(1)

Ir-Regolament (KE) Nru 1831/2003 jipprevedi l-awtorizzazzjoni tal-addittivi għall-użu fin-nutrizzjoni tal-annimali u jipprevedi r-raġunijiet u l-proċeduri għall-għoti ta’ din l-awtorizzazzjoni.

(2)

F’konformità mal-Artikolu 7 tar-Regolament (KE) Nru 1831/2003, tressqet applikazzjoni għall-awtorizzazzjoni tal-kloridrat monoidrat tal-L-ċisteina magħmul bil-fermentazzjoni ma’ Escherichia coli KCCM 80109 u KCCM 80197. Ma’ din l-applikazzjoni ntbagħtu d-dettalji u d-dokumenti meħtieġa skont l-Artikolu 7(3) tar-Regolament (KE) Nru 1831/2003.

(3)

Din l-applikazzjoni tikkonċerna l-awtorizzazzjoni tal-kloridrat monoidrat tal-L-ċisteina magħmul bil-fermentazzjoni ma’ Escherichia coli KCCM 80109 u KCCM 80197 bħala addittiv tal-għalf għall-ispeċijiet kollha tal-annimali L-applikant talab biex dan l-addittiv jiġi klassifikat fil-kategorija tal-addittivi “addittivi sensorjali”.

(4)

L-applikant talab li l-addittiv tal-għalf jiġi awtorizzat għall-użu wkoll fl-ilma tax-xorb. Iżda r-Regolament (KE) Nru 1831/2003 ma jippermettix l-awtorizzazzjoni ta’ “komposti aromatizzanti” għall-użu fl-ilma għax-xorb. Għaldaqstant, l-użu tal-kloridrat monoidrat tal-L-ċisteina magħmul bil-fermentazzjoni ma’ Escherichia coli KCCM 80109 u KCCM 80197 fl-ilma tax-xorb jenħtieġ ma jkunx permess. Il-fatt li l-kloridrat monoidrat tal-L-ċisteina magħmul bil-fermentazzjoni ma’ Escherichia coli KCCM 80109 u KCCM 80197 mhux awtorizzat biex jintuża bħala aromatizzant fl-ilma tax-xorb, ma jipprekludix l-użu tiegħu fl-għalf kompost, li jingħata mal-ilma.

(5)

Fl-opinjoni tagħha tad-19 ta’ Marzu 2020 (2), l-Awtorità Ewropea dwar is-Sigurtà fl-Ikel (“l-Awtorità”) ikkonkludiet li skont il-kundizzjonijiet proposti tal-użu fl-għalf, il-kloridrat monoidrat tal-L-ċisteina magħmul bil-fermentazzjoni ma’ Escherichia coli KCCM 80109 u KCCM 80197 ma għandux effetti negattivi fuq is-saħħa tal-annimali, is-saħħa tal-konsumaturi jew fuq l-ambjent. L-Awtorità kkonkludiet għall-kloridrat monoidrat tal-L-ċisteina magħmul bil-fermentazzjoni ma’ Escherichia coli KCCM 80109 u KCCM 80197 li għalkemm l-esponiment tal-utenti permezz tan-nifs mhux probabbli minħabba l-potenzjal baxx tat-trab, il-prodott hu propost li jiġi klassifikat bħala irritant respiratorju minħabba l-pH baxx tiegħu meta jkun f’soluzzjoni. Barra minn hekk, abbażi tar-riżultati tal-istudji pprovduti, dan jenħtieġ jiġi klassifikat bħala irritanti għall-ġilda u li dan jista’ jikkawża ħsara serja lill-għajnejn. Il-kloridrat monoidrat tal-L-ċisteina mhux sensitizzatur dermali. L-Awtorità kkonkludiet ukoll li peress li l-kloridrat monoidrat tal-L-ċisteina magħmul bil-fermentazzjoni ma’ Escherichia coli KCCM 80109 u KCCM 80197 jintuża fl-ikel bħala aromatizzant, hu mistenni li dan jista’ jipprovdi funzjoni simili fl-għalf u mhi meħtieġa l-ebda dimostrazzjoni ulterjuri tal-effikaċja meta jintuża fl-għalf. L-Awtorità ma jidhrilhiex li hemm bżonn rekwiżiti speċifiċi għal monitoraġġ ta’ wara t-tqegħid fis-suq. Ivverifikat ukoll ir-rapport dwar il-metodu tal-analiżi tal-addittiv tal-għalf, fl-għalf imressaq mil-Laboratorju ta’ Referenza stabbilit bir-Regolament (KE) Nru 1831/2003.

(6)

Il-valutazzjoni tal-kloridrat monoidrat tal-L-ċisteina magħmul bil-fermentazzjoni ma’ Escherichia coli KCCM 80109 u KCCM 80197 turi li l-kundizzjonijiet għall-awtorizzazzjoni, kif previst fl-Artikolu 5 tar-Regolament (KE) Nru 1831/2003, huma ssodisfati. Għaldaqstant, l-użu tal-kloridrat monoidrat tal-L-ċisteina magħmul bil-fermentazzjoni ma’ Escherichia coli KCCM 80109 u KCCM 80197 jenħtieġ jiġi awtorizzat kif speċifikat fl-Anness ta’ dan ir-Regolament.

(7)

Jenħtieġ li jiġu previsti restrizzjonijiet u kundizzjonijiet biex ikun hemm kontroll aħjar. B’mod partikolari, jenħtieġ jiġi indikat kontenut rakkomandat fuq it-tikketta tal-addittiv tal-għalf. Meta jinqabeż dan il-kontenut, fuq it-tikketta tat-taħlitiet lesti minn qabel jenħtieġ tiġi indikata ċerta informazzjoni.

(8)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,