52014DC0902

KOMUNIKAZZJONI TAL-KUMMISSJONI KOMUNIKAZZJONI MILL-KUMMISSJONI LILL-PARLAMENT EWROPEW, LILL-KUNSILL, LILL-BANK ĊENTRALI EWROPEW, LILL-KUMITAT EKONOMIKU U SOĊJALI EWROPEW, LILL-KUMITAT TAR-REĠJUNI U LILL-BANK EWROPEW TAL-INVESTIEMNT

Stħarriġ Annwali dwar it-Tkabbir 2015

              INTRODUZZJONI

Wara li għaddiet mill-agħar kriżi finanzjarja u ekonomika f'ġenerazzjonijiet, l-UE għamlet passi kbar fil-bini tal-pedamenti għal tkabbir iktar sod u sostennibbli fil-futur.  Imma minkejja l-isforzi nazzjonali u Ewropej, l-irkupru huwa iktar dgħajjef milli kien mistenni sena ilu. Il-momentum beda jnaqqas fir-Rebbiegħa 2014. Il-kriżi ekonomika ġabet magħha kriżi soċjali li għadha għaddejja u l-irkupru kajman qed itellef l-isforzi biex jonqsu l-livelli għolja ta' qgħad. 

Filwaqt li l-ambjent ekonomiku globali jispjega xi ftit mit-tnaqqis tar-ritmu ekonomiku attwali, fatturi domestiċi speċifiċi qed jimpedixxu tkabbir iktar mgħaġġel fl-UE. Hemm varjazzjonijiet kbar bejn l-Istati Membri. It-tkabbir għadu qed jiġi mxekkel mill-frammentazzjoni tas-swieq finanzjarji minħabba l-kriżi finanzjarja u tad-dejn sovran; il-ħtieġa li jonqos id-dejn tal-kumpaniji, tal-unitajiet domestiċi u tal-gvern; l-aġġustament parzjali tal-iżbilanċi makroekonomiċi; u l-fiduċja mhix soda, minħabba l-inċertezza dwar il-prospettiva ekonomika u l-impenn lejn ir-riformi strutturali u istituzzjonali. Żieda baxxa fil-produttività, livelli baxxi ta' investiment u qgħad strutturali għoli jillimitaw il-prospetti tat-tkabbir tal-Ewropa.

Fl-istess ħin l-UE u l-Istati Membri tagħha jridu jindirizzaw firxa ta' xejriet fit-tul li jaffettwaw il-ħolqien tax-xogħol u t-tkabbir, l-iktar b'rabta mal-bidla soċjetali u demografika, il-globalizzazzjoni, l-iżviluppi fil-produttività u teknoloġiċi, il-pressjoni fuq ir-riżorsi u t-tħassib ambjentali kif ukoll tkabbir li ġenerlament huwa iktar dgħajjef fil-pajjiżi emerġenti u li qed jiżviluppaw.

Il-wasla ta’ Kummissjoni ġdida, b’aġenda ambizzjuża għall-“Impjiegi, it-Tkabbir, il-Ġustizzja u l-Bidla Demokratika”[1], hija l-mument opportun għal bidu mill-ġdid. Huwa urġenti li tagħti ħajja mill-ġdid lit-tkabbir mal-UE kollha u li jiġi ġġenerat momentum ġdid għall-bidla. Dan l-Istħarriġ Annwali dwar it-Tkabbir, flimkien mad-dokumenti li jakkumpanjawh, jippreżenta l-Pakkett tal-Impjiegi, it-Tkabbir u l-Investiment imħabbar bħala l-ewwel prijorità fil-Linji gwida Politiċi ta' din il-Kummissjoni.

Kaxxa 1. Sejbiet ewlenin tat-tbassir tar-Rebbiegħa 2014 tal-Kummissjoni[2] · Fl-2014 it-tkabbir reali fil-PDG huwa mistenni li jilħaq 1,3 % fl-UE u 0,8 % fiż-Żona tal-Euro kumplessivament. Dan għandu jitla' bil-mod fl-2015 għal 1,5 % u 1,1 % rispettivament, hekk kif jitjiebu d-domanda barranija u domestika. Għall-2016, hija mistennija aċċelerazzjoni tal-attività ekonomika għal 2,0 % u 1,7 % rispettivament. · F'Awwissu 2014 il-qgħad laħaq 24,6 miljun ruħ - 5 miljuni għandhom bejn il-15 u l-24 sena. Il-qgħad fit-tul huwa għoli ħafna. Ir-rati tal-qgħad ivarjaw ħafna bejn l-Istati Membri, minn 5,1 % fil-Ġermanja u 5,3 % fl-Awstrija għal 24,8 % fi Spanja u 26,8 % fil-Greċja fl-2014. · Ix-xejra ta' inflazzjoni baxxa hija mistennija tkompli din is-sena, bi prezzijiet tal-komoditajiet orħos, partikolarment għall-enerġija u l-ikel, u prospettiva ekonomika iktar dgħajfa milli mistenni. L-irkupru gradwali tal-attività ekonomika matul l-orizzont tat-tbassir huwa mistenni li jwassal għal żieda fl-inflazzjoni fl-UE, minn 0,6 % fl-2014 għal 1,0 % fl-2015 u 1,6 % fl-2016. Il-proporzjonijiet tad-defiċit mal-PDG huma mistennija jonqsu iktar matul din is-sena, għalkemm b'mod anqas mgħaġġel, minn 4,5 % fl-2011 għal 3,0 % għall-UE u 2,6 % għaż-Żona tal-Euro rispettivament. Id-defiċits tal-gvern huma mbassra li se jkomplu jinżlu matul is-sentjen li ġejjin, xprunati mit-tisħiħ tal-attività ekonomika. Il-proporzjonijiet tad-dejn mal-PDG tal-UE u taż-Żona tal-Euro huma mistennija li jilħqu l-massimu s-sena d-dieħla f'livell ta' 88,3 % u 94,8 % rispettivament f'għadd ta' pajjiżi.

F'dan l-Istħarriġ Annwali dwar it-Tkabbir għall-2015 il-Kummissjoni li ħadet postha fl-1 ta' Novembru 2014 tispjega l-karatteristiċi ewlenin tal-aġenda l-ġdida tagħha għall-impjiegi u t-tkabbir. It-tkabbir jista' jerġa' jaqbad ir-ritmu biss jekk l-Istituzzjonijiet tal-UE u l-Istati Membri jaħdmu flimkien biex imexxu 'l quddiem l-ekonomija tas-suq soċjali tal-Ewropa. Dan l-Istħarriġ Annwali dwar it-Tkabbir għalhekk jippreżenta x'jista' jsir iktar fil-livell tal-UE biex tgħin lill-Istati Membri jirritornaw lejn livelli ogħla ta' tkabbir u jimxu 'l quddiem lejn l-iżvilupp sostennibbli. Biex dan iseħħ se jkun meħtieġ impenn determinant għall-bidla u lejn li l-affarijiet isiru mod ieħor fil-livell nazzjonali.

1.         APRROĊĊ INTEGRAT

Illum ir-riskju ta' tkabbir persistentament baxx, inflazzjoni qrib iż-żero u qgħad għoli sar tħassib ewlieni. L-impatt tal-kriżi ma kienx biss ċikliku, kif enfaższzat mid-dgħufija tad-domanda aggregata, iżda wkoll għandu wkoll komponent sinifikanti strutturali li baxxa l-potenzjal tat-tkabbir tal-ekonomiji tal-UE.

Il-politiki strutturali, fiskali u monetarji jridu jkun magħquda f'approċċ integrat li jiffaċilita t-tkabbir biex din l-isfida tiġi indirizzata b'mod effettiv, li jaġixxu kemm fuq in-naħa tad-domanda kif ukoll tal-provvista tal-ekonomiji tagħha. Dan jirrikjedi azzjoni fil-livelli kollha tal-gvern mil-livell globali, speċjalment fil-kuntest tal-G20, sal-livell tal-UE, nazzjonali, reġjonali u lokali.

Sadanittant, fi ħdan il-mandat tiegħu u f'indipendenza sħiħa l-Bank Ċentrali Ewropew (BĊE) se jkompli jaqdi rwol ewlieni fl-istipular tal-politika kumplessiva taż-Żona tal-Euro. Il-BĊE għandu r-responsabbiltà esklussiva għall-politika monetarja fiż-Żona tal-Euro. Ħa għadd ta’ miżuri importanti biex jiffaċilita l-pożizzjoni tal-politika monetarja u jsaħħaħ t-trażmissjoni tagħha lejn kundizzjonijiet finanzjarji usa', prinċipalment permezz tal-programm tagħha ta’ xiri ta' Titoli Abbażi ta’ Assi (Asset Backed Securities, ABS) li beda f’Ottubru li għadda. Flimkien mal-programm ta’ bonds koperti u l-Operazzjonijiet Immirati ta’ Rifinanzjament fuq Terminu Itwal (Targeted Longer-Term Refinancing Operations, TLTRO), l-impatt kumplessiv ta’ dawn it-tliet miżuri fuq il-karta bilanċjali tal-BĊE se jkunu sinifikanti. Huwa mistenni li d-daqs tal-karta bilanċjali se jersaq lejn id-daqs milħuq fil-bidu tal-2012. Dawn il-miżuri għandhom isostnu l-attività ekonomika hekk kif l-effett tagħhom jibda jinħass fl-ekonomija.

Wasal iż-żmien li l-awtoritajiet pubbliċi fil-livelli kollha jieħdu r-responsabbiltà. Minħabba d-differenzi bejn l-Istati Membri, l-approċċ korrett se ivarja minn pajjiż għal ieħor, filwaqt li xorta waħda jibqa' parti minn approċċ integrat komuni. Il-Kummissjoni qiegħda tirrakkomanda tliet pilastri ewlenin għall-politika ekonomika u soċjali tal-UE fl-2015:

Imbuttatura kordinata lill-investiment: flimkien ma' dan l-Istħarriġ Annwali dwar it-Tkabbir, il-Kummissjoni qiegħda tippreżenta Pjan ta' Investiment għall-Ewropa li għandu jimmobbilizza mill-inqas EUR 315-il biljun f'investiment pubbliku u privat addizzjonali matul il-perjodu 2015-2017 u jtejjeb b'mod sinifikanti l-ambjent kumplessiv tal-investiment.

