(1)

Ir-Regolament (UE) 2016/429 fost l-oħrajn jistipula r-rekwiżiti tas-saħħa tal-annimali għad-dħul fl-Unjoni ta’ konsenji ta’ annimali, ta’ prodotti ġerminali u ta’ prodott ta’ oriġini mill-annimali, u japplika mill-21 ta’ April 2021. Wieħed minn dawk ir-rekwiżiti dwar is-saħħa tal-annimali hu li dawk il-konsenji jridu jkunu ġejjin minn pajjiż terz jew territorju, żona jew kompartiment tiegħu, elenkat f’konformità mal-Artikolu 230(1) ta’ dak ir-Regolament.

(2)

Ir-Regolament Delegat tal-Kummissjoni (UE) 2020/692 (2) jissupplimenta r-Regolament (UE) 2016/429 rigward ir-rekwiżiti tas-saħħa tal-annimali għad-dħul fl-Unjoni ta’ konsenji ta’ ċerti speċijiet u kategoriji ta’ annimali, ta’ prodotti ġerminali u ta’ prodotti li joriġinaw mill-annimali minn pajjiżi terzi jew mit-territorji, miż-żoni, jew mill-kompartimenti tagħhom. Ir-Regolament Delegat (UE) 2020/692 jipprevedi li konsenji ta’ annimali, ta’ prodotti ġerminali u ta’ prodotti li joriġinaw mill-annimali li jidħlu fil-kamp ta’ applikazzjoni tiegħu jistgħu jingħataw permess jidħlu fl-Unjoni biss jekk jiġu minn pajjiż terz jew mit-territorju, minn żona jew minn kompartiment tiegħu li jkun elenkat għall-ispeċijiet u l-kategoriji ta’ annimali, ta’ prodotti ġerminali u ta’ prodotti li joriġinaw mill-annimali partikolari, f’konformità mar-rekwiżiti tas-saħħa tal-annimali stabbiliti f’dak ir-Regolament Delegat.

(3)

Ir-Regolament ta’ Implimentazzjoni tal-Kummissjoni (UE) 2021/404 (3) jistabbilixxi l-listi tal-pajjiżi terzi jew it-territorji, iż-żoni jew il-kompartimenti tagħhom, li minnhom huwa permess li jidħlu fl-Unjoni dawk l-ispeċijiet u l-kategoriji ta’ annimali, prodotti ġerminali u prodotti li joriġinaw mill-annimali li jidħlu fil-kamp ta’ applikazzjoni tar-Regolament Delegat (UE) 2020/692. Il-listi u ċerti regoli ġenerali li jikkonċernaw il-listi huma stabbiliti fl-Annessi I sa XXII ta’ dak ir-Regolament Delegat.

(4)

L-Anness IV tar-Regolament ta’ Implimentazzjoni (UE) 2021/404 jistabbilixxi l-lista ta’ pajjiżi terzi, territorji jew żoni tagħhom awtorizzati għad-dħul fl-Unjoni ta’ konsenji ta’ annimali ekwini.

(5)

Sabiex tospita l-avvenimenti ekwestri tad-19-il Logħob Asjatiku, iċ-Ċina talbet ir-rikonoxximent ta’ żona ħielsa mill-mard tal-ekwini stabbilita fiċ-Ċentru Ekwestru ta’ Tonglu fil-parti tal-belt ta’ Yaolin fil-parti tal-Majjistral tal-Kontea ta’ Tonglu, id-Distrett ta’ Fuyang, il-Muniċipalità ta’ Hangzhou, il-Provinċja ta’ Zhejiang fiċ-Ċina, konnessa mal-Ajruport Internazzjonali ta’ Hangzhou Xiaoshan. Għadd ta’ żwiemel irreġistrati li joriġinaw mill-Unjoni se jieħdu sehem fid-19-il Logħob Asjatiku.

(6)

Fid-dawl tan-natura temporanja ta’ dawk l-avvenimenti ekwestri, jixraq li tiġi prevista approvazzjoni temporanja biss ta’ dik iż-żona ħielsa mill-mard tal-ekwini mill-15 ta’ Settembru 2023 sat-13 ta’ Novembru 2023 biex jingħata biżżejjed żmien biex iż-żwiemel irreġistrati li joriġinaw mill-Unjoni jidħlu u joħorġu minn dik iż-żona.

(7)

Iċ-Ċina pprovdiet il-garanziji, b’mod partikolari fir-rigward tan-notifikabbiltà fil-pajjiż tal-mard elenkat imsemmi fil-punt 1 tal-Anness I tar-Regolament Delegat (UE) 2020/692 rilevanti għall-annimali ekwini, u garanziji rigward il-konformità jew l-ekwivalenza mar-rekwiżiti rilevanti tas-saħħa tal-annimali li japplikaw fl-Unjoni. Barra minn hekk, iċ-Ċina infurmat lill-Kummissjoni li l-grupp kollu ta’ żwiemel irreġistrati li joriġinaw mill-Unjoni u li se jikkompetu f’dawk l-avvenimenti, se jinżammu separati mill-ekwidi kollha li mhumiex tal-istess oriġini u status ta’ saħħa.

(8)

Fl-istess ħin, l-awtodikjarazzjoni miċ-Ċina tal-istabbiliment ta’ żona ħielsa mill-mard tal-ekwini għad-19-il Logħob Asjatiku ġiet ippubblikata fil-paġna web tal-Organizzazzjoni Dinjija għas-Saħħa tal-Annimali (4).

(9)

Fid-dawl ta’ dawk il-garanziji u tal-informazzjoni li pprovdiet iċ-Ċina, jenħtieġ li jkun permess għal perjodu limitat id-dħul mill-ġdid ta’ żwiemel irreġistrati minn żona ddeżinjata bħala ħielsa mill-mard tal-ekwini f’dak il-pajjiż terz wara l-esportazzjoni temporanja, f’konformità mar-rekwiżiti tar-Regolament Delegat (UE) 2020/692, li jkunu akkumpanjati minn ċertifikat tas-saħħa tal-annimali maħruġ f’konformità ma’ mudell stabbilit fil-Kapitoli 16 u 17 tal-Anness II tar-Regolament ta’ Implimentazzjoni tal-Kummissjoni (UE) 2021/403 (5). Jenħtieġ li dan il-perjodu jkun limitat għal massimu ta’ 60 jum f’konformità mal-punt II.3.2, it-tieni għażla, tal-mudell taċ-ċertifikat tas-saħħa tal-annimali stabbilit fil-Kapitolu 17 tal-Anness II tar-Regolament ta’ Implimentazzjoni (UE) 2021/403.

(10)

Għalhekk jenħtieġ li l-Anness IV tar-Regolament ta’ Implimentazzjoni (UE) 2021/404 jiġi emendat skont dan.

(11)

Billi r-Regolament ta’ Implimentazzjoni (UE) 2021/404 japplika mill-21 ta’ April 2021, fl-interess taċ-ċertezza ġuridika, u għall-faċilitazzjoni tan-negozju, jenħtieġ li l-emendi li jridu jsiru fir-Regolament ta’ Implimentazzjoni (UE) 2021/404 b’dan ir-Regolament isiru effettivi b’urġenza.

(12)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,