(1)

Is-Sistema ta’ Informazzjoni tas-Suq Intern (“l-IMI”) stabbilita bir-Regolament (UE) Nru 1024/2012 hija applikazzjoni tas-softwer aċċessibbli bl-użu tal-Internet u ġiet żviluppata mill-Kummissjoni, b’kooperazzjoni mal-Istati Membri, sabiex tgħin lill-Istati Membri jikkonformaw mar-rekwiżiti relatati mal-iskambju tal-informazzjoni stabbiliti fl-atti tal-Unjoni billi tipprovdi mekkaniżmu ċentralizzat ta’ komunikazzjoni biex jiffaċilita l-iskambju transfruntier tal-informazzjoni u l-assistenza reċiproka.

(2)

L-Artikolu 4(1) tar-Regolament (UE) Nru 1024/2012 jippermetti lill-Kummissjoni twettaq proġetti pilota biex tivvaluta kemm l-IMI tkun effettiva fl-implimentazzjoni tad-dispożizzjonijiet dwar il-kooperazzjoni amministrattiva stabbiliti f’atti tal-Unjoni li mhumiex elenkati fl-Anness ta’ dak ir-Regolament.

(3)

Id-Direttiva (UE) 2021/555 tal-Parlament Ewropew u tal-Kunsill (2) tipprevedi l-kooperazzjoni amministrattiva bejn l-Istati Membri dwar il-kontroll tal-akkwist u l-pussess ta’ armi tan-nar. L-Artikolu 18 ta’ dik id-Direttiva jeħtieġ lill-Kummissjoni tistabbilixxi arranġamenti dettaljati għal skambju sistematiku, permezz ta’ mezzi elettroniċi, tal-informazzjoni msemmija f’dak l-Artikolu. Il-Kummissjoni adottat ir-Regolament Delegat (UE) 2021/1423 (3) li jistabbilixxi l-arranġamenti dettaljati għall-iskambju sistematiku tal-informazzjoni msemmija fil-paragrafu 4 ta’ dak l-Artikolu dwar ir-rifjuti li jingħataw l-awtorizzazzjonijiet. L-IMI tista’ tkun għodda effettiva fl-implimentazzjoni tad-dispożizzjoni dwar il-kooperazzjoni amministrattiva li tidħol fil-kamp ta’ applikazzjoni ta’ dak ir-Regolament Delegat. Għaldaqstant, jenħtieġ li dik id-dispożizzjoni dwar il-kooperazzjoni amministrattiva tkun is-suġġett ta’ proġett pilota skont l-Artikolu 4 tar-Regolament (UE) Nru 1024/2012.

(4)

Jenħtieġ li l-IMI tipprovdi l-funzjonalità teknika, inkluż l-istabbiliment ta’ repożitorju, biex tippermetti lill-awtoritajiet kompetenti tal-Istati Membri jissodisfaw l-obbligi tagħhom stabbiliti fir-Regolament Delegat (UE) 2021/1423.

(5)

Jenħtieġ li l-IMI tiffaċilita l-kooperazzjoni amministrattiva bejn l-awtoritajiet tal-Istati Membri billi tippermettilhom ifittxu fir-repożitorju tal-IMI sabiex jivverifikaw jekk individwu partikolari jkunx ġie prekluż milli jakkwista jew milli jkollu fil-pussess tiegħu arma tan-nar. Sabiex jiġu rrispettati d-drittijiet tal-protezzjoni tad-data tal-individwi li dwarhom ikun hemm data rreġistrata fir-repożitorju, jenħtieġ li l-awtoritajiet nazzjonali jkunu jistgħu jikkonsultaw biss l-informazzjoni relatata ma’ individwu partikolari. Jenħtieġ li l-awtoritajiet nazzjonali ma jkunux jistgħu jfittxu bi kriterji oħra, pereżempju r-rifjuti kollha għal perjodu partikolari jew għal Stat Membru partikolari.

(6)

Biex jiġi żgurat li d-data personali skambjata bħala parti mill-proġett pilota tiġi mblukkata hekk kif ma tkunx aktar meħtieġa skont l-Artikolu 14 tar-Regolament (UE) Nru 1024/2012, jenħtieġ li tiġi indikata b’mod ċar id-data ta’ meta t-tali data trid titqies li ma tkunx aktar meħtieġa għall-finijiet ta’ dak l-Artikolu. Jenħtieġ li dik id-data tkun taqbel mad-data stabbilita skont l-Artikolu 5 tar-Regolament Delegat (UE) 2021/1423 bħala d-data ta’ meta l-informazzjoni relatata mad-deċiżjoni ta’ rifjut ma tridx tibqa’ aċċessibbli fl-IMI. Huwa xieraq ukoll li jiġi ċċarat li, ladarba d-data tkun imblukkata, din trid titħassar awtomatikament fl-IMI tliet snin wara mingħajr il-ħtieġa ta’ għeluq formali.

(7)

Skont l-Artikolu 4(2) tar-Regolament (UE) Nru 1024/2012, il-Kummissjoni trid tippreżenta evalwazzjoni tal-eżitu tal-proġett pilota lill-Parlament Ewropew u lill-Kunsill. Huwa xieraq li tiġi speċifikata d-data sa meta jenħtieġ li tiġi ppreżentata l-evalwazzjoni.

(8)

Il-miżuri previsti f’din id-Deċiżjoni huma skont l-opinjoni tal-Kumitat stabbilit bl-Artikolu 24 tar-Regolament (UE) Nru 1024/2012,

(a)

repożitorju għall-ħżin u għall-kondiviżjoni tal-informazzjoni dwar ir-rifjuti skont ir-Regolament Delegat (UE) 2021/1423;

(b)

faċilità ta’ tiftix li tippermetti lill-awtoritajiet kompetenti jfittxu fir-repożitorju sabiex jivverifikaw jekk dan jinkludix informazzjoni dwar ir-rifjuti fir-rigward ta’ individwu speċifiku;

(c)

faċilità li tippermetti li l-entrati jitneħħew u jiġu aġġornati skont l-Artikolu 4 tar-Regolament Delegat (UE) 2021/1423;

(d)

sistema biex jintbagħtu tfakkiriet regolari bil-posta elettronika lill-awtoritajiet kompetenti biex dawn jitfakkru jirrieżaminaw ċerti entrati skont l-Artikolu 4 tar-Regolament Delegat (UE) 2021/1423.