(1)

It-trasferiment ta' applikanti għal protezzjoni internazzjonali lejn il-Greċja skont ir-Regolament (UE) Nru 604/2013 tal-Parlament Ewropew u tal-Kunsill (1) (minn hawn 'il quddiem “ir-Regolament ta' Dublin”) ġie sospiż mill-Istati Membri sa mill-2011, wara żewġ sentenzi tal-Qorti Ewropea tad-Drittijiet tal-Bniedem (QEDB) u l-Qorti tal-Ġustizzja tal-Unjoni Ewropea (QtĠ) (2), li identifikaw nuqqasijiet sistemiċi fis-sistema tal-ażil Griega, li rriżultaw fi ksur tad-drittjiet fundamentali tal-applikanti għal protezzjoni internazzjonali trasferiti minn Stati Membri oħra għall-Greċja skont ir-Regolament tal-Kunsill (KE) Nru 343/2003 (3).

(2)

Il-Kumitat tal-Ministri tal-Kunsill tal-Ewropa ilu jsegwi s-sitwazzjoni fil-Greċja billi s-sentenza M.S.S vs il-Belġju u l-Greċja ngħatat mill-QEDB fl-2011 abbażi ta' rapporti ta' progress li l-Greċja hija mitluba tippreżenta bħala evidenza tal-eżekuzzjoni tas-sentenza u abbażi tal-evidenza minn NGOs u organizzazzjonijiet internazzjonali, bħall-Kummissarju Għoli tan-Nazzjonijiet Uniti għar-Refuġjati (UNHCR — United Nations High Commissioner for Refugees), li joperaw fil-Greċja. Fuq talba tal-Greċja ppreżentata f'Ġunju 2016, il-Kumitat Ministerjali aċċetta li jipposponi l-proċedura ta' evalwazzjoni abbażi tal-argument li bħalissal-Greċja qiegħda taħt pressjoni migratorja enormi, li s-sitwazzjoni hija eċċezzjonali, instabbli u mhux bħal kif kienet meta ngħatat is-sentenza M.S.S ħames snin ilu.

(3)

B'riżultat tas-sentenza M.S.S, il-Greċja impenjat ruħha li tirriforma s-sistema ta' ażil tagħha abbażi ta' Pjan ta' Azzjoni nazzjonali dwar ir-Riforma tal-Ażil u l-Ġestjoni tal-Migrazzjoni, ippreżentat f'Awwissu 2010 u rivedut f'Jannar 2013 (minn hawn 'il quddiem “il-Pjan ta' Azzjoni Grieg”). Fl-1 ta' Ottubru 2015, il-Greċja ppreżentat Pjan Direzzjonali dwar l-implimentazzjoni tal-iskema ta' rilokazzjoni u l-approċċ tal-hotspots lill-Kunsill, li jiddeskrivi wkoll fil-qosor ċerti azzjonijiet li għandhom jingħataw prijorità biex tiġi żgurata l-implimentazzjoni ta' azzjonijiet pendenti li dwarhom kien hemm qbil fl-oqsma tal-ażil u l-akkoljenza.

(4)

Fl-istess ħin, il-kriżi attwali tar-refuġjati u l-migrazzjoni tkompli tpoġġi pressjoni fuq is-sistemi Griegi tal-ażil u l-migrazzjoni bħala l-pajjiż ewlieni tal-ewwel dħul mir-rotta tal-Lvant tal-Mediterran. Bejn Jannar u l-4 ta' Diċembru 2016, 171 909 migrant waslu b'mod irregolari fil-Greċja (4). Anke jekk id-Dikjarazzjoni bejn l-UE u t-Turkija (5) wasslet għal tnaqqis sinifikanti fl-għadd ta' wasliet ta' kuljum lejn il-Greċja mit-Turkija (6), din fdat ukoll responsabbiltajiet ġodda fuq l-awtoritajiet Griegi. Barra minn hekk, l-għadd medju ta' kuljum ta' wasliet fil-Greċja żdied fil-perjodu mill-bidu ta' Awwissu 2016 meta mqabbel mal-perjodu mill-1 ta' Mejju sal-31 ta' Lulju 2016 (7). Barra minn hekk, is-sitwazzjoni fil-Greċja nbidlet b'mod sinifikanti wara l-għeluq de facto tar-rotta tal-Balkani tal-Punent li jipprevjeni li ċittadini ta' pajjiżi terzi jkomplu bil-vjaġġ tagħhom. B'riżultat ta' dan, aktar minn 62 000 ċittadin ta' pajjiż terz li waslu b'mod irregolari attwalment jinsabu fil-Greċja (8). Fl-istess ħin, l-iskema ta' rilokazzjoni ta' emerġenza bbażata fuq żewġ Deċiżjonijiet tal-Kunsill (9) (minn issa 'l quddiem “Deċiżjonijiet ta' Rilokazzjoni”), qed turi xejra pożittiva, b'mod partikolari fil-Greċja fejn it-trasferimenti għal rilokazzjoni żdiedu u attwalment huma ta' 1 000 fix-xahar. Madankollu, jeħtieġ li jsiru aktar sforzi min-naħa tal-Istati Membri kollha biex itaffu l-pressjoni minn fuq il-Greċja. Għal dan l-għan, il-Kummissjoni qed issejjaħ lill-Istati Membri biex jimpenjaw ruħhom u jirrilokaw fuq bażi ta' kull xahar biex jitwettqu mill-anqas 2 000 trasferiment għal rilokazzjoni fix-xahar minn Diċembru 2016 u progressivament iżidu r-rilokazzjonijiet kull xahar (10).

(5)

Fl-10 ta' Frar u fil-15 ta' Ġunju 2016, il-Kummissjoni indirizzat rispettivament żewġ Rakkomandazzjonijiet lir-Repubblika Ellenika dwar il-miżuri urġenti li għandhom jittieħdu mill-Greċja minħabba t-tkomplija tat-trasferimenti skont ir-Regolament ta' Dublin (11). Dawn ir-Rakkomandazzjonijiet ikkonkludew li s-sitwazzjoni fil-Greċja għadha teħtieġ titjib konsiderevoli qabel ma l-Kummissjoni tkun tista' twettaq valutazzjoni ulterjuri dwar il-possibbiltà li jissoktaw it-trasferimenti lejn il-Greċja skont ir-Regolament ta' Dublin. Fit-28 ta' Settembru 2016, il-Kummissjoni indirizzat it-tielet Rakkomandazzjoni lir-Repubblika Ellenika dwar il-miżuri urġenti speċifiċi li għandha tieħu l-Greċja fid-dawl tat-tkomplija tat-trasferimenti skont ir-Regolament ta' Dublin (12) (minn hawn 'il quddiem “it-tielet Rakkomandazzjoni”). It-tielet Rakkomandazzjoni kkonkludiet li l-Greċja għadha tħabbat wiċċha ma' sitwazzjoni diffiċli biex tittratta għadd kbir ta' applikanti ġodda għall-ażil, b'mod partikolari dawk li jirriżultaw mill-implimentazzjoni tal-hekk imsejjaħ “eżerċizzju ta' prereġistrazzjoni” u t-tkomplija ta' wasliet ta' migranti irregolari. Barra minn hekk, kellhom jittieħdu passi importanti oħra biex jiġu rimedjati n-nuqqasijiet sistemiċi li fadal fis-sistema ta' ażil Griega, b'mod partikolari minħabba restrizzjonijiet ta' kapaċità. Abbażi tal-progress ulterjuri miksub, meta jerġgħu jibdew it-trasferimenti lejn il-Greċja skont ir-Regolament ta' Dublin, skont it-tielet Rakkomandazzjoni, għandu jitqies l-impatt li din is-sitwazzjoni diffiċli għandha fuq il-funzjonament kumplessiv tas-sistema tal-ażil, u għaldaqstant jenħtieġ li dawn jibdew b'mod gradwali, fuq bażi ta' każ b'każ.

