20.12.2011   

MT

Il-Ġurnal Uffiċjali tal-Unjoni Ewropea

L 336/81

(1)

Bosta Stati Membri jimponu taxxi meta tmut persuna, b’mod partikolari taxxi fuq il-wirt u l-proprjetà filwaqt li xi Stati Membri jistgħu jintaxxaw il-wirt u l-proprjetà taħt intestaturi oħra tat-taxxa, bħat taxxa fuq id-dħul. It-taxxi kollha li japplikaw meta tmut persuna minn hawn ‘il quddiem huma msejħa taxxi fuq il-wirt.

(2)

Bosta Stati Membri li jimponu taxxi fuq il-wirt jimponu wkoll taxxi fuq donazzjonijiet bejn persuni ħajjin.

(3)

L-Istati Membri jistgħu jintaxxaw il-wirt fuq il-bażi ta’ fatturi ta’ “konnessjoni” li jvarjaw. Huma jistgħu jagħmlu dan fuq il-bażi ta’ rabta personali bħar-residenza, id-domiċilju jew in-nazzjonalità tal-mejjet, jew ir-residenza, id-domiċilju jew in-nazzjonalità tal-werriet, jew fuq il-bażi tat-tnejn. Xi Stati Membri jistgħu japplikaw aktar minn wieħed minn dawn il-fatturi jew jistgħu japplikaw miżuri kontra l-abbuż li jinvolvu kunċett estiż tad-domiċilju jew tar-residenza għall-finijiet tat-taxxa.

(4)

Barra mit-tassazzjoni fuq il-bażi ta’ rabta personali, l-Istati Membri jistgħu jimponu taxxa fuq il-wirt fuq assi li jkunu jinsabu fil-ġuriżdizzjoni tagħhom. It-taxxa tista’ tiġi applikata fuq din il-bażi anki jekk la l-mejjet u lanqas il-werriet ma jkollhom rabta personali mal-pajjiż fejn ikunu jinsabu l-assi.

(5)

Hemm dejjem aktar ċittadini tal-Unjoni li matul ħajjithom qed jiċċaqilqu minn pajjiż għal ieħor fi ħdan l-Unjoni biex jgħixu, jistudjaw, jaħdmu u jirtiraw, u li qed jixtru proprjetà u jinvestu f’assi f’pajjiżi li mhumiex il-pajjiżi ta’ oriġini tagħhom.

(6)

Meta dawn il-każijiet jirriżultaw f’wirt transkonfinali mal-mewt ta’ individwu, aktar minn Stat Membru wieħed jista’ jkollhom id-dritt li jimponu taxxi tal-wirt fuq dawk il-laxxiti.

(7)

Jeżistu ftit konvenzjonijiet bilaterali bejn l-Istati Membri dwar l-eżenzjoni mill-ħlas ta’ taxxa doppja jew multipla fuq il-wirt.

(8)

Il-biċċa l-kbira tal-Istati Membri jipprevedu, permezz ta’ leġiżlazzjoni jew ta’ prattiki amministrattivi adottati unilateralment fil-livell nazzjonali, eżenzjoni mill-ħlas ta’ taxxa doppja fil-każ ta’ taxxi barranin fuq il-wirt.

(9)

Madankollu, ġeneralment hemm limitazzjonijiet fuq dawn is-sistemi nazzjonali ta’ eżenzjoni fil-każ ta’ taxxi barranin fuq il-wirt. B’mod partikolari, dawn għandhom kamp ta’ applikazzjoni limitat f’dak li jirrigwarda t-taxxi u l-persuni koperti. Huma jistgħu ma jippermettux li jingħata kreditu għal taxxi fuq id-donazzjonijiet preċedentement imħallsa fuq l-istess wirt jew għal taxxi imposti fil-livell lokali jew reġjonali pjuttost milli fil-livell nazzjonali, jew għat-taxxi kollha imposti minn pajjiżi oħrajn mal-mewt. Jistgħu jagħtu eżenzjoni biss fil-każ ta’ taxxi barranin imħallsa fuq proprjetà barranija partikolari. Jistgħu ma jagħtux eżenzjoni fil-każ ta’ taxxa barranija fuq proprjetà li tkun tinsab f’pajjiż li ma jkunx dak tal-eredi jew tal-mejjet. Jistgħu jeskludu t-taxxa barranija fuq assi li jkunu jinsabu fit-territorju tal-Istat Membru li jagħti l-eżenzjoni. Is-sistemi nazzjonali ta’ eżenzjoni jistgħu wkoll ma jirnexxux għaliex huma ma jqisux id-differenzi li hemm bejniethom u bejn ir-regoli dwar it-taxxa fuq il-wirt fi Stati Membri oħrajn, b’mod partikolari dwar dak li għandu jiġi kkunsidrat bħala assi lokali meta mqabbel ma’ assi barranija u dwar meta jseħħ it-trasferiment tal-assi u d-data meta tkun dovuta t-taxxa. Finalment, l-eżenzjoni mit-taxxa tista’ tkun suġġetta għad-diskrezzjoni tal-awtorità kompetenti u għaldaqstant ma tistax tiġi ggarantita.

