;

(c)“ftehim” tfisser il-Ftehim ta’ Sħubija dwar is-Sajd Sostenibbli attwali bejn l-Unjoni Ewropea u r-Renju tal-Marokk, l-iskambju ta’ ittri li jakkumpanja dan il-Ftehim, il-protokoll għall-implimentazzjoni ta’ dan il-Ftehim, l-Anness u l-Appendiċijiet tiegħu.

(d)“attività tas-sajd” tfisser it-tiftix għall-ħut, it-tfigħ il-baħar, il-kalar, it-tkarkir jew l-irfigħ tal-irkaptu tas-sajd, it-teħid tal-qabdiet abbord, it-trasbord, iż-żamma abbord, l-ipproċessar abbord, it-trasferiment, it-tqegħid fil-gaġeġ, is-simna u l-ħatt l-art tal-ħut u tal-prodotti tas-sajd;

(e) “bastiment tas-sajd” tfisser kull bastiment mgħammar għall-użu kummerċjali tar-riżorsi bijoloġiċi tal-baħar;

(f)“bastiment tal-Unjoni” tfisser bastiment tas-sajd li jtajjar il-bandiera ta’ Stat Membru tal-Unjoni u li huwa reġistrat fl-Unjoni;

(g)“sid il-bastiment” tfisser il-persuna li hija legalment responsabbli mill-bastiment tas-sajd, li tmexxih u tikkontrollah;

(h)“żona tas-sajd” tfisser l-ilmijiet tal-Atlantiku Ċentrali tal-Lvant li jinsabu bejn il-paralleli 35° 47’ 18'' fit-Tramuntana u 20  46’ 13'' fit-Tramuntana, inkluż l-ilmijiet tal-madwar tas-Saħara tal-Punent 1 li jkopru ż-żoni kollha ta’ ġestjoni. Din id-definizzjoni ma għandhiex taffettwa n-negozjati possibbli dwar id-demarkazzjoni taż-żoni marittimi tal-Istati kostali li jikkonfinaw maż-żona tas-sajd u d-drittijiet tal-pajjiżi terzi inġenerali.

(i)“żona ta’ ġestjoni” tfisser iż-żona ta’ attività demarkata bil-koordinati ġeografiċi, bl-irkaptu li jista’ jintuża jew bl-ispeċijiet awtorizzati.

(j)“awtorizzazzjoni tas-sajd” tfisser liċenzja tas-sajd maħruġa mill-Awtoritajiet tar-Renju tal-Marokk għal bastiment tas-sajd tal-Unjoni li tagħtih id-dritt li jwettaq attivitajiet tas-sajd fiż-żona tas-sajd;

(k)“awtorizzazzjoni tas-sajd dirett” tfisser liċenzja tas-sajd maħruġa mill-Awtoritajiet tar-Renju tal-Marokk għal bastiment tas-sajd tal-Unjoni barra mill-kamp ta’ applikazzjoni tal-Ftehim;

(l)“stokk” tfisser riżorsa bijoloġika tal-baħar li tinsab f’żona partikolari;

(m)“prodotti tas-sajd’ tfisser l-organiżmi akkwatiċi li jirriżultaw minn attività tas-sajd;

(n)“prodotti tal-akkwakultura” tfisser l-organiżmi akkwatiċi fi kwalunkwe stadju taċ-ċiklu tal-ħajja tagħhom li jirriżultaw minn kwalunkwe attività tal-akkwakultura jew prodott li joriġina minnhom;

(o)“settur tas-sajd” tfisser is-settur tal-ekonomija li jinkludi l-attivitajiet kollha tal-produzzjoni, tal-ipproċessar u tal-kummerċjalizzazzjoni tal-prodotti tas-sajd u tal-akkwakultura;

(p)“sajjied” tfisser kull persuna involuta f’attivitajiet ta’ sajd kummerċjali, kif rikonoxxut mill-Partijiet;

(q)“opportunità ta’ sajd” tfisser dritt legali kwantifikat għas-sajd, espress f’termini ta’ qabdiet u/jew ta’ sforz tas-sajd;

(r)“sajd sostenibbli” tfisser sajd f’konformità mal-għanijiet u mal-prinċipji stabbiliti mill-Kodiċi ta’ Kondotta għal Sajd Responsabbli adottat waqt il-Konferenza tal-Organizzazzjoni tal-Ikel u l-Agrikoltura tan-Nazzjonijiet Uniti (FAO) fl-1995;

Artikolu 2

Suġġett

Dan il-Ftehim jistabbilixxi qafas għall-governanza ġuridika, ambjentali, ekonomika u soċjali għall-attivitajiet tas-sajd imwettqa mill-bastimenti tal-Unjoni li jistipulaw b’mod partikolari:

(a)il-kundizzjonijiet li skonthom il-bastimenti tal-Unjoni jistgħu jwettqu attivitajiet tas-sajd fiż-żona tas-sajd;

(b)il-kooperazzjoni ekonomika u finanzjarja fis-settur tas-sajd bil-għan li tiġi stabbilita sħubija għas-settur tas-sajd u li tissaħħaħ il-governanza tal-oċeani;

(c)il-kooperazzjoni amministrattiva għall-implimentazzjoni tal-kontribuzzjoni finanzjarja;

(d)il-kooperazzjoni xjentifika u teknika bil-ħsieb li jiġi żgurat użu sostenibbli tar-riżorsi tas-sajd fiż-żona tas-sajd u l-iżvilupp tas-settur ikkonċernat;

(e)il-kooperazzjoni dwar il-miżuri ta’ kontroll u ta’ sorveljanza biex jiġu kkontrollati l-attivitajiet fiż-żona tas-sajd ħalli tiġi żgurata l-konformità mar-regoli fis-seħħ u tiġi żgurata l-effettività tal-miżuri għall-konservazzjoni tar-riżorsi tas-sajd u għall-ġestjoni tal-attivitajiet tas-sajd, b’mod partikolari għall-ġlieda kontra s-sajd illegali, mhux irrappurtat u mhux irregolat.

Artikolu 3

Prinċipji u għanijiet għall-implimentazzjoni ta’ dan il-Ftehim

1. Il-Partijiet jimpenjaw ruħhom li jippromwovu s-sajd sostenibbli fiż-żona tas-sajd abbażi tal-prinċipju tan-nondiskriminazzjoni bejn il-flotot differenti li jinsabu fiż-żona tas-sajd.

2. L-Awtoritajiet tar-Renju tal-Marokk jimpenjaw ruħhom li l-aċċess għaż-żona tas-sajd ikun ibbażat fuq l-attività tal-flotta tas-sajd tal-Unjoni. L-Awtoritajiet tar-Renju tal-Marokk għandhom jiżguraw li l-flotta Ewropea tikseb sehem xieraq tar-riżorsi żejda tas-sajd, filwaqt li titqies l-ispeċifiċità ta’ kull ftehim. Il-flotta Ewropea għandha tgawdi mill-istess kundizzjonijiet tekniċi tas-sajd applikati għall-flotot kollha.

3. Il-Partijiet jimpenjaw ruħhom li jinfurmaw lil xulxin dwar il-ftehimiet u l-arranġamenti tas-sajd konklużi ma’ parti terza.

4. Il-Partijiet jaqblu li l-bastimenti tal-Unjoni għandhom jaqbdu biss l-eċċessi tal-qabda permessa kif imsemmi fl-Artikolu 62(2) u (3) tal-UNCLOS, u identifikati, b’mod ċar u trasparenti abbażi tal-opinjonijiet xjentifiċi disponibbli u rilevanti u tal-informazzjoni rilevanti skambjata bejn il-Partijiet dwar l-isforz totali tas-sajd tal-flotot kollha li joperaw fiż-żona tas-sajd fir-rigward tal-istokkijiet affettwati.

5. Fir-rigward tal-istokkijiet ta’ ħut transżonali jew migratorju ħafna,għad-determinazzjoni tar-riżorsi disponibbli għall-aċċess, il-Partijiet għandhom iqisu debitament il-valutazzjonijiet xjentifiċi mwettqa fil-livell reġjonali kif ukoll il-miżuri ta’ konservazzjoni u ta’ ġestjoni adottati mill-organizzazzjonijiet ta’ ġestjoni tas-sajd reġjonali rilevanti.

6. Il-Partijiet jimpenjaw ruħhom li jiżguraw l-implimentazzjoni ta’ dan il-Ftehim fil-qafas tal-governanza ġurdika, ambjentali, ekonomika u soċjali għall-attivitajiet tas-sajd tal-bastimenti tal-Unjoni.

7. Fl-interess reċiproku tal-Partijiet, dawn jimpenjaw ruħhom li jistabbilixxu djalogu mill-qrib, li jiffaċilitaw il-konsultazzjoni u li jinfurmaw lil xulxin b’mod partikolari dwar l-implimentazzjoni tal-politika settorjali tas-sajd u tal-governanza tal-oċeani.

8. Il-Partijiet għandhom jikkooperaw ukoll fit-twettiq ta’ evalwazzjonijiet ex ante, matul u ex post tal-miżuri, tal-programmi u tal-azzjonijiet implimentati abbażi tad-dispożizzjonijiet ta’ dan il-Ftehim.

9. Il-Partijiet jimpenjaw ruħhom biex jiżguraw li d-Dikjarazzjoni tal-Organizzazzjoni Internazzjonali tax-Xogħol (ILO) dwar il-prinċipji u d-drittijiet fundamentali fuq il-post tax-xogħol tapplika bis-sħiħ għall-baħħara kollha li jitilgħu abbord il-bastimenti tal-Unjoni, b’mod partikolari dwar il-libertà ta’ assoċjazzjoni, tan-negozjar kollettiv tal-ħaddiema u tat-tneħħija tad-diskriminazzjoni fir-rigward tal-impjiegi u tal-professjoni. 

10. Dan il-Ftehim jikkonforma mal-Ftehim Ewro-Mediterranju li jistabbilixxi assoċjazzjoni bejn l-Unjoni Ewropea u r-Renju tal-Marokk tas-26 ta’ Frar 1996 – minn hawn ’il quddiem imsejjaħ il-“Ftehim ta’ Assoċjazzjoni”. Dan jgħin biex jintlaħqu l-għanijiet ġenerali tal-Ftehim ta’ Assoċjazzjoni u jimmira li jiżgura l-vijabbiltà tar-riżorsi tas-sajd mill-aspetti ekoloġiċi, ekonomiċi u soċjali.

11. Dan il-Ftehim huwa implimentat skont l-Artikolu 1 tal-Ftehim ta’ Assoċjazzjoni dwar l-iżvilupp ta’ djalogu u kooperazzjoni u l-Artikolu 2 tal-istess Ftehim dwar ir-rispett għall-prinċipji demokratiċi u d-drittijiet fundamentali tal-bniedem.

Artikolu 4

Aċċess tal-bastimenti tal-Unjoni għaż-żona tas-sajd

L-Awtoritajiet tar-Renju tal-Marokk jimpenjaw ruħhom li jawtorizzaw lill-bastimenti tal-Unjoni jwettqu attivitajiet tas-sajd fiż-żona tas-sajd skont dan il-Ftehim.

Artikolu 5

Kundizzjonijiet li jirregolaw l-attivitajiet tas-sajd u l-klawżola ta’ esklużjoni

1. Il-bastimenti tal-Unjoni jistgħu jistadu fiż-żona tas-sajd koperta b’dan il-Ftehim dment li jkollhom awtorizzazzjoni tas-sajd li tkun inħarġet skont dan il-Ftehim. Għandha tkun ipprojbita kull attività tas-sajd li ssir barra mill-qafas ta’ dan il-Ftehim.

2. L-awtoritajiet tar-Renju tal-Marokk ma għandhomx joħorġu awtorizzazzjonijiet għas-sajd għall-bastimenti tal-Unjoni ħlief skont dan il-Ftehim. Għandu jkun ipprojbit il-ħruġ ta’ awtorizzazzjonijiet għas-sajd għall-bastimenti tal-Unjoni barra mill-qafas ta’ dan il-Ftehim, b’mod partikolari fl-għamla ta’ awtorizzazzjonijiet diretti.

3. Il-proċedura biex bastiment jikseb awtorizzazzjoni tas-sajd, l-imposti applikabbli u l-metodu tal-pagament li għandhom jużaw is-sidien tal-bastimenti għandhom ikunu kif stabbilit fil-Protokoll u fl-Anness u fl-Appendiċijiet tiegħu.

4. Il-Partijiet għandhom jiżguraw l-applikazzjoni korretta ta’ dawn il-kundizzjonijiet u l-proċeduri b’kooperazzjoni amministrattiva xierqa bejn l-awtoritajiet kompetenti.

Artikolu 6

Liġijiet u regolamenti li jirregolaw l-attivitajiet tas-sajd

1. Biex jiġi żgurat qafas regolatorju għas-sajd sostenibbli, il-bastimenti tal-Unjoni li joperaw fiż-żona tas-sajd għandhom jikkonformaw mal-liġijiet u mar-regolamenti tal-Marokk li jirregolaw l-attivitajiet tas-sajd f’dik iż-żona, sakemm ma jkunx speċifikat mod ieħor f’dan il-Ftehim. L-Awtoritajiet tar-Renju tal-Marokk għandhom jinnotifikaw lill-awtoritajiet tal-Unjoni bil-liġijiet u bir-regolamenti applikabbli sa mhux aktar tard minn xahar qabel ma jibda japplika dan il-Ftehim.

2. L-Unjoni timpenja ruħha li tieħu l-miżuri xierqa kollha meħtieġa biex tiżgura li l-bastimenti tagħha jikkonformaw ma’ dan il-Ftehim u mal-liġijiet u r-regolamenti notifikati u li jiġu applikati b’mod effettiv il-miżuri ta’ monitoraġġ, kontroll u sorveljanza tal-attivitajiet tas-sajd previsti f’dan il-Ftehim.

Il-bastimenti tal-Unjoni jridu jikkooperaw mal-awtoritajiet tar-Renju tal-Marokk responsabbli mill-monitoraġġ, il-kontroll u s-sorveljanza.

3. Il-Partijiet għandhom jinfurmaw lil xulxin qabel ma jadottaw kwalunkwe deċiżjoni li tista’ taffettwa l-attivitajiet tal-bastimenti tal-Unjoni skont dan il-Ftehim. Il-Partijiet għandhom jinfurmaw lil xulxin bi kwalunkwe emenda fil-politika jew fil-leġiżlazzjoni tas-sajd rispettiva tagħhom li tista’ tħalli impatt potenzjali fuq l-attivitajiet tal-bastimenti tal-Unjoni skont dan il-Ftehim.

Kull emenda fil-leġiżlazzjoni li taffettwa l-attivitajiet tal-bastimenti tal-Unjoni fiż-żona tas-sajd għandha tkun infurzabbli fir-rigward tal-bastimenti tal-Unjoni mis-60 jum wara li l-awtoritajiet tal-Unjoni jirċievu n-notifika mill-Marokk, ħlief f’ċirkostanzi eċċezzjonali fejn ma japplikax dan il-perjodu.

IMPENJI U OBBLIGI ĠENERALI

Artikolu 7

Sħubija

Il-Partijiet jaqblu li jsaħħu s-sħubija tagħhom, inklużi l-kooperazzjoni fil-qasam xjentifiku, il-kooperazzjoni bejn l-operaturi ekonomiċi, il-koopereazzjoni fil-qasam tal-monitoraġġ, il-kontroll u s-sorveljanza (MKS), il-ġlieda kontra s-sajd illegali, mhux irrappurtat u mhux irregolat (IUU), kif ukoll il-kooperazzjoni amministrattiva għall-implimentazzjoni ta’ politika tas-sajd sostenibbli.

Artikolu 8

Kooperazzjoni fil-qasam xjentifiku

1. Matul il-perjodu tal-Ftehim, il-Partijiet għandhom jikkooperaw biex jimmonitorjaw l-istat tar-riżorsi fiż-żona tas-sajd. Għal dan il-għan, għandha tiġi stabbilita laqgħa xjentifika konġunta li trid issir darba fis-sena fl-Unjoni u fil-Marokk b’mod alternat.

2. Imsejsa fuq il-konklużjonijiet tal-laqgħa xjentifika u l-aqwa pariri xjentifiċi disponibbli, il-Partijiet għandhom jikkonsultaw lil xulxin fil-Kumitat Konġunt previst fl-Artikolu 13 u, fejn ikun meħtieġ u bi qbil komuni, jieħdu miżuri sabiex jiżguraw il-ġestjoni sostenibbli tar-riżorsi tas-sajd.

3. Il-Partijiet b’dan jimpenjaw ruħhom li jikkonsultaw lil xulxin, jew direttament jew fl-organizzazzjonijiet internazzjonali kkonċernati, sabiex jiżguraw il-ġestjoni u l-konservazzjoni tar-riżorsi bijoloġiċi u biex jikkooperaw fir-riċerka xjentifika rilevanti.

Artikolu 9

Kooperazzjoni bejn l-operaturi ekonomiċi

1. Il-Partijiet għandhom iħeġġu l-koperazzjoni ekonomika, xjentifika u teknika fis-settur tas-sajd u fis-setturi relatati. Dawn għandhom jikkonsultaw lil xulxin biex jiffaċilitaw u jippromwovu l-miżuri differenti li jistgħu jittieħdu għal dan il-għan.

2. Il-Partijiet jimpenjaw ruħhom li jippromwovu l-iskambju tal-informazzjoni dwar it-tekniki u l-irkaptu tas-sajd, il-metodi ta’ konservazzjoni u l-proċessi industrijali tal-ipproċessar tal-prodotti tas-sajd.

