This document is an excerpt from the EUR-Lex website
Document 52013DC0645
REPORT FROM THE COMMISSION TO THE EUROPEAN PARLIAMENT AND THE COUNCIL on the implementation of Council Regulation (EC) No 814/2000 on information measures relating to the common agricultural policy
RAPPORT TAL-KUMMISSJONI LILL-PARLAMENT EWROPEW U LILL-KUNSILL dwar l-implimentazzjoni tar-Regolament tal-Kunsill (KE) Nru 814/2000 dwar il-miżuri ta' tagħrif li għandhom x'jaqsmu mal-politika agrikola komuni
RAPPORT TAL-KUMMISSJONI LILL-PARLAMENT EWROPEW U LILL-KUNSILL dwar l-implimentazzjoni tar-Regolament tal-Kunsill (KE) Nru 814/2000 dwar il-miżuri ta' tagħrif li għandhom x'jaqsmu mal-politika agrikola komuni
/* COM/2013/0645 final */
RAPPORT TAL-KUMMISSJONI LILL-PARLAMENT EWROPEW U LILL-KUNSILL dwar l-implimentazzjoni tar-Regolament tal-Kunsill (KE) Nru 814/2000 dwar il-miżuri ta' tagħrif li għandhom x'jaqsmu mal-politika agrikola komuni /* COM/2013/0645 final */
RAPPORT TAL-KUMMISSJONI LILL-PARLAMENT
EWROPEW U LILL-KUNSILL dwar l-implimentazzjoni tar-Regolament
tal-Kunsill (KE) Nru 814/2000 dwar il-miżuri ta' tagħrif li
għandhom x'jaqsmu mal-politika agrikola komuni I. Daħla Dan ir-rapport jikkonċerna l-implimentazzjoni
tar-Regolament tal-Kunsill (KE) Nru 814/2000 (minn hawn 'il quddiem
"ir-Regolament") għas-snin 2011 u 2012. L-għanijiet tal-miżuri ta'
tagħrif, kif iddefiniti fir-Regolament, huma: –
għajnuna fl-ispjegazzjoni tal-PAK kif ukoll
fl-implimentazzjoni u l-iżvilupp tagħha –
promozzjoni tal-Mudell Ewropew tal-agrikoltura, u
għajnuna biex il-poplu jifhmu –
għoti ta' tagħrif lill-bdiewa u lil nies
oħra li joqogħdu f'żoni rurali –
trawwim tal-kuxjenza tal-pubbliku fir-rigward
tal-kwistjonijiet u l-għanijiet tal-PAK. L-azzjonijiet jinġabru f'żewġ
kategoriji ewlenin: –
Dawk imressqin minn organizzazzjonijiet ta'
partijiet terzi għall-kofinanzjament mill-FAEG (għotjiet) –
Dawk li jsiru fuq inizjattiva tal-Kummissjoni u li
jiġu ffinanzjati b'rata ta' 100 % mill-FAEG (azzjonijiet diretti). Il-Kunsill iddeċieda (l-Artikolu 8
tar-Regolament tal-Kunsill Nru 814/2000) li kull sentejn għandu
jiġi ppreżentat rapport dwar l-implimentazzjoni tar-Regolament
lill-Parlament Ewropew u lill-Kunsill. Dan huwa l-ħames rapport f'dan
ir-rigward[1].
