(1)

Fis-16 ta’ Mejju 2019, fuq il-bażi tal-Artikolu 10 tar-Regolament bażiku, il-Kummissjoni Ewropea (“il-Kummissjoni”) bdiet investigazzjoni antisussidji b’rabta mal-importazzjonijiet fl-Unjoni ta’ ċerti materjali tal-fibra tal-ħġieġ minsuġa u/jew meħjuta (“GFF”) li joriġinaw mir-Repubblika tal-Poplu taċ-Ċina (ir-“RPĊ”) u mill-Eġittu (flimkien imsejħa “il-pajjiżi kkonċernati”). Il-Kummissjoni ppubblikat Notifika ta’ Bidu f’Il-Ġurnal Uffiċjali tal-Unjoni Ewropea (“Notifika ta’ Bidu”) (2) fis-16 ta’ Mejju 2019,.

(2)

Il-Kummissjoni bdiet l-investigazzjoni wara lment ippreżentat fl-1 ta’ April 2019 minn Tech-Fab Europe (“l-ilmentatur”) f’isem il-produtturi li jirrappreżentaw aktar minn 25 % tal-produzzjoni totali tal-Unjoni ta’ ċerti materjali tal-fibra tal-ħġieġ minsuġa u/jew meħjuta. L-ilment kien fih evidenza ta’ sussidjar u ta’ dannu konsegwenti li kien biżżejjed sabiex jiġġustifika l-bidu tal-investigazzjoni.

(3)

Qabel il-bidu tal-investigazzjoni antisussidji, il-Kummissjoni nnotifikat lill-Gvern taċ-Ċina (“GTĊ”) (3) u lill-Gvern tal-Eġittu (“GTE”) (4) li hija rċeviet ilment iddokumentat kif suppost u stiednet lill-GTĊ u lill-GTE għal konsultazzjonijiet f’konformità mal-Artikolu 10(7) tar-Regolament bażiku. Fit-13 ta’ Mejju 2019 saru konsultazzjonijiet mal-GTĊ u mal-GTE. Madankollu, ma setgħet tinstab ebda soluzzjoni maqbula b’mod reċiproku.

(4)

Fil-21 ta’ Frar 2019, il-Kummissjoni bdiet investigazzjoni anti-dumping separata tal-istess prodott li joriġina mir-RPĊ u mill-Eġittu (5) (“l-investigazzjoni anti-dumping separata”). Fis-7 ta’ April 2020, il-Kummissjoni imponiet dazji antidumping definittivi fuq l-importazzjonijiet tal-prodott ikkonċernat li joriġinaw mir-RPĊ u mill-Eġittu (6) (ir-Regolament anti-dumping definittiv). L-analiżijiet tad-dannu, tal-kawżalità u tal-interess tal-Unjoni mwettqa f’din l-investigazzjoni antisussidji u l-investigazzjoni anti-dumping separata huma identiċi mutatis mutandis, peress li d-definizzjoni tal-industrija tal-Unjoni, il-produtturi tal-Unjoni inklużi fil-kampjun, il-perjodu taħt kunsiderazzjoni u l-perjodu ta’ investigazzjoni huma l-istess fiż-żewġ investigazzjonijiet.

(5)

Il-GTĊ sostna li l-investigazzjoni jenħtieġ li ma titnediex minħabba li l-ilment ma kienx jissodisfa r-rekwiżiti evidenzjarji tal-Artikoli 11(2) u 11(3) tal-Ftehim tad-WTO dwar Sussidji u Miżuri Kompensatorji (‘Ftehim SCM’) u tal-Artikolu 10(2) tar-Regolament Bażiku. Skont il-GTĊ, ma kienx hemm biżżejjed evidenza ta’ sussidji kumpensabbli, ta’ dannu u ta’ rabta kawżali bejn l-importazzjonijiet sussidjati u d-dannu.

(6)

Il-Kummissjoni ma laqgħetx din l-affermazzjoni. L-evidenza ppreżentata fl-ilment kienet tikkostitwixxi l-informazzjoni disponibbli b’mod raġonevoli għall-ilmentatur f’dak l-istadju. Kif jidher fil-memorandum dwar is-suffiċjenza ta’ evidenza, li fih il-valutazzjoni tal-Kummissjoni dwar l-evidenza kollha li għandha għad-dispożizzjoni tal-Kummissjoni dwar ir-Repubblika tal-Poplu taċ-Ċina u l-Eġittu, u li fuq il-bażi tagħha l-Kummissjoni bdiet l-investigazzjoni, kien hemm biżżejjed evidenza, fl-istadju tal-bidu, li s-sussidji allegati kienu kumpensabbli f’termini tal-eżistenza, l-ammont u n-natura tagħhom. L-ilment kien fih ukoll biżżejjed evidenza tal-eżistenza ta’ dannu għall-industrija tal-Unjoni, li kien ikkawżat mill-importazzjonijiet sussidjati.

(7)

B’mod aktar speċifiku, matul il-konsultazzjonijiet ta’ qabel il-bidu, il-GTĊ indika li r-referenzi tal-ilmentatur għal kwalunkwe pjan, programm jew rakkomandazzjoni taċ-Ċina kienu irrilevanti peress li mhumiex vinkolanti u li l-industrija tal-GFF mhija msemmija la fit-13-il Pjan ta’ Ħames Snin taċ-Ċina u lanqas fit-13-il Pjan ta’ Ħames Snin għall-Industrija tal-Materjali tal-Bini (2016-2020). Wara l-bidu, il-GTĊ sostna wkoll li l-GFF mhijiex koperta mid-dokument ‘Made in China 2025’. Il-Kummissjoni nnutat li l-GTĊ ma jikkontestax l-eżistenza ta’ pjanijiet, programmi jew rakkomandazzjonijiet bħal dawn iżda biss sa fejn huma vinkolanti jew sa fejn ikopru l-industrija tal-GFF. Il-Kummissjoni osservat ukoll li l-ilmentatur ipprovda evidenza li tindika li jissemmew “materjali ġodda” f’diversi dokumenti tal-gvern, filwaqt li “materjali bbażati fuq il-ħġieġ” jissemmew fit-13-il Pjan ta’ Ħames Snin għall-Industrija tal-Materjali tal-Bini (2016-2020). Il-GTĊ naqas milli jipproduċi xi evidenza li turi li dawk l-affermazzjonijiet ma jkunux applikabbli għall-prodott ikkonċernat.

(8)

Il-GTĊ iddikjara wkoll li la l-Korporazzjoni Ċiniża għall-Assigurazzjoni tal-Esportazzjonijiet u tal-Kreditu (“Sinosure”) u lanqas il-banek kummerċjali tal-Istat mhuma korpi pubbliċi u li l-GTĊ ma jinkarigax jew jagħti direzzjonijiet lil banek privati. Il-Kummissjoni nnutat li din l-affermazzjoni hija marbuta mal-affermazzjoni diġà evokata hawn fuq, u li l-ilment, fost l-oħrajn, semma l-Liġi Bankarja fiċ-Ċina, li l-GTĊ ma jikkontestax li hija parti mil-leġiżlazzjoni Ċiniża. Il-Kummissjoni enfasizzat ukoll li l-investigazzjonijiet antisussidji riċenti tal-UE kienu kkonkludew b’mod differenti dwar din il-kwistjoni (7).

(9)

Barra minn hekk, il-GTĊ sostna li l-kreditu tax-xerrejja tal-esportazzjonijiet huwa pprovdut lil kumpaniji barranin u għalhekk ma jibbenefikax lill-produtturi Ċiniżi tal-GFF. Madankollu, il-Kummissjoni sabet li l-benefiċċji mogħtija lil kumpaniji barranin li huma proprjetà tal-produtturi Ċiniżi tal-GFF jistgħu jibbenefikaw lil dawn tal-aħħar.

(10)

Il-GTĊ indika li l-iskema tat-taxxa relatata mad-deprezzament mgħaġġel tat-tagħmir użat mill-intrapriżi ta’ Teknoloġija Avvanzata għall-iżvilupp u għall-produzzjoni ta’ Teknoloġija Avvanzata, kif ukoll xi programmi ta’ għotjiet minn dawk imsemmija kienu mitmuma. Il-Kummissjoni ħadet nota ta’ dan il-kumment, iżda enfasizzat li la japplika għall-programmi kollha u lanqas għal-livelli differenti ta’ awtoritajiet tal-gvern (jiġifieri nazzjonali, reġjonali jew lokali) imsemmija fl-ilment. Barra minn hekk, l-iskema tat-taxxa relatata mad-deprezzament mgħaġġel xorta tista’ twassal għal benefiċċji kontinwi bħal deprezzament matul il-ħajja tat-tagħmir rilevanti, u possibbilment tkopri l-perjodu ta’ investigazzjoni.

(11)

Wara l-bidu, il-GTĊ argumenta wkoll li l-ilmentatur ma stabbilixxiex il-kundizzjonijiet għall-applikazzjoni ta’ valur referenzjarju minn barra l-pajjiż għas-self u għad-drittijiet tal-użu tal-art. Il-Kummissjoni sabet, madankollu, li l-allegazzjonijiet li jinsabu fl-ilment huma appoġġati minn investigazzjonijiet antisussidji reċenti tal-UE li kkonkludew dwar dan li hemm ħtieġa ta’ valuri referenzjarji esterni aġġustati għall-kundizzjonijiet prevalenti fir-RPĊ (8).

(12)

Barra minn hekk, il-GTĊ sostna li l-ilment kien nieqes minn biżżejjed evidenza peress li kien jiddependi l-aktar fuq regolamenti preċedenti tal-UE li jikkonċernaw kampijiet ta’ applikazzjoni differenti tal-prodotti. Madankollu, il-Kummissjoni nnutat li s-sejbiet li saru f’investigazzjonijiet antisussidji preċedenti u riċenti jirrigwardaw l-istess allegati programmi ta’ sussidju fl-ilment. Wara l-bidu, il-GTĊ sostna wkoll li kienu seħħew bidliet u riformi sostanzjali fis-settur finanzjarju fis-snin mill-2016 sal-2018, u li għalhekk l-ilment ma setax jiddependi fuq sitwazzjoni li kienet teżisti qabel. Madankollu, il-Kummissjoni nnutat li fl-ilment l-ilmentatur ipprovda wkoll evidenza addizzjonali tal-eżistenza kontinwa tal-programmi ta’ sussidju, mingħajr ma dawn ġew mibdula sostanzjalment. Il-Kummissjoni fakkret ukoll li l-GTĊ naqas milli jipprovdi evidenza li tirribatti l-kontinwazzjoni tal-programmi rilevanti. Għalhekk, fl-istadju tal-bidu, l-evidenza disponibbli kellha t-tendenza turi li ma kien hemm ebda bidla rilevanti fil-programmi ta’ sussidju inkwistjoni. Fl-aħħar mill-aħħar, dan ġie kkonfermat ukoll f’din l-investigazzjoni.

(13)

Il-GTĊ sostna wkoll, fir-rigward ta’ diversi sussidji, li l-applikant naqas milli jipprovdi evidenza tal-benefiċċju u tal-ispeċifiċità. Il-Kummissjoni hija tal-fehma li l-ilmentatur ipprovda biżżejjed evidenza tal-benefiċċju u tal-ispeċifiċità kif kien raġonevolment disponibbli għalih. Fi kwalunkwe każ, il-Kummissjoni eżaminat l-evidenza fl-ilment u pprovdiet il-valutazzjoni tagħha stess tal-elementi rilevanti kollha fil-memorandum ta’ suffiċjenza ta’ evidenza, li tpoġġiet fil-fajl miftuħ mal-ftuħ. Il-GTĊ tenna l-kummenti tiegħu wara l-bidu, iżda ma pprovdiex evidenza ulterjuri.

(14)

Għalhekk, il-Kummissjoni kkonkludiet li kien hemm biżżejjed evidenza pprovduta fl-ilment li x’aktarx turi l-allegat eżistenza ta’ sussidjar mill-GTĊ.

(15)

Fl-aħħar nett, element partikolari ta’ dan il-każ huwa li l-allegat sussidjar fl-Eġittu jikkonċerna żewġ kumpaniji fiż-Żona ta’ Kooperazzjoni Ekonomika u Kummerċjali ta’ Suez Ċina-Eġittu (“Żona SETC”), żona ekonomika speċjali li ġiet stabbilita mir-RPĊ u mill-Eġittu, li huma ż-żewġ pajjiżi fil-mira tal-ilment. Il-Kummissjoni ddikjarat l-intenzjoni tagħha li tinvestiga s-sussidji kollha rċevuti minn dawn il-kumpaniji fiż-Żona SETC, b’mod irrilevanti mis-sors tagħhom.

(16)

Matul il-konsultazzjonijiet ta’ qabel il-bidu, il-GTĊ indika li l-ilmentatur ma kellu l-ebda bażi ġuridika biex jikkontesta lill-GTĊ permess li l-prodott ikkonċernat joriġina jew jiġi esportat mill-Eġittu. Il-Kummissjoni nnutat it-tħassib tal-GTĊ, iżda xorta qieset li hemm biżżejjed evidenza biex tinbeda investigazzjoni dwar l-allegati sussidji kumpensabbli mogħtija lill-kumpaniji fiż-Żona SETC, b’mod irrilevanti mis-sors tagħhom.

(17)

Wara l-bidu, il-GTĊ argumenta li, meta jiġi stabbilit il-konsum tal-Unjoni, l-aġġustament li sar fid-data tal-importazzjoni mir-RPĊ kien inġust meta mqabbel mal-aġġustament li sar fid-data dwar l-importazzjoni minn pajjiżi terzi oħra bħar-Russja. Il-GTĊ argumenta wkoll li dawn l-aġġustamenti ma ġewx kontroverifikati mill-Kummissjoni. Il-GTĊ argumenta wkoll li ma hemm l-ebda informazzjoni uffiċjali dwar x’jikkostitwixxi informazzjoni/intelligence tas-suq li tintuża fl-aġġustamenti li jsiru fid-data tal-importazzjoni.

(18)

Kif spjegat ukoll fil-premessa (937), b’referenza għall-analiżi li għamel l-ilmentatur dwar l-importazzjoni fuq il-bażi tas-NM, l-importazzjonijiet ġew ivvalutati wkoll abbażi tal-istatistika dwar l-importazzjoni fil-livell TARIC, kontroverifikati ma’ sorsi oħra u aġġustati fejn xieraq. Fir-rigward tar-Russja, id-data tal-importazzjoni ġiet kontroverifikata u aġġustata abbażi tad-data tal-importazzjoni mill-produtturi GFF relatati mal-produtturi tal-Unjoni li kienu l-uniċi produtturi GFF magħrufa fir-Russja. Din il-metodoloġija nstab li kienet twassal b’mod raġonevoli għal stima preċiża tal-importazzjonijiet tal-prodott ikkonċernat mir-Russja. Bl-istess mod, matul l-investigazzjoni, kif spjegat fil-premessa hawn taħt (937), il-Kummissjoni kkontroverifikat id-data tal-Eurostat fil-livell TARIC mad-data sottomessa mill-produtturi magħrufa fir-RPĊ, li ppreżentaw ruħhom matul l-eżerċizzju tat-teħid tal-kampjuni. Il-volum tal-esportazzjoni ta’ GFF irrappurtat mill-produtturi esportaturi Ċiniżi li kkooperaw irrappreżenta t-totalità tal-importazzjonijiet irreġistrati fl-Eurostat taħt il-kodiċijiet TARIC rilevanti u għalhekk l-esportazzjonijiet kollha tqiesu bħala prodott ikkonċernat. Fl-aħħar, b’kuntrast ma’ dak li afferma l-GTĊ, l-ilment spjega kif intużat l-informazzjoni/intelligence tas-suq biex tiġi aġġustata d-data tal-importazzjoni. Din l-affermazzjoni għalhekk ġiet miċħuda.

(19)

Fil-kummenti tiegħu dwar il-bidu, il-GTĊ argumenta li s-suq tal-GFF huwa segmentat u li kull segment jirrappreżenta faxex ta’ prezzijiet differenti ħafna. Il-GTĊ argumenta li t-tliet tipi ewlenin ta’ prodotti, faxex minsuġa (“WR”), materjali meħjuta (“NCF”), u materjali kumplessi (“CM”) għandhom kompożizzjoni u stadji/proċessi ta’ produzzjoni differenti, u għalhekk anki l-kostijiet tal-produzzjoni u l-prezzijiet tal-bejgħ huma differenti. Barra minn hekk, dawn it-tliet tipi ta’ prodotti għandhom karatteristiċi fiżiċi u tekniċi differenti, li mbagħad jiddefinixxu l-użi finali tagħhom. Skont il-GTĊ, il-valutazzjoni ta’ tqabbil/twaqqigħ tal-prezzijiet, kif ukoll il-valutazzjoni tal-impatt allegatament dannuż tal-importazzjonijiet Ċiniżi kif magħmul fl-ilment fuq livell aggregat hija żvijjanti u insuffiċjenti mingħajr ma tivvaluta fir-realtà l-firxa tal-preżenza, jiġifieri l-volum u s-sehem mis-suq, tal-produtturi Ċiniżi u tal-Unjoni f’kull segment tal-prodott.

(20)

Il-Kummissjoni kkunsidrat li l-GTĊ ma ssottometta l-ebda evidenza biex jappoġġa dawk l-affermazzjonijiet. Fil-bidu, l-ilmentatur ipprovda biżżejjed evidenza dwar il-kostijiet u l-prezzijiet tal-prodott investigat. Il-fatt li jeżistu tipi differenti ta’ prodotti li jista’ jkollhom proċessi ta’ produzzjoni, kostijiet u prezzijiet tal-bejgħ differenti ma jfissirx awtomatikament li hemm segmentazzjoni tas-suq. Ta’ min jinnota li skont l-Artikolu 10(2) tar-Regolament bażiku, l-ilmentatur irid jipprovdi informazzjoni li tkun raġonevolment disponibbli għalih. Peress li l-kostijiet u l-prezzijiet ta’ tipi ta’ prodotti manifatturati fiċ-Ċina huma ta’ natura kunfidenzjali u mhux disponibbli għall-ilmentatur, il-Kummissjoni kkunsidrat li l-ilment kien fih biżżejjed informazzjoni li kienet raġonevolment disponibbli għall-ilmentatur biex tagħti bidu għall-investigazzjoni.

(21)

Barra minn hekk, l-informazzjoni miġbura u li waslet għand il-Kummissjoni matul l-investigazzjoni wriet li s-suq tal-Unjoni għall-GFF mhuwiex segmentat. L-affermazzjoni li t-tliet tipi ta’ prodotti — WR, NCF u CM — għandhom karatteristiċi fiżiċi u tekniċi differenti, li mbagħad jiddefinixxu l-użi finali tagħhom, hija fattwalment skorretta. Kif spjegat fl-ilment u fil-premessi minn (129) sa (138), u kif ma ġiex ikkontestat mill-GTĊ, il-prodott ikkonċernat jintuża biex jirrinforza r-reżini termoplastiċi u r-reżini ffurmati bis-sħana fl-industrija tal-komposti. Ħafna drabi, fl-użu, tip jista’ jintuża minflok ieħor; it-tip ta’ materjal magħżul jiddependi fuq id-dehra tal-wiċċ, il-fluss tar-raża, it-tensjoni li għaliha l-prodott lest ikun soġġett u t-teknika tal-applikazzjoni. Ċerti tipi ta’ prodotti huma partikolarment tajbin għal tekniki ta’ produzzjoni bil-forom magħluqin, jew tqegħid bl-idejn.

(22)

It-tliet tipi ta’ prodotti għandhom dawn l-użi prinċipali u komuni li ġejjin: Id-WRs jintużaw fuq applikazzjonijiet iffurmati bis-sħana, speċjalment dawk li jitqiegħdu bl-idejn, għall-prodotti tal-baħar (qxur tad-dgħajjes u gverti), pannelli tal-karrozzerija (eż. trakkijiet, ferroviji), skrejjen tal-imtieħen tar-riħ, pajpijiet u tankijiet. L-NCFs jintużaw għall-kostruzzjoni ta’ prodotti tal-baħar (qxur tad-dgħajjes u gverti), karrozzerija u pannelli ta’ vetturi (eż. trakkijiet, ferroviji), skrejjen tal-imtieħen tar-riħ u gondoli (nacelles), skis u snowboards, pajpijiet u tankijiet. Is-CMs jintużaw f’applikazzjonijiet b’forom magħluqin għal karrozzerija u pannelli ta’ vetturi, prodotti tal-baħar (qxur ta’ dgħajjes u gverti), gondoli tal-imtieħen tar-riħ u vetturi ta’ rikreazzjoni.

(23)

Fl-aħħar nett, il-Kummissjoni tinnota li mhuwiex rari li prodott ikkonċernat ikollu tipi ta’ prodotti li għandhom struttura ta’ kost u prezzijiet differenti. Din hija r-raġuni stess li għaliha l-Kummissjoni tiġbor data abbażi ta’ klassifikazzjoni dettaljata ta’ tipi ta’ prodotti. Din il-klassifikazzjoni, minbarra l-forom tal-materjali, iddistingwiet bejn formati ta’ bejgħ, tipi ta’ ħġieġ użat, piż tal-erja u densità tar-rovings. Il-kalkolu tat-twaqqigħ tal-prezz kien ibbażat fuq it-tip ta’ prodott għal kull paragun ta’ tip ta’ prodott u għalhekk dawn il-karatteristiċi kollha tqiesu meta l-importazzjonijiet mir-RPĊ kienu qed jiġu mqabbla ma’ GFF ta’ produtturi mill-Unjoni. Dan l-argument għalhekk ġie miċħud.

(24)

Fil-kummenti tiegħu dwar il-bidu, il-GTĊ argumenta wkoll li d-differenzi sinifikanti bejn il-prezzijiet tal-importazzjoni tal-GFF minn sorsi differenti jagħmilha ċara wkoll li s-suq tal-Unjoni għat-tipi differenti ta’ prodotti huwa segmentat u l-importazzjonijiet minn pajjiżi differenti huma għal segmenti differenti tas-suq.

(25)

Kif innutat hawn fuq, l-informazzjoni miġbura mill-Kummissjoni matul l-investigazzjoni kollha kkonfermat li s-suq tal-Unjoni għall-GFF mhuwiex segmentat. Barra minn hekk, l-investigazzjoni wriet li l-produtturi esportaturi Ċiniżi u l-produtturi esportaturi Eġizzjani ma jesportawx forom kompletament differenti ta’ GFF. Is-similaritajiet bejn il-prodott mibjugħ mill-produtturi esportaturi fir-RPĊ u fl-Eġittu kienu ta’ madwar 90 %. Dan l-argument għalhekk ġie miċħud.

(26)

Fil-kummenti tiegħu dwar il-bidu, il-GTĊ argumenta wkoll li l-paragun tal-prezzijiet tal-importazzjonijiet Ċiniżi u l-kalkolu tat-twaqqigħ tal-prezz fl-ilment kienu bbażati fuq data mhux komparabbli u magħżula b’mod selettiv li ġiet aġġustata ħażin.

(27)

Kif imsemmi hawn fuq, l-Artikolu 10(2) tar-Regolament bażiku jistabbilixxi l-istandard tal-evidenza li trid tiġi pprovduta mill-ilmentatur fl-ilment. Għalhekk, filwaqt li l-informazzjoni trid tkun suffiċjenti trid ukoll tkun raġonevolment disponibbli għall-ilmentatur. Peress li l-informazzjoni dwar il-kostijiet u l-prezzijiet hija kunfidenzjali min-natura tagħha, data preċiża dwar il-kostijiet u l-prezzijiet għal kull tip ta’ prodott esportat minn kumpaniji f’pajjiżi terzi mhijiex disponibbli b’mod raġonevoli għall-ilmentatur fl-istadju tal-bidu. L-informazzjoni pprovduta xorta waħda tqieset suffiċjenti biex tinbeda l-investigazzjoni peress li kienet ibbażata fuq l-istatistika tal-prezzijiet tal-importazzjonijiet Ċiniżi mill-Eurostat.

(28)

Il-Kummissjoni nnutat ukoll li, kif speċifikat fil-premessa (965), il-kalkolu tat-twaqqigħ tal-prezzijiet matul l-investigazzjoni kien prinċipalment ibbażat fuq data dettaljata attwali tal-produtturi u tal-produtturi esportaturi tal-Unjoni inklużi fil-kampjun u kkonferma l-allegazzjonijiet ta’ twaqqigħ tal-prezzijiet fl-ilment abbażi tal-istatistika tal-Eurostat. Għaldaqstant, dan l-argument tqies bħala irrilevanti wkoll fir-rigward tad-data użata fl-investigazzjoni.

(29)

Fil-kummenti tiegħu dwar il-bidu, il-GTĊ argumenta li l-importazzjonijiet GFF Ċiniżi ma kkawżawx pressjoni fuq il-prezzijiet. Din l-affermazzjoni ma ġiet issostanzjata bl-ebda evidenza.

(30)

B’kuntrast, l-ilment ipprovda informazzjoni dwar l-effett tal-importazzjonijiet sussidjati fuq il-prezzijiet tal-prodott simili fis-suq tal-Unjoni u l-impatt konsegwenti tal-importazzjonijiet fuq l-industrija tal-Unjoni, liema informazzjoni tqieset biżżejjed biex tinbeda investigazzjoni. L-evidenza pprovduta fl-ilment uriet li l-prezzijiet tal-Unjoni kienu qed jitwaqqgħu b’mod sinifikanti mill-prezzijiet tal-importazzjoni Eġizzjani u Ċiniżi.

(31)

Barra minn hekk, dik l-affermazzjoni hija fattwalment żbaljata. Kif instab mill-Kummissjoni matul l-investigazzjoni u kif spjegat fil-premessa (966), il-produtturi esportaturi Ċiniżi fil-kampjun waqqgħu b’mod sinifikanti l-prezzijiet tal-industrija tal-Unjoni matul il-PI. Dan l-argument għalhekk ġie miċħud.

(32)

Fil-kummenti tiegħu dwar il-bidu, il-GTĊ argumenta li l-akkumulazzjoni ta’ importazzjonijiet miċ-Ċina u mill-Eġittu għall-fini tal-analiżi tad-dannu mhijiex ġustifikata f’dan il-każ. Dan minħabba li l-kundizzjonijiet tal-kompetizzjoni bejn l-importazzjonijiet minn dawn il-pajjiżi, u bejn l-importazzjonijiet minn dawn il-pajjiżi u l-prodott simili prodott u mibjugħ mill-industrija tal-Unjoni fis-suq tal-Unjoni huma ferm differenti. Il-GTĊ argumenta li l-GFF Ċiniż mhuwiex f’kompetizzjoni mal-GFF Eġizzjan peress li (i) l-importazzjonijiet tal-GFF Eġizzjani kienu prattikament ineżistenti sal-2017; (ii) l-importazzjonijiet ta’ GFF miċ-Ċina u mill-Eġittu segwew għal kollox xejriet opposti; (iii) l-importazzjonijiet Eġizzjani huma pprezzati b’mod differenti; u (iv) l-importazzjonijiet Eġizzjani huma biss ta’ NCF skont il-kalkoli tal-ilmentatur stess u għalhekk ma jikkompetux mal-Unjoni u mal-bejgħ tal-GFF Ċiniż fis-suq tal-Unjoni.

(33)

Il-Kummissjoni l-ewwel osservat li l-ilment kien fih biżżejjed evidenza li turi li l-importazzjonijiet tal-prodott ikkonċernat kienu qed jiġu sussidjati u l-volumi tal-importazzjonijiet kienu sinifikanti u jikkawżaw dannu għall-industrija tal-Unjoni. Kien fiha wkoll għadd ta’ elementi rigward il-valutazzjoni kumulattiva tal-importazzjonijiet miż-żewġ pajjiżi kkonċernati (b’mod partikolari li għal kull pajjiż l-ammonti stmati ta’ sussidjar mhumiex de minimis (9), li għal kull pajjiż il-volumi ta’ importazzjoni huma sinifikanti (10) u li l-pajjiżi kkonċernati qed jikkompetu ma’ xulxin, mal-prodott simili u ma’ pajjiżi terzi u li l-prodotti esportati minn dawn il-pajjiżi qed jikkondividu l-istess karatteristiċi u użi finali mal-prodott simili (11)), li nstabu li kienu qed jegħlbu l-piż tagħhom fl-istadju tal-bidu. Din l-evidenza ġiet analizzata aktar matul l-investigazzjoni u l-Kummissjoni kkonfermat li l-kundizzjonijiet għal akkumulazzjoni ġew issodisfati, kif deskritt fil-premessi (947) sa (950).

(34)

Il-GTĊ argumenta wkoll li l-volum tal-importazzjonijiet Ċiniżi naqas fil-perjodu kkunsidrat u ma setax għamel ħsara lill-produtturi tal-Unjoni.

(35)

Kif diskuss hawn fuq, l-ilment kien fih biżżejjed evidenza li l-importazzjonijiet ta’ GFF Ċiniżi u Eġizzjani għandhom jiġu vvalutati b’mod kumulattiv. Skont l-evidenza fl-ilment, l-importazzjonijiet ta’ GFF miż-żewġ pajjiżi qed jikkompetu ma’ xulxin u mal-prodott simili, kif ukoll mal-importazzjonijiet minn pajjiżi terzi. L-importazzjonijiet mir-RPĊ u mill-Eġittu għandhom l-istess karatteristiċi u użi, u jinbiegħu lill-klijenti madwar l-Unjoni f’kompetizzjoni diretta ma’ GFF prodott mill-industrija tal-Unjoni u minn pajjiżi terzi.

(36)

Fil-kummenti tiegħu dwar il-bidu, il-GTĊ argumenta li l-ilmentatur naqas milli jipprovdi data affidabbli dwar l-industrija tal-Unjoni fis-sħuħija tagħha, peress li d-data dwar dawk li ma ilmentawx ma kinitx affidabbli. Barra minn hekk, l-ilmentatur ma pprovdiex informazzjoni dwar diversi indikaturi tad-dannu.

(37)

Il-GTĊ ma spjegax b’liema mod id-data ma kinitx affidabbli. Għal darb’ oħra, l-informazzjoni kunfidenzjali dwar il-bejgħ u data tal-produzzjoni tal-produtturi mhux ilmentaturi tal-Unjoni ma kinitx disponibbli għall-ilmentatur. Għalhekk, l-ilmentatur ipprovda stimi li tqiesu raġonevoli u biżżejjed preċiżi u f’konformità mal-Artikolu 10(2) tar-Regolament bażiku. Sabiex tiġi pprovduta biżżejjed evidenza ta’ dannu, ma hemmx obbligu li tiġi pprovduta data dwar l-indikaturi kollha ta’ dannu msemmija fl-Artikolu 8(4) tar-Regolament bażiku; u lanqas mhemm bżonn li l-indikaturi kollha tad-dannu juru xejra ta’ tnaqqis.

(38)

Il-Kummissjoni nnotat li l-kampjun tal-produtturi tal-Unjoni magħżul matul l-investigazzjoni, kien jinkludi l-akbar mhux ilmentatur u dan ta lill-Kummissjoni opportunità li tagħmel kontroverifika tad-data makro. Barra minn hekk, l-indikaturi rilevanti ta’ dannu kollha tqiesu mill-Kummissjoni fl-investigazzjoni. Dan l-argument għalhekk ġie miċħud.

(39)

Fil-kummenti tiegħu dwar il-bidu, il-GTĊ argumenta li, il-produtturi tal-Unjoni ma ġarrbux dannu u b’mod partikolari mhux minħabba l-importazzjonijiet Ċiniżi. Skont il-GTĊ, bejn l-2015 u l-PI tal-ilment, l-industrija tal-Unjoni kienet sejra tajjeb u bażikament l-indikaturi kollha ta’ dannu żviluppaw b’mod pożittiv jew baqgħu stabbli.

(40)

Id-data fl-ilment uriet b’mod ċar li l-industrija tal-Unjoni ġarbet dannu materjali minn importazzjonijiet sussidjati ħafna li jwaqqgħu l-prezzijiet ta’ GFF mill-pajjiżi suġġetti. Il-produzzjoni, il-bejgħ u s-sehem mis-suq tal-industrija tal-Unjoni naqsu b’mod sostanzjali. L-ilmentaturi kienu mġiegħla jnaqqsu l-investiment u l-impjiegi. L-istokkijiet tal-produtturi tal-Unjoni żdiedu u l-profittabilità tagħhom naqset u dan isostni l-ilment.

(41)

Il-Kummissjoni nnutat li matul l-investigazzjoni l-indikaturi ta’ dannu stabbiliti abbażi tad-data reali verifikata pprovduta minn produtturi tal-Unjoni fil-kampjun urew dannu materjali li kien ikkawżat minn importazzjonijiet mill-pajjiżi kkonċernati. Il-GTĊ pprovda kummenti dwar dawn l-indikaturi, fil-kummenti tiegħu dwar id-divulgazzjoni finali (12). Dawn il-kummenti huma indirizzati fit-Taqsima 5.4. ta’ dan ir-Regolament.

(42)

Fil-kummenti tiegħu dwar il-bidu, il-GTĊ argumenta li l-industrija tal-Unjoni ġarrbet dannu minħabba l-importazzjonijiet relatati tagħha minn pajjiżi terzi u t-tnaqqis fid-domanda fis-suq tal-Unjoni.

(43)

Il-Kummissjoni ma qablitx. L-ilment wera li minħabba l-volumi baxxi ta’ importazzjonijiet relatati minn pajjiżi terzi, dawn ma setgħux ikkawżaw id-dannu materjali. L-analiżi li l-ilmentatur għamel tal-indikaturi tad-dannu wriet ukoll li d-dannu ma jistax jiġi spjegat bit-tnaqqis fid-domanda fis-suq tal-Unjoni minħabba li t-telf mis-sehem mis-suq juri li t-telf fil-bejgħ kien imur b’mod ċar lil hinn mit-tnaqqis fil-konsum.

(44)

L-ilmentatur ipprovda biżżejjed evidenza ta’ rabta kawżali bejn l-importazzjonijiet mill-pajjiżi kkonċernati u d-dannu. Barra minn hekk, l-ilmentatur analizza kawżi potenzjali oħra tad-dannu, bħall-prestazzjoni tal-produtturi tal-Unjoni, il-prestazzjoni tal-esportazzjoni tal-produtturi tal-Unjoni u l-importazzjonijiet minn pajjiżi terzi oħra.

(45)

Matul l-investigazzjoni, l-importazzjonijiet minn pajjiżi terzi u t-tnaqqis fid-domanda fis-suq tal-Unjoni, ġew eżaminati fit-Taqsima 6.2. hawn taħt. Wara d-divulgazzjoni finali, il-GTĊ ma għamel l-ebda argumenti ġodda fil-kummenti dwar il-bidu. Dan l-argument għalhekk ġie miċħud.

(46)

Fil-kummenti tiegħu dwar il-bidu, il-GTĊ argumenta li l-produtturi tal-Unjoni integrati vertikalment ġarrbu dannu minħabba l-kostijiet relatati ma’ “integrazzjoni b’lura” u l-abbiltà mnaqqsa li jbigħu fis-suq miftuħ minħabba “integrazzjoni ’l isfel”.

(47)

Fil-bidu, ma kienet disponibbli l-ebda informazzjoni dwar żvantaġġ kompetittiv apparenti mill-industrija tal-Unjoni. Barra minn hekk, il-produtturi tal-Unjoni fil-biċċa l-kbira mhumiex integrati vertikalment.

(48)

Barra minn hekk, il-Kummissjoni nnutat li l-investigazzjoni ma wrietx kostijiet anormali minħabba l-integrazzjoni vertikali. Ukoll, il-produtturi tal-Unjoni fil-kampjun kollha biegħu primarjament lil klijenti mhux relatati. Dan l-argument għalhekk ġie miċħud.

(49)

Fil-kummenti tiegħu dwar il-bidu, il-GTĊ argumenta li x-xejriet ta’ bejgħ differenti tal-produtturi ilmentaturi u mhux ilmentaturi bejn l-2015 u l-PI tal-ilment jindikaw li ż-żewġ settijiet ta’ produtturi jikkompetu għall-bejgħ u għall-klijenti. Għalhekk, it-telf ta’ bejgħ u mis-sehem tas-suq li kellhom il-produtturi ilmentaturi favur il-produtturi mhux ilmentaturi kien ukoll ir-raġuni probabbli l-għala tal-ewwel kienu soffrew f’termini ta’ volumi ta’ bejgħ u ma setgħux jogħlu l-prezzijiet fil-PI tal-ilment.

(50)

Il-kompetizzjoni fost il-produtturi tal-Unjoni hija konsegwenza tas-suq ħieles u normalment hija suppożizzjoni (sakemm ma jkunx hemm evidenza ta’ eżistenza ta’ prattiki antikompetittivi, li mhuwiex il-każ), aktar milli fattur li jispjega l-eżistenza ta’ dannu. Għalhekk, il-produtturi ilmentaturi u mhux ilmentaturi tal-Unjoni mhux biss jikkompetu ma’ xulxin fis-suq tal-Unjoni, iżda anki l-produtturi ilmentaturi tal-Unjoni nfushom jikkompetu ma’ xulxin. Dan ma jistax jiġi kkunsidrat bħala li jnaqqas ir-rabta ta’ kawżalità bejn l-importazzjonijiet sussidjati u d-dannu materjali mġarrab mill-industrija tal-Unjoni fis-sħuħija tagħha. Is-sejbiet tad-dannu materjali bbażati fuq kampjun validu jiddependu fuq valutazzjoni tal-industrija kollha kemm hi, inkluża data mingħand l-ilmentaturi u mhux ilmentaturi (data mikro u makro).

(51)

Matul l-investigazzjoni, kif speċifikat fin-Nota tal-fajl għall-ispezzjoni mill-parti interessata fil-kampjun finali tal-produtturi tal-Unjoni tal-21 ta’ Ġunju 2019, il-kampjun tal-produtturi tal-Unjoni kien magħmul kemm mill-produtturi tal-Unjoni, kemm ilmentaturi kif ukoll mhux. Barra minn hekk, id-determinazzjoni tad-dannu ma kinitx limitata għall-produtturi tal-Unjoni li lmentaw iżda għall-industrija kollha tal-Unjoni kollha kemm hi. Din l-affermazzjoni għalhekk ġiet miċħuda.

(52)

Fl-aħħar nett, fil-kummenti tiegħu wara l-bidu, il-GTĊ sostna li ngħatat kunfidenzjalità eċċessiva lill-informazzjoni ewlenija bħal min sostna l-ilment u d-data marbuta mad-dannu prinċipali. Il-GTĊ asserixxa li dan żammu milli jirribatti b’mod xieraq l-affermazzjonijiet li għamel l-ilmentatur.

(53)

Il-Kummissjoni kkunsidrat li l-verżjoni miftuħa għall-ispezzjoni mill-partijiet interessati fl-ilment kien fiha l-evidenza essenzjali u s-sommarji mhux kunfidenzjali tad-data li ngħatat trattament kunfidenzjali sabiex il-partijiet interessati jkunu jistgħu jeżerċitaw id-drittijiet tad-difiża tagħhom matul il-proċediment kollu. Tfakkar li l-Artikolu 29 tar-Regolament bażiku jippermetti s-salvagwardja ta’ informazzjoni kunfidenzjali f’ċirkostanzi fejn l-iżvelar ikun ta’ vantaġġ kompetittiv sinifikanti għal xi kompetitur jew jista’ jkollu effett negattiv sinifikanti fuq persuna li tkun qed tipprovdi l-informazzjoni jew fuq persuna li minnha dik il-persuna tkun kisbet l-informazzjoni. Għaldaqstant, l-affermazzjonijiet tal-GTĊ f’dan ir-rigward ġew miċħuda.

(54)

Il-GTE sostna li l-investigazzjoni jenħtieġ li ma titnediex minħabba li l-ilment ma kienx jissodisfa r-rekwiżiti evidenzjarji tal-Artikolu 11(2) tal-Ftehim tad-WTO dwar Sussidji u Miżuri Kompensatorji u tal-Artikolu 10(2) tar-Regolament Bażiku. Skont il-GTE, ma kienx hemm biżżejjed evidenza ta’ sussidji kumpensabbli, ta’ dannu u ta’ rabta kawżali bejn l-importazzjonijiet sussidjati u d-dannu. Il-Kummissjoni rrifjutat dik l-affermazzjoni għall-istess raġunijiet kif imsemmi fil-premessa (6) ta’ hawn fuq.

(55)

Matul il-konsultazzjonijiet ta’ qabel il-bidu, il-GTE indika li l-ilmentatur ma ppreżentax evidenza li l-allegat self preferenzjali jingħata mill-gvern Eġizzjan. Madankollu, minħabba l-ġabra ta’ evidenza mressqa fl-ilment, u b’mod partikolari l-arranġamenti bejn iċ-Ċina u l-Eġittu, kif ukoll l-għanijiet ta’ dawn l-arranġamenti, il-Kummissjoni hija tal-fehma li l-ilmentatur ipprovda biżżejjed evidenza kif kien raġonevolment disponibbli għalih li turi li l-imġiba tal-għoti ta’ sussidji permezz ta’ self preferenzjali tista’ tiġi attribwita lill-GTE.

(56)

Barra minn hekk, il-GTE sostna li l-allegati benefiċċji tat-taxxa tneħħew mil-leġiżlazzjoni fl-2015 u li l-ilmentatur naqas milli jipprovdi evidenza li dawn għandhom japplikaw għal proġetti eżistenti. Madankollu, il-Kummissjoni sabet li l-ilmentatur ipprovda biżżejjed evidenza tal-anterjorità ta’ dawn il-benefiċċji tat-taxxa kif kien raġonevolment disponibbli għalih.

(57)

Il-GTE sostna wkoll li r-remissjoni tad-dazji tal-importazzjoni fuq il-materja prima mhijiex sussidju dment li dawn il-prodotti importati jiġu esportati mill-ġdid bħala tali jew kif ipproċessati fi prodott downstream. Il-Kummissjoni rrikonoxxiet li hija biss ir-remissjoni żejda tad-dazji tal-importazzjoni fuq il-materja prima li hija sussidju kumpensabbli, u tat attenzjoni partikolari lil dan matul l-investigazzjoni. Il-Kummissjoni nnutat ukoll li l-kumment tal-GTE ma japplikax għat-tagħmir tal-produzzjoni.

(58)

Il-GTE sostna li l-ilmentatur naqas milli jipprovdi evidenza ta’ benefiċċju fuq l-għoti ta’ art b’remunerazzjoni inqas minn adegwata. Madankollu, il-Kummissjoni sabet li l-ilmentatur ipprovda biżżejjed evidenza ta’ benefiċċju kif kien raġonevolment disponibbli għalih.

(59)

Fl-aħħar nett, il-GTE indika li l-ilmentatur naqas milli jipprovdi evidenza tal-ispeċifiċità li tikkonċerna l-provvista tal-elettriku b’remunerazzjoni inqas minn adegwata, billi ma hemm l-ebda speċifiċità meta l-aċċess għal sussidju huwa soġġett għal kundizzjonijiet oġġettivi. Il-Kummissjoni nnutat li l-GTE ma pprovda l-ebda evidenza fir-rigward ta’ dawn il-kundizzjonijiet oġġettivi matul il-konsultazzjonijiet ta’ qabel il-bidu.

(60)

Għalhekk, il-Kummissjoni kkonkludiet li kien hemm biżżejjed evidenza pprovduta fl-ilment biex tinbeda investigazzjoni dwar l-allegati sussidji kumpensabbli mogħtija direttament jew indirettament mill-GTE.

(61)

Wara d-divulgazzjoni definittiva, Yuntianhua Group sostna li s-sostituzzjoni tal-fatturi ta’ produzzjoni mwettqa fl-investigazzjoni anti-dumping separata mhijiex xierqa u talab lill-Kummissjoni twettaq kalkolu tal-marġni ta’ dumping għall-produtturi esportaturi tal-grupp mingħajr rikors għall-Artikolu 2(6a) tar-Regolament (UE) 2016/1036 tal-Parlament Ewropew u tal-Kunsill tat-8 ta’ Ġunju 2016 dwar il-protezzjoni kontra l-importazzjonijiet li huma l-oġġett ta’ dumping minn pajjiżi mhux membri tal-Unjoni Ewropea (ir-“Regolament anti-dumping bażiku”) (13). Skont Yuntianhua Group, l-investigazzjoni antisussidji ma sabet l-ebda evidenza li l-inputs tal-GFF kienu pprovduti b’remunerazzjoni inqas minn adegwata. Il-grupp argumenta b’mod simili li l-investigazzjoni antisussidji aċċettat li l-inputs tal-GFF kienu nxtraw b’valuri tas-suq mhux distorti peress li l-fatturat tal-fornituri tal-input u tal-materja prima ntużaw għall-kalkolu tal-benefiċċji tas-sussidju.

(62)

Il-Kummissjoni, l-ewwel nett, innotat li l-kummenti dwar il-kalkolu u l-metodoloġija użati fl-investigazzjoni anti-dumping separata lil hinn mill-ambitu ta’ dan il-proċediment. Għalhekk, kummenti li jikkonċernaw il-metodoloġija użata għad-determinazzjoni tad-dumping jenħtieġ li jkunu pprovduti fil-kuntest ta’ dik l-investigazzjoni.

(63)

It-tieni, l-investigazzjoni, kif deskritta fit-Taqsima 3, uriet li l-fornituri ewlenin tal-produtturi esportaturi bbenefikaw b’mod estensiv minn sussidji tal-gvern. Il-Kummissjoni fakkret li l-użu tal-fatturat ta’ kumpaniji relatati li jfornu inputs u materja prima ma jimplikax li qed jiġi aċċett li l-valuri tas-suq ta’ dawk il-provvisti mhux jiġi distort. Għall-kuntrarju, il-fatturat huwa l-element ta’ allokazzjoni, li jippermetti tqassim tajjeb tas-sussidji stabbiliti li minnhom ibbenefikaw il-produtturi esportaturi.

(64)

Fl-aħħar, il-Kummissjoni nnutat li s-sejbiet magħmula skont l-Artikolu 2 (6a) tar-Regolament bażiku dwar l-anti-dumping huma relatati ma’ distorsjonijiet sinifikanti fejn il-prezzijiet jew il-kostijiet jiġu affettwati minn intervent sostanzjali tal-gvern. Varjetà ta’ elementi huma eżaminati f’dan il-kuntest b’mod olistiku. Għaldaqstant, il-fatt li investigazzjoni antiidumping skont l-Artikolu 2(6a) ma tiddependix fuq evidenza li tikkonċerna s-sussidjar ta’ materja prima jew tal-prodott ikkonċernat mhuwiex impediment għall-Kummissjoni biex tinvestiga separatament u skont ir-regoli applikabbli fir-Regolament bażiku jekk hemmx sussidjar. Għaldaqstant, l-argumenti ta’ Yuntianhua Group ġew miċħuda.

(65)

Wara d-divulgazzjoni definittiva addizzjonali, Yuntianhua Group sostna li d-divulgazzjoni kien fiha sejbiet ġodda dwar: (i) in-nuqqas ta’ segmentazzjoni tas-suq GFF; (ii) il-karatteristiċi fiżiċi u tekniċi tal-prodott; (iii) l-istruttura tal-kost u tal-prezzijiet; (iv) l-għadd doppju li jirriżulta mill-impożizzjoni fl-istess ħin ta’ dazji anti-dumping u antisussidji li affettwaw il-livell tad-dazji anti-dumping definittivi imposti fis-7 ta’ April 2020; u (v) il-fatt li l-marġni ta’ dumping li nstab fl-investigazzjoni anti-dumping għal din il-parti kien żbaljat u għandu jitnaqqas mill-ammont kollu tas-sussidjar stabbilit fir-RPĊ biex jiġi evitat l-għadd doppju. Dawn l-elementi ma kinux jinsabu fid-divulgazzjoni finali tal-proċedura anti-dumping parallela u b’hekk ma kienx fiha dawn is-sejbiet u l-kunsiderazzjonijiet essenzjali. B’riżultat ta’ dan, skont din il-parti, ir-Regolament anti-dumping definittiv (UE) 2020/492 huwa manifestament mhux raġonevoli u illegali, u l-marġni ta’ dumping ta’ 64,7 % li jidher fir-Regolament anti-dumping (UE) 2020/492 huwa żbaljat.

(66)

Il-Kummissjoni nnotat mill-bidu nett li l-ispjegazzjonijiet li jinsabu fid-divulgazzjoni definittiva addizzjonali f’din il-proċedura huma reazzjoni għall-kummenti li waslu mingħand il-partijiet wara dik id-divulgazzjoni, u b’hekk kien fiha aktar dettalji dwar is-sejbiet li għamlet il-Kummissjoni. Għaldaqstant, ma jikkostitwixxux sejbiet ġodda iżda sempliċiment jindirizzaw il-kummenti tal-partijiet interessati.

