13.9.2012   

MT

Il-Ġurnal Uffiċjali tal-Unjoni Ewropea

C 277/125

—

ifakkar dwar l-importanza tal-politika Ewropea fil-qasam tat-trasport, l-enerġija u t-telekomunikazzjoni bħala strument ewlieni biex tiġi żgurata ż-żieda fil-kompetittività tal-bliet u r-reġjuni u biex tikkontribwixxi għall-ksib tal-koeżjoni ekonomika, soċjali u territorjali fl-UE;

—

jappoġġja l-ħolqien tal-istrument il-ġdid tal-Faċilità “Nikkollegaw l-Ewropa” (FNE) bħala qafas legali komuni u bħala strument uniku ta’ finanzjament għas-settur tat-trasport, l-enerġija u t-telekomunikazzjoni;

—

jilqa' l-enfasi tagħha li tindirizza l-konnessjonijiet neqsin, it-tneħħija tal-punti ta’ konġestjoni u l-provvista ta’ konnessjonijiet transkonfinali adegwati kif ukoll l-introduzzjoni ta’ strumenti finanzjarji innovattivi, sabiex jiġi żgurat l-ikbar effett ta’ lieva tal-infiq pubbliku u ċ-ċittadini tal-UE jingħataw valur miżjud ogħla;

—

jappella sabiex l-implimentazzjoni ssir f'kooperazzjoni mill-qrib mal-Istati Membri, l-awtoritajiet lokali u reġjonali u l-atturi fil-livell lokali b'konformità mal-prinċipju tas-sussidjarjetà;

—

iqis li l-implimentazzjoni tal-FNE għandha tkun konformi wkoll mal-għanijiet kemm tal-Istrateġija Ewropa 2020 kif ukoll il-politika ta’ Koeżjoni, u komplementari u konsistenti mal-Fondi tal-Politika ta’ Koeżjoni;

—

jinsisti li l-fondi jiġu allokati b'mod ġust bejn l-Istati Membri u r-reġjuni kollha tal-UE filwaqt li jitqiesu ċ-ċirkostanzi territorjali speċifiċi tal-UE;

—

jitlob lill-Kummissjoni Ewropea tiċċara li l-EUR 10 biljun li għandhom jiġu trasferiti mill-Fond ta’ Koeżjoni jkunu jirrispettaw ir-Regolament għall-Fond tal-Koeżjoni, inklużi l-kwoti nazzjonali li japplikaw għall-Istati Membri.

Relatur

Is-Sur ŽAGAR (SI/PPE), Sindku ta’ Slovenska Bistrica

Dokumenti ta’ referenza

1.

ifakkar li l-politika Ewropea dwar it-trasport, it-telekomunikazzjonijiet u l-faċilitajiet diġitali għandha titfassal bħala strument ewlieni maħsub biex jiżgura ż-żieda tal-kompetittività tal-bliet u r-reġjuni, il-moviment liberu tal-merkanzija u l-persuni, l-integrazzjoni tas-Suq Uniku u l-koeżjoni ekonomika, soċjali u territorjali tal-UE u l-konnessjoni tagħha mal-bqija tad-dinja;

2.

jilqa' r-rwol potenzjali tal-Faċilità “Nikkolegaw l-Ewropa” sabiex issaħħaħ it-tkabbir u l-impjiegi u tagħmel l-Ewropa iktar kompetittiva (1) u jappoġġja l-enfasi tal-Kummissjoni fuq il-ħolqien tal-konnessjonijiet neqsin, it-tneħħija tal-punti ta’ konġestjoni u l-provvista ta’ konnessjonijiet transkonfinali adegwati;

3.

jappoġġja l-ħolqien tal-istrument il-ġdid tal-Faċilità “Nikkollegaw l-Ewropa” (FNE) bħala qafas legali komuni u bħala strument ta’ finanzjament għas-setturi tat-trasport, l-enerġija u t-telekomunikazzjonijiet;

4.

jappella sabiex l-implimentazzjoni ssir f'kooperazzjoni mill-qrib mal-Istati Membri, l-awtoritajiet lokali u reġjonali u l-atturi fil-livell lokali b'konformità mal-prinċipju tas-sussidjarjetà;