(10)

In-nuqqas ta’ modi xierqa ta’ kif jista’ jkun hemm eżenzjoni mill-akkumulazzjoni ta’ tassazzjoni fuq il-wirt tista’ twassal għal livelli globali ta’ tassazzjoni li jkunu apprezzabbilment ogħla minn dawn applikabbli f’sitwazzjonijiet li jkunu purament interni għal xi wieħed mill-Istati Membri involuti.

(11)

Dan jista’ jfixkel liċ-ċittadini tal-UE milli jgawdu kompletement mid-dritt tagħhom li jiċċaqilqu u li joperaw liberament b’mod transkonfinali fi ħdan l-Unjoni. Jista’ wkoll joħloq diffikultajiet għat-trasferiment tan-negozji ż-żgħar meta jmutu l-proprjetarji.

(12)

Filwaqt li d-dħul mit-taxxi fuq il-wirt jirrappreżenta sehem relattivament żgħir mid-dħul globali tat-taxxa tal-Istati Membri u l-każijiet transkonfinali waħidhom jammontaw għal sew inqas, it-taxxa doppja fuq il-wirt jista’ jkollha impatt maġġuri fuq l-individwi affettwati.

(13)

Bħalissa t-taxxa doppja fuq il-wirt mhijiex qed tiġi riżolta b’mod sistematiku fil-livell nazzjonali jew f’dak bilaterali, jew fuq il-bażi tal-liġi tal-Unjoni. Sabiex jiġi żgurat li s-Suq Intern jiffunzjona bla problemi, għandha tiġi inkoraġġuta sistema aktar globali għall-għoti ta’ eżenzjoni minn taxxa doppja fuq il-wirt f’każijiet transkonfinali.

(14)

Għandu jiġi pprovdut ordni ta’ prijorità ta’ min għandu dritt li jintaxxa, jew inkella ta’ min għandu jagħti eżenzjoni fil-każijiet fejn żewġ Stati Membri jew aktar japplikaw taxxi fuq il-wirt għall-istess wirt.

(15)

Bħala regola ġenerali, u skont il-prattika li hija l-aktar segwita fil-livell internazzjonali, l-Istati Membri li fihom ikunu jinsabu l-proprjetà immobbli u l-proprjetà tan-negozju ta’ stabbiliment permanenti għandhom, bħala l-Istat bl-aktar rabta mill-qrib, ikollhom id-dritt primarju li japplikaw it-taxxa fuq il-wirt fuq proprjetà bħal din.

(16)

Peress li huwa faċli li jinbidel il-post fejn tkun tinsab proprjetà mobbli li ma tkunx proprjetà tan-negozju ta’ stabbiliment permanenti, il-konnessjoni tagħha mal-Istat Membri fejn tinzerta li tkun tinstab fil-ħin tal-mewt hija ġeneralment ħafna inqas mill-qrib mir-rabtiet personali li l-mejjet jew l-eredi jista’ jkollhom ma’ Stat Membru ieħor. L-Istat Membru fejn tkun tinsab proprjetà mobbli bħal din għandu għalhekk jeżenta dil-proprjetà mit-tassazzjoni tiegħu fuq il-wirt jekk din it-tassazzjoni tiġi applikata mill-Istat Membru li miegħu il-mejjet u/jew l-eredi jkollhom rabta personali.

(17)

Il-wirt ta’ spiss jakkumula tul il-ħajja tal-mejjet. Barra minn dan, jekk ikunu involuti Stati Membri differenti, hemm iktar possibbiltà li l-assi li jkunu jagħmlu parti mill-wirt ikunu jinsabu fl-Istat Membru li miegħu il-mejjet ikollu rabtiet personali milli fl-Istat Membru li miegħu l-eredi jkollu dawn ir-rabtiet. Fit-tassazzjoni tal-wirt fuq il-bażi ta’ rabtiet personali mat-territorju tagħhom, il-maġġoranza tal-Istati Membri jirreferu għar-rabtiet li jkollu l-mejjet pjuttost minn dawk li jkollu l-eredi, għalkemm bost minnhom jintaxxaw ukoll jew jintaxxaw biss jekk l-eredi jkollu rabta personali mat-territorju tagħhom. Minħabba din in-natura u l-importanza tar-rabtiet personali tal-mejjet kif ukoll għal raġunijiet prattiċi, it-taxxa doppja li tirriżulta mill-fatt li l-mejjet u l-eredi jkollhom rabtiet personali ma’ Stati Membri differenti għandha tkun suġġetta għal eżenzjoni mill-Istat Membru li miegħu l-eredi jkollu rabtiet personali.

