(1)

Ir-Regolament (UE) Nru 1380/2013 tal-Parlament Ewropew u tal-Kunsill (3) għandu l-għan li jelimina b’mod progressiv il-qbid skartat fis-sajd kollu tal-Unjoni bl-introduzzjoni ta’ obbligu ta’ ħatt l-art għall-qabdiet ta’ speċijiet li għalihom hemm limiti tal-qbid.

(2)

L-Artikolu 9 tar-Regolament (UE) Nru 1380/2013 jipprevedi l-adozzjoni ta’ pjanijiet pluriennali li jkun fihom miżuri ta’ konservazzjoni għas-sajd li jisfrutta ċerti stokkijiet f’żona ġeografika rilevanti.

(3)

Pjanijiet pluriennali bħal dawn jispeċifikaw id-dettalji tal-implimentazzjoni tal-obbligu ta’ ħatt l-art u jistgħu jagħtu s-setgħa lill-Kummissjoni tkompli tispeċifika dawk id-dettalji abbażi ta’ rakkomandazzjonijiet konġunti żviluppati mill-Istati Membri.

(4)

Fl-4 ta’ Lulju 2018, il-Parlament Ewropew u l-Kunsill adottaw ir-Regolament (UE) 2018/973 li jistabbilixxi pjan pluriennali għall-istokkijiet demersali fil-Baħar tat-Tramuntana u s-sajd li jisfrutta dawk l-istokkijiet (4). L-Artikolu 11 ta’ dak ir-Regolament jagħti s-setgħa lill-Kummissjoni tadotta atti delegati sabiex tissupplimenta lil dan ir-Regolament billi tispeċifika d-dettalji tal-obbligu ta’ ħatt l-art għall-istokkijiet kollha tal-ispeċijiet fil-Baħar tat-Tramuntana li għalihom japplika l-obbligu ta’ ħatt l-art skont l-Artikolu 15(1) tar-Regolament (UE) Nru 1380/2013, kif previst fl-Artikolu 15(5)(a) sa (e) ta’ dak ir-Regolament, abbażi ta’ rakkomandazzjonijiet konġunti żviluppati mill-Istati Membri.

(5)

Ir-Regolament Delegat tal-Kummissjoni (UE) 2018/2035 (5) speċifika d-dettalji tal-implimentazzjoni tal-obbligu ta’ ħatt l-art għal ċertu sajd demersali fil-Baħar tat-Tramuntana għall-perjodu mill-2019 sal-2021, wara rakkomandazzjoni konġunta li ppreżentaw il-Belġju, id-Danimarka, Franza, il-Ġermanja, in-Netherlands, l-Iżvezja u r-Renju Unit, li għandhom interess ta’ ġestjoni dirett fis-sajd fil-Baħar tat-Tramuntana.

(6)

Wara li kkonsultaw lill-Kunsill Konsultattiv tal-Baħar tat-Tramuntana u lill-Kunsill Konsultattiv tal-Istokkijiet Pelaġiċi, fid-29 ta’ Mejju 2019 dawk l-Istati Membri ressqu rakkomandazzjoni konġunta ġdida lill-Kummissjoni dwar id-dettalji tal-implimentazzjoni tal-obbligu ta’ ħatt l-art għas-sajd demersali fil-Baħar tat-Tramuntana. Ir-rakkomandazzjoni konġunta ġiet emendata fis-7 ta’ Awwissu 2019.

(7)

Ir-rakkomandazzjoni konġunta l-ġdida li ressqu l-Istati Membri tissuġġerixxi li jitkomplew għadd ta’ miżuri tekniċi addizzjonali li l-Unjoni u n-Norveġja qablu fuqhom fl-2011 (6) u fl-2012 (7), kif ukoll li jiġi awtorizzat l-użu tal-apparat ta’ selettività SepNep. L-għan ta’ dawn il-miżuri huwa li tiżdied is-selettività u li jonqsu l-qabdiet mhux mixtieqa fil-każ tat-tip ta’ sajd jew tal-ispeċijiet koperti mill-obbligu ta’ ħatt l-art, u dawn iddaħħlu għall-2019 sal-2021 mir-Regolament Delegat (UE) 2018/2035 skont l-Artikolu 15(5)(a) tar-Regolament (UE) Nru 1380/2013.

(8)

Fl-14 ta’ Awwissu 2019 daħal fis-seħħ Regolament ġdid dwar il-miżuri ta’ konservazzjoni tar-riżorsi tas-sajd u l-protezzjoni tal-ekosistemi tal-baħar permezz ta’ miżuri tekniċi, jiġifieri r-Regolament (UE) 2019/1241. Fl-Anness V tiegħu, dan jistabbilixxi dispożizzjonijiet speċifiċi dwar miżuri tekniċi stabbiliti fil-livell reġjonali għall-Baħar tat-Tramuntana, li jinkludu wkoll regoli dwar id-daqsijiet tal-malja, il-kundizzjonijiet assoċjati u l-qabdiet inċidentali. L-Artikolu 15 ta’ dak ir-Regolament jagħti s-setgħa lill-Kummissjoni tadotta atti delegati sabiex temenda, tissupplimenta, tħassar jew tidderoga mill-miżuri tekniċi stabbiliti fl-Annessi tar-Regolament (UE) 2019/1241, inkluż fl-implimentazzjoni tal-obbligu ta’ ħatt l-art.

(9)

Ir-Regolament (UE) 2019/1241 ma jipprevedix miżuri tranżizzjonali. Għalhekk, sabiex tiġi żgurata l-kompatibbiltà bejn dan ir-Regolament Delegat u r-Regolament (UE) 2019/1241, jeħtieġ li jiġu applikati l-kundizzjonijiet stabbiliti fir-Regolament (UE) 2019/1241, filwaqt li, fl-istess ħin, jitqiesu ċ-ċirkustanzi eċċezzjonali involuti. Abbażi tal-informazzjoni li pprovdew l-Istati Membri, il-Kumitat Xjentifiku, Tekniku u Ekonomiku għas-Sajd (l-STECF) ivvaluta b’mod pożittiv (8) l-informazzjoni li l-grupp reġjonali pprovda biex jappoġġa l-miżuri tekniċi inklużi fir-rakkomandazzjoni konġunta. Din ir-rakkomandazzjoni konġunta ġiet żviluppata u ppreżentata mill-Istati Membri u ġiet ivvalutata mill-STECF qabel ma ġie adottat ir-regolament il-ġdid dwar il-miżuri tekniċi, jiġifieri qabel ma daħal fis-seħħ ir-Regolament (UE) 2019/1241, u għalhekk ma kinetx tirreferi għal dak ir-Regolament. Madankollu, minħabba ċ-ċirkustanzi eċċezzjonali, il-Kummissjoni tqis li, abbażi tal-informazzjoni li għandha għad-dispożizzjoni tagħha f’dan l-istadju fir-rakkomandazzjoni konġunta u fil-valutazzjoni tal-STECF, ma jidher li hemm l-ebda element li jindika li l-miżuri tekniċi addizzjonali proposti se jonqsu milli jħarsu r-rekwiżiti stabbiliti fl-Artikolu 15 tar-Regolament (UE) 2019/1241 għall-miżuri tekniċi.

