14.9.2016   

MT

Il-Ġurnal Uffiċjali tal-Unjoni Ewropea

L 246/357

—

wara li kkunsidra d-deċiżjoni tiegħu dwar il-kwittanza għall-implimentazzjoni tal-baġit tal-Eurojust għas-sena finanzjarja 2014,

—

wara li kkunsidra l-Artikolu 94 u l-Anness V tar-Regoli ta’ Proċedura tiegħu,

—

wara li kkunsidra r-rapport tal-Kumitat għall-Kontroll tal-Baġit u l-opinjoni tal-Kumitat għal-Libertajiet Ċivili, il-Ġustizzja u l-Intern (A8-0099/2016),

A.

billi, skont l-istqarrijiet finanzjarji tagħha, il-baġit finali ta’ Eurojust għas-sena finanzjarja 2014 kien ta’ EUR 33 667 239, u dan jirrappreżenta żieda ta’ 4,04 % meta mqabbel mal-2013; billi l-baġit kollu tal-Eurojust ġej mill-baġit tal-Unjoni;

B.

billi l-Qorti tal-Awdituri (“il-Qorti”), fir-rapport tagħha dwar il-kontijiet annwali tal-Eurojust għas-sena finanzjarja 2014 (“ir-rapport tal-Qorti”), stqarret li kisbet assigurazzjoni raġonevoli li l-kontijiet annwali tal-Eurojust huma affidabbli u li t-tranżazzjonijiet ta’ bażi huma legali u regolari;

1.

Jirrikonoxxi mill-Eurojust li:

2.

Jinnota b’sodisfazzjon li l-isforzi ta’ monitoraġġ baġitarju matul is-sena finanzjarja 2014 irriżultaw f’rata ta’ implimentazzjoni baġitarja ta’ 99,82 %, li tirrappreżenta żieda ta’ 0,21 % mill-2013; jaċċerta li r-rata ta’ eżekuzzjoni tal-approprjazzjonijiet ta’ pagament kienet ta’ 87,31 %, li tirrappreżenta tnaqqis ta’ 2,34 % mill-2013;

3.

Jirrikonoxxi d-dikjarazzjoni tal-Eurojust li naqqset l-għadd ta’ linji baġitarji għall-baġit tagħha għall-2015 sabiex tnaqqas id-dgħufijiet fl-ippjanar u fl-implimentazzjoni tal-baġit; jirrimarka, barra minn hekk, li dan l-eżerċizzju se jkompli għall-baġits tal-2016 u tal-2017;

4.

Jinnota bi tħassib mir-rapport tal-Qorti li l-impatt finanzjarju tal-aġġustamenti tas-salarji u taż-żieda fil-koeffiċjenti ta’ korrezzjoni ma kinux inklużi fil-baġit inizjali għas-sena finanzjarja 2014; jiddispjaċih li n-nuqqas ta’ madwar EUR 1 800 000 fil-baġit tas-salarji irrikjeda tnaqqis temporanju fin-nefqa operattiva u trasferimenti sostanzjali minn linji baġitarji amministrattivi u operattivi fi tmiem is-sena; jinnota li dan in-nuqqas kien parzjalment ibbilanċjat minn baġit emendatorju li pprovda EUR 1 200 000 addizzjonali lill-Eurojust u li saru impenji biex javvanzaw l-implimentazzjoni tal-proġetti ppjanati;

5.

Jieħu nota tal-fatt li l-Eurojust tipprovdi għotjiet mill-baġit tagħha stess biex tappoġġja l-iskwadri ta’ investigazzjoni konġunti (SIK); jirrimarka, barra minn hekk, li tħallsu biss 32,8 % sa tmiem is-sena, prinċipalment minħabba l-implimentazzjoni tal-baġit skont il-benefiċjarji u t-talbiet imressqa tagħhom għal rimborż, fatt li jqiegħed l-eżekuzzjoni tal-baġit f’riskju; jistieden lill-Eurojust tirrapporta lill-awtorità ta’ kwittanza dwar miżuri meħuda biex tindirizza din il-kwistjoni u tipprovdi gwida aħjar għall-benefiċjarji tagħha;

6.

