(1)

Skont l-Artikolu 3(3) tat-Trattat dwar l-Unjoni Ewropea, l-Unjoni tiġġieled kontra l-esklużjoni soċjali u d-diskriminazzjoni u tippromwovi l-ugwaljanza bejn in-nisa u l-irġiel u l-protezzjoni tad-drittijiet tat-tfal.

(2)

Skont l-Artikolu 9 tat-Trattat dwar il-Funzjonament tal-Unjoni Ewropea (TFUE), fid-definizzjoni u fl-implimentazzjoni tal-politiki u l-attivitajiet tagħha, l-Unjoni għandha tqis il-ħtiġijiet marbuta mal-promozzjoni ta’ livell għoli ta’ impjiegi, mal-garanzija ta’ protezzjoni soċjali xierqa, mal-ġlieda kontra l-esklużjoni soċjali kif ukoll ma’ livell għoli ta’ edukazzjoni, taħriġ u protezzjoni tas-saħħa tal-bniedem.

(3)

Skont l-Artikolu 151 TFUE, l-Unjoni u l-Istati Membri għandhom bħala objettivi l-promozzjoni tal-impjiegi, it-titjib tal-kundizzjonijiet tal-ħajja u tax-xogħol, il-protezzjoni soċjali xierqa, id-djalogu bejn it-tmexxija u l-ħaddiema, l-iżvilupp tar-riżorsi umani bil-ħsieb li jkun hemm livell għoli ta’ impjieg għal żmien twil u li tiġi miġġielda l-esklużjoni soċjali. Skont l-Artikolu 153(1), il-punt (j), TFUE, bil-għan li jintlaħqu dawk l-objettivi, l-Unjoni ssostni u tikkomplementa l-attivitajiet tal-Istati Membri fil-qasam tal-ġlieda kontra l-esklużjoni soċjali.

(4)

L-Artikolu 24 tal-Karta tad-Drittijiet Fundamentali tal-Unjoni Ewropea (il-“Karta”) jirrikonoxxi li t-tfal għandhom id-dritt għall-protezzjoni u għall-kura meħtieġa għall-ġid tagħhom, u li l-aħjar interess tat-tfal għandu jkun kunsiderazzjoni primarja fl-azzjonijiet kollha relatati mat-tfal, kemm jekk jittieħdu minn awtoritajiet pubbliċi kif ukoll minn istituzzjonijiet privati. L-Artikolu 33 tal-Karta jistipula li l-familja għandha tgawdi minn protezzjoni legali, ekonomika u soċjali.

(5)

L-Artikolu 17 tal-Karta Soċjali Ewropea Riveduta, li saret fi Strasburgu fit-3 ta’ Mejju 1996, jikkonferma l-impenn li tittieħed kull miżura xierqa u meħtieġa biex jiġi żgurat li t-tfal ikollhom il-kura, l-assistenza, l-edukazzjoni u t-taħriġ li jeħtieġu.

(6)

Il-Konvenzjoni tan-Nazzjonijiet Uniti dwar id-Drittijiet tat-Tfal, adottata fl-20 ta’ Novembru 1989, li ġiet ratifikata mill-Istati Membri kollha tal-Unjoni, tistipula fl-Artikoli 2, 3, 6, 12, 18, 24, 27, 28 u 31 li l-Istati Parti għall-Konvenzjoni jirrikonoxxu l-aħjar interessi tat-tfal bħala kunsiderazzjoni primarja u jagħrfu d-dritt tat-tfal: għall-parteċipazzjoni u l-iżvilupp, inkluż id-dritt għall-protezzjoni minn kull forma ta’ diskriminazzjoni; għall-ħajja; għal smigħ fi proċedimenti ġudizzjarji u amministrattivi; għat-tgawdija tal-ogħla standard ta’ saħħa li jista’ jintlaħaq; għall-aċċess għal servizzi ta’ kura tas-saħħa; għall-għajnuna mill-Istat biex jiġi żgurat livell xieraq ta’ għajxien, edukazzjoni, divertiment, attivitajiet rikreattivi, u għal sehem sħiħ fil-ħajja kulturali u artistika.