(10)

Għalhekk, sabiex tiżdied is-selettività tal-irkaptu u jonqsu l-qabdiet mhux mixtieqa fl-Iskagerrak, huwa xieraq li jiġu inklużi l-miżuri tekniċi li ressqu l-Istati Membri. Jenħtieġ li dawn il-miżuri japplikaw għall-perjodu mill-2020 sal-2021.

(11)

Kif stabbilit fir-Regolament (UE) 2018/973, il-Baħar tat-Tramuntana huwa magħmul mid-diviżjonijiet 2a u 3a tal-ICES (9) u mis-subżona 4 tal-ICES.

(12)

Inkisbu kontribuzzjonijiet xjentifiċi mingħand il-korpi xjentifiċi rilevanti u dawn ġew eżaminati mill-STECF (10). Il-Kummissjoni bagħtet il-miżuri kkonċernati lill-grupp ta’ esperti magħmul mit-28 Stat Membru u mill-Parlament Ewropew bħala osservatur, għal konsultazzjoni bil-miktub min-naħa tagħhom.

(13)

Għal ċerti stokkijiet, bħal dawk tal-barbun tat-tbajja’, l-STECF sab li r-rati ta’ sopravivenza tal-ħut individwali jaf mhumiex daqshekk għoljin daqs dawk ta’ speċijiet oħrajn. Madankollu, il-Kummissjoni qieset l-impatt relattiv ta’ din l-eżenzjoni fuq l-istokk kollu meta mqabbel mal-impatt tagħha fuq il-ħut individwali, u bbilanċjatu mal-ħtieġa li titkompla l-attività tas-sajd biex tinġabar id-data meħtieġa biex ikunu jistgħu jiġu indirizzati l-kummenti tal-STECF. F’każijiet fejn l-ammont relattiv ta’ qbid skartat ta’ ħut mejjet huwa relattivament baxx, il-Kummissjoni tqis li huwa approċċ pragmatiku u prudenti tal-ġestjoni tas-sajd li jingħataw eżenzjonijiet fuq bażi temporanja, minħabba li jekk dan ma jsirx, ma tkunx tista’ tinġabar id-data essenzjali għall-ġestjoni xierqa u infurmata tal-qbid skartat bil-għan li jiġi implimentat bis-sħiħ l-obbligu ta’ ħatt l-art.

(14)

Ir-Regolament Delegat (UE) 2018/2035 kien fih eżenzjoni marbuta ma’ rata għolja ta’ sopravivenza għal-lingwata komuni li tkun iżgħar mid-daqs minimu ta’ referenza għall-konservazzjoni li tinqabad mill-bastimenti tat-tkarkir fid-diviżjoni 4c tal-ICES, abbażi ta’ evidenza xjentifika li wriet rati għoljin ta’ sopravivenza tal-qbid skartat. Dik l-evidenza ġiet evalwata fis-snin ta’ qabel u l-STECF ikkonkluda (11) li kienet biżżejjed. L-STECF indika li ma ngħatat l-ebda informazzjoni ġdida dwar fejn tinsab iż-żona ta’ tkabbir (12). Billi dal-ħin ma hemm l-ebda żona tat-tkabbir identifikata, l-eżenzjoni tista’ tiddaħħal f’dan ir-Regolament, iżda jenħtieġ li l-Istati Membri jibagħtu l-informazzjoni rilevanti malli jiġu identifikati t-tali żoni. Minħabba li ċ-ċirkustanzi ma nbidlux, jenħtieġ li dik l-eżenzjoni tibqa’ tapplika fil-kuntest ta’ dan ir-Regolament.

(15)

Ir-Regolament Delegat (UE) 2018/2035 kien fih eżenzjoni marbuta ma’ rata għolja ta’ sopravivenza, kif previst fl-Artikolu 15(4)(b) tar-Regolament (UE) Nru 1380/2013, għall-qabdiet tal-iskampu li jsiru bin-nases fid-diviżjonijiet 2a u 3a tal-ICES u fis-subżona 4 tal-ICES, abbażi ta’ evidenza xjentifika li wriet rati għoljin ta’ sopravivenza tal-qbid skartat. Dik l-evidenza ġiet evalwata fis-snin ta’ qabel u l-STECF ikkonkluda (13) li kienet biżżejjed. Minħabba li ċ-ċirkustanzi ma nbidlux, jenħtieġ li dik l-eżenzjoni tibqa’ tapplika fil-kuntest ta’ dan ir-Regolament.

(16)

Ir-Regolament Delegat (UE) 2018/2035 kien fih eżenzjoni marbuta ma’ rata għolja ta’ sopravivenza għall-qabdiet tal-iskampu li jsiru b’ċertu tip ta’ rkaptu fis-subżona 4 tal-ICES u fid-diviżjonijiet 2a u 3a tal-ICES dejjem jekk jintuża apparat ta’ selettività netgrid. Dik l-eżenzjoni ngħatat bil-kundizzjoni li l-Istati Membri jibagħtu data dwar is-sajd li jsir mal-kosta tal-Punent tal-Baħar tat-Tramuntana. Lill-STECF ma ntbagħtitlux evidenza ġdida dwar rata għolja ta’ sopravivenza. L-Istati Membri qalu li ma kien hemm bżonn l-ebda data addizzjonali minħabba li fl-2018 l-STECF qal li l-informazzjoni xjentifika ta’ appoġġ dwar l-istimi tar-rati ta’ sopravivenza li jkopru l-kosta tal-Punent tal-Baħar tat-Tramuntana kienet affidabbli (14). Madankollu, l-STECF huwa mħasseb (15) dwar is-sajd għall-iskampu u għall-gambli tat-tip Pandalus spp. mal-kosta tal-Lvant, minħabba li din l-informazzjoni hija nieqsa u ma tistax tiġi vvalutata r-rata ta’ sopravivenza tal-iskampu f’dak it-tip ta’ sajd. F’dawn iċ-ċirkustanzi, l-eżenzjoni tista’ tiġi applikata sal-31 ta’ Diċembru 2020 u jenħtieġ li l-Istati Membri li għandhom interess ta’ ġestjoni dirett jibagħtu data dwar is-sajd li jsir mal-kosta tal-Lvant tal-Baħar tat-Tramuntana għall-valutazzjoni min-naħa tal-STECF mill-aktar fis possibbli u sa mhux aktar tard mill-1 ta’ Mejju 2020.

