“L-ANNESS XIII

Linji gwida speċifiċi għal attività partikolari għad-determinazzjoni ta’ emissjonijiet ta’ ossidu nitruż (N2O) mill-produzzjoni ta’ aċidu nitriku, aċidu adipiku, kaprolaktam, glijossal u aċidu glijossiliku

1.   LIMITAZZJONIJIET U KOMPLETEZZA

Il-linji gwida speċifiċi għal attività partikolari li jinsabu f’dan l-Anness għandhom japplikaw għall-monitoraġġ tal-emissjonijiet tal-N2O mill-produzzjoni tal-aċidu nitriku, l-aċidu adipiku, il-kaprolaktam, il-glijossal u l-aċidu glijossiliku fi stallazzjonijiet rilevanti inklużi skont l-Artikolu 24 tad-Direttiva 2003/87/KE.

Għal kull attività li minnha jkun hemm emissjonijiet tal-N2O, is-sorsi kollha li jirrilaxxaw N2O minn proċessi ta’ produzzjoni għandhom ikunu koperti, inkluż fejn l-emissjonijiet ta’ N2O minn produzzjoni jiġu inkanalati minn ġo kwalunkwe tagħmir li jnaqqashom. Dan jinkludi:

—	il-produzzjoni ta’ aċidu nitriku – emissjonijiet tal-N2O mill-ossidazzjoni katalitika tal-ammonja u/jew mill-unitajiet ta’ tnaqqis tal-NOx/N2O;

—	il-produzzjoni ta’ aċidu adipiku - emissjonijiet tal-N2O inklużi dawk mir-reazzjoni ta’ ossidazzjoni, kwalunkwe proċess dirett ta’ ċirkolazzjoni tal-arja u/jew kwalunkwe tagħmir ta’ kontroll ta’ emissjonijiet;

—	il-produzzjoni tal-glijossal u l-aċidu glijossiliku – emissjonijiet tal-N2O inklużi dawk mir-reazzjonijiet tal-proċessi, kwalunkwe proċess dirett ta’ ċirkolazzjoni tal-arja u/jew kwalunkwe tagħmir ta’ kontroll tal-emissjonijiet;

—	il-produzzjoni tal-kaprolaktam – emissjonijiet tal-N2O inklużi dawk mir-reazzjonijiet tal-proċessi, kwalunkwe proċess dirett ta’ ċirkolazzjoni tal-arja u/jew kwalunkwe tagħmir ta’ kontroll tal-emissjonijiet.

Dawn id-dispożizzjonijiet ma japplikaw għall-ebda emissjoni tal-N2O minn kombustjoni ta’ fjuwils.

Kwalunkwe emissjoni rilevanti ta’ CO2 assoċjata direttament mal-proċess ta’ produzzjoni (u li mhijiex diġà koperta mill-EU ETS) li hija diġà inkluża fil-permess tal-emissjoni tal-gassijiet serra tal-istallazzjoni għandha tiġi mmonitorjata skont dawn il-Linji gwida.

L-Anness I, it-Taqsima 16 ma tapplikax għall-monitoraġġ tal-emissjonijiet N2O.

2.   DETERMINAZZJONI TAL-EMISSJONIJIET CO2(e) u N2O

2.1.   EMISSJONIJIET TA’ N2O FIS-SENA

L-emissjonijiet tal-N2O mill-produzzjoni tal-aċidu nitriku għandhom jitkejlu permezz ta’ kejl kontinwu ta’ emissjonijiet (bl-esklużjoni ta’ sorsi de minimis – it-Taqsima 6.3).

L-emissjonijiet tal-N2O mill-produzzjoni tal-aċidu adipiku, il-kaprolaktam, il-glijossal u l-aċidu glijossiliku għandhom jiġu mmonitorjati permezz ta’ kejl kontinwu ta’ emissjonijiet għal emissjonijiet imnaqqsa u l-metodu ta’ kalkolu (ibbażat fuq metodu ta’ miżien tal-piż (it-Taqsima 2.6)) għal okkorrenzi temporanji ta’ emissjonijiet imnaqqsa.

It-total fis-sena ta’ emissjonijiet ta’ N2O mill-istallazzjoni huwa l-għadd tal-emissjonijiet fis-sena ta’ N2O mis-sorsi kollha tagħha ta’ emissjonijiet.