L-annessi msemmija fit-test jinsabu
fid-Dokument ta' Ħidma tal-Persunal tal-Kummissjoni mehmuż. II. IL-BAĠIT Il-baġit li tqiegħed
għad-dispożizzjoni tal-miżuri ta' tagħrif skont
l-intestatura tal-baġit 05 08 06 żdied kien ta'
EUR 8 miljun fl-2011 u ta' EUR 8 miljun fl-2012. It-tqassim
proviżorju bejn l-azzjonijiet li jridu jittieħdu fuq inizjattiva
tal-Kummissjoni u l-azzjonijiet li jridu jiġu kkofinanzjati
(għotjiet) kien kif ġej: 2011: azzjonijiet diretti (EUR 4.5
miljun) (56%) – għotjiet (EUR 3.5 miljun) (44%) 2012: azzjonijiet diretti (EUR 5.8
miljun) (72 %) – għotjiet (EUR 2.2 miljun) (28 %) L-eżekuzzjoni tal-baġit laħqet 100%
għall-2011, u 99% għall-2012 f'termini ta' impenji, u laħqet 80%
f'termini ta' ħlasijiet għall-2011. Iċ-ċifri
aħħarija tal-eżekuzzjoni f'termini ta' ħlasijiet
għall-2012 s'issa ma jistgħux jiġu rrappurtati, billi
l-ħlasijiet b'rabta mal-baġit tal-2012 se jkomplu jsiru sal-31 ta'
Diċembru 2013. III. TQASSIM TAL-AZZJONIJIET
IFFINANZJATI Ir-riforma tal-Politika Agrikola Komuni hija
pprogrammata għal wara l-2013. Wara dibattitu pubbliku wiesa',
fit-18 ta' Novembru 2010 l-Kummissjoni ressqet komunikazzjoni
dwar "Il-KAP lejn l-2020", li tiddettalja alternattivi għall-PAK
tal-futur, u li varat id-dibattitu mal-istituzzjonijiet l-oħra u
mal-partijiet interessati. Fit-12 ta' Ottubru 2011, il-Kummissjoni
ressqet sensiela ta’ proposti legali mfassla biex il-PAK issir politika iktar
effettiva, favur agrikoltura iktar kompetittiva u sostenibbli, u favur
żoni rurali ħajjin u fuq tagħhom. Għaldaqstant, kien hemm
enfażi qawwija, matul il-perjodu ta' rappurtar, fuq azzjonijiet ta'
tagħrif li mmiraw li jqajmu kuxjenza pubblika dwar il-proposti
tal-Kummissjoni biex tirriforma l-Politika Agrikola Komuni, u dwar il-kontribut
ta' dawn il-proposti lejn l-ilħiq tal-isfidi identifikati
fl-istrateġija Ewropa 2020 tal-Kummissjoni. Dan kien l-element ewlieni
tal-istrateġija ta' komunikazzjoni ddefinita mill-Kummissjoni, fil-qafas
tar-Regolament implimentat permezz ta' pjanijiet ta' azzjoni annwali. Din il-prijorità
tirrifletti s-sejbiet ta' għadd ta' sondaġġi tal-Ewrobarometru
dwar l-agrikoltura u l-KAP tul l-aħħar snin: il-prinċipji ta'
gwida u l-miri tal-Politika Agrikola Komuni (PAK) huma appoġġjati
mill-maġġoranza tan-nies, iżda ħafna ma jafux fil-politika
nfisha. Għaldaqstant, l-istrateġija ta' komunikazzjoni timmira li
tqajjem kuxjenza dwar il-PAK, u li turi li l-PAK tindirizza t-tħassib
taċ-ċittadini. Barra minn hekk, il-ħamsin anniversarju
tad-dħul fis-seħħ tal-Politika Agrikola Komuni, u r-rwol tagħha
bħala pilastru tal-integrazzjoni Ewropea, ġew issottolinjati fl-2012
b'azzjonijiet kemm diretti u kemm indiretti. Dan l-anniversarju ttieħed
bħala opportunità biex titqajjem kuxjenza pubblika dwar il-PAK, kemm
fir-rigward tal-kisbiet tagħha, u kemm fir-rigward tal-lok
għall-iżvilupp tagħha fil-ġejjieni, permezz tar-riforma
proposta. L-ippjanar tal-miżuri ta' tagħrif
iffoka fuq is-sodisfazzjoni tal-bżonnijiet ta' gruppi destinatarji
speċifiċi, fuq id-definizzjoni ta' messaġġi xierqa, u fuq
strateġiji ta' tixrid bi qbil mar-Regolament, kif ukoll fuq
il-valutazzjoni u kummenti. Tkattru l-isforzi biex jitkomplew jiżviluppaw
sinerġiji fost l-atturi differenti fil-qasam tal-komunikazzjoni dwar l-agrikoltura,
inklużi l-partijiet interessati u l-awtoritajiet nazzjonali. Kompliet
titfannad il-kooperazzjoni mal-istituzzjonijiet l-oħra tal-UE, kif ukoll
ma' netwerks bħaċ-Ċentri ta' Informazzjoni ta' Europe Direct, u
n-Netwerk Ewropew għall-Iżvilupp Rurali. 1. Għotjiet (azzjonijiet
ta' komunikazzjoni li ttieħdu fuq inizjattiva ta' organizzazzjonijiet li
huma partijiet terzi) Ir-Regolament jipprevedi żewġ tipi