(67)

Barra minn hekk, dwar il-punti (i) - (iii) imqajma minn din il-parti jiġifieri n-nuqqas ta’ segmentazzjoni tas-suq tal-GFF, il-karatteristiċi tal-prodott, u l-istruttura tal-kost u tal-prezzijiet, il-Kummissjoni nnutat li r-rimarki fid-divulgazzjoni addizzjonali dwar dawn it-tliet punti kienu maħsuba biex jindirizzaw affermazzjonijiet ġodda li għamlu l-partijiet. Dawn l-affermazzjonijiet ġodda tressqu biss fil-kuntest ta’ dan il-proċediment antisussidju. L-unika affermazzjoni mqajma fil-proċediment anti-dumping dwar is-segmentazzjoni kienet li l-produtturi tal-Unjoni jipproduċu biss prodotti OEM speċifiċi għall-konsumatur u jenħtieġ li ma tiġi imposta l-ebda miżura fuq is-segment OEM. Dawn l-argumenti ġew indirizzati b’mod sħiħ fil-premessa 409 tar-Regolament anti-dumping (14). Għalhekk, il-Kummissjoni ma setgħetx possibbilment diġà tindirizza dawn il-kummenti ġodda fil-kuntest tad-divulgazzjoni fir-rigward tal-antidumping. Ir-Regolament anti-dumping definittiv kien jinkludi s-sejbiet u l-kunsiderazzjonijiet essenzjali kollha li abbażi tagħhom il-Kummissjoni ħadet id-deċiżjoni tagħha dwar din il-proċedura u indirizza b’mod sħiħ l-argumenti kollha li tqajmu fil-kuntest ta’ dak il-proċediment. Is-sejbiet fil-proċedura antisussidji ma jaffettwawx ir-raġunament li sar fir-Regolament anti-dumping definittiv.

(68)

Barra minn hekk, minn perspettiva sostantiva, dawn il-punti la jaffettwaw u lanqas ibiddlu b’xi mod is-sejbiet tal-investigazzjoni, la tal-antidumping u lanqas tal-antisussidju. Għalhekk, ma hemm l-ebda impatt minn dawn il-punti fuq is-sitwazzjoni tal-parti li qed tagħmel din l-affermazzjoni jew fuq is-sitwazzjoni ta’ xi parti oħra. Minkejja dan, il-Kummissjoni ddeċidiet li tagħti opportunità addizzjonali lill-partijiet biex jikkummentaw dwar dawk il-punti. Tabilħaqq, għalkemm dawn il-partijiet ma introduċew l-ebda bidla huma stess (u għalhekk il-Kummissjoni ma kellhiex fil-prinċipju obbligu li tindirizzahom fid-divulgazzjoni addizzjonali iżda fir-Regolament definittiv), dawn ġew inklużi fid-divulgazzjoni addizzjonali definittiva. Għal dawn ir-raġunijiet kollha, dawn l-affermazzjonijiet ġew miċħuda.

(69)

F’kwalunkwe każ, ma teżisti l-ebda kontradizzjoni bejn is-sejbiet taż-żewġ investigazzjonijiet. L-unika differenza hija li l-partijiet kellhom l-opportunità jikkummentaw fi stadju aktar tard u għamlu kummenti addizzjonali f’dan il-proċediment. Il-Kummissjoni kellha l-obbligu li twieġeb għal dawn il-kummenti u li għamlet hekk f’dan ir-Regolament.

(70)

Fir-rigward speċifiku tal-aħħar żewġ kwistjonijiet, (iv) u (v) fil-premessa (67) hawn fuq, tal-possibbiltà ta’ għadd doppju u tal-marġni tad-dumping, il-Kummissjoni nnutat dan li ġej. L-ewwel nett, kif diġà ġie spjegat b’tweġiba għall-kummenti tal-partijiet għad-divulgazzjoni definittiva ta’ dan il-proċediment, b’mod partikolari fil-premessa (1137), il-Kummissjoni indirizzat b’mod sħiħ il-kwistjoni potenzjali tal-għadd doppju u tat biżżejjed opportunità lill-partijiet kollha biex jissottomettu kummenti matul dan il-proċediment. Hija ma setgħetx tagħmel dan fil-kuntest tal-proċediment tal-anti-dumping li kien għaddejj. It-tieni, il-Kummissjoni tinnota li fil-kuntest ta’ proċedimenti separati tal-anti-dumping u tal-antisussidji fuq l-istess prodott li joriġina mill-istess pajjiż fejn l-impożizzjoni ta’ dazji kumpensatorji sseħħ aktar tard mill-impożizzjoni ta’ dazji anti-dumping, ma hemm l-ebda alternattiva ħlief li jiġu emendati d-dazji anti-dumping imposti preċedentement. Dan irid isir sabiex jitqiesu d-dazji kompensatorji l-ġodda filwaqt li fl-istess ħin jiġi evitat l-għadd doppju u tiġi rispettata r-regola tal-inqas dazju jekk applikabbli u rilevanti. Għal dan l-għan, f’dawn il-każijiet it-teknika leġiżlattiva hija li jiġu imposti d-dazji kumpensatorji rilevanti u mbagħad fl-istess ħin jiġu emendati d-dazji anti-dumping applikabbli rilevanti kif xieraq permezz tal-istess regolament. Għaldaqstant, għall-kuntrarju ta’ dak li qed targumenta din il-parti, ir-Regolament anti-dumping (UE) 2020/492 mhuwiex manifestament żbaljat u mhux raġonevoli. Il-valutazzjonijiet u l-affermazzjonijiet rilevanti ġew indirizzati b’mod sħiħ f’dan ir-Regolament, li jikkostitwixxi wkoll il-bażi għall-emendar tar-regolament anti-dumping definittiv. Billi d-dazju anti-dumping rilevanti applikabbli għal Yuntianhua Group huwa modifikat ukoll skont dan ir-Regolament, kif spjegat fid-dettall fit-Taqsima 8, anki l-affermazzjoni ta’ din il-parti, li l-livell tad-dazju anti-dumping tagħha fir-Regolament (UE) 2020/492 huwa żbaljat, hija fattwalment kif ukoll legalment ħażina. Għal dawn ir-raġunijiet kollha, l-affermazzjonijiet ta’ Yuntianhua Group huma miċħuda.

(71)

Fil-31 ta’ Lulju 2019, l-ilmentatur ippreżenta talba għal reġistrazzjoni tal-importazzjonijiet ta’ GFF li joriġina mill-pajjiżi kkonċernati skont l-Artikolu 24(5) tar-Regolament bażiku. Fil-21 ta’ Novembru 2019, l-ilmentatur reġa’ ppreżenta talba għal reġistrazzjoni skont l-Artikolu 24(5) tar-Regolament bażiku, b’ċifri aġġornati dwar l-importazzjoni.

(72)

Skont l-Artikolu 24(5) tar-Regolament bażiku, l-importazzjonijiet tal-prodott ikkonċernat huma soġġetti għar-reġistrazzjoni biex ikun żgurat li jekk mill-investigazzjoni jirriżultaw sejbiet li jwasslu għall-impożizzjoni ta’ dazji kompensatorji definittivi, dawk id-dazji jkunu jistgħu jiġu imposti retroattivament fuq l-importazzjonijiet irreġistrati skont id-dispożizzjonijiet legali applikabbli, jekk il-kundizzjonijiet meħtieġa jiġu ssodisfati.

(73)

Bi tweġiba għat-talba ta’ reġistrazzjoni, il-partijiet interessati ppreżentaw kummenti li l-Kummissjoni indirizzat fir-Regolament ta’ reġistrazzjoni. Il-Kummissjoni kellha biżżejjed evidenza disponibbli li tiġġustifika l-ħtieġa li l-importazzjonijiet jiġu rreġistrati.

(74)

Fil-21 ta’ Jannar 2020, il-Kummissjoni ppubblikat ir-Regolament ta’ Implimentazzjoni (UE) 2020/44 (“ir-Regolament ta’ reġistrazzjoni”) (15) li għamel l-importazzjonijiet tal-GFF li joriġinaw mir-RPĊ u mill-Eġittu soġġetti għal reġistrazzjoni mit-22 ta’ Jannar 2020.

(75)

Matul l-investigazzjoni, ħareġ biċ-ċar li xi operaturi ekonomiċi jaf ma kinux jippreżentaw ruħhom minħabba fehim żbaljat tad-definizzjoni tal-prodott taħt investigazzjoni. Għal din ir-raġuni, fit-18 ta’ Settembru 2019, il-Kummissjoni ċċarat il-kliem tad-deskrizzjoni tal-ambitu tal-prodott inkluż fin-Notifika ta’ Bidu billi ppubblikat Notifika (“Notifika ta’ Kjarifika”) (16). In-Notifika ta’ Kjarifika tat wkoll il-possibbiltà li l-partijiet jippreżentaw ruħhom sa perjodu ta’ żmien stipulat u biex jitolbu kwestjonarju, jekk xtaqu jagħmlu dan. L-ebda parti interessata ma bagħtet xi kumment dwar in-Notifika ta’ Kjarifka jew talbet kwestjonarju.

(76)

Wara l-pubblikazzjoni tan-Notifika ta’ Kjarifika u fl-investigazzjoni sussegwenti, ġie kkonfermat li l-ebda operatur ekonomiku ma kien naqas milli jippreżenta lilu nnifsu minħabba n-nuqqas ta’ fehim possibbli fid-definizzjoni tal-prodott ikkonċernat inkluża fin-Notifika ta’ Bidu.

(77)

L-investigazzjoni tas-sussidjar u tad-dannu kopriet il-perjodu bejn l-1 ta’ Jannar 2018 u l-31 ta’ Diċembru 2018 (“il-perjodu ta’ investigazzjoni” jew il-“PI”). L-eżami tax-xejriet rilevanti għall-valutazzjoni tad-dannu kopra l-perjodu ta’ bejn l-1 ta’ Jannar 2015 u t-tmiem tal-perjodu ta’ investigazzjoni (“il-perjodu taħt kunsiderazzjoni”).

(78)

Kemm l-investigazzjoni antisussidji attwali kif ukoll l-investigazzjoni anti-dumping imsemmija fil-premessa (4) għandhom l-istess perjodu ta’ investigazzjoni u l-istess perjodu taħt kunsiderazzjoni.

(79)

Fin-Notifika ta’ Bidu, il-Kummissjoni stiednet lill-partijiet interessati jagħmlu kuntatt magħha sabiex jipparteċipaw fl-investigazzjoni. Barra minn hekk, il-Kummissjoni għarrfet speċifikament lill-ilmentatur, lill-GTE, lill-GTĊ, lil produtturi tal-Unjoni magħrufa oħrajn, lill-produtturi esportaturi magħrufa, lill-importaturi magħrufa u lill-utenti dwar il-bidu tal-investigazzjoni u stednithom sabiex jipparteċipaw.

(80)

Il-partijiet interessati kellhom l-opportunità jikkummentaw dwar il-bidu tal-investigazzjoni u jitolbu seduta mal-Kummissjoni u/jew mal-Uffiċjal tas-Seduta fil-proċedimenti kummerċjali. Yuntianhua Group talab intervent mill-Uffiċjal tas-Seduta biex iqajjem tħassib relatat mal-iskadenza mogħtija biex iwieġeb għal ittra ta’ defiċjenza. Il-kumpanija sostniet li ma kinitx innutat l-ittra ta’ defiċenza minħabba li s-server tal-IT tagħha kien bi żball ikkunsidra l-email tal-Kummissjoni bħala posta mhux mixtieqa, u talbet estensjoni ta’ 18-il jum. L-Uffiċjal tas-Seduta stieden lill-Kummissjoni testendi l-iskadenza b’sitt ijiem.

(81)

Kif imsemmi fit-Taqsima 1.3, il-Kummissjoni ċċarat l-ambitu tal-prodott matul l-investigazzjoni u tat lill-partijiet interessati kkonċernati mill-kjarifika, jew lil min seta’ ma kienx ippreżenta lilu nnifsu minħabba li emmen li ma kienx ikkonċernat mill-proċediment, l-opportunità li jippreżenta lilu nnifsu u li jitlob kwestjonarju sa perjodu ta’ żmien stipulat. L-ebda parti oħra ma ppreżentat lilha nnifisha.

(82)

Fin-Notifika ta’ Bidu, il-Kummissjoni ddikjarat li hija tista’ tieħu kampjun mill-partijiet interessati skont l-Artikolu 27 tar-Regolament bażiku.

(83)

Fin-Notifika ta’ Bidu, il-Kummissjoni ddikjarat li kienet iddeċidiet li tillimita l-investigazzjoni għal għadd raġonevoli ta’ produtturi tal-Unjoni billi tapplika kampjunar. Hija żiedet tgħid li għażlet b’mod provviżorju kampjun ta’ produtturi tal-Unjoni abbażi tal-volum ta’ produzzjoni rrappurtat tal-prodott simili fl-Unjoni bejn Ottubru 2017 u Settembru 2018 filwaqt li qieset ukoll il-firxa ġeografika. Il-kampjun ikkonsista minn erba’ produtturi tal-Unjoni li jirrappreżentaw aktar minn 40 % tal-produzzjoni totali stmata tal-Unjoni ta’ GFF. L-ebda waħda mill-partijiet interessati ma pprovdiet kummenti u għalhekk il-kampjun provviżorju ġie kkonfermat. Il-kampjun jirrappreżenta lill-industrija tal-Unjoni.

(84)

Biex tiddeċiedi jekk il-kampjunar kienx meħtieġ u, jekk iva, biex tagħżel kampjun, il-Kummissjoni talbet lill-importaturi mhux relatati biex jipprovdu l-informazzjoni speċifikata fin-Notifika ta’ Bidu.

(85)

Importatur mhux relatat wieħed biss (Euroresins UK Ltd.) ipprovda l-informazzjoni mitluba u qabel li jkun inkluż fil-kampjun. Minħabba n-numru żgħir ta’ importaturi li kkollaboraw, il-Kummissjoni ddeċidiet li ma kienx meħtieġ li jittieħed kampjun.

(86)

Sabiex tiddeċiedi jekk il-kampjunar kienx meħtieġ u, jekk iva, biex tagħżel kampjun, il-Kummissjoni talbet lill-produtturi esportaturi magħrufa kollha fir-RPĊ sabiex jipprovdu l-informazzjoni speċifikata fin-Notifika ta’ Bidu. Barra minn hekk, il-Kummissjoni talbet lill-Missjoni tar-Repubblika tal-Poplu taċ-Ċina għall-Unjoni Ewropea biex tidentifika u/jew tikkuntattja lil produtturi esportaturi oħrajn, jekk hemm, li jistgħu jkunu interessati jipparteċipaw fl-investigazzjoni.

(87)

Kien hemm tmien produttur esportatur jew gruppi ta’ produtturi esportaturi fir-RPĊ li ppreżentaw l-informazzjoni mitluba u qablu li jkunu inklużi fil-kampjun. Skont l-Artikolu 27(1) tar-Regolament bażiku, il-Kummissjoni għażlet kampjun ta’ żewġ gruppi ta’ produtturi esportaturi abbażi tal-ikbar volum rappreżentattiv ta’ esportazzjonijiet lejn l-Unjoni li jista’ jiġi investigat b’mod raġonevoli fil-ħin disponibbli. Il-gruppi ta’ produtturi esportaturi inklużi fil-kampjun jirrappreżentaw aktar minn 79 % tal-esportazzjonijiet irrappurtati ta’ GFF mir-RPĊ lejn l-Unjoni matul il-perjodu ta’ investigazzjoni.

(88)

Il-kampjun tal-produtturi esportaturi jew gruppi ta’ produtturi esportaturi huwa li ġej:

(89)

Skont l-Artikolu 27(2) tar-Regolament bażiku, il-produtturi esportaturi magħrufa u kkonċernati kollha, u l-awtoritajiet tar-RPĊ ġew ikkonsultati dwar l-għażla tal-kampjun.

(90)

Waslu kummenti dwar l-għażla tal-kampjun minn żewġ produtturi esportaturi inklużi fil-kampjun, Jushi u Hengshi, li jagħmlu parti mis-CNBM Group. Filwaqt li Jushi u Hengshi ma kkontestawx il-fatt li kienu kumpaniji relatati, huma ddikjaraw li ma kinux relatati ma’ Taishan. Jushi ddikjarat li l-Kummissjoni ma setgħetx tiddependi b’mod mekkaniku fuq l-Artikolu 127(1)(d) jew (f) tar-Regolament ta’ Implimentazzjoni tal-Kummissjoni (UE) 2015/2447 tal-24 ta’ Novembru 2015 (17) (“l-Att ta’ implimentazzjoni tal-Kodiċi Doganali tal-Unjoni”) biex tittratta Hengshi, Jushi u Taishan bħala entità waħda. Insostenn ta’ din il-pretensjoni, Jushi rreferiet għall-Bord tad-WTO fil-Korea – Certain Paper (18) u l-Linji Gwida għal tranżazzjonijiet relatati ta’ kumpaniji elenkati tal-Borża ta’ Shanghai.

(91)

Huma enfasizzaw li (i) ma kellhomx parteċipazzjoni azzjonarja diretta komuni, (ii) ma kien hemm l-ebda sovrapożizzjoni fil-bordijiet tagħhom, (iii) ma kien hemm l-ebda tranżazzjoni relatata bejn Hengshi/Jushi u Taishan, u (iv) kienu kompetituri fis-suq.

(92)

Wara l-eżerċizzju tal-kampjunar, fit-13 ta’ Novembru 2019, saret seduta ma’ Taishan, li fiha reġgħu tqajmu l-argumenti msemmija hawn fuq.

(93)

L-investigazzjoni żvelat li China National Building Material (“CNBM”) hija intrapriża tal-Istat Ċiniż li 41,27 % tagħha hija direttament jew indirettament proprjeta tal-Kumpanija Omm ta’ CNBM, li min-naħa tagħha hija proprjetà kollha kemm hi tal-Kummissjoni tal-Kunsill tal-Istat ta’ Amministrazzjoni u Superviżjoni tal-Assi (“SASAC”) li hija proprjetà tal-Istat. CNBM għandha sehem ta’ 26,97 % f’China Jushi Co., Ltd. (“China Jushi”), li hija l-unika azzjonist ta’ Jushi (19).

(94)

F’Settembru 2017, CNBM daħlet fi Ftehim ta’ Fużjoni (20) ma’ Sinoma li ġie ffinalizzat f’Mejju 2018. Sinoma, permezz tas-sussidjarja tagħha Sinoma Science & Technology Co. kienet is-sid ta’ Taishan. Wara l-fużjoni, Sinoma ngħaqdet u ġiet assorbita minn CNBM. Bħala konsegwenza, CNBM għandha sehem ta’ 26,97 % f’China Jushi (l-unika azzjonista ta’ Jushi) u sehem ta’ 60,24 % f’Sinoma Science & Technology Co., Ltd. (l-unika azzjonista ta’ Taishan).

(95)

L-Artikolu 127(1)(d) tal-Att ta’ Implimentazzjoni tal-Kodiċi Doganali jistabbilixxi li żewġ persuni għandhom jitqiesu li jkunu relatati jekk: parti terza tkun tippossjedi, tikkontrolla jew iżżomm direttament jew indirettament 5 % jew aktar tal-istokk jew l-ishma li jivvutaw jew tat-tnejn. CNBM għandha sehem ta’ 26,97 % f’China Jushi (l-unika azzjonista ta’ Jushi) u 60,24 % f’Sinoma Science & Technology Co., Ltd. (l-unika azzjonista ta’ Taishan). Għalhekk, instab li l-kumpaniji kienu relatati.

(96)

Barra minn hekk, skont rapport tal-kumpanija mill-kumpanija ta’ senserija Ċiniża Guotai Junan Securities tal-2019 (21), CNBM ilha mill-2017 torganizza mill-ġdid l-entitajiet operatorji tagħha sabiex ittejjeb il-koordinazzjoni reġjonali u telimina l-kompetizzjoni orizzontali fost is-sussidjarji elenkati. Barra minn hekk, CNBM beħsiebha ssolvi l-kwistjonijiet tal-kompetizzjoni orizzontali sal-2020. Skont l-informazzjoni disponibbli pubblikament fir-rapport, CNBM ippjanat li tibda dan il-proċess billi tikkonsolida n-negozju tal-fibra tal-ħġieġ tagħha permezz ta’ injezzjonijiet ta’ assi bejn China Jushi u Sinoma Science & Technology (l-unika azzjonista ta’ Taishan). Għalhekk, l-evidenza miġbura matul l-investigazzjoni ma tappoġġjax l-argument tal-kumpaniji li l-parteċipazzjoni azzjonarja komuni ma għandha l-ebda implikazzjoni prattika u li l-kumpaniji joperaw b’mod indipendenti. Għall-kuntrarju, din l-evidenza tissuġġerixxi li lil hinn mis-sempliċi parteċipazzjoni azzjonarja (li waħedha tista’ tkun determinanti għall-konklużjoni li l-kumpaniji huma relatati), it-tliet kumpaniji jistgħu jinfluwenzaw ukoll b’mod konsiderevoli d-deċiżjonijiet kummerċjali ta’ xulxin, u li l-kumpanija tal-kontroll tagħhom (CNBM) għandha l-għan li tal-anqas tikkoordina, jekk mhux tintegra, l-operazzjonijiet tagħhom (“issolvi l-kwistjonijiet tal-kompetizzjoni orizzontali”). Dan ifisser li s-sussidji riċevuti minn kwalunkwe minn dawk il-kumpaniji jistgħu jintużaw għall-vantaġġ tal-prodott ikkonċernat mingħajr distinzjoni. Għalhekk, il-Kummissjoni rrifjutat l-affermazzjoni li l-konklużjoni tagħha li tikkunsidra t-tliet kumpaniji bħala relatati ma qisitx ir-realtajiet fattwali u ekonomiċi.

(97)

Fir-rigward tal-argument li l-Kummissjoni ma setgħetx tittratta lil Hengshi, Jushi u Taishan bħala grupp uniku għall-fini tal-kalkolu tal-ammont ta’ sussidjar mogħti fuq il-prodott ikkonċernat, il-Kummissjoni fakkret li biex jiġi żgurat li l-miżuri jkunu jistgħu jiġu infurzati b’mod effettiv, b’mod partikolari biex jiġi evitat li l-esportazzjonijiet jiġu diretti permezz ta’ kumpanija relatata bl-anqas dazju, hija l-prattika tal-Kummissjoni li tistabbilixxi r-relazzjoni bejn il-produtturi esportaturi permezz tal-kriterji stabbiliti fl-Artikolu 127 tal-Att ta’ Implimentazzjoni tal-Kodiċi Doganali tal-Unjoni. Dan ġie kkomunikat b’mod ċar lill-partijiet kollha fin-Notifika ta’ bidu fil-bidu tal-proċediment. Barra minn hekk, ir-referenza għall-Artikolu 127 tal-Att ta’ Implimentazzjoni tal-Kodiċi Doganali tal-Unjoni tinsab espliċitament fl-Artikolu 2(1) tar-Regolament bażiku dwar l-Anti-dumping (22) u l-Kummissjoni jenħtieġ li jkollha l-istess trattament ta’ partijiet kemm f’każijiet anti-dumping kif ukoll f’ każijiet antisussidji (23). Barra minn hekk, skont l-Artikolu 7(1) tar-Regolament bażiku, il-kalkolu tal-ammont ta’ sussidjar isir għal kull unità tal-prodott issussidjat esportat lejn l-Unjoni. Il-kalkolu tal-ammont ta’ sussidji kumpensabbli abbażi tal-prodott ikkonċernat esportat lejn l-Unjoni jimplika li, meta l-kumpaniji jkunu relatati, peress li l-flus huma funġibbli, jistgħu jużaw dawk il-benefiċċji għall-prodott ikkonċernat mingħajr distinzjoni, u għalhekk, irrispettivament mill-produttur esportatur b’mod partikolari. F’dan il-każ, peress li Henghsi, Jushi u Taishan jagħmlu u jesportaw il-prodott ikkonċernat, l-ammont ta’ sussidji kumpensabbli mogħtija fuqhom jenħtieġ li jqis il-fatt li, minħabba r-relazzjoni tagħhom, huma kapaċi jidderieġu dawk il-benefiċċji għall-prodott ikkonċernat esportat lejn l-Unjoni kif jidhrilhom xieraq. Konsegwentement, il-benefiċċji mogħtija lil dawk il-produtturi esportaturi fir-rigward tal-prodott ikkonċernat jenħtieġ li jirriżultaw f’ammont wieħed għall-grupp.

(98)

Fl-aħħar nett, il-każ tad-WTO (24) msemmi minn Jushi fil-premessa (90) ma jappoġġjax l-affermazzjoni tal-kumpanija. Fil-fatt, għall-kuntrarju ta’ dak li Jushi qed tipprova tikkonkludi, il-Bord tad-WTO f’dak il-każ kkonferma li, għall-fini ta’ determinazzjonijiet ta’ dumping f’investigazzjonijiet anti-dumping, ir-regola fl-Artikolu 6.10 tal-Ftehim anti-dumping tad-WTO (fejn jenħtieġ li jkun kkalkulat marġni ta’ dumping għal kull produttur esportatur) ma kinitx neċessarjament tipprekludi li entitajiet ġuridiċi distinti jiġu ttrattati bħala esportatur jew produttur uniku. Il-Bord innota li dan it-trattament ikun permess “fejn ir-relazzjoni strutturali u kummerċjali bejn il-kumpaniji inkwistjoni tkun suffiċjentement qrib biex jiġu kkunsidrati bħala esportatur uniku” (25). Bl-applikazzjoni ta’ din il-konsiderazzjoni, il-Bord ma stabbilixxiex il-kriterji li l-awtoritajiet investigattivi jridu japplikaw biex jivvalutaw jekk il-kumpaniji humiex relatati. Il-Bord sempliċement analizza l-elementi speċifiċi (bħall-parteċipazzjoni azzjonarja, il-bord tad-diretturi, il-mezzi ta’ bejgħ) li l-awtorità ta’ investigazzjoni kellha quddiemha f’dak il-każ. Il-Korp tal-Appell f’KE — Fastenersikkonferma l-possibbiltà li għadd ta’ esportaturi jiġu ttrattati bħala entità waħda, u elenka wkoll elementi li jistgħu jkunu rilevanti, bħall-eżistenza ta’ rabtiet korporattivi u strutturali bejn l-esportaturi, bħal (i) kontroll, parteċipazzjoni azzjonarja u ġestjoni komuni; (ii) l-eżistenza ta’ rabtiet korporattivi u strutturali bejn l-Istat u l-esportaturi, bħal kontroll, parteċipazzjoni azzjonarja u ġestjoni komuni; u (iii) kontroll jew influwenza materjali mill-Istat fir-rigward tal-ipprezzar u tal-produzzjoni (26). F’dak ir-rigward, mill-elementi legali u fattwali ta’ dan il-każ, ma jistax jiġi miċħud li jeżistu rabtiet korporattivi bejn Jushi, Hengshi u Taishan.

(99)

Abbażi ta’ dak li ntqal hawn fuq, il-Kummissjoni kkonkludiet li kienu kumpaniji relatati għall-iskop ta’ din l-investigazzjoni u l-affermazzjonijiet kollha f’dan ir-rigward ġew għaldaqstant miċħuda.

(100)

Wara d-divulgazzjoni definittiva, Taishan oġġezzjona għall-applikazzjoni ta’ dazju kumpensatorju kombinat ma’ Hengshi/Jushi. Din il-parti interessata sostniet li l-azzjonist finali komuni CNBM kellu biss kontroll limitat ħafna fuq id-deċiżjonijiet kummerċjali u operazzjonali ta’ Jushi jew ta’ Hengshi. Huma tennew li Taishan u Hengshi/Jushi kienu kompetituri fis-suq u nnotaw li huma diġà kienu ppreżentaw evidenza b’appoġġ għal dawn l-affermazzjonijiet. Taishan offra impenn bil-miktub li effettivament jaqta’ kwalunkwe rabta kummerċjali bejn Taisisan u Hengshi/Jushi u għalhekk ma jippermetti l-ebda esportazzjoni ta’ GFF lejn l-Unjoni minn Hengshi/Jushi permezz ta’ Taishan.

(101)

Kif deskritt fil-premessa (96), l-investigazzjoni wriet li permezz tal-azzjonisti komuni tagħhom, it-tliet kumpaniji huma kapaċi jinfluwenzaw b’mod sinifikanti d-deċiżjonijiet kummerċjali ta’ xulxin. L-evidenza fil-fajl uriet li l-kumpaniji jinsabu fil-proċess li jikkonsolidaw u jikkoordinaw l-operazzjonijiet tal-fibra tal-ħġieġ. Ma ġiet ipprovduta l-ebda informazzjoni jew evidenza ġdida li tista’ tinvalida dawn is-sejbiet. Fil-fatt, Taishan ma kkontestax il-pjanijiet tal-azzjonist ewlieni tiegħu li jikkonsolida n-negozju tal-fibra tal-ħġieġ tiegħu. Tali pjanijiet huma f’kontradizzjoni ċara ma’ kwalunkwe impenn biex jinqatgħu r-rabtiet kummerċjali bejn Taishan u Hengshi/Jushi. Barra minn hekk, u mingħajr ma tittieħed pożizzjoni dwar jekk il-Kummissjoni tistax taċċetta impenn bħal dan, jidher ċar li l-kumpanija mhijiex f’pożizzjoni li tidħol f’xi tip ta’ impenn mingħajr l-approvazzjoni tal-kontrolluri finali tagħha. Għalhekk, l-affermazzjonijiet u t-talba għal impenn ta’ Taishan ġew miċħuda.

(102)

Wara d-divulgazzjoni definittiva, is-CNBM Group argumenta li s-sussidji riċevuti mingħand in-negozjant relatat Jushi Hong Kong Co. Ltd. ma setgħux jiġu kkumpensati, peress li l-kumpanija kienet ibbażata f’Hong Kong u mhux fiċ-Ċina. Hong Kong huwa membru indipendenti tad-WTO u għalhekk huwa meqjus bħala ġurisdizzjoni indipendenti skont il-liġi tad-WTO u għall-finijiet tal-investigazzjonijiet għad-difiża tal-kummerċ tal-Unjoni. Peress li l-proċedimenti ta’ antisussidju attwali ma nbdewx kontra Hong Kong, jenħtieġ li kwalunkwe sussidju li allegatament irċeviet Jushi Hong Kong ma jiġix ikkunsidrat. Il-Kummissjoni nnutat li CNBM Group ma kkontestax is-sejbiet tal-Kummissjoni rigward is-sussidjar għal dan in-negozjant relatat. Irrispettivament mill-istatus ta’ Hong Kong f’din l-investigazzjoni, iċ-ċentru reali tal-attivitajiet u kontroll tal-kumpanija Jushi Hong Kong fil-fatt jinsabu fiċ-Ċina Kontinentali. Kif qalet il-kumpanija stess, “Fil-fatt, Jushi Hong Kong hija kumpannija fantażma, mingħajr impjegati, bla ebda art, bla ebda uffiċċju fiżiku u benefiċċju, bla programmi tat-taxxa u lanqas għotjiet”. Ir-rekords kontabilistiċi kienu jinsabu għand Jushi Group Co. Ltd., il-persunal rilevanti għall-verifika kien jinsab hemmhekk ukoll, u s-sussidji riċevuti u li kienu ta’ benefiċċju għall-prodott ikkonċernat ingħataw minn entitajiet Ċiniżi. Barra minn hekk, kif ikkonfermat mill-Appellate Body f’United States - Anti-Dumping and Countervailing Measures on Large Residential Washers from Korea, is-sussidji mogħtija lir-riċevitur f’pajjiżi li mhuwiex il-Membru li jissussidja jistgħu jkunu rilevanti sabiex jiġi kkalkulat l-ammont ta’ sussidju ad valorem (27). L-affermazzjoni tal-kumpanija għalhekk ġiet miċħuda.

(103)

Wara d-divulgazzjoni definittiva, Yuntianhua Group ippretenda li l-marġni ta’ sussidju tiegħu ġie minfuħ billi ġew miżjuda sussidji mogħtija lil kumpaniji li ma pprovdewx inputs użati fil-produzzjoni tal-prodott ikkonċernat, u, għalhekk, talab li s-sussidji ta’ dawn il-kumpaniji ma jitqisux għall-kalkolu tad-dazju kumpensatorju.

(104)

L-Artikolu 1 tar-Regolament bażiku jipprevedi li dazju kumpensatorju jista’ jiġi impost biex ipaċi kwalunkwe sussidju mogħti, direttament jew indirettament, għall-manifattura, il-produzzjoni, l-esportazzjoni jew it-trasport ta’ kwalunkwe prodott li r-rilaxx tiegħu fiċ-ċirkolazzjoni libera fl-Unjoni jikkawża dannu. Il-Kummissjoni għandha evidenza li l-kumpaniji inklużi fl-investigazzjoni u li l-benefiċċji tas-sussidju tagħhom ikkontribwew għad-dazju tal-grupp, ipparteċipaw direttament jew indirettament, u pprovdew inputs, servizzi, materjali, jew assi li kienu jintużaw fil-produzzjoni tal-prodott ikkonċernat kif deskritt fl-Artikolu 1 tar-Regolament bażiku. F’dan ir-rigward, il-kummenti li saru minn Yuntianhua Group ma kinux sostnuti minn evidenza konkreta.

(105)

Il-Kummissjoni, madankollu, osservat li waħda mill-kumpaniji relatati, li s-sussidji tagħhom kienu kkumpensati, oriġinarjament kienet mitluba tipparteċipa fl-investigazzjoni peress li kriet b’lokazzjoni makkinarju lil wieħed mill-produtturi esportaturi. Madankollu, wara l-kummenti li rċeviet, il-Kummissjoni rrevediet il-koeffiċjent tal-kontribuzzjoni relatat mal-attivitajiet ta’ lokazzjoni tal-kumpanija li kienu marbuta mal-prodott ikkonċernat. Peress li l-benefiċċji li setgħu jiġu allokati permezz tal-attivitajiet ta’ lokazzjoni kienu meqjusa bħala negliġibbli, il-Kummissjoni ddeċidiet li ma tikkunsidrahomx.

(106)

Ħamsa mill-produtturi esportaturi Ċiniżi li bagħtu lura l-formola tal-kampjunar infurmaw lill-Kummissjoni dwar l-intenzjoni tagħhom li jitolbu eżaminazzjoni individwali skont l-Artikolu 27(3) tar-Regolament bażiku. Il-Kummissjoni għamlet il-kwestjonarju disponibbli online fil-jum tal-bidu. Barra minn hekk, il-Kummissjoni infurmat lill-produtturi esportaturi mhux inklużi fil-kampjun li kienu meħtieġa jipprovdu tweġiba għall-kwestjonarju jekk xtaqu jiġu eżaminati fuq bażi individwali. Madankollu, l-ebda kumpanija ma pprovdiet tweġiba għall-kwestjonarju. B’riżultat ta’ dan, ma kienx possibbli eżami individwali.

(107)

Fin-notifika ta’ bidu, il-Kummissjoni stiednet lill-produtturi esportaturi kollha fl-Eġittu biex jikkuntattjawha. Żewġ produtturi esportaturi relatati, li jirrappreżentaw 100 % tal-esportazzjonijiet lejn l-Unjoni u 100 % tal-produzzjoni tal-GFF fl-Eġittu, ippreżentaw lilhom infushom:

(108)

Il-kwestjonarji għall-produtturi, għall-importaturi, għall-utenti tal-Unjoni, u għall-produtturi esportaturi fir-RPĊ u fl-Eġittu saru disponibbli online (28) fil-jum ta’ bidu.

(109)

Il-Kummissjoni rċeviet tweġibiet għall-kwestjonarju miż-żewġ gruppi ta’ produtturi esportaturi Ċiniżi inklużi fil-kampjun, miż-żewġ produtturi esportaturi Eġizzjani, mill-erba’ produtturi tal-Unjoni inklużi fil-kampjun, ħames utenti u importatur wieħed mhux relatat. L-ebda wieħed mill-produtturi esportaturi Ċiniżi mhux inklużi fil-kampjun ma bagħat tweġiba għall-kwestjonarju.

(110)

Il-Kummissjoni bagħtet ukoll kwestjonarju lill-GTĊ u lill-GTE. Il-kwestjonarju għall-GTĊ inkluda kwestjonarji speċifiċi għaċ-China Development Bank (“CDB”), għall-Export Import Bank of China (“EXIM”), u għal Sinosure. Dawk l-istituzzjonijiet finanzjarji kienet saret referenza għalihom speċifikament fl-ilment bħala korpi pubbliċi jew korpi mogħtija direzzjonijiet jew inkarigati sabiex jagħtu s-sussidji. Barra minn hekk, il-GTĊ intalab jibgħat il-kwestjonarju speċifiku għall-istituzzjonijiet finanzjarji lil kull istituzzjoni finanzjarja oħra li pprovdiet self jew krediti għall-esportazzjoni lill-kumpaniji inklużi fil-kampjun, jew lill-klijenti tal-kumpaniji inklużi fil-kampjun. Il-GTĊ intalab ukoll, għall-konvenjenza amministrattiva, biex jiġbor it-tweġibiet mogħtija minn dawn l-istituzzjonijiet finanzjarji u li jibgħathom direttament lill-Kummissjoni.

(111)

Il-kwestjonarju lill-GTE inkluda kwestjonarji speċifiċi għall-Bank Nazzjonali tal-Eġittu, Ahli Bank u Bank Misr. Dawk l-istituzzjonijiet finanzjarji kienet saret referenza għalihom speċifikament fl-ilment bħala korpi pubbliċi jew korpi mogħtija direzzjonijiet jew inkarigati sabiex jagħtu s-sussidji. Barra minn hekk, għall-konvenjenza amministrattiva, il-GTE ntalab jibgħat il-kwestjonarju speċifiku għall-istituzzjonijiet finanzjarji lil kull istituzzjoni finanzjarja oħra li pprovdiet self jew krediti għall-esportazzjoni lill-kumpaniji inklużi fil-kampjun. Barra minn hekk, il-kwestjonarju lill-GTE kien jinkludi kwestjonarji speċifiċi għal Egypt-TEDA Investment Company (“Egypt-TEDA”) u għal Egyptian Chinese JV Company for Investment (“ECCI”), li kienu ġew identifikati fl-ilment bħala entitajiet tal-Istat li joperaw fiż-Żona SETC. Il-GTE intalab ukoll li jiġbor xi tweġibiet mogħtija minn dawn l-istituzzjonijiet finanzjarji u entitajiet oħrajn, u li jibgħathom direttament lill-Kummissjoni.

(112)

Il-Kummissjoni rċeviet tweġibiet għall-kwestjonarju mill-GTĊ, li kienu jinkludu tweġibiet għall-kwestjonarju speċifiku minn EXIM u Sinosure, kif ukoll mill-GTE, li kienu jinkludu tweġibiet għall-kwestjonarju speċifiku mill-Bank Nazzjonali tal-Eġittu, minn Bank Misr u minn Egypt TEDA.

(113)

Mingħajr preġudizzju għall-applikazzjoni tal-Artikolu 28 tar-Regolament bażiku, il-Kummissjoni fittxet u vverifikat l-informazzjoni kollha meqjusa neċessarja u li saret disponibbli mill-partijiet, fil-ħin għad-determinazzjoni ta’ sussidju, dannu u l-interess tal-Unjoni. Saret żjara ta’ verifika fl-uffiċċji tal-Ministeru Ċiniż tal-Kummerċ, li matulha pparteċipaw ukoll uffiċjali minn ministeri rilevanti oħrajn. Barra minn hekk, matul din iż-żjara ta’ verifika kien hemm preżenti rappreżentanti minn EXIM, CDB u Sinosure.

(114)

Saret ukoll żjara ta’ verifika fl-uffiċċji ta’ Egypt TEDA, kif ukoll fl-uffiċċji tal-awtoritajiet tal-gvern Eġizzjan li ġejjin:

(115)

Barra minn hekk, il-Kummissjoni wettqet żjarat ta’ verifika skont l-Artikolu 26 tar-Regolament bażiku fl-uffiċċji tal-kumpaniji li ġejjin:

(116)

Minħabba t-theddida ta’ trażmissjoni tal-COVID-19 u l-miżuri konsegwenti meħuda biex tiġi ttrattata t-tifqigħa, (30) il-Kummissjoni ma setgħetx tivverifika d-data ppreżentata minn għadd ta’ kumpaniji li jappartjenu għall-grupp ta’ wieħed mill-pordutturi esportaturi li jinsabu fir-RPĊ. Minħabba li din is-sitwazzjoni mhux prevista seħħet fi stadju tard tal-proċediment u li ma kienet possibbli l-ebda soluzzjoni oħra, il-Kummissjoni użat b’mod eċċezzjonali l-informazzjoni ppreżentata minn dawn il-kumpaniji għall-kalkolu tas-sussidju, liema informazzjoni ġiet ivverifikata fuq il-bażi tal-informazzjoni disponibbli.

(117)

Fl-24 ta’ Jannar 2020, skont l-Artikolu 29(a)(2) tar-Regolament bażiku, il-Kummissjoni infurmat lill-partijiet interessati li kellha l-intenzjoni ma timponix miżuri proviżorji u li tkompli bl-investigazzjoni.

(118)

Il-Kummissjoni kompliet tfittex u tivverifika l-informazzjoni kollha li hija qieset meħtieġa għas-sejbiet definittivi tagħha.

(119)

Fis-27 ta’ Frar 2020, il-Kummissjoni infurmat lill-partijiet kollha bil-fatti u l-kunsiderazzjonijiet essenzjali li fuq il-bażi tagħhom kien beħsiebha timponi dazju anti-dumping definittiv fuq l-importazzjonijiet tal-prodott ikkonċernat fl-Unjoni (“id-divulgazzjoni definittiva”).

(120)

Il-partijiet kollha ngħataw perjodu ta’ 15-il jum li fih setgħu jikkummentaw dwar id-divulgazzjoni definittiva. Diversi partijiet interessati talbu għal estensjoni tad-data tal-iskadenza. Il-Kummissjoni tat sal-20 ta’ Marzu u t-23 ta’ Marzu 2020 biex jiġu sottomessi l-kummenti lil dawk il-partijiet. Il-partijiet interessati kellhom l-opportunità jikkummentaw dwar il-bidu tal-investigazzjoni u jitolbu seduta mal-Kummissjoni u/jew mal-Uffiċjal tas-Seduta fil-proċedimenti kummerċjali.

(121)

F’investigazzjoni anti-dumping separata l-partijiet irċevew, fid-19 ta’ Diċembru 2019 divulgazzjoni definittiva tal-fatti u l-kunsiderazzjonijiet essenzjali li fuq il-bażi tagħhom kien biħsiebha timponi dazju anti-dumping definittiv fuq l-importazzjonijiet tal-prodott ikkonċernat fl-Unjoni. Barra minn hekk, fl-10 ta’ Frar 2020, il-partijiet interessati rċevew divulgazzjoni addizzjonali.

(122)

Il-Kummissjoni indirizzat f’dan ir-Regolament kummenti sottomessi matul il-proċedura antisussidji. Kummenti sottomessi fil-kuntest tal-investigazzjoni anti-dumping separata ma kinux indirizzati f’dan ir-regolament sakemm il-partijiet ma jindikawx b’mod espliċitu li l-kummenti ppreżentati koprew iż-żewġ proċeduri.

(123)

Wara d-divulgazzjoni definittiva, l-ebda parti ma talbet li tinstema’ mill-uffiċjal tas-seduta.

(124)

Barra minn hekk, il-partijiet interessati rċevew divulgazzjoni definittiva addizzjonali fis-17 ta’ April 2020 u ngħataw sat-22 ta’ April 2020 biex jissottomettu kummenti (“divulgazzjoni definittiva addizzjonali”).

(125)

Barra minn hekk, il-partijiet interessati rċevew tieni divulgazzjoni definittiva addizzjonali fl-24 ta’ April 2020 u ngħataw sas-27 ta’ April 2020 biex jissottomettu kummenti (“it-tieni divulgazzjoni definittiva addizzjonali”).

(126)

Il-Kummissjoni kellha seduti ta’ smigħ mal-industrija tal-Unjoni, mal-produtturi esportaturi Jushi/Hengshi China, u mal-produtturi esportaturi Eġizzjani Jushi/Hengshi Egypt kif ukoll mal-GTE.

(127)

Il-prodott ikkonċernat (31) huwa materjali ta’ faxex u/jew raden tal-fibra tal-ħġieġ b’filament kontinwu, minsuġa u/jew meħjuta, b’elementi oħrajn jew mingħajrhom, għajr prodotti mxappin jew imxappin minn qabel (prepreg), u għajr materjali b’nisġa miftuħa b’ċelloli ta’ daqs aktar minn 1,8 mm kemm fit-tul kif ukoll fil-wisa’ u li jiżnu aktar minn 35 g/m2 (“GFF”), li joriġina mir-RPĊ u mill-Eġittu, li attwalment jaqgħu taħt il-kodiċijiet NM ex 7019 39 00, ex 7019 40 00, ex 7019 59 00 u ex 7019 90 00 (il-kodiċijiet TARIC 7019390080, 7019400080, 7019590080 u 7019900080) (“il-prodott ikkonċernat”).

(128)

Il-GFF jintuża f’firxa wiesgħa ta’ applikazzjonijiet, pereżempju għall-produzzjoni ta’ paletti għat-turbini tar-riħ, fil-produzzjoni ta’ tagħmir tad-dgħajjes, tat-trakkijiet u tal-isport, kif ukoll fis-sistemi ta’ tiswija tal-pajpijiet.

(129)

L-investigazzjoni wriet li dawn il-prodotti li ġejjin għandhom l-istess karatteristiċi fiżiċi, kimiċi u tekniċi bażiċi kif ukoll l-istess użi bażiċi:

(130)

Il-Kummissjoni ddeċidiet li dawn il-prodotti huma għalhekk prodotti simili fis-sens tal-Artikolu 2(c) tar-Regolament bażiku.

(131)

Produttur esportatur wieħed u l-Ministeru tal-Kummerċ tar-Repubblika Għarbija tal-Eġittu sostnew li l-kitts tal-GFF maqtugħa minn qabel jenħtieġ li jkunu koperti mill-ambitu tal-investigazzjoni. Huma sostnew li l-kitts tal-GFF maqtugħa minn qabel ikunu prodott downstream li jirrikjedi passi addizzjonali ta’ produzzjoni u b’differenzi fil-karatteristiċi fiżiċi, li għandu daqs ferm iżgħar. Dan ikun f’forom u f’imballaġġ differenti, li jikkonsistu f’diversi biċċiet iżgħar ta’ materjali kkuttunati flimkien. Ġie sostnut ukoll li ma jkun hemm l-ebda riskju ta’ ċirkomvenzjoni billi jiġu esklużi l-kitts peress li l-proċess ta’ qtugħ ikun irriversibbli u li l-prodott ma jkunx interkambjabbli mal-GFF mhux maqtugħ.

(132)

L-ilmentatur sostna li l-kitts tal-GFF maqtugħ minn qabel u l-GFF mhux maqtugħ għandhom l-istess karatteristiċi bażiċi u użi finali. Peress li l-GFF huma materjali ta’ rinforz, huwa meħtieġ li dawn jitqattgħu skont il-forma sabiex tiġi adattata il-forma tal-prodott li jeħtieġ li jiġi rinforzat, iżda ma jbiddilx il-karatteristiċi bażiċi tiegħu bħala tali. Il-proċess ta’ qtugħ jista’ jitwettaq mill-produttur tal-GFF, minn min jaqtal-ħġieġ fuq livell industrijali u indipendenti jew mill-klijent innifsu. Hija operazzjoni sempliċi ħafna u li ma tiswix flus. L-ilmentatur sostna wkoll li l-utenti ma jipperċepixxux lill-GFF maqtugħ minn qabel b’mod differenti minn GFF ieħor, peress li l-GFF ġeneralment huma prodotti skont l-ispeċifikazzjonijiet tal-utenti. Jekk il-proċess ta’ qtugħ jibdel il-karatteristiċi tal-GFF, dan jagħmilhom inutilizzabbli għall-klijent speċifiku.

(133)

L-investigazzjoni wriet li l-proċessi ta’ qtugħ minn qabel u tagħqid ma jbiddlux il-karatteristiċi fiżiċi, tekniċi jew kimiċi bażiċi tal-GFF jew tal-użi finali bażiċi tagħhom. Il-konsumaturi taż-żewġ prodotti huma fil-parti l-kbira l-istess u t-tnejn jinbiegħu permezz tal-istess mezzi ta’ distribuzzjoni.

(134)

L-investigazzjoni kkonfermat ukoll li għall-biċċa l-kbira tal-applikazzjonijiet, il-GFF huma prodotti skont l-ispeċifikazzjonijiet tal-klijenti. Il-kitts tal-GFF maqtugħ minn qabel jikkostitwixxu sempliċement speċifikazzjoni addizzjonali fl-ordni tal-klijent. Il-fatt li l-kitts tal-GFF maqtugħ minn qabel jirċievu imballaġġ differenti ma jbiddilx il-karatteristiċi. Billi l-GFF huwa dejjem aktar ordnat fil-forma ta’ kitts tal-GFF maqtugħ minn qabel u s-servizzi tal-kitters esterni qegħdin jintużaw dejjem aktar, ikun hemm riskju kbir ta’ ċirkomvenzjoni, jekk il-GFF maqtugħ minn qabel ikun eskluż mill-ambitu tal-investigazzjoni. Għalhekk, il-Kummissjoni kkonkludiet li ma jkunx xieraq li l-GFF maqtugħ minn qabel jiġi eskluż mill-ambitu tal-investigazzjoni.