Għal kull sors ta’ emissjonijiet fejn jiġi applikat il-metodu ta’ kejl kontinwu ta’ emissjonijiet, l-emissjonijiet totali fis-sena huma l-għadd tal-emissjonijiet kollha fis-siegħa bl-użu ta’ din il-formula:

Fejn:

emissjonijiet ta’ N2Ofis-sena	=	emissjonijiet totali ta’ N2O fis-sena mis-sors tal-emissjonijiet f’tunellati ta’ N2O
N2O konċ konċ fis-siegħa	=	konċentrazzjonijiet ta’ N2O fis-siegħa f’mg/Nm3 fil-fluss ta’ gass fit-tubu mkejla waqt it-tħaddim
Fluss ta’ gass fit-tubu	=	il-fluss ta’ gass fit-tubu kif ikkalkulat hawn taħt f’Nm3/siegħa għal kull konċentrazzjoni f’kull siegħa

2.2.   EMISSJONIJIET TA’ N2O FIS-SIEGĦA

Il-medja fis-sena ta’ emissjonijiet ta’ N2O fis-siegħa għal kull sors fejn jiġi applikat il-metodu ta’ kejl kontinwu ta’ emissjonijiet għandha tiġi kkalkulata bil-formula li ġejja:

Fejn:

emissjonijiet ta’ N2O medja fis-siegħa	=	medja ta’ emissjonijiet ta’ N2O fis-siegħa fis-sena f’kg/siegħa mis-sors
konċentrazzjoni ta’ N2O fis-siegħa	=	konċentrazzjonijiet ta’ N2O fis-siegħa f’mg/Nm3 fil-fluss ta’ gass fit-tubu mkejla waqt it-tħaddim
Fluss ta’ gass fit-tubu	=	il-fluss ta’ gass fit-tubu kif ikkalkulat hawn taħt f’Nm3/siegħa għal kull konċentrazzjoni f’kull siegħa

L-inċertezza totali tal-medja tal-emissjonijiet fis-siegħa fis-sena għal kull sors ta’ emissjonijiet ma għandhiex taqbeż il-valuri tal-livelli ddefiniti hawn taħt. Il-metodu bbażat fuq l-ogħla livell għandu jintuża mill-operaturi kollha. F’każ biss li jintwera għas-sodisfazzjon tal-awtorità kompetenti li l-metodu bbażat fuq l-ogħla livell mhuwiex teknikament vijabbli jew se jwassal għal spejjeż għoljin wisq, jista’ jintuża l-livell aktar baxx li jmiss. Għall-perjodu ta’ rapportaġġ 2008-2012 bħala minimu għandu jiġi applikat il-Livell 2 għajr jekk dan ma jkunx teknikament vijabbli.

F’każijiet fejn l-applikazzjoni tar-rekwiżiti tal-livell 1 għal kull sors ta’ emissjonijiet mhijiex teknikament vijabbli jew twassal għal spejjeż għoljin wisq (għajr sorsi de minimis), l-operatur għandu japplika u juri konformità mal-livell xieraq għall-emissjonijiet totali fis-sena għas-sors tal-emissjonijiet imsemmi fit-Taqsima 2, l-Anness XII. Għall-perjodu ta’ rapportaġġ 2008-2012 ir-rekwiżit minimu huwa l-Livell 2, għajr jekk dan ma jkunx teknikament vijabbli. L-istallazzjonijiet rispettivi li japplikaw dan il-metodu għandhom jiġu nnotifikati lill-Kummisjoni mill-Istati Membri skont l-Artikolu 21 tad-Direttiva 2003/87/KE.

Il-Livell 1:

Għal kull sors ta’ emissjonijiet għandha tintlaħaq inċertezza totali tal-medja tal-emissjonijiet fis-siegħa fis-sena ta’ inqas minn 10 %.

Il-Livell 2:

Għal kull sors ta’ emissjonijiet għandha tintlaħaq inċertezza totali tal-medja tal-emissjonijiet fis-siegħa fis-sena ta’ inqas minn 7.5 %.

Il-Livell 3:

Għal kull sors ta’ emissjonijiet għandha tintlaħaq inċertezza totali tal-medja tal-emissjonijiet fis-siegħa fis-sena ta’ inqas minn ± 5 %.

2.3.   KONĊENTRAZZJONIJIET TA’ N2O FIS-SIEGĦA

Il-konċentrazzjonijiet tal-N2O fis-siegħa [mg/Nm3] fil-gass fit-tubu minn kull sors ta’ emissjonijiet għandhom jiġu ddeterminati b’kejl kontinwu f’punt rappreżentattiv, wara li jkunu għaddew mit-tagħmir li jnaqqashom (jekk jintuża tali tagħmir).