3. Il-Partijiet għandhom jagħmlu ħilithom sabiex joħolqu l-kundizzjonijiet adattati għall-promozzjoni tar-relazzjonijiet bejn l-intrapriżi tagħhom fl-oqsma tekniċi, ekonomiċi u kummerċjali, billi jħeġġu l-ħolqien ta’ ambjent favorevoli għall-iżvilupp tan-negozju u tal-investiment.

4. Il-Partijiet għandhom iħeġġu l-aktar, il-promozzjoni tal-investimenti fl-interess reċiproku tagħhom, f’konformità mal-leġiżlazzjoni fis-seħħ tagħhom.

Artikolu 10

Kooperazzjoni fil-qasam tal-monitoraġġ, il-kontroll u s-sorveljanza u fil-ġlieda kontra s-sajd illegali, mhux irrappurtat u mhux irregolat

1. Il-Partijiet jimpenjaw ruħhom biex jikkooperaw fil-qasam tal-monitoraġġ, il-kontroll u s-sorveljanza tal-attivitajiet tas-sajd fiż-żona tas-sajd u fil-ġlieda kontra s-sajd illegali, mhux irrappurtat u mhux irregolat bil-għan li jistabbilixxu sajd sostenibbli.

2. L-Awtoritajiet tar-Renju tal-Marokk għandhom jiżguraw li jiġu applikati b’mod effettiv id-dispożizzjonijiet dwar il-kontroll tas-sajd stabbiliti f’dan il-Ftehim u fil-Protokoll tiegħu. Il-bastimenti tal-Unjoni għandhom jikkooperaw mal-awtoritajiet tal-Marokk responsabbli mit-twettiq ta’ dan il-kontroll.

Artikolu 11

Kooperazzjoni amministrattiva

Biex jiżguraw li l-miżuri ta’ konservazzjoni u ta’ ġestjoni tar-riżorsi tas-sajd huma effettivi, il-Partijiet għandhom:

–jiżviluppaw kooperazzjoni amministrattiva biex jiżguraw li l-bastimenti tal-Unjoni jikkonformaw mad-dispożizzjoniji ta’ dan il-Ftehim, b’mod partikolari dawk imsemmija fl-Artikolu 6 tiegħu;

–jikkooperaw biex jipprevjenu u jiġġieldu kontra s-sajd illegali, b’mod partikolari bl-iskambju ta’ informazzjoni u bil-kooperazzjoni amministrattiva mill-qrib.

Artikolu 12

Kontribuzzjoni finanzjarja

1. Il-kontribuzzjoni finanzjarja hija definita fil-Protokoll, fl-Annessi u fl-Appendiċijiet tiegħu.

2. Il-kontribuzzjoni finanzjarja msemmija fil-paragrafu 1 għandha tinkludi:

(a)kumpens finanzjarju mogħti mill-Unjoni għall-aċċess mill-bastimenti tal-Unjoni għaż-żona tas-sajd;

(b)l-imposti li jridu jitħallsu mis-sidien tal-bastimenti tal-Unjoni;

(c)appoġġ settorjali mogħti mill-Unjoni għall-implimentazzjoni ta’ politika tas-sajd sostenibbli u governanza tal-oċeani, soġġett għall-programmazzjoni annwali u pluriennali.

3. Il-kontribuzzjoni finanzjarja mogħtija mill-Unjoni għandha titħallas kull sena skont il-Protokoll.

4. Il-Partijiet għandhom jeżaminaw l-allokazzjoni ġeografika u soċjali ġusta tal-benefiċċji soċjoekonomiċi li jirriżultaw minn dan il-Ftehim, b’mod partikolari f’termini ta’ infrastruttura, servizzi soċjali bażiċi, twaqqif ta’ negozji, taħriġ vokazzjonali, proġetti ta’ żvilupp u ta’ modernizzazzjoni tas-settur tas-sajd, sabiex jiġi żgurat li din l-allokazzjoni tkun ta’ benefiċċju għall-persuni kkonċernati b’mod proporzjonali mal-attivitajiet tas-sajd.

5. L-ammont tal-kontribuzzjoni finanzjarja msemmija fil-paragrafu 2(a) jista’ jiġi rivedut mill-Kumitat Konġunt f’każ ta’:

(a)tnaqqis tal-opportunitajiet tas-sajd mogħtija lill-bastimenti tal-Unjoni, b’mod partikolari għall-applikazzjoni tal-miżuri ta’ ġestjoni tal-istokkijiet ikkonċernati, li jitqiesu neċessarji għall-konservazzjoni u l-użu sostenibbli tar-riżorsi abbażi tal-aqwa pariri xjentifiċi disponibbli;

(b)żieda tal-opportunitajiet tas-sajd mogħtija lill-bastimenti tal-Unjoni jekk, abbażi tal-aqwa pariri xjentifiċi disponibbli, l-istat tar-riżorsi jkun jippermetti dan;

(c)sospensjoni jew terminazzjoni tal-Ftehim skont l-Artikoli 20 u 21 tiegħu.

6. Il-kontibuzzjoni finanzjarja msemmija fil-paragrafu 2(c):

(a)ma għandhiex tkun assoċjata mal-pagamenti għall-kostijiet ta’ aċċess imsemmija fil-paragrafu 2(a) u (b);

(b)għandha tkun stabbilita mill-ilħuq tal-għanijiet tal-appoġġ settorjali skont il-Protokoll u skont il-programmazzjoni annwali u pluriennali tal-implimentazzjoni tiegħu.

7. L-ammont tal-kontribuzzjoni finanzjarja msemmija fil-paragrafu 2(c) jista’ jiġi rivedut mill-Kumitat Konġunt jekk jiġu vvalutati mill-ġdid it-termini tal-appoġġ finanzjarju għall-implimentazzjoni tal-politika settorjali.

DISPOŻIZZJONIJIET ISTITUZZJONALI

Artikolu 13

Kumitat Konġunt

1. Għandu jiġi stabbilit Kumitat Konġunt magħmul minn rappreżentanti tal-Partijiet. Dan il-Kumitat għandu jkun responsabbli mill-monitoraġġ tal-applikazzjoni ta’ dan il-Ftehim u jista’ jemenda l-Protokoll, flimkien mal-Anness u l-Appendiċijiet tiegħu.

2. Il-Kumitat Konġunt għandu:

(a)jimmonitorja t-twettiq, l-interpretazzjoni u l-applikazzjoni ta’ dan il-Ftehim, b’mod partikolari, id-definizzjoni tal-programmazzjoni annwali u pluriennali msemmija fl-Artikolu 12(6)(b) u l-evalwazzjoni tal-implimentazzjoni tagħha;

(b)jiddefinixxi u jevalwa l-programmazzjoni annwali u pluriennali tal-kontribuzzjoni finanzjarja msemmija fl-Artikolu 12(2)(c);

(c)jeżamina l-allokazzjoni ġeografika u soċjali tal-benefiċċji soċjoekonomiċi tal-persuni kkonċernati msemmija fl-Artikolu 12(4);

(d)jiżgura l-komunikazzjoni u l-kooperazzjoni meħtieġa dwar kwistjonijiet ta’ interess komuni fil-qasam tas-sajd;

(e)iservi ta’ forum biex jissolva b’mod amikevoli kull tilwim li jista’ jinqala’ dwar l-interpretazzjoni jew l-applikazzjoni tal-Ftehim.

3. Il-Kumitat Konġunt jista’ japprova l-emendi fil-Protokoll, fl-Anness u fl-Appendiċijiet tiegħu dwar:

(a)ir-reviżjoni tal-opportunitajiet tas-sajd u, b’riżultat ta’ dan, tal-kontribuzzjoni finanzjarja msemmija fl-Artikolu 12(2)(a) u (b);

(b)l-arranġamenti ta’ appoġġ settorjali u, b’riżultat ta’ dan, tal-kontribuzzjoni finanzjarja msemmija fl-Artikolu 12(2)(c);

(c)il-kundizzjonijiet u l-arranġamenti tekniċi li skonthom il-bastimenti tal-Unjoni jwettqu l-attivitajiet tas-sajd tagħhom;

(d)kwalunkwe funzjoni oħra li l-Partijiet jiddeċiedu bi qbil komuni li jagħtuh, inkluż il-ġlieda kontra s-sajd IUU u l-governanza tal-oċeani.

5. Il-Kumitat Konġunt għandu jiltaqa’ mill-inqas darba fis-sena, b’mod alternat bejn il-Marokk u l-Unjoni, jew f’post ieħor li ż-żewġ Partijiet jaqblu dwaru, u għandha tippresedih il-Parti li tkun qed tospita l-laqgħa. Dan għandu jiltaqa’ b’mod straordinarju fuq talba ta’ waħda mill-Partijiet.

Il-konklużjonijiet tal-laqgħat tal-Kumitat Konġunt għandhom jiddaħħlu fil-minuti ffirmati mill-Partijiet.

6. Il-Kumitat Konġunt jista’ jadotta r-regoli ta’ proċedura tiegħu stess.

Artikolu 14

Żona ta’ applikazzjoni

Dan il-Ftehim għandu japplika għat-territorji li, minn naħa japplika t-Trattat li jistabbilixxi l-Unjoni Ewropea u, min-naħa l-oħra, japplikaw il-liġijiet u r-regolamenti msemmija fl-Artikolu 6(1).

DISPOŻIZZJONIJIET FINALI

Artikolu 15

Soluzzjoni tat-tilwim

Il-Partijiet għandhom jikkonsultaw lil xulxin dwar kull tilwim li jikkonċerna l-interpretazzjoni jew l-applikazzjoni ta’ dan il-Ftehim.

Artikolu 16

Status tal-Protokoll, tal-Anness, tal-Appendiċijiet u tal-iskambju ta’ ittri

Il-Protokoll, l-Anness u l-Appendiċijiet tiegħu kif ukoll l-iskambju ta’ ittri li jakkumpanja dan il-Ftehim għandhom ikunu parti integrali ta’ dan il-Ftehim u jkunu rregolati wkoll b’dawn id-dispożizzjonijiet finali.

Artikolu 17

Lingwi u dħul fis-seħħ

Dan il-Ftehim huwa mfassal bil-Bulgaru, biċ-Ċek, bid-Daniż, bl-Estonjan, bil-Finlandiż, bil-Franċiż, bil-Ġermaniż, bil-Grieg, bl-Ingliż, bil-Kroat, bil-Latvjan, bil-Litwan, bil-Malti, bin-Netherlandiż, bl-Għarbi, bil-Pollakk, bil-Portugiż, bir-Rumen, bis-Slovakk, bis-Sloven, bl-Ispanjol, bl-Iżvediż, bit-Taljan u bl-Ungeriż, b’kull test ugwalment awtentiku.

Dan jidħol fis-seħħ fid-data meta l-Partijiet jinnotifikaw lil xulxin li lestew il-proċeduri meħtieġa għal dak il-għan.

Artikolu 18

Durata

Dan il-Ftehim għandu japplika għal perjodu ta’ żmien indefinit.

Artikolu 19

Applikazzjoni proviżorja

Dan il-Ftehim jista’ jiġi applikat b’mod proviżorju bi qbil komuni permezz ta’ skambju ta’ notifiki bejn il-Partijiet, mid-data tal-iffirmar awtorizzat mill-Kunsill tal-Unjoni Ewropea.

Artikolu 20

Sospensjoni

1. L-applikazzjoni ta’ dan il-Ftehim tista’ tiġi sospiża fuq l-inizjattiva ta’ waħda mill-Partijiet fil-każ ta’ xi waħda minn dawn li ġejjin:

(a)f’ċirkostanzi, ħlief il-fenomeni naturali, fejn waħda mill-Partijiet ma jkollhiex kontroll raġonevoli fuqhom b’tali mod li jfixklu l-attivitajiet tas-sajd fiż-żona tas-sajd;

(b)meta tinqala’ xi tilwima bejn il-Partijiet dwar l-interpretazzjoni jew l-implimentazzjoni ta’ dan il-Ftehim, b’mod partikolari rigward il-konformità tal-Artikoli 6, 10 u 12;

(c)meta waħda mill-Partijiet ma tikkonformax ma’ dan il-Ftehim;

(d)meta jkun hemm bidliet sinifikanti fil-politika settorjali li wasslet għall-konklużjoni ta’ dan il-Ftehim, li twassal lil xi waħda mill-Partijiet biex titlob li dan jiġi emendat.

2. Is-sospensjoni tal-applikazzjoni tal-Ftehim għandha tkun notifikata bil-miktub mill-Parti interessata lill-Parti l-oħra u għandha tidħol fis-seħħ tliet xhur wara li tasal din in-notifika. Kif tintbagħat din in-notifika jibdew konsultazzjonijiet bejn il-Partijiet bil-għan li tinstab soluzzjoni amikevoli għat-tilwima tagħhom fi żmien tliet xhur.

3. F’każ li ma tinstabx soluzzjoni amikevoli għad-differenzi u tiġi implimentata s-sospensjoni, il-Partijiet għandhom ikomplu jikkonsultaw lil xulxin bil-għan li jsibu soluzzjoni għat-tilwima tagħhom. Meta tinstab din is-soluzzjoni, għandha tissokta l-implimentazzjoni tal-Ftehim u l-ammont tal-kontribuzzjoni finanzjarja msemmi fl-Artikolu 12(2) għandu jitnaqqas b’mod proporzjonat u pro rata temporis skont il-perjodu li matulu jkun dam sospiż il-Ftehim, sakemm ma jintlaħaqx qbil mod ieħor.

Artikolu 21

Terminazzjoni

1. Dan il-Ftehim jista’ jintemm fuq l-inizjattiva ta’ waħda mill-Partijiet fil-każ ta’ waħda minn dawn li ġejjin:

(a)f’ċirkostanzi, ħlief il-fenomeni naturali, fejn waħda mill-Partijiet ma jkollhiex kontroll raġonevoli fuqhom b’tali mod li jfixklu l-attivitajiet tas-sajd fiż-żona tas-sajd;

(b)f’każ ta’ degradazzjoni tal-istokkijiet ikkonċernati;

(c)f’każ li jonqos il-livell tal-użu tal-opportunitajiet tas-sajd mogħtija lill-bastimenti tal-Unjoni;

(d)f’każ ta’ ksur tal-impenji li daħlu għalihom il-Partijiet dwar il-ġlieda kontra s-sajd IUU;

(e)meta tinqala’ xi tilwima bejn il-Partijiet dwar l-interpretazzjoni jew l-implimentazzjoni ta’ dan il-Ftehim;

(f)meta waħda mill-Partijiet ma tikkonformax ma’ dan il-Ftehim;

(g)meta jkun hemm bidla sinifikanti fil-politika settorjali li wasslet għall-konklużjoni ta’ dan il-Ftehim, li twassal lil xi waħda mill-Partijiet biex titlob li dan jiġi emendat.

2. It-terminazzjoni tal-Ftehim għandha tiġi notifikata bil-miktub mill-Parti interessata lill-Parti l-oħra u għandha tidħol fis-seħħ sitt xhur wara li tasal din in-notifika sakemm il-Partijiet ma jaqblux bejniethom li jtawlu dan il-perjodu.

3. Meta tasal in-notifika ta’ terminazzjoni, il-Partijiet għandhom jikkonsultaw lil xulxin biex isibu soluzzjoni amikevoli għat-tilwima tagħhom fi żmien dan il-perijodu ta’ sitt xhur.

4. Il-pagament tal-kontribuzzjoni finanzjarja msemmija fl-Artikolu 12 għas-sena meta tidħol fis-seħħ it-terminazzjoni għandu jitnaqqas b’mod proporzjonat u pro rata temporis. Dan it-tnaqqis għandu japplika wkoll jekk waħda mill-Partijiet ittemm l-applikazzjoni proviżorja.

Artikolu 22

Reviżjoni

Il-Partijiet jaqblu li jirrevedu dan il-Ftehim biex jitqiesu l-emendi kollha fil-qafas tal-governanza ġuridika, ambjentali, ekonomika u soċjali li jistgħu jaffettwaw l-attivitajiet tas-sajd tal-Unjoni.

Artikolu 23

Tħassir

Il-Ftehim ta’ Sħubija dwar is-Sajd bejn il-Komunità Ewropea u r-Renju tal-Marokk, li daħal fis-seħħ fit-28 ta’ Frar 2007, huwa mħassar.

PROTOKOLL

dwar l-implimentazzjoni tal-Ftehim ta’ Sħubija dwar is-Sajd Sostenibbli bejn l-Unjoni Ewropea u r-Repubblika tal-Marokk

Artikolu 1

Definizzjonijiet

Għall-finijiet ta’ dan il-Protokoll, għandhom japplikaw id-definizzjonijiet stabbiliti fl-Artikolu 1 tal-Ftehim, ħlief għall-emendi msemmijin hawn taħt u ssupplimentati kif ġej:

1. “ftehim dwar is-sajd” tfisser il-Ftehim ta’ Sħubija dwar is-Sajd Sostenibbli bejn l-Unjoni Ewropea u r-Renju tal-Marokk u l-iskambju ta’ ittri li jakkumpanjah;

2. “Protokoll” tfisser il-Protokoll ta’ implimentazzjoni attwali tal-Ftehim dwar is-Sajd, l-Anness u l-Appendiċijiet tiegħu;

3. “żbark” tfisser il-ħatt għal fuq l-art ta’ kwalunkwe kwantità ta’ prodotti tas-sajd minn abbord bastiment tas-sajd;

4. “trasbord” tfisser il-ħatt minn bastiment għal fuq bastiment ieħor ta’ parti mill-prodotti tas-sajd jew tal-prodotti tas-sajd kollha;

5. “osservatur” tfisser persuna awtorizza minn awtorità nazzjonali responsabbli, skont id-dispożizzjonijiet tal-Anness, li tosserva l-implimentazzjoni tar-regoli applikabbli għall-attività tas-sajd jew li tosserva din l-attività għal finijiet xjentifiċi;

6. “liċenzja tas-sajd” tfisser awtorizzazzjoni amministrattiva maħruġa mid-Dipartiment lil sid il-bastiment wara li jħallas tariffa annwali, li biha jkun jista’ jistad fiż-żona ta’ ġestjoni matul il-perjodu li tkun ingħatat;

7. “operatur” tfisser il-persuna fiżika jew ġuridika li topera jew li tikkontrolla kwalunkwe intrapriża li twettaq xi waħda mill-attivitajiet relatati ma’ kwalunkwe stadju tal-katina ta’ produzzjoni, l-ipproċessar, il-kummerċjalizzazzjoni, id-distribuzzjoni u l-bejgħ bl-imnut tal-prodotti tas-sajd u tal-akkwakultura;

8. “Delegazzjoni” tfisser id-Delegazzjoni tal-Unjoni Ewropea fil-Marokk;

9. “Dipartiment” tfisser id-Dipartiment tas-Sajd Marittimu fi ħdan il-Ministeru għall-Agrikoltura, is-Sajd Marittimu, l-Iżvilupp Rurali u tal-Ilma u l-Foresti.