(6)

Permezz ta' ittra bid-data tat-22 ta' Novembru 2016, il-Greċja pprovdiet lill-Kummissjoni b'aktar informazzjoni dwar l-aħħar sitwazzjoni tal-applikanti għal ażil fil-Greċja u dwar il-progress li għamlet biex tirriforma s-sistema tal-ażil tagħha. Il-Greċja esprimiet ukoll tħassib dwar il-prospett ta' possibilità ta' tkomplija tat-trasferiment skont ir-Regolament ta' Dublin, minħabba l-għadd ta' migranti fil-Greċja, u nnutat piż enormi fuqha li huwa sproporzjonat għad-daqs tagħha u li jirriżulta f'sitwazzjoni fejn il-kapaċitajiet tal-ażil u tal-akkoljenza jilħqu l-limitu tagħhom. Il-Greċja bl-istess mod irreferiet għall-għadd ta' rilokazzjonijiet mill-Greċja għal Stati Membri oħra li għadu sew taħt il-livell previst fid-Deċiżjonijiet dwar ir-Rilokazzjoni. Madankollu, il-Greċja enfasizzat li hija ma għandiex l-għan li teskludi lilha nnifisha b'mod permanenti mis-sistema ta' Dublin u talbet għal solidarjetà ġenwina u appoġġ sakemm is-sitwazzjoni tkun ġiet regolarizzata bis-sħiħ fil-Greċja.

(7)

Skont id-dejta Griega tat-22 ta' Novembru 2016, mill-1 ta' Jannar 2016 ġew ippreżentati madwar 39 000 applikazzjoni għall-ażil quddiem is-Servizz ta' Ażil Grieg. Fit-30 ta' Settembru, il-każijiet pendenti li għandhom jiġu eżaminati fl-ewwel istanza kienu aktar minn 17 000. L-awtoritajiet Griegi stmaw li sa tmiem l-2016 se jkun ġie ppreżentat total ta' 50 000 applikazzjoni għall-ażil (13). Minħabba r-regolarizzazzjoni tas-sitwazzjoni fil-Greċja u l-aċċess imtejjeb għall-proċedura tal-ażil, fost fatturi oħra, il-volum ta' applikazzjonijiet għall-ażil li s-Servizz tal-Ażil Grieg qed jiffaċċja huwa ogħla b'mod sinifikanti minn tas-snin preċedenti.

(8)

Fl-aħħar Rakkomandazzjonijet tagħha, il-Kummissjoni nnutat it-titjib li għamlet il-Greċja fil-qafas leġiżlattiv tagħha biex tiżgura li d-dispożizzjonijiet legali l-ġodda tad-Direttiva 2013/32/UE tal-Parlament Ewropew u tal-Kunsill (14) (ir-riformulazzjoni tad-Direttiva dwar il-Proċeduri tal-Ażil) u partijiet mid-Direttiva 2013/33/UE (15) (ir-riformulazzjoni tad-Direttiva dwar il-Kundizzjonijiet ta' Akkoljenza) ġew trasposti fil-leġiżlazzjoni nazzjonali. Ġiet adottata liġi ġdida (il-Liġi 4375/2016) mill-Parlament Grieg fit-3 ta' April 2016 (16). Fit-22 ta' Ġunju 2016, il-Parlament approva emenda għal-Liġi Nru 4375/2016 li, fost l-oħrajn, timmodifika l-kompożizzjoni tal-Kumitati tal-Appelli u d-dritt ta' dawk li jfittxu ażil għal seduta orali mressqa quddiemhom (17). Fil-31 ta' Awwissu 2016, il-Parlament Grieg adotta wkoll liġi rigward it-tfal refuġjati tal-età tal-iskola residenti fil-Greċja (18).

(9)

Rigward il-kapaċita ta' akkoljenza f'din l-aħħar sena l-Greċja żiedet b'mod sinifikanti l-kapaċità ta' akkoljenza ġenerali tagħha kemm għall-migranti irregolari kif ukoll għall-applikanti għal protezzjoni internazzjonali. Skont l-informazzjoni ta' kuljum rilaxxata mill-awtoritajiet Griegi fis-6 ta' Diċembru 2016, hemm 71 539 post disponibbli l-aktar f'faċilitajiet ta' akkoljenza temporanji, inkluż l-akkomodazzjoni pprovduta mill-UNHCR (ara l-Premessa 11), kemm għall-migranti irregolari kif ukoll għall-applikanti għal protezzjoni internazzjonali fil-Greċja (19). Madankollu, hemm sfidi serji fir-rigward tal-kapaċità fil-Gżejjer tal-Eġew fejn hemm affollament eċċessiv: il-massimu tal-kapaċità ta' akkoljenza għadu madwar 8 200 filwaqt li l-għadd totali ta' migranti rreġistrati fil-gżejjer kien ta' 16 295 fil-5 ta' Diċembru 2016 (20).

(10)

Il-Greċja żiedet ukoll l-akkomodazzjoni għall-applikanti vulnerabbli, b'mod partikolari għall-vjaġġaturi minorenni mhux akkumpanjati. Fis-17 ta' Novembru 2016 kien hemm 1 191 post disponibbli f'postijiet ta' kenn għal vjaġġaturi minorenni mhux akkumpanjati irrispettivament minn jekk humiex persuni li jfittxu ażil jew le. Hemm previst li sa tmiem l-2016 jiġu stabbiliti 130 post ieħor adattati għall-vjaġġaturi minorenni mhux akkumpanjati. Madankollu, il-kapaċità għall-applikanti vulnerabbli għad baqagħlha ħafna biex tkun suffiċjenti billi attwalment il-faċilitajiet huma mimlija u hemm lista ta' stennija għal 1 199 vjaġġaturi minorenni mhux akkumpanjati li jeħtieġ li jitqiegħdu f'faċilitajiet xierqa (21). Għaldaqstant, il-progress f'dan il-qasam huwa kajman wisq, u huwa ċar li jeħtieġ li l-Greċja tintensifika l-isforzi tagħha biex tiżgura li jkun hemm fis-seħħ għadd xieraq ta' faċilitajiet ta' akkoljenza għal vjaġġaturi minorenni mhux akkumpanjati u tindirizza t-talba għal dan it-tip ta' akkomodazzjoni.

