(1)

Il-Konvenzjoni dwar l-Avjazzjoni Ċivili Internazzjonali, li ġiet iffirmata f’Chicago fis-7 ta’ Diċembru 1944 u tirregola t-trasport internazzjonali bl-ajru (il-“Konvenzjoni ta’ Chicago”), daħlet fis-seħħ fl-4 ta’ April 1947. Hija stabbilixxiet l-Organizzazzjoni tal-Avjazzjoni Ċivili Internazzjonali (“ICAO”).

(2)

L-Istati Membri tal-Unjoni huma Partijiet Kontraenti tal-Konvenzjoni ta’ Chicago u Stati Kontraenti għall-ICAO, filwaqt li l-Unjoni għandha status ta’ osservatur f’ċerti korpi tal-ICAO.

(3)

Skont l-Artikolu 54 tal-Konvenzjoni ta’ Chicago, il-Kunsill tal-ICAO jista’ jadotta standards internazzjonali (“standards”) u prattiki rakkomandati għall-avjazzjoni u jiddeżinjahom bħala Annessi għall-Konvenzjoni ta’ Chicago (“Annessi tal-ICAO”), b’mod partikolari fir-rigward tas-sikurezza tal-avjazzjoni ċivili.

(4)

Skont l-Artikolu 90 tal-Konvenzjoni ta’ Chicago, kwalunkwe Anness tal-ICAO jew kwalunkwe emenda għal Anness tal-ICAO għandha ssir effettiva fi żmien tliet xhur minn meta jiġu ppreżentati lill-Istati Kontraenti tal-ICAO, jew fl-aħħar ta’ tali perijodu itwal ta’ żmien li l-Kunsill tal-ICAO jista’ jippreskrivi, dment li sadanittant ma jkunx hemm maġġoranza ta’ Stati Kontraenti tal-ICAO li jirreġistraw id-diżapprovazzjoni tagħhom.

(5)

Ladarba jiġu adottati u jkunu effettivi, l-istandards ikunu vinkolanti għall-Istati Kontraenti kollha tal-ICAO, inkluż l-Istati Membri kollha tal-Unjoni, f’konformità mal-Konvenzjoni ta’ Chicago u fi ħdan il-limiti stabbiliti fiha.

(6)

Skont l-Artikolu 38 tal-Konvenzjoni ta’ Chicago, kwalunkwe Stat Kontraenti tal-ICAO li jsibha imprattikabbli li jikkonforma fl-aspetti kollha ma’ kwalunkwe standard jew li jġib ir-regolamenti jew il-prattiki tiegħu stess f’konformità sħiħa ma’ kwalunkwe standard wara emenda ta’ dan tal-aħħar, jew li jqis li huwa meħtieġ li jadotta regolamenti jew prattiki li jvarjaw fi kwalunkwe aspett partikolari minn dawk stabbiliti minn standard, għandu jinnotifika minnufih lill-ICAO dwar id-differenzi bejn ir-regolamenti jew il-prattika tiegħu stess u dawk stabbiliti mill-istandard. Fil-każ ta’ emendi għall-istandards, kwalunkwe Stat li ma jagħmilx l-emendi xierqa għar-regolamenti jew il-prattiki tiegħu stess għandu jinnotifika lill-Kunsill tal-ICAO fi żmien sittin jum mill-adozzjoni tal-emenda għall-istandard, jew jindika l-azzjoni li jipproponi li jieħu.

(7)

Ir-regoli interni tal-ICAO, b’mod partikolari l-iskadenzi stabbiliti mill-ICAO għall-Istati Kontraenti tal-ICAO biex jiġu notifikati d-differenzi fir-rigward tal-istandards, kif ukoll l-għadd ta’ differenzi fil-qasam tas-sikurezza tal-avjazzjoni li għandu jiġu notifikati kull sena, jagħmluha diffiċli biex tiġi stabbilita l-pożizzjoni li għandha tiġi adottata f’isem l-Unjoni f’Deċiżjoni tal-Kunsill ibbażata fuq l-Artikolu 218(9) tat-Trattat fi żmien xieraq biex tiġi notifikata kull differenza. Barra minn hekk, l-istandards adottati mill-Kunsill tal-ICAO fil-qasam tas-sikurezza tal-avjazzjoni fil-parti l-kbira jikkonċernaw kwistjonijiet ta’ kompetenza esklużiva tal-Unjoni. Għalhekk huwa effiċjenti u xieraq li jiġi stabbilit qafas għall-kriterji u l-proċedura li għandhom jiġu segwiti għan-notifika tad-differenzi fir-rigward tal-istandards fil-qasam tas-sikurezza tal-avjazzjoni li jaqgħu fil-kompetenza esklużiva tal-Unjoni, mingħajr preġudizzju għad-drittijiet u l-obbligi tal-Istati Membri skont il-Konvenzjoni ta’ Chicago.

(8)

Minħabba l-ispeċifiċità tas-settur tas-sikurezza tal-avjazzjoni meta mqabbel ma’ setturi oħra ttrattati mill-ICAO, b’mod partikolari l-għadd kbir ta’ standards adottati f’dak is-settur mill-Kunsill tal-ICAO u l-għadd ta’ differenzi li għandhom jiġu notifikati kull sena, din id-Deċiżjoni tirrigwarda biss id-dominju tas-sikurezza tal-avjazzjoni sabiex jiġu simplifikati l-proċessi u jiġu trattati bosta notifiki b’mod effiċjenti. Fil-livell tal-ICAO, l-istandards tas-sikurezza tal-avjazzjoni jinsabu prinċipalment fl-Annessi 1, 6, 8, 14, 18 u 19 tal-ICAO. Fil-livell tal-Unjoni, ir-rekwiżiti li jinsabu f’dawk l-istandards huma prinċipalment riflessi fir-Regolament (UE) 2018/1139 tal-Parlament Ewropew u tal-Kunsill (1), u fl-atti ta’ implimentazzjoni u ta’ delega adottati abbażi tiegħu, b’mod partikolari fir-Regolamenti tal-Kummissjoni (UE) Nru 1178/2011 (2), (UE) Nru 748/2012 (3), (UE) Nru 965/2012 (4), (UE) Nru 139/2014 (5), (UE) Nru 452/2014 (6)u (UE) Nru 1321/2014 (7), (UE) 2015/640 (8), (UE) Nru 139/2014, kif ukoll fir-Regolamenti (KE) Nru 2111/2005 (9) u (UE) Nru 376/2014 (10) tal-Parlament Ewropew u tal-Kunsill.