Tekniki ta’ kejl adegwati jinkludu l-Ispektroskopija IR, iżda jistgħu jintużaw oħrajn skont il-paragrafu 2 tat-Taqsima 6.1 tal-Anness I, basta jilħqu l-livell ta’ inċertezza meħtieġ għall-emissjonijiet tal-N2O. It-tekniki li jintużaw għandu jkollhom il-kapaċità li jkejlu l-konċentrazzjonijiet ta’ N2O ta’ kull sors ta’ emissjonijiet f’kundizzjonijiet fejn ikun intuża tagħmir ta’ tnaqqis u wkoll meta tali tagħmir ma jkunx intuża (pereżempju f’perjodi meta t-tagħmir ta’ tnaqqis ikun bil-ħsara u l-konċentrazzjonijiet jiżdiedu). Jekk l-inċertezzi jiżdiedu matul tali perjodi, dawn għandhom jitqiesu fil-valutazzjoni tal-inċertezza.

Il-kejliet kollha għandhom jiġu aġġustati abbażi ta’ gass niexef u għandhom jiġu rrappurtati b’mod konsistenti.

2.4.   ID-DETERMINAZZJONI TAL-FLUSS TA’ GASS FIT-TUBU

Il-metodi għall-monitoraġġ tal-fluss ta’ gass fit-tubu ddefiniti fl-Anness XII għandhom jintużaw għall-kejl tal-fluss ta’ gass fit-tubu għal skopijiet ta’ monitoraġġ ta’ emissjonijiet ta’ N2O.

Għall-produzzjoni tal-aċidu nitriku, għandu jiġi applikat il-metodu A għajr jekk dan ma jkunx teknikament vijabbli, f’liema każ jista’ jintuża metodu alternattiv, bħal pereżempju metodu li juża miżien tal-piż ibbażat fuq parametri sinifikanti (bħal pereżempju l-piż tal-input ta’ ammonja) jew id-determinazzjoni tal-fluss b’kejl kontinwu tal-fluss tal-emissjonijiet, basta tali metodu jkun approvat mill-Awtorità Kompetenti bħala parti mill-evalwazzjoni tal-pjan ta’ monitoraġġ u l-metodoliġija tal-monitoraġġ inkluża fih.

Għal attivitajiet oħrajn, jistgħu jintużaw metodi oħrajn għall-monitoraġġ tal-fluss ta’ gass fit-tubu deskritti fl-Anness XII, basta jkunu approvati mill-Awtorità Kompetenti bħala parti mill-evalwazzjoni tal-pjan ta’ monitoraġġ u l-metodoloġija tal-monitoraġġ inkluża fih.

Il-Metodu A – Il-produzzjoni tal-Aċidu Nitriku

Il-fluss ta’ gass fit-tubu għandu jiġi kkalkulat skont il-formula li ġejja:

Fejn:

Varja	=	fluss totali ta’ arja ta’ input f’Nm3/siegħa f’kundizzjonijiet standard;
O2 arja	=	il-frazzjoni tal-volum ta’ O2 fl-arja niexfa [= 0.2095];
O2 gass fit-tubu	=	il-frazzjoni tal-volum ta’ O2 fil-gass fit-tubu.

Il-Varja għandu jiġi kkalkulat bħala l-għadd tal-flussi kollha ta’ arja li jidħlu fl-unità ta’ produzzjoni tal-aċidu nitriku.

L-istallazzjoni għandha tapplika l-formula li ġejja, sakemm fil-pjan ta’ monitoraġġ tagħha ma jkunx speċifikat mod ieħor:

Varja = Vprimarju + Vsekondarju + Vsiġill

Fejn:

Vprimarju	=	Fluss primarju ta’ arja ta’ input f’Nm3/siegħa f’kundizzjonijiet standard;
Vsekondarju	=	Fluss sekondarju ta’ arja ta’ input f’Nm3/siegħa f’kundizzjonijiet standard;
Vsiġill	=	Fluss ta’ arja ta’ input fis-siġill f’Nm3/siegħa f’kundizzjonijiet standard;

Il-Vprimarju jiġi ddeterminat b’kejl kontinwu ta’ fluss qabel ma jsir it-taħlit mal-ammonja. Il-Vsekondarju jiġi ddeterminat b’kejl kontinwu ta’ fluss pereżempju qabel l-unità tal-irkupru tas-sħana. Il-Vsiġill huwa il-fluss ta’ arja mnaddaf fil-proċess ta’ produzzjoni tal-aċidu nitriku (jekk ikun rilevanti).