(11)

F'Jannar 2016, ġie ffirmat Ftehim ta' Delega għal total ta' EUR 80 miljun bejn il-Kummissjoni u l-UNHCR sabiex jiġu stabbiliti 20 000 post ta' akkomodazzjoni miftuħa (skemi ta' kiri ta' appartamenti, kupuni għal lukandi u programmi ta' familji ospitanti) primarjament għall-benefiċċju ta' applikanti għal protezzjoni internazzjonali li jkunu eliġibbli għal rilokazzjoni. Il-Ftehim ta' Delega ġie rivedut f'Lulju 2016 sabiex jinkludi fl-iskema ta' akkomodazzjoni wkoll il-possibbiltà li jiġu stabbiliti postijiet f'siti ta' rilokazzjoni ġestiti mill-UNHCR, u sabiex jagħmilha aktar ċara fit-test li l-grupp fil-mira tal-iskema tal-akkomodazzjoni jinkludi mhux biss kandidati għar-rilokazzjoni iżda anke oħrajn li jfittxu l-ażil, b'mod partikolari kandidati għar-riunifikazzjoni tal-familja skont ir-Regolament ta' Dublin u kategoriji vulnerabbli, inkluż vjaġġaturi minorenni mhux akkumpanjati u tfal mifrudin, anzjani, ġenituri singoli, dawk morda b'mod kroniku, nisa tqal, u oħrajn. Minn Settembru, il-postijiet ta' akkomodazzjoni disponibbli żdiedu b'mod sinifikanti (b'madwar 8 100). Il-UNHCR ikkommetta ruħu f'Diċembru 2015 li joħloq 20 000 post għal applikanti eliġibbli għal rilokazzjoni skont l-iskema tal-kiri fis-6 ta' Diċembru 2016, 20 145 post kienu disponibbli, inklużi 6 344 post fil-lukandi/bini sħiħ, 11 711-il post f'appartamenti, 484 post f'familji ospitanti, u 960 f'siti ta' rilokazzjoni u 646 post f'faċilitajiet apposta għal vjaġġaturi minorenni mhux akkumpanjati (22). Billi l-Ftehim ta' Delega attwali jispiċċa fil-31 ta' Diċembru 2016, il-Kummissjoni bdiet diskussjonijiet mal-UNHCR għall-estensjoni tal-iskema fl-2017, abbażi ta' valutazzjoni aġġornata tal-ħtiġijiet ta' akkoljenza tal-Greċja.

(12)

F'termini ta' kwalità, il-biċċa l-kbira tal-faċilitajiet ta' akkoljenza fil-Greċja għad baqgħalhom biex jissodisfaw ir-rekwiżiti stipulati fid-Direttiva dwar il-Kondizzjonijiet ta' Akkoljenza 2013/33/UE għall-applikanti għal protezzjoni internazzjonali, b'mod partikolari fuq il-gzejjer u f'ċerti faċilitajiet temporanji tal-Greċja kontinentali. Il-faċilitajiet ta' “hotspots” fil-gżejjer li mhux biss huma ffullati żżejjed iżda għandhom kundizzjonijiet materjali inferjuri f'termini ta' sanità u iġjene, aċċess għal servizzi essenzjali bħall-kura tas-saħħa, b'mod partikolari għall-gruppi vulnerabbli. Is-sigurtà mhijiex biżżejjed, u għad hemm tensjonijiet bejn nazzjonalitajiet differenti. Fil-Greċja kontinentali, filwaqt li l-iskema ta' akkomodazzjoni tal-UNHCR tipprovdi kundizzjonijiet adegwati, ħafna mill-kapaċità ta' akkoljenza li jifdal tikkonsisti f'kampijiet (bħalissa qed jintużaw 53 sit) u faċilitajiet ta' emerġenza bi standards li jvarjaw ħafna u li ta' spiss huma inadegwati, kemm f'termini ta' kundizzjonijiet materjali kif ukoll ta' sigurtà. Uħud minn dawn il-faċilitajiet bdew jitħejjew għax-xitwa iżda l-progress huwa kajman. Minkejja t-titjib, se jkun diffiċli li xi kampijiet jinbidlu f'faċilitajiet ta' akkoljenza permanenti xierqa, u jista' jkun hemm il-ħtieġa li dawn jingħalqu, filwaqt li jiġu kkonsoilidati oħrajn.

(13)

Barra minn hekk, jidher li l-koordinazzjoni ġenerali tal-organizzazzjoni tal-akkoljenza fil-Greċja hija inadegwata, minħabba n-nuqqas ta' qafas legali u sistema ta' monitoraġġ ċari, b'ġestjoni ad hoc ta' ċerti kampijiet mill-Ministeru għall-Migrazzjoni u oħrajn mis-Servizz ta' Akkoljenza u Identifikazzjoni. Għadha ma ttieħdet l-ebda deċiżjoni dwar liema faċilitajiet għandhom isiru permanenti. Is-Servizz ta' Akkoljenza għadu fil-proċess li jibni l-kapaċità tiegħu.

(14)

Minn dan ta' hawn fuq isegwi li l-Greċja għad trid tagħmel progress fl-istabbiliment ta' kapaċità permanenti ta' akkoljenza miftuħa suffiċjenti, adegwata u ddedikata għal applikanti għall-ażil, u kollha kemm huma jridu jkunu ta' standard xieraq f'konformità mal-acquis tal-UE. Dan għandu jinkludi ġestjoni ċentralizzata tal-faċilitajiet kollha ta' akkoljenza flimkien ma' sistema li kostantement tagħmel monitoraġġ tal-istandards materjali għal dawn il-faċilitajiet u s-servizzi pprovduti fihom. Jenħtieġ li xi faċilitajiet temporanji jsiru permanenti, iżda madankollu għandha tinżamm ukoll kapaċità suffiċjenti f'termini ta' faċilitajiet temporanji biex takkomoda kull nuqqas fil-kapaċità li jirriżulta minn influssi mhux mistennija. Barra minn hekk, kif kien mitlub fit-tielet Rakkomandazzjoni, huwa meħtieġ li l-awtoritajiet Griegi jipprovdu dejta aktar preċiża dwar il-kapaċità ta' akkoljenza u valutazzjoni tal-ħtiġijiet komprensiva u aġġornata kontinwament f'termini tal-kapaċità ta' akkoljenza totali u n-natura ta' din il-kapaċità.