Impenn imġedded lejn ir-riformi strutturali: dan huwa essenzjali biex il-pajjiżi joħorġu mid-dejn u jistimulaw il-ħolqien ta' iktar impjiegi u aħjar. Il-progress fil-livell nazzjonali u tal-UE fl-oqsma bħall-enerġija, it-telekomunikazzjoni u l-ekonomija diġitali, kif ukoll it-titjieb tal-kundizzjonijiet kummerċjali joħolqu opportunitajiet ġodda ta' xogħol u tkabbir. It-tnaqqis fil-burokrazija żejda fil-livell Ewropew u nazzjonali bħala parti mill-Aġenda ta’ Regolamentazzjoni Aħjar hija essenzjali biex jinħoloq ambjent regolatorju t-tajjeb u jiġi promoss ambjent ta’ intraprenditorija u l-ħolqien tal-impjiegi. Dan jeħtieġ sjieda nazzjonali u impenn fl-ogħla livell governattiv kif ukoll mill-Parlamenti nazzjonali. L-Ewropazzizzjoni ta' dawn l-isforzi toffri potenzjal kbir. Infittxu r-responsabbiltà fiskali: minkejja l-progress konsiderevoli fil-konsolidament fiskali, l-Istati Membri għad jeħtiġilhom jiżguraw il-kontroll fit-tul fuq il-livelli tad-defiċit u d-dejn. Il-politiki fiskali għandhom ikun differenzjati, skont is-sitwazzjoni ta' kull pajjiż. L-Istati Membri li għandhom sitwazzjoni fiskali aħjar għandhom jieħdu miżuri biex iħeġġu d-domanda domestika, b'enfażi partikolari fuq l-investiment. Barra minn dan, il-kwalità tal-finanzi pubbliċi għandha titjieb billi tittejjeb l-effiċjenza tan-nefqa u permess tal-prijoritizzazzjoni tal-investiment produttiv fl-infiq tal-gvern, billi s-sistema tat-taxxa ssir iktar effiċjenti u ta' sostenn għall-investiment. L-indirizzar tal-frodi fit-taxxa u l-evażjoni tat-taxxa jiżgura ġustizzja u jippermetti lill-Istati Membri jiġbru d-dħul mit-taxxa dovut lilhom.

Grafika 1. Approċċ integrat

Azzjoni simultanja f'dan it-tliet oqmsa hija kruċjali biex tiġi restawrata l-fiduċja, tonqos l-inċertezza li qed ixxekkel l-investiment u jiġu mmassimizzati l-effetti kbar li jsaħħu lil xulxin ta' dawn it-tliet pilastri li jaħdmu flimkien. B’mod partikolari, huwa ċar li għas-sostenibbiltà tal-finanzi pubbliċi u għall-mobilizzazzjoni tal-investiment se jkun essenzjali impenn imġedded lejn ir-riformi strutturali.

Biex timplimenta l-loġika tal-approċċ integrat ġdid, il-Kummissjoni qed tipproponi li tirrazzjonalizza u ssaħħaħ is-Semestru Ewropew tal-kordinazzjoni politika ekonomika b'appoġġ għal dawn it-tliet pilastri.

Biex tissaħħaħ ir-rabta bejn ir-riformi strutturali, l-investiment u r-responsabbiltà fiskali, il-Kummissjoni se tipprovdi wkoll iktar gwida dwar l-aħjar użu possibbli tal-flessibbiltà li hija integrata fir-regoli eżistenti tal-Patt ta’ Stabbiltà u Tkabbir.[3]

2.         INSAĦĦU L-INVESTIMENT

Investiment dgħajjef itellef l-irkupru tal-Ewropa

Hemm ħtieġa urġenti li jissaħħaħ l-investiment fl-Ewropa. Minħabba l-kriżi, il-livell tal-investiment waqa' bi kważi EUR 430 biljun minn meta laħaq il-massimu fl-2007 – waqgħa ta' 15 %. F'xi Stati Membri, dik il-waqgħa hija anki akbar.[4] It-tbassir tar-Rebbiegħa tal-Kummissjoni juri li l-investiment dgħajjef qiegħed iżomm lura l-irkupru fraġli tal-UE. 

L-għan mhuwiex li nerġgħu lura lejn il-quċċata tal-2007 bl-istess tip ta' investimenti – xi investimenti ta' qabel il-kriżi ma kinux sostennibbli. Madankollu, huwa ta' inkwiet li l-investiment ma reġax qabad riċentament fl-Ewropa kif għamel fl-Istati Uniti. Fl-2013, l-investiment kien għadu 19,3 % tal-PDG, bejn wieħed u ieħor żewġ punti perċentwali taħt il-medja storika tiegħu jekk wieħed jeskludi s-snin boom-bust. Dan ifisser li l-Ewropa għandha laguna fl-investiment ta' EUR 230 biljun sa EUR 370 biljun taħt ix-xejriet fit-tul tagħha.

Grafika 2. Xejriet riċenti fl-investiment fl-UE

(Formazzjoni ta' kapital fiss gross reali, UE-28, prezzijiet tal-2013, EUR biljuni)

Fl-istess waqt, ħtiġijiet kbar ta' investiment f'kull livell mhumiex qed jiġu ssodisfati. Pereżempju, l-unitajiet domestiċi u l-kumpaniji għandhom bżonn u jridu jibbenefikaw mill-aħħar teknoloġi u jsiru iktar effiċjenti fl-użu tal-enerġija u r-riżorsi. Is-sistemi tal-edukazzjoni u l-innovazzjoni huma mgħammra anqas u ffinanzjati anqas minn dawk tal-kompetituri ewlenin tagħna. Is-sistemi tal-benessri tagħna jeħtiġilhom jiġu mmodernizzati biex ilaħħqu mal-isfidi tal-populazzjoni tagħna li qed tixjieħ b'rata mgħaġġla. Is-settur tal-enerġija tagħna jeħtiġlu jaġġorna n-netwerks tiegħu mal-aħħar teknoloġiji, jintegra sorsi ta' enerġija rinovabbli u jiddiversifika s-sorsi tal-provvista tagħna. Is-settur tat-trasport tagħna jrid jimmodernizza l-infrastruttuta tiegħu, inaqqas il-konġezzjoni u jtejjeb il-konnessjonijiet kummerċjali. L-ambjent tagħna jeħtiġlu faċilitajiet aħjar tal-iskart, ir-riċiklaġġ u l-ilma. U aħna għandna bżonn broadband veloċi u li tilħaq 'il bogħod u ċentri tad-dejta iktar intelliġenti madwar l-Ewropa.

Dawn il-bżonnijiet qed jinħassu sew wara tant snin bla tkabbir jew tkabbir żgħir, b'riskju li l-istokk tal-kapital produttiv tal-Ewropa jiċkien u jiqdiem. Dan inqas iktar il-potenzjal tagħna għall-kompettittività u tkabbir, u jkun ta' piż fuq il-produttività u l-kapaċità tagħna li noħolqu l-impjiegi.

Ma hemmx tweġiba unika jew sempliċi. Hemm diversi raġunijiet għal din il-prestazzjoni dgħajfa: fiduċja tal-investituri baxxa, aspettattivi fuq id-domanda mrażżna u dejn għoli tal-unitajiet domestiċi u l-awtoritajiet pubbliċi. F'ħafna reġjuni l-prospettiva inċerta u t-tħassib dwar ir-riskju ta' kreditu żammew lill-SMEs milli jiksbu finanzjament għal proġetti denji.

Hemm tfaddil sustanzjali mis-settur privat u anki likwidità fil-wiesgħa, iżda dawn il-flus mhux isibu triqthom lejn l-ekonomija reali tal-Ewropa. Dan huwa fejn l-awtoritajiet pubbliċi fil-livelli kollha għandhom rwol x'jaqdu.

Jista' jsir ħafna fil-livell nazzjonali u reġjonali

L-awtoritajiet nazzjonali u reġjonali għandhom rwol ewlieni x'jaqdu biex jippromwovu r-riformi strutturali meħtieġa, jeżerċitaw responsabbiltà fiskali u jsaħħu l-investiment b'sostenn għall-impjiegi u t-tkabbir. L-Istati Membri bi spazju għal manuvrar fiskali jeħtieġ li jinvestu iktar. L-Istati Membri kollha, iżda partikolarment dawk b'inqas spazju fiskali għandhom jiżguraw użu effiċjenti tar-riżorsi, jipprijoritizzaw l-infiq marbut mal-investiment u t-tkabbir fil-baġit tagħhom, iġibu iktar investiment mill-Fondi tal-UE għad-diżpożizzjoni tagħhom u joħolqu ambjent li jwassal iktar għal investiment mill-atturi privati.

Din hija opportunità unika għall-awtoritajiet nazzjonali u reġjonali fix-xhur li ġejjin biex jużaw bl-aħjar mod il-baġit tal-UE għall-perjodu 2014-2020, peress li se jsiru disponibbli għodod u strumenti ġodda. Il-baġit tal-UE jammonta għal EUR 960 biljun għal dan il-perjodu ta' seba' snin, li jikkorrispondu għal EUR 140 biljun fis-sena, l-ekwivalenti għal 1 % tal-PDG tal-UE. Programmi tal-UE ewlenin bħal Orizzont 2020 (għall-innovazzjoni u r-riċerka), il-Faċilità Nikkollegaw l-Ewropa (għall-infrastruttura) u COSME (għall-finanzjament tal-SMEs) issa se jaqbdu r-rutina.

L-istess jgħodd għall-ġenerazzjoni l-ġdida ta' Fondi Strutturali u ta' Investiment Ewropej, li se jipprovdu EUR 350 biljun għal investiment ġdid matul 2014-2020. Dan se jinbidel f'investimenti ta' iktar minn EUR 600 biljun meta jiġu inklużi l-kofinanzjamenti nazzjonali. Is-sinifikant tal-Fondi jvarja bejn il-pajjiżi iżda jistgħu jkollhom sehem strateġiku ħafna kullimkien, billi bħala medja jirrapreżentaw 10 % tal-investiment pubbliku totali fl-UE.

Pjan ta' Investiment għall-Ewropa

Il-Pjan ta' Investiment għall-Ewropa li se tippreżenta l-Kummissjoni flimkien ma' dan l-Istħarriġ Annwali dwar it-Tkabbir se jikkumplimenta u jsaħħaħ l-isforzi eżistenti. Se jimmobilizzza mill-inqas EUR 315-il biljun bejn issa u l-aħħar tal-2017 f'investiment pubbliku u privat addizzjonali. L-ewwel nett, dan jista’ jsir permezz ta’ sforz konġunt min-naħa tal-istituzzjonijiet tal-UE u l-Bank Ewropew tal-Investiment (BEI) billi jitwaqqaf Fond Ewropew ġdid għall-Investimenti Strateġiċi. Madankollu, l-impatt tal-pjan jiġi mmultiplikat u jmorr lil hinn mill-EUR 315-il biljun hekk kif iktar partijiet interessati jissieħbu b’kontribuzzjonijiet volontarji addizzjonali: l-Istati Membri, il-Banek Promozzjonali Nazzjonali (National Promotional Banks, NPBs), l-awtoritajiet reġjonali u investituri privati kollha għandhom rwol ċentrali x’jaqdu. B’mod importanti, fil-kuntest tal-valutazzjoni tal-finanzi pubbliċi skont il-Patt ta’ Stabbiltà u Tkabbir, il-Kummissjoni tieħu pożizzjoni favorevoli lejn kontribuzzjonijiet kapitali lill-Fond il-ġdid.