ta' miżuri li għandhom jiġu ffinanzjati b'għotjiet:
miżuri speċifiċi ta' tagħrif, u programmi ta' ħidma
annwali. Miżura speċifika ta' tagħrif tfisser avvenimenti ta'
tagħrif limitati fiż-żmien u fl-ispazju, u implimentati
abbażi ta' baġit uniku. Programm annwali ta' ħidma tfisser
settijiet ta' bejn żewġ u ħames miżuri speċifiċi
ta' tagħrif. Għall-2011 u l-2012, ġie deċiż (bħal
fit-tliet snin ta' qabel) li għall-kofinanzjament jinżammu biss
il-miżuri speċifiċi ta' tagħrif, bil-għan li tiġi
ssimplifikata l-iskema ta' għotjiet, u li tiġi żgurata
l-koerenza bejn l-azzjonijiet ta' tagħrif differenti. Tkattru l-isforzi
biex jitfannad id-djalogu mal-benefiċjarji tal-għotjiet, sabiex
ikomplu jissaħħu l-effettività u s-sinerġija fost l-azzjonijiet
kofinanzjati mwettqa minn partijiet terzi, u l-miżuri mwettqa fuq
l-inizjattiva tal-Kummissjoni (azzjonijiet diretti). B'mod aktar
speċifiku, is-sejħiet għal proposti għal azzjonijiet
kofinanzjati fl-2011 u l-2012 ħeġġew lill-miżuri ta'
tagħrif iqajmu kuxjenza pubblika tal-proposti tal-Kummissjoni
għar-riforma tal-PAK[2]. Ir-rata massima ta' finanzjament
għall-miżuri msemmija hawn fuq hija ta' 50% tal-ispejjeż
eliġibbli. Madankollu, ir-rata tista' tiżdied sa 75% f'każijiet
eċċezzjonali, kif speċifikat fir-Regolament ta' Implimentazzjoni[3], u kif iddefinit fis-sejħa
għal proposti. Għall-2011, ġie deċiż li tinżamm
ir-rata massima ta' finanzjament ta' 50% għall-azzjonijiet kofinanzjati. Għall-2012,
is-sejħa għal proposti pprovdiet għar-rata massima ta' 75%
għall-miżuri ta' tagħrif ta' interess eċċezzjonali.
Madankollu, billi l-ebda proposta ma laħqet il-kriterji stipulati
għal tali miżuri eċċezzjonali, l-ebda azzjoni ma
ngħatat rata ta' finanzjament ta' 75% għall-2012. Fil-qafas tas-sejħa għal proposti
tal-2011, 44 azzjoni speċifika ġew kofinanzjati (b'żewġ
azzjonijiet oħra jintgħażlu mill-Kummissjoni, li ġew
abbandonati mill-benefiċjarji tal-għotja matul il-fażi ta'
implimentazzjoni). L-ammont ta' għotjiet mitlub mingħand
il-Kummissjoni kellu jkun ta' bejn EUR 20 000 u EUR 300 000. Fil-qafas tas-sejħa għal proposti
tal-2012, 11-il azzjoni speċifika ġew kofinanzjati
(intgħażlet ukoll azzjoni oħra, li ġiet abbundunata iktar
tard fis-sena). Ta' min wieħed jinnota li s-sejħa għal proposti
għall-2012 kienet maħsuba biex tagħti prijorità lil miżuri
innovattivi u kreattivi li jista' jkollhom impatt kbir f'għadd ta'
pajjiżi differenti. Għaldaqstant, għall-2012, l-applikanti
ġew mistiedna japplikaw għal għotjiet ta' bejn
EUR 100 000 u EUR 500 000; b'konsegwenza ta' dan,
għadd iżgħar ta' azzjonijiet ikbar ġew kofinanzjati
għal dik is-sena. B'hekk, kollox ma' kollox, fil-perjodu ta'
rappurtar ġew kofinanzjati totali ta' 55 azzjoni. L-għotjiet
ingħataw l-aktar għal kampanji ta' tagħrif, produzzjonijiet
awdjoviżivi, konferenzi, seminars, u għadd ta' proġetti mmirati
li jinfurmaw lit-tfal tal-iskejjel dwar il-PAK. Fil-perjodu ta' rappurtar,
l-għadd sinifikanti ta' kampanji ta' tagħrif irrifletta l-enfażi
kontinwa, dis-sejħiet għal proposti, fuq
it-tħeġġiġ ta' azzjonijiet kofinanzjati li jużaw
taħlita ta' għodod ta' komunikazzjoni bil-għan li jilħqu
l-massimu ta' impatt u l-usa' udjenza possibbli. Kif issemma qabel, il-50
anniversarju tal-PAK ġie ssottolinjat fis-sejħiet għal proposti
bħala mod biex ikunu infurmati ċ-ċittadini dwar il-kontribut
tal-PAK lejn l-integrazzjoni tal-UE u r-rwol tagħha fl-indirizzar ta'
sfidi ġodda. It-tipi ta' benefiċjarji ewelnin
tal-għotjiet kienu kif ġej: organizzazzjonijiet ta' azjendi agrikoli
professjonali, organizzazzjonijiet / għaqdiet oħra mhux governattivi,
amministrazzjonijiet pubbliċi (lokali, reġjunali, u awtoritajiet
nazzjonali), u organizzazzjonijiet tal-midja. Fil-passat, l-organizzazzjonijiet