5.

jappella għal approċċ aktar trasparenti, koerenti u semplifikat lejn il-finanzjament tal-UE li jkun kapaċi jattira l-finanzjament tas-settur privat li llum il-ġurnata huwa neċessarju biex jintlaħqu l-għanijiet tal-UE;

6.

iqis li l-implimentazzjoni tal-FNE għandha tikkontribwixxi wkoll għat-tisħiħ tal-għanijiet ekonomiċi, soċjali u territorjali tal-politika ta’ koeżjoni u li għandha tkun interkonnessa mal-fondi tal-politika ta’ koeżjoni sabiex ikunu kumplementari għal xulxin u konsistenti bejniethom;

7.

jilqa' l-proposti tal-Kummissjoni sabiex talloka EUR 10 biljun mill-Fond ta’ Koeżjoni għall-FNE sabiex tappoġġja l-implimentazzjoni kkoordinata ta’ proġetti dwar l-infrastruttura tat-trasport fuq in-netwerk ewlieni TEN-T fl-Istati Membri ta’ Koeżjoni; jenfasizza l-ħtieġa li jiġu rrispettati, kemm jista' jkun, l-allokazzjonijiet nazzjonali skont il-Fond ta’ Koeżjoni, sabiex jiġu żgurati kundizzjonijiet ta’ appoġġ finanzjarju favorevoli, kif stabbilit mill-Fond ta’ Koeżjoni, għat-tipi kollha ta’ proġetti eliġibbli, inklużu proġetti transkonfinali dwar it-toroq;

8.

iqis li l-proġetti tal-FNE għandhom isegwu l-prijoritajiet ta’ tkabbir intelliġenti, inklużiv u sostenibbli – l-għanijiet tal-Istrateġija Ewropa 2020;

9.

jisħaq fuq id-diffikultà li jiffaċċjaw ħafna Stati Membru biex jiżviluppaw waħedhom proġetti kumplessi ta’ infrastruttura tat-trasport transkonfinali, filwaqt li fil-livell tal-UE hemm volum kritiku ta’ domanda għal aktar sinerġiji bejn diversi programmi ta’ finanzjament u setturi ta’ politika li jridu jiżguraw l-ogħla effett ta’ lieva tal-infiq pubbliku li jippreżenta valur miżjud ogħla għaċ-ċittadini tal-UE;

10.

jappoġġja l-ħolqien tal-istrument il-ġdid tal-Faċilità “Nikkollegaw l-Ewropa” (FNE) bħala qafas legali komuni u bħala strument uniku ta’ finanzjament għas-settur tat-trasport, l-enerġija u t-telekomunikazzjoni;

11.

jenfasizza li fil-kuntest tal-proġetti tat-trasport, għandha titqies l-interkonnessjoni tagħhom ma’ forom oħra ta’ trasport li jinvolvu punti fokali, pereżempju t-trasport bl-ajru, il-metro, eċċ.; għandu jiġi pprovdut aċċess għal netwerk u servizzi rapidi ta’ broadband, b'mod partikolari f'żoni li mhumiex attraenti mil-lat kummerċjali, bħalma huma ż-żoni rurali b'densità tal-popolazzjoni baxxa, fejn it-Teknoloġiji tal-Informazzjoni u tal-Komunikazzjoni (ICT) jistgħu jagħmluha aktar faċli li jiġu pprovduti servizzi pubbliċi u jikkontribwixxu għall-preservazzjoni tal-popolazzjoni rurali u għall-koeżjoni territorjali;

12.

jixtieq li jiġi ċċarat it-trattament tar-reġjuni li għandhom indiċi ta’ żvilupp differenti sabiex jirriflettu sitwazzjonijiet speċifiċi territorjali tal-UE, inklużi reġjuni bi żvantaġġi demografiċi u naturali gravi u permanenti u d-dimensjoni ultraperiferika, u jkopru r-reġjuni tal-Ewropa b'mod bilanċjat;

13.

