(1)

Ir-Regolament (KE) Nru 178/2002 jistabbilixxi l-prinċipji ġenerali li b'mod ġenerali jirregolaw l-ikel u l-għalf, u b'mod partikolari jirregolaw is-sikurezza tal-ikel u tal-għalf, fil-livell tal-Unjoni u f'dak nazzjonali. Dan jistipula l-miżuri ta' emerġenza meta jkun jidher ċar li xi ikel jew għalf impurtat minn pajjiż terz x'aktarx ikun jikkostitwixxi riskju serju għas-saħħa tal-bniedem, għas-saħħa tal-annimali, jew għall-ambjent, u li l-miżuri li jieħdu l-Istati Membri ma jkunux biżżejjed biex jikkontrollaw sew dan ir-riskju.

(2)

Id-Direttiva tal-Kunsill 96/23/KE (2) tistipula li l-proċess tal-produzzjoni tal-annimali u tal-prodotti bażiċi ta' oriġini mill-annimali għandu jiġi ssorveljat għall-preżenza ta' ċerti residwi u sustanzi fl-annimali ħajjin, fl-eskrement tagħhom u fil-fluwidi u t-tessut ta' ġisimhom, fil-prodotti mill-annimali, fl-għalf u fl-ilma tax-xorb tagħhom.

(3)

Id-Deċiżjoni tal-Kummissjoni 2010/381/UE (3) tistipula li mill-inqas 10 % tal-konsenji tal-prodotti tal-akkwakultura mill-Indja maħsubin għall-konsum mill-bniedem għandhom jiġu ttestjati għall-preżenza ta' sustanzi attivi farmakoloġikament kif iddefinit fl-Artikolu 2(a) tar-Regolament (KE) Nru 470/2009 tal-Parlament Ewropew u tal-Kunsill (4), u b'mod partikolari għall-kloramfenikol, għat-tetraċiklina, għall-ossitetraċiklina u l-klortetraċiklina, u għall-metaboliti tan-nitrofurani.

(4)

Ir-riżultati tat-testijiet analitiċi li twettqu minn laboratorji tal-kontroll uffiċjali juru li, rigward il-preżenza ta' residwi tal-kloramfenikol, tat-tetraċiklina, tal-ossitetraċiklina, tal-klortetraċiklina u tal-metaboliti tan-nitrofurani, il-livell ta' konformità tal-prodotti tal-akkwakultura maħsuba għall-konsum mill-bniedem ġejjin mill-Indja mhuwiex sodisfaċenti.

(5)

Ir-riżultati ta' spezzjoni fl-Indja li twettqet mis-servizzi tal-ispezzjoni tal-Kummissjoni f'Marzu tal-2014 ikkonfermaw li l-garanziji Indjani dwar l-istatus tar-residwi fil-prodotti tal-akkwakultura jiddependu ħafna mill-programmi tal-ittestjar addizzjonali stabbiliti li jsiru qabel il-ġbir u qabel l-esportazzjoni tal-prodotti, u dawn sa ċertu punt itaffu d-defiċjenzi li ilhom jeżistu fil-kontrolli uffiċjali li jsiru fl-istabbilimenti tal-akkwakultura, u b'mod partikolari l-kontrolli uffiċjali xejn sodisfaċenti li jsiru fuq l-użu tal-prodotti mediċinali veterinarji. Madankollu, il-firxa relattivament żgħira tas-sustanzi li jsiru t-testijiet għalihom f'dawk il-programmi addizzjonali, iddgħajjef l-affidabbiltà ta' dawk il-garanziji. Sa issa, ir-rakkomandazzjonijiet fir-rapport tal-ispezzjoni dwar il-monitoraġġ uffiċjali tal-istabbilimenti tal-akkwakultura għadhom ma ġewx indirizzati b'mod sodisfaċenti.

(6)

Jixraq li l-miżuri tad-Deċiżjoni 2010/381/UE rigward il-prodotti kollha tal-akkwakultura maħsubin għall-konsum mill-bniedem li jiġu impurtati mill-Indja jiġu addattati. L-obbligu li l-ittestjar għandu jsir b'mod vinkolanti għandu jissaħħaħ, biex jiskoraġġixxi lill-produtturi Indjani milli jużaw is-sustanza rilevanti b'mod ħażin u biex jitnaqqsu kemm jista' jkun ir-riskji għas-saħħa tal-bniedem fl-Unjoni Ewropea.

(7)

Wara l-implimentazzjoni tas-sistema kompjuterizzata veterinarja integrata (“Traces”) bi qbil mal-Artikolu 3 tad-Deċiżjoni tal-Kummissjoni 2004/292/KE (5), u bl-użu mtejjeb tal-modulu dwar l-importazzjoni fit-Traces, rigward l-informazzjoni dwar ir-riżultati tat-testijiet tal-laboratorji, l-Istati Membri għandhom ikunu eżentati mill-obbligi ta' rapportar trimestrali li hemm stipulatili hemm stipulati fl-Artikolu 5(2) tad-Deċiżjoni 2010/381/UE.

(8)

Għalhekk, id-Deċiżjoni 2010/381/UE għandha tiġi emendata skont dan.

(9)

Il-miżuri previsti f'din id-Deċiżjoni huma konformi mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

(1)

Fl-Artikolu 3, il-paragrafu 1 huwa sostitwit b'dan li ġej:

(2)

Fl-Artikolu 5, tħassar il-paragrafu 2.