EUR-Lex Access to European Union law
This document is an excerpt from the EUR-Lex website
Document 32023R1668
Commission Delegated Regulation (EU) 2023/1668 of 25 May 2023 supplementing Directive (EU) 2019/2034 of the European Parliament and of the Council with regard to regulatory technical standards specifying the measurement of risks or elements of risks not covered or not sufficiently covered by the own funds requirements set out in Parts Three and Four of Regulation (EU) 2019/2033 of the European Parliament and of the Council and the indicative qualitative metrics for the amounts of additional own funds (Text with EEA relevance)
Regolament Delegat tal-Kummissjoni (UE) 2023/1668 tal-25 ta’ Mejju 2023 li jissupplimenta d-Direttiva (UE) 2019/2034 tal-Parlament Ewropew u tal-Kunsill fir-rigward tal-istandards tekniċi regolatorji li jispeċifikaw il-kejl tar-riskji jew tal-elementi ta’ riskju li mhumiex koperti jew mhumiex koperti biżżejjed mir-rekwiżiti ta’ fondi proprji stabbiliti fit-Tielet u r-Raba’ Parti tar-Regolament (UE) 2019/2033 tal-Parlament Ewropew u tal-Kunsill u l-metriċi kwalitattivi indikattivi għall-ammonti ta’ fondi proprji addizzjonali (Test b’rilevanza għaż-ŻEE)
Regolament Delegat tal-Kummissjoni (UE) 2023/1668 tal-25 ta’ Mejju 2023 li jissupplimenta d-Direttiva (UE) 2019/2034 tal-Parlament Ewropew u tal-Kunsill fir-rigward tal-istandards tekniċi regolatorji li jispeċifikaw il-kejl tar-riskji jew tal-elementi ta’ riskju li mhumiex koperti jew mhumiex koperti biżżejjed mir-rekwiżiti ta’ fondi proprji stabbiliti fit-Tielet u r-Raba’ Parti tar-Regolament (UE) 2019/2033 tal-Parlament Ewropew u tal-Kunsill u l-metriċi kwalitattivi indikattivi għall-ammonti ta’ fondi proprji addizzjonali (Test b’rilevanza għaż-ŻEE)
C/2023/3282
ĠU L 214, 31.8.2023, p. 1–8
(BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)
In force
|
31.8.2023 |
MT |
Il-Ġurnal Uffiċjali tal-Unjoni Ewropea |
L 214/1 |
REGOLAMENT DELEGAT TAL-KUMMISSJONI (UE) 2023/1668
tal-25 ta’ Mejju 2023
li jissupplimenta d-Direttiva (UE) 2019/2034 tal-Parlament Ewropew u tal-Kunsill fir-rigward tal-istandards tekniċi regolatorji li jispeċifikaw il-kejl tar-riskji jew tal-elementi ta’ riskju li mhumiex koperti jew mhumiex koperti biżżejjed mir-rekwiżiti ta’ fondi proprji stabbiliti fit-Tielet u r-Raba’ Parti tar-Regolament (UE) 2019/2033 tal-Parlament Ewropew u tal-Kunsill u l-metriċi kwalitattivi indikattivi għall-ammonti ta’ fondi proprji addizzjonali
(Test b’rilevanza għaż-ŻEE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat id-Direttiva (UE) 2019/2034 tal-Parlament u tal-Kunsill tas-27 ta’ Novembru 2019 dwar is-superviżjoni prudenzjali tad-ditti tal-investiment u li temenda d-Direttivi 2002/87/KE, 2009/65/KE, 2011/61/UE, 2013/36/UE, 2014/59/UE u 2014/65/UE (1), u b’mod partikolari l-Artikolu 40(6) u r-raba’ subparagrafu tiegħu,
Billi:
|
(1) |
Sabiex tiġi żgurata l-applikazzjoni armonizzata tar-rekwiżit ta’ fondi proprji addizzjonali fl-Unjoni kollha, huwa meħtieġ li jiġi stabbilit approċċ uniformi lejn il-kejl tar-riskji u tal-elementi ta’ riskju li jappoġġa d-determinazzjoni tal-livell ta’ kapital adegwat biex jiġu indirizzati r-riskji materjali kollha li d-ditti tal-investiment jistgħu jkunu esposti għalihom. Għalhekk, jenħtieġ li l-awtoritajiet kompetenti jiżguraw li d-ditti tal-investiment jkollhom fondi proprji addizzjonali adegwati biex ikopru kull kategorija ta’ riskju (Riskju għall-Klijent, Riskju għad-Ditta u Riskju għas-Suq), kif ukoll kwalunkwe riskju materjali ieħor. |
|
(2) |
Sabiex l-awtoritajiet kompetenti jkunu jistgħu jimmonitorjaw b’mod xieraq il-profil tar-riskju tad-ditti tal-investiment u jidentifikaw, jivvalutaw u jikkwantifikaw ir-riskji materjali, huwa meħtieġ li tiġi stabbilita metodoloġija dettaljata u komprensiva proporzjonata għan-natura, l-ambitu u l-kumplessità tal-attivitajiet tad-ditti tal-investiment abbażi tas-sorsi kollha ta’ informazzjoni disponibbli, inkluża l-informazzjoni miġbura għall-fini tal-Artikolu 36 tad-Direttiva (UE) 2019/2034. |