jappoġġja l-isforzi favur il-promozzjoni ta’ sistemi tat-trasport nodfa u sostenibbli – speċjalment it-trasport bil-ferrovija u bil-baħar – li huma modi effikaċi u kompetittivi li għandhom jingħataw infrastruttura adegwata u servizzi organizzati. Sabiex jiġi żgurat li dawn il-modi ta’ trasport sostenibbli jaħdmu tajjeb, hemm bżonn ukoll li jiġu żviluppati nodi loġistiċi interni li jippermettu l-aqwa skambju intermodali possibbli u l-effikaċja tas-sistema kollha kemm hi;

14.

huwa tal-fehma li jeħtieġ li tiġi kkunsidrata s-sitwazzjoni partikolari ta’ firxa ta’ żoni differenti fl-UE, inklużi r-reġjuni fl-Istati Membri l-ġodda b'infrastruttura li s'issa ġiet żviluppata b'mod dgħajjef u kienet nieqsa minn finanzjament adegwat, b'mod partikolari fejn dan iġib miegħu valur miżjud reġjonali kbir, pereżempju, għat-trasport transkonfinali;

15.

jisħaq fuq il-bżonn li jiġu promossi l-interkonnessjoni tan-netwerks tal-enerġija u l-funzjonament tas-suq intern tal-enerġija fl-UE u jirrikonoxxi l-indipendenza tal-UE fil-qasam tal-enerġija bħala waħda mill-prijoritajiet ewlenin ta’ dan l-istrument u li tiġi xprunata s-sigurtà tal-provvista;

16.

jisħaq fuq il-fatt li l-investimenti fin-netwerk tat-telekomunikazzjoni broadband u fil-pjattaformi tal-infrastruttura ta’ servizzi diġitali huma essenzjali biex tinkiseb l-Aġenda Diġitali tal-UE u biex jingħata kontribut għall-għanijiet tal-UE 2020, kif ukoll biex jiġu pprovduti s-servizzi pubbliċi Ewropej;

17.

jilqa' l-ħolqien tal-istrument tal-FNE u r-riżorsi finanzjarji tiegħu li m'għandhux ikun hemm dubji dwarhom, sabiex jiġi żgurat FNE effikaċi u b'effett ta’ lieva fuq sorsi oħra ta’ finanzjament pubbliku u privat, iżda jwissi kontra kull sforz li jista' jkun ta’ ħsara għall-Fondi Strutturali;

18.

minħabba l-qagħda tas-swieq finanzjarji, jinsab imħasseb dwar l-impatt u l-effett ta’ lieva mistennijin tal-mekkaniżmi ta’ finanzjament tal-FNE fuq il-finanzjament pubbliku reġjonali u lokali ppjanat għall-investiment fl-infrastruttura;

19.

jinsisti li l-finanzjament għandu jiġi allokat b'mod ġust bejn l-Istati Membri u r-reġjuni kollha, u jqis il-kwalità u l-valur miżjud tal-proġetti finanzjati mill-FNE fin-netwerks tat-trasport, l-enerġija u t-telekomunikazzjoni għar-reġjuni l-iktar dgħajfa, inklużi dawk bi żvantaġġi ġeografiċi u naturali permanenti, ir-reġjuni b'densità ta’ popolazzjoni baxxa ħafna, u dawk insulari, transkonfinali u muntanjużi, b'konsiderazzjoni adatta għall-effettività u l-effett ta’ lieva tal-proġetti proposti;

20.

jitlob lill-Kummissjoni Ewropea tiċċara li l-EUR 10 biljun li għandhom jiġu trasferiti mill-Fond ta’ Koeżjoni jkunu jirrispettaw ir-Regolament għall-Fond tal-Koeżjoni, inklużi l-kwoti nazzjonali li japplikaw għall-Istati Membri;

21.

jisħaq fuq il-fatt li r-regoli ta’ eliġibbiltà għandhom jiġu estiżi għall-ispejjeż amministrattivi;

22.

jappoġġja approċċ aktar trasparenti, koerenti u semplifikat lejn il-finanzjament tal-UE sabiex ikun jista' jiġi attirat il-finanzjament tas-settur privat; għalhekk, jitlob li l-ispejjeż amministrattivi jiġu inklużi fl-ispejjeż eliġibbli sabiex l-għanijiet ikunu jistgħu jintlaħqu b'mod aktar effettiv u jenfasizza li sorsi ġodda ta’ finanzjament m'għandhom bl-ebda mod jieħdu post il-finanzjament tradizzjonali tal-UE, iżda pjuttost jikkomplementawh;

