(1)

F’konformità mar-Regolament (UE, Euratom) 2015/2422 tal-Parlament Ewropew u tal-Kunsill (3), il-Qorti tal-Ġustizzja ppreżentat, fl-14 ta’ Diċembru 2017, lill-Parlament Ewropew, lill-Kunsill u lill-Kummissjoni rapport dwar il-bidliet possibbli fit-tqassim tal-kompetenzi biex tagħti deċiżjonijiet preliminari skont l-Artikolu 267 tat-Trattat dwar il-Funzjonament tal-Unjoni Ewropea (TFUE). F’dak ir-rapport, il-Qorti tal-Ġustizzja qieset li ma kienx hemm lok, f’dik id-data, li jiġu proposti bidliet fir-rigward tat-trattament tat-talbiet għal deċiżjoni preliminari magħmula skont l-Artikolu 267 TFUE. Madankollu, f’dak l-istess rapport, hija enfasizzat li trasferiment sussegwenti tal-kompetenza lill-Qorti Ġenerali li tagħti deċiżjonijiet preliminari f’ċerti oqsma speċifiċi ma jistax jiġi eskluż jekk in-numru u l-kumplessità tat-talbiet għal deċiżjoni preliminari mressqa quddiem il-Qorti tal-Ġustizzja jkunu tali li l-amministrazzjoni tajba tal-ġustizzja tirrikjedih. Barra minn hekk, tali trasferiment huwa f’konformità mar-rieda tal-awturi tat-Trattat ta’ Nizza, li kellhom l-intenzjoni jsaħħu l-effiċjenza tas-sistema ġudizzjarja tal-Unjoni billi pprevedew il-possibbiltà li l-Qorti Ġenerali tiġi involuta fit-trattament ta’ dawk it-talbiet.

(2)

Skont l-istatistika tal-Qorti tal-Ġustizzja, kemm in-numru ta’ kawżi għal deċiżjoni preliminari pendenti kif ukoll it-tul ta’ żmien medju li jittieħed biex jiġu trattati dawk il-kawżi qegħdin jiżdiedu. Peress li t-talbiet għal deċiżjoni preliminari jridu jiġu ttrattati b’ħeffa sabiex il-qrati nazzjonali jkunu jistgħu jiggarantixxu d-dritt għal rimedju effettiv, jenħtieġ li s-sitwazzjoni attwali tiġi indirizzata. Dik is-sitwazzjoni hija dovuta mhux biss għall-għadd kbir ta’ talbiet għal deċiżjoni preliminari mressqa quddiem il-Qorti tal-Ġustizzja kull sena, iżda wkoll għall-kumplessità kbira u n-natura partikolarment sensittiva ta’ numru dejjem jikber ta’ talbiet magħmula lil dik il-qorti. Bil-għan li l-Qorti tal-Ġustizzja tkun tista’ tkompli taqdi l-missjoni tagħha tas-salvagwardja u t-tisħiħ tal-unità u l-konsistenza tad-dritt tal-Unjoni, u biex jiġi żgurat li d-deċiżjonijiet tal-Qorti tal-Ġustizzja jkunu tal-ogħla kwalità, huwa meħtieġ, fl-interess tal-amministrazzjoni tajba tal-ġustizzja, li tintuża l-possibbiltà prevista fl-Artikolu 256(3), l-ewwel subparagrafu, tat-TFUE u li tiġi ttrasferita lill-Qorti Ġenerali kompetenza sabiex tieħu konjizzjoni tat-talbiet preliminari magħmula skont l-Artikolu 267 tat-TFUE, f’oqsma speċifiċi stabbiliti fl-Istatut tal-Qorti tal-Ġustizzja tal-Unjoni Ewropea (l-“Istatut”).

(3)

It-trasferiment lill-Qorti Ġenerali ta’ parti mill-kompetenza sabiex tagħti deċiżjonijiet preliminari jenħtieġ li jippermetti lill-Qorti tal-Ġustizzja tiddedika aktar ħin u riżorsi għall-eżami tat-talbiet għal deċiżjoni preliminari l-aktar kumplessi u sensittivi u, f’dan il-qafas, issaħħaħ id-djalogu mal-qrati nazzjonali, inter alia billi tagħmel użu akbar mill-mekkaniżmu previst fl-Artikolu 101 tar-Regoli tal-Proċedura tal-Qorti tal-Ġustizzja, li jippermettilha titlob kjarifika minn qorti jew tribunal tar-rinviju f’terminu ta’ żmien stabbilit mill-Qorti tal-Ġustizzja, minbarra n-noti jew l-osservazzjonijiet bil-miktub ippreżentati mill-partijiet interessati msemmija fl-Artikolu 23 tal-Istatut.