(7)

L-Artikolu 7 tal-Konvenzjoni tan-Nazzjonijiet Uniti dwar id-Drittijiet tal-Persuni b’Diżabbiltà (1), ratifikata mill-Unjoni u mill-Istati Membri kollha tagħha, jistipula li l-Istati Parti għal dik il-Konvenzjoni għandhom jieħdu l-miżuri kollha adegwati biex jiżguraw it-tgawdija sħiħa mit-tfal b’diżabbiltà tad-drittijiet tal-bniedem u tal-libertajiet fundamentali kollha fuq bażi ugwali ma’ tfal oħra.

(8)

Flimkien mal-Istati Membri tagħha, l-Unjoni hija impenjata bis-sħiħ li tkun minn ta’ quddiem fl-implimentazzjoni tal-Aġenda 2030 tan-Nazzjonijiet Uniti u l-Għanijiet ta’ Żvilupp Sostenibbli tan-Nazzjonijiet Uniti, inkluż dawk dwar il-qerda tal-faqar, l-iżgurar ta’ ħajja b’saħħitha u l-promozzjoni tal-benesseri, u l-iżgurar ta’ edukazzjoni ta’ kwalità inklużiva u ekwa.

(9)

Fl-20 ta’ Frar 2013, il-Kummissjoni adottat ir-Rakkomandazzjoni 2013/112/UE (2) intitolata “L-investiment fit-tfal: niksru ċ-ċiklu tal-iżvantaġġ.” Dik ir-Rakkomandazzjoni tistipula approċċ integrat għat-tnaqqis tal-faqar jew tal-esklużjoni soċjali tat-tfal u għat-titjib tal-benesseri tat-tfal li jibni fuq tliet pilastri: l-aċċess għar-riżorsi, l-aċċess għal servizzi ta’ kwalità, u d-dritt tat-tfal li jipparteċipaw.

(10)

F’Novembru 2017, il-Parlament Ewropew, il-Kunsill u l-Kummissjoni pproklamaw il-Pilastru Ewropew tad-Drittijiet Soċjali, fejn stipulaw 20 prinċipju biex jiġu appoġġati swieq tax-xogħol u sistemi ta’ protezzjoni soċjali ġusti u li jiffunzjonaw sew. Il-prinċipju 11 jipprevedi d-dritt tat-tfal għal edukazzjoni u kura bikrija tat-tfal li tkun affordabbli u ta’ kwalità tajba, protezzjoni mill-faqar u għal miżuri speċifiċi biex jittejbu l-opportunitajiet indaqs tat-tfal li ġejjin minn kuntest żvantaġġat.

(11)

Il-Parlament Ewropew, fir-Riżoluzzjoni tiegħu tal-24 ta’ Novembru 2015 (3), stieden lill-Kummissjoni u lill-Istati Membri biex jintroduċu garanzija għat-tfal, b’enfasi fuq it-tfal fil-faqar u l-aċċess tagħhom għas-servizzi. Barra minn hekk, fir-Riżoluzzjoni tiegħu tal-11 ta’ Marzu 2021 (4) il-Parlament Ewropew stieden lill-Kummissjoni biex fl-Istrateġija tal-UE dwar id-Drittijiet tat-Tfal tinkludi miżuri konkreti ta’ investiment fit-tfal sabiex jinqered il-faqar tat-tfal, inkluż il-ħolqien ta’ Garanzija Ewropea għat-Tfal b’riżorsi xierqa, u biex tippreżenta l-proposta tagħha għall-Garanzija Ewropea għat-Tfal fl-ewwel trimestru tal-2021, u stieden lill-Istati Membri jinvestu r-riżorsi kollha possibbli, inkluż il-fondi tal-Unjoni, biex jiġġieldu l-faqar u l-esklużjoni soċjali tat-tfal u biex jistabbilixxu pjanijiet ta’ azzjoni nazzjonali ta’ garanzija għat-tfal.

