This document is an excerpt from the EUR-Lex website
Document 32022D0847
Council Decision (CFSP) 2022/847 of 30 May 2022 in support of efforts to prevent and combat illicit proliferation and trafficking of small arms and light weapons (SALW) and ammunition and their impact in the Americas
Deċiżjoni tal-Kunsill (PESK) 2022/847 tat-30 ta’ Mejju 2022 b’appoġġ għall-isforzi għall-prevenzjoni u l-ġlieda kontra l-proliferazzjoni u t-traffikar illeċiti ta’ armi ħfief u ta’ kalibru żgħir (SALW) u l-munizzjon u l-impatt tagħhom fil-Kontinent Amerikan
Deċiżjoni tal-Kunsill (PESK) 2022/847 tat-30 ta’ Mejju 2022 b’appoġġ għall-isforzi għall-prevenzjoni u l-ġlieda kontra l-proliferazzjoni u t-traffikar illeċiti ta’ armi ħfief u ta’ kalibru żgħir (SALW) u l-munizzjon u l-impatt tagħhom fil-Kontinent Amerikan
ST/8651/2022/INIT
ĠU L 148, 31.5.2022, p. 40–49
(BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)
In force
31.5.2022 |
MT |
Il-Ġurnal Uffiċjali tal-Unjoni Ewropea |
L 148/40 |
DEĊIŻJONI TAL-KUNSILL (PESK) 2022/847
tat-30 ta’ Mejju 2022
b’appoġġ għall-isforzi għall-prevenzjoni u l-ġlieda kontra l-proliferazzjoni u t-traffikar illeċiti ta’ armi ħfief u ta’ kalibru żgħir (SALW) u l-munizzjon u l-impatt tagħhom fil-Kontinent Amerikan
IL-KUNSILL TAL-UNJONI EWROPEA,
Wara li kkunsidra t-Trattat dwar l-Unjoni Ewropea, u b’mod partikolari l-Artikoli 28(1) u 31(1) tiegħu,
Wara li kkunsidra l-proposta mir-Rappreżentant Għoli tal-Unjoni għall-Affarijiet Barranin u l-Politika ta’ Sigurtà,
Billi:
(1) |
Fid-19 ta’ Novembru 2018, il-Kunsill adotta l-Istrateġija tal-UE kontra l-Armi tan-Nar, Armi Ħfief u ta’ Kalibru Żgħir Illeċiti (“SALW”) u l-Munizzjon tagħhom, intitolata “Aktar Sigurtà fuq l-Armi Biex Nipproteġu liċ-Ċittadini” (l-“Istrateġija tal-UE dwar is-SALW”), li tistabbilixxi l-linji gwida għal azzjoni tal-Unjoni fil-qasam tal-armi ħfief u ta’ kalibru żgħir (SALW). |
(2) |
Fuq livell reġjonali, l-Istrateġija tal-UE dwar is-SALW torbot lill-Unjoni u l-Istati Membri li jipprovdu assistenza lil pajjiżi oħra sabiex itejbu l-ġestjoni u s-sigurtà tal-ħażniet miżmuma mill-istat billi jsaħħu l-oqfsa leġiżlattivi u amministrattivi nazzjonali u billi jsaħħu l-istituzzjonijiet li jirregolaw il-provvista leġittima u l-ġestjoni tal-ħażniet tas-SALW u l-munizzjon għall-forzi tad-difiża u tas-sigurtà. |
(3) |
L-Istrateġija tal-UE dwar is-SALW tinnota li l-Unjoni ser tfittex li jkun hemm sinerġija mal-istati Amerikani u l-organizzazzjonijiet reġjonali rilevanti sabiex jitnaqqsu l-proliferazzjoni u t-traffikar illeċiti tas-SALW, bil-għan li jitnaqqsu l-vjolenza bl-armi u l-attività kriminali. |
(4) |
L-Amerka Latina u l-Karibew ġew milquta serjament mill-proliferazzjoni u l-akkumulazzjoni eċċessiva ta’ SALW. L-emisferu Amerikan għadu kklassifikat bħala wieħed mill-aktar reġjuni vjolenti fid-dinja. Skont l-aħħar studju globali dwar l-omiċidji mill-Uffiċċju tan-Nazzjonijiet Uniti kontra d-Droga u l-Kriminalità (UNODC) fl-2017, ir-reġjun irreġistra rata ta’ 17,2-il omiċidju għal kull 100 000 abitant, kważi tliet darbiet il-medja globali. Il-maġġoranza l-kbira tal-omiċidji jitwettqu bl-użu ta’ armi tan-nar, u dan iqiegħed il-ġlieda u l-prevenzjoni tal-proliferazzjoni u t-traffikar illeċitu ta’ armi u munizzjon bħala waħda mill-prijoritajiet fuq l-aġenda inter-Amerikana. |
(5) |
F’konformità mal-Istrateġija tal-UE dwar is-SALW, l-Unjoni ser issaħħaħ id-djalogu u l-kooperazzjoni tagħha mal-organizzazzjonijiet reġjonali li jaħdmu fuq il-kontroll tas-SALW, billi tallinja l-attivitajiet tagħha mal-istrateġiji reġjonali u l-pjanijiet ta’ azzjoni. |
(6) |
L-Organizzazzjoni tal-Istati Amerikani (OSA) hija s-Segretarjat għall-Konvenzjoni Inter-Amerikana kontra l-Iffabbrikar Illeċitu u t-Traffikar tal-Armi tan-Nar, il-Munizzjon, l-Isplussivi u Materjal Relatat Ieħor (CIFTA), u qed tikkoordina u timplimenta inizjattivi reġjonali fil-ġlieda kontra t-traffikar illeċitu tas-SALW fil-Kontinent Amerikan. |
(7) |
L-Unjoni preċedentement appoġġat l-attivitajiet tal-OSA permezz tad-Deċiżjoni tal-Kunsill (PESK) 2018/2010 (1) b’appoġġ ta’ attivitajiet għall-ġlieda kontra l-proliferazzjoni u t-traffikar illeċiti ta’ SALW u l-munizzjon u l-impatt tagħhom fl-Amerka Latina u l-Karibew. F’dak ir-rigward, l-Unjoni ddeċidiet li tiffinanzja dik l-inizjattiva preċiżament biex jitnaqqsu l-vjolenza bl-armi u l-attività kriminali. |
(8) |
Fit-30 ta’ Ġunju 2018, it-tielet Konferenza tan-Nazzjonijiet Uniti għar-Rieżami tal-Progress li sar fl-Implimentazzjoni tal-Programm ta’ Azzjoni tan-NU kontra Armi Ħfief u ta’ Kalibru Żgħir illeċiti adottat dokument ta’ eżitu li fih l-Istati ġeddu l-impenn tagħhom għall-prevenzjoni u l-ġlieda kontra d-devjazzjoni ta’ armi ħfief u ta’ kalibru żgħir. L-Istati tennew ir-rieda tagħhom li jaħdmu għal kooperazzjoni internazzjonali u li jsaħħu l-kooperazzjoni reġjonali permezz ta’ koordinazzjoni, konsultazzjoni, skambju ta’ informazzjoni u kooperazzjoni operazzjonali mtejba, bl-involviment ta’ organizzazzjonijiet reġjonali u subreġjonali rilevanti, kif ukoll awtoritajiet tal-infurzar tal-liġi, tal-kontroll tal-fruntieri u tal-ħruġ ta’ liċenzji ta’ esportazzjoni u importazzjoni. |
(9) |