(15)

Ġie nnutat titjib sostanzjali rigward l-istabbiliment ta' Uffiċċji Reġjonali għall-Ażil fir-Rakkomandazzjonijiet preċedenti. Il-liġi tal-Greċja tipprevedi l-istabbiliment ta' Uffiċċji Reġjonali għall-Ażil fir-reġjuni ta' Attika, Salonka, Traċja, Epiru, it-Tessalija, il-Greċja tal-Punent, Kreta, Lesvos, Chios, Samos, Leros u Rodi (23). B'deċiżjoni tad-Direttur tas-Servizz tal-Ażil huwa wkoll possibbli li jitwaqqfu Unitajiet Awtonomi tal-Ażil sabiex ikopru ż-żieda fil-ħtiġijiet tas-Servizz tal-Ażil. Skont l-informazzjoni mogħtija mill-Greċja fl-ittra bid-data tat-22 ta' Novembru 2016, sa issa saru operazzjonali seba' Uffiċċji Reġjonali fir-reġjuni ta' Attika, Traċja, Salonka, Lesvos, Samos, Rodi u Patras. Barra minn hekk, disa' Unitajiet Awtonomi tal-Ażil huma operazzjonali f'Piraeus, Evros, Xanthi, Leros, Kos, Korintu u Unità ta' Rilokazzjoni f'Alimos. Kif tistipula l-liġi, tliet Uffiċċji Reġjonali għall-Ażil għandhom isiru operattivi fiż-żona ta' Kos, Epirus (Ioannina), Kreta (Heraklio) u Tessalja (Volos).

(16)

Is-Servizz ta' Ażil Grieg jinsab fil-proċess li jżid il-kapaċità tiegħu. Bħalissa, hemm 478 persuna jaħdmu fi ħdan is-Servizz ta' Ażil (24). Din iċ-ċifra tkopri postijiet tas-Servizz Ċentrali kif ukoll Uffiċċji Reġjonali u Unitajiet ta' Ażil stabbiliti. Il-Baġit nazzjonali jkopri 250 kariga, filwaqt li l-bqija huwa ffinanzjat minn sorsi differenti tal-UE u taż-ŻEE. Sa tmiem is-sena huwa previst li l-persunal se jiżdied għal 659. Dan minbarra l-persunal impjegat għal żmien fiss mill-UNHCR kif ukoll il-persunal tal-EASO u l-esperti tal-Istati Membri mibgħuta permezz tal-EASO lis-Servizz tal-Ażil Grieg għal perjodu fiss. L-intenzjoni tal-awtoritajiet Griegi hija li jissostitwixxu l-persunal kuntrattwali kollu b'persunal permanenti sa tmiem l-2017 u li ma jkomplux iżidu l-kapaċità; is-Servizz tal-Ażil Grieg ġibed l-attenzjoni tas-servizzi tal-Kummissjoni li espansjoni aktar rapida tal-persunal mhijiex fattibbli minħabba n-nuqqas ta' persunal ta' livell għoli biex iħarreġ, jiggwida u jissorvelja lill-persunal ġdid reklutat. Billi s-Servizz tal-Ażil se jkun ittripla fid-daqs tiegħu matul l-2016, huwa indika li jeħtieġ li jikkonsolida, speċjalment biex jibni maniġment intermedju u kompetenza tal-persunal.

(17)

Minħabba l-livell taż-żieda fl-għadd ta' applikazzjonijiet għal ażil fil-Greċja, għadu mhuwiex ċar jekk il-livelli attwali u ppjanati tal-persunal għas-Servizz tal-Ażil humiex biżżejjed għal dak li huwa meħtieġ biex jiġi pproċessat l-volum attwali u dak futur probabbli f'waqtu u b'mod xieraq. Waħda mill-prijoritajiet ewlenin tas-Servizz tal-Ażil għandu jkun li jitnaqqas iż-żmien li jgħaddi bejn meta persuna tagħmel u meta tippreżenta applikazzjoni li bħalissa ta' spiss huwa twil wisq, b'impatt fuq id-drittijiet li jgawdu minnhom il-persuni kkonċernati u li jikkawżaw frustrazzjoni fost dawk affettwati. Jenħtieġ li ż-żmien jitnaqqas skont l-Artikolu 6(2) tad-Direttiva 2013/32/UE li tirrikjedi li persuna li tkun għamlet applikazzjoni għall-ażil tingħatha opportunità effettiva biex tippreżenta applikazzjoni “malajr kemm jista' jkun”. Huwa essenzjali wkoll li, ladarba tiġi ppreżentata, l-applikazzjoni tiġi pproċessata fl-iskadenzi stabbiliti fid-Direttiva, u għalhekk normalment fi żmien sitt (6) xhur. L-ipproċessar ta' applikazzjoni għall-ażil ippreżentata bħalissa jieħu mill-inqas diversi xhur, ħlief f'każijiet ta' rilokazzjoni li jiġu pproċessati aktar malajr, u hemm inċertezza konsiderevoli dwar kemm l-għadd attwali ta' applikazzjonijiet se jkunu approvati malajr. Madankollu, il-Kummissjoni tieħu nota tat-tħassib espress mill-Greċja fl-ittra bid-data tat-22 ta' Novembru 2016 li skontha żieda aktar rapida tal-persunal tas-Servizz tal-Ażil thedded li taffettwa l-koerenza u l-kwalità tad-deċiżjonijiet.

(18)

Jeħtieġ li jiġi vvalutat b'mod urġenti jekk iż-żieda fir-riżorsi umani tas-Servizz tal-Ażil sa issa hijiex biżżejjed, u jiġi vvalutat ukoll kif il-Kummissjoni, l-Aġenziji rilevanti tal-UE u l-Istati Membri jistgħu jgħinu bl-aħjar mod lill-Greċja sabiex tlaħħaq ma' dawn l-applikazzjonijiet f'limitu ta' żmien iqsar. Jenħtieġ li ssir valutazzjoni tal-ħtiġijiet komprensiva u aġġornata kontinwament li tqis l-għadd ta' applikazzjonijiet għall-ażil li bħalissa huma pendenti u li x'aktarx jiġu pproċessati mis-Servizz tal-Ażil Grieg f'waqt wieħed u l-għadd ta' persunal disponibbli meħtieġ jew x'aktarx li jkun meħtieġ biex jiġu pproċessati dawk l-applikazzjonijiet. Dan il-persunal jista' jkun jinkludi riżorsi addizzjonali li għandhom jiġu pprovduti mill-Greċja stess u permezz tal-mobilizzazzjoni tal-esperti tal-Istati Membri fil-forma ta' tim ta' appoġġ tal-EASO. Filwaqt li tinżamm il-kwalità, jenħtieġ li jiġi esplorat kif il-metodi ta' ħidma jiġu razzjonalizzati u jsiru aktar effiċjenti biex jitħaffu l-intervisti u l-proċeduri, bl-appoġġ tal-EASO fejn xieraq.

