(1)

Ir-Regolament (KE) Nru 1881/2006 (2) jiffissa l-livelli massimi ta’ ċitrinina fis-supplimenti tal-ikel ibbażati fuq ir-ross iffermentat bil-ħmira ħamraMonascus purpureus.

(2)

Wara talba mill-Kummissjoni biex tingħata opinjoni xjentifika dwar ir-riskji għas-saħħa miċ-ċitrinina fl-ikel u fl-għalf, fit-2 ta’ Marzu 2012, il-Bord Xjentifiku dwar Kontaminanti fil-Katina tal-Ikel tal-Awtorità Ewropea dwar is-Sigurtà fl-Ikel (“l-Awtorità”) adotta opinjoni dwar ir-riskji għas-saħħa pubblika u għas-saħħa tal-annimali marbuta mal-preżenza taċ-ċitrinina fl-ikel u fl-għalf (3). Il-Bord Xjentifiku dwar il-Kontaminanti kkonkluda li, fuq il-bażi tad-data disponibbli, ma setax jeskludi li ċ-ċitrinina, minkejja li ma tikkawżax tħassib fir-rigward tan-nefrotossiċità, ma tikkawżax tħassib fir-rigward tal-ġenotossiċità u l-karċinoġeniċità.

(3)

Id-data disponibbli dwar il-preżenza taċ-ċitrinina f’ċerti preparazzjonijiet tar-ross iffermentat bil-ħmira ħamra żvelat livelli għoljin ta’ ċitrinina f’dawk il-preparazzjonijiet. Għalhekk, ġie stabbilit livell massimu ta’ ċitrinina fil-preparazzjonijiet tar-ross iffermentat bil-ħmira ħamra fir-Regolament (KE) Nru 1881/2006. Minħabba n-nuqqasijiet fl-għarfien fir-rigward tal-preżenza taċ-ċitrinina fil-preparazzjonijiet tar-ross iffermentat bil-ħmira ħamra u f’oġġetti tal-ikel oħra, u minħabba l-inċertezzi li għad fadal fir-rigward tal-karċinoġeniċità u tal-ġenotossiċità tagħha, tqies li kien xieraq li jsir rieżami tal-livell massimu.

(4)

Fl-2015, l-Awtorità ppubblikat sejħa għall-proposti biex tinvestiga l-konċentrazzjonijiet taċ-ċitrinina f’kampjuni ta’ ikel b’enfasi speċjali fuq il-ħbub u l-prodotti bbażati fuq l-ħbub minn reġjuni ġeografiċi differenti fl-Ewropa. Ir-rapport li jiddeskrivi l-eżitu ta’ dawn l-investigazzjonijiet “Occurrence of citrinin in food” [“L-okkorrenza taċ-ċitrinina fl-ikel”] (4) ġie ppubblikat fl-2017. Inkisbet data rappreżentattiva dwar l-okkorrenza taċ-ċitrinina fl-ikel fl-Ewropa, prinċipalment fiċ-ċereali u fil-prodotti taċ-ċereali u fis-supplimenti tal-ikel ibbażati fuq ir-ross iffermentat bil-ħmira ħamra.

(5)

Id-data l-ġdida dwar l-okkorrenzi taċ-ċitrinina tindika li ma hemmx bżonn li jiġu stabbiliti l-livelli massimi taċ-ċitrinina fl-ikel, apparti fis-supplimenti tar-ross iffermentat bil-ħmira ħamra. Madankollu, għaċ-ċitrinina fis-supplimenti tal-ikel li fihom il-ħmira ħamra Monascus purpureus, id-data rappreżentattiva miksuba dwar l-okkorrenza tixhed li l-livell massimu jenħtieġ li jitbaxxa. Ma kien hemm l-ebda data ġdida disponibbli dwar it-tossiċità taċ-ċitrinina, li tirrikjedi aġġornament tal-valutazzjoni li saret mill-Awtorità dwar ir-riskji taċ-ċitrinina għas-saħħa pubblika. Għalhekk, l-inċertezzi fir-rigward tal-ġenotossiċità u tal-karċinoġeniċità taċ-ċitrinina għadhom hemm. Għalhekk f’ġieħ il-protezzjoni tas-saħħa pubblika jeħtieġ li l-livelli taċ-ċitrinina fl-ikel ikunu baxxi kemm jista’ jkun. Dan huwa partikolarment rilevanti għas-supplimenti tal-ikel ibbażati fuq ir-ross iffermentat bil-ħmira ħamra billi d-data tixhed livelli għoljin ħafna ta’ ċitrinina f’ċerti kampjuni ta’ dawn il-prodotti, li jirriżultaw f’esponiment għoli għaċ-ċitrinina għall-konsumaturi ta’ dawn il-prodotti. Fl-istess ħin, mid-data disponibbli feġġ li, permezz ta’ applikazzjoni ta’ proċessi ta’ manifattura tajbin, jistgħu jinksbu livelli baxxi ta’ citrinina fis-supplimenti tal-ikel ibbażati fuq ir-ross iffermentat bil-ħmira ħamra Monascus purpureus. Meta jitqiesu l-inċertezzi li għad fadal fir-rigward tat-tossiċità taċ-ċitrinina u fir-rigward ta’ kemm huwa fattibbli li jinkisbu livelli baxxi ta’ ċitrinina billi jiġu applikati prattiki ta’ manifattura tajbin, huwa xieraq li jitnaqqas il-livell massimu ta’ ċitrinina fis-supplimenti tal-ikel ibbażati fuq ir-ross iffermentat bil-ħmira ħamra Monascus purpureus biex jiġi żgurat livell għoli ta’ protezzjoni tas-saħħa tal-bniedem.

(6)

Jenħtieġ li jingħata perjodu ta’ żmien raġonevoli li jippermetti lill-Istati Membri u lill-operaturi tan-negozji tal-ikel jadattaw ruħhom għar-rekwiżiti l-ġodda stabbiliti f’dan ir-Regolament. Għaldaqstant, jenħtieġ li r-Regolament (KE) Nru 1881/2006 jiġi emendat skont dan.

(7)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,