(12)

Id-Dikjarazzjoni Konġunta intitolata “Overcoming poverty and social exclusion – mitigating the impact of COVID-19 on families – working together to develop prospects for strong children” (Negħlbu l-faqar u l-esklużjoni soċjali – intaffu l-impatt tal-COVID-19 fuq il-familji – naħdmu flimkien biex niżviluppaw prospetti għal tfal b’saħħithom), iffirmata f’Diċembru 2020 minn 24 Ministru tal-Kunsill Impjiegi, Politika Soċjali, Saħħa u Affarijiet tal-Konsumatur, talbet Garanzija Ewropea għat-Tfal ibbażata fuq il-prinċipji u l-approċċ integrat tar-Rakkomandazzjoni 2013/112/UE u tal-Pilastru Ewropew tad-Drittijiet Soċjali. Il-Ministri affermaw mill-ġdid li l-aċċess għal kura tas-saħħa mingħajr ħlas, edukazzjoni mingħajr ħlas, edukazzjoni u kura bikrija tat-tfal affordabbli, akkomodazzjoni diċenti u nutrizzjoni adegwata huma essenzjali għat-tfal f’riskju ta’ faqar jew ta’ esklużjoni soċjali.

(13)

Il-Pjan ta’ Azzjoni tal-Pilastru Ewropew tad-Drittijiet Soċjali (5) jagħti spinta ġdida biex jiġu indirizzati l-faqar u l-esklużjoni soċjali fl-Unjoni, b’mod partikolari billi jiffissa l-mira bl-2030 bħala orizzont biex l-għadd ta’ persuni f’riskju ta’ faqar jew esklużjoni soċjali jitnaqqas bi 15-il miljun, inkluż b’mill-inqas ħames miljuni tifel u tifla.

(14)

L-Istrateġija komprensiva tal-Unjoni dwar id-Drittijiet tat-Tfal (6) tgħin biex issaħħaħ il-parteċipazzjoni tat-tfal fis-soċjetà, tqiegħed l-aħjar interessi tat-tfal f’kunsiderazzjoni primarja, tipproteġi lit-tfal vulnerabbli, inkluż dawk f’riskju ta’ esklużjoni u marġinalizzazzjoni soċjoekonomiċi, tipproteġi d-drittijiet tat-tfal online, trawwem ġustizzja li hija adatta għat-tfal u tipprevjeni u tiġġieled il-vjolenza kontra t-tfal. Din għandha wkoll l-għan li tiġġieled id-diskriminazzjoni kontra t-tfal, inkluż abbażi tas-sess jew tal-orjentazzjoni sesswali tagħhom jew tal-ġenituri tagħhom.

(15)

L-għan ta’ din ir-Rakkomandazzjoni hu li tipprevjeni u tiġġieled l-esklużjoni soċjali billi tiggarantixxi l-aċċess tat-tfal fil-bżonn għal sett ta’ servizzi ewlenin, fosthom l-integrazzjoni ta’ perspettiva tal-ugwaljanza bejn il-ġeneru, sabiex titqies is-sitwazzjonijiet differenti tal-bniet u s-subien, billi tiġġieled il-faqar fost it-tfal u trawwem opportunitajiet indaqs. Tfal fil-bżonn huma persuni taħt it-18-il sena li huma f’riskju ta’ faqar jew esklużjoni soċjali. Dan jirreferi għal tfal li jgħixu f’familji f’riskju ta’ faqar, jew li jesperjenzaw deprivazzjoni materjali u soċjali severa, jew b’intensità ta’ xogħol baxxa ħafna.

(16)

Sabiex jipprevedu aċċess effettiv jew aċċess effettiv u mingħajr ħlas għas-servizzi ewlenin, l-Istati Membri, f’konformità maċ-ċirkostanzi u l-approċċi nazzjonali, jenħtieġ li jorganizzaw u jipprovdu tali servizzi jew jipprovdu benefiċċji adegwati sabiex il-ġenituri jew it-tuturi tat-tfal fil-bżonn ikunu f’pożizzjoni li jkopru l-ispejjeż jew il-ħlasijiet ta’ dawk is-servizzi. Hija meħtieġa attenzjoni partikolari biex jiġi evitat li kwalunkwe spiża possibbli ta’ akkumpanjament tifforma xkiel għal tfal fil-bżonn f’familji bi dħul baxx biex ikollhom aċċess sħiħ għas-servizzi ewlenin.