(19)

L-applikanti għal ażil irid ikollhom aċċess effettiv għal rimedju kontra deċiżjoni negattiva dwar it-talba tagħhom. Sar progress importanti f'dan ir-rigward. L-Awtorità tal-Appelli u l-Kumitati tal-Appelli ġew stabbiliti bil-Liġi 4375/2016 adottata f'April 2016. Il-Liġi 4399/2016 li ġiet adottata f'Ġunju 2016 tistabbilixxi Kumitati tal-Appelli ġodda. Huma responsabbli biex jeżaminaw l-appelli kollha kontra deċiżjonijiet tas-Servizz tal-Ażil Grieg ippreżentati mill-20 ta' Lulju 2016 'il quddiem. Bħala prijorità, il-Kumitati tal-Appelli jiffukaw primarjament fuq każijiet imressqa fil-gżejjer Griegi, sabiex jikkontribwixxu għall-implimentazzjoni tad-Dikjarazzjoni bejn l-UE u t-Turkija. Bħalissa hemm sitta minnhom. Fil-21 ta' Lulju ġie stabbilit ukoll Kumitat tal-Appelli bħala alternattiva għal dawk permanenti (25). Sabiex tlaħħaq maż-żieda fil-volum ta' kawżi li qed jiżdied u l-ġestjoni ta' każijiet pendenti, il-Greċja beħsiebha tistabbilixxi seba' kumitati oħra li mistennija li jkunu operazzjonali sal-aħħar ta' Diċembru 2016 u ġġib it-total għal 20 sal-aħħar ta' Frar 2017.

(20)

Il-Liġi Nru 4399/2016 emendat ukoll l-istruttura ta' dawn il-Kumitati li issa huma magħmula minn tliet membri: żewġ imħallfin tal-Qorti Amministrattiva u ċittadin Grieg wieħed bi sfond u esperjenza rilevanti li se jkunu ppreżentati mill-UNHCR jew il-Kumitat Nazzjonali għad-Drittijiet tal-Bniedem.

(21)

Skont l-informazzjoni mogħtija mill-awtoritajiet Griegi fl-ittra bid-data tat-22 ta' Novembru 2016, mill-21 ta' Lulju 2016, tressqu 2 347 appell quddiem il-Kumitati tal-Appelli iżda nqatgħu 573 deċiżjoni biss.

(22)

Il-Kumitati tal-Appelli “Pendenti” li ġew stabbiliti sabiex jinstemgħu l-appelli għall-ażil pendenti mill-Greċja fil-bidu kienu mogħtija mandat addizzjonali biex jisimgħu, minbarra dawk l-appelli sostantivi bbażati fuq deċiżjonijiet fl-ewwel istanza, l-appelli kontra deċiżjonijiet ibbażati fuq raġunijiet ta' ammissibilità bħala parti mid-Dikjarazzjoni bejn l-UE u t-Turkija. Skont l-informazzjoni mogħtija mill-awtoritajiet Griegi fit-22 ta' Novembru 2016, aktar minn 2 000 appell li ġew ippreżentati bejn April u l-20 ta' Lulju 2016 tressqu quddiem il-Kumitati tal-Appelli Pendenti. L-istabbiliment ta' Kumitati tal-Appelli Ġdid fl-24 ta' Ġunju 2016 (26) naqqas il-piż minn fuq l-20 Kumitat tal-Appelli “Pendenti” u ppermettewlhom li jħaffu l-pass tal-proċedimenti tal-kawżi ta' appelli pendenti.

(23)

Sar aktar progress dwar it-talbiet pendenti fit-tul ta' appelli skont il-“proċedura l-antika” rregolata mid-Digriet Presidenzjali 114/2010. It-talbiet pendenti bħalissa jammontaw għal madwar 6 589 każ fit-22 ta' Novembru 2016 (minn total ta' madwar 51 000 każ li ġew ikkunsidrati bħala parti mit-talbiet pendenti fil-bidu tal-2013 u madwar 8 075 każ f'Settembru 2016). Skont il-Liġi Griega 4375/2016, l-awtoritajiet Griegi taw permessi għal skopijiet umanitarji lil persuni li l-applikazzjoni tagħhom għall-ażil kienet ilha pendenti għal żmien konsiderevoli u li kienu eliġibbli li jiksbu permessi ta' residenza fuq bażi umanitarja jew raġunijiet eċċezzjonali oħra. Il-permessi ta' residenza jinħarġu għal perjodu ta' sentejn u jistgħu jiġġeddu (27). Dawn jipprovdu lill-benefiċjarji l-istess drittijiet u benefiċċji bħal dawk li jingħataw status ta' protezzjoni sussidjarja fil-Greċja, (28) u dawn il-persuni ma jibqgħux jiġu kkunsidrati bħala applikanti għall-ażil. Madankollu, uħud mill-appelli pendenti jiġu eżaminati fis-sustanza tagħhom. Minkejja l-progress sinifikanti li għamlet il-Greċja mir-Rakkomandazzjonijiet preċedenti, għandha tkompli tagħmel sforzi biex tittratta l-appelli ta' talbiet pendenti f'dan ir-rigward, u tiżgura li l-applikanti b'appell pendenti jkollhom l-opportunità li jeżerċitaw id-dritt tagħhom għal rimedju effettiv.

(24)

Minħabba ż-żieda sinifikanti fl-għadd ta' applikazzjonijiet li saru fil-Greċja sa mill-implimentazzjoni tad-Dikjarazzjoni bejn l-UE u t-Turkija, Awtorità tal-Appelli b'persunal sħiħ, li tkun kapaċi tittratta żieda sinifikanti mistennija fl-għadd ta' appelli, hija iktar u iktar essenzjali. Filwaqt li tinżamm il-kwalità u bla ħsara għall-indipendenza tal-membri tal-kumitat, jenħtieġ li tiżdied l-effiċjenza tal-kumitati. Dan jista' jinkludi b'mod partikolari laqgħat aktar ta' spiss għall-Kumitati tal-Appelli, l-użu ta' assistenza legali fit-tfassil ta' deċiżjonijiet u l-ispeċjalizzazzjoni tal-kumitati kif ukoll l-involviment full-time tal-membri. Jenħtieġ li jkun involut aktar persunal ta' appoġġ (29). Jenħtieġ ukoll li titwettaq valutazzjoni tal-ħtiġijiet kontinwa abbażi tal-għadd ta' appelli li bħalissa huma pendenti quddiem id-diversi korpi ta' appell u li x'aktarx ikunu qed jieħdu ħsieb tagħhom bil-ħsieb li jivvalutaw jekk l-għadd ta' kumitati huwiex biżżejjed u jekk il-metodi ta' ħidma humiex xierqa.