|
(3) |
Il-livell tar-rekwiżit ta’ fondi proprji addizzjonali jitqies adegwat meta jnaqqas il-probabbiltà ta’ falliment tad-ditta tal-investiment u jillimita r-riskju ta’ stralċ diżordinat li joħloq theddid għall-klijenti tad-ditta tal-investiment u għas-suq usa’, inklużi istituzzjonijiet finanzjarji oħra, infrastrutturi tas-suq, jew is-suq kollu kemm hu. Minħabba dan l-objettiv doppju tar-rekwiżit ta’ fondi proprji addizzjonali u f’konformità mal-istruttura tar-rekwiżiti ta’ fondi proprji kif stabbilit fit-Tielet u r-Raba’ Partijiet tar-Regolament (UE) 2019/2033 tal-Parlament Ewropew u tal-Kunsill (2), jenħtieġ li l-awtoritajiet kompetenti jikkunsidraw b’mod separat ir-riskji relatati mal-attivitajiet kurrenti tad-ditti tal-investiment u r-riskju ta’ stralċ diżordinat tan-negozju tad-ditta tal-investiment. |
|
(4) |
Sabiex jiġi żgurat li r-riskji jew l-elementi kollha tar-riskji li ditta tal-investiment tkun esposta għalihom jew toħloq għal oħrajn ikunu koperti kif xieraq, jenħtieġ li d-ditta tal-investiment ikollha biżżejjed fondi proprji, filwaqt li jitqiesu l-mudell tan-negozju, l-iskala u l-kumplessità tal-attivitajiet imwettqa mid-ditta tal-investiment, biex tirreżisti spejjeż operazzjonali addizzjonali relatati ma’ proċess ta’ stralċ ordnat. Sabiex jiġi żgurat li tali fondi proprji jkunu xierqa f’ċirkostanzi ekonomiċi partikolari, jenħtieġ li l-awtoritajiet kompeteni jqisu xenarji ekonomiċi plawżibbli differenti matul il-proċess ta’ rieżami u evalwazzjoni superviżorji mwettaq f’konformità mal-Artikolu 36 tad-Direttiva (UE) 2019/2034. B’mod partikolari, il-kontinwità tal-operat, il-protezzjoni tal-investituri u l-integrità tas-suq ma għandhomx jiġu pperikolati matul il-proċess ta’ stralċ. Għal dan il-għan, jenħtieġ li d-ditta tal-investiment tkun kapaċi, anke matul dak il-proċess, li tassorbi l-ispejjeż u t-telf li ma jkunux akkumpanjati minn volum suffiċjenti ta’ profitti. Minħabba li t-tul tal-proċess ta’ stralċ jista’ jvarja b’mod sinifikanti skont iċ-ċirkostanzi speċifiċi, jenħtieġ li l-awtoritajiet kompetenti jqisu dan meta jistabbilixxu r-rekwiżit ta’ fondi proprji addizzjonali. Barra minn hekk, minħabba l-forom legali potenzjalment diversi li jista’ jkollhom id-ditti tal-investiment, jenħtieġ li l-awtoritajiet kompetenti jqisu l-liġijiet nazzjonali applikabbli dwar l-insolvenza, il-kumpaniji u l-kummerċ, li jistgħu jaffettwaw it-tul tal-proċessi ta’ stralċ, kif ukoll l-ispejjeż u r-riskji assoċjati. |
|
(5) |
Sabiex tiġi żgurata l-proporzjonalità fid-determinazzjoni tar-rekwiżit ta’ fondi proprji addizzjonali, jenħtieġ li r-riskji u l-elementi ta’ riskju li mhumiex koperti jew mhumiex koperti biżżejjed mir-rekwiżit tal-fatturi-K imsemmi fl-Artikolu 15 tar-Regolament (UE) 2019/2033 jitkejlu biss għal dawk id-ditti tal-investiment li huma soġġetti għar-rekwiżit tal-fatturi-K imsemmi f’dak l-Artikolu, u mhux għal ditti żgħar u mhux interkonnessi li jissodisfaw il-kundizzjonijiet stabbiliti fl-Artikolu 12(1) ta’ dak ir-Regolament. Jeżistu riskji oħra li ma huma koperti bl-ebda mod mir-rekwiżiti ta’ fondi proprji stabbiliti fit-Tielet u r-Raba’ Partijiet tar-Regolament (UE) 2019/2033, inklużi riskji espliċitament esklużi minn dawk ir-rekwiżiti ta’ fondi proprji għad-ditti tal-investiment. Għalhekk, huwa meħtieġ li jiġi speċifikat li dawn ir-riskji jiġu vvalutati u mkejla mill-awtoritajiet kompetenti abbażi tad-daqs u l-mudell tan-negozju tad-ditta ta’ investiment kif ukoll abbażi tal-ambitu, in-natura u l-kumplessità tal-attivitajiet tagħha. |
|
(6) |