(17)

Kważi 18-il miljun tifel u tifla jinsabu f’riskju ta’ faqar jew esklużjoni soċjali fl-Unjoni (7), b’differenzi konsiderevoli bejn l-Istati Membri. Il-firxa ta’ fatturi ta’ riskju, li jistgħu jagħmlu lil xi tfal speċjalment vulnerabbli u esposti għall-faqar jew l-esklużjoni soċjali jvarjaw konsiderevolment. Għalhekk, l-approċċi nazzjonali għall-implimentazzjoni ta’ din ir-Rakkomandazzjoni għandhom jitfasslu skont iċ-ċirkostanzi u l-ħtiġijiet speċifiċi fuq il-post. Wieħed mid-determinanti ewlenin tal-esklużjoni soċjali tat-tfal huwa l-aċċess mhux ugwali għas-servizzi ewlenin, essenzjali għall-ġid tagħhom u l-iżvilupp tal-ħiliet soċjali, konjittivi u emozzjonali tagħhom. It-tfal li jgħixu fil-faqar jew it-tfal li ġejjin minn kuntest żvantaġġat aktarx li jsibu quddiemhom aktar ostakli fl-aċċess għall-edukazzjoni u l-kura bikrija tat-tfal, l-edukazzjoni inklużiva, il-kura tas-saħħa, in-nutrizzjoni tajba għas-saħħa u l-akkomodazzjoni adegwata. Dawn jibdew ħajjithom fi żvantaġġ, u dan jista’ jkollu implikazzjonijiet fit-tul għall-iżvilupp u għall-prospetti futuri tagħhom.

(18)

It-trażmissjoni interġenerazzjonali tal-esklużjoni soċjali tipperikola l-koeżjoni soċjali matul il-ġenerazzjonijiet u tiġġenera kostijiet ogħla għall-istati soċjali tagħna, filwaqt li xxekkel ir-reżiljenza ekonomika u soċjali. It-titjib tal-aċċess ugwali tat-tfal fil-bżonn għas-servizzi ewlenin huwa għaldaqstant mezz importanti biex jiżdiedu l-isforzi għall-prevenzjoni u l-ġlieda kontra l-esklużjoni soċjali. Dan jikkontribwixxi wkoll għat-trawwim ta’ opportunitajiet indaqs għat-tfal fil-bżonn u għall-ġlieda kontra l-faqar fost it-tfal.

(19)

L-indirizzar tal-iżvantaġġ mis-snin bikrija huwa investiment kosteffettiv, inkluż minn perspettiva fit-tul, peress li jikkontribwixxi mhux biss għall-inklużjoni tat-tfal u għall-eżiti soċjoekonomiċi ogħla tagħhom meta jkunu adulti, iżda wkoll għall-ekonomija u għas-soċjetà permezz ta’ integrazzjoni aħjar fis-suq tax-xogħol u fil-ħajja soċjali u titjib fit-tranżizzjoni mill-iskola għax-xogħol, inkluż permezz tal-implimentazzjoni sħiħa tar-Rakkomandazzjoni tal-Kunsill tat-30 ta’ Ottubru 2020 dwar Pont għall-Impjiegi – It-tisħiħ tal-Garanzija għaż-Żgħażagħ (8). L-investiment f’opportunitajiet indaqs għat-tfal jipprovdi s-sisien għal tkabbir sostenibbli u inklużiv, jappoġġja s-soċjetajiet ġusti u reżiljenti u l-konverġenza soċjali ’l fuq. Dan jikkontribwixxi wkoll biex jiġi indirizzat l-impatt ta’ żviluppi demografiċi negattivi billi jitnaqqsu n-nuqqasijiet ta’ ħiliet u ta’ ħaddiema u tiġi żgurata kopertura territorjali aħjar, filwaqt li jiġu sfruttati l-opportunitajiet li jirriżultaw mit-tranżizzjonijiet ekoloġiċi u diġitali.

(20)