Dawn il-flus addizzjonali għandhom ikunu ffukati fuq l-infrastruttura, b’mod partikolari l-enerġija u n-netwerks tal-broadband; kif ukoll fuq l-infrastruttura tat-trasport b’mod partikolari fiċ-ċentri industrijali; l-edukazzjoni, ir-riċerka u l-innovazzjoni; l-enerġija rinnovabbli u l-effiċjenza fl-użu tal-enerġija. Hemm żoni fejn jeżistu ħtiġijiet ċari u fejn il-progress huwa mistenni li jġib benefiċċji ekonomiċi u soċjetali kbar.

Waqt li jkun qed jiġi implimentat, il-Pjan ta' Investiment se jaqdi tliet objettivi politiċi relatati: li jreġġa' lura x-xejriet 'l isfel riċenti tal-investiment u jipprovdi spinta addizzjonali lill-ħolqien tax-xogħol u lill-irkupru tal-ekonomija tal-UE; li jittieħed pass deċiżiv biex jintlaħqu l-ħtiġijiet fit-tul tal-ekonomija tagħna billi tingħata spinta lill-kompetittività fl-oqsma strateġiċi; li tissaħħaħ id-dimensjoni Ewropea tal-kapital uman u l-infrastruttura fiżika tagħna, b'attenzjoni speċjali fuq interkonnessjonijiet li huma ta' importanza vitali għas-suq uniku tagħna.

Dan il-Pjan ta' Investiment ġie żviluppat b'kunsiderazzjoni tal-ispazju fiskali limitat tal-gvernijiet nazzjonali biex jiġi evitat li jkun ta' piż fuq il-finanzi pubbliċi nazzjonali. Ir-responsabbiltà fiskali hija parti mir-restawr tal-kunfidenza li teħtieġ l-Ewropa biex tirkupra mill-kriżi. Dan huwa għaliex il-Pjan huwa mibni fuq soluzzjonijiet disponibbli fil-livell tal-UE u fuq korpi u proċeduri stabbiliti, ħaġa li se tgħin biex jintlaħqu riżultati malajr, kif ukoll eżekuzzjoni rigoruża u r-responsabbiltà.

Kaxxa 2. Karatteristiċi ewlenin tal-Pjan ta’ Investiment għall-Ewropa Il-Pjan ta’ Investiment għall-Ewropa hija bbażata fuq tliet aspetti li jsaħħu lil xulxin b’mod reċiproku: § Il-mobilizzazzjoni ta’ mill-inqas EUR 315-il biljun f’finanzjament addizzjonali għall-investiment bejn issa u l-aħħar tal-2017. § Inizjattivi mmirati biex jiżguraw li l-investiment jilħaq il-bżonnijiet tal-ekonomija reali. § Miżuri biex jitjieb l-ambjent tal-investiment, u b’hekk l-investiment fl-Ewropa jsir iktar attraenti. Mobilizzazzjoni ta’ mill-inqas EUR 315-il biljun ta’ finanzjament addizzjonali għal investiment fil-livell tal-UE § Se jitwaqqaf Fond Ewropew ġdid għal Investimenti Strateġiċi, fi sħubija mill-qrib mal-BEI, sabiex jiġu appoġġati l-investimenti strateġiċi ta’ importanza Ewropea u l-finanzjament ta’ riskju għall-SMEs u l-kumpaniji b’kapitalizzazzjoni medja madwar l-Ewropa. § Il-Fondi Strutturali u ta’ Investiment Ewropej se jiġu sfruttati bis-sħiħ. Dan ifisser li jiġi żgurat li l-fondi tal-UE li baqa' mill-perjodu ta’ programmazzjoni 2007-2013 jintużaw bl-aħjar mod. Dan ifisser ukoll żieda fl-ingranaġġ tal-fondi tal-UE 2014-2020 billi jiġi rdupjat is-sehem kumplessiv tal-istrumenti finanzjarji innovattivi u jiġi mmassimizzat l-użu tal-kofinanzjament privat. Niżguraw li l-finanzi jaslu fl-ekonomija reali § Se tinħoloq segwenza trasparenti ta’ proġetti maturi għall-investiment fil-livell tal-UE, ibbażata fuq ir-rapport ta’ Diċembru 2014 minn Task Force tal-Kummissjoni, il-BEI u l-Istati Membri. § Sorsi ta’ għarfien espert u assistenza teknika se jinġabru flimkien f’"ċentru" uniku ta' pariri dwar l-investiment għall-promoturi tal-proġetti, l-investituri u l-awtoritajiet tal-immaniġġar. § Il-Kummissjoni u l-BEI, flimkien mal-awtoritajiet nazzjonali u reġjonali, se jimpenjaw ruħhom mal-promoturi tal-proġetti, l-investituri u l-partijiet interessati istituzzjonali biex jiffaċilitaw proġetti ewlenin ta’ investiment. Intejbu l-ambjent tal-investiment § Miżuri biex jitjieb il-qafas regolatorju, f’livell nazzjonali kif ukoll Ewropew, biex ikun ċar u prevedibbli, u jiġi inċentivat l-investiment. § Miżuri biex jiġu żviluppati sorsi ġodda u alternattivi ta’ finanzjament fuq terminu twil għall-ekonomija u nersqu lejn Unjoni tas-Swieq Kapitali. § Miżuri biex jitlesta s-suq uniku fis-setturi prinċipali bħall-enerġija, it-trasport u l-ekonomija diġitali.

3.         IMPENN IMĠEDDED LEJN IR-RIFORMI STRUTTURALI

It-tkabbir jeħtieġ b'mod kruċjali li l-Ekonomija Ewropea ssir iktar kompetittiva u li jiġi żgurat ambjent regolatorju tajjeb għall-investiment fuq terminu twil. Ir-riformi strutturali jistgħu jgħinu biex jiġi attirat investiment produttiv privat, partikolarment fl-industriji tan-netwerk u l-manifattura intelliġenti, fejn hemm bżonn ħafna investiment. Fil-livell tal-UE, dan jeħtieġ approfondiment ulterjuri tas-suq uniku u li jiġu evitati regolamenti ta’ piż bla bżonn, partikolarment għall-intrapriżi ż-żgħar u medji, it-titjib tal-aċċess għall-finanzi u l-iżgurar tal-kwalità tal-investiment fir-riċerka u l-innovazzjoni. Fil-livell tal-Istati Membri, jeħtieġ li dawn l-isforzi jiġu kkumplimentati minn implimentazzjoni ambizzjuża tar-riformi strutturali tas-swieq tal-prodotti, is-servizzi u x-xogħol.

INNEĦĦU L-OSTAKLI EWLENIN FIL-LIVELL TAL-UE

L-implimentazzjoni tas-suq uniku fil-prodotti u s-servizzi hija ta' prijorità. B’iktar minn 500 miljun konsumatur, is-suq uniku Ewropew jibqa’ l-iktar magna b’saħħitha tat-tkabbir fil-livell tal-UE. Dan se jeħtieġ enfasi qawwija fuq integrazzjoni ulterjuri tas-swieq tal-prodotti u s-servizzi fejn il-potenzjal għall-impjiegi, it-tkabbir u l-innovazzjoni huwa sinifikanti, onlajn u offlajn. Meta tagħmel dan, huwa importanti li jiġu sfruttati s-sinerġiji bejn suq uniku li jiffunzjona sew u l-industrija. Il-konsumaturi għandhom ikunu jistgħu jibbenefikaw minn suq uniku integrat li joffri l-istess possibbiltajiet bħas-swieq domestiċi tagħhom. Suq uniku iktar profond se joħloq benefiċċji fuq ix-xena esterna wkoll. Isaħħaħ il-pożizzjoni tal-kumpaniji Ewropej fil-katini tal-valur globali, jattira l-investiment u jpoġġi lill-Unjoni f’pożizzjoni aħjar biex toħloq rabtiet iktar b’saħħithom maċ-ċentri l-ġodda ta’ tkabbir globali permezz ta’ ftehimiet ta’ kummerċjali li jsaħħu l-konverġenza regolatorja mas-sħab kummerċjali prinċipali tagħna.

Is-Suq Diġitali Uniku huwa essenzjali għall-impjiegi, it-tkabbir u l-innovazzjoni. L-ekonomija globali qed tittrasforma f’waħda diġitali. It-Teknoloġija tal-Informazzjoni u l-Komunikazzjoni mhijiex biss settur iżda l-pedament ta’ ekonomija moderna u innovattiva. Suq Diġitali Uniku konness jista’ jiġġenera sa EUR 260 biljun kull sena f’titjieb fl-effiċjenza.[5] It-teknoloġija diġitali tintroduċi metodi ġodda ta' produzzjoni tal-prodotti u l-forniment ta' servizzi minn karozzi u kimika sad-distribuzzjoni bl-imnut u l-enerġija, u b'hekk issawwar mill-ġdid il-mod ta' kif naħdmu u jitgħallmu. Pożizzjoni tajba fl-ekonomija diġitali se tiddetermina l-kompetittività futura tal-UE u l-perkors lejn it-tkabbir mill-ġdid. Is-servizzi diġitali huma essenzjali għall-effiċjenza u s-sigurtà tal-infrastrutturi strateġiċi ewlenin tal-Ewropa, bħall-enerġija u l-ferrovija. U l-iktar importanti, toffri benefiċċji kbar għas-soċjetà – aċċess għal oġġetti u servizzi u informazzjoni, il-libertà tal-espressjoni, il-kreattività, kura tas-saħħa aħjar u servizzi pubbliċi. Minkejja dan, ma għandniex Suq Diġitali Uniku. Huma biss 14 % tal-SMEs li jużaw l-internet għall-bejgħ onlajn. Huma biss 12 % tal-konsumaturi li jagħmlu xiri transfruntier. Il-konsumaturi jiffrustraw ruħhom meta ma jkunux jistgħu jaċċessaw servizzi diġitali fi Stat Membru ieħor minħabba prattiki kummerċjali restrittivi jew impedimenti legali. In-negozji se jkunu jistgħu jisfruttaw il-potenzjal sħiħ tas-settur diġitali biss meta jkun hemm regoli tal-protezzjoni tad-dejta Ewropew komuni u ta’ standard għoli u meta terġa’ tinkiseb il-fiduċja tal-konsumaturi.

