ANNESS

1.   Għan

L-għan ġenerali ta’ din id-Deċiżjoni huwa li tappoġġa l-proċess preparatorju li jwassal għall-Konferenza tan-NU dwar it-TKA biex jiġi żgurat li huwa inklużiv kemm jista’ jkun u li kapaċi jagħmel rakkomandazzjonijiet konkreti dwar l-elementi tat-TKA futur, u li tappoġġa lill-Istati Membri tan-NU fl-iżvilupp u t-titjib tal-għarfien espert nazzjonali u reġjonali biex jiġu implimentati kontrolli effettivi fuq l-esportazzjoni u t-trasferiment tal-armi.

2.   Deskrizzjoni tal-proġett

2.1.   Għan tal-proġett

Il-proġett għandu l-għan li jilħaq l-objettivi speċifiċi li ġejjin:

(a)

jappoġġa l-proċess preparatorju li jwassal għall-Konferenza tan-NU dwar Trattat dwar it-TKA, inkluż permezz ta’: (i) iż-żieda tas-sensibilizzazzjoni, l-għarfien u l-intendiment tal-proċess TKA fost l-Istati Membri tan-NU, is-soċjetà ċivili u r-rappreżentanti tal-industrija; (ii) il-promozzjoni ta’ parteċipazzjoni inklużiva, attiva u effettiva tal-akbar numru possibbli ta’ Stati Membri tan-NU fil-Kumitat Preparatorju li għandu jsir fl-2010-2011; (iii) l-identifikazzjoni u l-formulazzjoni ta’ proposti konkreti dwar il-kontenut ta’ TKA, inklużi l-aktar kamp ta’ applikazzjoni, parametri u implikazzjonijiet komprensivi; (iv) il-promozzjoni, fost il-pajjiżi terzi, tal-ogħla standards possibbli għat-TKA, anke abbażi tal-esperjenzi u l-istrumenti reġjonali; (v) ppoġġ tat-tħejjija tal-Konferenza tal-2012 bit-tisħiħ tal-kapaċitajiet ta’ negozjar tal-parteċipanti.

(b)

appoġġa l-pajjiżi terzi fl-isforzi tagħhom li jistabbilixxu, itejbu u jimplimentaw, kif adatt, is-sistemi ta’ kontroll fuq l-esportazzjoni u t-trasferiment, inkluż permezz ta’: (i) l-assistenza fl-istabbiliment u t-tisħiħ tas-sistemi ta’ liċenzji; (ii) l-assistenza fit-titjib tal-konformità mal-kontrolli nazzjonali li jimplimentaw TKA futur u l-infurzar tagħhom, inklużi l-kontrolli tal-fruntieri, u l-monitoraġġ fuq l-esportazzjonijiet u t-trasferimenti tal-armi; (iii) l-appoġġ għall-iżvilupp ta’ rapporti nazzjonali u reġjonali dwar l-esportazzjonijiet u l-importazzjonijiet ta’ armi sabiex jiġu promossi t-trasparenzi u r-responsabbiltà tal-kummerċ tal-armi; (iv) l-appoġġ għal aktar trasparenza u responsabbiltà tal-kummerċ tal-armi permezz tal-parteċipazzjoni fir-Reġistru tan-NU dwar l-Armi Konvenzjonali (UN ROCA); (v) l-assistenza għall-isforzi nazzjonali biex jiġu mmarkati u rintraċċati armi żgħar u armamenti ħfief (SALW).

2.2.   Riżultati tal-Proġett

L-implimentazzjoni tal-proġett ser tirriżulta fi:

(a)	aktar sensibbilizzazzjoni, għarfien u fehim tal-proċess tat-TKA mill-Istati Membri tan-NU;

(b)	parteċipazzjoni usa’ u aktar sostantiva tal-Istati Membri tan-NU fil-Kumitat Preparatorju li għandu jsir fl-2010-2011, inkluż permezz tal-formulazzjoni ta’ proposti konkreti dwar il-kontenut ta’ TKA li għandu jirrifletti l-aktar kamp ta’ applikazzjoni komprensiv u l-ogħla standards possibbli;

(c)

aktar sensibbilizzazzjoni mill-pajjiżi terzi dwar l-istruttura u l-funzjonament tas-sistemi ta’ kontroll fuq l-esportazzjoni tal-armi konvenzjonali, inkluż permezz ta’ appoġġ li jimmira għat-titjib tal-konformità mal-kontrolli nazzjonali li jimplimentaw TKA futur u l-infurzar tiegħu, inklużi l-kontrolli tal-fruntieri, u l-monitoraġġ tal-esportazzjonijiet u t-trasferimenti tal-armi;

(d)	it-titjib taż-żamma tar-reġistri u l-kontabbiltà tal-armi, inkluż permezz ta’ marki u rintraċċar u l-preżentazzjoni nazzjonali lir-Reġistru tan-NU dwar l-Armi Konvenzjonali (UN ROCA) u kapaċitajiet nazzjonali mtejbin fil-kontrolli fuq l-esportazzjoni fost stati parteċipanti.