(135)

Produttur esportatur ieħor sostna li r-raden tal-fibra tal-ħġieġ jenħtieġ li jitqies bħala eskluż mill-ambitu tal-investigazzjoni. Dan il-produttur esportatur sostna li r-raden tal-fibra tal-ħġieġ ma kellhomx jissemmew b’mod espliċitu fil-kwestjonarju, fl-ilment jew fin-Notifika ta’ Bidu, li jindika li mhumiex koperti mill-kamp ta’ applikazzjoni tal-prodott. Huwa sostna wkoll li l-GFF mir-raden ma setax jiġi kklassifikat taħt il-karatteristiċi tan-numru tal-kontroll tal-prodott (“PCN”), li l-GFF mir-raden ikun importat taħt kodiċijiet NM differenti minn dawk imsemmija fl-ilment u li r-raden tal-fibra tal-ħġieġ ma jkunx lanqas kopert mill-miżuri kontra l-faxex tal-fibra tal-ħġieġ fi proċeduri oħrajn.

(136)

L-ilmentatur u produttur ieħor tal-Unjoni (mhux parti mill-ilment) sostnew li l-GFF minn raden tal-fibra tal-ħġieġ mhux mibrum jew mingħajr l-ebda barma jenħtieġ li jkun kopert mill-investigazzjoni, filwaqt li raden mibrum jista’ jiġi eskluż mill-ambitu ta’ applikazzjoni tal-investigazzjoni. L-ilmentantur sostna li r-raden tal-fibra tal-ħġieġ mhux mibrum jew mingħajr l-ebda barma, għandu l-istess karatteristiċi tal-faxex tal-fibra tal-ħġieġ li jkunu magħmula minn lott ta’ filamenti jew ħjut mhux mibruma u jintużaw ukoll għall-istess skopijiet bħall-faxex u normalment għandhom dijametru ta’ 13-24 mikrometru u tex ta’ 300-4 800.

(137)

Fir-rigward tal-inklużjoni tal-GFF minn raden tal-fibra tal-ħġieġ, in-Notifika ta’ Bidu ddefiniet il-prodott taħt investigazzjoni bħala “materjali ta’ faxex u/jew raden tal-fibra tal-ħġieġ b’filament kontinwu minsuġ jew meħjut, […]” (32). L-investigazzjoni wriet li raden tal-fibra tal-ħġieġ mhux mibrum jew mingħajr l-ebda brim għandu l-istess karatteristiċi bażiċi bħall-faxex tal-fibra tal-ħġieġ, jiġifieri jikkonsisti minn lott ta’ filamenti jew ħjut mhux mibruma, u jintużaw ukoll għall-istess skopijiet. Ġeneralment, it-tnejn għandhom dijametru ta’ 13-24 mikrometru u tex ta’ 300-4 800. Għalhekk, ma jkunx xieraq li dawn it-tipi ta’ prodotti jiġu esklużi mill-ambitu tal-investigazzjoni.

(138)

Fir-rigward tal-GFF prinċipalment magħmul minn raden tal-fibra tal-ħġieġ mibrum, il-Kummissjoni tinnota li dan il-prodott, li għandu karatteristiċi bażiċi differenti u huwa wkoll soġġett għal użi finali differenti, eż. bords taċ-ċirkwiti stampati, qatt ma kien parti mill-prodott ikkonċernat. Il-Kummissjoni ċċarat b’mod espliċitu dan il-punt fl-Avviż ta’ Kjarifika.

(139)

Qabel ma analizzat l-allegat sussidjar fil-forma ta’ sussidji jew programmi ta’ sussidju, il-Kummissjoni vvalutat il-pjanijiet, il-proġetti u dokumenti oħrajn tal-gvern, li kienu rilevanti għal aktar minn wieħed mis-sussidji jew mill-programmi ta’ sussidju. Hija sabet li s-sussidji jew il-programmi ta’ sussidju kollha taħt valutazzjoni jifformaw parti mill-implimentazzjoni tal-ippjanar ċentrali tal-GTĊ biex tiġi inċentivata l-industrija tal-GFF għar-raġunijiet li ġejjin.

(140)

It-12-il Pjan ta’ Ħames Snin għall-Iżvilupp Ekonomiku u Soċjali Nazzjonali tar-RPĊ (“it-12-il Pjan ta’ Ħames Snin”) enfasizza l-importanza tal-industrija tal-materjali l-ġodda, li jinkludi l-GFF, bħala “industrija strateġika emerġenti” u jistipula li dan jenħtieġ li jiġi żviluppat f’“industrija pilastru ewlenija” permezz ta’ appoġġ u gwida ta’ politika komprensivi (33). Barra minn hekk, it-13-il Pjan ta’ Ħames Snin għall-Iżvilupp Ekonomiku u Soċjali Nazzjonali tar-RPĊ (“it-13-il Pjan ta’ Ħames Snin”), li jkopri l-perjodu 2016-2020, għandu l-għan li jiżviluppa aktar industriji ta’ materjali ġodda billi jsaħħaħ ir-riċerka u l-iżvilupp u jtejjeb il-kapaċità ta’ innovazzjoni tal-industrija tal-manifattura (34).

(141)

It-13-il Pjan ta’ Ħames Snin jenfasizza l-viżjoni strateġika tal-GTĊ għat-titjib u għall-promozzjoni tal-industriji ewlenin. Huwa jenfasizza r-rwol tal-innovazzjoni teknoloġika fl-iżvilupp ekonomiku tar-RPĊ, kif ukoll l-importanza kontinwa tal-prinċipji ta’ żvilupp “ekoloġiku”. Skont il-Kapitolu 5 tiegħu, waħda mil-linji ewlenin ta’ żvilupp hija l-promozzjoni tat-titjib tal-istruttura industrijali tradizzjonali, kif kien diġà l-każ fit-12-il Pjan ta’ Ħames Snin. Il-Kapitolu 22 jelabora aktar din l-idea u jispjega l-istrateġija għall-modernizzazzjoni tal-industrija tradizzjonali fir-RPĊ permezz tal-promozzjoni tal-konverżjoni teknoloġika tagħha. F’dan ir-rigward, it-13-il Pjan ta’ Ħames Snin jgħid li l-kumpaniji se jiġu appoġġjati sabiex “jitjiebu b’mod komprensiv f’oqsma bħat-teknoloġija tal-prodotti, it-tagħmir industrijali, il-protezzjoni tal-ambjent u l-effiċjenza enerġetika”.

(142)

It-13-il Pjan ta’ Ħames Snin isemmi l-materjali l-ġodda f’xi każijiet: “aħna se nistinkaw aktar biex niksbu innovazzjonijiet fit-teknoloġiji ewlenin f’oqsma bħall-informazzjoni u l-komunikazzjoni tal-ġenerazzjoni li jmiss, l-enerġija l-ġdida, il-materjali ġodda […]” (35). Il-pjan jipprevedi wkoll li jitwettqu proġetti relatati ma’ riċerka, żvilupp u applikazzjoni ta’ materjali ġodda ewlenin (36).

(143)

Wara d-divulgazzjoni definittiva, il-GTĊ tenna l-pożizzjoni bażika tiegħu dwar il-Pjanijiet ta’ Ħames Snin taċ-Ċina, billi sostna li dawn mhumiex obbligatorji jew legalment vinkolanti iżda huma sempliċiment dokumenti ta’ gwida għaliex ma fihomx dispożizzjonijiet legali, sanzjonijiet jew regoli legali dwar l-applikabbiltà. Il-GTĊ sostna wkoll li t-12-il Pjan ta’ Ħames Snin ma għadux applikabbli u anke jekk it-13-il Pjan ta’ Ħames Snin ikun legalment vinkolanti, quod non, ma jsemmix il-GFF. Barra minn hekk, filwaqt li l-pjan jirreferi għal “materjali ġodda”, ma jiddefinixxix dan it-terminu. Fl-aħħar nett, it-13-il Pjan ta’ Ħames Snin mhuwiex speċifiku għall-industrija tal-GFF jew għall-“industrija tal-materjali ġodda” iżda jkopri kważi l-ekonomija kollha

(144)

Il-Kummissjoni ma qablitx ma’ din l-opinjoni. Il-Kapitolu 17 tat-13-il Pjan ta’ Ħames Snin jgħid: “L-istrateġija u l-pjan ta’ żvilupp nazzjonali se jkollhom rwol ewlieni u ristrittiv.” B’hekk, minflok ma jsiru biss dikjarazzjonijiet ġenerali ta’ inkoraġġiment, dan il-pjan juża lingwaġġ li jindika n-natura vinkolanti tiegħu.

(145)

Anki jekk it-12-il Pjan ta’ Ħames Snin mhuwiex aktar applikabbli, huwa l-predeċessur li enfasizza l-importanza tal-industrija tal-materjali ġodda bħala “industrija emerġenti strateġika” li t-13-il Pjan ta’ Ħames Snin kompla jiżviluppa. Kif muri fil-premessi (148) u (149), l-industrija tal-materjali ġodda tinkludi l-industrija tal-GFF. Kif imsemmi fil-premessa (141), it-13-il Pjan ta’ Ħames Snin jenfasizza l-viżjoni strateġika tal-GTĊ għat-titjib u l-promozzjoni tal-industriji ewlenin; għalhekk, huwa jagħti prijorità lil ċerti setturi u teknoloġiji, inkluż il-GFF.

(146)

Għaldaqstant, l-affermazzjonijiet tal-GTĊ f’dan ir-rigward ġew miċħuda.

(147)

L-industrija tal-materjali l-ġodda hija industrija inċentivata skont l-inizjattiva Made in China 2025 (37), u għalhekk hija eliġibbli biex tibbenefika minn finanzjament konsiderevoli mill-Istat. Inħolqu għadd ta’ fondi biex jappoġġjaw l-inizjattiva Made in China 2025 u għalhekk b’mod indirett l-industrija tal-GFF bħall-fond Nazzjonali taċ-Ċirkwiti Integrati, il-Fond tal-Manifattura Avvanzata u l-Fond ta’ Investiment tal-Industriji Emerġenti (38).

(148)

Barra minn hekk, sikwit issir referenza għall-GFF taħt il-kappa ta’ “materjali ġodda”. Il-Pjan Direzzjonali Made in China 2025 (39) 10 setturi strateġiċi, li huma l-industriji l-aktar importanti għall-GTĊ. Dan il-Pjan jiddeskrivi, fit-Taqsima 9 “materjali ġodda” u s-sottokategoriji tagħha, inklużi materjali fundamentali avvanzati (punt 9.1), materjali strateġiċi ewlenin (punt 9.2) inklużi fibri u materjali kompożiti bi prestazzjoni għolja, materjali tal-enerġija ġodda (40). Il-materjali ġodda għalhekk jibbenefikaw mill-vantaġġi li jirriżultaw mill-mekkaniżmi ta’ appoġġ elenkati fid-dokument, inklużi, fost l-oħrajn, il-Politiki ta’ Appoġġ Finanzjarju, il-Politika Fiskali u tat-Tassazzjoni, is-Sorveljanza u l-Appoġġ tal-Kunsill tal-Istat (41).

(149)

Barra minn hekk, bħala żieda mal-Pjan Direzzjonali Made in China 2025, f’Novembru 2016, il-lista ta’ 10 setturi strateġiċi ġiet irfinata f’Katalgu ta’ Erba’ Elementi Essenzjali ppubblikat mill-Kumitat Konsultattiv Nazzjonali dwar l-Istrateġija għall-Manifattura (NMSAC), grupp konsultattiv għall-Grupp Żgħir Nazzjonali ta’ Tmexxija dwar il-Bini ta’ Potenza tal-Manifattura Nazzjonali. F’dan il-katalgu, kull wieħed mill-10 setturi strateġiċi huwa maqsum f’erba’ kapitoli: (i) parts tal-bdil essenzjali ewlenin, (ii) materjali essenzjali ewlenin, (iii) proċessi/teknoloġiji essenzjali avvanzati u (iv) pjattaformi tat-teknoloġija industrijali. Il-fibra tal-ħġieġ tista’ tinstab fis-settur 7: tagħmir elettriku, punt II materjal essenzjali ewlieni: sottopunt 16 pjanċi ta’ insulazzjoni tal-fibra tal-ħġieġ u s-settur 9: materjali ġodda, punt II materjali essenzjali ewlenin, sottopunti 10. Fibra, monomeru u materjali kompożiti bi prestazzjoni għolja u 24. Materjali bbażati fuq il-ħġieġ.

(150)

Wara d-divulgazzjoni definittiva, il-GTĊ sostna li l-GFF ma jissemmiex fl-inizjattiva Made in China 2025 li hija disponibbli b’mod wiesa’ fl-ekonomija kollha u li Made in China 2025 mhijiex obbligatorja iżda hija sempliċi linja gwida.

(151)

F’dan ir-rigward, il-Kummissjoni ttenni li l-inizjattiva Made in China 2025 timmira b’mod ċar lejn l-industriji tal-materjali ġodda, li jinkludu l-industrija tal-GFF kif diġà muri. Din tipprovdi appoġġ strateġiku u garanzija permezz ta’, inter alia, politika aħjar ta’ appoġġ finanzjarju u appoġġ akbar tal-politika tat-tassazzjoni fiskali. Pereżempju, tipprevedi b’mod ċar li “jiżdied l-appoġġ għall-ġenerazzjoni ġdida ta’ teknoloġija tal-informazzjoni, ta’ tagħmir ta’ kwalità għolja, ta’ materjali ġodda, eċċ.”

(152)

L-inizjattiva Made in China 2025 tgħid li hija “il-programm ta’ azzjonijiet fl-ewwel għaxar snin ta’ implimentazzjoni tal-istrateġija tal-potenza fil-manifattura” u tistabbilixxi politiki u miri strateġiċi ċari. L-inizjattiva Made in China 2025 tipprevedi wkoll li “diversi reġjuni għandhom ifasslu programm speċifiku ta’ implimentazzjoni u jirfinaw il-miżuri ta’ politika biex jiżguraw li diversi kompiti jiġu implimentati” u tgħid ukoll li “il-Ministeru tal-Industrija u l-Informazzjoni għandu jsaħħaħ l-analiżi tal-itraċċar, is-superviżjoni u d-direzzjoni b’mod konġunt mad-dipartimenti rilevanti, u jirrapporta avvenimenti maġġuri lill-Kunsill tal-Istat mill-ewwel”. Barra minn hekk, l-inizjattiva Made in China 2025 hija appoġġata minn miżuri ta’ implimentazzjoni bħall-Pjan Direzzjonali “Made in China 2025” u l-“Avviż tal-Uffiċċju Ġenerali tal-Ministeru tal-Industrija u t-Teknoloġija tal-Informazzjoni dwar ir-rilaxx tal-2017 tal-Gwida ta’ Finanzjament għat-Trasformazzjoni u l-Aġġornament Industrijal (Made in China 2025) (42)”, li pprovda għal fondi li bbenefikaw lil ċerti produtturi esportaturi tal-GFF li kkooperaw. Barra minn hekk, il-Pjan ta’ Żvilupp tal-Industrija tal-Materjali tal-Bini (2016–2020) imsemmi fil-premessa (153) “huwa ppreparat ibbażat fuq il-qafas tat-13-il Pjan ta’ Ħames Snin għall-Ekonomija Nazzjonali u l-Iżvilupp Soċjali tar-Repubblika tal-Poplu taċ-Ċina u l-Istrateġija Made in China 2025”. Meta wieħed iqis dan ta’ hawn fuq, l-inizjattiva Made in China 2025 ma tidhirx li hija sempliċi linja gwida; għall-kuntrarju, jidher li għandha effett obbligatorju de facto u hija fil-biċċa l-kbira implimentata. Għaldaqstant, l-affermazzjonijiet tal-GTĊ ġew miċħuda.

(153)

Barra minn hekk, il-Pjan ta’ Żvilupp tal-Industrija tal-Materjali tal-Bini (2016–2020) jippromwovi wkoll l-industrija GFF. Dan il-pjan jitlob titjib fl-istruttura industrijali billi, inter alia, jitwessgħu l-industriji emerġenti bħall-materjali bbażati fuq il-ħġieġ, iċ-ċeramika industrijali, il-lentijiet intraokulari, il-fibri u l-materjali kompożiti bi prestazzjoni għolja, u l-grafen u materjali modifikati. Dan għandu jintlaħaq permezz tal-politiki ta’ finanzjament tal-gvern, tat-tassazzjoni, finanzjarji, tal-ipprezzar, tal-enerġija u tal-protezzjoni tal-ambjent, u l-appoġġ għall-kapital għall-parteċipazzjoni fil-fużjonijiet, fl-akkwiżizzjonijiet u fir-ristrutturar tal-intrapriżi tal-materjali tal-bini permezz ta’ diversi mezzi inkluż is-self (43).

(154)

Wara d-divulgazzjoni definittiva, il-GTĊ sostna li l-Pjan ta’ Żvilupp tal-Industrija tal-Materjali tal-Bini japplika għall-materjali tal-bini kollha u għalhekk huwa wkoll ġeneralment disponibbli fl-ekonomija kollha. Barra minn hekk, dan il-pjan jikkonċerna biss informazzjoni ġenerali dwar il-politika tal-gvern.

(155)

Il-pjan ta’ Żvilupp tal-Industrija tal-Materjali għall-Bini jipprevedi miżuri speċifiċi li jimmiraw lejn l-industrija tal-materjali tal-bini u l-industrija tal-GFF hija parti minnha kif spjegat fil-premessa (166). Għalhekk, il-Kummissjoni ma taqbilx mal-affermazzjoni tal-GTĊ li din hija disponibbli fl-ekonomija.

(156)

Għalkemm il-Pjan ta’ Żvilupp tal-Industrija tal-Materjali tal-Bini jista’ jidher sempliċement bħala dokument ta’ gwida, kif imsemmi fil-premessa (152), huwa implimentazzjoni tat-13-il Pjan ta’ Ħames Snin u tal-Istrateġija Made in China 2025. Jimmira lejn li “jippromwovi t-trasformazzjoni u l-aġġornament tal-industrija tal-materjali tal-bini, jiffaċilita t-tranżizzjoni tal-industrija tal-materjali tal-bini minn industrija kbira għal waħda b’saħħitha u li jinkiseb żvilupp sostenibbli matul il-perjodu tat-“13-il Pjan ta’ Ħames Snin” u jistabbilixxi kompiti u proġetti ċari sabiex jinkisbu l-objettivi stabbiliti matul perjodu definit konkret ta’ ħames snin (44). Għalhekk, il-karattru purament ta’ gwida tiegħu huwa diskutibbli, aktar u aktar meta jiġi eżaminat fil-kuntest usa’ tiegħu.

(157)

L-industrija GFF hija wkoll koperta mill-Pjan ta’ Żvilupp tal-Manifattura Intelliġenti (2016-2020) ippubblikat mill-Ministeru Ċiniż tal-Industrija u tat-Teknoloġija tal-informazzjoni (l-“MIIT”), li jistabbilixxi 10 kompiti ewlenin li għandhom l-għan li jqassru ċ-ċiklu ta’ żvilupp tal-prodott, itejbu l-effiċjenza tal-produzzjoni, il-kwalità tal-prodott, inaqqsu l-kost operatorju, il-konsum tar-riżorsi u l-enerġija, jaċċelleraw l-iżvilupp tal-manifattura intelliġenti. Fl-2018, il-Kunsill tal-Istat ħabbar il-pjanijiet taċ-Ċina li tespandi l-programm tagħha għall-manifattura intelliġenti billi żżid madwar 100 proġett pilota dik l-istess sena, u skont l-informazzjoni disponibbli pubblikament, fl-2015, wieħed mill-produtturi esportaturi li kkooperaw, Taishan Fiberglass Inc. ġie elenkat fost “L-Impjanti tal-Manifattura Intelliġenti” mill-MIIT (45).

(158)

Skont il-GTĊ, il-Pjan ta’ Żvilupp tal-Manifattura Intelliġenti (2016-2020) huwa irrilevanti, peress li mhuwiex speċifiku għall-industrija tal-GFF iżda jikkonċerna l-industrija tal-manifattura kollha. Barra minn hekk, il-GTĊ sostna li l-pjan mhuwiex dokument obbligatorju iżda sempliċi linja gwida.

(159)

Il-Pjan ta’ Żvilupp tal-Manifattura Intelliġenti (2016–2020) “huwa ppreparat skont il-Qafas tat-13-il Pjan ta’ Ħames Snin għall-Ekonomija Nazzjonali u l-Iżvilupp Soċjali tar-Repubblika tal-Poplu taċ-Ċina u l-Istrateġija Made in China 2025 (46)”. Għalhekk, timplimenta l-istrateġija stabbilita f’dawn id-dokumenti. Kif diġà ġie spjegat qabel, it-13-il Pjan ta’ Ħames Snin u l-Istrateġija “Made in China 2025” huma mmirati speċifikament lejn ċerti industriji, fosthom l-industrija tal-GFF bħala parti mill-industriji tal-materjali ġodda. Barra minn hekk, f’ħafna każijiet, il-Pjan ta’ Żvilupp tal-Manifattura Intelliġenti jirreferi għall-għaxar oqsma ewlenin tal-Istrateġija “Made in China 2025”. B’mod partikolari, il-“Kolonna Speċjali 6 — Enfasi fuq it-trasformazzjoni intelliġenti ta’ qasam ewlieni tipprevedi li “għall-ġenerazzjoni l-ġdida ta’ teknoloġiji tal-informazzjoni, (…) materjal ġdid, (…) materjal tal-bini (…), l-applikazzjoni profonda tat-teknoloġiji intelliġenti u diġitali fir-riċerka u l-iżvilupp u d-disinn, il-manifattura, il-loġistika u l-ħżin, l-operat u l-ġestjoni, is-servizz ta’ wara l-bejgħ u rabtiet ewlenin oħra tal-intrapriżi huma promossi”. Għalhekk, il-Pjan ta’ Żvilupp tal-Manifattura Intelliġenti (2016–2020) huwa speċifiku għall-industriji ewlenin stabbiliti mill-Istrateġija Made in China 2025 u jkopri, inter alia, il-materjali l-ġodda u s-setturi tal-materjali tal-bini li tagħmel parti minnhom l-industrija tal-GFF.

(160)

Il-Kummissjoni tinnota wkoll li l-lingwa użata fil-Pjan ta’ Żvilupp tal-Manifattura Intelliġenti (2016–2020) tissuġġerixxi l-karattru obbligatorju tad-dokument. B’mod partikolari, it-Taqsima II (III) “Objettivi ta’ żvilupp” tipprevedi li “Qabel l-2025, l-istrateġija “f’Żewġ Passi” għandha tiġi implimentata għall-promozzjoni tal-iżvilupp tal-manifattura intelliġenti: L-ewwel pass, sal-2020, il-fondazzjoni tal-iżvilupp tal-manifattura intelliġenti u l-kapaċità ta’ appoġġ se jkunu ovvjament mtejba, il-manifattura diġitali se tkun bażikament realizzata fil-qasam ewlieni tal-industrija tal-manifattura tradizzjonali, u t-trasformazzjoni intelliġenti tal-industrija ewlenija fejn il-kundizzjonijiet u l-fondazzjoni se jagħmlu progress ovvju; It-tieni pass, sal-2025, is-sistema ta’ appoġġ tal-manifattura intelliġenti tkun bażikament stabbilita, u t-trasformazzjoni intelliġenti sseħħ l-ewwel fl-industrija ewlenija”. Barra minn hekk, it-Taqsima V “Organizzazzjoni u implimentazzjoni” tgħid li “il-Ministeru tal-Industrija u t-Teknoloġija tal-Informazzjoni u l-Ministeru tal-Finanzi huma responsabbli mill-organizzazzjoni u l-implimentazzjoni tal-Pjan, it-tisħiħ tat-tmexxija, l-organizzazzjoni bir-reqqa, is-soluzzjoni f’waqtha tal-problemi li jinqalgħu matul il-proċess ta’ implimentazzjoni tal-Pjan, u l-promozzjoni tal-implimentazzjoni ta’ diversi kompiti u miżuri” u li “d-dipartimenti kompetenti mill-industrija u t-teknoloġija tal-informazzjoni u tal-finanzi f’diversi reġjuni għandhom malajr jifformulaw l-iskema ta’ implimentazzjoni marbuta mal-Pjan, jimplimentaw politiki ta’ appoġġ rilevanti, u jlestu x-xogħol ta’ feedback skont l-assenjazzjoni tar-responsabbiltà”. Għalhekk, il-Kummissjoni kkonkludiet li l-Pjan ta’ Żvilupp tal-Manifattura Intelliġenti għandu objettivi definiti b’mod ċar li huma obbligatorji għall-kumpaniji involuti.

(161)

Fid-dawl tas-sejbiet ta’ hawn fuq, l-affermazzjonijiet tal-GTĊ ġew miċħuda.

(162)

Barra minn hekk, il-Katalgu tal-Prodotti ta’ Esportazzjoni ta’ Teknoloġija Avvanzata taċ-Ċina, maħruġ mill-Ministeru tax-Xjenza u t-Teknoloġija, mill-Ministeru tal-Kummerċ Barrani u mill-Amministrazzjoni Ġenerali tad-dwana jelenka 1900 prodott ta’ teknoloġija avvanzata fi 8 kategoriji li huma mmirati għal politiki ta’ esportazzjoni preferenzjali mill-GTĊ. Waħda mill-kategoriji hija dik tal-“Materjali Ġodda”, li tinkludi l-GFF (47). Barra minn hekk, il-Katalogu tal-Prodotti tat-Teknoloġija Avvanzata taċ-Ċina maħruġ mill-Ministeru tax-Xjenza u t-Teknoloġija, il-Ministeru tal-Finanzi u l-Amministrazzjoni Statali tat-Tassazzjoni jirreferi għal 11-il qasam, fosthom il-“kategorija ta’ materjali ġodda”. Barra minn hekk, skont il-Liġi tar-RPĊ dwar il-Progress tax-Xjenza u t-Teknoloġija, l-intrapriżi ta’ teknoloġija avvanzata stabbiliti fiż-Żoni ta’ Żvilupp ta’ Teknoloġija Avvanzata jistgħu jibbenefikaw minn lista ta’ politiki preferenzjali li tinkludi: (i) rata ta’ 15 % ta’ Taxxa fuq l-Introjtu tal-Intrapriżi, minflok ir-rata normali ta’ 25 %; (ii) jekk il-valur tal-produzzjoni tal-prodotti għall-esportazzjoni jilħaq is-70 % tal-valur totali għal dik is-sena, ir-rata tal-EIT titnaqqas ulterjorment għal 10 %; (ii) l-intrapriżi ta’ teknoloġija avvanzata li jkunu għadhom kemm ġew stabbiliti huma eżentati mit-taxxa tal-EIT għall-ewwel sentejn mid-data tal-bidu tal-produzzjoni; (iv) l-intrapriżi ta’ teknoloġija avvanzata li jkunu għadhom kemm ġew stabbiliti huma eżentati mit-taxxa fuq il-kostruzzjoni; (v) għal kumpaniji ta’ produzzjoni u operat u żvilupp b’teknoloġija avvanzata ġodda, l-art R&Ż hija mingħajr taxxa; (vi) it-tagħmir użat minn intrapriżi ta’ teknoloġija avvanzata għall-produzzjoni u għall-iżvilupp b’teknoloġija avvanzata huwa soġġett għal deprezzament aktar mgħaġġel; (vii) il-prodotti esportati magħmula minn intrapriżi ta’ teknoloġija avvanzata huma eżentati mit-tariffi ta’ esportazzjoni ħlief dawk ristretti mill-Istat jew li jikkonċernaw prodotti speċifiċi, eċċ (48).

(163)

Wara d-divulgazzjoni definittiva, il-GTĊ sostna li l-Katalogu tal-Prodotti tat-Teknoloġija Avvanzata taċ-Ċina, li jinqara flimkien mal-Liġi tar-RPĊ dwar ix-Xjenzi u t-Teknoloġija, mhuwiex speċifiku għal ċertu industriji minħabba li dawn id-dokumenti jistabbilixxu kriterji oġġettivi għall-eliġibbiltà, li jiġu applikati awtomatikament.

(164)

F’dan ir-rigward, kif diġà ssemma fil-premessa (162), il-Katalgu tal-Prodotti ta’ Esportazzjoni ta’ Teknoloġija Avvanzata taċ-Ċina jaqsam il-prodotti tat-teknoloġija avvanzata fi tmien kategoriji, inkluż “materjali ġodda”. Il-Kummissjoni tinnota wkoll li l-Katalogu tal-Prodotti ta’ Teknoloġija Avvanzata taċ-Ċina jirreferi għal 11-il qasam, fosthom “6. Materjali ġodda”. Meta wieħed iqis li ż-żewġ katalgi huma limitati għal ċertu numru ta’ oqsma, ma jistax jiġi konkluż li japplikaw għall-industriji kollha. Għaldaqstant, l-affermazzjoni tal-GTĊ ġiet miċħuda.

(165)

Id-Dispożizzjonijiet Temporanji dwar il-Promozzjoni tal-Aġġustament tal-Istruttura Industrijali (Deċiżjoni Nru 40 2005 tal-Kunsill tal-Istat) (“Deċiżjoni Nru 40”), il-Kapitolu III jirreferi għal “Il-Katalogu ta’ Gwida tar-Ristrutturar tal-Industrija” li huwa magħmul minn tliet tipi ta’ kontenut, jiġifieri kontenut ta’ proġett imħeġġa, kontenut ta’ proġetti limitati u kontenut ta’ proġetti eliminati. Skont l-Artikolu XVII tad-Deċiżjoni, jekk “il-proġett ta’ investiment jappartjeni għall-kontenut imħeġġeġ għandu jiġi eżaminat u approvat u jiddaħħal fir-reġistri skont ir-regolamenti nazzjonali rilevanti dwar l-investiment; l-istituzzjonijiet finanzjarji kollha għandhom jipprovdu appoġġ ta’ kreditu skont il-prinċipji tal-kreditu; it-tagħmir li jużaw huma stess importat fl-ammont totali tal-investiment, bl-eċċezzjoni tal-komoditajiet fil-Kontenut tal-Komoditajiet Importati Mhux Eżentati ta’ Proġetti ta’ Investiment Domestiku (emendat fl-2000) maħruġ mill-Ministeru tal-Finanzi, jista’ jiġi eżentat mid-dazju fuq l-importazzjoni u mit-taxxa fuq il-valur miżjud fuq ir-rabiet tal-importazzjoni, sakemm ma jkunx hemm regolamenti ġodda dwar il-kontenut ta’ proġetti ta’ investiment mhux eżentat. Politiki oħra favorevoli dwar il-proġetti industrijali mħeġġa għandhom jiġu implimentati skont ir-Regolamenti nazzjonali rilevanti”.

(166)

Il-Katalogu ta’ Gwida tar-Ristrutturar tal-Industrija (Verżjoni tal-2011) (Emenda tal-2013) (49) listi taħt “Kategorija I Tħeġġiġ”

“XII.   “Materjali tal-bini:

[…]

(167)

Skont il-GTĊ, id-Deċiżjoni Nru 40 mhijiex speċifika għal xi intrapriża jew industrija, kif meħtieġ mill-Artikolu 2.1 tal-Ftehim SCM iżda għal ċerti proġetti mħeġġa. Barra minn hekk, id-Deċiżjoni Nru 40 mhijiex obbligatorja. Il-GTĊ afferma li l-Katalogu ta’ Gwida għar-Ristrutturar tal-Industrija msemmi mill-Kummissjoni huwa irrilevanti peress li l-Kummissjoni tirreferi għall-verżjoni tal-2011 ta’ dan il-katalgu, li diġà skada. Skont il-GTĊ, il-verżjoni l-ġdida ta’ dan il-katalogu ma ssemmix il-GFF.

(168)

L-ewwel nett, il-Kummissjoni tinnota li hija semmiet “Il-Katalogu ta’ Gwida għar-Ristrutturar tal-Industrija (Verżjoni tal-2011) (Emnenda tal-2013)”; għalhekk, ma rreferietx għall-verżjoni tal-2011 iżda għall-verżjoni emendata tal-2013. Sa fejn taf il-Kummissjoni, l-aħħar emenda tal-Katalogu ġiet approvata bid-Digriet tal-Kummissjoni Nazzjonali għall-Iżvilupp u r-Riforma tar-Repubblika tal-Poplu taċ-Ċina Nru 29 tas-27 ta’ Awwissu 2019 u daħlet fis-seħħ fl-1 ta’ Jannar 2020 (50). Dan il-“Katalogu ta’ Gwida għar-Ristrutturazzjoni tal-Industrija (Verżjoni tal-2019)” tabilħaqq ħa post il-“Katalogu ta’ Gwida għar-Ristrutturar tal-Industrija (Verżjoni tal-2011) (Emenda)”. Madankollu, ġie adottat u daħal fis-seħħ wara l-perjodu ta’ investigazzjoni. Għalhekk, matul il-perjodu ta’ investigazzjoni kien applikabbli “Il-Katalogu Gwida għar-Ristrutturar tal-Industrija (Verżjoni tal-2011) (Emenda tal-2013). Fi kwalunkwe każ, għall-kuntrarju tal-affermazzjoni tal-GTĊ, il-verżjoni tal-2019 tal-“Katalgu ta’ Gwida għar-Ristrutturazzjoni tal-Industrija” jirreferi għall-GFF taħt it-“Taqsima I Industriji mħeġġa” kif ġej:

“XII.   Materjali tal-bini

[…]

(169)

It-tieni, il-Kummissjoni ma taqbilx li d-Deċiżjoni Nru 40 ma għandhiex effett obbligatorju. Fil-fatt, id-Deċiżjoni Nru 40 tistabbilixxi regolamenti temporanji li jippromwovu r-ristrutturar industrijali u tirreferi għal “Il-Katalgu ta’ Gwida għar-Ristrutturar tal-Industrija”, li jiddefinixxi tliet tipi ta’ kontenut: kontenut ta’ proġetti mħeġġa, kontenut ta’ proġetti limitati u kontenut ta’ proġetti eliminati. Madankollu, l-Artikolu XVII tad-Deċiżjoni Nru 40 jistabbilixxi t-trattament ta’ proġetti ta’ investiment li jappartjenu għall-kontenut imħeġġeġ b’mod obbligatorju, eż. “l-istituzzjonijiet finanzjarji kollha għandhom jipprovdu appoġġ ta’ kreditu skont il-prinċipji ta’ kreditu”, “politiki favoriti oħrajn dwar il-proġetti industrijali mħeġġa għandhom jiġu implimentati skont ir-Regolamenti nazzjonali rilevanti”. Barra minn hekk, l-Artikolu XXI jistipula li “l-politiki preferenzjali rilevanti implimentati skont Il-kontenut ta’ Industriji, Prodotti u Teknoloġiji Attwalment Speċjalment Imħeġġeġ mill-Istat (emendat fl-2000) għandhom jiġu aġġustati biex jiġu implimentati skont il-kontenut tat-tħeġġiġ tal-Katalogu ta’ Gwida għar-Ristrutturazzjoni tal-Industrija”. Għalhekk, id-Deċiżjoni Nru 40 għandha effett obbligatorju f’dan ir-rigward. Il-Katalogu ta’ Gwida għar-Ristrutturar tal-Industrija, “il-Kategorija I Tħeġġiġ” telenka ċertu numru ta’ proġetti taħt ċertu numru ta’ industriji. Kif spjegat fil-premessa (166), jinkludi l-industrija tal-materjali tal-bini u proġetti speċifiċi relatati mal-industrija tal-GFF. Konsegwentement, id-Deċiżjoni Nru 40 flimkien mal-Katalogu ta’ Gwida għar-Ristrutturar tal-Industrija jipprevedi trattament speċifiku għal ċerti proġetti f’ċerti industriji mħeġġa. Għalhekk, għalkemm dawn id-dokumenti jirreferu għal proġetti speċifiċi, huma l-ewwel jistabbilixxu l-industriji speċifiċi li huma mħeġġa u mbagħad ċerti proġetti f’dawn l-industriji li jistgħu jibbenefikaw mit-trattament preferenzjali previst fid-Deċiżjoni Nru 40. Għalhekk, il-Kummissjoni ċaħdet l-affermazzjonijiet tal-GTĊ.

(170)

Barra minn hekk, il-GFF huwa kopert mill-Pjan ta’ Żvilupp tal-Industrija tal-Materjali 2016-2020 (51), li jipprevedi fost l-oħrajn, it-tranżizzjoni tal-industrija tal-materjal tal-kostruzzjoni minn industrija kbira għal industrija b’saħħitha. Huwa jipprevedi wkoll l-ottimizzazzjoni tal-istrutturi tas-settur tal-kostruzzjoni, it-titjib tas-sigurtà tal-provvista tal-materjali ewlenin, iż-żieda fil-livell ta’ konċentrazzjoni fl-industrija kif ukoll it-titjib tal-kompetittività internazzjonali. Il-pjan jipprevedi miri kwantitattivi għall-iżvilupp, kontroll governattiv fuq il-kapaċità ta’ produzzjoni, miri dettaljati għall-produzzjoni, distribuzzjoni ġeografika tal-industriji fost il-provinċji tar-RPĊ, sigurtà tal-forniment, żvilupp ta’ industriji speċifiċi, kontroll u influwenza tal-gvern fuq il-miżuri ta’ appoġġ tal-intrapriżi u tal-industrija (52). Dan juri l-preżenza u l-intervent qawwija tal-Istat fl-industrija tal-fibra tal-ħġieġ.

(171)

It-13-il Pjan ta’ Ħames Snin għall-Industrija tal-Fibra u tal-Materjali Kompożiti (53) huwa pjan li jimmira b’mod speċifiku lejn l-industrija tal-materjali tal-fibra. Huwa jiggwida b’mod ċar l-iżvilupp tas-settur, pereżempju t-Taqsima III.3 tistabbilixxi l-għan li:

(172)

“L-integrazzjoni u t-titjib attiv tat-truf upstream u downstream tal-katina tal-industrija sabiex jinżamm l-iżvilupp b’saħħtu u stabbli tal-industrija tal-fibra u tal-materjali kompożiti: Jiġu inċentivati l-intrapriżi ta’ produzzjoni ta’ vaski u fornijiet fuq skala kbira biex jimplimentaw b’mod kostanti l-istrateġija ta’ żvilupp “go global”, u jimplimentaw mudelli ta’ kapaċità ta’ produzzjoni globali. Fuq din il-bażi: - il-kontroll fuq ir-rata tat-tkabbir tal-volum tal-produzzjoni tal-fibra tal-ħġieġ domestika jinżamm f’livell relattivament baxx; - fl-istess ħin, jitnaqqas il-proporzjon tal-esportazzjoni tal-fibra tal-ħġieġ u l-prodotti domestiċi; - jiġu aġġustati b’mod attiv l-istrutturi tal-prodotti; […] - tiġi aġġustata b’mod attiv l-istruttura tal-prodott u l-intrapriżi jiġu ggwidati biex jimplimentaw żvilupp differenzjat, jiġi żviluppat bis-saħħa pproċessar fil-fond ta’ prodotti tal-fibra tal-ħġieġ, jitwessa’ d-daqs tas-suq ta’ prodotti tal-fibra u ta’ materjali kompożiti f’oqsma ta’ applikazzjoni ta’ livell medju sa għoli, u jittejbu l-kwalità tal-prodott u l-valur miżjud. Jiġi żgurat li r-rata ta’ tkabbir annwali tad-dħul ewlieni tan-negozju tal-industrija tal-fibra u tal-materjali kompożiti tkun ogħla mir-rata ta’ tkabbir tal-PDG nazzjonali b’madwar 5 sa 6 punti perċentwali, li jfisser, mill-2020, id-dħul totali ta’ intrapriżi akbar mid-daqs indikat se jilħaq il-500 biljun yuan, jiġifieri d-doppju meta mqabbel mas-sitwazzjoni prevalenti fi tmiem it-12-il Pjan ta’ Ħames Snin.” (54)

(173)

Barra minn hekk, it-Taqsima IV.3.4 ta’ dak il-pjan tistabbilixxi l-bażi għall-gwida governattiva tal-intrapriżi u tal-industrija kollha:

(174)

“Jiġu ggwidati diversi tipi ta’ intrapriżi biex jinvolvu ruħhom f’operazzjonijiet differenzjati billi jitqiesu l-vantaġġi individwali u s-segmenti speċifiċi tas-suq tagħhom. B’mod partikolari, huwa meħtieġ li l-intrapriżi żgħar u ta’ daqs medju jiġu ggwidati biex isegwu t-triq tat-tkabbir li tikkonsisti fl-indirizzar ta’ lakuni speċifiċi, biex l-intrapriżi ż-żgħar ikunu komplementari għal dawk kbar, fil-konsiderazzjoni tal-ispeċjalizzazzjoni bħala d-direzzjoni għas-suċċess. Bis-saħħa ta’ operazzjonijiet differenzjati, il-kompetizzjoni fuq skala kbira bejn intrapriżi kbar tiġi evitata, u l-kompetizzjoni bejn intrapriżi simili tiġi evitata, u b’hekk jiġi eliminat is-suq tal-kompetizzjoni bi prezz baxx. Fl-istess ħin, bi produzzjoni speċjalizzata, l-intrapriżi żgħar u ta’ daqs medju jistgħu wkoll jirbħu r-rispett u l-attenzjoni ta’ intrapriżi kbar, jistabbilixxu relazzjonijiet koperattivi mill-qrib ma’ intrapriżi kbar, u jappoġġjaw b’mod effettiv u jippromwovu l-iżvilupp ta’ intrapriżi kbar.”

(175)

L-assoċjazzjonijiet tal-industrija huma interkonnessi mill-qrib mal-Istat, l-aktar permezz tal-importanza tal-bini tas-CCP f’dawk l-assoċjazzjonijiet (55). Id-dispożizzjonijiet tat-Taqsima IV.3.6 tal-istess pjan jindikaw ukoll intervent mill-Istat fil-produzzjoni tal-fibra, inkluż is-settur tal-GFF:

(176)

Ir-RPĊ ippromwoviet b’mod attiv l-industriji tal-GFF fuq livelli differenti tal-gvern, eżempju ta’ inizjattiva lokali li tkopri waħda mill-kumpaniji inklużi fil-kampjun jista’ jinstab fil-Pjan ta’ Ħames Snin tal-Belt ta’ Jiujiang għat-13-il Pjan ta’ Ħames Snin għall-iżvilupp ekonomiku u soċjali:

(177)

Wara d-divulgazzjoni definittiva, il-GTĊ sostna li t-13-il Pjan ta’ Ħames Snin għall-Industrija tal-Materjali tal-Fibra u Komposti u t-13-il l-Pjan ta’ Ħames Snin tal-Belt ta’ Jiujiang, it-tnejn jikkonċernaw biss informazzjoni ġenerali dwar il-politika tal-gvern, bl-ebda konnessjoni diretta ma’ xi wieħed mill-allegati programmi ta’ sussidju inkwistjoni u għalhekk mhumiex “evidenza suffiċjenti” ta’ speċifiċità.

(178)

Il-Kummissjoni ma qablitx ma’ din l-affermazzjoni. Kif spjegat fil-premessi (171) u (172), it-13-il Pjan ta’ Ħames Snin għall-Industrija tal-Materjali tal-Fibra u Komposti jimmira speċifikament l-lejn l-industrija tal-materjal tal-fibri u jiggwida b’mod ċar l-iżvilupp tas-settur. Anki jekk dan id-dokument jista’ ma jkollux rabta diretta mal-allegati programmi ta’ sussidju kif qal il-GTĊ, dan jindika miżuri speċifiċi li jinkoraġġixxu l-industrija tal-fibra u tal-materjali komposti. Barra minn hekk, kif imsemmi fil-premessa (176), it-13-il Pjan ta’ Ħames Snin tal-Belt ta’ Jiujiang għall-iżvilupp ekonomiku u soċjali speċifikament jimmira lejn Jushi Group, li huwa wieħed mill-produtturi esportaturi li kkooperaw. Għalhekk, dawn id-dokumenti juru li l-awtoritajiet Ċiniżi jimmiraw speċifikament lejn industrija partikolari, li tinkludi l-industrija tal-GFF, u ċerti kumpaniji f’din l-industrija. Għaldaqstant, l-affermazzjonijiet tal-GTĊ ġew miċħuda.

(179)

Meta jitqies dan t’hawn fuq, l-industrija tal-GFF hija b’hekk meqjusa bħala industrija strateġika/ewlenija, li l-iżvilupp tagħha huwa segwit b’mod attiv mill-GTĊ bħala objettiv politiku.

(180)

Wara d-divulgazzjoni definittiva, il-GTĊ oġġezzjona għall-valutazzjoni tal-Kummissjoni li l-industrija tal-GFF hija industrija mħeġġa u li l-allegazzjoni tal-Kummissjoni li l-industrija GFF hija mħeġġa fiċ-Ċina ma turix li l-miżuri inkwistjoni huma speċifiċi skont it-tifsira tal-Artikolu 2 tal-Ftehim SCM.

(181)

Il-Kummissjoni ma qablitx mal-affermazzjoni tal-GTĊ. Is-sejbiet murija fil-premessi (140) sa (178) juru li l-industrija tal-GFF, bħala parti mill-“materjali tal-bini” u l-industriji tal-“materjali ġodda”, hija partikolarment fil-mira u mħeġġa permezz ta’ diversi għodod politiċi u regolatorji u elenkata f’katalgi ta’ industriji mħeġġa. Il-fatt li dawn id-dokumenti jipprevedu miżuri speċifiċi fir-rigward ta’ ċerti industriji, inkluża l-industrija tal-GFF, huwa biżżejjed biex juri li huma speċifiċi skont it-tifsira tal-Artikolu 2 tal-Ftehim SCM.

(182)

Għall-konvenjenza amministrattiva, il-Kummissjoni talbet lill-GTĊ biex jibgħat kwestjonarji speċifiċi lil żewġ banek speċifiċi tal-Istat imsemmija fl-ilment, lil Sinosure, kif ukoll kull lil kwalunkwe istituzzjoni finanzjarja oħra li pprovdiet self jew krediti għall-esportazzjoni lill-kumpaniji inklużi fil-kampjun.

(183)

Il-GTĊ tabilħaqq bagħat il-kwestjonarji speċifiċi lill-banek. 15-il fergħa bankarja kkonfermaw is-self pendenti tagħhom mal-kumpaniji inklużi fil-kampjun matul il-PI, iżda mingħajr ma taw tweġiba għall-kwestjonarju bħala tali. Il-bank intern biss ta’ wieħed mill-produtturi esportaturi (CNBM Finance) u bank tal-Istat wieħed (Export-Import Bank of China) effettivament wieġbu għall-mistoqsijiet fil-kwestjonarju. Barra minn hekk, il-Bank tal-Iżvilupp taċ-Ċina ma weġibx għall-kwestjonarju, iżda kien disponibbli għal mistoqsijiet matul iż-żjara ta’ verifika.

(184)

Skont il-GTĊ, huwa ma kellux l-awtorità li jitlob informazzjoni mingħand il-banek tal-Istat li ma weġbux għall-kwestjonarju, billi dawn joperaw indipendentement mill-GTĊ.

(185)

Il-Kummissjoni ma qablitx ma’ din l-opinjoni. L-ewwel nett, huwa l-fehim tal-Kummissjoni li l-informazzjoni mitluba minn entitajiet tal-Istat (kemm jekk dawn ikunu kumpaniji kif ukoll jekk ikunu istituzzjonijiet pubbliċi/finanzjarji) hija disponibbli għall-GTĊ għall-entitajiet kollha fejn il-GTĊ huwa l-azzjonist ewlieni jew kbir. Tabilħaqq, skont il-Liġi tar-Repubblika tal-Poplu taċ-Ċina dwar l-Assi ta’ Intrapriżi tal-Istat (57), l-aġenziji tas-superviżjoni u tal-amministrazzjoni tal-assi tal-Istat stabbiliti mill-Kummissjoni għas-Superviżjoni u l-Amministrazzjoni tal-Assi tal-Istat tal-Kunsill tal-Istat u l-gvernijiet tal-poplu lokali jwettqu d-dmirijiet u r-responsabbiltajiet tal-kontributur tal-kapital ta’ intrapriża b’investiment mill-Istat f’isem il-gvern. Dawn l-aġenziji huma għalhekk intitolati li jirċievu redditi fuq l-assi, jieħdu sehem fit-teħid ta’ deċiżjonijiet maġġuri u jagħżlu persunal maniġerjali ta’ intrapriżi b’investiment mill-Istat. Barra minn hekk, skont l-Artikolu 17 tal-Liġi msemmija aktar ’il fuq dwar l-Assi tal-Istat, l-intrapriżi b’investiment mill-Istat għandhom jaċċettaw l-amministrazzjoni u s-superviżjoni mill-gvernijiet u d-dipartimenti u l-aġenziji governattivi rilevanti, jaċċettaw is-superviżjoni pubblika, u jkunu responsabbli lill-kontributuri kapitali.