L-Aġenda 2030 tan-Nazzjonijiet Uniti għall-Iżvilupp Sostenibbli tafferma li huwa neċessarju li jiġi miġġieled il-kummerċ illeċitu tal-armi ħfief u ta’ kalibru żgħir għall-kisba ta’ ħafna għanijiet ta’ żvilupp sostenibbli, inklużi dawk relatati mal-paċi, il-ġustizzja u l-istituzzjonijiet b’saħħithom, it-tnaqqis tal-faqar, it-tkabbir ekonomiku, is-saħħa, l-ugwaljanza bejn il-ġeneri u l-bliet sikuri. Għalhekk, fl-Għan ta’ Żvilupp Sostenibbli 16.4, l-Istati kollha impenjaw ruħhom li jnaqqsu b’mod sinifikanti l-flussi illeċiti finanzjarji u tal-armi. |
(10) |
Fl-Aġenda tiegħu għad-Diżarm “Securing our Common Future” (“Niżguraw il-Ġejjieni Komuni Tagħna”), li ġiet ippreżentata fl-24 ta’ Mejju 2018, is-Segretarju Ġenerali tan-Nazzjonijiet Uniti appella biex tiġi indirizzata l-akkumulazzjoni eċċessiva u l-kummerċ illeċitu ta’ armi konvenzjonali u biex jingħata appoġġ lill-approċċi għall-armi żgħar fil-livell ta’ pajjiżi. |
(11) |
It-tieni fażi (Fażi II), bħala kontinwazzjoni tal-isforzi preċedenti tal-Unjoni, iżżomm il-paradigma tal-multilateraliżmu u s-sinerġiji bejn l-Unjoni u l-OSA, u tikkomplementa l-ħidma globali tal-Unjoni f’dan il-qasam billi timmira reġjun milqut serjament mill-proliferazzjoni, l-akkumulazzjoni eċċessiva, u t-traffikar tas-SALW, |
ADOTTA DIN ID-DEĊIŻJONI:
Artikolu 1
1. Bil-ħsieb tal-implimentazzjoni tal-Istrateġija tal-UE dwar is-SALW, l-għan ta’ din id-Deċiżjoni huwa li tiġi indirizzata l-vjolenza bl-armi fil-Kontinent Amerikan. Għal dan il-għan, l-Unjoni għandha tiffinanzja l-proġett deskritt fl-Anness, li l-għan tiegħu huwa li jiġġieled kontra l-proliferazzjoni u t-traffikar illeċitu tal-armi tan-nar u l-munizzjon, u li jipprevjeni l-involviment tal-armi tan-nar f’komunitajiet milquta ħafna.
2. Skont il-paragrafu 1, l-objettivi ta’ din id-Deċiżjoni huma dawn li ġejjin:
(a) |
it-tisħiħ tal-Qafas Regolatorju Nazzjonali dwar l-Armi tan-Nar, filwaqt li jitqiesu prattiki internazzjonali normattivi u tajbin; |
(b) |
it-titjib tal-kapaċità operazzjonali tal-awtoritajiet nazzjonali biex jimmarkaw, jittraċċaw, jaħżnu u jeqirdu l-armi tan-nar; |
(c) |
l-ottimizzazzjoni tal-kontroll tal-armi ta’ kalibru żgħir permezz tal-użu tal-Mekkaniżmu ta’ Komunikazzjoni Reġjonali dwar it-Trasferimenti Leċiti ta’ Armi tan-Nar u Munizzjon (MCTA); |
(d) |
it-tisħiħ tar-reżiljenza tal-komunità għall-vjolenza bl-armi tan-nar u t-tnaqqis tal-aċċess għal armi tan-nar illeċiti u/jew mhux mixtieqa; |
(e) |
l-iżvilupp ta’ Pjan Direzzjonali tal-Amerka Ċentrali għall-Armi tan-Nar biex il-pajjiżi jiġu mgħammra b’għodda prattika u ta’ ġestjoni permezz ta’ approċċ reġjonali, ikkoordinat u bbażat fuq l-evidenza. |
3. Deskrizzjoni dettaljata tal-proġett tinsab fl-Anness għal din id-Deċiżjoni.
Artikolu 2
1. Ir-Rappreżentant Għoli tal-Unjoni għall-Affarijiet Barranin u l-Politika ta’ Sigurtà (“RGħ”) għandu jkun responsabbli għall-implimentazzjoni ta’ din id-Deċiżjoni.
2. L-implimentazzjoni teknika tal-proġett imsemmi fl-Artikolu 1 għandha titwettaq mill-OSA.
3. L-OSA għandha twettaq il-kompitu tagħha taħt ir-responsabbiltà tar-RGħ. Għal dak il-għan, ir-RGħ għandu jidħol fl-arranġamenti meħtieġa mal-OSA.
Artikolu 3
1. L-ammont ta’ referenza finanzjarja għall-implimentazzjoni tal-proġett iffinanzjat mill-Unjoni għandu jkun ta’ EUR 4 240 906.
2. In-nefqa ffinanzjata mill-ammont ta’ referenza stipulat fil-paragrafu 1 għandha tkun amministrata f’konformità mal-proċeduri u r-regoli applikabbli għall-baġit ġenerali tal-Unjoni.
3. Il-Kummissjoni għandha tissorvelja l-amministrazzjoni xierqa tan-nefqa msemmija fil-paragrafu 1. Għal dak il-għan, hija għandha tikkonkludi l-ftehim ta’ għotja neċessarju mal-OSA. Il-ftehim ta’ għotja għandu jistipula li l-OSA trid tiżgura l-viżibbiltà tal-kontribuzzjoni tal-Unjoni, adatta għad-daqs tagħha.
4. Il-Kummissjoni għandha tagħmel ħilitha biex tikkonkludi l-ftehim ta’ għotja msemmi fil-paragrafu 3 malajr kemm jista’ jkun wara d-dħul fis-seħħ ta’ din id-Deċiżjoni. Hija għandha tinforma lill-Kunsill bi kwalunkwe diffikultà f’dak il-proċess u bid-data tal-konklużjoni tal-ftehim ta’ għotja.
Artikolu 4
1. Ir-RGħ għandu jirrapporta lill-Kunsill dwar l-implimentazzjoni ta’ din id-Deċiżjoni abbażi ta’ rapporti narrattivi regolari mħejjija mill-OSA. Dawk ir-rapporti għandhom jifformaw il-bażi għall-evalwazzjoni li għandha ssir mill-Kunsill.
2. Il-Kummissjoni għandha tirrapporta dwar l-aspetti finanzjarji tal-proġett imsemmi fl-Artikolu 1.
Artikolu 5
1. Din id-Deċiżjoni għandha tidħol fis-seħħ fid-data tal-adozzjoni tagħha.
2. Din id-Deċiżjoni għandha tiskadi 36 xahar wara d-data tal-konklużjoni tal-ftehim ta’ għotja msemmi fl-Artikolu 3(3). Madankollu, għandha tiskadi sitt xhur wara d-data tad-dħul fis-seħħ tagħha jekk ma jiġi konkluż l-ebda ftehim matul dak il-perjodu ta’ sitt xhur.
Magħmul fi Brussell, it-30 ta’ Mejju 2022.
Għall-Kunsill
Il-President
C. COLONNA
(1) Id-Deċiżjoni tal-Kunsill (PESK) 2018/2010 tas-17 ta’ Diċembru 2018 b’appoġġ għall-Ġlieda Kontra l-Proliferazzjoni u t-Traffikar Illeċiti ta’ Armi Ħfief, ta’ Kalibru Żgħir (SALW) u l-Munizzjon u l-Impatt tagħhom fl-Amerka Latina u l-Karibew fil-qafas tal-Istrateġija tal-UE kontra Armi tan-Nar, Armi Ħfief u ta’ Kalibru Żgħir Illeċiti u l-Munizzjon tagħhom “Aktar Sigurtà fuq l-Armi Biex Nipproteġu liċ-Ċittadini” (ĠU L 322, 18.12.2018, p. 27).
