10.11.2017   

MT

Il-Ġurnal Uffiċjali tal-Unjoni Ewropea

L 292/59

(1)

L-Artikolu 193 tad-Direttiva 2006/112/KE jipprevedi li persuna taxxabbli li tforni merkanzija jew servizzi hija, bħala regola ġenerali, responsabbli għall-ħlas tat-taxxa fuq il-valur miżjud (VAT) lill-awtoritajiet tat-taxxa.

(2)

Skont l-Artikolu 199a(1)(g) tad-Direttiva 2006/112/KE, l-Istati Membri jistgħu jistabbilixxu li l-persuna responsabbli għall-ħlas tal-VAT fuq fornimenti ta' servizzi tat-telekomunikazzjoni hija l-persuna taxxabbli li lilha jsir il-forniment (il-mekkaniżmu tar-reverse charge). In-Netherlands ma jagħmlux użu minn din l-għażla.

(3)

Reċentement ġew skoperti każijiet ta' frodi fis-settur tas-servizzi tat-telekomunikazzjoni fin-Netherlands. Konsegwentement, in-Netherlands jixtiequ jintroduċu l-mekkaniżmu tar-reverse charge għall-fornimenti domestiċi ta' servizzi tat-telekomunikazzjoni.

(4)

Skont l-Artikolu 199a(1) tad-Direttiva 2006/112/KE, il-mekkaniżmu tar-reverse charge jista' jiġi applikat biss sal-31 ta' Diċembru 2018 u l-perijodu minimu ta'applikazzjoni huwa ta' sentejn. Minħabba li l-kundizzjoni tal-perijodu minimu ta' applikazzjoni ma jistax jiġi ssodisfat, in-Netherlands ma jistgħux japplikaw il-mekkaniżmu tar-reverse charge abbażi tal-Artikolu 199a(1)(g) ta' dik id-Direttiva.

(5)

Konsegwentement, permezz ta' ittra rreġistrata mal-Kummissjoni fil-11 ta' Lulju 2017, in-Netherlands talbu deroga mill-Artikolu 193 tad-Direttiva 2006/112/KE biex ikunu awtorizzati japplikaw il-mekkaniżmu tar-reverse charge għall-fornimenti ta' servizzi tat-telekomunikazzjoni abbażi tal-Artikolu 395 ta' dik id-Direttiva.

(6)

F'konformità mal-Artikolu 395(2) tad-Direttiva 2006/112/KE, il-Kummissjoni infurmat lill-Istati Membri l-oħra permezz ta' ittra datata l-5 ta' Settembru 2017 bit-talba magħmula min-Netherlands. Permezz ta' ittra datata s-6 ta' Settembru 2017, il-Kummissjoni nnotifikat lin-Netherlands li kellha l-informazzjoni li hija tqis neċessarja biex tqis it-talba.

(7)

L-għan tad-deroga mitluba huwa li tevita l-frodi tal-VAT fis-settur tas-servizzi tat-telekomunikazzjoni. Minkejja li l-fornimenti ta' servizzi tat-telekomunikazzjoni huma suxxettibbli għall-frodi u qed jiġu ssorveljati mill-qrib, in-Netherlands reċentement skoprew skemi kummerċjali frodulenti b'rabta ma' minuti ta' telefonati li jinvolvu għadd ta' negozjanti nieqsa u ta' kumpaniji buffer. Dawk l-iskemi jirriżultaw f'telf sinifikanti ta' dħul mit-taxxa.

(8)

Abbażi tal-informazzjoni mressqa min-Netherlands, il-metodi konvenzjonali għall-identifikazzjoni u l-prevenzjoni tal-frodi mhumiex effettivi, minħabba li s-servizzi involuti jiġu minn barra l-Unjoni u ma jissemmew fl-ebdareġistru jew lista. Il-ħlasijiet isiru permezz ta' pjattaformi ta' ħlas f'kontijiet bankarji barra l-Unjoni u dan jagħmel it-tranżazzjonijiet aktar diffiċli biex jiġu identifikati u impossibbli li tinkiseb informazzjoni mill-banek. In-Netherlands jenfasizzaw li mingħajr il-mekkaniżmu tar-reverse charge għas-servizzi kkonċernati t-telf ta' taxxa se jiżdied b'mod esponenzjali.

(9)

Għalhekk, jenħtieġ li n-Netherlands ikunu awtorizzati japplikaw il-mekkaniżmu tar-reverse charge għall-fornimenti ta' servizzi tat-telekomunikazzjoni sal-31 ta' Diċembru 2018.

(10)

Id-deroga ma għandha l-ebda impatt negattiv fuq ir-riżorsi proprji tal-Unjoni li jirriżultaw mill-ġbir tal-VAT,