Sabiex jiġu żgurati l-kejl u l-kopertura korretti tar-riskji kollha li huma msemmija fit-Tielet u r-Raba’ Partijiet tar-Regolament (UE) 2019/2033 iżda li mhumiex koperti bis-sħiħ jew b’mod adegwat minn dawk ir-rekwiżiti, dawn ir-riskji jenħtieġ li jitkejlu b’mod separat għal kull kategorija ta’ riskju (Riskju għall-Klijent, Riskju għas-Suq u Riskju għad-Ditta). Għall-istess raġuni, ir-riskji li mhumiex koperti fil-Partijiet Tlieta u Erbgħa ta’ dak ir-Regolament, inklużi dawk espliċitament esklużi minn dawk ir-rekwiżiti, jenħtieġ li jitkejlu fuq bażi ta’ riskji individwali. Madankollu, jekk il-kejl għal kull kategorija ta’ riskju jew abbażi tar-riskji individwali jkun ta’ piż żejjed jew ma jkunx fattibbli f’każijiet ta’ ditti tal-investiment soġġetti għal rekwiżit kapitali inizjali iktar baxx mir-rekwiżit stabbilit fl-Artikolu 9(1) tad-Direttiva (UE) 2019/2034, jenħtieġ li l-kejl tar-riskji f’dawk il-każijiet jitwettaq fuq livell aggregat, filwaqt li jitqies il-prinċipju tal-proporzjonalità. |
|
(7) |
Sabiex jinsab il-bilanċ it-tajjeb bejn il-kunsiderazzjonijiet prudenzjali u l-applikazzjoni proporzjonali, jenħtieġ li l-kejl tar-riskji fuq livell aggregat ma japplikax għad-ditti tal-investiment li huma soġġetti għar-rekwiżit ta’ kapital inizjali stabbilit fl-Artikolu 9(1) tad-Direttiva (UE) 2019/2034. Jenħtieġ li d-ditti tal-investiment li huma soġġetti għal rekwiżiti ta’ kapital inizjali iktar għolja jiġu vvalutati f’termini ta’ riskji b’kejl għal kull kategorija ta’ riskju u abbażi tar-riskji individwali. |
|
(8) |
Sabiex tiġi żgurata l-konsistenza fil-kejl tar-riskji materjali li d-ditti tal-investiment jistgħu joħolqu għall-oħrajn jew jiffaċċjaw huma stess, jenħtieġ li l-awtoritajiet kompetenti jiddependu fuq sett armonizzat ta’ metriċi kwalitattivi indikattivi minimi. Minħabba li r-riskji jevolvu matul iċ-ċiklu tan-negozju ta’ ditta, jenħtieġ li l-awtoritajiet kompetenti jwettqu mhux biss valutazzjoni statika, iżda jwettqu wkoll analiżi storika tax-xejriet ta’ tali metriċi. Sabiex ir-riskji rilevanti kollha jiġu koperti kif xieraq, jenħtieġ li jintużaw metriċi differenti għad-ditti tal-investiment b’mudelli u b’attivitajiet ta’ negozju differenti. Sabiex ikopru kif xieraq ir-riskji rilevanti kollha tad-ditta tal-investiment, filwaqt li jqisu l-mudell jew l-attività ta’ negozju speċifika, il-forma legali u d-disponibbiltà ta’ data affidabbli, jenħtieġ li l-awtoritajiet kompetenti, b’ċerti kundizzjonijiet li jappartjenu b’mod partikolari għall-ispeċifiċitajiet tal-mudell tan-negozju jew tal-kwalità tad-data ta’ ditta, jaġġustaw il-metriċi u jużaw dawk il-metriċi aġġustati jew, jekk dan ma jkunx possibbli, jużaw metriċi alternattivi li jkunu proporzjonati għad-daqs, il-kumplessità, il-mudell tan-negozju, u l-mudell operatorju tad-ditta tal-investiment u li jiżguraw valutazzjoni adegwata tar-riskji. |
|
(9) |
Dan ir-Regolament huwa bbażat fuq l-abbozz tal-istandards tekniċi regolatorji ppreżentat lill-Kummissjoni mill-Awtorità Bankarja Ewropea. |
|
(10) |
L-Awtorità Bankarja Ewropea wettqet konsultazzjonijiet pubbliċi miftuħa dwar l-abbozz ta’ standards tekniċi regolatorji li fuqu huwa bbażat dan ir-Regolament, analizzat l-ispejjeż u l-benefiċċji relatati potenzjali u talbet il-parir tal-Grupp tal-Partijiet Bankarji Interessati stabbilit f’konformità mal-Artikolu 10 tar-Regolament (UE) Nru 1093/2010 tal-Parlament Ewropew u tal-Kunsill (3), |
ADOTTAT DAN IR-REGOLAMENT:
Artikolu 1
Riskju ta’ stralċ diżordinat
1. L-awtoritajiet kompetenti għandhom, wara li jikkunsidraw il-forma legali, il-mudell tan-negozju, l-istrateġija tan-negozju u tar-riskju, u l-iskala u l-kumplessità tal-attivitajiet ta’ ditta tal-investiment, matul il-proċess ta’ rieżami u evalwazzjoni superviżorji tagħhom imwettaq skont l-Artikolu 36 tad-Direttiva (UE) 2019/2034, ikejlu r-riskju ta’ stralċ diżordinat tan-negozju tad-ditta tal-investiment billi jiddeterminaw l-ammont ta’ kapital li jitqies adegwat biex dik id-ditta tiġi stralċjata b’mod ordnat f’xenarji plawżibbli.