soċjo-professjonali attivi fl-agrikoltura u fl-iżvilupp rurali
f'livell nazzjonali (spiss membri ta' korpi fil-livell tal-UE) kienu jiffurmaw
parti kbira fil-listi tal-benefiċjarji. Barra minn hekk, żdiedu
l-parteċipazzjoni tagħhom, fost l-oħrajn, organizzazzjonijiet
tal-midja, –speċjalment is-settur awdjoviżiv–. F'għadd ta'
azzjonijiet kofinanzjati, il-benefiċjarji użaw il-possibbiltà li
jinvolvu lil aktar organizzazzjonijiet bħala msieħba
fl-eżekuzzjoni tal-proġetti, pereżempju fl-azzjonijiet
implimentati minn organizzazzjonijiet tal-midja, spiss daħlu bħala
msieħba jew koorganizzaturi organizzazzjonijiet tal-azjendi agrikoli jew
tipi oħra ta' għaqdiet jew NGOs. L-Anness 1 jagħti daqqa t'għajn
ġenerali lejn l-għotjiet fil-perjodu ta' rappurtar. Id-dettalji dwar
l-għotjiet individwali jinsabu fis-sit elettroniku Europa:
http://ec.europa.eu/agriculture/grants-for-information-measures/index_en.htm L-applikazzjonijiet ġew ivvalutati skont
kriterji stretti ta' eliġibbiltà, esklużjoni, selezzjoni u
għoti, kif stipulat fis-sejħa għal proposti. Dan kien bi qbil
mar-Regolament, u rrifletta l-mira tal-Kummissjoni li tikseb trattament ugwali
u kompetizzjoni ġusta fost l-applikanti. Fil-perjodu ta' rappurtar, baqa' jiżdied
l-għadd ta' applikazzjonijiet b'suċċess mill-Istati Membri
tal-UE12; 37.3% mill-għadd totali ta' għotjiet mogħtija fl-2011
u l-2012 ġew allokati lil organizzazzjonijiet f'dawk l-Istati Membri. Bħalma ġara fl-imgħoddi, matul il-perjodu
tar-rappurtar baqa' jkun hemm livell għoli ta' interess min-nofsinhar
tal-UE. It-tabella ta' hawn taħt tindika
l-għadd ta' applikazzjonijiet milqugħa u aċċettati mqassmi
skont l-Istat Membru matul il-perjodu ta' rappurtar. Tabella I Importanti li wieħed jisħaq li, kif
sar fl-imgħoddi, għadd kunsiderevoli ta' azzjonijiet kofinanzjati
laħqu udjenza usa' li tmur lil hinn mill-parteċipanti immedjati,
bis-saħħa tal-effett ta' multiplikazzjoni tal-istampa u tal-midja
speċjalizzati, kif ukoll bis-saħħa tal-użu akbar
tal-internet u n-netwerks soċjali bħala għodod għat-tixrid. 2. Azzjonijiet ta'
komunikazzjoni li ttieħdu fuq inizjattiva tal-Kummissjoni Fil-perjodu ta' rappurtar, bħal fis-snin
ta' qabel, kien hemm għadd sinifikanti ta' azzjonijiet ta' komunikazzjoni
li twettqu fuq l-inizjattiva tal-Kummissjoni. Dawn kienu ta' spiss implimentati
b’għajnuna teknika esterna. Madwar 64% tal-baġit ġie allokat
għal dawn il-miżuri fil-perjodu 2011-2012. L-Anness II jipprovdi d-dettalji dwar
l-inizjattivi tal-Kummissjoni f'dan il-perjodu, inklużi l-ispejjeż
rispettivi. Parteċipazzjoni f'fieri L-enfażi tal-Kummissjoni fuq
"id-dimensjoni lokali", kif ukoll fuq it-tqajjim tal-kuxjenza
taċ-ċittadini fir-rigward tal-PAK u tal-UE b'mod ġenerali,
kienet kruċjali fl-organizzazzjoni tal-padiljuni tal-Kummissjoni f'fieri fis-snin
2011 u 2012. L-attivitajiet fil-fieri komplew jimmiraw il-pubbliku
ġenerali u l-partijiet interessati, u l-kampanja tal-ħamsin
anniversarju ġiet sfruttata, fost l-oħrajn, biex tikkomunika
lill-pubbliku ġenerali li l-PAK u l-iżvilupp rurali huma relevanti
għas-soċjetà kollha. Il-parteċipazzjoni fil-fieri kompliet
tipprovdi pjattaforma għad-djalogu mal-bdiewa, mal-partijiet interessati u
mal-pubbliku ġenerali dwar kwistjonijiet ta' politika. L-azzjonijiet
xeħtu dawl fuq proġetti ta' żvilupp rurali b'suċċess u
fuq il-politika ta' kwalità tal-UE, filwaqt li ġew organizzati
attivitajiet ta' informazzjoni u edukazzjoni maħsuba biex jiġbdu
lill- udjenzi żgħażagħ u lill- pubbliku
ġenerali . Konferenzi Matul dan il-perjodu, il-konferenzi pprovdew
forum importanti għad-djalogu u għall-konsultazzjoni mal-partijiet
interessati dwar aspetti tar-riforma tal-Politika Agrikola Komuni.
