25.6.2016   

MT

Il-Ġurnal Uffiċjali tal-Unjoni Ewropea

L 168/7

(1)

Ir-Regolament (KE) Nru 1342/2008 jistipula li l-limiti tal-isforz tas-sajd huma assenjati lil gruppi ta' sforz iddefiniti skont ir-raggruppamenti tal-irkapti u skont iż-żoni ġeografiċi stabbiliti fl-Anness I ta' dak ir-Regolament.

(2)

Wieħed mill-għanijiet ewlenin tal-Politika Komuni tas-Sajd huwa li telimina l-prattika ħalja tar-rimi. L-obbligu tal-iżbark se jidħol progressivament fis-seħħ għal ċertu sajd demersali li bħalissa huwa kopert mir-reġim tal-isforz tas-sajd skont ir-Regolament (KE) Nru 1342/2008. Dan il-perjodu jibda mill-2016 u jispiċċa l-aktar tard sal-2019.

(3)

Minħabba l-implimentazzjoni tal-obbligu tal-iżbark, tinħtieġ aktar flessibbiltà fir-reġim attwali tal-isforz tas-sajd biex is-sajjieda jkunu jistgħu jużaw irkaptu li jkun aktar selettiv u li jkollu malja akbar. F'dan il-kuntest, deher li kien hemm bżonn analiżi biex jiġi evalwat kemm l-istruttura attwali tar-raggruppamenti tal-isforz kienet għadha kosteffiċjenti f'termini ta' piż tal-ġestjoni mqabbel mal-bżonnijiet tal-konservazzjoni.

(4)

B'riżultat ta' dan, il-Kumitat Xjentifiku, Tekniku u Ekonomiku għas-Sajd (STECF) intalab jagħti parir dwar il-possibbiltà li ssir fużjoni tar-raggruppamenti attwali tal-irkapti tax-xbieki tat-tkarkir bi travu BT1 u BT2 li jintużaw biex jiddefinixxu l-gruppi tal-isforz. Il-Kumitat Xjentifiku, Tekniku u Ekonomiku għas-Sajd jikkonkludi (2) li hemm riskju li tiżdied il-mortalità mis-sajd tal-merluzz jekk issir il-fużjoni tar-raggruppamenti tal-irkapti BT1 u BT2. L-STECF jikkonkludi wkoll li din il-fużjoni ġdida tar-raggruppament tkun aktar eteroġena f'termini ta' stokkijiet bijoloġiċi maqbuda milli huma r-raggruppamenti separati tal-BT1 u tal-BT2 u li x'aktarx mhux se tiżdied il-kosteffiċjenza peress li jkollhom jittieħdu miżuri addizzjonali biex jopponu l-possibbiltà li tiżdied il-mortalità mis-sajd tal-merluzz. Madankollu, il-konklużjonijiet tal-STECF juru wkoll li jekk il-fużjoni tar-raggruppamenti tal-irkapti ssir, is-sajjieda jkunu jistgħu jistadu b'mod aktar selettiv. Il-fużjoni tar-raggruppamenti tal-irkapti tista' tnaqqas il-qbid inċidentali tal-barbun tat-tbajja' u ta' speċijiet oħra ta' pixxiċatt.

(5)

L-STECF jirrapporta wkoll li b'mod kumulattiv, l-irkaptu BT1 u BT2 jammonta għal 5 % biss tal-qbid ġenerali tal-merluzz fil-Baħar tat-Tramunata u li l-impatti potenzjali ta' din il-fużjoni fuq il-mortalità tal-merluzz se jkunu limitati.

(6)

Il-fużjoni riċenti tar-raggruppamenti tal-irkapti TR tax-xibka tat-tkarkir tal-qiegħ u tat-tartarun bir-Regolament ta' Implimentazzjoni tal-Kummissjoni (UE) 2015/2324 (3) kellu konsegwenzi negattivi fuq dawk l-Istati Membri li jittrasferixxu l-isforzi b'mod regolari mir-raggruppamenti BT fir-raggruppament TR2. Il-fużjoni tar-raggruppamenti BT se tirrimedja għal dawn l-effetti negattivi.

(7)

Il-fużjoni se tnaqqas b'mod sinifikanti l-ispejjeż ta' ġestjoni billi tnaqqas l-ispejjeż amministrattivi għall-awtoritajiet nazzjonali u għas-sajjieda. Peress li ħafna sajjieda jużaw irkaptu differenti u għalhekk huma parti minn diversi raggruppamenti tal-isforz, dawn ikollhom bżonn ta' kalkoli kumplessi meta jallokaw l-isforzi tas-sajd.

(8)

Skont il-parir tal-Kunsill Internazzjonali għall-Esplorazzjoni tal-Baħar (ICES) (4), l-istatus ta' konservazzjoni tal-istokk tal-merluzz fil-Baħar tat-Tramuntana fis-Subżona IV tal-ICES, fid-Diviżjoni VIId tal-ICES u fil-parti tal-Punent tad-Diviżjoni IIIa tal-ICES (Skagerrak) tjieb ħafna.

(9)

Għalhekk mhuwiex xieraq li r-raggruppamenti tal-irkapti BT1 u BT2 jibqgħu separati fl-oqsma li ġejjin: Skagerrak, dik il-parti taż-żona IIIa tal-ICES li mhix koperta minn Skagerrak u Kattegat; iż-żona IV tal-ICES u l-ilmijiet tal-Unjoni taż-żona IIa tal-ICES, u ż-żona VIId tal-ICES. Minħabba l-qagħda ħażina tal-istokk tal-merluzz fiż-żoni ta' Kattegat, iż-żona VIIa tal-ICES, iż-żona VIa tal-ICES u l-ilmijiet tal-Unjoni taż-żona Vb tal-ICES, il-fużjoni tar-raggruppamenti tal-irkapti ma għandhiex tapplika għal dawn iż-żoni.

(10)

Il-Kummissjoni se tissorvelja mill-qrib l-effetti tal-fużjoni tar-raggruppamenti tal-irkapti BT1 u BT2 fuq il-mortalità mis-sajd tal-merluzz. Jekk ikun xieraq se taddatta l-istruttura tar-raggruppamenti tal-irkapti skont ir-riżultati ta' din is-sorveljanza jekk tiżdied il-mortalità mis-sajd tal-merluzz minħabba r-rimi.

(11)

Biex il-Kummissjoni u l-Istati Membri jkunu jistgħu jissorveljaw kif se tevolvi din is-sitwazzjoni mingħajr ma jġarrbu spejjeż amministrattivi addizzjonali, jixraq li s-sistema ta' rappurtar attwali ma tinbidilx.

(12)

Għalhekk, ir-Regolament (KE) Nru 1342/2008 għandu jiġi emendat,

(13)

Il-miżuri previsti f'dan ir-Regolament huma skont l-opinjoni tal-Kumitat dwar is-Sajd u l-Akkwakultura,