Għal kurrenti ta’ arja ta’ input li flimkien jammontaw għal anqas minn 2,5 % tal-fluss totali tal-arja, l-awtorità kompetenti tista’ taċċetta metodi ta’ kalkolu għad-determinazzjoni ta’ din ir-rata ta’ fluss tal-arja proposta mill-operatur ibbażati fuq l-aqwa prattiki tal-industrija.

L-operatur għandu jipprovdi evidenza permezz ta’ kejliet f’kundizzjonijiet normali ta’ tħaddim li l-fluss ta’ gass fit-tubu mkejjel huwa omoġenju biżżejjed biex ikun jista’ jintuża l-metodu ta’ kejl propost. Jekk permezz ta’ dawn il-kejliet jiġi kkonfermat fluss li mhuwiex omoġenju, dan għandu jitqies waqt id-determinazzjoni ta’ metodi xierqa ta’ monitoraġġ u meta tiġi kkalkulata l-inċertezza fl-emissjonijiet tal-N2O.

Il-kejliet kollha għandhom jiġu aġġustati abbażi ta’ gass niexef u għandhom jiġu rrappurtati b’mod konsistenti.

2.5.   L-OSSIĠNU (O2)

Il-konċentrazzjonijiet ta’ ossiġnu fil-gass fit-tubu għandhom jitkejlu jekk ikunu meħtieġa biex jiġi kkalkulat il-fluss tal-gass fit-tubu skont it-Taqsima 2.4. Għandhom japplikaw ir-rekwiżiti għall-kejliet tal-konċentrazzjonijiet fit-Taqsima 6 tal-Anness I. Tekniki ta’ kejl adegwati jinkludu: pressjoni paramanjetika li talterna, miżien manjetiku tal-liwi u sonda tad-diossidu taż-żirkonju. L-inċertezza tal-kejliet tal-konċentrazzjonijiet tal-O2 għandhom jitqiesu fid-determinazzjoni tal-inċertezza tal-emissjonijiet tal-N2O.

Il-kejliet kollha għandhom jiġu aġġustati abbażi ta’ gass niexef u għandhom jiġu rrappurtati b’mod konsistenti.

2.6.   KALKOLU TAL-EMISSJONIJIET TAL-N2O

Għal emissjonijiet mhux imnaqqsa, speċifiċi u perjodiċi, ta’ N2O mill-produzzjoni tal-aċidu adipiku, il-kaprolaktam, il-glijossal u l-aċidu glijossiliku (bħal pereżempju emissjonijiet mhux imnaqqsa miċ-ċirkolazzjoni għal raġunijiet ta’ sikurezza u/jew meta l-impjant ta’ tnaqqis ikun bil-ħsara) fejn il-monitoraġġ kontinwu tal-emissjonijiet tal-N2O mhuwiex teknikament vijabbli, il-kalkolu tal-emissjonijiet tal-N2O jista’ jiġi applikat permezz ta’ miżien tal-piż. Il-metodu ta’ kalkolu għandu jiġi bbażat fuq ir-rata massima ta’ emissjonijiet potenzjali ta’ N2O mir-reazzjoni kimika li sseħħ fil-perjodu u l-waqt tal-emissjonijiet. Il-metodu ta’ kalkolu speċifiku għandu jiġi approvat mill-awtorità kompetenti bħala parti mill-evalwazzjoni tal-pjan ta’ monitoraġġ u l-metodoloġija ta’ monitoraġġ inkluża fih.

L-inċertezza fi kwalunkwe emissjoni kkalkulata għal sors ta’ emissjonijiet speċifiku għandha titqies fid-determinazzjoni tal-medja tal-inċertezza fis-siegħa fis-sena għas-sors tal-emissjonijiet. Għall-emissjonijiet ikkalkulati jew fejn tintuża kombinazzjoni ta’ kalkolu u kejl kontinwu biex jiġu ddeterminati l-emissjonijiet tal-N2O għandhom jiġu applikati l-istess livelli li jintużaw għall-emissjonijiet imkejla totalment b’kejl kontinwu ta’ emissjonijiet.