(186)

Barra minn hekk, il-GTĊ għandu wkoll l-awtorità meħtieġa biex jinteraġixxi mal-istituzzjonijiet finanzjarji anki meta ma jkunux tal-Istat, minħabba li kollha jaqgħu taħt il-ġurisdizzjoni tal-awtorità regolatorja bankarja Ċiniża. Pereżempju, skont l-Artikoli 33 u 36 tal-Liġi dwar is-Superviżjoni Bankarja u tal-Assigurazzjoni (58), il-Kummissjoni Regolatorja Bankarja taċ-Ċina (“CBRC”) għandha l-awtorità li tirrikjedi li l-istituzzjonijiet finanzjarji kollha stabbiliti fir-RPĊ jippreżentaw informazzjoni, bħal rapporti finanzjarji, rapporti statistiċi u informazzjoni dwar l-operazzjonijiet tan-negozju u l-ġestjoni. Is-CBIRC tista’ wkoll tagħti struzzjonijiet lill-istituzzjonijiet finanzjarji biex jiddivulgaw informazzjoni lill-pubbliku.

(187)

Barra minn hekk, għalkemm l-uniku bank tal-Istat li kkoopera pprovda xi spjegazzjonijiet ġenerali dwar il-funzjonament tas-sistemi ta’ approvazzjoni u ta’ ġestjoni tar-riskju tas-self tiegħu, huwa ma pprovdiex informazzjoni speċifika dwar is-self ipprovdut lill-kumpaniji fil-kampjun. Huwa sostna li kien marbuta b’rekwiżiti statutorji u regolatorji u bi klawżoli kuntrattwali fir-rigward tal-kunfidenzjalità tal-informazzjoni relatata mal-kumpaniji fil-kampjun.

(188)

Għalhekk, il-Kummissjoni talbet lill-gruppi ta’ produtturi esportaturi inklużi fil-kampjun sabiex jagħtu aċċess għall-informazzjoni speċifika għall-kumpaniji miżmuma mill-banek kollha, kemm dawk tal-Istat kif ukoll dawk privati, li mingħandhom irċevew self. Għalkemm il-kumpaniji inklużi fil-kampjun taw il-kunsens tagħhom biex jipprovdu aċċess għad-data tal-bank li tappartjeni għalihom, il-banek li kkooperaw irrifjutaw li jipprovdu l-informazzjoni dettaljata meħtieġa.

(189)

Il-Kummissjoni finalment irċeviet biss informazzjoni dwar l-istruttura korporattiva u s-sjieda mill-bank tal-Istat li kkoopera iżda mill-ebda waħda mill-istituzzjonijiet finanzjarji l-oħra li kienu pprovdew self lill-kumpaniji inklużi fil-kampjun. Barra minn hekk, ebda waħda mill-istituzzjonijiet finanzjarji ma pprovdiet xi informazzjoni speċifika għall-valutazzjoni tar-riskju tas-self mogħti lill-gruppi ta’ produtturi esportaturi inklużi fil-kampjun.

(190)

Billi ma kellha l-ebda informazzjoni fir-rigward tal-biċċa l-kbira tal-banek tal-Istat li pprovdew self lill-kumpaniji inklużi fil-kampjun, u l-ebda informazzjoni speċifika għall-kumpaniji dwar is-self ipprovdut mill-banek li kkooperaw, il-Kummissjoni kkunsidrat li ma kinitx irċeviet informazzjoni kruċjali rilevanti għal dan l-aspett tal-investigazzjoni.

(191)

Għalhekk, il-Kummissjoni infurmat lill-GTĊ li jista’ jkollha tirrikorri għall-użu tal-fatti disponibbli skont l-Artikolu 28(1) tar-Regolament bażiku meta teżamina l-eżistenza u l-firxa tal-allegat sussidjar mogħti permezz ta’ self preferenzjali.

(192)

Fit-tweġiba għall-ittra tal-Kummissjoni, il-GTĊ oġġezzjona għall-applikazzjoni tal-Artikolu 28(1) tar-Regolament bażiku. B’mod ġenerali, argumenta li l-ewwel nies l-informazzjoni speċifika mitluba ma kinitx meħtieġa minħabba li l-proċediment kien ibbażat fuq ilment li naqas milli jipprovdi rekwiżiti ta’ evidenza suffiċjenti tal-Ftehim SCM u tar-Regolament bażiku. Il-Kummissjoni qieset li s-suffiċjenza tal-evidenza tal-ilment diġà ġiet indirizzata fit-Taqsima 1.1.1 ta’ hawn fuq u għalhekk żammet il-konklużjoni tagħha li kien hemm biżżejjed evidenza pprovduta fl-ilment li x’aktarx turi l-eżistenza tal-allegat sussidjar mill-GTĊ.

(193)

Il-GTĊ oġġezzjona b’mod aktar speċifiku għall-applikazzjoni tal-Artikolu 28(1) tar-Regolament bażiku rigward is-self preferenzjali. Il-GTĊ tenna li ma kellu ebda awtorità fuq il-banek. Il-GTĊ qies ukoll li huwa kien ikkoopera bl-aħjar kapaċitajiet tiegħu, li l-Kummissjoni kienet imponiet piż żejjed mhux raġonevoli fuqu, u li l-informazzjoni nieqsa ma kinitx “meħtieġa” fis-sens tal-Artikolu 28 tar-Regolament bażiku, peress li kienet diġà disponibbli permezz tat-tweġibiet għall-kwestjonarji. Il-GTĊ tenna dawn l-affermazzjonijiet wara d-divulgazzjoni definittiva.

(194)

Il-Kummissjoni żammet il-pożizzjoni tagħha li l-GTĊ għandu l-awtorità li jitlob informazzjoni mill-banek għar-raġunijiet spjegati fil-premessi (185) sa (186) ta’ hawn fuq. Hija rrikonoxxiet li l-GTĊ għadda l-kwestjonarji rilevanti lill-banek, u li rċeviet tweġiba sodisfaċenti minn wieħed mill-banek tal-Istat. Il-Kummissjoni użat l-informazzjoni pprovduta b’dan il-mod, u kkomplementatha b’fatti disponibbli biss għal dawk il-partijiet li kienu nieqsa.

(195)

Din l-informazzjoni nieqsa prinċipalment tikkonċerna żewġ aspetti. L-ewwel, informazzjoni dwar l-istruttura tas-sjieda u tal-governanza tal-banek li ma kkooperawx, li kienet meħtieġa biex il-Kummissjoni tiddetermina jekk dawn il-banek humiex korpi pubbliċi jew le. It-tieni, informazzjoni speċifika dwar il-kumpanija mill-bank li kkoopera, bħal pereżempju l-proċess ta’ approvazzjoni ta’ self intern tal-bank u l-valutazzjoni tal-affidabbiltà kreditizja tal-bank għas-self ipprovdut lill-kumpaniji inklużi fil-kampjun li kienet meħtieġa fis-sens tal-Artikolu 28 tar-Regolament Bażiku sabiex jiġi stabbilit jekk ġiex ipprovdut self b’rati preferenzjali lill-kumpaniji inklużi fil-kampjun. Barra minn hekk, dawn id-dokumenti interni jistgħu jiġu pprovduti biss mill-banek, u għalhekk ma setgħux jiġu pprovduti permezz tat-tweġibiet għall-kwestjonarju tal-kumpaniji inklużi fil-kampjun.

(196)

Il-GTĊ sostna wkoll li l-informazzjoni speċifika għall-kumpaniji ma setgħetx tiġi pprovduta għal raġunijiet regolatorji. Anki jekk il-Kummissjoni kellha kunsens ġenerali bil-miktub mill-kumpaniji inklużi fil-kampjun fejn irrinunzjaw għad-drittijiet ta’ kunfidenzjalità tagħhom, il-GTĊ sostna li l-banek jew l-istituzzjonijiet finanzjarji rilevanti jkunu meħtieġa jitolbu lill-partijiet għall-permess espliċitu tagħhom fir-rigward ta’ kull tranżazzjoni ta’ self partikolari u li dawn il-permessi jkollhom jiġu vverifikati mill-istituzzjonijiet finanzjarji rilevanti.

(197)

Madankollu, il-Kummissjoni nnotat li intalab kunsens b’mod separat minn kull kumpanija għat-tranżazzjonijiet ta’ self ta’ kull bank speċifiku. Il-Kummissjoni qieset li kunsens speċifiku bħal dan jenħtieġ li jkun biżżejjed bħala tali biex jingħata aċċess għar-rekords relatati mal-kumpaniji inklużi fil-kampjun. Barra minn hekk, xi banek effettivament ipprovdew deskrizzjoni ġenerali tas-self pendenti tagħhom mal-kumpaniji, u b’hekk urew li ma kinux ristretti fil-provvista ta’ informazzjoni bħala tali dwar tranżazzjonijiet speċifiċi. Madankollu, l-ebda wieħed minn dawn il-banek ma pprovda xi informazzjoni relatata mal-valutazzjoni interna tagħhom stess tat-tranżazzjonijiet li kienu ġew iddivulgati.

(198)

Fl-aħħar nett, il-Kummissjoni ma kkunsidratx li kienet imponiet piż mhux raġonevoli fuq il-GTĊ. Mill-bidu, il-Kummissjoni llimitat l-investigazzjoni tagħha għal dawk l-istituzzjonijiet finanzjarji li kienu pprovdew self lill-kumpaniji inklużi fil-kampjun. Il-Kummissjoni lanqas ma għabbiet lill-GTĊ bl-identifikazzjoni ta’ dawn l-istituzzjonijiet finanzjarji, billi l-lista bl-ismijiet u l-indirizzi tal-banek, kif ukoll it-talba biex jibagħtu l-kwestjonarji, ġiet ipprovduta lill-GTĊ fil-bidu nett tal-investigazzjoni, f’Ġunju 2019. Dan ipprovda biżżejjed żmien biex il-GTĊ jikkonforma mat-talba tal-Kummissjoni. Għalhekk, il-Kummissjoni kkunsidrat li kienet għamlet l-almu tagħha biex tiffaċilita l-kompiti mitluba mill-GTĊ.

(199)

Fin-nuqqas ta’ informazzjoni kuntrarja rċevuta mill-GTĊ, il-Kummissjoni b’mod provviżorju kellha toqgħod parzjalment fuq il-fatti disponibbli meta teżamina l-eżistenza u l-firxa tal-allegat sussidjar mogħti permezz ta’ self preferenzjali.

(200)

Sinosure wieġbet parzjalment għall-kwestjonarju speċifiku rigward l-assigurazzjoni ta’ kreditu għall-esportazzjoni pprovduta lill-kumpaniji inklużi fil-kampjun. B’mod partikolari, Sinosure lanqas ma tat informazzjoni speċifika dwar l-assigurazzjoni ta’ kreditu għall-esportazzjoni pprovduta lill-industrija tal-GFF, il-livell tal-primjums tagħha jew ċifri dettaljati relatati mal-profittabbiltà tan-negozju tagħha tal-assigurazzjoni ta’ kreditu għall-esportazzjoni.

(201)

Barra minn hekk, Sinosure naqset milli tipprovdi d-dokumentazzjoni ta’ sostenn mitluba dwar il-governanza korporattiva tagħha, bħall-Istatut ta’ Assoċjazzjoni tagħha, billi sostniet li din kienet informazzjoni kunfidenzjali.

(202)

Fin-nuqqas ta’ din l-informazzjoni, il-Kummissjoni kkunsidrat li ma kinitx irċeviet informazzjoni kruċjali rilevanti għal dan l-aspett tal-investigazzjoni.

(203)

Huwa l-fehim tal-Kummissjoni li l-informazzjoni mitluba minn entitajiet tal-Istat (kemm kumpaniji kif ukoll istituzzjonijiet pubbliċi/finanzjarji) hija disponibbli għall-GTĊ għall-entitajiet kollha fejn il-GTĊ huwa l-azzjonist ewlieni jew kbir. Dan huwa wkoll il-każ għal Sinosure, li hija entità kompletament tal-Istat. Għalhekk, il-Kummissjoni infurmat lill-GTĊ li jista’ jkollha tirrikorri għall-użu ta’ fatti disponibbli skont l-Artikolu 28(1) tar-Regolament bażiku meta teżamina l-eżistenza u l-firxa tal-allegat sussidjar mogħti permezz tal-assigurazzjoni ta’ kreditu għall-esportazzjoni.

(204)

Fit-tweġiba għall-ittra tal-Kummissjoni, il-GTĊ oġġezzjona għall-applikazzjoni tal-Artikolu 28(1) tar-Regolament bażiku fir-rigward tal-assigurazzjoni ta’ kreditu għall-esportazzjoni, billi ġibed l-attenzjoni għall-fatt li Sinosure kienet ipprovdiet tweġiba għall-kwestjonarju, u kienet wieġbet għall-mistoqsijiet tal-Kummissjoni waqt il-verifika fuq il-post.

(205)

Sinosure tabilħaqq ipprovdiet tweġiba għall-kwestjonarju u rappreżentanti minn Sinosure kienu preżenti fil-verifika fl-uffiċċji tal-GTĊ. Madankollu, kif imsemmi fil-premessi (200) u (201) ta’ hawn fuq, l-informazzjoni pprovduta ma kinitx kompluta. Pereżempju, Sinsoure pprovdiet ċifri globali dwar il-profittabbiltà tagħha, iżda mhux dwar il-profittabbiltà tan-negozju tagħha tal-assigurazzjoni ta’ kreditu għall-esportazzjoni għal żmien qasir bħala tali. Għalhekk, l-informazzjoni pprovduta ma ppermettietx lill-Kummissjoni tasal għal konklużjonijiet dwar partijiet kruċjali tal-investigazzjoni fir-rigward tal-assigurazzjoni ta’ kreditu għall-esportazzjoni, jiġifieri jekk Sinosure hijiex korp pubbliku u jekk il-primjums imposti fuq il-kumpaniji inklużi fil-kampjun kinux konformi mas-suq.

(206)

Il-Kummissjoni għalhekk ikkonkludiet li kellha toqgħod parzjalment fuq il-fatti disponibbli għas-sejbiet tagħha fir-rigward tal-assigurazzjoni ta’ kreditu għall-esportazzjoni.

(207)

Skont il-kwestjonarju dwar is-sussidji mibgħut lill-produtturi esportaturi, il-kumpaniji azzjonarja huma meħtieġa jipprovdu tweġiba għat-Taqsimiet A u E tal-kwestjonarju. Madankollu, China National Building Materials Co. Ltd. (“CNBM”), is-sid aħħari tal-produtturi esportaturi Jushi, Hengshi. u Taishan, naqset milli tagħti din it-tweġiba.

(208)

CNBM qieset li ma kinitx involuta fin-negozju tal-materjali tal-fibra tal-ħġieġ, u li ma kellha ebda tranżazzjoni diretta mal-produtturi esportaturi. Madankollu, il-Kummissjoni sabet li kien hemm żidiet sinifikanti fil-kapital iffinanzjati minn CNBM b’rabta ma’ wieħed mill-produtturi esportaturi. Barra minn hekk, il-Kummissjoni sabet evidenza li l-għotjiet ipprovduti lil xi entitajiet fil-grupp għaddew minn kontijiet bankarji ta’ CNBM, u li xi għotjiet ġew allokati bejn diversi entitajiet fil-grupp permezz tal-kontijiet tar-riżervi kapitali.

(209)

Il-Kummissjoni tqis li fin-nuqqas ta’ tweġiba għall-kwestjonarju mill-kumpanija omm CNBM, huwa impossibbli li tiġi ddeterminata l-firxa sħiħa tas-sussidji rċevuti minn CNBM Group. Taħt dawn iċ-ċirkostanzi, il-Kummissjoni kienet tal-fehma li hija ma rċeviet ebda informazzjoni kruċjali rilevanti għal dan l-aspett tal-investigazzjoni.

(210)

Għalhekk, il-Kummissjoni infurmat lis-CNBM Group li jista’ jkollha tirrikorri għall-użu ta’ fatti disponibbli skont l-Artikolu 28(1) tar-Regolament bażiku meta teżamina l-eżistenza u l-firxa tal-allegat sussidjar mogħti lil CNBM, il-kumpanija omm tas-CNBM Group.

(211)

Fit-tweġiba għall-ittra tal-Kummissjoni, Jushi oġġezzjonat għall-applikazzjoni tal-Artikolu 28(1) tar-Regolament bażiku rigward CNBM. Jushi tenniet li CNBM għandha r-rwol ta’ investitur fl-ekwità, aktar milli r-rwol ta’ kontrollur attwali ta’ China Jushi, li ma kinitx involuta fin-negozju tal-materjali tal-fibra tal-ħġieġ, u li ma kellha l-ebda tranżazzjoni diretta mal-produtturi esportaturi. Barra minn hekk, għalkemm CNBM hija l-akbar azzjonista ta’ China Jushi, il-parteċipazzjoni azzjonarja tagħha tammonta biss għal 26,97 %.

(212)

Rigward iż-żidiet fil-kapital, Jushi ddikjarat li l-proporzjon ta’ parteċipazzjoni azzjonarja ta’ CNBM f’China Jushi naqas minn 60,25 % fl-1998 għal 26,97 % fl-aħħar tal-PI. F’dawn l-aħħar tliet snin, il-kapital irreġistrat ta’ China Jushi żdied biss permezz tar-riżervi kapitali tagħha stess, u għalhekk il-parteċipazzjoni azzjonarja ta’ CNBM baqgħet stabbli b’26,97 %.

(213)

L-ewwel il-Kummissjoni qieset taħt il-kundizzjonijiet kollha li l-kumpaniji azzjonarji jenħtieġ li jipprovdu tweġiba għall-kwestjonarju sabiex taċċerta jekk ingħatax xi sussidju fil-livell tal-kumpanija omm li tista’ tkun relatata mal-produttur esportatur. Mingħajr tweġiba għall-kwestjonarju, huwa impossibbli li tiġi ddeterminata l-firxa sħiħa tas-sussidji relatati mal-produtturi esportaturi.

(214)

It-tieni, għall-affermazzjonijiet relatati mal-kontroll reali ta’ CNBM fuq Jushi, il-Kummissjoni tirreferi għar-raġunament żviluppat fil-premessi (93) sa (96) ta’ hawn fuq li jikkonċernaw ir-relazzjoni bejn Jushi u Taishan. Fuq din il-bażi, dawn l-affermazzjonijiet ġew irrifjutati.

(215)

It-tielet, f’termini ta’ żidiet fil-kapital, għalkemm huwa veru li l-parteċipazzjoni azzjonarja ta’ CNBM naqset f’termini relattivi matul iż-żmien, din effettivament żdiedet f’termini assoluti matul il-perjodu bejn l-2010 u l-2018.

(216)

Fl-aħħar nett, l-elementi msemmija fil-premessa (208) ta’ hawn fuq mhumiex marbuta biss ma’ Jushi u Hengshi, iżda ma’ Taishan ukoll. B’riżultat ta’ dan, anki jekk il-Kummissjoni taċċetta l-kummenti ta’ Jushi, dan ma jibdilx is-sejbiet tal-Kummissjoni għal CNBM Group bħala tali.

(217)

Il-Kummissjoni għalhekk ikkonkludiet li kellha toqgħod parzjalment fuq il-fatti disponibbli għas-sejbiet tagħha fir-rigward ta’ CNBM, il-kumpanija omm ta’ CNBM Group.

(218)

Yunnan Yuntianhua Group Co., Ltd. naqas milli jipprovdi informazzjoni sħiħa fil-ħin dwar il-fondi rċevuti permezz ta’ strumenti oħra ta’ ekwità minn ċerti azzjonisti tal-kumpanija.

(219)

Minkejja talbiet ripetuti mill-Kummissjoni, matul u wara l-verifika fuq il-post, il-kumpanija naqset li tipprovdi l-informazzjoni mitluba. Għalhekk, il-Kummissjoni nnotifikat lill-kumpanija inkwistjoni li kienet se tikkunsidra li tibbaża s-sejbiet tagħha parzjalment fuq il-fatti disponibbli skont l-Artikolu 28(1) tar-Regolament bażiku (jiġifieri sa fejn kienet ikkonċernata l-informazzjoni relatata ma’ strumenti ta’ ekwità oħra). Fit-tweġiba lill-Kummissjoni, il-kumpanija indikat li minħabba l-għeluq uffiċjali fiċ-Ċina matul l-aħħar ġimgħa ta’ Jannar u l-ewwel ġimgħa ta’ Frar, ma kinitx f’pożizzjoni li twieġeb għat-talba għall-informazzjoni tal-Kummissjoni sal-iskadenza stabbilita.

(220)

Fin-nuqqas ta’ xi evidenza addizzjonali li tikkonċerna l-fondi riċevuti permezz ta’ strumenti ta’ ekwità oħra msemmija fil-premessa (218) f’dan l-istadju, il-Kummissjoni kompliet toqgħod parzjalment fuq il-fatti disponibbli għas-sejbiet tagħha dwar dawn il-fondi rċevuti permezz ta’ strumenti ta’ ekwità oħrajn minn ċerti azzjonisti tal-kumpanija kif dettaljat fit-Taqsima 3.4.3.4 hawn taħt.

(221)

Abbażi tal-informazzjoni inkluża fl-ilment, fin-Notifika ta’ Bidu u fit-tweġibiet għall-kwestjonarji tal-Kummissjoni, ġie investigat l-allegat sussidjar permezz tas-sussidji li ġejjin mill-GTĊ:

(222)

Skont l-informazzjoni pprovduta miż-żewġ gruppi ta’ produtturi esportaturi inklużi fil-kampjun, 36 istituzzjoni finanzjarja li jinsabu fir-RPĊ kienu pprovdewlhom finanzjament. Minn dawk is-36 istituzzjoni finanzjarja, 29 kienu banek tal-Istat (59). L-istituzzjonijiet finanzjarji l-oħra kienu jew proprjetà privata (erba’ istituzzjonijiet), jew il-Kummissjoni ma kinitx kapaċi tiddetermina jekk kinux proprjetà tal-Istat jew proprjetà privata (tliet istituzzjonijiet). Madankollu, bank tal-Istat wieħed biss mela l-kwestjonarju speċifiku, minkejja talba lill-GTĊ li kopriet l-istituzzjonijiet finanzjarji kollha li kienu pprovdew self lill-kumpaniji inklużi fil-kampjun.

(223)

EXIM jipprovdi self kontinġenti fuq l-esportazzjoni b’rati preferenzjali lill-kumpaniji Ċiniżi li jipproduċu prodotti ġodda u tat-teknoloġija avvanzata, prodotti bi drittijiet intellettwali indiġeni, ditti li huma proprjetà tagħhom infushom, prodotti b’valur miżjud għoli u prodotti tas-softwer li huma reġistrati mal-awtoritajiet għall-industrija u għall-kummerċ (60). Skont l-informazzjoni disponibbli għall-Kummissjoni, il-produtturi Ċiniżi tal-GFF jikkwalifikaw għal self orjentat lejn l-esportazzjoni bħala prodotti ġodda u ta’ teknoloġija avvanzata u/jew bħala ditti li huma proprjetà tagħhom infushom, minħabba li bosta produtturi huma rikonoxxuti bħala “Intrapriżi ta’ Teknoloġija Avvanzata Nazzjonali” jew ingħataw status ta’ ditta famuża, ditta mill-aqwa, eċċ.

(224)

Barra minn hekk, EXIM jassisti wkoll lill-esportaturi permezz ta’ krediti tax-xerrejja tal-esportazzjoni. Il-krediti tax-xerrejja għall-esportazzjoni huma pprovduti lil kumpaniji barranin biex jiffinanzjaw l-importazzjoni tagħhom ta’ prodotti, teknoloġiji u servizzi Ċiniżi (61).

(225)

Il-Kummissjoni vverifikat jekk il-banek tal-Istat kinux qegħdin jaġixxu bħala korpi pubbliċi fis-sens tal-Artikoli 3 u 2(b) tar-Regolament bażiku. F’dan ir-rigward, it-test applikabbli sabiex jiġi stabbilit jekk impriża tal-Istat hijiex korp pubbliku huwa kif ġej (62): “Li jgħodd huwa jekk entità għandhiex l-awtorità li teżerċita funzjonijiet governattivi, aktar milli kif tinkiseb tali awtorità. Hemm modi differenti ta’ kif il-gvern fis-sens ristrett jista’ jipprovdi lill-entitajiet b’awtorità. Għaldaqstant, hemm tipi differenti ta’ evidenza li jistgħu jkunu rilevanti biex jintwera li tali awtorità ngħatat lil entità partikolari. Evidenza li entità, fil-fatt, qiegħda teżerċita funzjonijiet governattivi tista’ sservi bħala evidenza li hija għandha jew ingħatat awtorità governattiva, b’mod partikolari fejn tali evidenza tipponta lejn prattika sostnuta u sistematika. Jirriżulta, fil-fehma tagħna, li l-evidenza li gvern jeżerċita kontroll sinifikanti fuq entità u l-imġiba tagħha tista’ sservi, f’ċerti ċirkostanzi, bħala evidenza li l-entità rilevanti għandha awtorità governattiva u teżerċita tali awtorità fit-twettiq ta’ funzjonijiet governattivi. Madankollu, aħna nenfasizzaw li, apparti minn delega espliċita ta’ awtorità fi strument legali, l-eżistenza ta’ sempliċi rabtiet formali bejn entità u gvern fis-sens dejjaq tal-kelma x’aktarx ma tkunx biżżejjed biex jiġi stabbilit il-pussess neċessarju ta’ awtorità governattiva. Għalhekk, pereżempju, is-sempliċi fatt li gvern huwa l-azzjonista maġġoritarju ta’ entità ma jurix li l-gvern jeżerċita kontroll sinifikanti fuq l-imġiba ta’ dik l-entità, u ferm inqas li l-gvern taha awtorità governattiva. F’xi okkażjonijiet, madankollu, fejn l-evidenza tkun turi li jkun hemm bosta indizji formali ta’ kontroll tal-gvern u jkun hemm ukoll evidenza li dan il-kontroll ikun ġie eżerċitat b’mod sinifikanti, evidenza bħal din tista’ tippermetti l-inferenza li l-entità kkonċernata tkun qiegħda teżerċita awtorità governattiva.”

(226)

Il-Kummissjoni fittxet informazzjoni dwar is-sjieda tal-Istat, kif ukoll indizji formali ta’ kontroll tal-gvern fil-banek tal-Istat. Hija analizzat ukoll jekk il-kontroll kienx ġie eżerċitat b’mod sinifikanti. Għal dan il-għan, il-Kummissjoni kellha parzjalment tiddependi fuq il-fatti disponibbli minħabba r-rifjut tal-GTĊ u tal-banek tal-Istat li jipprovdu evidenza dwar il-proċess ta’ teħid ta’ deċiżjonijiet li kien wassal għas-self preferenzjali.

(227)

Sabiex setgħet twettaq din l-analiżi, il-Kummissjoni l-ewwel eżaminat l-informazzjoni mill-banek tal-Istat li mlew il-kwestjonarju speċifiku u ppermettew li ssir verifika.

(228)

Bank tal-Istat wieħed biss, li huwa EXIM, ipprova tweġiba għall-kwestjonarju, li ġiet ivverifikata fuq il-post.

(229)

Abbażi tal-informazzjoni li rċeviet fit-tweġiba għall-kwestjonarju u matul iż-żjara ta’ verifika, il-Kummissjoni stabbiliet li l-GTĊ kellu, direttament jew indirettament, aktar minn 50 % tal-ishma fl-istituzzjoni finanzjarja.

(230)

F’dak li għandu x’jaqsam mal-indizji formali tal-kontroll mill-gvern tal-banek tal-Istat li kkooperaw, il-Kummissjoni kkwalifikathom kollha bħala “istituzzjoni finanzjarja ewlenija tal-Istat”. B’mod partikolari, l-avviż “Regolamenti Interim dwar il-Bord tas-Superviżuri f’Istituzzjonijiet Finanzjarji tal-Istat Ewlenin” jgħid li: “L-istituzzjonijiet finanzjarji tal-Istat ewlenin imsemmija f’dawn ir-Regolamenti jirreferu għal banek pubbliċi tal-Istat, banek kummerċjali, kumpaniji tal-ġestjoni tal-assi finanzjarji, kumpaniji tat-titoli, kumpaniji tal-assigurazzjoni, eċċ. (li minn hawn ’il quddiem issir referenza għalihom bħala istituzzjonijiet finanzjarji tal-Istat), li lilhom il-Kunsill tal-Istat jibgħat bordijiet ta’ superviżuri”.

(231)

Il-Bord tas-Superviżuri tal-istituzzjonijiet finanzjarji tal-Istat ewlenin huwa maħtur skont ir-“Regolamenti Interim tal-Bord tas-Superviżuri tal-Istituzzjonijiet Finanzjarji tal-Istat Ewlenin” (Digriet tal-Istat Nru 282). Abbażi tal-Artikoli 3 u 5 ta’ dawn ir-Regolamenti Interim, il-Kummissjoni stabbiliet li l-Membri tal-Bord tas-Superviżuri huma maħtura mill-Kunsill tal-Istat u responsabbli lejh, u dan juri l-kontroll istituzzjonali tal-Istat fuq l-attivitajiet kummerċjali tal-banek tal-Istat li kkooperaw. Minbarra dawn l-indizji ġeneralment applikabbli, il-Kummissjoni sabet dan li ġej fir-rigward tal-EXIM:

(232)

EXIM ġie ffurmat u jopera skont “L-Avviż tat-Twaqqif tal-Export-Import Bank of China” maħruġ mill-Kunsill tal-Istat, kif ukoll skont l-Istatut ta’ Assoċjazzjoni ta’ EXIM. Skont l-Istatut ta’ Assoċjazzjoni tiegħu, l-Istat jinnomina direttament il-maniġment ta’ EXIM. Il-Bord tas-Superviżuri huwa maħtur mill-Kunsill tal-Istat skont ir-“Regolamenti Interim dwar il-Bordijiet tas-Superviżuri f’Istituzzjonijiet Finanzjarji tal-Istat Ewlenin” u liġijiet u regolamenti oħrajn, u huwa responsabbli lejn il-Kunsill tal-Istat.

(233)

L-Istatut ta’ Assoċjazzjoni jsemmi wkoll li l-Kumitat tal-Partit ta’ EXIM għandu rwol ewlieni u politiku biex jiżgura li l-politiki u l-iskjerament maġġuri tal-Partit u l-Istat jiġu implimentati minn EXIM. It-tmexxija tal-Partit hija integrata fl-aspetti kollha tal-governanza korporattiva.

(234)

L-Istatut ta’ Assoċjazzjoni jiddikjara wkoll li EXIM huwa ddedikat biex jappoġġja l-iżvilupp tal-kooperazzjoni kummerċjali u ekonomika barranija, l-investiment transfruntier, l-Inizjattiva “One Belt One Road”, il-kooperazzjoni fil-kapaċità internazzjonali u l-manifattura tat-tagħmir. L-ambitu tan-negozju tiegħu jinkludi self fuq medda ta’ żmien qasir, medju u fit-tul kif approvat u skont il-politiki tal-kummerċ barrani u ta’ investiment fi swieq barranin (“going out”) tal-Istat, bħal kreditu għall-esportazzjoni, kreditu għall-importazzjoni, self barrani ta’ inġinerija b’kuntratt barrani, self ta’ investiment barrani, self tal-gvern Ċiniż għall-għajnuna barranija u self lix-xerrejja tal-esportazzjoni.

(235)

Il-Kummissjoni sabet ukoll li l-istituzzjonijiet finanzjarji tal-Istat, bidlu l-Istatut ta’ Assoċjazzjoni tagħhom fl-2017 biex iżidu r-rwol tal-Partit Komunista taċ-Ċina (China Communist Party, CCP) fl-ogħla livell ta’ teħid ta’ deċiżjonijiet tal-banek.

(236)

Dan l-Istatut ta’ Assoċjazzjoni l-ġdid jistipula li:

(237)

Din l-evidenza turi li l-Gvern eżerċita kontroll sinifikanti fuq l-imġiba ta’ din l-istituzzjoni

(238)

Il-Kummissjoni kompliet tfittex informazzjoni dwar jekk il-GTĊ eżerċitax kontroll sinifikanti fuq l-imġiba tal-banek tal-Istat li kkooperaw fir-rigward tal-politiki tas-self u l-valutazzjoni tar-riskju tagħhom, fejn huma pprovdew self lill-industrija tal-GFF. F’dan ir-rigward, tqiesu d-dokumenti regolatorji li ġejjin:

(239)

Waqt li kienet qiegħda tirrevedi dawn id-dokumenti regolatorji, il-Kummissjoni sabet li l-istituzzjonijiet finanzjarji fir-RPĊ qegħdin joperaw f’ambjent legali ġenerali li jidderiġihom sabiex jallinjaw ruħhom mal-objettivi tal-politika industrijali tal-GTĊ meta jieħdu deċiżjonijiet finanzjarji, għar-raġunijiet li ġejjin.

(240)

Fir-rigward ta’ EXIM, il-mandat ta’ politika pubblika tiegħu huwa stabbilit fin-notifikazzjoni li jiġi stabbilit EXIM kif ukoll fl-Istatut ta’ Assoċjazzjoni tiegħu.

(241)

Fil-livell ġenerali, l-Artikolu 34 tal-Liġi Bankarja, li tapplika għall-istituzzjonijiet finanzjarji kollha li joperaw fiċ-Ċina, jistabbilixxi li l-“Banek kummerċjali għandhom iwettqu n-negozju ta’ self tagħhom skont il-ħtiġijiet tal-iżvilupp ekonomiku u soċjali nazzjonali u taħt il-gwida tal-politiki industrijali tal-Istat”. Għalkemm l-Artikolu 4 tal-Liġi Bankarja jiddikjara li “Banek kummerċjali għandhom, skont il-liġi, iwettqu operazzjonijiet tan-negozju mingħajr interferenza minn kwalunkwe unità jew individwu. Il-banek kummerċjali għandhom b’mod indipendenti jassumu responsabbiltà ċivili bil-proprjetà tagħhom kollha bħala persuna ġuridika”, l-investigazzjoni wriet li l-Artikolu 4 tal-Liġi Bankarja huwa applikat soġġett għall-Artikolu 34 tal-Liġi Bankarja, jiġifieri fejn l-Istat jistabbilixxi politika pubblika, il-banek jimplimentawha u jsegwu l-istruzzjonijiet tal-Istat.

(242)

Barra minn hekk, l-Artikolu 15 tar-Regoli Ġenerali dwar is-Self jipprevedi li: “F’konformità mal-politika tal-Istat, id-dipartimenti rilevanti jistgħu jissussidjaw l-imgħaxijiet fuq is-self, bil-ħsieb li ssir promozzjoni tat-tkabbir ta’ ċerti industriji u l-iżvilupp ekonomiku f’xi oqsma.”

(243)

B’mod simili, id-Deċiżjoni Nru 40 tagħti struzzjonijiet lill-istituzzjonijiet finanzjarji kollha biex jipprovdu appoġġ ta’ kreditu b’mod speċifiku għall-proġetti “imħeġġa”. Kif diġà ġie spjegat fit-Taqsima 3.1 u aktar speċifikament fil-premessa (166), il-proġetti tal-industrija tal-GFF jappartjenu għall-kategorija “imħeġġa”. Id-Deċiżjoni Nru 40 għalhekk tikkonferma sejbiet preċedenti fir-rigward tal-Liġi Bankarja li l-banek jeżerċitaw awtorità governattiva fil-forma ta’ operazzjonijiet ta’ kreditu preferenzjali. Il-Kummissjoni sabet ukoll li CBRC għandha awtorità ta’ approvazzjoni wiesgħa fuq l-aspetti kollha tal-immaniġġjar tal-istituzzjonijiet finanzjarji kollha stabbiliti fir-RPĊ (inklużi istituzzjonijiet finanzjarji bi sjieda privata u dawk bi sjieda barranija), bħal (63):

(244)

Il-Liġi Bankarja hija legalment vinkolanti. In-natura obbligatorja tal-Pjanijiet ta’ Ħames Snin u tad-Deċiżjoni Nru 40 ġiet stabbilita hawn fuq fit-Taqsima 3.1. In-natura obbligatorja tad-dokumenti regolatorji tas-CBIRC tirriżulta mis-setgħat tagħha bħala l-awtorità regolatorja bankarja. In-natura obbligatorja ta’ dokumenti oħrajn tidher permezz tal-klawżoli ta’ superviżjoni u evalwazzjoni li fihom.

(245)

Wara d-divulgazzjoni definittiva, il-GTĊ sostna li l-ebda wieħed mid-dokumenti regolatorji msemmija mill-Kummissjoni ma kien biżżejjed biex juri li fl-fatt kien eżerċitat kontroll sinifikanti mill-GTĊ fuq EXIM. B’mod aktar speċifiku, il-GTĊ argumenta li l-Artikolu 34 tal-Liġi Ċiniża dwar il-Banek Kummerċjali ma huwa xejn aktar minn dikjarazzjoni ġenerali mingħajr implikazzjonijiet prattiċi. Il-GTĊ żied li l-Artikolu 34 jenħtieġ li ma jinqarax waħdu, iżda flimkien mal-Artikoli 4, 5, u 41 tal-Liġi Bankarja li allegatament hija relatata mal-awtonomija tal-bank, u n-nuqqas ta’ interferenza minn entitajiet, individwi jew gvernijiet. Il-GTĊ talab ukoll li jiġi injorat l-Artikolu 15 tar-Regoli Ġenerali dwar is-Self, peress li mhuwiex obbligatorju. Fl-aħħar, il-GTĊ iddikjara li d-Deċiżjoni Nru 40 tal-Kunsill tal-Istat ma kinitx vinkolanti, u rreferiet għall-Artikolu 17 ta’ din id-Deċiżjoni, li skontha l-istituzzjonijiet finanzjarji kollha huma meħtieġa jieħdu deċiżjonijiet ta’ self abbażi tal-prinċipji tas-suq.

(246)

Il-Kummissjoni l-ewwel fakkret li, kif imsemmi fil-premessa ta’ hawn fuq, hija qieset li l-Liġi Bankarja u d-Deċiżjoni Nru 40 huma obbligatorji. Barra minn hekk, is-sejbiet ta’ din l-investigazzjoni (kif ukoll is-sejbiet tal-Kummissjoni f’investigazzjonijiet preċedenti dwar l-istess programm ta’ sussidju (64)) ma appoġġjawx l-affermazzjoni li l-banek ma jikkunsidrawx il-politika u l-pjanijiet tal-gvern. L-investigazzjoni minflok uriet li l-Artikolu 15 tar-Regoli Ġenerali dwar is-Self jiġi applikat fil-prattika u li l-Artikoli 4, 5 u 41 tal-Liġi Bankarja, jiġu applikati skont l-Artikolu 34 tal-Liġi Bankarja, jiġifieri meta l-Istat jistabbilixxi politika pubblika, il-banek jimplimentawha u jsegwu l-istruzzjonijiet tal-Istat. Is-sejbiet ta’ din l-investigazzjoni ma jappoġġjawx l-affermazzjoni li l-banek ma jqisux il-politiki u l-pjanijiet tal-gvern meta jieħdu deċiżjonijiet ta’ għoti ta’ self. Pereżempju, il-Kummissjoni sabet li l-produtturi esportaturi jibbenefikaw minn rati tal-imgħax simili baxxi permezz ta’ self preferenzjali.

(247)

Il-Kummissjoni nnutat ukoll li d-Deċiżjoni Nru 40 tal-Kunsill tal-Istat tagħti struzzjonijiet lill-istituzzjonijiet finanzjarji kollha biex jipprovdu appoġġ ta’ kreditu biss lil proġetti mħeġġa u twiegħed l-implimentazzjoni ta’ “politiki preferenzjali oħra fuq il-proġetti mħeġġa”. Fuq il-bażi ta’ dan ta’ hawn fuq, il-banek huma meħtieġa jipprovdu appoġġ ta’ kreditu lill-industrija tal-GFF. Filwaqt li l-Artikolu 17 tal-istess Deċiżjoni jitlob ukoll lill-bank biex jirrispetta l-prinċipji tal-kreditu, il-Kummissjoni ma setgħetx tistabbilixxi matul l-investigazzjoni li dan sar fil-prattika. Id-Deċiżjoni Nru 40 għalhekk ikkonfermat sejbiet preċedenti fir-rigward tal-Liġi Bankarja li l-banek jeżerċitaw awtorità governattiva fil-forma ta’ operazzjonijiet ta’ kreditu preferenzjali.

(248)

Fuq din il-bażi, il-Kummissjoni kkonkludiet li l-GTĊ ħoloq qafas normattiv li kellu jiġi rrispettat mill-maniġers u mis-superviżuri maħtura mill-GTĊ u li huma responsabbli lejn il-GTĊ. Għalhekk, il-GTĊ straħ fuq il-qafas normattiv sabiex jeżerċita kontroll b’mod sinifikanti fuq l-imġiba tal-bank tal-Istat li kkoopera kull meta kien qiegħed jipprovdi self lill-industrija tal-GFF.

(249)

Il-Kummissjoni fittxet ukoll prova konkreta tal-eżerċizzju ta’ kontroll b’mod sinifikanti abbażi ta’ self konkret. Matul iż-żjara ta’ verifika, il-bank tal-Istat li kkoopera saħaq li fil-prattika kien uża politiki u mudelli sofistikati ta’ valutazzjoni tar-riskju tal-kreditu meta ta s-self inkwistjoni. Madankollu, kif diġà ġie indikat fil-premessi (187) sa (190) hawn fuq, ma ġew ipprovduti l-ebda eżempji konkreti relatati mal-kumpaniji inklużi fil-kampjun. Il-bank tal-Istat li kkoopera rrifjuta li jipprovdi informazzjoni, inklużi l-valutazzjonijiet tar-riskju ta’ kreditu speċifiku tiegħu, relatata mal-kumpaniji inklużi fil-kampjun għal raġunijiet regolatorji u għal raġunijiet kuntrattwali anki jekk il-Kummissjoni kellha kunsens bil-miktub mingħand il-kumpaniji inklużi fil-kampjun li rrinunzjaw id-drittijiet ta’ kunfidenzjalità tagħhom.

(250)

Għalhekk, fin-nuqqas ta’ evidenza konkreta ta’ valutazzjonijiet tal-affidabbiltà kreditizja, il-Kummissjoni eżaminat l-ambjent legali ġenerali kif stabbilit hawn fuq fil-premessi (238) sa (245), flimkien mal-imġiba tal-bank tal-Istat li kkoopera fir-rigward tas-self ipprovdut lill-kumpaniji inklużi fil-kampjun. Din l-imġiba kkuntrastat mal-pożizzjoni uffiċjali tagħha matul iż-żjara ta’ verifika, peress li fil-prattika ma kinitx qiegħda taġixxi abbażi ta’ valutazzjonijiet tar-riskju bbażati fuq is-suq.

(251)

Iż-żjarat ta’ verifika wrew li bl-unika eċċezzjoni ta’ ċertu self f’munita barranija, ingħataw selfiet liż-żewġ gruppi ta’ produtturi esportaturi inklużi fil-kampjun b’rati tal-imgħax taħt jew qrib ir-rati normattivi tal-imgħax tal-People’s Bank of China (“PBOC”), irrispettivament mis-sitwazzjoni finanzjarja u mir-riskju ta’ kreditu tal-kumpaniji. Għaldaqstant, is-selfiet ingħataw b’inqas mir-rati tas-suq meta mqabbla mar-rata li tikkorrispondi mal-profil tar-riskju tal-produtturi esportaturi inklużi fil-kampjun. Barra minn hekk, il-kumpaniji kollha inklużi fil-kampjun kienu rċevew kreditu rotanti, li ppermettielhom jissostitwixxu minnufih il-kapital imħallas lura fuq is-self fid-data tal-maturità permezz ta’ kapital ġdid minn self ġdid.

(252)

Il-Kummissjoni sabet ukoll li s-self li kellu jiġi rrappurtat mill-banek bħala self “mhux normali” mhux dejjem kien indikat bħala tali fir-reġistru ta’ kreditu ċentrali nazzjonali mill-bank tal-Istat li kkoopera. L-obbligu li jiġi rrappurtat tali “self mhux normali” jeżisti b’mod partikolari meta s-self ikun ġie ristrutturat, meta d-debitur ikun naqas milli jħallas il-pagamenti dovuti tiegħu, jew meta jkun inħareġ kreditu rotanti. Tali okkorrenzi nstabu għaż-żewġ produtturi esportaturi inklużi fil-kampjun. Skont il-“Linji Gwida dwar il-klassifikazzjoni ta’ self ibbażat fuq ir-riskju” tas-CBIRC, dawn il-każijiet kollha kellhom jiġu inklużi fir-reġistru ċentrali tal-kreditu. Dan in-nuqqas ta’ rapportar mill-istituzzjonijiet finanzjarji jwassal għal stampa mgħawġa tas-sitwazzjoni kreditizja tal-kumpanija fir-reġistru ċentrali tal-kreditu, minħabba li r-reġistru ma jurix l-affidabbiltà kreditizja reali tal-kumpanija. Bħala riżultat, anki jekk istituzzjoni finanzjarja kellha tapplika valutazzjoni tar-riskju bbażata fuq is-suq, kien ikollha tagħmel dan abbażi ta’ informazzjoni mhux preċiża.

(253)

Għalhekk, il-Kummissjoni kkonkludiet li l-GTĊ eżerċita kontroll sinifikanti fuq l-imġiba tal-bank tal-Istat li kkoopera fir-rigward tal-politiki tas-self tiegħu u l-valutazzjoni tar-riskju li tikkonċerna l-industrija tal-GFF.

(254)

Il-Kummissjoni stabbiliet li l-istituzzjoni finanzjarja tal-Istat li tikkoopera implimentat il-qafas legali stabbilit hawn fuq fl-eżerċizzju ta’ funzjonijiet governattivi fir-rigward tas-settur tal-GFF. Għalhekk, kienet qiegħda taġixxi bħala korp pubbliku fis-sens tal-Artikolu 2(b) tar-Regolament bażiku, moqri flimkien mal-Artikolu 3(1)(a)(i) tar-Regolament bażiku u skont il-ġurisprudenza rilevanti tad-WTO.

(255)

Kif stabbilit fit-Taqsima 3.2 ta’ hawn fuq, l-ebda bank tal-Istat ieħor li pprovda self lill-kumpaniji inklużi fil-kampjun ma wieġeb għall-kwestjonarju speċifiku. CDB ma weġibx għall-kwestjonarju, iżda kien disponibbli għal mistoqsijiet matul iż-żjara ta’ verifika fl-uffiċċji ta’ MOFCOM. Matul din iż-żjara, CDB sostna li d-dikjarazzjonijiet li kien għamel matul investigazzjoni antisussidji preċedenti mill-UE fl-2012 kienu għadhom validi, u li minn dak iż-żmien ’l hawn ma kien seħħ l-ebda tibdil kbir. CDB ma pprovda l-ebda informazzjoni dettaljata ulterjuri dwar l-istruttura ta’ governanza tiegħu, il-valutazzjoni tar-riskju jew eżempji relatati ma’ self speċifiku lill-industrija tal-GFF.

(256)

Għalhekk, skont il-konklużjonijiet milħuqa fil-premessi (182) sa (199) ta’ hawn fuq, il-Kummissjoni ddeċidiet li tuża l-fatti disponibbli sabiex tiddetermina jekk dawk il-banek tal-Istat jikkwalifikawx bħala korpi pubbliċi.

(257)

Fl-investigazzjoni antisussidji preċedenti (65), il-Kummissjoni stabbiliet li l-banek li ġejjin li kienu pprovdew self lill-gruppi ta’ produtturi esportaturi inklużi fil-kampjun fl-investigazzjonijiet inkwistjoni kienu parzjalment jew kompletament proprjetà tal-Istat innifsu jew ta’ persuni ġuridiċi li kienu proprjetà tal-Istat: China Development Bank, China Construction Bank, Industrial and Commercial Bank of China, Bank of Communications, China Everbright Bank, Postal Savings Bank, China Merchants Bank, Shanghai Pudong Development Bank, China Industrial Bank, Shenyang Rural Commercial Bank, Bank of Shanghai, Ningbo Bank, China CITIC Bank, China Guangfa Bank, China Bohai Bank, Huaxia Bank, Hankou Bank, Hubei Bank, Huishang Bank, Dongying Bank, Bank of Tianjin, Bank of Kunlun, Shanghai Rural Commercial Bank, China Industrial International Trust Limited, Daye Trust Co., Ltd. u Sinotruk Finance Co., Ltd. Peress li ma ġiet ipprovduta l-ebda informazzjoni li tindika mod ieħor, il-Kummissjoni żammet l-istess konklużjoni f’din l-investigazzjoni.

(258)

Bl-użu ta’ informazzjoni disponibbli għall-pubbliku, bħas-sit web tal-bank, rapporti annwali, informazzjoni disponibbli f’direttorji bankarji jew fuq l-Internet, il-Kummissjoni sabet ukoll li l-banek li ġejjin li kienu pprovdew self jew lokazzjoni finanzjarja liż-żewġ gruppi ta’ produtturi esportaturi inklużi fil-kampjun kienu parzjalment jew kompletament proprjetà tal-Istat innifsu jew ta’ persuni ġuridiċi li huma proprjetà tal-Istat:

(259)

Il-Kummissjoni stabbiliet ukoll, fin-nuqqas ta’ informazzjoni speċifika mill-istituzzjonijiet finanzjarji inkwistjoni li tindika mod ieħor, is-sjieda u l-kontroll tal-GTĊ abbażi ta’ indizji formali għall-istess raġunijiet ippreżentati hawn fuq fit-Taqsima 3.4.1.2. B’mod partikolari, fuq il-bażi tal-fatti disponibbli, il-maniġers u s-superviżuri fil-banek tal-Istat li ma kkooperawx jidher li nħatru mill-GTĊ u li huma responsabbli lejn il-GTĊ bl-istess mod bħal fil-bank tal-Istat li kkoopera.