Pereżempju, il-konferenza ta' Lulju 2012 "Il-PAK lejn l-2020 -
niżnu s-sitwazzjoni mas-soċjetà ċivili" ġiet
organizzata bħala segwiment għall-konsultazzjoni wiesgħa, varata
fl-2010, dwar l-isfidi li qiegħda tħabbat wiċċha
magħhom l-agrikoltura Ewropea. Din il-konferenza kienet opportunità biex
is-settur mhux gvernamentali, ir-rappreżentanti tal-Istati Membri u
l-istituzzjonijiet tal-UE jiddibattu u jiddiskutu l-proposti
leġiżlattivi għal riforma tal-PAK għal wara l-2013,
adottati mill-Kummissjoni t-12 ta' Ottubru 2011. Għadd ta'
avvenimenti ġew iddisinjati wkoll biex jisħqu fuq il-prijorità mogħtija
lit-tisħiħ tal-innovazzjoni u t-twassil tar-riċerka fl-agrikoltura
Ewropea. Dan inkluda konferenza-dibattitu mtellgħa bi sħab
mal-Presidenza tal-UE u l-Parlament Ewropew f'Diċembru 2011; kif ukoll
konferenza oħra ta' livell għoli f'Marzu 2012. F'konferenza
oħra, tal-20 ta' April 2012, madwar 400 parti interessata esploraw
modi u mezzi biex jitrawwem u jiġi sfruttat il-potenzjal tal-agrikoltura
lokali, u tal-ktajjen qosra tal-provvista, biex jippromwovu l-impjieg u
t-tkabbir fiż-żoni rurali. Dawn l-avvenimenti kkontribwew
għall-proċess tal-komunikazzjoni, l-implimentazzjoni u
l-iżvilupp tal-politika agrikola, bi qbil mar-Regolament. L-użu
tat-teknoloġija tal-istreaming fuq l-internet iggarantixxa tixrid wiesa'
tal-proċedimenti tal-konferenza. Pubblikazzjonijiet Fil-perjodu ta' rappurtar,
il-pubblikazzjonijiet komplew jirriflettu l-programm leġiżlattiv.
Fosthom kien hemm testi dwar il-proposti għar-riforma tal-PAK u dwar
il-politika ta' kwalità. Bil-ħsieb li jikkoinċidu mal-kampanja tal-50
anniversarju tal-PAK, fl-2012 ġew prodotti għadd ta'
pubblikazzjonijiet pedagoġiċi biex jiġbdu l-attenzjoni tat-tfal
tal-iskejjel u dik tal-pubbliku ġenerali. Dawn il-pubblikazzjonijiet
inxterdu b'mod wiesa' fl-Istati Membri, u b'hekk il-kampanju tal-anniversarju
għenet biex tqajjem kuxjenza dwar il-Politika Agrikola Komuni u
l-iżvilupp rurali. Websajt Is-sit elettroniku "Agrikoltura u
Żvilupp Rurali" baqa' jiżviluppa matul il-perjodu ta' rappurtar,
speċifikament bħala sors importanti ta' tagħrif
speċjalizzat dwar il-PAK u l-iżvilupp rurali. Is-sit żvolġa
rwol importanti wkoll fil-proċess ta' konsultazzjoni mal-partijiet
interessati u mal-pubbliku ġenerali fir-rigward tad-direzzjoni li
għandha taqbad il-politika agrikola fil-ġejjieni. Saru żewġ
konsultazzjonijiet fuq l-internet (waħda dwar l-informazzjoni u
l-promozzjoni għall-prodotti agrikoli tal-UE, u l-oħra dwar
ir-rieżami tar-reġim tal-UE dwar il-frott u l-ħaxix). Il-fehmiet
espressi tqiesu jew qegħdin jitqiesu fl-iżvilupp tal-politika
rispettiva. L-abbonamenti tal-bullettini u r-rapporti fil-qosor
tal-"Monitoring Agri-Trade Policy" (MAP) telgħu
għal 5 150, dawk tal-aġġornamenti
tal-"Agricultural commodity price dashboard" bħalissa laħqu
l-1 320, u dawk tar-rapporti fil-qosor tal-"Agricultural Policy
Perspectives" huma 1 180. Bħalissa qiegħda titlesta
l-migrazzjoni lejn verżjoni totalment ġdida tas-sit elettroniku
(disinn korporattiv ġdid, teknoloġija għall-ġestjoni
tal-kontenut elettroniku, u kontenut semplifikat u aġġornat, bi qbil