Huma meħtieġa iktar riformi strutturali fis-swieq tal-enerġija biex tinkiseb Unjoni tal-Enerġija reżiljenti b’politika għat-tibdil fil-klima li tħares ’il quddiem, b’konformità mal-objettivi tal-Ewropa 2020 u l-qafas għall-klima u l-enerġija għall-2030 miftiehem mill-Kunsill Ewropew f’Ottubru 2014, u biex tissaħħaħ is-sigurtà tal-provvista tal-enerġija u jitlesta s-suq intern tal-enerġija. Dan jirrekjedi titjib tat-tfassil tas-suq tal-enerġija, it-tisħiħ tal-istrumenti bbażati fuq is-suq eżistenti u li tiġi modernizzata u estiża l-infrastruttura tal-enerġija. Dan għandu jippermetti li fl-UE l-enerġija ddur b’mod ħieles, jiġu eliminati l-iżolamenti tal-enerġija u tiġi integrata l-enerġija rinnovabbli fin-netwerk. Il-finanzjament tal-investimenti meħtieġa se jkun sfida ewlenija. Filwaqt li se jingħata appoġġ sinifikanti mill-Fondi Strutturali u ta’ Investiment tal-UE, huma meħtieġa mekkaniżmi finanzjarji innovattivi biex jistimulaw u jingranaw l-investimenti fil-modernizzazzjoni tal-enerġija u jinċentivaw l-investiment tal-unitajiet domestiċi fl-effiċjenza tal-enerġija.

Azzjoni ambizzjuża hija meħtieġa sabiex jiġi żgurat qafas regolatorju tal-UE favur l-impjiegi, it-tkabbir u l-investimenti. Il-Kummissjoni se tipprijoritizza l-ħidma li bdiet f’Diċembru 2012 bit-tnedija tal-Programm dwar l-Idoneità u l-Prestazzjoni tar-Regolamentazzjoni (REFIT) – analiżi ġenerali tal-leġiżlazzjoni eżistenti. Dan għandu jagħmel il-liġi tal-UE eħfef, iktar sempliċi u irħas għall-benefiċċju taċ-ċittadini u l-intrapriżi. Il-Kummissjoni se tkompli ssaħħaħ l-għodod regolatorji tagħha (il-valutazzjoni tal-impatt, l-evalwazzjoni), f’kooperazzjoni mill-qrib mal-istituzzjonijiet Ewropej l-oħra, l-Istati Membri u l-partijiet interessati.

It-tneħħija tal-ostakoli regolatorji msemmija hawn fuq għandha timxi id f'id mal-varar tal-Fond il-ġdid Ewropew għall-Investimenti Starteġiċi żviluppat bi sħab bejn il-Kummissjoni u l-BEI.

IR-RIFORMI STRUTTURALI FIL-LIVELL TAL-ISTATI MEMBRI

Fl-aħħar nett, ir-riforma u l-immodernizzar tal-ekonomiji tagħna huma meħtieġa sabiex isejsu l-mudell soċjali Ewropew tagħna. Huwa importanti li l-membri kollha tas-soċjetà, b’mod partikolari s-sħab soċjali, ikun jista’ jkollhom rwol u jappoġġaw il-bidla b’mod proattiv.

L-implimentazzjoni ambizzjuża tar-riformi strutturali fis-swieq tal-prodotti, is-servizzi u x-xogħol tista’ tikkontribwixxi biex jiżdiedu l-produttività, tinkiseb mill-ġdid il-kompetittività u jitjieb l-ambjent kummerċjali, u b’hekk jitrawwem ukoll l-investiment. Dan jista’ jikkontribwixxi għal bilanċjar mill-ġdid durabbli tal-mudell tat-tkabbir tagħna, jitnaqqas l-impatt negattiv tad-diżingranaġġ finanzjarju meħtieġ mis-settur privat u jikkontribwixxi għall-prevenzjoni ta’ żbilanċi makroekonomiċi dannużi. Barra minn hekk, minħabba l-effetti fuq it-tkabbir, il-produttività u l-impjiegi, sakemm ikunu jeżistu l-kanali t-tajbin, dan tista’ jikkontribwixxi għat-titjib tas-sitwazzjoni soċjali inġenerali u biex jitnaqqas il-faqar, kif ukoll għas-sostenibbiltà tad-dejn privat u pubbliku.

Minkejja l-kisbiet ta’ xi Stati Membri – partikolarment dawk l-iktar vulnerabbli – huma meħtieġa sforzi ta’ riforma addizzjonali fl-Istati Membri kollha. L-esperjenza ta’ dan l-aħħar tat evidenza biżżejjed li azzjoni ambizzjuża tahħti riżultati ċari (ara l-Kaxxa 3).

Kaxxa 3. Eżempji ta’ riformi strutturali effettivi fl-Istati Membri

· Fi Spanja, f’Diċembru 2013, il-gvern approva Liġi li tiggarantixxi l-unità tas-suq fl-interess tal-libertà tal-moviment u tal-istabbiliment tal-persuni u l-moviment liberu ta’ merkanzija. Il-liġi hija razzjonalizzazzjoni ambizzjuża ta’ trikkib ta' leġiżlazzjoni fi Spanja, tindirizza l-frammentazzjoni tas-suq domestiku u żżid il-kompetizzjoni fis-swieq tal-prodotti. Skont l-Awtoritajiet Spanjoli, ir-riforma hija stmata li maż-żmien tgħolli l-PDG b’iktar minn 1,5 %.

· Il-Portugall daħħal fis-seħħ għadd ta’ riformi fis-suq tax-xogħol bejn l-2011 u l-2013. Ġiet allinjata l-protezzjoni tal-ħaddiema b'kuntratti permanenti u għal żmien fiss. Il-leġiżlazzjoni dwar il-ħin tax-xogħol saret iktar flessibbli, u ttieħdu miżuri biex is-salarji jiġu adattati aħjar mal-produttività fil-livell tad-ditta. Il-benefiċċji tal-qgħad ġew riformati u l-eliġibbiltà ġiet estiża. Is-Servizz Pubbliku tal-Impjiegi ġie riformat, il-Politiki tas-Suq tax-Xogħol Attivi ġew analizzati u programmi ġodda introdotti, fosthom uħud mmirati lejn iż-żgħażagħ. Ir-rata tal-qgħad naqset b’madwar 2 punti perċentwali bejn l-2013 u l-2014.

· Il-Polonja bdiet riforma ambizzjuża li tiffaċilita l-aċċess għall-professjonijiet regolati. Aċċess għal 50 professjoni – inklużi avukati, nutara, aġenti tal-proprjetà immobbli u sewwieqa tat-taxi – ġie liberalizzat fl-ewwel mewġa ta’ riforma fl-2013. Deċiżjonijiet li jkopru 91 professjoni oħra ġew adottati mill-Parlament Pollakk f’April 2014 u d-deregolamentazzjoni ta' 101 professjoni oħra hija ppjanata għal kmieni fl-2015.

· L-Italja implimentat sett ta’ miżuri fl-2013 mmirati biex tiżdied il-kompetizzjoni u t-trasparenza fis-swieq tal-gass u l-elettriku. L-inizjattivi li ħa l-gvern Taljan għenu biex tiġi indirizzata l-kwistjoni twila tal-prezzijiet għoljin tal-enerġija fl-Italja u, skont l-istimi mir-regolatur tal-enerġija, għenu biex jitnaqqsu l-prezzijiet lill-utenti aħħarija.

Għall-2015, il-Kummissjoni tirrakkomanda li l-attenzjoni tiġi ffukati fuq għadd ta’ riformi ewlenin. L-oqsma magħżula huma rilevanti għall-Istati Membri kollha għalkemm miżuri preċiżi li għandhom jittieħdu ser ivarjaw minn pajjiż għall-ieħor. Fiż-Żona tal-Euro, għandha tingħata attenzjoni partikolari lill-kordinazzjoni aħjar ta’ xi wħud minn dawn ir-riformi sabiex jittejbu s-sinerġiji pożittivi u biex jiġu evitati effetti sekondarji negattivi. L-oqsma tar-riforma huma dawn:

1. It-titjib tad-dinamika fis-swieq tax-xogħol u l-indirizzar tal-livell għoli tal-qgħad. L-iktar pajjiżi kompetittivi u reżiljenti huma dawk fejn il-kumpaniji u l-intraprendituri jgħożżu u jinvestu l-iktar fil-ħiliet kontinwi tal-iżvilupp u fejn l-innovazzjoni hija mħeġġa u fejn in-nies jistgħu jiċċaqilqu faċilment bejn il-professjonijiet, is-setturi u / jew ir-reġjuni.

Ir-regoli u l-istituzzjonijiet tal-protezzjoni tal-impjiegi għandhom jipprovdu ambjent xieraq biex jiġi stimulat l-ingaġġ, filwaqt li joffru livelli ta’ protezzjoni moderni, kemm lil dawk li diġà huma f’impjieg u lil dawk li qegħdin ifittxu xogħol. L-Istati Membri jridu jistinkaw iktar biex ineħħu l-ostakoli għall-ħolqien tal-impjieg, bl-involviment tas-sħab soċjali, inkluż fejn neċessarju billi jirriformaw l-iskemi tar-risoluzzjoni tat-tilwim industrijali. Riformi li jimmiraw lejn it-tnaqqis tat-tassazzjoni tax-xogħol biex jgħinu li jiġu restawrati l-impjiegi għandhom jiġu intensifikati. It-tnaqqis tas-segmentazzjoni tas-suq tax-xogħol għandu jgħin biex jiġu eliminati l-ostakoli għall-impjieg għal dawk li attwalment huma qiegħda, sottoimpjegati jew impjegati b’kuntratt temporanju, u jiffaċilita l-mobilità professjonali 'l fuq.

L-UE għandha bżonn ħaddiema ta’ ħila f’setturi li qed jikbru bħall-ekonomija diġitali, is-setturi ambjentali u l-kura tas-saħħa. L-edukazzjoni għandha rwol prinċipali x’tiżvolġi biex tiġi żgurata l-kapaċità ta’ rispons tal-ħiliet għas-sinjali tas-suq tax-xogħol. It-taħriġ vokazzjonali u s-sistemi ta’ taħriġ doppju għandhom jiġu mtejba biex jipprovdu liż-żgħażagħ bis-settijiet tal-ħiliet meħtieġa. It-tagħlim tul il-ħajja għandu jsir prijorità ċentrali, permezz tal-mobilizzazzjoni ta’ atturi kemm pubbliċi kif ukoll privati, b’aċċess usa’ fl-etajiet kollha u għal dawk li l-iktar għandhom bżonn. Valutazzjoni aħjar tal-bżonnijiet tal-ħiliet fil-livelli reġjonali u settorjali hija meħtieġ ukoll.

