(1)

Ir-Regolament (KE) Nru 1831/2003 jipprevedi l-awtorizzazzjoni tal-addittivi għall-użu fin-nutrizzjoni tal-annimali u r-raġunijiet u l-proċeduri għall-għoti u għat-tiġdid ta’ din l-awtorizzazzjoni.

(2)

Ġie awtorizzat preparat ta’ Bifidobacterium animalis ssp. animalis DSM 16284, Ligilactobacillus salivarius DSM 16351 (li qabel kien identifikat b’mod tassonomiku bħala Lactobacillus salivarius ssp. salivarius DSM 16351) u Enterococcus faecium DSM 21913, għal 10 snin bħala addittiv tal-għalf għall-użu fit-tiġieġ tas-simna bir-Regolament ta’ Implimentazzjoni tal-Kummissjoni (UE) Nru 544/2013 (2) u, bir-Regolament ta’ Implimentazzjoni tal-Kummissjoni (UE) 2015/1105 (3) għall-użu fl-għalf u fl-ilma tax-xorb għat-tiġieġ imrobbija għall-bajd u għall-ispeċijiet minuri ta’ pollam għajr dawk tal-bajd, kif ukoll għall-użu fl-ilma tax-xorb għat-tiġieġ tas-simna.

(3)

F’konformità mal-Artikolu 14(1) tar-Regolament (KE) Nru 1831/2003, tressqet applikazzjoni għat-tiġdid tal-awtorizzazzjoni tal-preparat ta’ Bifidobacterium animalis ssp. animalis DSM 16284, Ligilactobacillus salivarius DSM 16351 u Enterococcus faecium DSM 21913 bħala addittiv tal-għalf għat-tiġieġ tas-simna, għat-tiġieġ imrobbija għall-bajd u għall-ispeċijiet minuri ta’ pollam għajr dawk tal-bajd, bit-talba li dak l-addittiv jiġi kklassifikat fil-kategorija “addittivi żootekniċi” u fil-grupp funzjonali “stabbilizzaturi tal-flora intestinali”. F’konformità mal-Artikolu 7 tar-Regolament (KE) Nru 1831/2003, dik l-applikazzjoni kienet tikkonċerna wkoll l-awtorizzazzjoni ta’ użi ġodda tal-istess preparat bħala addittiv tal-għalf għall-użu fl-għalf u fl-ilma tax-xorb għat-tiġieġ imrobbija għat-tnissil, għad-dundjani tas-simna u għad-dundjani mrobbija għat-tnissil. Flimkien mal-applikazzjoni ntbagħtu d-dettalji u d-dokumenti meħtieġa skont l-Artikolu 14(2) u l-Artikolu 7(3) ta’ dak ir-Regolament.

(4)

Fl-opinjoni tagħha tal-15 ta’ Novembru 2023 (4), l-Awtorità Ewropea dwar is-Sigurtà fl-Ikel (“l-Awtorità”) ikkonkludiet li l-preparat ta’ Bifidobacterium animalis ssp. animalis DSM 16284, Ligilactobacillus salivarius DSM 16351 u Enterococcus faecium DSM 21913 huwa sikur għall-ispeċijiet fil-mira, għall-konsumaturi u għall-ambjent skont il-kundizzjonijiet tal-użu awtorizzati u dehrilha li din il-konklużjoni tapplika wkoll għall-ispeċijiet fil-mira li fil-każ tagħhom saret talba għal użi ġodda. Ikkonkludiet ukoll li dak il-preparat ma jirritax il-ġilda jew l-għajnejn iżda jenħtieġ li jitqies bħala sensitizzatur respiratorju. L-Awtorità indikat li ma kienx meħtieġ li tiġi vvalutata l-effikaċja tal-preparat ta’ Bifidobacterium animalis ssp. animalis DSM 16284, Ligilactobacillus salivarius DSM 16351 u Enterococcus faecium DSM 21913 fil-kuntest tat-tiġdid tal-awtorizzazzjoni għat-tiġieġ tas-simna, għat-tiġieġ imrobbija għall-bajd u għall-ispeċijiet minuri ta’ pollam għajr dawk tal-bajd. Ikkonkludiet ukoll li dak il-preparat tqies bħala effikaċi fl-għalf u fl-ilma tax-xorb għall-ispeċijiet kollha ta’ pollam li qed jikbru, inkluż fir-rigward tal-kumpatibbiltà tal-użu tal-koċċidjostati li teżisti awtorizzazzjoni għalihom. L-Awtorità ma dehrilhiex li hemm il-ħtieġa ta’ rekwiżiti speċifiċi rigward il-monitoraġġ ta’ wara l-introduzzjoni fis-suq.