(25)

Fil-liġi l-ġdida (il-Liġi 4375/2016) ġie inkluż l-għoti ta' għajnuna legali bla ħlas għall-applikanti fl-istadju tal-appell. Madankollu, il-miżuri kollha li jimplimentaw din il-liġi fil-prattika għadhom ma ttiħdux. Fid-9 ta' Settembru 2016 ġiet adottata Deċiżjoni Ministerjali li timplimenta l-għoti ta' għajnuna legali skont il-Liġi 4375/2016. Il-finanzjament għall-implimentazzjoni ta' assistenza legali bla ħlas kien garantit permezz tal-programmi nazzjonali tagħhom skont il-Fond għall-Ażil, il-Migrazzjoni u l-Integrazzjoni (AMIF — Asylum, Migration and Integration Fund). Barra minn hekk, ingħata ftehim ta' għotja lill-UNHCR skont is-sistema ta' finanzjament għal għajnuna ta' emerġenza AMIF għall-ammont totali ta' EUR 30 miljun (30). Fost affarijiet oħra, dan il-finanzjament qed jintuża mill-UNHCR biex jipprovdi għajnuna legali bla ħlas lill-applikanti għal protezzjoni internazzjonali fi stadju ta' appell sal-bidu tal-2017, sa liema żmien l-awtoritajiet Griegi se jkunu mistennija li jimplimentaw l-iskema tagħhom ta' għajnuna legali bla ħlas. Qed jiġu implimentati żewġ proġetti bi sħubija mal-organizzazzjonijiet mhux governattivi (Metaction u l-Kunsill Grieg għar-Refuġjati): wieħed fil-gżejjer, b'kopertura sħiħa tal-appelli kollha u l-ieħor fil-Greċja kontinentali, b'kopertura parzjali biss, għal appelli ppreżentati f'Ateni u Salonka, u mhux għal applikanti għal ażil li jinsabu f'detenzjoni. Fid-19 ta' Settembru, il-Greċja għarrfet lill-Kummissjoni li r-roster tal-avukati li għandu jinżamm mis-Servizz tal-Ażil se jiġi stabbilit sal-bidu tal-2017. Jenħtieġ li l-Greċja tieħu l-passi meħtieġa biex mingħajr dewmien tiggarantixxi d-dritt għall-għajnuna legali bla ħlas għall-applikanti għal ażil li jippreżentaw appelli.

(26)

Għad hemm tħassib serju dwar il-protezzjoni tal-applikanti vulnerabbli, inkluż il-vjaġġaturi minorenni mhux akkumpanjati, b'mod partikolari minħabba n-nuqqas ta' sistema ta' tutela li tiffunzjona sew, nuqqasijiet f'termini ta' akkomodazzjoni xierqa u tħassib ġenerali rigward is-sigurtà tagħhom. Il-Liġi l-ġdida 4375/2016 tipprevedi Direttorat ġdid għall-Akkoljenza u Direttorat għall-Integrazzjoni Soċjali li t-tnejn li huma jinkludu dipartimenti speċjalizzati għall-akkoljenza u l-integrazzjoni ta' minorenni mhux akkumpanjati fi ħdan il-Ministeru tal-Intern u r-Rikostruzzjoni Amministrattiva, inkluż il-provvediment ta' rappreżentant legali. Minkejja dan, l-awtoritajiet Griegi għad iridu jadottaw miżuri ta' implimentazzjoni biex jiżguraw li l-vjaġġaturi minorenni mhux akkumpanjati jingħataw fil-prattika garanziji proċedurali xierqa u kundizzjonijiet ta' akkoljenza. Għad irid jiġi adottat qafas leġiżlattiv ieħor li għandu jinkludi dispożizzjonijiet għal sistema ta' tutela effiċjenti. L-awtoritajiet Griegi kkonfermaw li l-Ministeru tax-Xogħol u tas-Solidarjetà Soċjali (MoL), li huwa responsabbli mill-vjaġġaturi minorenni mhux akkumpanjati, qed iħejji liġi ġdida dwar it-tutela li għandha tkun lesta qabel tmiem l-2016. Fi ħdan din il-liġi jiġi stabbilit servizz speċjali, possibbilment dipartiment, għas-sistema ta' tutela. Filwaqt li l-gvern Grieg diġà adotta Deċiżjoni Ministerjali dwar il-kalkolu tal-età ta' vjaġġaturi minorenni mhux akkumpanjati li qed ifittxu ażil, (31) għadu qed jiġi rrappurtat tħassib dwar l-implimentazzjoni tal-kalkolu fil-prattika minħabba nuqqas ta' identifikazzjoni u n-nuqqas ta' rimedju legali rigward il-kalkolu tal-età mwettaq mill-pulizija.

(27)

Sar progress sinifikanti fir-rigward tal-aċċess għall-edukazzjoni. Il-Liġi 4415/2016 f'Awwissu 2016 għandha l-għan, fost l-oħrajn, li tiżgura appoġġ psikosoċjali u edukazzjoni għat-tfal ta' dawk li jfittxu l-ażil, kif ukoll integrazzjoni bla xkiel fis-sistema edukattiva Griega ta' dawk li se jibqgħu fil-Greċja, wara perjodu tranżitorju ta' tħejjija. Minkejja reżistenza lokali, l-awtoritajiet Griegi qed jieħdu miżuri sinifikanti biex jimplimentaw dan il-qafas legali b'mod sħiħ u effettiv.

(28)

Skont diversi partijiet interessati, is-sitwazzjoni għall-vjaġġaturi minorenni mhux akkumpanjati għadha ġeneralment prekarja, u hemm tħassib serju dwar is-sigurtà tagħhom fil-faċilitajiet ta' akkoljenza fil-Greċja kontinentali u fil-gżejjer, u b'xi wħud jindikaw li t-tfal għadhom jinżammu f'detenzjoni, jew f'“żoni protetti” f'faċilitajiet ta' akkoljenza miftuħa, għal perjodi twal f'kundizzjonijiet iffullati u mhux iġeniċi mingħajr rappreżentanti jew aċċess għal għajnuna legali, sakemm tinstab akkomodazzjoni adatta għalihom (32). Kif iddikjarat fil-Premessa 10, in-nuqqas ta' akkomodazzjoni xierqa għat-tfal hija problema importanti li għad trid tiġi rimedjata b'mod urġenti.