Is-sitwazzjoni taż-żgħażagħ u dawk qiegħda fit-tul b'mod partikolari, teħtieġ azzjoni determinata. Is-sistemi tal-benefiċċji għandhom jikkombinaw is-sostituzzjoni tad-dħul adegwat ma' servizzi ta' attivar u ta’ faċilitazzjoni, li huma mmirati lejn il-ħtiġijiet individwali u li jingħataw permezz ta’ punti ta’ servizz one-stop. Iridu jitneħħew id-diżinċentivi fiskali biex tfittex impjieg. Il-Garanzija għaż-Żgħażagħ tirrappreżenta sforz ambizzjuż li tgħaqqad strumenti differenti biex tindirizza lill-qgħad fost iż-żgħażagħ b’mod effikaċi. Madankollu, il-fondi disponibbli, inklużi EUR 6,4 biljun tal-Inizjattiva favur l-Impjieg taż-Żgħażagħ, għandhom jintużaw iktar malajr u b’mod iktar effiċjenti mill-Istati Membri, u jiġu msaħħa permezz ta’ mezzi nazzjonali. Ġew adottati biss tliet Programmi Operazzjonali rilevanti b’valur totali ta’ EUR 1,6 biljun għal Franza, l-Italja u l-Litwanja u li jippermettu li jsiru pagamenti ta' prefinanzjament lil dawn il-pajjiżi. Sabiex ikunu jistgħu jiġu adottati l-biċċa l-kbira tal-Programmi Operazzjonali rilevanti sal-aħħar tas-sena, l-Istati Membri jridu jwieġbu l-osservazzjonijiet tal-Kummissjoni malajr kemm jista’ jkun.

Bħala medja, hemm iktar minn żewġ miljun post tax-xogħol vakanti fl-UE. Filwaqt li hemm limiti għal mobbiltà ġeografika, jidher li l-ħaddiema mhumiex jużaw l-opportunitajiet tal-moviment ħieles b’mod sħiħ. It-tneħħija tal-ostakli se teħtieġ li jiżdied l-ambitu tal-portabilità tad-drittijiet tal-pensjoni madwar l-UE u tingħata għajnuna lill-ħaddiema biex jagħmlu għażla infurmata dwar il-mobilità, pereżempju permezz tan-netwerk EURES. Fl-istess ħin, iridu jittieħdu passi kontra l-abbuż tar-regoli eżistenti u jiġi evitat l-eżodu permanenti tal-imħuħ minn ċerti reġjuni. Koperazzjoni msaħħa tal-UE fl-iskambju tal-informazzjoni u l-prassi tajba se tkun essenzjali.

Livell għoli ta’ impjiegi jeħtieġ li l-pagi reali jsegwu l-iżviluppi tal-produttività, inkluż fil-livell tal-industrija u tad-ditti. Xi Stati Membri għad iridu jlestu l-korrezzjoni tax-xejriet ta’ qabel il-kriżi, b’pagi qabżu ż-żieda fil-produttività. Ir-rwol tas-sħab soċjali huwa kruċjali. Il-ftehimiet kollettivi għandhom jippermettu ċertu grad ta’ flessibilità għal żidiet fil-pagi differenzjati bejn is-setturi u fis-setturi, skont l-iżviluppi fl-produttività speċifika.

2. Ir-riformi tal-pensjonijiet. Madwar l-UE hemm bżonn li tiġi żgurata s-sostenibbiltà u l-adegwatezza tas-sistemi tal-pensjonijiet. Il-maġġoranza tal-Istati Membri rriformaw is-sistemi tal-pensjonijiet pubbliċi tagħhom f’dawn l-aħħar snin biex ipoġġuhom fuq bażi iktar soda hekk kif is-soċjetà Ewropea qed tkompli tixjieħ. Madankollu, kif rifless fir-rakkomandazzjonijiet speċifiċi għall-pajjiżi tal-2014, f’bosta każijiet huma meħtieġa iktar riformi biex tiżdied l-effiċjenza u s-sostenibbiltà finanzjarja tal-pensjonijiet. Fl-istess ħin, l-adegwatezza tas-sistemi tal-pensjonijiet jeħtieġ li tiġi mħares, sabiex ikun jista' jiġi żgurat livell diċenti ta’ dħul wara l-irtirar. Minħabba x-xejra tal-ħajja itwal, f’bosta pajjiżi jeħtieġ li tiġi stabbilita viżjoni iktar dinamika tal-età li jirtiraw fiha n-nies, inkluż li l-età tal-irtirar statutorja tkun marbuta mal-istennija tal-għomor tal-ħajja b’mod iktar sistematiku biex jiġi żgurat bilanċ adegwat bejn il-ħajja tax-xogħol u l-ħajja fl-irtirar.

3. L-Immodernizzar tas-sistemi ta' protezzjoni soċjali. Il-mekkaniżmi tal-protezzjoni soċjali għandhom ikunu effiċjenti u adegwati fl-istadji kollha tal-ħajja ta' individwu. Hemm il-ħtieġa għal politiki soċjali ssimplifikati u iktar iffukati kkumplimentati minn servizzi tan-nuna u tal-edukazzjoni ta' kwalità u affordabbli, il-prevenzjoni ta' tluq bikri mill-iskola, taħriġ u assistenza għall-impjieg, sostenn għall-akkomodazzjoni u kura tas-saħħa aċċessibbli. Is-sistemi tal-kura tas-saħħa jeħtieġ li jkunu riformati biex jipprovdu kura tas-saħħa permezz ta' strutturi effiċjenti, inkluż is-Saħħa-e.

4. It-titjib tal-flessibilità tas-swieq tal-prodotti u s-servizzi. L-immodernizzar tal-operat tal-industriji li jużaw netwerk, l-aġġornament tal-kapaċità tal-infrastruttura u l-ftuħ ulterjuri tas-setturi tas-servizzi għadu sfida għall-biċċa l-kbira tal-Istati Membri kif muri fir-rakkomandazzjoni speċifika għall-pajjiż maħruġa lill-Istati Membri fl-2014, li ffukat fuq miżuri biex itejbu l-funzjonament tal-industriji li jużaw netwerk u t-titjib tal-kompetizzjoni fis-setturi tal-prodotti u s-servizzi, notevolment fir-rigward tal-professjonijiet irregolati. Infurzar effettiv tal-leġiżlazzjoni tal-konsumatur tista' żżid ukoll il-fiduċja u toħloq domanda fis-suq uniku.

Il-leġiżlazzjoni tal-UE tipprovdi qafas għall-modernizzazzjoni fil-livell nazzjonali, u biex tagħmel l-Ewropa iktar attraenti u kompetittiva kumplessivament. L-Istati Membri wettqu għadd ta' riformi fis-settur tas-servizzi wara d-dħul fis-seħħ tad-Direttiva dwar is-Servizzi fl-2006, iżda l-progress kien iktar żbilanċjat riċentament. L-implimentazzzjoni sħiħa tad-Direttiva dwar is-Servizzi ttejjeb b'mod sinifikanti l-funzjonament tas-suq uniku għas-servizzi u tista' twassal għal gwadann ekonomiku sa massimu ta' 1,6 % tal-PDG tal-UE fuq medda twil ta' żmien lil him miż-0,8 % tal-PDG tal-UE fil-livell attwali ta' implimentazzjoni.[6] Il-persistenza ġenerali ta' għadd kbir ta' eċċezzjonijiet għall-prinċipji ġenerali preveisti mid-Direttiva, flimkien ma' proċessi twal ta' riforma f'għadd ata' Stati Membri, għadhom qed ikunu ta' piż fuq l-implimentazzjoni sħiħa tad-Direttiva u b'hekk ma jippermettux li jinħasdu l-benifiċċji kollh atagħha. It-tisħiħ tar-riformi nazzjonali għandu jiffoka fuq it-tneħħija tal-ostakoli segwenti: (i) rekwiżiti ta' awtorizzazzjoni sproporzjonati u inġustifikati f'xi Stati Membri, notevolment rekwiżiti ta' forma ġuridika u ta' parteċipazzjoni azzjonarja. (ii) nuqqas ta' ċarezza tal-leġiżlazzjoni domestika fir-rigward tar-regoli applikabbli għan-negozji li jipprovdu servizzi transfruntieri; (iii) nuqqas ta' rikonoxximent reċiproku; (iv) proċeduri amministrattivi ingumbranti, li għandhom lok għal titjib fil-prestazzjoni tal-Punti ta' Kuntatt Uniku; (iv) progress żbilanċjat fl-evalwazzjoni reċiproka li qed issir tar-regolamenti professjonali u r-riformi fil-professjonijiet irregolati; (v) ostakoli li jifdal għall-moviment ħieles ta' merkanzija. Il-Kummissjoni se tkompli taħdem mill-qrib mal-Istati Membri biex tneħħi dawn l-ostakoli.[7]

5. Titjieb tal-kundizzjonijiet ta' qafas għall-investiment fin-negozju. Sforzi biex jissaħħu l-ambjent tan-negozju biex jiffavorixxi iktar l-investiment huma essenzjali biex iġibu investiment privat partikolarment fi Stati Membri bi spazju fiskali limitat għall-investiment pubbliku. Sħubijiet pubbliċi-privati, u governanza ta' intrapriżi tal-istat se jkunu jeħtieġu li jkunu mfassla bir-reqqa biex in-nefqa pubblika u l-investiment privat ikunu iktar effiċjenti. Kuntratti ta' akkwist pubbliku għandhom jinfetħu ulterjorment, partikolarment bl-użu ta' leġiżlazzjoni tal-UE. Dan jimplika wkoll li l-kapaċità amministrattiva tal-awtoritajiet ta' akkwist għall-ippjanar u l-implimentazzjoni tissaħħaħ, partikolarment permezz tal-akkwist elettroniku. F'ħafna każijijiet, huma meħtieġa wkoll effiċjenza mtejba tal-proċeduri u iktar trasparenza. Oqfsa ta' insolvenza li jiffunzjonaw sew huma wkoll kruċjali għal riallokazzjoni effiċjenti tar-riżorsi.