(17)

Ir-Regolament Delegat (UE) 2018/2035 kien fih eżenzjoni marbuta ma’ rata għolja ta’ sopravivenza għall-qabdiet inċidentali ta’ speċijiet li għalihom hemm limiti tal-qbid li jsiru waqt is-sajd bin-nases u bix-xbieki fyke, abbażi ta’ evidenza xjentifika li wriet rati għoljin ta’ sopravivenza tal-qbid skartat. Dik l-evidenza ġiet evalwata fis-snin ta’ qabel u l-STECF ikkonkluda (16) li d-data disponibbli tindika li r-rata ta’ mortalità tal-ħut skartat x’aktarx li se tkun baxxa, madankollu l-qabdiet attwali f’dan it-tip ta’ sajd huma negliġibbli. Minħabba li l-qabdiet mhumiex sinifikanti u ċ-ċirkustanzi ma nbidlux, jenħtieġ li l-eżenzjoni tibqa’ tapplika fil-kuntest ta’ dan ir-Regolament.

(18)

Ir-Regolament Delegat (UE) 2018/2035 kien fih eżenzjoni marbuta ma’ rata għolja ta’ sopravivenza għall-barbun tat-tbajja’ li jinqabad waqt is-sajd bl-għeżula u bil-pariti fid-diviżjoni 3a tal-ICES u fis-subżona 4 tal-ICES. L-Istati Membri pprovdew evidenza xjentifika biex juru r-rati għoljin ta’ sopravivenza tal-qbid skartat għall-barbun tat-tbajja’ f’dak it-tip ta’ sajd. L-evidenza ġiet ippreżentata lill-STECF, li kkonkluda (17) li ngħatat informazzjoni raġonevoli li turi r-rata konsiderevolment għolja ta’ sopravivenza. Għalhekk, jenħtieġ li dik l-eżenzjoni tiddaħħal f’dan ir-Regolament.

(19)

Ir-Regolament Delegat (UE) 2018/2035 kien fih eżenzjoni marbuta ma’ rata għolja ta’ sopravivenza għall-barbun tat-tbajja’ li jinqabad waqt is-sajd bit-tartaruni Daniżi fid-diviżjoni 3a tal-ICES u fis-subżona 4 tal-ICES. L-Istati Membri pprovdew evidenza xjentifika biex juru r-rati għoljin ta’ sopravivenza tal-qbid skartat għall-barbun tat-tbajja’ f’dak it-tip ta’ sajd. L-evidenza ġiet ippreżentata lill-STECF, li kkonkluda (18) li d-data tal-istudju dwar ir-rati ta’ sopravivenza hija affidabbli, għalkemm jistgħu jintużaw miżuri addizzjonali biex tiżdied ir-rata ta’ sopravivenza, minħabba li din tonqos b’mod sinifikanti f’każ li l-barbun tat-tbajja’ jdum iktar minn 30 minuta biex jingħażel. Għalhekk, jenħtieġ li dik l-eżenzjoni tiddaħħal f’dan ir-Regolament.

(20)

Ir-Regolament Delegat (UE) 2018/2035 kien fih eżenzjoni marbuta ma’ rata għolja ta’ sopravivenza għall-qabdiet tal-barbun tat-tbajja’ u għall-qabdiet inċidentali tiegħu li jsiru waqt is-sajd għall-pixxiċatt jew għall-ħut tond bix-xbieki tat-tkarkir fid-diviżjoni 3a tal-ICES u fis-subżona 4 tal-ICES fix-xhur tax-xitwa. L-Istati Membri pprovdew evidenza xjentifika biex juru r-rati għoljin ta’ sopravivenza tal-qbid skartat għall-barbun tat-tbajja’ f’dak it-tip ta’ sajd. L-evidenza ġiet ippreżentata lill-STECF, li kkonkluda (19) li r-rati ta’ sopravivenza fl-istudju ta’ appoġġ jonqsu jekk il-ħin tal-għażla jkun ta’ iktar minn 60 minuta fix-xhur tas-sajf u allura r-rata baxxa ta’ sopravivenza tal-barbun tat-tbajja’ fis-sajf tiġġustifika l-fatt li l-eżenzjoni tingħata biss għax-xhur tax-xitwa. Għalhekk, jenħtieġ li dik l-eżenzjoni tiddaħħal f’dan ir-Regolament.

(21)

Ir-Regolament Delegat (UE) 2018/2035 ta eżenzjoni marbuta ma’ rata għolja ta’ sopravivenza għar-rebekkini u għar-raj li jinqabdu b’kull tip ta’ rkaptu tas-sajd fid-diviżjonijiet 2a u 3a tal-ICES u fis-subżona 4 tal-ICES, minkejja l-fatt li ma kienx hemm evidenza xjentifika ddettaljata dwar ir-rati ta’ sopravivenza disponibbli għas-segmenti kollha tal-flotta u għall-kombinazzjonijiet kollha tal-irkaptu, taż-żoni u tal-ispeċijiet. Madankollu, ħlief għal xi ftit eċċezzjonijiet, l-STECF iqis li, b’mod ġenerali, ir-rati ta’ sopravivenza huma robusti (20), iżda hemm bżonn ta’ iktar dettalji. Minħabba l-ħtieġa li titkompla l-attività tas-sajd sabiex jiġi żgurat li tinġabar id-data meħtieġa, jenħtieġ li tingħata dik l-eżenzjoni, iżda jenħtieġ li l-Istati Membri jkollhom l-obbligu jippreżentaw id-data rilevanti li tippermetti lill-STECF jivvaluta bis-sħiħ il-ġustifikazzjoni u li tippermetti lill-Kummissjoni twettaq rieżami. Jenħtieġ li, sal-1 ta’ Mejju ta’ kull sena, l-Istati Membri li għandhom interess ta’ ġestjoni dirett jibagħtu l-affarijiet li ġejjin: (a) pjan direzzjonali żviluppat biex iżid is-sopravivenza u biex jimla l-lakuni fid-data identifikati mill-STECF, li jrid jiġi vvalutat kull sena mill-STECF, u (b) rapporti annwali dwar il-progress li jkun sar b’rabta mal-programmi marbutin mar-rata ta’ sopravivenza u dwar kull modifika jew aġġustament li jkun sar fihom.