Jinnota mir-rapport tal-Qorti li l-livell kumplessiv tal-approprjazzjonijiet impenjati kien għoli fir-rata ta’ 99 %; jirrimarka madankollu li l-livell ta’ riporti għat-Titolu III kien għoli bir-rata ta’ 35 %, li tfisser tnaqqis ta’ 2 % meta mqabbla mal-2013; jikkonstata li l-livell għoli ta’ riporti seħħ l-aktar minħabba n-nuqqas temporanju fil-baġit, meta l-impenji setgħu jsiru biss tard fis-sena u minħabba l-għoti ta’ proġetti għal skwadri ta’ investigazzjoni konġunti mnedija matul l-aħħar xhur tal-2014 li għalihom il-pagamenti ma kinux dovuti qabel l-2015;

7.

Jilqa’ l-fatt li l-Eurojust se tevalwa l-użu tal-approprjazzjonijiet differenzjati biex tiżgura l-finanzjament tal-attivitajiet operattivi tagħha; jinnota, barra minn hekk, li din l-inizjattiva hi meħuda f’konsultazzjoni mad-Direttorat Ġenerali għall-Ġustizzja u l-Konsumaturi u d-Direttorat Ġenerali għall-Baġit tal-Kummissjoni; jistieden lill-Eurojust tirrapporta lill-awtorità ta’ kwittanza dwar ir-riżultati ta’ din l-inizjattiva u l-miżuri meħuda;

8.

Jinnota l-isforzi magħmula mill-Eurojust biex toffri pjan ta’ akkwist aktar komprensiv u jħeġġeġ lill-Eurojust tippubblika l-lista sħiħa ta’ kuntratti aġġudikati;

9.

Jilqa’ l-preżentazzjoni dettaljata tal-istruttura organizzattiva, tal-membri u tal-istrutturi amministrattivi tal-Eurojust, kif ukoll il-pubblikazzjoni tal-kodiċi ta’ mġiba amministrattiva tagħha fuq is-sit web;

10.

Ifakkar lill-Eurojust li jeħtiġilha tadotta regoli vinkolanti interni għall-protezzjoni tal-informaturi, bi qbil mal-Artikolu 22c tar-Regolamenti tal-Persunal, li daħlu fis-seħħ fl-1 ta’ Jannar 2014;

11.

Jitlob lill-Eurojust tipprovdi lill-awtorità ta’ kwittanza b’rekord irreġistrat ta’ każijiet ta’ kunflitti ta’ interess identifikati, u jitlobha tistabbilixxi regoli stretti u ċari kontra r-“revolving doors”;

12.

Jaċċerta ruħu, abbażi tal-informazzjoni fornuta mill-Eurojust li fl-2014 is-Servizz ta’ Awditjar Intern (IAS) tal-Kummissjoni wettaq valutazzjonijiet tar-riskju u li r-riżultati ta’ dawn il-valutazzjonijiet ġew użati mill-IAS bħala l-bażi tal-Pjan Strateġiku għall-Awditjar Intern 2014-2016 tiegħu kif ukoll mill-Eurojust biex tidentifika titjib ulterjuri possibbli għall-proċessi amministrattivi; jirrikonoxxi l-azzjonijiet meħuda mill-Eurojust rigward l-implimentazzjoni tal-istandards ta’ kontroll intern relatati ma’ valuri etiċi u organizzattivi kif ukoll il-proċess tal-immaniġġjar tar-riskju;

13.

Jirrikonoxxi l-osservazzjoni tal-Eurojust li ma kien hemm l-ebda rakkomandazzjoni maħruġa mill-IAS fl-2014; jirrimarka, barra minn hekk, li l-IAS ħareġ rakkomandazzjoni “pendenti” mis-sena 2013 fl-ewwel tliet xhur tal-2015; jistenna b’interess ir-riżultati tar-rieżami u jitlob lill-Eurojust tirrapporta lill-awtorità ta’ kwittanza dwar l-eżitu;

14.