6. Titjib tal-kwalità tal-investiment fir-riċerka u l-innovazzjoni (R&I) L-investimen fir-R&I fil-livell nazzjonali u reġjonali għandu rwol kritiku biex jixpruna tkabbir sostenibbli. L-Istati Membri għandhom ikomplu jipprioritizzaw l-investiment pubbliku fir-riċerka u l-innovazzjoni, waqt li jiżguraw l-effiċjenza tagħhom u l-ingranaġġ fir-rigward tal-investiment privat. L-Istati Membri għandhom jiffukaw fuq il-kwalità tal-istituzzjonijiet tar-R&I, fuq il-proċessi tagħhom għall iżvilupp tal-istrateġija u t-tfassil tal-politika u fuq il-programmi. Fl-istess waqt, jeħtieġ li jżommu r-ritmu tar-riformi biex jiżguraw ambjent li jiffavorixxi l-investiment, li huwa kundizzjoni neċessarja għall-investiment tan-negozju fir-R&I u għal SME innovattivi li qed jikbru b'mod rapidu.

7. Titjib tal-effiċjenza fl-amministrazzjoni pubblika. L-amministrazzjonijiet pubbliċi mal-UE qed ikomplu jiffaċċaw l-isfida li jagħtu "aħjar imma b'inqas", jiġifieri jlaħħqu mal-ħtiġijiet pubbliċi fi żminijiet ta' baġits iktar stretti, itejbu l-ambjent tan-negozji billi jtaffu l-piżijiet amministrattivi u regolatorji għall-impriżi u ċ-ċittadini, u jadattaw għall-ħtiġijiet tal-ekonomija diġitali. Din għadha ta' sfida fil-biċċa l-kbira tal-Istati Membri. Għadd minnhom bdew riformi istituzzjonali jew territorjali, bl-objettiv doppju li jinkiseb iffrankar ta' flus permezz tar-razzjonalizzazzjoni tal-organizzazzjonijiet tagħhom. u l-iżgurar ta' teħid tad-deċiżjonijiet u implimentazzjoni bla intoppi tar-riformi permezz ta' kjarifika tal-kompetenzi tas-saffi istituzzjonali u governattivi varji.

Addizzjonalment, similarment għall-Programm dwar l-idoneità u l-prestazzjoni tar-regolamentazzjoni mwettaq fil-livell tal-UE, il-biċċa l-kbira tal-Istati Membri jeħtieġ li jfittxu li jiksbu simplifikazzjoni u approċċ iktar diġitali għall-amministrazzjoni pubblika. It-tneħħija ta' burokrazija żejda u ostakli regolatorji għandhom iwasslu għal kwalità ogħla, leġiżlazzjoni iktar sempliċi u iktar aċċessibbli u jifirxu t-triq għal ambjent li jiffavorixxi iktar lin-negozji u liċ-ċittadini, li min-naħa tagħhom irawmu l-investiment. F'dan ir-rigward, it-titjib tal-effiċjenza u l'iżgurar ta' sistemi ġudizjarji indipendenti ġusti huma preerekwiżit importanti wkoll. Hemm ħtieġa ċara li jkunu ttrattati kwistjonijiet bħat-tul tal-proċedimenti, l-għadd ta' kawżi pendenti, l-użu insuffiċjenti tal-ICT, il-promozzjoni ta' mekkaniżmi ta' soluzzjoni alternattiva għat-tilwim u l-indipendenza tas-sistema ġudizzjarja.

4.         Fl-INSEGWIMENT GĦAR-RESPONSABILITÀ FISKALI

Fid-dawl taż-żieda drastika tal-livelli tad-defiċit u tad-dejn madwar l-UE matul il-kriżi finanzjarja, grad sinifikanti ta' konsolidazzjoni fiskali kien neċessarju biex ikunu żgurati l-finanzi pubbliċi tal-Istati Membri u jkissru ċ-ċirku vizzjuż bejn l-iżvilupp tad-dejn sovran u l-instabilità finanzjarja. L-aġġustamenti sinifikanti li saru fis-snin riċenti rnexxilhom inaqqsu d-defiċits u jistabbilizzaw il-livelli tad-dejn fl-UE. It-tnaqqis qawwi fl-għadd ta' pajjiżi bi proċedura ta' defiċit eċċessiv - li naqqsu għal 11 fl-2014 minn 24 fl-2011 - jirrifletti dan it-titjib fiskali. Skont l-aħħar previżjonijiet, il-pożizzjoni fiskali fl-UE hija issa mistennija tibqa' newtrali fis-snin li ġejjin, li jfisser li l-politika fiskali mhux se żżomm lit-tkabbir milli jmur 'il quddiem.

Madankollu, id-dejn pubbliku għadu għoli ħafna u dan, flimkien ma' pożizzjoni ta' dejn estern għoli, jagħmel lill-ekonomiji iktar vulnerabbli għal xokkijiet avversi u jista' jaġixxi bħala trażżin għat-tkabbir. Tali żbilanċi jistgħu jirrapreżentaw ukoll theddida għall-funzjonament bla intoppi taż-Żona tal-Euro kumplessivament. Iż-żieda fid-dejn tal-gvern għad trid titreġġa lura fis-snin li ġejjin, f'konformità mal-obbligi tal-Istati Membri skont il-Patt ta' Stabbiltà u Tkabbir. Dan jista' jinkiseb permezz ta' politiki fiskali responsabbli u tkabbir ekonomiku. L-ewwel nett, ir-ritmu tal-aġġustament fiskali għandu jkunu differenzjat skont l-isfidi fiskali ffaċċati minn Sati membri differenti. Waqt li dawk bi sfidi ta' sostenibbiltà għandhom ikomplu jikkonsolidaw, Stati Membri bi spazju fiskali għandhom jużawh biex isostnu t-tkabbir. L-Istati Membri għandhom ukoll jagħmlu użu sħiħ ta' oqfsa fiskali nazzjonali mtejba riċentament biex jistabilixxu u jżommu mat-trajettorja fiskali ġusta. It-tieni, il-kompożizzjoni tal-l-istrateġiji fiskali jeħtieġ li tkun imfassal b'mod li jiffavorixxi t-tkabbir. F'bosta pajjiżi, sakemm tibqa' konsistenti mar-rekwiżiti ta' konsolidament, enfasi fuq it-trażżin fin-nefqa possibilment flimkien ma' tnaqqis fit-taxxi li huma l-iktar distortivi tista' tgħin biex iżżid it-tkabbir u l-investiment.

Kaxxa 4. Konsolidament fiskali responsabbli li jiffavorixxi t-tkabbir Il-mod kif l-Istati Membri għamlu l-konsolidament fiskali ma kienx jiffavorixxi wisq it-tkabbir. Huwa kien eċċessivament ikkonċentrat madwar żidiet fit-taxxi, li mhumiex ottimali fil-biċċa l-kbira tal-Istati Membri fejn il-piż tat-taxxa diġà huwa għoli. Fuq in-naħa tan-nefqa tal-baġits nazzjonali, l-investiment pubbliku kienet il-partita l-aktra fil-mira għat-tnaqqis, minkejja l-potenzjal tat-tkabbir tagħha fost in-nefqa baġitarja. Fl-istess waqt, f'xi Stati Membri kemm id-daqs tal-aġġustamenti fiskali neċessarji u d-dinamiki tal-kriżi finanzjarja kienu jirrikjedu li jirrikorru għal soluzzjonijiet rapidi. Bil-kriżi finanzjarja li qed tbatti u bir-rittmu ta' konsolidament li qed jimmodera, il-kompożizzjoni tal-miżuri baġitarji bdiet titjib. Dan diġà kien viżibbli fl-2014 u wieħed jista' jarah ukoll fl-abbozzi ta' baġit għall-2015. It-tnaqqis fin-nefqa tal-investiment twaqqaf, waqt li l-kompożizzjoni tad-dħulijiet saret tiffavorixxi iktar it-tkabbir. Partikolarment, l-abbozzi ta' baġit għall-2015 fihom xi miżuri fiskali pożittivi li jnaqqsu il-piż tat-taxxa fuq il-manodopera, minkejja li l-livell ta' ambizzjoni xorta għadu taħt il-livell tal-isfidi.

Fuq in-naħa tad-dħul, huwa importanti li tkun żgurata sistema fiskali favorevoli għat-tkabbir u effiċjenti. L-impjiegi u t-tkabbir jistgħu jkunu stimulati biċ-ċaqliq tal-piż tat-taxxa lil hinn mill-manodopera lejn forom oħra ta' taxxi li huma ferm inqas detrimentali għat-tkabbir, bħat-taxxi rikurrenti fuq il-proprjetà l-ambjent u l-konsum, waqt li jkun ikkunsidrat l-impatt ditribuzzjonali potenzjali fuq tali ċaqliq. Il-piż tat-taxxa għoli fuq il-manodopera ilu problema fl-Ewropa b'differenzi ta' 40 % bejn l-Istati Membri fil-kost involut biex ikun impjegat ħaddiem b'paga medja u l-paga li l-ħaddiem fil-fatt jieħu d-dar. It-twessigħ tal-bażijiet fiskali, is-simplifikazzjoni u t-trasparenza mtejba jistgħu wkoll jgħinu biex iżidu l-effiċjenza tas-sistema tat-taxxa u jtejbu l-konformità fiskali kif ukoll il-ġlieda kontra ppjanar aggressiv tat-taxxa.

Fuq in-naħa tan-nefqa, investiment pubbliku produttiv u iktar partiti tan-nefqa kurrenti li jiffavorixxu t-tkabbir għandhom ikunu prijoritizzati - deċiżjonijiet rapidi fuq il-Pjan ta' Investiment għall-Ewropa propost mill-Kummissjoni se jgħinu lil dawn il-prijoritajiet. Is-sistemi ta' protezzjoni soċjali għandu jkollhom ir-rwol tagħhom fil-ġlieda kontra l-faqar u jrawwmu l-inklużjoni soċjali. L-effiċjenza tal-programmi eżiżtenti tan-nefqa fil-kisba tal-għanijiet tagħhom għandha tkun imtejba bl-adozzjoni tar-riformi u miżuri oħra, bħall-analiżi tal-infiq. Mill-inqas tminn Stati Membri bħalissa jinsabu, jew kienu riċentament impenjati f'analiżi tal-infiq f'forma jew oħra.: ir-Renju Unit, il-Pajjiżi l-Baxxi, Franza, l-Italja, l-Irlanda, id-Danimarka, Spanja u l-Isvezja. Il-kondivizjoni tar-riżultati u tal-esperjenza usa' miksuba minn din l-analiżi għandhom ikunu parti mis-sistema kumplessiva tal-governanza.