Artikolu 2

Għan

L-għan ta’ dan il-Protokoll huwa li jimplimenta d-dispożizzjonijiet tal-Ftehim dwar is-Sajd, jistabbilixxi b’mod partikolari l-kundizzjonijiet tal-aċċess tal-bastimenti tal-Unjoni għaż-żona tas-sajd iddefinita fl-Artikolu 1(h) tiegħu u d-dispożizzjonijiet tal-implimentazzjoni tas-Sħubija dwar is-Sajd Sostenibbli.

Artikolu 3

Opportunitajiet ta’ sajd

1. Mid-data tal-applikazzjoni ta’ dan il-Protokoll u għall-perjodu ddefinit fl-Artikolu 16, l-opportunitajiet tas-sajd li ġejjin jingħataw skont l-Artikolu 5 tal-Ftehim dwar is-Sajd kif ġej:

(a)għall-kategorija “Sajd pelaġiku fuq skala żgħira fit-Tramuntana bit-tartarun”: 22 bastiment, minn hawn ’il quddiem imsejħa “Kategorija 1”;

(b)għall-kategorija “Sajd fuq skala żgħira fit-Tramuntana bil-konz tal-qiegħ”: 35 bastiment, minn hawn ’il quddiem imsejħa “Kategorija 2”;

(c)għall-kategorija “Sajd fuq skala żgħira fin-Nofsinhar bil-qasba u x-xlief”: 10 bastimenti, minn hawn ’il quddiem imsejħa “Kategorija 3”;

(d)għall-kategorija “Sajd tal-qiegħ fin-Nofsinhar bix-xbieki tat-tkarkir tal-qiegħ u l-konz tal-qiegħ”: 16-il bastiment, minn hawn ’il quddiem imsejħa “Kategorija 4”;

(e)għall-kategorija “Sajd fuq skala żgħira għat-tonn bil-qasba”: 27 bastiment, minn hawn ’il quddiem imsejħa “Kategorija 5”;

(f)għall-kategorija “Sajd pelaġiku industrijali bix-xbieki tat-tkarkir pelaġiku jew semipelaġiku u bit-tartarun tal-borża”: kwota annwali ta’:

i) 85 000 tunnellata għall-ewwel sena ta’ applikazzjoni, 18-il bastiment,

ii) 90 000 tunnellata għat-tieni sena ta’ applikazzjoni, 18-il bastiment,

iii) 100 000 tunnellata għat-tielet u għar-raba’ sena ta’ applikazzjoni, 18-il bastiment,

minn hawn ’il quddiem imsejħa “Kategorija 6”;

2. Il-paragrafu 1 għandu japplika soġġett għad-dispożizzjonijiet tal-Artikoli 5, 10 u 20 ta’ dan il-Protokoll.

3. Skont l-Artikolu 5 tal-Ftehim dwar is-Sajd, il-bastimenti tal-Unjoni jistgħu jwettqu biss attivitajiet tas-sajd fiż-żona tas-sajd jekk ikollhom liċenzja tas-sajd maħruġa f’konformità ma’ dan il-Protokoll u l-arranġamenti stabbiliti fl-Anness u fl-Appendiċijiet tiegħu.

4. Skont id-dispożizzjonijiet tal-Artikolu 3(4) tal-Ftehim dwar is-Sajd, il-Partijiet jaqblu li fil-Kumitati Konġunti jiskambjaw informazzjoni dwar il-qabdiet jew dwar l-isforz totali tas-sajd imwettaq fuq l-istokkijiet ikkonċernati mill-flotot kollha li joperaw fiż-żona tas-sajd.

Artikolu 4

Kontribuzzjoni finanzjarja

1. Il-valur totali annwali stmat tal-Protokoll huwa ta’:

1.1. EUR 48 100 000 għall-ewwel sena ta’ applikazzjoni. Dan l-ammont jitqassam kif ġej:

(a)    EUR 37 000 000 bħala l-kontribuzzjoni finanzjarja msemmija fl-Artikolu 12 tal-Ftehim dwar is-Sajd, allokata kif ġej:

i)EUR 19 100 000 bħala kumpens finanzjarju għall-aċċess tal-bastimenti tal-Unjoni għaż-żona tas-sajd, kif imsemmi fl-Artikolu 12(2)(a) tal-Ftehim dwar is-Sajd;

ii)EUR 17 900 000 bħala appoġġ settorjali kif imsemmi fl-Artikolu 12(2)(c) tal-Ftehim dwar is-Sajd;

b)EUR 11 100 000 li jikkorrispondu għall-ammont stmat tal-imposti li jridu jitħallsu mis-sidien tal-bastimenti, kif imsemmi fl-Artikolu 12(2)(b) tal-Ftehim dwar is-Sajd.

1.2. EUR 50 400 000 għat-tieni sena ta’ applikazzjoni. Dan l-ammont jitqassam kif ġej:

(a)EUR 38 800 000 bħala l-kontribuzzjoni finanzjarja msemmija fl-Artikolu 12 tal-Ftehim dwar is-Sajd, allokata kif ġej:

i)EUR 20 000 000 bħala kumpens finanzjarju għall-aċċess tal-bastimenti tal-Unjoni għaż-żona tas-sajd, kif imsemmi fl-Artikolu 12(2)(a) tal-Ftehim dwar is-Sajd;

ii)EUR 18 800 000 bħala appoġġ settorjali kif imsemmi fl-Artikolu 12(2)(c) tal-Ftehim dwar is-Sajd;

(b)EUR 11 600 000 li jikkorrispondu għall-ammont stmat tal-imposti li jridu jitħallsu mis-sidien tal-bastimenti, kif imsemmi fl-Artikolu 12(2)(b) tal-Ftehim dwar is-Sajd.

1.3. EUR 55 100 000 għat-tielet u għar-raba’ sena ta’ applikazzjoni. Dan l-ammont jitqassam kif ġej:

(a)EUR 42 400 000 bħala l-kontribuzzjoni finanzjarja msemmija fl-Artikolu 12 tal-Ftehim dwar is-Sajd, allokata kif ġej:

i)EUR 21 900 000 bħala kumpens finanzjarju għall-aċċess tal-bastimenti tal-Unjoni għaż-żona tas-sajd, kif imsemmi fl-Artikolu 12(2)(a) tal-Ftehim dwar is-Sajd;

ii)EUR 20 500 000 bħala appoġġ settorjali kif imsemmi fl-Artikolu 12(2)(c) tal-Ftehim dwar is-Sajd;

(b)    EUR 12 700 000 li jikkorrispondu għall-ammont stmat tal-imposti li jridu jitħallsu mis-sidien tal-bastimenti, kif imsemmi fl-Artikolu 12(2)(b) tal-Ftehim dwar is-Sajd.

2. Skont id-dispożizzjonijiet tal-Artikolu 12 tal-Ftehim dwar is-Sajd u b’mod partikolari l-paragrafu 4 tiegħu u soġġett għad-dispożizzjonijiet tal-Artikolu 5, l-awtoritajiet tar-Renju tal-Marokk għandhom jallokaw il-kontribuzzjoni finanzjarja skont id-dispożizzjonijiet tal-Artikoli 6 u 7 ta’ dan il-Protokoll.

3. Il-paragrafu 1 għandu japplika soġġett għad-dispożizzjonijiet tal-Artikoli 5, 10, 18, 19 u 20 ta’ dan il-Protokoll.

4. Il-kontribuzzjoni finanzjarja msemmija fil-paragrafu 12(2)(a) u (c) tal-Ftehim dwar is-Sajd għandha titħallas lit-Teżorier Ġenerali tar-Renju tal-Marokk f’kont apposta għal dan il-għan, miftuħ mat-Teżor Ġenerali tar-Renju tal-Marokk, li d-dettalji tiegħu għandhom jiġu kkomunikati mill-awtoritajiet tar-Renju tal-Marokk.

Artikolu 5

Reviżjoni tal-opportunitajiet tas-sajd

1. L-opportunitajiet tas-sajd imsemmija fl-Artikolu 3 ta’ dan il-Protokoll jistgħu jiġu riveduti mill-Kumitat Konġunt skont l-Artikolu 13(3)(a) tal-Ftehim dwar is-Sajd, bi qbil komuni u sakemm ir-reviżjoni ma tippreġudikax is-sostenibbiltà tar-riżorsi fiż-żona tas-sajd. Din ir-reviżjoni tista’ tikkonċerna l-għadd ta’ bastimenti, l-ispeċijiet fil-mira jew il-kwoti allokati skont l-Artikolu 3 għal kull kategorija.

2. Skont id-dispożizzjonijiet tal-Artikolu 12(5) tal-Ftehim dwar is-Sajd, jekk jiżdiedu jew jitnaqqsu l-opportunitajiet tas-sajd, il-kumpens finanzjarju previst fl-Artikolu 12(2)(a) tal-Ftehim għandu jiġi rrivedut b’mod proporzjonat għall-opportunitajiet tas-sajd, pro rata temporis u abbażi tal-valur stmat tal-qabdiet għall-kategoriji kkonċernati. Din ir-reviżjoni għandha tiġi approvata mill-Kumitat Konġunt.

Madankollu, ma jistax ikun hemm żieda fl-opportunitajiet tas-sajd li ssarraf fl-irduppjar tal-kumpens finanzjarju mħallas mill-Unjoni msemmi fl-Artikolu 12(2)(a) tal-Ftehim dwar is-Sajd.

Artikolu 6

Kumpens finanzjarju li jingħata għall-aċċess għaż-żona tas-sajd u imposti li jridu jitħallsu mis-sidien tal-bastimenti

1. Il-kumpens finanzjarju msemmi fl-Artikolu 12(2)(a) u t-tariffi msemmija fl-Artikolu 12(2)(b) tal-Ftehim dwar is-Sajd għandhom ikunu soġġetti għal allokazzjoni ġeografika u soċjali ġusta tal-benefiċċji soċjoekonomiċi sabiex jiġi żgurat li l-kumpens ikun ta’ benefiċċju għall-komunitajiet lokali kkonċernati, skont l-Artikolu 12(4) tal-Ftehim dwar is-Sajd.

2. Sa mhux aktar tard minn 3 xhur wara d-data tal-applikazzjoni ta’ dan il-Protokoll, l-awtoritajiet tar-Renju tal-Marokk għandhom jippreżentaw metodu li jwassal għall-allokazzjoni ġeografika u soċjali msemmija fil-paragrafu 1 kif ukoll kriterju tal-allokazzjoni tal-ammonti li jridu jiġu allokati, li għandhom jiġu eżaminati mill-Kumitat Konġunt.

3. Kull emenda sinifikanti fl-allokazzjoni ġeografika u soċjali għandha tiġi eżaminata mill-Partijiet fi ħdan il-Kumitat Konġunt.

4. Kull sena u fi żmien 3 xhur, l-awtoritajiet tar-Renju tal-Marokk għandhom jippreżentaw rapport annwali dwar l-allokazzjoni ġeografika u soċjali fis-sena finanzjarja preċedenti.

5. Qabel ma jiskadi dan il-Protokoll, l-awtoritajiet tar-Renju tal-Marokk għandhom jippreżentaw rapport finali dwar l-allokazzjoni ġeografika u soċjali tal-ammonti msemmija fil-paragrafu 1.

Artikolu 7

Allokazzjoni tal-appoġġ settorjali

1. L-appoġġ settorjali msemmi fl-Artikolu 12(2)(c) tal-Ftehim dwar is-Sajd se jikkontribwixxi għall-iżvilupp u l-implimentazzjoni tal-politika settorjali fil-qafas tal-istrateġija nazzjonali għall-iżvilupp tas-settur tas-sajd.

2. Sa mhux aktar tard minn 3 xhur wara d-data tal-applikazzjoni ta’ dan il-Protokoll, il-Kumitat Konġunt għandu jaqbel fuq programm settorjali pluriennali u fuq arranġamenti ta’ implimentazzjoni dettaljati li jkopru, b’mod partikolari:

(a)linji gwida annwali u pluriennali għall-użu tal-ammont speċifiku mogħti bħala appoġġ settorjali skont l-Artikolu 12(4) tal-Ftehim dwar is-Sajd;

(b)l-għanijiet annwali u pluriennali li jridu jinkisbu sabiex jiġu żviluppati attivitajiet tas-sajd sostenibbli, filwaqt li jitqiesu l-prijoritajiet tal-awtoritajiet tar-Renju tal-Marokk stabbiliti fil-politika settorjali nazzjonali tiegħu;

(c)il-kriterji, ir-rapporti u l-proċeduri, inklużi l-indikaturi baġitarji u finanzjarji, u l-metodi ta’ kontroll u ta’ awditu li jridu jintużaw biex jiġu vvalutati r-riżultati miksuba fuq bażi annwali.

3. Kull emenda f’dawn il-linji gwida, l-għanijiet, il-kriterji u l-indikaturi għandha tiġi approvata mill-Partijiet fi ħdan il-Kumitat Konġunt.

4. L-awtoritajiet tar-Renju tal-Marokk għandhom jippreżentaw rapport annwali dwar il-progress tal-proġetti implimentati fil-qafas tal-appoġġ settorjali, li għandu jiġi eżaminat mill-Kumitat Konġunt. L-istruttura tar-rapport għandha tkun stabbilita mill-Kumitat Konġunt sa mhux aktar tard minn 3 xhur wara d-data ta’ applikazzjoni ta’ dan il-Protokoll.

5. Skont in-natura tal-proġetti u t-tul ta’ żmien tagħhom, ladarba dawn jitlestew, l-awtoritajiet tar-Renju tal-Marokk għandhom jippreżentaw rapport ta’ implimentazzjoni li jrid jiġi eżaminat mill-Kumitat Konġunt. Il-kontenut ta’ dan ir-rapport għandu jiġi ddefinit mill-Kumitat Konġunt.

6. Qabel ma jiskadi l-Protokoll, l-awtoritajiet tar-Renju tal-Marokk għandhom jippreżentaw ukoll rapport finali dwar l-implimentazzjoni tal-appoġġ settorjali previst skont dan il-Protokoll, inklużi l-elementi msemmija fil-paragrafi preċedenti.

7. Jekk ikun meħtieġ, il-Partijiet għandhom ikomplu jimmonitorjaw l-implimentazzjoni tal-appoġġ settorjali sa mhux aktar minn sitt xhur wara l-iskadenza, is-sospensjoni jew it-terminazzjoni ta’ dan il-Protokoll kif previst fih stess. Madankollu, għandhom jitqiesu kull azzjoni jew proġett approvati minn qabel mill-Kumitat Konġunt biex il-monitoraġġ tal-appoġġ settorjali għal din l-azzjoni jew dan il-proġett ikun jista’ jiġi estiż għal perjodu addizzjonali ta’ mhux aktar minn sitt xhur.

8. Il-Partijiet għandhom ifasslu pjan ta’ komunikazzjoni u ta’ viżibbiltà relatat mal-Ftehim dwar is-Sajd. Dan il-pjan għandu jiġi approvat mill-ewwel laqgħa tal-Kumitat Konġunt.

Artikolu 8

Pagamenti

1. Il-pagament tal-kontribuzzjoni finanzjarja prevista fl-Artikolu 12(2)(a) tal-Ftehim dwar is-Sajd irid jitħallas:

(a)għall-ewwel sena, sa mhux aktar tard minn xahrejn wara l-laqgħa tal-Kumitat Konġunt li tapprova l-metodu ta’ allokazzjoni msemmi fl-Artikolu 6(2);

(b)għas-snin ta’ wara, fid-data tal-anniversarju tal-applikazzjoni ta’ dan il-Protokoll, soġġetta għall-analiżi mill-Kumitat Konġunt skont il-paragrafi 4 u 5.

2. Il-pagament tal-kontribuzzjoni finanzjarja prevista fl-Artikolu 12(2)(c) tal-Ftehim dwar is-Sajd irid jitħallas:

(a)għall-ewwel sena, sa mhux aktar tard minn xahrejn wara li l-Kumitat Konġunt ikun approva l-programmazzjoni annwali u pluriennali prevista fl-Artikolu 7(2) ta’ dan il-Protokoll;

(b)għas-snin ta’ wara, xahrejn wara l-approvazzjoni mill-Kumitat Konġunt tal-kisbiet tas-sena preċedenti u tal-programmazzjoni annwali prevista għas-sena finanzjarja li jmiss.

