Access to European Union law
<a href="https://eur-lex.europa.eu/content/help/eurlex-content/experimental-features.html" target="_blank">More about the experimental features corner</a>
Choose the experimental features you want to try
EUR-Lex
Access to European Union law

This document is an excerpt from the EUR-Lex website

You are here
Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search

Document 32022R0695

    Regolament ta’ Implimentazzjoni tal-Kummissjoni (UE) 2022/695 tat-2 ta’ Mejju 2022 li jistabbilixxi regoli għall-applikazzjoni tad-Direttiva 2006/22/KE tal-Parlament Ewropew u tal-Kunsill fir-rigward tal-formula komuni għall-kalkolu tal-klassifikazzjoni tar-riskju tal-impriżi tat-trasport

    C/2022/2743

    ĠU L 129, 3.5.2022, p. 33–36 (BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)

    Legal status of the document In force

    ELI: http://data.europa.eu/eli/reg_impl/2022/695/oj

    3.5.2022   

    MT

    Il-Ġurnal Uffiċjali tal-Unjoni Ewropea

    L 129/33

    REGOLAMENT TA’ IMPLIMENTAZZJONI TAL-KUMMISSJONI (UE) 2022/695

    tat-2 ta’ Mejju 2022

    li jistabbilixxi regoli għall-applikazzjoni tad-Direttiva 2006/22/KE tal-Parlament Ewropew u tal-Kunsill fir-rigward tal-formula komuni għall-kalkolu tal-klassifikazzjoni tar-riskju tal-impriżi tat-trasport

    IL-KUMMISSJONI EWROPEA,

    Wara li kkunsidrat it-Trattat dwar il-Funzjonament tal-Unjoni Ewropea,

    Wara li kkunsidrat id-Direttiva tal-Parlament Ewropew u tal-Kunsill 2006/22/KE tal-15 ta Marzu 2006 dwar il-kundizzjonijiet minimi għall-implimentazzjoni tar-Regolamenti (KE) Nru 561/2006 u (UE) Nru 165/2014 u d-Direttiva 2002/15/KE dwar il-leġiżlazzjoni soċjali li għandha x’taqsam ma’ attivitajiet tat-trasport bit-triq u li tħassar id-Direttiva tal-Kunsill 88/599/KEE (1), u b’mod partikolari l-Artikolu 9(1) tagħha,

    Billi:

    (1)

    L-infurzar effettiv u kosteffiċjenti tal-leġiżlazzjoni tal-Unjoni dwar it-trasport bit-triq huwa ta’ importanza kbira għat-titjib tas-sikurezza fit-toroq, tal-kundizzjonijiet tax-xogħol tax-xufiera u tal-protezzjoni soċjali u għall-iżgurar ta’ kompetizzjoni ġusta bejn l-impriżi tat-trasport bit-triq.

    (2)

    Is-sistemi nazzjonali ta’ klassifikazzjoni tar-riskju introdotti mill-Istati Membri biex jimmiraw aħjar il-kontrolli tal-impriżi bi klassifikazzjoni ta’ riskju għoli huma bbażati fuq metodi ta’ kalkolu nazzjonali differenti. Dan ixekkel il-komparabbiltà u l-iskambju ta’ informazzjoni dwar il-punteġġi tar-riskju fil-kuntest tal-infurzar transfruntier.

    (3)

    It-tieni subparagrafu tal-Artikolu 9(1) tad-Direttiva 2006/22/KE jirrikjedi li l-Kummissjoni tistabbilixxi, permezz ta’ atti ta’ implimentazzjoni, formula komuni għall-kalkolu tal-klassifikazzjoni tar-riskju ta’ impriża.

    (4)

    Meta tistabbilixxi din il-formula, il-Kummissjoni jenħtieġ li tqis il-ksur kollu li jista’ jaffettwa l-klassifikazzjoni tar-riskju tal-impriżi, li jinkludi ksur tar-Regolament (KE) Nru 561/2006 tal-Parlament Ewropew u tal-Kunsill (2), tar-Regolament (UE) Nru 165/2014 tal-Parlament Ewropew u tal-Kunsill (3), tad-dispożizzjonijiet nazzjonali li jittrasponu d-Direttiva 2002/15/KE tal-Parlament Ewropew u tal-Kunsill (4), u l-ksur speċifikat fl-Artikolu 6 tar-Regolament (KE) Nru 1071/2009 tal-Parlament Ewropew u tal-Kunsill (5).