2. Il-kejl imsemmi fil-paragrafu 1 għandu jkun proporzjonat għall-kumplessità, il-profil tar-riskju, u l-ambitu tal-operat tad-ditta tal-investiment, u għall-impatt potenzjali tal-istralċ tagħha fuq il-klijenti u s-swieq, u għandu jinkludi dan li ġej:
|
(a) |
stima tal-perjodu ta’ żmien realistiku għall-istralċ tad-ditta tal-investiment; |
|
(b) |
valutazzjoni tal-kompiti operazzjonali u legali tad-ditta tal-investiment matul il-proċess ta’ stralċ fuq perjodu ta’ żmien realistiku; |
|
(c) |
l-identifikazzjoni u l-valutazzjoni tal-ispejjeż materjali fissi u varjabbli; |
|
(d) |
l-identifikazzjoni u l-valutazzjoni ta’ riskji jew ta’ elementi ta’ riskju materjali li jistgħu jimmaterjalizzaw matul il-proċess ta’ stralċ; |
|
(e) |
kwalunkwe aspett ieħor rilevanti għall-proċess ta’ stralċ. |
3. Meta tapplika d-Direttiva 2014/59/UE tal-Parlament Ewropew u tal-Kunsill (4), l-informazzjoni disponibbli dwar l-azzjonijiet ta’ rkupru u l-arranġamenti ta’ governanza fil-pjan ta’ rkupru jew fil-pjan ta’ rkupru tal-grupp tad-ditta tal-investiment għandha titqies mill-awtoritajiet kompetenti għall-fini tal-paragrafu 2, il-punti (b) u (c), jekk l-awtoritajiet kompetenti jqisu li dik l-informazzjoni hija kredibbli u affidabbli biżżejjed.
4. Għad-ditti tal-investiment soġġetti għar-rekwiżit ta’ kapital inizjali stabbilit fl-Artikolu 9(1) tad-Direttiva (UE) 2019/2034, l-awtoritajiet kompetenti għandhom jinkludu fil-kejl tagħhom dan li ġej:
|
(a) |
l-ispejjeż tal-għeluq, inklużi l-ispejjeż tal-litigazzjoni għall-fini tal-paragrafu 2, il-punt (c), ta’ dan l-Artikolu; |
|
(b) |
it-telf tad-dħul u t-telf tal-valur nett realizzabbli tal-assi li mistennija jiġġarrbu minħabba l-proċess ta’ stralċ għall-fini tal-paragrafu 2, il-punt (d), ta’ dan l-Artikolu. |
5. L-awtoritajiet kompetenti għandhom jidentifikaw u jikkwantifikaw l-ispejjeż, ir-riskji jew l-elementi ta’ riskju materjali u għandhom jiddeterminaw il-kapital meqjus adegwat biex jassorbihom skont il-paragrafi 1 u 2 ta’ dan l-Artikolu.
L-awtoritajiet kompetenti għandhom jużaw il-metriċi kwalitattivi indikattivi rilevanti msemmija fl-Artikolu 6(1) u għandhom jikkombinawhom ma’ analiżi statika u storika tax-xejriet, filwaqt li jagħtu l-ġudizzju espert tagħhom kif xieraq.
6. Il-kapital meqjus adegwat biex ikopri r-riskju ta’ stralċ diżordinat tan-negozju ta’ ditta tal-investiment imkejjel f’konformità ma’ dan l-Artikolu għandu jkun mill-inqas daqs ir-rekwiżit tal-ispejjeż ġenerali fissi ta’ dik id-ditta tal-investiment ikkalkulat f’konformità mal-Artikolu 13 tar-Regolament (UE) 2019/2033.