(260)

Fir-rigward tal-eżerċitu tal-kontroll b’mod sinifikanti, il-Kummissjoni kkunsidrat li s-sejbiet dwar l-istituzzjoni finanzjarji li kkooperat setgħu jiġu kkunsidrati rappreżentattivi wkoll għall-istituzzjonijiet finanzjarji tal-Istat li ma kkooperawx. Il-qafas normattiv analizzat fit-Taqsima 3.4.1.2 ta’ hawn fuq japplika għalihom bl-istess mod. Fin-nuqqas ta’ kwalunkwe indikazzjoni kuntrarja, ibbażata fuq il-fatti disponibbli, in-nuqqas ta’ evidenza konkreta tal-valutazzjonijiet tal-affidabbiltà kreditizja huwa validu għalihom bl-istess mod bħal għall-bank tal-Istat li kkoopera u għalhekk l-analiżi dwar l-applikazzjoni konkreta tal-qafas normattiv fit-Taqsima 3.4.1.2. ta’ hawn fuq tapplika għalihom bl-istess mod.

(261)

Barra minn hekk, il-Kummissjoni osservat li l-maġġoranza tal-kuntratti ta’ self li l-Kummissjoni kisbet mingħand il-kumpaniji inklużi fil-kampjun kellhom kundizzjonijiet simili u li r-rati ta’ self li ġew miftiehma kienu simili u kkoinċidew parzjalment mar-rati pprovduti mill-bank tal-Istat li kkoopera.

(262)

Għalhekk, il-Kummissjoni qieset li s-sejbiet għall-bank tal-Istat li kkoopera kienu jikkostitwixxu l-fatti disponibbli skont l-Artikolu 28 tar-Regolament bażiku sabiex jiġu vvalutati l-banek tal-Istat l-oħrajn, minħabba dawk is-similaritajiet fil-kundizzjonijiet tas-self u fir-rati tas-self.

(263)

Fuq dik il-bażi, il-Kummissjoni kkonkludiet li l-banek tal-Istat l-oħrajn li jipprovdu self lill-kumpaniji inklużi fil-kampjun huma korpi pubbliċi fis-sens tal-Artikoli 2(b) moqri flimkien mal-Artikoli 3(1)(a)(i) tar-Regolament bażiku.

(264)

Wara d-divulgazzjoni definittiva, il-GTĊ argumenta li l-Kummissjoni bbażat ruħha biss fuq investigazzjonijiet preċedenti u fuq indizji ta’ kontroll formali biex tistabbilixxi li l-banek tal-Istat li ma kkooperawx kienu qed jaġixxu bħala korpi pubbliċi. Ma saret l-ebda analiżi separata għal kull bank. Barra minn hekk, peress li EXIM huwa bank ta’ politika, is-sitwazzjoni tiegħu ma setgħetx tiġi trasposta għal banek kummerċjali.

(265)

F’dan ir-rigward, il-Kummissjoni fakkret li fin-nuqqas ta’ kooperazzjoni mill-banek l-oħra tal-Istat, il-Kummissjoni kellha tibbaża fuq il-fatti disponibbli. Il-Kummissjoni kkonkludiet li l-informazzjoni mill-investigazzjonijiet preċedenti, flimkien ma’ indizji formali ta’ kontroll u s-sejbiet tal-investigazzjoni nnifisha rigward EXIM u rigward l-imġiba attwali tal-banek lejn il-produtturi esportaturi kienet tikkostitwixxi l-aħjar fatti disponibbli f’dan il-każ. Fi kwalunke każ, il-GTĊ naqas milli jippreżenta xi evidenza jew argument biex jirribatti s-sejbiet tal-Kummissjoni dwar il-fatt li l-banek tal-Istat l-oħrajn li pprovdew self lill-kumpaniji inklużi fil-kampjun huma korpi pubbliċi fis-sens tal-Artikoli 2(b) moqri flimkien mal-Artikoli 3(1)(a)(i) tar-Regolament bażiku. Għalhekk, il-Kummissjoni żammet il-pożizzjoni tagħha.

(266)

Fid-dawl tal-kunsiderazzjonijiet ta’ hawn fuq, il-Kummissjoni stabbiliet li l-istituzzjonijiet finanzjarji Ċiniżi kollha tal-Istat li pprovdew self jew lokazzjoni finanzjarja liż-żewġ gruppi inklużi fil-kampjun ta’ produtturi esportaturi li kkooperaw huma korpi pubbliċi fis-sens tal-Artikolu 2(b) moqri flimkien mal-Artikolu 3(1)(a)(i) tar-Regolament bażiku.

(267)

Barra minn hekk, anki li kieku l-istituzzjonijiet finanzjarji tal-Istat ma jitqisux bħala korpi pubbliċi, il-Kummissjoni stabbiliet li huma kienu jitqiesu bħala li huma inkarigati jew mogħtija direzzjonijiet mill-GTĊ sabiex iwettqu funzjonijiet normalment vestiti fil-gvern, fis-sens tal-Artikolu 3(1)(a)(iv) tar-Regolament bażiku għall-istess raġunijiet, kif stabbilit fil-premessi (269) sa (272) ta’ hawn taħt. B’hekk, fi kwalunkwe każ, l-imġiba tagħhom tiġi attribwita lill-GTĊ.

(268)

Imbagħad, il-Kummissjoni daret lejn l-istituzzjonijiet finanzjarji li kien fadal. L-istituzzjonijiet finanzjarji li ġejjin kienu meqjusa bħala proprjetà privata, abbażi tas-sejbiet stabbiliti fl-investigazzjonijiet antisussidji preċedenti (67), u kkomplementati minn informazzjoni disponibbli pubblikament: China Minsheng Bank, Sumitomo Mitsui Banking (China) Co., Ltd, Standard Chartered Bank, Ping An Bank. Għall-istituzzjonijiet finanzjarji li ġejjin, fin-nuqqas ta’ kooperazzjoni u fin-nuqqas ta’ biżżejjed informazzjoni disponibbli pubblikament, il-Kummissjoni ma setgħetx tivverifika jekk dawn kinux tal-Istat jew proprjetà privata: Chongqing Runyin Financial Leasing Co., Ltd., Wuxi International Platinum Co., Ltd., Liangjiang Financial Leasing Co., Ltd., Taan Bank u Taiex Daiyue Rural Commercial Bank Co., Ltd. Billi segwiet approċċ konservattiv, il-Kummissjoni analizzat dawn tal-aħħar bl-istess mod bħal istituzzjonijiet finanzjarji privati u minn hawn ’il quddiem issir referenza għalihom bħala “istituzzjonijiet finanzjarji privati”. Il-Kummissjoni analizzat jekk dawk l-istituzzjonijiet finanzjarji kinux ġew inkarigati jew mogħtija direzzjonijiet mill-Gvern taċ-Ċina sabiex jagħtu sussidji lis-settur tal-GFF fis-sens tal-Artikolu 3(1)(a)(iv) tar-Regolament bażiku.

(269)

Skont il-Korp tal-Appell tad-WTO, “inkarigu” jseħħ meta gvern jagħti responsabbiltà lil korp privat u “direzzjoni” tirreferi għal sitwazzjonijiet fejn il-gvern jeżerċita l-awtorità tiegħu fuq korp privat (68). Fiż-żewġ każijiet, il-gvern juża korp privat bħala sostitut biex jagħmel il-kontribuzzjoni finanzjarja u, “fil-maġġoranza tal-każijiet, wieħed jistenna li l-inkarigu jew id-direzzjoni ta’ korp privat ikunu jinvolvu xi forma ta’ theddida jew ġegħil” (69). Fl-istess ħin, il-paragrafu (iv) ma jippermettix lill-Membri jimponu miżuri kompensatorji għall-prodotti “kull meta l-gvern ikun sempliċement qiegħed jeżerċita s-setgħat regolatorji ġenerali tiegħu” (70) jew meta l-intervent tal-gvern “jista’ jew ma jistax ikollu riżultat partikolari sempliċiment fuq il-bażi taċ-ċirkostanzi fattwali mogħtija u l-eżerċizzju tal-libertà tal-għażla mill-atturi f’dak is-suq” (71). Minflok, l-inkarigu jew d-direzzjoni jimplikaw “rwol iżjed attiv tal-gvern minn sempliċi atti ta’ inkoraġġiment” (72).

(270)

Il-Kummissjoni nnutat li l-qafas normattiv dwar l-industrija msemmi hawn fuq fil-premessi (238) sa (245) japplika għall-istituzzjonijiet finanzjarji kollha fir-RPĊ, inklużi istituzzjonijiet finanzjarji privati. Biex jintwera dan, il-Liġi Bankarja u d-diversi ordnijiet tas-CBIRC ikopru l-banek kollha ffinanzjata miċ-Ċina u b’investiment barrani taħt il-ġestjoni tas-CBIRC.

(271)

Barra minn hekk, iż-żjarat ta’ verifika lill-kumpaniji inklużi fil-kampjun urew li l-maġġoranza tal-kuntratti ta’ self li l-Kummissjoni kienet kisbet mill-kumpaniji inklużi fil-kampjun kellhom kundizzjonijiet simili u li r-rati tas-self ipprovduti mill-istituzzjonijiet finanzjarji privati kienu simili u kkoinċidew parzjalment mar-rati pprovduti mill-istituzzjonijiet finanzjarji pubbliċi.

(272)

Fin-nuqqas ta’ informazzjoni diverġenti rċevuta mingħand l-istituzzjonijiet finanzjarji privati, il-Kummissjoni kkonkludiet li, sa fejn hija kkonċernata l-industrija tal-GFF, l-istituzzjonijiet finanzjarji kollha (inklużi l-istituzzjonijiet finanzjarji privati) li joperaw fiċ-Ċina taħt is-superviżjoni tas-CBIRC ġew inkarigati jew mogħtija direzzjonijiet mill-Istat fis-sens tal-Artikolu 3(1)(a)(iv), l-ewwel inċiż tar-Regolament bażiku biex isegwu politiki governattivi u jipprovdu self b’rati preferenzjali lill-industrija tal-GFF.

(273)

Wara d-divulgazzjoni definittiva, waħda mill-partijiet argumentat li l-fatt li kull grupp ta’ kumpaniji fil-kampjun ibbenefika minn tipi differenti ta’ self jew lokazzjoni finanzjarja matul il-perjodu ta’ investigazzjoni b’varjanzi fir-rigward eż. tal-maturità, tal-kollateral, tal-garanziji u ta’ kundizzjonijiet oħra mehmuża, kif imsemmi fil-premessa (281) hawn taħt, indika li dawn mhumiex qed jiġu inkarigati jew diretti mill-Istat. Din il-parti sostniet ukoll li s-sovrapożizzjoni fir-rati minn banek privati u pubbliċi wriet li l-banek pubbliċi kienu qed jipprovdu self b’termini tas-suq, mhux l-oppost. Il-Kummissjoni ppruvat ukoll tittrasferixxi l-oneru tal-provi billi ddikjarat li l-konklużjonijiet tagħha kienu japplikaw “[f]in-nuqqas ta’ kwalunkwe informazzjoni diverġenti li waslet mingħand l-istituzzjonijiet finanzjarji privati”. Madankollu, il-Kummissjoni kellha l-ewwel tistabbilixxi każ prima facie.

(274)

B’risposta għal dawn l-affermazzjonijiet, il-Kummissjoni fakkret li fin-nuqqas ta’ kooperazzjoni mill-banek, il-Kummissjoni kellha tibbaża fuq il-fatti disponibbli għall-banek privati. Bħala tali, ma ttrasferiex l-oneru tal-prova. Barra minn hekk, peress li kien hemm kooperazzjoni minn bank tal-Istat wieħed biss, il-Kummissjoni użat l-informazzjoni mill-parti li kkooperat, li tqieset li hija korp pubbliku, biex tqabbilha mal-kundizzjonijiet offruti minn banek privati, li ma kinux qed jikkooperaw. Il-fatt li kien hemm koinċidenza fir-rati juri li l-banek privati pprovdew ukoll self taħt it-termini tas-suq, u mhux l-oppost. Jekk jiġi segwit ir-raġunament ta’ din il-partit ikun ekwivalenti għal konklużjoni li l-informazzjoni bbażata fuq il-fatti disponibbli hija aktar affidabbli mill-konklużjonijiet ibbażati fuq informazzjoni verifikata. Il-fatt li l-kumpaniji bbenefikaw minn tipi differenti ta’ self matul il-perjodu ta’ investigazzjoni b’kundizzjonijiet differenti marbuta miegħu, ma jbiddilx dan. Fi kwalunkwe każ, il-parti naqset milli tressaq xi evidenza jew argument biex tirribatti s-sejbiet tal-Kummissjoni. Għalhekk, dawn il-affermazzjonijiet ġew miċħuda.

(275)

Barra minn hekk, il-qafas normattiv li japplika għall-banek kollha fiċ-Ċina huwa ferm usa’ minn dawk iż-żewġ regolamenti weħidhom li jirregolaw is-CBRC, kif muri fil-premessa (238) ta’ hawn fuq, u s-sett sħiħ ta’ dokumenti regolatorji huwa legalment vinkolanti, kif spjegat fil-premessa (244) ta’ hawn fuq, u għalhekk dawn jammontaw għal aktar minn sempliċi atti ta’ inkoraġġiment. Barra minn hekk, iż-żjarat ta’ verifika fil-kumpaniji inklużi fil-kampjun ma wrew l-ebda differenzi sinifikanti bejn il-kundizzjonijiet tas-self jew ir-rati pprovduti mill-istituzzjonijiet finanzjarji privati, u dawk ipprovduti minn istituzzjonijiet finanzjarji li huma proprjetà pubblika.

(276)

Wara d-divulgazzjoni, il-GTĊ qal li l-leġiżlazzjoni invokata mill-Kummissjoni għandha biss rwol ta’ gwida, u s-sempliċi rwol ta’ gwida tal-gvern mhuwiex biżżejjed biex wieħed jikkonkludi li ġie fdat xi kompitu jew ingħatat direzzjoni. F’dan il-kuntest il-GTĊ argumenta li l-Artikolu 34 tal-Liġi Bankarja ma huwa xejn aktar minn dikjarazzjoni ġenerali mingħajr implikazzjonijiet prattiċi.

(277)

L-Artikolu 15 tar-Regoli Ġenerali dwar is-Self ukoll mhuwiex obbligu mandatorju iżda jippermetti biss li l-istituzzjonijiet finanzjarji jqisu l-politiki tal-istat. Id-Deċiżjoni Nru 40 ukoll mhijiex dokument li jorbot, u tagħti mandat espliċitu lill-istituzzjonijiet finanzjarji biex jipprovdu appoġġ finanzjarju “skont il-prinċipji ta’ kreditu”.

(278)

Il-Kummissjoni ma qablitx ma’ din il-fehma, peress li l-qafas normattiv li japplika għall-banek kollha fiċ-Ċina huwa legalment vinkolanti, kif spjegat fil-premessa (244) hawn fuq, u għalhekk dawn jammontaw għal aktar minn sempliċi atti ta’ inkoraġġiment jew ta’ gwida mill-gvern. Fir-rigward tad-Deċiżjoni Nru 40, il-Kummissjoni diġà stabbiliet fil-premessa (247) hawn fuq li d-Deċiżjoni Nru 40 tagħti struzzjonijiet lill-istituzzjonijiet finanzjarji kollha biex jipprovdu appoġġ ta’ kreditu biss lil proġetti mħeġġa minkejja li l-Artikolu 17 tal-istess Deċiżjoni jitlob ukoll lill-banek biex jirrispettaw il-prinċipji tal-kreditu. Għalhekk, il-Kummissjoni żammet il-pożizzjoni tagħha.

(279)

Fl-investigazzjoni antisussidji preċedenti, il-Kummissjoni diġà ddeterminat li l-klassifikazzjonijiet tal-kreditu domestiku mogħtija lill-kumpaniji Ċiniżi ma kinux affidabbli, abbażi ta’ studju ppubblikat mill-Fond Monetarju Internazzjonali (73), li juri diskrepanza bejn il-klassifikazzjonijiet tal-kreditu internazzjonali u dawk Ċiniżi, flimkien mas-sejbiet tal-investigazzjoni li tikkonċerna l-kumpaniji inklużi fil-kampjun. Fil-fatt, skont il-FMI, aktar minn 90 % tal-bonds Ċiniżi huma kklassifikati AA sa AAA mill-aġenziji ta’ klassifikazzjoni lokali. Dan mhuwiex komparabbli ma’ swieq oħrajn, bħall-UE jew l-Istati Uniti. Pereżempju, inqas minn 2 % tad-ditti jgawdu minn dawn il-klassifikazzjonijiet tal-ogħla livell fis-suq tal-Istati Uniti. Għalhekk, l-aġenziji Ċiniżi tal-klassifikazzjoni tal-kreditu għandhom tendenza qawwija favur l-ogħla tarf tal-iskala ta’ klassifikazzjoni. Huma għandhom skali ta’ klassifikazzjoni wiesgħa ħafna u għandhom tendenza li jiġbru flimkien bonds b’riskji ta’ inadempjenza differenti b’mod sinifikanti f’kategorija waħda wiesgħa ta’ klassifikazzjoni (74).

(280)

Barra minn hekk, l-aġenziji ta’ klassifikazzjoni barranin, bħal Standard and Poor’s u Moody’s, tipikament japplikaw żieda fuq il-klassifikazzjoni ta’ kreditu tal-linja bażi tal-emittent abbażi ta’ stima tal-importanza strateġika tad-ditta għall-Gvern Ċiniż u s-saħħa ta’ kwalunkwe garanzija impliċita meta jikklassifikaw bonds Ċiniżi maħruġa barra l-pajjiż (75). Fitch pereżempju tindika b’mod ċar, fejn applikabbli, li tali garanziji huma mutur ewlieni li fuqu huma bbażati l-klassifikazzjonijiet tal-kreditu tagħha ta’ kumpaniji Ċiniżi (76).

(281)

Il-Kummissjoni sabet ukoll aktar informazzjoni biex tikkomplementa din l-analiżi. L-ewwel nett, il-Kummissjoni ddeterminat li l-Istat jista’ jeżerċita ċerta influwenza fuq is-suq tal-klassifikazzjoni tal-kreditu. Skont żewġ studji ppubblikati fl-2016, kien hemm madwar 12-il aġenzija tal-klassifikazzjoni tal-kreditu attivi fis-suq Ċiniż, li l-biċċa l-kbira minnhom huma tal-Istat. B’kollox, 60 % tal-bonds korporattivi kklassifikati kollha fiċ-Ċina ġew ikklassifikati minn aġenzija tal-klassifikazzjoni tal-Istat (77).

(282)

Il-GTĊ ikkonferma li, matul il-perjodu ta’ investigazzjoni, kien hemm 15-il aġenzija ta’ klassifikazzjoni tal-kreditu attivi fis-suq tal-bonds taċ-Ċina, fosthom 12-il aġenzija tal-kreditu domestiċi, inklużi Shanghai Brilliance Credit Rating & Investors Service Co., Ltd, Dagong Global Credit Rating Co., Ltd, Golden Credit Rating International Co., Ltd, China Bond Rating Co., Ltd, CSCI Pengyuan Credit Rating Co., Ltd, Fareast Credit Rating Co., Ltd, China Chengxin Securities Rating Co., Ltd, United Credit Ratings Co., Ltd, Shanghai Credit Information Services Co., Ltd, China Securities Index Co., Ltd, Beijing North Joint Credit Evaluation Co., Ltd, u Sichuan Dapu Credit Rating Limited Company. Il-biċċa l-kbira tal-aġenziji ta’ klassifikazzjoni domestiċi kienu proprjetà tal-Istat. Kien hemm ukoll 3 aġenziji ta’ klassifikazzjoni tal-kreditu li kienu impriżi konġunti Ċiniżi-barranin, jiġifieri China Lianhe Credit Rating Co. Ltd, S&P Global China Rating, u China Chengxin International Credit Rating Co.,Ltd.

(283)

It-tieni, ma hemmx dħul liberu fis-suq Ċiniż tal-klassifikazzjoni tal-kreditu. Huwa essenzjalment suq magħluq, peress li l-aġenziji tal-klassifikazzjoni jridu jiġu approvati mill-Kummissjoni Regolatorja tat-Titoli taċ-Ċina (China Securities Regulatory Commission, CSRC) jew mill-PBOC qabel ma jkunu jistgħu jibdew l-operazzjonijiet tagħhom (78). F’nofs l-2017, il-PBOC ħabbar li l-aġenziji ta’ klassifikazzjoni tal-kreditu barranin se jitħallew iwettqu klassifikazzjonijiet tal-kreditu fuq parti mis-suq domestiku tal-bonds, taħt ċerti kundizzjonijiet. Madankollu, matul il-perjodu ta’ investigazzjoni, l-ebda aġenzija tal-klassifikazzjoni tal-kreditu barranija ma ġiet aċċettata s’issa (79). Madankollu, sadanittant, l-aġenziji barranin stabbilew impriżi konġunti ma’ xi aġenziji tal-klassifikazzjoni tal-kreditu lokali, li jipprovdu klassifikazzjonijiet ta’ kreditu għal ħruġ ta’ bonds domestiċi. Madankollu, dawn il-klassifikazzjonijiet isegwu l-iskali tal-klassifikazzjoni Ċiniżi u għalhekk mhumiex eżattament komparabbli mal-klassifikazzjonijiet internazzjonali, kif spjegat hawn fuq.

(284)

Fl-aħħar nett, studju riċenti mwettaq mill-PBOC innifsu jikkonferma s-sejbiet tal-Kummissjoni, billi fil-konklużjonijiet tiegħu jiddikjara li “jekk il-livell ta’ investiment tal-bonds barranin jiġi stabbilit għall-klassifikazzjoni internazzjonali BBB u ogħla, allura l-grad ta’ investiment tal-bonds domestiċi jista’ jiġi kklassifikat fil-livell AA u ogħla, filwaqt li titqies id-differenza bejn il-klassifikazzjoni domestika medja u l-klassifikazzjoni internazzjonali ta’ 6 livelli jew aktar” (80).

(285)

Fid-dawl tas-sitwazzjoni deskritta fil-premessi (279) sa (284) ta’ hawn fuq, il-Kummissjoni kkonkludiet li l-klassifikazzjonijiet tal-kreditu Ċiniżi ma jipprovdux stima affidabbli tar-riskju ta’ kreditu tal-assi sottostanti. Fuq din il-bażi, anki jekk xi kumpaniji inklużi fil-kampjun ingħataw klassifikazzjoni tal-kreditu tajba minn aġenzija tal-klassifikazzjoni Ċiniża, il-Kummissjoni kkonkludiet li dawn il-klassifikazzjonijiet mhumiex affidabbli. Dawk il-klassifikazzjonijiet kienu distorti wkoll mill-objettivi ta’ politika li jħeġġu industriji strateġiċi ewlenin, bħal GFF.

(286)

F’konformità mas-sejbiet fl-investigazzjonijiet dwar l-HRF u t-tyres (81), is-self rotanti huwa self li jippermetti kumpanija tissostitwixxi l-kapital imħallas lura fuq is-self fid-data tal-maturità permezz ta’ kapital ġdid minn self ġdid. Self rotanti normalment huwa sinjal ta’ problemi ta’ likwidità fuq perjodu qasir ta’ mutwatarju, u jinvolvi skopertura akbar għar-riskju għall-banek li jagħtuh. L-eżistenza ta’ kreditu rotanti f’kumpanija partikolari kienet għalhekk meqjusa bħala indikazzjoni li l-kumpanija hija f’sitwazzjoni finanzjarja agħar minn dak li jissuġġerixxu r-rapporti finanzjarji mal-ewwel daqqa t’għajn, u li hemm riskju addizzjonali relatat ma’ problemi ta’ likwidità fuq perjodu ta’ żmien qasir.

(287)

Wara d-divulgazzjoni definittiva, il-GTĊ sostna li s-self rotanti mhuwiex neċessarjament sinjal ta’ problemi ta’ likwidità. Dan huwa ċar mis-siti web ta’ banek Ewropej ewlenin. Pereżempju, linji ta’ kreditu u self rotanti huma parti min-negozju standard ta’ banek bħal ING (82) u BNP Paribas (83) u mhumiex assoċjati ma’ rati tal-imgħax ogħla.

(288)

Il-Kummissjoni ma qablitx mal-valutazzjoni magħmula mill-GTĊ. L-awtoritajiet Ċiniżi stess jikkunsidraw is-self rotanti bħala fattur addizzjonali ta’ riskju ta’ kreditu. Kif jingħad fil-“Linji Gwida dwar il-klassifikazzjoni ta’ self ibbażat fuq ir-riskju” tas-CBRC, is-self rotanti jenħtieġ li jiġi rrappurtat mill-inqas bħala self “konċernat” (84). Self li jaqa’ taħt din il-kategorija jfisser li minkejja li mutwatarju jista’ jħallas il-kapital u l-imgħax tas-self issa, hemm xi fatturi li jistgħu jaffettwaw b’mod negattiv il-ħlas lura tagħhom.

(289)

Faċilitajiet ta’ kreditu rotanti fil-fatt jeżistu fl-Ewropa, iżda t-termini u l-kundizzjonijiet tagħhom huma differenti ħafna mis-self rotanti Ċiniż. Faċilitajiet ta’ kreditu rotanti fl-Unjoni bażikament huma linji ta’ kreditu, b’ammont massimu predeterminat li jista’ jiġi prelevat u mħallas lura f’diversi okkażjonijiet matul il-perjodu ta’ żmien speċifikat minn qabel. Barra minn hekk, dawn il-faċilitajiet ta’ kreditu jinvolvu kost addizzjonali, kemm jekk ikun marġni kuntrattwali minbarra r-rati normali tas-suq għal perjodu qasir (85), jew tariffa predeterminata tal-immaniġġjar. Barra minn hekk, l-eżempju ta’ BNP Paribas provdut mill-GTĊ ippreveda wkoll tariffa għal kapital mhux użat tul id-durata tal-faċilità ta’ kreditu.

(290)

Min-naħa l-oħra, is-self rotanti misjub tul iż-żjarat ta’ verifika fil-kumpaniji Ċiniżi fil-kampjun ma kellux kundizzjonijiet differenti minn self ieħor b’terminu qasir. Ma kinux ittimbrati bħala linji ta’ kreditu jew faċilità ta’ kreditu rotanti u ma kienx hemm tariffi jew marġini addizzjonali marbutin magħhom. Mal-ewwel daqqa t’għajn, deher bħala self normali b’terminu qasir. Madankollu, xi kultant l-għan tas-self kien jirreferi għal “ħlas lura ta’ self”. Barra minn hekk, meta ġew ivverifikati l-ħlasijiet lura ta’ dan is-self waqt iż-żjara ta’ verifika, deher ċar li l-ammont ta’ kapital fil-fatt kien qed jitħallas lura minn self ġdid riċevut mill-istess bank għall-istess ammont fi żmien ġimgħa qabel jew ġimgħa wara d-data tal-maturità tas-self inizjali. Il-Kummissjoni mbagħad estendiet l-analiżi tagħha għas-self l-ieħor fit-tabelli ta’ self u sabet li fil-biċċa l-kbira każijiet oħra bl-istess karatteristiċi eżatt. Għal dawn ir-raġunijiet kollha, il-Kummissjoni żammet il-pożizzjoni tagħha dwar is-self rotanti.

(291)

Matul l-investigazzjoni, il-Kummissjoni sabet li ċerti kumpaniji fil-kampjun ħarġu bonds bl-iskop speċifiku ta’ ħlasijiet lura tad-dejn, jiġifieri self. Il-Kummissjoni stabbiliet li billi jirristrutturaw id-dejn tagħhom permezz ta’ dan l-istrument, xi kumpaniji jkunu jistgħu jerġgħu jirranġaw u jiddeferixxu l-obbligazzjonijiet tagħhom, kif ukoll, jiksbu l-fondi li mingħajrhom ma jkunux jistgħu jissodisfaw l-obbligi tagħhom ta’ ħlas lura, u għalhekk dan juri li kien hemm problemi biex jinġabru fondi.

(292)

L-użu ta’ bonds għal dan l-għan iqajjem tħassib dwar il-kapaċità ta’ kumpanija partikolari li tħallas id-djun tagħha, u għalhekk iqajjem dubji mhux biss dwar il-likwidità tagħha fuq perjodu qasir, iżda wkoll dwar is-solvenza fit-tul. L-eżistenza ta’ bonds maħruġa bl-għan ta’ ħlas lura ta’ self f’kumpanija partikolari hija għalhekk meqjusa bħala indikazzjoni li l-kumpanija hija f’sitwazzjoni finanzjarja agħar minn dak li jissuġġerixxu r-rapporti finanzjarji mal-ewwel daqqa t’għajn, u li hemm riskju addizzjonali relatat mal-finanzjament tagħha fuq perjodu qasir u perjodu twil.

(293)

Kif intwera fil-premessi (238) sa (245), diversi dokumenti legali li huma speċifikament immirati fis-settur, jagħtu direzzjoni lill-istituzzjonijiet finanzjarji biex jipprovdu self b’rati preferenzjali lill-industrija tal-GFF. Dawn id-dokumenti juru li l-istituzzjonijiet finanzjarji jipprovdu biss self preferenzjali lil għadd limitat ta’ industriji/kumpaniji li jikkonformaw mal-politiki rilevanti tal-GTĊ.

(294)

Wara d-divulgazzjoni definittiva, il-GTĊ ma qabilx mal-konklużjonijiet dwar l-ispeċifiċità tas-self preferenzjali. Skont il-GTĊ, l-Artikoli 4 u 34 tal-Liġi Bankarja sempliċiment jistabbilixxu linji gwida ġenerali fir-rigward tal-imġiba tal-banek kummerċjali u ma jsemmux liema kumpaniji jew industriji għandhom jingħataw self. Barra minn hekk, l-Artikolu 15 tar-Regoli Ġenerali dwar is-Self ma jillimitax espressament u mingħajr ambigwità d-disponibbiltà ta’ dan is-sussidju speċifiku għall-impriżi tas-settur tal-GFF. Id-Deċiżjoni Nru 40 mhijiex speċifika għal xi intrapriża jew industrija iżda għal ċerti proġetti mħeġġa, li mhumiex sinonimi. Barra minn hekk, id-Deċiżjoni Nru 40 mhijiex obbligatorja, u fid-dawl tal-firxa estremament wiesgħa ta’ setturi u industriji ekonomiċi koperti mid-Deċiżjoni Nru 40, ma jistax jiġi konkluż li dawn id-dokumenti jillimitaw b’mod espliċitu l-aċċess tal-allegat sussidju lil ċerti intrapriżi.

(295)

F’dan ir-rigward, il-Kummissjoni nnutat li, għalkemm il-liġi Bankarja u r-Regoli Ġenerali dwar is-Self ma jispeċifikawx il-GFF bħala tali, huma jirreferu għall-politiki industrijali tal-Istat, li huma stabbiliti fid-dokumenti elenkati fit-Taqsima 3.1 hawn fuq. Il-Kummissjoni għalhekk irreferiet lura għad-dokumenti li kienu elenkati u l-konklużjonijiet li ntlaħqu fit-Taqsima 3.1 hawn fuq. Barra minn hekk, hija qieset li r-referenzi għall-industrija tal-GFF huma ċari biżżejjed peress li din l-industrija hija identifikata jew b’isimha jew b’referenza għall-prodott li timmanifattura jew għall-grupp industrijali li tagħmel parti minnu. Barra minn hekk, il-fatt li l-GTĊ jappoġġa grupp limitat ta’ industriji mħeġġa, li jinkludi l-industrija tal-GFF, jagħmel dan is-sussidju speċifiku. Għalhekk il-Kummissjoni żammet il-konklużjonijiet tagħha.

(296)

Għalhekk, il-Kummissjoni kkonkludiet li s-sussidji fil-forma ta’ self preferenzjali mhumiex ġeneralment disponibbli, iżda huma speċifiċi fis-sens tal-Artikolu 4(2)(a) tar-Regolament bażiku. Barra minn hekk, l-ebda waħda mill-partijiet interessati ma ppreżentat evidenza li tissuġġerixxi li s-self preferenzjali huwa bbażat fuq kriterji jew kundizzjonijiet oġġettivi fis-sens tal-Artikolu 4(2)(b) tar-Regolament bażiku.

(297)

Il-Kummissjoni mbagħad ikkalkulat l-ammont tas-sussidju kumpensabbli. Għal dan il-kalkolu, hija vvalutat il-benefiċċju mogħti lir-riċevituri matul il-perjodu ta’ investigazzjoni. Skont l-Artikolu 6(b) tar-Regolament bażiku, il-benefiċċju mogħti lir-riċevituri huwa d-differenza bejn l-ammont ta’ mgħax li l-kumpanija tħallas fuq is-self preferenzjali u l-ammont li l-kumpanija tħallas għal self kummerċjali komparabbli li jista’ jinkiseb fis-suq.

(298)

F’dan ir-rigward, il-Kummissjoni nnutat għadd ta’ speċifiċitajiet fis-suq tal-GFF Ċiniż. Kif spjegat fit-Taqsimiet 3.4.1.1 sa 3.4.1.7 ta’ hawn fuq, is-self ipprovdut mill-istituzzjonijiet finanzjarji Ċiniżi jirrifletti intervent sostanzjali tal-gvern u ma jirriflettix rati li normalment jinstabu f’suq li jiffunzjona.

(299)

Il-gruppi ta’ kumpaniji inklużi fil-kampjun ivarjaw fejn tidħol is-sitwazzjoni finanzjarja ġenerali tagħhom. Kull waħda minnhom ibbenefikat minn tipi differenti ta’ self jew lokazzjoni finanzjarja matul il-perjodu ta’ investigazzjoni, b’varjanzi fir-rigward pereżempju tal-maturità, tal-kollateral, tal-garanziji u ta’ kundizzjonijiet marbuta oħrajn. Għal dawk iż-żewġ raġunijiet, kull kumpanija kellha medja ta’ rata tal-imgħax differenti abbażi tas-sett tagħha stess ta’ self irċevut.

(300)

Il-Kummissjoni vvalutat fuq bażi individwali s-sitwazzjoni finanzjarja ta’ kull grupp ta’ produtturi esportaturi inklużi fil-kampjun bil-għan li tirrifletti dawn il-partikolaritajiet. F’dan ir-rigward, il-Kummissjoni segwiet il-metodoloġija tal-kalkolu għal self preferenzjali stabbilit fl-investigazzjoni antisussidji fuq prodotti tal-azzar b’laminazzjoni termali, kif ukoll l-investigazzjoni antisussidji dwar it-tyres li joriġinaw mir-RPĊ (86) u spjegata fil-premessi ta’ hawn taħt. Bħala riżultat, il-Kummissjoni kkalkulat il-benefiċċju mill-prattiki tas-self preferenzjali għal kull grupp ta’ produtturi esportaturi inklużi fil-kampjun fuq bażi individwali u allokat dan il-benefiċċju għall-prodott ikkonċernat.

(301)

Kif imsemmi fil-premessi (250) sa (252) ta’ hawn fuq, l-istituzzjonijiet finanzjarji Ċiniżi li jsellfu ma pprovdew l-ebda valutazzjoni tal-affidabbiltà kreditizja. Għalhekk, sabiex tistabbilixxi l-benefiċċju, il-Kummissjoni kellha tivvaluta jekk ir-rati tal-imgħax għas-self mogħtija lis-CNBM Group kinux fil-livell tas-suq.

(302)

Il-produtturi esportaturi ta’ CNBM Group ippreżentaw lilhom infushom f’sitwazzjoni finanzjarja ġeneralment profittabbli skont il-kontijiet finanzjarji tagħhom. Wieħed mill-produtturi esportaturi ma kellu l-ebda self. Madankollu, il-Kummissjoni nnutat li huwa ffinanzja 65 % tax-xiri tiegħu b’forma ta’ strument finanzjarju preferenzjali fuq perjodu qasir (abbozzi ta’ aċċettazzjoni bankarja). Kif spjegat fit-Taqsima 3.4.3.2 hawn taħt, l-abbozzi ta’ aċċettazzjonijiet bankarji huma tip ta’ strument ta’ dejn; għalhekk, l-użu estensiv tagħhom jindika kwistjonijiet ta’ likwidità fuq perjodu qasir. It-tieni produttur esportatur għamel profitti kostanti matul il-perjodu 2016–2018, u mal-ewwel daqqa ta’ għajn kellu indikaturi finanzjarji b’saħħithom, bħal proporzjon baxx ta’ dejn ma’ assi. Madankollu, deher li kien hemm problemi ta’ likwidità għal żmien qasir għar-raġunijiet li ġejjin: id-dejn dovut fuq perjodu qasir tal-kumpanija kien jirrappreżenta kważi 100 % tal-fatturat tagħha; ħarġet bond biex tħallas lura s-self mill-banek; użat ammont kbir ta’ abbozzi ta’ aċċettazzjoni bankarja biex tiffinanzja x-xiri tagħha, u użat self rotanti, li jissuġġerixxi li l-kumpanija tista’ tkun f’sitwazzjoni finanzjarja aktar fraġli minn dik li r-rapporti finanzjarji jissuġġerixxu mal-ewwel daqqa t’għajn. It-tielet produttur esportatur wera stampa simili, b’sitwazzjoni profittabbli, iżda użu estensiv ta’ abbozzi ta’ aċċettazzjoni bankarja u bond maħruġ biex jitħallas lura s-self mill-banek.

(303)

L-ewwel kumpanija prinċipali intermedjarja, China Jushi, kienet profittabbli matul il-perjodu 2016–2017 u l-perjodu ta’ investigazzjoni, iżda użat b’mod estensiv l-abbozzi ta’ aċċettazzjoni bankarja biex tiffinanzja x-xiri tagħha. Barra minn hekk, il-Kummissjoni stabbiliet li xi self mogħti fil-livell ta’ China Jushi kien kreditu rotanti, u li China Jushi ħarġet żewġ bonds bl-iskop li tħallas il-krediti bankarji. Is-self rotanti instab ukoll fit-tieni kumpanija omm intermedjarja, Sinoma Technology.

(304)

Kif imsemmi fil-premessi (207) sa (217) ta’ hawn fuq, il-kumpanija omm CNBM ma kkooperatx. Madankollu, meta wieħed iħares lejn ir-rapport annwali tagħha disponibbli pubblikament għall-2018, toħroġ stampa simili: il-kumpanija għandha ingranaġġ għoli, bi proporzjon ta’ dejn nett ta’ 130 %, u proporzjon ta’ dejn mal-assi ta’ 68 %. Matul il-perjodu ta’ investigazzjoni, il-kumpanija kkonkludiet swap ta’ dejn ma’ ekwità ma’ banek tal-Istat, sabiex ittejjeb l-istruttura tad-dejn tagħha. Taħt tali ftehim, il-kumpanija tista’ tikkonverti parti mid-dejn tagħha lil banek tal-Istat f’ishma, u b’hekk tnaqqas l-obbligazzjonijiet fuq il-karta bilanċjali tagħha.

(305)

Il-Kummissjoni nnutat li l-kumpaniji varji ta’ CNBM Group ingħataw klassifikazzjonijiet li jvarjaw bejn AA- u AA + minn aġenzija tal-klassifikazzjoni tal-kreditu Ċiniża. Fid-dawl tad-distorsjonijiet ġenerali tal-klassifikazzjonijiet tal-kreditu Ċiniżi msemmija fil-premessi (279) sa (285), il-Kummissjoni kkonkludiet li din il-klassifikazzjoni mhijiex affidabbli.

(306)

Il-Kummissjoni kkunsidrat li s-sitwazzjoni finanzjarja globali tal-grupp tikkorrispondi għal klassifikazzjoni BB, li hija l-ogħla klassifikazzjoni li ma għadhiex tikkwalifika bħala “grad ta’ investiment”. “Grad ta’ investiment” ifisser li l-bonds maħruġa mill-kumpanija jiġu ġġudikati mill-aġenzija ta’ klassifikazzjoni bħala li x’aktarx jissodisfaw biżżejjed l-obbligi ta’ ħlas li l-banek huma permessi li jinvestu fihom.

(307)

Wara d-divulgazzjoni definittiva, is-CNBM Group qal li l-Kummissjoni tat klassifikazzjoni tal-kreditu konġunta lil CNBM Group kollu abbażi prinċipalment tal-klassifikazzjoni tal-kreditu ta’ CNBM, minkejja li l-livell ta’ dejn tas-CNBM ma setax ikollu effett detrimentali fuq China Jushi, li minnha għandu biss sehem ta’ 27 %. Barra minn hekk, CNBM ma setax jittrasferixxi l-obbligazzjonijiet tad-dejn tiegħu lil Jushi China peress li l-kumpaniji fil-grupp huma entitajiet legali separati b’responsabbiltà limitata, li jfisser li d-djun tal-azzjonisti jew tas-sussidjarji ma setgħux jiġu ttrasferiti. Barra minn hekk, peress li CNBM Group jikkunsidra li l-abbozzi ta’ aċċettazzjoni tal-banek mhumiex ekwivalenti għal self fuq terminu qasir, jenħtieġ ukoll li ma jitqisux fil-valutazzjoni tal-klassifikazzjoni tal-kreditu tal-kumpaniji.

(308)

Il-Kummissjoni ma qablitx ma’ dawn l-affermazzjonijiet. Kif jidher fil-premessi (301) sa (304) hawn fuq, il-Kummissjoni għamlet valutazzjoni individwali ta’ kull waħda mill-kumpaniji f’dawn il-gruppi. Fil-każ speċifiku ta’ CNBM Group, irrispettivament mis-sitwazzjoni deskritta fil-livell ta’ CNBM, il-biċċa l-kbira tal-kumpanniji eżaminati wrew stampa simili, inkluż self rotanti, użu estensiv ta’ aċċettazzjonijiet bankarji, u bonds maħruġa biex jitħallas lura self. Barra minn hekk, għall-kuntrarju ta’ dak li qalet il-kumpanija, dejn ġie effettivament trasferit bejn diversi kumpaniji fil-grupp permezz ta’ self bejn il-kumpaniji. Għalhekk, il-Kummissjoni ddeċidiet li tattribwixxi klassifikazzjoni tal-kreditu unika lill-grupp. Fl-aħħar, kif imsemmi fit-Taqsima 3.4.3.2 hawn taħt, il-Kummissjoni qieset li l-aċċettazzjoni tal-banek tabbozza bħala tip ieħor ta’ strument finanzjarju ekwivalenti għal self b’terminu qasir, li jista’ għalhekk jintuża fid-determinazzjoni tal-klassifikazzjonijiet tal-kreditu. Għalhekk, l-affermazzjonijiet tal-kumpanija ġew miċħuda.

(309)

Il-primjum mistenni fuq bonds maħruġa minn ditti b’din il-klassifikazzjoni (BB) imbagħad kien applikat għar-rata ta’ self standard tal-PBOC sabiex tiġi stabbilita r-rata tas-suq.

(310)

Dak il-marġni kummerċjali kien iddeterminat bil-kalkolu tal-firxa relattiva bejn l-indiċijiet tal-bonds korporattivi bi klassifikazzjoni AA tal-Istati Uniti u l-bonds korporattivi tal-Istati Uniti bi klassifikazzjoni BB abbażi tad-data ta’ Bloomberg għas-segmenti industrijali. Il-firxa relattiva kkalkulata b’dan il-mod imbagħad ġiet miżjuda mar-rati normattivi tal-imgħax kif ippubblikati mill-PBOC fid-data meta ngħata s-self (87), u għall-istess tul ta’ żmien bħas-self inkwistjoni. Dan sar individwalment għal kull self ipprovdut lill-kumpanija.

(311)

Wara d-divulgazzjoni definittiva, diversi partijiet sostnew li l-użu ta’ firxa relattiva kien difettuż. Kollha kemm huma allegaw li l-Kummissjoni kellha tuża firxa assoluta minflok relattiva bejn il-bonds klassifikati US AA u l-bonds iklassifikati US BB. Ingħataw ir-raġunijiet li ġejjin:

(312)

Dawn il-kwistjonijiet kienu diġà ppreżentati f’investigazzjoni preċedenti (88). Kif wieħed jista’ jara mill-premessi (175) sa (187) fil-każ HRF, u mill-premessa (256) fil-każ Tyres, il-Kummissjoni ċaħdet dawn l-argumenti għar-raġunijiet li ġejjin.

(313)

L-ewwel nett, filwaqt li l-Kummissjoni rrikonoxxiet li l-banek kummerċjali normalment jużaw marġni kummerċjali espress f’termini assoluti, hija osservat li din il-prattika tidher prinċipalment ibbażata fuq kunsiderazzjonijiet prattiċi, minħabba li r-rata tal-imgħax hija fl-aħħar mill-aħħar numru assolut. Madankollu, in-numru assolut huwa t-traduzzjoni ta’ valutazzjoni tar-riskju li hija bbażata fuq evalwazzjoni relattiva. Ir-riskju ta’ inadempjenza ta’ kumpanija kklassifikata BB huwa X% aktar probabbli mill-inadempjenza tal-gvern jew ta’ kumpanija mingħajr riskju. Din hija evalwazzjoni relattiva.

(314)

It-tieni, ir-rati tal-imgħax jirriflettu mhux biss il-profili tar-riskju tal-kumpaniji, iżda wkoll ir-riskji speċifiċi tal-pajjiż u tal-munita. Il-firxa relattiva għalhekk taqbad bidliet fil-kundizzjonijiet tas-suq sottostanti, li ma jiġux espressi meta tiġi segwita l-loġika ta’ firxa assoluta. Bħalma hu fil-każ preżenti, ir-riskju speċifiku tal-pajjiż u tal-munita ta’ spiss ivarja maż-żmien, u l-varjazzjonijiet huma differenti minn pajjiżi għall-ieħor. B’riżultat ta’ dan, ir-rati mingħajr riskji jvarjaw b’mod sinifikanti matul iż-żmien, u ġieli jkunu inqas fl-Istati Uniti u ġieli fiċ-Ċina. Dawn id-differenzi huma relatati ma’ fatturi bħat-tkabbir osservat u mistenni tal-PDG, is-sentiment ekonomiku u l-livelli tal-inflazzjoni. Minħabba li r-rata mingħajr riskju tvarja maż-żmien, l-istess firxa nominali assoluta tista’ tfisser valutazzjoni differenti ħafna tar-riskju. Pereżempju, fejn il-bank jistma li r-riskju ta’ inadempjenza speċifiku għall-kumpanija huwa 10 % ogħla mir-rata mingħajr riskju (stima relattiva), il-firxa assoluta li tirriżulta tista’ tkun bejn 0,1 % (b’rata mingħajr riskju ta’ 1 %) u 1 % (b’rata mingħajr riskju ta’ 10 %). Minn perspettiva ta’ investitur, il-firxa relattiva għalhekk hija miżura aħjar peress li tirrifletti d-daqs tal-firxa tar-rendiment u l-mod kif inhi affettwata mil-livell bażi tar-rata tal-imgħax.

(315)

It-tielet, il-firxa relattiva hija wkoll newtrali f’termini ta’ pajjiżi. Pereżempju, fejn ir-rata mingħajr riskju fl-Istati Uniti tkun iktar baxxa mir-rata mingħajr riskju fiċ-Ċina, il-metodu jwassal għal marġini kummerċjali assoluti ogħla. Min-naħa l-oħra, fejn ir-rata mingħajr riskju fiċ-Ċina tkun iktar baxxa minn tal-Istati Uniti, il-metodu jwassal għal marġini kummerċjali assoluti iktar baxxi.

(316)

Dwar it-tielet punt, data storika li turi l-evoluzzjoni tal-firxa assoluta u relattiva matul iż-żmien kienet diġà ġiet analizzata fil-każ Tyres. L-analiżi tal-Kummissjoni sabet li l-firxa assoluta mhijiex stabbli kif allegat, iżda minflok tvarja maż-żmien, minn 1 % għal 4,5 %. Barra minn hekk, il-firxa relattiva segwiet eżattament l-istess xejra bħat-firxa assoluta matul dawn l-aħħar 23 sena, jiġifieri meta l-firxa relattiva tiżdied il-firxa assoluta tiżdied ukoll u viċi versa. Fir-rigward tal-volatilità allegata tal-firxa relattiva, id-daqs tal-bidliet kien simili — id-differenza bejn l-ogħla ċifri u ċ-ċifri l-aktar baxxi kienet ta’ 530 % għall-firxa relattiva u ta’ 450 % għall-firxa assoluta (89).

(317)

Il-GTĊ oġġezzjona wkoll għall-użu ta’ valur referenzjarju minn barra l-pajjiż. F’dan ir-rigward, il-GTĊ nnota li l-Kummissjoni l-ewwel kellha tara x’self kummerċjali komparabbli l-produtturi esportaturi setgħu jiksbu fis-suq. Inkella, il-valur referenzjarju jenħtieġ li jkun ibbażat fuq evidenza pożittiva u spjegazzjonijiet motivati li s-self kollu fis-suq ikkonċernat kien distort mill-intervent tal-gvern b’tali mod li ma kien jeżisti l-ebda self komparabbli fis-suq domestiku.