mal-inizjattiva tal-Kummissjoni favur ir-razzjonalizzazzjoni u
l-ottimizzazzjoni tas-siti elettroniċi). Stħarriġ tal-opinjonijiet F'Mejju 2011, sar stħarriġ
speċjali tal-Ewrobarometru fuq għadd limitat ta' kwistjonijiet
fil-kuntest tat-tħejjija għall-proposti leġiżlattivi tar-riforma
tal-PAK, inkluża l-kwistjoni tat-trasparenza fir-rigward
tal-benefiċjarji tal-pagamenti tal-PAK. F'Marzu 2012, sar
stħarriġ ieħor dwar l-atteġġjamenti
taċ-ċittadini lejn is-sigurtà tal-ikel, il-kwalità tal-ikel, u
l-fehmiet dwar ir-rabta bejn l-agrikoltura u l-preżervazzjoni tan-natura u
tal-kampanja. Żjarat Fil-perjodu 2011-2012, intlaqgħu
żjarat ta' gruppi magħmulin prinċipalment minn bdiewa,
rappreżentanti tal-bdiewa, studenti, rappreżentanti reġjunali u
lokali, ġurnalisti u akkademiċi. L-għan ta' dawn iż-żjarat
kien li jingħataw spjegazzjoni u fehim iddettaljat liċ-ċittadini
dwar il-Politika Agrikola Komuni, inkluż l-iżvilupp rurali, kif ukoll
dwar il-loġika wara r-riforma tagħha. Azzjonijiet fil-midja Matul il-perjodu ta' rappurtar, kien hemm
enfażi qawwija fuq it-tkomplija tal-iżvilupp u t-tfannid
tal-konnessjonijiet mal-midja, fid-dawl tal-importanza tagħha bħala
effett multiplikatur fil-qasam tal-komunikazzjoni. It-twaqqif ta' pjattaforma
elettronika (Ag-press.eu") fl-2011 jagħti lok għall-interazzjoni
ta' kuljum bejn is-servizzi relevanti tal-Kummissjoni u l-ġurnalisti
interessati fl-agrikoltura mal-UE kollha. In-netwerk Ewropew Ag-Press
għall-ġurnalisti fil-qasam tal-agrikoltura llum għandu mat-800
ġurnalist membru. Din il-pjattaforma elettronika, li tiġi
aġġornata kuljum, tiffaċilita l-aċċess
għall-aħbarijiet u informazzjoni dwar kwistjonijiet agrikoli, l-aktar
mill-Kummissjoni Ewropea, iżda wkoll mill-istituzzjonijiet l-oħra
tal-UE. Il-pjattaforma tippermetti wkoll l-iskambju ta' esperjenzi bejn
il-ġurnalisti nfushom. Permezz ta' azzjonijiet bħal żjarat ta'
informazzjoni f'azjendi agrikoli għall-ġurnalisti, seminars u
żjarat ta' studju fi Brussell u fl-Istati Membri, ir-rapprenżentanti
tal-midja jiġu infurmati dwar il-PAK, kif ukoll dwar id-diversità tal-agrikoltura
Ewropea. F'dan il-perjodu wkoll, ġiet
intensifikata l-attività fil-midja soċjali b'rabta mal-agrikoltura u
l-iżvilupp rurali. IV. KAMPANJI TA' KOMUNIKAZZJONI
DWAR KWISTJONIJIET EWLENIN Saret referenza fir-rapporti preċedenti
għad-dibattitu pubbliku wiesa' dwar il-ġejjieni tal-politika tal-UE
għall-azjendi agrikoli, kif ukoll għal azzjonijiet ta' komunikazzjoni
sussegwenti, sabiex jiġġeneraw djalogu miftuħ fejn il-PAK
ġiet spjegata u diskussa mal-pubbliku ġenerali, mal-partijiet
interessati, u l-bqija. Fil-perjodu ta' rappurtar, komplew l-isforzi biex
jittejjeb il-fehim dwar il-Politika Agrikola Komuni u l-iżvilupp rurali
min-naħa tal-partijiet interessati u l-pubbliku ġenerali, permezz ta'
kampanji ta' komunikazzjoni speċifiċi. Pereżempju, l-adozzjoni mill-Kummissjoni
ta' proposti leġiżlattivi dwar ir-riforma tal-PAK f'Ottubru 2011
ġiet akkumpanjata minn sessjonijiet ta' tagħrif mal-istampa u
mal-partijiet interessati fis-27 Stat Membru tal-UE. Dawn is-sessjonijiet ta'
