IL-KUMMISSJONI EWROPEA

Brussell, 2.2.2016

COM(2016) 43 final

2016/0027(COD)

Proposta għal

DEĊIŻJONI TAL-PARLAMENT EWROPEW U TAL-KUNSILL

dwar l-użu tal-banda ta’ frekwenzi 470-790 MHz fl-Unjoni

{SWD(2016) 19 final}
{SWD(2016) 20 final}

MEMORANDUM TA’ SPJEGAZZJONI

1.KUNTEST TAL-PROPOSTA

•Ir-raġunijiet għall-proposta u l-għanijiet tagħha

kundizzjonijiet tekniċi armonizzati għal servizzi ta’ komunikazzjoni elettronika tal-broadband mingħajr fili fil-banda tal-frekwenzi ta’ 700 MHz abbażi tal-prinċipju tan-newtralità tat-teknoloġija u tas-servizzi;

data ta’ skadenza komuni biex il-banda 700 MHz issir disponibbli għall-użu effettiv għal servizzi ta’ komunikazzjoni elettronika broadband mingħajr fili, f’konformità mal-kundizzjonijiet tekniċi armonizzati ta' hawn fuq, u l-miżuri ta’ koordinazzjoni bħala appoġġ għal din it-tranżizzjoni;

prijorità għad-distribuzzjoni ta’ servizzi tal-midja awdjoviżiva (AVMS) fil-banda ta' frekwenzi ta’ taħt 700 MHz flimkien ma’ approċċ flessibbli dwar kif tintuża l-banda ta' frekwenzi; dan huwa meħtieġ biex titqies id-diversità rigward is-sinifikat tas-suq tad-DTT fl-Istati Membri.

•Konsistenza mad-dispożizzjonijiet eżistenti ta’ politika fil-qasam ta’ politika

2.BAŻI ĠURIDIKA, SUSSIDJARJETÀ U PROPORZJONALITÀ

•Bażi ġuridika

•Sussidjarjetà u proporzjonalità

L-UE għandha tiddeċiedi kif għandha l-intenzjoni li tuża l-banda ta' frekwenzi 700 MHz fil-ġejjieni jekk tixtieq tevita li jkun hemm approċċi nazzjonali diverġenti u jekk trid tillimita l-interferenza transfruntiera. Fin-nuqqas ta’ leġiżlazzjoni komuni mal-Unjoni kollha għall-banda UHF tinħoloq frammentazzjoni li tagħmel ħsara fl-użu tal-banda tal-UHF fi ħdan l-Unjoni. Il-frammentazzjoni twassal għal interferenza transfruntiera, u dan jista’ jaffettwa sa 13% tal-popolazzjoni tal-UE.

Għalhekk, hemm bżonn ta’ deżinjazzjoni kkoordinata u awtorizzazzjoni tal-banda ta’ 700 MHz għall-broadband mingħajr fili sal-2020 u deżinjazzjoni kkoordinata tal-banda ta' taħt 700 MHz għall-flessibbilà fl-użu li tissalvgwardja l-provvista tas-servizzi tal-midja awdjoviżiva lill-udjenzi tal-massa, kif ukoll l-investimenti f’teknoloġiji iktar effiċjenti, meħtieġa sabiex jitneħħa l-użu attwali tal-banda ta’ 700 MHz mid-DTT.

•Għażla tal-istrument

3.RIŻULTATI TAL-EVALWAZZJONIJIET EX POST, TAL-KONSULTAZZJONIJIET TAL-PARTIJIET IKKONĊERNATI U TAL-VALUTAZZJONIJIET TAL-IMPATT

•Il-konsultazzjonijiet tal-partijiet ikkonċernati

Din il-proposta ħadet kont tal-kontributi tal-partijiet interessati li ġejjin:

(a)Ir-rapport Lamy 8 , imfassal minn Pascal Lamy innifsu fuq il-bażi tal-ħidma tal-grupp ta’ livell għoli ppresedut minnu;

(b)kontributi għall-konsultazzjoni pubblika 9 dwar ir-rapport Lamy;

(c)ir-rapport RSPG dwar ‘Proposed spectrum coordination approach for broadcasting in the case of a reallocation of the 700 MHz band’ 10 ;

(d)l-Opinjoni tal-RSPG dwar "Long-term strategy on the future use of UHF band (470-790 MHz) in the European Union".

•Il-ġbir u l-użu tal-għarfien espert

‘Economic and Social Impact of Repurposing the 700 MHz frequency band for Wireless Broadband Services in the European Union’;

‘Challenges and opportunities of broadcast-broadband convergence and its impact on spectrum and network use’.

•Valutazzjoni tal-impatt

(1)Ebda azzjoni fil-livell tal-Unjoni.

(2)Deżinjazzjoni kkoordinata u awtorizzazzjoni tal-banda ta’ frekwenzi ta’ 700 MHz għall-broadband mingħajr fili sal-2020 u prenotazzjoni tal-banda ta' frekwenzi ta’ 700 MHz għad-DTT u l-PMSE awdjo.

