(1)

Abbażi ta’ valutazzjoni preliminari, ir-Regolament ta’ Implimentazzjoni tal-Kummissjoni (UE) 2018/2019 (2) jistabbilixxi lista ta’ pjanti, prodotti tal-pjanti u oġġetti oħra ta’ riskju għoli.

(2)

Ir-Regolament ta’ Implimentazzjoni tal-Kummissjoni (UE) 2018/2018 (3) jistabbilixxi regoli speċifiċi dwar il-proċedura li għandha tiġi segwita sabiex issir il-valutazzjoni tar-riskju msemmija fl-Artikolu 42(4) tar-Regolament (UE) 2016/2031 għal dawk il-pjanti, il-prodotti tal-pjanti u oġġetti oħra ta’ riskju għoli.

(3)

Wara valutazzjoni preliminari, fl-Anness tar-Regolament ta’ Implimentazzjoni (UE) 2018/2019 iddaħħlu 34 ġeneru u speċi waħda ta’ pjanti għat-tħawwil li joriġinaw mill-pajjiżi terzi, bħala pjanti ta’ riskju għoli. Dak l-Anness jinkludi l-ġeneru Malus Mill.

(4)

Fit-18 ta’ Ottubru 2019, l-Ukrajna ressqet talba lill-Kummissjoni għall-esportazzjoni lejn l-Unjoni ta’ salvaġġ ta’ bejn sena u tliet snin u pjanti mlaqqmin għat-tħawwil tal-Malus domestica li huma inattivi u bl-għeruq mikxufin. Dik it-talba kienet sostnuta mid-dossier tekniku rilevanti.

(5)

Fit-30 ta’ Settembru 2021, l-Awtorità Ewropea dwar is-Sigurtà fl-Ikel (“l-Awtorità”) adottat opinjoni xjentifika dwar il-valutazzjoni tar-riskju ta’ komodità tal-pjanti għat-tħawwil tal-Malus domestica mill-Ukrajna (4). L-Awtorità identifikat il-Lopholeucaspis japonica, l-Eotetranychus prunicola, il-virus tar-ringspot tat-tabakk u l-Erwinia amylovora bħala pesti rilevanti għal dawk il-pjanti għat-tħawwil.

(6)

L-Awtorità evalwat il-miżuri ta’ mitigazzjoni tar-riskju deskritti fid-dossier għal-Lopholeucaspis japonica, l-Eotetranychus prunicola u l-virus tar-ringspot tat-tabakk u stmat il-probabbiltà tal-ħelsien tal-komodità minn dawk il-pesti. Fir-rigward tal-Erwinia amylovora, l-Awtorità evalwat jekk ir-rekwiżiti speċjali għall-introduzzjoni u l-moviment fiż-żoni protetti speċifikati, elenkati fil-punt 9 tal-Anness X tar-Regolament ta’ Implimentazzjoni tal-Kummissjoni (UE) 2019/2072 (5), tal-pjanti Malus Mill., għajr il-frott u ż-żrieragħ, humiex issodisfati.

(7)

Abbażi tal-opinjoni xjentifika tal-Awtorità, ir-riskju fitosanitarju mill-introduzzjoni fl-Unjoni ta’ salvaġġ inattiv ta’ mhux aktar minn tliet snin, bl-għeruq mikxufin u ta’ pjanti mlaqqmin għat-tħawwil tal-Malus domestica li joriġinaw mill-Ukrajna jitqies aċċettabbli, sakemm ikun hemm konformità mar-rekwiżiti tal-importazzjoni speċjali rispettivi stabbiliti fl-Anness VII tar-Regolament ta’ Implimentazzjoni (UE) 2019/2072 u mar-rekwiżiti speċjali għaż-żoni protetti stabbiliti fil-punt 9 tal-Anness X tiegħu.

(8)

Il-Lopholeucapsis japonica u l-virus tar-ringspot tat-tabakk huma elenkati bħala pesti ta’ kwarantina fl-Unjoni fl-Anness II tar-Regolament ta’ Implimentazzjoni (UE) 2019/2072. L-Erwinia amylovora hija elenkata bħala pest ta’ kwarantina f’żona protetta u bħala pest irregolat mhux ta’ kwarantina fl-Unjoni fl-Anness III u fl-Anness IV tar-Regolament ta’ Implimentazzjoni (UE) 2019/2072 rispettivament, u fil-punt 9 tal-Anness X ta’ dak ir-Regolament huma stabbiliti rekwiżiti speċjali għall-prevenzjoni tad-dħul u t-tixrid tal-pest fiż-żoni protetti speċifikati.

(9)

L-Eotetranychus prunicola għadha mhijiex inkluża fil-lista tal-pesti ta’ kwarantina fl-Unjoni. Madankollu, abbażi tal-evidenza pprovduta mill-Istati Membri, l-impatt ta’ dak il-pest fuq il-pjanti ospitanti tiegħu fl-Unjoni mhuwiex sinifikanti. Għaldaqstant, ma huma meħtieġa l-ebda rekwiżiti tal-importazzjoni fir-rigward ta’ dak il-pest.

(10)

Għalhekk, jixraq li s-salvaġġ inattiv ta’ mhux aktar minn tliet snin, bl-għeruq mikxufin, u l-pjanti mlaqqmin għat-tħawwil tal-Malus domestica li joriġinaw mill-Ukrajna ma jibqgħux jitqiesu bħala pjanti ta’ riskju għoli.

(11)

Ir-Regolament ta’ Implimentazzjoni tal-Kummissjoni (UE) 2020/1361 (6) emenda r-Regolament ta’ Implimentazzjoni (UE) 2018/2019 billi jispeċifika li huwa pprojbit li tiġi introdotta fl-Unjoni l-Malus Mill., għajr il-pjanti ta’ sena sa sentejn, bl-għeruq mikxufin, inattivi u mlaqqmin għat-tħawwil tal-Malus domestica li joriġinaw mis-Serbja. Madankollu, permezz ta’ ommissjoni, dak ir-Regolament ma jispeċifikax li dawk il-pjanti għat-tħawwil jenħtieġ li jkunu mingħajr weraq, f’konformità mal-opinjoni xjentifika rilevanti tal-EFSA (7). Għalhekk, jenħtieġ li dik l-ommissjoni tiġi kkoreġuta.

(12)

Għalhekk, l-Anness tar-Regolament ta’ Implimentazzjoni (UE) 2018/2019 jenħtieġ li jiġi emendat u kkoreġut kif xieraq.

(13)

Jenħtieġ li sabiex ikun hemm konformità mal-obbligi tal-Unjoni li jirriżultaw mill-ftehim tal-Organizzazzjoni Dinjija tal-Kummerċ dwar l-applikazzjoni ta’ miżuri sanitarji u fitosanitarji (8), l-importazzjoni ta’ salvaġġ inattiv ta’ mhux aktar minn tliet snin, bl-għeruq mikxufin, u ta’ pjanti mlaqqmin għat-tħawwil tal-Malus domestica li joriġinaw mill-Ukrajna tissokta fl-iqsar żmien possibbli.

(14)

Il-miżuri previsti f’dan ir-Regolament huma konformi mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,