(18)

Il-kunflitti minħabba r-rabtiet personali ma’ bosta Stati Membri jistgħu jiġu riżolti fuq il-bażi ta’ proċedura ta’ ftehim komuni li tinvolvi regoli determinanti biex tiġi stabbilita l-aktar rabta personali mill-qrib.

(19)

Peress li ż-żmien meta tiġi applikata t-taxxa fuq il-wirt jista’ jvarja fost l-Istati Membri involuti u peress li l-każijiet b’elementi transkonfinali jistgħu jieħdu żmien sinifikattivament itwal biex jiġu riżolti meta mqabbla ma’ każijiet domestiċi ta’ taxxa fuq il-wirt minħabba l-ħtieġa li wieħed jittratta ma’ aktar minn sistema legali u/jew tat-taxxa waħda, l-Istati Membri għandhom jippermettu li jkun hemm perjodu raġonevoli ta’ żmien biex isiru talbiet għal eżenzjoni mit-taxxa.

(20)

Din ir-Rakkomandazzjoni tippromwovi d-drittijiet fundamentali rikonoxxuti b’mod partikolari mill-Karta tad-Drittijiet Fundamentali tal-Unjoni Ewropea, bħad-dritt għall-proprjetà (l-Artikolu 17), li jiggarantixxi speċifikament id-dritt li wieħed jiddisponi minn proprjetà li jkun akkwista legalment, il-libertà tal-intrapriża (l-Artikolu 16) u l-libertà taċ-ċittadini tal-UE ta’ moviment liberu fi ħdan l-UE (l-Artikolu 45).

(a)

“taxxa fuq il-wirt” tfisser kull taxxa imposta fil-livell nazzjonali, federali, reġjonali jew lokali mal-mewt, irrispettivament minn isem it-taxxa, mill-mod kif it-taxxa tiġi imposta u mill-persuna li għaliha tapplika t-taxxa, inklużi b’mod partikolari, taxxa fuq il-proprjetà, taxxa fuq il-wirt, taxxa fuq trasferimenti, dazju fuq trasferimenti, taxxa tal-boll, taxxa fuq id-dħul u taxxa fuq il-qligħ kapitali;

(b)

“eżenzjoni mit-taxxa” tfisser dispożizzjoni li tkun tinsab f’leġiżlazzjoni, f’istruzzjonijiet amministrattivi jew fi gwida amministrattiva li permezz tagħha Stat Membru jagħti eżenzjoni minn taxxa fuq il-wirt imħallsa fi Stat Membru ieħor, billi jagħti kreditu għat-taxxa barranija li jitnaqqas mit-taxxa dovuta f’dak l-Istat Membru, billi jeżenta l-wirt jew parti minnu mit-tassazzjoni f’dak l-Istat Membru bħala rikonoxximent tat-taxxa barranija mħallsa, jew billi b’xi mod ieħor jonqos milli jimponi t-taxxa fuq il-wirt;

(c)

“assi” tfisser kull proprjetà mobbli u/jew immobbli u/jew drittijiet li huma suġġetti għat-taxxa fuq il-wirt;

(d)

“rabta personali” tirreferi għar-raba tal-mejjet jew tal-eredi ma’ Stat Membru, li tista’ tkun ibbażata fuq id-domiċilju, ir-residenza, ir-residenza permanenti, iċ-ċentru tal-interessi vitali, ir-residenza abitwali, in-nazzjonalità jew iċ-ċentru tal-ġestjoni effettiva;

(a)

proprjetà immobbli li tkun tinsab f’dak l-Istat Membru l-ieħor;

(b)

proprjetà mobbli li tkun proprjetà tan-negozju ta’ stabbiliment permanenti li jkun jinsab f’dak l-Istat Membru l-ieħor.

4.4.1.

Ir-rabta personali aktar mill-qrib ta’ individwu għandha tiġi ddeterminata kif ġej:

4.4.2.

Fil-każ ta’ persuna li ma tkunx individwu, bħal istituzzjoni karitatevoli, ir-rabta personali aktar mill-qrib tagħha tista’ titqies li tkun mal-Istat Membru fejn ikollha l-post tal-ġestjoni effettiva tagħha.