(3)Deżinjazzjoni kkoordinata u awtorizzazzjoni tal-banda ta’ frekwenzi ta’ 700 MHz għall-broadband mingħajr fili sal-2020. Deżinjazzjoni kkoordinata tal-banda ta' frekwenzi ta' taħt 700 MHz għal użu flessibbli, skont id-domanda nazzjonali b'garanzija tal-provvista kontinwa ta’ servizzi tal-midja awdjoviżiva lill-udjenza tal-massa (b’mod teknoloġikament newtrali), inkluż distribuzzjoni free-to-view, kif ukoll id-disponibbiltà tal-ispettru għall-użu tal-PMSE awdjo. Biex tiġi evitata l-interferenza, l-użu tal-ispettru taħt 700 MHz għandu jkun limitat teknikament għall-mowd ‘downlink-only’ 12 . Din l-għażla tipprovdi wkoll għal żvilupp ta’ strateġija tal-ispettru għal PMSE awdjo li toffri soluzzjoni għat-telf tal-ispettru għal PMSE awdjo fil-banda tal-UHF.

(4)Deżinjazzjoni kkoordinata u awtorizzazzjoni tal-banda tal-UHF kollha għall-broadband mingħajr fili sal-2020.

Filwaqt li tqis ir-riżultati tal-irkantijiet tal-ispettru reċenti għall-baned ta' frekwenzi ta’ 800 MHz u ta’ 900 MHz, stima konservattiva tad-dħul ġenerali mill-assenjazzjoni tal-banda ta' frekwenzi ta' 700 MHz fl-UE-28 sal-2020 tkun ta’ madwar EUR 11 biljun, meta l-fatturi l-oħra kollha jibqgħu l-istess.

4.IMPLIKAZZJONIJIET BAĠITARJI

Ebda implikazzjonijiet baġitarji speċifiċi ma huma mistennija għall-Unjoni.

5.ELEMENTI OĦRA

•Spjega dettaljata tad-dispożizzjonijiet speċifiċi tal-proposta

skadenzi għall-għoti ta' skop ġdid lill-banda ta’ frekwenzi ta’ 700 MHz għas-servizzi ta’ komunikazzjoni elettronika broadband mingħajr fili skont il-kundizzjonijiet tekniċi armonizzati fil-livell tal-Unjoni;

miżuri li jiffaċilitaw it-tranżizzjoni tal-użu tal-ispettru fil-banda tal-UHF;

miżuri għal użu fit-tul tal-banda ta' frekwenzi ta' taħt 700 MHz, għalkemm dawn se jinkludu analiżi mill-ġdid.

il-ftehimiet dwar il-koordinazzjoni transfruntiera jridu jitlestew sa tmiem l-2017;

il-banda ta' frekwenzi ta’ 700 MHz trid tkun disponibbli għal użu effettiv għas-servizzi ta’ komunikazzjoni elettronika broadband mingħajr fili sa nofs l-2020, skont id-Deċiżjoni ta’ Implimentazzjoni tal-Kummissjoni dwar il-kundizzjonijiet tekniċi armonizzati għall-użu tal-banda ta' frekwenzi 16 .

2016/0027 (COD)

Proposta għal

DEĊIŻJONI TAL-PARLAMENT EWROPEW U TAL-KUNSILL

dwar l-użu tal-banda ta’ frekwenzi 470-790 MHz fl-Unjoni

IL-PARLAMENT EWROPEW U L-KUNSILL TAL-UNJONI EWROPEA,

Wara li kkunsidraw it-Trattat dwar il-Funzjonament tal-Unjoni Ewropea, u b'mod partikolari l-Artikolu 114 tiegħu,

Wara li kkunsidraw il-proposta mill-Kummissjoni Ewropea,

Wara li l-abbozz tal-att leġiżlattiv intbagħat lill-parlamenti nazzjonali,

Wara li kkunsidraw l-opinjoni tal-Kumitat Ekonomiku u Soċjali Ewropew 18 ,

Wara li kkunsidraw l-opinjoni tal-Kumitat tar-Reġjuni 19 ,

Filwaqt li jaġixxu skont il-proċedura leġiżlattiva ordinarja,

Billi:

(1)Fil-programm pluriennali tal-politika tal-ispettru tar-radju (RSPP) stabbilit bid-Deċiżjoni Nru 243/2012/UE 20 , il-Parlament Ewropew u l-Kunsill stabbilixxew l-għanijiet li jiġu identifikati tal-inqas 1 200 MHz tal-ispettru adatt għall-broadband mingħajr fili tas-servizzi tal-komunikazzjoni elettronika fl-Unjoni sal-2015, li jingħata appoġġ għall-iżvilupp ulterjuri tas-servizzi tal-midja awdjoviżiva innovattivi billi jiġi żgurat spettru suffiċjenti għall-provvista satellitari u terrestri ta’ servizzi bħal dawn, jekk il-ħtieġa tkun sostanzjata b’mod ċar, u li jiġi żgurat spettru suffiċjenti għal ħolqien ta’ programmi u avvenimenti speċjali (PMSE).

(2)Fl-istrateġija tagħha għas-suq uniku diġitali (DSM) 21 , il-Kummissjoni tenfasizza l-importanza ta’ banda ta' frekwenzi ta' 694-790 MHz ("700 MHz”) biex tiżgura l-provvista ta’ servizzi tal-broadband f’żoni rurali u tenfasizza l-ħtieġa għal rilaxx ikkoordinat ta’ dik il-banda ta’ frekwenzi, filwaqt li takkomoda l-ħtiġijiet speċifiċi tad-distribuzzjoni ta’ servizzi tal-midja awdjoviżiva.

