(1)

L-Artikolu 18(1) tal-Ftehim dwar il-ħruġ tar-Renju Unit tal-Gran Brittanja u l-Irlanda ta’ Fuq mill-Unjoni Ewropea u mill-Komunità Ewropea tal-Enerġija Atomika (2) (il-“Ftehim”) jipprevedi li l-Istat ospitanti jista’ jesiġi li ċ-ċittadini tal-Unjoni jew iċ-ċittadini tar-Renju Unit, il-membri tal-familji rispettivi tagħhom u persuni oħra, li jirrisjedu fit-territorju tiegħu b’konformità mal-kundizzjonijiet stabbiliti fit-Titolu II tal-Ftehim, japplikaw għal status ta’ residenza ġdid li jagħti d-drittijiet taħt dan it-Titolu u dokument li jattesta tali status.

(2)

Kif hu previst fl-Artikolu 18(4) tal-Ftehim, fejn Stat ospitanti jkun għażel li ma jesiġix li ċ-ċittadini tar-Renju Unit, il-membri tal-familja tagħhom, u persuni oħra, residenti fit-territorju tiegħu f’konformità mal-kundizzjonijiet stabbiliti f’dan it-Titolu II ta’ dan il-Ftehim, japplikaw għall-istatus ta’ residenza l-ġdid bħala kundizzjoni għar-residenza legali, dawk eliġibbli għad-drittijiet ta’ residenza għandu jkollhom id-dritt li jirċievu, b’konformità mal-kundizzjonijiet stabbiliti fid-Direttiva 2004/38/KE tal-Parlament Ewropew u tal-Kunsill (3), dokument ta’ residenza li jinkludi dikjarazzjoni li dan ikun inħareġ b’konformità ma’ dan il-Ftehim.

(3)

L-Artikolu 26 tal-Ftehim jipprevedi li l-Istat fejn jaħdmu ċ-ċittadini tar-Renju Unit jista’ jesiġi li jkollhom drittijiet bħala ħaddiema transkonfinali taħt it-Titolu II tal-Ftehim japplikaw għal dokument li jiċċertifika li għandhom tali drittijiet skont dan it-Titolu u li dawk iċ-ċittadini għandu jkollhom id-dritt li jinħarġilhom tali dokument.

(4)

Ir-Regolament tal-Kunsill (KE) Nru 1030/2002 (4) jippreskrivi format uniformi għall-permessi ta’ residenza għaċ-ċittadini ta’ pajjiż terz. Dan il-format jinkludi l-informazzjoni kollha neċessarja u jissodisfa standards tekniċi għolja, partikolarment fir-rigward ta’ salvagwardji kontra l-falsifikazzjoni.

(5)

Għaldaqstant, wara l-ħruġ tar-Renju Unit tal-Gran Brittanja u l-Irlanda ta’ Fuq mill-Unjoni Ewropea, dan il-format jenħtieġ li jintuża wkoll għad-dokumenti ta’ residenza li jridu jinħarġu liċ-ċittadini tar-Renju Unit, lill-membri tal-familji rispettivi tagħhom u lil persuni oħra li jirrisjedu fit-territorju ta’ Stat Membru b’konformità mal-kundizzjonijiet stipulati fit-Titolu II tal-Ftehim.

(6)

Dan il-format huwa idoneu wkoll għad-dokumenti li jridu jinħarġu liċ-ċittadini tar-Renju Unit li jkollhom drittijiet bħala ħaddiema li jaħdmu bejn il-fruntieri fl-Istat Membru fejn jaħdmu.

(7)

Billi dawk id-dokumenti se jintużaw bħala prova tad-drittijiet previsti taħt it-Titolu II tal-Ftehim, l-entrata taħt in-numru 10 “Tip ta’ permess” jenħtieġ li tinkludi dikjarazzjoni li tindika li dawk id-dokumenti jkunu nħarġu b’konformità mal-Ftehim.

(8)

L-Istati Membri jenħtieġ li jindikaw taħt l-entrata Nru 12 “Kummenti” jekk id-dokument ta’ residenza jkunx inħareġ taħt l-Artikolu 18(1) jew 18(4) tal-Ftehim.

(9)

Biex jiġi żgurat li l-identità tad-detentur tkun tista’ tiġi vverifikata bla ebda dubju jenħtieġ li d-dokumenti jkollhom perjodu ta’ validità minimu ta’ ħames snin u validità massima ta’ għaxar snin biex ir-ritratt tad-detentur ikun jista’ jiġi aġġornat.

(10)

B’konformità mal-Artikolu 19(2) tal-Ftehim, jenħtieġ li d-dokumenti li jinħarġu mill-Istati Membri skont l-Artikolu 18(1) tal-Ftehim jidħlu fis-seħħ biss wara li jintemm il-perjodu ta’ tranżizzjoni previst fl-Artikolu 126 tal-Ftehim.

(11)

Madankollu, l-Istati Membri diġà jistgħu joħorġu permessi ta’ residenza liċ-ċittadini tar-Renju Unit skont l-Artikolu 18(1) jew 18(4) tal-Ftehim matul il-perjodu ta’ tranżizzjoni, jekk jagħżlu li jagħmlu dan għal raġunijiet amministrattivi jew raġunijiet oħra. Madankollu, ir-Regolament (KE) Nru 1030/2002 kif emendat bir-Regolament (UE) 2017/1954 tal-Parlament Ewropew u tal-Kunsill (5) għadu mhux applikabbli bis-sħiħ. Għaldaqstant, l-Istati Membri jenħtieġ li jużaw il-format attwali għall-permessi ta’ residenza għaċ-ċittadini ta’ pajjiż terz li huwa stipulat fir-Regolament (KE) Nru 1030/2002 kif emendat mir-Regolament tal-Kunsill (KE) Nru 380/2008 (6) sakemm jibda japplika r-Regolament (UE) 2017/1954.

(12)

Il-miżuri previsti f’din id-Deċiżjoni huma konformi mal-opinjoni tal-Kumitat stabbilita bl-Artikolu 6 tar-Regolament tal-Kunsill (KE) Nru 1683/95 (7),