ANNESS
DOKUMENT TA’ PROĠETT
IL-ĠLIEDA KONTRA L-PROLIFERAZZJONI U T-TRAFFIKAR ILLEĊITI TA’ ARMI ĦFIEF, TA’ KALIBRU ŻGĦIR U L-MUNIZZJON U L-IMPATT TAGĦHOM FIL-KONTINENT AMERIKAN
1. Informazzjoni ġenerali
Il-Kontinent Amerikan huwa wieħed mir-reġjuni fid-dinja l-aktar milquta mill-vjolenza bl-armi: fl-2017, irreġistra l-ogħla rata reġjonali ta’ omiċidji bi 17,2-il omiċidju għal kull 100 000 abitant, meta mqabbla mal-medja globali ta’ 6,1 għal kull 100 000 abitant (1). L-aċċess faċli għall-armi tan-nar u d-disponibbiltà tagħhom f’ħafna mill-pajjiżi huma fatturi ewlenin biex jiġu spjegati dawk ir-rati. Kważi 75 % tal-omiċidji fir-reġjun jitwettqu bl-użu ta’ arma tan-nar (2). Ir-reġjun huwa wkoll wieħed mid-destinazzjonijiet ewlenin tal-armi tan-nar għat-traffikar illeċitu (3).
Fil-biċċa l-kbira minħabba dawk ix-xejriet negattivi, il-proliferazzjoni tal-armi tan-nar u t-traffikar illeċitu saru prijorità fl-aġenda għas-sigurtà taċ-ċittadini tar-reġjun. Il-pajjiżi fil-Kontinent Amerikan enfasizzaw l-importanza tal-koordinazzjoni u l-istrateġiji transkonfinali meta jitqiesu l-kumplessità u l-internazzjonalizzazzjoni dejjem akbar tal-organizzazzjonijiet kriminali. Dak l-impenn ġie tradott fl-iffirmar tal-Konvenzjoni Inter-Amerikana kontra l-Iffabbrikar Illeċitu u t-Traffikar tal-Armi tan-Nar, il-Munizzjon, l-Isplussivi u Materjal Ieħor Relatat (CIFTA) fl-1997, l-ewwel ftehim reġjonali vinkolanti tat-tip tiegħu. Is-CIFTA, li ġiet irratifikata minn 31 mill-34 Stat Membru tal-Organizzazzjoni tal-Istati Amerikani (OSA), hija għodda fundamentali biex jiġi indirizzat il-kummerċ illeċitu tal-armi ta’ kalibru żgħir fir-reġjun.
Madankollu, minkejja l-isforzi siewja tal-awtoritajiet nazzjonali, il-pajjiżi għadhom ma jistgħux jimplimentaw is-CIFTA bis-sħiħ. Il-kumplessità tal-kriminalità organizzata li tikkontrolla t-traffikar tal-armi fir-reġjun, inkluż l-ispeċjalizzazzjoni tal-ħidma, l-istrutturi ta’ koordinazzjoni u l-internazzjonalizzazzjoni tal-operazzjonijiet, toħloq sfidi serji għall-kapaċità tal-pajjiżi li jinvestigaw u jħarrku dawn id-delitti. Huma jsibuha diffiċli wkoll biex jikkonformaw ma’ protokolli oħra u biex jimplimentaw strateġiji li jistgħu jnaqqsu l-proliferazzjoni u d-disponibbiltà tal-armi tan-nar. Il-forzi militari u tas-sigurtà ma jimplimentawx b’mod sistematiku protokolli dwar il-ġestjoni tal-ħażniet, u b’hekk iżidu l-probabbiltà ta’ devjazzjoni tal-armi tan-nar u l-munizzjon lejn is-suq illeċitu, kif ukoll ir-riskju ta’ splużjonijiet mhux ippjanati fil-faċilitajiet ta’ ħżin. L-immarkar, iż-żamma ta’ rekords, u t-traċċar tal-armi tan-nar huma inkonsistenti fir-reġjun, li jwassal biex jitwaqqfu investigazzjonijiet kriminali li jistgħu jittraċċaw l-oriġini tal-armi tan-nar, isibu konnessjoni ma’ diversi postijiet tad-delitt, u jikxfu networks ta’ traffikar illeċitu. In-nuqqas ta’ leġiżlazzjoni domestika li tirrifletti l-obbligi tas-CIFTA u li tagħti mandat lil dawn l-attivitajiet jikkomprometti l-kontinwazzjoni u s-sostenibbiltà ta’ dawn il-prattiki.
Fuq livell ieħor, il-biċċa l-kbira tar-reġjun għadu qed jiffaċċa sfidi biex jippromwovi l-benesseri tal-komunitajiet tiegħu, milquta minn livelli għoljin ta’ faqar, qgħad, u nuqqas ta’ aċċess għas-servizzi pubbliċi, fost kundizzjonijiet oħra li jpoġġuhom f’sitwazzjoni ta’ vulnerabbiltà. Il-membri ta’ dawn il-komunitajiet huma aktar probabbli li jkunu vittmi jew awturi ta’ vjolenza bl-armi. Għalhekk, biex jiġu evitati ċikli perpetwi ta’ vjolenza, mhuwiex biżżejjed li tingħata attenzjoni biss fuq politiki ta’ kontroll tal-armi. Jeħtieġ li jiġu indirizzati dawn il-fatturi ta’ riskju u li tissaħħaħ ir-reżiljenza tal-membri tal-komunità. Il-kombinament ta’ politiki repressivi u preventivi huwa fundamentali biex jitnaqqsu l-livelli ta’ vjolenza bl-armi fir-reġjun. Biex iwieġbu għal dawn l-isfidi, fl-2019, l-Istati Membri tal-OSA approvaw l-ewwel Pjan ta’ Azzjoni Emisferiku għall-Gwida tat-Tfassil ta’ Politiki Pubbliċi għall-Prevenzjoni u t-Tnaqqis tal-Omoċidji Intenzjonali, b’kunsiderazzjoni tal-qafas tal-Programm Inter-Amerikan għall-Prevenzjoni tal-Vjolenza u l-Kriminalità. Il-Pjan ta’ Azzjoni jagħti sensiela ta’ 28 rakkomandazzjoni dwar (1) il-produzzjoni, it-tixrid, u l-użu ta’ informazzjoni u evidenza xjentifika; (2) it-tfassil u l-implimentazzjoni tal-politiki ta’ prevenzjoni, u (3) il-ġustizzja kriminali.