(3)Spettru fil-banda ta’ frekwenzi ta' 470-790 MHz huwa vantaġġ siewi għall-varar kosteffikaċi ta’ netwerks mingħajr fili b'kopertura universali fuq ġewwa u fuq barra. Dan l-ispettru bħalissa qed jintuża fl-Unjoni kollha għat-televiżjoni diġitali terrestri (DTT) u t-tagħmir tal-awdjo mingħajr fili għall-PMSE. Huwa jappoġġja l-iżvilupp tas-setturi tal-midja, is-setturi kulturali u kreattivi, li jistrieħu b’mod estensiv fuq din ir-riżorsa tal-ispettru mingħajr fili fil-provvista ta’ kontenut lil udjenzi tal-massa.

(4)Għar-Reġjun 1, li jinkludi l-Unjoni, ir-Regolamenti tar-Radju tal-Unjoni Internazzjonali tat-Telekomunikazzjoni adottati mill-Konferenza Dinjija dwar ir-Radjukomunikazzjoni allokaw il-banda ta’ frekwenzi ta’ 700 MHz għas-servizz tax-xandir u tal-mowbajls (ħlief il-mowbajl aeronawtiku) fuq bażi koprimarja, u l-banda ta' frekwenzi 470-694 MHz ("taħt 700 MHz”) esklużivament għas-servizz tax-xandir, fuq bażi primarja, u għall-użu tal-awdjo mingħajr fili għall-PMSE, fuq bażi sekondarja.

(5)Minħabba t-traffiku tal-broadband mingħajr fili li dejjem qed jikber b'mod rapidu, il-kapaċità msaħħa tan-netwerk mingħajr fili saret neċessità. Spettru fil-banda ta' frekwenzi ta’ 700 MHz jipprovdi kemm kapaċità addizzjonali u kopertura universali, b’mod partikolari għaż-żoni rurali u remoti ekonomikament diffiċli, għall-użu fuq ġewwa, kif ukoll għal komunikazzjonijiet tat-tip mekkanizzat fuq firxa wiesgħa. F’dan il-kuntest, il-miżuri koerenti għal kopertura terrestri mingħajr fili ta’ kwalità għolja madwar l-Unjoni, li jserrħu fuq l-aħjar prattika nazzjonali għall-obbligi ta' liċenzja għall-operaturi, għandhom jimmiraw li jilħqu l-objettiv tal-RSPP li ċ-ċittadini kollha jkollhom aċċess għal veloċitajiet tal-broadband ta’ mhux anqas minn 30 Mb/s sal-2020. B’dan il-mod, il-miżuri se jippromwovu servizzi diġitali innovattivi u jiżguraw benefiċċji soċjoekonomiċi fit-tul.

(6)Il-qsim tal-ispettru fi ħdan banda ta’ frekwenzi komuni bejn użu tal-broadband mingħajr fili bidirezzjonali (uplink u downlink), minn naħa, u xandir televiżiv unidirezzjonali jew użu tal-awdjo mingħajr fili għall-PMSE, min-naħa l-oħra, huwa teknikament diffiċli. Dan ifisser li l-għoti ta' skop ġdid għall-banda ta' frekwenzi ta’ 700 MHz għal servizzi ta’ komunikazzjoni elettronika broadband mingħajr fili, bidirezzjonali u terrestri, iċaħħad lill-utenti tad-DTT u tal-awdjo mingħajr fili għall-PMSE minn parti ta’ riżorsi tal-ispettru tagħhom. Is-setturi tal-PMSE u tad-DTT għalhekk jeħtieġu prevedibbiltà regolatorja fit-tul dwar id-disponibbiltà ta’ spettru suffiċjenti, sabiex ikunu jistgħu jitħarsu l-għoti sostenibbli u l-iżvilupp ta’ dawn is-servizzi, b’mod partikolari tat-televiżjoni free-to-view. Jista’ jkun hemm bżonn ta’ miżuri fil-livell nazzjonali u tal-Unjoni biex jiżguraw riżorsi addizzjonali tal-ispettru għall-użu tal-awdjo mingħajr fili għall-PMSE barra l-banda ta’ frekwenzi 470-790 MHz.

(7)Fir-rapport tiegħu lill-Kummissjoni (“ir-rapport Lamy”) 22 , Pascal Lamy, President tal-Grupp ta’ livell għoli dwar l-użu fil-ġejjieni tal-banda ta' frekwenzi 470-790 MHz, irrakkomanda li l-frekwenza 700 MHz issir disponibbli għall-broadband mingħajr fili sal-2020 (+/- sentejn). Dan se jgħin biex jintlaħaq l-għan fit-tul ta’ prevedibbiltà regolatorja għad-DTT biex jinkiseb aċċess għal banda ta’ frekwenzi ta’ taħt 700 MHz sal-2030, għalkemm dan għandu jiġi rivedut sal-2025. Ir-rapport Lamy jirrakkomanda wkoll flessibbiltà nazzjonali fl-użu tal-ispettru tal-banda ta’ frekwenzi ta’ taħt 700 MHz, li huwa limitat għal downlink-only. Id-downlink-only hija r-restrizzjoni tat-trażmissjonijiet kollha f'sistema mingħajr fili, tkun xi tkun it-teknoloġija tagħha, għat-trażmissjoni unidirezzjonali minn stazzjonijiet ta' infrastruttura ċentrali bħal torri tax-xandir tat-TV jew stazzjon ta' bażi mobbli lejn terminali portabbli jew mobbli bħal settijiet tat-televixin jew settijiet tat-telefown ċellulari.