3.   KALKOLU TA’ EKWIVALENTI TA’ CO2 (CO2(e)) FIS-SENA

It-total tal-emissjonijiet tal-N2O fis-sena mis-sorsi kollha tal-emissjonijiet (imkejla f’tunnellati sa tliet ċifri wara l-punt deċimali) għandhom jitbiddlu f’emissjonijiet ta’ CO2(e) fis-sena (imqarrba lejn l-eqreb tunnellata) permezz tal-formula li ġejja:

Għall-emissjonijiet matul il-perjodu 2008-12, għandu jintuża l-Potenzjal għat-Tisħin Globali GWPN2O = 310 t CO2(e)/t N2O, li huwa l-valur pprovdut fit-Tieni Rapport ta’ Valutazzjoni tal-Panel Intergovernattiv dwar it-Tibdil fil-Klima (il-valur GWP tal-IPCC, 1995).

L-ammont totali ta’ CO2(e) iġġenerat mis-sorsi kollha tal-emissjonijiet u kwalunkwe emissjoni diretta ta’ CO2 minn sorsi oħrajn ta’ emissjonijiet (jekk ikunu inklużi fil-permess tal-gassijiet serra) għandu jiżdied mat-total tal-emissjonijiet ta’ CO2 fis-sena ġġenerat mill-istallazzjoni u għandu jintuża għar-rappurtaġġ u ċ-ċediment tal-kwoti.

4.   DETERMINAZZJONI TAR-RATI TA’ ATTIVITÀ TAL-PRODUZZJONI

Ir-rati tal-produzzjoni għandhom jiġu kkalkulati bl-użu ta’ rapporti tal-produzzjoni u s-sigħat ta’ tħaddim kuljum.

5.   PJAN TA’ MONITORAĠĠ

Minbarra r-rekwiżiti ddefiniti fl-Anness I, it-Taqsima 4.3 (a), (b), (c), (d), (j), (k), (m) u (n), il-pjanijiet ta’ monitoraġġ għal stallazzjonijiet koperti b’dan l-Anness għandhom jinkludu t-tagħrif li ġej:

(a)	il-punti kollha rilevanti ta’ emissjonijiet matul operazzjoni tipika, u matul fażijiet limitati u ta’ tranżizzjoni (eż. perjodi ta’ ħsara jew fażijiet ta’ kummissjunar) murija fuq dijagramma ta’ proċess;

(b)	il-metodu u l-parametri li jintużaw biex jiġu ddeterminati l-kwantità ta’ materjali (eż. l-ammonja) użati fil-proċess tal-produzzjoni u l-kwantità massima ta’ materjal li jintuża skont il-kapaċità sħiħa tal-istallazzjoni;

(ċ)	il-metodu u l-parametri użati biex tiġi ddeterminata l-kwantità ta’ prodott immanifatturat bħala piż fis-siegħa, espress bħala aċidu nitriku (100 %), aċidu adipiku (100 %), glijossal u aċidu glijossiliku u kaprolaktam fis-siegħa rispettivament;

(d)

il-metodu u l-parametri użati biex jiġu ddeterminati l-konċentrazzjoni ta’ N2O fil-gass fit-tubu minn kull sors ta’ emissjoni, il-firxa ta’ operazzjoni tagħha, l-inċertezza tagħha, u dettalji dwar kwalunkwe metodu alternattiv li għandu jiġi applikat jekk il-konċentrazzjonijiet ma jaqgħux fil-firxa tal-operazzjoni u s-sitwazzjonijiet meta dan jista’ jseħħ;

(e)

il-metodu użat biex jiġu ddeterminati r-rata totali tal-fluss ta’ gass fit-tubu (espressa f’Nm3 fis-siegħa) minn kull sors ta’ emissjonijiet, il-firxa ta’ operazzjoni tagħha u l-inċertezza. Jekk ikunu dderivati permezz ta’ kalkolu, għandhom jingħataw id-dettalji għal kull fluss ta’ gass fit-tubu mmonitorjat;

(f)	il-metodu ta’ kalkolu użat biex jiġu ddeterminati l-emissjonijiet ta’ N2O minn sorsi perjodiċi, mhux imnaqqsa ta’ produzzjoni ta’ aċidu adipiku, kaprolaktam, glijossal u aċidu glijossiliku;

(g)	il-mod kif u sa liema livell topera l-istallazzjoni b’piżijiet varjabbli, u l-mod kif titwettaq il-ġestjoni operazzjonali;