    (5)

    Il-formula komuni jenħtieġ li tqis l-għadd, is-serjetà u l-frekwenza tal-okkorrenza ta’ ksur, ir-riżultati tal-kontrolli meta ma jkun instab ebda ksur kif ukoll jekk impriża tat-trasport bit-triq kinitx qed tagħmel użu mit-takografu intelliġenti, skont il-Kapitolu II tar-Regolament (UE) Nru 165/2014, fil-vetturi kollha tagħha.

    (6)

    Il-formula komuni għall-kalkolu tal-klassifikazzjoni tar-riskju ta’ impriża jenħtieġ li tikkontribwixxi b’mod sinifikanti għall-armonizzazzjoni tal-prattiki ta’ infurzar fl-Unjoni kollha, billi tiżgura li s-sewwieqa u l-impriżi tat-trasport kollha jiġu ttrattati b’mod ugwali fir-rigward tal-kontrolli u s-sanzjonijiet skont ir-regoli applikabbli tal-Unjoni.

    (7)

    Meta l-miżuri previsti f’dan ir-Regolament ikunu jinvolvu l-ipproċessar ta’ data personali, dawn jenħtieġ li jitwettqu f’konformità mad-dritt tal-Unjoni dwar il-protezzjoni tad-data personali u l-privatezza, b’mod partikolari r-Regolament (UE) 2016/679 tal-Parlament Ewropew u tal-Kunsill (6), u, fejn applikabbli, id-Direttiva 2002/58/KE tal-Parlament Ewropew u tal-Kunsill (7).

    (8)

    Il-miżuri previsti f’dan ir-Regolament huma skont l-opinjoni tal-Kumitat stabbilit bl-Artikolu 42(1) tar-Regolament (UE) Nru 165/2014,

    ADOTTAT DAN IR-REGOLAMENT:

    Artikolu 1

    Il-formula komuni għall-kalkolu tal-klassifikazzjoni tar-riskju ta’ impriża tat-trasport u r-rekwiżiti għall-applikazzjoni tagħha huma stabbiliti fl-Anness.

    Artikolu 2

    Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

    Dan ir-Regolament għandu jorbot fl-intier tiegħu u japplika direttament fl-Istati Membri kollha.

    Magħmul fi Brussell, it-2 ta’ Mejju 2022.

    Għall-Kummissjoni

    Il-President

    Ursula VON DER LEYEN

    (1)   ĠU L 91, 29.3.2019, p. 45.

    (2)  Ir-Regolament (KE) Nru 561/2006 tal-Parlament Ewropew u tal-Kunsill tal-15 ta’ Marzu 2006 dwar l-armonizzazzjoni ta’ ċerta leġiżlazzjoni soċjali li għandha x’taqsam mat-trasport bit-triq u li jemenda r-Regolamenti tal-Kunsill (KEE) Nru 3821/85 u (KE) Nru 2135/98 u li jħassar ir-Regolament tal-Kunsill (KEE) Nru 3820/85 (ĠU L 102, 11.4.2006, p. 1).

    (3)  Ir-Regolament (UE) Nru 165/2014 tal-Parlament Ewropew u tal-Kunsill tal-4 ta’ Frar 2014 dwar takografi fit-trasport bit-triq, li jħassar ir-Regolament tal-Kunsill (KEE) Nru 3821/85 dwar apparat ta’ reġistrazzjoni għat-trasport bit-triq u li jemenda r-Regolament (KE) Nru 561/2006 tal-Parlament Ewropew u tal-Kunsill dwar l-armonizzazzjoni ta’ ċerta leġiżlazzjoni soċjali li għandha x’taqsam mat-trasport bit-triq (ĠU L 60, 28.2.2014, p. 1).

    (4)  Id-Direttiva 2002/15/KE tal-Parlament Ewropew u tal-Kunsill tal-11 ta’ Marzu 2002 dwar l-organizzazzjoni tal-ħin tax-xogħol ta’ ħaddiema li jwettqu attivitajiet mobbli tat-trasport fit-toroq (ĠU L 80, 23.3.2002, p. 35).

    (5)  Ir-Regolament (KE) Nru 1071/2009 tal-Parlament Ewropew u tal-Kunsill tal-21 ta’ Ottubru 2009 li jistabbilixxi regoli komuni dwar il-kundizzjonijiet li għandhom jiġu rrispettati għall-eżerċizzju tal-professjoni ta’ operatur tat-trasport bit-triq u li jħassar id-Direttiva tal-Kunsill 96/26/KE (ĠU L 300, 14.11.2009, p. 51)..