tagħrif ġibdu aktar minn 2 500 rappreżentant tal-midja
(midja speċjalizzata u reġjunali, televixin u radju nazzjonali) u
parti interessata (entitajiet tas-soċjetà ċivili,
amministrazzjonijiet reġjunali u nazzjonali). B'hekk ġiet iġġenerata
koperatura fil-midja konsiderevoli (b'aktar minn 500 artiklu tal-istampa fl-24
siegħa ta' wara l-avveniment). Dan kien eżerċizzju importanti
ħafna fil-komunikazzjoni fil-livell lokali, mal-partijiet interessati
kollha, inkluż il-pubbliku ġenerali. Azzjoni importanti oħra kienet
il-kampanja tal-midja organizzata wara t-tifqigħa tal-e-coli fl-2011, biex
uriet l-appoġġ tal-Kummissjoni għall-isforzi tal-produtturi biex
jerġgħu jiksbu l-fiduċja tal-konsumaturi fil-konsum tal-frott u
l-ħaxix. Il-kampanja, li saret mal-UE kollha fuq l-istampa u t-televixin,
kienet tikkonsisti f'riklami f'pubblikazzjoni tal-istampa f'kull Stat Membru, u
f'pakkett ta' aħbarijiet bil-vidjo għat-televixin. Huwa stmat li
l-kampanja laħqet madwar 37 miljun ruħ. Kif issemma aktar 'il fuq, it-tema
tal-ħamsin anniversarju tad-dħul fis-seħħ tal-Politika
Agrikola Komuni kellha preżenza prominenti fl-azzjonijiet ta' tagħrif
matul l-2012. Fil-perjodu ta' rappurtar, it-tħejjija u l-implimentazzjoni
tal-kampanja ta' komunikazzjoni CAP@50 kienu mmarkati minn grad sostanzjali ta'
kooperazzjoni bejn il-Kummissjoni, l-istituzzjonijiet l-oħra tal-UE,
l-Istati Membri u l-partijiet interessati. Din il-kampanja serva ta' katalist
sinifikanti għall-azzjonijiet ta' tagħrif dwar il-PAK mal-UE kollha;
saru madwar 150 avveniment irrelatat fl-Istati Membri matul is-sena,
imtellgħin mill-awtoritajiet nazzjonali u reġjonali u
mill-għaqdiet tas-soċjetà ċivili, bis-saħħa
tal-ħolqien ta' sit elettroniku ddedikat u pjattaforma interattiva li
inkludiet, fost l-oħrajn, materjal awdjoviżiv u ta' arkivju, u pubblikazzjonijiet
u materjal promozzjonali dwar il-kontribut storiku tal-PAK lejn il-kostruzzjoni
tal-Ewropa, kif ukoll dwar ir-rwol tiegħu fl-indirizzar ta' sfidi attwali
u futuri. Fost l-avvenimenti ewlenin tal-anniversarju,
wirja interattiva bl-isem – The CAP Past Present and Future –, immirata
lejn il-pubbliku ġenerali, daret ma' xi 20 Stat Membru, kif ukoll ma'
istituzzjonijiet oħrajn tal-UE, bejn April u Diċembru tal-2012. Tul
l-24 tappa, il-wirja ġibdet 'il fuq minn 60 000 ruħ. Azzjonijiet oħra relatati tal-CAP@50
inkludew is-sehem f'avvenimenti popolari bħal A Farm in the City,
organizzata fi Brussell f'Settembru 2012. 5 000 ruħ żaru
l-padiljun tal-Kummissjoni, u 20 000 ruħ ġew esposti
għall-messaġġi ewlenin tal-avveniment (permezz ta' promozzjoni
bil-midja). Fl-2012, tvarat l-ewwel edizzjoni tal-Premjijiet tal-Komunikazzjoni
tal-PAK, għall-eżempji tal-aqwa prassi fil-komunikazzjoni tal-PAK;
l-għan kien li jiġu identifikati miżuri partikularment
effettivi, u li jitrawwem l-iskambju tal-aqwa prassi fost il-multiplikaturi u
l-imsieħba tan-netwerks varji. V. IL-PROPORZJON TAN-NEFQA
(IMPENJI U PAGAMENTI) BEJN L-AZZJONIJIET KOFINANZJATI FUQ L-INIZJATTIVA TA'
PARTIJIET TERZI (GĦOTJIET) U AZZJONIJIET TA' TAGĦRIF FUQ