(8)Il-Grupp għal Politika dwar l-Ispettru tar-Radju (RSPG) jirrakkomanda fl-opinjoni tiegħu dwar strateġija fit-tul għall-użu fil-ġejjieni tal-banda ta’ frekwenzi ta' 470-790 MHz fl-Unjoni (“Opinjoni tal-RSPG”) l-adozzjoni ta’ approċċ koordinat fl-Unjoni kollha biex il-banda ta' frekwenzi ta’ 700 MHz issir disponibbli għal użu effettiv għal servizzi ta’ komunikazzjoni elettronika broadband mingħajr fili sa tmiem l-2020. Dan għandu jsir flimkien ma’ garanzija ta' disponibbiltà fit-tul sal-2030 tal-banda ta' frekwenzi ta' taħt 700 MHz għall-forniment ta' servizzi tal-midja awdjoviżiva downlink-only. L-RSPG jirrakkomanda, b’mod partikolari, l-introduzzjoni tal-flessibilità sabiex il-banda ta' frekwenzi ta' taħt 700 MHz tista’ tintuża wkoll għal servizzi ta’ komunikazzjoni elettronika broadband mingħajr fili għal finijiet ta’ downlink-only.

(9)Billi xi Stati Membri diġà nedew jew lestew proċess nazzjonali li jawtorizzaw l-użu tal-banda ta’ frekwenzi 700 MHz għal servizzi ta' komunikazzjoni elettronika broadband mingħajr fili, terrestri u bidirezzjonali, l-Unjoni għandha tieħu azzjoni immedjata sabiex tevita l-frammentazzjoni tas-suq uniku. Dak li hemm bżonn huwa approċċ koordinat tal-użu tal-banda ta’ frekwenzi 470-790 MHz fil-ġejjieni, li għandu wkoll jipprovdi prevedibbiltà regolatorja, jibbilanċja d-diversità bejn l-Istati Membri b'għanijiet ta' suq uniku u jippromwovi pożizzjoni koerenti tal-Unjoni fix-xena internazzjonali. F’dan il-kuntest, l-Istati Membri għandhom jintalbu li jagħtu skop ġdid lill-banda ta' frekwenzi ta' 700 MHz b’mod f’waqtu skont il-liġi tal-Unjoni u dik nazzjonali.

(10)L-użu tal-banda ta’ frekwenzi ta' 700 MHz minn applikazzjonijiet oħra f’pajjiżi barra mill-Unjoni, kif permess minn ftehimiet internazzjonali jew f’partijiet tat-territorju nazzjonali barra l-kontroll effettiv tal-awtoritajiet tal-Istati Membri, jista' jillimita l-użu tal-banda għas-servizzi ta’ komunikazzjoni elettronika terrestri tal-broadband mingħajr fili f’xi Stati Membri. Dan iżommhom lura milli jikkonformaw mal-iskeda komuni stabbilita fil-livell tal-Unjoni. L-Istati Membri għandhom jieħdu l-passi kollha meħtieġa biex jimminimizzaw id-durata u l-firxa ġeografika ta’ dawn il-limitazzjonijiet u jfittxu l-għajnuna tal-Unjoni, fejn meħtieġ, skont l-Artikolu 10(2) tal-RSPP. Huma għandhom jinnotifikaw ukoll lill-Kummissjoni dwar dawn il-limitazzjonijiet skont l-Artikoli 6(2) u 7, u l-informazzjoni għandha tiġi ppubblikata f’konformità mal-Artikolu 5 tad-Deċiżjoni Nru 676/2002/KE 23 .

(11)L-użu tal-banda ta’ frekwenzi 700 MHz għal servizzi ta’ komunikazzjoni elettronika broadband terrestri mingħajr fili għandu jkun suġġett għal reġim flessibbli ta’ awtorizzazzjoni mill-aktar fis possibbli. Dan għandu jinkludi l-possibbiltà għad-detenturi tad-drittijiet tal-użu tal-ispettru li jinnegozjaw u jikru d-drittijiet eżistenti tagħhom fil-kuntest tal-applikazzjoni tal-Artikoli 9, 9a u 9b tad-Direttiva 2002/21/KE 24 .

(12)F’konformità mal-Artikoli 9 u 9a tad-Direttiva 2002/21/KE, l-Istati Membri għandhom japplikaw approċċ flessibbli fejn ikun possibbli u jistgħu jippermettu l-introduzzjoni ta’ użu downlink-only alternattiv bħas-servizzi ta' komunikazzjoni elettronika terrestri tal-broadband mingħajr fili fil-banda ta' frekwenzi ta’ taħt 700 MHz skont il-ħtiġijiet nazzjonali għad-distribuzzjoni tas-servizzi tal-midja awdjoviżiva lill-udjenza tal-massa. Meta jipermettu l-użu downlink-only fil-banda ta’ frekwenzi taħt 700 MHz għal servizzi ta’ komunikazzjoni elettronika terrestri tal-broadband mingħajr fili, l-Istati Membri għandhom jiżguraw li dan l-użu ma jaffettwax l-użu ta’ banda taħt 700 MHz għax-xandir diġitali terrestri fi Stati Membri ġirien, kif previst fil-ftehim fil-Konferenza Reġjonali dwar it-Telekomunikazzjoni tal-2006 25 .