Il-Patt ta' Stabbiltà u Tkabbir jipprovdi l-qafas xieraq biex iwassal għal-tkabbir fit-tul fil-kuntest tal-finanzi pubbliċi sostenibbli, inkluż flessibilità fejn meħtieġ. Huwa jenfasizza l-iżviluppi baġitarji f'termini struturali u mhux biss fir-rigward tad-defiċit nominali. Dan jippermetti li żviluppi lil hinn mill-kontroll tal-gvern ikunu ffiltrati, kemm jekk ikunu negattivi (pereżempju skossi assimetriċi) jew pożittivi (pereżempju dħulijiet imprevisti). Dan ifisser li jkollna idea aħjar tal-pożizzjoni baġitarja sottostanti. Kull Stat Membru huwa vvalutat individwalment, filwaqt li jitqiesu s-sitwazzjoni ekonomika u l-isfidi nazzjonali partikolari tagħhom b'riżultat tat-tixjiħ demografiku, ikluż fl-oqsma tal-politiki tal-pensjoni u l-kura tas-saħħa, u l-livell tad-dejn pubbliku.

5.         SIMPLIFIKAZZJONI TAS-SISTEMA TA' GOVERNANZA TAGĦNA BIEX ISSIR IKTAR EFFETTIVA U TIŻDIED IR-RESPONSABBILTÀ

Dan l-Istħarriġ Annwali dwar it-Tkabbir ivara ċiklu annwali ta' governanza ekonomika magħruf bħala s-Semestru Ewropew. Huwa jgħaqqad is-sorveljanza tal-politika fiskali, makroekonomika u strutturali fil-livell tal-UE qabel ma jitħejjew il-baġits nazzjonali u d-deċiżjonijiet għas-sena segwenti. Mill-2011, is-Semestru Ewropew intuża biex jibda u jigwida riformi fiskali u strutturali importanti fl-Istati Membri. Flimkien ma' dan l-Istħarriġ Annwali dwar it-Tkabbir, il-Kummissjoni wettqet analiżi tal-leġiżlazzjoni tal-pakkett ta' sitta u dak ta' tnejn li saħħet il-governanza ekonomika tal-UE.[8]

Is-Semestru Ewropew sar veikolu importanti biex iwassal għal riformi fil-livelli nazzjonali u tal-UE, billi jiżgura li l-UE u l-Istati Membri jikkordinaw il-politiki ekonomiċi tagħhom u l-isforzi biex jippromwovu impjiegi, tkabbir u investiment. Madankollu, il-monitoraġġ mill-Kummissjoni[9] wera li għad hemm nuqqas ta' responsabbiltà li qed jirriżulta f'livell insodisfaċenti tal-implimentazzjoni tar-rakkomandazzjonijiet speċifiċi għall-pajjiż, partikolarment fil-qasam tar-riformi strutturali. Fil-preżenza tal-isfidi ekonoiċi Ewropej, il-Kummissjoni tikkunsidra li issa huwa ż-żmien xieraq għas-simplifikazzjoni u t-tisħiħ tas-Semestru Ewropew biex isir iktar effettiv billi jkun iktar iffukat, iktar ċar u jkollu rwol politiku akbar fil-futur, f'konformità mal-approċċ integrat ippreżentat fl-Istħarriġ Annwali dwar it-Tkabbir. Semestru Ewropew irriformat għandu jkollu l-għan li jżid l-effikaċja tal-kordinazzjoni tal-politika ekonomika fil-livell tal-UE permezz ta' obbligu akbar ta' rendikont u responsabbiltà mtejba mill-atturi kollha (ara l-Anness).

L-għan tas-simplifikazzjoni tas-Semestru huwa li tiżdied ir-responsabbiltà politika, l-obbligu ta' rendikont u l-aċċettazzjoni tal-proċess, biex tissaħħaħ il-kredibilità u l-kumparabilità madwar l-Istati Membri u biex jgħin biex tittejjeb l-implimentazzjoni tar-rakkomandazzjonijiet speċifiċi għall-pajjiżi.

Id-diskussjoni dwar is-Semestru Ewropew hija importanti wkoll fid-dawl tal-analiżi ta' nofs it-terminu tal-Istrateġija tal-Ewropa 2020 li se tkun ppreżentata fil-ħin għad-diskussjoni fil-Kunsill Ewropew tar-rebbiegħa tal-2015. Wara l-Komunikazzjoni dwar ir-rendikont tal-implimentazzjoni tal-istrateġija Ewropa 2020 maħruġa f'Marzu li għadda[10] u abbażi tal-eżitu tal-konsultazzjoni pubblika, is-sommarju tad-dibattiti fil-Kunsill u l-inputs irċevuti mill-partijiet interessati, il-Kummissjoni qed taħdem fuq l-analiżi ta' nofs it-terminu tal-istrateġija Ewropa 2020 u se tippreżenta l-ideat tagħha kmieni fl-2015.

Biex l-UE tirnexxi fit-twettiq tax-xogħol tagħha u l-isfida għat-tkabbir hemm il-ħtieġa għal kunsens wiesa' fuq id-direzzjoni t-tajba għall-politika u sostennn b'saħħtu mill-partijiet kkonċernati għall-isforzi għar-riforma. Dan ifisser li l-Parlamenti nazzjonali, il-partijiet soċjali u l-biċċa l-kbira tas-soċjetà ċivili kollha jeħtieġu li jkunu iktar involuti fl-implimentazzjoni tal-politiki li jkunu deċiżi fil-livelli tal-UE u dawk nazzjonali. Biex il-Parlamenti nazzjonali jkunu assoċjati iktar mill-qrib mal-proċess, kull sena, il-Parlamenti nazzjonali u l-Parlament Ewropew jiltaqgħu matul il-ġimgħa Parlamentari biex jiddibattu s-Semestru Ewropew bl-involviment tal-Kummissjoni.

Hemm ukoll ħtieġa ċara li jkunu mmonitorjati l-progress soċjali u l-impatt tar-riformi maż-żmien. Diġà beda x-xogħol biex tissaħħaħ id-dimensjoni soċjali tal-Unjoni Ekonomika u Monetarja. Partikolarment, indikaturi tal-impjiegi u dawk soċjali qed ikunu introdotti fil-proċedura ta' żbilanċ makroekonomiku u għandhom jintużaw bis-sħiħ biex jinkiseb fehim aħjar tas-suq tax-xogħol u l-iżviluppi u r-riskji soċjali. Il-Kummissjoni se tiżgura wkoll li l-imsieħba soċjali Ewropej ikunu assoċjati aħjar mal-proċess tas-Semestru Ewropew.

Waqt li l-ewwel ideat se jkunu ttestjati u implimentati għas-Semestru Ewropew tal-2015, proposta ulterjuri se jkunu elaborati fix-xhur li ġejjin bħala parti mix-xogħol fuq l-approfondiment tal-governanza ekonomika, ikkordinat mill-President tal-Kummissjoni, flimkien mal-President tal-Kunsill Ewropew, dak tal-Bank Ċentrali u tal-Grupp tal-Euro.[11]

6.         KONKLUŻJONI

Hemm bżonn urġenti ta' bidu ġdid fit-tfassil tal-politika ekonomika fl-UE. Fl-Istħarriġ Annwali dwar it-Tkabbir għall-2015 il-Kummissjoni tipproponi li l-UE tfittex li tikseb approċċ integrat għall-politika ekonomika mibni madwar tliet pilastri ewlenin, li kollha kemm huma jridu jaġixxu flimkien - biex b'hekk isaħħu l-investiment, jaċċeleraw ir-riformi strutturali u jaraw li jiksbu konsolidament fiskali li jiffavorixxi t-tkabbir.

Bħala kwistjoni ta' prijorità, l-Istati Membri għandhom jendorsjaw il-Pjan ta' Investiment ta' EUR 315-il biljun propost bħala parti mill-Istħarriġ Annwali dwar it-Tkabbir Huma għandhom jimpenjaw ruħhom biex jikkonkludu l-bidliet leġiżlattivi neċessarji meħtieġa biex joħolqu l-Fond ġdid propost sa tmiem Ġunju 2015. L-Istati Membri għandhom ukoll jimpenjaw ruħhom li almenu kumplessivament jirdoppjaw l-istrumenti finanzjarji innovattivi użati fl-implimentazzjoni ta' proġetti skont il-Fondi Ewropej Strutturali u ta' Investiment fit-tliet snin li ġejjin.

Skont is-sitwazzjoni ta' kull Stat Membru, l-approċċ integrat propost għandu jkun implimentat fuq livell nazzjonali billi tkun indirizzata r-riġidità fis-suq tax-xogħol sabiex jittrattaw l-livelli għolja ta' qgħad, itejbu l-flessibilità tas-swieq tas-servizzi u l-prodotti, ifittxu li jiksbu riformi tal-pensjonijiet, itejbu l-kwalità tal-investiment fir-riċerka, l-innovazzjoni, l-edukazzjoni u t-taħriġ u jtejbu l-effiċjenza tal-amministrazzjoni pubblika. L-imsieħba soċjali huma mistiedna biex jikkontribwixxu b'mod attiv fl-aġendi tar-riforma domestika.

Żieda fl-involviment tal-Parlamenti nazzjonali, l-imsieħba soċjali u l-partijiet kkonċernati fis-Semestru Ewropew hija neċessarja biex issaħħaħ ir-responsabbiltà u l-obbligu ta' rendikont nazzjonali. Is-simplifikazzjoni tas-Semestru Ewropew tal-2015 se tkun l-ewwel pass f'din id-direzzjoni.

L-approċċ integrat propost jitlob tmexxija politika mill-Istati Membri, il-Parlament Ewropew u l-Kunsill Ewropew. Il-Kummissjoni se taħdem mal-atturi kollha biex tiżgura li l-Ewropa terġa' titpoġġa fit-triq ta' irkupru ekonomiku sostenibbli.

ANNESS

Simplifikazzjoni u tisħiħ tas-Semestru Ewropew

Is-Semestru Ewropew jirreferi għaċ-ċiklu annwali tal-kordinazzjoni tal-politika ekonomika u baġitarja li fiha l-Istati Membri huma pprovduti bi gwida qabel ma jieħdu deċiżjonijet ta' politika fil-livell nazzjonali. Il-gwida hija pprovduta fil-kuntest tal-Patt ta' Stabbiltà u Tkabbir u l-Proċedura ta' Żbilanċ Makroekonomiku. Is-Semestru Ewropew iservi wkoll biex jimplimenta l-Istrateġija Ewropa 2020.