    (6)  Ir-Regolament (UE) 2016/679 tal-Parlament Ewropew u tal-Kunsill tas-27 ta’ April 2016 dwar il-protezzjoni tal-persuni fiżiċi fir-rigward tal-ipproċessar ta’ data personali u dwar il-moviment liberu ta’ tali data, u li jħassar id-Direttiva 95/46/KE (ĠU L 119, 4.5.2016, p. 1).

    (7)  Id-Direttiva 2002/58/KE tal-Parlament Ewropew u tal-Kunsill tat-12 ta’ Lulju 2002 dwar l-ipproċessar tad-data personali u l-protezzjoni tal-privatezza fis-settur tal-komunikazzjoni elettronika (ĠU L 201, 31.7.2002, p. 37).

    ANNESS

    FORMULA KOMUNI GĦALL-KALKOLU TAL-KLASSIFIKAZZJONI TAR-RISKJU TAL-IMPRIŻI TAT-TRASPORT U R-REKWIŻITI GĦALL-APPLIKAZZJONI TAGĦHA

    (1)

    Il-klassifikazzjoni tar-riskju globali ta’ impriża tat-trasport għandha tiġi kkalkulata bl-użu tal-formula komuni li ġejja:

    Image 1

    Fejn:

    R

    —

    il-klassifikazzjoni tar-riskju globali tal-impriża

    n

    —

    l-għadd ta’ ksur ta’ tip partikolari għal kull kontroll individwali (it-tipi kollha ta’ kontrolli).

    i

    —

    kontroll individwali

    v

    —

    punteġġ ponderat skont it-tip/is-serjetà tal-ksur (MI/SI/VSI/MSI)

    MSI

    —

    l-iktar ksur serju

    VSI

    —

    ksur serju ħafna

    SI

    —

    ksur serju

    MI

    —

    ksur minuri

    N

    —

    l-għadd ta’ vetturi kkontrollati waqt kontroll individwali

    r

    —

    l-għadd totali ta’ kontrolli fuq l-impriża

    g

    —

    ponderazzjoni għall-użu tat-takografu intelliġenti skont il-Kapitolu II tar-Regolament (UE) Nru 165/2014

    (2)

    Il-prinċipji u l-elementi li ġejjin għandhom jintużaw meta tiġi applikata l-formula komuni:

    (3)

    Il-perjodu ta’ żmien li matulu ksur jingħadd fil-formula, għandu jkun ta’ sentejn.

    (4)

    L-operaturi tat-trasport għandhom jiġu kklassifikati fil-meded ta’ riskju li ġejjin abbażi tal-punteġġ tagħhom:

    —

    operaturi li fuqhom ma sar l-ebda kontroll (medda griża)

    —

    0-100 punt: operaturi b’riskju baxx (medda ħadra)

    —

    101-200 punt: operaturi b’riskju medju (medda ambra)

    —

    201 punt jew iktar: operaturi b’riskju għoli (medda ħamra)

    (5)

    Il-punteġġ ponderat ta’ kontroll individwali (“i”) għandu jiġi kkalkulat billi jiġu applikati l-fatturi ta’ ponderazzjoni li ġejjin (“v”) skont it-tip ta’ ksur:

     

    MI = 1

     

    SI = 10

     

    VSI = 30

     

    MSI = 90

    (6)

    Il-klassifikazzjoni tar-riskju finali ta’ impriża għandha tqis l-għadd totali ta’ kontrolli mwettqa (“r”), kemm mal-ġenb tat-triq kif ukoll fuq il-post tagħha, inklużi dawk il-kontrolli fejn ma ġie identifikat l-ebda ksur.

    (7)

    Il-kontrolli fejn ma jinstab l-ebda ksur għandhom jiġu rreġistrati b’punteġġ ta’ żero.

    (8)

    Il-punteġġ ponderat ta’ kontroll individwali għandu jqis il-vetturi kollha kkontrollati (“N”).

    (9)

    Id-data tal-ksur li titqies fil-formula komuni titqies bħala d-data li fiha l-ksur ikun sar definittiv, jiġifieri ma jkunx aktar soġġett għal rieżami. Fil-formula, il-ksur għandu jingħadd darba biss.

    (10)

    Jekk kontroll fuq il-post ta’ impriża tat-trasport jistabbilixxi li l-flotta kollha tagħha hija mgħammra bit-takografu intelliġenti skont il-Kapitolu II tar-Regolament (UE) Nru 165/2014, il-punteġġ finali tagħha għandu jiġi mmultiplikat b’fattur ta’ 0,9 (“g”).
    Top