(4)

F’dan il-kuntest, u peress li l-Qorti tal-Ġustizzja hija dejjem aktar meħtieġa, f’kawżi għal deċiżjoni preliminari, biex tittieħed deċiżjoni dwar kwistjonijiet ta’ natura kostituzzjonali jew relatati mad-drittijiet tal-bniedem u mal-Karta tad-Drittijiet Fundamentali tal-Unjoni Ewropea (il-“Karta”), jenħtieġ li t-trasparenza u l-ftuħ tal-proċess ġudizzjarju jissaħħu. Għal dak l-għan, u mingħajr preġudizzju għar-Regolament (KE) Nru 1049/2001 tal-Parlament Ewropew u tal-Kunsill (4), jenħtieġ li l-Istatut jiġi emendat sabiex jipprevedi li n-noti jew l-osservazzjonijiet bil-miktub ippreżentati minn parti interessata msemmija fl-Artikolu 23 tal-Istatut jenħtieġ li jiġu ppubblikati fuq is-sit web tal-Qorti tal-Ġustizzja tal-Unjoni Ewropea fi żmien raġonevoli wara l-għeluq tal-kawża, sakemm dik il-parti ma tqajjimx oġġezzjonijiet għall-pubblikazzjoni tas-sottomissjonijiet bil-miktub ta’ dik il-parti stess, f’liema każ jissemma fuq l-istess sit web li tkun tqajmet tali oġġezzjoni. Tali pubblikazzjoni se żżid l-obbligu ta’ rendikont u tibni l-fiduċja fl-Unjoni kif ukoll fid-dritt tal-Unjoni.

(5)

Wara r-riforma tal-qafas ġudizzjarju tal-Unjoni b’riżultat tar-Regolament (UE, Euratom) 2015/2422, attwalment il-Qorti Ġenerali tinsab f’pożizzjoni fejn tista’ tiffaċċja ż-żieda fil-volum ta’ xogħol li se tirriżulta mit-trasferiment tal-kompetenza biex jingħataw deċiżjonijiet preliminari f’xi oqsma speċifiċi. Madankollu, peress li l-volum ta’ xogħol tal-Qorti Ġenerali huwa marbut mill-qrib mal-iżviluppi tal-attività tal-Unjoni, għandu jiġi żgurat li l-Qorti Ġenerali tkun tista’ tkompli teżerċita b’mod sħiħ l-istħarriġ ġudizzjarju tagħha fir-rigward tal-istituzzjonijiet, tal-korpi, tal-uffiċċji u tal-organi tal-Unjoni.

(6)

Għal raġunijiet ta’ ċertezza legali, huwa essenzjali li l-oqsma li fihom il-Qorti Ġenerali tingħata kompetenza biex tagħti deċiżjonijiet preliminari jkunu definiti b’mod ċar u separabbli biżżejjed minn oqsma oħra. Barra minn hekk, huwa importanti wkoll li dawk l-oqsma jkunu dawk li taw lok għal ġurisprudenza sostanzjali tal-Qorti tal-Ġustizzja li tista’ tiggwida lill-Qorti Ġenerali fl-eżerċizzju tal-kompetenza tagħha li tagħti deċiżjonijiet preliminari.

(7)

Barra minn hekk, jenħtieġ li l-oqsma speċifiċi jiġu ddeterminati billi titqies il-ħtieġa li l-Qorti tal-Ġustizzja jitnaqqsilha l-piż mill-obbligu li teżamina numru ta’ kawżi għal deċiżjoni preliminari li jkun kbir biżżejjed sabiex ikollu effett reali fuq il-volum tax-xogħol tagħha.