(13)Fi kwalunkwe każ, l-użu tal-ispettru fil-banda ta’ frekwenzi 470-694 MHz għandu jkun ivvalutat mill-ġdid fil-livell tal-Unjoni sa mhux aktar tard mill-2025. Tali valutazzjoni għandha tqis ukoll ir-rieżami ppjanat ta’ din il-banda ta’ frekwenzi fil-Konferenza tar-Radjukomunikazzjoni Dinjija fl-2023. It-tibdil fl-użu tal-banda ta' frekwenzi taħt 700 MHz għandu jqis l-iżviluppi teknoloġiċi, l-imġieba tal-konsumatur, l-importanza li jitkompla l-forniment ta’ servizz ta’ televiżjoni bla ħlas 26 u tal-objettivi soċjali, ekonomiċi u kulturali ta’ interess ġenerali. F’dan il-kuntest jinħtieġu studji dwar il-kundizzjonijiet tekniċi u regolatorji għal koeżistenza bejn użi tal-ispettru attwali u ġodda fil-banda ta’ frekwenza taħt 700 MHz. Dawn jiżguraw koerenza bejn l-approċċi meħuda minn Stati Membri differenti dwar użu flessibbli u effiċjenti tal-ispettru u jippermettu miżuri tekniċi armonizzati għall-użu u l-koeżistenza f’din il-banda. Studji u miżuri bħal dawn jistgħu jiġu żviluppati skont id-Deċiżjoni 676/2002/KE.

(14)L-Istati Membri għandhom jadottaw pjanijiet nazzjonali koerenti li jiffaċilitaw l-użu tal-banda ta’ frekwenzi 700 MHz għal servizzi ta’ komunikazzjoni elettronika terrestri tal-broadband mingħajr fili filwaqt li jiżguraw l-kontinwità tas-servizzi tax-xandir bit-televiżjoni li jiżgombraw il-banda. Ladarba jiġu adottati, l-Istati Membri għandhom jibagħtu l-pjanijiet direzzjonali b’mod trasparenti mal-Unjoni kollha. Il-pjanijiet direzzjonali għandhom ikopru attivitajiet u perjodi ta' żmien għall-ippjanar mill-ġdid tal-frekwenzi, l-iżviluppi tekniċi għal tagħmir ta' netwerk u tal-utent aħħari, il-koeżistenza bejn tagħmir tar-radju u tagħmir mhux tar-radju, ta' reġimi eżistenti u ta' oħrajn ġodda ta’ awtorizzazzjoni u informazzjoni dwar il-possibbiltà li jingħata kumpens għal spejjeż ta’ migrazzjoni, fejn dawn jinqalgħu, sabiex jiġu evitati, inter alia, l-ispejjeż għall-utenti finali. Fejn l-Istati Membri jkollhom l-intenzjoni li jżommu d-DTT, il-pjanijiet direzzjonali għandhom jagħtu attenzjoni partikolari biex jiffaċilitaw aġġornamenti ta’ tagħmir tax-xandir għal aktar teknoloġiji effiċjenti fl-ispettru bħal formati vidjo avvanzati (eż. HEVC) jew teknoloġiji ta’ trażmissjoni tas-sinjal (eż. DVB-T2).

(15)L-ambitu u l-mekkaniżmu ta’ kumpens possibbli sabiex titlesta t-tranżizzjoni fl-użu tal-ispettru fi ħdan il-banda ta’ frekwenzi 470-790 MHz għandhom ikunu analizzati skont id-dispożizzjonijiet nazzjonali rilevanti kif previst fl-Artikolu 14 tad-Direttiva 2002/20/KE 27 , u jridu jkunu konsistenti mad-dispożizzjonijiet tal-Artikoli 107 u 108 tat-TFUE.

(16)Minħabba li l-għan ta’ din id-Deċiżjoni, jiġifieri l-iżgurar ta' tranżizzjoni kkoordinata fl-użu tal-ispettru tal-banda ta' frekwenzi ta' 470-790 MHz fl-Unjoni skont għanijiet komuni, ma jistax jinkiseb b’mod suffiċjenti mill-Istati Membri u jista' għalhekk, minħabba l-iskala u l-effetti tiegħu, jinkiseb aħjar fil-livell tal-Unjoni, l-Unjoni tista’ tadotta miżuri, skont il-prinċipju tas-sussidjarjetà kif stabbilit fl-Artikolu 5 tat-Trattat dwar l-Unjoni Ewropea. Skont il-prinċipju tal-proporzjonalità, kif stabbilit fl-istess Artikolu, din id-Deċiżjoni ma tmurx lil hinn minn dak li hu meħtieġ biex jintlaħaq dak l-għan,

ADOTTAW DIN ID-DEĊIŻJONI:

Artikolu 1

(1)Sat-30 ta’ Ġunju 2020, l-Istati Membri għandhom jippermettu l-użu tal-banda ta’ frekwenzi 694-790 MHz għas-sistemi terrestri li huma kapaċi jipprovdu servizzi ta’ komunikazzjoni elettronika broadband mingħajr fili biss taħt kundizzjonijiet tekniċi armonizzati stabbiliti mill-Kummissjoni skont l-Artikolu 4 tad-Deċiżjoni 676/2002/KE. Fejn meħtieġ, l-Istati Membri għandhom iwettqu l-proċess ta’ awtorizzazzjoni jew jemendaw id-drittijiet eżistenti rilevanti għall-użu tal-ispettru skont id-Direttiva 2002/20/KE, sabiex jippermettu dak l-użu.