(9)

Barra minn hekk, jenħtieġ li din id-Deċiżjoni tkun limitata għall-pożizzjonijiet li għandhom jittieħdu f’isem l-Unjoni fi ħdan l-ICAO f’oqsma ta’ kompetenza esklużiva tal-Unjoni.

(10)

Id-differenzi fl-istandards adottati mill-Kunsill tal-ICAO jistgħu jirriżultaw mil-liġi tal-Unjoni minħabba l-adozzjoni ta’ standard ġdid jew emendat minn dak il-Kunsill jew minħabba modifika għal-liġi tal-Unjoni. Fir-rigward ta’ tali differenzi, il-pożizzjoni li għandha tiġi adottata f’isem l-Unjoni jenħtieġ li tkun ibbażata fuq dokument bil-miktub ippreżentat mill-Kummissjoni fi żmien debitu lill-Kunsill għad-diskussjoni u l-approvazzjoni.

(11)

Id-differenzi fl-istandards adottati mill-Kunsill tal-ICAO fil-qasam tas-sikurezza tal-avjazzjoni jistgħu jirriżultaw ukoll minn miżuri nazzjonali adottati skont l-Artikolu 71 tar-Regolament (UE) 2018/1139 fil-każ ta’ ċirkostanzi imprevedibbli urġenti, fejn dawk il-miżuri jkunu differenti mill-istandards u, għalhekk, jeħtieġu n-notifika tad-differenzi lill-ICAO skont l-Artikolu 38 tal-Konvenzjoni ta’ Chicago. Huwa għalhekk xieraq ukoll li tiġi definita f’din id-Deċiżjoni l-proċedura li għandha tiġi segwita għad-definizzjoni ta’ tali differenzi. Jenħtieġ li dik il-proċedura tiddependi fuq il-kamp ta’ applikazzjoni u d-durata tal-miżuri nazzjonali adottati, f’konformità mal-prinċipji ta’ sussidjarjetà u proporzjonalità, u jenħtieġ li tippermetti lill-Istati Membri jikkonformaw mingħajr dewmien mal-obbligi internazzjonali tagħhom skont l-Artikolu 38 tal-Konvenzjoni ta’ Chicago. Jenħtieġ li dik il-proċedura tkun mingħajr preġudizzju għall-kondizzjonijiet u l-proċedura stipulati fl-Artikolu 71 tar-Regolament (UE) 2018/1139.

(12)

Id-differenzi li għandhom jiġu notifikati lill-ICAO jenħtieġ li jkunu bbażati b’mod partikolari fuq l-informazzjoni pprovduta mill-Aġenzija tas-Sikurezza tal-Avjazzjoni tal-Unjoni Ewropea f’konformità mal-Artikolu 90(4) tar-Regolament (UE) 2018/1139, fejn applikabbli. Jenħtieġ li d-differenzi jsegwu l-format definit mill-ICAO fil-Formola dwar in-Notifika ta’ Konformità jew Differenzi tagħha jew fis-sistema tal-Iffajljar Elettroniku tad-Differenzi, fejn meħtieġ mill-ICAO. Fejn, skont din id-Deċiżjoni, il-pożizzjoni li għandha tiġi adottata f’isem l-Unjoni tkun stabbilita f’dokument bil-miktub ippreżentat mill-Kummissjoni lill-Kunsill għad-diskussjoni u l-approvazzjoni, jenħtieġ li tali dokument, fejn xieraq u fuq bażi ta’ każ b’każ, jindika jekk jenħtieġx li tingħata flessibbiltà lill-Istati Membri għan-notifika tad-differenzi inkwistjoni. Barra minn hekk, jenħtieġ li l-Kummissjoni tagħmel ħilitha biex tibda tħejji tali dokument kemm jista’ jkun malajr sabiex tippermetti biżżejjed ħin għal tali tħejjija, inkluż kwalunkwe konsultazzjoni xierqa li għandha titwettaq fil-livell tal-esperti.

(13)

Jenħtieġ li l-implimentazzjoni ta’ din id-Deċiżjoni ma tinvolvix ksur tal-obbligi tal-Istati Membri taħt il-liġi tal-Unjoni jew l-obbligi internazzjonali tagħhom taħt il-Konvenzjoni ta’ Chicago, b’mod partikolari fir-rigward tal-konformità mal-iskadenza għan-notifika tad-differenzi lill-ICAO.

(14)

Jenħtieġ li din id-Deċiżjoni tapplika għal perijodu limitat ta’ żmien, jiġifieri sa wara s-sessjoni tal-Kunsill tal-ICAO wara l-Assemblea tal-ICAO li jmiss, sabiex il-Kunsill ikun jista’ jivvaluta l-effettività ta’ din id-Deċiżjoni u jiddeċiedi, abbażi ta’ proposta tal-Kummissjoni, jekk jestendix jew le l-applikazzjoni tagħha jew inkella jemendaha,