2.3.   Deskrizzjoni tal-attivitajiet

Il-proġett jipprevedi l-organizzazzjoni ta’ seba’ seminars reġjonali, avveniment ta’ tnedija u ta’ konklużjoni, sa tliet avvenimenti sekondarji u t-tqassim tar-riżultati.

Is-seminars reġjonali ser isiru matul tlett ijiem f’post li għandu jiġi ddeterminat fir-reġjuni ta’ mira.

2.3.1   Struttura tas-seminars reġjonali

Is-seminars ser jinkludu l-preżentazzjonijiet u d-diskussjonijiet li ġejjin:

L-ewwel parti [JUM 1 u JUM 2 (l-ewwel nofs)]: (a) ħarsa ġenerali tat-TKA, sfond, kamp ta’ applikazzjoni possibbli u parametri, eċċ...; (b) opinjonijiet nazzjonali u reġjonali dwar it-TKA, inkluża preżentazzjoni tal-opinjoni tal-Unjoni dwar TKA; (c) aspetti oħrajn tat-TKA, inklużi miżuri ta’ trasparenza u assistenza; (d) formulazzjoni ta’ rakkomandazzjonijiet għall-ħidma tas-sessjonijiet tal-Kumitat Preparatorju.

It-tieni parti [JUM 2 (it-tieni nofs) u JUM 3]: (a) preżentazzjoni ta’ sistemi nazzjonali u reġjonali tal-kontroll fuq il-kummerċ tal-armi konvenzjonali, inkluża l-Pożizzjoni Komuni tal-Kunsill 2008/944/PESK tat-8 ta’ Diċembru 2008 li tiddefinixxi regoli komuni li jirregolaw il-kontroll tal-esportazzjonijiet ta’ teknoloġija u apparat militari (1); (b) aspetti tal-istabbiliment u l-infurzar tas-sistemi ta’ liċenzji, inkluż l-aspetti legali u amministrattiv; (c) aspetti tal-konformità mal-kontrolli nazzjonali li jimplimentaw TKA futur u l-infurzar tagħhom, inklużi l-kontrolli tal-fruntieri, u l-monitoraġġ tal-esportazzjonijiet u t-trasferimenti u l-esportazzjonijiet tal-armi; (d) aspetti taż-żamma tar-reġistri u l-kontabbiltà tal-armi, inklużu rapporti nazzjonali u reġjonali dwar it-trasferimenti tal-armi; (e) rwol u funzjonament tal-UN ROCA, inkluża assistenza fil-preżentazzjoni ta’ rapporti nazzjonali lir-Reġistru; (f) strumenti internazzjonali u nazzjonali biex jiġu mmarkati u s-SALW u assistenza għall-implimentazzjoni tagħhom.

Is-seminars ta’ tliet ijiem ser jinkludu sessjonijiet ta’ gruppi ta’ ħidma dwar aspetti speċifiċi ta’ TKA.

2.3.2.   Parteċipanti fis-seminars

Parteċipanti għal dawn is-seminars reġjonali jinkludu:

(a)	persunal diplomatiku u militari/tad-difiża minn pajjiżi fir-reġjuni, partikolarment awtoritajiet responsabbli għal-linji ta’ politika nazzjonali rigward it-TKA, inklużi delegati nazzjonali li jipparteċipaw fil-Kumitat Preparatorju tat-TKA;

(b)	persunal tekniku u tal-infurzar tal-liġi minn pajjiżi fir-reġjuni, partikolarment awtoritajiet ta’ kontroll fuq l-esportazzjoni, tad-dwana u uffiċjali tal-infurzar tal-liġi (żewġ parteċipanti għal kull pajjiż);

(c)	rappreżentanti minn organizzazzjonijiet internazzjonali u reġjonali, organizzazzjonijiet mhux governamentali (NGOs) ibbażati reġjonalment, gruppi ta’ riflessjoni u industrija lokali/reġjonali;

(d)	rappreżentanti mill-UNIDIR u l-Uffiċċju tan-Nazzjonijiet Uniti għall-Affarijiet tad-Diżarmament (UNODA); (il-Fergħa għall-Armi Konvenzjonali u l-Fergħa Reġjonali, inklużi ċ-ċentri reġjonali, kif adatt);

(e)	esperti nazzjonali u internazzjonali tekniċi dwar l-aspetti tal-kontrolli fuq l-esportazzjonijiet tal-armi konvenzjonali, inklużi esperti tal-Unjoni u rappreżentanti tal-industrija.