Artikolu 2
Riskji jew elementi ta’ riskju materjali li mhumiex koperti jew mhumiex koperti kompletament mir-rekwiżit tal-fatturi-K stabbilit fil-Parti Tlieta, it-Titolu II, tar-Regolament (UE) 2019/2033
1. Meta d-ditta tal-investiment ma tissodisfax il-kundizzjonijiet biex tikkwalifika bħala ditta tal-investiment żgħira u mhux interkonnessa kif stabbilit fl-Artikolu 12(1) tar-Regolament (UE) 2019/2033, l-awtoritajiet kompetenti għandhom, wara li jqisu l-mudell tan-negozju, il-forma legali, l-istrateġija tan-negozju u tar-riskju, u l-iskala u l-kumplessità tal-attivitajiet tad-ditta tal-investiment, matul ir-rieżamijiet tagħhom imwettqa f’konformità mal-Artikoli 36 u 37 tad-Direttiva (UE) 2019/2034, ikejlu kwalunkwe riskju materjali jew element ta’ riskju materjali li jirriżulta mill-attivitajiet kontinwi tad-ditta tal-investiment, li dik id-ditta toħloq għaliha nnifisha, għall-klijenti tagħha u għas-suq, u li ma jkunx kopert jew kopert bis-sħiħ mir-rekwiżit tal-fatturi-K stabbilit fil-Parti Tlieta, it-Titolu II tar-Regolament (UE) 2019/2033.
L-awtoritajiet kompetenti għandhom jiddeterminaw il-kapital li jitqies adegwat biex ikopri r-riskji rilevanti relatati mar-rekwiżit tal-fatturi-K.
2. Il-kejl imsemmi fil-paragrafu 1 għandu jsir separatament għal kull kategorija ta’ riskju stabbilita bħala “Riskju għall-Klijent” (RtC), “Riskju għas-Suq” (RtM) u “Riskju għad-Ditta” (RtF) fl-Artikolu 15 tar-Regolament (UE) 2019/2033.
B’deroga mill-ewwel subparagrafu, għad-ditti tal-investiment soġġetti għal rekwiżi ta’ kapital inizjali iktar baxx mir-rekwiżit stabbilit fl-Artikolu 9(1) tad-Direttiva (UE) 2019/2034, meta l-awtoritajiet kompetenti jqisu kwantifikazzjoni iktar granulari mhux fattibbli jew ta’ piż żejjed, il-kejl għandu jitwettaq fuq livell aggregat.
3. Il-kejl imsemmi fil-paragrafu 2 għandu jidentifika u jikkwantifika r-riskji jew l-elementi ta’ riskju materjali għal kull kategorija ta’ riskju, inklużi r-riskji li jirriżultaw mill-użu tal-approċċ tal-mudell intern alternattiv kif imsemmi fl-Artikolu 22, il-punt (c), tar-Regolament (UE) 2019/2033, abbażi tal-metriċi kwalitattiva indikattiva stabbilita fl-Artikolu 6(2), (3) u (4), ta’ dan ir-Regolament u abbażi tal-ġudizzju espert li għandu jingħata mill-awtoritajiet kompetenti.
4. L-awtoritajiet kompetenti għandhom jiżguraw li l-kapital meqjus adegwat biex ikopri r-riskji materjali relatati mar-rekwiżit tal-fatturi-K ma jkunx inqas mir-rekwiżit totali tal-fatturi-K.
Artikolu 3
Riskji jew elementi ta’ riskju materjali li mhumiex mir-rekwiżiti ta’ fondi proprji stabbiliti fit-Tielet u r-Raba’ Partijiet tar-Regolament (UE) 2019/2033
1. Meta d-ditta tal-investiment ma tissodisfax il-kundizzjonijiet biex tikkwalifika bħala ditta tal-investiment żgħira u mhux interkonnessa kif stabbilit fl-Artikolu 12(1) tar-Regolament (UE) 2019/2033, l-awtoritajiet kompetenti għandhom, wara li jqisu l-mudell tan-negozju, il-forma legali, l-istrateġija tan-negozju u tar-riskju, u l-iskala u l-kumplessità tal-attivitajiet tad-ditta tal-investiment, matul il-proċess ta’ rieżami u evalwazzjoni superviżorji tagħhom stabbilit fl-Artikolu 36 tad-Direttiva (UE) 2019/2034, ikejlu kwalunkwe riskju materjali jew element ta’ riskju materjali li jirriżulta minn kwalunkwe attività kurrenti tad-ditta tal-investiment, għajr dawk imsemmija fl-Artikolu 2 ta’ dan ir-Regolament u li mhumiex diġà koperti mir-rekwiżiti ta’ fondi proprji ta’ dik id-ditta stabbiliti fil-Partijiet Tlieta u Erbgħa tar-Regolament (UE) 2019/2033, billi jiddeterminaw abbażi ta’ riskji individwali l-kapital addizzjonali meqjus adegwat biex ikopri r-riskji jew l-elementi ta’ riskju materjali.