(29)

Il-Kummissjoni Ewropea pprovdiet finanzjament sostanzjali lill-Greċja biex tappoġġa lill-pajjiż fl-isforzi tiegħu biex is-sistema tal-ġestjoni tal-ażil tkun skont l-istandards tal-UE. Sa mill-bidu tal-2015, ingħataw iktar minn EUR 352 miljun f'assistenza ta' emerġenza permezz ta' Fondi tal-Affarijiet Interni (AMIF u l-Fond għas-Sigurtà Interna (ISF)) lill-Greċja, jew direttament lill-awtoritajiet Griegi inkella permezz ta' Aġenziji tal-Unjoni u organizzazzjonijiet internazzjonali li joperaw fil-Greċja. Minn dan l-ammont, madwar EUR 90 miljun ġew mogħtija direttament mill-awtoritajiet Griegi f'Lulju 2016 biex isaħħu l-kapaċitajiet tagħhom biex jitjiebu l-kundizzjonijiet tal-għajxien u biex jipprovdu servizzi tal-kura tas-saħħa primarja f'ċentri ta' akkomodazzjoni għar-refuġjati, kif ukoll li jagħtu akkoljenza u servizzi tal-kura tas-saħħa lill-migranti. Permezz tal-Istrument ta' Appoġġ ta' Emerġenza li nħoloq dan l-aħħar, organizzazzjonijiet umanitarji sħab qed jingħataw ukoll finanzjament sostanzjali (madwar EUR 198 miljun) bil-għan li jkopri l-ħtiġijiet umanitarji bażiċi tal-migranti u tar-refuġjati. Dan il-finanzjament jikkontribwixxi għall-implimentazzjoni tal-pjan ta' reazzjoni għal emerġenzi żviluppat flimkien mill-Kummissjoni, mill-awtoritajiet Griegi u/jew mill-partijiet ikkonċernati rilevanti biex tiġi indirizzata s-sitwazzjoni umanitarja fil-post u/jew tiġi appoġġata l-implimentazzjoni tad-Dikjarazzjoni bejn l-UE u t-Turkija.

(30)

Din l-assistenza ta' emerġenza hija apparti l-EUR 509 miljun allokati lill-Greċja għall-perjodu mill-2014 sal-2020 permezz tal-programmi nazzjonali tagħha skont il-Fondi AMIF u FSI, biex b'hekk il-Greċja tkun l-ewwel benefiċjarju ta' fondi tal-Affarijiet Interni tal-UE fost l-Istati Membri tal-UE.

(31)

Jenħtieġ li l-Greċja tiżgura li dawn ir-riżorsi finanzjarji jintużaw b'mod sħiħ bl-aktar mod effiċjenti u effettiv u mingħajr aktar dewmien. Għal dan l-għan, il-programmi nazzjonali tal-Greċja taħt il-Fondi tal-Affarijiet Interni (AMIF, FSI) qed jiġu riveduti sabiex jiġu aġġustati mal-prijoritajiet il-ġodda. Ir-reviżjoni tal-programm nazzjonali tal-AMIF tlestiet, filwaqt li r-reviżjoni tal-programm nazzjonali tal-FSI waslet fl-istadji finali u għandha titlesta dalwaqt. Barra minn hekk, għalkemm il-ħatra formali tal-Awtorità Responsabbli l-ġdida tlestiet, skont ir-rekwiżiti stabbiliti fil-bażi legali, il-proċeduri u l-miżuri operazzjonali xorta għadhom iridu jiġu ssimplifikati biex jiġi żgurat li l-awtoritajiet Griegi jibdew jimmobilizzaw bis-sħiħ il-fondi disponibbli skont il-programmi nazzjonali sabiex jilqgħu għal ħtiġijiet urġenti b'mod speċjali fil-qasam tal-akkoljenza u servizzi oħra ta' migranti preżenti fil-pajjiż.

(32)

Kif ġie rikonoxxut fil-Komunikazzjoni tal-Kummissjoni tal-4 ta' Marzu 2016 dwar “Lura lejn Schengen”, (33) l-iżgurar ta' sistema ta' Dublin li tiffunzjona bis-sħiħ huwa element indispensabbli tal-isforzi usa' meħtieġa biex il-politika tal-ażil, il-migrazzjoni u l-fruntieri tiġi stabilizzata. Dawn l-isforzi biex jiġi normalizzat il-funzjonament tas-sistema ta' Dublin għandhom, min-naħa tagħhom, iwasslu biex iż-żona Schengen terġa' tibda topera b'mod normali. L-inċentiv biex applikanti għal ażil li jaslu b'mod irregolari fil-Greċja jibqgħu sejrin lejn Stati Membri oħrajn, li nħoloq mill-2011 bis-sospensjoni tat-trasferimenti, skont ir-Regolament ta' Dublin, lejn il-Greċja, huwa wieħed mill-fatturi li jwassal għall-movimenti sekondarji li qegħdin ixekklu l-funzjonament xieraq tas-sistema ta' Schengen. Għalhekk huwa importanti li l-Greċja tieħu b'urġenza l-azzjonijiet pendenti identifikati f'din ir-Rakkomandazzjoni. Fl-istess ħin, ir-riforma tar-regoli ta' Dublin kif proposta mill-Kummissjoni, (34) ibbażata fuq l-objettiv ta' solidarjetà u t-tqassim ġust tal-piż bejn l-Istati Membri, għandha tkun prijorità. In-negozjati fuq din il-proposta għadhom għaddejjin.

(33)

Il-Kummissjoni tirrikonoxxi l-progress importanti li sar mill-Greċja, megħjuna mill-Kummissjoni, l-EASO, l-Istati Membri u organizzazzjonijiet internazzjonali u mhux governattivi, sabiex jitjieb il-funzjonament tas-sistema tal-ażil Griega wara s-sentenza M.S.S fl-2011. Madankollu, il-Greċja għadha qed tħabbat wiċċha ma' sitwazzjoni diffiċli biex tittratta għadd kbir ta' applikanti għall-ażil ġodda, b'mod partikolari dawk li jirriżultaw mill-implimentazzjoni tal-eżerċizzju ta' prereġistrazzjoni, it-tkomplija ta' wasliet ta' migranti irregolari, minkejja li f'livelli aktar baxxi milli kien qabel Marzu 2016 u, mir-responsabbiltajiet tagħha taħt l-implimentazzjoni ta-Dikjarazzjoni bejn l-UE u t-Turkija. Barra minn hekk, hemm aktar passi importanti li għandhom jittieħdu biex jiġu rrimedjati n-nuqqasijiet li fadal fis-sistema ta' ażil Griega, b'mod partikolari fir-rigward tal-kwalità tal-faċilitajiet ta' akkoljenza, it-trattament ta' applikanti vulnerabbli u l-ħeffa li bihom l-applikazzjonijiet għall-ażil jiġu rreġistrati, ippreżentati u eżaminati fiż-żewġ istanzi. Sabiex jitqies l-impatt ta' din is-sitwazzjoni diffiċli dwar il-funzjonament ġenerali tas-sistema tal-ażil u sabiex jiġi evitat li jitpoġġa piż insostenibbli fuq il-Greċja, għadu mhuwiex possibbli li tiġi rakkomandata tkomplija sħiħa tat-trasferimenti skont ir-Regolament ta' Dublin lejn il-Greċja, għalkemm dan jibqa' l-għan aħħari.