Jirrikonoxxi d-dikjarazzjoni tal-Eurojust li l-kwistjoni li għadha għaddejja identifikata mill-Qorti fl-2011 rigward id-dupplikazzjoni tar-responsabbiltajiet bejn id-Direttur Amministrattiv u l-Kulleġġ tal-Eurojust tista’ tiġi solvuta biss permezz tal-awtorità leġiżlattiva fil-proċedura leġiżlattiva għal Regolament ġdid tal-Eurojust (1); jemmen li dan ir-regolament futur għandu jiġi adottat skont id-Direttiva PIF (2) u r-Regolament UPPE (3); iħeġġeġ lill-awtorità leġiżlattiva tipproċedi bir-riformi neċċesarji li jinsabu f’dawn il-proposti għal leġiżlazzjoni ġdida;

15.

Jirrikonoxxi d-dikjarazzjoni tal-Eurojust li fl-2014 hija ddeċidiet li tissospendi l-proġetti li jirriżultaw mir-rieżami tal-istruttura organizzattiva tagħha; jirrimarka li r-Regolament il-ġdid tal-Eurojust jista’ jindirizza l-kwistjonijiet marbuta mal-governanza li wasslu għall-bidu taż-żewġ proġetti fil-passat;

16.

Jilqa’ b’sodisfazzjon il-pjan annwali ta’ tagħlim stabbilit fl-2014 biex ikopri l-ħtiġijiet professjonali ta’ persunal kif ukoll l-istabbiliment ta’ qafas ta’ kompetenza bl-għan li jirriflettu l-ħtiġijiet ewlenin u ta’ tmexxija tal-Eurojust; jinnota li l-ħidma fuq l-abbozz tal-qafas ta’ kompetenza avvanzat fl-2014 kellu jitlesta u jsir disponibbli għall-persunal kollu fl-2015; jistieden lill-Eurojust tipprovdi lill-awtorità ta’ kwittanza b’aġġornament dwar l-implimentazzjoni tal-qafas ta’ kompetenza;

17.

Jitlob lil dawk l-istituzzjonijiet tal-Unjoni li daħħlu kodiċijiet ta’ mġiba, inkluż il-Parlament Ewropew, biex jintensifikaw il-miżuri tagħhom ta’ implementazzjoni, bħalma huma l-verifiki tad-dikjarazzjoni tal-interessi finanzjarji;

18.

Jitlob lill-Eurojust ittejjeb il-proċeduri u l-prattiki tagħha mmirati għas-salvagwardja tal-interessi finanzjarji tal-Unjoni u tikkontribwixxi attivament għal proċess ta’ kwittanza li jkun orjentat lejn ir-riżultati;

19.

Ifakkar li skont l-Artikolu 41a tad-Deċiżjoni dwar it-tisħiħ tal-Eurojust (4), qabel l-4 ta’ Ġunju 2014, il-Kulleġġ tal-Eurojust għandu jikkummissjona evalwazzjoni esterna indipendenti tal-implimentazzjoni ta’ din id-Deċizjoni kif ukoll tal-attivitajiet imwettqa mill-Eurojust; jilqa’ b’sodisfazzjon il-pubblikazzjoni tar-rapport finali (5) u jirrikonoxxi t-tmien rakkomandazzjonijiet strateġiċi tagħha;

20.

Hu tal-fehma li jeħtieġ jittieħdu aktar passi kemm għat-trattament tal-kwistjonijiet etiċi marbutin mar-rwol politiku tal-lobbies, il-prattiki tagħhom u l-influwenza tagħhom, kemm għall-promozzjoni ta’ salvagwardji għall-integrità, ħalli jogħla l-livell ta’ transparenza tal-attivitajiet ta’ lobbying; jipproponi li jiġu introdotti regoli komuni li jiggvernaw it-twettiq tal-attivitajiet tal-lobbying fi ħdan l-istituzzjonijiet u l-aġenziji tal-Unjoni;

21.

Jirreferi, fir-rigward tal-kummenti l-oħrajn li jakkumpanjaw id-deċiżjoni tiegħu dwar il-kwittanza, li huma ta’ natura orizzontali, għar-riżoluzzjoni tiegħu tat-28 ta’ April 2016 (6) dwar il-prestazzjoni, il-ġestjoni finanzjarja u l-kontroll tal-aġenziji.