Huwa f’dan il-kuntest li, mill-2007, id-Dipartiment tas-Sigurtà Pubblika tal-OSA (DSP tal-OSA) ipprovda appoġġ lill-pajjiżi tal-Kontinent Amerikan biex itejbu l-kapaċità tagħhom li jikkonformaw mal-obbligi (4) u l-mandati tas-CIFTA stabbiliti għall-prevenzjoni tal-vjolenza u l-kriminalità, speċjalment fost il-popolazzjonijiet l-aktar vulnerabbli. Wara waqfien ta’ ħames snin, id-DSP tal-OSA reġa’ attiva l-programmi operazzjonali tiegħu fl-2019, b’finanzjament mill-Unjoni Ewropea. Il-proġett “Il-Ġlieda kontra l-Proliferazzjoni u t-Traffikar Illeċiti ta’ Armi Ħfief, ta’ Kalibru Żgħir (SALW) u l-Munizzjon u l-Impatt tagħhom fl-Amerka Latina u l-Karibew”, beda fl-2019 u ntemm fl-2021. Huwa inizjattiva komprensiva għall-kontroll tal-armi implimentata fil-qafas tal-Programm ta’ Assistenza għall-Kontroll ta’ Armi u Munizzjon (PACAM) tad-DSP; u jieħu kont tat-tagħlimiet meħuda minn attivitajiet preċedenti u tibni fuq dawk ir-riżultati ta’ suċċess biex titmexxa ’l quddiem l-implimentazzjoni tas-CIFTA u l-mandati reġjonali għall-prevenzjoni tal-kriminalità. Madankollu, il-pandemija tal-COVID-19 u l-miżuri restrittivi adottati mill-pajjiżi biex jindirizzawha kellhom impatt dirett fuq l-implimentazzjoni tal-proġett, b’mod partikolari dawk l-attivitajiet li jridu jitwettqu fuq il-post, b’taħriġ u superviżjoni diretti tal-uffiċjali (bħall-qerda u l-immarkar tas-SALW). Barra minn hekk, tnaqqset id-disponibbiltà tal-gvernijiet biex jikkollaboraw u jipparteċipaw fl-attivitajiet tal-proġett, hekk kif l-isforzi ġew iddevjati biex tiġi indirizzata l-kriżi bla preċedent tas-saħħa. B’riżultat ta’ dan, l-ambitu tal-proġett kellu jiġi aġġustat, b’xi impatt fuq ir-riżultati mistennija.
Meta jitqiesu dawk l-isfidi, flimkien mal-ħtiġijiet dejjem jikbru tal-pajjiżi (li ma kinux mistennija li jiġu indirizzati bis-sħiħ f’inizjattiva ta’ tliet snin), il-Fażi II tal-proġett ser tkompli tipprovdi appoġġ komprensiv lill-pajjiżi, bil-għan li jkun hemm sjieda nazzjonali ta’ dawn il-proċessi. L-esperjenza tad-DSP tal-OSA wriet li huwa meħtieġ appoġġ kontinwu biex jiġu sostnuti l-progress u l-avvanzi f’termini ta’ kontroll tal-armi tan-nar u l-prevenzjoni tal-vjolenza u l-kriminalità bl-armi tan-nar, u, għaldaqstant, din il-fażi l-ġdida ser tieħu kont tal-importanza ta’ strateġiji fit-tul biex tiġi pprovduta bidla sinifikanti u sostenibbli fil-politiki u l-kundizzjonijiet tas-sigurtà.
2. Approċċ Tekniku
Matul il-Fażi II, id-DSP tal-OSA ser ikompli jinvesti f’approċċ olistiku li jgħaqqad lentijiet repressivi u preventivi, ma’ attivitajiet normattivi u operazzjonali, biex jindirizza l-kwistjoni kumplessa tal-vjolenza bl-armi u t-traffikar illeċitu fir-reġjun. Kif intwera f’reġjuni oħra, qafas leġiżlattiv modern, koeżiv u armonizzat, f’konformità mal-qafas normattiv internazzjonali, huwa l-pedament għal politiki effettivi ta’ kontroll tal-armi tan-nar. Il-bidliet leġiżlattivi jridu jkunu akkumpanjati minn titjib fil-kapaċitajiet tal-pajjiżi biex joperazzjonalizzaw u jimplimentaw il-liġi. Għalhekk, billi jaħdem f’dawn iż-żewġ sferi, il-proġett ser ikun jista’ jiġi mmirat lejn il-ħtiġijiet tal-pajjiżi u b’mod simultanju jippromwovi bidliet fit-tul u sostenibbli. Dawn l-attivitajiet biex jissaħħaħ il-kontroll tal-armi tan-nar u biex titnaqqas id-disponibbiltà tal-armi tan-nar ser jiġu kkomplementati minn approċċ preventiv biex titnaqqas id-domanda f’komunitajiet li huma milquta ħafna mill-vjolenza bl-armi, b’enfasi partikolari fuq il-prevenzjoni tal-vjolenza abbażi tal-ġeneru relatata mal-użu ħażin tal-armi tan-nar. L-azzjonijiet għall-promozzjoni ta’ prattiki sikuri fost iċ-ċittadini tal-komunitajiet, kif ukoll ir-riżoluzzjoni tal-konflitti, l-assistenza għall-vittmi u s-superstiti ta’ vjolenza, u l-għoti lura volontarju ta’ SALW u munizzjon ifittxu li jtejbu r-reżiljenza tal-komunità għall-vjolenza bl-armi.
Skont il-kunċett propost għal dan il-proġett, id-DSP tal-OSA, permezz tal-PACAM, ser jassumi r-rwol ta’ aġenzija ta’ koordinazzjoni u implimentazzjoni permezz ta’ approċċ kollaborattiv ma’ aġenziji oħra f’dan il-qasam u mal-awtoritajiet nazzjonali. Bl-użu tal-fora politiċi u l-mezzi ta’ komunikazzjoni tal-OSA, id-DSP tal-OSA ser jidentifika l-pajjiżi tar-reġjun li jeħtieġu appoġġ u jaħdem magħhom fil-ftehimiet speċifiċi meħtieġa għall-konsolidazzjoni tal-assistenza. Il-proġett ser jadotta appoġġ speċifiku u mfassal apposta għal kull pajjiż, meta jitqies li jista’ ma jkollhomx l-istess ħtiġijiet u lakuni. Mhux kollha ser jiġu appoġġati fil-komponenti kollha tal-proġett. Minflok, id-DSP tal-OSA ser ikompli juża l-approċċ preċedenti ta’ suċċess tal-PACAM: l-immappjar u l-identifikazzjoni tal-ħtiġijiet ta’ kull pajjiż, l-involviment tal-awtoritajiet u l-ħolqien ta’ pjan ta’ assistenza, u l-użu tal-missjonijiet. Barra minn hekk, meta jitqiesu t-tagħlimiet meħuda mill-adattament tal-attivitajiet tal-proġett matul il-pandemija, id-DSP tal-OSA ser ifittex li jottimizza r-riżorsi billi juża l-ambjent virtwali u l-għodod teknoloġiċi, meta jkun possibbli.
Barra minn hekk, meta jitqiesu l-impatti differenti li l-vjolenza bl-armi għandha fuq in-nisa, l-irġiel, il-bniet u s-subien, kif ukoll fuq il-popolazzjonijiet vulnerabbli, il-Fażi II ser tkompli jkollha perspettiva abbażi tal-ġeneru u tad-drittijiet tal-bniedem. Din tinkludi l-inkorporazzjoni tan-nisa fil-livelli kollha tal-implimentazzjoni tal-proġett, u l-inkoraġġiment biex ikun hemm sehem aktar ugwali tal-parteċipazzjoni tan-nisa fl-attivitajiet tal-proġett, bħala benefiċjarji tal-interventi. Barra minn hekk, l-attivitajiet ta’ prevenzjoni tal-vjolenza ser jiffokaw attenzjoni partikolari fuq il-ħtieġa tan-nisa u l-bniet għas-sigurtà u s-sikurezza fil-komunitajiet tagħhom u għall-parteċipazzjoni tagħhom fit-tiftix ta’ soluzzjonijiet għal dawn l-isfidi, kif ukoll l-inkorporazzjoni ta’ komponenti li jiffokaw esklużivament fuq l-indirizzar tal-vjolenza abbażi tal-ġeneru.
3. Għan Ġenerali
It-tisħiħ tal-kapaċità tal-Istati Membri tal-OSA biex tiġi indirizzata l-vjolenza bl-armi fir-reġjun billi jiġu appoġġati miżuri għall-ġlieda kontra l-proliferazzjoni u t-traffikar illeċitu tal-armi tan-nar u l-munizzjon, u l-prevenzjoni tal-involviment tal-armi tan-nar f’komunitajiet milquta ħafna.