23.

jilqa' l-introduzzjoni ta’ strumenti finanzjarji innovattivi, b'mod partikolari l-użu ta’ bonds tal-proġetti tal-UE, li ser jattiraw l-investituri privati u jħeġġu s-sħubijiet pubbliċi-privati fl-UE. Meta wieħed iqis il-qagħda tas-swieq finanjarji, il-garanzija għal dawn il-bonds għandha tkun f'idejn il-Kummissjoni;

24.

jitlob lill-Kummissjoni tipprevedi miżuri għall-bini tal-kapaċitajiet għall-użu ta’ strumenti finanzjarji innovattivi, sabiex tappoġġja l-parteċipazzjoni tal-awtoritajiet pubbliċi li m'għandhomx l-għarfien espert meħtieġ, speċjalment fil-livell reġjonali u lokali; jilqa' l-adozzjoni fis-6 ta’ Lulju 2012 tar-Regolament li jniedi l-fażi pilota 2012-2013 tal-inizjattiva tal-bonds għall-proġetti tal-UE bil-għan li jiġu mobilizzati sa EUR 4,5 biljun f'finanzjament mis-settur privat għall-proġetti ta’ infrastruttura strateġiċi prinċipali (2); jappoġġja li jekk tkun ta’ suċċess, il-fażi pilota tiġi segwita minn fażi operattiva matul il-perjodu 2014-2020 fil-qafas tal-faċilità “Nikkollegaw l-Ewropa”;

25.

jilqa' l-programmi ta’ ħidma bħala strumenti li jużaw il-forma ta’ għotjiet li jintużaw fil-każ ta’ miżuri partikolari;

26.

jistqarr li l-eliġibbiltà tal-infiq, kif definita mill-FNE, tista' tkun fattur li jillimita l-implimentazzjoni tal-proġetti; għalhekk, għandha tiġi emendata rigward id-dati tal-eliġibbiltà u aspetti partikolari tal-ispejjeż eliġibbli, bħall-ispejjeż ta’ tħejjija, VAT li ma tistax tiġi rkuprata, ix-xiri ta’ bini;

27.

jitlob lill-Kummissjoni tirrispetta l-allokazzjonijiet nazzjonali u r-rati ta’ finanzjament fil-qafas tal-Fond ta’ Koeżjoni u jitlob li l-lista indikattiva tal-proġetti definita fil-programmi operattivi tiġi ffinanzjata permezz tal-Fond ta’ Koeżjoni;

28.

jenfasizza li, meta wieħed iqis is-sitwazzjoni attwali li qed jiffaċċjaw l-awtoritajiet lokali u reġjonali, il-benefiċjarji mhux ser ikunu jistgħu jibdew il-ħidma tagħhom fil-ħin. Għaldaqstant, id-dispożizzjonijiet li jikkonċernaw il-kanċellazzjoni tal-proġetti m'għandhomx ikunu restrittivi wisq u b'hekk għandu jkun hemm perjodu ta’ tliet snin minflok sentejn kif propost mill-Kummissjoni Ewropea;

29.

ifakkar li l-EUR 10 biljun li se jitwarrbu mill-Fond ta’ Koeżjoni se jiġu trattati skont ir-regoli ta’ ġestjoni diretta u mhux skont il-“prinċipju ta’ min ikun applika l-ewwel jinqeda l-ewwel”; jenfasizza li l-approċċ “min ikun applika l-ewwel jinqeda l-ewwel” jista' jkollu r-riskju li jżid l-iżbilanċ tal-pajjiżi li jibbenefikaw mill-Fond ta’ Koeżjoni tal-UE, li jiffaċċjaw aktar diffikultajiet rigward kundizzjonijiet amministrattivi, umani u finanzjarji; dan jista' jfixkel lil xi Stati Membri u reġjuni milli jippreżentaw proġetti maturi;

30.

jipproponi li r-regoli dwar l-eliġibbiltà tan-nefqa tal-EUR 10 biljun li għandhom jiġu trasferiti mill-Fond ta’ Koeżjoni għandhom ikunu konformi mar-regolament li japplika għal dan il-Fond;