Skont id-daqs tar-reġjuni, hu mistenni li f’kull seminar ser ikun hemm parteċipazzjoni ta’ bejn 45 u 80 parteċipant. Uffiċjali diplomatiku jew militari wieħed għal kull stat mistieden ser jipparteċipa fl-ewwel parti ta’ kull seminar, filwaqt li uffiċjal tekniku u tal-infurzar tal-liġi wieħed għal kull stat mistieden ser jattendi t-tieni parti. L-għażla tal-pajjiżi li għandhom ikunu mistiedna għal kull seminar u l-parteċipanti ser issir mir-RGħ, f’konsultazzjoni mal-korpi kompetenti tal-Kunsill, abbażi ta’ proposta li ssir mill-UNIDIR.

Il-parteċipazzjoni tal-esperti tal-Unjoni fis-seminar għandha tkun żgurata f’livell adegwat, f’termini kemm ta’ għarfien espert tekniku kif ukoll politiku.

2.3.3.   Kontribut: Komponent ta’ riċerka

Biex jiġi żgurat kontribut infurmat sew, sostantiv u f’waqtu għall-proċess tan-NU, huwa meħtieġ komponent qawwi ta’ riċerka. L-UNIDIR ser jikkummissjona sa 12-il dokument ta’ riċerka tal-isfond mingħand istituti ta’ riċerka kompetenti jew esperti individwali, waqt li jiġu ffukati xi aspetti prinċipali relevanti tal-proġett u tas-seminars reġjonali. L-UNIDIR għandu jipproponi lir-RGħ lista konċiża ta’ istituti ta’ riċerka possibbli jew esperti individwali li jkollhom sfond sod fi kwistjonijiet speċifiċi ta’ TKA. Ir-RGħ għandu jagħżel dawk l-aktar adatti abbażi tal-lista konċiża u f’konsultazzjoni mal-korpi kompetenti tal-Kunsill.

2.3.4.   Distribuzzjoni reġjonali tas-seminars

Is-seminars reġjonali għandhom isiru skont ir-raggruppamenti li ġejjin:

(a)	seminar għall-Amerika Latina u l-Karibew;

(b)	seminar għal-Lvant Nofsani;

(c)	seminar għall-Afrika ta’ Fuq, Ċentrali u tal-Punent;

(d)	seminar għall-Afrika tal-Lvant u t’Isfel;

(e)	seminar għall-Asja tal-Lvant u l-Paċifiku;

(f)	seminar għall-Asja Ċentrali u tan-Nofsinhar;

(g)	seminar għar-reġjun “Ewropa Usa’”.

Postijiet issuġġeriti tentattivament għas-seminars huma:

(a)	Buenos Aires jew Rio de Janeiro għall-Amerika Latina u l-Karibew;

(b)	il-Kajr jew Bejrut għal-Lvant Nofsani;

(c)	Rabat jew Akkra għall-Afrika ta’ Fuq, Ċentrali u tal-Punent;

(d)	Nairobi jew Johannesburg għall-Afrika tal-Lvant u t’Isfel;

(e)	Jakarta jew Pekin għall-Asja tal-Lvant u l-Paċifiku;

(f)	New Dehli jew Astana għall-Asja Ċentrali u tan-Nofsinhar;

(g)	Moska jew Belgrad għar-reġjun “Ewropa Usa’”.

Il-postijiet finali ser jiġu ddeterminati biex jiġu mmassimizzati r-riżorsi, tiġi minimizzata l-marka tal-karbonju u abbażi tal-assistenza disponibbli fil-livell lokali. L-UNIDIR ser jipproponi rakkomandazzjonijiet raġunati dwar il-postijiet, għal konsiderazzjoni u approvazzjoni mir-RGħ f’konsultazzjoni mal-korpi kompetenti tal-Kunsill.

2.3.5.   Avvenimenti ta’ tnedija u ta’ konklużjoni

Għandu jsir avveniment ta’ tnedija tul jum wieħed biex jiġu preżentati l-għanijiet tal-proġett lill-komunità internazzjonali u biex jiġu mfittxija kontributi mis-soċjetà ċivili, ir-riċerkaturi u l-NGOs biex jiġi żgurat appoġġ għall-proġett. Għandu jkun organizzat avveniment ta’ konklużjoni ta’ jum wieħed biex jiġu ppreżentanti r-riżultati tal-proġett. Il-postijiet finali għal dawn l-avvenimenti għandhom ikunu ddeterminati skont il-proċedura prevista għall-għażla tal-postijiet għas-seminars reġjonali. L-avveniment ta’ tnedija jista’ jsir fil-marġini tal-Kumitat Preparatorju ta’ Lulju 2010, skont id-data tal-adozzjoni ta’ din id-Deċiżjoni.