(5)

Għalhekk, f’konformità mal-Artikolu 5(4), il-punt (c) tar-Regolament tal-Kummissjoni (KE) Nru 378/2005 (5), mhuwiex meħtieġ rapport ta’ evalwazzjoni tal-Laboratorju ta’ Referenza.

(6)

Fid-dawl ta’ dan ta’ hawn fuq, il-Kummissjoni jidhrilha li l-preparat ta’ Bifidobacterium animalis ssp. animalis DSM 16284, Ligilactobacillus salivarius DSM 16351 u Enterococcus faecium DSM 21913 jissodisfa l-kundizzjonijiet, kif previst fl-Artikolu 5 tar-Regolament (KE) Nru 1831/2003. Għaldaqstant, jenħtieġ li l-awtorizzazzjoni ta’ dak il-preparat tiġġedded għall-użu fl-għalf u fl-ilma tax-xorb għat-tiġieġ tas-simna, għat-tiġieġ imrobbija għall-bajd u għall-ispeċijiet minuri ta’ pollam tas-simna u mrobbija għall-bajd jew għat-tnissil, u jenħtieġ li l-użu ta’ dak il-preparat jiġi awtorizzat għall-użu fl-għalf u fl-ilma tax-xorb għat-tiġieġ imrobbija għat-tgħammir, għad-dundjani tas-simna u għad-dundjani mrobbija għat-tnissil. Jixraq li tiġi indikata l-kumpatibbiltà tal-użu ta’ dak il-preparat mal-koċċidjostati li ġejjin: il-maduramiċina, l-ammonju, id-diklażuril, il-kloridat tar-robenidina, id-dekokinat, in-narasin, in-nikarbażina, taħlita tan-narasin man-nikarbażina. Barra minn hekk, meta jitqies li dawk il-koċċidjostati ma jistgħux jiġu awtorizzati bħala addittivi tal-għalf għal kull waħda mill-ispeċijiet jew kategoriji elenkati fl-Anness, l-użu simultanju tagħhom fil-preparat ta’ Bifidobacterium animalis ssp. animalis DSM 16284, Ligilactobacillus salivarius DSM 16351 u Enterococcus faecium DSM 21913 jenħtieġ li jkun possibbli biss f’konformità mal-kundizzjonijiet ta’ awtorizzazzjoni rispettivi tagħhom bħala addittivi tal-għalf. Fl-aħħar nett, il-Kummissjoni jidhrilha li jenħtieġ li jittieħdu miżuri protettivi xierqa biex jiġu evitati l-effetti negattivi fuq is-saħħa tal-utenti tal-addittiv.

(7)

Bħala konsegwenza tat-tiġdid tal-awtorizzazzjoni tal-preparat ta’ Bifidobacterium animalis ssp. animalis DSM 16284, Ligilactobacillus salivarius DSM 16351 u Enterococcus faecium DSM 21913 bħala addittiv tal-għalf għall-użu fl-għalf u fl-ilma tax-xorb għat-tiġieġ tas-simna, għat-tiġieġ imrobbija għall-bajd u għall-ispeċijiet minuri ta’ pollam imrobbija għall-bajd jew għat-tnissil, jenħtieġ li jitħassru r-Regolamenti ta’ Implimentazzjoni (UE) Nru 544/2013 u (UE) 2015/1105.

(8)

Billi r-raġunijiet ta’ sikurezza ma jeħtiġux l-applikazzjoni immedjata tal-modifiki fil-kundizzjonijiet tal-awtorizzazzjoni tal-preparat ta’ Bifidobacterium animalis ssp. animalis DSM 16284, Ligilactobacillus salivarius DSM 16351 u Enterococcus faecium DSM 21913 għall-użu fl-għalf u fl-ilma tax-xorb għat-tiġieġ tas-simna, għat-tiġieġ imrobbija għall-bajd u għall-ispeċijiet minuri ta’ pollam tas-simna u mrobbija għall-bajd jew għat-tnissil, jixraq li jiġi previst perjodu tranżitorju għall-partijiet interessati biex iħejju ruħhom ħalli jissodisfaw ir-rekwiżiti l-ġodda li jirriżultaw mill-awtorizzazzjoni.

(9)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,