(8)

Huwa fuq il-bażi ta’ dawk il-kriterji li jenħtieġ li ssir id-determinazzjoni tal-oqsma speċifiċi li fihom il-Qorti Ġenerali tingħata l-kompetenza li tagħti deċiżjonijiet preliminari. B’kont meħud tan-natura li qed tiżviluppa tad-dritt tal-Unjoni, dik id-determinazzjoni jenħtieġ li ssir billi wieħed jibbaża fuq il-mod konvenzjonali ta’ referenza għal dawk l-oqsma speċifiċi. Sabiex jiġi żgurat li dik id-determinazzjoni tkun tista’ tkompli ssir fil-futur, biċ-ċertezza legali meħtieġa, minkejja l-iżviluppi tad-dritt tal-Unjoni rigward dawk l-oqsma speċifiċi, huwa importanti li jitqiesu l-kwistjonijiet tipikament koperti minn dawk l-oqsma speċifiċi fil-mument tal-adozzjoni ta’ dan ir-Regolament.

(9)

Is-sistema komuni tat-taxxa fuq il-valur miżjud, id-dazji tas-sisa, il-Kodiċi Doganali u l-klassifikazzjoni tariffarja tal-oġġetti fin-Nomenklatura Magħquda jissodisfaw il-kriterji li għandhom jitqiesu bħala oqsma speċifiċi fis-sens tal-Artikolu 256(3), l-ewwel subparagrafu, tat-TFUE. Dawk l-oqsma jkopru, fil-mument tal-adozzjoni ta’ dan ir-Regolament, kwistjonijiet bħad-determinazzjoni tal-bażi għat-taxxa għall-valutazzjoni tat-taxxa fuq il-valur miżjud jew il-kundizzjonijiet għall-eżenzjoni mill-ħlas ta’ dik it-taxxa; l-interpretazzjoni tal-arranġamenti ġenerali għad-dazju tas-sisa u tal-qafas relatat mad-dazji fuq l-alkoħol, ix-xorb alkoħoliku, it-tabakk, il-prodotti tal-enerġija u l-elettriku; l-elementi li abbażi tagħhom jiġu applikati dazji fuq l-importazzjoni jew l-esportazzjoni fil-kuntest tal-kummerċ tal-oġġetti, bħat-tariffa doganali komuni, l-oriġini u l-valur doganali tal-oġġetti; proċeduri ta’ importazzjoni u esportazzjoni, inklużi t-tiġrib, id-determinazzjoni u l-estinzjoni ta’ dejn doganali; arranġamenti doganali speċifiċi; is-sistema ta’ eżenzjoni mid-dazji doganali, kif ukoll l-interpretazzjoni ta’ intestaturi tariffarji speċifiċi u l-kriterji għall-klassifikazzjoni ta’ ċerti oġġetti fin-Nomenklatura Magħquda stabbilita fl-Anness I tar-Regolament tal-Kunsill (KEE) Nru 2658/87 (5).

(10)

Il-kumpens u l-assistenza lill-passiġġieri meta s-servizzi tat-trasport jiddewmu jew jiġu kkanċellati jew meta l-passiġġieri jiġu mċaħħda milli jitilgħu abbord jissodisfaw il-kriterji biex jitqiesu bħala oqsma speċifiċi skont it-tifsira tal-Artikolu 256(3), l-ewwel subparagrafu, tat-TFUE, u jkopru kwistjonijiet li fil-mument tal-adozzjoni ta’ dan ir-Regolament huma rregolati bir-Regolamenti (KE) Nru 261/2004 (6), (UE) Nru 1177/2010 (7), (UE) Nru 181/2011 (8) u (UE) 2021/782 (9) tal-Parlament Ewropew u tal-Kunsill. L-istess kriterji huma ssodisfati wkoll fir-rigward tas-sistema ta’ skambju ta’ kwoti ta’ emissjonijiet ta’ gassijiet serra, fil-mument tal-adozzjoni ta’ dan ir-Regolament regolat bid-Direttiva 2003/87/KE tal-Parlament Ewropew u tal-Kunsill (10) u bl-atti adottati abbażi ta’ dik id-direttiva.

(11)

Fid-dawl tal-kriterju materjali applikabbli għat-tqassim tal-kompetenza fir-rigward tat-talbiet preliminari bejn il-Qorti tal-Ġustizzja u l-Qorti Ġenerali, għal raġunijiet ta’ ċertezza legali u ta’ ħeffa, huwa importanti li ma jkunux il-qrati jew it-tribunali tar-rinviju li jiddeċiedu huma stess liema qorti tkun kompetenti sabiex tieħu konjizzjoni tat-talba għal deċiżjoni preliminari. B’hekk, kull talba għal deċiżjoni preliminari jenħtieġ li titressaq quddiem il-Qorti tal-Ġustizzja, li jenħtieġ li tiddetermina, skont modalitajiet speċifikati fir-Regoli tal-Proċedura tagħha, jekk it-talba taqax esklużivament taħt wieħed jew aktar mill-oqsma speċifiċi stabbiliti fl-Istatut u, għaldaqstant, jekk dik it-talba jkollhiex tiġi ttrasferita lill-Qorti Ġenerali.