2.3.6.   Avvenimenti sekondarji

L-ewwel avveniment sekondarju għandu jiġi organizzat fil-marġini tal-Ewwel Kumitat (il-65 laqgħa tal-Assemblea Ġenerali tan-NU) f’Ottubru 2010 biex tiżdied is-sensibbilizzazzjoni tal-partijiet interessati fi New York dwar il-proġett u biex jiġu diskussi xi elementi sostanzjali konkreti rilevanti għall-proċess tat-TKA.

It-tieni avveniment sekondarju għandu jsir fir-raba’ sessjoni tal-Kumitat Preparatorju tat-TKA mlaqqa’ fi New York, li għandha ssir fl-2011 biex il-partijiet interessati miġbura fi New York jiġu ppreżentati bir-riżultati tal-proġett miksuba sa dakinhar.

F’Ottubru 2001 ser jiġi organizzat it-tielet avveniment sekondarju fil-marġini tal-Ewwel Kumitat (is-66 laqgħa tal-Assemblea Ġenerali tan-NU) biex jiġu ppreżentati r-riżultati tal-proġett sa dakinhar lill-partijiet interessati kollha mlaqqgħin fi New York.

2.4.   Outputs - Disseminazzjoni

RAPPORTI-PUBBLIKAZZJONI

Kull seminar u avveniment għandhom jipproduċu rapport sommarju qasir tad-diskussjonijiet u tar-rakkomandazzjonijiet u l-ideat imressqa għal TKA u tal-aspetti tekniċi diskussi. Ir-rapporti tas-seminar, miktuba bl-Ingliż, għandhom ikunu disponibbli online u fuq mezzi ta’ ħżin ta’ data elettroniċi għad-distribuzzjoni.

Abbozz tar-rapport finali li janalizza r-rapporti sommarji tas-seba’ laqgħat reġjonali u avvenimenti oħrajn inklużi fil-proġett għandu jkun prodott u ppreżentat għall-kummenti waqt is-seminar ta’ konklużjoni. Ir-rapport finali għandu jkun disponibbli online u fuq mezzi ta’ ħżin ta’ data elettroniċi għad-distribuzzjoni. Pubblikazzjoni li tagħmel sommarju tar-rapport finali għandha ssir disponibbli online u f’kopji stampati.

3.   Tul ta’ żmien

Il-perijodu ta’ implimentazzjoni tal-proġett huwa ta’ 24 xahar wara d-data tal-konklużjoni tal-ftehim ta’ finanzjament imsemmi fl-Artikolu 3(3).

4.   Benefiċjarji

Il-benefiċjarji ta’ dan il-proġett għandhom ikunu l-Istati Membri tan-NU, b’enfasi partikolari fuq l-awtoritajiet tal-istat responsbbli għall-istabbiliment ta’ linji ta’ politika nazzjonali rigward it-TKA, awtoritajiet ta’ kontrolli fuq l-esportazzjoni, tad-dwana u uffiċjali tal-infurzar tal-liġi li jeħtieġu li jsaħħu l-għarfien espert tagħhom sabiex jiżguraw kummerċ tal-armi responsabbli u jipprevjenu proliferazzjoni irresponsabbli ta’ armi konvenzjonali fil-qafas ta’ TKA futur. L-għażla tal-benefiċjari tal-istat speċifiċi ser ssir abbażi ta’ lista konċiża ta’ benefiċjarji proposta mill-UNIDIR għall-konsiderazzjoni u l-approvazzjoni mir-RGħ, f’konsultazzjoni mal-korpi kompetenti tal-Kunsill.

5.   Entità ta’ implimentazzjoni

L-implimentazzjoni teknika ta’ din id-Deċiżjoni ser tkun fdata lill-UNIDIR. L-UNIDIR għandu jwettaq il-kompitu tiegħu taħt ir-responsabbiltà tar-RGħ. L-UNIDIR għandu jikkoopera mal-UN-ODA u l-membri tal-Uffiċċju tal-Kumitati Preparatorji għall-Konferenza tan-NU dwar TKA.

L-UNIDIR għandu, fejn adegwat, jaħdem ma’ istituzzjonijiet bħall-organizzazzjonijiet reġjonali, il-gruppi ta’ riflessjoni, l-NGOs u l-industrija. L-UNIDIR għandu jiżgura l-viżibbiltà tal-kontribuzzjoni tal-Unjoni, adatta għad-daqs tagħha.

---

(1)   ĠU L 335, 13.12.2008, p. 99.