Is-Semestru Ewropew jibda kull sena bil-pubblikazzjoni mill-Kummissjoni tal-Istħarriġ Annwali dwar it-Tkabbir. Huwa jiddeskrivi l-prijoritajiet ekonomiċi ġenerali għall-UE. Huwa jkun diskuss mill-istituzzjoniijiet l-oħra u jikkontribwixxi għad-diskussjoni li twassal għall-Kunsill Ewropew tar-Rebbiegħa. L-Istati Membri jippreżentaw programmi nazzjonali fir-rebbiegħa ta' kull sena. Il-Kummissjoni mbagħad tipproponi rakkomandazzjonijiet ta' politika speċifiċi għall-pajjiż lil kull Stat Membru, fuq il-bażi tal-valutazzjoni tagħha tas-sitwazzjonijiet ekonomiċi u l-programmi nazzjonali. L-oqsma rilevanti kollha ta' politika huma koperti: riformi fiskali, makroekonomiċi u strutturali Ir-rakkomandazzjonijiet huma diskussi fil-Kunsill  u endorsjati mill-Kunsill Ewropew ta' Ġunju, qabel ma finalment ikunu adottati mill-Kunsill. L-Istati Membri huma mistennija jirriflettu r-rakkomandazzjonijiet fil-pjanijiet baġitarji u politiki tagħhom għas-sena sussegwenti u jimplimentawhom fit-12-il xahar ta' wara.

Waqt li s-Semestru Ewropew saħħaħ il-kordinazzjoni tal-politika ekonomika fil-livell tal-UE, l-implimentazzjoni limitati jew xi kultant saħansitra n-nuqqas ta' implimentazzjoni tar-rakkomandazzjonijiet speċifiċi għall-pajjiż tefgħu dubji fuq l-effikaċja tiegħu. Semestru Ewropew simplifikat u msaħħaħ għandu jibni fuq il-qawwiet eżistenti tal-proċess u jindirizza d-dgħufijiet tiegħu, billi jissimplifika l-istadji varji u l-eżiti tagħhom, billi jtejjeb il-koperazzjoni u d-djalogu mal-Istati Membri, billi jillimita r-rekwiżiti għar-rapportar, billi jtejjeb in-natura multilaterali tal-proċess u billi jsaħħaħ ir-responsaabilità fil-livelli kollha.

L-issimplifikar tal-eżiti tal-Kummissjoni u l-possibilità ta' iktar feedback dwar l-analiżi tal-Kummissjoni. Il-prattika li jkun ippreżenatat l-Istħarriġ Annwali dwar it-Tkabbir u r-Rapport dwar il-Mekkaniżmu ta' Twissija b'mod konġunt fil-ħarifa taħdem sew, minħabba li ż-żewġ dokumenti jikkumplimentaw lil xulxin u huma stipulati fl-approċċ kumplessiv tal-UE għas-sena li ġejja. Madankollu, iż-żewġ dokumenti speċifiċi għall-pajjiż prodotti iktar tard fil-proċess, id-dokumenti ta' Ħidma tal-Persunal li jakkumpanjaw ir-rakkomandazzjonijiet speċifiċi għall-pajjiżi u l-Analiżi Profonda ppreżentati bħala segwitu għar-rapport dwar il-Mekkaniżmu ta' Twissija, huma attwalment ippreżentati f'żewġ punti differenti fir-rebbiegħa. Valutazzjoni ekonomika unika komprensiva għal kull Stat Membru li tipprovdi l-bażi għar-rakkomandazzjonijiet li għandhom ikunu indirizzati lill-Istati Membri jtejbu l-koerenza tal-proċess u jnaqqsu l-piż amministrattiv. Pubblikazzjoni iktar bikrija tad-dokumenti - pereżempju f'Marzu - tippermetti wkoll għal iktar trasparenza u feedback possibbli dwar l-analiżi tal-Kummissjoni.

Simplifikazzzjoni tar-rekwiżiti tar-rapportar tal-Istati Membri Ir-rekwiżiti tar-rapportar tal-Istati Membri għandhom ikunu proporzjonati u jkollhom valur miżjud. Huma għandom isegwu approċċ "għid darba biss", li bih l-informazzjoni disponibbli miġbura permezz ta' dokumenti jew missjonijiet fuq il-post tkun kondiviża b'mod effettiv u riutilizzata, waqt li l-iffokar tax-xogħol fil-livell Ewropew jintefa' fuq l-analizzar u l-aġġornament tagħha. Il-Programm Nazzjonali ta' Riforma jista' jkollhom rwol importanti ta' komunitarizzazzjoni u responsabbiltà jekk ikunu ffukati mill-ġdid, biex jipprovdu input nazzjonali iktar immirat fl-analiżi tal-Kummissjoni fi stadju iktar bikri u jekk il-Parlamenti nazzjonali u l-imsieħba soċjali jkunu involuti fil-formulazzjoni tagħhom.

Titjib tan-natura multilaterali tal-proċess: Ir-responsabbiltà tas-Semestru Ewropew mill-Istati Membri għadha kumplessivament dgħajfa wisq fil-livell nazzjonali, iżda wkoll fil-livell Ewropew. Dan jillimita l-kwalità tad-diskussjoni u sussegwentament l-implimentazzjoni tar-rakkomandazzjonijiet speċifiċi għall-pajjiż. F'oqsma fejn l-għodod ta' sorveljanza huma iktar b'saħħithom, bħal fl-oqfsa tal-finanzi pubbliċi u dawk fiskali, ir-rekord ta' implimentazzjoni hu ogħla b'mod sinifikanti. Proċess issimplifikat għandu jippermetti iktar żmien biex il-gwida tal-UE tkun eżaminata u diskussa. Il-preżentazzjoni bikrija tal-analiżi speċifika għall-pajjiż tal-Kummissjoni tgħin ukoll f'dan ir-rigward. Barra minn hekk, flimkien mal-Presidenza tal-Kunsill, għandu jkun possibbli li jittejjeb il-kontroeżami tal-prestazzjoni u l-politiki matul is-sena. Komparabilità mtejba tal-azzjonijiiet politiki u l-eżiti madwar l-Istati Membri tgħin ukoll il-pressjoni mill-pari u tinforma ulterjorment diskussjonijiet multilaterali tematiki. L-iskambju ta' opinjonijiet dwar il-monitoraġġ tal-Kummissjoni dwar it-twettiq ta' riformi huwa partikolarment importanti fil-kuntest tal-preparazzjoni tad-diskusjoni tal-Kunsill tal-abbozz ta' rakkomandazzjonijiet u fid-dawl tad-dibattitu fil-Kunsill Ewropew ta' Ġunju.

Ftuħ tal-proċess u impenn akbar ma' atturi oħra: Il-leġittimità demokratika tal-proċess tas-Semestru Ewropew xi drabi kienet iddubitata. Fi snin riċenti, il-Kummissjoni gradwalment stabbilit djalogu iktar profond u iktar permanenti mal-Istati Membri, permezz ta' laqgħat bilaterali, diskussjonijiet iktar immirati fil-kumitati tal-Kunsill u missjonijiet tekniċi iktar mifruxa. Kien hemm ukoll titjib fl-involviment parlamentari. Fir-rigward tal-Parlament Ewropew, involviment mill-qrib sar possibbli permezz tad-Djalogu Ekonomiku, introdott mill-leġiżlazzjoni tal-Pakkett ta' sitt proposti leġislattivi, li jjipprovdi għal diskussjonijiet bejn il-Parlament Ewropew min-naħa, u l-Istati Membri, il-Kunsill, il-Kummissjonin, il-Kunsill Ewropew u l-Grupp tal-Euro min-naħa l-oħra. Addizzjonalment, il-Parlament ikollu dibattiti politiki importanti f'mumenti kruċjali tas-Semestru Ewropew. Il-konoxxenza tal-Parlamenti nazzjonali dwar is-Semestru Ewropew żdiedet matul is-snin, grazzi għall-implimentazzjoni tal-Leġiżlazzjoni dwar il-Pakkett ta' żewġ proposti leġiżlattivi u involviment iktar dirett tal-Kummissjoni permezz ta' preżentazzjonijiet u dibattiti. Minkejja tali żviluppi pożittivi, hemm lok għal djalogu usa', mhux biss mal-Parlamenti, iżda wkoll mal-imsieħba soċjali. Pereżempju, fil-futur il-Kummissjoni tista' taħdem mal-Parlament Ewropew u l-imsieħba soċjali fil-livell Ewropew qabel ma jkun ippreżentat l-Istħarriġ Annwali dwar it-Tkabbir u tkompli d-dibattitu wara l-adozzjoni tiegħu. Fuq il-bażi tal-analiżi speċifika għall-pajjiz, il-Kummissjoni tista' taħdem ukoll mal-Parlament Ewropew biex tiddiskuti l-aspetti orizzontali emerġenti u, skont ir-relevanza, mal-imsieħba soċjali biex tirċievi feedback dwar kwistjonijiet topiċi speċifiċi għal pajjiż.

[1]               Ara l-Linji Gwida Politiċi għall-Kummissjoni l-ġdida tal-15 ta’ Lulju 2014: http://ec.europa.eu/about/juncker-commission/docs/pg_en.pdf

[2]               It-Tbassir tar-Rebbiegħa 2014 tal-Kummissjoni, l-4 ta' Novembru 2014: http://ec.europa.eu/economy_finance/publications/european_economy/2014/pdf/ee7_en.pdf

[3]               Kif imħabbar fil-Linji gwida Politiċi għall-Kummissjoni l-ġdida tal-15 ta’ Lulju 2014.

[4]               Dan huwa partikolarment il-każ għall-Italja (-25 %), il-Portugall (-36 %), Spanja (-38 %), l-Irlanda (-39 %) u l-Greċja(-64 %).

[5]               "Mapping the Cost of Non-Europe 2014-19", studju ppubblikat mill-Parlament Ewropew f’Lulju 2014.

[6]               J. Monteagudo, A. Rutkowski, D. Lorenzani, "The economic impact of the Services Directive: A first assessment following implementation", Economic Papers 456, Ġunju 2012, http://ec.europa.eu/economy_finance/publications/economic_paper/2012/pdf/ecp_456_en.pdf

[7]               COM(2012) 261 tat-8 ta' Ġunju 2012.

[8]               COM(2014) 905 tat-28 ta' Novembru 2014.

[9]               Il-valutazzjonijiet mill-Kummissjoni huma ppreżentati fid-dokumenti annwali ta' Ħidma tal-Persunal li jakkumpanjaw ir-rakkomandazzjonijiet speċifiċi għall-pajjiż http://ec.europa.eu/europe2020/making-it-happen/country-specific-recommendations/index_mt.htm

[10]             COM(2014) 130 finali, "Evalwazzjoni tal-istrateġija tal-Ewropa 2020 għal tkabbir intelliġenti, sostenibbli u inklussiv", http://ec.europa.eu/europe2020/pdf/europe2020stocktaking_mt.pdf u http://ec.europa.eu/europe2020/pdf/europe2020stocktaking_mt.pdf

[11]             Kif miftiehem fis-Samit taż-Żona tal-Euro tal-24 ta' Ottubru 2014.