3. Il-pagament tal-imposti dovut mis-sidien tal-bastimenti għandu jitħallas kif previst fit-Taqsima E tal-Kapitolu I tal-Anness ta’ dan il-Protokoll.

4. Kull sena l-Kumitat Konġunt għandu jikkonferma li r-riżultati miksuba jikkonformaw mal-programmazzjoni u li l-pagamenti li jkunu saru jikkonformaw mal-kriterju tal-allokazzjoni ġeografika u soċjali.

5. Jekk ir-riżultati miksuba ma jikkonformawx mal-programmazzjoni jew mal-metodu msemmi fl-Artikolu 6(2) u (3), inkluż fir-rigward tal-allokazzjoni ġeografika u soċjali, il-pagamenti u l-attivitajiet tas-sajd relatati jistgħu jiġu riveduti, jew skont il-każ, parzjalment jew totalment sospiżi. F’dawn il-każijiet il-Partijiet għandhom ikomplu jikkonsultaw lil xulxin u l-pagamenti u l-attivitajiet tas-sajd rilevanti għandhom jitkomplew ladarba l-Kumitat Konġunt jikkonferma li ġew issodisfati l-kundizzjonijiet stabbiliti fil-paragrafu 4.

Artikolu 9

Koordinazzjoni fil-qasam xjentifiku

1. Skont l-Artikoli 3 u 8 tal-Ftehim dwar is-Sajd, il-Partijiet jimpenjaw ruħhom li jorganizzaw laqgħat xjentifiċi fuq bażi regolari jew meta jkun hemm bżonn, sabiex jiġu eżaminati kwistjonijiet ta’ natura xjentifika u, jekk meħtieġ u fuq talba tal-Kumitat Konġunt, il-valur stmat tal-ewwel bejgħ tal-qabdiet fil-post tal-iżbark jew fis-swieq aħħarin.

2. Il-mandat, il-kompożizzjoni u t-tmexxija ta’ dawn il-laqgħat xjentifiċi għandhom jiġu stabbiliti mill-Kumitat Konġunt.

Artikolu 10

Kampanji ta’ sajd xjentifiku

Għall-finijiet tar-riċerka u biex jissaħħaħ l-għarfien xjentifiku u tekniku, u fuq talba tal-Kumitat Konġunt, tista’ ssir kampanja ta’ sajd xjentifiku fiż-żona tas-sajd. L-arranġamenti ta’ kif għandha tiġi implimentata l-kampanja ta’ sajd xjentifiku għandhom jiġu stabbiliti skont id-dispożizzjonijiet previsti fil-Kapitolu III tal-Anness ta’ dan il-Protokoll.

Artikolu 11

Kooperazzjoni bejn l-operaturi ekonomiċi

Skont il-leġiżlazzjoni u r-regolamenti fis-seħħ, il-Partijiet għandhom jippromwovu l-kuntatti u jikkontribwixxu għall-kooperazzjoni bejn l-operaturi ekonomiċi fl-oqsma li ġejjin:

(a)l-iżvilupp ta’ industriji marbuta mas-sajd, b’mod partikolari l-kostruzzjoni u t-tiswija navali u l-manifattura ta’ rkaptu u materjali tas-sajd;

(b)l-iżvilupp tal-iskambju ta’ għarfien espert professjonali u t-taħriġ ta’ maniġers għas-settur tas-sajd marittimu;

(c)it-tqegħid fis-suq tal-prodotti tas-sajd;

(d)il-kummerċjalizzazzjoni;

(e)l-akkwakultura u l-ekonomija blu.

Artikolu 12

In-nuqqas ta’ konformità mad-dispożizzjonijiet u l-obbligi stabbiliti bil-Protokoll

F’konformità mad-dispożizzjonijiet ta’ dan il-Protokoll u l-leġiżlazzjoni fis-seħħ fiż-żona tas-sajd, l-awtoritajiet tar-Renju tal-Marokk jirriżervaw id-dritt li japplikaw is-sanzjonijiet kif previsti fl-Anness f’każ ta’ nuqqas ta’ konformità mad-dispożizzjonijiet u l-obbligi stabbiliti bl-applikazzjoni ta’ dan il-Protokoll.

Artikolu 13

Skambju elettroniku ta’ data

Il-Partijiet jimpenjaw ruħhom li jistabbilixxu mill-aktar fis is-sistemi, bħall-ERS, meħtieġa biex ikun żgurat l-iskambju elettroniku tal-informazzjoni u tad-dokumenti kollha marbuta mal-ġestjoni teknika ta’ dan il-Protokoll, bħad-data dwar il-qabdiet, il-pożizzjonijiet VMS u n-notifiki tad-dħul fiż-żona u tal-ħruġ minnha mill-bastimenti tal-Unjoni li joperaw skont dan il-Ftehim dwar is-Sajd.

Artikolu 14

Kunfidenzjalità

1. Il-Partijiet jimpenjaw ruħhom sabiex id-data personali kollha dwar il-bastimenti tas-sajd tal-Unjoni u l-attivitajiet tas-sajd tagħhom miksuba fil-qafas ta’ dan il-Ftehim, inkluża d-data miġbura mill-osservaturi, jiġu proċessati skont il-prinċipji tal-kunfidenzjalità u tal-protezzjoni tad-data.

2. Il-Partijiet għandhom jiżguraw li jippubblikaw biss id-data aggregata marbuta mal-attivitajiet tas-sajd fiż-żona tas-sajd.

3. Id-data li tista’ titqies bħala kunfidenzjali għandha tintuża mill-awtoritajiet kompetenti esklussivament għall-implimentazzjoni tal-Ftehim u għall-ġestjoni, il-kontroll u s-sorveljanza tas-sajd.

4. Fir-rigward tad-data personali mibgħuta lill-Unjoni, il-Kumitat Konġunt jista’ jistabbilixxi salvagwardji adegwati u rimedji legali skont ir-Regolament Ġenerali dwar il-Protezzjoni tad-Data.

Artikolu 15

Dħul fis-seħħ

Dan il-Protokoll u l-Anness u l-Appendiċijiet tiegħu għandhom jidħlu fis-seħħ fid-data li fiha l-Partijiet jinnotifikaw lil xulxin bit-twettiq tal-proċeduri meħtieġa għal dan il-għan.

Artikolu 16

Durata

Minkejja l-Artikolu 18 tal-Ftehim dwar is-Sajd, dan il-Protokoll għandu japplika għal perjodu ta’ erba’ snin mid-data tad-dħul fis-seħħ tiegħu jew, skont il-każ, l-applikazzjoni proviżorja tiegħu.

Artikolu 17

Applikazzjoni proviżorja

Dan il-Protokoll jista’ jiġi applikat b’mod proviżorju bi qbil komuni permezz ta’ skambju ta’ notifiki bejn iż-żewġ Partijiet, mid-data tal-iffirmar awtorizzat mill-Kunsill tal-Unjoni Ewropea.

Artikolu 18

Sospensjoni

L-applikazzjoni ta’ dan il-Protokoll tista’ tiġi sospiża fuq l-inizjattiva ta’ waħda mill-Partijiet skont id-dispożizzjonijiet tal-Artikolu 20 tal-Ftehim dwar is-Sajd.

Artikolu 19

Terminazzjoni

Dan il-Protokoll jista’ jintemm fuq l-inizjattiva ta’ waħda mill-Partijiet skont id-dispożizzjonijiet tal-Artikolu 21 tal-Ftehim dwar is-Sajd.

Artikolu 20

Reviżjoni

Dan il-Protokoll jista’ jiġi rivedut fuq l-inizjattiva ta’ waħda mill-Partijiet skont id-dispożizzjonijiet tal-Artikolu 22 tal-Ftehim dwar is-Sajd.

ANNESS

KUNDIZZJONIJIET LI JIRREGOLAW L-ATTIVITAJIET TAS-SAJD TAL-BASTIMENTI TAL-UNJONI FIŻ-ŻONA TAS-SAJD

KAPITOLU I

DISPOŻIZZJONIJIET APPLIKABBLI GĦALL-APPLIKAZZJONIJIET U L-ĦRUĠ TAL-LIĊENZJI

A. Applikazzjonijiet għal-liċenzji

1. Il-bastimenti eliġibbli biss jistgħu jingħataw liċenzja biex jistadu fiż-żona tas-sajd.

2. Sabiex bastiment ikun eliġibbli, la sid il-bastiment, la l-kaptan u lanqas il-bastiment innifsu ma jridu jkunu pprojbiti milli jistadu fiż-żona tas-sajd u l-bastiment ma jridx ikun legalment elenkat bħala bastiment IUU.

3. Dawn iridu jkunu konformi mal-leġiżlazzjoni fis-seħħ u jkunu ssodisfaw l-obbligi kollha preċedenti li jiġu mill-attivitajiet tas-sajd tagħhom fiż-żona tas-sajd.

4. L-awtoritajiet tal-Unjoni għandhom jippreżentaw lid-Dipartiment tas-Sajd Marittimu tal-Ministeru għall-Agrikoltura, is-Sajd Marittimu, l-Iżvilupp Rurali u tal-Ilma u l-Foresti (minn hawn ’il quddiem imsejjaħ “id-Dipartiment”), il-listi tal-bastimenti li japplikaw biex iwettqu l-attivitajiet tas-sajd tagħhom fil-limiti stabbiliti fid-dokumenti tekniċi annessi mal-Protokoll, mill-inqas 20 jum qabel id-data tal-bidu tal-validità tal-liċenzji mitluba.

Dawn il-listi għandhom:

(a)jintbagħtu lid-Dipartiment bil-posta elettronika billi jintużaw l-indirizzi li jingħataw bl-iskambju ta’ ittri qabel id-data ta’ applikazzjoni tal-Protokoll;

(b)jiddikjaraw l-għadd ta’ bastimenti għal kull kategorija tas-sajd u għal kull żona ta’ ġestjoni, u għal kull bastiment, il-karatteristiċi prinċipali tiegħu, l-ammonti li jridu jitħallsu maqsuma skont l-intestatura u l-irkaptu li se jintuża matul il-perjodu inkwistjoni, u għall-kategorija 6 jiddikjaraw il-kwota mitluba f’tunnellati ta’ qabdiet fl-għamla ta’ tbassir ta’ kull xahar.

5. Fir-rigward tal-kategorija 6, jekk f’xahar partikolari l-qabdiet

(a)jilħqu l-kwota proviżorja ta’ kull xahar tal-bastiment qabel tmiem ix-xahar inkwistjoni, sid il-bastiment jista’ jibgħat lid-Dipartiment, permezz tal-awtoritajiet tal-Unjoni, ammont proviżorju aġġustat tat-tbassir tal-qabdiet għal kull xahar u talba għal estensjoni tal-kwota proviżorja tiegħu ta’ kull xahar;

(b)jibqgħu taħt il-kwota proviżorja ta’ kull xahar tal-bastiment, l-ammont korrispondenti tal-kwota jew tat-tariffa għandu jiġi riportat għall-perjodu ta’ attività li jmiss fis-sena kalendarja attwali.

6. L-applikazzjonijiet individwali għal-liċenzja, miġbura skont il-kategorija tas-sajd, għandhom jintbagħtu lid-Dipartiment fl-istess ħin li jintbagħtu l-listi msemmija hawn fuq, f’konformità mal-mudell tal-formola mogħti fl-Appendiċi 1.

7. Kull applikazzjoni għal liċenzja għandha tkun akkumpanjata bid-dokumenti li ġejjin:

(a)kopja taċ-ċertifikat tat-tunnellaġġ iċċertifikat kif xieraq mill-Istat tal-bandiera;

(b)ritratt diġitali bil-kulur riċenti, b’riżoluzzjoni grafika minima ta’ 1400 x 1050 pixels u awtentikat skont il-proċeduri fis-seħħ fl-Istat tal-bandiera, li juri l-ġenb tal-bastiment fl-istat attwali tiegħu bl-ittri u bin-numri ta’ reġistrazzjoni li jidhru b’mod ċar. Dan ir-ritratt ma għandux ikun izgħar minn 15 cm x 10 cm;

(c)prova tal-pagament tat-tariffi annwali għal-liċenzja tas-sajd kif iddefinit mil-leġiżlazzjoni fis-seħħ u tal-imposti u tal-ispejjeż tal-osservaturi stabbiliti fit-Taqsima E ta’ hawn taħt;

(d)kull dokument jew ċertifikat ieħor meħtieġ skont id-dispożizzjonijiet partikolari li huma applikabbli għat-tip ta’ bastiment ikkonċernat skont dan il-Protokoll.

8. Jekk liċenzja tiġġedded sena wara sena skont dan il-Protokoll fir-rigward ta’ bastiment li l-karatteristiċi tekniċi tiegħu ma nbidlux, l-applikazzjoni ta’ tiġdid għandha tkun akkumpanjata biss bil-prova tal-pagament tat-tariffi tal-liċenzja tas-sajd, ta’ imposti oħra u tal-ispejjeż tal-osservaturi.

9. Il-formoli tal-applikazzjoni għal-liċenzja u d-dokumenti kollha msemmija fil-paragrafu 6 ta’ hawn fuq li fihom l-informazzjoni meħtieġa għall-istabbiliment tal-liċenzji tas-sajd jistgħu jintbagħtu mill-awtoritajiet tal-Unjoni lid-Dipartiment bil-posta elettronika.

B. Ħruġ tal-liċenzji

1. Id-Dipartiment għandu joħroġ il-liċenzji tas-sajd għall-awtoritajiet tal-Unjoni, permezz tad-Delegazzjoni tal-Unjoni Ewropea fil-Marokk (minn hawn ’il quddiem imsejħa d-“Delegazzjoni”) għall-bastimenti kollha fi żmien 15-il jum wara li d-Dipartiment jirċievi d-dokumentazzjoni kollha msemmija fil-punt 6 ta’ hawn fuq.

2. Jekk ikun il-każ, id-Dipartiment għandu jinnotifika lill-awtoritajiet tal-Unjoni r-raġunijiet għaliex il-liċenzja ġiet irrifjutata.

3. Il-liċenzji tas-sajd għandhom ikunu stabbiliti skont id-data li tinsab fid-dokumenti tekniċi tal-Appendiċi 2, u għandhom isemmu b’mod partikolari ż-żona ta’ ġestjoni, id-distanza mill-kosta, id-data li għandha x’taqsam mal-apparat ta’ pożizzjonament u lokalizzazzjoni kontinwi bis-satellita (numru tas-serje tat-transponder VMS), l-irkaptu awtorizzat, l-ispeċijiet prinċipali, id-daqsijiet tax-xbieki awtorizzati, il-qabdiet inċidentali permissibbli u għall-kategorija 6, il-kwoti proviżorji ta’ kull xahar tal-qabdiet awtorizzati tal-bastiment.

4. Il-kwota proviżorja ta’ kull xahar tal-bastiment tista’ tiġi estiża skont il-limiti tal-qabdiet previsti fid-dokument tekniku korrispondenti.

5. Il-liċenzji tas-sajd jistgħu jinħarġu biss għall-bastimenti li jkunu kkonformaw mal-formalitajiet amministrattivi kollha meħtieġa f’dan ir-rigward.

6. Il-Partijiet għandhom jaqblu li jippromwovu l-ħolqien ta’ sistema ta’ liċenzji elettroniċi.

C. Validità u użu tal-liċenzji

1. Bl-eċċezzjoni tal-ewwel sena, li tibda fid-data tal-applikazzjoni u tispiċċa mhux aktar tard mill-31 ta’ Diċembru, il-liċenzji tas-sajd għandhom ikunu validi għal:

(a)sena kalendarja waħda (kategorija 5) li tikkorrispondi għall-perjodu minn meta tibda l-validità tal-liċenzja sal-31 ta’ Diċembru;

(b)tliet xhur (kategoriji 1, 2, 3 u 4) li jikkorrispondu għal wieħed mill-perjodi ta’ tliet xhur li jibda fl-1 ta’ Jannar, fl-1 ta’ April, fl-1 ta’ Lulju jew fl-1 ta’ Ottubru;

(c)xahar (kategorija 6) li jikkorrispondi għall-perjodu minn meta tibda l-validità tal-liċenzja sa tmiem ix-xahar.

Għall-aħħar sena ta’ applikazzjoni, li tibda mill-1 ta’ Jannar u tispiċċa fid-data tal-iskadenza tal-Protokoll, il-perjodu msemmija hawn fuq għandhom jitqassru de facto, skont il-każ, minħabba l-iskadenza tal-Protokoll.

2. Il-liċenzja tas-sajd għandha tkun valida biss għall-perjodu kopert mill-pagament tal-imposti, kif ukoll għaż-żona ta’ ġestjoni, it-tipi ta’ rkaptu u l-kategorija tas-sajd indikati fl-istess liċenzja.

3. Kull liċenzja tas-sajd għandha tinħareġ f’isem bastiment speċifiku u mhijiex trasferibbli. Madankollu, f’każ ippruvat ta’ forza maġġuri, bħat-telf jew l-immobilizzazzjoni fit-tul ta’ bastiment minħabba ħsara teknika serja kkonfermat kif xieraq mill-awtoritajiet kompetenti tal-Istat tal-bandiera, il-liċenzja ta’ bastiment tista’ titħassar fuq talba mill-awtoritajiet tal-Unjoni. Għandha tinħareġ liċenzja ġdida mill-aktar fis possibbli skont id-dispożizzjonijiet applikabbli għall-applikazzjonijiet u l-ħruġ ta’ liċenzji ta’ bastiment ieħor li jappartjeni għall-istess kategorija tas-sajd u b’tunnellaġġ li ma jaqbiżx dak tal-bastiment li tkun tħassritlu l-liċenzja.