L-aċċess ugwali għal edukazzjoni u kura u edukazzjoni bikrija tat-tfal li tkun ta’ kwalità u inklużiva huwa ċentrali biex titkisser it-trażmissjoni tal-esklużjoni soċjali u biex jiġu żgurati opportunitajiet indaqs għat-tfal f’sitwazzjoni żvantaġġata. Madankollu, id-disponibbiltà limitata u l-kostijiet għoljin tal-edukazzjoni u l-kura bikrija tat-tfal jistgħu joħolqu ostaklu għal tfal minn familji b’introjtu baxx. Ir-rati ta’ attendenza tagħhom huma konsiderevolment aktar baxxi u jirriżultaw aktar tard f’eżiti edukattivi agħar u f’rati ogħla ta’ tluq bikri mill-iskola, b’mod partikolari għat-tfal li ġejjin minn kuntest ta’ migrazzjoni jew it-tfal Rom. Is-segregazzjoni u d-diskriminazzjoni fl-aċċess għall-edukazzjoni ġenerali minn tfal b’diżabbiltà jew ħtiġijiet edukattivi speċjali jibqgħu ta’ sfida. L-għażla tal-istabbiliment edukattiv jeħtieġ li tirrifletti l-aħjar interessi tat-tfal. L-għadd dejjem jikber ta’ tfal fis-sistemi edukattivi li ġejjin minn kuntest ta’ migrazzjoni jitlob il-prevenzjoni ta’ ambjenti tal-iskola segregati u l-adattament tal-metodi tat-tagħlim, f’konformità mal-liġi nazzjonali u l-obbligi tal-Istati Membri skont l-istrumenti internazzjonali rilevanti fil-qasam.

(21)

Parti importanti mit-tagħlim, inkluż il-kisba ta’ ħiliet soċjali, isseħħ permezz ta’ attivitajiet sportivi, kulturali jew ta’ divertiment. Hemm provi li tali attivitajiet huma ta’ benefiċċju, speċjalment għal tfal li ġejjin minn kuntest żvantaġġat. Madankollu, huma wisq għaljin għal ċerti gruppi ta’ tfal jew il-parteċipazzjoni tagħhom fihom hija mxekkla minn nuqqas ta’ infrastruttura xierqa, minn aċċessibbiltà dgħajfa jew minn problemi lingwistiċi.

(22)

It-tfal fil-bżonn huma ġeneralment imxekkla milli jaċċessaw ċerti servizzi tal-kura tas-saħħa, bħall-kura dentali jew apparat ta’ sostenn, bħal ħadid tas-snien, lentijiet korrettivi jew nuċċalijiet. Dawn it-tfal għandhom ukoll inqas opportunitajiet u riżorsi biex jibbenefikaw minn programmi ta’ prevenzjoni tal-mard u ta’ promozzjoni tas-saħħa. Il-faqar ta’ introjtu u determinanti soċjali oħra jaffettwaw b’mod sinifikanti l-iżvilupp u s-saħħa ġenerali, inkluż is-saħħa mentali, tat-tfal u jżidu r-riskju ta’ mard fis-snin ta’ wara. L-intervent bikri u l-prevenzjoni huma essenzjali, flimkien ma’ aċċess aħjar għall-programmi ta’ prevenzjoni u promozzjoni tas-saħħa pubblika, inkluż it-tilqim, u l-appoġġ għat-trobbija tat-tfal, li jistgħu jgħinu biex jinkisbu riżultati aħjar.

(23)

L-aċċess għal nutrizzjoni tajba għas-saħħa u sostenibbli huwa sfida b’mod partikolari għal familji b’introjtu baxx. Programmi ta’ ikel u nutrizzjoni tajbin għas-saħħa jistgħu jgħinu biex jiġu indirizzati problemi bħal dieta ħażina, nuqqas ta’ attività fiżika, obeżità jew użu ta’ alkoħol u tabakk, u b’hekk jitnaqqsu l-malnutrizzjoni u n-nutrizzjoni ħażina, li huma aktar prevalenti fost tfal li ġejjin minn kuntest żvantaġġat. L-esperjenza tal-pandemija tal-COVID-19 uriet l-importanza ta’ skemi tal-ikliet tal-iskola għal xi tfal, li f’daqqa waħda sfaw imċaħħda minn sors affidabbli ta’ nutrizzjoni matul il-lockdown (9). L-iżgurar tal-aċċess tat-tfal fil-bżonn għal mill-inqas ikla waħda tajba għas-saħħa kull jum tal-iskola huwa għalhekk ta’ importanza kbira u jista’ jinkiseb jew billi jingħataw tali ikliet jew billi jiġi żgurat li l-ġenituri jew it-tuturi, jew it-tfal, ikunu f’pożizzjoni li jieħdu ħsieb l-ikliet, filwaqt li jitqiesu ċ-ċirkostanzi u l-ħtiġijiet lokali speċifiċi.