2. Il-kejl imsemmi fil-paragrafu 1 għandu jinkludi l-identifikazzjoni, il-valutazzjoni u, fejn xieraq, il-kwantifikazzjoni tal-oqsma ta’ riskju li ġejjin:
|
(a) |
ir-riskji li jiffaċċjaw is-sigurtà tan-network u s-sistemi ta’ informazzjoni tad-ditta tal-investiment sabiex ikunu żgurati l-kunfidenzjalità, l-integrità u d-disponibbiltà tal-proċessi, id-data u l-assi tagħhom; |
|
(b) |
ir-riskju taċ-ċaqliq fir-rata tal-imgħax u r-riskju tal-kreditu li jirriżultaw minn attivitajiet tal-portafoll mhux tan-negozjar. |
Għal ditti tal-investiment soġġetti għal rekwiżit ta’ kapital inizjali iktar baxx mir-rekwiżit stabbilit fl-Artikolu 9(1) tad-Direttiva (UE) 2019/2034, meta l-awtoritajiet kompetenti jqisu kwantifikazzjoni iktar granulari bħala mhux fattibbli jew ta’ piż żejjed, il-kejl għandu jitwettaq fuq livell aggregat.
3. Meta jwettqu l-kejl imsemmi fil-paragrafi 1 u 2, l-awtoritajiet kompetenti għandhom jużaw il-metriċi kwalitattivi indikattivi rilevanti msemmija fl-Artikolu 6(5) u jikkombinawhom ma’ analiżi statika u storika tax-xejriet, filwaqt li jagħtu l-ġudizzju espert tagħhom kif xieraq.
Artikolu 4
Ir-riskju materjali totali li mhuwiex kopert jew mhuwiex kopert b’mod sħiħ mir-rekwiżiti ta’ fondi proprji stabbiliti fit-Tielet u r-Raba’ Partijiet tar-Regolament (UE) 2019/2033
1. L-awtoritajiet kompetenti għandhom jikkalkulaw l-ammont totali ta’ kapital addizzjonali meqjus adegwat biex ikopri r-riskji materjali jew l-elementi ta’ riskju materjali maħluqa mill-attivitajiet kontinwi tad-ditta tal-investiment bħala t-total tal-kapital meqjus adegwat ikkalkulat f’konformità mal-Artikoli 2 u 3.
2. L-awtoritajiet kompetenti għandhom ikejlu r-riskju materjali totali li mhuwiex kopert jew mhuwiex kopert b’mod sħiħ mir-rekwiżiti ta’ fondi proprji stabbiliti fil-Partijiet Tlieta u Erbgħa tar-Regolament (UE) 2019/2033 billi jiddeterminaw il-livell ta’ fondi proprji addizzjonali meħtieġa bħala d-differenza bejn l-ogħla wieħed mill-ammonti kkalkulati f’konformità mal-Artikolu 1 jew il-paragrafu 1 ta’ dan l-Artikolu u r-rekwiżiti ta’ fondi proprji stabbiliti fit-Tielet jew ir-Raba’ Parti tar-Regolament (UE) 2019/2033.
Artikolu 5
Metriċi kwalitattivi ġenerali għad-determinazzjoni tar-rekwiżit ta’ fondi proprji addizzjonali
1. Meta jiddeterminaw l-ammont tar-rekwiżiti ta’ fondi proprji addizzjonali għall-finijiet tal-Artikoli 1, 2 u 3, l-awtoritajiet kompetenti għandhom iqisu dan li ġej:
|
(a) |
l-eżiti tal-proċess ta’ valutazzjoni tal-adegwatezza tal-kapital intern u l-proċess ta’ valutazzjoni tar-riskju intern mid-ditta tal-investiment stabbiliti fl-Artikolu 24 tad-Direttiva (UE) 2019/2034; |
|
(b) |
id-data rrapportata f’konformità mal-Artikolu 54 u 55 tar-Regolament (UE) 2019/2033; |
|
(c) |
l-eżitu tar-rieżamijiet imwettqa skont l-Artikoli 36 u 37 tad-Direttiva (UE) 2019/2034; |
|
(d) |
ir-riżultati ta’ kwalunkwe attività superviżorja oħra; |
|
(e) |
inputs rilevanti oħra, inkluż ġudizzju superviżorju. |
2. L-awtoritajiet kompetenti għandhom jiżguraw il-komparabbiltà fil-kwantifikazzjoni tar-rekwiżit ta’ fondi proprji addizzjonali impost fuq id-ditti tal-investiment kollha fl-ambitu tal-mandat superviżorju tagħhom.