4. Deskrizzjoni tal-Istrateġiji ta’ Intervent tal-Proġetti
Objettiv 1: It-Tisħiħ tal-Qafas Regolatorju Nazzjonali dwar l-Armi tan-Nar, filwaqt li jitqiesu prattiki internazzjonali normattivi u tajbin
Attivitajiet
— |
L-identifikazzjoni ta’ pajjiżi li għandhom jiġu assistiti bħala kwistjoni ta’ prijorità fir-rieżami leġiżlattiv, abbażi ta’ valutazzjoni tal-ħtiġijiet u b’kont meħud tal-pajjiżi fil-mira tal-komponenti operazzjonali tal-proġett; |
— |
Assistenza teknika lill-pajjiżi biex jirrieżaminaw il-leġiżlazzjoni u l-qafas normattiv filwaqt li jitqiesu l-istandards internazzjonali u l-armonizzazzjoni interna tal-mandati, kif ukoll l-integrazzjoni ta’ perspettiva abbażi tal-ġeneru; |
— |
L-iżvilupp ta’ standards reġjonali dwar is-Sigurtà Fiżika u l-Ġestjoni tal-Ħażniet, u dwar il-Qerda tas-SALW u l-Munizzjon; |
— |
L-iżvilupp ta’ rakkomandazzjonijiet reġjonali għall-prevenzjoni tal-vjolenza abbażi tal-ġeneru relatata mal-użu ħażin tal-armi tan-nar; |
— |
L-iżvilupp ta’ bażi ta’ data elettronika biex jiġi ffaċilitat l-aċċess għall-istandards tal-armi tan-nar u linji gwida rilevanti oħra (eż. CIFTA, leġiżlazzjoni mudell, MOSAIC, u IATG) biex jiġi ffaċilitat l-aċċess għal u l-użu tal-istandards għall-oqsma differenti rigward il-kontroll tal-armi tan-nar billi jkun hemm magna tat-tiftix u billi l-istandards jiġu kkategorizzati b’tikketti li jippermettu lill-utenti jsibu malajr ir-regoli relatati kollha għal qasam ta’ interess. |
Outputs
— |
Assistenza leġiżlattiva pprovduta biex jitjieb il-qafas normattiv nazzjonali dwar l-armi tan-nar, filwaqt li jitqiesu l-istandards internazzjonali u l-perspettiva abbażi tal-ġeneru, lil mill-inqas sitt pajjiżi tar-reġjun; |
— |
Standards Reġjonali għas-Sigurtà Fiżika u l-Ġestjoni tal-Ħażniet (PSSM) żviluppati u mxerrda lill-Istati Membri kollha tal-OSA; |
— |
Standards Reġjonali għall-Qerda tas-SALW u l-Munizzjon żviluppati u mxerrda lill-Istati Membri kollha tal-OSA; |
— |
Rakkomandazzjonijiet reġjonali għall-prevenzjoni tal-vjolenza abbażi tal-ġeneru relatata mal-użu ħażin tal-armi tan-nar żviluppati u mxerrda lill-Istati Membri kollha tal-OSA; |
— |
Bażi ta’ data elettronika tal-istandards u l-linji gwida tas-SALW maħluqa u magħmula disponibbli biex tintuża mill-pajjiżi. |
Objettiv 2: It-titjib tal-kapaċità operazzjonali tal-awtoritajiet nazzjonali biex jimmarkaw, jittraċċaw, jaħżnu u jeqirdu l-armi tan-nar
Attivitajiet
— |
L-iżvilupp u l-għoti ta’ taħriġ speċjalizzat għall-persunal nazzjonali fil-PSSM, l-immarkar u ż-żamma ta’ rekords, u l-qerda tas-SALW u l-munizzjon. Ser ikun hemm workshops reġjonali ta’ taħriġ, fejn il-persunal ser ikun jista’ jikkondividi wkoll prattiki tajbin u jtejjeb il-kollaborazzjoni, u korsijiet nazzjonali mmirati lejn il-ħtiġijiet speċifiċi ta’ kull pajjiż; |
— |
Taħriġ avvanzat fit-tneħħija ta’ mezzi esplożivi għal tekniċi minn pajjiżi fi sħubija mal-Ministeru għad-Difiża ta’ Spanja; |
— |
Assistenza teknika u riżorsi biex jiġu implimentati pjanijiet nazzjonali biex jinqerdu l-armi, u l-munizzjon obsolet, maqbud jew żejjed; |
— |
Assistenza teknika u appoġġ biex jiġu mmarkati l-armi tan-nar, u jinżammu rekords, inkluż il-forniment ta’ tagħmir meħtieġ; |
— |
It-tfassil ta’ pjanijiet ta’ sostenibbiltà ma’ pajjiżi li jirċievu appoġġ permezz tal-proġett. |
Outputs
— |
Proċessi ta’ qerda tal-armi tan-nar u l-munizzjon imwettqa f’mill-inqas 10 pajjiżi, bil-qerda ta’ mill-inqas 150 tunnellata ta’ munizzjon, u 35 000 SALW maqbuda, obsoleti, mhux sikuri u/jew żejda; |
— |
Mill-inqas 200 persunal nazzjonali mħarrġa fil-qerda tas-SALW u l-munizzjon; |
— |
Assistenza teknika dwar l-immarkar u ż-żamma ta’ rekords tal-armi tan-nar ipprovduta lil mill-inqas 12-il pajjiż; |
— |
Mill-inqas 150 persunal nazzjonali mħarrġa fl-immarkar u ż-żamma ta’ rekords; |
— |
Sistemi Nazzjonali ta’ Reġistrazzjoni tal-Armi tan-Nar aġġornati ta’ mill-inqas tliet pajjiżi; |
— |
Is-sigurtà tal-ħażniet istituzzjonali mtejba f’mill-inqas 10 pajjiżi; |
— |
Żewġ Seminars Reġjonali dwar Prattiki Tajbin ta’ Sigurtà Fiżika u Ġestjoni tal-Ħażniet implimentati, biċ-ċertifikazzjoni ta’ mill-inqas 80 uffiċjal minn mill-inqas 15-il pajjiż; |
— |
Mill-inqas 45 persunal minn 10 pajjiżi ċċertifikati bħala tekniċi tat-tneħħija ta’ mezzi esplożivi għal-livell 3 tal-EOD; |
— |
Għodod u linji gwida għall-elaborazzjoni ta’ Pjanijiet ta’ Azzjoni Nazzjonali maħluqa u disponibbli għall-pajjiżi assistiti mill-proġett; |
— |
Pjanijiet ta’ Azzjoni Nazzjonali abbozzati u vvalidati mill-awtoritajiet nazzjonali għal mill-inqas 20 % tal-pajjiżi li jirċievu assistenza. |
Objettiv 3: L-ottimizzazzjoni tal-kontroll tal-armi ta’ kalibru żgħir permezz tal-użu ta’ għodod tat-Teknoloġija tal-Informazzjoni
Attivitajiet
— |
Il-programmazzjoni tas-Sistema Elettronika għall-Mekkaniżmu ta’ Komunikazzjoni Reġjonali dwar it-Trasferimenti Leċiti ta’ Armi tan-Nar u Munizzjon (MCTA), mekkaniżmu reġjonali għan-notifika u l-iskambju ta’ informazzjoni dwar it-trasferiment leċitu ta’ armi tan-nar, li l-qafas u r-rekwiżiti tekniċi tiegħu ġew żviluppati matul il-Fażi I. Dan jirrifletti l-esperjenza pożittiva tal-Unjoni Ewropea u ser jippermetti lill-pajjiżi jidentifikaw u jikkomunikaw malajr dwar il-vulnerabbiltajiet u r-riskji ta’ devjazzjoni fil-kummerċ legali internazzjonali tal-armi tan-nar. Meta jitqies li kważi 50 % tal-pajjiżi fir-reġjun m’għandhomx sistema elettronika ta’ liċenzjar nazzjonali, ser tiġi esplorata l-possibbiltà li s-sistema tiġi pprogrammata b’mod li jippermetti lill-pajjiżi jużawha bħala s-sistemi domestiċi tagħhom; |
— |
Il-varar tas-Sistema Elettronika tal-MCTA bħala fażi pilota, bit-taħriġ tal-awtoritajiet nazzjonali u l-inkorporazzjoni tal-korrezzjonijiet meħtieġa; |
— |