31.

jitlob li, mingħajr preġudizzju għall-kwistjonijiet ta’ kompetenza, l-appoġġ finanzjarju għal proġetti li ma jkunux laħqu l-livell tan-netwerks trans-Ewropej għandu jkun konformi mal-prinċipju tas-sussidjarjetà;

32.

jappoġġja l-programmi ta’ ħidma multiannwali li għandhom jiġu komunikati lill-partijiet kkonċernati kollha. B'konformità mal-prinċipji tal-governanza f'diversi livelli, it-tħejjija tal-programmi ta’ ħidma għandhom jinvolvu l-imsieħba fil-livelli kollha;

33.

jenfasizza li l-awtoritajiet lokali u reġjonali huma legalment responsabbli għal ħafna mill-oqsma koperti mill-FNE u li huma affettwati direttament mill-miżuri proposti għall-finanzjament tal-infrastrutturi trans-Ewropej tat-trasport, l-enerġija u t-telekomunikazzjoni; għalhekk, huwa vitali li l-prinċipji tal-governanza f'diversi livelli jiġu rispettati sabiex jiġi żgurat żvilupp territorjali bbilanċjat;

34.

iqis li l-proposta tal-FNE ma tidhirx li tqajjem xi kwistjoni fir-rigward tal-konformità tagħha mal-prinċipju ta’ sussidjarjetà (3); ifakkar li, minħabba l-iskala u l-effetti tagħhom, il-proġetti tal-FNE jistgħu jinvolvu d-dimensjoni transnazzjonali u għaldaqstant iridu jinkisbu fl-iktar livell xieraq tagħhom: UE, nazzjonali, reġjonali jew lokali;

35.

jinsisti li l-awtoritajiet reġjonali u lokali u partijiet interessati oħra għandhom jiġu inklużi fil-proċess tat-teħid tad-deċiżjonijiet u fl-ippjanar fi ħdan l-Istati Membri rigward il-lista indikattiva tal-proġetti tal-FNE li potenzjalment jistgħu jiġu ffinanzjati;

36.

jinsisti li l-awtoritajiet lokali u reġjonali għandhom jiġu informati kmieni kemm jista' jkun dwar il-proposti tal-FNE u għandhom jiġu appoġġjati b'mod attiv sabiex jiġu integrati fit-tħejjija tal-proġetti u l-istrateġiji territorjali għall-iżvilupp. Huwa vitali wkoll li l-partijiet interessati kollha tar-reġjuni individwali jikkooperaw fit-tħejjija tal-proġetti futuri tal-FNE u fl-implimentazzjoni tagħhom;

37.

huwa tal-fehma li sa tmiem l-2012 għandhom jiġu żviluppati miżuri strateġiċi sabiex l-awtoritajiet reġjonali u nazzjonali jitħeġġu biex iħejju l-listi ta’ investimenti proposti fl-oqsma tal-enerġija u t-telekomunikazzjoni, għax hekk biss jista' jifdal ħin biżżejjed għall-Istati Membri individwali biex iħejju d-dokumenti tagħhom rigward il-proġetti;

38.

jenfasizza li teknoloġiji ġodda (eż. infrastruttura għal karburanti alternattivi) għandhom iktar ostakli għad-dħul mill-infrastruttura tradizzjonali bħat-toroq u l-ferroviji u għaldaqstant l-għotjiet se jkunu permessi sa 50 % flok 20 %;

39.

jenfasizza li l-implimentazzjoni tal-FNE mill-aġenzija eżekuttiva tal-Kummissjoni Ewropea bħala awtorità tal-ġestjoni għandha titwettaq f'kooperazzjoni mill-qrib ma’ awtoritajiet pubbliċi rilevanti oħrajn. Għandhom jiġu evitati spejjeż addizzjonali għat-twaqqif u t-tħaddim tal-aġenzija;

40.

jenfasizza li r-regoli li jirregolaw il-fondi tal-FNE għandhom jiġu definiti, meta msieħba individwali minn Stati Membri differenti ma jkunux jistgħu jilħqu ftehim dwar l-implimentazzjoni ta’ proġett individwali;