(h)	il-metodu u kwalunkwe formula ta’ kalkolu li jintużaw biex jiġu ddeterminati l-emissjonijiet ta’ N2O fis-sena minn kull sors ta’ emissjonijiet;

(i)	il-kundizzjonijiet tal-proċess li jiddevjaw minn operazzjonijiet normali, indikazzjoni tal-frekwenza potenzjali u d-dewma ta’ tali kundizzjonijiet, kif ukoll indikazzjoni tal-volum ta’ emissjonijiet ta’ N2O waqt il-kundizzjonijiet li jiddevjaw mill-proċess (bħal pereżempju ħsara fit-tagħmir);

(j)	il-valutazzjoni użata biex turi l-konformità mar-rekwiżiti ta’ inċertezza tal-livell imsemmija fit-Taqsima 2 ta’ dan l-Anness u l-livell milħuq;

(k)	il-valur espress f’kg/N2O fis-siegħa li jkun ġie ddeterminat skont l-Anness I it-Taqsimiet 6.3 a) u b) biex jintuża f’każ li t-tagħmir ta’ kejl ikun bil-ħsara jew ma jaħdimx kif suppost,

(l)	Dettalji ta’ kwalunkwe devjazzjonijiet mir-rekwiżiti tal-istandards ġenerali bħal pereżempju l-EN14181 u l-ISO 14956:2002;

Minbarra r-rekwiżiti fl-Anness I, it-Taqsima 4.3, bidla sostanzjali fil-metodoloġija ta’ monitoraġġ bħala parti mill-pjan ta’ monitoraġġ għandha tkun soġġetta għall-approvazzjoni tal-awtorità kompetenti jekk tikkonċerna:

—	bidliet sinifikanti fil-mod kif tiffunzjona l-istallazzjoni li jaffettwaw il-livell totali ta’ emissjonijiet ta’ N2O, il-konċentrazzjoni ta’ N2O, ir-rata tal-fluss jew parametri oħrajn tal-gass fit-tubu, speċjalment jekk jiġu installati jew ssostitwiti miżuri ta’ tnaqqis;

—	idliet fil-metodi użati biex jiġu ddeterminati l-emissjonijiet ta’ N2O, inklużi bidliet fil-kejl kontinwu tal-konċentrazzjonijiet, il-konċentrazzjonijiet tal-ossiġnu u l-fluss ta’ gass fit-tubu, jew il-metodu ta’ kalkolu li jaffettwaw b’mod sinifikanti l-inċertezza totali tal-emissjonijiet;

—	bidliet fil-parametri użati biex jiġu ddeterminati l-emissjonijiet u/jew il-produzzjoni tal-aċidu nitriku, l-aċidu adipiku, il-kaprolaktam, il-glijossal u l-aċidu glijossiliku fis-sena;

—	bidliet fil-valutazzjoni tal-inċertezza.

6.   ĠENERALI

6.1.   RATA TA’ TEĦID TA’ KAMPJUNI

Medji fis-siegħa validi għandhom jiġu kkalkulati skont it-Taqsima 6.3 (a) tal-Anness I:

—	għall-konċentrazzjoni tal-N2O fil-gass fit-tubu;

—	għall-fluss totali ta’ gass fit-tubu fejn dan jitkejjel direttament u fejn huwa meħtieġ;

—	għall-flussi tal-gassijiet u l-konċentrazzjonijiet tal-ossiġnu kollha meħtieġa biex jiġi ddeterminat b’mod indirett il-fluss totali tal-gass fit-tubu.

6.2.   DEJTA NIEQSA

Dejta nieqsa għandha titqies skont l-Anness I it-Taqsima 6.3 (a) u (b). Jekk ikun hemm dejta nieqsa minħabba ħsara fit-tagħmir tat-tnaqqis, wieħed għandu jassumi li l-emissjonijiet matul dik is-siegħa partikolari kollha ma kinux imnaqqsa u għandhom jiġu kkalkulati valuri ta’ sostituzzjoni skont dan.

L-operatur għandu jieħu kull pass prattiku meħtieġ biex jiżgura li t-tagħmir ta’ monitoraġġ kontinwu tal-emissjonijiet ma jdumx bil-ħsara għal aktar minn ġimgħa fi kwalunkwe sena kalendarja. Jekk dan iseħħ, l-operatur għandu jgħarraf lill-awtorità kompetenti minnufih.