(22)

Meta kienu qed jitqiesu r-rati ta’ sopravivenza tar-rebekkini u tar-raj, instab li r-raja kukù (Leucoraja naevus) kellhom rata ta’ sopravivenza li kienet ħafna iktar baxxa minn dik ta’ speċijiet oħrajn. Barra minn hekk, jidher li l-fehim xjentifiku dwar ix-xejra ta’ sopravivenza ta’ dik l-ispeċi huwa inqas robust. Madankollu, jekk din l-ispeċi tiġi eskluża mill-eżenzjoni, dan jipprevjeni s-sajd u l-ġbir kontinwu u preċiż tad-data. Tressqet evidenza rilevanti lill-STECF, li kkonkluda (21) li nbdew żewġ studji ġodda dwar esperimenti marbutin mar-rata ta’ sopravivenza tar-raja kukù, iżda li se jkun hemm bżonn ta’ iktar osservazzjonijiet biex isir ġudizzju definittiv dwar ir-rati ta’ sopravivenza fi żmien sena jew sentejn. Għalhekk, jenħtieġ li din l-eżenzjoni tingħata għal sentejn u li jiġu żviluppati, b’mod urġenti, studji ġodda u miżuri mtejba ta’ sopravivenza u li dawn jintbagħtu lill-STECF għall-valutazzjoni tiegħu malajr kemm jista’ jkun u sa mhux aktar tard mill-1 ta Mejju.

(23)

Ir-rakkomandazzjoni konġunta l-ġdida tissuġġerixxi eżenzjoni marbuta ma’ rata għolja ta’ sopravivenza għall-qabdiet tal-barbun tat-tbajja’ li jkun iżgħar mid-daqs minimu ta’ referenza għall-konservazzjoni li jinqabad bi xbieki tat-tkarkir bi travu (BT2) b’daqs tal-malja ta’ bejn 80 u 119-il mm fid-diviżjoni 2a tal-ICES u fis-subżona 4 tal-ICES għall-perjodu mill-2020 sal-2021:

(24)

Ir-rakkomandazzjoni konġunta l-ġdida tissuġġerixxi eżenzjoni marbuta ma’ rata għolja ta’ sopravivenza għall-barbun imperjali li jinqabad bi xbieki tat-tkarkir bi travu b’manka b’daqs tal-malja ta’ iktar minn 80 mm fis-subżona 4 tal-ICES. L-Istati Membri pprovdew evidenza xjentifika biex juru r-rati għoljin ta’ sopravivenza tal-qbid skartat għall-barbun imperjali f’dak it-tip ta’ sajd. L-evidenza ġiet ippreżentata lill-STECF, li kkonkluda (23) li ma ġiet ippreżentata l-ebda evidenza ġdida dwar is-sopravivenza u li l-istudji li kienu ġew ippreżentati qabel kellhom x’jaqsmu ma’ tip ta’ rkaptu ieħor u mhux max-xbieki tat-tkarkir bi travu u għalhekk ma kinux rappreżentattivi. Madankollu, l-Istati Membri ntrabtu li jagħmlu iktar riċerka biex josservaw ir-rata ta’ sopravivenza tal-barbun imperjali skartat li jkun inqabad bi xbieki tat-tkarkir bi travu u biex jipprovdu informazzjoni iktar iddettaljata dwar ir-rata ta’ sopravivenza fil-proġett il-ġdid, li mistenni jitwettaq sal-2021. Minħabba l-ħtieġa li titkompla l-attività tas-sajd sabiex jiġi żgurat li tinġabar id-data meħtieġa, jenħtieġ li tingħata dik l-eżenzjoni, iżda jenħtieġ li l-Istati Membri jkollhom l-obbligu jippreżentaw, fil-perjodu taż-żmien indikat, id-data rilevanti li tippermetti lill-STECF jivvaluta bis-sħiħ il-ġustifikazzjoni u li tippermetti lill-Kummissjoni twettaq rieżami. Jenħtieġ li dik l-eżenzjoni tiġi applikata b’mod provviżorju sal-31 ta’ Diċembru 2020.

(25)

Ir-rakkomandazzjoni konġunta l-ġdida tissuġġerixxi li l-applikazzjoni ta’ eżenzjoni marbuta ma’ rata għolja ta’ sopravivenza għall-barbun tat-tbajja’ li jinqabad bi xbieki tat-tkarkir b’daqs tal-malja ta’ mill-inqas 120 mm meta jkun qed jiġi mistad il-pixxiċatt jew il-ħut tond fid-diviżjoni 3a tal-ICES u fis-subżona 4 tal-ICES tiġi estiża għax-xhur tas-sajf. Ir-Regolament Delegat (UE) 2018/2035 ta dik l-eżenzjoni biss għax-xhur tax-xitwa (mill-1 ta’ Novembru sat-30 ta’ April). Ir-rakkomandazzjoni konġunta l-ġdida tissuġġerixxi wkoll eżenzjonijiet ġodda marbutin ma’ rata għolja ta’ sopravivenza għal dawn li ġejjin:

(26)

L-Istati Membri pprovdew evidenza xjentifika biex juru r-rati għoljin ta’ sopravivenza tal-qbid skartat għall-barbun tat-tbajja’ f’dak it-tip ta’ sajd. L-STECF innota (24) li l-metodi użati biex jiġu stmati r-rati ta’ sopravivenza jvarjaw minn studju għall-ieħor u qal li jidher li l-barbun tat-tbajja’ iżgħar, li jinqabad iktar ta’ spiss b’manki b’daqs tal-malja iżgħar, għandu rati iktar baxxi ta’ sopravivenza. Madankollu, ir-rapport xjentifiku sħiħ dwar iż-żona kollha jippermetti valutazzjoni rappreżentattiva dwar ir-rati ta’ sopravivenza tal-barbun tat-tbajja’ fix-xhur tas-sajf. Għalhekk, il-Kummissjoni tqis li din l-eżenzjoni jenħtieġ li tingħata għal sena biss u li jenħtieġ li jiġu żviluppati, b’mod urġenti, l-istudji l-ġodda u l-miżuri mtejba ta’ sopravivenza u li dawn jintbagħtu lill-STECF għall-valutazzjoni tiegħu malajr kemm jista’ jkun u sa mhux aktar tard mill-1 ta’ Mejju 2020.

(27)

Ir-Regolament Delegat (UE) 2018/2035 kien fih eżenzjonijiet de minimis għal dawn li ġejjin:

(28)

L-Istati Membri pprovdew evidenza li tappoġġa lil dawk l-eżenzjonijiet de minimis. L-STECF (25) eżamina dik l-evidenza u kkonkluda (26) li d-dokumenti li bagħtu l-Istati Membri kien fihom argumenti raġonati li juru li huwa diffiċli jinkiseb iktar titjib fis-selettività jew li dan se jwassal għal spejjeż sproporzjonati biex jiġu mmaniġġjati l-qabdiet mhux mixtieqa. Minħabba li ċ-ċirkustanzi ma nbidlux, huwa xieraq li jkomplu jiġu applikati l-eżenzjonijiet de minimis skont il-perċentwali u l-emendi meħtieġa li ġew issuġġeriti fir-rakkomandazzjoni konġunta l-ġdida skont l-Artikolu 15(5)(c) tar-Regolament (UE) Nru 1380/2013.