4. F’każ li titħassar il-liċenzja, sid il-bastiment jew ir-rappreżentant tiegħu, għandhom jirritornaw il-liċenzja tas-sajd imħassra lid-Dipartiment.

5. Il-liċenzja tas-sajd għandha tinżamm il-ħin kollu abbord il-bastiment u tintwera lill-awtoritajiet ta’ kontroll kull darba li ssir spezzjoni.

D. Pagamenti tal-liċenzji tas-sajd u imposti

1. Il-pagamenti annwali tal-liċenzji tas-sajd huma stabbiliti fil-liġijiet u fir-regolamenti Marokkini li jirregolaw l-attivitajiet tas-sajd fiż-żona tas-sajd.

2. Il-pagamenti tal-liċenzji għandhom ikopru s-sena kalendarja li fiha tinħareġ il-liċenzja u għandhom jitħallsu mal-ewwel applikazzjoni għal liċenzja għal dik is-sena. Il-pagamenti tal-liċenzji jinkludu kull pagament jew taxxa oħra relatati, ħlief għat-taxxi tal-port jew il-pagamenti għall-għoti ta’ servizzi.

3. Minbarra l-pagamenti tal-liċenzji tas-sajd, l-imposti għandhom jiġu kkalkulati għal kull bastiment skont ir-rati stabbiliti fid-dokumenti tekniċi tal-Appendiċi 2.

4. Il-kalkolu tat-tariffi għandu jsir pro rata mal-perjodu ta’ validità effettiva tal-liċenzja tas-sajd, filwaqt li jitqies kull perjodu ta’ waqfien mis-sajd.

E. Termini tal-pagament

1. Il-pagament tal-liċenzji tas-sajd, tal-imposti u tal-ispejjeż tal-osservaturi għandu jsir f’isem it-Teżorier Ministerjali tal-Ministeru għall-Agrikoltura, is-Sajd Marittimu, l-Iżvilupp Rurali u tal-Ilma u l-Foresti fil-kont tal-bank Nru 0018100078000 20110750201 miftuħ fil-Bank Al Maghrib, il-Marokk, qabel ma jinħarġu l-liċenzji tas-sajd.

2. Il-pagament tal-imposti għall-qabdiet mill-bastimenti tal-kategorija 5 għandu jitħallas kif ġej:

(a)L-ammont b’rata fissa mħallas minn qabel (EUR 7 000 għal kull bastiment) imsemmi fid-dokument tekniku għandu jitħallas qabel ma tibda l-attività tas-sajd;

(b)L-ammont imħallas minn qabel għandu jiġi kkalkulat pro rata skont it-tul tal-validità tal-liċenzja;

(c)Sat-30 ta’ Ġunju, l-awtoritajiet tal-Unjoni għandhom jippreżentaw lid-Dipartiment dikjarazzjoni tal-imposti dovuti għas-sena tas-sajd preċedenti, ibbażata fuq ir-rappurtar tal-qabdiet ta’ kull sid tal-bastiment, ivverifikata u vvalidata mill-awtoritajiet kompetenti tal-Istat tal-bandiera u mill-awtoritajiet tar-Renju tal-Marokk;

(d)Għall-aħħar sena tal-applikazzjoni, id-dikjarazzjoni tal-imposti dovuti għas-sena tas-sajd preċedenti għandha tiġi nnotifikata fi żmien erba’ xhur wara li jiskadi l-Protokoll;

(e)e) Id-dikjarazzjoni finali għandha tintbagħat lis-sidien tal-bastimenti kkonċernati li għandu jkollhom 30 jum mid-data li fiha d-Dipartiment jinnotifika l-approvazzjoni taċ-ċifri, sabiex jissodisfaw l-obbligi finanzjarji tagħhom. Il-prova tal-pagament minn sid il-bastiment, li għandha ssir f’euro f’isem it-Teżorier Ġenerali tal-Marokk fil-kont tal-bank imsemmi fil-paragrafu 1, għandha tintbagħat lid-Dipartiment mill-awtoritajiet tal-Unjoni sa mhux aktar tard minn xahar u nofs wara dik in-notifika;

(f)f) Madankollu, jekk l-ammont tad-dikjarazzjoni jkun inqas mit-total tal-pagament bil-quddiem imsemmi hawn fuq, id-differenza korrispondenti ma tistax tiġi rkuprata;

(g)g) Is-sidien tal-bastimenti għandhom jieħdu l-miżuri kollha meħtieġa biex jiżguraw li kwalunkwe pagament supplimentari jitħallas fiż-żmien stabbilit fil-punt (e).

(h)h) In-nuqqas ta’ konformità mal-obbligi stabbiliti fil-punt (e) għandu jwassal għas-sospensjoni awtomatika tal-liċenzja tas-sajd sakemm sid il-bastiment jikkonforma ma’ dawk l-obbligi.

3. Il-pagament tal-imposti fuq il-kwoti allokati għall-bastimenti tat-tkarkir tal-kategorija 6 għandu jitħallas kif ġej:

(a)l-imposta korrispondenti għall-kwota proviżorja ta’ kull xahar tal-bastiment mitluba minn sid il-bastiment għandha titħallas qabel ma tibda l-attività tas-sajd;

(b)f’każ li tiġi estiża l-kwota proviżorja ta’ kull xahar kif imsemmi fil-paragrafu 5 tat-Taqsima A, l-imposta korrispondenti għal din l-estensjoni trid tasal għand l-awtoritajiet tar-Renju tal-Marokk qabel ma jitkomplew l-attivitajiet tas-sajd;

(c)f’każ ta’ skorriment tal-kwota proviżorja ta’ kull xahar u ta’ kwalunkwe estensjoni tagħha, l-ammont tal-imposta korrispondenti għal dan l-iskorriment għandu jiżdied b’fattur ta’ 3. Il-bilanċ ta’ kull xahar, ikkalkulat abbażi tal-qabdiet reali, għandu jitħallas fi żmien xahrejn mix-xahar li fih saru dawn il-qabdiet.

KAPITOLU II

ŻONI TA’ ĠESTJONI

1. Iż-żoni ta’ ġestjoni għal kull kategorija tas-sajd huma stabbiliti fid-dokumenti tekniċi tal-Appendiċi 2.

2. Qabel id-data ta’ applikazzjoni ta’ dan il-Protokoll, l-awtoritajiet tar-Renju tal-Marokk għandhom jikkomunikaw lill-awtoritajiet tal-Unjoni l-koordinati ġeografiċi taż-żoni ta’ ġestjoni kif ukoll kull żona fit-territorju tagħhom fejn is-sajd huwa projbit.

3. Din l-informazzjoni għandha tintbagħat b’mod elettroniku, f’forma deċimali T/N DD. ddd (WGS84).

4. Kull emenda fil-koordinati għandha tiġi kkomunikata mingħajr dewmien.

5. Jekk ikun meħtieġ, l-Unjoni tista’ titlob aktar informazzjoni dwar dawk il-koordinati.

KAPITOLU III

ARRANĠAMENTI GĦALL-IMPLIMENTAZZJONI TAL-KAMPANJA TAS-SAJD XJENTIFIKU

1. Il-Partijiet għandhom jiddeċiedu b’mod konġunt dwar

(a)l-operaturi Ewropej li se jwettqu l-kampanja tas-sajd xjentifiku;

(b)il-perjodu l-aktar adattat għal dan il-għan; u

(c)il-kundizzjonijiet applikabbli.

2. Sabiex ikun iffaċilitat ix-xogħol esploratorju tal-bastimenti, id-Dipartiment għandu jgħaddi kull informazzjoni xjentifika u data oħra fundamentali disponibbli.

3. Il-Partijiet għandhom jaqblu dwar Protokoll xjentifiku li għandu jintuża bħala l-bażi għall-kampanja tas-sajd xjentifiku, u li għandu jintbagħat lill-operaturi kkonċernati.

4. Il-kampanji ma għandhomx idumu aktar minn sitt xhur u inqas minn tliet xhur, sakemm ma jkunx maqbul mod ieħor mill-Partijiet.

5. L-awtoritajiet tal-Unjoni għandhom jibagħtu lill-awtoritajiet tar-Renju tal-Marokk, applikazzjoni għal-liċenzja tas-sajd għall-kampanja tas-sajd xjentifiku, akkumpanjata b’dossier tekniku li jispeċifika:

(a)il-karatteristiċi tekniċi tal-bastiment;

(b)il-livell ta’ għarfien espert tal-uffiċjali tal-bastiment b’rabta mas-sajd;

(c)il-proposta għall-parametri tekniċi tal-kampanja (kemm se ddum għaddejja, l-irkaptu li se jintuża, ir-reġjuni li se jiġu esplorati, eċċ.);

(d)il-mezz ta’ finanzjament.

6. Jekk ikun meħtieġ, id-Dipartiment għandu jorganizza djalogu dwar l-aspetti tekniċi u finanzjarji mal-awtoritajiet tal-Unjoni u, possibilment mas-sidien tal-bastimenti kkonċernati.

7. Qabel ma tibda l-kampanja tas-sajd xjentifiku, il-bastiment tal-Unjoni għandu jidħol f’port magħżul mill-awtoritajiet tar-Renju tal-Marokk biex isirulu spezzjonijiet, inklużi dawk previsti fil-punt 1 tal-Kapitolu VIII ta’ dan l-Anness.

8. Qabel ma tibda l-kampanja, is-sidien tal-bastimenti għandhom jipprovdu lid-Dipartiment u lill-awtoritajiet tal-Unjoni:

(a)dikjarazzjoni tal-qabdiet li jkunu diġà abbord;

(b)il-karatteristiċi tekniċi tal-irkaptu tas-sajd li jkun se jintuża matul il-kampanja;

(c)garanzija li dawn se jikkonformaw mar-rekwiżiti regolatorji fis-seħħ.

9. Matul il-kampanja fuq il-baħar, is-sidien ikkonċernati għandhom:

(a)jibagħtu lid-Dipartiment u lill-awtoritajiet tal-Unjoni rapport fil-ġimgħa dwar il-qabdiet ta’ kuljum u ta’ kull sajda, inkluża deskrizzjoni tal-parametri tekniċi tal-kampanja (il-pożizzjoni, il-fond, id-data u l-ħin, il-qabdiet u osservazzjonijiet jew kummenti oħra);

(b)jindikaw il-pożizzjoni, il-veloċità u r-rotta tal-bastiment permezz tal-VMS;

(c)jiżguraw abbord il-bastiment ikun hemm osservatur xjentifiku ta’ nazzjonalità Marokkina jew magħżul mill-awtoritajiet tar-Renju tal-Marokk, skont id-dispożizzjonijiet dwar l-osservaturi stabbiliti fil-Kapitolu VII. Sakemm il-Partijiet ma jiddeċidux mod ieħor, il-bastiment qatt ma għandu jkun obbligat jidħol f’port aktar minn darba kull xahrejn;

(d)jissottomettu l-bastiment tagħhom għal spezzjoni qabel ma jħalli ż-żona tas-sajd Marokkina, jekk l-awtoritajiet tar-Renju tal-Marokk jitolbu dan;

(e)jikkonformaw mal-liġijiet u mar-regolamenti tas-sajd Marokkini. Il-qabdiet li jsiru matul il-kampanja tas-sajd xjentifiku, inklużi l-qabdiet inċidentali, għandhom jibqgħu l-proprjetà ta’ sid il-bastiment, dejjem jekk jikkonformaw mad-dispożizzjonijiet stabbiliti f’dan ir-rigward mill-Kumitat Konġunt u d-dispożizzjonijiet tal-Protokoll xjentifiku.

10. Id-Dipartiment għandu jinnomina persuna ta’ kuntatt li tkun inkarigata li tittratta l-problemi mhux previsti li jistgħu jfixklu l-iżvilupp tal-kampanja dwar is-sajd xjentifiku.

KAPITOLU IV

MONITORAĠĠ BIS-SATELLITA (SISTEMA TA’ MONITORAĠĠ TAL-BASTIMENTI - VMS)

A. Dispożizzjonijiet ġenerali

1. Ir-regolamenti Marokkini li jirregolaw il-funzjonament tal-apparat ta’ pożizzjonament u lokalizzazzjoni bis-satellita għandhom japplikaw għall-bastimenti tal-Unjoni li qed joperaw jew li beħsiebhom joperaw fiż-żona tas-sajd skont dan il-Protokoll. L-Istat tal-bandiera għandu jiżgura li l-bastimenti li jtajru l-bandiera tiegħu jikkonformaw mad-dispożizzjonijiet ta’ dawk ir-regolamenti.

2. L-attività ta’ kull bastiment tal-Unjoni awtorizzat skont dan il-Protokoll trid tiġi kontinwament monitorjata, b’mod partikolari permezz ta’ sistema ta’ monitoraġġ tal-bastimenti abbażi ta’ satellita, minn hawn ’il quddiem imsejħa VMS (Vessel Monitoring System - VMS). L-arranġamenti dettaljati ta’ dan il-monitoraġġ għandhom jiġu stabbiliti mill-Kumitat Konġunt.

3. Is-sistema VMS tal-bastimenti soġġetti għall-monitoraġġ bis-satellita skont dan il-Protokoll għandha tibgħat b’mod awtomatiku l-pożizzjonijiet tal-bastimenti liċ-ċentru ta’ kontroll tas-sajd (Ċentru ta’ Sorveljanza u ta’ Kontroll tas-Sajd - CSCP), tal-Istat tal-bandiera tagħhom, li għandhom jibagħtuhom liċ-CSCP tal-Marokk.

4. L-Istat tal-bandiera u l-awtoritajiet tar-Renju tal-Marokk għandhom jinnominaw korrispondent VMS kull wieħed li għandu jaġixxi bħala l-punt ta’ kuntatt.

(a)Qabel id-data ta’ applikazzjoni tal-Protokoll, iċ-CSCP tal-Istat tal-bandiera u tal-Marokk għandhom jikkomunikaw id-dettalji ta’ kuntatt (l-isem, l-indirizz, it-telefown, it-telex, il-posta elettronika) tal-korrispondent VMS rispettiv tagħhom.

(b)Kull emenda fid-dettalji ta’ kuntatt tal-korrispondent VMS trid tiġi nnotifikata minnufih.

Il-punti ta’ kuntatt, li d-dettalji ta’ kuntatt tagħhom għandhom jiġu kkomunikati qabel id-data ta’ applikazzjoni ta’ dan il-Protokoll, għandhom jiskambjaw kwalunkwe informazzjoni rilevanti dwar it-tagħmir tal-bastimenti, il-protokolli tat-trażmissjoni jew kwalunkwe funzjoni oħra meħtieġa għall-monitoraġġ bis-satellita.

B. Data VMS

1. Meta bastiment li jkun qed jistad skont il-Ftehim dwar is-Sajd u huwa soġġett għall-monitoraġġ bis-satellita skont dan il-Protokoll jidħol fiż-żona tas-sajd, ir-rapporti susseggwenti tal-pożizzjoni għandhom jiġu kkomunikati immedjatament miċ-CSCP tal-Istat tal-bandiera liċ-CSCP tal-Marokk. Dawn il-messaġġi għandhom jintbagħtu kif ġej:

(a)b’mod elettroniku bl-użu ta’ protokoll sigur;

(b)bi frekwenza ta’ sagħtejn jew inqas;

(c)fil-format indikat fl-Appendiċi 3.

2. Il-format NAF għandu jintuża sakemm issir il-bidla għall-format il-ġdid UN-CEFACT. L-awtoritajiet tar-Renju tal-Marokk għandhom jistabbilixxu l-perjodu meħtieġ għall-bidla lejn il-format UN-CEFACT fil-protokoll FLUX, filwaqt li jitqiesu r-restrizzjonijiet tekniċi dwar l-integrazzjoni ta’ dan il-format il-ġdid u l-protokoll FLUX. Dawn għandhom jiddefinixxu l-perjodu ta’ prova meħtieġ qabel ma ssir it-tranżizzjoni għall-użu effettiv tal-format il-ġdid u tal-protokoll FLUX. Ladarba dawn il-provi jitlestew b’suċċess, il-Partijiet għandhom jistabbilixxu mill-aktar fis possibbli, id-data effettiva tal-applikazzjoni konġunta fil-Kumitat Konġunt jew bi skambju ta’ ittri.

3. Kull messaġġ ta’ pożizzjoni għandu jinkludi:

(a)l-identifikazzjoni tal-bastiment;

(b)il-pożizzjoni ġeografika l-aktar riċenti tal-bastiment (il-lonġitudni, il-latitudni), b’marġni ta’ żball tal-pożizzjoni ta’ inqas minn 100 metru, u b’intervall ta’ fiduċja ta’ 99 %;

(c)id-data u l-ħin li fihom tkun ġiet irreġistrata l-pożizzjoni;

(d)il-veloċità u r-rotta tal-bastiment.

4. Il-pożizzjonijiet VMS għandhom jiġu identifikati kif ġej:

(a)l-ewwel pożizzjoni rreġistrata wara d-dħul fiż-żona tas-sajd għandha tkun identifikata bil-kodiċi “ENT”;

(b)il-pożizzjonijiet kollha segwenti huma identifikati bil-kodiċi “POS”;

(c)l-ewwel pożizzjoni rreġistrata wara t-tluq miż-żona tas-sajd għandha tkun identifikata bil-kodiċi “EXI”;

(d)il-pożizzjonijiet trażmessi manwalment, f’konformità mal-paragrafu 3 tat-Taqsima C, huma identifikati bil-kodiċi “MAN”.