(34)

Madankollu, il-Greċja għamlet progress sinifikanti fl-istabbiliment ta' strutturi istituzzjonali u legali essenzjali għal sistema ta' ażil li tiffunzjona sew, u hemm prospetti tajbin biex fil-futur qarib titpoġġa fis-seħħ sistema ta' ażil li tiffunzjona bis-sħiħ, ladarba jiġu rimedjati n-nuqqasijiet kollha li għad baqa', b'mod partikolari fir-rigward tal-kundizzjonijiet ta' akkoljenza u t-trattament ta' persuni vulnerabbli, inkluż il-vjaġġaturi minorenni mhux akkumpanjati. Għaldaqstant, huwa xieraq li jiġi rakkomandat li t-trasferimenti jerġgħu jibdew gradwalment u abbażi ta' garanziji individwali, filwaqt li jitqiesu l-kapaċitajiet ta' akkoljenza u t-trattament tal-applikazzjonijiet skont il-leġiżlazzjonijiet rilevanti tal-UE, u filwaqt li jitqies it-trattament attwalment inadegwat ta' ċerti kategoriji ta' persuni, b'mod partikolari applikanti vulnerabbli, inkluż vjaġġaturi minorenni mhux akkumpanjati. Barra minn hekk, jenħtieġ li t-tkomplija ma tiġix applikata b'mod retroattiv iżda tikkonċerna lill-applikanti għall-ażil li l-Greċja hija responsabbli għalihom b'data speċifika ta' bidu sabiex jiġi evitat li jitpoġġa piż insostenibbli fuq il-Greċja. Għandu jiġi rrakkomandat li din id-data tiġi stabbilita fil-15 ta' Marzu 2017.

(35)

Abbażi ta' dak li ntqal hawn fuq, din ir-Rakkomandazzjoni tistabbilixxi l-miżuri li jeħtieġ li jittieħdu jew jiġu sostnuti mill-awtoritajiet Griegi bil-ħsieb li jerġgħu jinbdew it-trasferimenti skont ir-Regolament ta' Dublin rigward l-applikanti għall-ażil li daħlu l-Greċja b'mod irregolari fil-fruntieri esterni mill-15 ta' Marzu 2017 'il quddiem, jew li l-Greċja hija responsabbli għalihom skont il-kriterji apparti l-Artikolu 13 fil-Kapitolu III tar-Regolament (UE) Nru 604/2013 minn dik id-data. Bil-ħsieb ta' dan l-objettiv, jenħtieġ li l-Greċja tieħu l-passi kollha stipulati f'din ir-Rakkomandazzjoni b'mod urġenti. Skont il-prinċipju tas-solidarjetà u t-tqassim ġust tar-responsabbiltà, jenħtieġ li l-Istati Membri l-oħrajn jikkontribwixxu wkoll biex jintlaħaq dan l-objettiv, b'mod partikolari billi jibagħtu esperti biex jassistu lill-awtoritajiet Griegi b'reazzjoni għad-diversi talbiet tal-EASO kif ukoll billi jikkonformaw bis-sħiħ mal-obbligi ta' rilokazzjoni tagħhom li jirriżultaw mid-Deċiżjonijiet ta' Rilokazzjoni.

(36)

Din ir-Rakkomandazzjoni tistabbilixxi wkoll il-modalitajiet għat-tkomplija tat-trasferimenti li jenħtieġ li jinkludu kooperazzjoni mill-qrib bejn l-awtoritajiet Griegi u l-awtoritajiet tal-Istat Membru trasferenti f'każijiet individwali ta' trasferiment, abbażi tal-obbligu ta' kooperazzjoni leali bejn l-Istati Membri, inkluż biex jiġi żgurat li l-persuna tkun se tiġi akkomodata kif xieraq skont l-istandards stabbiliti fid-Direttiva 2013/33/UE u li t-talba tagħha tiġi pproċessata skont id-Direttiva 2013/32/UE. Dan se jkun jeħtieġ li l-Greċja tipprovdi assigurazzjonijiet speċifiċi fir-rigward ta' kull individwu li għandu jiġi ttrasferit rigward il-mod li bih hu se jiġi ttrattat. Barra minn hekk, jenħtieġ li jitwaqqaf mekkaniżmu ta' appoġġ u rapportar li jikkonsisti f'tim tal-EASO ta' esperti mill-Istati Membri li jassisti fl-iżgurar li dawn l-istandards jiġu applikati fil-prattika fir-rigward tal-persuni ttrasferiti.

(37)

Rappurtar regulari mill-Greċja dwar il-progress li qed isir fl-implimentazzjoni ta' dawn l-azzjonijiet huwa essenzjali sabiex tiġi żgurata l-implimentazzjoni sħiħa ta' din ir-Rakkomandazzjoni. Għaldaqstant, jenħtieġ li il-Greċja tipprovdi l-ewwel rapport sal-15 ta' Frar 2017 kif stipulat f'din ir-Rakkomandazzjoni li għandu jinkludi b'mod partikolari deskrizzjoni ta' kif l-awtoritajiet Griegi qed ipoġġu fis-seħħ il-proċedura għall-għoti ta' garanziji f'każijiet individwali ta' trasferiment fir-rigward tal-leġiżlazzjoni rilevanti tal-UE. Minn dak iż-żmien 'il quddiem, il-Greċja għandha tirrapporta kull xahrejn dwar l-implimentazzjoni ta' din ir-Rakkomandazzjoni.

(38)

Fuq il-bażi ta' dawn ir-rapporti u kull informazzjoni rilevanti oħra għad-dispożizzjoni tagħha jew żviluppi oħrajn, il-Kummissjoni se tirrapporta regolarment dwar il-progress li jkun sar fl-implimentazzjoni ta' din ir-Rakkomandazzjoni u taġġorna, fejn meħtieġ, ir-Rakkomandazzjonijiet stabbiliti fiha.

(39)

Ir-responsabbiltà ta' teħid ta' deċiżjoni dwar it-tkomplija tat-trasferimenti f'każijiet individwali taqa' esklussivament f'idejn l-awtoritajiet tal-Istati Membri taħt il-kontroll tal-qrati, li jistgħu jagħmlu referenzi preliminari lill-Qorti tal-Ġustizzja Ewropea dwar l-interpretazzjoni tar-Regolament ta' Dublin.