Aġġornament tal-komunità virtwali għall-iskambju ta’ informazzjoni, żviluppata matul il-Fażi I, biex issir Pjattaforma Emisferika ta’ Għarfien dwar l-Armi tan-Nar, b’funzjonalitajiet bħal (i) sottomissjoni awtomatika u traċċar ta’ data dwar is-sistema ta’ kontroll tal-armi tan-nar u l-istatus tal-implimentazzjoni tas-CIFTA; (ii) repożitorju tal-awtoritajiet nazzjonali; (iii) dashboard biex jiġu viżwalizzati l-istatus u l-komprensività tas-sistema ta’ kontroll tal-armi tan-nar; |
— |
Aġġornament u espansjoni tas-Software ta’ Kontroll ta’ Inventarji ta’ SALW u Munizzjon għall-pajjiżi fir-reġjun li jistgħu jibbenefikaw minn din is-soluzzjoni tal-IT żviluppata matul il-Fażi I. |
Outputs
— |
Sistema Elettronika għall-Mekkaniżmu ta’ Komunikazzjoni Reġjonali dwar it-Trasferimenti Leċiti ta’ Armi tan-Nar u Munizzjon (MCTA) ipprogrammata u implimentata, bħala pilota, f’ħames pajjiżi; |
— |
Software ta’ Kontroll ta’ Inventarji ta’ SALW u Munizzjon imtejjeb, abbażi tal-feedback tal-utenti, u implimentat f’mill-inqas erba’ pajjiżi oħra; |
— |
Pjattaforma Emisferika ta’ Għarfien dwar l-Armi tan-Nar żviluppata, bir-reġistrazzjoni ta’ punti ta’ kuntatt ta’ mill-inqas 15-il pajjiż; |
— |
Il-laqgħat tal-punti ta’ kuntatt nazzjonali jsiru darbtejn fis-sena biex jiġu stabbiliti d-djalogu u l-kooperazzjoni. |
Objettiv 4: It-tisħiħ tar-reżiljenza tal-komunità għall-vjolenza bl-armi tan-nar u t-tnaqqis tal-aċċess għal armi tan-nar illeċiti u/jew mhux mixtieqa
Attivitajiet
— |
L-espansjoni tal-metodoloġija tal-programm OASIS għal mill-inqas komunità oħra milquta ħafna mill-vjolenza bl-armi tan-nar. L-OASIS ifittex li jippromwovi mġiba soċjalment responsabbli f’komunitajiet milquta b’mod sever mill-vjolenza bl-armi tan-nar; dan jinkludi valutazzjoni inizjali tal-komunità, u l-mekkaniżmi disponibbli għall-prevenzjoni tal-vjolenza u għall-assistenza lill-vittmi. Il-programm joffri attivitajiet ekstrakurrikulari ta’ kuljum liż-żgħażagħ f’riskju, u taħriġ lil diversi partijiet ikkonċernati lokali fil-komunitajiet dwar il-prevenzjoni tal-vjolenza u l-assistenza lill-vittmi; |
— |
Il-ħolqien ta’ ċentru ta’ referenza bbażat fil-komunità għall-assistenza lill-vittmi, il-familji u x-xhieda ta’ vjolenza u kriminalità mwettqa bl-użu ta’ armi tan-nar biex jiġu interrotti ċ-ċikli ta’ vjolenza; |
— |
L-iżvilupp ta’ programm reġjonali ta’ taħriġ edukattiv għall-prevenzjoni u l-indirizzar tal-vjolenza abbażi tal-ġeneru; |
— |
L-iżvilupp u l-implimentazzjoni ta’ mill-inqas żewġ kampanji komunitarji ta’ ġbir ta’ armi, inkluż strateġiji edukattivi għas-sensibilizzazzjoni tal-popolazzjoni u l-inkoraġġiment tal-għoti lura volontarju tal-armi. Il-kampanji ser jenfasizzaw ir-rabta bejn il-vjolenza abbażi tal-ġeneru u l-użu ħażin tal-armi tan-nar, peress li l-biċċa l-kbira tal-vittmi ta’ vjolenza abbażi tal-ġeneru ġew intimidati jew maqtula bihom (5); |
— |
Appoġġ lill-awtoritajiet nazzjonali u lokali fil-ġbir, il-ħżin, it-trasport, u l-qerda tas-SALW u l-munizzjon miġbura. Dan ser isir f’koordinazzjoni mal-attivitajiet imwettqa taħt l-Objettiv 2 tal-proġett biex jiġu ottimizzati r-riżorsi. |
Outputs
— |
Kapaċitajiet imtejba ta’ mill-inqas żewġ komunitajiet hotspot biex jappoġġaw liż-żgħażagħ f’riskju, jassistu lill-vittmi u lis-superstiti, u jipprevjenu l-vjolenza bl-armi tan-nar; |
— |
Il-ħiliet għall-ħajja ta’ mill-inqas 160 student minn żewġ komunitajiet hotspot imtejba permezz ta’ taħriġ u t-twettiq ta’ kuljum ta’ attivitajiet wara l-ħin tal-iskola; |
— |
Mill-inqas 150 persuna li jfasslu l-politika, uffiċjali tal-gvern, fornituri tas-servizzi, mexxejja tal-komunità, għalliema, ġenituri, u membri tas-soċjetà ċivili mħarrġa fil-prevenzjoni u l-interruzzjoni tal-vjolenza abbażi tal-ġeneru u l-assistenza lill-vittmi; |
— |
Ċentru ta’ referenza wieħed għas-superstiti tal-vjolenza, il-familji u x-xhieda maħluq u operazzjonali; |
— |
Mill-inqas żewġ kampanji komunitarji ta’ ġbir ta’ armi żviluppati u implimentati. |
Objettiv 5: L-iżvilupp ta’ Pjan Direzzjonali tal-Amerka Ċentrali għall-Armi tan-Nar biex il-pajjiżi jiġu mgħammra b’għodda prattika u ta’ ġestjoni permezz ta’ approċċ reġjonali, ikkoordinat u bbażat fuq l-evidenza
Attivitajiet
— |
L-elaborazzjoni ta’ metodoloġija għall-iżvilupp tal-Pjan Direzzjonali tal-Amerka Ċentrali, f’konsultazzjoni ma’ esperti fil-qasam u mal-validazzjoni tal-pajjiżi; |
— |
L-iżvilupp ta’ valutazzjoni tal-ħtiġijiet, f’konsultazzjoni mal-gvernijiet tal-Amerka Ċentrali; |
— |
L-iżvilupp ta’ abbozz ta’ Pjan Direzzjonali tal-Amerka Ċentrali għall-Armi tan-Nar, b’kont meħud tal-valutazzjoni tal-ħtiġijiet, l-oqfsa legali internazzjonali u l-prattiki tajbin; |
— |
Validazzjoni tal-abbozz tal-Pjan Direzzjonali permezz ta’ ċiklu ta’ konsultazzjonijiet mal-pajjiżi u l-partijiet ikkonċernati; u |
— |
Komunikazzjoni esterna u sensibilizzazzjoni biex jiġu mobilizzati s-sħab biex jappoġġaw l-implimentazzjoni tal-Pjan Direzzjonali tal-Amerka Ċentrali għall-Armi tan-Nar. |
Outputs
— |
Metodoloġija għall-iżvilupp ta’ pjan direzzjonali elaborat u vvalidat mal-partijiet ikkonċernati; |
— |
Valutazzjoni tal-ħtiġijiet żviluppata biex jiġu ddeterminati t-theddid, il-lakuni, il-vulnerabbiltajiet u l-prijoritajiet prinċipali tal-pajjiżi tal-Amerka Ċentrali; |
— |
Żewġ workshops implimentati biex jiġbru kontributi u feedback għall-abbozz tal-Pjan Direzzjonali tal-Amerka Ċentrali għall-Armi tan-Nar, bil-parteċipazzjoni tal-awtoritajiet nazzjonali u l-organizzazzjonijiet li jaħdmu fil-qasam; |
— |
Pjan Direzzjonali tal-Amerka Ċentrali żviluppat u ppreżentat lill-pajjiżi tar-reġjun; |
— |
Kampanja ta’ komunikazzjoni żviluppata biex jinxtered il-Pjan Direzzjonali tal-Amerka Ċentrali għall-Armi tan-Nar, tinkiseb l-approvazzjoni politika tiegħu, u jinġabar l-appoġġ tas-sħab għall-implimentazzjoni tiegħu. |
5. Tul ta’ żmien
It-tul ta’ żmien totali tal-Fażi II reġjonali komprensiva hu stmat li jkun ta’ 36 xahar.