(2)Sabiex jippermettu l-użu tal-banda ta’ frekwenzi 694-790 MHz skont il-paragrafu 1, l-Istati Membri għandhom, sal-31 ta’ Diċembru 2017, jikkonkludu l-ftehimiet ta’ koordinazzjoni tal-frekwenza transftuntiera kollha meħtieġa fi ħdan l-Unjoni.

(3)L-Istati Membri ma għandhomx ikunu marbutin mill-obbligi li hemm fil-paragrafi 1 u 2 f’żoni ġeografiċi fejn il-koordinazzjoni tal-frekwenzi ma' pajjiżi mhux tal-Unjoni tibqa’ mhux solvuta, sakemm l-Istati Membri jagħmlu kull sforz possibbli biex jiġu mminimizzati d-durata u l-ambitu ġeografiku ta’ din il-koordinazzjoni mhux solvuta u jirrapportaw annwalment ir-riżultati lill-Kummissjoni sakemm il-kwistjonijiet tal-koordinazzjoni pendenti jkunu ġew solvuti. Dan il-paragrafu għandu japplika wkoll għall-problemi ta' koordinazzjoni tal-ispettru fir-Repubblika ta' Ċipru li jirrizultaw mill-fatt li l-Gvern ta' Ċipru ma jistax jeżerċita kontroll effettiv f'parti mit-territorju tiegħu.

Artikolu 2

Sat-30 ta’ Ġunju 2022, l-Istati Membri għandhom jippermettu t-trasferiment jew it-twellija ta’ drittijiet tal-użu tal-ispettru għal servizzi ta’ komunikazzjoni elettronika fil-banda ta’ frekwenzi 694-790 MHz.

Artikolu 3

Meta l-Istati Membri jawtorizzaw l-użu tal-banda ta’ frekwenza 694-790 MHz jew jemendaw id-drittijiet eżistenti li jużaw il-banda ta’ frekwenzi 694-790 MHz, huma għandhom jieħdu l-miżuri kollha neċessarji biex jiġi żgurat livell ta’ kwalità għolja ta’ kopertura tal-popolazzjoni tagħhom u t-territorju b’veloċità ta’ mill-inqas 30 Mb/s, kemm ġewwa kif ukoll barra, inkluż f’żoni ta’ prijorità nazzjonali stabbiliti minn qabel, fejn meħtieġ, u tul rotot ewlenin tat-trasport terrestri. Tali miżuri jistgħu jinkludu kundizzjonijiet li jiffaċilitaw jew jinkoraġġixxu l-qsim tal-infrastruttura tan-netwerk jew tal-ispettru f’konformità mal-liġi tal-Unjoni.

Għal dak l-għan, l-Istati Membri għandhom jivvalutaw u jikkonsultaw lil xulxin dwar il-ħtieġa li jintehmżu kundizzjonijiet għad-drittijiet ta’ użu għall-frekwenzi fi ħdan il-banda ta’ frekwenzi 694-790 MHz.

Artikolu 4

(1)L-Istati Membri għandhom jiżguraw id-disponibbiltà tal-banda ta’ frekwenzi 470-694 MHz jew partijiet mill-banda għall-provvista ta’ servizzi terristri tal-midja awdjoviżiva lil udjenzi tal-massa, inkluż it-televiżjoni mingħajr ħlas, u għall-użu minn tagħmir tal-awdjo mingħajr fili għall-PMSE, abbażi tal-ħtiġijiet nazzjonali tax-xandir. L-Istati Membri għandhom jiżguraw li kwalunkwe użu ieħor tal-banda ta’ frekwenzi 470-694 MHz fit-territorju tagħhom ma jikkawżax interferenza dannuża lill-provvista terrestri ta’ servizzi tal-midja awdjoviżiva fi Stat Membru ġar.

(2)Jekk l-Istati Membri jawtorizzaw l-użu tal-ispettru fil-banda ta’ frekwenzi 470-694 MHz għal sistemi terrestri li huma kapaċi jipprovdu servizzi ta’ komunikazzjoni elettronika minbarra netwerks ta' xandir televiżiv, użu bħal dan għandu jkun limitat għal downlink-only. Użu bħal dan għandu jkun mingħajr preġudizzju għall-obbligi li jirriżultaw minn ftehimiet internazzjonali u mil-liġi tal-Unjoni.

Artikolu 5

Sat-30 ta’ Ġunju 2017, l-Istati Membri għandhom jadottaw u jippubblikaw il-pjan nazzjonali tagħhom u l-iskeda (“pjan direzzjonali nazzjonali”) biex jissodisfaw l-obbligi tagħhom skont l-Artikoli 1 u 4 ta’ din id-Deċiżjoni.