(24)

Tfal minn familji b’introjtu baxx, li ġejjin minn kuntest ta’ migrazzjoni jew ta’ oriġini minoranza etnika huma f’riskju ogħla ta’ privazzjoni severa ta’ akkomodazzjoni, ta’ affollament eċċessiv u ta’ faqar enerġetiku u huma aktar esposti għall-fenomenu tal-persuni mingħajr dar. In-nefqa fuq l-akkomodazzjoni hija ta’ piż kbir għal unitajiet domestiċi b’sors ta’ dħul wieħed, speċjalment dawk immexxija min-nisa. L-għoti ta’ akkomodazzjoni adegwata u l-iżgurar li t-tfal u l-familji tagħhom jirċievu akkomodazzjoni temporanja adegwata huma mekkaniżmi importanti biex tiġi indirizzata l-esklużjoni soċjali tat-tfal u jiġi mminimizzat ir-riskju li jisfaw mingħajr dar. Bil-għan tad-deistituzzjonalizzazzjoni tat-tfal, għandha tiġi promossa l-kura ta’ kwalità bbażata fil-komunità jew f’familja It-tqegħid tat-tfal fil-kura istituzzjonali għandu jsir biss meta dan ikun fl-aħjar interessi tat-tfal, filwaqt li titqies is-sitwazzjoni ġenerali tat-tfal u l-ħtiġijiet individwali tat-tfal. L-għoti ta’ appoġġ lit-tfal li jħallu l-kustodja istituzzjonali jew il-foster care huwa kruċjali biex l-għajxien indipendenti u l-integrazzjoni soċjali tagħhom jiġu appoġġati.

(25)

Il-kriżi li ħolqot il-pandemija tal-COVID-19 jista’ jkollha effetti estensivi fuq il-benesseri ekonomiku u soċjali tal-familji u tat-tfal, u x’aktarx taffettwa b’mod sproporzjonat lit-tfal li ġejjin minn kuntest żvantaġġat. Gruppi b’introjtu baxx u medju jħabbtu wiċċhom ma’ riskju ogħla ta’ telf ta’ introjtu, b’impatt potenzjalment sinifikanti fuq l-introjtu disponibbli tal-unitajiet domestiċi minħabba żieda fil-qgħad u tnaqqis fil-possibiltajiet ta’ telexogħol. Il-kriżi mistennija li żżid l-inugwaljanzi eżistenti u x’aktarx li ser tirriżulta f’żieda fl-għadd ta’ unitajiet domestiċi f’riskju ta’ faqar jew ta’ esklużjoni soċjali. Din tqiegħed ukoll pressjoni sinifikanti fuq id-disponibbiltà tas-servizzi. It-tfal li jesperjenzaw diversi forom ta’ żvantaġġ huma fost l-aktar milquta mill-kriżi. It-tagħlim mill-bogħod kien diffiċli għal ħafna tfal li jgħixu f’unitajiet domestiċi mingħajr appoġġ mill-familja, ħiliet jew tagħmir adegwat, inkluż għal tfal li jgħixu f’territorji remoti jew rurali b’infrastruttura diġitali inadegwata.

(26)

L-indirizzar tal-esklużjoni soċjali tat-tfal u t-tnaqqis tal-impatt soċjoekonomiku tal-pandemija tal-COVID-19 jeħtieġu approċċ integrat, iffukat fuq il-persuna u multidimensjonali u qafas ta’ politika ta’ abilitazzjoni. It-tisħiħ tal-kooperazzjoni u l-koordinazzjoni bejn is-servizzi f’diversi livelli jiggarantixxi prevenzjoni effettiva u jappoġġja l-inklużjoni soċjali tat-tfal. Flimkien mal-iżgurar tal-aċċess għal servizzi ewlenin, fir-reġjuni u fit-territorji kollha, inkluż permezz ta’ investiment fl-infrastruttura tas-servizzi u fil-forza tax-xogħol, huwa meħtieġ ukoll li jittejbu l-effettività u r-rilevanza tal-politiki relatati, jiġu kkombinati miżuri preventivi u ta’ rimedju u li jinkiseb l-aħjar benefiċċju mill-istrumenti eżistenti tal-Unjoni.