5. Iċ-CSCP tal-Istat tal-bandiera għandu jiżgura l-ipproċessar awtomatiku u t-trażmissjoni elettronika tal-messaġġi ta’ pożizzjoni. Il-messaġġi ta’ pożizzjoni għandhom jiġu rreġistrati b’mod sigur u salvagwardjati f’bażi tad-data għal tliet snin. Madankollu, f’każ ta’ restrizzjonijiet tekniċi, dan il-perjodu jista’ jitqassar bi ftehim reċiproku.

6. Il-komponenti tas-softwer u tal-ħardwer tal-apparat tas-sistema ta’ monitoraġġ bis-satellita għandhom ikunu:

(a)affidabbli, li ma jippermettu l-ebda falsifikazzjoni tal-pożizzjonijiet u ma jistgħux jiġu mmanipolati manwalment;

(b)kompletament awtomatiċi u operattivi f’kull ħin indipendentement mill-kundizzjonijiet ambjentali u klimatiċi.

7. Huwa pprojbit li wieħed iċaqlaq, jiskonnetta, jeqred, jagħmel ħsara jew ma jħallix operattiva s-sistema ta’ lokalizzazzjoni kontinwa bl-użu tal-komunikazzjonijiet bis-satellita mqiegħda abbord il-bastiment għal finijiet ta’ trażmissjoni tad-data jew li jbiddel intenzjonalment, jiddevja jew jiffalsifika d-data li toħroġ minn din is-sistema jew li tiġi rreġistrata minnha.

8. Il-kaptani tal-bastimenti għandhom jiżguraw f’kull ħin li:

(a)id-data ma tiġix mibdula;

(b)l-antenna jew l-antenni konnessi mat-tagħmir ta’ monitoraġġ bis-satellita ma jkunux ostakolati bl-ebda mod;

(c)il-provvista tal-elettriku għat-tagħmir tal-monitoraġġ bis-satellita ma tinqatax;

(d)it-tagħmir tal-monitoraġġ bis-satellita ma jitneħħix minn fuq il-bastiment.

9. Għall-finijiet ta’ monitoraġġ u kontroll, fejn meħtieġ u meta jkun mitlub, il-Partijiet jaqblu li jiskambjaw informazzjoni dwar it-tagħmir użat.

C. Nuqqas tekniku jew ħsara li jaffettwaw l-apparat ta’ monitoraġġ abbord il-bastiment

1. Fil-każ ta’ nuqqas tekniku jew ħsara li taffettwa l-apparat użat għall-monitoraġġ kontinwu bis-satellita installat abbord il-bastiment tas-sajd, id-Dipartiment u l-awtoritajiet tal-Unjoni jridu jkunu infurmati minnufih mill-Istat tal-bandiera.

2. L-apparat difettuż irid jiġi sostitwit fi żmien 10 ijiem ta’ xogħol wara li l-Istat tal-bandiera jinnotifika l-ħsara liċ-CSCP tal-Marokk. Wara dan il-perjodu, il-bastiment inkwistjoni jrid jidħol f’port innomimat mill-awtoritajiet tar-Renju tal-Marokk għal segwitu regolatorju u tiswija, jew jitlaq miż-żona sakemm l-Istat tal-bandiera ma jkunx bagħat ir-rapport ta’ spezzjoni dwar l-apparat difettuż liċ-CSCP tal-Marokk u infurmah bir-raġunijiet li wasslu għall-ħsara.

3. Sakemm l-apparat ma jiġix sostitwit, il-kaptan tal-bastiment għandu jibgħat manwalment, bil-posta elettronika, bir-radju jew bil-faks, liċ-CSCP tal-Istat tal-bandiera, rapport tal-pożizzjoni globali kull erba’ sigħat, inkluż ir-rapporti dwar il-pożizzjoni hekk kif irreġistrata mill-kaptan tal-bastiment skont il-kundizzjonijiet imsemmija fit-Taqsima B.

4. Dawn il-messaġġi manwali għandhom jiġu rreġistrati immedjatament miċ-CSCP tal-Istat tal-bandiera fil-bażi tad-data msemmija fil-paragrafu 5 tat-Taqsima B u trażmessi minnufih miċ-CSCP tal-Istat tal-bandiera lis-CSCP tal-Marokk, bl-użu tal-istess format tal-protokoll kif deskritt fl-Appendiċi 3.

D. Meta d-data VMS ma tasalx għand iċ-CSCP tal-Marokk

1. Jekk iċ-CSCP tal-Marokk jistabbilixxi li l-Istat tal-bandiera mhux qed jibgħat l-informazzjoni prevista fit-Taqsima B, l-awtoritajiet tal-Unjoni u l-Istat tal-bandiera kkonċernat għandhom jiġu infurmati b’dan minnufih.

2. Iċ-CSCP tal-Istat tal-bandiera u/jew iċ-CSCP tal-Marokk għandhom jinnotifikaw minnufih lil xulxin dwar kwalunkwe anomalija operazzjonali li għandha x’taqsam mal-komunikazzjoni u l-wasla tal-messaġġi tal-pożizzjoni sabiex tinstab soluzzjoni teknika malajr kemm jista’ jkun. L-awtoritajiet tal-Unjoni għandhom ikunu infurmati bis-soluzzjoni li tkun instabet miż-żewġ CSCPs.

3. Il-messaġġi kollha mhux trażmessi matul dan il-waqfien għandhom jiġu trażmessi mill-ġdid malli l-komunikazzjoni bejn iċ-CSCP tal-Istat tal-bandiera kkonċernat u ċ-CSCP tal-Marokk tiġi stabbilita mill-ġdid.

4. Iċ-CSCP tal-Istat tal-bandiera u ċ-CSCP tal-Marokk għandhom jaqblu, qabel id-data ta’ applikazzjoni ta’ dan il-Protokoll, dwar il-mezzi ta’ komunikazzjoni elettroniċi alternattivi li għandhom jintużaw għat-trażmissjoni tad-data VMS f’każ ta’ nuqqas ta’ komunikazzjoni bejn iċ-CSCPs, u għandhom jinfurmaw lil xulxin minnufih b’kull emenda.

5. In-nuqqasijiet ta’ komunikazzjoni bejn iċ-CSCP tal-Marokk u tal-Istati tal-bandiera tal-Unjoni ma għandhomx jaffettwaw il-ħidma normali tal-attivitajiet tas-sajd tal-bastimenti. Madankollu, it-tip ta’ trażmissjoni deċiża skont il-paragrafu 4 għandha tintuża immedjatament.

6. L-awtoritajiet tar-Renju tal-Marokk għandhom jinformaw lis-servizzi ta’ kontroll kompetenti tagħhom sabiex il-bastimenti tal-Unjoni ma jitqisux li qed iwettqu ksur minħabba n-nuqqas ta’ trażmissjoni tad-data VMS ikkawżat minn problemi operattivi ta’ CSCP u tal-mezzi tat-trażmissjoni deċiżi skont il-paragrafu 4.

E. Protezzjoni tad-data VMS

1. Id-data kollha ta’ sorveljanza kkomunikata minn Parti waħda lill-Parti l-oħra f’konformità ma’ dawn id-dispożizzjonijiet għandha tintuża esklussivament mill-awtoritajiet tar-Renju tal-Marokk għall-monitoraġġ, il-kontroll u s-sorveljanza tal-flotta tas-sajd tal-Unjoni skont dan il-Ftehim dwar is-Sajd, jew għal studji ta’ riċerka mwettqa mill-Marokk fir-rigward tal-ġestjoni u l-organizzazzjoni tas-sajd.

2. Tkun xi tkun ir-raġuni, din id-data ma għandha tiġi kkomunikata taħt l-ebda ċirkostanza lil terzi persuni.

3. F’każ ta’ nuqqas ta’ qbil dwar l-interpretazzjoni jew l-applikazzjoni ta’ dawn id-dispożizzjonijiet il-Partijiet għandhom jikkonsultaw lil xulxin fi ħdan il-Kumitat Konġunt previst fl-Artikolu 13 tal-Ftehim, li għandu jieħu deċiżjoni dwar il-kwistjoni.

4. Jekk ikun meħtieġ, il-Partijiet jaqblu li jemendaw dawn id-dispożizzjonijiet fil-Kumitat Konġunt.

KAPITOLU V

DIKJARAZZJONI TAL-QBID

A. Ġurnal ta’ abbord dwar is-sajd

1. Il-kaptan tal-bastiment għandu juża l-ġurnal ta’ abbord dwar is-sajd skont il-mudelli previsti fl-Appendiċijiet 4 u 5, u li jżommu aġġornat skont id-dispożizzjonijiet stabbiliti fin-nota ta’ spjegazzjoni ta’ dak il-ġurnal ta’ abbord dwar is-sajd.

2. Sid il-bastiment għandu jibgħat kopja tal-ġurnal ta’ abbord dwar is-sajd lill-awtoritajiet kompetenti tiegħu sa mhux aktar tard minn 15-il jum wara l-iżbark tal-qabdiet. Dawk l-awtoritajiet għandhom jibagħtu kopji lill-awtoritajiet tal-Unjoni u lid-Dipartiment. Il-ġurnal ta’ abbord dwar is-sajd irid jimtela u jintbagħat anke jekk ma jinqabad xejn.

3. In-nuqqas ta’ konformità ta’ sid il-bastiment mal-obbligi stabbiliti fil-paragrafi 1 u 2 ta’ hawn fuq għandu jwassal għas-sospensjoni awtomatika tal-liċenzja tas-sajd sakemm sid il-bastiment jonora l-obbligi tiegħu. L-awtoritajiet tal-Unjoni għandhom jiġu infurmati minnufih bi kwalunkwe deċiżjoni bħal din.

B. Rappurtar tal-qabdiet ta’ kull tliet xhur

1. Qabel it-tmiem tat-tielet xahar ta’ kull perjodu ta’ tliet xhur, l-awtoritajiet tal-Unjoni għandhom jinformaw lid-Dipartiment bid-data tagħhom dwar il-kwantitajiet maqbuda mill-bastimenti tal-Unjoni matul it-tliet xhur preċedenti, b’konformità mal-mudelli previsti fl-Appendiċijiet 6 u 7.

2. Id-data għandha tkun maqsuma fuq kull xahar u skont il-kategorija għal kull bastiment u kull speċi speċifikata fil-ġurnal ta’ abbord dwar is-sajd.

3. Din id-data għandha tintbagħat ukoll lid-Dipartiment permezz ta’ fajl elettroniku f’format kompatibbli mas-softwer użat mid-Dipartiment.

C. Affidabbiltà tad-data

L-informazzjoni li tinsab fid-dokumenti msemmija fit-Taqsimiet A u B ta’ hawn fuq, trid tirrifletti r-realtà tas-sajd biex tkun tista’ tintuża bħala waħda mill-bażijiet għall-monitoraġġ tal-evoluzzjoni tal-istokkijiet.

D. Tranżizzjoni għal sistema elettronika

1. Sakemm issir il-bidla għall-format il-ġdid UN-CEFACT li juża n-netwerk FLUX tal-Kummissjoni, id-data kollha dwar il-qabdiet u r-rappurtar għandha tintbagħat bi skambju elettroniku (Electronic Reporting System (Sistemi ta’ Reġistrazzjoni Elettronika) - ERS) permezz tad-DEH (Data Exchange Highway) tal-Kummissjoni fil-format XML EU-ERS 3.1.0.

2. Matul l-ewwel sitt xhur tal-Protokoll, il-Partijiet għandhom iwettqu t-testijiet meħtieġa biex is-sistema ERS tkun operattiva.

3. Il-Partijiet beħsiebhom jimplimentaw din is-sistema u jissostitwixxu l-verżjonijiet stampati tal-ġurnal ta’ abbord dwar is-sajd u tar-rappurtar tal-qabdiet bid-data ERS sa tmiem il-perjodu ta’ prova, li jekk ikun meħtieġ, jistgħu jaqblu li jestenduh.

4. Bi qbil komuni, il-Partijiet għandhom jużaw il-mod u l-format ta’ trażmissjoni tas-sistema ERS konformi mad-dispożizzjonijiet tekniċi li d-definizzjonijiet u l-arranġamenti ta’ applikazzjoni tagħhom se jiġu stabbiliti mill-iskambju ta’ ittri qabel id-data ta’ applikazzjoni ta’ dan il-Protokoll.

E. Żbarki barra mill-Marokk

Sid il-bastiment għandu jibgħat lill-awtoritajiet kompetenti tiegħu r-rapport dwar l-iżbark tal-qabdiet imwettqa skont dan il-Protokoll, sa mhux aktar tard minn 15-il jum wara l-iżbark. Fl-istess żmien, dan għandu jibgħat kopja lid-Delegazzjoni u lill-awtoritajiet tar-Renju tal-Marokk fl-indirizz mogħti bl-iskambju ta’ ittri qabel id-data ta’ applikazzjoni tal-Protokoll.

In-nuqqas ta’ konformità ta’ sid il-bastiment ma’ dawn l-obbligi għandu jwassal għas-sospensjoni awtomatika tal-liċenzja tas-sajd sakemm dan jonora l-obbligi tiegħu. L-awtoritajiet tal-Unjoni għandhom jiġu infurmati minnufih bi kwalunkwe deċiżjoni bħal din.

KAPITOLU VI

TLUGĦ ABBORD TAL-BAĦĦARA MAROKKINI

1. Kif previst fid-dokumenti tekniċi tal-Appendiċi 2, sid il-bastiment li jingħata liċenzja tas-sajd skont dan il-Ftehim, għandu jtella’ abbord baħħara Marokkini għal matul il-perjodu kollu tal-attività tiegħu fiż-żona tas-sajd.

2. Sid il-bastiment jista’ jagħżel il-baħħara li jtella’ abbord il-bastimenti tiegħu:

(a)jew mil-lista uffiċjali ta’ kandidati magħżula tal-iskejjel ta’ taħriġ marittimu trażmessa mid-Dipartiment lill-awtoritajiet tal-Unjoni u kkomunikata minn din tal-aħħar lill-Istati tal-bandiera kkonċernati. Il-lista tiġi aġġornata kull sena fl-1 ta’ Frar. Is-sidien tal-bastimenti jistgħu jagħżlu l-kandidati bl-aħjar għarfien u bl-esperjenza l-aktar adegwata mil-lista ta’ kandidati;

(b)jew baħħara li ttellgħu abbord bastimenti tal-Unjoni skont protokolli preċedenti.

3. Il-kuntratti tax-xogħol tal-baħħara Marokkini, li kopja tagħhom għandha tingħata lill-firmatarji, għandhom isiru bejn ir-rappreżentanti tas-sidien tal-bastimenti u l-baħħara u/jew it-trejdjunjins jew ir-rappreżentanti tagħhom b’konsultazzjoni mal-awtoritajiet tar-Renju tal-Marokk. Dawn il-kuntratti għandhom jiżguraw lill-baħħara l-benefiċċji tas-sistema tas-sigurtà soċjali li huma eliġibbli għalihom, inkluża l-assigurazzjoni f’każ ta’ mewt, mard jew inċident.

4. Sid il-bastiment jew ir-rappreżentant tiegħu jridu jibagħtu kopja tal-kuntratt lid-Dipartiment permezz tad-Delegazzjoni.

5. Sid il-bastiment jew ir-rappreżentant tiegħu għandhom jibagħtu lid-Dipartiment, permezz tad-Delegazzjoni, l-ismijiet tal-baħħara Marokkini li jittellgħu abbord kull bastiment u għandhom isemmu wkoll ir-rwol tagħhom fl-ekwipaġġ.

6. Fl-1 ta’ Frar u fl-1 ta’ Awwissu, id-Delegazzjoni għandha tibgħat lid-Dipartiment sommarju ta’ sitt xhur għal kull bastiment, tal-baħħara Marokkini li ttellgħu abbord tal-bastimenti tal-Unjoni bid-dettalji tar-reġistrazzjoni tagħhom.

7. Il-paga tal-baħħara Marokkini għandha titħallas mis-sidien tal-bastimenti. Din għandha tiġi stabbilita qabel il-ħruġ tal-liċenzji, bi qbil komuni bejn is-sidien tal-bastimenti jew ir-rappreżentanti tagħhom u l-baħħara Marokkini kkonċernati jew ir-rappreżentanti tagħhom. Madankollu, il-kundizzjonijiet tar-remunerazzjoni tal-baħħara Marokkini ma jistgħux ikunu inqas minn dawk tal-ekwipaġġ Marokkin, u għandhom jikkonformaw mal-istandards tal-ILO u fl-ebda każ ma jkunu inferjuri għalihom.

8. Jekk baħħar wieħed jew diversi baħħara impjegati abbord ma jkunux preżenti fil-ħin stabbilit għat-tluq tal-bastiment, il-kaptan għandu jkun awtorizzat li jibda l-vjaġġ ippjanat wara li jinforma lill-awtoritajiet kompetenti tal-port tat-tlugħ abbord dwar in-nuqqas fl-għadd ta’ baħħara meħtieġa u wara li jkun aġġorna r-rwoli tal-ekwipaġġ. Dawn l-awtoritajiet għandhom jinfurmaw lid-Dipartiment.

9. Sa mhux aktar tard mill-vjaġġ li jmiss, sid il-bastiment għandu jieħu l-miżuri meħtieġa biex jiżgura li fil-bastiment tiegħu jtella’ l-għadd ta’ baħħara meħtieġa.

10. F’każ li ma jittellgħux baħħara Marokkini abbord għal raġunijiet differenti minn dawk imsemmija fil-punt preċedenti, sid il-bastiment ikkonċernat għandu jħallas ammont fiss ta’ EUR 20 għal kull baħħar Marokkin li ma jittellax abbord u għal kull jum ta’ sajd fiż-żona tas-sajd, fi żmien massimu ta’ tliet xhur.