Sabiex jiġi żgurat li l-użu tal-banda ta’ frekwenzi 694-790 MHz huwa f’konformità mal-paragrafu 1 tal-Artikolu 1, l-Istati Membri għandhom jinkludu fil-pjani direzzjonali nazzjonali tagħhom, fejn xieraq, informazzjoni dwar miżuri biex jillimitaw l-impatt tal-proċess ta’ tranżizzjoni li jmiss fuq il-pubbliku u fuq l-utenti ta’ tagħmir tal-awdjo mingħajr fili għall-PMSE u biex jiffaċilitaw id-disponibbiltà f’waqtha ta’ tagħmir u ta' riċevituri interoperabbli tan-netwerk ta’ xandir televiżiv fis-suq intern.

Artikolu 6

Sal-1 ta’ Jannar 2025, il-Kummissjoni, b’kooperazzjoni mal-Istati Membri, għandha twettaq valutazzjoni u tirrapporta lill-Kunsill u lill-Parlament dwar l-iżviluppi fl-użu tal-banda ta’ frekwenzi 470-694 MHz, filwaqt li tqis l-aspetti soċjali, ekonomiċi, kulturali u teknoloġiċi li jaffettwaw l-użu tal-banda skont l-Artikoli 1 u 4. Ir-rapport għandu jivvaluta jekk ikunx meħtieġ li jinbidel l-użu tal-banda ta’ frekwenzi 470-694 MHz, jew xi parti minnha, fl-Unjoni.

Artikolu 7

Din id-Deċiżjoni tidħol fis-seħħ fl-20 jum wara dak tal-pubblikazzjoni tagħha f'Il-Ġurnal Uffiċjali tal-Unjoni Ewropea.

Artikolu 8

Din id-Deċiżjoni hija indirizzata lill-Istati Membri.

Magħmul fi Brussell,

(1) Il-banda ta' 700 MHz fir-Reġjun 3 kif ukoll il-banda ta' 698-790 MHz fir-Reġjun 2 kienu ġew allokati għas-servizzi mobbli fuq bażi koprimarja qabel l-2012

(2) Dokument RSPG 15-595 finali, link: http://rspg-spectrum.eu/wp-content/uploads/2013/05/RSPG15-595_final-RSPG_opinion_UHF.pdf .

(3) Id-Direttiva 2002/21/KE tal-Parlament Ewropew u tal-Kunsill tas-7 ta' Marzu 2002 dwar kwadru regolatorju komuni għan-networks ta' komunikazzjonijiet u servizzi elettroniċi (Direttiva Kwadru) (ĠU L 108, 24.04.2002, p. 33).

(4) Id-Direttiva 2002/20/KE tal-Parlament Ewropew u tal-Kunsill tas-7 ta' Marzu 2002 dwar l-awtorizzazzjoni ta' networks u servizzi ta' komunikazzjonijiet elettroniċi (Direttiva ta' Awtorizzazzjoni) (ĠU L 108, 24.04.2002, p. 21).

(5) Id-Deċiżjoni Nru 676/2002/KE tal-Parlament Ewropew u tal-Kunsill tas-7 ta' Marzu 2002 dwar il-qafas legali regolatorju għall-politika tal-ispectrum tar-radju fil-Komunità Ewropea (Deċiżjoni dwar l-Ispettri tar-Radju) (ĠU L 108, 24.4.2002, p. 1).

(6) Il-Konferenza Ewropea tal-Amministrazzjonijiet tal-Posta u t-Telekomunikazzjoni

(7) Id-Deċiżjoni tal-Kummissjoni tas-6 ta' Mejju 2010 dwar il-kundizzjonijiet tekniċi armonizzati tal-użu fil-banda ta' frekwenzi 790–862 MHz għas-sistemi terrestri li huma kapaċi jipprovdu servizzi ta' komunikazzjonijiet elettroniċi fl-Unjoni Ewropea (ĠU L 117/95, p. 11.5.2010).

(8) Link: http://ec.europa.eu/digital-agenda/en/news/report-results-work-high-level-group-future-use-uhf-band .

(9) Link: https://ec.europa.eu/eusurvey/runner/PublicConsultationLamyReport2014 .

(10) Document RSPG13-524 rev1, link: https://circabc.europa.eu/d/a/workspace/SpacesStore/614d3daf-76a0-402d-8133-77d2d3dd2518/RSPG13-524 %20rev1 %20Report_700MHz_reallocation_REV.pdf .

(11) Link: http://ec.europa.eu/smart-regulation/impact/ia_carried_out/cia_2015_en.htm#cnect

(12) Trażmissjoni biss mill-infrastruttura tan-netwerk lejn terminals riċevituri bħal settijiet tat-televixin jew tablets.

(13) Il-Kummissjoni approvat għajnuna mill-istat biex tillimita l-impatt fuq il-konsumaturi u l-utenti tal-PMSE f’diversi deċiżjonijiet. Ara, fost l-oħrajn, N622/03 Digitalisierungsfonds — l-Awstrija ĠU C 228, 17.9.2005; C25/04 L-introduzzjoni tat-televiżjoni diġitali terrestri (DVB-T) f'Berlin-Brandenburg — il-Ġermanja ĠU L 200, 22.7.2006; C24/04 It-televiżjoni diġitali terrestri fl-Isvezja, ĠU L 112, 30.4.2007; C52/05 Decoders diġitali fl-Italja ĠU L 147, 8.6.2007; N270/06 Sussidji għad-decoders diġitali bl-API — l-Italja ĠU C 80, 13.4.2007; N107/07 Sussidji għall-IdTV — l-Italja ĠU C 246, 20.10.2007; C34/06 L-introduzzjoni tat-televiżjoni diġitali terrestri (DVB-T) fit-Tramuntana tar-Renu-Westfalja, ĠU L 236, 3.9.2008; SA.28685 Captación de Televisión Digital en Cantabria — Spanja ĠU C 119, 24.4.2012; N671b/2009 — Bidla għad-diġitali fis-Slovakkja, ĠU C 39, 8.2.2011.