6.3.   SORSI DE MINIMIS TA’ N2O

“Flussi minn sorsi de minimis” għal sorsi ta’ emissjonijiet ta’ N2O tfisser fluss wieħed jew aktar minuri, mhux imnaqqsa minn sors, magħżul/a mill-operatur u li flimkien jirrilaxxaw 1 000 tunnellata ta’ CO2(e) jew anqas fis-sena, jew li jirrilaxxaw anqas minn 20 000 tunnellata ta’ CO2(e) fis-sena u jikkontribwixxu għal anqas minn 2 % tal-emissjonijiet totali ta’ CO2(e) ta’ dik l-istallazzjoni.

Soġġett għal approvazzjoni mill-awtorità kompetenti, l-operatur jista’ japplika metodi għall-monitoraġġ u r-rappurtaġġ billi juża l-kalkolu tiegħu mingħajr l-użu ta’ livelli għal kurrenti minn sorsi de minimis ta’ N2O.

6.4.   KALKOLU KORROBORATTIV TAL-EMISSJONIJIET

L-Anness I it-Taqsima 6.3(c) għandu japplika għal emissjonijiet ta’ N2O korroborattivi rrappurtati (minn kejl u kalkolu ta’ emissjonijiet kontinwi) u mwettqa bl-użu ta’ dejta tal-produzzjoni, il-Linji gwida tal-IPCC, 2006 u l-metodu speċifikat fl-Anness I, it-Taqsima 10.3.3. “Metodu orizzontali”.

7.   IL-VALUTAZZJONIJIET TAL-INĊERTEZZA

Il-valutazzjonijiet tal-inċertezza meħtieġa biex juru konformità mal-livelli rilevanti fit-Taqsima 2 għandhom jiġu ddeterminati permezz ta’ kalkolu ta’ propagazzjoni tal-iżbalji li jqis l-inċertezza tal-elementi kollha tal-kalkolu tal-emissjonijiet. Għall-kejl kontinwu s-sorsi ta’ inċertezza li ġejjin għandhom jiġu vvalutati skont l-EN 14181 u l-ISO 14956:2002:

—	l-inċertezza speċifikata ta’ tagħmir ta’ kejl kontinwu inklużi l-kampjuni;

—	l-inċertezzi assoċjati mal-kalibrazzjoni, u

—	inċertezza addizzjonali relatata ma’ kif it-tagħmir ta’ monitoraġġ qed jintuża fil-prattika.

Għall-kalkolu tal-inċertezza totali li għandha tintuża fit-Taqsima 2.2, għandhom jintużaw il-konċentrazzjonijiet fis-siegħa ddeterminati skont it-Taqsima 2.3. Għall-iskop tal-kalkolu tal-inċertezza biss, konċentrazzjonijiet ta’ N2O taħt 20 mg/Nm3 għandhom jiġu ssostitwiti b’valur awtomatiku ta’ 20 mg/Nm3.

L-operatur, permezz tal-proċess ta’ assigurazzjoni tal-kwalità u ta’ kontroll, għandu jamministra u jnaqqas il-bqija tal-inċertezzi tad-dejta tal-emissjonijiet fir-rapport tiegħu tal-emissjonijiet. Matul il-proċess ta’ verifika, il-verifikatur għandu jikkontrolla l-applikazzjoni korretta tal-metodoloġija ta’ monitoraġġ approvata, u għandu jivvaluta l-ġestjoni u t-tnaqqis tal-bqija tal-inċertezzi permezz tal-proċeduri ta’ assigurazzjoni ta’ kwalità u ta’ kontroll tal-operatur.

8.   KONTROLL U VERIFIKA

8.1.   KONTROLL

Minbarra r-rekwiżiti fl-Anness I it-Taqsimiet 10.1, 10.2 u 10.3, għandhom japplikaw il-proċeduri ta’ assigurazzjoni ta’ kwalità li ġejjin:

—	l-assigurazzjoni ta’ kwalità tal-kejl kontinwu tal-konċentrazzjoni tal-N2O u l-ossiġnu għandha titwettaq skont l-EN 14181;

—	it-tagħmir ta’ kejl installat għandu jiġi kkalibrat permezz ta’ kejliet paralleli darba kull tliet xhur;