Artikolu 6
Metriċi kwalitattivi indikattivi
1. Għall-finijiet tal-Artikolu 1(5), it-tieni subparagrafu, il-metriċi kwalitattivi indikattivi għandhom ikunu dawn li ġejjin:
|
(a) |
l-għadd ta’ aġenti marbuta mqabbel mat-total tal-persunal; |
|
(b) |
id-durata medja ta’ stralċ fil-ġuriżdizzjoni, filwaqt li titqies il-kumplessità tan-negozju tad-ditta tal-investiment; |
|
(c) |
is-sehem ta’ kuntratti mhux kanċellabbli u d-durata residwa tagħhom; |
|
(d) |
l-identifikazzjoni tas-swieq li fihom id-ditta tal-investiment tkun il-fornitur ewlieni tas-servizz; |
|
(e) |
il-valur u l-likwidità tal-assi fissi li d-ditta tal-investiment ikollha tiddisponi minnhom matul stralċ; |
|
(f) |
il-medja tal-pagamenti għat-terminazzjoni tal-impjieg pagabbli f’każ ta’ stralċ, filwaqt li jitqiesu l-leġiżlazzjoni dwar l-impjiegi u l-kuntratti mal-impjegati. |
2. Għall-finijiet tal-Artikolu 2, fir-rigward tal-kejl tal-RtC, il-metriċi kwalitattivi indikattivi għandhom ikunu dawn li ġejjin:
|
(a) |
l-ammont ta’ flus tal-klijenti miżmuma matul il-ħames (5) snin preċedenti; |
|
(b) |
l-ammont ta’ assi mmaniġġjati matul il-ħames (5) snin preċedenti; |
|
(c) |
l-ammont ta’ assi salvagwardjati u amministrati għall-klijenti matul il-ħames (5) snin preċedenti; |
|
(d) |
l-ammont ta’ telf jew danni mġarrba mid-ditta tal-investiment minħabba ksur tal-obbligi legali jew kuntrattwali tagħha matul mill-inqas il-ħames (5) snin preċedenti, inkluż it-telf li jirriżulta minn dawn:
|
|
(e) |
speċifikament għad-ditti tal-investiment li jżommu flus tal-klijenti, kwalunkwe inabbiltà tad-ditta tal-investiment li tirritorna l-flus tal-klijenti fil-ħin meta jkun meħtieġ u l-konsegwenzi finanzjarji assoċjati matul l-aħħar ħames (5) snin. |
3. Għall-finijiet tal-Artikolu 2, fir-rigward tal-kejl tal-RtM, il-metriċi kwalitattivi indikattivi għandhom ikunu dawn li ġejjin:
|
(a) |
il-varjabbiltà tal-valur tal-pożizzjonijiet, inkluż minħabba kundizzjonijiet tas-suq li qed jinbidlu; |
|
(b) |
is-sehem ta’ prodotti kumplessi u illikwidi fil-portafoll tan-negozjar tad-ditta tal-investiment, f’termini ta’ volum u ta’ introjtu nett; |
|
(c) |
speċifikament għad-ditti tal-investiment li jużaw mudelli interni, id-disponibbiltà ta’ ttestjar retrospettiv regolari tal-mudelli użati għal skopijiet regolatorji. |
4. Għall-finijiet tal-Artikolu 2, fir-rigward tal-kejl tal-RtF, il-metriċi kwalitattivi indikattivi għandhom ikunu dawn li ġejjin:
|
(a) |
il-fluss tan-negozjar ta’ kuljum u l-fluss medju tan-negozjar ta’ kuljum matul il-ħames (5) snin preċedenti; |
|
(b) |
kwalunkwe avveniment operazzjonali sinifikanti relatat mal-fluss tan-negozjar ta’ kuljum u t-telf finanzjarju assoċjat matul il-ħames (5) snin preċedenti, inklużi żbalji fl-ipproċessar; |
|
(c) |
il-varjabbiltà tal-introjtu u d-dħul tad-ditta tal-investiment matul il-ħames (5) snin preċedenti; |
|
(d) |
kwalunkwe telf imġarrab minħabba varjazzjonijiet fil-pożizzjonijiet fi strumenti finanzjarji, muniti barranin u komoditajiet matul il-ħames (5) snin preċedenti; |
|
(e) |
ir-rata ta’ inadempjenza tal-klijenti jew tal-kontropartijiet, u t-telf assoċjat matul il-ħames (5) snin preċedenti; |
|
(f) |
kwalunkwe telf minħabba bidliet materjali fil-valur kontabilistiku tal-assi, inkluż minħabba bidliet fil-kundizzjonijiet tas-suq u fl-affidabbiltà kreditizja tal-kontropartijiet; |
|
(g) |
l-ammonti u l-varjabbiltà ta’ pagamenti jew kontribuzzjonijiet taħt skema ta’ pensjoni b’benefiċċji stabiliti matul il-ħames (5) snin preċedenti; |
|
(h) |
kwalunkwe konċentrazzjoni tal-assi tad-ditta tal-investiment, inkluża l-konċentrazzjoni ta’ klijenti u ta’ kontropartijiet, kif ukoll il-konċentrazzjoni settorjali u ġeografika; |
|
(i) |
is-sehem tal-iskopertura li ma tidhirx fil-karta bilanċjali meta mqabbel mal-assi totali tal-investiment u mar-riskju ta’ kreditu relatat. |
5. Għall-finijiet tal-Artikolu 3, il-metriċi kwalitattivi indikattivi għandhom ikunu dawn li ġejjin:
|
(a) |
kwalunkwe indikazzjoni ta’ riskji finanzjarji sinifikanti mhux indirizzati mir-rekwiżiti tal-fondi proprji stabbiliti fl-Artikolu 11 tar-Regolament (UE) 2019/2033, b’mod partikolari:
|
|
(b) |
kwalunkwe indikazzjoni ta’ riskju sinifikanti tat-teknoloġija tal-informazzjoni u tal-komunikazzjoni (ICT), b’mod partikolari:
|
|
(c) |
kwalunkwe indikazzjoni ta’ riskju sinifikanti taċ-ċaqliq fir-rata tal-imgħax li jirriżulta minn attivitajiet tal-portafoll mhux tan-negozjar, b’mod partikolari:
|
6. L-awtoritajiet kompetenti jistgħu jestendu l-lista ta’ metriċi kwalitattivi indikattivi stabbiliti fil-paragrafi minn 1 sa 5 filwaqt li jiżguraw li tali metriċi addizzjonali jkunu proporzjonati għad-daqs, il-kumplessità, il-mudell tan-negozju u l-mudell operatorju tad-ditta tal-investiment.