(14) Għajnuna mill-istat C 25/2004, DVB-T Berlin Brandenburg;  Għajnuna mill-istat C 52/2005, Decoders diġitali; deċiżjoni tal-Kummissjoni ppjanata għal Jannar 2016 dwar għajnuna mill-Istat SA. 32619 innotifikata mir-Renju ta’ Spanja għal kumpens għad-danni li jirriżultaw mil-liberazzjoni tad-dividend diġitali.

(15) Il-każ QĠE, C-222/04 tal-10 ta’ Jannar 2006, Cassa di Risparmio di Firenze, paragrafu 131; Il-każ QĠE, C-126/01 tal-20 ta’ Novembru 2003, GEMO S.A., paragrafu 28; Il-każ QĠE, C-53/00 tat-22 ta’ Novembru 2001, Ferring SA, paragrafi. 19 ff; Il-każ QĠE, C-143/99 tat-8 ta’ Novembru 2001, Adria-Wien Pipeline, paragrafu 38; Il-każ QĠE, C-310/99, l-Italja v. il-Kummissjoni, paragrafu 251; Il-każ QĠE, T-109/01 tal-14 ta’ Jannar 2004, Fleuren Compost BV v. il-Kummissjoni, paragrafu 54; Il-każ QĠE, C-251/97 tal-5 ta’ Ottubru 1999, Franza v. il-Kummissjoni, paragrafu 40. Il-każ QĠ, T-177/07 tal-15 ta’ Ġunju 2010, Mediaset vs Il-Kummissjoni, il-każ QĠE, C-403/10 P tat-28 ta’ Lulju 2011, Mediaset vs Il-Kummissjoni. Il-każ QĠ T-21/06 tas-6 ta' Ottubru 2009, il-Ġermanja v. il-Kummissjoni dwar DVB-T – Berlin/Brandebourg, il-każijiet QĠ T-461/13 Spanja v. il-Kummissjoni, T-462/13 Il-Pajjiż Bask u Itelazpi v. il-Kummissjoni, T-463/13 u T-464/13  il-Galizja v. il-Kummissjoni u Retegal v. il-Kummissjoni, T-465/13  il-Katalonja u CTTI v. il-Kummissjoni, T-487/13  Navarra v. il-Kummissjoni u fl-aħħar nett T-541/13  Abertis Telecom u Retevisión v. il-Kummissjoni.

(16) Dawn l-iskadenzi huma f’konformità mar-rapport tal-RSPG, l-opinjoni tal-RSPG u r-rapport Lamy.

(17) ara l-Artikolu 6(8).

(18) ĠU C , , p. .

(19) ĠU C , , p. .

(20) Id-Deċiżjoni Nru 243/2012/UE tal-Parlament Ewropew u tal-Kunsill tal-14 ta' Marzu 2012 li tistabbilixxi programm pluriennali tal-politika tal-ispettru tar-radju (ĠU L 81, 21.3.2012, p. 7).

(21) Ara http://ec.europa.eu/pgreriorities/digital-single-market/index_en.htm .

(22) Ir-rapport tas-Sur Pascal Lamy huwa disponibbli fuq: https://ec.europa.eu/digital-agenda/en/news/report-results-work-high-level-group-future-use-uhf-band .

(23) Id-Deċiżjoni Nru 676/2002/EC tal-Parlament Ewropew u tal-Kunsill tas-7 ta' Marzu 2002 dwar il-qafas legali regolatorju għall-politika tal-ispectrum tar-radju fil-Komunità Ewropea (Deċiżjoni tal-Ispectrum tar-Radju) (ĠU L 108, 24.4.2002, p. 1).

(24) Id-Direttiva Nru 2002/21/KE tas-7 ta’ Marzu 2002 dwar kwadru regolatorju komuni għan-netwerks ta’ komunikazzjonijiet u servizzi elettroniċi (Direttiva Kwadru) (ĠU L108, 24.4.2002, p. 33).

(25) Il-Konferenza tar-Radjukomunikazzjoni Reġjonali tal-2006 għall-ippjanar tas-servizz ta’ xandir diġitali terrestri f’partijiet tar-Reġjuni 1 u 3, fil-banda ta’ frekwenzi 174-230 MHz u 470-862 MHz (RRC-06) f’Ġinevra.

(26) Fl-ispirtu tad-Direttiva 2010/13/UE tal-Parlament Ewropew u tal-Kunsill (Direttiva dwar is-Servizzi tal-Midja Awdjoviżiva).

(27) Id-Direttiva 2002/20/KE tal-Parlament Ewropew u tal-Kunsill tas-7 ta' Marzu 2002 dwar l-awtorizzazzjoni ta' networks u servizzi ta' komunikazzjonijiet elettroniċi (Direttiva ta' Awtorizzazzjoni) (ĠU L 108, 24.04.2002, p. 21)