(29)

Ir-rakkomandazzjoni konġunta l-ġdida pprovdiet evidenza xjentifika addizzjonali biex l-eżenzjonijiet de minimis jiġu estiżi għal dawn li ġejjin:

(30)

Ir-rakkomandazzjoni konġunta l-ġdida ssuġġeriet eżenzjonijiet de minimis għal dawn li ġejjin:

(31)

L-Istati Membri pprovdew evidenza xjentifika li tappoġġa lil dawk l-eżenzjonijiet de minimis eżistenti u ġodda abbażi tad-diffikultajiet biex tittejjeb is-selettività u tal-ispejjeż sproporzjonati tal-immaniġġjar tal-qabdiet. L-STECF eżamina dik l-evidenza waqt il-laqgħa plenarja tiegħu li saret bejn l-1 u l-5 ta’ Lulju 2019 (27).

(32)

L-STECF eżamina l-evidenza addizzjonali li l-Istati Membri bagħtu dwar l-eżenzjonijiet de minimis marbutin mas-sawrell u mal-kavalli li jinqabdu minn bastimenti li jużaw ix-xbieki tat-tkarkir tal-qiegħ u x-xbieki tat-tkarkir bi travu u kkonkluda li, għall-biċċa l-kbira mill-Istati Membri, jeħtieġ tintbagħat aktar informazzjoni. Minħabba l-ħtieġa li titkompla l-attività tas-sajd sabiex jiġi żgurat li tinġabar id-data meħtieġa biex tiġi pprovduta dik l-informazzjoni, jenħtieġ li l-eżenzjonijiet individwali għal kull speċi jkunu limitati għal sena u li l-Istati Membri jkollhom l-obbligu jippreżentaw id-data rilevanti li tippermetti lill-STECF jivvaluta bis-sħiħ il-ġustifikazzjoni u li tippermetti lill-Kummissjoni twettaq rieżami. Jenħtieġ li l-Istati Membri kkonċernati jwettqu x-xogħol meħtieġ biex jiġbru u jipproċessaw id-data meħtieġa jew iwettqu l-provi addizzjonali u jipprovdu l-informazzjoni malajr kemm jista’ jkun u sa mhux aktar tard mill-1 ta’ Mejju 2020 għall-valutazzjoni min-naħa tal-STECF. Għalhekk jenħtieġ li dawk l-eżenzjonijiet jiġu applikati b’mod provviżorju sal-31 ta’ Diċembru 2020.

(33)

L-STECF eżamina l-evidenza li l-Istati Membri bagħtu dwar l-eżenzjoni de minimis marbuta ma’ kwantità ta’ laċċ ikħal, ta’ ċiċċirell, ta’ merluzz tan-Norveġja u ta’ stokkafixx flimkien li tinqabad waqt is-sajd demersali mħallat minn bastimenti li jużaw ix-xbieki tat-tkarkir u kkonkluda li ma hemm l-ebda evidenza kwantitattiva li tappoġġa d-dikjarazzjonijiet li hemm livell baxx ta’ qbid skartat u li ġew eżawriti l-għażliet biex titjieb is-selettività. L-STECF qal li jkun diffiċli li jsir iktar titjib fis-selettività f’dak it-tip ta’ sajd u li hemm bżonn ta’ eżenzjoni de minimis biex jiġu koperti l-qabdiet mhux mixtieqa li jibqa’. Minħabba l-ħtieġa li titkompla l-attività tas-sajd sabiex jiġi żgurat li tinġabar id-data meħtieġa biex tiġi pprovduta dik l-informazzjoni, jenħtieġ li l-eżenzjoni de minimis għal kwantità meħuda flimkien tkun limitata għal sena u li l-Istati Membri jkollhom l-obbligu jippreżentaw id-data rilevanti li tippermetti lill-STECF jivvaluta bis-sħiħ il-ġustifikazzjoni u li tippermetti lill-Kummissjoni twettaq rieżami. Jenħtieġ li l-Istati Membri kkonċernati jwettqu l-provi addizzjonali u jipprovdu l-informazzjoni malajr kemm jista’ jkun u sa mhux aktar tard mill-1 ta’ Mejju 2020 għall-valutazzjoni min-naħa tal-STECF. Għalhekk jenħtieġ li dawk l-eżenzjonijiet jiġu applikati b’mod provviżorju sal-31 ta’ Diċembru 2020.

(34)

L-STECF eżamina l-evidenza li l-Istati Membri bagħtu dwar l-eżenzjoni de minimis marbuta mal-merlangu li jkun iżgħar mid-daqs minimu ta’ referenza għall-konservazzjoni li jinqabad bix-xbieki tat-tkarkir bi travu u kkonkluda li l-evidenza li tgħid li hemm spiża marbuta mal-ħatt l-art tal-qabdiet mhux mixtieqa minnha nnifisha mhix biżżejjed biex turi li dawk l-ispejjeż huma sproporzjonati. L-STECF qal li jenħtieġ li t-titjib fis-selettività fis-sajd rilevanti jingħata prijorità minħabba li dan se jnaqqas l-ispejjeż tal-immaniġġjar tal-qabdiet mhux mixtieqa. Minħabba l-ħtieġa li titkompla l-attività tas-sajd sabiex jiġi żgurat li tinġabar id-data meħtieġa biex tiġi pprovduta dik l-informazzjoni, jenħtieġ li l-eżenzjoni de minimis tkun limitata għal sena u li l-Istati Membri jkollhom l-obbligu jippreżentaw id-data rilevanti li tippermetti lill-STECF jivvaluta bis-sħiħ il-ġustifikazzjoni u li tippermetti lill-Kummissjoni twettaq rieżami. Jenħtieġ li l-Istati Membri kkonċernati jwettqu l-provi addizzjonali u jipprovdu l-informazzjoni rilevanti kollha malajr kemm jista’ jkun u sa mhux aktar tard mill-1 ta’ Mejju 2020 għall-valutazzjoni min-naħa tal-STECF. Għalhekk jenħtieġ li din l-eżenzjoni tiġi applikata b’mod provviżorju sal-31 ta’ Diċembru 2020.