(12)

Jenħtieġ li l-Qorti tal-Ġustizzja tibqa’ kompetenti biex tagħti deċiżjoni dwar it-talbiet għal deċiżjoni preliminari li, għalkemm marbuta mal-oqsma speċifiċi, li fir-rigward tagħhom il-kompetenza li tingħata deċiżjoni preliminari tingħata lill-Qorti Ġenerali b’dan ir-Regolament, jikkonċernaw ukoll oqsma oħra, peress li l-Artikolu 256(3), l-ewwel subparagrafu, tat-TFUE, ma jipprevedi ebda possibbiltà ta’ trasferiment tal-kompetenza lill-Qorti Ġenerali biex tagħti deċiżjonijiet preliminari f’oqsma oħra għajr f’oqsma speċifiċi.

(13)

Id-dritt għal smigħ ġust u pubbliku fi żmien raġonevoli minn qorti indipendenti u imparzjali, stabbilita minn qabel bil-liġi, huwa dritt fundamentali ggarantit mill-Artikolu 47, t-tieni paragrafu, tal-Karta. Għalhekk, jenħtieġ li jiġi ddikjarat b’mod ċar fl-Istatut innifsu li l-Qorti tal-Ġustizzja se żżomm il-kompetenza meta t-talba għal deċiżjoni preliminari tqajjem kwistjonijiet awtonomi ta’ interpretazzjoni tad-dritt primarju, tad-dritt internazzjonali pubbliku, tal-prinċipji ġenerali tad-dritt tal-Unjoni jew tal-Karta, fid-dawl tan-natura orizzontali tagħhom, anke meta l-qafas ġuridiku tal-kawża fil-proċedimenti prinċipali jaqa’ f’wieħed jew aktar mill-oqsma speċifiċi li fir-rigward tagħhom il-kompetenza li jingħataw deċiżjonijiet preliminari tingħata lill-Qorti Ġenerali b’dan ir-Regolament.

(14)

Wara analiżi preliminari, u wara li jinstemgħu l-Viċi President tal-Qorti tal-Ġustizzja u l-Avukat Ġenerali Ewlieni, jenħtieġ li l-President tal-Qorti tal-Ġustizzja jinforma lir-Reġistru dwar jekk it-talba għal deċiżjoni preliminari għandhiex tiġi ttrasferita lill-Qorti Ġenerali jew jekk għandhiex tintbagħat, għal analiżi ulterjuri, lil-laqgħa ġenerali li fiha jipparteċipaw l-Imħallfin u l-Avukati Ġenerali kollha tal-Qorti tal-Ġustizzja. Fl-interess tal-amministrazzjoni tajba u rapida tal-ġustizzja, il-proċess ta’ evalwazzjoni ta’ jekk it-talba għandhiex tiġi ttrasferita lill-Qorti Ġenerali jenħtieġ li jitwettaq f’perjodu ta’ żmien li ma jaqbiżx dak li huwa strettament meħtieġ, filwaqt li jitqiesu n-natura, it-tul u l-kumplessità tal-każ.

(15)

Fl-interess taċ-ċertezza legali u ta’ trasparenza akbar tal-proċedimenti ġudizzjarji, jenħtieġ li l-Qorti tal-Ġustizzja jew il-Qorti Ġenerali, fid-deċiżjoni tagħha dwar rinviju għal deċiżjoni preliminari, tagħti fil-qosor ir-raġunijiet għaliex hija kompetenti li tieħu konjizzjoni ta’ domanda preliminari. Barra minn hekk, jenħtieġ li l-Qorti tal-Ġustizzja tippubblika u taġġorna regolarment lista ta’ eżempji li juru l-applikazzjoni tal-Artikolu 50b tal-Istatut kif imdaħħal b’dan ir-Regolament emendatorju.

(16)

Il-Qorti Ġenerali se tiddeċiedi dwar kwistjonijiet ta’ kompetenza jew ta’ ammissibbiltà mqajma espliċitament jew impliċitament mit-talba għal deċiżjoni preliminari trasferita lilha.