—

fejn il-valuri ta’ limitu tal-emissjonijiet (ELVs) jintużaw tipikament bħala l-bażi tal-kalibrazzjoni tal-monitoraġġi kontinwi ta’ emissjonijiet, u fejn ma jeżisti l-ebda ELV għall-N2O jew l-O2, għandha tintuża il-medja tal-konċentrazzjoni fis-siegħa fis-sena biex tissostitwixxi l-ELVs ta’ dan it-tip;

—	il-QAL 2 għandu jsir ma’ gassijiet ta’ referenza adegwati minbarra mal-gass li jkun qed jintuża bħala kampjun, biex tkun żgurata valutazzjoni ta’ firxa ta’ kalibrazzjoni wiesgħa biżżejjed;

—	it-tagħmir ta’ kejl li jkejjel il-volum tal-fluss ta’ gass fit-tubu għandu jiġi kkalibrat kull sena jew meta l-impjant issirlu l-manutenzjoni, skont liema minnhom iseħħ l-ewwel. Il-kwalità tal-assigurazzjoni tal-volum tal-fluss ta’ gass fit-tubu ma hemmx bżonn li titwettaq skont l-EN 14181;

—	jekk verifiki interni jsibu nuqqas ta’ konformità mal-EN 14181 jew li għandha ssir kalibrazzjoni mill-ġdid, dan għandu jiġi rrappurtat lill-awtorità kompetenti mingħajr l-ebda dewmien.

8.2.   VERIFIKA

Minbarra r-rekwiżiti ta’ verifika ddefiniti fit-Taqsima 10.4, għandhom jiġu ċċekkjati dawn li ġejjin:

—	il-korrettezza fl-applikazzjoni tar-rekwiżiti msemmija fit-Taqsimiet 7 u 8.1 ta’ dan l-Anness;

—	metodi ta’ kalkoli u riżultati fejn dejta nieqsa ġiet issostitwita b’valuri kkalkulati.

—	kredibbiltà tal-valuri ta’ sostituzzjoni kkalkulati u l-valuri mkejla;

—	kwalunkwe valutazzjoni komparattiva li tikkorrobora r-riżultati tal-emissjonijiet u l-metodi bbażati fuq il-kalkoli u r-rapportaġġ ta’ dejta dwar attività, fatturi ta’ emissjonijiet u affarijiet simili.

9.   RAPPURTAĠĠ

L-emissjonijiet totali ta’ N2O fis-sena għandhom jiġu rrappurtati f’tunnellati sa tliet ċifri wara l-punt deċimali u bħala CO2(e) imqarrba lejn l-eqreb tunnellata.

Minbarra r-rekwiżiti ta’ rapportaġġ iddefiniti fit-Taqsima 8 tal-Anness I l-operaturi ta’ stallazzjonijiet koperti b’dan l-Anness għandhom jirrapurtaw it-tagħrif li ġej għall-istallazzjonijiet tagħhom:

(a)	il-ħin ta’ tħaddim tal-unità tal-ipproċessar u l-ħin totali ta’ tħaddim tal-impjant fis-sena;

(b)	id-dejta tal-produzzjoni għal kull unità u l-metodu użat biex tiġi ddeterminata l-kwantità ta’ prodott;

(ċ)	il-kriterji ta’ kejl użati fil-kwantifikazzjoni ta’ kull parametru;

(d)	l-inċertezza għal kull parametru mkejjel u kkalkulat (inklużi l-konċentrazzjonijiet tal-gass, il-fluss ta’ gass fit-tubu, l-emissjonijiet ikkalkulati) u l-inċertezza totali tal-piż fis-siegħa li tirriżulta u/jew iċ-ċifra tal-emissjonijiet fis-sena.

(e)	id-dettalji ta’ kwalunkwe ħsara fit-tagħmir li affettwat il-kejl tal-emissjonijiet u l-fluss tal-emissjonijiet/ta’ gass fit-tubu, inkluż l-għadd ta’ drabi, is-sigħat affettwati, id-dewma u d-dati ta’ meta kien hemm il-ħsarat.

(f)	id-dettalji dwar meta kien hemm il-ħtieġa li tiġi applikata t-Taqsima 6.2 ta’ dan l-Anness, inklużi l-għadd ta’ drabi, is-sigħat affettwati, il-kalkoli u l-valuri ta’ sostituzzjoni użati;

(g)	id-dejta ta’ input li tintuża fi kwalunkwe valutazzjoni korroborattiva skont l-Anness I, it-Taqsimiet 6.3(c) u 4.3 biex jiġu ċċekkjati l-emissjonijiet ta ’ N2O fis-sena.”