(35)

L-STECF eżamina l-evidenza li l-Istati Membri bagħtu dwar l-eżenzjoni de minimis marbuta mal-merlangu u mal-bakkaljaw li jkunu iżgħar mid-daqs minimu ta’ referenza għall-konservazzjoni li jinqabdu bix-xbieki tat-tkarkir tal-qiegħ u kkonkluda li ma hemm l-ebda possibbiltà li wieħed jevalwa jekk l-istimi dwar l-ispejjeż sproporzjonati humiex korretti jew le. L-STECF qal li jenħtieġ li t-titjib fis-selettività fis-sajd rilevanti jingħata prijorità minħabba li dan se jnaqqas l-ispejjeż tal-immaniġġjar tal-qabdiet mhux mixtieqa. Minħabba l-ħtieġa li titkompla l-attività tas-sajd sabiex jiġi żgurat li tinġabar id-data meħtieġa biex tiġi pprovduta dik l-informazzjoni, jenħtieġ li l-eżenzjoni de minimis tkun limitata għal sena u li l-Istati Membri jkollhom l-obbligu jippreżentaw id-data rilevanti li tippermetti lill-STECF jivvaluta bis-sħiħ il-ġustifikazzjoni u li tippermetti lill-Kummissjoni twettaq rieżami. Barra minn hekk, l-Istati Membri huma mistennija jirrappurtaw dwar l-adozzjoni ta’ iktar miżuri marbutin mas-selettività. Jenħtieġ li l-Istati Membri kkonċernati jwettqu l-provi addizzjonali u jipprovdu l-informazzjoni malajr kemm jista’ jkun u sa mhux aktar tard mill-1 ta’ Mejju 2020 għall-valutazzjoni min-naħa tal-STECF. Għalhekk jenħtieġ li din l-eżenzjoni tiġi applikata b’mod provviżorju sal-31 ta’ Diċembru 2020.

(36)

L-STECF eżamina l-evidenza li l-Istati Membri bagħtu dwar l-eżenzjoni de minimis il-ġdida marbuta mal-lipp li jkun iżgħar mid-daqs minimu ta’ referenza għall-konservazzjoni li jinqabad bil-konzijiet u kkonkluda li jkun diffiċli li jsir iktar titjib fis-selettività f’dak it-tip ta’ sajd. Barra minn hekk, l-STECF innota li minħabba li l-volum marbut mal-eżenzjoni de minimis x’aktarx li se jkun żgħir, l-eżenzjoni mhu se jkollha l-ebda impatt fuq ir-rata ġenerali ta’ mortalità mis-sajd, sakemm il-qabdiet skartati jiġu rreġistrati. Minħabba li diffiċli tinkiseb is-selettività, jenħtieġ li l-eżenzjoni għal dak it-tip ta’ sajd tkun limitata għal sena u li l-Istati Membri jkollhom l-obbligu jippreżentaw id-data rilevanti li tippermetti lill-STECF jivvaluta bis-sħiħ il-ġustifikazzjoni u li tippermetti lill-Kummissjoni twettaq rieżami. Jenħtieġ li l-Istati Membri kkonċernati jwettqu l-provi addizzjonali u jipprovdu l-informazzjoni malajr kemm jista’ jkun u sa mhux aktar tard mill-1 ta’ Mejju 2020 għall-valutazzjoni min-naħa tal-STECF. Għalhekk jenħtieġ li dawk l-eżenzjonijiet jiġu applikati b’mod provviżorju sal-31 ta’ Diċembru 2020.

(37)

Sabiex jiġu żgurati stimi affidabbli tal-livelli ta’ skartar biex jiġu stabbiliti l-qabdiet totali permissibbli, jenħtieġ li, fil-każijiet fejn l-eżenzjoni de minimis tkun ibbażata fuq l-estrapolazzjoni ta’ sitwazzjonijiet b’data limitata u informazzjoni parzjali dwar il-flotot, l-Istati Membri jiżguraw il-provvista ta’ data preċiża u verifikabbli għall-flotta kollha koperta minn dik l-eżenzjoni.

(38)

Il-miżuri li ġew issuġġeriti fir-rakkomandazzjoni konġunta l-ġdida huma skont l-Artikolu 15(4), l-Artikolu 15(5)(c) u l-Artikolu 18(3) tar-Regolament (UE) Nru 1380/2013 u skont ir-Regolament (UE) 2018/973, u b’mod partikulari l-Artikolu 11 tiegħu, u b’hekk jistgħu jiddaħħlu f’dan ir-Regolament.

(39)

Skont l-Artikolu 16(2) tar-Regolament (UE) 2018/973, il-Kummissjoni ngħatat is-setgħa tadotta atti delegati marbutin mal-obbligu ta’ ħatt l-art għal perjodu ta’ ħames snin li jibda mill-5 ta’ Awwissu 2018. Għalhekk huwa xieraq li, fit-tieni sena tal-applikazzjoni ta’ dan ir-Regolament, jiġi rivedut l-impatt tal-eżenzjonijiet mill-obbligu ta’ ħatt l-art marbutin ma’ rata għolja ta’ sopravivenza u tal-eżenzjonijiet de minimis minn dan l-obbligu.

(40)

Jenħtieġ li r-Regolament Delegat (UE) 2018/2035 jitħassar u li dan jiġi ssostitwit b’Regolament ġdid.

(41)

Billi l-miżuri previsti f’dan ir-Regolament għandhom impatt dirett fuq l-ippjanar tal-istaġun tas-sajd tal-bastimenti tal-Unjoni u fuq l-attivitajiet ekonomiċi relatati ma’ dan, jenħtieġ li dan ir-Regolament jidħol fis-seħħ minnufih wara li jiġi ppubblikat. Jenħtieġ li dan jibda japplika mill-1 ta’ Jannar 2020,

(1)

“pannell Seltra” tfisser apparat ta’ selettività li:

(2)

“apparat ta’ selettività netgrid” tfisser apparat ta’ selettività magħmul minn sezzjoni magħmula minn erba’ pannelli mdaħħla f’xibka tat-tkarkir b’żewġ pannelli b’xibka inklinata ta’ malja maqrut b’daqs tal-malja ta’ mill-inqas 200 mm, li twassal għal toqba minn fejn jaħrab il-ħut fil-parti ta’ fuq tax-xibka tat-tkarkir;

(3)

“pannell Fjamming” tfisser l-aħħar sezzjoni tal-malja tax-xibka tat-tkarkir bi travu, li tidjieq għax-xejn u li:

(4)

“pannell tar-rilaxx bentiku” tfisser pannell tax-xbiek b’malji ikbar jew b’malji kwadri mwaħħal fil-pannell t’isfel ta’ xibka tat-tkarkir, normalment ta’ xibka tat-tkarkir bi travu, biex kull materjal bentiku u fdal ta’ qiegħ il-baħar ikun jista’ joħroġ minnha qabel ma jgħaddi għal ġol-manka;

(5)

“SepNep” tfisser xibka tat-tkarkir bid-diriġenti li:

(a)

fis-sajd għal-lingwata komuni minn bastimenti li jużaw il-pariti u l-għeżula (GN, GNS, GND, GNC, GTN, GTR, GEN u GNF) fl-ilmijiet tal-Unjoni tad-diviżjonijiet 2a u 3a tal-ICES u tas-subżona 4 tal-ICES:

kwantità ta’ lingwata komuni li tkun ikbar u iżgħar mid-daqs minimu ta’ referenza għall-konservazzjoni li ma għandhiex taqbeż it-3 % tal-qabdiet annwali totali ta’ dik l-ispeċi;