(17)

L-Artikolu 54, it-tieni paragrafu, tal-Istatut jipprevedi li, meta l-Qorti Ġenerali ssib li ma għandhiex il-kompetenza li tieħu konjizzjoni ta’ rikors, hija għandha tirreferi dak ir-rikors lill-Qorti tal-Ġustizzja. L-istess obbligu jenħtieġ li japplika fil-każ li l-Qorti Ġenerali, waqt li tkun qed teżamina talba għal deċiżjoni preliminari trasferita lilha, tikkonstata li din ma tissodisfax il-kriterji stabbiliti fl-Artikolu 50b, l-ewwel paragrafu, tal-Istatut kif imdaħħal b’dan ir-Regolament emendatorju.

(18)

Barra minn hekk, il-Qorti Ġenerali tista’, skont l-Artikolu 256(3), it-tieni subparagrafu, tat-TFUE, tgħaddi lill-Qorti tal-Ġustizzja kawża li taqa’ fil-kompetenza tagħha iżda li teħtieġ deċiżjoni ta’ prinċipju li x’aktarx taffettwa l-unità jew il-konsistenza tad-dritt tal-Unjoni.

19.

Bil-għan li l-qrati nazzjonali u l-partijiet interessati msemmija fl-Artikolu 23 tal-Istatut jingħataw l-istess garanziji bħal dawk li toffri l-Qorti tal-Ġustizzja, jenħtieġ li l-Qorti Ġenerali tadotta dispożizzjonijiet proċedurali ekwivalenti għal dawk applikati mill-Qorti tal-Ġustizzja għat-trattament tat-talbiet għal deċiżjoni preliminari, b’mod partikolari fir-rigward tal-ħatra ta’ Avukat Ġenerali. Jenħtieġ li l-Imħallfin tal-Qorti Ġenerali jeleġġu minn fosthom il-Membri li għandhom jaqdu d-dmirijiet ta’ Avukat Ġenerali għal perjodu ta’ tliet snin li jista’ jiġġedded. Fil-perjodu li matulu dawk il-Membri jaqdu d-dmirijiet ta’ Avukat Ġenerali, huma ma għandhomx ipoġġu bħala Mħallfin f’kawżi rregolati bl-Artikolu 267 TFUE. Barra minn hekk, sabiex tiġi żgurata l-indipendenza tiegħu jew tagħha, jenħtieġ li l-Avukat Ġenerali maħtur sabiex jittratta talba għal deċiżjoni preliminari jappartjeni għal awla differenti minn dik li lilha ġiet assenjata dik it-talba.

(20)

Fid-dawl tal-karatteristiċi speċifiċi tal-proċedura għal deċiżjoni preliminari meta mqabbla mar-rikorsi diretti li fir-rigward tagħhom għandha kompetenza l-Qorti Ġenerali, huwa xieraq li t-talbiet għal deċiżjoni preliminari jiġu assenjati lil awli tal-Qorti Ġenerali magħżula għal dan il-fini.

(21)

Barra minn hekk, sabiex titħares, b’mod partikolari, il-konsistenza tad-deċiżjonijiet preliminari mogħtija mill-Qorti Ġenerali, u fl-interess ta’ amministrazzjoni tajba tal-ġustizzja, jenħtieġ li tiġi prevista awla tal-Qorti Ġenerali ta’ daqs intermedju bejn l-awli b’ħames Imħallfin u l-Awla Manja. Minħabba ż-żieda fir-responsabbiltajiet tal-Qorti Ġenerali, introdotti b’riżultat ta’ dan ir-Regolament, jenħtieġ li Stat Membru jew istituzzjoni tal-Unjoni li jkunu parti fil-proċedimenti jkunu jistgħu jitolbu t-tlaqqigħ ta’ tali awla intermedja meta l-Qorti Ġenerali tiġi adita skont l-Artikolu 267 TFUE.

22.

Skont l-istatistika tal-Qorti tal-Ġustizzja numru kbir ta’ appelli jiġu ppreżentati kontra d-deċiżjonijiet tal-Qorti Ġenerali. Bl-għan li tinżamm l-effiċjenza tal-proċedura tal-appell u li l-Qorti tal-Ġustizzja tkun tista’ tiffoka fuq l-appelli li jqajmu kwistjonijiet legali importanti, jenħtieġ li jiġi estiż il-mekkaniżmu li permezz tiegħu jiġi ddeterminat jekk appell jiġix ammess, filwaqt li jiġi żgurat li r-rekwiżiti inerenti għal protezzjoni ġudizzjarja effettiva jiġu ssodisfati.