(318)

F’dan ir-rigward, kif spjegat fit-Taqsima 3.4.1.7 hawn fuq, il-Kummissjoni ddeterminat li l-klassifikazzjonijiet tal-kreditu domestiċi mogħtija lill-kumpaniji Ċiniżi ma kinux affidabbli bħala tali, u kienu wkoll distorti mill-objettivi ta’ politika li jinkoraġġixxu industriji strateġiċi ewlenin, bħall-GFF. B’riżultat ta’ dan, il-klassifikazzjonijiet tal-kreditu Ċiniżi ma jipprovdux stima affidabbli tar-riskju ta’ kreditu tal-assi sottostanti, u l-Kummissjoni kellha tfittex valur referenzjarju bbażat fuq klassifikazzjonijiet tal-kreditu mingħajr distorsjoni. Barra minn hekk, il-Kummissjoni nnutat li r-rata tal-imgħax li tirriżulta ta’ madwar 9 % għall-kumpaniji kklassifikati BB mhijiex irraġonevoli fid-dawl tal-fatt li r-rendiment tal-bonds korporattivi kklassifikati BB fis-suq domestiku Ċiniż kien ta’ 21 % fi tmiem il-perjodu ta’ investigazzjoni (90). Għaldaqstant, dawn l-affermazzjonijiet ġew miċħuda.

(319)

Il-GTĊ sostna wkoll li l-użu ta’ valur referenzjarju minn barra l-pajjiż ma kienx xieraq, peress li l-valur referenzjarju ma għamilx l-aġġustamenti meħtieġa biex jirrifletti l-kundizzjonijiet prevalenti fis-suq finanzjarju Ċiniż, u li l-Kummissjoni naqset milli tqis id-differenzi li kienu jeżistu fid-daqs tas-self, fit-termini u fil-kundizzjonijiet ta’ ripagament u jekk is-self kienx garantit jew le, fost fatturi oħra.

(320)

Il-Kummissjoni ma qablitx ma’ din il-fehma, peress li ntużat ir-rata normattiva tal-PBOC bħala punt tat-tluq għall-kalkolu. Barra minn hekk, l-użu tal-firxa relattiva jinkludi bidliet fil-kundizzjonijiet tas-suq sottostanti speċifiċi għall-pajjiż, li mhumiex espressi meta tiġi segwita l-loġika ta’ firxa assoluta, kif spjegat fil-premessa ta’ hawn fuq. Barra minn hekk, il-Kummissjoni osservat li ma kienx possibbli li f’din l-approssimazzjoni jiġu inklużi l-fatturi kollha tal-valutazzjoni tar-riskju individwali ta’ bank. Madankollu, il-metodoloġija tal-kalkolu tal-Kummissjoni tqis il-parametri tas-self individwali, bħad-data tal-bidu u t-tul tas-self, kif ukoll il-varjabbiltà tar-rata tal-imgħax. L-affermazzjonijiet tal-GTĊ għalhekk ġew miċħuda.

(321)

Fir-rigward ta’ self denominat f’muniti barranin fir-RPĊ, tapplika l-istess sitwazzjoni fir-rigward tad-distorsjonijiet tas-suq u n-nuqqas ta’ klassifikazzjonijiet tal-kreditu validi, għaliex dan is-self huwa mogħti mill-istess istituzzjonijiet finanzjarji Ċiniżi. Għalhekk, kif instab qabel, sabiex jiġi stabbilit valur referenzjarju xieraq intużaw bonds korporattivi kklassifikati BB f’denominazzjonijiet rilevanti maħruġa matul il-perjodu ta’ investigazzjoni.

(322)

Barra minn hekk, kif spjegat fit-Taqsima 3.4.2.1 l-eżistenza ta’ kreditu rotanti f’kumpanija partikolari hija meqjusa bħala indikazzjoni li l-kumpanija hija f’sitwazzjoni finanzjarja agħar minn dak li jissuġġerixxu r-rapporti finanzjarji mal-ewwel daqqa t’għajn, u li hemm riskju addizzjonali relatat ma’ problemi ta’ likwidità fuq perjodu ta’ żmien qasir. Tabilħaqq, il-kreditu rotanti ġeneralment jiġi konkluż għal żmien qasir. Huwa improbabbli ħafna li kreditu rotanti jkollu maturità ta’ aktar minn sentejn, u l-evidenza tas-self ivverifikata fil-kumpaniji inklużi fil-kampjun appoġġjat din il-konklużjoni.

(323)

Għalhekk, sabiex titqies l-iskopertura akbar għar-riskju tal-banek meta jipprovdu finanzjament għal perjodu qasir lill-kumpaniji b’self rotanti, il-Kummissjoni waqqgħet livell wieħed fl-iskala tal-klassifikazzjoni tar-riskju u adattat il-kalkolu tal-firxa relattiva għall-finanzjament għal żmien qasir kollu tal-kumpaniji kkonċernati. Il-Kummissjoni għalhekk għamlet paragun bejn il-bonds korporattivi AA tal-Istati Uniti u l-bonds korporattivi tal-Istati Uniti B (minflok BB) bl-istess tul ta’ żmien. Skont id-definizzjonijiet tal-klassifikazzjoni tal-kreditu ta’ Standard & Poor’s, obbligant bi klassifikazzjoni “B” huwa aktar vulnerabbli mill-obbliganti bi klassifikazzjoni “BB”, iżda bħalissa l-obbligant xorta għandu l-kapaċità li jissodisfa l-impenji finanzjarji tiegħu. Madankollu, kundizzjonijiet ta’ negozju, finanzjarji jew ekonomiċi avversi jistgħu jnaqqsu l-kapaċità jew ir-rieda tal-obbligant li jissodisfa l-impenji finanzjarji tiegħu. Dan il-valur referenzjarju huwa għalhekk ikkunsidrat xieraq biex jirrifletti r-riskju addizzjonali li ġej mill-użu ta’ kreditu rotanti bħala finanzjament fuq perjodu qasir.

(324)

Il-Kummissjoni għalhekk użat dan bħala l-valur referenzjarju rilevanti għad-dejn kollu fuq perjodu qasir, inkluż is-self, b’maturità ta’ sentejn jew inqas ipprovdut lil kumpaniji li kienu qegħdin jużaw kreditu rotanti.

(325)

Għas-self li jifdal b’maturità ta’ aktar minn sentejn u għal kumpaniji li ma kellhomx kreditu rotanti, il-Kummissjoni reġgħet lura għall-valur referenzjarju ġenerali li jagħti l-ogħla grad ta’ bonds ta’ “Grad mhux ta’ investiment”, kif spjegat fil-premessa (306).

(326)

Il-Kummissjoni sabet li ċerti kumpaniji fl-grupp ħarġu bonds bl-iskop ta’ ristrutturar tad-dejn. F’dan il-każ, kif spjegat fit-Taqsima 3.4.2.2, il-Kummissjoni kkunsidrat li l-kumpaniji kkonċernati huma f’sitwazzjoni finanzjarja agħar minn dik li qed jissuġġerixxu r-rapporti finanzjarji mal-ewwel daqqa t’għajn, u li hemm riskju addizzjonali relatat mal-finanzjament tagħhom fuq perjodu qasir u twil. Għalhekk, sabiex tqis l-iskopertura akbar għar-riskju, il-Kummissjoni waqqgħet livell wieħed fl-iskala ta’ klassifikazzjoni tar-riskju u adattat il-kalkolu tal-firxa relattiva wkoll għall-finanzjament fit-tul tagħhom, inkluż is-self, billi għamlet paragun bejn il-bonds korporattivi tal-Istati Uniti AA u l-Istati Uniti B.

(327)

Fl-aħħar nett, peress li l-kumpanija omm CNBM ma kkooperatx, il-benefiċċju għal self preferenzjali fil-livell ta’ CNBM ġie stabbilit bl-użu tal-metodoloġija spjegata f’din it-taqsima, applikata għall-informazzjoni disponibbli pubblikament fir-rapport annwali tal-2018 ta’ din il-kumpanija, bħal obbligazzjonijiet pendenti, il-kost medju tal-kapital u d-durata medja tas-self.

(328)

Kif imsemmi fil-premessi (250) sa (252) ta’ hawn fuq, l-istituzzjonijiet finanzjarji Ċiniżi li jsellfu ma pprovdew l-ebda valutazzjoni tal-affidabbiltà kreditizja. Għalhekk, sabiex tistabbilixxi l-benefiċċju, il-Kummissjoni kellha tivvaluta jekk ir-rati tal-imgħax għas-self mogħtija lil Yuntianhua Group kinux fil-livell tas-suq.

(329)

Il-produtturi esportaturi tal-Yuntianhua Group ippreżentaw lilhom infushom f’sitwazzjoni finanzjarja ġeneralment profittabbli skont il-kontijiet finanzjarji tiegħu.

(330)

Madankollu, l-analiżi tal-likwidità fuq perjodu qasir tqajjem tħassib għaż-żewġ kumpaniji li jesportaw billi d-djun fuq perjodu qasir fl-PI jirrappreżentaw minn 90 għal aktar minn 100 fil-mija tal-fatturat tal-kumpaniji, b’xejra ta’ żieda mis-sena ta’ qabel. L-użu tad-dejn fuq perjodu qasir huwa sinifikanti fiż-żewġ kumpaniji. Għalkemm wieħed mill-produtturi esportaturi ma kellu l-ebda self matul il-PI, huwa ffinanzja l-biċċa l-kbira tax-xiri tiegħu, kif ukoll parti minn kost ieħor mhux operattiv, permezz ta’ abbozzi ta’ aċċettazzjoni bankarja, strument b’maturità li ġeneralment tkun ta’ inqas minn sena.

(331)

Is-CPIC, l-ewwel azzjonist dirett u fornitur ewlieni għall-produtturi esportaturi, kien profittabbli matul il-PI. Madankollu, naqqas ir-redditu mal-ekwità mis-sena ta’ qabel. Barra minn hekk, il-kumpanija tippreżenta problemi bil-likwidità, peress li d-djun tagħha fuq perjodu qasir jirrappreżentaw minn 80 sa 90 % tad-dejn totali. It-tqabbil tal-assi attwali tal-kumpanija mal-obbligazzjonijiet kurrenti tagħha jagħti proporzjon kurrenti (91) b’valur baxx, taħt il-1, li jqajjem tħassib dwar il-kapaċità tagħha li tħallas lura djun fuq perjodu qasir. Bl-istess mod, il-Kummissjoni stabbiliet l-użu estensiv ta’ abbozzi ta’ aċċettazzjoni bankarja biex tiffinanzja x-xiri tagħha.

(332)

Yunnan Yuntianhua Group Co., Ltd., il-kumpanija omm tal-Yuntianhua Group, involuta fil-katina tal-provvista tal-prodott investigat, kienet qed tagħmel telf matul il-PI. It-tqabbil tal-assi kurrenti tal-kumpanija mal-obbligazzjonijiet kurrenti tagħha, permezz tal-proporzjon attwali ta’ inqas minn 1, iqajjem tħassib serju dwar il-likwidità tagħha u dwar il-kapaċità tagħha li tħallas lura d-djun fuq perjodi qosra. Barra minn hekk, l-investigazzjoni sabet li l-kumpanija ħarġet bonds bl-għan espliċitu li tħallas lura d-dejn. Ġie stabbilit ukoll l-użu ta’ self rotanti.

(333)

Il-Kummissjoni nnutat li l-Yuntianhua Group ingħata klassifikazzjoni AA minn aġenzija tal-klassifikazzjoni tal-kreditu Ċiniża. Fid-dawl tad-distorsjonijiet ġenerali tal-klassifikazzjonijiet tal-kreditu Ċiniżi msemmija fil-premessi (279) sa (285) hawn fuq, il-Kummissjoni kkonkludiet li din il-klassifikazzjoni mhijiex affidabbli.

(334)

Il-Kummissjoni kkunsidrat li s-sitwazzjoni finanzjarja globali tal-grupp tikkorrispondi għal klassifikazzjoni BB, li hija l-ogħla klassifikazzjoni li ma għadhiex tikkwalifika bħala “grad ta’ investiment”. “Grad ta’ investiment” ifisser li l-bonds maħruġa mill-kumpanija jiġu ġġudikati mill-aġenzija ta’ klassifikazzjoni bħala li x’aktarx jissodisfaw biżżejjed l-obbligi ta’ ħlas li l-banek huma permessi li jinvestu fihom.

(335)

Il-primjum mistenni fuq bonds maħruġa minn ditti b’din il-klassifikazzjoni (BB) imbagħad kien applikat għar-rata ta’ self standard tal-PBOC sabiex tiġi stabbilita r-rata tas-suq.

(336)

Dak il-marġni kummerċjali kien iddeterminat bil-kalkolu tal-firxa relattiva bejn l-indiċijiet tal-bonds korporattivi bi klassifikazzjoni AA tal-Istati Uniti u l-bonds korporattivi tal-Istati Uniti bi klassifikazzjoni BB abbażi tad-data ta’ Bloomberg għas-segmenti industrijali. Il-firxa relattiva kkalkulata b’dan il-mod imbagħad ġiet miżjuda mar-rati normattivi tal-imgħax kif ippubblikati mill-PBOC fid-data meta ngħata s-self (92), u għall-istess tul ta’ żmien bħas-self inkwistjoni. Dan sar individwalment għal kull self u lokazzjoni finanzjarja ipprovduti lill-kumpanija.

(337)

Fir-rigward ta’ self denominat f’muniti barranin fir-RPĊ, tapplika l-istess sitwazzjoni fir-rigward tad-distorsjonijiet tas-suq u n-nuqqas ta’ klassifikazzjonijiet tal-kreditu validi, għaliex dan is-self huwa mogħti mill-istess istituzzjonijiet finanzjarji Ċiniżi. Għalhekk, kif instab qabel, sabiex jiġi stabbilit valur referenzjarju xieraq intużaw bonds korporattivi kklassifikati BB f’denominazzjonijiet rilevanti maħruġa matul il-perjodu ta’ investigazzjoni.

(338)

Barra minn hekk, kif spjegat fit-Taqsima 3.4.2.1 l-eżistenza ta’ kreditu rotanti f’kumpanija partikolari hija meqjusa bħala indikazzjoni li l-kumpanija hija f’sitwazzjoni finanzjarja agħar minn dak li jissuġġerixxu r-rapporti finanzjarji mal-ewwel daqqa t’għajn, u li hemm riskju addizzjonali relatat ma’ problemi ta’ likwidità fuq perjodu ta’ żmien qasir. Tabilħaqq, il-kreditu rotanti ġeneralment jiġi konkluż għal żmien qasir. Huwa improbabbli ħafna li kreditu rotanti jkollu maturità ta’ aktar minn sentejn, u l-evidenza tas-self ivverifikata fil-kumpaniji inklużi fil-kampjun appoġġjat din il-konklużjoni.

(339)

Għalhekk, sabiex titqies l-iskopertura akbar għar-riskju tal-banek meta jipprovdu finanzjament għal perjodu qasir lill-kumpaniji b’self rotanti, il-Kummissjoni waqqgħet livell wieħed fl-iskala tal-klassifikazzjoni tar-riskju u adattat il-kalkolu tal-firxa relattiva għall-finanzjament għal żmien qasir kollu tal-kumpaniji kkonċernati. Il-Kummissjoni għalhekk għamlet paragun bejn il-bonds korporattivi AA tal-Istati Uniti u l-bonds korporattivi tal-Istati Uniti B (minflok BB) bl-istess tul ta’ żmien. Skont id-definizzjonijiet tal-klassifikazzjoni tal-kreditu ta’ Standard & Poor’s, obbligant bi klassifikazzjoni “B” huwa aktar vulnerabbli mill-obbliganti bi klassifikazzjoni “BB”, iżda bħalissa l-obbligant xorta għandu l-kapaċità li jissodisfa l-impenji finanzjarji tiegħu. Madankollu, kundizzjonijiet ta’ negozju, finanzjarji jew ekonomiċi avversi jistgħu jnaqqsu l-kapaċità jew ir-rieda tal-obbligant li jissodisfa l-impenji finanzjarji tiegħu. Dan il-valur referenzjarju huwa għalhekk ikkunsidrat xieraq biex jirrifletti r-riskju addizzjonali li ġej mill-użu ta’ kreditu rotanti bħala finanzjament fuq perjodu qasir.

(340)

Il-Kummissjoni għalhekk użat dan bħala l-valur referenzjarju rilevanti għad-dejn kollu fuq perjodu qasir, inkluż is-self, b’maturità ta’ sentejn jew inqas ipprovdut lil kumpaniji li kienu qegħdin jużaw kreditu rotanti.

(341)

Għas-self li jifdal b’maturità ta’ aktar minn sentejn u għal kumpaniji li ma kellhomx kreditu rotanti, il-Kummissjoni reġgħet lura għall-valur referenzjarju ġenerali li jagħti l-ogħla grad ta’ bonds ta’ “Grad mhux ta’ investiment”, kif spjegat fil-premessa (306).

(342)

Il-Kummissjoni sabet li ċerti kumpaniji fl-grupp ħarġu bonds bl-iskop ta’ ristrutturar tad-dejn. F’dan il-każ, kif spjegat fit-Taqsima 3.4.2.2, il-Kummissjoni kkunsidrat li l-kumpaniji kkonċernati huma f’sitwazzjoni finanzjarja agħar minn dik li qed jissuġġerixxu r-rapporti finanzjarji mal-ewwel daqqa t’għajn, u li hemm riskju addizzjonali relatat mal-finanzjament tagħhom fuq perjodu qasir u twil. Għalhekk, sabiex tqis l-iskopertura akbar għar-riskju, il-Kummissjoni waqqgħet livell wieħed fl-iskala ta’ klassifikazzjoni tar-riskju u adattat il-kalkolu tal-firxa relattiva wkoll għall-finanzjament fit-tul tagħhom, inkluż is-self, billi għamlet paragun bejn il-bonds korporattivi tal-Istati Uniti AA u l-Istati Uniti B.

(343)

L-investigazzjoni wriet li l-gruppi kollha inklużi fil-kampjun ta’ produtturi esportaturi bbenefikaw minn self preferenzjali matul il-perjodu ta’ investigazzjoni. Minħabba l-eżistenza ta’ kontribuzzjoni finanzjarja, benefiċċju għall-produtturi esportaturi u speċifiċità, il-Kummissjoni qieset is-self preferenzjali bħala sussidju kumpensabbli.

(344)

L-ammont ta’ sussidju stabbilit b’mod provviżorju fir-rigward tas-self preferenzjali matul il-perjodu ta’ investigazzjoni għall-gruppi ta’ kumpaniji inklużi fil-kampjun jammonta għal:

Finanzjament preferenzjali: self

(345)

L-investigazzjoni wriet li l-istituzzjonijiet finanzjarji Ċiniżi pprovdew ukoll linji ta’ kreditu b’kundizzjonijiet preferenzjali b’rabta mal-għoti ta’ finanzjament lil kull kumpanija inkluża fil-kampjun. Dawn kienu jikkonsistu fi ftehimiet qafas, li taħthom il-bank jippermetti lill-kumpaniji fil-kampjun jużaw diversi strumenti ta’ dejn, bħal self ta’ kapital operatorju, abbozzi ta’ aċċettazzjoni bankarja, kontijiet dokumentarji, forom oħra ta’ finanzjament tal-kummerċ, eċċ., sa ċertu ammont massimu.

(346)

L-għan ta’ linja ta’ kreditu huwa li jiġi stabbilit limitu ta’ self li l-kumpanija tista’ tuża fi kwalunkwe ħin biex tiffinanzja l-operazzjonijiet attwali tagħha u b’hekk tagħmel il-finanzjament tal-kapital operatorju flessibbli u immedjatament disponibbli meta jkun meħtieġ. L-investigazzjoni wriet li ż-żewġ produtturi esportaturi fil-kampjun kellhom ftehimiet tal-linja ta’ kreditu ma’ banek differenti li koprew diversi strumenti ta’ finanzjament fuq perjodu qasir bil-għan li jiġu ffinanzjati l-ispejjeż operatorji. Konsegwentement, il-Kummissjoni qieset li fil-prinċipju, il-finanzjament kollu fuq żmien qasir tal-kumpaniji fil-kampjun jenħtieġ li jkun kopert minn tip ta’ strument ta’ linja ta’ kreditu, inklużi l-abbozzi ta’ aċċettazzjoni bankarja, li jinħarġu fuq bażi regolari biex jiġu ffinanzjati l-operazzjonijiet attwali.

(347)

Għalhekk, il-Kummissjoni qabblet l-ammont tal-linji ta’ kreditu disponibbli għall-kumpaniji li kkooperaw matul il-perjodu ta’ investigazzjoni mal-ammont ta’ finanzjament fuq perjodu qasir użat minn dawn il-kumpaniji matul l-istess perjodu biex jiġi stabbilit jekk il-finanzjament kollu fuq perjodu qasir kienx kopert minn linja ta’ kreditu. F’każ li l-ammont ta’ finanzjament għal perjodu qasir jaqbeż il-limitu ta’ linja ta’ kreditu, il-Kummissjoni żiedet l-ammont tal-linja ta’ kreditu eżistenti bl-ammont użat effettivament mill-produtturi esportaturi lil hinn mil-limitu ta’ dik il-linja ta’ kreditu.

(348)

Taħt ċirkostanzi normali tas-suq, il-linji ta’ kreditu jkunu soġġetti għall-hekk imsejħa tariffa ta’ “arranġament” jew “impenn” biex jikkumpensaw għall-kostijiet u għar-riskji tal-bank, kif ukoll għal tariffi ta’ tiġdid debitati fuq bażi annwali għat-tiġdid tal-validità tal-linji ta’ kreditu. Madankollu, il-Kummissjoni sabet li l-kumpaniji kollha inklużi fil-kampjun ibbenefikaw minn linji ta’ kreditu pprovduti bla ħlas.

(349)

Wara d-divulgazzjoni definittiva, il-GTĊ argumenta li l-affermazzjoni tal-Kummissjoni li f’ċirkostanzi normali tas-suq, il-linji ta’ kreditu jkunu soġġetti għal tariffi ta’ impenn, ma kinitx ġustifikata fid-dawl tal-kunsiderazzjoni tagħha stess fil-każijiet tal-Inġenji tal-Ajru. Skont il-GTĊ, it-tariffi ta’ impenn japplikaw biss meta l-linja ta’ kreditu tkun linja ta’ kreditu impenjata. Madankollu, il-Kummissjoni ma stabbilixxietx li l-linji ta’ kreditu inkwistjoni kienu linji ta’ kreditu impenjati. Il-GTĊ fakkar li f’“KE - Inġenji tal-ajru”, l-UE nnifisha sostniet li l-fatt li l-BEI ma ddebitax tariffi ta’ impenn kien ġustifikat għaliex “… (i) għal kuntratti b’ “rata miftuħa” (jiġifieri kuntratti fejn ir-rati mhumiex fissi ex ante), ma hemm l-ebda ċertezza dwar iż-żmien tad-disponibbiltà tal-fondi, u l-BEI ma jimpenjax ruħu għal rata preċiża ta’ imgħax”.

(350)

Bi tweġiba għal din l-affermazzjoni, il-Kummissjoni nnutat li l-argument tal-UE dwar it-tariffi ta’ impenn fil-proċedimenti KE-Inġenji tal-ajru ma ġiex segwit mill-Bord fis-sejbiet finali tiegħu. B’mod partikolari, il-Bord stabbilixxa li n-nuqqas ta’ tariffi ta’ impenn mill-BEI biex jikkumpensa għall-impenn tal-BEI li jagħmel disponibbli finanzjament kien aktar vantaġġuż minn self komparabbli mingħand mutwanti kummerċjali u ta benefiċċju (93). Għaldaqstant, din l-affermazzjoni ġiet miċħuda.

(351)

Skont l-Artikolu 6(d)(ii) tar-Regolament bażiku, il-Kummissjoni qieset il-benefiċċju hekk mogħti lir-riċevituri li huwa d-differenza bejn l-ammont li l-kumpanija ħallset bħala tariffa għall-ftuħ jew għat-tiġdid ta’ linji ta’ kreditu minn istituzzjonijiet finanzjarji Ċiniżi u l-ammont li l-kumpanija kien ikollha tħallas għal linja ta’ kreditu kummerċjali komparabbli li tista’ tinkiseb mis-suq.

(352)

Wara d-divulgazzjoni, bosta partijiet affermaw li l-Kummissjoni ma wettqitx analiżi tal-ispeċifiċità għal-linji ta’ kreditu. Barra minn hekk, il-GTĊ tenna l-kummenti tiegħu żviluppati fit-Taqsima 3.1 hawn fuq, billi qal li l-GFF mhijiex industrija mħeġġa u l-ebda dokument imsemmi mill-Kummissjoni f’dan ir-rigward ma juri li l-linji ta’ kreditu pprovduti lill-industrija tal-GFF huma speċifiċi skont it-tifsira tal-Artikolu 2 tal-Ftehim SCM.

(353)

Il-Kummissjoni ma għamlitx analiżi tal-ispeċifiċità separata peress li l-linji ta’ kreditu huma intrinsikament marbuta ma’ tipi oħra ta’ self preferenzjali, u b’hekk isegwu l-istess analiżi tal-ispeċifiċità kif żviluppata fit-Taqsima 3.4.2.3 hawn fuq għas-self. Għaldaqstant, dawn l-affermazzjonijiet ġew miċħuda.

(354)

Il-valur referenzjarju xieraq għat-tariffa tal-arranġament ġie stabbilit għal 1,5 % b’referenza għal data (94) disponibbli pubblikament għall-ftuħ ta’ linji ta’ kreditu simili f’sitwazzjonijiet simili (iżda mhux distorti). L-ammont tat-tariffa tal-arranġament pagabbli fuq il-bażi ta’ somma f’daqqa fiż-żmien tal-ftuħ tal-linja ta’ kreditu. Għalhekk, il-Kummissjoni applikat il-valur referenzjarju għall-ammont tal-linji ta’ kreditu miftuħa matul il-perjodu ta’ investigazzjoni.

(355)

Għal linji ta’ kreditu eżistenti qabel il-bidu tal-PI u mġedda matul il-PI, intużat tariffa ta’ tiġdid ta’ 1,25 % bħala l-valur referenzjarju skont l-istess sors. L-ammont tat-tariffa tat-tiġdid huwa pagabbli annwalment fuq il-bażi ta’ somma f’daqqa fiż-żmien it-tiġdid tal-linja ta’ kreditu. Għalhekk, il-Kummissjoni applikat il-valur referenzjarju għall-ammont tal-linji ta’ kreditu mġedda matul il-PI.

(356)

Wara d-divulgazzjoni definittiva, waħda mill-partijiet ikkummentat li l-kostijiet marbuta mat-tariffi tal-arranġament u tat-tiġdid jiġu ta’ spiss rinunzjati mill-banek biex jiżguraw klijenti kummerċjali kbar. Il-kumpanija pprovdiet ukoll eżempju ta’ bank fl-Istati Uniti, li ma ddebitax tariffa ta’ arranġament u ddebita biss tariffa ta’ tiġdid annwali ta’ 0,25 % għal linja ta’ kreditu impenjat ta’ bejn USD 100 001 u USD 3 miljun (95). Barra minn hekk, minħabba li l-Istati Uniti huma suq ferm akbar mir-Renju Unit u li l-Kummissjoni bbażat ruħha fuq klassifikazzjonijiet tal-bonds mill-Istati Uniti biex tistabbilixxi l-affidabbiltà kreditizja, tali valur referenzjarju tqies li huwa ferm aktar xieraq mill-valur referenzjarju tar-Renju Unit għal negozji żgħar użati mill-Kummissjoni.

(357)

Il-Kummissjoni nnutat li l-allegazzjonijiet li l-kostijiet marbuta mat-tariffi tal-arranġament u tat-tiġdid jiġu ta’ spiss rinunzjati mill-banek biex jiżguraw klijenti kummerċjali kbar ma kienu sostanzjati mill-ebda evidenza. Barra minn hekk, il-Kummissjoni rrieżaminat il-valur referenzjarju propost mill-kumpanija u sabet li dan il-valur referenzjarju kien jikkonċerna speċifikament linji ta’ kreditu għal negozji żgħar b’ammont massimu ta’ USD 3 miljun, u b’mod partikolari relatat ma’ ħtiġijiet ta’ kapital operatorju fuq perjodu qasir. Għall-kuntrarju, il-valur referenzjarju wżat mill-Kummissjoni kellu limitu minimu ta’ GBP 25 000, iżda mingħajr limitu massimu, ma kienx hemm limitazzjonijiet f’termini tal-użu tal-kapital ipprovdut jew tat-tul, u kien separat minn prodott finanzjarju ieħor imsemmi fl-istess dokument, iżda speċifikament imfassal għall-impriżi żgħar. Il-valur referenzjarju tal-Kummissjoni kien għalhekk iktar adattat għall-klijenti l-kbar. Barra minn hekk, il-bank tal-Istati Uniti li jipprovdi l-linji ta’ kreditu fl-eżempju magħżul kien bank li jopera esklussivament fis-suq tal-Istati Uniti, filwaqt li l-HSBC (il-valur referenzjarju użat mill-Kummissjoni) huwa bank globali, li jopera fis-suq Ċiniż ukoll. Ma hemm l-ebda evidenza disponibbli għall-Kummissjoni li tindika li l-HSBC jirrinunzja għat-tariffi skont id-daqs tal-klijent. F’dan ir-rigward ukoll, il-valur referenzjarju tal-Kummissjoni deher aktar xieraq. Għalhekk, l-affermazzjonijiet tal-kumpanija ġew miċħuda.

(358)

L-abbozzi ta’ aċċettazzjoni bankarji huma prodott finanzjarju mmirat lejn l-iżvilupp ta’ suq monetarju domestiku aktar attiv permezz tat-twessigħ tal-faċilitajiet ta’ kreditu. Hija forma ta’ finanzjament fuq perjodu qasir li tista’ “tnaqqas il-kost tal-fond u ssaħħaħ l-effiċjenza tal-kapital” ta’ min ikun qed jippreleva (96).

(359)

L-abbozzi ta’ aċċettazzjoni bankarji jistgħu jintużaw biss biex jiġu saldati tranżazzjonijiet kummerċjali ġenwini u minn jiġbed irid jipproduċi biżżejjed evidenza f’dak ir-rigward, eż. permezz ta’ ftehim ta’ xiri/bejgħ, fattura u ordni ta’ kunsinna eċċ. L-abbozzi ta’ aċċettazzjoni bankarji jistgħu jintużaw bħala mezz standard ta’ pagament fi ftehimiet ta’ xiri flimkien ma’ mezzi oħra bħal rimessi jew ordni ta’ flus.

(360)

L-abbozz ta’ aċċettazzjoni bankarja jitfassal mill-applikant (min ikun se jippreleva, li huwa wkoll ix-xerrej fit-tranżazzjoni kummerċjali sottostanti) u jiġi aċċettat minn bank. Meta jaċċetta l-abbozz, il-bank jaċċetta li jħallas bla kundizzjonijiet tal-ammont ta’ flus speċifikat fl-abbozz lill-benefiċjarju/portatur fid-data indikata (id-data tal-maturità).

(361)

B’mod ġenerali, il-kuntratti ta’ aċċettazzjoni bankarja fihom il-lista tat-tranżazzjonijiet koperti mill-ammont tal-abbozz b’indikazzjoni tad-data ta’ maturità ta’ pagament mal-fornitur u tad-data tal-maturità tal-abbozz ta’ aċċettazzjoni bankarja.

(362)

Il-Kummissjoni stabbilit li ġeneralment l-abbozzi ta’ aċċettazzjoni bankarja jinħarġu fil-qafas ta’ ftehim ta’ abbozz ta’ aċċettazzjoni bankarja li jispeċifika l-identità tal-bank, tal-fornituri u tax-xerrej, l-obbligi tal-bank u tax-xerrej u li jagħti dettalji tal-valur għal kull fornitur, id-data ta’ maturità tal-pagament miftiehma mal-fornitur u d-data tal-maturità tal-abbozz ta’ aċċettazzjoni bankarja.

(363)

Il-Kummissjoni stabbiliet ukoll li l-ftehimiet ta’ linji ta’ kreditu ġeneralment jelenkaw abbozzi ta’ aċċettazzjoni bankarja bħala l-użu possibbli tal-limitu finanzjarju flimkien ma’ strumenti finanzjarji oħra fuq perjodu qasir bħal self ta’ kapital operatorju.

(364)

Skont il-kundizzjonijiet stabbiliti minn kull bank, min jippreleva jista’ jkun meħtieġ jagħmel depożitu żgħir f’kont apposta, jagħmel pleġġ u jħallas kummissjoni fuq l-aċċettazzjoni. Fi kwalunkwe każ, min jippreleva jkun obbligat jittrasferixxi l-ammont sħiħ tal-abbozz tal-aċċettazzjoni bankarja fil-kont apposta mhux aktar tard mid-data tal-maturità tal-abbozz tal-aċċettazzjoni bankarja.

(365)

Ladarba tiġi aċċettata mill-bank, min jippreleva jaqbel mal-abbozz ta’ aċċettazzjoni bankarja u jittrasferih lil min qed jitħallas, li huwa wkoll il-fornitur tat-tranżazzjoni kummerċjali sottostanti, bħala ħlas tal-fattura. Konsegwentement, l-obbligu ta’ ħlas tax-xerrej (min jippreleva) lejn il-fornitur (il-benefiċjarju) jiġi kkanċellat. Jinħoloq obbligu ġdid ta’ pagament fuq ix-xerrej lejn il-bank tal-aċċettazzjoni għall-istess ammont (min jippreleva jkollu l-obbligu jħallas lill-bank fi flus qabel il-maturità tal-abbozz tal-aċċettazzjoni bankarja). Għalhekk, il-ħruġ ta’ abbozzi ta’ aċċettazzjoni bankarja għandu l-effett li jissostitwixxi l-obbligu ta’ min jippreleva lejn il-fornitur tiegħu ma’ obbligu lejn il-bank.

(366)

Il-maturità tal-abbozzi ta’ aċċettazzjoni bankarja tvarja skont il-kundizzjonijiet stabbiliti minn kull bank u tista’ tkun sa sena.

(367)

Il-benefiċjarju (jew id-detentur) tal-abbozz tal-aċċettazzjoni bankarja għandu tliet għażliet qabel il-maturità:

(368)

Id-data tal-ħruġ tal-abbozz ta’ aċċettazzjoni bankarja tikkorrispondi b’mod ġenerali mad-data ta’ maturità ta’ pagament miftiehma mal-fornitur iżda tista’ tkun ukoll data qabel jew wara d-data ta’ maturità tal-pagament. L-investigazzjoni sabet li, sa fejn huma kkonċernati l-kumpaniji fil-kampjun, id-data tal-ħruġ kienet ġeneralment dak inhar tad-data ta’ maturità jew qabel mal-fornitur u f’xi każijiet anki wara d-data ta’ maturità tal-pagament. Il-Kummissjoni stabbiliet li l-maturità tal-abbozzi ta’ aċċettazzjoni bankarja tal-kumpaniji fil-kampjun, fil-biċċa l-kbira tal-każijiet kienet minn sitt xhur sa 12-il xahar wara d-data ta’ maturità tal-pagament tal-fattura.

(369)

Rigward it-trattament kontabilistiku tal-abbozzi ta’ aċċettazzjoni bankarja, dawn huma rikonoxxuti bħala obbligazzjonijiet lejn il-bank fil-kontijiet ta’ min jippreleva, jiġifieri l-produtturi esportaturi fil-kampjun.

(370)

Il-Credit Reference Center of the People’s Bank of China (‘CRCP’) jagħraf l-abbozzi ta’ aċċettazzjoni bankarja bħala “kreditu mhux saldat” mogħti mill-banek fl-istess livell tas-self, l-ittri ta’ kreditu jew il-finanzjament ta’ kummerċ. Jenħtieġ li jiġi nnutat ukoll li s-CRCP huwa fornit mill-istituzzjonijiet finanzjarji li jagħtu diversi tipi ta’ self u li tali istituzzjonijiet finanzjarji b’hekk irrikonoxxew l-abbozzi ta’ aċċettazzjoni bankarja bħala obbligazzjonijiet lejhom. Barra minn hekk, il-ftehimiet ta’ aċċettazzjoni bankarja miġbura matul l-investigazzjoni jistabbilixxu li, jekk ix-xerrej ma jagħmilx il-ħlas sħiħ fid-data ta’ skadenza tal-abbozzi ta’ aċċettazzjoni bankarja, il-bank jittratta l-ammont mhux imħallas bħala self li għadu ma tħallasx lill-bank.

(371)

Wara d-divulgazzjoni definittiva, produttur esportatur minn CNBM Group afferma li CRCP ma jirrikonoxxix l-abbozzi ta’ aċċettazzjoni bankarja bħala obbligazzjoni lejn il-bank fir-rapporti ta’ kreditu. Din il-parti interessata rreferiet għan-nota tal-obbligazzjonijiet fir-Rapport ta’ Kreditu ta’ CRCR fejn hemm speċifikat li “Il-bilanċ tad-dejn jinkludi l-avvanzi mhux saldati, is-self, is-self tal-klassi, il-finanzjament ta’ kummerċ, il-fatturament, il-kontijiet ta’ skont, il-garanziji u d-dejn ikkumpensat ta’ partijiet terzi, u d-djun immaniġġjati minn kumpanija tal-immaniġġjar tal-assi fil-mument tal-istatistika”. Hija żiedet ukoll li f’waħda mill-kumpaniji tal-grupp is-“Sommarju tal-informazzjoni” fir-rapport ta’ kreditu tirreferi għall-“bilanċ attwali tal-obbligazzjonijiet”, li ma kienx jinkludi l-ammonti ta’ abbozzi ta’ aċċettazzjoni bankarja iżda biss l-ammont ta’ self.

(372)

F’dan ir-rigward, il-Kummissjoni tindika li r-rapporti ta’ kreditu jelenkaw l-abbozzi ta’ aċċettazzjoni bankarja fis-“Sommarju tal-informazzjoni dwar il-kreditu mhux saldat” fl-istess livell bħas-self, l-ittri ta’ kreditu, il-kontijiet skontati, il-fatturament jew il-finanzjament ta’ kummerċ. Il-fatt li l-abbozzi ta’ aċċettazzjoni bankarja ma jingħaddux fil-“bilanċ tad-dejn” jew fil-“bilanċ attwali tal-obbligazzjonijiet” fiż-żmien speċifiku meta nħareġ ir-rapport ma jaffettwax il-klassifikazzjoni tagħhom bħala kreditu, li huwa rikonoxxut b’mod ċar minn CRCP fir-rapporti ta’ kreditu.

(373)

Kif diġà ssemma fil-premessa (358), l-abbozzi ta’ aċċettazzjoni bankarja huma forma ta’ finanzjament fuq perjodu qasir. Barra minn hekk, kif iddikjarat mill-People’s Bank of China fis-sit wed tiegħu, “the bank acceptance draft can guarantee the establishment and performance of the contract between the buyer and the seller, as well as promote the capital turnover via the intervention of Bank of China’s credit ” (97). Barra minn hekk, fuq is-sit web tiegħu id-DBS Bank jirreklama l-abbozzi ta’ aċċettazzjoni bankarja bħala mezz biex “jittejjeb il-kapital operatorju permezz ta’ differiment ta’ pagamenti” (98).

(374)

Kummissjoni sabet li l-abbozzi ta’ aċċettazzjoni bankarja jintużaw l-aktar bħala mezz ta’ ħlas fi tranżazzjonijiet kummerċjali bħala sostitut għal ordni ta’ flus u b’hekk jiġi ffaċilitat id-dħul ta’ flus u l-kapital operatorju ta’ min jippreleva. Minn perspettiva ta’ flus, l-istrument de facto jagħti lil min jippreleva data ta’ maturità tal-pagament ta’ sitt xhur jew sena minħabba li l-pagament attwali fi flus tal-ammont tat-tranżazzjoni jseħħ mal-maturità tal-abbozz ta’ aċċettazzjoni bankarja u mhux fil-mument meta min jippreleva kellu jħallas lill-fornitur tiegħu. Fin-nuqqas ta’ strument finanzjarju bħal dan, min jippreleva jkollu jew juża l-kapital operatorju tiegħu stess, b’kost, jew jidħol f’kuntratt ta’ self ta’ kapital operatorju fuq perjodu qasir ma’ bank sabiex iħallas lill-fornituri tiegħu, ukoll b’kost. Fil-fatt, billi jħallas b’abbozz ta’ aċċettazzjoni bankarja, min jippreleva juża l-oġġetti jew is-servizzi fornuti għal perjodu ta’ sitt xhur sa sena mingħajr ma javvanza l-ebda flus u mingħajr ma jġarrab l-ebda kost. Bħala eżempju tal-użu ta’ abbozzi ta’ aċċettazzjoni bankarja bħala sostitut għal self fuq perjodu qasir, il-Kummissjoni stabbilixxiet li wieħed mill-produtturi esportaturi fil-kampjun ma kellu l-ebda self. Madankollu, l-abbozzi ta’ aċċettazzjoni bankarja maħruġa minn dan il-produttur esportatur matul il-PI kienu jirrappreżentaw 70 % tal-kost operattiv tiegħu. Bl-istess mod, l-abbozzi ta’ aċċettazzjoni bankarja fi tmiem il-PI kienet tirrappreżenta aktar minn 53 % tal-obbligazzjonijiet totali tiegħu.

(375)

F’ċirkostanzi normali tas-suq, bħala strument finanzjarju, l-abbozzi ta’ aċċettazzjoni bankarja jimplikaw kost ta’ finanzjament għal min jippreleva. L-investigazzjoni wriet li l-kumpaniji kollha fil-kampjun li użaw abbozzi ta’ aċċettazzjoni bankarja matul il-perjodu ta’ investigazzjoni ħallsu biss kummissjoni għas-servizz ta’ aċċettazzjoni pprovdut mill-bank, li varjat bejn 0,05 % u 0,1 % tal-valur nominali tal-abbozz. Madankollu, l-ebda waħda mill-kumpaniji fil-kampjun ma ġarrbet kost għall-finanzjament permezz ta’ abbozzi ta’ aċċettazzjoni bankarja billi ddifferiet il-ħlas fi flus għall-forniment tal-oġġetti u s-servizzi. Għalhekk, il-Kummissjoni kkunsidrat li l-kumpaniji investigati bbenefikaw minn finanzjament fil-forma ta’ abbozzi ta’ aċċettazzjoni bankarja li għalihom ma ġarrbu l-ebda kost.

(376)

B’kont meħud ta’ dan ta’ hawn fuq, il-Kummissjoni kkonkludiet li s-sistema ta’ aċċettazzjoni bankarja stabbilita fir-RPĊ pprovdiet lill-produtturi esportaturi kollha finanzjament bla ħlas għall-operazzjonijiet kurrenti tagħhom, li tawhom benefiċċju kumpensabbli kif deskritt fil-premessi (395) sa (399) hawn taħt, skont l-Artikolu 3(1)(a)(i) u 3(2) tar-Regolament bażiku.

(377)

Wara d-divulgazzjoni definittiva, iż-żewġ produtturi esportaturi li kkooperaw għamlu kumment li l-abbozzi ta’ aċċettazzjoni bankarja ma jikkostitwixxux self jew kwalunkwe forma oħra ta’ assistenza finanzjarja u li l-Kummissjoni assumiet b’mod żbaljat li l-użu tal-abbozzi ta’ aċċettazzjoni bankarja għandu l-istess effett bħal dak tas-self fuq terminu qasir. Huma argumentaw li d-data ta’ maturità tal-pagament li l-użu ta’ abbozz ta’ aċċettazzjoni bankarja jimplika mhijiex self fuq terminu qasir mingħajr imgħax mogħti minn bank, iżda pjuttost estensjoni tad-data ta’ maturità tal-pagament li l-bejjiegħ jiddeċiedi li jagħti. Yuntianhua Group afferma li l-Kummissjoni ma wrietx l-eżistenza ta’ kontribuzzjoni finanzjarja fil-każ ta’ abbozzi ta’ aċċettazzjoni bankarja. Iż-żewġ produtturi esportaturi li kkooperaw insistew li l-abbozzi ta’ aċċettazzjoni bankarja ma jinvolvu l-ebda finanzjament għaliex l-ebda flus ma jkunu ġew trasferiti mill-bank lil xi parti.

(378)

Kumpanija waħda minn CNBM Group argumentat li l-aċċettazzjoni bankarja ssir biss biex tiffaċilita tranżazzjonijiet bejn partijiet mhux familjari, b’mod li l-bank iżid il-garanzija tiegħu stess li l-pagament isir meta d-data tal-maturità tkun waslet. Barra minn hekk, l-abbozz ta’ aċċettazzjoni bankarja ma jbiddilx id-data tal-pagament kif oriġinarjament prevista fil-kuntratt tal-bejgħ u għalhekk, bank ma jipprovdix, billi jaċċetta abbozz, self fuq terminu qasir. Hija qalet ukoll li l-mod li bih l-abbozzi ta’ aċċettazzjoni bankarja jiddaħħlu fir-reġistri interni tal-kumpanija ma jbiddilx il-konklużjoni li l-abbozzi ta’ aċċettazzjoni bankarja mhumiex xi tip ta’ finanzjament fuq terminu qasir. Din il-parti affermat ukoll li peress li skont il-kuntratt tal-bejgħ, il-bejjiegħ jirċievi l-pagament biss fi żmien sitt xhur jew sena, ix-xerrej ma jkollux bżonn juża l-kapital operatorju tiegħu stess jew jidħol f’kuntratt ta’ self fuq terminu qasir biex iħallas fil-pront, minħabba li l-bejjiegħ diġà jkun aċċetta li l-pagament se jkun differit.

(379)

F’dan ir-rigward, il-Kummissjoni ġibdet l-attenzjoni li hi ma stabbilixxietx li l-abbozzi ta’ aċċettazzjoni bankarja jikkostitwixxu self. Madankollu, il-Kummissjoni kkonkludiet li dawn għandhom effetti ekonomiċi simili għall-finanzjament fuq terminu qasir.

(380)

Kif jissemma fil-premessa (374) il-Kummissjoni stabbiliet li l-abbozzi ta’ aċċettazzjoni bankarja jintużaw l-aktar bħala mezz ta’ ħlas fi tranżazzjonijiet kummerċjali bħala sostitut għal ordni ta’ flus u b’hekk jiġi ffaċilitat id-dħul ta’ flus u l-kapital operatorju ta’ min jippreleva. Il-Kummissjoni sabet ukoll li minn perspettiva ta’ flus, l-istrument jiddifferixxi l-pagament fi flus sal-maturità tal-abbozz ta’ aċċettazzjoni bankarja. Fil-fatt, il-fornitur jitħallas bl-abbozz ta’ aċċettazzjoni bankarja fid-data tal-maturità miftiehma fil-kuntratt, minflok fi flus. Il-pagament fi flus mal-maturità huwa pagament mill-prelevatur lill-bank skont ir-relazzjoni kuntrattwali maħluqa bejn il-prelevatur u l-bank fil-qafas tal-abbozz tal-aċċettazzjoni bankarja. Il-fornituri jistgħu wkoll japprovaw abbozzi ta’ aċċettazzjoni bankarja biex iħallsu lil fornituri oħra (minflok flus). Għalhekk, kif indikat fil-premessa (374), l-użu ta’ abbozzi ta’ aċċettazzjoni bankarja jippermetti lill-prelevaturi jużaw l-oġġetti jew is-servizzi fornuti għal perjodu ta’ sitt xhur sa sena mingħajr ma javvanzaw flus u mingħajr ma jġarrbu l-ebda kost. Il-Kummissjoni tenniet ukoll li People’s Bank of China jippreżenta l-abbozzi ta’ aċċettazzjoni bankarja bħala strument li jista’ “inaqqas il-kost tal-fondi u jtejjeb l-effiċjenza tal-kapital” tal-prelevatur “ kif ukoll jippromwovi l-fatturat kapitali permezz tal-intervent tal-kreditu tal-Bank of China  (99) u DBS Bank jirreklama l-abbozzi ta’ aċċettazzjoni bankarja bħala mezz biex “jittejjeb il-kapital operatorju permezz ta’ differiment tal-pagamenti” (100). Barra minn hekk, il-GTĊ ma kkontestax il-konklużjoni tal-Kummissjoni li l-abbozzi ta’ aċċettazzjoni bankarja huma forma ta’ finanzjament. Barra minn hekk, reċentement, CBIRC ħareġ avviż li fih jiddikjara li sabiex jissaħħaħ l-appoġġ tal-kreditu għall-impriżi downstream f’intrapriżi essenzjali, l-istituzzjonijiet finanzjarji jistgħu jipprovdu appoġġ ta’ kreditu għall-impriżi downstream biex jiksbu oġġetti u jħallsu għal oġġetti billi jiftħu kontijiet ta’ aċċettazzjoni mill-bankarja, ittri domestiċi ta’ kreditu, finanzjament minn qabel, eċċ. (101) Din hija evidenza oħra li turi li l-GTĊ jipperċepixxi l-abbozzi ta’ aċċettazzjoni bankarja bħala forma oħra ta’ appoġġ ta’ kreditu.