(b)

fis-sajd għal-lingwata komuni minn bastimenti li jużaw xbieki tat-tkarkir bi travu (TBB) b’daqs tal-malja ta’ bejn 80 u 119-il mm, armati b’pannell Fjamming, fl-ilmijiet tal-Unjoni tas-subżona 4 tal-ICES:

kwantità ta’ lingwata komuni li tkun iżgħar mid-daqs minimu ta’ referenza għall-konservazzjoni li ma għandhiex taqbeż il-5 % tal-qabdiet annwali totali ta’ dik l-ispeċi;

(c)

fis-sajd għall-iskampu minn bastimenti li jużaw xbieki tat-tkarkir tal-qiegħ (OTB, OTT u TBN) b’daqs tal-malja ta’ 70 mm jew iktar, armati bi gradilja selettiva tal-ispeċijiet bi spazju ta’ mhux aktar minn 35 mm bejn il-vireg, fl-ilmijiet tal-Unjoni tad-diviżjoni 3a tal-ICES:

kwantità ta’ lingwata komuni, ta’ merluzz tal-linja sewda, ta’ merlangu, ta’ bakkaljaw, ta’ pollakkju iswed u ta’ merluzz flimkien li jkunu iżgħar mid-daqs minimu ta’ referenza għall-konservazzjoni li ma għandhiex taqbeż l-4 % tal-qabdiet annwali totali tal-iskampu, tal-lingwata komuni, tal-merluzz tal-linja sewda, tal-merlangu u tal-gamblu tat-Tramuntana, tal-bakkaljaw, tal-pollakkju l-iswed u tal-merluzz;

(d)

fis-sajd għall-gamblu tat-Tramuntana minn bastimenti li jużaw xbieki tat-tkarkir tal-qiegħ (OTB u OTT) b’daqs tal-malja ta’ 35 mm jew iktar, armati bi gradilja selettiva tal-ispeċijiet bi spazju ta’ mhux aktar minn 19-il mm bejn il-vireg, bil-ħruġ mhux ibblukkat għall-ħut, fl-ilmijiet tal-Unjoni tad-diviżjoni 3a tal-ICES:

kwantità ta’ lingwata komuni, ta’ merluzz tal-linja sewda, ta’ merlangu, ta’ bakkaljaw, ta’ barbun tat-tbajja’, ta’ pollakkju iswed, ta’ aringi, ta’ merluzz tan-Norveġja, ta’ arġentina silus u ta’ stokkafixx flimkien li jkunu iżgħar mid-daqs minimu ta’ referenza għall-konservazzjoni li ma għandhiex taqbeż il-5 % tal-qabdiet annwali totali tal-iskampu, tal-lingwata komuni, tal-merluzz tal-linja sewda, tal-merlangu, tal-bakkaljaw, tal-pollakkju l-iswed, tal-barbun tat-tbajja’, tal-gamblu tat-Tramuntana, tal-merluzz, tal-merluzz tan-Norveġja, tal-arġentina silus, tal-aringi u tal-istokkafixx;

(e)

fis-sajd demersali mħallat minn bastimenti li jużaw xbieki tat-tkarkir tal-qiegħ jew tartaruni (OTB, OTT, SDN u SSC) b’daqs tal-malja ta’ bejn 70 u 99 mm (TR2) fl-ilmijiet tal-Unjoni tad-diviżjoni 4c tal-ICES:

kwantità ta’ merlangu u ta’ bakkaljaw (Gadus morhua) flimkien li jkunu iżgħar mid-daqs minimu ta’ referenza għall-konservazzjoni li ma għandhiex taqbeż il-5 % fl-2020 u fl-2021 tal-qabdiet annwali totali tal-merlangu u tal-bakkaljaw; l-ammont massimu ta’ bakkaljaw li jista’ jiġi skartat għandu jkun limitat għal 2 % ta’ dawk il-qabdiet annwali totali;

(f)

fis-sajd demersali mħallat minn bastimenti li jużaw xbieki tat-tkarkir tal-qiegħ jew tartaruni (OTB, OTT, SDN u SSC) b’daqs tal-malja ta’ bejn 70 u 99 mm (TR2) fl-ilmijiet tal-Unjoni tad-diviżjonijiet 4a u 4b tal-ICES:

kwantità ta’ merlangu u ta’ bakkaljaw (Gadus morhua) flimkien li jkunu iżgħar mid-daqs minimu ta’ referenza għall-konservazzjoni li ma għandhiex taqbeż is-6 % fl-2020 tal-qabdiet annwali totali tal-merlangu u tal-bakkaljaw; l-ammont massimu ta’ bakkaljaw li jista’ jiġi skartat għandu jkun limitat għal 2 % ta’ dawk il-qabdiet annwali totali;

l-eżenzjoni de minimis stabbilita f’dan il-punt għandha tapplika b’mod provviżorju sal-31 ta’ Diċembru 2020. L-Istati Membri li għandhom interess ta’ ġestjoni dirett għandhom jibagħtu informazzjoni xjentifika addizzjonali li tappoġġa l-eżenzjoni malajr kemm jista’ jkun u sa mhux aktar tard mill-1 ta’ Mejju 2020. Sal-31 ta’ Lulju 2020, l-STECF għandu jivvaluta l-informazzjoni xjentifika li tkun ingħatat;

(g)

fis-sajd minn bastimenti li jużaw xbieki tat-tkarkir tal-qiegħ (OTB, OTT, TBN u PTB) b’daqs tal-malja ta’ bejn 90 u 119-il mm, armati b’pannell Seltra, jew xbieki tat-tkarkir tal-qiegħ (OTB, OTT, TBN u PTB) b’daqs tal-malja ta’ 120 mm jew iżjed, fl-ilmijiet tal-Unjoni tad-diviżjoni 3a tal-ICES:

kwantità ta’ merlangu li jkun iżgħar mid-daqs minimu ta’ referenza għall-konservazzjoni sa ammont massimu ta’ 2 % tal-qabdiet annwali totali tal-iskampu, tal-bakkaljaw, tal-merluzz tal-linja sewda, tal-merlangu, tal-pollakkju l-iswed, tal-lingwata komuni, tal-barbun tat-tbajja’ u tal-merluzz;

(h)

fis-sajd demersali mħallat minn bastimenti li jużaw xbieki tat-tkarkir bi travu b’daqs tal-malja ta’ bejn 80 u 119-il mm fl-ilmijiet tal-Unjoni tas-subżona 4 tal-ICES:

kwantità ta’ merlangu li jkun iżgħar mid-daqs minimu ta’ referenza għall-konservazzjoni li ma għandhiex taqbeż it-2 % tal-qabdiet annwali totali tal-barbun tat-tbajja’ u tal-lingwata;

l-eżenzjoni de minimis stabbilita f’dan il-punt għandha tapplika b’mod provviżorju sal-31 ta’ Diċembru 2020. L-Istati Membri li għandhom interess ta’ ġestjoni dirett għandhom jibagħtu informazzjoni xjentifika addizzjonali li tappoġġa l-eżenzjoni malajr kemm jista’ jkun u sa mhux aktar tard mill-1 ta’ Mejju 2020. Sal-31 ta’ Lulju 2020, l-STECF għandu jivvaluta l-informazzjoni xjentifika li tkun ingħatat;