(27)

Il-proċess ta’ koordinazzjoni ekonomika u tal-impjiegi tas-Semestru Ewropew, appoġġat mit-Tabella ta’ Valutazzjoni Soċjali (10), enfasizza l-isfida tal-faqar jew tal-esklużjoni soċjali fost it-tfal, b’għadd ta’ Stati Membri li rċevew rakkomandazzjonijiet speċifiċi għall-pajjiż. Il-Linji Gwida dwar l-Impjiegi jenfasizzaw l-importanza li jiġi żgurat l-aċċess għal kulħadd, inkluż it-tfal, għal ċerti servizzi, bħall-edukazzjoni u l-kura bikrija tat-tfal, l-edukazzjoni u l-kura tas-saħħa, u tali aċċess iservi bħala kundizzjoni meħtieġa biex jiġu żgurati opportunitajiet indaqs.

(28)

Il-fondi tal-Unjoni huma disponibbli biex jappoġġjaw l-implimentazzjoni tal-Garanzija Ewropea għat-Tfal u miżuri ta’ appoġġ ulterjuri. Fil-Fond Soċjali Ewropew Plus, l-Istati Membri kollha ser jallokaw ammont xieraq biex jiġu indirizzati l-faqar jew l-esklużjoni soċjali tat-tfal. Għall-Istati Membri, li fihom ir-rata ta’ tfal f’riskju ta’ faqar jew ta’ esklużjoni soċjali tkun ogħla mill-medja tal-Unjoni, dan l-ammont għandu jkun mill-inqas 5 % tal-allokazzjoni nazzjonali tal-Fond Soċjali Ewropew Plus tagħhom. Skont il-prinċipji tas-sussidjarjetà u tal-proporzjonalità, il-Fond Ewropew għall-Iżvilupp Reġjonali u InvestEU ser jappoġġjaw ukoll investimenti fl-infrastruttura ta’ abilitazzjoni, bħall-akkomodazzjoni soċjali u l-faċilitajiet tal-edukazzjoni u l-kura bikrija tat-tfal, kif ukoll tagħmir u aċċess għal servizzi ġenerali u ta’ kwalità. Bħala parti mill-Pjan ta’ Rkupru għall-Ewropa u l-istrument “Next Generation EU”, il-Faċilità għall-Irkupru u r-Reżiljenza toffri finanzjament addizzjonali mill-Unjoni għal riformi, investiment u politiki għall-ġenerazzjoni li jmiss, it-tfal u ż-żgħażagħ, bħall-edukazzjoni u l-ħiliet, li għandhom jiġu inklużi fi pjanijiet nazzjonali ta’ rkupru u reżiljenza (11). L-Istrument ta’ Appoġġ Tekniku jista’ jappoġġja lill-Istati Membri fit-tfassil u fl-implimentazzjoni ta’ riformi strutturali fl-oqsma tal-edukazzjoni, is-servizzi soċjali, il-ġustizzja u s-saħħa, inkluż riformi transsettorjali li jindirizzaw il-faqar fost it-tfal u l-esklużjoni soċjali.

(29)

L-Istati Membri jistgħu jibbenefikaw ukoll mill-iskema tal-UE 2017-2023 tal-frott, il-ħaxix u l-ħalib fl-iskola biex jagħmlu prodotti tajbin għas-saħħa aktar disponibbli għat-tfal u jtejbu l-fehim tagħhom dwar il-benefiċċji ta’ ikel tajjeb għas-saħħa u sostenibbli.

(30)

Din ir-Rakkomandazzjoni jenħtieġ li tiġi implimentata permezz ta’ pjanijiet ta’ azzjoni nazzjonali adattati għaċ-ċirkostanzi nazzjonali, reġjonali u lokali. Dawn il-pjanijiet ta’ azzjoni nazzjonali jenħtieġ li jidentifikaw tfal fil-bżonn u l-ostakli li jiffaċċjaw biex jaċċessaw u jieħdu s-servizzi koperti minn din ir-Rakkomandazzjoni. Għal dan il-għan, hu rakkomandat li l-Istati Membri jinvolvu lill-partijiet ikkonċernati rilevanti, inkluż l-organizzazzjonijiet mhux governattivi li jippromwovu d-drittijiet tat-tfal. Il-progress fl-implimentazzjoni ta’ din ir-Rakkomandazzjoni jenħtieġ ukoll li jiġi mmonitorjat regolarment pereżempju, bħala parti mit-Tabella ta’ Valutazzjoni Soċjali fil-kuntest tas-Semestru Ewropew, inkluż permezz tal-iżvilupp ta’ indikaturi ta’ monitoraġġ rilevanti.