(381)

Il-fatt li ma hemm l-ebda trasferiment ta’ flus mill-bank lil xi parti fil-mument tal-ħruġ tal-abbozz ta’ aċċettazzjoni bankarja ma jbiddilx ir-raġunament u l-konklużjonijiet ta’ hawn fuq. Kif diġà ġie spjegat, l-abbozzi ta’ aċċettazzjoni bankarja, kif stabbiliti fir-RPĊ, huma mezz ta’ pagament fi tranżazzjonijiet kummerċjali li jiffavorixxu lill-prelevatur billi jiffaċilitaw il-fatturat u l-kapital operatorju tagħhom. Mil-lat ekonomiku u finanzjarju, l-użu ta’ dan l-istrument jippermetti lill-prelevatur iħallas l-obbligazzjonijiet tiegħu mingħajr ma juża r-riżorsi finanzjarji tal-kumpanija u għalhekk, jikkostitwixxi forma ta’ finanzjament tal-operazzjonijiet ekonomiċi tiegħu. Għall-kuntrarju ta’ dak li jsostnu l-produtturi esportaturi li kkooperaw, dan il-finanzjament mhuwiex mogħti mill-fornitur iżda mill-bank. Kif spjegat fil-premessa (365), ladarba l-abbozz tal-aċċettazzjoni bankarja jiġi aċċettat mill-bank u approvat mill-benefiċjarju (jiġifieri l-fornitur), l-obbligu tal-pagament tax-xerrej (prelevatur) lejn il-fornitur (benefiċjarju) jitħassar. Fil-fatt, il-benefiċjarju (fornitur) jitħallas minn abbozz ta’ aċċettazzjoni bankarja fil-mument miftiehem fil-kuntratt tal-bejgħ (jiġifieri d-data ta’ maturità). Dan ġie kkonfermat ukoll mill-GTĊ matul iż-żjara ta’ verifika, jiġifieri li ladarba l-kumpanija tħallas lill-fornitur bl-abbozz tal-aċċettazzjoni bankarja dawn ma jibqgħux b’obbligu mal-fornitur iżda mal-bank għaliex min talab li jinħareġ l-abbozz ta’ aċċettazzjoni bankarja jkun irid iħallas lill-bank b’mod sħiħ fid-data tal-maturità. Barra minn hekk, bħala mezz ta’ pagament, l-abbozz ta’ aċċettazzjoni bankarja jista’ jintuża mill-fornitur sabiex iħallas l-obbligazzjonijiet tiegħu stess lejn partijiet oħra. Għalhekk, il-fornitur ma jagħtix estensjoni tad-data ta’ maturità. Għall-kuntrarju, il-bank jagħti estensjoni għall-pagament attwali fi flus tat-tranżazzjoni koperta bl-abbozz ta’ aċċettazzjoni bankarja b’sitt xhur jew b’sena u b’hekk jippermetti lill-prelevatur jevita kwalunkwe kost ta’ finanzjament.

(382)

Il-Kummissjoni ma qablitx mal-kumment li peress li skont il-kuntratt tal-bejgħ, il-bejjiegħ jirċievi l-pagament biss fi żmien sitt xhur jew sena, ix-xerrej ma jkollux bżonn juża l-kapital operatorju tiegħu stess jew jidħol f’kuntratt ta’ self fuq terminu qasir biex iħallas fil-pront. Il-Kummissjoni ma qablitx ukoll mad-dikjarazzjoni li l-mod kif il-produtturi esportaturi fil-kampjun jikkontabbilizzaw l-abbozzi ta’ aċċettazzjoni bankarja fir-reġistri interni tagħhom huwa irrilevanti. Fil-fatt, kif diġà ssemma hawn fuq, l-abbozzi ta’ aċċettazzjoni bankarji huma mezz ta’ pagament li jintuża mill-prelevatur biex jonora l-obbligi tiegħu lejn il-benefiċjarju. Id-dikjarazzjoni li “il-bejjiegħ jirċievi biss il-pagament fi żmien sitt xhur jew sena” hija fattwalment skorretta minħabba li l-bejjiegħ jirċievi l-pagament permezz ta’ abbozz ta’ aċċettazzjoni bankarja fid-data ta’ maturità miftiehma fil-kuntratt. Kif diġà ntqal fil-premessa (374), l-abbozzi ta’ aċċettazzjoni bankarja huma stipulati bħala mezz ta’ pagament fi tranżazzjonijiet kummerċjali minflok pagament fi flus u dan huwa maqbul kemm mill-bejjiegħ kif ukoll mix-xerrej. Madankollu, il-pagament fi flus għall-oġġetti u s-servizzi huwa differit għad-data tal-maturità tal-abbozz ta’ aċċettazzjoni bankarja u dan id-differiment jingħata mill-bank. Kif diġà ġie spjegat fil-premessa (365), meta l-bejjiegħ jitħallas b’abbozz ta’ aċċettazzjoni bankarja, l-obbligazzjoni tal-prelevatur lejn il-bejjiegħ tiġi kkanċellata u jinħolqu żewġ obbligazzjonijiet ġodda: obbligazzjoni tal-prelevatur lejn il-bank tal-aċċettazzjoni u obbligazzjoni tal-bank tal-aċċettazzjoni lejn il-bejjiegħ (benefiċjarju) jew id-detentur tal-abbozz ta’ aċċettazzjoni bankarja. Għall-kuntrarju ta’ dak li ġie affermat, il-mod kif il-produtturi esportaturi fil-kampjun jikkontabbilizzaw l-abbozzi ta’ aċċettazzjoni bankarja fir-reġistri interni tagħhom huwa element importanti li juri li, minn naħa l-obbligazzjoni lejn il-bejjiegħ tiġi kkanċellata bil-pagament permezz tal-abbozz ta’ aċċettazzjoni bankarja u, min-naħa l-oħra, tinħoloq obbligazzjoni għall-prelevatur lejn il-bank. Din hija evidenza addizzjonali li permezz tal-użu ta’ abbozzi ta’ aċċettazzjoni bankarja bħala mezz ta’ pagament, li huwa permess mill-bank li aċċetta l-abbozz, il-prelevatur ma jkollux bżonn iħallas fi flus lill-fornitur (il-benefiċjarju) fid-data ta’ maturità miftiehma fil-kuntratt. Minflok, il-prelevatur huwa obbligat iħallas fi flus lill-bank fid-data ta’ maturità tal-abbozz ta’ aċċettazzjoni bankarja, li tkun sitt xhur jew sena wara. Dan kompla jiġi kkonfermat mill-GTĊ matul iż-żjara ta’ verifika peress li ddikjara li l-abbozzi ta’ aċċettazzjoni bankarja “huma interessanti biex itaffu l-piż fuq il-fluss tal-flus tal-kumpanija”.

(383)

Il-Kummissjoni lanqas ma qablet mal-kumment li meta jaċċetta l-abbozz ta’ aċċettazzjoni bankarja, il-bank ikun b’xi mod sempliċiment qed iżid il-garanzija tiegħu li l-pagament se jsir mad-data ta’ maturità. L-ewwel nett, kif intqal qabel, l-abbozz ta’ aċċettazzjoni bankarja huwa mezz ta’ pagament, li permezz tiegħu l-prelevatur jonora l-obbligazzjoni tiegħu lejn il-benefiċjarju (il-fornitur). Għalhekk, il-pagament tal-fornitur mill-prelevatur iseħħ fil-mument tal-approvazzjoni tal-abbozz ta’ aċċettazzjoni bankarja, filwaqt li mal-maturità, il-prelevatur jonora l-obbligu ta’ pagament tiegħu lejn il-bank. It-tieni, l-abbozz ta’ aċċettazzjoni bankarja ma jistax jiġi kklassifikat sempliċement bħala garanzija addizzjonali ta’ pagament fil-futur minħabba li l-abbozz ta’ aċċettazzjoni bankarja huwa mezz ta’ pagament, rikonoxxut fil-kuntratti ta’ bejgħ, u l-obbligu ta’ pagament tal-prelevatur lejn il-fornitur jiġi kkanċellat permezz tal-pagament bl-abbozz ta’ aċċettazzjoni bankarja. Il-pagament fi flus dovut lill-bank mal-maturità mhuwiex estensjoni tad-data ta’ maturità mogħtija mill-fornitur, minflok huwa obbligu lejn il-bank. Barra minn hekk, dan ġie kkonfermat mill-GTĊ matul iż-żjara ta’ verifika fejn iddikjara li mil-lat legali d-differenza bejn il-garanzija bankarja u l-abbozz ta’ aċċettazzjoni bankarja hija li “bil-garanzija hija l-kumpanija A li tkun fl-ewwel linja ta’ responsabbiltà għall-pagament, filwaqt li fl-aċċettazzjonijiet bankarji jkun il-bank emittenti”.

(384)

B’konsiderazzjoni ta’ dan, il-Kummissjoni tenniet il-konklużjoni tagħha li f’termini tal-effetti tagħhom l-abbozzi ta’ aċċettazzjoni bankarja huma forma ta’ finanzjament fuq terminu qasir b’mod li dawn jippermettu lill-produtturi esportaturi jiffinanzjaw ix-xiri tagħhom. Il-benefiċċju pprovdut lill-produtturi esportaturi li kkooperaw huwa l-iffrankar tal-kost tal-finanzjament minħabba l-fatt li l-użu ta’ finanzjament permezz ta’ abbozzi ta’ aċċettazzjoni bankarja ma jiġix remunerat.

(385)

Meta wieħed iqis li l-abbozzi ta’ aċċettazzjoni bankarja effettivament għandhom l-istess għan u effetti bħas-self ta’ kapital operatorju fuq terminu qasir, u li dawn intużaw b’mod estensiv mill-produtturi esportaturi li kkooperaw biex jiffinanzjaw l-operazzjonijiet attwali tagħhom minflok ma użaw self ta’ kapital operatorju fuq terminu qasir, dawn kellu jkollhom kost ekwivalenti għal finanzjament ta’ self ta’ kapital operatorju fuq terminu qasir. Din il-konklużjoni kompliet tiġi kkonfermata mill-GTĊ matul iż-żjara ta’ verifika fejn iddikjara li, fir-rigward tal-għażla għal kumpanija bejn l-abbozz ta’ aċċettazzjoni bankarja u self fuq terminu qasir, huwa f’idejn il-kumpanija li tiddeċiedi iżda “min-natura tagħhom dawn huma simili”.

(386)

Fid-dawl tal-kunsiderazzjonijiet ta’ hawn fuq, il-Kummissjoni ċaħdet l-affermazzjonijiet li l-abbozzi ta’ aċċettazzjoni bankarja mhumiex forma ta’ finanzjament fuq terminu qasir.

(387)

Dwar l-ispeċifiċità, kif imsemmi fil-premessa (165), skont id-Deċiżjoni Nru 40, l-istituzzjonijiet finanzjarji jenħtieġ li jipprovdu appoġġ ta’ kreditu lill-industriji mħeġġa.

(388)

Il-Kummissjoni qieset li l-abbozzi ta’ aċċettazzjonijiet bankarji huma forma oħra ta’ appoġġ finanzjarju preferenzjali mill-istituzzjonijiet finanzjarji lill-industriji mħeġġa bħas-settur tal-GFF. Tabilħaqq, kif speċifikat fit-Taqsima 3.1 hawn fuq, is-settur GFF huwa fost l-industriji mħeġġa u għalhekk huwa eliġibbli għal kull appoġġ finanzjarju possibbli. Ma ngħatat l-ebda evidenza li kwalunkwe impriża fir-RPĊ (għajr fl-industriji mħeġġa) jistgħu jibbenefikaw minn abbozzi ta’ aċċettazzjoni bankarja bl-istess termini u kundizzjonijiet preferenzjali.

(389)

Wara d-divulgazzjoni definittiva, CNBM Group sostna li l-abbozz ta’ aċċettazzjoni bankarja huwa prattika kummerċjali komuni fir-RPĊ disponibbli għall-industriji kollha u li l-uniku limitu statutorju għall-utent ta’ abbozz ta’ aċċettazzjoni bankarja huwa indikat fl-Artikolu 6 tal-Liġi tar-Repubblika tal-Poplu taċ-Ċina dwar Strumenti negozjabbli, jiġifieri “jekk persuna li ma jkollhiex kapaċità jew kapaċità limitata għal atti ċivili tiffirma strumenti negozjabbli, il-firma għandha tkun nulla u bla effett”. Il-grupp sostna wkoll li mhijiex ir-responsabbiltà tal-produtturi esportaturi li jirribattu preżunzjoni li allegat programm ta’ sussidju huwa speċifiku u li hija r-responsabbiltà tal-Kummissjoni li tissostanzja d-determinazzjoni tagħha tal-ispeċifiċità abbażi ta’ evidenza pożittiva, b’mod partikolari billi tqabbel it-termini offruti lill-kumpaniji fil-kampjun ma’ dawk offruti lill-kumpaniji Ċiniżi l-oħra. Fl-aħħar, kumpanija waħda minn CNBM Group talbet lill-Kummissjoni biex tispjega għaliex sistema simili fil-Kanada, li l-Kummissjoni semmiet fil-każ tar-roti elettriċi, mhijiex meqjusa bħala programm speċifiku ta’ sussidju, filwaqt li tqis is-sistema fir-RPĊ bħala sussidju speċifiku.

(390)

F’dan ir-rigward, il-Kummissjoni rreferiet għall-Premessa (165) fejn ippreżentat evidenza li skont id-Deċiżjoni Nru 40, l-istituzzjonijiet finanzjarji huma meħtieġa jipprovdu appoġġ ta’ kreditu lill-industriji mħeġġa. L-abbozzi ta’ aċċettazzjoni bankarja, bħala forma ta’ finanzjament, huma parti mis-sistema ta’ appoġġ finanzjarju preferenzjali minn istituzzjonijiet finanzjarji lill-industriji mħeġġa, bħall-industrija tal-GFF.

(391)

Il-Kummissjoni fakkret li hija bbażat il-valutazzjoni tagħha rigward l-ispeċifiċità tal-iskema ta’ sussidju fuq dokumenti governattivi disponibbli, bħal pjanijiet u regolamenti, dwar l-industriji mħeġġa. F’dan ir-rigward, il-Kummissjoni nnutat li l-GTĊ iddefinixxa b’mod ċar liema industriji huma mħeġġa u b’hekk illimita l-benefiċċji tal-finanzjament preferenzjali speċifiku għal dawk biss. Għalhekk, anki jekk għadd ta’ industriji oħrajn definiti b’mod speċifiku bħala mħeġġa jgawdu mill-istess kundizzjonijiet preferenzjali jew kundizzjonijiet preferenzjali bħal dawk tal-industrija tal-GFF, dan ma jagħmilx il-finanzjament preferenzjali u b’mod partikolari, l-abbozzi ta’ aċċettazzjoni bankarja ġeneralment disponibbli għall-industriji kollha.

(392)

Barra minn hekk, anki jekk forma ta’ finanzjament tista’ tkun fil-prinċipju disponibbli għal kumpaniji fl-industriji kollha, il-kundizzjonijiet konkreti, li taħthom dan il-finanzjament huwa offrut lil kumpaniji minn ċerta industrija, bħar-remunerazzjoni tal-finanzjament u l-volum tal-finanzjament, jistgħu jagħmluha speċifika. Fil-fatt, fil-każ tal-produtturi esportaturi li kkooperaw, kif imsemmi hawn fuq, il-Kummissjoni stabbiliet li kollha kemm huma bbenefikaw minn finanzjament fuq terminu qasir permezz ta’ abbozzi ta’ aċċettazzjoni bankarja mingħajr ebda kost u li xi wħud minnhom ibbenefikaw minn volum sostanzjali ta’ abbozzi ta’ aċċettazzjoni bankarja meta mqabbla ma’ finanzjamenti oħrajn għal perjodu qasir bħal self fuq terminu qasir. Ma kien hemm l-ebda evidenza ppreżentata mill-partijiet interessati ma li turi li l-finanzjament permezz tal-abbozzi ta’ aċċettazzjoni bankarja tal-kumpaniji fl-industrija tal-GFF huwa bbażat fuq kriterji jew kundizzjonijiet oġġettivi fis-sens tal-Artikolu 4(2)(b) tar-Regolament bażiku.

(393)

Rigward il-kumment dwar is-sistema tal-abbozzi ta’ aċċettazzjoni bankarja fil-Kanada, il-Kummissjoni indikat li skont l-Artikolu 4(2) tar-Regolament bażiku, il-valutazzjoni tal-ispeċifiċità ta’ programm ta’ sussidju ssir biss fir-rigward tas-sussidji investigati. Għalhekk, il-Kummissjoni mhijiex meħtieġa turi li sistemi simili f’pajjiżi oħra huma wkoll speċifiċi.

(394)

B’kunsiderazzjoni għall-argumenti ta’ hawn fuq, l-affermazzjonijiet tal-produtturi esportaturi li kkooperaw rigward l-ispeċifiċità tal-abbozzi ta’ aċċettazzjoni bankarja ġew miċħuda.

(395)

Sabiex tikkalkula l-ammont tas-sussidju kumpensabbli, il-Kummissjoni vvalutat il-benefiċċju mogħti lir-riċevituri matul il-perjodu ta’ investigazzjoni.

(396)

Kif diġà ssemma fil-premessi (358) u (373), l-abbozzi ta’ aċċettazzjoni bankarja huma forma ta’ finanzjament fuq perjodu qasir li jsaħħaħ l-effiċjenza tal-kapital ta’ min jippreleva billi jiffaċilita l-kapital operatorju tiegħu u jissodisfa l-ħtiġijiet ta’ flus tiegħu peress li fil-biċċa l-kbira jintuża bħala mezz ta’ pagament fi tranżazzjonijiet kummerċjali minflok flus. Il-Kummissjoni sabet li l-produtturi esportaturi fil-kampjun użaw l-abbozzi ta’ aċċettazzjoni bankarja biex jindirizzaw il-ħtiġijiet tagħhom għal finanzjament fuq perjodu qasir mingħajr ma ħallsu remunerazzjoni. Barra minn hekk, kif jingħad fil-premessa (346), il-Kummissjoni kkunsidrat li l-finanzjament kollu fuq perjodu qasir tal-kumpaniji fil-kampjun, inklużi l-abbozzi ta’ aċċettazzjoni bankarja, jenħtieġ li jkunu koperti b’linja ta’ kreditu. Il-benefiċċju li għandu x’jaqsam mal-linji ta’ kreditu kien stabbilit fit-Taqsima 3.4.3.1 hawn fuq.

(397)

Il-Kummissjoni għalhekk ikkonkludiet li min jippreleva l-aċċettazzjoni tal-banek jenħtieġ li jħallas remunerazzjoni għall-perjodu ta’ finanzjament. Għal skopijiet ta’ kalkolu, il-Kummissjoni kkunsidrat li l-perjodu ta’ finanzjament beda, jew fid-data ta’ maturità tal-pagament miftiehma mal-fornitur, f’każijiet fejn l-abbozz ta’ aċċettazzjoni bankarja nħareġ qabel id-data ta’ maturità, jew fid-data tal-ħruġ tal-abbozz ta’ aċċettazzjoni bankarja f’każijiet fejn l-abbozz ta’ aċċettazzjoni bankarja nħareġ fid-data ta’ maturità tal-pagament jew wara. Il-perjodu ta’ finanzjament kien meqjus li jintemm fid-data ta’ maturità tal-abbozz ta’ aċċettazzjoni bankarja.

(398)

Skont l-Artikolu 6(b) tar-Regolament bażiku, il-Kummissjoni qieset li l-benefiċċju hekk ikkonferit lir-riċevituri huwa d-differenza bejn l-ammont li l-kumpanija kienet effettivament ħallset bħala remunerazzjoni għall-finanzjament mill-abbozzi ta’ aċċettazzjoni bankarja u l-ammont li kieku tħallas jekk tiġi applika rata ta’ imgħax ta’ finanzjament fuq perjodu qasir.

(399)

Il-Kummissjoni ddeterminat il-benefiċċju li jirriżulta min-nonpagament tal-kost tal-finanzjament fuq perjodu qasir. F’dan ir-rigward, kif diġà ssemma fil-premessa (358), l-abbozzi ta’ aċċettazzjoni bankarja huma forma ta’ finanzjament fuq perjodu qasir. Huma effettivament għandhom l-istess skop bħal self ta’ kapital operatorju fuq perjodu qasir. Għalhekk, il-Kummissjoni kkunsidrat li l-abbozzi ta’ aċċettazzjoni bankarja jenħtieġ li jġarrbu kost ekwivalenti għal finanzjament ta’ self fuq perjodu ta’ qasir. Għalhekk, il-Kummissjoni applikat l-istess metodoloġija dwar il-finanzjament fuq perjodu qasir iddenominat f’RMB, deskritt fit-Taqsima 3.4.2.4 hawn fuq.

(400)

Wara d-divulgazzjoni definittiva, kumpanija waħda minn CNBM Group għamlet kumment li peress li l-abbozz ta’ aċċettazzjoni bankarja huwa kreditu pprovdut mill-bejjiegħ lix-xerrej, il-Kummissjoni jenħtieġ li tikkalkula l-benefiċċju fil-kuntest tal-“forniment ta’oġġetti u servizzi għal remunerazzjoni inqas minn adegwata (LTAR)” mill-programm ta’ sussidju u għandha l-ewwel tiddetermina jekk il-fornituri jirrappreżentawx “korpi pubbliċi” skont it-tifsira tal-Artikolu 2(b) tar-Regolament bażiku.

(401)

Kif diġà ġie spjegat fil-premessi (379) sa (383), il-Kummissjoni ma qablitx li l-abbozzi ta’ aċċettazzjoni bankarja huma kreditu pprovdut mill-bejjiegħ u kkonkludiet li l-abbozzi ta’ aċċettazzjoni bankarji huma forma ta’ finanzjament preferenzjali pprovdut mill-bank lill-prelevatur. Għalhekk, il-kumment ta’ hawn fuq ġie miċħud.

(402)

Kumpanija oħra minn CNBM Group sostniet li l-Kummissjoni missha naqqset it-terminu attwali tal-pagament mogħti mill-perjodu preżunt tal-finanzjament bankarju.

(403)

Kif spjegat fil-premessa (397), il-Kummissjoni qieset id-data ta’ maturità tal-pagament miftiehma mal-fornitur fil-kalkolu tal-perjodu tal-finanzjament. Fil-każ tal-kumpanija ta’ CNBM Group li għamlet l-affermazzjoni, l-investigazzjoni wriet li fil-prattika d-data ta’ maturità tal-pagament tal-fatturi sottostanti kienet jew diġà skadiet meta nħarġu l-abbozzi korrispondenti ta’ aċċettazzjoni bankarja, jew li ma setgħet tinstab l-ebda rabta bejn il-fatturi pprovduti u l-abbozzi ta’ aċċettazzjoni bankarja. Għaldaqstant, din l-affermazzjoni ġiet miċħuda.

(404)

Kumpanija waħda minn CNBM Group sostniet li l-Kummissjoni jenħtieġ li tnaqqas it-tariffi effettivament imħallsa, mill-produtturi fil-kampjun, mill-benefiċċju allegat. Barra minn hekk, Yuntianhua Group afferma li skont l-Artikolu 7(1)(a) tar-Regolament bażiku, il-Kummissjoni trid tnaqqas kwalunkwe tariffa għall-applikazzjoni jew kost ieħor li neċessarjament jiġġarrab biex wieħed jikkwalifika għas-sussidju jew jiksbu.

(405)

Il-Kummissjoni diġà nnutat fil-premessa (375) li l-produtturi esportaturi li kkooperaw ħallsu kummissjoni għall-abbozzi ta’ aċċettazzjoni bankarja mogħtija mill-bank, li varjat bejn 0,05 % u 0,1 % tal-valur nominali tal-abbozz ta’ aċċettazzjoni bankarja. Fil-fatt, din il-kummissjoni, imħallsa għall-ipproċessar tal-abbozz ta’ aċċettazzjoni bankarja mill-bank, hija element distint mill-finanzjament mogħti mill-bank, li għalih il-produtturi esportaturi li kkooperaw ma ġarrbu l-ebda kost. Din it-tariffa titħallas sabiex tkopri l-kostijiet amministrattivi tal-bank għall-ipproċessar tal-abbozzi ta’ aċċettazzjoni bankarja. Il-Kummissjoni kkompensat biss il-parti tal-finanzjament tal-abbozzi ta’ aċċettazzjoni bankarja (jiġifieri, il-parti ekwivalenti għal finanzjament fuq terminu qasir); hija ma analizzatx jekk il-kummissjoni ta’ aċċettazzjoni kinitx tinvolvi sussidju kumpensabbli wkoll. Fi kwalunkwe każ, l-impatt tat-tariffa fuq l-ammont ta’ sussidju jvarja minn 0,01 % għal 0,04 %, skont il-produttur esportatur u għalhekk hija immaterjali. Għalhekk, il-Kummissjoni ma qisitx li huwa meħtieġ li tanalizza din l-affermazzjoni skont il-mertu tagħha u lanqas li tivvaluta l-kumpensabbiltà ta’ dan il-benefiċċju.

(406)

Kumpanija waħda minn CNBM Group sostniet li l-bażi għall-kalkolu tal-benefiċċju jenħtieġ li titnaqqas bl-ammont ta’ depożiti li għamlet bħala garanzija għall-abbozzi ta’ aċċettazzjoni bankarja.

(407)

F’dan ir-rigward, kif il-Kummissjoni kkonkludiet f’investigazzjonijiet preċedenti (102), jenħtieġ li l-ewwel jiġi nnutat li hija prattika komuni li l-banek jitolbu garanziji u kollaterali mingħand il-klijenti tagħhom meta jagħtuhom finanzjament. Barra minn hekk, jenħtieġ li jiġi nnutat li dawn il-garanziji jintużaw biex jiżguraw li l-produttur esportatur iġorr ir-responsabbiltà finanzjarja tiegħu fil-konfront tal-bank u mhux fil-konfront tal-fornitur. L-investigazzjoni żvelat ukoll li dawn il-garanziji ma jintalbux b’mod sistematiku mill-banek Ċiniżi u mhux dejjem huma marbuta ma’ abbozzi ta’ aċċettazzjoni bankarja. F’dan ir-rigward, id-depożiti allegati ma jammontawx għal pagament bil-quddiem mill-prelevatur lill-banek iżda sempliċement garanzija addizzjonali mitluba x’imdaqqiet mill-banek u li ma għandha l-ebda impatt fuq id-deċiżjoni tal-bank li joħroġ abbozzi ta’ aċċettazzjoni bankarja mingħajr imgħax addizzjonali għas-self fuq il-prelevatur. Barra minn hekk, dawn il-garanziji jistgħu jieħdu diversi forom li jinkludu depożiti ta’ żmien fiss u pleġġijiet. Id-depożiti jġorru imgħax favur il-prelevatur, u għalhekk ma jirrappreżentawx kost għall-prelevatur tal-abbozz ta’ aċċettazzjoni bankarja. Fuq din il-bażi, din l-affermazzjoni ġiet irrifjutata.

(408)

Kumpanija waħda minn CNBM Group sostniet li l-Kummissjoni jenħtieġ li teskludi mill-kalkoli tagħha l-abbozzi ta’ aċċettazzjoni bankarja maħruġa lil partijiet relatati peress li l-estensjoni ta’ terminu ta’ pagament lil parti relatata permezz ta’ abbozz ta’ aċċettazzjoni bankarja ma tagħti l-ebda benefiċċju lill-benefiċjarju f’termini ta’ aktar likwidità minħabba li tnaqqas il-likwidità tal-kontroparti relatata b’ammont proporzjonat.

(409)

F’dan ir-rigward, il-Kummissjoni tfakkar li kif imsemmi hawn fuq, abbozz ta’ aċċettazzjoni bankarja huwa mezz ta’ pagament u għalhekk, ma għandux l-effett li jestendi d-data ta’ maturità tal-pagament miftiehma mal-fornitur iżda għandu l-effett li jiddeferixxi l-pagament fi flus. Bħala mezz ta’ pagament, l-abbozz ta’ aċċettazzjoni bankarja jista’ jiġi approvat mill-benefiċjarju (il-fornitur) sabiex isaldi l-obbligazzjonijiet tiegħu lejn partijiet oħra. Għalhekk, ma hemm l-ebda tnaqqis proporzjonat fil-likwidità tal-partijiet relatati li rċevew l-abbozz tal-aċċettazzjoni bankarja. Għaldaqstant, l-affermazzjoni ġiet miċħuda.

(410)

Yuntianhua Group afferma li fil-kalkolu tal-abbozzi ta’ aċċettazzjoni bankarja għal xi kumpaniji relatati, il-Kummissjoni ma użatx id-data kif ipprovduta fit-tweġiba għall-kwestjonarju.

(411)

Il-Kummissjoni nnutat li l-kalkolu kien ibbażat fuq l-aħħar sottomissjoni ta’ data pprovduta mill-kumpaniji u vverifikat matul il-verifika fuq il-post. Għalhekk, l-affermazzjoni ġiet miċħuda.

(412)

Fl-aħħar, kumpanija waħda minn CNBM Group għamlet talba speċifika rigward l-abbozzi ta’ aċċettazzjoni bankarja maħruġa minn kumpanija relatata biex jiġi evitat l-għadd doppju. Il-Kummissjoni ma laqgħetx din l-affermazzjoni. Madankollu, peress li d-dettalji ta’ din l-affermazzjoni huma kunfidenzjali, il-Kummissjoni indirizzaha f’divulgazzjoni speċifika lill-kumpanija kkonċernata.

(413)

L-investigazzjoni wriet li l-istituzzjonijiet finanzjarji Ċiniżi skontaw ir-riċevibbli għal ċerti kumpaniji fil-kampjun u minflok irċevew flus.

(414)

Permezz ta’ din l-operazzjoni, l-intermedjarji finanzjarji avvanzaw lill-kumpaniji ammonti ta’ riċevibbli qabel id-data li fiha kienu dovuti. Il-kumpaniji rċevew fondi minn kmieni billi ttrasferew id-drittijiet ta’ riċevibbli futuri lil istituzzjonijiet finanzjarji wara t-tnaqqis ta’ tariffi u tar-rati ta’ skont applikabbli.

(415)

Ir-rata ta’ skont applikabbli jenħtieġ li tikkumpensa speċifikament għar-riskju ta’ inadempjenza, li huwa influwenzat ħafna mill-klassifikazzjoni tal-kreditu tal-aħħar entità responsabbli li tissodisfa l-obbligu tal-ħlas.

(416)

Ir-riċevibbli skontati li nstabu matul l-investigazzjoni kellhom forom differenti bħal kambjali, bonds, fatturament, aċċettazzjonijiet bankarji u aċċettazzjonijiet kummerċjali. Kull formola topera taħt kundizzjonijiet speċifiċi u wkoll jinvolvu wkoll gradi differenti ta’ riskju sottostanti. Fil-każ ta’ abbozzi ta’ aċċettazzjoni bankarja, l-aħħar entità responsabbli hija l-emittent tal-aċċettazzjoni bankarja, jiġifieri l-Bank. Madankollu, f’tipi oħra ta’ riċevibbli, pereż. kambjali, ittra ta’ kreditu l-aħħar entità responsabbli normalment tkun kumpanija kummerċjali.

(417)

F’ċirkostanzi normali tas-suq, ir-rata ta’ skont applikabbli jenħtieġ li tikkumpensa għall-kostijiet u għar-riskji tal-bank. Madankollu, il-Kummissjoni sabet li ċerti kumpaniji fil-kampjun setgħu ġew ipprovduti b’rati preferenzjali, li jagħtu benefiċċju kumpensabbli.

(418)

Il-benefiċċju hekk ikkonferit lir-riċevituri jkun id-differenza bejn ir-rata ta’ skont applikata mill-istituzzjonijiet finanzjarji Ċiniżi u r-rata ta’ skont applikabbli għal operazzjoni komparabbli fis-suq, pereżempju self fuq perjodu qasir.

(419)

Madankollu, l-informazzjoni li tinsab fil-fajl ma tippermettix li jiġu identifikati r-rati ta’ skont differenti applikabbli. Barra minn hekk, il-Kummissjoni estimat li l-benefiċċju mogħti minn din il-forma ta’ sussidjar kien negliġibbli f’din l-investigazzjoni. Għalhekk, ddeċidiet li ma tikkumpensahx.

(420)

Il-Kummissjoni stabbiliet abbażi ta’ informazzjoni disponibbli pubblikament li CNBM kienet wettqet matul il-perjodu ta’ investigazzjoni swap ta’ dejn ma’ ekwità għal RMB 4 biljun mal-Agricultural Bank of China (“ABC”) u mal-Bank of Communications (“COMM”). Kif indikat fil-premessi (208) sa (217) hawn fuq, CNBM naqset milli tipprovdi tweġiba għall-kwestjonarju u li tikkoopera mal-investigazzjoni. Għalhekk, il-Kummissjoni kellha tirrikorri għall-fatti disponibbli fejn għandha x’taqsam il-valutazzjoni tagħha ta’ din it-tranżazzjoni.

(421)

ABC u COMM it-tnejn huma banek tal-Istat, meqjusa bħala korpi pubbliċi u/jew inkarigati jew diretti skont it-Taqsima 3.4.1.4 ta’ hawn fuq. Barra minn hekk, kemm ABC kif ukoll COMM instabu li kienu korpi pubbliċi f’investigazzjonijiet antisussidju preċedenti jew li ġew fdati jew diretti biex iwettqu funzjonijiet li normalment ikunu vestiti fil-gvern (103). Ma hemm l-ebda evidenza fil-fajl tal-investigazzjoni attwali li tikkontradixxi dawk is-sejbiet preċedenti.

(422)

Il-Kummissjoni kkunsidrat li bank ma kienx se jikkonverti d-dejn tiegħu f’ekwità taħt kundizzjonijiet normali tas-suq mingħajr kumpens ulterjuri. Tabilħaqq, l-ekwità hija strument ħafna aktar riskjuż mid-dejn, għaliex m’hemm l-ebda assigurazzjoni li l-bank se jieħu lura l-investiment kapitali tiegħu. Barra minn hekk, l-ekwità mhux neċessarjament tiggarantixxi redditu fuq l-investiment għall-kuntrarju ta’ rata tal-imgħax fuq is-self. Ir-riskju akbar li l-banek jidħlu għalih bis-saħħa ta’ din l-iswap ta’ dejn ma’ ekwità huwa evidenzajt mis-sitwazzjoni finanzjarja dgħajfa li tinsab fir-rapport annwali tal-kumpanija għas-sena finanzjarja 2018: il-kumpanija għandha proporzjon għoli ħafna ta’ dejn nett (bejn 120 % -145 %), is-self fuq perjodu qasir li jrid jitħallas lura fi żmien sena jammonta għad-doppju tal-profitt gross annwali tal-kumpanija, u l-obbligazzjonijiet kumplessivi jirrappreżentaw 2/3 tal-fatturat annwali tagħha. Fl-aħħar nett, artiklu fl-istampa fuq is-sit web ta’ CNBM speċifikament jindika l-objettivi tal-politika industrijali u l-importanza kbira tal-kooperazzjoni strateġika bejn CNBM u ż-żewġ banek bħala r-raġuni għall-iswap. B’mod partikolari, l-artiklu tal-istampa jgħid li l-iswap se tgħin lil CNBM jikseb “riforma strutturali min-naħa tal-provvista” bħala objettiv industrijali.

(423)

Fid-dawl tal-kunsiderazzjonijiet ta’ hawn fuq, il-Kummissjoni kkonkludiet li matul il-perjodu ta’ investigazzjoni l-iswap ta’ dejn ma’ ekwità ta benefiċċju lil CNBM peress li ngħatat kundizzjonijiet preferenzjali minn korpi jew entitajiet pubbliċi jew mill-Istat li b’xi mod ieħor huma fdati jew diretti jwettqu l-objettivi tal-politika industrijali.

(424)

Il-Kummissjoni qieset li l-finanzjament preferenzjali permezz ta’ swap ta’ dejn ma’ ekwità huwa speċifiku skont it-tifsira tal-Artikolu 4(2)(a) tar-Regolament bażiku peress li l-investituri huma entitajiet, li joperaw skont il-linji gwida tal-politiki tal-Istat li jelenkaw il-GFF bħala industrija mħeġġa. Fi kwalunkwe każ, l-informazzjoni disponibbli tindika l-għoti ta’ dan is-sussidju ad hoc lil CNBM, li jagħmel is-sussidju speċifiku għal intrapriża.

(425)

Fin-nuqqas ta’ provi ulterjuri minħabba nuqqas ta’ kooperazzjoni, il-Kummissjoni ma kellhiex aċċess għall-ftehimiet bejn CNBM u l-banek. Għalhekk il-Kummissjoni ma setgħetx tivvaluta jekk ir-riskji sinifikanti li l-banek ħadu ġewx ikkumpensati b’xi mod jew ieħor. Madankollu, l-elementi kollha spjegati fil-premessa (422) jindikaw is-sitwazzjoni finanzjarja diffiċli ta’ CNBM u lejn l-objettivi industrijali segwiti b’din it-tranżazzjoni, u dan jappoġġja l-konklużjoni li ma kienx hemm loġika tas-suq li tirrifletti r-riskji reali sinifikanti involuti. Konsegwentement, il-Kummissjoni kkunsidrat it-tranżazzjoni bħala ekwivalenti għall-maħfra tad-dejn, u ttrattata bħala għotja matul il-perjodu ta’ investigazzjoni. Billi l-għotja ttieħdet kompletament fil-perjodu ta’ investigazzjoni, din ġiet ikkalkulata fuq il-bażi tal-fatturat totali tal-grupp kollu. Dan irriżulta f’ammont ta’ sussidju ta’ 1,83 %.

(426)

Matul il-perjodu ta’ investigazzjoni, kumpanija fil-kampjun (Yunnan Yuntianhua Group Co., Ltd) ibbenefikat minn fondi pprovduti minn entitajiet ikkontrollati mill-Istat permezz ta’ forom speċjali ta’ injezzjonijiet ta’ ekwità.

(427)

Dawn il-fondi ġew trasferiti f’forma ta’ ekwità li, madankollu, ma pprovdewx awtomatikament lill-investituri bi drittijiet sħaħ tal-azzjonisti. F’dan is-sens, il-fondi ġew trasferiti bi skambju ta’ sehem ta’ ekwità fil-futur fil-kumpanija riċeventi, li jsir effettiv biss wara perjodu ta’ żmien mhux determinat.

(428)

L-investigazzjoni stabbiliet li meta l-kumpanija rċeviet il-fondi, dawn ġew kontabillizzati bħala strumenti azzjonarji oħra mingħajr il-bidla mistennija fuq is-sehem tas-sjieda tal-kumpanija. L-investituri, minkejja li ttrasferixxew il-fondi, ma kisbux aċċess sħiħ għad-drittijiet tal-parteċipazzjoni azzjonarja, u lanqas ma rċevew xi pagament ta’ interess bi skambju. Kien biss wara perjodu ta’ żmien mhux determinat, iżda normalment aktar minn sena, u wara l-approvazzjoni tas-SASAC, li parti mill-fondi ġew ittrasferiti f’ekwità ta’ kapital imħallas. L-investituri, f’dak il-mument biss irċevew id-drittijiet sħaħ tal-azzjonisti.

(429)

Il-Kummissjoni stabbiliet ukoll li l-perjodu bejn l-injezzjoni ta’ kapital u l-għoti tad-drittijiet tal-azzjonisti jista’ jkun itwal minn sena. F’dan ir-rigward, il-Kummissjoni identifikat ammonti sostantivi ta’ injezzjonijiet ta’ ekwità li ma kinux jagħtu drittijiet tal-azzjonisti matul il-perjodu kollu ta’ investigazzjoni.

(430)

Konsegwentement, fil-prattika, sakemm id-drittijiet tal-azzjonisti jiġu rikonoxxuti, għal perjodu itwal minn sena, il-kumpanija jkollha għad-dispożizzjoni tagħha fondi bi skambju ma’ trasferiment futur tas-sjieda iżda mingħajr ma ġġarrab l-ebda kost.

(431)

F’ċirkostanzi normali tas-suq, biex tikkumpensa għall-użu ta’ fondi, kumpanija tittrasferixxi porzjon tas-sjieda tal-kumpanija ftit wara li jkunu waslu l-fondi, jew tirreġistra l-fondi bħala dejn. Madankollu, minħabba ċ-ċirkostanzi partikolari ta’ dawn l-arranġamenti f’dan il-każ, din il-forma ibrida ta’ finanzjament hija fil-fatt eqreb għal self klassiku mingħajr imgħax min-naħa tal-azzjonisti għal perjodu twil milli għal strument azzjonarju.

(432)

Fid-dawl tal-kunsiderazzjonijiet ta’ hawn fuq, il-Kummissjoni kkunsidrat li matul il-perjodu ta’ investigazzjoni l-kumpanija Yuntinanhua Group Co., Ltd., parti minn Yuntifanhua Group, ibbenefikat minn aċċess għal ammonti sostantivi ta’ finanzjament għal perjodu twil, li għalih ma kellha l-ebda kost. Billi din il-forma speċjali ta’ injezzjonijiet ta’ ekwità inkwistjoni ma tatx awtomatikament drittijiet tal-azzjonisti lill-investituri, il-Kummissjoni kkunsidrat li dawn kellhom effett simili għal self mingħajr imgħax.

(433)

Sabiex jiġi ddeterminat jekk l-investituri jistgħux jitqiesu korpi pubbliċi jew fdati jew diretti mill-GTĊ, il-Kummissjoni talbet lil Yuntianhua Group speċifika informazzjoni dwar l-azzjonisti li pprovdew fondi permezz ta’ strumenti azzjonarji oħra. L-investituri kienu: Kunming Heze Investment Center; Yunnan Jinrun Zhonghao Investment Center; u Yunnan State-owned Enterprise Reform No.2 Equity Investment Fund Partnership (Fond għar-riforma tal-intrapriżi tal-istat).

(434)

L-informazzjoni mitluba mill-Kummissjoni kienet tinkludi informazzjoni korporattiva, bħal ismijiet tal-azzjonisti prinċipali u l-kompożizzjoni u r-regoli tal-bord tad-diretturi ta’ kull investitur. Il-Kummissjoni talbet ukoll informazzjoni dwar il-politiki ta’ investiment tal-imsemmija investituri u aktar dettalji dwar it-trasferimenti speċifiċi ta’ fondi permezz ta’ strumenti azzjonarji.

(435)

Barra minn hekk, il-Kummissjoni kkuntattjat lill-GTĊ u talbet l-istess informazzjoni kif deskritt fil-premessa (434). Il-GTĊ wieġeb li la kellu u lanqas ma kien iżomm informazzjoni dwar kumpaniji speċifiċi u għall-entitajiet kollha fiċ-Ċina li fihom jista’ jkollu parteċipazzjoni azzjonarja. Għalhekk, huwa rrifjutat li jwieġeb direttament iżda iddifferixxa t-tweġiba tiegħu għal dik li kienet se tagħti l-kumpanija fil-kampjun kkonċernata.

(436)

Fin-nuqqas ta’ tweġiba sħiħa, skont il-premessi (218) sa (220), il-Kummissjoni ddeċidiet li tuża l-fatti disponibbli biex tiddetermina jekk dawk l-investituri jikkwalifikawx bħala korpi pubbliċi.

(437)

Bl-użu ta’ informazzjoni disponibbli għall-pubbliku, bħal rapporti annwali, informazzjoni disponibbli f’direttorji kummerċjali jew fuq is-siti web tal-investituri jew bażijiet ta’ data disponibbli pubblikament, il-Kummissjoni sabet li l-investituri li kienu pprovdew fondi permezz ta’ strumenti azzjonarji oħra lill-Yuntianhua Group kienu parzjalment jew kompletament proprjetà tal-Istat.

(438)

Fir-rigward ta’ Kunming Heze Investment Center, il-Kummissjoni stabbiliet li aktar minn 98 % tal-ishma fl-aħħar mill-aħħar miżmuma mill-gvern lokali u SOEs (104). Speċifikament, fost l-azzjonisti tagħha, il-Kummissjoni sabet aktar minn 24 % tal-ishma miżmuma minn SOE Yunnan State Owned Capital Operations Ltd (Yunnan guoyou ziben yunying youxian gongsi). Il-Kummissjoni sabet ukoll li aktar minn 74 % tal-ishma ta’ Kunming Heze Investment Center miżmuma minn China Fortune International (Huaxin International Trust) li hija kumpanija finanzjarja tas-SOE China Huadan Group Co., Ltd.. Barra minn hekk, Kunming Heze Investment Center hija ġestita minn fond ta’ investiment dedikat għall-investiment f’kumpaniji pubbliċi provinċjali. Barra minn hekk, fl-entità u fl-azzjonisti tal-entità, il-Kummissjoni sabet rappreżentanti legali u membri tal-bordijiet, li preċedentament kellhom pożizzjoni eżekuttiva f’Yunnan SASAC, kif ukoll membri tas-CCP (105).

(439)

Fir-rigward ta’ Yunnan Jinrun Zhonghao Investment Center (106), il-Kummissjoni stabbiliet li aktar minn 46 % tal-ishma fl-aħħar mill-aħħar miżmuma mill-gvern lokali u SOEs. B’mod partikolari, il-Kummissjoni sabet fost l-azzjonisti liċ-China Construction Bank Trust, u operazzjoni kapitali minn Jinrun, maniġer ta’ fond ta’ investiment fl-ekwità li huwa proprjetà tal-Provinċja ta’ Yunnan

(440)

Bl-istess mod, il-Kummissjoni stabbiliet li l-Enterprise Reform No.2 Equity Investment Fund Partnership (reforma tal-fond għall-intrapriża tal-Istat) proprejtà tas-SOE Yunnan Energy Investment Group huwa tal-Istat ta’ Yunnan.

(441)

Barra minn hekk, il-Kummissjoni stabbiliet l-eżistenza ta’ indizji formali ta’ kontroll mill-Istat ta’ dawn l-investituri. B’mod partikolari, fin-nuqqas ta’ informazzjoni speċifika li tindika mod ieħor, il-Kummissjoni qieset li l-maniġers u s-superviżuri f’kumpaniji statali li huma sidien tal-entitajiet inkwistjoni huma preżunti li huma maħtura u akkontabbli lejn l-Istat abbażi tal-konklużjonijiet fit-Taqsimiet 3.4.1.5 u 3.4.1.6.

(442)

Barra minn hekk, kif spjegat fil-premessa (431), il-Kummissjoni stabbiliet li l-operazzjonijiet tagħhom ma segwewx loġika purament tas-suq u ma jirriflettux ir-riskji reali tas-suq assoċjati mat-tranżazzjonijiet investigati. Minflok, f’konformità mal-politiki governattivi biex jiġu mħeġġa industriji speċifiċi, kif stabbilit fit-Taqsima 3.1 ta’ hawn fuq, dawk l-investituri aġixxew irrazzjonalment meta appoġġaw finanzjarjament lill-produttur esportatur.

(443)

Fid-dawl tal-kunsiderazzjonijiet ta’ hawn fuq, il-Kummissjoni stabbiliet li l-entitajiet ikkontrollati mill-Istat li pprovdew fondi permezz ta’ strument azzjonarju lil Yuntianhua Group huma korpi pubbliċi fis-sens tal-Artikolu 2(b) moqri flimkien mal-Artikolu 3(1)(a)(i) tar-Regolament bażiku.

(444)

Barra minn hekk, anki li kieku l-entitajiet ikkontrollati mill-Istat ma jitqisux bħala korpi pubbliċi, il-Kummissjoni stabbiliet li huma kienu jitqiesu bħala li huma inkarigati jew mogħtija direzzjonijiet mill-GTĊ sabiex iwettqu funzjonijiet normalment vestiti fil-gvern, fis-sens tal-Artikolu 3(1)(a)(iv) tar-Regolament bażiku għall-istess raġunijiet, kif stabbilit fil-premessa (269). B’hekk, fi kwalunkwe każ, l-imġiba tagħhom tiġi attribwita lill-GTĊ.

(445)

Il-Kummissjoni qieset li l-finanzjament preferenzjali permezz ta’ injezzjonijiet ta’ ekwità huwa speċifiku skont it-tifsira tal-Artikolu 4(2)(a) tar-Regolament bażiku peress li l-investituri huma entitajiet, li joperaw skont il-linji gwida tal-politiki tal-Istat li jelenkaw il-GFF bħala industrija mħeġġa. Fi kwalunkwe każ, l-informazzjoni disponibbli tindika l-għoti ta’ dan is-sussidju ad hoc lil Yunnan Yuntianhua Group Co., Ltd, li jagħmel is-sussidju speċifiku għal intrapriża.

(446)

Kif spjegat fil-premessa (432), il-Kummissjoni qieset li Yunnan Yuntianhua Group Co., Ltd. ibbenefikat minn finanzjament sostantiv permezz ta’ injezzjonijiet ta’ ekwità, li kellhom effett simili għal finanzjament b’self mingħajr imgħax. Għalhekk, il-Kummissjoni ddeċidiet li ssegwi l-metodoloġija ta’ kalkolu għas-self kif deskritt hawn fuq fit-Taqsima 3.4.2. Dan ifisser li l-firxa relattiva bejn il-bonds korporattivi AA tal-Istati Uniti u l-bonds korporattivi applikabbli tal-Istati Uniti BB bl-istess durata hija applikata għar-rati tal-imgħax ta’ referenza ppubblikati mill-PBOC biex iiġi stabbili imgħax ibbażata fuq is-suq għas-self, li mbagħad tiġi mqabbla mar-rata tal-imgħax reali mħallsa mill-kumpanija sabiex jiġi ddeterminat il-benefiċċju. Dan irriżulta f’ammont ta’ sussidju ta’ 0,3 %.