41.

għaldaqstant, jissuġġerixxi li l-Kummissjoni Ewropea tanalizza l-utilità tar-REKT sabiex ikunu jistgħu jiġu indirizzati d-diffikultajiet potenzjali fl-implimentazzjoni ta’ proġetti transkonfinali minħabba leġislazzjonijiet nazzjonali differenti u li jiġu kkombinati sorsi finanzjarji differenti definiti f'regolamenti varji;

42.

jisħaq fuq il-bżonn li tiġi żgurata kompatibbiltà koerenti bejn proġetti ffinanzjati permezz tal-Fondi Strutturali, il-Fond tal-Koeżjoni u l-FNE u l-impatt mistenni tal-FNE fuq il-proġetti ż-żgħar;

43.

jitlob lill-Kummissjoni tipprovdi miżuri ċari li jiggarantixxu koordinazzjoni u kompatibbiltà bejn ir-regolamenti li japplikaw għall-Fondi Strutturali, speċjalment fir-rigward tal-abbozzar tal-Qafas Strateġiku Komuni u l-Kuntratti ta’ Sħubija, iżda wkoll rigward ir-regoli ta’ eliġibbiltà u l-irduppjar potenzjali ta’ proġetti ffinanzjati;

44.

jiġbed l-attenzjoni għall-impatt tal-FNE fuq l-ippjanar territorjali u l-istrateġiji għall-iżvilupp reġjonali u lokali u jappoġġja l-miżuri ta’ bini tal-kapaċitajiet biex l-awtoritajiet lokali u reġjonali jkollhom l-appoġġ meħtieġ bil-għan li jkunu mħejjija bl-aħjar mod possibbli biex iressqu proġetti maturi li jkunu jridu jiġu ffinanzjati permezz tal-FNE;

45.

jinsisti li l-programmi operattivi u r-regolamenti għall-perjodu ta’ pprogrammar 2014-2020 għandhom jiġu approvati fil-ħin, sabiex l-implimentazzjoni tal-proġetti tkun tista' tibda fil-bidu tal-2014;

46.

jappoġġja l-proposta tal-Kummissjoni li tersaq lejn approċċ aktar orjentat lejn ir-riżultati permezz tal-użu ta’ miri ċari u miżurabbli u indikaturi ta’ suċċess miftiehma minn qabel. Għandhom jiġu definiti ftit indikaturi ċari u affidabbli. L-indikaturi għandhom ikunu ġenerali, ġusti, proporzjonali u bbażati fuq il-prinċipju tat-trattament indaqs. Għalhekk, strumenti għall-ippjanar strateġiku għandhom jitqiegħdu għad-dispożizzjoni tal-awtoritajiet lokali u reġjonali bil-għan li jiġi evitat piż amministrattiv addizzjonali rigward ir-rappurtar, li jżid ħtieġa ta’ valutazzjoni li tinkludi l-impatt fuq il-koeżjoni ekonomika, soċjali u territorjali;

47.

jitlob li l-Istati Membri jagħmlu aktar użu mill-għajnuna teknika li hija disponibbli għall-programmi operattivi sabiex jittejbu l-kapaċitajiet tal-korpi lokali u reġjonali u ta’ parteċipanti oħra li jibbenefikaw mill-fondi tal-UE. Fil-qafas tal-istrument tal-FNE, huwa partikolarment importanti li l-Istati Membri l-anqas żviluppati jħejju wkoll proġetti ta’ kwalità bl-għajnuna ta’ riżorsi ta’ assistenza teknika u b'hekk ikunu jistgħu jikkompetu bl-istess saħħa ma’ Stati Membri oħra huma u japplikaw għas-sejħiet għall-proposti mmirati lejn il-kofinanzjament mill-UE;

48.

jitlob definizzjoni aktar iddettaljata fir-rigward tat-tħejjija tad-dokumenti rigward il-proġetti, it-tħejjija tal-proġetti, il-proċeduri ta’ tnedija u l-applikazzjonijiet ta’ parteċipanti individwali (il-qsim tal-kompiti bejn il-korpi nazzjonali u l-awtoritajiet reġjonali u lokali) fil-qafas tal-istrument FNE.