11. Dan l-ammont għandu jintuża għat-taħriġ tas-sajjieda Marokkini u għandu jitħallas fil-kont tal-bank Nru 0018100078000 20110750201 miftuħ fil-Bank Al Maghrib, il-Marokk.

12. Ħlief fil-każ previst fil-punt 8, in-nuqqas persistenti min-naħa ta’ sid il-bastiment li jtella’ abbord l-għadd stipulat ta’ baħħara Marokkini għandu jwassal għas-sospensjoni awtomatika tal-liċenzja tas-sajd tal-bastiment sakemm dan l-obbligu jiġi sodisfat. Id-Delegazzjoni għandha tiġi infurmata minnufih bi kwalunkwe deċiżjoni bħal din.

KAPITOLU VII

OSSERVAZZJONI TAS-SAJD

1. Il-bastimenti awtorizzati biex jistadu fiż-żona tas-sajd skont dan il-Protokoll għandhom itellgħu abbord lill-osservaturi nnominati bħala “osservaturi xjentifiċi” mill-awtoritajiet tar-Renju tal-Marokk. Ir-riżultat tax-xogħol ta’ dawn l-osservaturi jista’ jintuża għal finijiet xjentifiċi u/jew ta’ kontroll.

2. Ir-rata ta’ kopertura u d-dewmien ta’ din l-osservazzjoni huma speċifikati skont kull kategorija fid-dokumenti tekniċi tal-Appendiċi 2.

3. Il-kundizzjonijiet tat-tlugħ abbord tal-osservaturi nnominati huma stabbiliti kif ġej:

(a)Id-Dipartiment għandu jistabbilixxi l-lista tal-bastimenti magħżula sabiex itellgħu osservatur abbord u l-lista tal-osservaturi nnominati biex jittellgħu abbord. Dawn il-listi għandhom jintbagħtu lid-Delegazzjoni hekk kif ikunu lesti.

(b)Id-Dipartiment għandu jikkomunika lis-sidien tal-bastimenti kkonċernati, permezz tad-Delegazzjoni, l-isem tal-osservatur innominat sabiex jittella’ abbord il-bastiment mal-ħruġ tal-liċenzja jew sa mhux aktar tard minn 15-il jum qabel id-data prevista għat-tlugħ abbord tal-osservatur.

4. It-termini tat-tlugħ abbord tal-osservatur għandhom jiġu stabbiliti bi qbil komuni bejn sid il-bastiment jew ir-rappreżentant tiegħu u l-awtoritajiet tar-Renju tal-Marokk.

5. Sa mhux aktar tard minn ġimagħtejn qabel it-tlugħ abbord, sid il-bastiment ikkonċernat għandu jikkomunika d-data u l-port magħżula mill-awtoritajiet tar-Renju tal-Marokk fejn se jsir it-tlugħ abbord tal-osservatur.

6. It-tlugħ abbord tal-osservatur għandu jsir fil-port magħżul minn sid il-bastiment u fil-bidu tal-ewwel vjaġġ fiż-żona tas-sajd wara n-notifika tal-lista tal-bastimenti magħżula.

7. F’każ li l-osservatur jittella’ abbord f’pajjiż barrani, l-ispejjeż tal-ivvjaġġar tal-osservatur għandhom jitħallsu minn sid il-bastiment. Jekk bastiment li jkollu osservatur abbord joħroġ miż-żona tas-sajd, iridu jittieħdu l-miżuri kollha meħtieġa biex jiżġuraw li l-osservatur jittieħed lura f’pajjiżu malajr kemm jista’ jkun, bl-ispejjeż imħallsa minn sid il-bastiment.

8. F’każ li l-osservatur jivvjaġġa għalxejn għax sid il-bastiment ma jonorax l-impenji li jkun ħa, l-ispejjeż tal-vjaġġ kif ukoll l-indenniz ta’ kuljum, ekwivalenti għal dawk imħallsa lill-uffiċjali nazzjonali tal-Marokk ta’ grad ekwivalenti, għall-ġranet meta l-osservatur ikun inattiv, għandhom jitħallsu minn sid il-bastiment. Bl-istess mod, f’każ ta’ dewmien fit-tlugħ abbord li jkun tort ta’ sid il-bastiment, dan għandu jħallas lill-osservatur l-indennizz ta’ kuljum imsemmi hawn fuq.

9. Kull emenda fir-regolamenti dwar l-indennizz ta’ kuljum għandha tiġi kkomunikata lid-Delegazzjoni sa mhux aktar tard minn xahrejn qabel ma tidħol fis-seħħ.

10. Jekk l-osservatur ma jkunx preżenti fil-post u fil-ħin miftiehem u fit-tnax-il siegħa sussegwenti tal-ħin miftiehem, sid il-bastiment jiġi eżentat awtomatikament mill-obbligu li jtellgħu abbord.

11. Waqt li jkun abbord, l-osservatur għandu jiġi ttrattat bħala uffiċjal. Dan għandu jwettaq il-kompiti li ġejjin:

(a)josserva l-attivitajiet tas-sajd tal-bastimenti;

(b)jivverifika l-pożizzjoni tal-bastimenti involuti fl-operazzjonijiet tas-sajd;

(c)jieħu kampjuni bijoloġiċi skont il-programmi xjentifiċi;

(d)jieħu nota tal-irkaptu tas-sajd użat;

(e)jivverifika d-data dwar il-qabdiet fiż-żona tas-sajd li tkun ġiet irreġistrata fil-ġurnal ta’ abbord dwar is-sajd;

(f)jivverifika l-perċentwali tal-qabdiet inċidentali u jagħmel stima tal-volum tal-ispeċijiet ta’ ħut, krustaċji u ċefalopodi mormija li jistgħu jiġu kkummerċjalizzati;

(g)jikkomunika, permezz tal-faks jew b’mod elettroniku, id-data dwar is-sajd inkluż il-volum tal-qabdiet prinċipali u inċidentali abbord.

12. Il-kaptan għandu jagħmel dak kollu li jista’ biex jiżgura s-sikurezza fiżika u morali tal-osservatur waqt li jkun qed jaqdi dmirijietu.

13. L-osservatur għandu jingħata aċċess għal kull faċilità meħtieġa sabiex iwettaq dmirijietu. Il-kaptan għandu jiffaċilita l-aċċess tal-osservatur għall-mezzi ta’ komunikazzjoni meħtieġa għall-qadi ta’ dmirijietu, għad-dokumenti konnessi direttament mal-attivitajiet tas-sajd tal-bastiment inklużi, b’mod partikolari, il-ġurnal ta’ abbord dwar is-sajd u l-ġurnal tan-navigazzjoni, kif ukoll għall-partijiet tal-bastiment meħtieġa sabiex ikun iffaċilitat il-qadi ta’ dmirijietu.

14. Waqt li jkun abbord, l-osservatur għandu:

(a)jieħu l-miżuri kollha xierqa sabiex il-kundizzjonijiet tat-tlugħ abbord tiegħu, kif ukoll il-preżenza tiegħu fuq il-bastiment la jinterrompu u lanqas ifixklu l-operazzjonijiet tas-sajd,

(b)jieħu ħsieb il-beni u l-apparat li jkun hemm abbord u jirrispetta l-kunfidenzjalità ta’ kull dokument li jappartjeni għall-bastiment.

15. Fit-tmiem tal-perjodu ta’ osservazzjoni u qabel ma jħalli l-bastiment, l-osservatur għandu jħejji rapport tal-attivitajiet li jintbagħat lill-awtoritajiet tar-Renju tal-Marokk b’kopja lid-Delegazzjoni. Għandu jiffirmah fil-preżenza tal-kaptan li jista’ jżid jew jara li jiżdiedu l-osservazzjonijiet kollha li jidhirlu li jkunu utli u jiffirmahom. Għandha tingħata kopja tar-rapport lill-kaptan tal-bastiment qabel ma jsir l-iżbark tal-osservatur.

16. Sid il-bastiment għandu jħallas għall-akkomodazzjoni u l-ikel tal-osservatur bl-istess kundizzjonijiet li jingħataw lill-uffiċjali, filwaqt li jitqiesu l-possibiltajiet tal-bastiment.

17. Il-paga u l-kontribuzzjonijiet soċjali tal-osservatur għandhom jitħallsu mill-awtoritajiet tar-Renju tal-Marokk.

18. Sabiex jiġu koperti l-ispejjeż li jirriżultaw mill-preżenza tal-osservaturi abbord il-bastimenti, flimkien mat-tariffi li jitħallsu mis-sidien tal-bastimenti huwa previst ukoll il-pagament tal-hekk imsejħa “spejjeż tal-osservaturi” ikkalkulati abbażi ta’ EUR 5,5 kull TG għal kull tliet xhur u għal kull bastiment li jistad fiż-żona tas-sajd. Dawn l-ispejjeż għandhom jitħallsu skont it-termini tal-pagament previsiti fit-Taqsima E, tal-Kapitolu I ta’ dan l-Anness.

19. In-nuqqas ta’ konformità mal-obbligi stabbiliti fil-paragrafi preċedenti għandu jwassal għas-sospensjoni tal-liċenzja tas-sajd sakemm sid il-bastiment jikkonforma ma’ dawk l-obbligi. Id-Delegazzjoni għandha tiġi infurmata minnufih bi kwalunkwe deċiżjoni bħal din.

KAPITOLU VIII

MONITORAĠĠ U KONTROLL

A. Spezzjonijiet tekniċi

1. Darba fis-sena kalendarja u wara kwalunkwe emenda fil-karatteristiċi tekniċi tagħhom jew wara talba għal bidla tal-kategorija tas-sajd li teħtieġ l-użu ta’ rkaptu tas-sajd differenti, il-bastimenti tal-Unjoni li għandhom liċenzja skont dan il-Protokoll għandhom jippreżentaw ruħhom f’port magħżul mill-awtoritajiet tar-Renju tal-Marokk biex isirulhom l-ispezzjonijiet tekniċi previsti mir-regolamenti fis-seħħ. Dawn l-ispezzjonijiet tekniċi jridu jsiru fi żmien 48 siegħa mill-wasla tal-bastiment fil-port.

2. Wara li titlesta l-ispezzjoni teknika, il-kaptan tal-bastiment għandu jingħata ċertifikat ta’ konformità li jkollu l-istess perjodu ta’ validità tal-liċenzja u li għandu jiġġedded awtomatikament għall-bastimenti li jġeddu l-liċenzja tagħhom matul is-sena kalendarja. Madankollu, il-perjodu ta’ validità ma jistax ikun itwal minn sena. Dan iċ-ċertifikat għandu jinżamm dejjem abbord.

3. L-ispezzjoni teknika ssir biex tiġi kkontrollata l-konformità tal-karatteristiċi tekniċi u tal-irkaptu abbord il-bastiment, biex jiġi vverifikat il-funzjonament tal-apparat ta’ pożizzjonament u lokalizzazzjoni bis-satellita installat abbord u biex jiġi vverifikat li qed jiġu ssodisfati d-dispożizzjonijiet li jikkonċernaw l-ekwipaġġ Marokkin.

4. L-ispejjeż relatati mal-ispezzjonijiet tekniċi għandhom jitħallsu minn sidien il-bastimenti u li jiġu stabbiliti skont ir-rati ffissati mir-regolamenti Marokkini. Dawn ma jistgħux ikunu ogħla mill-ammonti li jitħallsu s-soltu mill-bastimenti l-oħrajn għall-istess servizz.

5. In-nuqqas ta’ konformità ta’ sid il-bastimenti mal-obbligi stabbiliti fil-paragrafi 1, 2 u 3 ta’ hawn fuq għandu jwassal għas-sospensjoni awtomatika tal-liċenzja tas-sajd sakemm dan jonora l-obbligi tiegħu. Id-Delegazzjoni għandha tiġi infurmata minnufih bi kwalunkwe deċiżjoni bħal din.

B. Dħul fiż-żona u l-ħruġ minnha

1. Il-bastimenti tal-Unjoni li għandhom liċenzja li tikkonforma mad-dispożizzjonijiet ta’ dan il-Protokoll għandhom jinnotifikaw, mill-anqas sitt sigħat qabel, lid-Dipartiment permezz tal-posta elettronika, bl-intenzjoni tagħhom li jidħlu jew joħorġu miż-żona tas-sajd, u għandhom jagħtu wkoll l-informazzjoni li ġejja:

(a)id-data u l-ħin tat-trażmissjoni tal-messaġġ;

(b)il-pożizzjoni tal-bastiment skont it-Taqsima B tal-Kapitolu IV;

(c)il-piż f’kilogrammi u l-qabdiet għal kull speċi miżmuma abbord, identifikati bil-kodiċi alfa-3;

(d)il-messaġġi tat-tip “qabdiet mad-dħul” (COE) u “qabdiet mal-ħruġ” (COX).

2. Għall-bastimenti tal-kategoriji 1 u 2, il-perjodu ta’ notifika msemmi fil-paragrafu 1 għandu jitnaqqas għal siegħa.

3. Din l-informazzjoni għandha tintbagħat preferibbilment bil-posta elettronika jew bil-faks, u li d-dettalji tagħhom għandhom jingħataw bl-iskambju ta’ ittri qabel id-data ta’ applikazzjoni tal-Protokoll.

4. Fil-każ tal-bastimenti tal-kategorija 6, il-ħruġ definittiv miż-żona tas-sajd huwa soġġett għall-awtorizzazzjoni minn qabel tad-Dipartiment. Din l-awtorizzazzjoni għandha tinħareġ fi żmien 24 siegħa minn meta tkun saret it-talba mill-kaptan jew mill-aġent tal-bastiment, bl-eċċezzjoni ta’ talba li tasal lejliet tmiem il-ġimgħa, fejn l-awtorizzazzjoni tinħareġ it-Tnejn ta’ wara. F’każ li tinċaħad l-awtorizzazzjoni, id-Dipartiment għandu jinnotifika minnufih lil sid il-bastiment u lill-awtoritajiet tal-Unjoni dwar ir-raġunijiet ta’ din iċ-ċaħda.

5. Bastiment li jinqabad jistad mingħajr ma jkun avża lid-Dipartiment għandu jitqies bħala bastiment mingħajr liċenzja.

6. Sid il-bastiment għandu jindika n-numri tal-faks u tat-telefown tal-bastiment kif ukoll l-indirizz elettroniku tal-kaptan fuq il-formola tal-applikazzjoni għal-liċenzja tas-sajd.

C. Proċeduri ta’ kontroll

1. Il-kaptan ta’ bastiment tal-Unjoni li għandu liċenzja skont dan il-Protokoll għandu jippermetti u jiffaċilita t-tlugħ abbord u t-twettiq tad-dmirijiet ta’ kull uffiċjal Marokkin responsabbli mill-ispezzjoni u mill-kontroll tal-attivitajiet tas-sajd.

2. Dawn l-uffiċjali ma għandhomx jibqgħu abbord għal aktar mill-ħin meħtieġ biex iwettqu dmirijiethom.

3. Wara kull spezzjoni u kontroll, l-ispettur għandu jħejji rapport li għandu jiġi ffirmat ukoll mill-kaptan tal-bastiment u li huwa intitolat li jżid il-kummenti. Għandha tintbagħat kopja lill-kaptan.

D. Tlugħ abbord

1. Id-Dipartiment għandu jinforma lid-Delegazzjoni mill-aktar fis possibbli u sa mhux aktar tard minn 48 siegħa, bit-tlugħ abbord ta’ bastiment tal-Unjoni fiż-żona tas-sajd.

2. Fl-istess waqt, l-awtoritajiet tal-Unjoni għandhom jirċievu rapport fil-qosor dwar iċ-ċirkostanzi u r-raġunijiet li wasslu għal dan it-tlugħ abbord.

3. Il-kaptan għandu jidderieġi l-bastiment tiegħu lejn il-port indikat mill-awtoritajiet tar-Renju tal-Marokk responsabbli mill-kontroll. Il-bastiment li jkun kiser ir-regolamenti Marokkini fis-seħħ dwar is-sajd marittimu għandu jinżamm fil-port sakemm jitlestew il-formalitajiet kollha amministrattivi.

E. Dikjarazzjoni ta’ ksur

1. Wara li jiġi rreġistrat ksur fid-dikjarazzjoni mħejjija mill-awtoritajiet tar-Renju tal-Marokk responsabbli mill-kontroll, il-kaptan tal-bastiment għandu jiffirma dak id-dokument. Jekk il-kaptan jirrifjuta jew ma jkunx jista’ jiffirma, dan għandu jinkiteb fid-dikjarazzjoni.

2. Il-firma jew in-nuqqas tagħha, ma għandhomx jippreġudikaw id-drittijiet tal-kaptan u l-mezzi li jista’ juża biex jiddefendi ruħu kontra l-ksur tar-regoli li bih ikun qed jiġi akkużat.

F. Soluzzjoni tal-ksur

1. Qabel ma jinbeda xi proċediment ġudizzjarju, għandu jsir sforz biex jissolva l-ksur irreġistrat permezz ta’ proċedura ta’ kompromess, skont ir-regolamenti Marokkini dwar is-sajd.

Wara li tiġi riċevuta t-talba sottomessa minn sid il-bastiment wieħed għandu sa mhux aktar minn tliet ijiem ta’ xogħol biex jaċċetta l-proċedura ta’ kompromess. Din l-aċċettazzjoni għandha tiġi evidenzjata billi jitħejja dokument tal-ġbir maħruġ minn sid il-bastiment għall-pagament tal-ammont dovut qabel l-iskadenza speċifikata fuq l-istess dokument. Jekk il-pagament isir fiż-żmien speċifikat, il-proċedura ta’ kompromess għandha titqies bħala definittiva, iżda jekk dak iż-żmien jiskadi d-Dipartiment għandu jieħu azzjoni legali.