(23)

Jenħtieġ li jiġi estiż il-mekkaniżmu li permezz tiegħu jiġi ddeterminat jekk appell jiġix ammess għal dawk l-appelli li jkollhom bħala suġġett deċiżjoni tal-Qorti Ġenerali dwar id-deċiżjoni ta’ bord tal-appell indipendenti ta’ korp, uffiċċju jew organu tal-Unjoni li, fid-data tal-1 ta’ Mejju 2019, kellhom tali bord tal-appell indipendenti iżda għadhom ma jissemmewx fl-Artikolu 58a tal-Istatut. Tali appelli jikkonċernaw kawżi li jkunu diġà bbenefikaw minn eżami doppju, l-ewwel minn bord tal-appell indipendenti u mbagħad mill-Qorti Ġenerali, bir-riżultat li d-dritt għal protezzjoni ġudizzjarja effettiva jiġi ggarantit kompletament.

(24)

Il-mekkaniżmu li permezz tiegħu jiġi determinat jekk appell jiġix ammess jenħtieġ li jiġi estiż ukoll għat-tilwim dwar l-eżekuzzjoni ta’ kuntratti li jinkludu klawżola ta’ arbitraġġ, fis-sens tal-Artikolu 272 tat-TFUE, li ħafna drabi sempliċement jeħtieġu li l-Qorti Ġenerali tapplika għall-mertu tat-tilwima l-liġi nazzjonali li għalih tirreferi l-klawżola ta’ arbitraġġ. Meta l-Qorti Ġenerali tkun meħtieġa tapplika d-dritt tal-Unjoni għall-mertu tat-tilwima, jenħtieġ li l-appelli mressqa kontra d-deċiżjonijiet tal-Qorti Ġenerali mogħtija b’relazzjoni ma’ tali tilwim jiġu ammessi meta jqajmu kwistjonijiet li jkunu sinifikanti fir-rigward tal-unità, il-konsistenza jew l-iżvilupp tad-dritt tal-Unjoni.

(25)

L-Artikolu 23 tal-Istatut jawtorizza lill-Parlament Ewropew, lill-Kunsill u lill-Bank Ċentrali Ewropew jippreżentaw noti jew osservazzjonijiet bil-miktub lill-Qorti tal-Ġustizzja meta jkunu adottaw l-att li l-validità jew l-interpretazzjoni tiegħu jkunu kkontestati. Fil-prassi ġuriżdizzjonali tagħha, il-Qorti tal-Ġustizzja madankollu diġà ppermettiet lill-Parlament Ewropew u lill-Bank Ċentrali Ewropew jipparteċipaw fi proċeduri li jikkonċernaw talbiet oħra għal deċiżjoni preliminari meta kellhom interess partikolari fil-kwistjonijiet imqajma mill-qorti nazzjonali.

(26)

Għalhekk, jenħtieġ li l-Artikolu 23 tal-Istatut jiġi emendat biex jipprevedi li d-deċiżjonijiet kollha tal-qorti jew tat-tribunal ta’ Stat Membru li jirreferu kawża lill-Qorti tal-Ġustizzja jiġu nnotifikati lill-Parlament Ewropew, lill-Kunsill u lill-Bank Ċentrali Ewropew, sabiex ikunu jistgħu jivvalutaw jekk għandhomx tali interess partikolari u jiddeċiedu jekk jixtiqux jeżerċitaw id-dritt tagħhom li jippreżentaw noti jew osservazzjonijiet bil-miktub. Tali emenda jenħtieġ li tkun mingħajr preġudizzju għad-dritt ta’ istituzzjonijiet, korpi, uffiċċji jew organi oħra li jippreżentaw noti jew osservazzjonijiet bil-miktub meta jkunu adottaw l-att li l-validità jew l-interpretazzjoni tiegħu jkunu kkontestati.