(447)

Il-kumpaniji kollha inklużi fil-kampjun ibbenefikaw minn finanzjament preferenzjali fil-forma ta’ bonds.

(448)

Fiċ-Ċina, l-atturi fis-suq tal-bonds huma essenzjalment l-istess entitajiet bħal dawk li huma attivi fis-suq tas-self. Kumpaniji li jixtiequ joħorġu bonds jeħtieġ li jitolbu s-servizzi ta’ istituzzjoni finanzjarja, li taġixxi bħala sottoskrittur. Is-sottoskritturi jorganizzaw il-ħruġ ta’ bonds u jipproponu r-rati tal-imgħax li bihom il-bond jiġi ppreżentat lill-investituri. Dawn is-sottoskritturi huma l-istess banek tal-Istat li jipprovdu wkoll is-self preferenzjali kif diskuss fit-Taqsima 3.4.2 ta’ hawn fuq. Barra minn hekk, l-investituri li jixtru l-bonds huma prinċipalment ukoll banek Ċiniżi (proprjetà tal-Istat), peress li aktar minn 95 % tal-volum totali ta’ negozjar tal-bonds iseħħ fis-suq interbankarju (107).

(449)

Kif deskritt fit-Taqsima 3.4.1.1 ta’ hawn fuq, dawn l-istituzzjonijiet finanzjarji huma kkaratterizzati minn preżenza qawwija tal-Istat, u l-GTĊ għandu l-possibbiltà li jeżerċita influwenza sinifikanti fuqhom.

(450)

Il-qafas legali ġenerali li fih joperaw dawn l-istituzzjonijiet finanzjarji, u li diġà kien deskritt fit-Taqsima 3.4.1 ta’ hawn fuq, huwa wkoll applikabbli għall-bonds. Barra minn hekk, id-dokumenti regolatorji li ġejjin japplikaw speċifikament għall-bonds:

(451)

F’konformità mal-qafas regolatorju, il-bonds ma jistgħux jinħarġu jew jiġu nnegozjati liberament fiċ-Ċina. Il-ħruġ ta’ kull bond irid ikun approvat minn diversi awtoritajiet governattivi, bħall-PBOC, l-NDRC jew is-CSRC, skont it-tip ta’ bond u t-tip ta’ emittent. Barra minn hekk, skont ir-Regolamenti dwar l-Amministrazzjoni tal-Bonds Korporattivi, hemm kwoti annwali għall-ħruġ ta’ bonds korporattivi.

(452)

Barra minn hekk, skont l-Artikolu 16 tal-Liġi dwar it-Titoli, il-ħruġ għall-pubbliku ta’ bonds jenħtieġ li jissodisfa r-rekwiżiti li ġejjin: “l-investiment ta’ fondi miġbura għandu jkun konformi mal-politiki industrijali tal-Istat […]” u “l-fondi kif miġbura […] għandhom jintużaw għall-iskop kif ivverifikat”. L-Artikolu 12 tar-Regolamenti dwar l-Amministrazzjoni tal-Bonds Korporattivi jtenni li l-għan tal-fondi miġbura jrid ikun konformi mal-politiki industrijali tal-Istat.

(453)

Skont il-Miżuri Amministrattivi għall-Ħruġ u Negozjar ta’ Bonds Korporattivi, huma biss ċerti bonds li jikkorrispondu ma’ kriterji stretti ta’ kwalità, bħal klassifikazzjoni ta’ kreditu AAA, li jistgħu jiġu offruti għal ħruġ għall-pubbliku. Il-biċċa l-kbira tal-bonds għalhekk jinħarġu privatament lil dawk li jissejħu investituri kkwalifikati, li ġew approvati mis-CSRC, u li huma essenzjalment investituri istituzzjonali Ċiniżi.

(454)

Fl-aħħar nett, ir-rati tal-imgħax fuq il-bonds korporattivi mhumiex determinati liberament, peress li l-Artikolu 18 tar-Regolamenti dwar l-Amministrazzjoni tal-Bonds Korporattivi jiddikjara li “r-rata tal-imgħax offruta għal kwalunkwe bond korporattiv ma għandhiex tkun ogħla minn 40 % tar-rata tal-imgħax prevalenti mħallsa mill-banek lil individwi għal depożiti ta’ tfaddil b’terminu fiss tal-istess maturità”.

(455)

Il-Kummissjoni fittxet ukoll evidenza konkreta dwar l-eżerċizzju ta’ kontroll b’mod sinifikanti abbażi ta’ kwistjonijiet konkreti ta’ bonds. Għalhekk, hija eżaminat l-ambjent legali ġenerali kif stabbilit hawn fuq fil-premessi (450) sa (454), flimkien mas-sejbiet konkreti tal-investigazzjoni.

(456)

Iż-żjarat ta’ verifika wrew li normalment nħarġu bonds miż-żewġ gruppi ta’ produtturi esportaturi inklużi fil-kampjun b’rati tal-imgħax qrib ir-rati tal-imgħax tal-valur referenzjarju tal-People’s Bank of China (“PBOC”), irrispettivament mis-sitwazzjoni finanzjarja u tar-riskju ta’ kreditu tal-kumpaniji.

(457)

Fil-prattika, ir-rati tal-imgħax fuq il-bonds huma influwenzati mill-klassifikazzjoni tal-kreditu, simili għas-self. Madankollu, kif deskritt hawn fuq fil-premessi (279) sa (285), is-suq lokali tal-klassifikazzjoni tal-kreditu jsofri minn distorsjonijiet u l-klassifikazzjonijiet tal-kreditu mhumiex affidabbli. Dan intwera mill-fatt li l-prospetti tal-bonds u r-rapporti tal-klassifikazzjoni tal-kreditu għall-bonds maħruġa mill-kumpaniji inklużi fil-kampjun ma kinux jikkorrispondu mas-sitwazzjoni attwali tal-kumpaniji.

(458)

F’każ wieħed pereżempju, il-prospett dettaljat tal-bonds wissa li l-livelli tal-profitt tal-kumpanija kienu qed jonqsu, li porzjon sinifikanti tal-assi netti kien imwiegħed għal garanziji interni ta’ finanzjament, li kien hemm pressjoni għolja maħluqa minn ħlas lura tad-dejn fuq perjodu qasir, u li l-kumpanija kienet ipprevediet xi proġetti estensivi b’kapital intensiv minkejja li diġà kellha proporzjon għoli ta’ dejn ma’ assi. Madankollu, ir-rapport imbagħad ikkonkluda billi pprovda klassifikazzjoni tal-kreditu AA+ għall-offerta ta’ bonds.

(459)

Fid-dawl tal-kunsiderazzjonijiet ta’ hawn fuq, il-Kummissjoni sabet li l-istituzzjonijiet finanzjarji Ċiniżi li jorganizzaw il-ħruġ ta’ bonds għall-kumpaniji inklużi fil-kampjun huma korpi pubbliċi jew huma fdati jew diretti mill-gvern fis-sens tal-Artikoli 3 u 2(b) tar-Regolament bażiku kif spjegat fit-Taqsimiet 3.4.1.5 u 3.4.1.6. Barra minn hekk, ġie pprovdut benefiċċju lill-produtturi esportaturi inklużi fil-kampjun, billi l-bonds inħarġu b’rati taħt ir-rati tas-suq li jikkorrispondu għall-profil ta’ riskju attwali tagħhom.

(460)

Il-Kummissjoni kkunsidrat li l-finanzjament preferenzjali permezz ta’ bonds huwa speċifiku fis-sens tal-Artikolu 4(2)(a) tar-Regolament bażiku peress li l-bonds ma jistgħux jinħarġu mingħajr approvazzjoni ta’ awtoritajiet tal-gvern, u l-Liġi dwar it-Titoli tar-RPĊ tiddikjara li l-ħruġ ta’ bonds irid ikun konformi mal-politiki industrijali tal-Istat. Kif diġà ssemma fil-premessi (140) sa (177), l-industrija tal-GFF titqies bħala industrija ewlenija/strateġika.

(461)

Peress li l-bonds huma essenzjalment tip ieħor ta’ strument ta’ dejn, simili għal self, u billi l-metodoloġija ta’ kalkolu għal self hija diġà bbażata fuq basket ta’ bonds, il-Kummissjoni ddeċidiet li ssegwi l-metodoloġija ta’ kalkolu għal self kif deskritt hawn fuq fit-Taqsima 3.4.2. Dan ifisser li l-firxa relattiva bejn il-bonds korporattivi AA tal-Istati Uniti u l-bonds korporattivi tal-Istati Uniti BB bl-istess tul ta’ żmien hija applikata għar-rati tal-imgħax ta’ referenza ppubblikati mill-PBOC biex tiġi stabbilita rata tal-imgħax ibbażata fuq is-suq għal bonds, li mbagħad tiġi mqabbla mar-rata tal-imgħax reali mħallsa mill-kumpanija sabiex jiġi ddeterminat il-benefiċċju.

(462)

Kif spjegat fil-premessa (291), il-Kummissjoni sabet li ċerti kumpaniji ħarġu bonds bl-għan ta’ ristrutturar tad-dejn. F’dawn il-każijiet, kif spjegat fit-Taqsima 3.4.2.2, il-Kummissjoni kkunsidrat li l-kumpaniji kkonċernati huma f’sitwazzjoni finanzjarja agħar minn dik li qed jissuġġerixxu r-rapporti finanzjarji mal-ewwel daqqa t’għajn, u li hemm riskju addizzjonali relatat mal-finanzjament tagħhom fuq perjodu qasir u twil. Għalhekk, sabiex tqis l-iskopertura akbar għar-riskju, il-Kummissjoni waqqgħet livell wieħed fl-iskala ta’ klassifikazzjoni tar-riskju u adattat il-kalkolu tal-firxa relattiva wkoll għall-finanzjament tagħhom, inkluż il-bonds, billi għamlet paragun bejn il-bonds korporattivi tal-Istati Uniti AA u l-Istati Uniti B.

(463)

L-investigazzjoni wriet li l-gruppi kollha fil-kampjun tal-produtturi esportaturi bbenefikaw minn finanzjament preferenzjali fil-forma ta’ abbozzi ta’ aċċettazzjoni bankarja u bonds, u tnejn mill-kumpaniji fil-kampjun ibbenefikaw minn finanzjament preferenzjali fil-forma ta’ injezzjonijiet ta’ ekwità matul il-perjodu ta’ investigazzjoni. Minħabba l-eżistenza ta’ kontribuzzjoni finanzjarja, benefiċċju għall-produtturi esportaturi u speċifiċità, il-Kummissjoni qieset dawn it-tipi ta’ finanzjament preferenzjali bħala sussidju kumpensabbli.

(464)

Dwar CNBM, peress li din il-kumpanija ma kkooperatx, il-benefiċċju minn tipi oħrajn ta’ finanzjament preferenzjali fil-livell ta’CNBM ġie stabbilit bl-użu tal-metodoloġija spjegata fit-taqsimiet ta’ hawn fuq, applikata għall-informazzjoni disponibbli pubblikament fir-rapport annwali tal-2018 ta’ din il-kumpanija, bħal ħruġ ta’ bonds u ammonti pendenti għan-noti pagabbli.

(465)

L-ammont ta’ sussidju stabbilit fir-rigward tal-finanzjament preferenzjali deskritt hawn fuqu matul il-perjodu ta’ investigazzjoni għall-gruppi ta’ kumpaniji inklużi fil-kampjun jammonta għal:

Finanzjament preferenzjali: tipi oħra ta’ finanzjament

(466)

L-ilmentatur allega li Sinosure tipprovdi assigurazzjoni ta’ kreditu għall-esportazzjoni fuq terminu qasir, medju u twil, assigurazzjoni tal-investiment u obbligazzjonijiet garantiti, fost servizzi oħrajn, fuq bażi aġevolanti lill-industriji inċentivati. Skont studju riċenti mwettaq mill-Organizzazzjoni għall-Kooperazzjoni u l-Iżvilupp Ekonomiċi (“OECD”), l-industrija Ċiniża tat-teknoloġija avvanzata, li l-industrija tal-GFF tagħmel parti minnha, irċeviet 21 % tat-total tal-assigurazzjoni ta’ kreditu għall-esportazzjoni pprovdut minn Sinosure (108). Barra minn hekk, Sinosure ħadet rwol attiv fit-twettiq tal-Inizjattiva “Made in China 2025”, billi tiggwida lill-intrapriżi biex jużaw ir-riżorsi ta’ kreditu nazzjonali, twettaq innovazzjoni xjentifika u teknoloġika u titjib teknoloġiku, u tgħin lill-intrapriżi li jinvestu fi swieq barranin isiru aktar kompetittivi fis-suq globali (109).

(1)

Notifika dwar l-Implimentazzjoni tal-Istrateġija ta’ Promozzjoni tal-Kummerċ permezz tax-Xjenza u t-Teknoloġija bl-Użu tal-Assigurazzjoni ta’ Kreditu għall-Esportazzjoni (Shang Ji Fa [2004] Nru 368) maħruġa b’mod konġunt mill-MOFCOM u Sinosure;

(2)

Pjan 840 inkluż fin-Notifika mill-Kunsill tal-Istat tas-27 ta’ Mejju 2009;

(3)

Notifika dwar il-Kultivazzjoni u l-Iżvilupp tal-Kunsill tal-Istat dwar l-Industriji Emerġenti ta’ Deċiżjoni Strateġika li qegħdin Jaċċelleraw (GuoFa [2010] Nru 32 tat-18 ta’ Ottubru 2010), maħruġa mill-Kunsill tal-Istat u l-Linji Gwida ta’ Implimentazzjoni tagħha (GuoFa [2011] Nru 310 tal-21 ta’ Ottubru 2011)

(4)

Avviż dwar il-Ħruġ tal-Katalgu tal-Esportazzjoni tal-2006 ta’ Prodotti tat-Teknoloġija Avvanzata taċ-Ċina, Guo Ke Fa Ji Zi [2006] Nru 16

(5)

Notice on Compilation of Guide Catalogue of Chinese High-tech Products from the Ministry of Science and Technology, G.K.B.J. [2009] Nru 61 tad-9 ta’ Ottubru 2009

(467)

Iż-żewġ gruppi ta’ kumpaniji inklużi fil-kampjun kellhom ftehimiet tal-assigurazzjoni tal-esportazzjoni pendenti ma’ Sinosure matul il-perjodu ta’ investigazzjoni.

(468)

Kif intqal fil-premessa (201) ta’ hawn fuq, Sinosure naqset milli tipprovdi d-dokumentazzjoni ta’ sostenn mitluba fir-rigward tal-governanza korporattiva tagħha bħall-Istatut ta’ Assoċjazzjoni.

(469)

Barra minn hekk, kif indikat fil-premessa (200), Sinosure ma pprovdietx informazzjoni aktar speċifika dwar l-assigurazzjoni ta’ kreditu għall-esportazzjoni pprovduta lill-industrija tal-GFF, il-livell tal-primjums tagħha jew ċifri dettaljati relatati mal-profittabbiltà tan-negozju tagħha tal-assigurazzjoni ta’ kreditu għall-esportazzjoni.

(470)

Għalhekk, il-Kummissjoni kellha tikkomplementa l-informazzjoni mogħtija mill-fatti disponibbli.

(471)

Skont l-informazzjoni pprovduta f’investigazzjonijiet antisussidji preċedenti (110), Sinosure hija kumpanija tal-assigurazzjoni tal-politika tal-Istat stabbilita u appoġġjata mill-Istat sabiex tappoġġja l-iżvilupp u l-kooperazzjoni ekonomiċi u kummerċjali barranin tar-RPĊ. Il-kumpanija hija 100 % tal-Istat. Hija għandha bord tad-diretturi u bord tas-superviżuri. Il-Gvern għandu s-setgħa li jaħtar u jkeċċi lill-maniġers superjuri tal-kumpanija. Abbażi ta’ din l-informazzjoni, il-Kummissjoni kkonkludiet li hemm indikazzjoni formali tal-kontroll tal-gvern b’rabta ma’ Sinosure.

(472)

Minbarra dan, il-Kummissjoni fittxet informazzjoni dwar jekk il-GTĊ eżerċitax kontroll sinifikanti fuq l-imġiba ta’ Sinosure fir-rigward tal-industrija tal-GFF. F’dan il-kuntest, il-Kummissjoni nnutat li l-Katalgu tal-Esportazzjoni tal-Prodotti ta’ Teknoloġija Avvanzata u Ġdida taċ-Ċina jelenka speċifikament il-prodotti tal-fibra tal-ħġieġ, inkluż il-GFF, bħala mħeġġa biex jiġu esportati (111).

(473)

Barra minn hekk, skont l-Avviż dwar l-Implimentazzjoni tal-Istrateġija ta’ Promozzjoni tal-Kummerċ permezz tax-Xjenza u t-Teknoloġija bl-Użu tal-Assigurazzjoni tal-Kreditu għall-Esportazzjoni, Sinosure jenħtieġ li żżid l-appoġġ tagħha għall-industriji u l-prodotti ewlenin billi ssaħħaħ l-appoġġ kumplessiv tagħha għall-esportazzjoni ta’ prodotti ta’ teknoloġija avvanzata u ġdida. Jenħtieġ li tittratta l-industriji bħal “materjali ġodda” u industriji avvanzati u ġodda oħra elenkati fil-Katalgu tal-Esportazzjoni ta’ Prodotti ta’ Teknoloġija Avvanzata u Ġdida taċ-Ċina, bħala l-fokus tan-negozju tagħha u tipprovdi appoġġ komprensiv f’termini ta’ proċeduri ta’ sottoskrizzjoni, approvazzjoni b’limiti, veloċità tal-approvazzjoni tal-pretensjonijiet u flessibbiltà tar-rati. Fir-rigward tal-flessibbiltà tar-rati, hija jenħtieġ li tagħti lill-prodotti l-iskont massimu tar-rata tal-primjum fil-medda varjabbli pprovduta mill-kumpanija tal-assigurazzjoni tal-kreditu. Kif imsemmi fil-premessi (148) u (162), l-industrija GFF hija inkluża fil-kategorija aktar ġenerali ta’ “materjali ġodda”. Barra minn hekk, ir-Rapport Annwali ta’ Sinosure għall-2017 jgħid li Sinosure għandha tranżazzjonijiet assigurati b’mod attiv ta’ industriji emerġenti strateġiċi bħal materjali ġodda (112)

(474)

Fuq dik il-bażi, il-Kummissjoni kkonkludiet li l-GTĊ ħoloq qafas normattiv li kellu jiġi rrispettat mill-maniġers u mis-superviżuri maħtura mill-GTĊ u li huma responsabbli lejn il-GTĊ. Għalhekk, il-GTĊ iddependa fuq il-qafas normattiv sabiex jeżerċita kontroll b’mod sinifikanti fuq l-imġiba ta’ Sinosure.

(475)

Il-Kummissjoni fittxet ukoll evidenza konkreta tal-eżerċizzju ta’ kontroll b’mod sinifikanti abbażi ta’ ftehimiet ta’ assigurazzjoni konkreti. Matul iż-żjara ta’ verifika, Sinosure sostniet li fil-prattika l-primjums tagħha kienu orjentati lejn is-suq u bbażati fuq il-prinċipji tal-valutazzjoni tar-riskju. Madankollu, ma ġew ipprovduti l-ebda eżempji speċifiċi fir-rigward tal-industrija tal-GFF jew tal-kumpaniji inklużi fil-kampjun.

(476)

Fin-nuqqas ta’ evidenza konkreta, il-Kummissjoni għalhekk eżaminat l-imġiba konkreta ta’ Sinosure fir-rigward tal-assigurazzjoni pprovduta lill-kumpaniji inklużi fil-kampjun. Din l-imġiba kkuntrast mal-pożizzjoni uffiċjali tagħhom, peress li ma kinux qegħdin jaġixxu abbażi tal-prinċipji tas-suq.

(477)

Wara li qabblet il-pretensjonijiet totali mħallsa mal-ammonti totali assigurati, abbażi tad-data fir-Rapport Annwali ta’ Sinosure għall-2017 (113) il-Kummissjoni kkonkludiet li bħala medja, Sinosure kellha titlob 0,26 % tal-ammont assigurat bħala primjum biex tkopri l-kost tal-pretensjonijiet (mingħajr biss ma tqis l-ispejjeż ġenerali). Madankollu, fil-prattika, il-primjums imħallsa mill-kumpaniji inklużi fil-kampjun kienu ħafna aktar baxxi mit-tariffa minima meħtieġa biex jiġu koperti l-kostijiet operazzjonali.

(478)

Barra minn hekk, il-Kummissjoni sabet li xi wħud mill-produtturi esportaturi bbenefikaw minn rifużjoni parzjali jew totali tal-primjums tal-assigurazzjoni tal-kreditu għall-esportazzjoni mħallsa lil Sinosure.

(479)

Għalhekk, il-Kummissjoni kkonkludiet li l-qafas legali stabbilit hawn fuq qiegħed jiġi implimentat minn Sinosure fl-eżerċizzju ta’ funzjonijiet governattivi fir-rigward tas-settur tal-GFF. Sinsosure aġixxiet bħala korp pubbliku fis-sens tal-Artikolu 2(b) tar-Regolament bażiku, moqri flimkien mal-Artikolu 3(1)(a)(i) tar-Regolament bażiku u skont il-ġurisprudenza rilevanti tad-WTO. Barra minn hekk, il-prodotturi esportaturi inklużi fil-kampjun ingħataw benefiċċju, billi l-assigurazzjoni ġiet ipprovduta b’rati taħt it-tariffa minima meħtieġa biex Sinosure tkopri l-kostijiet operazzjonali tagħha.

(480)

Il-Kummissjoni ddeterminat ukoll li s-sussidji mogħtija skont il-programm ta’ assigurazzjoni għall-esportazzjoni huma speċifiċi, peress li ma setgħux jinkisbu mingħajr l-esportazzjoni u għalhekk huma kontinġenti fuq l-esportazzjoni fis-sens tal-Artikolu 4(4)(a) tar-Regolament bażiku.

(481)

Matul iż-żjara ta’ verifika, Sinosure ddikjarat li hemm ħames parteċipanti fis-suq u li ma għandhiex informazzjoni dwar is-sehem mis-suq tagħha. Madankollu, skont l-informazzjoni pprovduta f’investigazzjoni antisussidji preċedenti, li għaliha l-perjodu ta’ investigazzjoni kien bejn l-1 ta’ Lulju 2016 u t-30 ta’ Ġunju 2017 (114), Sinosure rrappreżentat madwar 90 % tas-suq domestiku għall-assigurazzjoni tal-esportazzjoni fir-RPĊ f’dak iż-żmien u għalhekk kellha pożizzjoni tas-suq predominanti. Il-Kummissjoni ma setgħetx issib primjum domestiku tal-assigurazzjoni bbażat fuq is-suq. Għalhekk, f’konformità ma’ investigazzjonijiet antisussidji preċedenti, il-Kummissjoni użat l-aktar valur referenzjarju estern xieraq, li għalih kien hemm informazzjoni faċilment disponibbli, jiġifieri r-rati tal-primjum applikati mill-Export-Import Bank (“Ex-Im Bank”) tal-Istati Uniti tal-Amerika għal istituzzjonijiet mhux finanzjarji għal esportazzjonijiet lejn pajjiżi tal-OECD.

(482)

Ir-rifużjonijiet ta’ primjums tal-assigurazzjoni għall-esportazzjoni li ngħataw matul il-perjodu ta’ investigazzjoni ġew ittrattati bħala għotja. Minħabba li ma kien hemm l-ebda evidenza ta’ kostijiet addizzjonali mġarrba mill-kumpaniji li għalihom ikun meħtieġ aġġustament, il-benefiċċju ġie kkalkulat bħala l-ammont sħiħ tar-rifużjoni rċevut matul il-perjodu ta’ investigazzjoni.

(483)

L-ammont ta’ sussidju stabbilit fir-rigward ta’ din l-iskema matul il-perjodu ta’ investigazzjoni għall-produtturi esportaturi inklużi fil-kampjun jammonta għal:

Finanzjament u assigurazzjoni preferenzjali: assigurazzjoni ta’ kreditu għall-esportazzjoni

(484)

Peress li l-gruppi ta’ kumpaniji investigati kienu integrati vertikalment, il-fornituri ewlenin tal-materja prima ġew inklużi fl-investigazzjoni mill-Kummissjoni, u s-sussidji rċevuti fil-livell ta’ dawn il-fornituri relatati ġew integrati fil-kalkoli għal kull skema ta’ sussidju.

(485)

Min-naħa l-oħra, il-Kummissjoni ma sabitx biżżejjed evidenza biex tissostanzja l-allegazzjoni ta’ provvista ta’ oġġetti b’remunerazzjoni inqas minn adegwata minn fornituri mhux relatati lill-produtturi GFF.

(486)

L-art kollha fir-RPĊ hija jew proprjetà tal-Istat jew ta’ kollettiva, magħmula minn rħula jew bliet żgħar, qabel ma t-titolu ġuridiku jew ekwitabbli tal-art ikun jista’ jingħata privattiva jew jingħata lil sidien korporattivi jew individwali. Il-biċċiet ta’ art kollha f’żoni urbanizzati huma proprjetà tal-Istat u l-biċċiet ta’ art kollha f’żoni rurali huma proprjetà tal-irħula jew tal-bliet żgħar fihom.

(487)

Madankollu, skont il-liġi kostituzzjonali tar-RPĊ u l-Liġi dwar l-Art, il-kumpaniji u l-individwi jistgħu jixtru “drittijiet għall-użu tal-art”. Għal art industrijali, il-kera hija normalment ta’ 50 sena, u tiġġedded għal perjodu ieħor ta’ 50 sena.

(488)

Skont il-GTĊ, l-Artikolu 137 tal-Liġi dwar il-Proprjetà tar-Repubblika tal-Poplu taċ-Ċina jistipula li “l-art li tintuża għal skopijiet ta’ industrija, divertiment jew djar kummerċjali, eċċ. jew l-art li għaliha hemm żewġ utenti jew aktar maħsuba għandha tiġi trasferita permezz ta’ rkant, sejħa għall-offerti jew kwalunkwe metodu ieħor ta’ offerti mill-pubbliku.” Barra minn hekk il-GTĊ, jirreferi għall-Artikolu 3 tar-Regolamenti Interim tar-Repubblika tal-Poplu taċ-Ċina li Jirrigwardaw l-Għoti u t-Trasferiment tad-Dritt għall-Użu ta’ Art tal-Gvern f’Żoni Urbani. Dan l-Artikolu jiddisponi li “kwalunkwe kumpanija, intrapriża, organizzazzjoni oħra u individwu ieħor fir-Repubblika tal-Poplu taċ-Ċina jew barra minnha, jistgħu, sakemm ma jkunx previst mod ieħor mil-liġi, jiksbu d-dritt għall-użu tal-art u jinvolvu ruħhom fl-iżvilupp, l-utilizzazzjoni u l-ġestjoni tal-art f’konformità mad-dispożizzjonijiet ta’ dawn ir-Regolamenti.”

(489)

Il-GTĊ huwa tal-fehma li fir-RPĊ hemm suq ħieles għall-art u li l-prezz imħallas minn intrapriża industrijali għat-titolu ta’ twellija tal-art jirrifletti l-prezz tas-suq.

(490)

Fiċ-Ċina, l-għoti tad-dritt għall-użu tal-art jaqa’ taħt il-Liġi dwar l-Amministrazzjoni tal-Artijiet tar-Repubblika tal-Poplu taċ-Ċina. Barra minn hekk, id-dokumenti li ġejjin huma wkoll parti mill-bażi ġuridika:

(491)

Skont l-Artikolu 10 tad-“Dispożizzjoni dwar l-Għoti tad-Dritt għall-Użu ta’ Art għall-Kostruzzjoni tal-Istat permezz ta’ Sejħa għall-Offerti, Irkant u Kwotazzjoni”, l-awtoritajiet lokali jistabbilixxu l-prezzijiet tal-art skont is-sistema tal-evalwazzjoni tal-art urbana, li tiġi aġġornata kull tliet snin biss, u l-politika industrijali tal-gvern.

(492)

Matul iż-żjara ta’ verifika, il-GTĊ iddikjara li f’Mejju 2019 il-Ministeru tal-Finanzi ħareġ Linji Gwida dwar l-utilizzazzjoni tal-użu ta’ art industrijali biex jipprovdu informazzjoni aħjar dwar il-LUR għall-parteċipanti fis-suq, u jiżgura l-forniment skont il-ħtieġa tas-suq. Dawn il-Linji Gwida jiddikjaraw li qegħdin jinħolqu kundizzjonijiet ekwi u l-parteċipanti kollha fis-suq għandhom aċċess bl-istess kundizzjonijiet għall-art industrijali. Madankollu, dawn il-Linji Gwida ma kienux applikabbli matul il-perjodu ta’ investigazzjoni u fil-ħin tal-akkwist tal-LUR mill-produtturi esportaturi fil-kampjun.

(493)

F’investigazzjonijiet preċedenti, il-Kummissjoni sabet li l-prezzijiet imħallsa għal-LUR fir-RPĊ ma kinux rappreżentattivi ta’ prezz tas-suq iddeterminat mill-provvista u mid-domanda tas-suq ħieles, peress li s-sistema tal-irkant instabet li ma kinitx ċara, ma kinitx trasparenti u ma kinitx qiegħda tiffunzjona fil-prattika, u nstab li l-prezzijiet kienu stabbiliti b’mod arbitrarju mill-awtoritajiet. Kif issemma fil-premessa preċedenti, l-awtoritajiet jistabbilixxu l-prezzijiet skont is-Sistema ta’ Evalwazzjoni tal-Art Urbana li, fost kriterji oħrajn, tagħtihom struzzjonijiet sabiex jikkunsidraw ukoll il-politika industrijali meta jistabbilixxu l-prezz tal-art industrijali.

(494)

L-investigazzjoni attwali ma wriet ebda tibdil notevoli f’dan ir-rigward. Pereżempju, il-Kummissjoni sabet li ftit biss mill-produtturi esportaturi inklużi fil-kampjun kienu għaddew minn proċess ta’ offerti jew minn proċess ta’ offerta pubblika simili għal xi LUR tagħhom, anki għad-drittijiet tal-użu tal-art miksuba dan l-aħħar. Għall-biċċa l-kbira tal-kumpaniji inklużi fil-kampjun l-LURs kienu allokati mill-awtoritajiet lokali bi prezzijiet negozjati.

(495)

Il-Kummissjoni nnutat li hemm ukoll sistema dinamika ta’ monitoraġġ tal-art minbarra s-sistema ta’ monitoraġġ tal-art urbana. Fir-rieżami tal-iskadenza tal-Panelli Solari li joriġinaw mir-Repubblika tal-Poplu taċ-Ċina (115), il-Kummissjoni sabet li dawn il-prezzijiet huma ogħla mill-prezzijiet normattivi minimi stabbiliti mis-sistema ta’ evalwazzjoni tal-art urbana u użati mill-gvernijiet lokali, minħabba li dawn tal-aħħar kienu aġġornati biss kull tliet snin, filwaqt li l-prezzijiet tal-monitoraġġ dinamiku kienu aġġornati kull tliet xhur. Madankollu, ma kien hemm l-ebda indikazzjoni li l-prezzijiet tal-art huma bbażati fuq il-prezzijiet tal-monitoraġġ dinamiku. Fil-fatt, il-GTĊ, waqt il-verifika dwar il-panelli solari, kien ikkonferma li s-sistema ta’ monitoraġġ dinamiku tal-prezz tal-art timmonitorja l-varjazzjonijiet fil-livelli tal-prezz tal-art f’ċerti żoni (jiġifieri l-105 bliet Ċiniżi) fir-RPĊ u hija ddisinjata biex tivvaluta l-evoluzzjoni tal-prezzijiet tal-art. Madankollu, il-prezzijiet inizjali fl-offerti u fl-irkanti kienu bbażati fuq il-valuri referenzjarji stabbiliti mis-sistema tal-evalwazzjoni tal-art. Din is-sitwazzjoni kienet għadha applikabbli matul il-PI. Barra minn hekk, f’dan il-każ, il-biċċa l-kbira tal-gruppi ta’ kumpaniji inklużi fil-kampjun irċevew il-biċċiet ta’ art tagħhom permezz ta’ allokazzjoni.

(496)

Għall-biċċiet tal-art li kienu pprovduti permezz ta’ offerti, il-Kummissjoni sabet li f’kull każ, kien hemm offerent wieħed biss għall-art, u l-prezz imħallas kien jikkorrispondi għall-prezz inizjali tal-proċess tal-offerti. Fin-nuqqas ta’ informazzjoni dettaljata addizzjonali dwar il-proċess effettiv tal-irkant, ma kienx ċert li l-prezz inizjali kien stabbilit b’mod indipendenti u li kien jikkorrispondi għall-valur tas-suq tad-dritt tal-użu tal-art.

(497)

Wara d-divulgazzjoni definittiva, il-GTĊ sostna li f’mekkaniżmu tal-offerti, il-prezz miksub eventwalment ma jirriflettix biss il-prezz li bih il-bejjiegħ ikun lest li jbigħ jew il-prezz inizjali li bih issir l-offerta, iżda jirrifletti wkoll il-prezz li x-xerrejja lesti jħallsu u l-prezz li eventwalment jintlaħaq permezz ta’ tali mekkaniżmu u li għalhekk jirrifletti kemm id-domanda kif ukoll il-provvista. Jekk, wara li jkun tlesta l-mekkaniżmu ta’ offerti, il-prezz finali “jikkorrispondi għall-prezz inizjali tal-proċess tal-offerti”, dan ifisser sempliċiment li dan huwa l-prezz li jirrifletti d-domanda u l-provvista f’dak il-mument partikolari. Il-Kummissjoni qablet mal-GTĊ dwar il-prinċipji bażiċi ta’ mekkaniżmi tal-offerti deskritti, iżda nnotat li tali mekkaniżmu jista’ jaħdem biss meta jkun hemm diversi offerenti għal ċerta biċċa art. Madankollu, il-Kummissjoni ma sabitx eżempju wieħed f’din l-investigazzjoni, jew anki f’investigazzjonijiet preċedenti, fejn kien hemm aktar minn offerent wieħed għall-art, u fejn setgħet ġiet osservata l-interazzjoni tad-domanda u l-provvista. Għaldaqstant, din l-affermazzjoni ġiet miċħuda.

(498)

Barra minn hekk, il-Kummissjoni sabet ukoll li xi kumpaniji rċevew rifużjonijiet mingħand l-awtoritajiet lokali biex jikkumpensaw għall-prezzijiet li ħallsu għal-LURs. Barra minn hekk, xi wħud mil-LURs miksuba mill-kumpaniji f’CNBM Group kellhom jitħallsu biss diversi snin wara li l-art tkun bdiet tintuża.

(499)

L-evidenza ta’ hawn fuq tikkontradixxi l-affermazzjonijiet tal-GTĊ li l-prezzijiet imħallsa għal-LUR fir-RPĊ huma rappreżentattivi ta’ prezz tas-suq li jiġi stabbilit mill-provvista u mid-domanda fis-suq ħieles.

(500)

Is-sejbiet ta’ din l-investigazzjoni juru li s-sitwazzjoni li tikkonċerna l-akkwist tal-LURs fir-RPĊ mhijiex trasparenti u li l-prezzijiet ġew stabbiliti b’mod arbitrarju mill-awtoritajiet.

(501)

Għalhekk, l-għoti ta’ drittijiet għall-użu tal-art mill-GTĊ jenħtieġ li jitqies bħala sussidju fis-sens tal-Artikolu 3(1)(a) (iii) u tal-Artikolu 3(2) tar-Regolament bażiku fil-forma ta’ provvista ta’ oġġetti li tagħti benefiċċju lill-kumpaniji riċevituri. Kif spjegat fil-premessi (491) sa (499) ta’ hawn fuq, ma hemm l-ebda suq funzjonanti għall-art fir-RPĊ u l-użu ta’ valur referenzjarju estern (ara l-premessi (506) sa (515) ta’ hawn taħt) juri li l-ammont li l-produtturi esportaturi inklużi fil-kampjun ħallsu għad-drittijiet għall-użu tal-art huwa ferm inqas mir-rata normali tas-suq.

(502)

Fil-kuntest ta’ aċċess preferenzjali għal art industrijali għall-kumpaniji li jappartjenu għal ċerti industriji, il-Kummissjoni tinnota li l-prezz stabbilit mill-awtoritajiet lokali għandu jqis il-politika industrijali tal-gvern, kif imsemmi hawn fuq fil-premessa (493). F’din il-politika industrijali, l-industrija GFF hija elenkata bħala industrija mħeġġa (116). Barra minn hekk, id-Deċiżjoni Nru 40 tal-Kunsill tal-Istat tirrikjedi li l-awtoritajiet pubbliċi jiżguraw li l-art tiġi pprovduta lill-industriji mħeġġa. L-Artikolu 18 tad-Deċiżjoni Nru 40 jagħmilha ċara li l-industriji li huma “ristretti” mhux se jkollhom aċċess għad-drittijiet għall-użu tal-art. Minn dan isegwi li s-sussidju huwa speċifiku skont l-Artikolu 4(2)(a) u 4(2)(c) tar-Regolament bażiku peress li l-għoti preferenzjali ta’ art huwa limitat għal kumpaniji li jappartjenu għal ċerti industriji, f’dan il-każ is-settur tal-GFF, u l-prattiki tal-gvern f’dan il-qasam mhumiex ċari u mhumiex trasparenti.

(503)

Wara d-divulgazzjoni definittiva, il-GTĊ tenna l-kummenti pprovduti dwar it-Taqsima 3.1 ta’ hawn fuq fir-rigward tal-LUR ukoll, u qal li l-ebda wieħed mid-dokumenti msemmija mill-Kummissjoni ma għandu rabta diretta mal-GFF, u l-ebda wieħed minnhom ma jillimita d-dispożizzjoni allegatament preferenzjali tal-LURs għal ċerti intrapriżi. Barra minn hekk, id-Deċiżjoni Nru 40 tal-Kunsill tal-Istat ma ssemmix li l-awtoritajiet pubbliċi jenħtieġ li jiżguraw li l-art tiġi pprovduta lill-industriji mħeġġa.

(504)

Bi tweġiba, il-Kummissjoni rreferiet għall-argumenti diġà żviluppati fit-Taqsima 3.1 hawn fuq, fejn enfasizzat li l-GFF hija tabilħaqq industrija mħeġġa. Barra minn hekk, id-Deċiżjoni Nru 40 tal-Kunsill tal-Istat issemmi fl-Artikolu XII li “Il-Katalgu ta’ Gwida għar-Ristrutturar tal-Industrija” huwa referenza importanti biex jiggwida l-investiment, l-immaniġġjar tal-gvern ta’ proġetti ta’ investiment u l-formulazzjoni u l-implimentazzjoni ta’ politiki ta’ taxxa, krediti, art (enfasi miżjuda) u importazzjoni u esportazzjoni”. Barra minn hekk, l-introduzzjoni tad-Deċiżjoni Nru 40 tgħid li “Id-dipartimenti kollha kkonċernati jenħtieġ li jaċċelleraw il-passi fil-formulazzjoni u fl-emendar tal-politiki rilevanti tat-taxxa, il-kreditu, l-art (enfasi miżjuda) u l-importazzjoni u l-esportazzjoni, eċċ., u jsaħħu l-koordinazzjoni mal-politiki industrijali sabiex tiġi pperfezzjonata aktar is-sistema ta’ politika tal-promozzjoni tar-ristrutturar industrijali”. Min-naħa l-oħra, l-Artikolu XVIII tad-Deċiżjoni Nru 40 jgħid li għall-industriji li jaqgħu taħt il-kategorija limitata “Id-dipartimenti li jirregolaw l-investiment ma għandhomx jeżaminaw, japprovaw jew jirreġistraw, l-ebda istituzzjoni finanzjarja ma tista’ tagħti self, l-ebda dipartiment ieħor li jirregola l-immaniġġjat tal-art , l-ippjanar u l-kostruzzjoni tal-bliet, il-ħarsien ambjentali, l-ispezzjoni tal-kwalità, it-tifi tan-nar, id-dwana, l-industrija u l-kummerċ, eċċ, ma jistgħu jgħaddu minn proċeduri rilevanti” (enfasi miżjuda). Għalhekk hemm rabta ċara bejn il-politiki industrijali għall-industriji mħeġġa u l-politika għall-provvista tal-art. L-affermazzjonijiet tal-GTĊ għalhekk ġew miċħuda.

(505)

Konsegwentement, il-Kummissjoni qieset li dan is-sussidju huwa kumpensabbli.

(506)

Bħal f’investigazzjonijiet preċedenti (117) u f’konformità mal-Artikolu 6(d)(ii) tar-Regolament bażiku, il-prezzijiet tal-art mit-Territorju Doganali Separat tat-Tajwan, Penghu, Kinmen u Matsu (“it-Tajpej Ċiniż”) intużaw bħala valur referenzjarju estern (118). Il-benefiċċju mogħti lir-riċevituri jiġi kkalkulat billi tittieħed inkunsiderazzjoni d-differenza bejn l-ammont effettivament imħallas minn kull wieħed mill-produtturi esportaturi inklużi fil-kampjun (jiġifieri l-prezz effettiv imħallas kif iddikjarat fil-kuntratt u, meta applikabbli, il-prezz iddikjarat fil-kuntratt imnaqqas bl-ammont ta’ rifużjonijiet/għotjiet mill-gvern lokali) għad-drittijiet għall-użu tal-art u l-ammont li normalment kellu jitħallas abbażi tal-valur referenzjarju tat-Tajpej Ċiniż.

(507)

Il-Kummissjoni tqis it-Tajpej Ċiniż bħala valur referenzjarju estern xieraq għar-raġunijiet li ġejjin:

(508)

Il-Kummissjoni użat il-prezz medju tal-art għal kull metru kwadru stabbilit fit-Tajwan ikkoreġut għall-inflazzjoni u l-evoluzzjoni tal-PDG mid-dati tal-kuntratti rispettivi tad-dritt għall-użu tal-art, billi segwiet il-metodoloġija applikata f’investigazzjonijiet preċedenti (119). L-informazzjoni rigward il-prezzijiet tal-art industrijali kif kienu fl-2015 inġabret mis-sit web tal-Uffiċċju Industrijali tal-Ministeru tal-Affarijiet Ekonomiċi tat-Tajwan (120). Għas-snin ta’ qabel, il-prezzijiet ġew ikkoreġuti permezz tar-rati ta’ inflazzjoni u tal-evoluzzjoni tal-PDG per capita bil-prezzijiet kurrenti f’USD għat-Tajwan kif ippubblikati mill-FMI għall-2015.

(509)

Wara d-divulgazzjoni definittiva, diversi partijiet qalu li t-Tajpej Ċiniża ma kienx valur referenzjarju estern xieraq. Parti waħda ssuġġeriet l-użu tal-Indja minflok it-Taipei Ċiniża għar-raġunijiet li ġejjin:

(510)

Madankollu, l-affermazzjoni ta’ din il-parti injorat element kruċjali fl-analiżi tagħha, jiġifieri l-livell ta’ żvilupp ekonomiku ta’ dawn il-provinċji. Skont sorsi pubbliċi, il-livell ta’ PDG per capita ta’ dawn il-provinċji Indjani huwa inferjuri ħafna aktar minn dak tal-bliet/provinċji fejn huma bbażati l-produtturi esportaturi. Fil-fatt, il-PDG per capita ta’ Maharastra (121), li huwa l-ogħla fost it-tliet provinċji msemmija, kien jammonta għal USD 3 000 biss fl-2018–2019, filwaqt li l-livell tal-PDG fil-provinċja ta’ Zhejiang (użat għal skopijiet ta’ tqabbil mill-ilmentatur) kien jgħodd USD 14 907 fl-2018 (122). Meta jitqies dan ta’ hawn fuq u l-fatturi elenkati fil-premessa (507), din l-affermazzjoni kellha tiġi miċħuda.

(511)

Barra minn hekk, il-GTĊ qal li jenħtieġ li jintużaw prezzijiet domestiċi f’dan il-każ minħabba li huma involuti wkoll kumpaniji privati f’sullokazzjoni jew trasferiment ta’ LURs fiċ-Ċina, u l-GTĊ għalhekk mhuwiex l-uniku attur f’dak is-suq. Sabiex tiġi eżaminata din l-affermazzjoni l-Kummissjoni teħtieġ li l-ewwel tistabbilixxi n-natura u d-daqs tas-suq tal-art għall-atturi privati meta mqabbla mas-suq immexxi mill-gvern kif ukoll kwalunkwe interferenza possibbli mill-awtoritajiet ċentrali u lokali f’dak allegat suq tal-art li jopera privatament. Barra minn hekk, jenħtieġ li tkun disponibbli data komprensiva u aġġornata dwar l-ipprezzar tat-tranżazzjonijiet. Madankollu, il-GTĊ naqas milli jipprovdi statistika jew data li tippermetti lill-Kummissjoni teżamina l-proposta, u l-Kummissjoni ma setgħet issib l-ebda data disponibbli pubblikament dwar is-suġġett. Barra minn hekk, anki jekk tingħata din l-informazzjoni, din tkun tikkonċerna biss suq sekondarju tat-trasferimenti, peress li hemm biss parteċipant wieħed fis-suq primarju (jiġifieri l-allokazzjoni oriġinali ta’ LUR dejjem titwettaq mill-GTĊ). Tabilħaqq, is-suq primarju tal-allokazzjoni oriġinali ta’ 50 sena huwa differenti mill-kera fis-suq sekondarju, li normalment jenħtieġ li tkin għal perjodu ferm iqsar, jew tal-inqas bi klawżoli differenti għar-rivalwazzjoni, it-terminazzjoni, eċċ. Għalhekk, il-Kummissjoni kompliet tiddependi fuq l-informazzjoni disponibbli għas-suq primarju, li huwa s-suq li qed jiġi investigat f’dan il-każ.

(512)

Il-GTĊ argumenta wkoll li f’każ li l-Kummissjoni tagħżel li tipproċedi b’valur referenzjarju estern, jenħtieġ li jsir aġġustament għall-fattur tad-densità tal-popolazzjoni, li mbagħad jaffettwa d-domanda u konsegwentement il-prezzijiet. Tabilħaqq, bejn l-2015 u l-2018, id-densità tal-popolazzjoni fit-Tajpej Ċiniż kienet 4,4 darbiet ogħla milli kienet fiċ-Ċina. B’mod partikolari, filwaqt li d-densità tal-popolazzjoni għaċ-Ċina bejn l-2015 u l-2018 kienet ta’ madwar 147 persuna għal kull kilometru kwadru ta’ art, id-densità tal-popolazzjoni għat-Tajpej Ċiniż kienet ta’ madwar 650 persuna għal kull km2 ta’ art fl-istess perjodu. Is-sitwazzjoni tal-art u l-prezzijiet f’dawn iż-żewġ pajjiżi huma għalhekk inkomparabbli.

(513)

Madankollu, il-Kummissjoni nnutat li l-GTĊ qabbel iċ-ċifri tad-densità tal-popolazzjoni fil-livell tal-pajjiż kollu. B’ħarsa aktar mill-qrib lejn id-densità tal-popolazzjoni tal-postijiet attwali tal-produtturi esportaturi, jidher li ċ-ċifri tad-densità tal-popolazzjoni huma fil-fatt pjuttost simili. Pereżempju, id-densità tal-popolazzjoni ta’ Zhejiang kienet ta’ 560 persuna għal kull m2 fl-2018, u d-densità tal-popolazzjoni ta’ Shandong kienet ta’ 640 persuna kull km2 (123). Għalhekk, il-Kummissjoni kkunsidrat li ma kienx iġġustifikat aġġustament.

(514)

Il-GTĊ talab ukoll lill-Kummissjoni biex tipprovdi informazzjoni addizzjonali dwar is-similarità bejn it-tip ta’ art u t-tranżazzjonijiet użati biex inħadem il-valur referenzjarju rilevanti, kif imsemmi fil-premessa (507) hawn fuq. Il-Kummissjoni enfasizzat f’dan ir-rigward li fiż-żewġ każijiet, it-tranżazzjonijiet jikkonċernaw art industrijali ta’ ċertu daqs f’żoni industrijali.

(515)

Skont l-Artikolu 7(3) tar-Regolament bażiku, l-ammont ta’ sussidju ġie allokat għall-perjodu ta’ investigazzjoni permezz tal-ħajja normali tad-dritt għall-użu tal-art industrijali, jiġifieri 50 sena. Dan l-ammont imbagħad ġie allokat fuq il-fatturat totali tal-kumpanija rispettiva matul il-perjodu ta’ investigazzjoni, peress li s-sussidju ma jiddependix mill-andament tal-esportazzjoni u ma ngħatax b’referenza għall-kwantitajiet manifatturati, prodotti, esportati jew trasportati.

(516)

Wara d-divulgazzjoni definittiva, Yuntianhua Group sostna li kien hemm żball klerikali fuq il-valur użat f’kuntratt speċifiku ta’ LUR. Il-Kummissjoni aċċettat din l-affermazzjoni u kkoreġiet il-valur skont dan.