6. Entità tal-implimentazzjoni teknika
L-implimentazzjoni teknika ta’ dan il-programm hija fdata lid-Dipartiment tas-Sigurtà Pubblika tas-Segretarjat Ġenerali tal-Organizzazzjoni tal-Istati Amerikani (DSP tal-OSA). Id-DSP tal-OSA għandu pożizzjoni vantaġġuża biex jappoġġa lill-pajjiżi tal-Kontinent Amerikan meta jitqies ir-rwol doppju tiegħu bħala Kosegretarjat Tekniku tas-CIFTA, u bħala l-korp tekniku u operazzjonali tal-OSA f’dan il-qasam. F’dan ir-rwol, id-DSP tal-OSA implimenta proġetti u programmi biex jappoġġa lill-Istati Membri tal-OSA fl-issodisfar tal-obbligi tagħhom li jiżguraw is-sigurtà ta’ ħażniet nazzjonali tal-armi tan-nar, li jimplimentaw miżuri leġiżlattivi li jistabbilixxu l-iffabbrikar illeċitu u t-traffikar tal-armi tan-nar bħala reati kriminali skont il-liġi domestika, li jeħtieġu l-immarkar tal-armi tan-nar, u li jiskambjaw informazzjoni ma’ firmatarji oħra tas-CIFTA fir-rigward tal-informazzjoni dwar it-traċċar u x-xejriet ta’ traffikar illeċitu. L-ebda organizzazzjoni reġjonali jew subreġjonali oħra li tkopri l-Kontinent Amerikan kollu ma għandha l-influwenza politika, l-għarfien espert tekniku jew il-firxa ġeografika biex tkun tista’ tappoġġa u tassisti lill-istati Amerikani kollha.
Matul il-Fażi II, id-DSP tal-OSA ser ikompli wkoll jikkoordina u jikkollabora ma’ istituzzjonijiet u organizzazzjonijiet oħra matul l-eżekuzzjoni tal-proġett. Id-DSP tal-OSA involva għadd minnhom fil-Fażi I u jistenna li jkompli jikkollabora dwar kwistjonijiet speċifiċi biex jippromwovi l-inizjattiva fir-reġjun, inkluż iċ-Ċentru Reġjonali tan-Nazzjonijiet Uniti għall-Paċi, id-Diżarm u l-Iżvilupp fl-Amerka Latina u l-Karibew (UNLIREC), l-Aġenzija ta’ Implimentazzjoni tal-Komunità tal-Karibew għall-Kriminalità u s-Sigurtà (CARICOM IMPACS), il-Bord ta’ Difiża Inter-Amerikan, it-Tim Konsultattiv għall-Ġestjoni tal-Munizzjon taċ-Ċentru Internazzjonali ta’ Ġinevra għat-Tneħħija ta’ Mini għal Skopijiet Umanitarji (AMAT-GICHD), il-Fondazzjoni Umanitarja Golden West, l-INTERPOL, id-Dipartiment tal-Istat tal-Istati Uniti u ċ-Ċentru għat-Taħriġ fit-Tneħħija ta’ Mini għal Skopijiet Umanitarji tad-Dipartiment tad-Difiża tal-Istati Uniti. Id-DSP jiffoka fuq l-istabbiliment ta’ relazzjoni mill-qrib ma’ dawn l-entitajiet l-oħra kollha li jaħdmu wkoll fil-qasam biex jiġu massimizzati l-benefiċċji tal-azzjoni bl-użu tal-għarfien espert komplementari tal-organizzazzjonijiet. B’mod partikolari, matul il-Fażi II, id-DSP tal-OSA ser jimmira li jsaħħaħ il-kollaborazzjoni mal-organizzazzjonijiet subreġjonali, bħal CARICOM-IMPACS u SICA (Sistema ta’ Integrazzjoni tal-Amerka Ċentrali), biex tiġi appoġġata l-implimentazzjoni tal-Pjan Direzzjonali tal-Karibew għall-Armi tan-Nar, u jiġi kkoordinat l-iżvilupp tal-Pjan Direzzjonali tal-Amerka Ċentrali għall-Armi tan-Nar.
7. Rilevanza
A. “Aktar Sigurtà fuq l-Armi Biex Nipproteġu liċ-Ċittadini”: Strateġija tal-UE kontra l-Armi tan-Nar, Armi Ħfief u ta’ Kalibru Żgħir Illeċiti u l-Munizzjon Tagħhom, adottata mill-Kunsill fid-19 ta’ Novembru 2018
L-objettivi, l-attivitajiet, u l-eżiti mistennija ta’ dan il-proġett huma allinjati mal-għanijiet u l-approċċ tal-Istrateġija tal-Unjoni Ewropea "Aktar Sigurtà fuq l-Armi Biex Nipproteġu liċ-Ċittadini". F’dan ir-rigward, il-Kunsill tal-Unjoni Ewropea ddeċieda li jiffinanzja l-Fażi I ta’ din l-inizjattiva sabiex irawwem il-multilateraliżmu u s-sinerġiji bejn l-Unjoni Ewropea u l-OSA biex jitnaqqsu l-vjolenza bl-armi u l-attività kriminali, u qies bir-reqqa l-prijoritajiet stabbiliti fl-istrateġija. Il-Fażi II, bħala kontinwazzjoni ta’ dawk l-isforzi, iżżomm din il-paradigma u dan l-approċċ, u tikkomplementa l-ħidma globali tal-Unjoni Ewropea f’dan il-qasam billi żżomm fil-mira tagħha reġjun milqut serjament mill-proliferazzjoni, l-akkumulazzjoni eċċessiva u t-traffikar tas-SALW.