2. Fil-każ ta’ proċedura ta’ kompromess, l-ammont tal-multa imposta għandu jiġi ffissat skont ir-regolamenti Marokkini dwar is-sajd.

3. Jekk ma tkunx tista’ tinstab proċedura ta’ kompromess għall-każ u jitressaq quddiem korp ġudizzjarju kompetenti, sid il-bastiment għandu jiddepożita garanzija bankarja, li tkun biżżejjed biex tiżgura l-infurzar tal-penali finanzjarji, fil-kont tal-bank miftuħ fil-Bank Al Maghrib il-Marokk li jingħata bl-iskambju ta’ ittri qabel id-data ta’ applikazzjoni ta’ dan il-Protokoll.

4. Il-garanzija bankarja għandha tkun irrevokabbli sakemm jintemmu l-proċedimenti ġudizzjarji. Din għandha tiġi rilaxxata jekk il-proċedura tintemm mingħajr kundanna. Bl-istess mod, f’każ ta’ kundanna li twassal għal multa inqas mill-garanzija depożitata, id-differenza għandha tiġi rilaxxata mill-awtoritajiet tar-Renju tal-Marokk.

5. Il-bastiment huwa awtorizzat li jitlaq mill-port:

(a)meta jitwettqu l-obbligi miftiehma fil-proċedura ta’ kompromess;

(b)meta l-garanzija bankarja msemmija fil-paragrafu 3 ta’ hawn fuq tkun ġiet depożitata u aċċettata mill-awtoritajiet tar-Renju tal-Marokk, sakemm jitlestew il-proċedimenti ġudizzjarji.

G. Trasbord

1. Fiż-żona tas-sajd għandu jiġi pprojbit kull trasbord tal-qabdiet fuq il-baħar. Madankollu, il-bastimenti tal-kategorija 6 li jixtiequ jittrasbordaw qabdiet fiż-żona tas-sajd għandhom jagħmlu dan f’port magħżul mill-awtoritajiet tar-Renju tal-Marokk jew fiż-żona tiegħu, wara li d-Dipartiment jagħti l-awtorizzazzjoni tiegħu. Dan it-trasbord għandu jsir taħt is-superviżjoni tal-osservatur jew ta’ rappreżentant tad-Delegazzjoni tas-sajd marittimu u tal-awtoritajiet ta’ kontroll. Kull ksur ta’ din id-dispożizzjoni għandu jwassal għas-sanzjonijiet previsti fir-regolamenti Marokkini fis-seħħ.

2. Qabel kull operazzjoni ta’ trasbord, sid dan il-bastiment għandu jibgħat l-informazzjoni li ġejja lid-Dipartiment, mill-inqas 72 siegħa minn qabel:

(a)l-isem tal-bastimenti tas-sajd li se jwettqu t-trasbord;

(b)l-isem tal-bastiment tal-ġarr tal-qabda, il-bandiera, in-numru tar-reġistrazzjoni u l-kodiċi tar-radju tiegħu;

(c)it-tunnellaġġ, għal kull speċi li tkun se tiġi trasbordata;

(d)id-destinazzjoni tal-qabdiet;

(e)id-data u l-ġurnata tat-trasbord.

3. Il-Parti Marokkina tirriżerva d-dritt li tirrifjuta t-trasbord jekk il-bastiment li jkun qiegħed iġorr il-ħut wettaq sajd IUU kemm fiż-żona tas-sajd kif ukoll barra minnha.

4. It-trasbord għandu jitqies bħala ħruġ miż-żona tas-sajd. Għalhekk, il-bastimenti għandhom jibagħtu lid-Dipartiment ir-rapport dwar il-qabdiet u javżawh bl-intenzjoni tagħhom li jkomplu jistadu jew li jħallu ż-żona tas-sajd.

5. Il-kaptan ta’ bastiment tal-kategorija 6 tal-Unjoni li għandu liċenzja skont id-dispożizzjonijiet ta’ dan il-Protokoll u li huwa impenjat f’operazzjonijiet ta’ żbark jew ta’ trasbord f’xi port magħżul mill-awtoritajiet tar-Renju tal-Marokk, għandu jippermetti u jiffaċilita l-kontrolli ta’ dawn l-operazzjonijiet mill-ispetturi Marokkini. Wara kull spezzjoni u kontroll fil-port, il-kaptan tal-bastiment għandu jingħata ċertifikat.

H. Monitoraġġ konġunt tas-sajd

1. Il-Partijiet għandhom jistabbilixxu sistema ta’ monitoraġġ u osservazzjoni tal-kontrolli tal-iżbark fuq l-art, bil-għan li titjieb l-effettività ta’ dawn il-kontrolli sabiex tkun żgurata l-konformità mad-dispożizzjonijiet ta’ dan il-Protokoll.

2. L-arranġamenti prattiċi ta’ dan il-monitoraġġ konġunt għandhom jiġu definiti bi qbil komuni bejn l-awtoritajiet kompetenti tal-Partijiet. Sussegwentement, il-Partijiet għandhom iħejju pjan annwali ta’ monitoraġġ konġunt.

3. Il-Partijiet għandhom jinnominaw lir-rappreżentanti tagħhom għall-monitoraġġ konġunt u l-ippjanar tal-awditu skedat billi jinnotifikaw lill-Parti l-oħra bl-isimijiet tagħhom. Id-Dipartiment għandu jibgħat din l-informazzjoni xahar bil-quddiem.

4. Ir-rappreżentant tal-awtoritajiet tar-Renju tal-Marokk għandu jattendi bħala osservatur l-ispezzjonijiet ta’ żbark tal-bastimenti li jkunu operaw fiż-żona tas-sajd, li jitwettqu mis-servizzi nazzjonali ta’ kontroll tal-Istati Membri.

5. Dan għandu jakkumpanja lill-uffiċjali nazzjonali tal-kontroll fl-ispezzjonijiet li jagħmlu fil-portijiet, abbord il-bastimenti, fuq il-mollijiet, fis-swieq fejn isir l-ewwel bejgħ, fil-ħwienet tal-bejjiegħa bl-ingrossa tal-ħut, fl-imħażen tal-friża u f’postijiet oħrajn konnessi mal-iżbark u l-ħażna tal-ħut qabel l-ewwel bejgħ u għandu jkollu aċċess għad-dokumenti soġġetti għal dawn l-ispezzjonijiet.

6. Ir-rappreżentant tal-awtoritajiet tar-Renju tal-Marokk għandu jħejji u jissottometti rapport dwar l-ispezzjonijiet li attenda. Kopja ta’ dan ir-rapport għandha tinbgħat lid-Delegazzjoni. L-awtoritajiet tar-Renju tal-Marokk jirriżervaw id-dritt li jużaw l-informazzjoni miġbura matul dawn l-ispezzjonijiet għal finijiet ta’ kontroll regolatorju.

7. Fuq talba tal-awtoritajiet tal-Unjoni, l-ispetturi tas-sajd tal-Unjoni jistgħu jattendu bħala osservaturi fl-ispezzjonijiet imwettqa mill-awtoritajiet tar-Renju tal-Marokk fir-rigward tal-operazzjonijiet ta’ żbark tal-bastimenti tal-Unjoni fil-portijiet magħżula mill-awtoritajiet tar-Renju tal-Marokk.

KAPITOLU IX

ŻBARK TAL-QABDIET

A. Prinċipju

Il-Partijiet, konxji mill-interess ta’ integrazzjoni aħjar biex ikun żgurat l-iżvilupp konġunt tas-setturi tas-sajd rispettivi tagħhom, jaqblu li jadottaw il-miżuri li ġejjin dwar l-iżbark fil-portijiet magħżula mill-awtoritajiet tar-Renju tal-Marokk ta’ proporzjon tal-qabdiet magħmula fiż-żona tas-sajd minn bastimenti tal-Unjoni li ngħataw liċenzja skont id-dispożizzjonijiet ta’ dan il-Protokoll.

B. Definizzjoni

L-operazzjonijiet li ġejjin għandhom jitqiesu bħala żbark obbligatorju:

1. L-iżbark ta’ prodotti friski għal tranżitu bl-art li jiġġenera t-taxxi marbuta mal-attività mwettqa fil-port iżda l-ebda taxxa ad valorem;

2. It-trasbord fil-port jew fiż-żona tal-port ta’ prodotti friżati jew l-iżbark fil-port fil-kontejners;

3. L-iżbark ta’ prodotti friski jew friżati fil-qafas ta’ kuntratt bejn sid il-bastiment tal-Unjoni u operatur (“kuntratt bejn sid il-bastiment u manifattur”);

4. L-iżbark ta’ prodotti friski jew friżati li se jinbiegħu fis-swali tal-irkant jew mill-“Comptoir d'agréage du poisson industriel” (CAPI).

C. Regoli ta’ implimentazzjoni

L-iżbark obbligatorju għandu jsir skont id-dispożizzjonijiet stipulati fid-dokumenti tekniċi annessi ma’ dan il-Protokoll.

D. Inċentivi finanzjarji

Il-bastimenti tal-Unjoni tal-kategorija 5, il-bastimenti RSW u l-bastimenti tas-sajd bit-tartarun tal-kategorija 6, li għandhom liċenzja tas-sajd skont id-dispożizzjonijiet ta’ dan il-Protokoll u li f’port Marokkin jiżbarkaw aktar mill-perċentwali ta’ żbarki obbligatorji previsti fid-dokumenti tekniċi, jistgħu jibbenefikaw minn tnaqqis ta’ 5 % fuq it-tariffa għal kull tunnellata żbarkata li tkun aktar mil-limitu obbligatorju, sakemm il-prodotti li jiġu żbarkati jgħaddu mis-swali tal-irkant u ma jiġux trasbordati u/jew tranżitati.

Is-sidien tal-bastimenti li jiżbarkaw f’portijiet barra mill-Marokk mitluba jissottomettu n-noti tal-bejgħ lid-Dipartimenti għall-kontroll tal-kwantitajiet mhux żbarkati fil-Marokk.

L-impatt soċjali u ekonomiku kwantifikabbli ta’ dawn l-iżbarki, kif ukoll kull sħubija privata bejn il-Marokkini u l-Ewropej fis-setturi relatati mas-sajd, se jiġu vvalutati fil-Kumitat Konġunt.

E. Penali f’każ ta’ nuqqas ta’ konformità mal-obbligi ta’ żbark

Il-bastimenti fil-kategoriji soġġetti għall-iżbark obbligatorju li ma jikkonformawx ma’ dan l-obbligu stabbilit skont id-dokumenti tekniċi rilevanti, jistgħu jkunu soġġetti għal żieda ta’ 15 % fuq il-pagament tal-imposta sussegwenti. Il-Kumitat Konġunt għandu jistabbilixxi penali aktar ħarxa f’każ ta’ reċevidità.

Il-penali għall-iżbark obbligatorju huma kkalkulati abbażi tal-perjodu ta’ validità tal-liċenzja tas-sajd għal kull kategorija tas-sajd (kull xahar għall-kategorija 6, kull tliet xhur għall-kategoriji 1 u 4 u kull sena għall-kategorija 5).

Il-penali aktar ħarxa għandhom jiġu kkalkulati kif ġej:

–Għall-kategoriji 1 u 4: iż-żieda tiġi applikata fuq l-ammont tal-imposta mħallsa kull tliet xhur (skont il-TG);

–Għall-kategorija 5: iż-żieda tiġi applikata fuq l-ammont tal-imposta annwali;

–Għall-kategorija 6, fejn l-imposti jitħallsu u l-liċenzji jinħarġu kull xahar: iż-żieda tiġi applikata fuq l-ammont li jrid jitħallas bħala “kwota applikata f’tunnellati ta’ qabdiet abbażi ta’ previżjonijiet kull xahar”.

Appendiċi 1

FTEHIM DWAR IS-SAJD BEJN IL-MAROKK U L-UNJONI EWROPEA

APPLIKAZZJONI GĦAL LIĊENZJA TAS-SAJD

NUMRU TAL-KATEGORIJA TAS-SAJD: ...

I - L-APPLIKANT

1.    Isem sid il-bastiment:    ......................................................................................................................

2.    Isem l-assoċjazzjoni jew ir-rappreżentant ta’ sid il-bastiment:...............................................................................

3.    Indirizz tal-assoċjazzjoni jew tar-rappreżentant ta’ sid il-bastiment:...........................................................................

.....................................................................................................................................................................................

4.    Telefown:...........................................    Faks:...................................
Posta elettronika: ……………………………………………..

5.    Isem il-kaptan: .............................. Nazzjonalità: ............................. Posta elettronika: ……………………..…

II - IL-BASTIMENT U L-IDENTIFIKAZZJONI TIEGĦU

1.    Isem il-bastiment:............................................................................................................................................

2.    Pajjiż tal-bandiera:...............................................................................................................................

3.    Numru tar-reġistrazzjoni esterna:..............................................................................................................

4.    Port tar-reġistrazzjoni: ……………………. MMSI: ……………. Numru IMO:………………………

5.    Data li fiha nkisbet il-bandiera attwali:..................Bandiera ta’ qabel (jekk kien hemm): …………………………

6.    Sena u post tal-kostruzzjoni: ...................................Sinjal tas-sejħa bir-radju: ................................................

7.    Frekwenza tas-sejħa bir-radju: …………………............ Numru tat-telefown bis-satellita: ……….……………………

8.    Materjal tal-buq:    Azzar ◻    Injam ◻    Poliester ◻    Materjal ieħor ◻

III - KARATTERISTIĊI TEKNIĊI TAL-BASTIMENT U T-TAGĦMIR

1.    Tul totali : ..................................................    Wisa’: ...............................................................................

2.    Tunnellaġġ gross (espress f’TG): ...............    Tunnellaġġ nett:……………………………

3.    Qawwa tal-magna prinċipali f’KW: ................ Ditta: .............................. Tip: ................................

4.    Tip ta’ bastiment: .................................................. Kategorija tas-sajd: …..........................................................

5.    Irkaptu tas-sajd: ................................................................................................................................................

6.    Żoni tas-sajd: ……………………………………..    Speċijiet fil-mira: ………………………………………..

7.    Għadd totali ta’ membri tal-ekwipaġġ abbord: ......................................................................................................................

8.    Metodu ta’ konservazzjoni abbord:    Frisk ◻    Tkessiħ ◻    Imħallat ◻    Iffriżar ◻

9.    Kapaċità tal-friża kull 24 siegħa (f’tunnellati): .............................................................................................

10.    Kapaċità tal-istivi: ....................................................................    Għadd: ..........................................................

11.    Transponder VMS:

   Manifattur: …………………………………Mudell: ……………………. Numru tas-serje: ………………………

   Verżjoni tas-softwer: ..................................................... Operatur tas-satellita: ………………………..…………..…

   Magħmul fi .............................................................., il- .............................

   Firma tal-applikant ...................................................................

Appendiċi 2

Dokument tekniku dwar is-sajd Nru°1

Sajd fuq skala żgħira fit-Tramuntana bit-tartarun

Dokument tekniku dwar is-sajd Nru°2

Sajd fuq skala żgħira fit-Tramuntana bil-konz tal-qiegħ

Dokument tekniku dwar is-sajd Nru°3

Sajd fuq skala żgħira fin-Nofsinhar bil-qasba u x-xlief

Dokument tekniku dwar is-sajd Nru°4

Sajd tal-qiegħ fin-Nofsinhar bix-xbieki tat-tkarkir tal-qiegħ u l-konz tal-qiegħ

Dokument tekniku dwar is-sajd Nru°5

Sajd għat-tonn bil-qasba u x-xlief

Dokument tekniku dwar is-sajd Nru°6

Sajd pelaġiku industrijali bix-xbieki tat-tkarkir pelaġiku jew semipelaġiku u bit-tartarun tal-borża

Appendiċi 3

KOMUNIKAZZJONI TAL-MESSAĠĠI VMS LILL-MAROKK

RAPPORT DWAR IL-POŻIZZJONI

Data obbligatorja li trid tiġi trażmessa fir-rapporti dwar il-pożizzjonijiet li jintbagħtu f’format NAF

L-informazzjoni li ġejja hija meħtieġa fiż-żmien tat-trażmissjoni sabiex tippermetti lis-CSCP Marokkin jidentifika s-CSCP emittenti:

L-indirizz IP tas-server tas-CSCP u/jew ir-referenzi DNS

Iċ-ċertifikat SSL (katina sħiħa tal-awtoritajiet ta’ ċertifikazzjoni)

It-trażmissjoni tad-data hija strutturata kif ġej:

Il-karattri użati jridu jikkonformaw mar-regoli tal-ISO 8859.1

Linja djagonali doppja (//) u l-kodiċi “SR” jindikaw il-bidu tal-messaġġ

Kull element tad-data jiġi identifikat mill-kodiċi tiegħu u huwa sseparat mill-elementi l-oħra tad-data permezz ta’ linja djagonali doppja (//)

Linja djagonali waħda (/) tissepara l-kodiċi u d-data

Il-kodiċi “ER” segwit minn linja djagonali doppja (//) jindika tmiem il-messaġġ

Data obbligatorja li trid tiġi trażmessa fir-rapporti dwar il-pożizzjonijiet li jintbagħtu f’format UN-CEFACT:

It-trażmissjoni tad-data fil-format UN/CEFACT hija strutturata kif deskritta fid-dokument ta’ implimentazzjoni provdut mill-Kummissjoni Ewropea qabel id-data ta’ applikazzjoni tal-Protokoll.