(i)

fis-sajd għall-iskampu minn bastimenti li jużaw xbieki tat-tkarkir tal-qiegħ b’daqs tal-malja ta’ bejn 80 u 99 mm, armati b’SepNep, fl-ilmijiet tal-Unjoni tas-subżona 4 tal-ICES:

kwantità ta’ barbun tat-tbajja’ li jkun iżgħar mid-daqs minimu ta’ referenza għall-konservazzjoni li ma għandhiex taqbeż it-3 % tal-qabdiet annwali totali tal-pollakkju l-iswed, tal-barbun tat-tbajja’, tal-merluzz tal-linja sewda, tal-merlangu, tal-bakkaljaw, tal-gamblu tat-Tramuntana, tal-lingwata komuni u tal-iskampu;

(j)

fis-sajd għall-gamblu tar-ramel minn bastimenti li jużaw ix-xbieki tat-tkarkir bi travu fl-ilmijiet tal-Unjoni tad-diviżjonijiet 4b u 4c tal-ICES:

kwantità tal-ispeċijiet kollha li għalihom hemm limiti tal-qbid li ma għandhiex taqbeż is-7 % fl-2020 u s-6 % fl-2021 tal-qabdiet annwali totali tal-ispeċijiet kollha li għalihom hemm limiti tal-qbid li jsiru f’dak it-tip ta’ sajd;

(k)

fis-sajd demersali mħallat bi xbieki tat-tkarkir tal-qiegħ (OTB, OTT, PTB u TBB) b’daqs tal-malja ta’ bejn 80 u 99 mm (TR2 u BT2) fis-subżona 4 tal-ICES:

kwantità ta’ sawrell (Trachurus spp.) li ma għandhiex taqbeż is-7 % fl-2020 u s-6 % fl-2021 tal-qabdiet annwali totali tas-sawrell li jsiru f’dak it-tip ta’ sajd;

l-eżenzjoni de minimis stabbilita f’dan il-punt għandha tapplika b’mod provviżorju sal-31 ta’ Diċembru 2020. L-Istati Membri li għandhom interess ta’ ġestjoni dirett għandhom jibagħtu informazzjoni xjentifika addizzjonali li tappoġġa l-eżenzjoni malajr kemm jista’ jkun u sa mhux aktar tard mill-1 ta’ Mejju 2020. Sal-31 ta’ Lulju 2020, il-Kumitat Xjentifiku, Tekniku u Ekonomiku għas-Sajd (l-STECF) għandu jivvaluta l-informazzjoni xjentifika li tkun ingħatat;

(l)

fis-sajd demersali mħallat bi xbieki tat-tkarkir tal-qiegħ (OTB, OTT, PTB u TBB) b’daqs tal-malja ta’ bejn 80 u 99 mm fis-subżona 4 tal-ICES:

kwantità ta’ kavalli (Scomber scombrus) li ma għandhiex taqbeż is-7 % fl-2020 u s-6 % fl-2021 tal-qabdiet annwali totali tal-kavalli li jsiru f’dak it-tip ta’ sajd;

l-eżenzjoni de minimis stabbilita f’dan il-punt għandha tapplika b’mod provviżorju sal-31 ta’ Diċembru 2020. L-Istati Membri li għandhom interess ta’ ġestjoni dirett għandhom jibagħtu informazzjoni xjentifika addizzjonali li tappoġġa l-eżenzjoni malajr kemm jista’ jkun u sa mhux aktar tard mill-1 ta’ Mejju 2020. Sal-31 ta’ Lulju 2020, l-STECF għandu jivvaluta l-informazzjoni xjentifika li tkun ingħatat;

(m)

fis-sajd demersali mħallat bi xbieki tat-tkarkir (OTB, OTM, OTT, PTB, PTM, SDN, SPR, SSC, TB u TBN) b’daqs tal-malja ta’ iktar minn 80 mm fid-diviżjoni 3a tal-ICES u fis-subżona 4 tal-ICES u fis-sajd għall-gamblu tat-Tramuntana li jsir bl-użu ta’ rkaptu armat b’għarbiel li jkollu spazju massimu ta’ 19-il mm bejn il-vireg tiegħu jew b’apparat ekwivalenti tas-selettività u b’apparat għaż-żamma tal-ħut b’daqs tal-malja ta’ iktar minn 35 mm fid-diviżjoni 3a tal-ICES u ta’ iktar minn 32 mm fis-subżona 4 tal-ICES:

kwantità ta’ laċċ ikħal, ta’ ċiċċirell, ta’ merluzz tan-Norveġja u ta’ stokkafixx flimkien li ma għandhiex taqbeż il-1 % tal-qabdiet annwali totali li jsiru fis-sajd demersali mħallat u fis-sajd għall-gamblu tat-Tramuntana;

l-eżenzjoni de minimis stabbilita f’dan il-punt għandha tapplika b’mod provviżorju sal-31 ta’ Diċembru 2020. L-Istati Membri li għandhom interess ta’ ġestjoni dirett għandhom jibagħtu informazzjoni xjentifika addizzjonali li tappoġġa l-eżenzjoni malajr kemm jista’ jkun u sa mhux aktar tard mill-1 ta’ Mejju 2020. Sal-31 ta’ Lulju 2020, l-STECF għandu jivvaluta l-informazzjoni xjentifika li tkun ingħatat;

(n)

fis-sajd demersali għall-merluzz minn bastimenti li jużaw il-konzijiet (LLS) fis-subżona 4 tal-ICES:

kwantità ta’ lipp (Molva molva) li jkun iżgħar mid-daqs minimu ta’ referenza għall-konservazzjoni li ma għandhiex taqbeż it-3 % tal-qabdiet annwali totali tal-lipp li jsiru f’dak it-tip ta’ sajd demersali;

l-eżenzjoni de minimis stabbilita f’dan il-punt għandha tapplika b’mod provviżorju sal-31 ta’ Diċembru 2020. L-Istati Membri li għandhom interess ta’ ġestjoni dirett għandhom jibagħtu informazzjoni xjentifika addizzjonali li tappoġġa l-eżenzjoni malajr kemm jista’ jkun u sa mhux aktar tard mill-1 ta’ Mejju 2020. Sal-31 ta’ Lulju 2020, l-STECF għandu jivvaluta l-informazzjoni xjentifika li tkun ingħatat.