7. L-awtoritajiet kompetenti għandhom jaġġustaw il-metriċi stabbiliti fil-paragrafi 1 sa 5 u għandhom jużaw dawk il-metriċi aġġustati meta tapplika kwalunkwe waħda mill-kundizzjonijiet li ġejjin:
|
(a) |
il-metrika ma tkunx xierqa minħabba l-forma legali speċifika, il-bidliet strutturali, in-negozju u l-mudell operatorju tad-ditta tal-investiment; |
|
(b) |
l-istima tal-metrika tkun ta’ piż żejjed minħabba d-daqs u l-kumplessità tal-attivitajiet tad-ditta tal-investiment; |
|
(c) |
l-istima tal-metrika ma tkunx fattibbli minħabba n-nuqqas ta’ data affidabbli, sakemm tali data ma taqax taħt l-Artikoli 54 u 55 tar-Regolament (UE) 2019/2033 jew l-Artikolu 39(2), il-punt (j), tad-Direttiva (UE) 2019/2034; |
|
(d) |
l-istima tal-metrika ma tkunx fattibbli minħabba n-nuqqas ta’ data storika affidabbli, li jagħmel il-perjodu ta’ analiżi storiku irrilevanti. F’każijiet bħal dawn, l-awtoritajiet kompetenti għandhom jillimitaw il-perjodu tal-analiżi storika għaż-żmien li jkun għadda mill-aħħar proċess ta’ rieżami u evalwazzjoni superviżorji stabbilit fl-Artikolu 36 tad-Direttiva (UE) 2019/2034. |
Jekk ma jkunx possibbli għall-awtoritajiet kompetenti li jaġġustaw il-metriċi kif imsemmi fl-ewwel subparagrafu, l-awtoritajiet kompetenti għandhom jużaw metriċi alternattivi kif xieraq, filwaqt li jiżguraw li l-metriċi alternattivi li jużaw jkunu proporzjonati għad-daqs, il-kumplessità, il-mudell tan-negozju u l-mudell operatorju tad-ditta tal-investiment.
Artikolu 7
Dħul fis-seħħ
Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, il-25 ta’ Mejju 2023.
Għall-Kummissjoni
Il-President
Ursula VON DER LEYEN
(1) ĠU L 314, 5.12.2019, p. 64.
(2) Ir-Regolament (UE) 2019/2033 tal-Parlament Ewropew u tal-Kunsill tas-27 ta’ Novembru 2019 dwar ir-rekwiżiti prudenzjali tad-ditti tal-investiment u li jemenda r-Regolamenti (UE) Nru 1093/2010, (UE) Nru 575/2013, (UE) Nru 600/2014 u (UE) Nru 806/2014 (ĠU L 314, 5.12.2019, p. 1).
(3) Ir-Regolament (UE) Nru 1093/2010 tal-Parlament Ewropew u tal-Kunsill tal-24 ta’ Novembru 2010 li jistabbilixxi Awtorità Superviżorja Ewropea (Awtorità Bankarja Ewropea), u li jemenda d-Deċiżjoni Nru 716/2009/KE u jħassar id-Deċiżjoni tal-Kummissjoni 2009/78/KE (ĠU L 331, 15.12.2010, p. 12).
(4) Id-Direttiva 2014/59/UE tal-Parlament Ewropew u tal-Kunsill tal-15 ta’ Mejju 2014 li tistabbilixxi qafas għall-irkupru u r-riżoluzzjoni ta’ istituzzjonijiet ta’ kreditu u ditti ta’ investiment u li temenda d-Direttiva tal-Kunsill 82/891/KEE u d-Direttivi 2001/24/KE, 2002/47/KE, 2004/25/KE, 2005/56/KE, 2007/36/KE, 2011/35/UE, 2012/30/UE u 2013/36/UE, u r-Regolamenti (UE) Nru 1093/2010 u (UE) Nru 648/2012, tal-Parlament Ewropew u tal-Kunsill (ĠU L 173, 12.6.2014, p. 190).
(5) Id-Direttiva 2014/65/UE tal-Parlament Ewropew u tal-Kunsill tal-15 ta’ Mejju 2014 dwar is-swieq fl-istrumenti finanzjarji u li temenda d-Direttiva 2002/92/KE u d-Direttiva 2011/61/UE (ĠU L 173, 12.6.2014, p. 349).