L-INIZJATTIVA TAL-KUMMISSJONI || || || 2011 || 2012 || Għotjiet || Azzjonijiet diretti || Totali || Għotjiet || Azzjonijiet diretti || Totali Tqassim proviżorju tal-baġit || 3.500.000 || 4.500.000 || 8.000.000 || 2.200.000 || 5.800.000 || 8.000.000 Impenji f'EUR || 3.507.228 || 4.480.063 || 7.987.291 || 2.197.904 || 5.707.754 || 7.905.658 % ta' impenn || 100% || 100% || 100% || 100% || 98% || 99% Pagamenti (**) f'EUR || 2.440.123 || 3.939.636 || 6.379.759 || (*) || (*) || (*) % ta' żborż vs impenn || 70% || 88% || 80% || (*) || (*) || (*) (*) Ċifri s'issa
mhux disponibbli – il-biċċa l-kbira mill-azzjonijiet għadhom ma
tħallsux (**) Il-pagamenti
msemmija fit-tabella ma jirrappreżentawx l-eżekuzzjoni tas-sena N
biss, iżda jiġbru flimkien il-pagamenti mwettqa fis-snin N u N+1 fuq
l-impenji tas-sena N. Ta' min wieħed jinnota li sar titjib
fir-rati ta' impenn u ta' żborż meta mqabbla mal-perjodu ta'
rappurtar ta' qabel, fejn ir-rata medja ta' impenn tul it-tliet snin
laħqet 85% għall-għotjiet u 96% għall-azzjonijiet diretti,
u r-rata medja ta' pagament laħqet 65% u 86% għall-għotjiet u
l-azzjonijiet diretti, rispettivament. Il-pagamenti dejjem ikunu aktar baxxi
mill-ammonti impenjati oriġinalment. Fil-każ tal-għotjiet, dan
huwa minħabba l-fatt li, l-ewwel nett, f'ħafna każijiet
l-ispejjeż aħħarija tal-azzjonijiet ikunu iktar baxxi milli kif
kien previst fil-bidu mill-benefiċjarju, u t-tieni nett, minħabba li
mhux l-ispejjeż kollha ddikjarati mill-benefiċjarji jistgħu
jitqiesu eliġibbli. Fil-każ tal-azzjonijiet meħudin fuq
l-inizjattiva tal-Kummissjoni, id-differenzi huma iżgħar, u huma
dovuti għall-impenji, li jqisu n-nefqa kollha prevedibbli u possibbli - u
li kultant jispiċċaw ikunu aktar baxxi milli kien ġie previst
fil-bidu, billi qed isir iffrankar -, u li jqisu wkoll l-aktar miżuri
kosteffettivi mwettqa tul l-implimentazzjoni tal-proġett. VI. KONKLUŻJONI L-azzjonijiet ta' komunikazzjoni marbutin
mal-PAK fil-perjodu ta' rappurtar kienu jimmiraw li jgħarrfu lill-pubbliku
ġenerali u l-partijiet interessati, u li jqajmu l-kuxjenza tiegħu,
dwar il-kisbiet tal-Politika Agrikola Komuni fit-twassil ta' settur agrikolu
modern, sostenibbli u effiċjenti fl-Ewropa. Dawn l-azzjonijiet saħqu
wkoll fuq l-importanza tar-riforma tal-PAK, sabiex jitkompla l-proċess
lejn il-garanzija ta' politika agrikola aktar ġusta u aktar
ekoloġika, mgħammra biżżejjed biex tikkontribwixxi b'mod
attiv għall-kisba tal-għanijiet tal-istrateġija
Ewropa 2020. Fit-twettiq ta' dawn l-azzjonijiet, tkattru l-isforzi biex
jiġu promossi sinerġiji aktar b'saħħithom bejn
l-azzjonijiet ta' komunikazzjoni tal-Kummissjoni, tal-istituzzjonijiet
l-oħra l-UE, tas-soċjetà ċivili, u tal-Istati Membri. [1] COM (2003)235
finali, 8.5.2003; COM (2007)324 finali, 13.6.2007; COM (2009)237
finali, 20.5.2009; COM (2011)294 finali, 25.5.2011. [2] ĠU
C 231/8, 27.8.2010; ĠU C 212/22, 19.7.2011. [3] Ir-Regolament
tal-Kummissjoni (KE) Nru 2208/2002 tat-12 ta’ Diċembru 2002 li
jistabbilixxi r-regoli dettaljati għall-applikazzjoni tar-Regolament
tal-Kunsill (KE) Nru 814/2000 dwar miżuri ta’ informazzjoni
inkonnessjoni mal-politika agrikola komuni (ĠU L 337/21, 13.12.2002).