B’mod speċifiku, il-Fażi II tirrifletti l-prijoritajiet li ġejjin tal-Istrateġija:
2.1. |
It-Tisħiħ tal-Qafas Normattiv: L-attivitajiet tal-Objettiv 1 tal-Azzjoni jfittxu li jiżguraw li l-pajjiżi jarmonizzaw il-leġiżlazzjoni tagħhom mal-istandards internazzjonali, u jkollhom għodod disponibbli biex itejbu l-implimentazzjoni tal-konvenzjonijiet; |
2.2.2 |
Kontrolli fuq l-esportazzjoni ta’ armi tan-nar u l-munizzjon tagħhom: L-iżvilupp tal-għodda elettronika tal-MCTA, fl-Objettiv 3, jindirizza l-importanza tal-kontroll tal-kummerċ legali biex jiġu evitati devjazzjonijiet lejn is-suq illeċitu; |
2.2.3 |
Ġestjoni sigura tal-ħażna tas-SALW u l-munizzjon: L-Objettiv 2 għandu sensiela ta’ attivitajiet li jiffokaw fuq il-PSSM, inkluż it-taħriġ ta’ uffiċjali u l-assistenza teknika u materjali għat-titjib ta’ prattiki u faċilitajiet, skont l-istandards internazzjonali tal-MOSAICS u l-IATGs; |
2.2.4 |
Rimi responsabbli ta’ SALW u l-munizzjon tagħhom: L-Objettiv 2 jinkludi taħriġ, assistenza materjali, superviżjoni u ċertifikazzjoni tal-proċessi ta’ qerda tal-armi tan-nar u l-munizzjon lill-pajjiżi li jeħtieġu dan; |
2.2.5 |
Kwistjonijiet trasversali: L-Objettiv 3 jinkludi sensiela ta’ soluzzjonijiet u għodod tal-IT biex jitrawmu l-kooperazzjoni u l-kondiviżjoni tal-informazzjoni madwar il-pajjiżi tar-reġjun. |
Sabiex jiġi massimizzat l-impatt ta’ dawk l-attivitajiet, id-DSP tal-OSA ser jappoġġa attivitajiet komplementari inkluż it-tnaqqis tad-domanda għall-armi tan-nar billi jimplimenta azzjonijiet ta’ prevenzjoni u programmi ta’ ġbir, u l-iżvilupp ta’ Pjan Direzzjonali tal-Amerka Ċentrali, bħala għodda konkreta għall-koordinazzjoni u t-titjib tal-isforzi f’dan ir-reġjun.
B. Id-Deċiżjoni tal-Kunsill tal-UE 2011/428/PESK tat-18 ta’ Lulju 2011 b’appoġġ għall-attivitajiet tal-Uffiċċju tan-Nazzjonijiet Uniti għall-Affarijiet ta’ Diżarm biex jiġi implimentat il-Programm ta’ Azzjonijiet tan-Nazzjonijiet Uniti għall-Prevenzjoni, il-Ġlieda Kontra u l-Qerda tal-Kummerċ Illeċitu f’Armi Ħfief u ta’ Kalibru Żgħir fl-Aspetti Kollha Tiegħu (6)
Id-Deċiżjoni tal-Kunsill tippromwovi tliet objettivi prinċipali: (1) l-implimentazzjoni tal-Programm ta’ Azzjoni tan-NU għall-Prevenzjoni, il-Ġlieda Kontra u l-Qerda tal-Kummerċ Illeċitu f’Armi Ħfief u ta’ Kalibru Żgħir fl-Aspetti Kollha Tiegħu fil-livell globali kif ukoll reġjonali, (2) appoġġ għall-implimentazzjoni tal-Istrument Internazzjonali dwar it-Traċċar (ITI), u (3) appoġġ għall-iżvilupp u l-implimentazzjoni ta’ linji gwida tekniċi tan-NU għall-ġestjoni ta’ ħażniet ta’ munizzjon.
Kull wieħed minn dawn l-objettivi huwa konsistenti mal-għanijiet ġenerali tad-dispożizzjonijiet speċifiċi tal-Konvenzjoni Inter-Amerikana kontra l-Iffabbrikar Illeċitu u t-Traffikar tal-Armi tan-Nar, il-Munizzjon, l-Isplussivi u Materjal Ieħor Relatat (CIFTA) u l-Korsijiet ta’ Azzjoni tagħha. Is-CIFTA tagħti diversi rakkomandazzjonijiet obbligatorji lill-Istati Partijiet, inkluż l-istabbiliment tal-ġuriżdizzjoni fuq reati kriminali; l-immarkar obbligatorju tal-armi tan-nar; iż-żamma ta’ rekords għat-traċċar; it-titjib tal-kontrolli ta’ trasferiment; u l-kooperazzjoni tranżnazzjonali. Il-Kors ta’ Azzjoni 2018-2022 tas-CIFTA jsaħħaħ l-għanijiet tal-Istati Partijiet għas-CIFTA f’dawn l-oqsma f’konformità mal-Programm ta’ Azzjoni tan-NU u l-Protokoll kontra l-Iffabbrikar Illeċitu u t-Traffikar tal-Armi tan-Nar, il-Partijiet u l-Komponenti u l-Munizzjon tagħhom, li jissupplimenta l-Konvenzjoni tan-Nazzjonijiet Uniti kontra l-Kriminalità Organizzata Tranżnazzjonali.
Id-DSP tal-OSA jkompli jimplimenta programmi operazzjonali biex jappoġġa lill-pajjiżi fil-bini tal-kapaċitajiet tagħhom biex jikkonformaw mal-obbligi tagħhom skont is-CIFTA. Il-Fażi II tfasslet biex tkompli din l-assistenza b’kunsiderazzjoni tal-prijoritajiet stabbiliti mill-Istati Partijiet għas-CIFTA fil-Kors ta’ Azzjoni 2018-2022, b’mod partikolari dawn li ġejjin: 1. L-Immarkar u t-Traċċar tal-Armi tan-Nar; 2. L-Importazzjoni u l-Esportazzjoni; 3. Il-Miżuri Leġiżlattivi; u 4. Il-Ġestjoni u l-Qerda tal-Ħażniet.
8. Rappurtar
Id-DSP tal-OSA ser iħejji rapporti regolari, f’konformità mal-Ftehim ta’ Delega nnegozjat.
9. Spiża totali
L-istima totali tal-finanzjament mitlub mill-UE għall-implimentazzjoni tal-Fażi II huwa ta’ EUR — madwar EUR 4,2 miljun. Is-Segretarjat Ġenerali tal-OSA ser jipprovdi kontribuzzjonijiet in natura għall-eżekuzzjoni tal-programm u ser ifittex appoġġ in natura ieħor (bħal dak ipprovdut mill-Gvern Spanjol fil-Fażi I).
(1) UNODC, Global Study on Homicide (Studju Globali dwar l-Omoċidji). 2019. https://www.unodc.org/unodc/en/data-and-analysis/global-study-on-homicide.html
(2) Ibid.
(3) Skont il-Global Study of Firearms Trafficking (Studju Globali dwar it-Traffikar tal-Armi tan-Nar), l-Amerka Ċentrali u l-Amerka t’Isfel, flimkien mal-Asja tal-Punent, jammontaw għal 80 % tad-destinazzjonijiet tat-traffikar tal-armi tan-nar (UNODC, 2020).
(4) Mill-2007 sal-2015, id-DSP tal-OSA implimenta inizjattivi tal-Programm ta’ Assistenza għall-Kontroll ta’ Armi u Munizzjon fir-reġjun (PACAM). Ibbenefikaw il-25 Stat Membru tal-OSA, u dan irriżulta fl-immarkar ta’ aktar minn 290 000 arma tan-nar u l-qerda ta’ 60 000 arma oħra u ta’ aktar minn 1 700 tunnellata ta’ munizzjon fir-reġjun kollu.
(5) https://unoda-web.s3.amazonaws.com/wp-content/uploads/2019/07/MOSAIC-06.10-2017EV1.0.pdf