(31)

Din ir-Rakkomandazzjoni tikkomplementa r-Rakkomandazzjoni tal-Kummissjoni 2013/112/UE, tikkostitwixxi riżultat tal-Pjan ta’ Azzjoni tal-Pilastru Ewropew tad-Drittijiet Soċjali, u tikkomplementa l-Istrateġija komprensiva tal-Unjoni dwar id-Drittijiet tat-Tfal.

(32)

Din ir-Rakkomandazzjoni tirrispetta bis-sħiħ il-prinċipji tas-sussidjarjetà u tal-proporzjonalità. Hija mingħajr preġudizzju għall-prinċipji tal-liġi proċedurali nazzjonali u t-tradizzjonijiet legali tal-Istati Membri u ma tinvolvix estensjoni tas-setgħat tal-Unjoni,

1.

2.

3.

4.

5.

6.

7.

8.

9.

10.

11.

(a)

jinnominaw Koordinatur nazzjonali tal-Garanzija għat-Tfal, mgħammar b’riżorsi u mandat adegwati li jippermettu l-koordinazzjoni u l-monitoraġġ effettivi tal-implimentazzjoni ta’ din ir-Rakkomandazzjoni;

(b)

bil-ħsieb li l-miżuri jolqtu lit-tfal fil-bżonn bl-aktar mod effettiv, u filwaqt li jitqiesu l-organizzazzjonijiet u ċ-ċirkostanzi nazzjonali, reġjonali u lokali, jinvolvu lill-partijiet ikkonċernati rilevanti fl-identifikazzjoni tat-tfal fil-bżonn u l-ostakli li għandhom quddiemhom biex jaċċessaw u jieħdu s-servizzi koperti minn din ir-Rakkomandazzjoni;

(c)

fi żmien disa’ xhur mill-adozzjoni ta’ din ir-Rakkomandazzjoni, jippreżentaw pjan ta’ azzjoni lill-Kummissjoni, li jkopri l-perijodu sal-2030, biex jimplimentaw din ir-Rakkomandazzjoni, filwaqt li jqisu ċ-ċirkostanzi nazzjonali, reġjonali u lokali kif ukoll l-azzjonijiet u l-miżuri ta’ politika eżistenti li jappoġġjaw lit-tfal fil-bżonn. Il-pjan ta’ azzjoni jenħtieġ li jinkludi b’mod partikolari:

(d)

jiżviluppaw miżuri effettivi ta’ sensibilizzazzjoni għat-tfal fil-bżonn u għall-familji tagħhom, b’mod partikolari fil-livell reġjonali u lokali u permezz ta’ stabbilimenti edukattivi, assistenti soċjali mħarrġa, servizzi ta’ appoġġ għall-familja, organizzazzjonijiet tas-soċjetà ċivili u tal-ekonomija soċjali, bil-għan li titqajjem kuxjenza u titħeġġeġ u tiġi ffaċilitata l-adozzjoni tas-servizzi koperti minn din ir-Rakkomandazzjoni;

(e)

jiżguraw il-parteċipazzjoni ta’ awtoritajiet reġjonali, lokali u awtoritajiet rilevanti oħra, tfal u partijiet ikkonċernati rilevanti li jirrappreżentaw is-soċjetà ċivili, organizzazzjonijiet mhux governattivi, stabbilimenti edukattivi u korpi responsabbli għall-promozzjoni tal-inklużjoni u l-integrazzjoni soċjali, id-drittijiet tat-tfal, l-edukazzjoni inklużiva u n-nondiskriminazzjoni, inkluż korpi nazzjonali tal-ugwaljanza matul it-tħejjija, l-implimentazzjoni, il-monitoraġġ u l-evalwazzjoni tal-pjan ta’ azzjoni;

(f)

jirrapportaw kull sentejn lill-Kummissjoni dwar il-progress fl-implimentazzjoni ta’ din ir-Rakkomandazzjoni, f’konformità mal-pjan ta’ azzjoni nazzjonali msemmi fis-fil-punt (c).

12.