(1)

Cape Verde huwa pajjiż li jibbenefika mill-iskema ġeneralizzata ta' preferenzi msejħa SĠP fir-Regolament (UE) Nru 978/2012 tal-Parlament Ewropew u tal-Kunsill (2). Ir-regoli dwar l-oriġini preferenzjali għall-finijiet tas-SPĠ, minbarra r-regoli proċedurali, huma stabbiliti fir-Regolament Delegat tal-Kummissjoni (UE) 2015/2446 (3).

(2)

B'ittra datata t-22 ta' Ottubru 2018, Cape Verde ressaq talba għal estensjoni tad-deroga temporanja mir-regoli dwar l-oriġini preferenzjali stabbiliti fir-Regolament Delegat (UE) 2015/2446, li kienet ingħatat bir-Regolament ta' Implimentazzjoni tal-Kummissjoni (UE) 2017/967 (4). It-talba kienet għal volum annwali ta' 5 000 tunnellata ta' tonn ippreparat jew ippreservat għal perjodu sakemm jidħol fis-seħħ il-Ftehim ta' Sħubija Ekonomika (“l-FSE”) il-ġdid bejn l-Unjoni u l-Afrika tal-Punent li nbeda fit-30 ta' Ġunju 2014. Skont id-deroga mitluba, dawn il-prodotti jitqiesu li joriġinaw f'Cape Verde anki jekk, minkejja li jkunu ġew prodotti f'Cape Verde, ikunu ġew prodotti minn ħut mhux oriġinarju.

(3)

Fit-talba tiegħu għal deroga, Cape Verde spjega li l-kwantitajiet ta' tonn li l-flotta tiegħu qed taqbad bħalissa fl-ilmijiet proprji huma żgħar u, fin-nuqqas ta' deroga, il-flotta disponibbli għas-sajd lil hinn mill-ilmijiet territorjali tiegħu hija limitata. Barra minn hekk, l-istaġun tas-sajd għat-tonn huwa limitat għal erba' xhur tas-sena. Dan inaqqas l-opportunitajiet għall-qbid ta' tonn oriġinarju. Element importanti ieħor huwa li Cape Verde reċentement żviluppa l-infrastruttura portwali tiegħu. B'riżultat ta' dan, issa jistgħu jiġu ttrattati kwantitajiet ikbar ta' tonn u għaldaqstant l-industrija tas-sajd għat-tonn issa għandha l-opportunità tikber. Fl-aħħar nett, it-talba enfasizzat id-diffikultajiet li qed jaffaċċja Cape Verde b'riżultat tad-dewmien fid-dħul fis-seħħ tal-FSE bejn l-Unjoni u l-Afrika tal-Punent. Hija enfasizzat ukoll il-ħtieġa ta' Cape Verde għal deroga mir-regoli dwar l-oriġini preferenzjali sabiex tikkumpensa għall-fatt li għadhom ma jistgħux jiġu invokati r-regoli ta' akkumulazzjoni skont l-FSE, peress li s-sitwazzjoni legali ta' dan il-Ftehim għadha ma evolvietx.

(4)

L-argumenti fit-talba juru li, mingħajr id-deroga, l-abbiltà tal-industrija tal-ipproċessar tal-ħut ta' Cape Verde li tesporta l-prodotti inkwistjoni lejn l-Unjoni taħt is-SĠP se tiġi affettwata b'mod sinifikanti. Dan jista' jkun ta' deterrent għall-iżvilupp ulterjuri tal-flotta ta' Cape Verde għal sajd pelaġiku żgħir u fil-futur ifixkel il-konformità ta' Cape Verde mar-regoli tal-oriġini applikabbli għal dawn il-prodotti.

(5)

Għalhekk jenħtieġ li Cape Verde jingħata deroga temporanja mir-rekwiżit, skont ir-regoli dwar l-oriġini preferenzjali, li l-prodotti li jkun fihom materjali li ma jkunux inkisbu għalkollox fil-pajjiż benefiċjarju jridu jkunu għaddew minn xogħol jew ipproċessar suffiċjenti sabiex ikunu jistgħu jitqiesu li joriġinaw f'dak il-pajjiż. Jenħtieġ li d-deroga tkun għal volum annwali ta' 5 000 tunnellata ta' tonn ippreparat jew ippreservat. Jenħtieġ li d-deroga tkun limitata għal perjodu ta' sena sabiex jiġu vvalutati l-kapaċità u l-isforzi ta' Cape Verde biex iħejji ruħu biex jikkonforma mar-regoli tal-oriġini għall-prodotti kkonċernati. Madankollu, jekk l-FSE jidħol fis-seħħ qabel ma jintemm dak il-perjodu ta' sena, jenħtieġ li d-deroga tiskadi fil-jum li jiġi eżatt qabel id-data li fiha jidħol fis-seħħ l-FSE.

(6)

Il-kwantitajiet stabbiliti fl-Anness ta' dan ir-Regolament jenħtieġ li jkunu ġestiti skont l-Artikoli 49 sa 54 tar-Regolament ta' Implimentazzjoni tal-Kummissjoni (UE) 2015/2447 (5) li jirregolaw il-ġestjoni tal-kwoti tariffarji.

(7)

Jenħtieġ li d-deroga tingħata bil-kundizzjoni li l-awtoritajiet doganali ta' Cape Verde jieħdu l-passi neċessarji biex iwettqu kontrolli kwantitattivi fuq l-esportazzjonijiet tal-prodotti soġġetti għad-deroga, u li dawn jibagħtu lill-Kummissjoni dikjarazzjoni tal-kwantitajiet li għalihom ikunu nħarġu ċertifikati tal-oriġini tal-Formola A skont dan ir-Regolament u n-numri tas-serje ta' dawk iċ-ċertifikati. Jekk skont l-Artikolu 79 tar-Regolament ta' Implimentazzjoni (UE) 2015/2447, f'Cape Verde tidħol fis-seħħ is-sistema tal-Esportaturi rreġistrati (REX) matul is-sena 2019, jenħtieġ li tiġi applikata l-istess regola għad-dikjarazzjonijiet dwar l-oriġini li jsiru mill-esportaturi rreġistrati.

(8)

Il-miżuri previsti f'dan ir-Regolament jeħtieġ li jidħlu fis-seħħ mill-aktar fis possibbli wara l-pubblikazzjoni tiegħu sabiex titqies is-sitwazzjoni ta' Cape Verde u biex dan il-pajjiż jitħalla juża d-deroga mingħajr aktar dewmien.

(9)

Il-miżuri previsti f'dan ir-Regolament huma skont l-opinjoni tal-Kumitat tal-Kodiċi Doganali,