(27)

Dan ir-Regolament jipprevedi bidla sinifikanti għall-qafas ġudizzjarju tal-Unjoni u għalhekk l-implimentazzjoni tiegħu jenħtieġ li tiġi mmonitorjata mill-qrib. Għal dak il-fini, il-Qorti tal-Ġustizzja jenħtieġ li tippreżenta fi żmien raġonevoli lill-Parlament Ewropew, lill-Kunsill u lill-Kummissjoni rapport dwar it-trasferiment lill-Qorti Ġenerali tal-kompetenza għal deċiżjonijiet preliminari f’oqsma speċifiċi u dwar l-estensjoni tal-mekkaniżmu għad-determinazzjoni ta’ jekk appell jiġix ammess. Jenħtieġ li l-Qorti tal-Ġustizzja, b’mod partikolari, tagħti informazzjoni li tippermetti valutazzjoni tal-punt sa fejn l-objettivi ddikjarati intlaħqu, filwaqt li jitqiesu l-ħeffa li biha jkunu ġew trattati l-kawżi u l-effiċjenza tal-eżami tal-appelli u tat-talbiet għal deċiżjoni preliminari l-aktar kumplessi jew sensittivi.

(28)

Il-Parlament Ewropew u l-Qorti tal-Ġustizzja żviluppaw djalogu kostruttiv dwar il-funzjonament tas-sistema ġudizzjarja tal-Unjoni, u dan wera li kien partikolarment ta’ benefiċċju fil-kuntest tar-riforma preżenti. Dak id-djalogu, li għalih jistgħu jiġu mistiedna esperti kull meta jkun xieraq, jenħtieġ li jiġi segwit b’mod strutturat fuq bażi annwali, bir-rispett dovut għar-rwol u l-kompetenzi ta’ kull istituzzjoni, sabiex tiġi diskussa l-implimentazzjoni tar-riforma tal-Istatut introdotta minn dan ir-Regolament u biex issir riflessjoni dwar titjib ulterjuri.

(29)

Il-konsultazzjoni pubblika u mal-partijiet ikkonċernati hija integrali għal teħid tad-deċiżjonijiet abbażi ta’ informazzjoni tajba u biex tittejjeb il-kwalità tat-tfassil tal-liġijiet. Qabel ma tadotta talba jew proposta biex jiġu emendati d-dispożizzjonijiet tal-Protokoll Nru 3 dwar l-Istatut skont l-Artikolu 281 tat-TFUE, jenħtieġ li l-Qorti tal-Ġustizzja jew il-Kummissjoni jwettqu konsultazzjonijiet pubbliċi b’mod miftuħ u trasparenti, filwaqt li jiżguraw li l-modalitajiet u l-limiti ta’ żmien ta’ dawk il-konsultazzjonijiet pubbliċi jippermettu l-akbar parteċipazzjoni possibbli. Ir-riżultati tal-konsultazzjonijiet pubbliċi u mal-partijiet ikkonċernati jenħtieġ li jiġu kkomunikati mingħajr dewmien, skont il-każ, lill-Kummissjoni jew lill-Qorti tal-Ġustizzja, kif ukoll lill-Parlament Ewropew u lill-Kunsill, u jsiru pubbliċi.

(30)

Jenħtieġ għalhekk li l-Protokoll Nru 3 dwar l-Istatut tal-Qorti tal-Ġustizzja tal-Unjoni Ewropea jiġi emendat kif xieraq,

(1)

l-Artikolu 23 huwa emendat kif ġej:

(2)

jiddaħħal l-artikolu li ġej:

(3)

l-Artikolu 50 huwa emendat kif ġej:

(4)

jiddaħħal l-artikolu li ġej:

(5)

fl-Artikolu 54, it-tieni paragrafu, huwa sostitwit b’dan li ġej:

“Meta l-Qorti Ġenerali ssib li ma tkunx kompetenti sabiex tieħu konjizzjoni ta’ rikors jew talba għal deċiżjoni preliminari li taqa’ fil-kompetenza tal-Qorti tal-Ġustizzja, hija għandha tirreferi dak ir-rikors jew dik it-talba lill-Qorti tal-Ġustizzja; Bl-istess mod, meta l-Qorti tal-Ġustizzja ssib li rikors jew talba għal deċiżjoni preliminari jaqgħu fil-kompetenza tal-Qorti Ġenerali, hija għandha tirreferi dak ir-rikors jew dik it-talba lill-Qorti Ġenerali, u dik il-Qorti ma tkunx tista’ tirrifjuta l-kompetenza.”

(6)

l-Artikolu 58a huwa sostitwit b’dan li ġej:

(7)

l-artikolu li ġej jiddaħħal fit-Titolu V tal-Istatut: